တၢ်သးဝံၣ်န့ၣ် အရ့ဒိၣ်လၢ ပှၤအံၣ်စရ့လးဖိလၢညါ အဂီၢ်ဒိၣ်မး. ဒီးလံာ်စီဆှံ ပာ်ဖျါထီၣ်ဝဲ ပှၤဒ့တၢ်အူတၢ် ဒီးပှၤသးဝံၣ်တၢ်အဂ့ၢ် တဘျုးဘျီညါ. ပမ့ၢ်ဘၣ်ကွၢ် လံာ်စီဆှံန့ၣ် ပှၤကွဲးဝဲ ဒ်သိးဒီးထါသးဝံၣ် အိၣ်တဘျုးကတြူၢ်ညါ. အဒိ စံးထီၣ်ပတြၢၤ, တၢ်သးဝံၣ်တဖၣ်အတၢ်သးဝံၣ် ဒီးသးသယုၢ်တၢ်န့ၣ် အကဲဝဲ ထါသးဝံၣ်. အဃိ လံာ်တဘ့ၣ် လၢအမ့ၢ် Music in Biblical Life တဲဝဲလၢ လံာ်စီဆှံ “ပာ်ဖျါထီၣ်ဝဲ ၡဲၡဲလၢ ပှၤအံၣ်စရ့လးဖိလၢညါန့ၣ် အဝဲသ့ၣ်သူဝဲ တၢ်သးဝံၣ် လၢအတၢ်အိၣ်မူ တဘျုးသနၢၣ်ညါ.”

တၢ်သးဝံၣ်လၢ တၢ်အိၣ်မူ ကိးနံၤဒဲးအဂီၢ်. ပှၤအံၣ်စရ့လးဖိလၢညါန့ၣ် အဝဲသ့ၣ် ပာ်ဖျါထီၣ် အတၢ်တူၢ်ဘၣ်ခီဖျိ တၢ်ဒ့တၢ်အူ ဒီးတၢ်သးဝံၣ်. (ၡါ ၃၀:၂၉) အဒိ ဖဲပှၤပာ်ထီၣ် စီၤပၤအသီ, သုးဖိတဖၣ်လဲၤဒုးတၢ်နၢၤ ဒီးပှၤမၤဘူၣ်လၢ တၢ်ဘူၣ်ထီၣ်ဘါထီၣ် အဂီၢ်အခါ ပိာ်မုၣ်တဖၣ် ဒိသီၣ်ဝဲ တၢ်ခြ့ခြ့, ဂဲၤကလံၣ် ဒီးသးဝံၣ်တၢ် လၢတၢ်သးခု. (စံၣ်ညီၣ် ၁၁:၃၄; ၁ မူၤ ၁၈:၆, ၇; ၁ စီၤပၤ ၁:၃၉, ၄၀) တကးဒံးဘၣ် ဖဲပှၤတဂၤသံအခါ ပှၤအံၣ်စရ့လးဖိတဖၣ် သးဝံၣ်ဝဲထါဟီၣ် ဒ်သိးကပာ်ဖျါထီၣ်လၢ အသးအုး. (၂ ကွဲး ၃၅:၂၅) အဃိ လံာ်တဘ့ၣ် လၢအမ့ၢ် McClintock and Strong’s Cyclopedia ပာ်ဖျါထီၣ်ဝဲလၢ “ပှၤဧ့ၤဘြံၤဖိလၢညါန့ၣ် အဝဲသ့ၣ် ဘၣ်သူၣ်ဘၣ်သး တၢ်သးဝံၣ်ဒိၣ်မး.”

တၢ်သးဝံၣ်လၢ စီၤပၤအနီပူၤ. အံၣ်စရ့လး အစီၤပၤလၢညါစ့ၢ်ကီး အဝဲသ့ၣ် ဘၣ်သူၣ်ဘၣ်သး တၢ်သးဝံၣ်ဒိၣ်မး. အဒိ စီၤပၤစီလူး ကိးန့ၢ်ဝဲ စီၤဒၤဝံး ဒီးမၢအဒ့တနၢ် လၢအနီပူၤ. (၁ မူၤ ၁၆:၁၈, ၂၃) လၢခံ ဖဲစီၤဒၤဝံး ကဲထီၣ်စီၤပၤအခါ အတ့ထီၣ် တၢ်ဒ့တၢ်အူ အတၢ်ပီးတၢ်လီ, ကွဲးတၢ်သးဝံၣ်လၢအမုာ် ဒီးရဲၣ်ကျဲၤဝဲ ပှၤဒ့တၢ်ဖိလၢ ကဒ့တၢ်သးဝံၣ်လၢ ယဟိဝၤယွၤ အတၢ်လုၢ်ဟံၣ်. (၂ ကွဲး ၇:၆; ဧၤ ၆:၅) စီၤပၤၡလိၤမိၤစ့ၢ်ကီး အအိၣ်ဒီး အပှၤသးဝံၣ်တၢ်ဖိ လၢအမ့ၢ် ပှၤပိာ်မုၣ် ဒီးပှၤပိာ်ခွါတဖၣ်.—စံၣ် ၂:၈.

