၁-၂. ယဟိဝၤယွၤ ကွဲမုာ် ပှၤလၢ အဘူၣ်ထီၣ်ဘါထီၣ်အီၤ လၢကကဲထီၣ် မနုၤလဲၣ်.

 ပှၤမ့ၢ်သံကွၢ်နၤလၢ ‘ယဟိဝၤယွၤန့ၣ် နထံၣ်အီၤလၢ အကဲ ပှၤဒ်လဲၣ်တဂၤလဲၣ်’ န့ၣ် နကတဲက့ၤ ဒ်လဲၣ်. ဘၣ်သ့ၣ်သ့ၣ် နကတဲလၢ ‘ယဟိဝၤယွၤန့ၣ် ယထံၣ်အီၤဒ်ယပါ, ယကစၢ်ယွၤ ဒီးယသကိး.’ ဒီးဘၣ်သ့ၣ်သ့ၣ် နကတဲလၢအဂၤ တမံၤမံၤဒံး. ဘၣ်ဆၣ် မ့ၢ်နကတဲလၢ ယဟိဝၤယွၤန့ၣ် အကဲပှၤလၢ အတူၢ်လိာ် ပှၤတမှံၤ တဘျီဘျီစ့ၢ်ကီးဧါ.

^၂ စီၤပၤဒၤဝံး ထိၣ်သတြီၤဝဲ ယဟိဝၤယွၤ ဒ်သိးဒီး ဟံၣ်ကစၢ် ဒီးမ့မ့ၢ်ပှၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် အထိၣ်သတြီၤဝဲ ဒ်သိးဒီး ပှၤတမှံၤ. စီၤဒၤဝံး တဲဝဲလၢ “အိ ယဟိဝၤယွၤဧၢ, မတဂၤ ကကဲ ပှၤတမှံၤလၢ နဒဲပူၤလဲၣ်. မတဂၤ ကအိၣ်ဘၣ်လၢ နကစၢၢ်စီဆှံအလိၤလဲၣ်.” (စံး ၁၅:၁) လၢလံာ်စီဆှံ တဆၢအံၤ ပသ့ၣ်ညါဘၣ်လၢ ပကဲထီၣ် ယဟိဝၤယွၤ အပှၤတမှံၤသ့. ပမ့ၢ်တဲလၢ အဂၤတမံၤန့ၣ် ယဟိဝၤယွၤ ကွဲမုာ်ပှၤလၢ ပကကဲထီၣ် အသကိး. တၢ်ကွဲမုာ်အံၤ လီၤသးခုဒိၣ်မး တမ့ၢ်ဧီၤ.

ယဟိဝၤယွၤ ဘၣ်သးလၢ ပကကဲထီၣ် အပှၤတမှံၤ

၃. လၢယဟိဝၤယွၤ အဒဲပူၤန့ၣ် မတဂၤကဲ ပှၤတမှံၤ အဆိကတၢၢ်တဂၤလဲၣ် ဒီးအဝဲသ့ၣ် တၢ်ရ့လိာ်သး အိၣ်ဒ်လဲၣ်.

^၃ တချုးလၢ ယဟိဝၤယွၤ တ့လီၤတၢ် နီတမံၤဒံးဘၣ်န့ၣ် အဘၣ်အိၣ်ဝဲ ထဲတဂၤ. လၢခံအတ့လီၤ အဖိခွါဝဲၢ်ကိ ဒီးကွဲမုာ်အီၤလၢ ကကဲထီၣ်အပှၤတမှံၤ လၢအဒဲပူၤ. ယဟိဝၤယွၤ ကဲဘၣ် ပှၤလၢအတူၢ်လိာ် ပှၤတမှံၤအဃိ အသးခုဒိၣ်မး. တကးဒံးဘၣ် လံာ်စီဆှံ ပာ်ဖျါထီၣ်ဝဲလၢ အဖိခွါန့ၣ် ကဲထီၣ် “အတၢ်သးခုလီၤလီၤဆီဆီ” လၢအဂီၢ်. ဒီးအဖိခွါ လၢအမ့ၢ် အပှၤတမှံၤ အဆိကတၢၢ် တဂၤန့ၣ် “သူၣ်ဖှံသးညီ လၢ အမဲာ်ညါ ထီဘိ.”—ကတိၤ ၈:၃၀.

၄. လၢခံ ယဟိဝၤယွၤ ကွဲမုာ်အါထီၣ် မတဂၤ လၢအဒဲပူၤလဲၣ်.

