၁. ယဟိဝၤယွၤ ဘၣ်သးလၢ ပကကဲထီၣ် ပှၤဒ်လဲၣ်.

 ဖဲပှၤဒီမိၢ်ဝၤခံဂၤ အိၣ်ဖျဲၣ်ထီၣ်အဖိသီသီ ဒီးအသ့ၣ်ညါလၢ အဖိအိၣ်ဆူၣ်အိၣ်ချ့အခါ အဝဲသ့ၣ်သးခုဒိၣ်မး. ပှၤဒီမိၢ်ဝၤခံဂၤအံၤ အဲၣ်အဖိ သနာ်က့ အဝဲသ့ၣ် တဘၣ်သးလၢ အဖိကဆဲးကဲဖိသၣ်အီနုၢ် ထီဘိဘၣ်. တကးဒံးဘၣ် အဖိမ့ၢ်တဒိၣ်ထီၣ်ဘၣ်န့ၣ် အဝဲသ့ၣ် ကဘၣ်ယိၣ်တၢ်ဒိၣ်မး. ဒ်န့ၣ်အသိး ဖဲပမၤလိ ယဟိဝၤယွၤ အဂ့ၢ်သီသီအခါ ယဟိဝၤယွၤသးခုဒိၣ်မး. ဘၣ်ဆၣ် အဘၣ်သးလၢ ပကဆဲးမၤလိအါထီၣ် အဂ့ၢ်ဒံး. (၁ ကရံၣ် ၃:၁) တကးဒံးဘၣ် ယဟိဝၤယွၤ ဘၣ်သးလၢ ပကကဲထီၣ် ခရံာ်ဖိလၢအ “ဒိၣ်တုာ်ခိၣ်ပှဲၤ” လၢနီၢ်သးတခီ.—၁ ကရံၣ် ၁၄:၂၀.

၂. လၢတၢ်မၤလိတခါအံၤ ပကတဲသကိး တၢ်သံကွၢ်မနုၤလဲၣ်.

^၂ ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အဆိကမိၣ်တၢ် ဒီးအမၤတၢ်ဒ်လဲၣ်. ဒ်သိး ပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ပကဘၣ်မၤဒ်လဲၣ်. ပမ့ၢ်မၤလိ လံာ်စီဆှံတၢ်မ့ၢ်တၢ်တီ အဒိၣ်အယိာ်န့ၣ် ကမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤဒ်လဲၣ်. ဒီးဘၣ်မနုၤအဃိ ပကဘၣ်ဟးဆှဲး တၢ်ဆိကမိၣ်လၢ ပတလိၣ်ဆဲးကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီဘၣ်လဲၣ်. ပကတဲသကိး တၢ်သံကွၢ်တဖၣ်အံၤ အတၢ်စံးဆၢ လၢတၢ်မၤလိတခါအံၤ.

ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အဆိကမိၣ်တၢ် ဒီးအမၤတၢ်ဒ်လဲၣ်

၃. ပဒိၣ်ထီၣ်ထီထီၣ် လၢနီၢ်သးတခီန့ၣ် အဲၣ်ဒိးတဲဝဲ အခီပညီဒ်လဲၣ်.

^၃ လၢလံာ်စီဆှံပူၤ ကြံးအတၢ်ကတိၤလၢ ပှၤကွဲးကျိာ်ထံက့ၤလၢ “ဒိၣ်ထီၣ်ထီထီၣ်” န့ၣ် အခီပညီ မ့ၢ်စ့ၢ်ကီး “ပှၤလၢ အဒိၣ်တုာ်ခိၣ်ပှဲၤ.” a (၁ ကရံၣ် ၂:၆) အဃိ ဒ်ဖိသၣ်တဂၤ ဒိၣ်ထီၣ်ထီထီၣ် ဒီးကဲထီၣ် ပှၤလၢ အဒိၣ်တုာ်ခိၣ်ပှဲၤအသိး ပဝဲစ့ၢ်ကီး ပကဘၣ် ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ. ပမ့ၢ်မၤဒ်န့ၣ်မၣ် ပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ. ဒီးပမ့ၢ်ကဲထီၣ် ပှၤလၢ အဒိၣ်တုာ်ခိၣ်ပှဲၤ လၢနီၢ်သးလံ သနာ်က့ ပကဘၣ်ဆဲး လဲၤထီၣ်လဲၤထီ လၢနီၢ်သးတခီဒံး. (၁ တံၤ ၄:၁၅) ပဝဲခဲလၢာ် ဃုာ်ဒီး ပှၤသးစၢ်မ့ၢ်ဂ့ၤ ပကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီသ့. ဘၣ်ဆၣ် ပကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီလံဧါန့ၣ် ပကသ့ၣ်ညါဒ်လဲၣ်.

၄. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အကဲပှၤဒ်လဲၣ်.

 ^၄ ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အကဲပှၤလၢ အမၤထွဲ ယဟိဝၤယွၤ အတၢ်ဘၣ်သးခဲလၢာ် ဒီးအတမၤထဲ အကစၢ်တၢ်ဘၣ်သးဘၣ်. အတကဲ ပှၤလၢပှၤပှဲၤဘၣ်အဃိ အမၤကမၣ်တၢ်သ့. ဘၣ်ဆၣ် အဂုာ်ကျဲးစၢး ဆိကမိၣ်တၢ် ဒီးမၤတၢ်လၢ အဘၣ်ယဟိဝၤယွၤအသး ကိးနံၤဒဲး. အဒုးအိၣ်ထီၣ် လုၢ်လၢ်သကဲာ်ပဝးအသီ ဒီးအဂုာ်ကျဲးစၢး ဆိကမိၣ်တၢ် ဒ်ယဟိဝၤယွၤအသိးထီဘိ. (အ့း ၄:၂၂-၂၄) ဒီးဖဲအဘၣ်ဆၢတဲာ်တၢ်အခါ ခီဖျိလၢ အမၤလိပာ်စၢၤသးလၢ အကမၤထွဲ ယဟိဝၤယွၤ အတၢ်သိၣ်တၢ်သီ ဒီးတၢ်ဟံးစုနဲၣ်ကျဲအဃိ အတလိၣ်ဘၣ် တၢ်ဘျၢဒီဒူၣ်လၢ ကတဲအီၤလၢ အကဘၣ်မၤဒ်အံၤဒ်န့ၣ်ဘၣ်. တကးဒံးဘၣ် ဖဲအဆၢတဲာ်လီၤသးလၢ အကမၤတၢ်တမံၤမံၤအခါ အဂုာ်ကျဲးစၢးမၤထွဲဝဲ.—၁ ကရံၣ် ၉:၂၆, ၂၇.

၅. ခရံာ်ဖိလၢ အတဒိၣ်တုာ်ခိၣ်ပှဲၤ လၢနီၢ်သးတခီန့ၣ် အတၢ်အိၣ်သးအိၣ်ဒ်လဲၣ်. (အ့းဖ့းစူး ၄:၁၄, ၁၅)

^၅ မ့မ့ၢ် ခရံာ်ဖိလၢ အတဒိၣ်တုာ်ခိၣ်ပှဲၤ လၢနီၢ်သးတခီန့ၣ် အနာ်န့ၢ်ဝဲ “တၢ်ကွဲန့ၢ်လွဲန့ၢ်” ဒီး “တၢ်ကူၣ်ထီၣ်ဖးလီၤ လၢအပှဲၤဒီး တၢ်လီတၢ်ဝ့ၤတဖၣ်” သ့ညီမး. ဒီးဘၣ်သ့ၣ်သ့ၣ် အကနာ်န့ၢ်ဝဲ ပှၤလၢအထီဒါက့ၤ တၢ်မ့ၢ်တၢ်တီ အတၢ်လံၣ်တၢ်လီစ့ၢ်ကီး. b (ဖး အ့းဖ့းစူး ၄:၁၄, ၁၅.) ခရံာ်ဖိလၢ အတဒိၣ်တုာ်ခိၣ်ပှဲၤ လၢနီၢ်သးတခီန့ၣ် အကသးက့ၣ်ပှၤဂၤ, ဃုတၢ်အ့ၣ်လိာ်ဒီးပှၤဂၤ ဒီးအသးထီၣ်တၢ်ညီ. ဒီးဖဲအထံၣ်ဘၣ် တၢ်လ့ပစီအခါ အဟးဆှဲးဝဲတန့ၢ်ဘၣ်.—၁ ကရံၣ် ၃:၃.

၆. ပကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီန့ၣ် အလီၤဂာ်ဒီး ဖိသၣ်ဒိၣ်ထီၣ် ဒီးကဲထီၣ်ပှၤဒိၣ်တုာ်ခိၣ်ပှဲၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၆ ဒ်ပတဲသကိး တၢ်ဂ့ၢ်လၢအခီၣ်ထံးအသိး လံာ်စီဆှံ ထိၣ်သတြီၤဝဲ တၢ်ဒိၣ်ထီၣ်ထီထီၣ် လၢနီၢ်သးတခီ ဒ်သိးဒီး ဖိသၣ်ဒိၣ်ထီၣ်ထီထီၣ် ဒီးကဲထီၣ် ပှၤဒိၣ်တုာ်ခိၣ်ပှဲၤ. တၢ်လၢဖိသၣ် တသ့ၣ်ညါဝဲဘၣ်န့ၣ် အိၣ်ဒီဒူၣ်ညါအဃိ ပှၤဒိၣ်တုာ်ခိၣ်ပှဲၤ ကဘၣ် ဟံးစုနဲၣ်ကျဲအီၤ ဒီးဒီသဒၢအီၤ. အဒိ တချုးလၢ ပှၤဒီဖိမိၢ်ခံဂၤ ခီကျဲဒံးဘၣ်အခါ မိတဂၤ ကမၢအဖိမုၣ်ဖိ ဖီၣ်ဃာ်အစု. လၢခံ ဖဲအဖိမုၣ်ဖိဒိၣ်ထီၣ်အခါ အမိကပျဲ အလဲၤခီကျဲ လၢအကစၢ် ဘၣ်ဆၣ် အမိ ကတဲနီၣ်ဒံးအီၤလၢ တချုးလၢ အခီကျဲဒံးဘၣ်န့ၣ် အကဘၣ်ကွၢ်ဆိ အခိၣ်အဃၢၤ. ဒီးဖဲအဖိမုၣ် ကဲထီၣ်ပှၤဒိၣ်တုာ်ခိၣ်ပှဲၤအခါ အကဟးဆှဲး တၢ်လီၤဘၣ်ယိၣ်ဒ်အံၤ လၢအကစၢ်. ပထံၣ်ဘၣ်လၢ ဒ်သိးဖိသၣ်ဟးဆှဲး တၢ်လီၤဘၣ်ယိၣ် ကသ့အဂီၢ် အကလိၣ်ဘၣ် ပှၤဒိၣ်တုာ်ခိၣ်ပှဲၤ အတၢ်မၤစၢၤ. ဒ်န့ၣ်အသိး ခရံာ်ဖိလၢ အတဒိၣ်တုာ်ခိၣ်ပှဲၤ လၢနီၢ်သးတခီန့ၣ် ဒ်သိး အတမၤတၢ်လၢ ကမၤဟးဂီၤ အတၢ်ရ့လိာ်သး ဒီးယဟိဝၤယွၤတဂ့ၤ ဒီးဒ်သိး အဆၢတဲာ်တၢ်လၢ အဘၣ်ကသ့အဂီၢ် အကလိၣ်ဘၣ် တၢ်မၤစၢၤလၢ ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအအိၣ်. ပမ့ၢ်ဘၣ်ထိၣ်သတြီၤန့ၣ် ဖဲခရံာ်ဖိလၢ အဒိၣ်တုာ်ခိၣ်ပှဲၤတဂၤ ဘၣ်ဆၢတဲာ်တၢ်အခါ အဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲ လီၤတံၢ်လီၤဆဲး ဒ်သိး အကသ့ၣ်ညါ ယဟိဝၤယွၤ အတၢ်ထံၣ်. ဝံၤဒီး တၢ်လၢအသ့ၣ်ညါဝဲန့ၣ် အမၤထွဲဝဲ.

