ဟ့ခါနၣ် မ့ၢ်ပှၤစံၣ်တဲၤတဲလီၤတၢ်ဖိလၢ တဒိးဘျၢဘၣ်အသးလၢထံဒံးဘၣ် ဒီးအအိၣ်လၢကီၢ်အၤရမ့နံယါန့ၣ်လီၤ. ဘၣ်တနံၤအဝဲထံၣ်ဝဲ လံာ်ခီကီၢ် (passport) တဘ့ၣ်လၢအဟံၣ်ကပၤန့ၣ်လီၤ. လၢလံာ်ခီကီၢ်အကဆူးန့ၣ် အိၣ်ဒီးခးလၢပှၤထုးထီၣ်စ့အဂီၢ် (debit cards) ဒီးကျိၣ်စ့အါအါဂီၢ်ဂီၢ်လီၤ. အဝဲတဲဘၣ်အဝၤ တၢ်လၢအထံၣ်န့ၢ်ဝဲန့ၣ်လီၤ. အဝၤစ့ၢ်ကီးမ့ၢ် ပှၤစံၣ်တဲၤတဲလီၤတၢ်ဖိလၢ တဒိးဘျၢဘၣ်အသးလၢထံဒံးဘၣ်လီၤ.

ပှၤဒီမါဝၤခံဂၤအံၤ ကွၢ်ဆၢၣ်မဲာ်ဘၣ် ကျိၣ်စ့အတၢ်ကီတၢ်ခဲဒီး အကမၢ်အိၣ်စ့ၢ်ကီးလီၤ. ဘၣ်ဆၣ် အဝဲသ့ၣ် ပာ်လီၤအသးလၢ အကက့ၤဟ့ၣ်ကဒါက့ၤ လံာ်ခီကီၢ်ဒီးစ့န့ၣ်လီၤ. ဖဲစ့အကစၢ်ထံၣ်ဘၣ်လၢ အဝဲသ့ၣ်ဟဲဟ့ၣ်က့ၤအီၤအခါ စ့ကစၢ်ဒီးအဟံၣ်ဖိဃီဖိ ကမၢကမၣ်ဝဲဒိၣ်မးလီၤ. ဟ့ခါနၣ်ဒီးအဝၤ တဲဘၣ်ပှၤတဖၣ်န့ၣ်လၢ အဝဲသ့ၣ်မၤတၢ်တီတီလိၤဒ်အံၤ မ့ၢ်လၢအမၤလိလံာ်စီဆှံအဃိလီၤ. ဟ့ခါနၣ်ဒီးအဝၤ ဟံးန့ၢ်တၢ်ခွဲးတၢ်ယာ် လၢကတဲဘၣ်အဝဲသ့ၣ် ယဟိဝၤပှၤအုၣ်အသးအဂ့ၢ် ဒီးဟ့ၣ်လီၤအဝဲသ့ၣ်လၢ လံာ်လဲၢ်တဖၣ်လီၤ.

ဟံၣ်ဖိဃီဖိတဒူၣ်အံၤအဲၣ်ဒိးဟ့ၣ် ဟ့ခါနၣ် အကိၣ်ပှ့ၤဘၣ်ဆၣ်အဝဲတဟံးန့ၢ်ဝဲဘၣ်. လၢခံတနံၤ ပှၤလၢအစ့လီၤမၢ်တဂၤ ဟဲဆူဟ့ခါနၣ်အဟံၣ် ဒီးဟ့ၣ်အဝဲသ့ၣ်လၢ ပသံးတၢ်မျၢ်ပလဲ တဘိန့ၣ်လီၤ.

ဟံၣ်ဖိဃီဖိတဒူၣ်အံၤ ထံၣ်ဘၣ်ဟ့ခါနၣ်ဒီးအဝၤ မၤတၢ်တီတီလိၤလိၤအခါ အဝဲသ့ၣ်ကမၢကမၣ်ဒိၣ်မးလီၤ. ဘၣ်ဆၣ် မ့ၢ်ယဟိဝၤယွၤကမၢကမၣ်ဝဲဧါ. အဝဲသ့ၣ်မၤတၢ်တီတီလိၤလိၤန့ၣ် မ့ၢ်ယဟိဝၤယွၤထံၣ်ဝဲဒ်လဲၣ်. အဝဲသ့ၣ် မၤတၢ်တီတီလိၤလိၤအဃိ မ့ၢ်အဘျုးအဖှိၣ်အိၣ်ဧါ.

