၁. တဘျီတခီၣ်န့ၣ် ဘၣ်မနုၤအဃိ ပဆၢတဲာ်တၢ် တညီဘၣ်လဲၣ်.

 ကိးနံၤဒဲးန့ၣ် ပကဘၣ် ဆၢတဲာ်တၢ်. တၢ်ဆၢတဲာ်တနီၤ ဒ်သိးဒီး ပကအီၣ်မနုၤလဲၣ် ဒီးပကမံ အခါဖဲလဲၣ်န့ၣ် ပဆၢတဲာ်အီၤညီ. ဘၣ်ဆၣ် တၢ်ဆၢတဲာ် အဂၤတနီၤန့ၣ် ပဆၢတဲာ်ဘၣ်အီၤ တညီဘၣ်. ဘၣ်မနုၤအဃိလဲၣ်. ဘၣ်သ့ၣ်သ့ၣ် ပတၢ်ဆၢတဲာ်တနီၤန့ၣ် အမၤဘၣ်ဒိ ပတၢ်အိၣ်ဆူၣ်အိၣ်ချ့, ပတၢ်သးခု ဒီးပှၤလၢပအဲၣ် မ့တမ့ၢ် အမၤဟးဂီၤ ပတၢ်ရ့လိာ်သးဒီး ယဟိဝၤယွၤ. အဃိ ဖဲပဆၢတဲာ်တၢ်အခါ ပအဲၣ်ဒိးလၢ အကကဲဘျုး လၢပနီၢ်ကစၢ် ဒီးပဟံၣ်ဖိဃီဖိအဂီၢ်. ဒီးတၢ်လၢ အရ့ဒိၣ်ကတၢၢ်န့ၣ် ပကဘၣ် ဆၢတဲာ်တၢ်လၢ အဘၣ်ယဟိဝၤယွၤအသး.—ရိ ၁၂:၁, ၂.

၂. ဒ်သိး ပဆၢတဲာ်တၢ် ကဘၣ်အဂီၢ် တၢ်ဂ့ၢ်သၢထံၣ်လၢ ကမၤစၢၤပှၤန့ၣ် မ့ၢ်မနုၤလဲၣ်.

^၂ ဒ်သိး ပဆၢတဲာ်တၢ် ကဘၣ်အဂီၢ် ပကဘၣ် (၁) ဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲး, (၂) ဆိကမိၣ်ထံ ယဟိဝၤယွၤအတၢ်ထံၣ်, (၃) ဆိကမိၣ်ထံ တၢ်လၢပကြၢးဃုထၢအီၤ လီၤတံၢ်လီၤဆဲး. လၢတၢ်မၤလိအံၤ ပကတဲသကိး တၢ်ဂ့ၢ်သၢထံၣ်အံၤ. ဒီးပကမၤလိဘၣ် စ့ၢ်ကီးလၢ ဒ်သိး ပဆိကမိၣ်ထံတၢ် ဒီးပဲာ်ထံနီၤဖးတၢ် ကသ့အဂီၢ် ပကဘၣ်မၤဒ်လဲၣ်.—ကတိၤ ၂:၁၁.

ဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲး

၃. တချုးလၢ ပဆၢတဲာ်တၢ်အခါ ဘၣ်မနုၤအဃိ ပကဘၣ် ဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးလဲၣ်. တဲဖျါထီၣ် တၢ်အဒိ.

^၃ ပဆၢတဲာ်တၢ်ကဘၣ်အဂီၢ် အဆိကတၢၢ်န့ၣ် ပကဘၣ် ဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲး. ဘၣ်မနုၤအဃိ အရ့ဒိၣ်လဲၣ်. အဒိ ဆိကမိၣ်ကွၢ် ပှၤဆါတဂၤလၢ အလဲၤကူစါယါဘျါ အသးလၢ ကသံၣ်သရၣ်အအိၣ်. ကသံၣ်သရၣ် မ့ၢ်တသံကွၢ်အီၤ ဒီးတမၤကွၢ် အတၢ်ဆါ နီတမံၤဘၣ်န့ၣ် မ့ၢ်အကဆၢတဲာ်လီၤသးလၢ အကကူစါယါဘျါ ပှၤဆါဒ်အံၤဒ်နုၤဧါ. လ့ၤတက့ၤ အတမၤဝဲဒ်န့ၣ်ဘၣ်. ဒ်န့ၣ်အသိး တချုးလၢ ပဆၢတဲာ်တၢ်အခါ ပမ့ၢ်ဃုသ့ၣ်ညါဆိ တၢ်ဂ့ၢ်တၢ်ကျိၤ လီၤတံၢ်လီၤဆဲးမး ပဆၢတဲာ်တၢ်ကဘၣ်. ပကဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးအဂီၢ် ပကဘၣ်မၤဒ်လဲၣ်.

