နသ့ၣ်ညါဧါ
ဘၣ်မနုၤအဃိ စီၤဒၤဝံး အပှၤသုးဖိန့ၣ် ပၣ်ဃုာ်ဒီး ပှၤထံဂၤကီၢ်ဂၤဖိလဲၣ်
စီၤဒၤဝံး အပှၤသုးဖိန့ၣ် ပၣ်ဃုာ်ဒီး ပှၤထံဂၤကီၢ်ဂၤဖိ. အဒိ အဝဲသ့ၣ် တနီၤန့ၣ်ကဲဝဲ ပှၤဧၣ်မိၣ်ဖိ စီၤစ့လ့း, ပှၤဃ့ၤသးဖိ စီၤအူၤရံယၤ ဒီးပှၤမိၤအးဖိ စီၤယံးသမၤ. a (၁ ကွဲး ၁၁:၃၉, ၄၁, ၄၆) တကးဒံးဘၣ် စီၤဒၤဝံး အပှၤသုးဖိန့ၣ် ပၣ်ဃုာ်စ့ၢ်ကီးဒီး “ပှၤကရံသးဖိ, ပှၤပလ့သးဖိ ဒီးပှၤကံးတံးဖိ.” (၂ မူၤ ၁၅:၁၈) ဖျါလီၤဂာ်လၢ ပှၤကရံသးဖိ ဒီးပှၤပလ့သးဖိန့ၣ် အဘူးလိာ်သးဒီး ပှၤဖလ့ၡသးဖိ. (ဃ့း ၂၅:၁၆) ဘၣ်သ့ၣ်သ့ၣ် ပှၤကံးတံးဖိန့ၣ် ကဲဝဲပှၤလၢ အအိၣ်လၢ ပှၤဖလ့ၡသးဖိ အဝ့ၢ်လၢအမ့ၢ် ဝ့ၢ်ကၤသး.—ၡူ ၁၃:၂, ၃; ၁ မူၤ ၆:၁၇, ၁၈.
ဖဲစီၤဒၤဝံး ဃုထၢထီၣ် ပှၤသုးဖိအခါ ဘၣ်မနုၤအဃိ အဃုထၢစ့ၢ်ကီး ပှၤထံဂၤကီၢ်ဂၤဖိလဲၣ်. စီၤဒၤဝံး နာ်ဝဲသပှၢ်တၢၢ်လၢ အဝဲသ့ၣ် ကတီဒီးအီၤ ဒီးအရ့ဒိၣ်ကတၢၢ်န့ၣ် အဝဲသ့ၣ် ကတီဒီး ယဟိဝၤယွၤ. အဒိ ဘၣ်ဃးဒီး ပှၤကရံသးဖိ ဒီးပှၤပလ့သးဖိန့ၣ် လံာ်စီဆှံ အလံာ်ခီယ့ၤတဘ့ၣ် ပာ်ဖျါထီၣ်ဝဲလၢ “ဖဲစီၤဒၤဝံး ထံၣ်ဘၣ် တၢ်ကီတၢ်ခဲ ဖဲအပၢတၢ်ဒီတကတီၢ်အခါ အဝဲသ့ၣ် တီဒီးစီၤဒၤဝံး ဒီးမၤစၢၤအီၤ.” အဝဲသ့ၣ် ပာ်ဖျါထီၣ် အတၢ်သးတီဒ်လဲၣ်. ဖဲ “ပှၤအံၣ်စရ့လးဖိခဲလၢာ်” ပာ်တ့ၢ်ကွံာ် စီၤပၤဒၤဝံး ဒီးပိာ်ထီၣ် “ပှၤလၢ အဟးဒုးအိၣ်ထီၣ် တၢ်ကီတၢ်ခဲ လၢအမံၤမ့ၢ် စီၤၡဘၤအခံ” အခါ ပှၤကရံသးဖိ ဒီးပှၤပလ့သးဖိ ဆဲးအိၣ်လၢ စီၤဒၤဝံးအအိၣ် တကပၤ ဒီးမၤစၢၤအီၤဒ်သိး ကမၤပတုာ်ကွံာ် စီၤၡဘၤ အတၢ်ထီဒါ. (၂ မူၤ ၂၀:၁, ၂, ၇) ဒီးလၢအဂၤတဘျီန့ၣ် စီၤပၤဒၤဝံး အဖိခွါ စီၤအဒိနံၤယၤ ဂုာ်ထီၣ်ဝဲ စီၤပၤအလီၢ်. ခဲအံၤတဘျီစ့ၢ်ကီး ပှၤကရံသးဖိ ဒီးပှၤပလ့သးဖိ ဆဲးအိၣ်လၢ စီၤဒၤဝံးအအိၣ် တကပၤ ဒီးမၤစၢၤအီၤဒ်သိး အကပာ်ထီၣ် စီၤၡလိၤမိၤ လၢအမ့ၢ်ပှၤတဂၤလၢ ယဟိဝၤယွၤ ဃုထၢထီၣ်ဝဲလၢ ကပၢက့ၤတၢ်လၢ စီၤဒၤဝံးအလီၢ်.—၁ စီၤပၤ ၁:၂၄-၂၇, ၃၈, ၃၉.
