တၢ်ရဲၣ်တၢ်ကျဲၤလၢ အလီၤပလိာ်ဒီး လံာ်စီဆှံ
“ယွၤပာ်လီၤဟီၣ်ခိၣ်အခီၣ်ထံး လၢတၢ်ကူၣ်သ့, တ့လီၤမူခိၣ်လၢ တၢ်ကူၣ်တၢ်ဆးလီၤ.”—ကတိၤဒိ ၃:၁၉.
တၢ်သးဝံၣ်- ၆, ၂၄
၁, ၂. (က) ဘၣ်ဃးဒီး ယွၤအတၢ်ကရၢကရိန့ၣ် ပှၤတနီၤနီၤ အတၢ်ထံၣ်အိၣ်ဒ်လဲၣ်. (ခ) လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်.
ပှၤတနီၤနီၤတဲဝဲလၢ “နတၢ်ရ့လိာ်သးဒီးယွၤန့ၣ် မ့ၢ်တၢ်လၢအရ့ဒိၣ်ကတၢၢ်လီၤ. နတလိၣ်ဘၣ် တၢ်ကရၢကရိလၢ အကဟံးစုနဲၣ်ကျဲနၤဘၣ်.” အဝဲသ့ၣ်တဲတၢ်န့ၣ် မ့ၢ်အဘၣ်စ့ၢ်ကီးဧါ. တၢ်အုၣ်အသးပာ်ဖျါထီၣ်ဝဲမနုၤလဲၣ်.
၂ လၢတၢ်မၤလိတခါအံၤအပူၤ ပကထံၣ်ဘၣ်လၢ ယဟိဝၤယွၤ ရဲၣ်လီၤကျဲၤလီၤဝဲတၢ်ခဲလၢာ်လၢ အလီၢ်ဒၣ်ဝဲဂ့ၤဂ့ၤဘၣ်ဘၣ်လီၤ. တကးဒံးဘၣ် အဝဲကရၢကရိထီၣ်ဝဲအခ့အပှၤတဖၣ်လီၤ. ပကမၤလိသကိးတၢ်ဂ့ၢ်လၢ ဖဲယဟိဝၤယွၤအတၢ်ကရၢကရိ ဟံးစုနဲၣ်ကျဲပှၤအခါ ပဘၣ်မၤဒ်လဲၣ်န့ၣ်လီၤ. (၁ ကရံၣ်သူး ၁၄:၃၃, ၄၀) ယွၤအပှၤဂီၢ်မုၢ်တဖၣ်လၢ တၢယၤဖှိၣ်အစိၤန့ၣ် လူၤပိာ်ထွဲလံာ်စီဆှံ တၢ်ဟံးစုနဲၣ်ကျဲအဃိ အဝဲသ့ၣ်စံၣ်တဲၤတဲလီၤဘၣ်တၢ်လၢ တၢ်လီၢ်အါတီၤလီၤ. ဒ်အဝဲသ့ၣ်အသိး မုၢ်မဆါတနံၤအံၤ ပလူၤပိာ်ထွဲလံာ်စီဆှံ အတၢ်ဟံးစုနဲၣ်ကျဲလၢ ကစၢ်ယွၤအတၢ်ကရၢကရိ ဟ့ၣ်လီၤဝဲန့ၣ်လီၤ. ခီဖျိလၢ ပမၤဒ်န့ၣ်အဃိ ပစံၣ်တဲၤတဲလီၤဘၣ်တၢ်လၢ ဟီၣ်ခိၣ်ဒီဘ့ၣ်န့ၣ်လီၤ. တကးဒံးဘၣ် ပတၢ်အိၣ်ဖှိၣ်စီဆှံဝဲ, အိၣ်ဒီးတၢ်ဃူတၢ်ဖိးဒီး တၢ်မုာ်တၢ်ခုၣ်စ့ၢ်ကီးလီၤ.
ယဟိဝၤယွၤမ့ၢ် ယွၤလၢအရဲၣ်လီၤကျဲၤလီၤတၢ် ဂ့ၤဂ့ၤဘၣ်ဘၣ်
၃. ဘၣ်မနုၤအဃိ နနာ်လၢယဟိဝၤယွၤ မ့ၢ်ယွၤလၢ အရဲၣ်လီၤကျဲၤလီၤတၢ် ဂ့ၤဂ့ၤဘၣ်ဘၣ်လဲၣ်.
