တၢ်ဟ့ၣ်ကူၣ်လၢ တၢ်မၤလိအဂီၢ်
ဆွဲတၢ်ဂီၤ ဒ်သိး နကနီၣ်ဘၣ်က့ၤ တၢ်ဂ့ၢ်အဂီၢ်
ပဝဲကိးဂၤဒဲးန့ၣ် ပသးပ့ၤနီၣ်တၢ်ညီမးအဃိ တၢ်ဂ့ၢ်လၢ ပမၤလိဘၣ်တဖၣ်န့ၣ် ပတနီၣ်ဘၣ်က့ၤ ခဲလၢာ်ဘၣ်. သနာ်က့ တၢ်အဒိလၢ ယ့ၣ်ၡူး တဲဝဲတဖၣ်န့ၣ် အါတက့ၢ် ပနီၣ်ဘၣ်အီၤညီမး. တၢ်ဂ့ၢ်လၢ ယ့ၣ်ၡူး တဲဝဲတဖၣ်န့ၣ် ပထံၣ်တမှံအီၤသ့ ဒီးပတိၢ်နီၣ်ဘၣ်အီၤညီ. အဃိ နၤစ့ၢ်ကီး နမ့ၢ်ထံၣ်တမှံကွၢ် တၢ်ဂ့ၢ်လၢ နမၤလိဘၣ်န့ၣ် ကမၤစၢၤနၤဒ်သိး နကနီၣ်ဘၣ်က့ၤ တၢ်ဂ့ၢ်လၢ နမၤလိဘၣ်. နထံၣ်တမှံကွၢ် တၢ်ဂ့ၢ်ကသ့အဂီၢ် ဖဲနမၤလိတၢ်အခါ ဆွဲတၢ်ဂီၤ ဘၣ်ဃးဒီး တၢ်ဂ့ၢ်လၢ နမၤလိဘၣ်.
ပှၤလၢအဆွဲတၢ်ဂီၤ ဘၣ်ဃးဒီး တၢ်ဂ့ၢ်အသီ လၢအမၤလိဘၣ်ဝဲန့ၣ် ညီနုၢ် အနီၣ်ဘၣ်က့ၤဝဲ. အဆွဲတၢ်ဂီၤအဃိ မၤစၢၤအီၤလၢ အကနၢ်ပၢၢ် တၢ်ကတိၤတဖၣ် တကးဒံးဘၣ် အနၢ်ပၢၢ်စ့ၢ်ကီး တၢ်ဂ့ၢ်လၢ အရ့ဒိၣ်တဖၣ် အခီပညီ. တၢ်ဂီၤလၢအဆွဲဝဲန့ၣ် တလိၣ်လၢ အကဘၣ်ဂ့ၤ ဒ်သိးဒီး ပှၤဆွဲတၢ်ဂီၤ လၢအဖၠဲးဘၣ်, အဆွဲဝဲ ယိယိဖိသ့လီၤ. လီၤဆီဒၣ်တၢ် ပှၤသးပှၢ်တဖၣ် မ့ၢ်ဆွဲတၢ်ဂီၤ ဘၣ်ဃးဒီး တၢ်ဂ့ၢ်အသီလၢ အမၤလိဘၣ်ဝဲန့ၣ် ကမၤစၢၤအီၤဒ်သိး အကနီၣ်ဘၣ်က့ၤဝဲ.
လၢခံတဘျီ ဖဲနမၤ နီၢ်ကစၢ်တၢ်မၤလိ လံာ်စီဆှံအခါ ဆွဲကွၢ်တၢ်ဂီၤ ဘၣ်ဃးဒီး တၢ်ဂ့ၢ်လၢ နမၤလိဘၣ်တဖၣ်. နမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် နကနီၣ်ဘၣ်က့ၤ တၢ်ဂ့ၢ်အါမးအဃိ နကသးခုဒိၣ်မး.
