၁. ဖဲဒီပုၢ်ဝဲၢ်မုၣ်ခွါတနီၤ ဟးစံၣ်တဲၤတဲလီၤတၢ် ဒီးတဲတၢ်ဒီးပှၤဂၤအခါ အဝဲသ့ၣ် တူၢ်ဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

 ပဝဲယဟိဝၤပှၤအုၣ်အသးတဖၣ်န့ၣ် ခီဖျိလၢ ပအဲၣ်ပပါအိၣ်လၢမူခိၣ် ဒီးပဘၣ်သးမၤစၢၤ ပှၤလၢပဃၢၤဒ်သိး အဝဲသ့ၣ် ကသ့ၣ်ညါထီၣ် အဂ့ၢ်အဃိ ပဟးစံၣ်တဲၤတဲလီၤတၢ်. ပှၤစံၣ်တဲၤတဲလီၤတၢ်ဖိအါဂၤ ဟးစံၣ်တဲၤတဲလီၤတၢ်မုာ်မး. သနာ်က့ တနီၤန့ၣ် ဟးစံၣ်တဲၤတဲလီၤတၢ် တမုာ်အါအါဘၣ်. ဘၣ်မနုၤအဃိလဲၣ်. အဝဲသ့ၣ်တနီၤန့ၣ် ကဲပှၤလၢ အမဲာ်ဆှးသ့ ဒီးတူၢ်ဘၣ်ဝဲလၢ အသိၣ်လိတၢ် တသ့ဘၣ်. တနီၤဟီန့ၣ် ပှၤမ့ၢ်တကွဲမုာ်အီၤလၢ ပှၤဟံၣ်ဘၣ်န့ၣ် အဝဲသ့ၣ် လဲၤဝဲတဘူၣ်ဘၣ်. အဂၤတနီၤန့ၣ် ဘၣ်ယိၣ်ဝဲလၢ ပှၤတဒိကနၣ်အီၤဘၣ်. ဒီးအဂၤတနီၤန့ၣ် ပှၤသိၣ်လိပာ်စၢၤအီၤလၢ အတဘၣ် မၤသးထီၣ်ပှၤဂၤဘၣ်. ဒီပုၢ်ဝဲၢ်မုၣ်ခွါတဖၣ်အံၤ အဲၣ်ယဟိဝၤယွၤဒိၣ်မး သနာ်က့ အဝဲသ့ၣ် ကတဲဘၣ် ပှၤလၢအတသ့ၣ်ညါဝဲတဖၣ် လၢတၢ်သးခုကစီၣ်န့ၣ် တညီလၢ အဝဲသ့ၣ်အဂီၢ်ဘၣ်. ဘၣ်ဆၣ် အဝဲသ့ၣ် သ့ၣ်ညါဝဲလၢ တၢ်စံၣ်တဲၤတဲလီၤတၢ် အတၢ်မၤန့ၣ် အရ့ဒိၣ်ဒိၣ်မးအဃိ အဝဲသ့ၣ် ဟးစံၣ်တဲၤတဲလီၤတၢ်ထီဘိ. ဆိကမိၣ်ကွၢ် ယဟိဝၤယွၤ ကသးခုထဲလဲၣ်.

၂. တဘျီတခီၣ် နဟးစံၣ်တဲၤတဲလီၤတၢ် မ့ၢ်တမုာ်ဘၣ် သနာ်က့ ဘၣ်မနုၤအဃိ နတဘၣ် သးဟးဂီၤဘၣ်လဲၣ်.

^၂ နၤမီၤ နတူၢ်ဘၣ်ဒ်န့ၣ်ဧါ. တဘျီတခီၣ် နဟးစံၣ်တဲၤတဲလီၤတၢ် တမုာ်ဘၣ် အိၣ်စ့ၢ်ကီးဧါ. နမ့ၢ်တူၢ်ဘၣ်ဒ်န့ၣ်န့ၣ် သးဟးဂီၤတဂ့ၤ. နတၢ်သးဒူ တအိၣ်အါအါဘၣ်န့ၣ် ကမ့ၢ်ခီဖျိလၢ နဘၣ်သးပာ်ဖျါထီၣ်လၢ နအိၣ်ဒီး တၢ်ဆီၣ်လီၤသး ဒီးနတဘၣ်သးလၢ ပှၤကသးစၢၢ်ဆၢနၤဘၣ်. ဘၣ်သ့ၣ်သ့ၣ် ကမ့ၢ်စ့ၢ်ကီးလၢ နတဘၣ်သး တဲအါတၢ်ဒီးပှၤဂၤဘၣ်. ဒီးလီၤဆီဒၣ်တၢ် ဖဲနတဲပၠးပှၤဂၤ တၢ်လၢအဂ့ၤ တမံၤမံၤအခါ ညီနုၢ်န့ၣ် နဘၣ်သးလၢ ပှၤကဒိကနၣ်နၤဂ့ၤဂ့ၤ. ဘၣ်ဆၣ် နသ့ၣ်ညါလၢ နပါအိၣ်လၢမူခိၣ် သ့ၣ်ညါနၢ်ပၢၢ် နတၢ်တူၢ်ဘၣ်ဂ့ၤဂ့ၤ ဒီးအဘၣ်သး မၤစၢၤနၤသပှၢ်တၢၢ်. (ၡါ ၄၁:၁၃) အဃိ နမၤလီၤမၢ်ကွံာ် တၢ်တူၢ်ဘၣ်လၢ အမၤစှၤလီၤ နတၢ်သးခု ကသ့ဒ်လဲၣ်. ဒီးနဟးစံၣ်တဲၤတဲလီၤတၢ် ကမုာ်ဒိၣ်ထီၣ်အဂီၢ် နကဘၣ်မၤဒ်လဲၣ်. တၢ်မၤလိတခါအံၤ ကပာ်ဖျါထီၣ် တၢ်ဟ့ၣ်ကူၣ် ယဲၢ်ခါလၢ ကမၤစၢၤပှၤ.