၃ ဖဲပထံၣ်ဘၣ် ကယဲၢ်တၢ်လၢ ယဟိဝၤယွၤတ့လီၤဝဲတဖၣ်အခါ ပသ့ၣ်ညါလၢ အမ့ၢ်ယွၤလၢ အရဲၣ်ကျဲၤတၢ်ဂ့ၤဂ့ၤဘၣ်ဘၣ်တဂၤလီၤ. ကစၢ်ယွၤ “ပာ်လီၤဟီၣ်ခိၣ်အခီၣ်ထံး လၢတၢ်ကူၣ်သ့, တ့လီၤမူခိၣ်လၢတၢ်ကူၣ်တၢ်ဆးလီၤ.” (ကတိၤဒိ ၃:၁၉) ယဟိဝၤယွၤ အတၢ်ဘၣ်တ့တဖၣ်န့ၣ် ပတသ့ၣ်ညါအဂ့ၢ်ခဲလၢာ်ဘၣ် လၢတၢ်န့ၣ်အဃိ လံာ်စီဆှံပာ်ဖျါထီၣ်ဝဲလၢ ပှၤနၢ်ဟူထဲအတၢ်ကတိၤ “ကသွံဒံ” ဖိလီၤ. (ယိၤဘး ၂၆:၁၄) ပသ့ၣ်ညါ ကစၢ်ယွၤအတၢ်ဘၣ်တ့ဘၣ်ဃး မူဟီၣ်ကယၢထဲတစဲးဖိသနာ်က့ ပသ့ၣ်ညါလၢ ကစၢ်ယွၤန့ၣ် အမ့ၢ်ယွၤလၢ အရဲၣ်ကျဲၤတၢ်ဂ့ၤဂ့ၤဘၣ်ဘၣ်တဂၤလီၤ. (စံးထီၣ်ပတြၢၤ ၈:၃, ၄) ပမ့ၢ်ကွၢ် ဆၣ်လၢအကကွဲၢ်တဖၣ်န့ၣ် လဲၤတရံးအသးလၢ အကျိၤအကျဲဂ့ၤဂ့ၤဘၣ်ဘၣ် ဒီးမူဖျၢၣ်တဖၣ် လဲၤတရံးဝဲမုၢ်ဘၣ်လီၢ်ဘၣ်စးလီၤ. မူဖျၢၣ်ဒီးဆၣ်တဖၣ်အံၤ လဲၤတရံးအသးဂ့ၤဂ့ၤဘၣ်ဘၣ် မ့ၢ်လၢယဟိဝၤယွၤ ရဲၣ်လီၤကျဲၤလီၤဝဲအဃိလီၤ. ဖဲပထံၣ်ဘၣ်လၢ ကစၢ်ယွၤတ့လီၤ မူခိၣ်ပှဲၤဝဲဒီး “တၢ်ကူၣ်သ့” အခါပအဲၣ်ဒိးစံးထီၣ်ပတြၢၤအီၤ, ဘူၣ်ထီၣ်ဘါထီၣ်အီၤဒီး တီဒီးအီၤလီၤ.—စံးထီၣ်ပတြၢၤ ၁၃၆:၁, ၅-၉.
၄. ဘၣ်မနုၤအဃိ ပှၤစဲအ့ၣ်ဖိတဖၣ် စံးဆၢဝဲတၢ်သံကွၢ်လၢ အရ့ဒိၣ်တဖၣ်တသ့ဘၣ်လဲၣ်.