၄. ဒ် ကတိၤဒိ ၁၈:၁၃ ပာ်ဖျါထီၣ်ဝဲအသိး ဒ်သိး ပကဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးအဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

 ^၄ ပကဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးအဂီၢ် ပကဘၣ်သံကွၢ်တၢ်. အဒိ ဆိကမိၣ်ကွၢ်လၢ ပှၤကွဲမုာ်နၤလၢ နကလဲၤရ့လိာ်သးဒီးအီၣ်သကိးတၢ် ဒီးပှၤဂၤ. မ့ၢ်နကြၢးလဲၤဧါ. နမ့ၢ်တသ့ၣ်ညါ ပှၤလၢအရဲၣ်ကျဲၤတၢ် ဒီးအတၢ်ရဲၣ်တၢ်ကျဲၤ ပၣ်ဃုာ်ဒီးမနုၤလဲၣ်ဘၣ်န့ၣ် နကဘၣ်သံကွၢ် ပှၤလၢအကွဲမုာ်နၤ ဒ်အံၤ– “တၢ်ရဲၣ်တၢ်ကျဲၤအံၤ ပှၤကမၤဝဲလၢ တၢ်လီၢ်ဖဲလဲၣ် ဒီးလၢဆၢကတီၢ်ဖဲလဲၣ်. ပှၤကဟဲပှဲၤဂၤလဲၣ် ဒီးမတဂၤကဟဲလဲၣ်. မတဂၤ ကတီခိၣ်ရိၤမဲတၢ်လဲၣ်. ပှၤလၢအဟဲတဖၣ်န့ၣ် ကမၤမနုၤလဲၣ်. တၢ်ရဲၣ်တၢ်ကျဲၤအံၤ အပၣ်ဃုာ်ဒီးသံးစ့ၢ်ကီးဧါ.” နမ့ၢ်ဃုသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢန့ၣ် ကမၤစၢၤနၤလၢ နကဆၢတဲာ် တၢ်လၢအဘၣ်.—ဖး ကတိၤဒိ ၁၈:၁၃.

၅. နဃုသ့ၣ်ညါ တၢ်ဂ့ၢ်တၢ်ကျိၤဝံၤအလီၢ်ခံ နကဘၣ် မၤမနုၤလဲၣ်.

^၅ နဃုသ့ၣ်ညါ တၢ်ဂ့ၢ်တၢ်ကျိၤဝံၤအလီၢ်ခံ ဆိကမိၣ်ထံ ဘၣ်ဃးဒီး တၢ်လၢ ကကဲထီၣ်အသး လီၤတံၢ်လီၤဆဲး. အဒိ နမ့ၢ်သ့ၣ်ညါလၢ ပှၤတနီၤလၢ အကဟဲလၢ တၢ်ရဲၣ်တၢ်ကျဲၤအံၤ တမၤထွဲ ယဟိဝၤယွၤ အတၢ်ဟံးစုနဲၣ်ကျဲဘၣ် မ့ၢ်တမ့ၢ် ပှၤကွၢ်ထွဲတၢ်လၢ ပှၤတဘၣ်အီသံးအါတလၢဘၣ် မ့ၢ်တအိၣ်ဘၣ်န့ၣ် တၢ်ကကဲထီၣ်သးဒ်လဲၣ်. နဆိကမိၣ် တၢ်ရဲၣ်တၢ်ကျဲၤအံၤ ကကဲထီၣ် မူးပွဲလၢ အလီၤရၢၢ်လီၤစၢၢ်ဧါ. (၁ ပ့း ၄:၃) ဒီးတၢ်ရဲၣ်တၢ်ကျဲၤ အဆၢကတီၢ် မ့ၢ်ဘၣ်လိာ်အသးဒီး နဘၣ်လဲၤထီၣ် တၢ်အိၣ်ဖှိၣ် မ့တမ့ၢ် လဲၤစံၣ်တဲၤတဲလီၤတၢ် အဆၢကတီၢ်န့ၣ် နကဘၣ်မၤဒ်လဲၣ်. နမ့ၢ်ဆိကမိၣ်ထံ တၢ်အိၣ်သးတဖၣ်အံၤ လီၤတံၢ်လီၤဆဲးန့ၣ် နဆၢတဲာ် တၢ်လၢအဘၣ် ကညီဝဲ. သနာ်က့ တၢ်လၢနကဘၣ်မၤန့ၣ် အိၣ်ဒံး. နဃုသ့ၣ်ညါ တၢ်အိၣ်သးတဖၣ်အံၤ လံ ဘၣ်ဆၣ် နကဘၣ်သံကွၢ်လီၤ နသးလၢ ‘ဘၣ်ဃးဒီး တၢ်အိၣ်သးတဖၣ်အံၤန့ၣ် ယဟိဝၤယွၤ ထံၣ်ဝဲဒ်လဲၣ်.’—ကတိၤ ၂:၆.

