တၢ်မၤလိ ၁၇
တၢ်သးဝံၣ် ၁၁၁ တၢ်ဂ့ၢ်လၢ အမၤသးခုပှၤ
ဆဲးအိၣ်လၢ နီၢ်သးပၤရဒံစူးအပူၤထီဘိ
“သးခု ဒီးသူၣ်ဖှံသးညီလၢ တၢ်လၢယကတ့လီၤ အဃိ လီၤထူလီၤယိာ်.”—ၡါ ၆၅:၁၈.
တၢ်ဂ့ၢ်မိၢ်ပှၢ်
တၢ်မၤလိတခါအံၤန့ၣ် ပကသ့ၣ်ညါဘၣ်လၢ နီၢ်သးပၤရဒံစူးန့ၣ် အကဲဘျုးလၢပဂီၢ်ဒ်လဲၣ် ဒီးပမၤစၢၤပှၤဂၤ ဒ်သိး အဝဲသ့ၣ် ကဘၣ်သး ပၣ်ဃုာ်လၢ နီၢ်သးပၤရဒံစူးအပူၤ ကသ့ဒ်လဲၣ်.
၁. နီၢ်သးပၤရဒံစူးန့ၣ် အကဲမနုၤလဲၣ် ဒီးပကဘၣ်ပာ်လီၤသးလၢ ပကမၤမနုၤလဲၣ်.
ဆၢကတီၢ်ခဲအံၤ လၢဟီၣ်ခိၣ်ချၢန့ၣ် တၢ်အိၣ်သးအိၣ်ဝဲတခါလၢ အလီၤဂာ်ဒ်သိးဒီး ပၤရဒံစူး. ဒီးလၢပၤရဒံစူးအံၤအပူၤန့ၣ် ပှၤလၢအမၤတၢ်ဂ့ၤ ဒီးအမၤတၢ်ဆူၣ်ဆူၣ် အိၣ်ဝဲလၢ အကကွဲၢ်ညါ. ပှၤတဖၣ်အံၤ အဝဲသ့ၣ်အိၣ်ဒီး တၢ်ဃူတၢ်ဖိးနီၢ်ကီၢ်. ဒီးပှၤလၢအအိၣ်ပာ်စၢၤလၢ ပၤရဒံစူးအံၤအပူၤန့ၣ် အဝဲသ့ၣ်ပာ်လီၤသးလၢ အတဟးထီၣ်ဖဲန့ၣ် နီတဘျီဘၣ်. အဝဲသ့ၣ် ဘၣ်သးလၢပှၤအါဂၤ ကပၣ်ဃုာ်လၢ တၢ်အိၣ်သး လီၤလီၤဆီဆီတခါအံၤအပူၤစ့ၢ်ကီး. တၢ်အိၣ်သးတခါအံၤ အကဲမနုၤလဲၣ်. အကဲဝဲ နီၢ်သးပၤရဒံစူး. a
၂. နီၢ်သးပၤရဒံစူးန့ၣ် အလီၤဂာ်ဒီး တၢ်လီၢ်ဒ်လဲၣ်.
၂ ဟီၣ်ခိၣ်လၢ မုၣ်ကီၤလံၢ်ပၢဝဲအံၤ အိၣ်ထဲ တၢ်သူၣ်ဟ့သးဟ့, တၢ်အၢတၢ်သီ ဒီးတၢ်လီၤဘၣ်ယိၣ်. သနာ်က့ ပထံၣ်ဘၣ်လၢ ယဟိဝၤယွၤ ဒုးအိၣ်ထီၣ်ဝဲ တၢ်အိၣ်သး လီၤလီၤဆီဆီတခါလၢ အပှၤဂီၢ်မုၢ်အဂီၢ်, ဒ်သိးအဝဲသ့ၣ် ကအိၣ်ဘၣ် ဃူဃူဖိးဖိး ဒီးမုာ်မုာ်ခုၣ်ခုၣ်အဃိ အလီၤကမၢကမၣ်ဒိၣ်မး. (၁ ယိၤ ၅:၁၉; လီၣ် ၁၂:၁၂) ဟီၣ်ခိၣ်လၢ မုၣ်ကီၤလံၢ်ပၢဝဲအံၤ အမၤဘၣ်ဒိဝဲ ပှၤအါဂၤ. ဘၣ်ဆၣ် ပကစၢ်ယွၤ လၢအအိၣ်ဒီး တၢ်အဲၣ်န့ၣ် အမၤစၢၤပှၤဒ်သိး ပကအိၣ်ဘၣ် ပူၤပူၤဖျဲးဖျဲး ဒီးပကဆဲးမၤ အတၢ်မၤ လၢတၢ်သးခုထီဘိ. လံာ်စီဆှံ ပာ်ဖျါထီၣ်ဝဲလၢ နီၢ်သးပၤရဒံစူးန့ၣ် အလီၤဂာ်ဒီး “တၢ်ပူၤဖျဲးအလီၢ်” ဒီး “တၤသၣ်လီၢ်လၢ အဒိးန့ၢ်ဘၣ်ထံ အါအါဂီၢ်ဂီၢ်.” (ၡါ ၄:၆; ၅၈:၁၁) အဃိ ပအိၣ်မူဘၣ်လၢ မုၢ်နံၤခံကတၢၢ်လၢ အကီအခဲတဖၣ်အပူၤ သနာ်က့ ခီဖျိလၢ ယဟိဝၤယွၤ အတၢ်ဆိၣ်ဂ့ၤအဃိ ပဝဲလၢ အအိၣ်ဘၣ်လၢ ပၤရဒံစူးအံၤအပူၤန့ၣ် ပအိၣ်ဘၣ် ပူၤပူၤဖျဲးဖျဲး ဒီးအိၣ်ဒီးတၢ်သးခု.—ၡါ ၅၄:၁၄; ၂ တံၤ ၃:၁.
၃. ဖဲပှၤအံၣ်စရ့လးဖိအစိၤန့ၣ် ဝံအတၢ်စံးပာ်ဖဲ ယၡါယၤ အဆၢဒိၣ် ၆၅ ဟဲလၢပှဲၤထီၣ်ဒ်လဲၣ်.