၄ ပှၤစဲအ့ၣ်ဖိတဖၣ် ဃုသ့ၣ်ညါဝဲဘၣ်ဃးဒီး မူဟီၣ်ကယၢဒီး ပဟီၣ်ခိၣ်အဂ့ၢ်န့ၣ်လီၤ. ဒီးတၢ်လၢအဝဲသ့ၣ် သ့ၣ်ညါထီၣ်ဝဲတဖၣ်န့ၣ် သူဝဲလၢကမၤဂ့ၤထီၣ် ပတၢ်အိၣ်မူအဂီၢ်လီၤ. ဘၣ်ဆၣ်တၢ်သံကွၢ်အရ့ဒိၣ်တဖၣ်န့ၣ် အဝဲသ့ၣ်စံးဆၢက့ၤဝဲတသ့ခဲလၢာ်ဘၣ်. အဒိ ပှၤစဲအ့ၣ်ဖိလၢ အဃုသ့ၣ်ညါ မုၢ်, လါ ဒီးဆၣ်တဖၣ်န့ၣ် ဘၣ်ဃးဒီး မူဟီၣ်ကယၢဟဲကဲထီၣ်ဒ်လဲၣ်အဂ့ၢ်န့ၣ် အဝဲသ့ၣ်တသ့ၣ်ညါဝဲ လီၤတံၢ်လီၤဆဲးဘၣ်. ဒီးဘၣ်မနုၤအဃိ ပှၤကညီ, ဆၣ်ဖိကီၢ်ဖိ ဒီးတၢ်မုၢ်တၢ်ဘိတဖၣ် အိၣ်ဝဲလၢ ဟီၣ်ခိၣ်တဖျၢၣ်အံၤအပူၤလဲၣ်န့ၣ် အဝဲသ့ၣ်တသ့ၣ်ညါဝဲဘၣ် ဒီးဘၣ်မနုၤအဃိ ပှၤကညီအဲၣ်ဒိးအိၣ်မူ လီၤထူလီၤယိာ်လဲၣ်န့ၣ် ပှၤအါဂၤတဲနၢ်ပၢၢ်ဝဲတဘၣ်ဘၣ်. (စံၣ်တဲၤတဲလီၤတၢ် ၃:၁၁) အဝဲသ့ၣ်စံးဆၢက့ၤဝဲတဘၣ်ဘၣ်, မ့ၢ်လၢပှၤစဲအ့ၣ်ဖိဒီး ပှၤအဂၤတဖၣ်တဲဝဲလၢ ယွၤတအိၣ်ဘၣ်ဒီး ဆီၣ်ထွဲဝဲ တၢ်နာ်လၢအမ့ၢ် သးသမူ အတၢ်လဲလိာ်အသး တဆီဘၣ်တဆီ (evolution) အဃိလီၤ. ဘၣ်ဆၣ်ယွၤစံးဆၢဝဲ တၢ်သံကွၢ်တဖၣ်အံၤလၢ လံာ်စီဆှံအပူၤလီၤ.
၅. ပှၤကညီတဖၣ် သ့ၣ်ညါဝဲ န့ဆၢၣ်အတၢ်သိၣ်တၢ်သီအဃိ ကဲဘျုးလၢ အဝဲသ့ၣ်အဂီၢ်ဒ်လဲၣ်.
၅ ဖဲယဟိဝၤယွၤ တ့လီၤတၢ်အခါ ပၣ်ဃုာ်ဒီး န့ဆၢၣ်အတၢ်ဘျၢအါမးလီၤ. တၢ်ဘျၢတဖၣ်အံၤ တဆီတလဲဝဲနီတဘျီဘၣ်. အဒိ ပှၤလၢအမၤတၢ်ဘၣ်ဃးလီမ့ၣ်အူ, ပှၤလၢအမၤတၢ်ဘၣ်ဃးဒီးထံ, အံၣ်ကၠနယၢၢ်, ပှၤနီကဘီယူၤ, ကသံၣ်သရၣ်လၢအကွဲးကါပှၤဆါ ဒီးပှၤအဂၤတဖၣ်န့ၣ် သ့ၣ်ညါဝဲတၢ်ဘျၢတဖၣ်အဃိ မၤဝဲအတၢ်မၤ သ့ဂ့ၤဂ့ၤလီၤ. အဒိ ပှၤကညီအသးဖျၢၣ်န့ၣ် ကအိၣ်ဝဲလၢ ပကိပူၤ တကပၤဃီလီၤ. အဃိ ပှၤဆါတဂၤ အသးဖျၢၣ် အိၣ်ဝဲဖဲလဲၣ်တတီၤလဲၣ်န့ၣ် သရၣ်လၢအကွဲးကါတၢ်တဂၤ ဃုဝဲဘၣ်လီၤ. ဒီးပှၤကိးဂၤဒဲးသ့ၣ်ညါဝဲလၢ ဟီၣ်ခိၣ်အိၣ်ဒီး တၢ်ထုးဃၢအဃိပမ့ၢ်အိၣ်လၢ တၢးဖးထီအဖီခိၣ်ဒီး ဖုလီၤန့ၣ် ပသံသ့ဝဲလီၤ. ခီဖျိလၢ ပသ့ၣ်ညါတၢ်ဂ့ၢ်အံၤ ဒီးပတအဲၣ်ဒိးသံဘၣ်အဃိ ပတဟးဖုလီၤနါစိၤဘၣ်.