ဆိကမိၣ်ထံ ယဟိဝၤယွၤ အတၢ်ထံၣ်

၆. ဒ် ယၤကိာ် ၁:၅ ပာ်ဖျါထီၣ်ဝဲအသိး ဘၣ်မနုၤအဃိ ပကဘၣ်ဃ့ ယဟိဝၤယွၤ အတၢ်မၤစၢၤလဲၣ်.

^၆ ဃ့ယဟိဝၤယွၤလၢ ကမၤစၢၤနၤဒ်သိး နကအိၣ်ဒီး တၢ်ထံၣ်ဒ်သိးဒီးအီၤ. လံာ်စီဆှံ တဲဝဲလၢ ယဟိဝၤယွၤန့ၣ် အ “သးအိၣ်ဟ့ၣ်ဝဲ ပှၤခဲလၢာ်လၢ တၢ်အါအါဂီၢ်ဂီၢ် ဒီးအတဒူပှၤဘၣ်.” (ဖး ယၤကိာ် ၁:၅.) အဃိ ပမ့ၢ်ဃ့တၢ်ကူၣ်သ့လၢ ယဟိဝၤယွၤ အအိၣ်န့ၣ် အကဟ့ၣ်လီၤပှၤ သပှၢ်တၢၢ်. ဒီးတၢ်ကူၣ်သ့အံၤ ကမၤစၢၤပှၤဒ်သိး ပကဆၢတဲာ်တၢ်လၢ အဘၣ်ယဟိဝၤယွၤအသး.

၇. နဃုသ့ၣ်ညါ ယဟိဝၤယွၤ အတၢ်ထံၣ် ကသ့ဒ်လဲၣ်. တဲဖျါထီၣ် တၢ်အဒိ.

^၇ ဖဲနဃ့ ယဟိဝၤယွၤ အတၢ်ဟံးစုနဲၣ်ကျဲအခါ အစံးဆၢက့ၤနၤ ဒ်လဲၣ်န့ၣ် ပာ်သူၣ်ပာ်သး လီၤတံၢ်လီၤဆဲး. အဒိ ဖဲနလဲၤလၢ တၢ်လီၢ်တတီၤတီၤ ဒီးနဟးဖျိးကျဲအခါ ဘၣ်သ့ၣ်သ့ၣ် နကမၢ ပှၤအိၣ်ဖဲန့ၣ်တဂၤ ဒုးနဲၣ်နၤကျဲ. ဘၣ်ဆၣ် တချုးလၢ အဒုးနဲၣ်နၤ ကျဲဒံးဘၣ်န့ၣ် နကဟးထီၣ်ဆိဧါ. နတဟးထီၣ်ဘၣ်. ဖဲအဒုးနဲၣ်နၤ ကျဲအခါ နကဒိကနၣ်အီၤထံထံ. ဒ်န့ၣ်အသိး ဖဲနဃ့ယဟိဝၤယွၤ အတၢ်ကူၣ်သ့ ဝံၤအလီၢ်ခံ ဒ်သိး နကသ့ၣ်ညါ အတၢ်ဟံးစုနဲၣ်ကျဲအဂီၢ် နကဘၣ်မၤဒ်လဲၣ်. နကဘၣ်ဃုသ့ၣ်ညါ အတၢ်သိၣ်တၢ်သီ ဒီးမၤထွဲ အတၢ်ဟံးစုနဲၣ်ကျဲ လၢအဘၣ်လိာ်သးဒီး နတၢ်အိၣ်သး. အဒိ ဒ်ပတဲတ့ၢ်လၢ အခီၣ်ထံးအသိး မ့ၢ်နကလဲၤလၢ တၢ်ရ့လိာ်ဒီးအီၣ်သကိးတၢ် အတၢ်ရဲၣ်တၢ်ကျဲၤဧါ တလဲၤဧါန့ၣ် ဖဲနဆၢတဲာ်တၢ်အခါ နကဘၣ် ဆိကမိၣ်ထံ  တၢ်ဂ့ၢ်မနုၤလဲၣ်. နကဘၣ် ဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲ ဘၣ်ဃးဒီး မူးပွဲလၢ အလီၤရၢၢ်လီၤစၢၢ်, တၢ်ရ့လိာ်လၢ အတဂ့ၤဘၣ် ဒီးနပာ်ဆိ ယွၤအဘီအမုၢ် လၢနီၣ်ဂံၢ်တၢန့ၣ် အရ့ဒိၣ်န့ၢ်ဒံး နပာ်ဆိ နနီၢ်ကစၢ် အတၢ်လိၣ်ဘၣ်.—ရိ ၁၃:၁၃; ၁ ကရံၣ် ၁၅:၃၃; မး ၆:၃၃.