၃ ယဟိဝၤယွၤ သူဝဲဝံယၡါယၤလၢ ကပာ်ဖျါထီၣ်ဝဲ ဘၣ်ဃးဒီး ပှၤလၢအအိၣ်လၢ နီၢ်သးပၤရဒံစူးအပူၤ အတၢ်အိၣ်သး ကမၤသးဒ်လဲၣ်အဂ့ၢ်. ယၡါယၤ အဆၢဒိၣ် ၆၅ ပာ်ဖျါထီၣ်ဝဲ တၢ်အိၣ်သးတခါအံၤ ဒီးဝံအတၢ်စံးပာ် တခါအံၤ ဟဲလၢပှဲၤထီၣ်ဝဲ အဆိကတၢၢ်တဘျီဖဲ ချ.ခ.န ၅၃၇ နံၣ်. ဖဲန့ၣ်အဆၢကတီၢ် ပှၤယူဒၤဖိလၢ အပီၢ်ယၢ်က့ၤသးန့ၣ် ဟးထီၣ်ဘၣ်လၢ ဘၤဘူၤလိၣ် ဒီးက့ၤဘၣ်လၢ အထံအကီၢ်. ဖဲအဝဲသ့ၣ် က့ၤတုၤအခါ ယဟိဝၤယွၤ ဆိၣ်ဂ့ၤအဝဲသ့ၣ် ဒီးမၤစၢၤအဝဲသ့ၣ်ဒ်သိး အဝဲသ့ၣ် ကဘှီဂ့ၤထီၣ်က့ၤ ဝ့ၢ်ယရူၤၡလ့ၣ် လၢအဟးဂီၤ ဒီးကတ့ထီၣ်က့ၤ တၢ်လုၢ်ဟံၣ်လၢ အကဲဝဲ တၢ်ဘူၣ်ထီၣ်ဘါထီၣ် အလီၢ်ခိၣ်သ့ၣ် လၢဝ့ၢ်ယရူၤၡလ့ၣ်အပူၤ.—ၡါ ၅၁:၁၁; ကၤ ၈:၃.
၄. ဆၢကတီၢ်ခဲအံၤ ဝံအတၢ်စံးပာ်ဖဲ ယၡါယၤ အဆၢဒိၣ် ၆၅ ဟဲလၢပှဲၤထီၣ်ဒ်လဲၣ်.
၄ ဖဲ ခ.န ၁၉၁၉ နံၣ်န့ၣ် ယဟိဝၤယွၤ အပှၤဂီၢ်မုၢ် ပူၤဖျဲးထီၣ်ကွံာ်လၢ ဘၤဘူၤလိၣ်ဖးဒိၣ် အပူၤအဃိ ဝံယၡါယၤ အတၢ်စံးပာ် ဟဲလၢပှဲၤထီၣ်ဝဲ ခံဘျီတဘျီ. ဖဲန့ၣ်ဝံၤအလီၢ်ခံ နီၢ်သးပၤရဒံစူးန့ၣ် ဒိၣ်ထီၣ်လဲၢ်ထီၣ်လၢ ဟီၣ်ခိၣ်ချၢဒီဘ့ၣ်ညါ. ဒီးပှၤလၢအအိၣ်လၢ နီၢ်သးပၤရဒံစူးအပူၤန့ၣ် စံၣ်တဲၤတဲလီၤဝဲ ဘီမုၢ်တၢ်သးခုကစီၣ်လၢ တၢ်သးဆူၣ်, ဒုးအိၣ်ထီၣ် တၢ်အိၣ်ဖှိၣ်အသီတဖၣ် ဒီးပာ်ဖျါထီၣ်စ့ၢ်ကီး ခရံာ်ဖိ အတၢ်ဂ့ၤတၢ်ဝါအါမး. လၢညါ ပှၤလၢအအိၣ်ဒီး လုၢ်လၢ်သကဲာ်ပဝး လၢအအၢအသီ ဒီးအတဂ့ၤဘၣ်န့ၣ် ခဲအံၤ အဝဲသ့ၣ် “ဒုးအိၣ်ထီၣ် လုၢ်လၢ်သကဲာ်ပဝးအသီ ဒ်ကစၢ်ယွၤအတၢ်ဘၣ်သး အိၣ်ဝဲအသိး” လံ. (အ့း ၄:၂၄) တကးဒံးဘၣ် တၢ်ဆိၣ်ဂ့ၤအါမးလၢ ဝံယၡါယၤ တဲဖျါထီၣ်ဝဲန့ၣ် ခါဆူညါ ပကထံၣ်ဘၣ်လၢ အကဟဲလၢပှဲၤထီၣ်နီၢ်ကီၢ်. ဒီးခဲအံၤစ့ၢ်ကီး ခီဖျိလၢ ပအိၣ်ဘၣ်လၢ နီၢ်သးပၤရဒံစူးအပူၤအဃိ ပဒိးန့ၢ်ဘၣ် အဘျုးဒီဒူၣ်ညါ. ပအိၣ်ဘၣ်လၢ နီၢ်သးပၤရဒံစူးအပူၤန့ၣ် အကဲဘျုးလၢပဂီၢ်ဒ်လဲၣ် ဒီးဘၣ်မနုၤအဃိ ပကဘၣ်ဆဲးအိၣ်လၢ နီၢ်သးပၤရဒံစူးအပူၤထီဘိလဲၣ်. ပကဆဲးကွၢ်သကိး.
ပှၤလၢအအိၣ်လၢ နီၢ်သးပၤရဒံစူးအပူၤန့ၣ် ကဒိးန့ၢ်ဘၣ်အဘျုး
၅. ဒ် ယၡါယၤ ၆၅:၁၃ ပာ်ဖျါထီၣ်ဝဲအသိး ပှၤလၢအအိၣ်လၢ နီၢ်သးပၤရဒံစူးအပူၤန့ၣ် ကဒိးန့ၢ်ဘၣ်မနုၤလဲၣ်.
၅ ကဒိးန့ၢ်ဘၣ် နီၢ်သးတၢ်လိၣ်ဘၣ် ကိးမံၤဒဲး. ပှၤလၢအအိၣ်လၢ နီၢ်သးပၤရဒံစူးအပူၤ ဒီးပှၤလၢအတအိၣ်လၢ နီၢ်သးပၤရဒံစူးအပူၤ အတၢ်အိၣ်မူ လီၤဆီလိာ်သးဒ်လဲၣ်န့ၣ် ဝံယၡါယၤ ပာ်ဖျါထီၣ်ဝဲ လီၤတံၢ်လီၤဆဲး. (ဖး ယၡါယၤ ၆၅:၁၃.) ပဝဲလၢ အဘူၣ်ထီၣ်ဘါထီၣ် ယဟိဝၤယွၤန့ၣ် ဒ်သိးပတၢ်ရ့လိာ်သးဒီး ယဟိဝၤယွၤ ကဂ့ၤအဂီၢ် ယဟိဝၤယွၤဟ့ၣ်ပှၤ နီၢ်သးတၢ်လိၣ်ဘၣ် ကိးမံၤဒဲး. အဟ့ၣ်ပှၤ အသးစီဆှံ, လံာ်စီဆှံ ဒီးလံာ်လဲၢ်တဖၣ်လၢ အဒိးသန့ၤထီၣ်သးလၢ အကလုၢ်ကထါ အဃိ ပ “အီၣ်တၢ်, . . . အီတၢ်, . . . [ဒီး] သးခု.” (ထိၣ်သတြီၤဒီး လီၣ်ဖျါ ၂၂:၁၇.) မ့မ့ၢ်ပှၤလၢ အတအိၣ်လၢ နီၢ်သးပၤရဒံစူးအပူၤဘၣ်န့ၣ် အဝဲသ့ၣ် အတၢ်အိၣ်သး လီၤဆီဒိၣ်မး. အဝဲသ့ၣ် တဒိးန့ၢ်ဘၣ် နီၢ်သးတၢ်အီၣ်ဘၣ်အဃိ အဝဲသ့ၣ်က “လီၤဘဲအီၣ်တၢ် . . . , ကလီၤဘဲအီထံ . . . , [ဒီး] ကတူၢ်ဘၣ် တၢ်မဲာ်ဆှး.”—ဧၤ ၈:၁၁.