ယွၤရဲၣ်လီၤကျဲၤလီၤဝဲတၢ်မနုၤလဲၣ်
၆. ယဟိဝၤယွၤအဲၣ်ဒိးလၢ အခ့အပှၤတဖၣ် ရဲၣ်လီၤကျဲၤလီၤတၢ် လီၤတံၢ်လီၤဆဲးဒီးဘူၣ်ထီၣ်ဘါထီၣ်အီၤန့ၣ် ပသ့ၣ်ညါသ့လၢကျဲဒ်လဲၣ်.
၆ ယဟိဝၤယွၤ ရဲၣ်လီၤကျဲၤလီၤဝဲ မူဟီၣ်ကယၢ လီၤတံၢ်လီၤဆဲးလီၤ. လၢတၢ်န့ၣ်အဃိပသ့ၣ်ညါလၢ အဝဲအဲၣ်ဒိးလၢ အခ့အပှၤသ့ၣ်တဖၣ် ရဲၣ်လီၤကျဲၤလီၤတၢ် လီၤတံၢ်လီၤဆဲးဒီး ဘူၣ်ထီၣ်ဘါထီၣ်အီၤန့ၣ်လီၤ. တကးဒံးဘၣ် ပကဘၣ်ဘူၣ်ထီၣ်ဘါထီၣ်အီၤဒ်လဲၣ်န့ၣ် အဝဲပာ်ဖျါထီၣ်န့ၢ်ပှၤ လၢလံာ်စီဆှံအပူၤလီၤ. ပမ့ၢ်လူၤပိာ်ထွဲ ကစၢ်ယွၤအတၢ်ဟံးစုနဲၣ်ကျဲ ခီဖျိလံာ်စီဆှံဒီး အတၢ်ကရၢကရိန့ၣ် ပတၢ်အိၣ်မူကပှဲၤဒီး တၢ်သူၣ်ဖှံသးညီ ဒီးတၢ်သူၣ်မံသးမုာ်လီၤ.
၇. ခီဖျိလံာ်စီဆှံ ဘၣ်တၢ်ကွဲးအီၤ တဆီဘၣ်တဆီ ဂ့ၤဂ့ၤဘၣ်ဘၣ်အဃိ ပသ့ၣ်ညါအါထီၣ် တၢ်ဂ့ၢ်မနုၤလဲၣ်.
၇ လံာ်စီဆှံ မ့ၢ်တၢ်ဟ့ၣ်လၢ အလုၢ်ဒိၣ်ပှ့ၤဒိၣ်တခါလၢ ယွၤဟ့ၣ်လီၤပှၤလီၤ. ပှၤကူၣ်ဘၣ်ကူၣ်သ့တနီၤနီၤ တဲဝဲလၢ လံာ်စီဆှံန့ၣ် မ့ၢ်ဒၣ်ပှၤယူဒၤဖိ ဒီးပှၤခရံာ်ဖိအလံာ်လၢ ပှၤဟီၣ်ခိၣ်ဖိကွဲးဒုးအိၣ်ထီၣ်ဝဲန့ၣ်လီၤ. ဘၣ်ဆၣ်ကစၢ်ယွၤ ဆၢတဲာ်ဝဲလၢ အကသူဝဲ မတၤတဂၤလၢ ကကွဲးလံာ်စီဆှံလဲၣ်, ကကွဲးဝဲလၢ အဆၢကတီၢ်ဖဲလဲၣ်, ဒီးကကွဲးဝဲတၢ်ဂ့ၢ်မနုၤလဲၣ်န့ၣ်လီၤ. လၢတၢ်န့ၣ်အဃိ လံာ်စီဆှံအံၤ မၤစၢၤပှၤဒ်သိး ပကနၢ်ပၢၢ်ထီၣ် တၢ်ကစီၣ်လၢယွၤအအိၣ်န့ၣ်လီၤ. စးထီၣ်လၢ ၁ မိၤၡ့ တုၤလီၤလၢ လီၣ်ဖျါန့ၣ် လံာ်စီဆှံပာ်ဖျါထီၣ်ဝဲတၢ် “အချံအသၣ်” န့ၣ်ကမ့ၢ်ပှၤလၢ အကမၤကဲထီၣ်ဟီၣ်ခိၣ်လၢ ပၤရဒံစူးန့ၣ်လီၤ. ခဲအံၤ ပသ့ၣ်ညါဘၣ်လၢတၢ် “အချံအသၣ်” န့ၣ်မ့ၢ်ဝဲယ့ၣ်ၡူး ဒီးအဘီအမုၢ်န့ၣ် ကပာ်ဖျါထီၣ်ဝဲလၢ ထဲဒၣ်ယဟိဝၤယွၤတဂၤန့ၣ် အိၣ်ဒီးတၢ်ခွဲးတၢ်ယာ်လၢ ကပၢပှၤဟီၣ်ခိၣ်ဖိန့ၣ်လီၤ.—ဖး ၁ မိၤၡ့ ၃:၁၅; မးသဲ ၆:၁၀; လီၣ်ဖျါ ၁၁:၁၅ တက့ၢ်.
၈. ပှၤအံၣ်စရ့လးဖိသ့ၣ်တဖၣ် အိၣ်ဒီးတၢ်ရဲၣ်တၢ်ကျဲၤဂ့ၤဂ့ၤဘၣ်ဘၣ် လၢကျဲဒ်လဲၣ်.
၈ ပှၤအံၣ်စရ့လးဖိတဖၣ် မၤပိာ်ထွဲဝဲတၢ်သိၣ်တၢ်သီလၢ ကစၢ်ယွၤဟ့ၣ်အဝဲသ့ၣ်တဖၣ်အဃိ တၢ်ခဲလၢာ် လဲၤအသးဂ့ၤဂ့ၤဘၣ်ဘၣ်န့ၣ်လီၤ. အဒိ အဝဲသ့ၣ်ရဲၣ်ကျဲၤဝဲလၢ ပိာ်မုၣ်တဖၣ်ကဘၣ် “မၤတၢ်ဖဲ ယွၤအိၣ်ဝဲဆိးဝဲ အဒဲစီဆှံအကျဲစၢၤထံး” န့ၣ်လီၤ. (၂ မိၤၡ့ ၃၈:၈, ခ့ခါစှီၤကျိာ်) ပှၤအံၣ်စရ့လးဖိတဖၣ် အိၣ်ဒီးတၢ်ရဲၣ်တၢ်ကျဲၤလၢ ကဘၣ်သုးဝဲအဒဲ ဒီးဒဲစီဆှံဒ်လဲၣ်ဒ်လဲၣ်အဂ့ၢ်န့ၣ်လီၤ. လၢခံ စီၤပၤဒၤဝံး ရဲၣ်လီၤကျဲၤလီၤဝဲ မူဒါလၢပှၤလုၢ်တၢ်အဒိၣ် ဒီးပှၤလ့ၤဝံဖိတဂၤစုာ်စုာ် ကဘၣ်မၤဝဲန့ၣ်လီၤ. (၁ ကွဲးနီၣ်တၢ် ၂၃:၁-၆; ၂၄:၁-၃) ဖဲပှၤအံၣ်စရ့လးဖိသ့ၣ်တဖၣ် ဒိကနၣ်ဝဲယဟိဝၤယွၤအကလုၢ်အခါ အဝဲသ့ၣ်ဒိးန့ၢ်ဘၣ်တၢ်ဆိၣ်ဂ့ၤန့ၣ်လီၤ. တကးဒံးဘၣ် ခီဖျိလၢအဝဲသ့ၣ်လူၤပိာ်ထွဲဝဲ ကစၢ်ယွၤအတၢ်ရဲၣ်တၢ်ကျဲၤအဃိ အဝဲသ့ၣ်အိၣ်ဒီးတၢ်မုာ်တၢ်ခုၣ် ဒီးတၢ်ဃူတၢ်ဖိးန့ၣ်လီၤ.—၅ မိၤၡ့ ၁၁:၂၆, ၂၇; ၂၈:၁-၁၄.
