တၢ်မၤလိ ၄၁
တၢ်သးဝံၣ် ၁၃ ခရံာ်, မ့ၢ်ပှၤဒိဂ့ၤတဲာ်ဘၣ်လၢပဂီၢ်
ယ့ၣ်ၡူးအိၣ်လၢ ဟီၣ်ခိၣ်ချၢ အလီၢ်ခံကတၢၢ် အသီ ၄၀ န့ၣ်ပန့ၢ်ဘၣ် တၢ်မၤလိဒ်လဲၣ်
“လၢအသီ ၄၀ အတီၢ်ပူၤန့ၣ် အဝဲသ့ၣ် ထံၣ်ဘၣ်အီၤဒီး အဝဲတဲဘၣ်ဃးဒီး ကစၢ်ယွၤအဘီမုၢ်အဂ့ၢ်လီၤ.”—မၤတၢ် ၁:၃.
တၢ်ဂ့ၢ်မိၢ်ပှၢ်
ဖဲယ့ၣ်ၡူးအိၣ်လၢ ဟီၣ်ခိၣ်ချၢ အလီၢ်ခံကတၢၢ် အသီ ၄၀ န့ၣ် အပာ်လီၤ တၢ်ဒိတၢ်တဲာ် ဒ်လဲၣ် ဒီးပကွၢ်လိအီၤ ကသ့ဒ်လဲၣ်.
၁-၂. ဖဲယ့ၣ်ၡူး အပျဲၢ်အဘီၣ်ခံဂၤ လဲၤလၢသဝီအ့းမၤအူအခါ လၢကျဲန့ၣ် တၢ်ကဲထီၣ်သးဒ်လဲၣ်.
ဖဲ ခ.န ၃၃ လါနံစၣ် ၁၆ သီန့ၣ် ယ့ၣ်ၡူး အပျဲၢ်အဘီၣ်တဖၣ် သူၣ်အုးသးအုး ဒီးပျံၤတၢ်ဒိၣ်မး. အဃိ အပျဲၢ်အဘီၣ်အကျါခံဂၤ ဟးထီၣ်ဝဲလၢ ယရူၤၡလ့ၣ် ဒီးလဲၤဝဲလၢ သဝီအ့းမၤအူ. သဝီအံၤ အယံၤဝဲဒီး ဝ့ၢ်ယရူၤၡလ့ၣ် ၁၁ ကံလိမံထၢၣ် (၇ မံးလာ်). ခီဖျိလၢ ပှၤမၤသံ ယ့ၣ်ၡူးအဃိ အပျဲၢ်အဘီၣ်ခံဂၤလၢ အပိာ်ဘၣ်အခံန့ၣ် အသးဘၣ်ဒိဒိၣ်မး. ဖျါလၢ အဝဲသ့ၣ် တၢ်မုၢ်လၢ် ဘၣ်ဃးဒီး တၢ်လၢမ့းၡံအၤ ကမၤန့ၢ် ပှၤယူဒၤဖိန့ၣ် ဟးဂီၤကွံာ်ဝဲ. သနာ်က့ တၢ်လၢအဝဲသ့ၣ် တမုၢ်လၢ်ဝဲဘၣ်န့ၣ် ဟဲကဲထီၣ်သးတခါ.
၂ ဖဲယ့ၣ်ၡူး အပျဲၢ်အဘီၣ်ခံဂၤ လဲၤလၢကျဲအခါ ပှၤလၢအတသ့ၣ်ညါဝဲတဂၤ ပိာ်ထီၣ်အဝဲသ့ၣ်အခံ. အဝဲသ့ၣ်တဲပၠး ပှၤတဂၤန့ၣ်လၢ တၢ်ကဲထီၣ်သးဒီး ယ့ၣ်ၡူးဒ်အံၤန့ၣ် အဝဲသ့ၣ် သးတမုာ်ဘၣ်. ဝံၤဒီး ပှၤတဂၤန့ၣ် တဲဘၣ်အဝဲသ့ၣ် တၢ်ဂ့ၢ်လၢ အဝဲသ့ၣ် သးပ့ၤနီၣ်ဝဲ တန့ၢ်နီတဘျီဘၣ်. ပှၤတဂၤန့ၣ် တဲဖျါထီၣ်တၢ်ဂ့ၢ် “စးထီၣ်လၢ စီၤမိၤၡ့ အတၢ်ကွဲးအသး တုၤလီၤလၢ ဝံအတၢ်ကွဲးအသး ခဲလၢာ်.” ဒီးအၡဲပၠးဝဲလၢ ဘၣ်မနုၤအဃိ မ့းၡံအၤ ကဘၣ် တၢ်မၤနးမၤဖှီၣ် ဒီးကဘၣ်တၢ်မၤသံအီၤအဂ့ၢ်. ဖဲအဝဲသ့ၣ်သၢဂၤ လဲၤတုၤလၢ သဝီအ့းမၤအူအခါ ယ့ၣ်ၡူး အပျဲၢ်အဘီၣ်ခံဂၤအံၤ သ့ၣ်ညါထီၣ်က့ၤဝဲလၢ ပှၤတဂၤအံၤ အကဲဝဲ ယ့ၣ်ၡူး လၢကစၢ်ယွၤ မၤသမူထီၣ်က့ၤအီၤ. အဝဲသ့ၣ် သ့ၣ်ညါဝဲလၢ မ့းၡံအၤမူဝဲအဃိ ထံၣ်တမှံကွၢ်လၢ အဝဲသ့ၣ် ကသးခုထဲလဲၣ်.—လူၤ ၂၄:၁၃-၃၅.
၃-၄. (က) ယ့ၣ်ၡူး ဟ့ၣ်ဂံၢ်ဟ့ၣ်ဘါ အပျဲၢ်အဘီၣ်အဃိ ကဲဘျုးလၢ အဝဲသ့ၣ်အဂီၢ်ဒ်လဲၣ်. (မၤတၢ် ၁:၃) (ခ) လၢတၢ်မၤလိအံၤ ပကသ့ၣ်ညါဘၣ် တၢ်ဂ့ၢ်မနုၤလဲၣ်.
၃ တချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ် ဒီးဖဲအအိၣ်လၢ ဟီၣ်ခိၣ်ချၢ အလီၢ်ခံကတၢၢ် အသီ ၄၀ န့ၣ် အလီၣ်ဖျါထီၣ်သးလၢ အပျဲၢ်အဘီၣ်အမဲာ်ညါ တဘျုးဘျီညါ. a (ဖး မၤတၢ် ၁:၃.) ဖဲန့ၣ်အခါ ယ့ၣ်ၡူးဟ့ၣ်ဂံၢ်ဟ့ၣ်ဘါ အပျဲၢ်အဘီၣ်လၢ အသးအုး ဒီးအပျံၤတၢ်တဖၣ်. အဃိ အဝဲသ့ၣ်သးခုထီၣ်က့ၤ ဒီးသးဆူၣ်ထီၣ်လၢ ကလဲၤစံၣ်တဲၤတဲလီၤတၢ် ဒီးသိၣ်လိပှၤဂၤ တၢ်သးခုကစီၣ် ဘၣ်ဃးဒီး ကစၢ်ယွၤ အဘီအမုၢ်အဂ့ၢ်.