 ပျဲကစၢ်ယွၤ အကလုၢ်ကထါ မၤဆူၣ်ထီၣ်နဂံၢ်ဘါ

၃. ဒ်သိး ဝံယံးရမံယၤ ကစံၣ်တဲၤတဲလီၤ ပှၤဂၤအဂီၢ် တၢ်မနုၤမၤစၢၤအီၤလဲၣ်.

^၃ လၢညါစ့ၢ်ကီး ဒ်သိး ကစၢ်ယွၤ အခ့အပှၤအါဂၤ မၤအမူဒါ ကီကီခဲခဲ ကဝံၤဝဲအဂီၢ် ကစၢ်ယွၤ အတၢ်ကစီၣ် မၤဆူၣ်ထီၣ် အဝဲသ့ၣ်အဂံၢ်အဘါ. ဆိကမိၣ်ကွၢ် ဝံယံးရမံယၤ အဒိအတဲာ်. ဖဲယဟိဝၤယွၤ ဟ့ၣ်အီၤမူဒါလၢ အကစံၣ်တဲၤတဲလီၤတၢ်အခါ အဘၣ်ယိၣ်တၢ်ဒိၣ်မး. ဝံယံးရမံယၤ တဲဝဲလၢ “ယကဲပှၤလၢ အသးစၢ်ဒံးလီၤ, ယတဲတၢ် တဘၣ်ဘၣ်.” (ယံး ၁:၆) ဘၣ်ဆၣ် ဒ်သိး အကအိၣ်ဒီး တၢ်သးဒူ ဒီးလဲၤစံၣ်တဲၤတဲလီၤတၢ်အဂီၢ် တၢ်မနုၤမၤစၢၤအီၤလဲၣ်. ယဟိဝၤယွၤ အတၢ်ကတိၤ မၤဆူၣ်ထီၣ်အဂံၢ်ဘါ. အတဲဝဲလၢ “အကလုၢ်ကထါန့ၣ် ကဲထီၣ်ဒ်သိးဒီး မ့ၣ်အူလၢ အအီၣ်တၢ်လၢယသးပူၤ ဒီးမ့ၣ်အူလၢ အကးတံာ်ဃာ်သးလၢ ယဃံပူၤ အဃိ ယတူၢ်တပှဲၤလၢၤဘၣ်.” (ယံး ၂၀:၈, ၉) ဟီၣ်ကဝီၤလၢ ဝံယံးရမံယၤ ဘၣ်လဲၤစံၣ်တဲၤတဲလီၤဝဲန့ၣ် ပှၤမ့ၢ်တဒိကနၣ်အီၤဘၣ် သနာ်က့ တၢ်ကစီၣ်လၢ အဘၣ်စံၣ်တဲၤတဲလီၤဝဲန့ၣ် မၤဆူၣ်ထီၣ်အဂံၢ်ဘါ.

၄. ပမ့ၢ်ဖး ကစၢ်ယွၤ အကလုၢ်ကထါ ဒီးဆိကမိၣ်ထံ တၢ်ဂ့ၢ်လၢပဖးန့ၣ် အကမၤစၢၤပှၤဒ်လဲၣ်. (ကလီးစဲ ၁:၉, ၁၀)

^၄ ဆၢကတီၢ်ခဲအံၤ ပဝဲစ့ၢ်ကီး ပဒိးန့ၢ်ဘၣ် တၢ်ဂံၢ်တၢ်ဘါလၢ ယဟိဝၤယွၤ အတၢ်ကတိၤ လၢအအိၣ်လၢ လံာ်စီဆှံအပူၤ. ဖဲတၢ်မၢဖိပီလူး ကွဲးလံာ်လၢ တၢ်အိၣ်ဖှိၣ်လၢ အအိၣ်လၢ ကလီးစဲအခါ အတဲဒီပုၢ်ဝဲၢ်မုၣ်ခွါလၢ တၢ်သ့ၣ်ညါ လီၤတံၢ်လီၤဆဲးန့ၣ် ကမၤစၢၤ အဝဲသ့ၣ်လၢ “ကအိၣ်မူ ဒ်ပှၤလၢအကြၢးဝဲဘၣ်ဝဲဒီး ယဟိဝၤယွၤ” ဒီးအဝဲသ့ၣ် မ့ၢ်သ့ၣ်ညါအါထီၣ် ယဟိဝၤယွၤ အဂ့ၢ်န့ၣ် အဝဲသ့ၣ် “ကဆဲးသၣ်ထီၣ်လၢ တၢ်မၤလၢအဂ့ၤကိးမံၤဒဲး.” (ဖး ကလီးစဲ ၁:၉, ၁၀.) တၢ်မၤလၢအဂ့ၤန့ၣ် ပၣ်ဃုာ်ဒီး တၢ်စံၣ်တဲၤတဲလီၤ တၢ်သးခုကစီၣ်အဂ့ၢ်. အဃိ ပမ့ၢ်ဖး ကစၢ်ယွၤ အကလုၢ်ကထါ ဒီးဆိကမိၣ်ထံ တၢ်ဂ့ၢ်လၢပဖးန့ၣ် အကမၤဂၢၢ်ကျၢၤဒိၣ်ထီၣ် ပတၢ်နာ်န့ၢ် ယဟိဝၤယွၤ. တကးဒံးဘၣ် ပကနၢ်ပၢၢ်အါထီၣ်လၢ ပကဘၣ်စံၣ်တဲၤတဲလီၤ ဘီမုၢ်တၢ်သးခုကစီၣ်န့ၣ် အရ့ဒိၣ်ဒိၣ်မး.