^၄ လၢခံ ယဟိဝၤယွၤ တ့လီၤပှၤနီၢ်သးဖိ လၢအဂၤတဖၣ် ဒီးအကွဲမုာ်စ့ၢ်ကီး အဝဲသ့ၣ်လၢ ကကဲထီၣ် အပှၤတမှံ လၢအဒဲပူၤ. မူခိၣ်ကလူးတဖၣ်အံၤ လံာ်စီဆှံ ကိးအဝဲသ့ၣ် လၢ “ကစၢ်ယွၤ အဖိခွါတဖၣ်” ဒီးအဝဲသ့ၣ် အိၣ်ဘၣ်တပူၤဃီဒီး ယဟိဝၤယွၤအဃိ အဝဲသ့ၣ် သးခုဒိၣ်မး. (ဘး ၃၈:၇; ဒၤ ၇:၁၀) ဒီးလၢခီၣ်ထံးခါ အနံၣ်ဖးယံာ်န့ၣ် ယဟိဝၤယွၤ အသကိးတဖၣ် ကဲဝဲထဲ ပှၤနီၢ်သးဖိ လၢအအိၣ် လၢမူခိၣ်. ဘၣ်ဆၣ် လၢခံ ယဟိဝၤယွၤ တ့လီၤပှၤဟီၣ်ခိၣ်ဖိ ဒီးအဝဲသ့ၣ် ကဲထီၣ် အပှၤတမှံၤ လၢအဒဲပူၤ သ့စ့ၢ်ကီး. လၢယဟိဝၤယွၤ အပှၤတမှံၤ အကျါန့ၣ် ပၣ်ဃုာ်ဒီး စီၤဃနိာ်, စီၤနိအၤ, စီၤအၤဘြၤဟၣ် ဒီးစီၤယိၤဘး. ပှၤတဖၣ်အံၤ ဘူၣ်ထီၣ်ဘါထီၣ် ယဟိဝၤယွၤ ဒီးလံာ်စီဆှံ ပာ်ဖျါထီၣ်လၢ အဝဲသ့ၣ်ကဲ ကစၢ်ယွၤ အသကိး ဒီးကဲပှၤလၢအ “လဲၤတၢ်ဒီး ယွၤလၢ အမ့ၢ်အတီတဂၤ.”—၁ မိၤ ၅:၂၄; ၆:၉; ဘး ၂၉:၄; ၡါ ၄၁:၈.

၅. ဝံအတၢ်စံးပာ်ဖဲ ယဃ့းစက့လး ၃၇:၂၆, ၂၇ န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.

^၅ ပူၤကွံာ်အနံၣ် လၢအကယၤတဖၣ်န့ၣ် ယဟိဝၤယွၤ ဆဲးကွဲမုာ် အသကိးတဖၣ်လၢ ကကဲထီၣ် အပှၤတမှံၤ. (ဖး ယဃ့းစက့လး ၃၇:၂၆, ၂၇.) အဒိ လၢဝံယဃ့းစက့လး အတၢ်စံးပာ်န့ၣ် ပသ့ၣ်ညါဘၣ်လၢ ယဟိဝၤယွၤ ဘၣ်သးလၢ ပှၤလၢ အဘူၣ်ထီၣ်ဘါထီၣ်အီၤန့ၣ် ကအိၣ်ဒီး တၢ်ရ့လိာ်သးဒီးအီၤ လၢအဂ့ၤ. ဒီးယဟိဝၤယွၤ အၢၣ်လီၤလၢ အကမၤ “တၢ်ဃူတၢ်ဖိး အတၢ်အၢၣ်လီၤအီလီၤဒီး အဝဲသ့ၣ်.” ဝံအတၢ်စံးပာ်အံၤ အဲၣ်ဒိးတဲ ဘၣ်ဃးဒီး တၢ်ဆၢကတီၢ်ဖဲ ပှၤလၢ ယဟိဝၤယွၤဒိးဖှူအီၤ ဒီးပှၤလၢ အအိၣ်ဒီး တၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်န့ၣ် ကအိၣ်ဘၣ် ဃူဃူဖိးဖိး ဒ် “သိတဖုဃီ” လၢယဟိဝၤယွၤ အဒဲပူၤ. (ယိၤ ၁၀:၁၆) ဒီးပထံၣ်ဘၣ်လၢ တၢ်ဆၢကတီၢ်အံၤ ဟဲလၢပှဲၤထီၣ်လၢ ပစိၤခဲအံၤ သပှၢ်တၢၢ်.

ပအိၣ် ဖဲလဲၣ်ဂ့ၤဖဲလဲၣ်ဂ့ၤ ယဟိဝၤယွၤ သးအိၣ်ပှၤ

၆. ပှၤတဂၤ ကဲထီၣ် ပှၤတမှံၤလၢ ယဟိဝၤယွၤ အဒဲပူၤ သ့ဒ်လဲၣ် ဒီးယဟိဝၤယွၤ အဒဲန့ၣ် အိၣ်လၢတၢ်လီၢ် ဖဲလဲၣ်.