၄ ပမ့ၢ်မၤလိ ဘၣ်ဃးဒီး ယ့ၣ်ၡူးအိၣ်လၢ ဟီၣ်ခိၣ်ချၢ အလီၢ်ခံကတၢၢ် အသီ ၄၀ အဂ့ၢ်န့ၣ် ပကန့ၢ်ဘၣ် အဘျုးအါမး. လၢတၢ်မၤလိအံၤ ပကသ့ၣ်ညါဘၣ် ယ့ၣ်ၡူးသူဝဲ အတၢ်ဆၢကတီၢ်လၢ (၁) အဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်, (၂) အမၤစၢၤ အပျဲၢ်အဘီၣ်လၢ ကနၢ်ပၢၢ်အါထီၣ် လံာ်စီဆှံတၢ်ကွဲးအသး, (၃) အသိၣ်လိပာ်စၢၤ အပျဲၢ်အဘီၣ်လၢ မူဒါလၢအဝဲသ့ၣ် ကဘၣ်မၤဝဲ လၢခါဆူညါအဂီၢ်. ဒီးဒ်သိး ပကွၢ်လိ ယ့ၣ်ၡူးအဒိအတဲာ် ကသ့အဂီၢ် တၢ်ဂ့ၢ်သၢခါအံၤ ကမၤစၢၤပှၤ.
ဟ့ၣ်ဂံၢ်ဟ့ၣ်ဘါပှၤဂၤ
၅. ဘၣ်မနုၤအဃိ ယ့ၣ်ၡူးအပျဲၢ်အဘီၣ်တဖၣ် လိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလဲၣ်.
၅ ဘၣ်မနုၤအဃိ ယ့ၣ်ၡူးအပျဲၢ်အဘီၣ်တဖၣ် လိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလဲၣ်. ပထံၣ်ဘၣ်လၢ အဝဲသ့ၣ်တနီၤန့ၣ် ပိာ်ယ့ၣ်ၡူးအခံအဃိ ဘၣ်ပာ်တ့ၢ်ကွံာ် အဟံၣ်အဃီ, အဟံၣ်ဖိဃီဖိ ဒီးအတၢ်ဖံးတၢ်မၤ. (မး ၁၉:၂၇) အဂၤတနီၤန့ၣ် ခီဖျိလၢအကဲထီၣ် ယ့ၣ်ၡူး အပျဲၢ်အဘီၣ်အဃိ ပှၤတရ့အဝဲသ့ၣ်ဂ့ၤဂ့ၤဘၣ်. (ယိၤ ၉:၂၂) ဒီးခီဖျိလၢ အဝဲသ့ၣ်နာ်ဝဲလၢ ယ့ၣ်ၡူးန့ၣ်ကဲဝဲ မ့းၡံအၤအဃိ အဝဲသ့ၣ်သးအိၣ် ဆီတလဲအတၢ်အိၣ်မူ ဒီးတူၢ်ဆါအသး. (မး ၁၆:၁၆) သနာ်က့ ဖဲပှၤမၤသံ ယ့ၣ်ၡူးအခါ အဝဲသ့ၣ် ဆိကမိၣ်ဝဲလၢ အတၢ်မုၢ်လၢ် တအိၣ်လၢၤဘၣ် ဒီးအသးလီၤစၢ်ဒိၣ်မး.
၆. ဖဲယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံ အဝဲမၤမနုၤလဲၣ်.
၆ ယ့ၣ်ၡူး သ့ၣ်ညါဝဲလၢ ဖဲအသံအခါ အပျဲၢ်အဘီၣ်တဖၣ် ကသူၣ်အုးသးအုး ဒီးအဝဲသ့ၣ်သးအုးန့ၣ် တမ့ၢ်ခီဖျိလၢ အဝဲသ့ၣ်တၢ်နာ် လီၤစှၤအဃိဘၣ်. အဃိ ဖဲယ့ၣ်ၡူး ဂဲၤဆၢထၢၣ် သမူထီၣ်က့ၤ တနံၤဃီဃီန့ၣ် အဟ့ၣ်ဂံၢ်ဟ့ၣ်ဘါဝဲ အပျဲၢ်အဘီၣ်တဖၣ်. အဆိကတၢၢ်န့ၣ် ဖဲနီၢ်မၤရံ မၤကဒၤလ့ၣ် ဟီၣ်ဝဲဖဲ ယ့ၣ်ၡူး အသွၣ်ခိၣ်ခီၣ်ထံးအခါ ယ့ၣ်ၡူးလီၣ်ဖျါထီၣ်သး လၢအမဲာ်ညါ. (ယိၤ ၂၀:၁၁, ၁၆) ဒီးအလီၣ်ဖျါထီၣ်စ့ၢ်ကီးအသးလၢ အပျဲၢ်အဘီၣ်ခံဂၤ လၢအလဲၤလၢ သဝီအ့းမၤအူ ဝံၤဒီး အလီၣ်ဖျါထီၣ်အသးလၢ တၢ်မၢဖိပ့းတရူး အမဲာ်ညါ. (လူၤ ၂၄:၃၄) ပန့ၢ်ဘၣ်တၢ်မၤလိလၢ ယ့ၣ်ၡူး အဒိအတဲာ်ဒ်လဲၣ်. ခဲအံၤ ပကတဲသကိးဆိ ဖဲယ့ၣ်ၡူးလီၣ်ဖျါထီၣ်သးလၢ နီၢ်မၤရံ မၤကဒၤလ့ၣ် အမဲာ်ညါအခါ တၢ်ကဲထီၣ်သးဒ်လဲၣ်.
၇. ယ့ၣ်ၡူးထံၣ်ဝဲ တၢ်ကဲထီၣ်သးဒီး နီၢ်မၤရံ မၤကဒၤလ့ၣ်ဒ်လဲၣ် ဒီးယ့ၣ်ၡူး မၤစၢၤအီၤဒ်လဲၣ်. (ယိၤဟၣ် ၂၀:၁၁-၁၆) (ကွၢ်စ့ၢ်ကီးတၢ်ဂီၤ.)