၉. လၢတၢယၤဖှိၣ်အစိၤန့ၣ် ခရံာ်ဖိတဖၣ် အိၣ်ဒီးတၢ်ရဲၣ်တၢ်ကျဲၤဒ်လဲၣ်.
၉ လၢတၢယၤဖှိၣ်အစိၤစ့ၢ်ကီး ခရံာ်ဖိတဖၣ် ရဲၣ်လီၤကျဲၤလီၤဝဲ အမူဒါဂ့ၤဂ့ၤဘၣ်ဘၣ်န့ၣ်လီၤ. အဝဲသ့ၣ်အိၣ်ဒီး ပှၤပၢဆှၢတၢ်ကမံးတံာ် လၢအမ့ၢ်ပှၤပိာ်ခွါတဖုလၢ ကဟံးစုနဲၣ်ကျဲ တၢ်အိၣ်ဖှိၣ်တဖၣ်န့ၣ်လီၤ. ပှၤပၢဆှၢတၢ်ကမံးတံာ်အဆိကတၢၢ်န့ၣ် ပၣ်ဃုာ်ထဲ တၢ်မၢဖိတဖၣ်လီၤ. လၢခံန့ၣ် ပှၤပၢဆှၢတၢ်ကမံးတံာ်န့ၣ် ပၣ်ဃုာ်ဒီး တၢ်အိၣ်ဖှိၣ်သးပှၢ်အဂၤတဖၣ်စ့ၢ်ကီးလီၤ. (မၤတၢ် ၆:၁-၆; ၁၅:၆) ယဟိဝၤယွၤ ဟံးစုနဲၣ်ကျဲဝဲ ပှၤပၢဆှၢတၢ်ကမံးတံာ် အပှၤဘၣ်မူဘၣ်ဒါတနီၤ ဒီးပှၤလၢအမၤသကိးတၢ်ဒီး အဝဲသ့ၣ်တဖၣ်လၢ ကကွဲးလံာ်ပရၢ ဒ်သိးကဟံးစုနဲၣ်ကျဲ ဒီးသိၣ်လိသီလိ တၢ်အိၣ်ဖှိၣ်တဖၣ်အဂီၢ်လီၤ. (၁ တံၤမသ့း ၃:၁-၁၃; တံတူး ၁:၅-၉) ခီဖျိလၢ တၢ်အိၣ်ဖှိၣ်တဖၣ် မၤပိာ်ထွဲဝဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲအဃိ အဝဲသ့ၣ်ဒိးန့ၢ်ဘၣ် တၢ်ဆိၣ်ဂ့ၤမနုၤလဲၣ်.
၁၀. လၢတၢယၤဖှိၣ်အစိၤ တၢ်အိၣ်ဖှိၣ်တဖၣ် လူၤပိာ်ထွဲဝဲပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲအဃိ ဒိးန့ၢ်ဘၣ်တၢ်ဆိၣ်ဂ့ၤဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၀ ဖး မၤတၢ် ၁၆:၄, ၅ တက့ၢ်. လၢတၢယၤဖှိၣ်အစိၤန့ၣ် ဒီပုၢ်ဝဲၢ်ခွါတနီၤ လဲၤဟးအိၣ်သကိးဝဲ တၢ်အိၣ်ဖှိၣ်တဖျၢၣ်ဘၣ်တဖျၢၣ် ဒ်သိးကတဲဘၣ်အဝဲသ့ၣ်လၢ “တၢ်သိၣ်တၢ်သီလၢ ပှၤတၢ်မၢဖိ ဒီးပှၤသူၣ်က့သးပှၢ်လၢ ယရူၤၡလ့ၣ် (ပှၤပၢဆှၢတၢ်ကမံးတံာ်) . . . ဟ့ၣ်လီၤဝဲဒ်သိး အကတိၢ်န့ၢ်ဖံးဃာ်” ဝဲလီၤ. ခီဖျိလၢ တၢ်အိၣ်ဖှိၣ်တဖၣ် လူၤပိာ်ထွဲဝဲတၢ်ဟံးစုနဲၣ်ကျဲအံၤအဃိ အဝဲသ့ၣ် “ဂၢၢ်ထီၣ်ကျၢၤထီၣ်လၢ တၢ်စူၢ်တၢ်နာ်အပူၤ ဒီးအါထီၣ်ဂီၢ်ထီၣ် ကိးမုၢ်နံၤမုၢ်နၤဒဲးလီၤ.” ပဝဲဒၣ်သ့ၣ်တဖၣ် ပဟံးန့ၢ်တၢ်မၤလိလၢ အဝဲသ့ၣ်အအိၣ်ကသ့ဒ်လဲၣ်.