^၆ လၢလံာ်စီဆှံပူၤန့ၣ် ပထံၣ်ဘၣ်လၢ ပှၤသူဒဲဒ်သိး ကအိၣ်ဘှံး ဒီးအိၣ်သဒၢသးလၢ မူခိၣ်ကလံၤသီၣ်ဂီၤအဂီၢ်. ဒီးပှၤတမှံၤတဂၤ မ့ၢ်အိၣ်ကဒုလၢ ပှၤဒဲပူၤန့ၣ် ဒဲကစၢ် ကကွၢ်ထွဲအီၤဂ့ၤဂ့ၤ. ဒ်န့ၣ်အသိး ဖဲပဟ့ၣ်လုၢ်ထီၣ်သးလၢ ယဟိဝၤယွၤ အအိၣ်အခါ ပကဲထီၣ် အပှၤတမှံၤ လၢအဒဲပူၤ. (စံး ၆၁:၄) အဃိ ပဒိးန့ၢ်ဘၣ် နီၢ်သးတၢ်အီၣ် အါအါဂီၢ်ဂီၢ် ဒီးပရ့လိာ်ဘၣ်သးဒီး ပှၤအဂၤလၢ အကဲထီၣ် ယဟိဝၤယွၤ အပှၤတမှံၤ. တကးဒံးဘၣ် ပမ့ၢ်အိၣ်တၢ်လီၢ် ဖဲလဲၣ်ဂ့ၤ ဖဲလဲၣ်ဂ့ၤ ပကဲထီၣ် ပှၤတမှံၤလၢ ယဟိဝၤယွၤ အဒဲပူၤသ့. အဒိ ဘၣ်သ့ၣ်သ့ၣ် နလဲၤထီၣ်ဘၣ် တၢ်အိၣ်ဖှိၣ်ဖးဒိၣ်လီၤဆီ လၢထံကီၢ်အဂၤ ဒီးဖဲန့ၣ် နထံၣ်လိာ်သးဒီး ပှၤလၢ အကဲထီၣ် ပှၤတမှံၤလၢ ယဟိဝၤယွၤ အဒဲပူၤ. အဃိ ပထံၣ်ဘၣ်လၢ ယဟိဝၤယွၤ အဒဲန့ၣ် အိၣ်လၢ တၢ်လီၢ်အါတီၤ ဒီးပမ့ၢ်အိၣ် ဖဲလဲၣ်ဂ့ၤ ဖဲလဲၣ်ဂ့ၤ သနာ်က့ ပမ့ၢ်တီဒီး ယဟိဝၤယွၤ ဒီးဘူၣ်ထီၣ်ဘါထီၣ်အီၤန့ၣ် ပကဲထီၣ် ပှၤတမှံၤ လၢအဒဲပူၤသ့.—လီၣ် ၂၁:၃.

၇. ဘၣ်မနုၤအဃိ ပတဲလၢ ပှၤသးတီ လၢအသံကွံာ်တဖၣ် ကဲဒံး ယဟိဝၤယွၤ အပှၤတမှံၤ လၢအဒဲပူၤလဲၣ်. (ကွၢ်စ့ၢ်ကီးတၢ်ဂီၤ.)

^၇ မ့မ့ၢ် ပှၤသးတီ လၢအသံကွံာ်တဖၣ်ဟီမီၤ, မ့ၢ်အဝဲသ့ၣ်ကဲ ပှၤတမှံၤလၢ ယဟိဝၤယွၤ အဒဲပူၤဒံးဧါ. အဝဲသ့ၣ်ကဲ ယဟိဝၤယွၤ အပှၤတမှံၤဒံး. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ  ယဟိဝၤယွၤ တသးပ့ၤနီၣ် အဝဲသ့ၣ်ဘၣ် ဒီးယဟိဝၤယွၤ ထံၣ်ဝဲလၢ အဝဲသ့ၣ် အိၣ်မူဒံး. ဘၣ်ဃးဒီး တၢ်ဂ့ၢ်အံၤ ယ့ၣ်ၡူး တဲဝဲဒ်အံၤ. “လၢတၢ်ကွဲးနီၣ် ဘၣ်ဃးဒီး သပှီာ်တၤဆှုၣ်တခိၣ် အပူၤန့ၣ် စီၤမိၤၡ့ ပာ်ဖျါထီၣ်ဝဲလၢ ပှၤသံကဂဲၤဆၢထၢၣ် သမူထီၣ်က့ၤအဂ့ၢ် ခီဖျိ အဝဲကိး ယဟိဝၤယွၤ လၢ ‘စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤလီၤ.’ အဃိ ကစၢ်ယွၤ တမ့ၢ် ပှၤသံတဖၣ် အယွၤဘၣ်, မ့ၢ်ဝဲ ပှၤမူတဖၣ်အယွၤလီၤ. လၢကစၢ်ယွၤ အမဲာ်ညါန့ၣ် အဝဲသ့ၣ်ခဲလၢာ် မ့ၢ်ပှၤမူလီၤ.”—လူၤ ၂၀:၃၇, ၃၈.