၇ ဖး ယိၤဟၣ် ၂၀:၁၁-၁၆. ဖဲလါနံစၣ် ၁၆ သီ ဂီၤခီဂီၤဂီၤန့ၣ် ပိာ်မုၣ်လၢ အသးတီတနီၤ လဲၤဝဲလၢ ယ့ၣ်ၡူးအသွၣ်ခိၣ် ဘၣ်ဆၣ် အဝဲသ့ၣ်တထံၣ် ယ့ၣ်ၡူး အစိၣ်လၢၤဘၣ်. (လူၤ ၂၄:၁, ၁၀) လၢပိာ်မုၣ်တဖၣ်အကျါန့ၣ် ပၣ်ဃုာ်ဒီး နီၢ်မၤရံ မၤကဒၤလ့ၣ်. ဆိကမိၣ်ကွၢ် အတၢ်လဲၤခီဖျိအံၤ. ဖဲနီၢ်မၤရံ လဲၤတုၤလၢ ယ့ၣ်ၡူးအသွၣ်ခိၣ်အခါ အတထံၣ် ယ့ၣ်ၡူး အစိၣ်လၢၤဘၣ်. အဃိ အကရီက့ၤ ဒီးတဲဘၣ် စီၤပ့းတရူး ဒီးစီၤယိၤဟၣ်. ဒီးဖဲစီၤပ့းတရူး ဒီးစီၤယိၤဟၣ် လဲၤဃ့ၢ်လၢ တၢ်သွၣ်ခိၣ်အခါ အလဲၤဃ့ၢ်ပိာ်ဝဲအခံ. စီၤပ့းတရူး ဒီးစီၤယိၤဟၣ် တထံၣ်ယ့ၣ်ၡူးအစိၣ် လၢတၢ်သွၣ်ခိၣ်လၢၤဘၣ်အဃိ အဝဲသ့ၣ် ဟဲက့ၤကဒါလၢဟံၣ်. မ့မ့ၢ် နီၢ်မၤရံန့ၣ် အအိၣ်တ့ၢ်ဖဲ တၢ်သွၣ်ခိၣ် ဒီးအဟီၣ်ဝဲ. ယ့ၣ်ၡူးအိၣ်ဖဲန့ၣ်န့ၣ် အတသ့ၣ်ညါဝဲဘၣ်. ယ့ၣ်ၡူးထံၣ်ဝဲ ပိာ်မုၣ်လၢအသးတီတဂၤအံၤ ဟီၣ်ဝဲအဃိ အအဲၣ်ဒိး မၤမုာ်ထီၣ်က့ၤအသး. အဃိ ယ့ၣ်ၡူး လီၣ်ဖျါထီၣ်သးလၢ နီၢ်မၤရံ အမဲာ်ညါ ဝံၤဒီးမၤတၢ်ယိယိဖိ တခါလၢ အမၤဆူၣ်ထီၣ်က့ၤ အဂံၢ်အဘါ. ယ့ၣ်ၡူး တဲတၢ်ဒီးအီၤ ဒီးဟ့ၣ်အီၤမူဒါလၢ အရ့ဒိၣ်တခါ. ယ့ၣ်ၡူးတဲအီၤလၢ က့ၤတဲဘၣ် ယဒီပုၢ်ဝဲၢ်ခွါတဖၣ် လၢယဂဲၤဆၢထၢၣ် သမူထီၣ်က့ၤလံ.—ယိၤ ၂၀:၁၇, ၁၈.
ပကွၢ်လိယ့ၣ်ၡူး အဒိအတဲာ် သ့ခီဖျိ ပပာ်သူၣ်ပာ်သး တၢ်ကီတၢ်ခဲလၢ ဒီပုၢ်ဝဲၢ်မုၣ်ခွါ ထံၣ်ဘၣ်ဝဲ, နၢ်ပၢၢ်စၢၤအဝဲသ့ၣ် တၢ်တူၢ်ဘၣ် ဒီးမၤမုာ်ထီၣ် အဝဲသ့ၣ်အသး (ကွၢ်လံာ်အဆၢ ၇)
၈. ပကွၢ်လိ ယ့ၣ်ၡူး အဒိအတဲာ် ကသ့ဒ်လဲၣ်.
၈ ပကွၢ်လိယ့ၣ်ၡူး အဒိအတဲာ် ကသ့ဒ်လဲၣ်. ဖဲပဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ ကဆဲးမၤ ယဟိဝၤယွၤ အတၢ်မၤအခါ မ့ၢ်ဝဲ ပကွၢ်လိ ယ့ၣ်ၡူး အဒိအတဲာ်. ဒ်ယ့ၣ်ၡူးအသိး ပကဘၣ် ဂုာ်ကျဲးစၢး ပာ်သူၣ်ပာ်သး တၢ်ကီတၢ်ခဲလၢ ဒီပုၢ်ဝဲၢ်မုၣ်ခွါ ထံၣ်ဘၣ်ဝဲ, နၢ်ပၢၢ်စၢၤအဝဲသ့ၣ် တၢ်တူၢ်ဘၣ် ဒီးမၤမုာ်ထီၣ် အဝဲသ့ၣ်အသး. ဆိကမိၣ်ကွၢ် ဒီပုၢ်ဝဲၢ်မုၣ်ကၠိစလ့ အတၢ်လဲၤခီဖျိ. ဒီပုၢ်ဝဲၢ်မုၣ်ကၠိစလ့န့ၣ် အဒီပုၢ်ဝဲၢ်မုၣ် သံလၢ တၢ်ကဲထီၣ်သး သတူၢ်ကလာ်အဃိ အသးအုးဒိၣ်မး. အတဲဝဲလၢ “ယသးအုး တဘျုးလါညါ.” ဒီးအဆဲးတဲဝဲလၢ “ဒီပုၢ်ဝဲၢ်ခွါတဂၤ ဒီးအမါန့ၣ် ကွဲမုာ်ယၤလၢ ယကလဲၤဟးလၢ အဝဲသ့ၣ်အဟံၣ်. အဝဲသ့ၣ်ပျဲလၢ ယကတဲဖျါထီၣ် ယတၢ်တူၢ်ဘၣ် ဒီးဒိကနၣ်န့ၢ်ယၤလၢ တၢ်သူၣ်အိၣ်သးအိၣ်အပူၤ. အဝဲသ့ၣ် ဒုးသ့ၣ်နီၣ်ထီၣ်ယၤလၢ ယဟိဝၤယွၤ ပာ်လုၢ်ပာ်ပှ့ၤယၤဒိၣ်မး.” ဒီပုၢ်ဝဲၢ်မုၣ် ဆဲးတဲဝဲလၢ “ယတူၢ်ဘၣ် လီၤဂာ်လၢ ယလီၤဘျၢလၢ ပီၣ်လဲၣ်ခံဒး ဒီးယတၢ်မုၢ်လၢ် တအိၣ်လၢၤဘၣ်. ဘၣ်ဆၣ် ယဟိဝၤယွၤ သူအဝဲသ့ၣ်လၢ ကထုးထီၣ်ကွံာ်ယၤ ဒီးအဝဲသ့ၣ် မၤစၢၤယၤဒ်သိး ယသးကဆူၣ်ထီၣ်က့ၤလၢ ယကဆဲးမၤ ယဟိဝၤယွၤ အတၢ်မၤ.” ပဝဲစ့ၢ်ကီး ပဟ့ၣ်ဂံၢ်ဟ့ၣ်ဘါ ပှၤဂၤသ့ခီဖျိ ပပျဲလၢ အဝဲသ့ၣ် ကတဲဖျါထီၣ် အတၢ်တူၢ်ဘၣ် ဒီးဒိကနၣ်န့ၢ် တၢ်လၢအဝဲသ့ၣ်တဲဝဲ လီၤတံၢ်လီၤဆဲး. ပမ့ၢ်မၤဒ်န့ၣ်န့ၣ် မ့ၢ်ဝဲ ပမၤမုာ်ထီၣ် အဝဲသ့ၣ်အသး ဒီးပမၤစၢၤအဝဲသ့ၣ်လၢ ကဆဲးမၤယဟိဝၤယွၤ အတၢ်မၤ.—ရိ ၁၂:၁၅.
မၤစၢၤပှၤဂၤလၢ ကနၢ်ပၢၢ်ထီၣ် ကစၢ်ယွၤ ကလုၢ်ကထါ
၉. ယ့ၣ်ၡူး အပျဲၢ်အဘီၣ်တဖၣ် တနၢ်ပၢၢ် တၢ်ဂ့ၢ်မနုၤဘၣ်လဲၣ် ဒီးယ့ၣ်ၡူးမၤစၢၤ အဝဲသ့ၣ်ဒ်လဲၣ်.