၈. ဒ်သိး နကဃုသ့ၣ်ညါ တၢ်ဂ့ၢ်တၢ်ကျိၤအဂီၢ် နမ့ၢ်လိၣ်ဘၣ် တၢ်မၤစၢၤန့ၣ် နကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၈ နကဃုသ့ၣ်ညါ တၢ်ဂ့ၢ်တၢ်ကျိၤအဂီၢ် တဘျီတခီၣ်န့ၣ် နကလိၣ်ဘၣ် တၢ်မၤစၢၤ. အဃိ နဃ့တၢ်ဟ့ၣ်ကူၣ်လၢ ဒီပုၢ်ဝဲၢ်မုၣ်ခွါလၢ အအိၣ်ဒီးတၢ်လဲၤခီဖျိတဖၣ် အအိၣ်သ့. ဘၣ်ဆၣ် နမ့ၢ်ဃုသ့ၣ်ညါ တၢ်ဂ့ၢ်တၢ်ကျိၤလၢ ပတၢ်ကရၢကရိ ထုးထီၣ်ဝဲန့ၣ် နကန့ၢ်ဘၣ် တၢ်ဟ့ၣ်ကူၣ်စ့ၢ်ကီး. တကးဒံးဘၣ် နမ့ၢ်သူ တၢ်ပီးတၢ်လီ ဒ်သိးဒီး လံာ်နဲၣ်ကျဲလၢ ယဟိဝၤပှၤအုၣ်အသးတဖၣ် ကဃုသ့ၣ်ညါတၢ်အဂီၢ် ဒီး လံာ်စီဆှံအဆၢတဖၣ်လၢ ခရံာ်ဖိအတၢ်အိၣ်မူအဂီၢ် န့ၣ် ကကဲဘျုးဝဲဒိၣ်မး. သ့ၣ်နီၣ်ထီၣ်လၢ နတၢ်တိာ်ပာ်န့ၣ် မ့ၢ်ဝဲ နကဆၢတဲာ်တၢ်လၢ အဘၣ်ယဟိဝၤယွၤအသး.

၉. တၢ်လၢပဆၢတဲာ်တဖၣ် အဘၣ်ယဟိဝၤယွၤအသးဧါန့ၣ် ပသ့ၣ်ညါ ကသ့ဒ်လဲၣ်. (အ့းဖ့းစူး ၅:၁၇)

^၉ တၢ်လၢပဆၢတဲာ်တဖၣ် အဘၣ်ယဟိဝၤယွၤအသးဧါန့ၣ် ပသ့ၣ်ညါ ကသ့ဒ်လဲၣ်. လံာ်စီဆှံ တဲဝဲလၢ “တၢ်သ့ၣ်ညါ ဘၣ်ဃးဒီး တၢ်စီဆှံ ဒိၣ်ကတၢၢ်တဂၤန့ၣ် ဒုးအိၣ်ထီၣ် တၢ်သ့ၣ်ညါနၢ်ပၢၢ်.” (ကတိၤ ၉:၁၀) အဃိ အရ့ဒိၣ်ဒိၣ်မးလၢ ပကဘၣ်သ့ၣ်ညါ ယဟိဝၤယွၤ အဂ့ၢ်ဂ့ၤဂ့ၤ. ဒီးဒ်သိး ပကအိၣ်ဒီး တၢ်သ့ၣ်ညါနၢ်ပၢၢ်အဂီၢ် ပကဘၣ်သ့ၣ်ညါ ယဟိဝၤယွၤ အတၢ်ဂ့ၤတၢ်ဝါ, အတၢ်တိာ်ပာ်, တၢ်လၢအအဲၣ်ဝဲ ဒီးတၢ်လၢအသးဟ့ဝဲတဖၣ်. ဒီးပကဘၣ် သံကွၢ်လီၤပသးလၢ ‘ယသ့ၣ်ညါပာ်စၢၤ ယဟိဝၤယွၤအဂ့ၢ်လံ အဃိ ဖဲယဆၢတဲာ်တၢ်အခါ ယမၤသးခုအသး ကသ့ဒ်လဲၣ်.’—ဖး အ့းဖ့းစူး ၅:၁၇.