ပှၤကစံးဆၢတၢ်သံကွၢ်တဖၣ်အံၤအဂီၢ်န့ၣ် တမ့ၢ်တၢ်လၢ အကီဘၣ်. ဘၣ်မနုၤအဃိလဲၣ်. မ့ၢ်လၢ ကစၢ်ယွၤအခ့အပှၤတဖၣ်သ့ၣ်ညါဝဲလၢ ယဟိဝၤယွၤအဂီၢ်န့ၣ် တၢ်ကွၢ်လိ ကစၢ်အတၢ်ဂ့ၤတၢ်ဝါတဖၣ် အလုၢ်အပှ့ၢ်ဒိၣ်န့ၢ်ဒံး တၢ်မျၢ်ပလဲ, ထူဧိၤလွဲဧိၤ ဒီးတၢ်အဂုၤအဂၤတဖၣ်လီၤ. တၢ်လၢယဟိဝၤယွၤ ပာ်လုၢ်ပာ်ပှ့ၤဝဲတဖၣ်န့ၣ်လီၤဆီ ဒီးတၢ်လၢပှၤဟီၣ်ခိၣ်ဖိတဖၣ်ပာ်ဒိၣ်ဝဲလီၤ. (ယၡါယၤ ၅၅:၈, ၉) ယွၤအခ့အပှၤတဖၣ်သ့ၣ်ညါဝဲလၢ အဝဲသ့ၣ်အတၢ်ဂုာ်ကျဲးစၢး ကွၢ်လိမၤဒိး ယဟိဝၤယွၤအတၢ်ဂ့ၤတၢ်ဝါန့ၣ် မ့ၢ်တၢ်လၢ အလုၢ်အပှ့ၤဒိၣ်လၢ ယဟိဝၤယွၤအမဲာ်ညါလီၤ.

လံာ်စီဆှံ ပာ်ဖျါထီၣ် တၢ်သ့ၣ်ညါနၢ်ပၢၢ် ဒီးတၢ်ကူၣ်သ့အဂ့ၢ်ဒ်အံၤလီၤ. ကတိၤဒိ ၃:၁၃-၁၅ စံးဝဲလၢ– “ပှၤလၢအထံၣ်န့ၢ်တၢ်ကူၣ်သ့, ဒီးပှၤလၢအမၤန့ၢ် တၢ်သူၣ်ဆးသးဆးန့ၣ် ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, တၢ်န့ၢ်ဘၣ်အီၤန့ၣ် ဂ့ၤန့ၢ်တၢ်န့ၢ်ဘၣ် ကျိၣ်ဧိၤစ့ဧိၤ, ဒီးအတၢ်အါထီၣ်ဂ့ၤန့ၢ် ထူစီတက့ၢ်လီၤ. အပှ့ၤဒိၣ်န့ၢ် တၢ်မျၢ်ပလဲတက့ၢ်, ဒီးကယဲၢ်တၢ်လၢ အဘၣ်နသးခဲလၢာ်န့ၣ် နတထိၣ်သတြီၤဘၣ်ဒီးအီၤဘၣ်.” ပထံၣ်ဘၣ်လၢယဟိဝၤယွၤ ပာ်လုၢ်ပာ်ပှ့ၤတၢ်ဂ့ၤတၢ်ဝါတဖၣ်အံၤ ဒိၣ်န့ၢ်ဒံးတၢ်ထူးတၢ်တီၤအဂၤန့ၣ်လီၤ.

တၢ်မၤတၢ်တီတီလိၤလိၤန့ၣ် ယဟိဝၤယွၤထံၣ်ဝဲဒ်လဲၣ်.

ယဟိဝၤယွၤ မ့ၢ်ကစၢ်ယွၤလၢ အမၤတၢ်တီတီလိၤလိၤလီၤ. ကစၢ်ယွၤ “ကတိၤတၢ်ကဘျံးကဘျၣ်တသ့ဘၣ်.” (တံတူး ၁:၂) ဒီးကစၢ်ယွၤမၢ တၢ်မၢဖိပီလူးကွဲးဝဲ လံာ်ပရၢဆူ ခရံာ်ဖိလၢတၢယၤဖှိၣ်အစိၤဒ်အံၤ– “ဘါထုကဖၣ်တၢ်လၢပဂီၢ်တက့ၢ်. အဂ့ၢ်ဒ်အံၤ, ပဆိကမိၣ်လၢ ပအိၣ်ဒီးပသးသ့ၣ်ညါဒၣ်တၢ်အဂ့ၤ, ဒီးတၢ်မိၣ်မၤပသးလၢ တၢ်အဂ့ၤလၢတၢ်ခဲလၢာ်အပူၤလီၤ.”—ဧ့ၤဘြံၤ ၁၃:၁၈.