မ့ၢ်နလူၤပိာ်ထွဲ တၢ်ဟံးစုနဲၣ်ကျဲစ့ၢ်ကီးဧါ
၁၁. ဖဲတၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ် အပှၤမၤစၢၤတၢ်တဖၣ် ဒိးန့ၢ်ဘၣ်ဝဲတၢ်ဟံးစုနဲၣ်ကျဲလၢ တၢ်ကရၢကရိအအိၣ်အခါ အဝဲသ့ၣ်ကြၢးမၤဝဲဒ်လဲၣ်.
၁၁ ဝဲၤတြၢ်ကမံးတံာ်, ကဝီၤအပှၤကွၢ်တၢ် ဒီးတၢ်အိၣ်ဖှိၣ်သးပှၢ်တဖၣ်န့ၣ် ကဘၣ်ဒိကနၣ်ဝဲ ယွၤအတၢ်ကရၢကရိ အတၢ်ဟံးစုနဲၣ်ကျဲစ့ၢ်ကီးလီၤ. လံာ်စီဆှံ ပာ်ဖျါထီၣ်ဝဲလၢ ပကဘၣ်ဒိကနၣ် ပှၤလၢအတီခိၣ်ရိၤမဲတၢ်တဖၣ်န့ၣ်လီၤ. (၅ မိၤၡ့ ၃၀:၁၆; ဧ့ၤဘြံၤ ၁၃:၇, ၁၇) ပှၤလၢအသးတီ ဒီးယဟိဝၤယွၤန့ၣ် ဖဲအဝဲသ့ၣ်ဒိးန့ၢ်ဘၣ် တၢ်ဟံးစုနဲၣ်ကျဲအခါ တထီဒါဒီး တကဒူးကဒ့ၣ်တၢ်ဘၣ် ပတအဲၣ်ဒိးလီၤဂာ်ဒီး စီၤဒံအိၤတြ့ၤဖံလၢ အတယူးယီၣ်ပာ်ကဲဝဲ ပှၤလၢတီခိၣ်ရိၤမဲတၢ်တဖၣ်န့ၣ်ဘၣ်. (ဖး ၃ ယိၤဟၣ် ၉, ၁၀ တက့ၢ်.) ပမ့ၢ်ဒိကနၣ်တၢ်ဟံးစုနဲၣ်ကျဲန့ၣ် ပကဒုးအိၣ်ထီၣ်တၢ်မုာ်တၢ်ခုၣ် ဒီးတၢ်ဃူတၢ်ဖိးလၢ တၢ်အိၣ်ဖှိၣ်အပူၤန့ၣ်လီၤ. ပကြၢးသံကွၢ်လီၤပသးလၢ ‘မ့ၢ်ယဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် ဒ်သိးကတီဒီးယဟိဝၤယွၤစ့ၢ်ကီးဧါ. ယွၤအတၢ်ကရၢကရိ အတၢ်ဟံးစုနဲၣ်ကျဲတဖၣ်န့ၣ် မ့ၢ်ယဒိကနၣ်အီၤတဘျီဃီဧါ.’
၁၂. တၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ်အပှၤမၤစၢၤတၢ် ဘၣ်တၢ်ပာ်ထီၣ်အီၤဒ်လဲၣ်.