၅. ဒ်သိး ပတၢ်ဖးလံာ်စီဆှံ ကကဲဘျုးအဂီၢ် ပကဘၣ်မၤဒ်လဲၣ်.

^၅ ဒ်သိး ပတၢ်ဖးလံာ်စီဆှံ ကကဲဘျုးအဂီၢ် ဖဲပဖးဒီးမၤလိ လံာ်စီဆှံ ဒီးပဆိကမိၣ်ထံ တၢ်ဂ့ၢ်လၢပဖးအခါ ပတဘၣ် ကရီတၢ်ဘၣ်. ပကဘၣ်ဖးအီၤ လီၤတံၢ်လီၤဆဲး ဒီးဖးအီၤကယီကယီ. ဒီးပမ့ၢ်ထံၣ် လံာ်စီဆှံအဆၢ လၢပတနၢ်ပၢၢ်အီၤ ဂ့ၤဂ့ၤဘၣ်န့ၣ် ပတဘၣ် စၢၢ်ကပာ်အီၤဘၣ်. ပကဘၣ် ဃုကွၢ်အါထီၣ် လံာ်စီဆှံတဆၢန့ၣ် အဂ့ၢ်လၢ တၢးထီခိးတၢ် လံာ်ရဲၣ်လီၤလၢ လံာ်လဲၢ်တဖၣ်အဂီၢ် မ့တမ့ၢ် လံာ်နဲၣ်ကျဲလၢ ယဟိဝၤပှၤအုၣ်အသးတဖၣ် ကဃုသ့ၣ်ညါတၢ်အဂီၢ်. ပမ့ၢ်ဖး လံာ်စီဆှံ လီၤတံၢ်လီၤဆဲး ဒီးဃုသ့ၣ်ညါအီၤ ဂ့ၤဂ့ၤန့ၣ် ပကနာ် သပှၢ်တၢၢ်လၢ တၢ်လၢလံာ်စီဆှံ တဲဝဲန့ၣ် အကဲတၢ်မ့ၢ်တၢ်တီ. (၁ သ့း ၅:၂၁) ဒီးပနာ် လံာ်စီဆှံ တၢ်မ့ၢ်တၢ်တီ မ့ၢ်အါထီၣ်န့ၣ် ပကဘၣ်သး တဲဘၣ်ပှၤဂၤ တၢ်လၢပမၤလိဘၣ်တဖၣ်ဒိၣ်ထီၣ်.

 ကတဲာ်ကတီၤဆိသး ဂ့ၤဂ့ၤလၢ တၢ်စံၣ်တဲၤတဲလီၤအဂီၢ်

၆. ဘၣ်မနုၤအဃိ ပကဘၣ် ကတဲာ်ကတီၤဆိသး ဂ့ၤဂ့ၤလၢ တၢ်စံၣ်တဲၤတဲလီၤအဂီၢ်လဲၣ်.

^၆ တချုးလၢ ပဟးစံၣ်တဲၤတဲလီၤတၢ်အခါ ပမ့ၢ်ကတဲာ်ကတီၤဆိသး ဂ့ၤဂ့ၤန့ၣ် ဖဲပတဲတၢ်ဒီးပှၤဂၤအခါ ပတဘၣ်ယိၣ်တၢ် အါအါလၢၤဘၣ်. လၢညါ တချုးဖဲ ယ့ၣ်ၡူး ဆှၢလီၤအပျဲၢ်အဘီၣ်လၢ ကလဲၤစံၣ်တဲၤတဲလီၤတၢ်ဒံးဘၣ်န့ၣ် အမၤစၢၤ အဝဲသ့ၣ်ဒ်သိး အဝဲသ့ၣ် ကကတဲာ်ကတီၤဆိသး ဂ့ၤဂ့ၤ. (လူၤ ၁၀:၁-၁၁) ခီဖျိလၢ အဝဲသ့ၣ် မၤထွဲတၢ်လၢ ယ့ၣ်ၡူး သိၣ်လိအဝဲသ့ၣ်အဃိ အဝဲသ့ၣ် မၤဂ့ၤတၢ်အါမး ဒီးအဝဲသ့ၣ် သးခုဒိၣ်မး.—လူၤ ၁၀:၁၇.