ယ့ၣ်ၡူးခရံာ်ပာ်လီၤဒိဂ့ၤတဲာ်ဘၣ် ဘၣ်ဃးဒီးတၢ်မၤတၢ်တီတီလိၤလိၤအဂ့ၢ်လီၤ. အဒိ ဖဲပှၤလုၢ်တၢ်အခိၣ် စီၤကၤယါဖၤ စံးဝဲလၢ, “နမ့ၢ်ယွၤအဖိခွါခရံာ်ဧါ, တမ့ၢ်ဘၣ်လဲန့ၣ်, ဒ်သိးနကစံးဘၣ်ပှၤဒီး, ယမၢနဆိၣ်တၢ်လၢယွၤလၢ အမူဝဲအမဲာ်ညါ” အခါန့ၣ် ယ့ၣ်ၡူးတဲဝဲတီတီလၢ အဝဲမ့ၢ်မ့းၡံအၤလီၤ. ယ့ၣ်ၡူး သ့ၣ်ညါဝဲလၢ ပှၤယူဒၤဖိအကွီၢ်ဘျီၣ် လၢအဒိၣ်ကတၢၢ် ပာ်ဒ့ၣ်ပာ်ကမၣ်အီၤလၢ အမ့ၢ်ပှၤဒုၣ်ဒွဲၣ်ယွၤ ဒီးမၤသံအီၤသ့သနာ်က့ အဝဲတဲတၢ်မ့ၢ်တၢ်တီဒူဒူလီၤ.—မးသဲ ၂၆:၆၃-၆၇.

မ့မ့ၢ်ပဝဲမီၣ်, ဒ်သိးပကဒိးန့ၢ်ဘၣ်ကျိၣ်စ့အဂီၢ် ပမ့ၢ်တတဲဖျါထီၣ်တၢ်ဂ့ၢ်တၢ်ကျိၤခဲလၢာ်ဘၣ် ဒီးပမ့ၢ်လီတၢ်တစဲးဖိန့ၣ် မ့ၢ်ပမၤတၢ်တီတီလိၤလိၤဒံးဧါ.

လၢမုၢ်နံၤခံကတၢၢ်အတီၢ်ပူၤ “ပှၤကညီကမ့ၢ်ပှၤအဲၣ်လီၤအသး, ပှၤသးကွံစ့” အဃိပကမၤတၢ်တီတီလိၤလိၤအဂီၢ်ကကီဝဲ လီၤ. (၂ တံၤမသ့း ၃:၂) ဖဲကျိၣ်စ့တဘၣ်လီၢ်ဘၣ်စး မ့တမ့ၢ် ပှၤဃုတၢ်ဖံးတၢ်မၤကီဝဲအခါ ပှၤဟုၣ်တၢ်, ပှၤလံၣ်အီၣ်လီအီၣ်တၢ် မ့တမ့ၢ် ပှၤမၤတၢ်တတီတလိၤ ကအါထီၣ်ဝဲလီၤ. တၢ်မၤဒ်အံၤန့ၣ် ပှၤတဆိကမိၣ်လၢအကမၣ်ဘၣ် ဒီးပှၤအါဂၤ ဆိကမိၣ်ဝဲလၢ တၢ်မၤတၢ်တတီတလိၤန့ၣ် မ့ၢ်ကျဲထဲတဘိလၢ ပှၤကဒိးန့ၢ်ဘၣ်ကျိၣ်စ့အဂီၢ်လီၤ. ခရံာ်ဖိတနီၤ ဆၢတဲာ်ဝဲလၢက “မၤတၢ်လၢအလၤအကပီၤတအိၣ် ဒ်သိးအကန့ၢ်စ့” အဃိအဝဲသ့ၣ် အမံၤဟးဂီၤ လၢတၢ်အိၣ်ဖှိၣ်အပူၤလီၤ.—၁ တံၤမသ့း ၃:၈; တံတူး ၁:၇.