၇. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အလိၣ်ဘၣ် ပှၤဂၤအတၢ်မၤစၢၤဒံးဧါ.

 ^၇ ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အတလိၣ်ဘၣ် ပှၤဂၤ အတၢ်မၤစၢၤ နီတဘျီဘၣ်ဧါ. တမ့ၢ်ဒ်န့ၣ်ဘၣ်. တဘျီတခီၣ် ပှၤလၢအဒိၣ်တုာ်ခိၣ်ပှဲၤစ့ၢ်ကီး ကဘၣ်ဃ့တၢ်မၤစၢၤ လၢပှၤဂၤအအိၣ်. ဘၣ်ဆၣ် ပှၤလၢအတဒိၣ်တုာ်ခိၣ်ပှဲၤန့ၣ် အကဘၣ်သးလၢ ပှၤကတဲအီၤလၢ အကဘၣ်ဆၢတဲာ်တၢ်ဒ်အံၤဒ်န့ၣ် မ့တမ့ၢ် ပှၤကဆၢတဲာ်န့ၢ်တၢ် လၢအဂီၢ်. မ့မ့ၢ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အမ့ၢ်ဃ့ တၢ်ဟ့ၣ်ကူၣ်လၢ ပှၤလၢအအိၣ်ဒီး တၢ်လဲၤခီဖျိအါအအိၣ် သနာ်က့ အသ့ၣ်ညါလၢ အကဘၣ်ဆၢတဲာ်တၢ် လၢအနီၢ်ကစၢ် ဒီးအ “ကဘၣ်ဝံ အနီၢ်ကစၢ် အတၢ်ဝံတၢ်ယိး.”—ကလၤ ၆:၅.

၈. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အဝဲသ့ၣ် လီၤဆီလိာ်သးဒ်လဲၣ်.

^၈ ဒ်ပှၤလၢ အဒိၣ်တုာ်ခိၣ်ပှဲၤလၢနီၢ်ခိ ဖျါလီၤဆီလိာ်သးအသိး ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီစ့ၢ်ကီး အဝဲသ့ၣ် လီၤဆီလိာ်သး. အဒိ အဝဲသ့ၣ် အိၣ်ဒီး တၢ်ဂ့ၤတၢ်ဝါလၢ အတဒ်သိးလိာ်သးဘၣ်. အဝဲသ့ၣ်တနီၤန့ၣ် အိၣ်ဒီး တၢ်ကူၣ်သ့အါမး ဒီးအဂၤတနီၤန့ၣ် အသးဒူမး. တနီၤန့ၣ် အဟ့ၣ်တၢ်ညီ ဒီးအဂၤတနီၤန့ၣ် အသးကညီၤတၢ်သ့. တကးဒံးဘၣ် ဖဲခရံာ်ဖိလၢ အဒိၣ်တုာ်ခိၣ်ပှဲၤခံဂၤ ထံၣ်ဘၣ် တၢ်အိၣ်သးတမံၤဃီ လၢအကဘၣ် ဆၢတဲာ်တၢ်အခါ ဘၣ်သ့ၣ်သ့ၣ် အဝဲသ့ၣ်ခံဂၤလၢာ် အတၢ်ဆၢတဲာ်န့ၣ် ကဘၣ်လိာ်သးဒီး လံာ်စီဆှံ, ဘၣ်ဆၣ် အဆၢတဲာ်တၢ် တဒ်သိးဘၣ်. ဒီးခီဖျိလၢ အဝဲသ့ၣ် ဆၢတဲာ်တၢ်လၢ အသန့ၤထီၣ်သးလၢ အသးလၢအသ့ၣ်ညါဒၣ်တၢ်အဃိ ညီနုၢ်န့ၣ် တၢ်ကဲထီၣ်သးဒ်အံၤ. အဃိ အဝဲသ့ၣ် အတၢ်ဆၢတဲာ် မ့ၢ်တဒ်သိးလိာ်သးဘၣ် သနာ်က့ အဝဲသ့ၣ် တစံၣ်ညီၣ်လိာ်သးဘၣ်. လၢကစံၣ်ညီၣ်လိာ်သးအလီၢ် အဝဲသ့ၣ် ဂုာ်ကျဲးစၢးအိၣ်ဃူဃူဖိးဖိး.—ရိ ၁၄:၁၀; ၁ ကရံၣ် ၁:၁၀.

ဒ်သိး ပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤအဂီၢ် ပကဘၣ်မၤဒ်လဲၣ်

၉. ခရံာ်ဖိတဂၤ မ့ၢ်တမၤတၢ်နီတမံၤဘၣ်န့ၣ် အဒိၣ်တုာ်ခိၣ်ပှဲၤ လၢနီၢ်သးကသ့ဧါ.