၆. ယိၤအ့လး ၂:၂၁-၂၄ ပာ်ဖျါထီၣ် တၢ်ဟ့ၣ်တနီၤလၢ ယဟိဝၤယွၤ ဟ့ၣ်အပှၤဂီၢ်မုၢ်န့ၣ် မ့ၢ်မနုၤလဲၣ် ဒီးအဘျုးအိၣ်ဒ်လဲၣ်.
၆ လၢဝံယိၤအ့လး အတၢ်စံးပာ်န့ၣ် အတဲဖျါထီၣ်ဝဲ တၢ်အီၣ်တၢ်အီတဖၣ် ဒ်သိးဒီး ဘု, စပံးထံ ဒီးသ့ၣ်စၤယံး အသိတဖၣ်. တၢ်သ့ၣ်တဖၣ်အံၤ ပာ်ဖျါထီၣ်ဝဲလၢ ယဟိဝၤယွၤ ဟ့ၣ်အပှၤဂီၢ်မုၢ် တၢ်လၢအဝဲသ့ၣ်လိၣ်ဘၣ် ကိးမံၤဒဲးဃုာ်ဒီး အတၢ်ဟံးစုနဲၣ်ကျဲ လၢလံာ်စီဆှံအပူၤ ဒ်သိးအဝဲသ့ၣ်တၢ်နာ် ကဆဲးဂၢၢ်ကျၢၤထီဘိ. (အ့ ၂:၂၁-၂၄) အဒိ အဟ့ၣ်ပှၤ နီၢ်သးတၢ်အီၣ်တဖၣ် ဒ်သိးဒီး လံာ်စီဆှံ, ပတၢ်ကရၢကရိလံာ်လဲၢ်လၢ အဒိးသန့ၤထီၣ်သးလၢ လံာ်စီဆှံ, ပဝဲးပဆဲး, တၢ်အိၣ်ဖှိၣ်တဖၣ်, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ်အဃိ ပဒိးန့ၢ်ဘၣ် နီၢ်သးတၢ်လိၣ်ဘၣ် ကိးမံၤဒဲး.
၇. ဘၣ်မနုၤအဃိ ပ “သးခု” လဲၣ်. (ယၡါယၤ ၆၅:၁၄)
၇ ကဒိးန့ၢ်ဘၣ် တၢ်သးခု ဒီးတၢ်သးမံ. ယဟိဝၤယွၤ အပှၤဂီၢ်မုၢ်တဖၣ် သးအိၣ်စံးဘျုးစံးဖှိၣ် ယဟိဝၤယွၤ လၢအသးဒီဖျၢၣ်အဃိ အဝဲသ့ၣ် “ကိးပသူထီၣ်လၢ တၢ်သူၣ်ဖှံသးညီ” အပူၤ. (ဖး ယၡါယၤ ၆၅:၁၄.) ပအိၣ်ဒီး လံာ်စီဆှံ တၢ်မ့ၢ်တၢ်တီလၢ အမၤဆူၣ်ထီၣ် ပတၢ်နာ်, တၢ်အၢၣ်လီၤတဖၣ် လၢလံာ်စီဆှံပူၤ ဒီးခီဖျိလၢ ယ့ၣ်ၡူးခရံာ် ဟ့ၣ်လုၢ်ထီၣ်သးအဃိ ပအိၣ်ဒီး တၢ်မုၢ်လၢ်နီၢ်ကီၢ် လၢခါဆူညါအဂီၢ်. ဒီးခီဖျိလၢ တၢ်ဂ့ၢ်တဖၣ်အံၤအဃိ ပ “သးခု.” တကးဒံးဘၣ် ပမ့ၢ်တဲသကိး တၢ်ဂ့ၢ်တဖၣ်အံၤဒီး ပဒီပုၢ်ဝဲၢ်မုၣ်ခွါန့ၣ် ပကဒိးန့ၢ်ဘၣ် တၢ်သးခုနီၢ်ကီၢ်.—စံး ၃၄:၈; ၁၃၃:၁-၃.
၈. တၢ်ဂ့ၤတၢ်ဝါ အရ့ဒိၣ်ခံခါလၢ ပထံၣ်ဘၣ်လၢ ပှၤလၢအအိၣ်လၢ နီၢ်သးပၤရဒံစူးအပူၤန့ၣ် မ့ၢ်မနုၤလဲၣ်.