ဘၣ်ဆၣ် ခရံာ်ဖိအါဒၣ်တက့ၢ်န့ၣ် ကွၢ်လိမၤဒိး ယ့ၣ်ၡူးလီၤ. အဝဲသ့ၣ် ထံၣ်ဝဲလၢ တၢ်ကွၢ်လိယွၤအတၢ်ဂ့ၤတၢ်ဝါတဖၣ်န့ၣ် မ့ၢ်တၢ်လၢအရ့ဒိၣ်န့ၢ်ဒံး တၢ်ထူးတၢ်တီၤ မ့ၢ်တမ့ၢ် တၢ်အဘျုးအဖှိၣ်တမံၤမံၤန့ၣ်လီၤ. လၢတၢ်န့ၣ်အဃိ ခရံာ်ဖိသးစၢ်တဖၣ် တဟုၣ်ကွၢ်လံာ် ဒ်သိးကန့ၢ်အမးဂ့ၤဂ့ၤအဂီၢ်ဘၣ်. (ကတိၤဒိ ၂၀:၂၃) ပမ့ၢ်မၤတၢ်တီတီလိၤလိၤသနာ်က့ ဘၣ်သ့ၣ်သ့ၣ် တမ့ၢ်ပကဒိးန့ၢ်ဘၣ်ခိၣ်ဖးဒ် ဟ့ခါနၣ်အသိးဘၣ်. ဘၣ်ဆၣ် ပမ့ၢ်မၤတၢ်တီတီလိၤလိၤန့ၣ် ပကမၤသးခုကစၢ်ယွၤအသး တကးဒံးဘၣ် ပကအိၣ်စ့ၢ်ကီးဒီးသးလၢအသ့ၣ်ညါတၢ်လၢ အကဆှီလီၤ. လၢတၢ်န့ၣ်အဃိ တၢ်အိၣ်ဒီးသးလၢအသ့ၣ်ညါတၢ်လၢအကဆှီန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်တခါလီၤ.

 ကါကၠံး ပာ်ဖျါထီၣ်ဝဲတၢ်ဂ့ၤတၢ်ဝါအံၤလၢ အတၢ်အိၣ်မူအပူၤလီၤ. အဝဲစံးဝဲလၢ– “တချုးလၢ ယကဲထီၣ်ခရံာ်ဖိဒံးဘၣ်န့ၣ် ယမၤတၢ်လၢ ခီပနံာ်ဖးဒိၣ်တဖျၢၣ်လီၤ. ခီပနံာ်ကစၢ်အံၤ တအဲၣ်ဒိးဟ့ၣ် တၢ်ခိတၢ်သွဲခဲလၢာ်အဃိ ခီပနံာ်အတၢ်ဟဲနုာ်န့ၣ်အိၣ်ဝဲအါဘၣ်ဆၣ် တီၣ်ဖျါထီၣ်ဝဲထဲတစဲးဖိလီၤ. လၢခီပနံာ်အပူၤ ယအိၣ်ဒီးမူဒါဖးဒိၣ်အဃိ ခီပနံၣ် အကစၢ်မၢ ယမၤတၢ်တတီတလိၤ ခီဖျိဟ့ၣ်လီၤခိၣ်ဖးဆူ ပှၤဘၣ်မူဘၣ်ဒါလၢ တၢ်ခိတၢ်သွဲတကပၤ ဒ်သိးကကွၢ်ကပာ် ပတၢ်မၤတတီတလိၤအဂီၢ်လီၤ. လၢတၢ်န့ၣ်အဃိ ယမံၤထီၣ်လၢ ယမၤတၢ်တတီတလိၤန့ၣ်လီၤ. ဘၣ်ဆၣ်ဖဲ ယမၤလိဘၣ် တၢ်မ့ၢ်တၢ်တီအခါ ယအဲၣ်ဒိးမၤတၢ်တီတီလိၤလိၤအဃိ ယန့ၢ်ဘၣ်စ့အါထဲလဲၣ်ထဲလဲၣ် သနာ်က့ ယတအဲၣ်ဒိးမၤတၢ်ဖဲန့ၣ်လၢၤဘၣ်. လၢခံယမၤယနီၢ်ကစၢ်အတၢ်မၤလီၤ. စးထီၣ်ဖဲန့ၣ်န့ၣ် ယမၤတၢ်တီတီလိၤလိၤ ဒီးယဟ့ၣ်တၢ်ခိတၢ်သွဲခဲလၢာ်လီၤ.”—၂ ကရံၣ်သူး ၈:၂၁.