၇. ပကတဲာ်ကတီၤဆိသးလၢ တၢ်စံၣ်တဲၤတဲလီၤအဂီၢ် သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၇ ပကဘၣ် ကတဲာ်ကတီၤဆိသးလၢ တၢ်စံၣ်တဲၤတဲလီၤအဂီၢ် ဒ်လဲၣ်. ပကဘၣ် ဆိကမိၣ်ဘၣ်ဃးဒီး တၢ်လၢပဘၣ်သးတဲ ဒီးတဲအီၤဒ် ပတဲတၢ်လၢ မုၢ်ဆ့ၣ်မုၢ်ဂီၤ လၢပကစၢ်တၢ်ကတိၤ. တကးဒံးဘၣ် ပမ့ၢ်ဆိကမိၣ်ပာ်စၢၤ တၢ်ဂ့ၢ်တခါခံခါ အတၢ်စံးဆၢလၢ ပှၤလၢပလီၢ်ကဝီၤ သူၣ်အိၣ်သးအိၣ်ဝဲန့ၣ် ကမၤစၢၤပှၤစ့ၢ်ကီး. ဒီးဖဲပလဲၤတဲတၢ်ဒီး ပှၤဂၤအခါ ပကဘၣ် ပာ်သးဂၢၢ်ဂၢၢ်, နံၤကမှံထီၣ် ဒီးတဲတၢ်ဒီးပှၤဂၤမုာ်မုာ်.

၈. ခရံာ်ဖိတဖၣ် လီၤဂာ်ဒ်သိးဒီး သပၢၤဟီၣ်ခိၣ်လၢ တၢ်မၢဖိပီလူး တဲဖျါထီၣ်ဝဲ ဒ်လဲၣ်.

^၈ တၢ်မၢဖိပီလူး တဲဘၣ် ဒီပုၢ်ဝဲၢ်မုၣ်ခွါတဖၣ်လၢ “ပလီၤဂာ်ဒ်သိးဒီး သပၢၤဟီၣ်ခိၣ်လၢ တၢ်လုၢ်ဒိၣ်ပှ့ၤဒိၣ်တမံၤအံၤ အိၣ်လၢအပူၤ.” (၂ ကရံၣ် ၄:၇) တၢ်လုၢ်ဒိၣ်ပှ့ၤဒိၣ်တမံၤအံၤ မ့ၢ်မနုၤလဲၣ်. အမ့ၢ်ဝဲ တၢ်စံၣ်တဲၤတဲလီၤ ဘီမုၢ်တၢ်သးခုကစီၣ်တၢ်မၤ လၢအကမၤပူၤဖျဲး ပှၤသးသမူ. (၂ ကရံၣ် ၄:၁) မ့မ့ၢ် သပၢၤဟီၣ်ခိၣ်န့ၣ် အဲၣ်ဒိးတဲဝဲ မနုၤလဲၣ်. အဲၣ်ဒိးတဲဝဲ ကစၢ်ယွၤ အခ့အပှၤလၢ အတဲဘၣ်ပှၤဂၤ တၢ်သးခုကစီၣ်အဂ့ၢ်. ဖဲစီၤပီလူး အစိၤန့ၣ် ပှၤပှ့ၤတၢ်ဆါတၢ်ဖိ သူဝဲသပၢၤဟီၣ်ခိၣ်လၢ ကဆှၢထီၣ်ဆှၢလီၤဝဲ တၢ်လုၢ်ဒိၣ်ပှ့ၤဒိၣ် ဒ်သိးဒီး တၢ်အီၣ်တၢ်အီ, စပံးထံ ဒီးကျိၣ်စ့. ဒ်န့ၣ်အသိး ယဟိဝၤယွၤ နာ်န့ၢ်ပှၤ ဒီးဟ့ၣ်လီၤပှၤ တၢ်သးခုကစီၣ်လၢ အလုၢ်ဒိၣ်ပှ့ၤဒိၣ်. ဒီးခီဖျိလၢ ယဟိဝၤယွၤ မၤစၢၤပှၤအဃိ ပကအိၣ်ဒီး တၢ်ဂံၢ်တၢ်ဘါ လၢပကဆဲး စံၣ်တဲၤတဲလီၤတၢ်.

ဃ့လၢနကအိၣ်ဒီး တၢ်သးဒူ

၉. ပမၤလီၤမၢ် တၢ်ပျံၤပှၤကညီ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၉ တဘျီတခီၣ်န့ၣ် ခီဖျိလၢ ပှၤတဘၣ်သး ဒိကနၣ်ပှၤဘၣ်အဃိ ပကပျံၤ ပှၤကညီ. ပမၤလီၤမၢ်ကွံာ် တၢ်ပျံၤပှၤကညီ ကသ့ဒ်လဲၣ်. ဆိကမိၣ်ကွၢ် ဖဲပှၤမၤလိာ် တၢ်မၢဖိတဖၣ်လၢ အဝဲသ့ၣ်တဘၣ် စံၣ်တဲၤတဲလီၤတၢ်လၢၤဘၣ်အခါ အဝဲသ့ၣ် တပျံၤတၢ် ဒီးတပတုာ် အတၢ်စံၣ်တဲၤတဲလီၤ တၢ်မၤဘၣ်. ဘၣ်ဆၣ် အဝဲသ့ၣ်  ဃ့ယဟိဝၤယွၤလၢ ကမၤစၢၤအီၤ ဒ်သိး “ကဆဲးစံၣ်တဲၤတဲလီၤ [အ] ကလုၢ်ကထါ ဒူဒူ.” ပထံၣ်ဘၣ်လၢ ယဟိဝၤယွၤ စံးဆၢအဝဲသ့ၣ် တဘျီဃီ. (မၤတၢ် ၄:၁၈, ၂၉, ၃၁) ပဝဲစ့ၢ်ကီး ပမ့ၢ်ပျံၤပှၤကညီ ဒီးပဟးစံၣ်တဲၤတဲလီၤတၢ် မ့ၢ်တဘူၣ်ဘၣ်န့ၣ် ပကဘၣ် ဃ့ယဟိဝၤယွၤ အတၢ်မၤစၢၤ. ဒီးဒ်သိး ပတဲပှၤဂၤ ဘီမုၢ်တၢ်သးခုကစီၣ် ကဘူၣ်အဂီၢ် ပကဘၣ် ဃ့ယဟိဝၤယွၤလၢ ကမၤစၢၤပှၤဒ်သိး ပတၢ်အဲၣ်ပှၤလၢပဃၢၤ ကအိၣ်အါထီၣ်.