ပဒိးန့ၢ်ဘၣ်အဘျုး ဒီးပအိၣ်ဒီးမူဒါ

၈. ပကဲဘၣ် ပှၤတမှံၤလၢ ယဟိဝၤယွၤ အဒဲပူၤအဃိ ပဒိးန့ၢ်ဘၣ် အဘျုးဒ်လဲၣ်.

^၈ တၢ်လၢဒဲန့ၣ် အကဲထီၣ် တၢ်အိၣ်ဘှံး ဒီးတၢ်အိၣ်သဒၢ အလီၢ်လၢ ကလံၤသီၣ်ဂီၤ အဂီၢ်သ့. ဒ်န့ၣ်အသိး ယဟိဝၤယွၤ အဒဲစ့ၢ်ကီး ဒီသဒၢဝဲ အပှၤတမှံၤလၢ တၢ်တမံၤဂ့ၤ တမံၤဂ့ၤလၢ ကမၤဟးဂီၤ အတၢ်ရ့လိာ်သးဒီးအီၤ ဒီးဟ့ၣ်အဝဲသ့ၣ် တၢ်မုၢ်လၢ်လၢ ခါဆူညါအဂီၢ်သ့. အဃိ ပမ့ၢ်ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤန့ၣ် မုၣ်ကီၤလံၢ် မၤဘၣ်ဒိပှၤ လီၤထူလီၤယိာ် တသ့ဘၣ်. (စံး ၃၁:၂၃; ၁ ယိၤ ၃:၈) တကးဒံးဘၣ် ခါဆူညါ လၢဟီၣ်ခိၣ်သီန့ၣ် ယဟိဝၤယွၤ ကဒီသဒၢ အသကိးလၢ အတီဒီးအီၤတဖၣ်လၢ တၢ်တမံၤဂ့ၤ တမံၤဂ့ၤလၢ ကမၤဟးဂီၤ အတၢ်ရ့လိာ်သးဒီးအီၤ ဒီးကဒီသဒၢစ့ၢ်ကီး အဝဲသ့ၣ်လၢ တၢ်သံ.—လီၣ် ၂၁:၄.

၉. ယဟိဝၤယွၤ ဘၣ်သးလၢ အပှၤတမှံၤတဖၣ် ကမၤမနုၤလဲၣ်.

^၉ ပကဲဘၣ် ပှၤတမှံၤလၢ ယဟိဝၤယွၤ အဒဲပူၤအဃိ မ့ၢ်ဝဲ တၢ်ခွဲးတၢ်ယာ်လၢ အဂ့ၤဒိၣ်မးတခါ. ဒီးခီဖျိလၢ ပကဲဘၣ် ယဟိဝၤယွၤ အပှၤတမှံၤအဃိ ပအိၣ်ဒီး တၢ်ရ့လိာ်သးဒီးအီၤ လီၤထူလီၤယိာ်သ့. အဃိ ပမ့ၢ်ဘၣ်သးဆဲးကဲ ယဟိဝၤယွၤ အပှၤတမှံၤန့ၣ် ပကဘၣ် မၤဒ်လဲၣ်. အဒိ ဖဲပှၤတဂၤကွဲမုာ်နၤ လၢအဟံၣ်အခါ နဘၣ်သးကဲ ပှၤတမှံၤလၢအဂ့ၤ ဒီးမၤတၢ်လၢ အဘၣ်ဟံၣ်ကစၢ်အသး. ဘၣ်သ့ၣ်သ့ၣ် တချုးလၢ နနုာ်လီၤလၢ ဟံၣ်ပူၤဒံးဘၣ်န့ၣ် ဟံၣ်ကစၢ်ကမၢ နဘ့ၣ်လီၤခီၣ်ဖံး ဒီးနသးအိၣ်မၤဒ် အတဲနၤအသိး. ဒ်န့ၣ်အသိး ပမ့ၢ်ဘၣ်သးဆဲးကဲ ပှၤတမှံၤလၢ ယဟိဝၤယွၤ အဒဲပူၤန့ၣ် ပကဘၣ် သ့ၣ်ညါ ယဟိဝၤယွၤ အတၢ်ဘၣ်သး. ဒီးတၢ်အဲၣ် ကထိၣ်ဟူးထိၣ်ဂဲၤထီၣ်ပှၤလၢ ပကဂုာ်ကျဲးစၢး “မၤတၢ်ဘၣ်အသးလၢ တၢ်ခဲလၢာ်အပူၤ.” (ကလီး ၁:၁၀) ယဟိဝၤယွၤန့ၣ် အကဲပသကိး တကးဒံးဘၣ် အကဲစ့ၢ်ကီး ပပါအိၣ်လၢမူခိၣ် ဒီးပကစၢ်ယွၤအဃိ ပကဘၣ် ပာ်ကဲအီၤ. (စံး ၂၅:၁၄) ပမ့ၢ် သ့ၣ်နီၣ်ထီၣ် တၢ်ဂ့ၢ်တထံၣ်အံၤန့ၣ် ပကပာ်ကဲ ယဟိဝၤယွၤ ထီဘိ. ပမ့ၢ်ပာ်ကဲ ယဟိဝၤယွၤန့ၣ် ကမၤစၢၤပှၤဒ်သိး ပကဟးဆှဲး တၢ်လၢ တဘၣ်အသးဘၣ်. ဒီးပကဘၣ်သး “လဲၤတၢ်ဒီး” ပကစၢ်ယွၤလၢ “တၢ်ဆီၣ်လီၤသး အပူၤ” ထီဘိ.—မံ ၆:၈.