ကါကၠံးစံးဝဲလၢ– “ယစ့ဟဲနုာ်စှၤလီၤတဝာ်ဃၣ်ဃၣ်အဃိ ယကလုၢ်အီၣ်လုၢ်အီ ယဟံၣ်ဖိဃီဖိအဂီၢ်ကီခဲဝဲလီၤ. ဘၣ်ဆၣ် ခဲအံၤယအိၣ်ဒီး တၢ်သးခုဒိၣ်န့ၢ်ဒံးလၢညါလီၤ. ယအိၣ်ဒီး သးလၢအသ့ၣ်ညါဒၣ်တၢ်လၢအကဆှီ လၢယဟိဝၤယွၤအမဲာ်ညါလီၤ. ယကဲထီၣ် ဒိဂ့ၤတဲာ်ဘၣ်လၢ ယဖိခွါခံဂၤအဂီၢ် ဒီးယဒိးန့ၢ်ဘၣ် မူဒါလၢ တၢ်အိၣ်ဖှိၣ်အပူၤလီၤ. ထဲန့ၣ်တကးဒံးဘၣ် အခဲအံၤ လၢပှၤလၢအဃ့တၢ်ခိတၢ်သွဲတဖၣ်အကျါမ့ၢ်ဂ့ၤ, ပှၤလၢအမၤသကိးတၢ်ဒီးယၤအကျါမ့ၢ်ဂ့ၤ ယအိၣ်ဒီးတၢ်မံၤဂ့ၤသၣ်ဂ့ၤ လၢယမ့ၢ်ပှၤမၤတၢ်တီတီလိၤလိၤတဂၤလီၤ.”

ယဟိဝၤယွၤ အဲၣ်ပှၤလၢအမၤလၤကပီၤအီၤ ခီဖျိလၢအဝဲသ့ၣ်ကွၢ်လိ အတၢ်ဂ့ၤတၢ်ဝါဒီး မၤတၢ်တီတီလိၤလိၤအဃိလီၤ. (တံတူး ၂:၁၀) ဒီးပမ့ၢ်မၤတၢ်တီတီလိၤလိၤန့ၣ် ကစၢ်ယွၤအၢၣ်လီၤပှၤလၢ ကမၤစၢၤပှၤလီၤ. ကစၢ်ယွၤထိးဘၣ် စီၤပၤဒၤဝံးအသး ဒီးအဝဲစံးဝဲလၢ– “ယမ့ၢ်တ့ၢ်ပှၤအသးစၢ်, ဒီးယကဲထီၣ်လံ ပှၤသးပှၢ်လံ, ဒီးပှၤတီပှၤလိၤဘၣ်တၢ် လဲၤသဒၣ်အီၤမ့ၢ်ဂ့ၤ, အချံအသၣ်ဃ့အီၣ်တၢ်မ့ၢ်ဂ့ၤန့ၣ် ယတထံၣ်ဘၣ်.”—စံးထီၣ်ပတြၢၤ ၃၇:၂၅.

ပမ့ၢ်ကွၢ် နီၢ်ရူၤသးအတၢ်လဲၤခီဖျိန့ၣ် ပသ့ၣ်ညါဘၣ်လၢ လံာ်စီဆှံလၢထးတဆၢအံၤဘၣ်ဝဲလီၤ. နီၢ်နၤဧမံ အသးပှၢ်ဘၣ်ဆၣ် နီၢ်ရူၤသးတပာ်တ့ၢ်ကွံာ်အီၤဘၣ်, လၢတၢ်န့ၣ်အလီၢ် အဝဲပိာ်ဝဲအမံၤပှၢ်အခံ ဒီးလဲၤအိၣ်ဒီးအီၤလၢ ကီၢ်အံၣ်စရ့လး ဒ်သိးကဘူၣ်ထီၣ်ဘါထီၣ် ယွၤလၢအမ့ၢ်အတီအဂီၢ်လီၤ. (ရူၤသး ၁:၁၆, ၁၇) နီၢ်ရူၤသး မၤတၢ်တီတီလိၤလိၤ ဒီးလူၤပိာ်ထွဲဝဲ ပှၤအံၣ်စရ့လးဖိ အတၢ်သိၣ်တၢ်သီ လၢပှၤဖှီၣ်ဖိယာ်ဖိအဂီၢ်အဃိ အဝဲဂုာ်ကျဲးစၢးထၢဘုစဲၤန့ၣ်လီၤ. ဒ်စီၤဒၤဝံး လဲၤခီဖျိဘၣ်တ့ၢ်ဝဲအသိး ကစၢ်ယဟိဝၤယွၤ တပာ်တ့ၢ်ဝဲ နီၢ်ရူၤသးဒီး နီၢ်နၤဧမံ နီတဘျီဘၣ်. (ရူၤသး ၂:၂-၁၈) ကစၢ်ယွၤလုၢ်အီၣ် နီၢ်ရူၤသးထဲလၢနီၢ်ခိတကးဒံးဘၣ် ကစၢ်ယွၤဃုထၢစ့ၢ်ကီးအီၤလၢ ကမ့ၢ်ပှၤတဂၤလၢ စီၤပၤဒၤဝံးဒီး မ့းၡံအၤဒၣ်လဲာ် ဟဲလီၤစၢၤလီၤသွဲၣ်လၢအီၤန့ၣ်လီၤ.—နီၢ်ရူၤသး ၄:၁၃-၁၇; မးသဲ ၁:၅, ၁၆.