၈ တၢ်ဂ့ၤတၢ်ဝါ အရ့ဒိၣ်ခံခါ လၢအမ့ၢ် တၢ်အဲၣ် ဒီးတၢ်ဃူတၢ်ဖိးန့ၣ် ပထံၣ်ဘၣ်လၢ ပှၤလၢအအိၣ်လၢ နီၢ်သးပၤရဒံစူးအပူၤ. တၢ်အဲၣ်လၢအမ့ၢ် “တၢ်စၢဃာ်လၢ အဒုးအိၣ်ဃူအိၣ်ဖိးတၢ်” န့ၣ်မၤစၢၤပှၤဒ်သိး ပကထံၣ်တမှံကွၢ်လၢ ပတၢ်အိၣ်မူလၢ ဟီၣ်ခိၣ်သီန့ၣ် ကမုာ်ဒိၣ်မး ဒီးပကအိၣ်ဒီးတၢ်အဲၣ် ဒီးတၢ်ဃူတၢ်ဖိး အါန့ၢ်ခဲအံၤဒံး. (ကလီး ၃:၁၄) ဒီပုၢ်ဝဲၢ်မုၣ်တဂၤ တဲဖျါထီၣ် အတၢ်ထံၣ် ဘၣ်ဃးဒီး ယဟိဝၤပှၤအုၣ်အသး ဖဲအထံၣ်လိာ်သးဒီး အဝဲသ့ၣ် အဆိကတၢၢ်တဘျီ ဒီးအတဲဝဲလၢ “ယၤဒီးယဟံၣ်ဖိဃီဖိ ကအိၣ်ဒီးတၢ်သးခုအဂီၢ် ယကဘၣ်မၤဒ်လဲၣ်န့ၣ် ယတသ့ၣ်ညါဘၣ်. ဘၣ်ဆၣ် ဖဲယထံၣ်လိာ်သးဒီး ယဟိဝၤပှၤအုၣ်အသး အဆိကတၢၢ်တဘျီအခါ ယထံၣ်ဘၣ်လၢ အဝဲသ့ၣ် ပာ်ဖျါထီၣ် တၢ်အဲၣ်နီၢ်ကီၢ် လၢတဂၤဒီးတဂၤအဖီခိၣ်.” အဃိ ပှၤတဂၤဂ့ၤတဂၤဂ့ၤ မ့ၢ်ဘၣ်သး ဒိးန့ၢ်ဘၣ် တၢ်သးခု ဒီးတၢ်သးမံန့ၣ် အဝဲသ့ၣ် ကဘၣ်အိၣ်လၢ ပနီၢ်သးပၤရဒံစူးအပူၤ. ဒီးပှၤဂၤမ့ၢ်ထံၣ် ယဟိဝၤယွၤ အခ့အပှၤ ဒ်လဲၣ်သနာ်က့ ယဟိဝၤယွၤ ဒီးကယဲၢ်ပှၤဟီၣ်ခိၣ်ဖိ ဒီးမူခိၣ်ကလူးလၢ အဘူၣ်ထီၣ်ဘါထီၣ်အီၤခဲလၢာ်န့ၣ် ထံၣ်ဝဲလၢ ယဟိဝၤယွၤ အခ့အပှၤတဖၣ် အိၣ်ဒီးမံၤဂ့ၤသၣ်ဂ့ၤ.—ၡါ ၆၅:၁၅.
၉. ဘၣ်ဃးဒီး တၢ်ကိးမံၤဒဲးလၢ အမၤသးအုး ဒီးမၤကိၢ်မၤဂီၤပှၤ လၢခဲအံၤန့ၣ် ယၡါယၤ ၆၅:၁၆, ၁၇ တဲဝဲဒ်လဲၣ်.
၉ ကပာ်သးမုာ်မုာ် ဒီးတသးကိၢ်တၢ်လၢၤဘၣ်. ပှၤလၢတအိၣ်လၢ နီၢ်သးပၤရဒံစူးအပူၤဘၣ်န့ၣ် ယၡါယၤ ၆၅:၁၄ တဲအဝဲသ့ၣ်လၢ “သုကဟီၣ်ကိးပသူထီၣ်လၢ တၢ်သူၣ်အုးသးအုးအပူၤ ဒီးသုကဟီၣ်ကယၢၤ ခီဖျိလၢ သုသူၣ်ဘၣ်ဒိသးဘၣ်ဒိနးမး အဃိ.” မ့မ့ၢ်လၢ ကစၢ်ယွၤ အပှၤဂီၢ်မုၢ်န့ၣ် ခါဆူညါ တၢ်ကိးမံၤဒဲးလၢ အမၤသးအုး ဒီးမၤကိၢ်မၤဂီၤ အဝဲသ့ၣ်အသးန့ၣ် “ကဘၣ်တၢ်သးပ့ၤနီၣ်ကွံာ်အီၤ ဒီးကဘၣ်တၢ်ပာ်တဒၢအီၤ လၢ [ကစၢ်ယွၤ] မဲာ်ညါ.” (ဖး ယၡါယၤ ၆၅:၁၆, ၁၇.) ယဟိဝၤယွၤ ကမၤလီၤမၢ်ကွံာ် ပတၢ်ကီတၢ်ခဲတဖၣ် ဒီးလၢခံကယီကယီန့ၣ် ပတသ့ၣ်နီၣ်ထီၣ် တၢ်တူၢ်ဘၣ်လၢ အမၤဘၣ်ဒိပသး နီတစဲးလၢၤဘၣ်.
၁၀. နအိၣ်ဘၣ်လၢ ယဟိဝၤယွၤ အတၢ်ကရၢကရိ အပူၤအဃိ နတူၢ်ဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၀ ခဲအံၤစ့ၢ်ကီး ဖဲပလဲၤထီၣ်တၢ်အိၣ်ဖှိၣ်အခါ ပဒိးန့ၢ်ဘၣ် တၢ်သးမုာ်. ဖဲပထီၣ် တၢ်အိၣ်ဖှိၣ်အခါ ပတသးစၢၢ်ဆၢ ပတၢ်ကီတၢ်ခဲဘၣ်အဃိ ပတသးကိၢ်တၢ် အါတလၢဘၣ်. ဒီးဖဲပပာ်ဖျါထီၣ် သးစီဆှံအတၤသၣ် လၢအပၣ်ဃုာ်ဒီး တၢ်အဲၣ်တၢ်ကွံ, တၢ်သူၣ်ခုသးခု, တၢ်သူၣ်မံသးမုာ်, တၢ်သူၣ်ဂ့ၤသးဝါ ဒီးတၢ်သူၣ်စူၤသးစူၤအခါ ပမၤစၢၤ ဒီပုၢ်ဝဲၢ်မုၣ်ခွါအဂၤလၢ အကဒိးန့ၢ်ဘၣ် တၢ်သးမုာ်. (ကလၤ ၅:၂၂, ၂၃) ပအိၣ်ဘၣ်လၢ ယဟိဝၤယွၤ အတၢ်ကရၢကရိ အပူၤအဃိ မ့ၢ်ဝဲ တၢ်ဆိၣ်ဂ့ၤဖးဒိၣ်. ဒီးပမ့ၢ်ဆဲးအိၣ်လၢ နီၢ်သးပၤရဒံစူးအပူၤန့ၣ် ပကထံၣ်ဘၣ် ယဟိဝၤယွၤ မၤလၢပှဲၤထီၣ် အတၢ်အၢၣ်လီၤလၢ အကမၤကဲထီၣ် “မူခိၣ်အသီ ဒီးဟီၣ်ခိၣ်အသီ.”