^၉ ဖိသၣ်တဖၣ်န့ၣ် တမၤတၢ်နီတမံၤဘၣ် သနာ်က့ တၢ်ဆၢကတီၢ် ယံာ်ထီၣ်ဒီး အဝဲသ့ၣ် ဒိၣ်ထီၣ်ကယီကယီ. မ့မ့ၢ်ပဝဲန့ၣ် ဒ်သိးပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ပကဘၣ် ဂုာ်ကျဲးစၢး ထဲးဂံၢ်ထဲးဘါ. အဒိ ဒီပုၢ်ဝဲၢ်မုၣ်ခွါ လၢဝ့ၢ်ကရံၣ်သူးန့ၣ် အဝဲသ့ၣ် တူၢ်လိာ် တၢ်သးခုကစီၣ်, ဒိးဘျၢထံ, ဒိးန့ၢ်ဘၣ် သးစီဆှံ ဒီးဒိးန့ၢ်ဘၣ် တၢ်မၤလိလၢ တၢ်မၢဖိပီလူးအအိၣ် ဒီဒူၣ်ညါ. (မၤတၢ် ၁၈:၈-၁၁) သနာ်က့ အဝဲသ့ၣ် ဒိးဘျၢထံန့ၢ် စှၤကိာ်နံၣ် ဝံၤအလီၢ်ခံ အဝဲသ့ၣ်အါဂၤန့ၣ် တဒိၣ်တုာ်ခိၣ်ပှဲၤလၢ နီၢ်သးတခီဒံးဘၣ်. (၁ ကရံၣ် ၃:၂) မ့မ့ၢ်ပဝဲမီၤ, ဒ်သိး ပကဆဲးကဲ ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီအဂီၢ် ပကဘၣ်မၤဒ်လဲၣ်.

၁၀. ဒ်သိး ပကကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ပကဘၣ်မၤဒ်လဲၣ် (ယူဒၤ ၂၀)

^၁၀ ဒ်သိး ပကကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီအဂီၢ် အဆိကတၢၢ်န့ၣ် ပကဘၣ် သးအိၣ်ကဲထီၣ် ပှၤဒိၣ်တုာ်ခိၣ်ပှဲၤ. ပှၤလၢအ “အဲၣ်ဒိးလၢ [အ] တၢ်လဲၤခီဖျိကအိၣ်စှၤ” ဒီးတအဲၣ်ဒိး လဲၤထီၣ်လဲၤထီ လၢနီၢ်သးတခီဘၣ်န့ၣ် အကဲထီၣ် ပှၤဒိၣ်တုာ်ခိၣ်ပှဲၤ တသ့ဘၣ်. (ကတိၤ ၁:၂၂) ပှၤတနီၤန့ၣ် အဒိၣ်တုာ်ခိၣ်ပှဲၤလံ ဘၣ်ဆၣ် အတဘၣ်သး ဟံးမူဒါလၢ အကဆၢတဲာ်တၢ် လၢအကစၢ်ဘၣ် ဒီးအဘၣ်သးလၢ အမိအပါ ဆၢတဲာ်န့ၢ်တၢ်လၢအဂီၢ်. ပတဘၣ်သး လီၤဂာ်ဒီး ပှၤဒ်န့ၣ်ဘၣ်. ပကဘၣ် ဆၢတဲာ်တၢ်လၢ ပကစၢ် ဒီးဆဲးမၤဂၢၢ်ကျၢၤဒိၣ်ထီၣ် ပတၢ်ရ့လိာ်သးဒီး ယဟိဝၤယွၤ လၢပကစၢ်. (ဖး ယူဒၤ ၂၀.) ခဲအံၤ နမ့ၢ်ဆဲးဂုာ်ကျဲးစၢး ဒ်သိး နကကဲထီၣ် ပှၤလၢအဒိၣ်တုာ်ခိၣ်ပှဲၤ လၢနီၢ်သးတခီဒံးန့ၣ် ဃ့ယဟိဝၤယွၤလၢ အကဟ့ၣ်နၤ “တၢ်သူၣ်အိၣ်သးအိၣ်တၢ် ဒီးတၢ်ဂံၢ်တၢ်ဘါလၢ [န] ကမၤတၢ် အဂီၢ်.”—ဖံလံး ၂:၁၃.

၁၁. ဒ်သိး ပကကဲထီၣ် ပှၤလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ယဟိဝၤယွၤ ဟ့ၣ်ပှၤတၢ်မၤစၢၤ မနုၤလဲၣ်. (အ့းဖ့းစူး ၄:၁၁-၁၃)

^၁၁ ဒ်သိး ပကကဲထီၣ် ပှၤလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ယဟိဝၤယွၤ သ့ၣ်ညါဝဲလၢ ပထဲးဂံၢ်ထဲးဘါလၢ ပကစၢ်ထဲတဂၤ တသ့ဘၣ်. အဃိ အသူဝဲ ပှၤကွၢ်သိ ဒီးပှၤသိၣ်လိတၢ်တဖၣ် လၢတၢ်အိၣ်ဖှိၣ်ပူၤ ဒ်သိး ကမၤစၢၤပှၤလၢ ပကကဲထီၣ် “ပှၤဒိၣ်တုာ်ခိၣ်ပှဲၤ” လၢနီၢ်သးတခီ ဒီး “တုၤထီၣ်ထီၣ်ဘးလၢ ခရံာ်အတၢ်ဒိၣ်တုာ်ခိၣ်ပှဲၤ.” (ဖး အ့းဖ့းစူး ၄:၁၁-၁၃.) ယဟိဝၤယွၤ ဟ့ၣ်စ့ၢ်ကီးပှၤ အသးစီဆှံ ဒ်သိးကမၤစၢၤပှၤလၢ ပကအိၣ်ဒီး “ခရံာ်အသး.” (၁ ကရံၣ် ၂:၁၄-၁၆) တကးဒံးဘၣ် ယဟိဝၤယွၤ ဟ့ၣ်ပှၤ လံာ်တၢ်သးခုကစီၣ် လွံၢ်ဘ့ၣ် လၢအပာ်ဖျါထီၣ် ယ့ၣ်ၡူး အတၢ်ဆိကမိၣ် ဒီးတၢ်လၢအတဲဝဲဒီးမၤဝဲ ဖဲအအိၣ်လၢ ဟီၣ်ခိၣ်ချၢအခါ. အဃိ ပမ့ၢ်ဆိကမိၣ်တၢ် ဒ်သိးယ့ၣ်ၡူး, ကွၢ်လိအီၤ ဒီးမၤထွဲအဒိအတဲာ်န့ၣ် ကမၤစၢၤပှၤလၢ ပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ.