၉ ယ့ၣ်ၡူး အတၢ်မၢဖိတဖၣ် နာ်ဝဲကစၢ်ယွၤ အကလုၢ်ကထါ ဒီးအဝဲသ့ၣ် ဂုာ်ကျဲးစၢး အိၣ်မူမၤထွဲဝဲ လၢအတၢ်အိၣ်မူအပူၤ. (ယိၤ ၁၇:၆) ဘၣ်ဆၣ် ပှၤမၤသံယ့ၣ်ၡူး ဒ်ပှၤအၢပှၤသီတဂၤအသိး လၢသ့ၣ်တၢၣ်အလိၤန့ၣ် အဝဲသ့ၣ် တနၢ်ပၢၢ်ဝဲ အခီပညီဘၣ်. ယ့ၣ်ၡူး သ့ၣ်ညါဝဲလၢ အပျဲၢ်အဘီၣ်တဖၣ်န့ၣ် အိၣ်ဒီးတၢ်နာ် ဒီးအဝဲသ့ၣ် အဲၣ်ယဟိဝၤယွၤ. သနာ်က့ အပျဲၢ်အဘီၣ်တဖၣ်န့ၣ် ကဘၣ်နၢ်ပၢၢ်အါထီၣ် လံာ်စီဆှံ တၢ်ကွဲးအသး လီၤတံၢ်လီၤဆဲးဒံး. (လူၤ ၉:၄၄, ၄၅; ယိၤ ၂၀:၉) အဃိ ယ့ၣ်ၡူး မၤစၢၤအဝဲသ့ၣ်လၢ ကဃုနၢ်ပၢၢ်အါထီၣ် တၢ်ကွဲးအသး အခီပညီ. ယ့ၣ်ၡူး မၤစၢၤအဝဲသ့ၣ် ဒ်လဲၣ်န့ၣ် ပကကွၢ်သကိး တၢ်ကဲထီၣ်သး ဖဲအပျဲၢ်အဘီၣ်ခံဂၤ လဲၤလၢသဝီ အ့းမၤအူအခါ.
၁၀. ဒ်သိးယ့ၣ်ၡူး အပျဲၢ်အဘီၣ် ကနာ်ဝဲနီၢ်ကီၢ်လၢ အကဲမ့းၡံအၤအဂီၢ် ယ့ၣ်ၡူးမၤစၢၤ အဝဲသ့ၣ်ဒ်လဲၣ်. (လူၤကၣ် ၂၄:၁၈-၂၇)
၁၀ ဖး လူၤကၣ် ၂၄:၁၈-၂၇. ယ့ၣ်ၡူး ကဲမတဂၤလဲၣ်န့ၣ် အတတဲဘၣ် အပျဲၢ်အဘီၣ်ခံဂၤန့ၣ် တဘျီဃီဘၣ်. အဆိကတၢၢ်န့ၣ် ယ့ၣ်ၡူး သံကွၢ်အဝဲသ့ၣ် တၢ်သံကွၢ်. ဘၣ်မနုၤအဃိ ယ့ၣ်ၡူးမၤဝဲဒ်န့ၣ်လဲၣ်. ဘၣ်သ့ၣ်သ့ၣ် ယ့ၣ်ၡူးဘၣ်သးလၢ အဝဲသ့ၣ် ကတဲဖျါထီၣ် အတၢ်တူၢ်ဘၣ် ဒီးအတၢ်ဆိကမိၣ်. ဒီးဖဲန့ၣ် အဝဲသ့ၣ် တဲဘၣ်အီၤလၢ အဝဲသ့ၣ် ဆိကမိၣ်ဝဲလၢ ယ့ၣ်ၡူး ကမၤထူၣ်ဖျဲးထီၣ် အဝဲသ့ၣ်လၢ ရိမ့ၤအတၢ်ပၢဖီလာ်. အဝဲသ့ၣ် တဲဖျါထီၣ် အတၢ်တူၢ်ဘၣ် ဝံၤအလီၢ်ခံ ယ့ၣ်ၡူးသူဝဲ တၢ်ကွဲးအသး ဒီးမၤစၢၤအဝဲသ့ၣ်လၢ ကနၢ်ပၢၢ်ထီၣ်လၢ ဝံအတၢ်စံးပာ်တဖၣ်န့ၣ် ဟဲလၢပှဲၤထီၣ် ဒီဒူၣ်လံ. လၢခံ ဖဲဟါလီၤခီန့ၣ် ယ့ၣ်ၡူး လီၣ်ဖျါထီၣ်အသးလၢ အပျဲၢ်အဘီၣ်အဂၤတဖၣ် အမဲာ်ညါ ဒီးၡဲပၠးစ့ၢ်ကီးအဝဲသ့ၣ် ဘၣ်ဃးဒီး ဝံအတၢ်စံးပာ် အခီပညီ. (လူၤ ၂၄:၃၃-၄၈) ဘၣ်ဃးဒီး တၢ်ဂ့ၢ်အံၤန့ၣ် ပန့ၢ်ဘၣ် တၢ်မၤလိဒ်လဲၣ်.
၁၁-၁၂. (က) ယ့ၣ်ၡူး ၡဲပၠး လံာ်စီဆှံတၢ်မ့ၢ်တၢ်တီ အဂ့ၢ်န့ၣ် ပန့ၢ်ဘၣ် တၢ်မၤလိဒ်လဲၣ်. (ကွၢ်စ့ၢ်ကီးတၢ်ဂီၤ.) (ခ) ဒီပုၢ်ဝဲၢ်ခွါတဂၤ မၤစၢၤ အပှၤမၤလိလံာ်စီဆှံဖိ ဒ်လဲၣ်.
၁၁ ပကွၢ်လိယ့ၣ်ၡူး အဒိအတဲာ် ကသ့ဒ်လဲၣ်. အဆိကတၢၢ်န့ၣ် ဖဲနမၤလိ နပှၤမၤလိလံာ်စီဆှံဖိအခါ ဒ်သိးအဝဲသ့ၣ် ကတဲဖျါထီၣ် အတၢ်တူၢ်ဘၣ်အဂီၢ် သံကွၢ်အဝဲသ့ၣ် တၢ်သံကွၢ် သ့သ့ဘၣ်ဘၣ်. (ကတိၤ ၂၀:၅) ဒီးဖဲနသ့ၣ်ညါ အဝဲသ့ၣ် တၢ်တူၢ်ဘၣ် ဝံၤအလီၢ်ခံ မၤစၢၤအဝဲသ့ၣ်လၢ ကဃုလံာ်စီဆှံအဆၢတဖၣ် လၢအဘၣ်ထွဲလိာ်သးဒီး အဝဲသ့ၣ် တၢ်အိၣ်သး. ဒီးတဘၣ်တဲ အဝဲသ့ၣ်လၢ အကဘၣ်မၤ ဒ်အံၤဒ်န့ၣ်ဘၣ်. လၢနကမၤ ဒ်န့ၣ်အလီၢ် မၤစၢၤအဝဲသ့ၣ် ဒ်သိး ကဃုနၢ်ပၢၢ်အါထီၣ် လံာ်စီဆှံအဆၢတဖၣ် ဒီးဆိကမိၣ်ထံလၢ အဝဲသ့ၣ် ကမၤထွဲ လံာ်စီဆှံ အတၢ်ဟံးစုနဲၣ်ကျဲ လၢအတၢ်အိၣ်မူအပူၤဒ်လဲၣ်. ခဲအံၤ ပကတဲသကိး ဒီပုၢ်ဝဲၢ်ခွါနီထ့ၤလၢ အအိၣ်လၢ ကီၢ်ကၣ်နၣ် အတၢ်လဲၤခီဖျိ.