ယဟိဝၤယွၤ တကွၢ်ဒိၣ်ဆံးအါစှၤ ပှၤအံၣ်စရ့လးဖိဘၣ်

၁၀-၁၁. ဖဲပှၤအံၣ်စရ့လးဖိ အိၣ်လၢ စံၤနါအပှၢ်မုၢ်ကနၢအခါ ယဟိဝၤယွၤ ရ့ဒီးအဝဲသ့ၣ်ဒ်လဲၣ် ဒီးဘၣ်မနုၤအဃိ ပတဲလၢ ယဟိဝၤယွၤ တကွၢ်ဒိၣ်ဆံးအါစှၤတၢ်ဘၣ်လဲၣ်.

^၁၀ ယဟိဝၤယွၤ တကွၢ်ဒိၣ်ဆံးအါစှၤ အပှၤတမှံၤဘၣ်. (ရိ ၂:၁၁) လၢညါ ဖဲပှၤအံၣ်စရ့လးဖိ အိၣ်လၢ စံၤနါအပှၢ်မုၢ်ကနၢအခါ ယဟိဝၤယွၤ ရ့ဒီးအဝဲသ့ၣ် ဂ့ၤဂ့ၤ ဒီးတကွၢ်ဒိၣ်ဆံးအါစှၤ အဝဲသ့ၣ်ဘၣ်.

^၁၁ ယဟိဝၤယွၤ မၤပူၤဖျဲးထီၣ် အပှၤဂီၢ်မုၢ်လၢ အဘၣ်ကဲကုၢ်လၢ ကီၢ်အဲၤကူပတူး ဝံၤအလီၢ်ခံ အဃုထၢထီၣ် ပှၤလုၢ်တၢ်ဒိၣ်တဖၣ်လၢ ကမၤတၢ်လၢ ဒဲစီဆှံ. ဒီးပထံၣ်ဘၣ်လၢ ယဟိဝၤယွၤ ဃုထၢထီၣ် ပှၤလ့ၤဝံဖိလၢ ကမၤတၢ်မၤလၢ ဒဲစီဆှံ. အဃိ ပှၤလၢ အမၤတၢ်လၢ ဒဲစီဆှံအပူၤ မ့တမ့ၢ် မၤတၢ်မၤလၢ အဘၣ်ထွဲဒီးဒဲစီဆှံန့ၣ် ယဟိဝၤယွၤ အဲၣ်အဝဲသ့ၣ် ဒိၣ်န့ၢ်ဒံး အခ့အပှၤ လၢအဂၤဒံးဧါ. တမ့ၢ်ဘၣ်. ယဟိဝၤယွၤ တကွၢ်ဒိၣ်ဆံးအါစှၤတၢ်ဘၣ်.

၁၂. ဖဲပှၤအံၣ်စရ့လးဖိ အိၣ်လၢ ပှၢ်မုၢ်ကနၢအခါ ယဟိဝၤယွၤ ပာ်ဖျါထီၣ်လၢ အတကွၢ်ဒိၣ်ဆံးအါစှၤ အဝဲသ့ၣ်ဘၣ်န့ၣ် တၢ်အုၣ်သး မနုၤအိၣ်လဲၣ်. (၂ မိၤၡ့ ၄၀:၃၈) (ကွၢ်စ့ၢ်ကီးတၢ်ဂီၤ.)