 လံာ်စီဆှံတၢ်မ့ၢ်တၢ်တီ အဒိၣ်အယိာ်န့ၣ် ကမၤစၢၤပှၤဒ်လဲၣ်

၁၂. “တၢ်သိၣ်လိ အခီၣ်ထံးခီၣ်ဘိ ဘၣ်ဃးဒီး ခရံာ်” န့ၣ် မ့ၢ်မနုၤလဲၣ်.

^၁၂ ဒ်သိး ပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ပကဘၣ် “လဲၤပူၤကွံာ် တၢ်သိၣ်လိ အခီၣ်ထံးခီၣ်ဘိ ဘၣ်ဃးဒီး ခရံာ်” လၢအမ့ၢ် တၢ်ဂ့ၢ်လၢ ပမၤလိဘၣ်သီသီတဖၣ်. တၢ်ဂ့ၢ်တဖၣ်န့ၣ် အပၣ်ဃုာ်ဒီး တၢ်ပီၢ်ယၢ်လီၤက့ၤသး, တၢ်နာ်, တၢ်ဒိးဘျၢထံ ဒီးတၢ်ဂဲၤဆၢထၢၣ် သမူထီၣ်က့ၤ. (ဧ့ၤ ၆:၁, ၂) တၢ်ဂ့ၢ်တဖၣ်အံၤ အကဲဝဲ ခရံာ်ဖိအမ့ၢ်အတီ အတၢ်သိၣ်လိ အခီၣ်ထံးခီၣ်ဘိ. အဃိ ဖဲစီၤပ့းတရူး စံၣ်တဲၤတဲလီၤတၢ် ဖဲဘူၣ်ယဲၢ်ဆံအခါ အတဲဘၣ် ပှၤဂီၢ်မုၢ်လၢ တၢ်ဂ့ၢ်တဖၣ်အံၤ. (မၤတၢ် ၂:၃၂-၃၅, ၃၈) ဒီးဒ်သိး ပကကဲထီၣ် ယ့ၣ်ၡူးခရံာ် အပျဲၢ်အဘီၣ်အဂီၢ် ပကဘၣ် တူၢ်လိာ် တၢ်သိၣ်လိ အခီၣ်ထံးခီၣ်ဘိတဖၣ်အံၤ. အဒိ စီၤပီလူး တဲဖျါထီၣ်ဝဲလၢ ပှၤတဂၤမ့ၢ်တနာ် တၢ်ဂဲၤဆၢထၢၣ် သမူထီၣ်က့ၤအဂ့ၢ်ဘၣ်န့ၣ် အတဲလီၤသးလၢ အကဲခရံာ်ဖိအမ့ၢ်အတီ တသ့ဘၣ်. (၁ ကရံၣ် ၁၅:၁၂-၁၄) တကးဒံးဘၣ် ဒ်သိး ပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ပတဘၣ် သးမံထဲ ပသ့ၣ်ညါ တၢ်သိၣ်လိ အခီၣ်ထံးခီၣ်ဘိဘၣ်, ပကဘၣ် ဆဲးဃုသ့ၣ်ညါအါထီၣ် တၢ်မ့ၢ်တၢ်တီ အဒိၣ်အယိာ်ဒံး.

၁၃. ဒ်သိး ပကန့ၢ်ဘၣ်အဘျုးလၢ လံာ်စီဆှံတၢ်မ့ၢ်တၢ်တီ အဒိၣ်အယိာ်အဂီၢ် ပကဘၣ်မၤဒ်လဲၣ်. (ဧ့ၤဘြံၤ ၅:၁၄) (ကွၢ်စ့ၢ်ကီးတၢ်ဂီၤ.)

^၁၃ လံာ်စီဆှံတၢ်မ့ၢ်တၢ်တီ အဒိၣ်အယိာ်န့ၣ် အလီၤဆီန့ၢ်ဒံး တၢ်သိၣ်လိ အခီၣ်ထံးခီၣ်ဘိ. လံာ်စီဆှံတၢ်မ့ၢ်တၢ်တီ အဒိၣ်အယိာ်န့ၣ် အပၣ်ဃုာ်ဒီး ယဟိဝၤယွၤ အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ လၢကမၤစၢၤပှၤဒ်သိး ပကသ့ၣ်ညါဘၣ် ယဟိဝၤယွၤ အတၢ်ထံၣ်. အဃိ ဒ်သိး ပကန့ၢ်ဘၣ်အဘျုးအဂီၢ် ပကဘၣ် ဖးကစၢ်ယွၤ အကလုၢ်ကထါ, ဆိကမိၣ်ထံ တၢ်ဂ့ၢ်လၢပဖး ဒီးဂုာ်ကျဲးစၢး မၤထွဲအီၤလၢ ပတၢ်အိၣ်မူအပူၤ. ပမ့ၢ်မၤလိပသး ဒ်န့ၣ်မၣ် ကမၤစၢၤပှၤလၢ ပကဆၢတဲာ်တၢ်လၢ အဘၣ်ယဟိဝၤယွၤအသး. c—ဖး ဧ့ၤဘြံၤ ၅:၁၄.

၁၄. ဒ်သိး ပှၤကရံၣ်သူးဖိ ကကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီအဂီၢ် စီၤပီလူး မၤစၢၤအဝဲသ့ၣ် ဒ်လဲၣ်.