၁၂ ဖဲနီထ့ၤ အိၣ် ၁၆ နံၣ်အခါ အဝဲစးထီၣ်မၤလိ လံာ်စီဆှံ. အမၤလိလံာ်စီဆှံ န့ၢ်တတီၤဖိ ဒီးအဟံၣ်ဖိဃီဖိ ထီဒါအီၤ. ဘၣ်ဆၣ် ဒ်သိး အကဆဲးမၤလိ လံာ်စီဆှံအဂီၢ် တၢ်မနုၤမၤစၢၤအီၤလဲၣ်. ဒီပုၢ်ဝဲၢ်ခွါလၢ အမၤလိ လံာ်စီဆှံဒီးအီၤတဂၤန့ၣ် တဲသကိးတ့ၢ် တၢ်ဂ့ၢ်ဒီးအီၤ လၢအအိၣ်ဖဲ မးသဲ အဆၢဒိၣ် ၁၀ ဒီးၡဲပၠးအီၤလၢ ခရံာ်ဖိ အမ့ၢ်အတီတဖၣ်န့ၣ် ပှၤကမၤနးမၤဖှီၣ်အဝဲသ့ၣ်. အဃိ နီထ့ၤ တဲဝဲလၢ “ဖဲပှၤမၤအၢမၤနးယၤအခါ ယသ့ၣ်ညါလၢ ယထံၣ်န့ၢ် တၢ်မ့ၢ်တၢ်တီ အနီၢ်ကီၢ်လံ.” တကးဒံးဘၣ် ဒီပုၢ်ဝဲၢ်ခွါ လၢအမၤလိအီၤန့ၣ် မၤစၢၤအီၤဒ်သိး အကဆိကမိၣ်ထံ မးသဲ ၁၀:၁၆ လၢအတဲဝဲလၢ ပကဘၣ်ကဲပှၤလၢ အကူၣ်တၢ်သ့. ဝံၤဒီး အဝဲသ့ၣ် တဲသကိးဘၣ်ဃးဒီး လံာ်စီဆှံအံၤ ကမၤစၢၤ နီထ့ၤလၢ အကတဲဘၣ် အဟံၣ်ဖိဃီဖိလၢ အတၢ်စူၢ်တၢ်နာ် အဂ့ၢ် ဒီးတဲတၢ်လၢ တၢ်ပာ်ကဲအပူၤ. ဖဲနီထ့ၤ ဒိးဘျၢထံ ဝံၤအလီၢ်ခံ အဘၣ်သးမၤ ပှၤလဲၤလၢညါ ဘၣ်ဆၣ် အပါန့ၣ်ဘၣ်သးလၢ အကလဲၤထီၣ် ဖၠၣ်စိမိၤကၠိ. ဒီပုၢ်ဝဲၢ်လၢ အမၤလိအီၤ လံာ်စီဆှံန့ၣ် တတဲအီၤလၢ အကဘၣ်မၤဝဲ ဒ်အံၤဒ်န့ၣ်ဘၣ်. အသံကွၢ်အီၤ တၢ်သံကွၢ်တဖၣ် ဒီးမၤစၢၤအီၤလၢ ကဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲ. လၢခံ နီထ့ၤ မၤဝဲဒ်လဲၣ်. အဆၢတဲာ်လီၤသးလၢ အကမၤ ကစၢ်ယွၤအတၢ်မၤ လၢဆၢကတီၢ်လၢပှဲၤ. အဃိ အပါနီဟးထီၣ်ကွံာ်အီၤလၢ ဟံၣ်ပူၤ. ဘၣ်ဃးဒီး တၢ်ကဲထီၣ်သးအံၤ နီထ့ၤ တူၢ်ဘၣ်ဝဲဒ်လဲၣ်. အတဲဝဲလၢ “ယဆၢတဲာ်တၢ်ဒ်အံၤန့ၣ် အဘၣ်လီၤ.” ပဝဲစ့ၢ်ကီး ပမ့ၢ်ဟံးန့ၢ် တၢ်ဆၢကတီၢ်လၢ ပကမၤစၢၤပှၤဂၤ ဒ်သိး အဝဲသ့ၣ် ကဆိကမိၣ်ထံ လံာ်စီဆှံအဆၢန့ၣ် ပမၤစၢၤအဝဲသ့ၣ်လၢ အဝဲသ့ၣ် ကမၤဂၢၢ်ကျၢၤထီၣ် အတၢ်နာ် ဒီးကဆဲးမၤ ယဟိဝၤယွၤ အတၢ်မၤ.—အ့း ၃:၁၆-၁၉.
ပကွၢ်လိယ့ၣ်ၡူး အဒိအတဲာ် သ့ခီဖျိ ပမၤစၢၤပှၤဂၤဒ်သိး အကဆိကမိၣ်ထံ တၢ်လၢလံာ်စီဆှံတဲဝဲ (ကွၢ်လံာ်အဆၢ ၁၁) d
မၤစၢၤ ဒီပုၢ်ဝဲၢ်ခွါတဖၣ်လၢ ကကဲထီၣ် “တၢ်ဟ့ၣ်တဖၣ်”
၁၃. တချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ် ဒ်သိး အပျဲၢ်အဘီၣ် ကဆဲးစံၣ်တဲၤတဲလီၤတၢ်အဂီၢ် ယ့ၣ်ၡူးမၤဝဲဒ်လဲၣ်. (အ့းဖ့းစူး ၄:၈)
၁၃ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ မူဒါလၢ အပါဟ့ၣ်လီၤအီၤန့ၣ် အမၤလၢပှဲၤဝဲ လီၤတံၢ်လီၤဆဲး. (ယိၤ ၁၇:၄) ဘၣ်ဆၣ် ယ့ၣ်ၡူး တဆိကမိၣ်ဝဲလၢ ပှၤလၢအမၤလၢပှဲၤ အပါအတၢ်ဘၣ်သးသ့န့ၣ် မ့ၢ်ထဲအီၤတဂၤဘၣ်. ဖဲအစံၣ်တဲၤတဲလီၤတၢ် လၢဟီၣ်ခိၣ်ချၢ သၢနံၣ်ဒီးတဝာ်အခါ အဝဲမၤစၢၤပှၤဂၤလၢ ကမၤကစၢ်ယွၤ အတၢ်မၤစ့ၢ်ကီး. ယ့ၣ်ၡူးနာ်န့ၢ် အပျဲၢ်အဘီၣ်အဃိ အဟ့ၣ်လီၤ အဝဲသ့ၣ်မူဒါလၢ ကသိၣ်လိတၢ် ဒီးကစံၣ်တဲၤတဲလီၤ တၢ်သးခုကစီၣ်. တကးဒံးဘၣ် အဝဲသ့ၣ် ကဘၣ်ကွၢ်ထွဲစ့ၢ်ကီး ယဟိဝၤယွၤ အပှၤဂီၢ်မုၢ်. ယ့ၣ်ၡူး အပျဲၢ်အဘီၣ် လၢအဘၣ် တီခိၣ်ရိၤမဲတၢ်တနီၤန့ၣ် ဘၣ်သ့ၣ်သ့ၣ် အဝဲသ့ၣ်အသးနံၣ် ကအိၣ် ၂၀ ဘျဲၣ်. (ဖး အ့းဖ့းစူး ၄:၈.) ယ့ၣ်ၡူး အပျဲၢ်အဘီၣ်တဖၣ်အံၤ ဖဲအဝဲသ့ၣ်မၤသကိးတၢ်ဒီး ယ့ၣ်ၡူးအခါ အဝဲသ့ၣ် မၤတၢ်ဆူၣ်မး ဒီးဆဲးတီဒီးယ့ၣ်ၡူး. ဒီးတချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ် ဒ်သိး အဝဲသ့ၣ် ကကဲထီၣ် “တၢ်ဟ့ၣ်တဖၣ်” အဂီၢ် ယ့ၣ်ၡူး သိၣ်လိအါထီၣ် အဝဲသ့ၣ် တၢ်ဂ့ၢ်အါမး. ယ့ၣ်ၡူး သိၣ်လိအဝဲသ့ၣ် တၢ်ဂ့ၢ်မနုၤလဲၣ်.