ပအိၣ်ဘၣ်လၢ ယဟိဝၤယွၤ အတၢ်ကရၢကရိ အပူၤအဃိ မ့ၢ်ဝဲ တၢ်ဆိၣ်ဂ့ၤဖးဒိၣ် (ကွၢ်လံာ်အဆၢ ၁၀) c
၁၁. ဒ် ယၡါယၤ ၆၅:၁၈, ၁၉ ပာ်ဖျါဝဲအသိး နီၢ်သးပၤရဒံစူး လၢယဟိဝၤယွၤ ဒုးအိၣ်ထီၣ်ဝဲန့ၣ် ကဲဘျုးလၢပဂီၢ်ဒ်လဲၣ်.
၁၁ ကသးခု ဒီးသူၣ်ဖှံသးညီ. ဝံယၡါယၤ ဆဲးတဲဝဲလၢ ပှၤလၢအအိၣ်လၢ နီၢ်သးပၤရဒံစူးအပူၤ လၢယဟိဝၤယွၤ ဒုးအိၣ်ထီၣ်ဝဲန့ၣ် အဝဲသ့ၣ်က “သးခု ဒီးသူၣ်ဖှံသးညီ.” (ဖး ယၡါယၤ ၆၅:၁၈, ၁၉.) အဃိ ပထံၣ်ဘၣ်လၢ ယဟိဝၤယွၤ သူပှၤဒ်သိး ပကမၤစၢၤပှၤဂၤလၢ ကဟးထီၣ်ကွံာ်လၢ တၢ်ဘူၣ်တၢ်ဘါကမၣ်အပူၤ ဒီးမၤစၢၤ အဝဲသ့ၣ်လၢ အကအိၣ်ဘၣ်လၢ နီၢ်သးပၤရဒံစူးအပူၤ. ပသ့ၣ်ညါဘၣ် တၢ်မ့ၢ်တၢ်တီအဃိ ပသးခုဒိၣ်မး ဒီးပဘၣ်သး မၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် တၢ်မ့ၢ်တၢ်တီ.—ယံး ၃၁:၁၂.
၁၂. တၢ်အၢၣ်လီၤလၢ ယၡါယၤ ၆၅:၂၀-၂၄ ပာ်ဖျါဝဲန့ၣ် နတူၢ်ဘၣ်ဒ်လဲၣ် ဒီးဘၣ်မနုၤအဃိလဲၣ်.
၁၂ ပအိၣ်ဘၣ်လၢ နီၢ်သးပၤရဒံစူးအပူၤအဃိ ပအိၣ်ဒီး တၢ်မုၢ်လၢ်. ခီဖျိလၢ တၢ်မုၢ်လၢ်အံၤအဃိ ပသးခု ဒီးသူၣ်ဖှံသးညီဒိၣ်မး. ဆိကမိၣ်ကွၢ် လံာ်စီဆှံ အတၢ်အၢၣ်လီၤ ဘၣ်ဃးဒီး တၢ်လၢပကထံၣ်ဘၣ် ဒီးပကမၤဘၣ်ခဲလၢာ်လၢ ဟီၣ်ခိၣ်သီအပူၤ. လံာ်စီဆှံ တဲဝဲလၢ “ဖိသၣ်လၢ အိၣ်ဖျဲၣ်ထီၣ် သီသီတဖၣ် တအိၣ်မူထဲ စှၤကိာ်သီလၢၤဘၣ်. . . . ယပှၤဂီၢ်မုၢ် အသးသမူ ကထီဝဲ ဒ်သိးဒီး သ့ၣ်တထူၣ်အသးသမူထီဝဲ.” တကးဒံးဘၣ် လံာ်စီဆှံ တဲဝဲလၢ ကစၢ်ယွၤ အပှၤဂီၢ်မုၢ် “ကတ့ထီၣ်ဟံၣ်တဖၣ် ဒီးကအိၣ်ဝဲလၢ အပူၤလီၤ. ဒီးအဝဲသ့ၣ် ကသူၣ်လီၤ စပံးကျီးတဖၣ် ဒီးကအီၣ်ဝဲ အသၣ်.” ဒီးခီဖျိလၢ “ယဟိဝၤယွၤ ဆိၣ်ဂ့ၤ” ပှၤအဃိ တၢ်မၤလၢ ပကမၤန့ၣ် “တကဲထီၣ် တၢ်ကလီကလီဘၣ်.” ယဟိဝၤယွၤ အၢၣ်လီၤဝဲလၢ ပကအိၣ်ဘၣ် ပူၤပူၤဖျဲးဖျဲး ဒီးအိၣ်ဒီး တၢ်အိၣ်မူလၢ အလီၤသူၣ်မံသးမုာ် ဒီးအိၣ်ဒီးတၢ်တိာ်ပာ် နီၢ်ကီၢ်. တကးဒံးဘၣ် “တချုးလၢ [ပ] ကိးထီၣ်ဒံးဘၣ်န့ၣ်” ယဟိဝၤယွၤ ကသ့ၣ်ညါ ပဝဲတဂၤဘၣ်တဂၤ တၢ်လိၣ်ဘၣ် ဒီးအက “မၤလၢပှဲၤ တၢ်သးသမူခဲလၢာ် အတၢ်မိၣ်န့ၢ်သးလီတဖၣ်.”—ၡါ ၆၅:၂၀-၂၄; စံး ၁၄၅:၁၆.
၁၃. ယၡါယၤ ၆၅:၂၅ ပာ်ဖျါဝဲလၢ တချုးပှၤတဂၤ ဘူၣ်ထီၣ်ဘါထီၣ် ယဟိဝၤယွၤ ဒံးဘၣ်န့ၣ် အဘၣ်ဆီတလဲ မနုၤလဲၣ်.
၁၃ ကအိၣ်ဘၣ်မုာ်မုာ်ခုၣ်ခုၣ် ဒီးပူၤပူၤဖျဲးဖျဲး. ပထံၣ်ဘၣ်လၢ ပှၤအါဂၤလၢ အထီဒါက့ၤတၢ်, မၤဆူၣ်မၤစိးတၢ် ဒီးမၤတၢ်တတီတလိၤ လၢညါန့ၣ် ခီဖျိလၢ ယဟိဝၤယွၤ အသးစီဆှံ အတၢ်မၤစၢၤအဃိ ခဲအံၤအဝဲသ့ၣ် ဆီတလဲက့ၤအသး. (ဖး ယၡါယၤ ၆၅:၂၅.) အဝဲသ့ၣ် ဂုာ်ကျဲးစၢး မၤလီၤမၢ်ကွံာ် အတၢ်ပာ်သး ဒီးသကဲာ်ပဝး လၢအတဂ့ၤဘၣ်တဖၣ်. (ရိ ၁၂:၂; အ့း ၄:၂၂-၂၄) နီၢ်ကီၢ်န့ၣ် ကစၢ်ယွၤ အပှၤဂီၢ်မုၢ်တဖၣ် တကဲပှၤလၢပှၤပှဲၤဘၣ်, အဃိ အဝဲသ့ၣ် ကဆဲးမၤဘၣ်တၢ်ကမၣ်. သနာ်က့ ယဟိဝၤယွၤ ဒုးအိၣ်ဃူအိၣ်ဖိး “ပှၤအကလုာ်ကလုာ်” လၢအအဲၣ်အီၤ ဒီးအဲၣ်လိာ်သး တဂၤဒီးတဂၤအဃိ ပထံၣ်ဘၣ်လၢ အဝဲသ့ၣ် အိၣ်ဘၣ်မုာ်မုာ်ခုၣ်ခုၣ် ဒီးပူၤပူၤဖျဲးဖျဲး. (တံ ၂:၁၁) ပှၤလၢအမၤ တၢ်လီၤလး ဒီးဒုးအိၣ်ဃူအိၣ်ဖိးတၢ် သ့ဒ်အံၤန့ၣ် မ့ၢ်ဝဲထဲ သ့တၢ်လၢာ် ကစၢ်ယွၤတဂၤလီၤ.
