ပှၤဖးလံာ်ဖိတဖၣ် အတၢ်သံကွၢ်
၂ သ့းစၤလနံ ၃:၁၄ တဲဝဲလၢ “ပာ်ပနီၣ်” ပှၤတဂၤဂၤ. တၢ်ကတိၤအံၤ အဲၣ်ဒိးတဲဝဲ တၢ်အိၣ်ဖှိၣ်သးပှၢ် ကဘၣ်ပာ်ပနီၣ် ပှၤတဂၤဂၤဧါ မ့တမ့ၢ် တၢ်အိၣ်ဖှိၣ်ဖိ ကဘၣ်ပာ်ပနီၣ်ဝဲဧါ.
တၢ်မၢဖိပီလူး ကွဲးန့ၢ် ခရံာ်ဖိလၢ အအိၣ်လၢ ဝ့ၢ်သ့းစၤလနံ ဒီးတဲဝဲလၢ “ပှၤတဂၤဂၤမ့ၢ်တဒိကနၣ် ပကလုၢ်ခီဖျိလၢ လံာ်ပရၢတဘ့ၣ်အံၤဘၣ်န့ၣ် ပာ်ပနီၣ်အီၤ.” (၂ သ့း ၃:၁၄) လၢညါန့ၣ် ပနၢ်ပၢၢ်လၢ တၢ်ဟံးစုနဲၣ်ကျဲအံၤ ကဲဝဲလၢ တၢ်အိၣ်ဖှိၣ်သးပှၢ်အဂီၢ်. ဒီးပှၤတဂၤလၢ ပှၤဟ့ၣ်ကူၣ်အီၤ ခဲအံၤခဲအံၤ ဘၣ်ဆၣ် အမ့ၢ်တဒိကနၣ် ဒီးမၤထွဲဝဲ တၢ်ဟ့ၣ်ကူၣ်ဘၣ်န့ၣ် တၢ်အိၣ်ဖှိၣ်သးပှၢ် ကဘၣ်ဟ့ၣ် တၢ်စံၣ်တဲၤတဲလီၤတၢ် ဘၣ်ဃးဒီး တၢ်ဟ့ၣ်ပလီၢ်လၢ တၢ်အိၣ်ဖှိၣ်ဖိအဂီၢ်. ဒီးဖဲန့ၣ်အလီၢ်ခံ တၢ်အိၣ်ဖှိၣ်ဖိ ကရ့ဒီးအီၤ ဖဲလၢအထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်အခါ ဘၣ်ဆၣ် အဝဲသ့ၣ် တဘၣ်ရ့ဒီးအီၤလၢ တၢ်ဆၢကတီၢ်အဂၤဘၣ်.
သနာ်က့ ခဲအံၤ ပဘၣ်မၤဘၣ်ထီၣ်က့ၤ ပတၢ်နၢ်ပၢၢ် ဘၣ်ဃးဒီး တၢ်ဂ့ၢ်အံၤ. စီၤပီလူး အတၢ်ဟံးစုနဲၣ်ကျဲအံၤ အဲၣ်ဒိးတဲဝဲ ဘၣ်ဃးဒီး ခရံာ်ဖိ တဂၤဂ့ၤ တဂၤဂ့ၤ အတၢ်ဆၢတဲာ် ဒီးအတၢ်ဆၢတဲာ်န့ၣ် ကသန့ၤထီၣ်သးလၢ တၢ်အိၣ်သး တမံၤမံၤအဖီခိၣ်. အဃိ တၢ်အိၣ်ဖှိၣ်သးပှၢ် တလိၣ်ဟ့ၣ် တၢ်စံၣ်တဲၤတဲလီၤတၢ် ဘၣ်ဃးဒီး တၢ်ဟ့ၣ်ပလီၢ်လၢ တၢ်အိၣ်ဖှိၣ်ဖိအဂီၢ်လၢၤဘၣ်. ဘၣ်မနုၤအဃိ ပမၤဘၣ်ထီၣ်က့ၤ ပတၢ်နၢ်ပၢၢ်လဲၣ်. ဖဲစီၤပီလူး ဟ့ၣ်ဝဲ တၢ်ဟံးစုနဲၣ်ကျဲအံၤအခါ အတဲတၢ်ဂ့ၢ်မနုၤလဲၣ်န့ၣ် ပကကွၢ်သကိး.