၁၀. ယဟိဝၤယွၤ မၤစၢၤပှၤဒ်သိး ပကအုၣ်သးဒူဒူ လၢအဂီၢ်ဒ်လဲၣ်. (ယၡါယၤ ၄၃:၁၀-၁၂)

^၁၀ ယဟိဝၤယွၤ ဃုထၢထီၣ်ပှၤ ဒ်အပှၤအုၣ်အသး ဒီးဒ်သိး ပကအိၣ်ဒီး တၢ်သးဒူအဂီၢ် အအၢၣ်လီၤပှၤလၢ အကမၤစၢၤပှၤ. (ဖး ယၡါယၤ ၄၃:၁၀-၁၂.) ပကကွၢ်သကိး တၢ်ဂ့ၢ်လွံၢ်ထံၣ် လၢအပာ်ဖျါထီၣ်လၢ ယဟိဝၤယွၤ မၤစၢၤပှၤ. တၢ, ဖဲပဟးစံၣ်တဲၤတဲလီၤတၢ် တဘျီဂ့ၤ တဘျီဂ့ၤအခါ ယ့ၣ်ၡူးအိၣ်ဒီးပှၤ. (မး ၂၈:၁၈-၂၀) ခံ, ယဟိဝၤယွၤ ဃုထၢထီၣ် မူခိၣ်ကလူးတနီၤလၢ ကမၤစၢၤပှၤ. (လီၣ် ၁၄:၆) သၢ, ယဟိဝၤယွၤ ဟ့ၣ်ပှၤ အသးစီဆှံ လၢအမ့ၢ် ပှၤမၤစၢၤတၢ် ဒ်သိးကဒုးသ့ၣ်နီၣ်ထီၣ်က့ၤပှၤ တၢ်လၢ ပမၤလိဘၣ်. (ယိၤ ၁၄:၂၅, ၂၆) လွံၢ်, ယဟိဝၤယွၤ ဟ့ၣ်ပှၤ ဒီပုၢ်ဝဲၢ်မုၣ်ခွါလၢ ကမၤသကိးတၢ်ဒီးပှၤ. ခီဖျိလၢ ယဟိဝၤယွၤ ဒီးပဒီပုၢ်ဝဲၢ်မုၣ်ခွါ လၢဟီၣ်ခိၣ်ဒီဘ့ၣ်ညါ အတၢ်မၤစၢၤအဃိ ပကအိၣ်ဒီး တၢ်သးဒူ ဒီးဆဲးစံၣ်တဲၤတဲလီၤတၢ်ဆူၣ်ဆူၣ်.

ဆီတလဲဒ် တၢ်လိၣ်ဘၣ်အိၣ်အသိး ဒီးအိၣ်ဒီးတၢ်ထံၣ်အကြၢးအဘၣ်

၁၁. ဖဲပဟးစံၣ်တဲၤတဲလီၤတၢ်အခါ ပမ့ၢ်တထံၣ် ပှၤအိၣ်လၢဟံၣ်ဘၣ်န့ၣ် ပမၤတၢ်အဂၤ မနုၤသ့လဲၣ်. (ကွၢ်စ့ၢ်ကီးတၢ်ဂီၤ.)

^၁၁ ဖဲနဟးစံၣ်တဲၤတဲလီၤတၢ်အခါ နမ့ၢ်တထံၣ် ပှၤအိၣ်လၢဟံၣ် အါအါဘၣ်န့ၣ် နသးဟးဂီၤဧါ. ပမ့ၢ်တူၢ်ဘၣ် ဒ်န့ၣ်န့ၣ် ပကဘၣ် သံကွၢ်လီၤပသးလၢ ‘ခဲအံၤ ပှၤလၢအအိၣ်လၢ ယတၢ်စံၣ်တဲၤတဲလီၤ အဟီၣ်ကဝီၤန့ၣ် အဝဲသ့ၣ် လဲၤဖဲလဲၣ်.’ (မၤတၢ် ၁၆:၁၃) ‘အဝဲသ့ၣ် လဲၤမၤတၢ်ဧါ မ့တမ့ၢ် အဝဲသ့ၣ် လဲၤပှ့ၤတၢ်ဧါ.’ အဝဲသ့ၣ် မ့ၢ်လဲၤမၤတၢ် ဒီးလဲၤပှ့ၤတၢ်န့ၣ် နဆိကမိၣ် ပမ့ၢ်မၤ တၢ်စံၣ်တဲၤတဲလီၤတၢ်လၢ ကျဲဖီခိၣ်န့ၣ် တဂ့ၤဧီၤ. ဒီပုၢ်ဝဲၢ်ခွါကၠီၡဝၤ တဲဝဲလၢ “ဖဲယဟးထီၣ်ဟးလီၤလၢ ပှၤအိၣ်အါအလီၢ် ဒီးပှၤဆါတၢ်ပှ့ၤတၢ် အလီၢ်အခါ ယစံၣ်တဲၤတဲလီၤဘၣ်ပှၤဂၤ.” ဒီပုၢ်ဝဲၢ်ခွါကၠီၡဝၤ ဒီးအမါဘြ့ၣ်ကၠဲၣ်န့ၣ် အဝဲသ့ၣ် လဲၤစံၣ်တဲၤတဲလီၤတၢ် လၢပှၤဟံၣ် လၢဟါလီၤခီ ဒီးလၢမုၢ်အိၣ်ဘှံးနံၤ ဖဲမုၢ်ဃ့ၢ်လီၤအဃိ အဝဲသ့ၣ်ထံၣ်လၢ ပှၤအိၣ်လၢဟံၣ်အါ.—အ့း ၅:၁၅, ၁၆.