^၁၂ ပှၤအံၣ်စရ့လးဖိ တဂၤဂၤ မ့ၢ်မၤတၢ်လၢ ဒဲစီဆှံမ့ၢ်ဂ့ၤ တမၤဘၣ်မ့ၢ်ဂ့ၤ, မ့ၢ်အိၣ်ဘူးဒီး ဒဲစီဆှံမ့ၢ်ဂ့ၤ တအိၣ်ဘူးဘၣ်မ့ၢ်ဂ့ၤ အဝဲသ့ၣ် တဂၤဂ့ၤ တဂၤဂ့ၤ ကဲထီၣ် ယဟိဝၤယွၤ အသကိးသ့. အဒိ တၢ်အၢၣ်အထူၣ် ဒီးမ့ၣ်အူအထူၣ်န့ၣ် အိၣ်ဝဲလၢ  ဒဲစီဆှံ အဖီခိၣ်အဃိ ပှၤအံၣ်စရ့လးဖိခဲလၢာ် ထံၣ်ဘၣ်ဝဲ တၢ်လီၤလး တခါအံၤသ့. (ဖး ၂ မိၤၡ့ ၄၀:၃၈.) ဒီးပှၤအံၣ်စရ့လးဖိတဂၤ မ့ၢ်သူၣ်လီၤအဒဲ ယံၤကတၢၢ်ဒီး ဒဲစီဆှံ သနာ်က့ ဖဲတၢ်အၢၣ်အထူၣ် သုးသးလၢ တၢ်လီၢ်အဂၤ တတီၤအခါ အကွၢ်စိဝဲဖျါ. အဃိ အဘိၣ်ထီၣ် အတၢ်ဖိတၢ်လံၤ, ဃဲၣ်လီၤက့ၤအဒဲ ဒီးဟးထီၣ် တပူၤဃီဒီး ပှၤအံၣ်စရ့လးဖိ လၢအဂၤသ့. (၄ မိၤ ၉:၁၅-၂၃) တကးဒံးဘၣ် ဖဲပှၤအူထီၣ် ကွဲၤခံဖျၢၣ်လၢ ပှၤတ့အီၤလၢစ့ညၣ် ဒ်သိး ကဒုးသ့ၣ်ညါ ပှၤအံၣ်စရ့လးဖိခဲလၢာ်လၢ အဝဲသ့ၣ်ကဘၣ် သုးလီၢ်သုးကျဲအခါ အဝဲသ့ၣ် မ့ၢ်အိၣ်ယံၤဒီး ဒဲစီဆှံ သနာ်က့ အဝဲသ့ၣ်နၢ်ဟူဝဲ ကွဲၤအသီၣ်. (၄ မိၤ ၁၀:၂) အဃိ ပှၤအံၣ်စရ့လးဖိတဂၤ မ့ၢ်အိၣ်ဘူးဒီး ဒဲစီဆှံ သနာ်က့ ပတဲလၢ အအိၣ်ဒီး တၢ်ရ့လိာ်သးဒီး ယဟိဝၤယွၤ ဂ့ၤန့ၢ်ဒံး ပှၤအံၣ်စရ့လးဖိ လၢအအိၣ်ယံၤဒီး ဒဲစီဆှံ တသ့ဘၣ်. ဖဲအံၤ ပထံၣ်ဘၣ်လၢ ပှၤအံၣ်စရ့လးဖိခဲလၢာ် ကဲထီၣ် ယဟိဝၤယွၤ အပှၤတမှံၤသ့ ဒီးအဝဲသ့ၣ် နာ်န့ၢ် ယဟိဝၤယွၤလၢ ကဟံးစုနဲၣ်ကျဲ ဒီးဒီသဒၢအီၤသ့. ဒ်န့ၣ်အသိး ဆၢကတီၢ် ခဲအံၤစ့ၢ်ကီး ပမ့ၢ်အိၣ်လၢ တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ သနာ်က့ ပနာ်သ့သပှၢ်တၢၢ်လၢ ယဟိဝၤယွၤ အဲၣ်ပှၤ, သးအိၣ်ပှၤ ဒီးဒီသဒၢပှၤ.

ဆၢကတီၢ် ခဲအံၤစ့ၢ်ကီး ယဟိဝၤယွၤ တကွၢ်ဒိၣ်ဆံးအါစှၤတၢ်ဘၣ်

၁၃. ဆၢကတီၢ်ခဲအံၤ ယဟိဝၤယွၤ ပာ်ဖျါထီၣ်လၢ အတကွၢ်ဒိၣ်ဆံးအါစှၤတၢ်ဘၣ် ဒ်လဲၣ်.