၁၄. ဖဲယ့ၣ်ၡူးအိၣ်လၢ ဟီၣ်ခိၣ်ချၢ အလီၢ်ခံကတၢၢ် အသီ ၄၀ န့ၣ် အသိၣ်လိ အပျဲၢ်အဘီၣ်လၢ တၢ်ဂ့ၢ်မနုၤလဲၣ်. (ကွၢ်စ့ၢ်ကီးတၢ်ဂီၤ.)
၁၄ ဖဲယ့ၣ်ၡူး ဟ့ၣ်ကူၣ်ဟ့ၣ်ဖး ဒီးသိၣ်က့ၤ အပျဲၢ်အဘီၣ်အခါ ယ့ၣ်ၡူး တဲအဝဲသ့ၣ်ပျီပျီ ဘၣ်ဆၣ် အတဲဝဲလၢ တၢ်အဲၣ်တၢ်ကွံ. အဒိ ယ့ၣ်ၡူး သ့ၣ်ညါဝဲလၢ အပျဲၢ်အဘီၣ် တနီၤန့ၣ် တနာ်ဝဲလၢ အကသံ ဒီးကဂဲၤဆၢထၢၣ် သမူထီၣ်က့ၤဘၣ်အဃိ ဒ်သိး အဝဲသ့ၣ် ကသ့ၣ်ညါထီၣ် တၢ်မ့ၢ်တၢ်တီအဂီၢ် ယ့ၣ်ၡူးဘၣ်သိၣ်က့ၤ အဝဲသ့ၣ် ဒီးတဲနၢ်ပၢၢ်အဝဲသ့ၣ်. (လူၤ ၂၄:၂၅-၂၇; ယိၤ ၂၀:၂၇) ယ့ၣ်ၡူး တဲဘၣ်အဝဲသ့ၣ်လၢ အဝဲသ့ၣ်တဘၣ် သးစၢၢ်ဆၢ တၢ်ဃုကျိၣ်ဃုစ့ အါန့ၢ်ဒံး ကဘၣ်ကွၢ်ထွဲ ကစၢ်ယွၤ အပှၤဂီၢ်မုၢ်ဘၣ်. (ယိၤ ၂၁:၁၅) ဒီးယ့ၣ်ၡူး ဒုးသ့ၣ်နီၣ်ထီၣ် အဝဲသ့ၣ်လၢ အဝဲသ့ၣ် တဘၣ်ထိၣ်သတြီၤ အသးဒီးပှၤဂၤ လၢယဟိဝၤယွၤ အတၢ်မၤအပူၤဘၣ်. (ယိၤ ၂၁:၂၀-၂၂) တကးဒံးဘၣ် ယ့ၣ်ၡူးဘှီဘၣ်ထီၣ် အဝဲသ့ၣ် အတၢ်နၢ်ပၢၢ် ဘၣ်ဃးဒီး ကစၢ်ယွၤ အဘီအမုၢ်အဂ့ၢ် ဒီးမၤစၢၤအဝဲသ့ၣ်လၢ ကသးစၢၢ်ဆၢလၢ တၢ်စံၣ်တဲၤတဲလီၤ တၢ်သးခုကစီၣ်. (မၤတၢ် ၁:၆-၈) တၢ်အိၣ်ဖှိၣ်သးပှၢ်တဖၣ် န့ၢ်ဘၣ် တၢ်မၤလိလၢ ယ့ၣ်ၡူး အအိၣ်ဒ်လဲၣ်.
ပကွၢ်လိယ့ၣ်ၡူး အဒိအတဲာ် သ့ခီဖျိ ပမၤစၢၤပှၤဂၤဒ်သိး အဝဲသ့ၣ် ကမၤအါထီၣ် မူဒါလၢတၢ်အိၣ်ဖှိၣ်ပူၤ (ကွၢ်လံာ်အဆၢ ၁၄)
၁၅-၁၆. (က) တၢ်အိၣ်ဖှိၣ်သးပှၢ်တဖၣ် ကွၢ်လိယ့ၣ်ၡူး အဒိအတဲာ် သ့ဒ်လဲၣ်. (ခ) ဒီပုၢ်ဝဲၢ်ခွါဖါထြံၤ ဒိးန့ၢ်ဘၣ် တၢ်သိၣ်က့ၤသီက့ၤအဃိ အန့ၢ်ဘၣ်အဘျုးဒ်လဲၣ်.
၁၅ တၢ်အိၣ်ဖှိၣ်သးပှၢ်တဖၣ် ကွၢ်လိယ့ၣ်ၡူး အဒိအတဲာ် ကသ့ဒ်လဲၣ်. အဝဲသ့ၣ် ကဘၣ်သိၣ်လိ ဒီးမၤစၢၤ ဒီပုၢ်ဝဲၢ်ခွါ ဃုာ်ဒီးဒီပုၢ်ဝဲၢ်ခွါ သးစၢ်တဖၣ် ဒ်သိး ကမၤအါထီၣ် မူဒါလၢတၢ်အိၣ်ဖှိၣ်ပူၤ. b တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ ဒီပုၢ်ဝဲၢ်ခွါတဖၣ်အံၤ ကဘၣ်မၤလိတၢ် အိၣ်ဒံးအါမး. အဃိ တၢ်အိၣ်ဖှိၣ်သးပှၢ်တဖၣ် မ့ၢ်သိၣ်လိ ဒီးဟ့ၣ်ကူၣ်ဟ့ၣ်ဖး ဒီပုၢ်ဝဲၢ်ခွါသးစၢ်တဖၣ်လၢ တၢ်အဲၣ်တၢ်ကွံန့ၣ် ဒီပုၢ်ဝဲၢ်ခွါသးစၢ်တဖၣ်အံၤ ကသ့ၣ်ညါလၢ အဝဲသ့ၣ် ကဘၣ်အိၣ်ဒီး တၢ်ဆီၣ်လီၤသး, ကဲထီၣ်ပှၤလၢ ပှၤနာ်န့ၢ်အီၤသ့ ဒီးကဲထီၣ်ပှၤလၢ အသးအိၣ်မၤစၢၤပှၤဂၤ.—၁ တံၤ ၃:၁; ၂ တံၤ ၂:၂; ၁ ပ့း ၅:၅.