၁၂. ဒ်သိး ပကသ့ၣ်ညါဘၣ် ပှၤတဂၤ နာ်တၢ်မနုၤလဲၣ် ဒီးအဘၣ်ယိၣ်ဘၣ်ဃးဒီး တၢ်ဂ့ၢ်မနုၤလဲၣ်အဂီၢ် ပကဘၣ်မၤဒ်လဲၣ်.

^၁၂ ခီၣ်ထံးခါ ပှၤလၢပတဲတၢ်ဒီးအီၤတဂၤ မ့ၢ်တဘၣ်သး ကနၣ်တၢ်ဂ့ၢ်လၢ ပတဲအီၤဘၣ်န့ၣ် ပကဘၣ် ဃုသ့ၣ်ညါဆိလၢ အဝဲသ့ၣ်  နာ်တၢ်မနုၤလဲၣ် ဒီးအဝဲသ့ၣ် ဘၣ်ယိၣ်ဘၣ်ဃးဒီး တၢ်ဂ့ၢ်မနုၤလဲၣ်. ဖဲဒီပုၢ်ဝဲၢ်ခွါကၠီၡဝၤ ဒီးအမါဘြ့ၣ်ကၠဲၣ် တဲတၢ်ဒီးပှၤဂၤအခါ အဝဲသ့ၣ် သူဝဲတၢ်သံကွၢ်လၢ အအိၣ်လၢ လံာ်ဖိအမဲာ်ညါ. အဒိ အဝဲသ့ၣ်သူဝဲ လံာ်ဖိလၢအမ့ၢ် နဆိကမိၣ်လၢ လံာ်စီဆှံန့ၣ် မ့ၢ်လံာ်ဒ်လဲၣ်တဘ့ၣ်လဲၣ်. ဒီးအဝဲသ့ၣ် တဲဝဲလၢ “ပှၤတနီၤန့ၣ် ဆိကမိၣ်လၢ လံာ်စီဆှံန့ၣ် ကစၢ်ယွၤ ဒုးအိၣ်ထီၣ်ဝဲ, အဂၤတနီၤန့ၣ် တဆိကမိၣ်ဝဲ ဒ်န့ၣ်ဘၣ်. နၤမီၤ နဆိကမိၣ်ဒ်လဲၣ်.” အဝဲသ့ၣ် မၤဝဲဒ်အံၤအဃိ အတဲသကိးဘၣ်တၢ်ဒီးပှၤဂၤ.

၁၃. ဖဲပဟးစံၣ်တဲၤတဲလီၤတၢ်အခါ ပှၤမ့ၢ်တကနၣ် တၢ်ကစီၣ်လၢ ပတဲဘၣ် သနာ်က့ ဘၣ်မနုၤအဃိ ပသးခုဒံးလဲၣ်. (ကတိၤဒိ ၂၇:၁၁)

^၁၃ ဖဲပဟးစံၣ်တဲၤတဲလီၤတၢ်အခါ ပှၤမ့ၢ်တကနၣ် တၢ်ကစီၣ်လၢ ပတဲဘၣ် သနာ်က့ ပသးခုဒံး. ပသးခု ခီဖျိလၢ ပမၤဒ် ယဟိဝၤယွၤ ဒီးအဖိခွါ မၤလိာ်ပှၤ အသိးအဃိ. (မၤတၢ် ၁၀:၄၂) ပမ့ၢ်တတဲဘၣ်တၢ်ဒီး ပှၤနီတဂၤဘၣ် ဒီးပှၤမ့ၢ်တဘၣ်သးကနၣ် တၢ်ကစီၣ်လၢ ပတဲဘၣ် သနာ်က့ ပသ့ၣ်ညါလၢ ပမၤသးခု ပပါအိၣ်လၢမူခိၣ် အသးအဃိ ပသးခုဒံး.—ဖး ကတိၤဒိ ၂၇:၁၁.

၁၄. ဖဲဒီပုၢ်ဝဲၢ်မုၣ်ခွါ အဂၤတဂၤ ထံၣ်လိာ်သးဒီး ပှၤလၢအသးအိၣ် တၢ်မ့ၢ်တၢ်တီအခါ ဘၣ်မနုၤအဃိ ပသးခုစၢၤအီၤလဲၣ်.