^၁၃ ဆၢကတီၢ် ခဲအံၤစ့ၢ်ကီး ကစၢ်ယွၤ အခ့အပှၤတနီၤန့ၣ် အိၣ်ဘူးဒီး ဝဲၤလီၢ်ခိၣ်သ့ၣ် မ့တမ့ၢ် ယဟိဝၤပှၤအုၣ်အသး အဝဲၤတြၢ်. အဝဲသ့ၣ်တနီၤန့ၣ် မၤတၢ်လၢ တၢ်လီၢ်တဖၣ်အံၤ အဃိ အဝဲသ့ၣ် ရ့လိာ်သးဘူးဘူးဒီး ပှၤလၢ အတီခိၣ်ရိၤမဲတၢ် ဖဲန့ၣ်တဖၣ်. အဂၤတနီၤန့ၣ် ကဲဝဲ ပှၤလဲၤတရံး အံးက့ၤကွၢ်က့ၤတၢ် မ့တမ့ၢ် ပှၤမၤ ကစၢ်ယွၤတၢ်မၤ လၢဆၢကတီၢ်လၢပှဲၤလီၤဆီ. ပဝဲတနီၤ မ့ၢ်တဒိးန့ၢ်ဘၣ် တၢ်ခွဲးတၢ်ယာ်တဖၣ်အံၤဘၣ် သနာ်က့ ပနာ်သ့သပှၢ်တၢၢ်လၢ ယဟိဝၤယွၤ ပာ်ပှၤဒ်သိး အပှၤတမှံၤ ဒီးအအဲၣ် ပဝဲခဲလၢာ်ဒံး. အသ့ၣ်ညါ ပဝဲတဂၤဘၣ်တဂၤ ဂ့ၤဂ့ၤ ဒီးအဟ့ၣ်ပှၤ တၢ်လၢပလိၣ်ဘၣ်တဖၣ်. (၁ ပ့း ၅:၇) တကးဒံးဘၣ် ယဟိဝၤယွၤ ဟ့ၣ်လီၤ အခ့အပှၤခဲလၢာ်လၢ နီၢ်သးတၢ်အီၣ်, အဟံးစုနဲၣ်ကျဲအဝဲသ့ၣ် ဒီးဒီသဒၢအဝဲသ့ၣ်.

၁၄. ယဟိဝၤယွၤ ပာ်ဖျါထီၣ်လၢ အတကွၢ်ဒိၣ်ဆံးအါစှၤတၢ်ဘၣ် လၢကျဲအဂၤ ဒ်လဲၣ်.

 ^၁၄ ဆၢကတီၢ်ခဲအံၤ ယဟိဝၤယွၤ မၤဝဲဒ်သိး ပှၤအကလုာ်ကလုာ် ကဖးဘၣ်ဝဲ လံာ်စီဆှံအဃိ အပာ်ဖျါထီၣ်လၢ အတကွၢ်ဒိၣ်ဆံးအါစှၤတၢ်ဘၣ်. အဒိ လံာ်စီဆှံန့ၣ် ခီၣ်ထံးခါ ပှၤကွဲးဝဲလၢ ဧ့ၤဘြံၤ, အရၣ်မ့း ဒီးကြံးကျိာ်. အဃိ ပှၤလၢ အဖးလံာ်စီဆှံလၢ ကျိာ်တဖၣ်အံၤသ့န့ၣ် မ့ၢ်အတၢ်ရ့လိာ်သးဒီး ယဟိဝၤယွၤ ဂ့ၤဒိၣ်န့ၢ်ဒံး ပှၤလၢ အဖးလံာ်စီဆှံလၢ ကျိာ်တဖၣ်အံၤ တသ့ဘၣ်ဧါ. တမ့ၢ်ဒ်န့ၣ်ဘၣ်.—မး ၁၁:၂၅.

၁၅. ယဟိဝၤယွၤ တကွၢ်ဒိၣ်ဆံးအါစှၤတၢ်ဘၣ်န့ၣ် တၢ်အုၣ်သး မနုၤအိၣ်လဲၣ်. (ကွၢ်စ့ၢ်ကီးတၢ်ဂီၤ.)