၁၀. ဘၣ်မနုၤအဃိ လံာ်စီဆှံ အတၢ်ဟံးစုနဲၣ်ကျဲန့ၣ် အရ့ဒိၣ်န့ၢ်ဒံး ပှၤဟီၣ်ခိၣ်ဖိ အတၢ်ဆဲးတၢ်လၤ ဒီးအလုၢ်လၢ်လဲၣ်.

^၁၀ တၢ်လၢပဆၢတဲာ်တဖၣ်န့ၣ် အမၤသးခု ယဟိဝၤယွၤအသး ဘၣ်ဆၣ် တဘျီတခီၣ် အတမၤသးခု ပဟံၣ်ဖိဃီဖိ ဒီးပသကိး အသးဘၣ်. အဒိ မိပါတနီၤန့ၣ် ကမၢအဖိမုၣ် ဆီဟံၣ်ဆီဃီဒီး ပှၤလၢအတၢ်အိၣ်တၢ်ယၢၤ မ့တမ့ၢ် ပှၤလၢအဟ့ၣ်ဝဲ တလးမူးပိာ်မုၣ် အဘူးအလဲ ကန့ၢ်အါအါအဂီၢ်. ပှၤတဂၤန့ၣ် အနီၢ်သးမ့ၢ်တဆူၣ်ဘၣ် သနာ်က့ လၢအဝဲသ့ၣ်အဂီၢ်န့ၣ် အရ့တဒိၣ်ဘၣ်. မိပါတဖၣ် အဲၣ်ဒိးဝဲလၢ အဖိမုၣ်ကအိၣ်ဘၣ် ဘီၣ်ဘီၣ်ညီညီ, ဘၣ်ဆၣ် ဒ်သိးအဖိမုၣ် ကလဲၤထီၣ်လဲၤထီလၢ နီၢ်သးတခီန့ၣ် ပိာ်ခွါတဂၤအံၤ ကမၤစၢၤအီၤဧါ. ဘၣ်ဃးဒီး တၢ်ဂ့ၢ်အံၤန့ၣ် ယဟိဝၤယွၤ ထံၣ်ဝဲဒ်လဲၣ်. ဖဲ မးသဲ ၆:၃၃ န့ၣ် ယ့ၣ်ၡူး ဟ့ၣ်ပလီၢ် ခရံာ်ဖိတဖၣ်လၢ ကဘၣ် “ပာ်ဆိယွၤအဘီအမုၢ်.” အဃိ ပပာ်ကဲ ပမိပပါ ဒီးပှၤလၢပခိၣ်ပဃၢၤ သနာ်က့ တၢ်လၢအရ့ဒိၣ်ကတၢၢ် မ့ၢ်ဝဲ ပကဘၣ်မၤသးခု ယဟိဝၤယွၤအသး.

ဆိကမိၣ်ထံ တၢ်လၢနကြၢးဃုထၢအီၤ လီၤတံၢ်လီၤဆဲး

၁၁. ဒ် ဖံလံးပံၤ ၁:၉, ၁၀ ပာ်ဖျါထီၣ်ဝဲအသိး ပဆၢတဲာ်တၢ်လၢအဘၣ် ကသ့အဂီၢ် ပလိၣ်ဘၣ် မနုၤလဲၣ်.