^၁၄ ဖဲခရံာ်ဖိလၢ အတဒိၣ်တုာ်ခိၣ်ပှဲၤ လၢနီၢ်သးတခီ ဘၣ်ဆၢတဲာ်တၢ်အခါ တၢ်သိၣ်တၢ်သီ လၢလံာ်စီဆှံပူၤ မ့ၢ်တအိၣ် လီၤတံၢ်လီၤဆဲးဘၣ်န့ၣ် အဝဲသ့ၣ် ဆၢတဲာ်တၢ် တဘၣ်ဘၣ်. တၢ်သိၣ်တၢ်သီ လၢလံာ်စီဆှံပူၤ မ့ၢ်တအိၣ်ဘၣ်န့ၣ် ပှၤတနီၤ ဆိကမိၣ်ဝဲလၢ အဝဲသ့ၣ် ဆၢတဲာ်တၢ် ဖဲအသးသ့. မ့မ့ၢ်အဂၤတနီၤန့ၣ် အဝဲသ့ၣ် ကဆၢတဲာ်တၢ်အဂီၢ် တလိၣ်တၢ်သိၣ်တၢ်သီဘၣ် သနာ်က့ အဝဲသ့ၣ် ဃုကွၢ်ဝဲတၢ်သိၣ်တၢ်သီ. အဒိ ဖျါလီၤဂာ်လၢ ခရံာ်ဖိလၢ ဝ့ၢ်ကရံၣ်သူးန့ၣ် အဝဲသ့ၣ်ကအီၣ် တၢ်အီၣ်တၢ်အီလၢ ပှၤဟ့ၣ်လုၢ်ထီၣ်လၢ တၢ်ဂီၤတၢ်ဖှီၣ်ဧါ တအီၣ်ဝဲဘၣ်ဧါအဂီၢ် အဝဲသ့ၣ် သံကွၢ်ဝဲ တၢ်သိၣ်တၢ်သီ လၢစီၤပီလူး. စီၤပီလူးတတဲ အဝဲသ့ၣ်လၢ အကဘၣ်မၤ ဒ်အံၤဒ်န့ၣ်ဘၣ်. စီၤပီလူး သ့ၣ်ညါဝဲလၢ အဝဲသ့ၣ် တဂၤဘၣ်တဂၤန့ၣ်  အိၣ်ဒီး “တၢ်သဘျ့လၢ . . . ကဃုထၢ” တၢ်ဒ်အသးလၢအသ့ၣ်ညါဒၣ်တၢ် ဟ့ၣ်ကူၣ်အီၤအသိး. စီၤပီလူး တဲဖျါထီၣ် လံာ်စီဆှံ အတၢ်ဟံးစုနဲၣ်ကျဲတနီၤလၢ ကမၤစၢၤအဝဲသ့ၣ် ဒ်သိး အဝဲသ့ၣ် ကဆၢတဲာ်တၢ်လၢ တမၤတံာ်တာ် အသးလၢအသ့ၣ်ညါဒၣ်တၢ်တဂ့ၤ ဒီးတကဲထီၣ် တၢ်လီၤဃံၢ်အလီၢ်လၢ ပှၤဂၤအဂီၢ်တဂ့ၤ. (၁ ကရံၣ် ၈:၄, ၇-၉) ဖဲအံၤန့ၣ် ပထံၣ်ဘၣ်လၢ ဒ်သိး ပှၤကရံၣ်သူးဖိ တသန့ၤသးလၢ ပှၤဂၤတဂ့ၤ ဒီးအဝဲသ့ၣ် ဆိကမိၣ်ထံတၢ် ဒီးဆၢတဲာ်တၢ်လၢအကစၢ် ကသ့အဂီၢ် စီၤပီလူး မၤစၢၤအဝဲသ့ၣ်လၢ ကမၤထွဲ လံာ်စီဆှံ အတၢ်ဟံးစုနဲၣ်ကျဲ. စီၤပီလူး မၤဝဲဒ်အံၤန့ၣ် မၤစၢၤအဝဲသ့ၣ်ဒ်သိး အဝဲသ့ၣ် ကကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီ.

၁၅. ဒ်သိး ဧ့ၤဘြံၤ ခရံာ်ဖိတဖၣ် ကကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီအဂီၢ် စီၤပီလူး မၤစၢၤအဝဲသ့ၣ်ဒ်လဲၣ်.