၁၆ ပကတဲသကိး ဒီပုၢ်ဝဲၢ်ခွါဖါထြံၤ လၢအဒိးန့ၢ်ဘၣ် အဘျုးလၢ တၢ်အိၣ်ဖှိၣ်သးပှၢ်တဂၤ သိၣ်က့ၤသီက့ၤအီၤ. ဖဲဒီပုၢ်ဝဲၢ်ခွါဖါထြံၤ သးစၢ်ခါန့ၣ် အတဲတၢ် ဆူၣ်ဆူၣ်ကိၤကိၤ ဒီးအတရ့ ဒီပုၢ်ဝဲၢ်မုၣ် ဂ့ၤဂ့ၤစ့ၢ်ကီးဘၣ်. တၢ်အိၣ်ဖှိၣ်သးပှၢ်တဂၤ ပာ်သူၣ်ပာ်သးဘၣ်ဝဲ ဖါထြံၤ အတၢ်ဂံၢ်စၢ်ဘါစၢ် ဒီးသိၣ်က့ၤသီက့ၤအီၤ လိၤလိၤလၢ တၢ်အဲၣ်တၢ်ကွံ. ဖါထြံၤတဲဝဲလၢ “တၢ်အိၣ်ဖှိၣ်သးပှၢ် တဲယၤလၢ ယကဘၣ် ဘှီဘၣ်ထီၣ်က့ၤသးအဃိ ယသးခုဒိၣ်မး.” အဆဲးတဲဝဲလၢ “လၢညါန့ၣ် ဖဲယထံၣ်လၢ ဒီပုၢ်ဝဲၢ်ခွါအဂၤ န့ၢ်ဘၣ်မူဒါလၢ ယဘၣ်သးန့ၢ်အခါ ယသးတမုာ်ဘၣ်. ဘၣ်ဆၣ် တၢ်အိၣ်ဖှိၣ်သးပှၢ်တဂၤ ဟ့ၣ်ကူၣ်ယၤ ဒီးတဲယၤလၢ ယကဘၣ် သးစၢၢ်ဆၢလၢ ယကမၤအါထီၣ် တၢ်ဆီၣ်လီၤသး ဒီးမၤစၢၤ ဒီပုၢ်ဝဲၢ်မုၣ်ခွါ. ယတဘၣ် သးစၢၢ်ဆၢလၢ ယကန့ၢ်ဘၣ် မူဒါလၢ ယလီကီန့ၣ်ဘၣ်.” လၢခံ ဖဲဒီပုၢ်ဝဲၢ်ခွါဖါထြံၤ ပှဲၤထီၣ် ၂၃ နံၣ် အခါ အကဲထီၣ် တၢ်အိၣ်ဖှိၣ်သးပှၢ်.—ကတိၤ ၂၇:၉.
၁၇. ယ့ၣ်ၡူးနာ်န့ၢ် အပျဲၢ်အဘီၣ်န့ၣ် အပာ်ဖျါထီၣ်ဝဲဒ်လဲၣ်.
၁၇ ယ့ၣ်ၡူး ဟ့ၣ်လီၤအပျဲၢ်အဘီၣ် မူဒါလၢ ကစံၣ်တဲၤတဲလီၤတၢ် တကးဒံးဘၣ် ကသိၣ်လိပှၤဂၤစ့ၢ်ကီး. ဘၣ်သ့ၣ်သ့ၣ် ယ့ၣ်ၡူး အပျဲၢ်အဘီၣ်တဖၣ် ကတူၢ်ဘၣ်ဝဲလၢ မူဒါလၢ ယ့ၣ်ၡူး ဟ့ၣ်လီၤအဝဲသ့ၣ်န့ၣ် အဝဲသ့ၣ်မၤဝဲတန့ၢ်ဘၣ်. ဘၣ်ဆၣ် ယ့ၣ်ၡူး နာ်န့ၢ် အပျဲၢ်အဘီၣ်တဖၣ်လၢ အဝဲသ့ၣ် မၤလၢပှဲၤအမူဒါန့ၢ်ဝဲ ဒီးယ့ၣ်ၡူး တဲအဝဲသ့ၣ်လၢ “ဒ်ပၢ်ဆှၢလီၤယၤအသိး ယၤစ့ၢ်ကီး ယဆှၢလီၤသု.”—ယိၤ ၂၀:၂၁.
၁၈. တၢ်အိၣ်ဖှိၣ်သးပှၢ်တဖၣ် ကွၢ်လိယ့ၣ်ၡူး အဒိအတဲာ် ကသ့ဒ်လဲၣ်.
၁၈ တၢ်အိၣ်ဖှိၣ်သးပှၢ်တဖၣ် ကွၢ်လိယ့ၣ်ၡူး အဒိအတဲာ် ကသ့ဒ်လဲၣ်. တၢ်အိၣ်ဖှိၣ်သးပှၢ် လၢအအိၣ်ဒီး တၢ်လဲၤခီဖျိန့ၣ် ကဘၣ်မၤစၢၤ ဒီပုၢ်ဝဲၢ်မုၣ်ခွါတဖၣ်လၢ မၤမူဒါတဖၣ်ကသ့ လီၤတံၢ်လီၤဆဲး. (ဖံလံး ၂:၁၉-၂၂) အဒိ တၢ်အိၣ်ဖှိၣ်သးပှၢ်တဖၣ် ကဘၣ်မၤစၢၤဝဲ ပှၤသးစၢ်တဖၣ်လၢ ကမၤကဆှီ ဒီးကွၢ်ထွဲဘီမုၢ်ဘျီၣ်ဒိၣ်. ဒီးဖဲတၢ်အိၣ်ဖှိၣ်သးပှၢ် ဟ့ၣ်လီၤ ဒီပုၢ်ဝဲၢ်ခွါတဂၤဂၤ မူဒါဝံၤအလီၢ်ခံ အဝဲသ့ၣ်ကဘၣ် သိၣ်လိအီၤလၢ ကဘၣ်မၤမူဒါဒ်လဲၣ် ဒီးကဘၣ်နာ်န့ၢ် ဒီပုၢ်ဝဲၢ်ခွါလၢ အဝဲသ့ၣ်ဃုထၢဝဲလၢ အကမၤလၢပှဲၤအမူဒါ. ဒီပုၢ်ဝဲၢ်ခွါမဲၣ်သယူ လၢအကဲထီၣ် တၢ်အိၣ်ဖှိၣ်သးပှၢ်သီသီတဂၤန့ၣ် တဲဝဲလၢ “ဒ်သိး ယမၤလၢပှဲၤ ယမူဒါလၢ တၢ်အိၣ်ဖှိၣ်ပူၤကန့ၢ်အဂီၢ် တၢ်အိၣ်ဖှိၣ်သးပှၢ်တဖၣ် သိၣ်လိယၤဂ့ၤဂ့ၤ ဒီးအဝဲသ့ၣ် နာ်ဝဲလၢ ယမၤလၢပှဲၤ မူဒါကန့ၢ်. အဃိ ယစံးဘျုးဘၣ် အဝဲသ့ၣ်ဒိၣ်မး.” ဒီးအဆဲးတဲဝဲလၢ “ယမၤတၢ် မ့ၢ်ကမၣ်တမံၤမံၤန့ၣ် တၢ်အိၣ်ဖှိၣ်သးပှၢ်တဖၣ် မၤစၢၤယၤလၢ ယကဟံးန့ၢ် တၢ်မၤလိလၢ ယတၢ်ကမၣ် ဒီးမၤဂ့ၤထီၣ်က့ၤ လၢခံတဘျီ.” c
၁၉. ပကဘၣ် ပာ်လီၤပသးလၢ ပကမၤ တၢ်မနုၤလဲၣ်.