ယဟိဝၤယွၤ အခ့အပှၤတနီၤ ဒ်သိးအဝဲသ့ၣ် ကန့ၢ်ဘၣ်စ့လၢလၢလီၢ်လီၢ်လၢ ကလုၢ်အီၣ်လုၢ်အီဝဲ အဟံၣ်ဖိဃီဖိအဂီၢ် ကကီဝဲလီၤ. ဘၣ်ဆၣ်ဒ်သိး အဝဲသ့ၣ်ကဒိးန့ၢ်ဘၣ် ကျိၣ်စ့အဂီၢ် တလံၣ်အီၣ်လီအီၣ်တၢ်ဘၣ်, လၢတၢ်န့ၣ်အလီၢ် အဝဲသ့ၣ် ခုဒီးမၤတၢ်ဆူၣ်ဆူၣ်လီၤ. ခီဖျိလၢ အဝဲသ့ၣ် မၤတၢ်တီတီလိၤလိၤအဃိ ပာ်ဖျါထီၣ်ဝဲ ကစၢ်ယွၤ အတၢ်ဂ့ၤတၢ်ဝါလၢ အပၣ်ဃုာ်ဒီး တၢ်မၤတၢ်တီတီလိၤလိၤလၢ အလုၢ်ဒိၣ်ပှ့ၤဒိၣ်န့ၢ်ဒံး တၢ်ထူးတၢ်တီၤကိးမံၤဒဲးန့ၣ်လီၤ.—ကတိၤဒိ ၁၂:၂၄; အ့းဖ့းစူး ၄:၂၈.

ဒ်နီၢ်ရူၤသးအသိး ခရံာ်ဖိလၢ ဟီၣ်ခိၣ်ဒီဘ့ၣ် ပာ်ဖျါထီၣ်ဝဲလၢ အဝဲသ့ၣ်နာ်ဝဲ ယဟိဝၤယွၤကမၤစၢၤအီၤန့ၣ်လီၤ. အဝဲသ့ၣ်နာ်ဝဲ ကစၢ်ယွၤအတၢ်အၢၣ်လီၤလၢအမ့ၢ်– “ယတညိကွံာ်ဘၣ်နၤဘၣ်, ယတလဲၤသဒၣ်ဘၣ်နၤဘၣ်.” (ဧ့ၤဘြံၤ ၁၃:၅) ပထံၣ်ဘၣ် တၢ်အုၣ်အသးအိၣ်အါမးလၢ ပှၤလၢအမၤတၢ်တီတီလိၤလိၤထီဘိန့ၣ် ယဟိဝၤယွၤမၤစၢၤအဝဲသ့ၣ်လီၤ. တကးဒံးဘၣ် ကစၢ်ယွၤ အၢၣ်လီၤဝဲလၢ ကမၤလၢပှဲၤအခ့အပှၤတဖၣ် အတၢ်လိၣ်ဘၣ်လၢ တနံၤအဂီၢ် တနံၤအဂီၢ်န့ၣ်လီၤ.—မးသဲ ၆:၃၃.

ပှၤဟီၣ်ခိၣ်ဖိတဖၣ် ပာ်လုၢ်ပာ်ပှ့ၤဝဲ တၢ်မျၢ်ပလဲ ဒီးတၢ်ထူးတၢ်တီၤအဂၤတဖၣ်လီၤ. ပသ့ၣ်ညါလၢ မ့မ့ၢ်ယဟိဝၤယွၤန့ၣ် ပာ်လုၢ်ပာ်ပှ့ၤဝဲ တၢ်မၤတၢ်တီတီလိၤလိၤ ဒီးတၢ်ဂ့ၤတၢ်ဝါအဂၤတဖၣ် ဒိၣ်န့ၢ်ဒံး တၢ်မျၢ်ပလဲဒီး တၢ်ထူးတၢ်တီၤန့ၣ်လီၤ.