^၁၅ ပန့ၢ်ဘၣ်စ့ၢ်ကီး တၢ်မၤလိအရ့ဒိၣ်တခါလၢ တၢ်လၢ စီၤပီလူးကွဲးန့ၢ် ဧ့ၤဘြံၤ ခရံာ်ဖိတဖၣ်. အဝဲသ့ၣ်တနီၤန့ၣ် တဆဲးကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီဘၣ်. လီၤဂာ်ဒ်သိး အဝဲသ့ၣ် “ကဲထီၣ်ကဒါက့ၤပှၤလၢ အလိၣ်ဘၣ်တၢ်နုၢ်ထံ ဒီးတမ့ၢ်တၢ်အီၣ် အသံးအကာ် [လံာ်စီဆှံ တၢ်မ့ၢ်တၢ်တီ အဒိၣ်အယိာ်] ဘၣ်.” (ဧ့ၤ ၅:၁၂) တၢ်နၢ်ပၢၢ်အသီလၢ ယဟိဝၤယွၤ ပာ်ဖျါထီၣ်န့ၢ်အဝဲသ့ၣ် ကယီကယီခီဖျိ တၢ်အိၣ်ဖှိၣ်န့ၣ် အဝဲသ့ၣ် တမၤလိဝဲ ဒီးတတူၢ်လိာ်ဝဲဘၣ်. (ကတိၤ ၄:၁၈) အဒိ ခီဖျိလၢ ယ့ၣ်ၡူးခရံာ် အတၢ်ဟ့ၣ်လုၢ်ထီၣ်သးအဃိ စီၤမိၤၡ့ အတၢ်သိၣ်တၢ်သီ ကတၢၢ်ကွံာ်လံ သနာ်က့ အနံၣ် ၃၀ ဘျဲၣ်ဝံၤအလီၢ်ခံ ပှၤယူဒၤဖိအါဂၤ ဆီၣ်ထွဲဝဲလၢ ပှၤကမၤထွဲ စီၤမိၤၡ့ အတၢ်သိၣ်တၢ်သီဒံး. (ရိ ၁၀:၄; တံ ၁:၁၀) လၢအနံၣ် ၃၀ အတီၢ်ပူၤ ပှၤယူဒၤဖိလၢ အကဲထီၣ် ခရံာ်ဖိတဖၣ် အိၣ်ဒီး တၢ်ဆၢကတီၢ်အါမးလၢ ကဃုသ့ၣ်ညါဝဲတၢ်ဂ့ၢ်လၢ အဝဲသ့ၣ် တလိၣ်မၤထွဲ စီၤမိၤၡ့ အတၢ်သိၣ်တၢ်သီလၢၤဘၣ်. အဃိ စီၤပီလူး ဂုာ်ကျဲးစၢး မၤစၢၤအဝဲသ့ၣ်ဒ်သိး အဝဲသ့ၣ် ကတူၢ်လိာ် တၢ်မ့ၢ်တၢ်တီ အဒိၣ်အယိာ်လၢ အသိၣ်လိဝဲ. စီၤပီလူးအလံာ်ပရၢန့ၣ် မၤဆူၣ်ထီၣ် အဝဲသ့ၣ် အတၢ်နာ်လၢ တၢ်ဘူၣ်ထီၣ်ဘါထီၣ် ယဟိဝၤယွၤ အတၢ်ရဲၣ်တၢ်ကျဲၤ လၢအအိၣ်ထီၣ် ခီဖျိယ့ၣ်ၡူးန့ၣ် အဂ့ၤဒိၣ်န့ၢ်အလီၢ်ဒံး. ဒီးဖဲအဝဲသ့ၣ် စံၣ်တဲၤတဲလီၤတၢ်အခါ ပှၤယူဒၤဖိ ထီဒါအဝဲသ့ၣ်အဃိ လံာ်ပရၢအံၤ မၤစၢၤအဝဲသ့ၣ်ဒ်သိး အဝဲသ့ၣ် ကဆဲးစံၣ်တဲၤတဲလီၤတၢ်ဒူဒူ.—ဧ့ၤ ၁၀:၁၉-၂၃.

ပကဘၣ်ဟးဆှဲး တၢ်ဆိကမိၣ်လၢ ပတလိၣ်ဆဲးကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီဘၣ်

၁၆. ပကဘၣ် ဂုာ်ကျဲးစၢးကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီ တကးဒံးဘၣ် ပကဘၣ် ဆဲးမၤမနုၤလဲၣ်.

^၁၆ ပကဘၣ် ဂုာ်ကျဲးစၢးကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီ တကးဒံးဘၣ် ပကဘၣ်ဆဲးကဲ ပှၤဒ်န့ၣ်ထီဘိ. ပမၤဒ်န့ၣ်ကသ့အဂီၢ် ပကဘၣ်ဟးဆှဲး တၢ်ဆိကမိၣ်လၢ ပတလိၣ်ဆဲးကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီဘၣ်. (၁ ကရံၣ် ၁၀:၁၂) တကးဒံးဘၣ် ပကဘၣ်ဆဲး “မၤကွၢ်လီၤ” ပသး ဒီးဆဲးလဲၤထီၣ်လဲၤထီ ဆူညါထီဘိ.—၂ ကရံၣ် ၁၃:၅.

၁၇. စီၤပီလူး အလံာ်ပရၢလၢ အကွဲးန့ၢ် ပှၤကလီးစဲဖိန့ၣ် ပာ်ဖျါထီၣ်တၢ်ဂ့ၢ် မနုၤလဲၣ် ဒီးဘၣ်မနုၤအဃိလဲၣ်.

 ^၁၇ ဖဲစီၤပီလူး ကွဲးလံာ်ပရၢလၢ ပှၤကလီးစဲဖိ အအိၣ်အခါ အကွဲးဖျါထီၣ်ကဒီး တၢ်ဂ့ၢ်ဘၣ်ဃးဒီး အဝဲသ့ၣ် ကဘၣ်ဆဲးကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီ. ပှၤကလီးစဲဖိတဖၣ်န့ၣ် ကဲဝဲ ခရံာ်ဖိလၢ အဒိၣ်တုာ်ခိၣ်ပှဲၤလံ သနာ်က့ စီၤပီလူး ဟ့ၣ်ပလီၢ် အဝဲသ့ၣ်ဒ်သိး ပှၤဟီၣ်ခိၣ်ဖိ အတၢ်ထံၣ် တဒိၣ်စိလၢ အဝဲသ့ၣ်အဖီခိၣ် တဂ့ၤအဂီၢ်. (ကလီး ၂:၆-၁၀) ဒီးစီၤအ့းပၤဖြါ လၢအသ့ၣ်ညါ ပှၤအိၣ်လၢ ကလီးစဲ တၢ်အိၣ်ဖှိၣ်ပူၤ အဂ့ၢ်ဂ့ၤဂ့ၤန့ၣ် အဃ့ထုကဖၣ် ထီဘိလၢ အဝဲသ့ၣ်က “ဆဲးကဲ ပှၤဒိၣ်တုာ်ခိၣ်ပှဲၤ.” (ကလီး ၄:၁၂) ပန့ၢ်ဘၣ် တၢ်မၤလိဒ်လဲၣ်. စီၤပီလူး ဒီးစီၤအ့းပၤဖြါ ခံဂၤလၢာ် သ့ၣ်ညါဝဲလၢ ပမ့ၢ်ဘၣ်သး ဆဲးကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီန့ၣ် ပကလိၣ်ဘၣ် ကစၢ်ယွၤ အတၢ်မၤစၢၤ ဒီးပကဘၣ် ဆဲးမၤဂ့ၤထီၣ် ပတၢ်ရ့လိာ်သးဒီး ကစၢ်ယွၤထီဘိ. ပှၤကလီးစဲဖိ မ့ၢ်ထံၣ်ဘၣ် တၢ်ကီတၢ်ခဲ ဒ်လဲၣ်သနာ်က့ စီၤပီလူး ဒီးစီၤအ့းပၤဖြါ ဘၣ်သးလၢ အဝဲသ့ၣ် ကဆဲးကဲထီၣ် ပှၤဒိၣ်တုာ်ခိၣ်ပှဲၤ လၢနီၢ်သးတခီ.