စီၤပီလူး သ့ၣ်ညါဘၣ်ဝဲလၢ ပှၤတနီၤလၢ တၢ်အိၣ်ဖှိၣ်အပူၤန့ၣ် “အိၣ်မူတကြၢးတဘၣ်ဘၣ်.” စီၤပီလူး ဟ့ၣ်အဝဲသ့ၣ် တၢ်ဟံးစုနဲၣ်ကျဲလၢ အဒိးသန့ၤထီၣ်သးလၢ လံာ်စီဆှံ သနာ်က့ အဝဲသ့ၣ် တဘၣ်သး ကနၣ်ဃုာ်ဝဲဘၣ်. လၢအပူၤကွံာ်တဘျီ ဖဲစီၤပီလူး လဲၤအိၣ်သကိး အဝဲသ့ၣ်အခါ စီၤပီလူး ဟ့ၣ်ကူၣ်အဝဲသ့ၣ်လၢ “ပှၤတဂၤဂၤ မ့ၢ်တအဲၣ်ဒိး မၤတၢ်ဘၣ်န့ၣ် အတကြၢးအီၣ်တၢ်ဘၣ်.” သနာ်က့ ပှၤတနီၤန့ၣ် အမၤတၢ်ကဲ ဘၣ်ဆၣ် လၢအကကွၢ်ထွဲလီၤ အနီၢ်ကစၢ်သး ဒီးလုၢ်အီၣ်လုၢ်အီ အဟံၣ်ဖိဃီဖိအဂီၢ် အတအဲၣ်ဒိးမၤတၢ်ဘၣ်. အဂၤတနီၤန့ၣ် အမၤဘၣ်ထွဲလိာ်သးဒီး ပှၤဂ့ၢ်လၢ အတဘၣ်ဃးဒီးအီၤဘၣ်. အဃိ ခရံာ်ဖိတဖၣ် ကဘၣ်ရ့ဒီး ပှၤတဖၣ်အံၤဒ်လဲၣ်.—၂ သ့း ၃:၆, ၁၀-၁၂.
စီၤပီလူး တဲဝဲလၢ “ပာ်ပနီၣ်အီၤ.” တၢ်ကတိၤအံၤ လၢကြံးကျိာ်န့ၣ် အဲၣ်ဒိးတဲဝဲလၢ ဒ်သိး ပှၤတဂၤအံၤ အတၢ်ပာ်သူၣ်ပာ်သး လၢအတဂ့ၤဘၣ်တဖၣ် တဒိၣ်စိလၢပဖီခိၣ် တဂ့ၤအဂီၢ် ပကဘၣ် ပာ်ပနီၣ်အီၤ ဒီးပလီၢ်ပသး ဘၣ်ဃးဒီးအီၤ. ဒီးတၢ်ဟံးစုနဲၣ်ကျဲအံၤ တမ့ၢ်ထဲလၢ တၢ်အိၣ်ဖှိၣ်သးပှၢ်အဂီၢ်ဘၣ်, ဘၣ်ဆၣ် တၢ်အိၣ်ဖှိၣ်ဖိခဲလၢာ် ကဘၣ်မၤထွဲဝဲစ့ၢ်ကီး. (၂ သ့း ၁:၁; ၃:၆) အဃိ ခရံာ်ဖိ တဂၤဂ့ၤ တဂၤဂ့ၤ မ့ၢ်သ့ၣ်ညါဘၣ်လၢ ဒီပုၢ်ဝဲၢ်မုၣ်ခွါ တဂၤဂၤ တမၤထွဲ တၢ်ဟ့ၣ်ကူၣ်လၢ လံာ်စီဆှံအပူၤဘၣ်န့ၣ် အဝဲသ့ၣ် အနီၢ်ကစၢ် ကဘၣ်ဆၢတဲာ်လီၤသးလၢက “ပတုာ် တၢ်ရ့လိာ်သးဒီးအီၤ.”
မ့မ့ၢ်ဒ်န့ၣ် စီၤပီလူး အတၢ်ဟ့ၣ်ကူၣ်အံၤ အဲၣ်ဒိးတဲဝဲလၢ ပကဘၣ်ထံၣ် ပှၤတဂၤအံၤ ဒ်သိးဒီး ပှၤလၢ ပှၤထုးထီၣ်ကွံာ်အီၤ လၢတၢ်အိၣ်ဖှိၣ်အပူၤဧါ. ပတဘၣ်ထံၣ်အီၤ ဒ်န့ၣ်ဘၣ်. စီၤပီလူး ဆဲးတဲဝဲလၢ “ဆဲးဟ့ၣ်ကူၣ်ဟ့ၣ်ဖးအီၤ ဒ်အမ့ၢ်ဒီပုၢ်ဝဲၢ်တဂၤ အသိး.” အဃိ ဖဲပှၤတဂၤအံၤ ဟဲထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်အခါ ပရ့ဒီးအီၤသ့. ဘၣ်ဆၣ် ပတဘၣ်ရ့ဒီးအီၤလၢ တၢ်ဆၢကတီၢ်အဂၤဘၣ်. ပမ့ၢ်တရ့ဒီးအီၤလၢ တၢ်ဆၢကတီၢ်အဂၤဘၣ်န့ၣ် အကသ့ၣ်ညါလီၤအသး ဒီးဘၣ်သ့ၣ်သ့ၣ် အကဆီတလဲက့ၤအသး.—၂ သ့း ၃:၁၄, ၁၅.