^၁၄ ဖဲဒီပုၢ်ဝဲၢ်မုၣ်ခွါ အဂၤတဂၤ ထံၣ်လိာ်သးဒီး ပှၤလၢအသးအိၣ် တၢ်မ့ၢ်တၢ်တီအခါ ပသးခုစၢၤအီၤ. တၢးထီခိးတၢ် မဲးကစံတဘ့ၣ် ထိၣ်သတြီၤဝဲ ပတၢ်စံၣ်တဲၤတဲလီၤတၢ်မၤ ဒ်သိးဒီး ပှၤဟးဃု ဖိသၣ်လၢအလီၤမၢ်တဂၤ. ပှၤဟးဃုတၢ်ဖိ ကအိၣ်ဒီဒူၣ် ဒီးကဃုအီၤလၢ တၢ်လီၢ်တတီၤဝံၤတတီၤ. ဒီးဖဲပှၤထံၣ်က့ၤ ဖိသၣ်အခါ ပှၤလၢအထံၣ်က့ၤအီၤ တကးဒံးဘၣ် ပှၤကိးဂၤဒဲး လၢအဃုအီၤန့ၣ် ကသးခုဒိၣ်မး. ဒ်န့ၣ်အသိး ပှၤကိးဂၤဒဲးလၢ တၢ်အိၣ်ဖှိၣ်အပူၤန့ၣ် မၤစၢၤလိာ်သးဒ်သိး ကဒုးကဲထီၣ်ပှၤဂၤလၢ ယ့ၣ်ၡူးခရံာ် အပျဲၢ်အဘီၣ်. ဒီးဒ်သိး ပကစံၣ်တဲၤတဲလီၤဘၣ် ပှၤကိးဂၤဒဲး လၢအအိၣ်လၢ ပဟီၣ်ကဝီၤအဂီၢ် ပလိၣ်ဘၣ် တၢ်အိၣ်ဖှိၣ်ဖိခဲလၢာ် အတၢ်မၤစၢၤ. ဒီးဖဲပှၤအသီ တဂၤဂၤ ဟဲထီၣ်တၢ်အိၣ်ဖှိၣ်အခါ ပှၤကိးဂၤဒဲးသးခု.

မၤအါထီၣ် တၢ်အဲၣ်ယဟိဝၤယွၤ ဒီးတၢ်အဲၣ်ပှၤလၢပဃၢၤ

၁၅. ပမ့ၢ်မၤထွဲ မးသဲ ၂၂:၃၇-၃၉ န့ၣ်ကမၤစၢၤပှၤလၢ ပစံၣ်တဲၤတဲလီၤတၢ် ကမုာ်ဒိၣ်ထီၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၅ ပမ့ၢ်မၤအါထီၣ် တၢ်အဲၣ်ယဟိဝၤယွၤ ဒီးတၢ်အဲၣ်ပှၤလၢပဃၢၤန့ၣ် ပဟးစံၣ်တဲၤတဲလီၤတၢ် ကမုာ်ဒိၣ်ထီၣ်. (ဖး မးသဲ ၂၂:၃၇-၃၉.) ယဟိဝၤယွၤ မ့ၢ်ထံၣ်ဝဲလၢ ပဟးစံၣ်တဲၤတဲလီၤတၢ် ဒီးပှၤတဂၤဒိးန့ၢ်ဘၣ် တၢ်သးခုခီဖျိလၢ အမၤလိလံာ်စီဆှံအဃိန့ၣ် ထံၣ်တမှံကွၢ် ယဟိဝၤယွၤ ကသးခုထဲလဲၣ်. ပကဘၣ် သ့ၣ်နီၣ်ထီၣ်စ့ၢ်ကီးလၢ ပှၤလၢအဒိကနၣ် တၢ်ကစီၣ်လၢပတဲ ဒီးအပာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် အိၣ်ဒီးတၢ်ခွဲးတၢ်ယာ်လၢ ကန့ၢ်ဘၣ် တၢ်မူအထူအယိာ်.—ယိၤ ၆:၄၀; ၁ တံၤ ၄:၁၆.

၁၆. ပမ့ၢ်ဘၣ်အိၣ်လၢ ပဟံၣ်ပူၤထီဘိ သနာ်က့ ဒ်သိးပစံၣ်တဲၤတဲလီၤတၢ် ကမုာ်ဒိၣ်ထီၣ်အဂီၢ် ပကဘၣ်မၤဒ်လဲၣ်. တဲဖျါထီၣ် တၢ်အဒိ.