၁၈. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတဂၤ မ့ၢ်တပလီၢ်သးဘၣ်န့ၣ် တၢ်ကဲထီၣ်သးဒီးအီၤ သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၈ စီၤပီလူး ဟ့ၣ်ပလီၢ် ဧ့ၤဘြံၤ ခရံာ်ဖိလၢ အဝဲသ့ၣ်မ့ၢ်ကဲ ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီလံ သနာ်က့ အဝဲသ့ၣ် မ့ၢ်တပလီၢ်သးဘၣ်န့ၣ် အဝဲသ့ၣ် တန့ၢ်ဘၣ် ကစၢ်ယွၤ အတၢ်ဘၣ်သးလၢၤဘၣ်. တကးဒံးဘၣ် အဝဲသ့ၣ် မ့ၢ်တဒိကနၣ် ဒီးမၤထွဲ ယဟိဝၤယွၤ အတၢ်မၤလိာ်ဘၣ်န့ၣ် အဝဲသ့ၣ် ကယံၤဒိၣ်ထီၣ်ဒီး ယဟိဝၤယွၤ တုၤလၢ အတဘၣ်သး ပီၢ်ယၢ်လီၤက့ၤသးဘၣ် အဃိ ယဟိဝၤယွၤ တပျၢ်ကွံာ် အဝဲသ့ၣ် တၢ်ကမၣ်လၢၤဘၣ်. ပထံၣ်ဘၣ်လၢ တၢ်တကဲထီၣ်သးဒီး ဧ့ၤဘြံၤ ခရံာ်ဖိတဖၣ် ဒ်အံၤဘၣ်အဃိ လီၤသးခုဒိၣ်မး. (ဧ့ၤ ၆:၄-၉) မ့မ့ၢ်လၢ ပှၤလၢအပတုာ်မၤ ယဟိဝၤယွၤ အတၢ်မၤ မ့တမ့ၢ် ပှၤလၢပှၤထုးထီၣ်ကွံာ်အီၤ လၢတၢ်အိၣ်ဖှိၣ်ပူၤ လၢဆၢကတီၢ်ခဲအံၤဟီမီၤ. အဝဲသ့ၣ် ကကဲထီၣ် ဒ်သိးဒီး ပှၤလၢစီၤပီလူးကွဲးဖျါထီၣ်ဝဲလၢ အတန့ၢ်ဘၣ် ကစၢ်ယွၤ အတၢ်ဘၣ်သးလၢၤဘၣ်န့ၣ်ဧါ. အဝဲသ့ၣ် မ့ၢ်ဆီၣ်လီၤသး ဒီးပီၢ်ယၢ်လီၤက့ၤသးန့ၣ် အဝဲသ့ၣ် တကဲထီၣ်ဒ်န့ၣ်ဘၣ်. သနာ်က့ ဖဲအဝဲသ့ၣ် ဟဲက့ၤကဒါလၢ ယဟိဝၤယွၤ အအိၣ်အခါ အဝဲသ့ၣ် ကလိၣ်ဘၣ် တၢ်မၤစၢၤလၢ ယဟိဝၤယွၤ ရဲၣ်ကျဲၤပာ်စၢၤဝဲ. (ဃ့း ၃၄:၁၅, ၁၆) ဘၣ်သ့ၣ်သ့ၣ် တၢ်အိၣ်ဖှိၣ်သးပှၢ်တဖၣ် ကရဲၣ်ကျဲၤဝဲလၢ ဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤတဂၤဂၤ ကမၤစၢၤ အဝဲသ့ၣ်ဒ်သိး အကမၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤ.

၁၉. ပမ့ၢ်ကဲထီၣ် ခရံာ်ဖိလၢအဒိၣ်တုာ်ခိၣ်ပှဲၤလံ သနာ်က့ ပကဘၣ်ဆဲးမၤဒံး မနုၤလဲၣ်.

^၁၉ နမ့ၢ်ဂုာ်ကျဲးစၢးကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤန့ၣ် နဆဲး လဲၤထီၣ်လဲၤထီၣ် လၢနီၢ်သးတခီသ့ဒံး. အဃိ ဆဲးမၤလိ လံာ်စီဆှံတၢ်မ့ၢ်တၢ်တီ အဒိၣ်အယိာ် ဒီးဂုာ်ကျဲးစၢး ဆိကမိၣ်တၢ် ဒ်သိးဒီး ယဟိဝၤယွၤထီဘိ. ဒီးနမ့ၢ်ကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတခီလံ သနာ်က့ ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ဂုာ်ကျဲးစၢး ဆဲးကဲပှၤဒ်န့ၣ်ထီဘိ.