^၁၁ ဖဲနဃုသ့ၣ်ညါ လံာ်စီဆှံ အတၢ်ဟံးစုနဲၣ်ကျဲ ဝံၤအလီၢ်ခံ နတၢ်ဃုထၢ အိၣ်ဒ်လဲၣ်န့ၣ် နကဘၣ် ဆိကမိၣ်ထံအီၤ လီၤတံၢ်လီၤဆဲး. (ဖး ဖံလံးပံၤ ၁:၉, ၁၀.) တၢ်သ့ပဲာ်ထံနီၤဖးတၢ်န့ၣ် ကမၤစၢၤပှၤဒ်သိး ပကသ့ၣ်ညါလၢ ပမ့ၢ်ဆၢတဲာ်တၢ် ဒ်အံၤဒ်နုၤန့ၣ် တၢ်ကကဲထီၣ်သးဒ်လဲၣ်. တဘျီတခီၣ် တၢ်ဆၢတဲာ်တနီၤန့ၣ် ပဆၢတဲာ်အီၤညီ ဒီးတနီၤန့ၣ် တညီဘၣ်. အဃိ ပမ့ၢ်အိၣ်ဒီး တၢ်သ့ပဲာ်ထံနီၤဖးတၢ်န့ၣ် ဖဲပထံၣ်ဘၣ် တၢ်အိၣ်သးကီခဲအခါဒၣ်လဲာ် ပဆၢတဲာ်တၢ် လၢအဘၣ်ကသ့.

၁၂-၁၃. တၢ်သ့ပဲာ်ထံနီၤဖးတၢ် မၤစၢၤနၤလၢ နဃုထၢ တၢ်လၢအဘၣ် ကသ့ဒ်လဲၣ်.

^၁၂ ဆိကမိၣ်ကွၢ် တၢ်အိၣ်သးအံၤ. အဒိ နကလုၢ်အီၣ်လုၢ်အီ နဟံၣ်ဖိဃီဖိအဂီၢ် နကဘၣ်ဃုတၢ်မၤ ဒီးနကထံၣ်န့ၢ် တၢ်မၤခံခါ. ဝံၤဒီး နကဆိကမိၣ်ထံ ဘၣ်ဃးဒီး တၢ်မၤခံခါအံၤ အကဲတၢ်မၤဒ်လဲၣ်, ကဘၣ်မၤတၢ် ပှဲၤသီလဲၣ်, ကဘၣ်လဲၤလၢ တၢ်မၤလီၢ် ယံၤထဲလဲၣ် ဒီးတၢ်ဂ့ၢ်လၢ အဂၤတဖၣ်. တကးဒံးဘၣ် တၢ်မၤခံခါအံၤ တထီဒါလိာ်သးဒီး လံာ်စီဆှံ အတၢ်သိၣ်တၢ်သီ နီတခါဘၣ်. အဃိ ဘၣ်သ့ၣ်သ့ၣ် နအဲၣ်ဒိး ဃုထၢတၢ်မၤလၢ နန့ၢ်ဘၣ်စ့အါတခါ. ဘၣ်ဆၣ် တချုး နဆၢတဲာ်တၢ်အခါ တၢ်ဂ့ၢ်အဂၤလၢ နကဘၣ် ဆိကမိၣ်ထံန့ၣ် အိၣ်ဒံး.

^၁၃ တၢ်လၢနကဘၣ် ဆိကမိၣ်ထံန့ၣ်မ့ၢ်ဝဲ နမ့ၢ်န့ၢ်ဘၣ် တၢ်မၤတခါအံၤန့ၣ် နလဲၤထီၣ် တၢ်အိၣ်ဖှိၣ် ကချုးကိးဘျီဒဲးဧါ. ဒီးနမ့ၢ်ဃုထၢ တၢ်မၤတခါဂ့ၤ တခါဂ့ၤန့ၣ် မ့ၢ်တၢ်ဆၢကတီၢ်လၢ နကကွၢ်ထွဲ နဟံၣ်ဖိဃီဖိ အတၢ်လိၣ်ဘၣ်လၢ နီၢ်ခိနီၢ်သးအဂီၢ် ကအိၣ်ဒံးဧါ. နမ့ၢ် သံကွၢ်လီၤနသး ဒ်အံၤန့ၣ် ကမၤစၢၤနၤလၢ နကပာ်ဆိ “တၢ်လၢအရ့ဒိၣ်ကတၢၢ်တဖၣ်” ဒ်သိးဒီး တၢ်ဘူၣ်ထီၣ်ဘါထီၣ် ယဟိဝၤယွၤ ဒီးနဟံၣ်ဖိဃီဖိ အတၢ်လိၣ်ဘၣ်. ဒီးနကထံၣ်လၢ ကျိၣ်စ့န့ၣ် အတမ့ၢ် တၢ်အရ့ဒိၣ်ကတၢၢ် လၢနဂီၢ်ဘၣ်. အဃိ နဆၢတဲာ်တၢ်ကဘၣ် ဒီးယဟိဝၤယွၤ ကဆိၣ်ဂ့ၤနၤ.