တၢ်သးဝံၣ်လၢ တၢ်ဘူၣ်ထီၣ်ဘါထီၣ်အဂီၢ်. ဖဲပှၤအံၣ်စရ့လးဖိ ဘူၣ်ထီၣ်ဘါထီၣ် ယဟိဝၤယွၤအခါ အဝဲသ့ၣ် သးဝံၣ်တၢ်စ့ၢ်ကီး. အဒိ ပှၤဒ့တၢ်အူတၢ် အဂၤ ၄,၀၀၀ ဒ့တၢ်ဖဲ တၢ်လုၢ်ဟံၣ် လၢဝ့ၢ်ယရူၤၡလ့ၣ်အပူၤ. (၁ ကွဲး ၂၃:၅) အဝဲသ့ၣ် ဒဲဝဲစှၢၣ်စှံး, ဒ့ဝဲသီတူၢ်, တနၢ် ဒီးအူထီၣ်ကွဲၤ. (၂ ကွဲး ၅:၁၂) ဘၣ်ဆၣ် ပှၤလၢအသူတၢ်သးဝံၣ် လၢတၢ်ဘူၣ်ထီၣ်ဘါထီၣ် အဂီၢ်န့ၣ် တမ့ၢ်ထဲ ပှၤဒ့တၢ်ဖိလၢ အဖၠဲးတဖၣ်အံၤဘၣ်. ကိးနံၣ်ဒဲး ဖဲပှၤအံၣ်စရ့လးဖိအါဂၤ ကလဲၤမၤဘူၣ်လၢ ဝ့ၢ်ယရူၤၡလ့ၣ်အခါ လၢကျဲန့ၣ် အဝဲသ့ၣ်သးဝံၣ်ဝဲ တၢ်လဲၤထီၣ်အတၢ်သးဝံၣ်. (စံး ၁၂၀-၁၃၄) ဒီးပှၤယူဒၤဖိ အတၢ်ကွဲးတခါ ပာ်ဖျါထီၣ်ဝဲလၢ ဖဲပှၤအံၣ်စရ့လးဖိ မၤဝဲဘူၣ်လဲၤကပာ်အခါ အဝဲသ့ၣ်သးဝံၣ် တၢ်သးဝံၣ်တနီၤလၢ လံာ်စံးထီၣ်ပတြၢၤ a အပူၤ.

ဆၢကတီၢ်ခဲအံၤ ကစၢ်ယွၤ အပှၤဂီၢ်မုၢ် ထံၣ်ဝဲလၢ တၢ်သးဝံၣ်န့ၣ် အမ့ၢ်တၢ်လၢ အရ့ဒိၣ်ဒံး. (ယၤ ၅:၁၃) ဖဲပဘူၣ်ထီၣ်ဘါထီၣ် ယဟိဝၤယွၤအခါ ပသးဝံၣ်စံးထီၣ်ပတြၢၤအီၤ. (အ့း ၅:၁၉) တၢ်သးဝံၣ် စံးထီၣ်ပတြၢၤ ယဟိဝၤယွၤန့ၣ် အမၤဃူမၤဖိးပှၤဒီး ဒီပုၢ်ဝဲၢ်မုၣ်ခွါ. (ကလီး ၃:၁၆) ဒီးတၢ်သးဝံၣ်န့ၣ် အမၤဆူၣ်ထီၣ်ပသး ဖဲပလဲၤခီဖျိ တၢ်ကီတၢ်ခဲအခါ. (မၤတၢ် ၁၆:၂၅) အဃိ တၢ်သးဝံၣ်န့ၣ် အကဲဝဲ ကျဲတဘိလၢ ပပာ်ဖျါထီၣ် ပတၢ်နာ်န့ၢ် ယဟိဝၤယွၤ ဒီးဖဲပသးဝံၣ် စံးထီၣ်ပတြၢၤအီၤအခါ ပပာ်ဖျါလၢ ပအဲၣ်အီၤ.