^၁၅ ပတၢ်ကူၣ်ဘၣ်ကူၣ်သ့ ပတီၢ်မ့ၢ်တထီဘၣ် ဒီးပဖးလံာ်စီဆှံလၢ ပှၤကွဲးဝဲလၢ အခီၣ်ထံး မ့ၢ်တဘၣ်ဘၣ် သနာ်က့ ယဟိဝၤယွၤ ကွဲမုာ်ပှၤလၢ ပကကဲ အပှၤတမှံၤဒံး. ဒီးပမ့ၢ်အိၣ်ဒီး တၢ်ကူၣ်ဘၣ်ကူၣ်သ့လၢ အပတီၢ်ထီမ့ၢ်ဂ့ၤ ပတၢ်ကူၣ်ဘၣ်ကူၣ်သ့ မ့ၢ်တအိၣ်ဘၣ်မ့ၢ်ဂ့ၤ ယဟိဝၤယွၤ ဟ့ၣ်ပဝဲကိးဂၤဒဲးလၢ အတၢ်ကူၣ်သ့. တကးဒံးဘၣ် အကလုၢ်ကထါ လံာ်စီဆှံန့ၣ် ပှၤကွဲးကျိာ်ထံက့ၤလၢ ကျိာ်လၢ အကထိဘျဲၣ်ညါ. အဃိ ပှၤအိၣ်လၢ ဟီၣ်ခိၣ်ဒီဘ့ၣ်ညါ မၤလိန့ၢ် တၢ်သိၣ်လိလၢ လံာ်စီဆှံအပူၤ ဒီးကဲထီၣ် ကစၢ်ယွၤ အသကိးသ့.—၂ တံၤ ၃:၁၆, ၁၇.

ဆဲးကဲပှၤလၢ ယဟိဝၤယွၤ “တူၢ်လိာ်ဝဲ”

၁၆. ဒ် မၤတၢ် ၁၀:၃၄, ၃၅ ပာ်ဖျါထီၣ်ဝဲအသိး ပကဲပှၤလၢ ယဟိဝၤယွၤ တူၢ်လိာ်ဝဲ ကသ့ဒ်လဲၣ်.

^၁၆ ယဟိဝၤယွၤ ကွဲမုာ် ဒီးတူၢ်လိာ်ပှၤလၢ အဒဲပူၤန့ၣ် မ့ၢ်ဝဲတၢ်ခွဲးတၢ်ယာ် ဖးဒိၣ်တခါ. ယဟိဝၤယွၤန့ၣ် အကဲဟံၣ်ကစၢ်လၢ အသးဂ့ၤ, အိၣ်ဒီးတၢ်အဲၣ်တၢ်ကွံ ဒီးအအဲၣ် အပှၤတမှံၤဒိၣ်မး တကးဒံးဘၣ် အတကွၢ်ဒိၣ်ဆံးအါစှၤတၢ်ဘၣ်. ပမ့ၢ်ကဲ ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, အိၣ်တၢ်လီၢ် ဖဲလဲၣ်ဂ့ၤ, ဒိၣ်ထီၣ်ဘၣ် ဒ်လဲၣ်ဂ့ၤ, ပတၢ်ကူၣ်ဘၣ်ကူၣ်သ့, ကလုာ်ဒူၣ်, တၢ်ဆဲးတၢ်လၤ ဒီးသးနံၣ် မ့ၢ်တဒ်သိးလိာ်သးဘၣ် သနာ်က့ ယဟိဝၤယွၤ တူၢ်လိာ်ပဝဲခဲလၢာ်. ဘၣ်ဆၣ် ပမ့ၢ်ဒိကနၣ် ယဟိဝၤယွၤ အကလုၢ် ဒီးမၤတၢ်လၢ အဘၣ်အသးမၣ် ပကကဲဘၣ် အပှၤတမှံၤ.—ဖး မၤတၢ် ၁၀:၃၄, ၃၅.

၁၇. ဒ်သိး ပကဆဲးကဲဘၣ် ပှၤတမှံၤလၢ ယဟိဝၤယွၤ အဒဲပူၤအဂီၢ် ပဃုအါထီၣ် တၢ်ဂ့ၢ်လၢ ကမၤစၢၤပှၤ သ့ဖဲလဲၣ်.

^၁၇ ဖဲစံးထီၣ်ပတြၢၤ ၁၅:၁ န့ၣ် စီၤဒၤဝံး သံကွၢ်ဝဲလၢ “အိ ယဟိဝၤယွၤဧၢ, မတဂၤ ကကဲ ပှၤတမှံၤလၢ နဒဲပူၤလဲၣ်. မတဂၤ ကအိၣ်ဘၣ်လၢ နကစၢၢ်စီဆှံအလိၤလဲၣ်.” ဒီးယဟိဝၤယွၤ မၢစီၤဒၤဝံး ကွဲးလီၤစ့ၢ်ကီး တၢ်သံကွၢ်တဖၣ်အံၤ အတၢ်စံးဆၢ. အဃိ ဒ်သိး ပကမၤတၢ်လၢ အဘၣ်ယဟိဝၤယွၤအသး ဒီးဆဲးကဲဘၣ် အသကိး ထီဘိအဂီၢ် ပကဘၣ်မၤဒ်လဲၣ်. တၢ်မၤလိ လၢခံတခါ ကပာ်ဖျါထီၣ်န့ၢ်ပှၤ တၢ်ဂ့ၢ်တနီၤလၢ ပကဘၣ်မၤ.