၁၄. ဒ်သိး ပတကဲထီၣ် တၢ်လီၤဃံၢ်အလီၢ် လၢပှၤဂၤအဂီၢ်တဂ့ၤန့ၣ် တၢ်သ့ပဲာ်ထံနီၤဖးတၢ် ဒီးတၢ်အဲၣ် ကမၤစၢၤပှၤဒ်လဲၣ်.

^၁၄ ဒ်သိး ပတၢ်ဆၢတဲာ် တကဲထီၣ် “တၢ်လီၤဃံၢ်အလီၢ် လၢပှၤဂၤအဂီၢ်” တဂ့ၤန့ၣ် တၢ်သ့ပဲာ်ထံနီၤဖးတၢ် ကမၤစၢၤပှၤလၢ ပကဆိကမိၣ်န့ၢ်တၢ်လၢ ပှၤဂၤအဂီၢ်. (ဖံလံး ၁:၁၀) အဒိ ဖဲပဆၢတဲာ်တၢ် ဘၣ်ဃးဒီး ပတၢ်ကူတၢ်ကၤ ဒီးတၢ်ခွံခိၣ်ခွံနၢ်အခါ အရ့ဒိၣ်ဒိၣ်မးလၢ ပကဘၣ် ဆၢတဲာ်တၢ်လၢ တၢ်ကူၣ်သ့. ဘၣ်သ့ၣ်သ့ၣ် ပအဲၣ်ဒိးဃုထၢ တၢ်ကူတၢ်ကၤ ဒီးတၢ်ခွံခိၣ်ခွံနၢ် ဒ်ပဘၣ်သးအသိး ဘၣ်ဆၣ် အမ့ၢ်မၤတံာ်တာ် ပှၤလၢတၢ်ချၢ မ့တမ့ၢ် ပှၤလၢတၢ်အိၣ်ဖှိၣ် အပူၤအသးန့ၣ် ပကဘၣ်မၤဒ်လဲၣ်. တၢ်သ့ပဲာ်ထံနီၤဖးတၢ် ကမၤစၢၤပှၤလၢ ပကပာ်ကဲ ပှၤဂၤအတၢ်ထံၣ်. ဒီးတၢ်အဲၣ်န့ၣ် ကမၤစၢၤပှၤလၢ ပကကွၢ်န့ၢ်တၢ်လၢ “ပှၤဂၤအဂီၢ်” ဒီးကူတၢ်ကၤတၢ် ဒီးခွံခိၣ်ခွံနၢ် လၢအကြၢးအဘၣ်.  (၁ ကရံၣ် ၁၀:၂၃, ၂၄, ၃၂; ၁ တံၤ ၂:၉, ၁၀) အဃိ ဖဲပဆၢတဲာ်တၢ်အခါ ပကပာ်ဖျါထီၣ်လၢ ပအဲၣ်ပှၤဂၤ ဒီးပပာ်ကဲပှၤဂၤ.

၁၅. ဒ်သိး ပတၢ်ဆၢတဲာ်လၢအရ့ဒိၣ် ကကဲထီၣ်လိၣ်ထီၣ်အဂီၢ် ပကဘၣ်မၤဒ်လဲၣ်.