ပှၤသုးဖိ အဂၤတဂၤ လၢအကဲ ပှၤထံဂၤကီၢ်ဂၤဖိ, ဘၣ်ဆၣ် အတီဒီးစီၤဒၤဝံး ဒိၣ်မးန့ၣ် မ့ၢ်ဝဲ ပှၤကၤသးဖိ စီၤအံတဲၤ. ဖဲစီၤပၤဒၤဝံး အဖိခွါ စီၤအးဘၡါလိၣ် ထီဒါက့ၤအပါ ဒီးကွဲန့ၢ်လွဲန့ၢ် ပှၤအံၣ်စရ့လးဖိလၢ ကဒုးကဲထီၣ်အီၤလၢ စီၤပၤအခါ စီၤအံတဲၤ ဒီးအသုးဖိအဂၤ ၆၀၀ တီဒီးစီၤဒၤဝံး ဒီးဆီၣ်ထွဲအီၤ. ခီၣ်ထံးခါန့ၣ် စီၤဒၤဝံးတဲဘၣ် စီၤအံတဲၤလၢ ခီဖျိလၢ စီၤအံတဲၤ ကဲပှၤထံဂၤကီၢ်ဂၤဖိအဃိ အတလိၣ်ဆီၣ်ထွဲအီၤဘၣ်. ဘၣ်ဆၣ် စီၤအံတဲၤ တဲအီၤလၢ “ယအၢၣ်လီၤတၢ်လၢ ယဟိဝၤယွၤလၢ အမူဝဲတဂၤ အမဲာ်ညါ ဒီးယကစၢ်စီၤပၤ အမဲာ်ညါလၢ ဖဲယကစၢ်စီၤပၤ လဲၤတပူၤဂ့ၤ တပူၤဂ့ၤန့ၣ် သံဂ့ၤမူဂ့ၤ ယကလဲၤပိာ် နခံ.”—၂ မူၤ ၁၅:၆, ၁၈-၂၁.
စီၤအံတဲၤ တီဒီးစီၤဒၤဝံး လၢအမ့ၢ် စီၤပၤလၢ ယဟိဝၤယွၤ ဒိးဖှူအီၤ
ပထံၣ်ဘၣ်လၢ ပှၤကရံသးဖိ, ပှၤပလ့သးဖိ ဒီးပှၤကံးတံးဖိ ကဲဝဲပှၤထံဂၤကီၢ်ဂၤဖိ သနာ်က့ အဝဲသ့ၣ် ပာ်ကဲယဟိဝၤယွၤ လၢအမ့ၢ် ကစၢ်ယွၤလၢ အမ့ၢ်အတီ ဒီးသ့ၣ်ညါဝဲလၢ စီၤဒၤဝံးန့ၣ် အကဲပှၤလၢ ယဟိဝၤယွၤ ဒိးဖှူအီၤ. စီၤဒၤဝံး အပှၤသုးဖိတဖၣ်အံၤ တီဒီးအီၤ ဒီးဆီၣ်ထွဲအီၤအဃိ ဆိကမိၣ်ကွၢ် အကသးခုထဲလဲၣ်.
a ဖဲ ၅ မိၤၡ့ ၂၃:၃-၆ န့ၣ် ကစၢ်ယွၤ အတၢ်သိၣ်တၢ်သီ အိၣ်ဝဲလၢ ပှၤဧၣ်မိၣ်ဖိ ဒီးပှၤမိၤအးဖိ နုာ်လီၤလၢ ယဟိဝၤယွၤ အတၢ်အိၣ်ဖှိၣ်အပူၤ တန့ၢ်နီတဂၤဘၣ်. ဖျါလၢ တၢ်သိၣ်တၢ်သီ တခါအံၤ အဲၣ်ဒိးတဲလၢ ပှၤဧၣ်မိၣ်ဖိ ဒီးပှၤမိၤအးဖိ ကဲထီၣ်ဒ်သိးဒီး ပှၤအံၣ်စရ့လးဖိ ဒီးန့ၢ်ဘၣ် တၢ်ခွဲးတၢ်ယာ် လၢာ်လၢာ်ဆ့ဆ့ ဒ်သိးဒီး ပှၤအံၣ်စရ့လးဖိ တသ့ဘၣ်. သနာ်က့ အဝဲသ့ၣ် ရ့လိာ်သးဒီး ပှၤအံၣ်စရ့လးဖိ ဒီးအိၣ်လၢ အဝဲသ့ၣ်အကျါသ့. ကွၢ် လံာ်လၢအမ့ၢ် Insight on the Scriptures, Volume 1, p. 95.