 ^၁၆ ခီဖျိလၢ တၢ်ဂ့ၢ်တမံၤမံၤအဃိ ပဟးထီၣ်လၢ ပဟံၣ်တသ့ဘၣ် ဒီးဘၣ်အိၣ်လၢ ပဟံၣ်ပူၤထီဘိဧါ. ပမ့ၢ်ဘၣ်အိၣ်ဒ်န့ၣ် သနာ်က့ ပမၤအါထီၣ် တၢ်အဲၣ်ယဟိဝၤယွၤ ဒီးတၢ်အဲၣ်ပှၤလၢပဃၢၤသ့ဒံး. အဒိ ဖဲခိၤရိၤနၤတၢ်ဆါ ရၤလီၤသးအခါ ဒီပုၢ်ဝဲၢ်ခွါစဲမၠိၤ ဒီးအမါဒဲနံးယါ ဘၣ်အိၣ်လၢ အဟံၣ်ပူၤထီဘိ. တၢ်အိၣ်သးကီခဲသနာ်က့ အဝဲသ့ၣ် မၤတၢ်စံၣ်တဲၤတဲလီၤတၢ်မၤ လၢလီတဲစိပူၤ, ကွဲးလံာ်ပရၢ ဒီးမၤလိလံာ်စီဆှံဒီးပှၤဂၤ လၢစူပူၤ. ဖဲဒီပုၢ်ဝဲၢ်ခွါစဲမၠိၤ လဲၤလၢတၢ်ဆါဟံၣ် ဒ်သိးကကူစါယါဘျါ အခဲစၢၤအခါ အစံၣ်တဲၤတဲလီၤဝဲ ပှၤတဂၤဂ့ၤ တဂၤဂ့ၤ လၢအထံၣ်ဘၣ်ဝဲ. အတဲဝဲလၢ “ဖဲပထံၣ်ဘၣ် တၢ်ကီတၢ်ခဲအခါ ပကဘၣ်ယိၣ်တၢ်, ပသးကလီၤဘှံး ဒီးပတၢ်နာ် ကဘၣ်တၢ်မၤကွၢ်အီၤ. အဃိ ပကဘၣ်သးခုလၢ ပမၤဘၣ် ယဟိဝၤယွၤ အတၢ်မၤ.” ထဲန့ၣ်တကးဒံးဘၣ် ဒီပုၢ်ဝဲၢ်မုၣ်ဒဲနံးယါ လီၤဃံၢ်ဘၣ်ဒိအဃိ အဘၣ်အိၣ်လၢ လီၢ်မံခိၣ် သၢလါညါ. လၢခံအဘၣ်သူ လ့ၣ်ဆီၣ်ဃုလါ. အတဲဝဲလၢ “တၢ်လၢယမၤကဲ ကိးမံၤဒဲးန့ၣ် ယဂုာ်ကျဲးစၢးမၤအီၤ. ယစံၣ်တဲၤတဲလီၤဘၣ် ကသံၣ်သရၣ်မုၣ် လၢအဟဲလၢယဟံၣ် ဒီးယတဲတၢ်ဒီး ပှၤတဂၤဂ့ၤ တဂၤအဂ့ၤလၢ အဟဲဆှၢန့ၢ်ယၤ တၢ်ဖိတၢ်လံၤ. ဒီးလၢလီတဲစိပူၤန့ၣ် ယတဲသကိးဘၣ်တၢ်ဒီး ပိာ်မုၣ်တဂၤလၢ အမၤတၢ်လၢ ခီပနံာ်လၢအဆါ တၢ်ဆါဟံၣ် တၢ်ဖိတၢ်လံၤ.” ခီဖျိလၢ ဒီပုၢ်ဝဲၢ်ခွါစဲမၠိၤ ဒီးဒီပုၢ်ဝဲၢ်မုၣ်ဒဲနံးယါ အတၢ်အိၣ်သးအဃိ အဝဲသ့ၣ်မၤတၢ် တန့ၢ်အါအါ ဒ်သိးလၢညါလၢၤဘၣ်. သနာ်က့ တၢ်လၢအဝဲသ့ၣ် မၤဝဲန့ၢ်န့ၣ် အမၤဝဲလၢ အဂ့ၤကတၢၢ်အဃိ အဝဲသ့ၣ် ဒိးန့ၢ်ဘၣ်တၢ်သးခု.

၁၇. တၢ်ဟ့ၣ်ကူၣ်လၢ တၢ်မၤလိတခါအံၤ ပာ်ဖျါထီၣ်ဝဲန့ၣ် ဒ်သိးနကဒိးန့ၢ်ဘၣ် အဘျုးအဂီၢ် နကဘၣ်မၤဒ်လဲၣ်.

^၁၇ ပဟ့ၣ်ဂံၢ်ဟ့ၣ်ဘါနၤလၢ နကမၤကွၢ် တၢ်ဟ့ၣ်ကူၣ်ယဲၢ်ခါလၢာ် လၢတၢ်မၤလိတခါအံၤ ပာ်ဖျါထီၣ်ဝဲ. တၢ်ဟ့ၣ်ကူၣ် တခါဘၣ်တခါန့ၣ် အလီၤဂာ်ဒ်သိးဒီး တၢ်နၢမူနၢဆှီတဖၣ်လၢ လၢကဖီအီၣ် ကသူဝံၣ်ဝံၣ်တခွးအဂီၢ်. ဖဲပဖီအီၣ် ကသူအခါ ပမ့ၢ်ဃါဃုာ် တၢ်နၢမူနၢဆှီ ခဲလၢာ်န့ၣ် ပကအီၣ်ဘၣ် ကသူဝံၣ်ဝံၣ်. ဒ်န့ၣ်အသိး ပမ့ၢ်မၤထွဲ တၢ်ဟ့ၣ်ကူၣ်ယဲၢ်ခါလၢာ်န့ၣ် အကမၤစၢၤပှၤဒ်သိး ပကမၤလီၤမၢ်ကွံာ် တၢ်တူၢ်ဘၣ်လၢ အမၤစှၤလီၤ ပတၢ်သးခု ဒီးပဟးစံၣ်တဲၤတဲလီၤတၢ် ကမုာ်ဒိၣ်ထီၣ်.