^၁၅ နမ့ၢ်ဘၣ်ဆၢတဲာ်တၢ် ဘၣ်ဃးဒီး တၢ်ဂ့ၢ်လၢအရ့ဒိၣ်န့ၣ် ဒ်သိး နတၢ်ဆၢတဲာ် ကကဲထီၣ်လိၣ်ထီၣ်အဂီၢ် နကဘၣ်မၤဒ်လဲၣ်. ယ့ၣ်ၡူး သိၣ်လိပှၤလၢ ပကဘၣ် “ဒွးဆိ . . . တၢ်လၢာ်ဘူၣ်လၢာ်စ့ၤ.” (လူၤ ၁၄:၂၈) ဒ်သိး နတၢ်ဆၢတဲာ် ကကဲထီၣ်လိၣ်ထီၣ်အဂီၢ် နကဘၣ် ဆိကမိၣ်ထံလၢ နတၢ်ဆၢကတီၢ်, ကျိၣ်စ့ ဒီးနဂံၢ်ဘါ ကလၢာ်ထဲလဲၣ်. ဒီးဘၣ်သ့ၣ်သ့ၣ် လၢတၢ်အိၣ်သးတနီၤန့ၣ် နကဘၣ် တဲသကိးတၢ်ဒီး နဟံၣ်ဖိဃီဖိ ဒ်သိး အဝဲသ့ၣ်တဂၤစုာ်စုာ် ဆီၣ်ထွဲဝဲ တၢ်ဆၢတဲာ်အံၤကသ့အဂီၢ် အဝဲသ့ၣ် ကဘၣ်မၤဒ်လဲၣ်. နမ့ၢ်ဆိကမိၣ်ပာ်စၢၤ ဒ်န့ၣ်န့ၣ် အကကဲဘျုးဒ်လဲၣ်. နကသ့ၣ်ညါထီၣ်လၢ နဘၣ်ဆီတလဲ တၢ်တမံၤမံၤဧါ မ့တမ့ၢ် နမ့ၢ်ဃုထၢလၢ အဂၤတခါန့ၣ် ကဂ့ၤဒိၣ်ဧါ. ဒီးနကဘၣ်သ့ၣ်နီၣ်ထီၣ်လၢ နမ့ၢ်ဒိကနၣ် နဟံၣ်ဖိဃီဖိ အတၢ်ဟ့ၣ်ကူၣ် လီၤတံၢ်လီၤဆဲးမး အဝဲသ့ၣ်စ့ၢ်ကီး ကသးအိၣ်မၤစၢၤနၤ ဒ်သိး နတၢ်ဆၢတဲာ် ကကဲထီၣ်လိၣ်ထီၣ်အဂီၢ်.—ကတိၤ ၁၅:၂၂.

ဆၢတဲာ်တၢ်လၢ ကကဲထီၣ်လိၣ်ထီၣ်

၁၆. ဒ်သိး နတၢ်ဆၢတဲာ် ကကဲထီၣ်လိၣ်ထီၣ်အဂီၢ် နကဘၣ်မၤ မနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ နဆၢတဲာ်တၢ်လၢအဘၣ် ကသ့ဒ်လဲၣ်.”)

^၁၆ နမ့ၢ်မၤထွဲ တၢ်ဟ့ၣ်ကူၣ်လၢ ပတဲတ့ၢ်တဖၣ်န့ၣ် နဆၢတဲာ်တၢ်ကဘၣ်. နဃုသ့ၣ်ညါ ဒီးနဆိကမိၣ်ထံ ယဟိဝၤယွၤ အတၢ်ဟံးစုနဲၣ်ကျဲ ဝံၤလံအဃိ နနာ်သ့သပှၢ်တၢၢ်လၢ နမၤသးခုအသး. ဒီးနနာ်သ့စ့ၢ်ကီးလၢ ဒ်သိးနတၢ်ဆၢတဲာ် ကကဲထီၣ်လိၣ်ထီၣ်အဂီၢ် ဖဲနဃ့ ယဟိဝၤယွၤ အတၢ်မၤစၢၤအခါ အကမၤစၢၤနၤ သပှၢ်တၢၢ်.

၁၇. ဒ်သိး နဆၢတဲာ်တၢ်ကဘၣ်အဂီၢ် နကဘၣ် သန့ၤသးလၢ မတဂၤလဲၣ်.

^၁၇ လၢအပူၤကွံာ် နတၢ်ဆၢတဲာ် မ့ၢ်ကဲထီၣ်လိၣ်ထီၣ် အါဘျီသနာ်က့ နကဘၣ် သ့ၣ်နီၣ်ထီၣ်လၢ ဒ်သိး နဆၢတဲာ်တၢ်ကဘၣ်အဂီၢ် နတဘၣ်သန့ၤသးလၢ နနီၢ်ကစၢ် တၢ်လဲၤခီဖျိ ဒီးတၢ်သ့တၢ်ဘၣ်ဘၣ်. နကဘၣ် သန့ၤသးလၢ ယဟိဝၤယွၤ ဒ်သိးအကဟ့ၣ်နၤ တၢ်သ့ၣ်ညါ, တၢ်နၢ်ပၢၢ် ဒီးတၢ်ပဲာ်ထံနီၤဖးတၢ်. တၢ်သ့ၣ်တဖၣ်အံၤ ကမၤစၢၤနၤလၢ နကအိၣ်ဒီး တၢ်ကူၣ်သ့နီၢ်ကီၢ်. (ကတိၤ ၂:၁-၅) ဒီးယဟိဝၤယွၤ ကမၤစၢၤနၤဒ်သိး နကဆၢတဲာ်တၢ်လၢ အကမၤသးခုအသး.—စံး ၂၃:၂, ၃.