၁၉ ဖဲယ့ၣ်ၡူးအိၣ်လၢ ဟီၣ်ခိၣ်ချၢ အလီၢ်ခံကတၢၢ် အသီ ၄၀ န့ၣ် အဟ့ၣ်ဂံၢ်ဟ့ၣ်ဘါပှၤဂၤ, အသိၣ်လိသီလိ ဒီးမၤစၢၤပှၤဂၤ. အဃိ မ်ပကပာ်လီၤသးလၢ ပကမၤထွဲ ယ့ၣ်ၡူး အဒိအတဲာ် လၢအဂ့ၤကတၢၢ်. (၁ ပ့း ၂:၂၁) ပမ့ၢ်မၤဒ်န့ၣ်န့ၣ် ယ့ၣ်ၡူး ကမၤစၢၤပှၤ တကးဒံးဘၣ် အဝဲအၢၣ်လီၤပှၤလၢ “ယကအိၣ်ဒီးသု ကိးမုၢ်နံၤဒဲး တုၤလီၤလၢ တၢ်အကတၢၢ်.—မး ၂၈:၂၀.
တၢ်သးဝံၣ် ၁၅ စံးပတြၢၤယဟိဝၤယွၤအဖိဝဲၢ်ကိ
a လံာ်တၢ်သးခုကစီၣ်လွံၢ်ဘ့ၣ် ဒီးလံာ်စီဆှံ အကတြူၢ်လၢအဂၤတဖၣ် ပာ်ဖျါထီၣ်ဝဲလၢ ဖဲယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံန့ၣ် အဝဲလီၣ်ဖျါထီၣ်အသးလၢ အပျဲၢ်အဘီၣ်တဖၣ် အမဲာ်ညါ တဘျုးဘျီညါ. အဝဲလီၣ်ဖျါထီၣ်အသးလၢ နီၢ်မၤရံ မၤကဒၤလ့ၣ် အမဲာ်ညါ, (ယိၤ ၂၀:၁၁-၁၈) လၢပိာ်မုၣ်အဂၤတဖၣ်အမဲာ်ညါ, (မး ၂၈:၈-၁၀; လူၤ ၂၄:၈-၁၁) လၢအပျဲၢ်အဘီၣ် ၂ ဂၤ အမဲာ်ညါ, (လူၤ ၂၄:၁၃-၁၅) လၢစီၤပ့းတရူးအမဲာ်ညါ (လူၤ ၂၄:၃၄) ဒီးလၢအတၢ်မၢဖိတဖၣ် အမဲာ်ညါ ဘၣ်ဆၣ် စီၤသိၤမါ တအိၣ်ဖဲန့ၣ်ဘၣ်. (ယိၤ ၂၀:၁၉-၂၄) အဝဲလီၣ်ဖျါထီၣ်အသးလၢ တၢ်မၢဖိတဖၣ်အမဲာ်ညါ ဒီးစီၤသိၤမါအိၣ်ဖဲန့ၣ်စ့ၢ်ကီး. (ယိၤ ၂၀:၂၆) အဝဲလီၣ်ဖျါထီၣ်အသးလၢ အပျဲၢ်အဘီၣ် ၇ ဂၤ အမဲာ်ညါ, (ယိၤ ၂၁:၁, ၂) လၢအပျဲၢ်အဘီၣ်အဂၤ ၅၀၀ ဘျဲၣ်အမဲာ်ညါ, (မး ၂၈:၁၆; ၁ ကရံၣ် ၁၅:၆) လၢအဒီပုၢ်ဝဲၢ်စီၤယၤကိာ် အမဲာ်ညါ, (၁ ကရံၣ် ၁၅:၇) လၢအတၢ်မၢဖိခဲလၢာ်အမဲာ်ညါ (မၤတၢ် ၁:၄) ဒီးအလီၣ်ဖျါထီၣ်အသးလၢ အတၢ်မၢဖိ အမဲာ်ညါ ဘူးဒီးဘ့ၤသနံ. (လူၤ ၂၄:၅၀-၅၂) တကးဒံးဘၣ် တၢ်ဆၢကတီၢ်အဂၤလၢ ယ့ၣ်ၡူး လီၣ်ဖျါထီၣ်အသးလၢ အပျဲၢ်အဘီၣ်တဖၣ်အမဲာ်ညါ အိၣ်ဝဲဘၣ်ဆၣ် လံာ်စီဆှံ တပာ်ဖျါထီၣ်ဝဲဘၣ်.—ယိၤ ၂၁:၂၅.
b တဘျီတခီၣ် ပိာ်ခွါသးစၢ်တနီၤလၢ အတုၤထီၣ်ထီၣ်ဘးန့ၣ် ဖဲအသးနံၣ်အိၣ် ၂၅-၃၀ အခါ ပှၤဃုထၢထီၣ် အဝဲသ့ၣ်လၢ ကမၤဝဲ ကဝီၤအပှၤကွၢ်တၢ် အတၢ်မၤ. ဘၣ်ဆၣ် ဒ်သိး အကဒိးန့ၢ်ဘၣ် တၢ်သိၣ်လိအဂီၢ် အဝဲသ့ၣ် ကဘၣ်ကဲဆိဝဲ တၢ်အိၣ်ဖှိၣ်သးပှၢ်.
c ဒ်သိး နမၤစၢၤ ပှၤသးစၢ်တဖၣ်လၢ အဝဲသ့ၣ် မၤဝဲမူဒါကသ့အဂီၢ် ဖးတၢ်ဂ့ၢ်လၢ အအိၣ်လၢ တၢးထီခိးတၢ် လါအီကူး ၂၀၁၈, ကဘျံးပၤ ၁၃-၁၄, လံာ်အဆၢ ၁၅-၁၇ ဒီး တၢးထီခိးတၢ် လါအ့ဖြ့ၣ် ၁၅, ၂၀၁၅, ကဘျံးပၤ ၈-၁၈.
d တၢ်ဂီၤ အခီပညီ– ဒီပုၢ်ဝဲၢ်ခွါတဂၤ မၤစၢၤ အပှၤမၤလိလံာ်စီဆှံဖိလၢ အကဆိကမိၣ်ထံ ဘၣ်ဃးဒီး တၢ်လၢလံာ်စီဆှံတဲဝဲ. ပှၤမၤလိလံာ်စီဆှံဖိတဂၤ နၢ်ပၢၢ်ထီၣ် ယဟိဝၤယွၤ အတၢ်ဘၣ်သး ဝံၤအလီၢ်ခံ အတၢၤကွံာ် တၢ်ဖိတၢ်လံၤလၢ အဘၣ်ထွဲဒီး ခရံာ်အိၣ်ဖျဲၣ်အမူး.