၁၄. ဒီပုၢ်ဝဲၢ်ခွါတဂၤ အတၢ်အိၣ်သးန့ၣ် အလီၤဂာ်ဒီး ယၡါယၤ ၆၅:၂၅ ဒ်လဲၣ်.
၁၄ ပှၤတဂၤ ဆီတလဲ အတၢ်ပာ်သး န့ၢ်အနီၢ်ကီၢ်ဧါ. ပကကွၢ်သကိး တၢ်လဲၤခီဖျိတခါ. ပိာ်ခွါသးစၢ်တဂၤလၢ အအိၣ်အနံၣ် ၂၀ ဒီးအဘၣ်လဲၤအိၣ်လၢ ဃိာ်ပူၤမၢ်မၢ်န့ၣ် အလုၢ်လၢ်သကဲာ်ပဝး တဂ့ၤဘၣ် ဒီးအမၤဆူၣ်မၤစိးတၢ်အါမး. အဘၣ်အိၣ်လၢ ဃိာ်ပူၤ ခီဖျိလၢ အဟုၣ်ပှၤကါ, အတမျာ်တၢ် ဒီးအမၤကမၣ်တၢ်ဖးဒိၣ် လၢအဂၤဒီဒူၣ်ညါ. အအ့ၣ်လိာ်သး ဒီးထိလိာ်သးဒီး ပှၤဂၤထီဘိ. သနာ်က့ ဖဲအနၢ်ဟူဘၣ် တၢ်မ့ၢ်တၢ်တီလၢ လံာ်စီဆှံအပူၤ ဒီးအစးထီၣ် လဲၤထီၣ်ယဟိဝၤပှၤအုၣ်အသး အတၢ်အိၣ်ဖှိၣ်အခါ အသ့ၣ်ညါထီၣ် တၢ်အိၣ်မူအတၢ်တိာ်ပာ် လၢအမ့ၢ် အကဘၣ် ဘူၣ်ထီၣ်ဘါထီၣ် ယဟိဝၤယွၤ လၢနီၢ်သးပၤရဒံစူးအပူၤ. ဒီးယၡါယၤ ၆၅:၂၅ လီၤဂာ်ဒီး အတၢ်အိၣ်သးဒ်လဲၣ်န့ၣ် အဒိးဘျၢထံ ဝံၤအလီၢ်ခံ အဆိကမိၣ်ဝဲအဂ့ၢ်မၢ်မၢ်. လၢညါ ဒီပုၢ်ဝဲၢ်ခွါအံၤ အတၢ်ပာ်သးန့ၣ် လီၤဂာ်ဒ်သိးဒီး ခ့ယုၢ်လၢ အလီၤပျံၤလီၤဖုး ဘၣ်ဆၣ် ခဲအံၤန့ၣ် ခီဖျိလၢ အဆီတလဲအသးအဃိ အလီၤဂာ်က့ၤဒ်သိးဒီး သိဖိလၢ အအိၣ်မုာ်မုာ်ခုၣ်ခုၣ်တဒု.
၁၅. ဘၣ်မနုၤအဃိ ပဘၣ်သးမၤစၢၤပှၤဂၤဒ်သိး အဝဲသ့ၣ် ကအိၣ်ဘၣ်လၢ ယဟိဝၤယွၤ အပှၤဂီၢ်မုၢ်အကျါလဲၣ် ဒီးပမၤစၢၤ အဝဲသ့ၣ်သ့ဒ်လဲၣ်.
၁၅ ဖဲ ယၡါယၤ ၆၅:၁၃ န့ၣ် တၢ်ကတိၤ စးထီၣ်လၢ “တၢ်ပၢကစၢ် ယဟိဝၤ တဲဝဲလၢ.” ဒီးအဆၢဖိ ၂၅ န့ၣ် တၢ်ကတိၤ ကတၢၢ်လၢ “ယဟိဝၤယွၤ တဲဝဲဒ်န့ၣ်လီၤ.” အဃိ ပထံၣ်ဘၣ်လၢ ယဟိဝၤယွၤ အတၢ်ကတိၤ ဟဲလၢထီၣ်ပှဲၤထီၣ်ထီဘိ. (ၡါ ၅၅:၁၀, ၁၁) ခဲအံၤ နီၢ်သးပၤရဒံစူး အိၣ်ထီၣ်လံ. ဒီးယဟိဝၤယွၤ ပာ်ဖှိၣ်ထီၣ် အပှၤဂီၢ်မုၢ် လၢအပှဲၤဒီး တၢ်အဲၣ်တၢ်ကွံ ဒီးတၢ်ဃူတၢ်ဖိးအဃိ ပစံးဘျုးအီၤဒိၣ်မး. တကးဒံးဘၣ် ပမ့ၢ်အိၣ်လၢ ဟီၣ်ခိၣ်လၢ အအိၣ်ထဲ တၢ်အၢတၢ်သီအပူၤ သနာ်က့ ခီဖျိလၢ ပအိၣ်ဘၣ်လၢ ကစၢ်ယွၤ အပှၤဂီၢ်မုၢ်အကျါအဃိ ပအိၣ်ဘၣ် မုာ်မုာ်ခုၣ်ခုၣ် ဒီးပူၤပူၤဖျဲးဖျဲး. (စံး ၇၂:၇) ခီဖျိလၢ တၢ်ဂ့ၢ်တဖၣ်အံၤအဃိ ပဘၣ်သးမၤစၢၤပှၤဂၤဒ်သိး အဝဲသ့ၣ် ကအိၣ်ဘၣ်လၢ ယဟိဝၤယွၤ အပှၤဂီၢ်မုၢ်အကျါ. အဃိ ပဂုာ်ကျဲးစၢး စံၣ်တဲၤတဲလီၤတၢ်ဆူၣ်ဆူၣ် ဒီးမၤစၢၤပှၤဂၤဒ်သိး အဝဲသ့ၣ်ကကဲထီၣ် ယ့ၣ်ၡူးခရံာ် အပျဲၢ်အဘီၣ်.—မး ၂၈:၁၉, ၂၀.