ဆၢကတီၢ်ခဲအံၤ ပကဘၣ်မၤထွဲ စီၤပီလူး အတၢ်ဟ့ၣ်ကူၣ်အံၤဒ်လဲၣ်. ပှၤလၢပပာ်ပနီၣ်အီၤတဂၤအံၤ စီၤပီလူး တအဲၣ်ဒိးတဲဝဲ ဘၣ်ဃးဒီး ပှၤတဂၤဂၤလၢ အဆၢတဲာ်တၢ် ဒ်အသးလၢအသ့ၣ်ညါဒၣ်တၢ် အိၣ်ဝဲအသိး ဘၣ်ဆၣ် အတၢ်ဆၢတဲာ်န့ၣ် တထီဒါ လံာ်စီဆှံ အတၢ်သိၣ်တၢ်သီန့ၣ်ဘၣ်. ဒီးအတတဲဝဲ ဘၣ်ဃးဒီး ပှၤလၢအတၢ်ထံၣ် တဒ်သိးဒီးပှၤဘၣ် ဒီးပှၤလၢ အမၤဘၣ်ဒိဘၣ် ပသးန့ၣ်ဘၣ်. နီၢ်ကီၢ်န့ၣ် စီၤပီလူး အဲၣ်ဒိးတဲဝဲ ဘၣ်ဃးဒီး ပှၤတဂၤဂၤလၢ ပှၤဟ့ၣ်ကူၣ်အီၤ ခဲအံၤခဲအံၤ ဘၣ်ဆၣ် အပာ်လီၤသးလၢ အတမၤထွဲ တၢ်ဟ့ၣ်ကူၣ်ဘၣ်. အဃိ အဆိကတၢၢ်န့ၣ် ပကဘၣ်သ့ၣ်ညါလၢ ပှၤတဂၤအံၤ အိၣ်မူ “တကြၢးတဘၣ်” နီၢ်ကီၢ်ဧါ.
ပမ့ၢ်သ့ၣ်ညါလၢ ဒီပုၢ်ဝဲၢ်မုၣ်ခွါ တဂၤဂၤ တမၤထွဲ တၢ်ဟ့ၣ်ကူၣ် လၢလံာ်စီဆှံအပူၤဘၣ်န့ၣ် a ဖဲအဟဲထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်အခါ ပရ့ဒီးအီၤသ့, သနာ်က့ ပကဆၢတဲာ်လီၤသးလၢ ပတရ့ဒီးအီၤလၢ တၢ်ဆၢကတီၢ်အဂၤလၢၤဘၣ်. ဒီးခီဖျိလၢ တၢ်ဆၢတဲာ်အံၤ ကဲဝဲပနီၢ်ကစၢ် တၢ်ဆၢတဲာ်အဃိ ပမ့ၢ်ဘၣ်သးတဲသကိးဒီး ပဟံၣ်ဖိဃီဖိလၢ အအိၣ်တပူၤဃီဒီးပှၤန့ၣ် ပတဲသ့, ဘၣ်ဆၣ် ပတတဲဘၣ်ပှၤဂၤဘၣ်. ဒီးလၢခံ အမ့ၢ်ဆီတလဲက့ၤ အတၢ်ပာ်သး ဒီးလုၢ်လၢ်သကဲာ်ပဝးမး ပကရ့ဒီးအီၤလၢ တၢ်ဆၢကတီၢ်အဂၤ.
a အဒိ ခရံာ်ဖိတနီၤန့ၣ် ဘၣ်သ့ၣ်သ့ၣ် အမၤတၢ်ကဲ ဘၣ်ဆၣ် အတအဲၣ်ဒိးမၤတၢ်ဘၣ်, အပာ်တၢ်အဲၣ်တီဒီး ပှၤတၢ်ချၢ, အတဲအါတၢ် ဘၣ်ဃးဒီး ပတၢ်ကရၢကရိ အတၢ်ဟံးစုနဲၣ်ကျဲ မ့တမ့ၢ် အတဲအီၣ်ပှၤဂ့ၢ်. (၁ ကရံၣ် ၇:၃၉; ၂ ကရံၣ် ၆:၁၄; ၂ သ့း ၃:၁၁, ၁၂; ၁ တံၤ ၅:၁၃) အဝဲသ့ၣ် မ့ၢ်ဆဲးမၤ တၢ်သ့ၣ်တဖၣ်အံၤန့ၣ် အဝဲသ့ၣ် ကဲပှၤလၢအ “အိၣ်မူတကြၢးတဘၣ်ဘၣ်.”