မၤစၢၤပှၤဂၤလၢ ကအိၣ်ဘၣ်လၢ နီၢ်သးပၤရဒံစူးအပူၤ
၁၆. ဒ်သိးပှၤတဂၤ ကဘၣ်သး ပၣ်ဃုာ်လၢ နီၢ်သးပၤရဒံစူး အပူၤအဂီၢ် တၢ်မနုၤ ထုးန့ၢ်အသးလဲၣ်.
၁၆ ဒ်သိးပှၤဂၤ ကဘၣ်သး ပၣ်ဃုာ်လၢ နီၢ်သးပၤရဒံစူး အပူၤအဂီၢ် ပဝဲတဂၤဘၣ်တဂၤန့ၣ် ပအိၣ်ဒီး မူဒါလၢအရ့ဒိၣ်. ဒီးပကမၤလၢပှဲၤ ပမူဒါအဂီၢ် ပကဘၣ်ကွၢ်လိ ယဟိဝၤယွၤ. ယဟိဝၤယွၤန့ၣ် အတမၢဆူၣ်ပှၤဂၤလၢ ကဟဲနုာ်လီၤလၢ အတၢ်ကရၢကရိ အပူၤဘၣ်. ဘၣ်ဆၣ်အ “မူၤဃီၤ” ပှၤဂၤလၢအအိၣ် ကယီကယီ. (ယိၤ ၆:၄၄; ယံး ၃၁:၃) ပှၤလၢအသးဘျၢတနီၤန့ၣ် အသ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါ ဒီးအတၢ်ပာ်သူၣ်ပာ်သးအဃိ ထုးန့ၢ်အဝဲသ့ၣ်သး ဒီးအဝဲသ့ၣ် ဘၣ်သးကဲထီၣ် ယဟိဝၤယွၤ အသကိး. ပတၢ်ဂ့ၤတၢ်ဝါ ဒီးလုၢ်လၢ်သကဲာ်ပဝး လၢအဂ့ၤန့ၣ် ကမၤစၢၤပှၤဂၤဒ်လဲၣ်.
၁၇. ပမၤစၢၤပှၤဂၤ ဒ်သိး အဝဲသ့ၣ် ကဘၣ်သး ပၣ်ဃုာ်လၢ နီၢ်သးပၤရဒံစူးအပူၤ ကသ့ဒ်လဲၣ်.
၁၇ ပမၤစၢၤပှၤဂၤ ဒ်သိး အဝဲသ့ၣ် ကဘၣ်သး ပၣ်ဃုာ်လၢ နီၢ်သးပၤရဒံစူးအပူၤ သ့ခီဖျိ ပရ့လိာ်သးဒီး ပဒီပုၢ်ဝဲၢ်မုၣ်ခွါဂ့ၤဂ့ၤ ဒီးပာ်ဖျါထီၣ်တၢ်အဲၣ်. လၢတၢ်မၢဖိအစိၤန့ၣ် ပှၤလၢအသးအိၣ် တၢ်မ့ၢ်တၢ်တီ လၢအလဲၤထီၣ် တၢ်အိၣ်ဖှိၣ် ဖဲဝ့ၢ်ကရံၣ်သူးအပူၤန့ၣ် အတဲဝဲလၢ “ကစၢ်ယွၤအိၣ်လၢ သုကျါနီၢ်ကီၢ်.” ဒီးခဲအံၤစ့ၢ်ကီး ဖဲပှၤလၢအသးအိၣ် တၢ်မ့ၢ်တၢ်တီတဂၤ ဟဲထီၣ်ပတၢ်အိၣ်ဖှိၣ်အခါ ပဘၣ်သးလၢ အဝဲသ့ၣ် ကတူၢ်ဘၣ်ဝဲဒ်န့ၣ်. (၁ ကရံၣ် ၁၄:၂၄, ၂၅; ကၤ ၈:၂၃) အဃိ တၢ်မၤလိာ် လၢအမ့ၢ် “အိၣ်ဃူအိၣ်ဖိးလိာ်သုသး တဂၤဒီးတဂၤ” န့ၣ်ပကဘၣ် ဆဲးမၤထွဲအီၤထီဘိ.—၁ သ့း ၅:၁၃.
၁၈. ပတၢ်ရ့လိာ်သး တဂၤဒီးတဂၤန့ၣ် ထုးန့ၢ်ပှၤသးလၢ နီၢ်သးပၤရဒံစူးအပူၤ သ့ဒ်လဲၣ်.
၁၈ ပကဘၣ် ဂုာ်ကျဲးစၢး ထံၣ်ပဒီပုၢ်ဝဲၢ်မုၣ်ခွါ ဒ်ယဟိဝၤယွၤ ထံၣ်ဝဲအသိး. ဒီးပမၤဒ်န့ၣ် သ့ခီဖျိ ပကွၢ်လၢ အဝဲသ့ၣ် အတၢ်ဂ့ၤတၢ်ဝါ ဒီးကွၢ်ကပာ်ကွံာ် အတၢ်ဂံၢ်စၢ်ဘါစၢ်, ခီဖျိလၢ ခါဆူညါန့ၣ် ပတၢ်ဂံၢ်စၢ်ဘါစၢ် ကလီၤမၢ်ကွံာ်. ဒီးပတၢ်ဂ့ၢ်ကီ မ့ၢ်အိၣ်လၢ ပဝဲတဂၤဒီးတဂၤ အဘၢၣ်စၢၤန့ၣ် ပကဘၣ်ကျဲးစၢး မၤဘၣ်ဂီၢ်က့ၤအီၤ ဒီးအိၣ်ဒီး “တၢ်သူၣ်ဂ့ၤသးဝါ ဒီးတၢ်သးကညီၤ လၢတဂၤဒီးတဂၤ အဖီခိၣ် . . . ဒီးပျၢ်လိာ်သးတၢ်ကမၣ် တဂၤဒီးတဂၤ လၢာ်လၢာ်ဆ့ဆ့.” (အ့း ၄:၃၂) ပမ့ၢ်ရ့လိာ်သး ဒ်န့ၣ်န့ၣ် ကထုးန့ၢ်ပှၤလၢ အဘၣ်သးလၢ ပှၤကရ့ဒီးအီၤဒ်န့ၣ်တဖၣ်အသး ဒီးအကဘၣ်သး ပၣ်ဃုာ်လၢ နီၢ်သးပၤရဒံစူးအပူၤ. b
ဆဲးအိၣ်လၢ နီၢ်သးပၤရဒံစူးအပူၤ
၁၉. (က) ဒ်တၢ်လွံၢ်နၢၣ် လၢအမ့ၢ် “ အဝဲသ့ၣ်ဟးထီၣ် ဒီးဟဲက့ၤကဒါ” ပာ်ဖျါဝဲအသိး ပှၤတနီၤလၢ အဟဲက့ၤကဒါလၢ နီၢ်သးပၤရဒံစူးအပူၤန့ၣ် အဝဲသ့ၣ် တဲဖျါထီၣ် အတၢ်တူၢ်ဘၣ်ဒ်လဲၣ်. (ခ) ပကဘၣ် ပာ်လီၤသးလၢ ပကမၤမနုၤလဲၣ်. (ကွၢ်စ့ၢ်ကီးတၢ်ဂီၤ.)
၁၉ ပအိၣ်ဘၣ်လၢ နီၢ်သးပၤရဒံစူးအပူၤအဃိ ပသးခုဒိၣ်မး. နီၢ်သးပၤရဒံစူးအံၤ အဃံလၤ ဒိၣ်န့ၢ်ဒံးလၢညါ ဒီးပှၤလၢအဘူၣ်ထီၣ်ဘါထီၣ် ယဟိဝၤယွၤ အိၣ်ဝဲ အါထီၣ်မၣ်အါထီၣ်. အဃိ ပကဘၣ်စံးဘျုး ယဟိဝၤယွၤထီဘိလၢ အဒုးအိၣ်ထီၣ်န့ၢ်ပှၤ နီၢ်သးပၤရဒံစူးအံၤ. ဒီးပှၤတဂၤဂ့ၤ တဂၤဂ့ၤ မ့ၢ်ဘၣ်သး ဒိးန့ၢ်ဘၣ် နီၢ်သးတၢ်လိၣ်ဘၣ် ကိးမံၤဒဲး, ဒိးန့ၢ်ဘၣ် တၢ်သးမံ, ပာ်သးမုာ်မုာ် ဒီးအိၣ်ဘၣ် ပူၤပူၤဖျဲးဖျဲးန့ၣ် အကဘၣ် နုာ်လီၤလၢ နီၢ်သးပၤရဒံစူးအပူၤ ဒီးတဘၣ်ဟးထီၣ် နီတဘျီဘၣ်. သနာ်က့ မုၣ်ကီၤလံၢ်န့ၣ် အဂုာ်ကျဲးစၢး လ့ပစီပှၤဒ်သိး ပကဟးထီၣ်ကွံာ်လၢ နီၢ်သးပၤရဒံစူးအပူၤအဃိ ပကဘၣ်ပလီၢ်သးထီဘိ. (၁ ပ့း ၅:၈; လီၣ် ၁၂:၉) ပတဘၣ်ပျဲလၢ အကမၤနၢၤပှၤဘၣ်. ပကဘၣ်ဂုာ်ကျဲးစၢး အိၣ်မူ ဃံဃံလၤလၤ, အိၣ်ဒီး လုၢ်လၢ်သကဲာ်ပဝး လၢအဂ့ၤ ဒီးအိၣ်ဒီး တၢ်ဃူတၢ်ဖိး လၢနီၢ်သးပၤရဒံစူးအပူၤ ထီဘိ.
ပှၤလၢအဆဲးအိၣ်လၢ နီၢ်သးပၤရဒံစူးအပူၤန့ၣ် ခါဆူညါ အကအိၣ်ဘၣ်စ့ၢ်ကီးလၢ ဟီၣ်ခိၣ်ပၤရဒံစူးအပူၤ (ကွၢ်လံာ်အဆၢ ၁၉)
နကစံးဆၢဒ်လဲၣ်
-
နီၢ်သးပၤရဒံစူးန့ၣ် မ့ၢ်မနုၤလဲၣ်.
-
လၢနီၢ်သးပၤရဒံစူးအပူၤန့ၣ် ပဒိးန့ၢ်ဘၣ် တၢ်ဆိၣ်ဂ့ၤ မနုၤလဲၣ်.
-
ပမၤစၢၤပှၤဂၤ ဒ်သိး အဝဲသ့ၣ် ကဘၣ်သး ပၣ်ဃုာ်လၢ နီၢ်သးပၤရဒံစူးအပူၤ ကသ့ဒ်လဲၣ်.
တၢ်သးဝံၣ် ၁၄၄ ကွၢ်ဆူခိၣ်ဖးထီဘိ
a တၢ်ကတိၤ အခီပညီ– တၢ်ကတိၤ “နီၢ်သးပၤရဒံစူး” န့ၣ်အဲၣ်ဒိးတဲဝဲ ပဘူၣ်ထီၣ်ဘါထီၣ် ယဟိဝၤယွၤ လၢတၢ်ဃူတၢ်ဖိး ဃုာ်ဒီးပဒီပုၢ်ဝဲၢ်မုၣ်ခွါ. ပအိၣ်ဘၣ်လၢ နီၢ်သးပၤရဒံစူးအပူၤအဃိ ပအိၣ်ဒီးတၢ်ရ့လိာ်သး လၢအဂ့ၤဒီး ယဟိဝၤယွၤ ဒီးဒီပုၢ်ဝဲၢ်မုၣ်ခွါ.
b ဒ်သိး နကသ့ၣ်ညါ ဘၣ်ဃးဒီး ဒီပုၢ်ဝဲၢ်မုၣ်တဂၤ အိၣ်လၢနီၢ်သးပၤရဒံစူး အပူၤအဃိ အဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်အဂီၢ် လၢ jw.org အပူၤန့ၣ် ကွၢ်တၢ်ဂီၤမူလၢအမ့ၢ် ခဲအံၤ အဝဲသ့ၣ်အိၣ်ဖဲလဲၣ်. အလါနၤ ယံၤနံၤခီဖၤ— ယတၢ်မုၢ်လၢ် ဟဲလၢထီၣ်ပှဲၤထီၣ်အဂ့ၢ်.
c တၢ်ဂီၤ အခီပညီ– ဖဲဒီပုၢ်ဝဲၢ်မုၣ်ခွါအါဂၤ ရ့လိာ်သး လၢတၢ်အိၣ်ဖှိၣ်ပူၤအခါ ဒီပုၢ်ဝဲၢ်ခွါတဂၤ တကနၣ်ဃုာ်ပှၤဂၤဘၣ် ဒီးအိၣ်လၢအကျိာ်အကျာ်.