၁၂ ဖဲအပူၤကွံာ်တယံာ်ဒံးဘၣ်န့ၣ် ပှၤပၢဆှၢတၢ်ကမံးတံာ် ဆီတလဲဝဲ တၢ်ရဲၣ်တၢ်ကျဲၤ ဘၣ်ဃးဒီး တၢ်ပာ်ထီၣ်တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ်လီၤ. ဒီးတၢ်ဂ့ၢ်အံၤ အိၣ်လၢ “ပှၤဖးလံာ်ဖိတဖၣ် အတၢ်သံကွၢ်” လၢ Watch Tower of November 15, 2014 အပူၤန့ၣ်လီၤ. လံာ်အံၤပာ်ဖျါထီၣ်ဝဲ လၢတၢယၤဖှိၣ်အစိၤန့ၣ် ပှၤပၢဆှၢတၢ်ကမံးတံာ် ဟ့ၣ်အခွဲးလၢကဝီၤအပှၤကွၢ်တၢ် ကပာ်ထီၣ်ဝဲ တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ်လီၤ. စးထီၣ်ဖဲ ၂၀၁၄ လါစဲးပတ့ဘၢၣ်န့ၣ် ကဝီၤအပှၤကွၢ်တၢ်တဖၣ် န့ၢ်ဘၣ်မူဒါလၢ အကပာ်ထီၣ်တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ်လီၤ. ဖဲတၢ်အိၣ်ဖှိၣ်သးပှၢ်တဖၣ် အဲၣ်ဒိးပာ်ထီၣ်ဒီပုၢ်ဝဲၢ်ခွါတဖၣ်လၢ တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ်အခါ ကဝီၤအပှၤကွၢ်တၢ်န့ၣ် ဂုာ်ကျဲးစၢးရ့ဒီး ဒီပုၢ်ဝဲၢ်ခွါအံၤ ဒီးဃုသ့ၣ်ညါအါထီၣ်ဝဲအဂ့ၢ် ဒီးအဟံၣ်ဖိဃီဖိအဂ့ၢ်န့ၣ်လီၤ. အဒိ အဝဲကမၤသကိးတၢ်ဒီး ဒီပုၢ်ဝဲၢ်အံၤလၢ တၢ်စံၣ်တဲၤတဲလီၤတၢ်မၤအပူၤန့ၣ်လီၤ. (၁ တံၤမသ့း ၃:၄, ၅) လၢခံ ကဝီၤအပှၤကွၢ်တၢ် ဒီးတၢ်အိၣ်ဖှိၣ်သးပှၢ်တဖၣ် ကတဲသကိးဝဲဘၣ်ဃး ဒီပုၢ်ဝဲၢ်တဂၤအံၤအဂ့ၢ်န့ၣ်လီၤ. ဖဲန့ၣ်အခါ အဝဲသ့ၣ်ကကွၢ်သကိး လံာ်စီဆှံအတၢ်ဘျၢလၢ တၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ်အပှၤမၤစၢၤတၢ်အဂီၢ် ဒီးတဲသကိးဝဲ လၢဒီပုၢ်ဝဲၢ်အံၤ တုၤထီၣ်ထီၣ်ဘးလၢ အကကဲထီၣ် တၢ်အိၣ်ဖှိၣ်သးပှၢ် မ့ၢ်တမ့ၢ် တၢ်အိၣ်ဖှိၣ်အပှၤမၤစၢၤတၢ်န့ၣ်လီၤ.—၁ တံၤမသ့း ၃:၁-၁၀, ၁၂, ၁၃; ၁ ပ့းတရူး ၅:၁-၃.
၁၃. ပဒိကနၣ် တၢ်အိၣ်ဖှိၣ်သးပှၢ်တဖၣ် အတၢ်ဟံးစုနဲၣ်ကျဲန့ၣ် ပပာ်ဖျါထီၣ်သ့လၢကျဲဒ်လဲၣ်.
၁၃ တၢ်အိၣ်ဖှိၣ်သးပှၢ်တဖၣ် အဲၣ်ဒိးဒီသဒၢ ဒီးကဟုကယာ် တၢ်အိၣ်ဖှိၣ်ဖိတဖၣ်အဃိ အဝဲသ့ၣ်ဟ့ၣ်ဝဲ တၢ်ဟံးစုနဲၣ်ကျဲလၢ လံာ်စီဆှံအပူၤလီၤ. ပကဘၣ်မၤသကိးတၢ် ဒီးအဝဲသ့ၣ်မ့ၢ်လၢ တၢ်ဟံးစုနဲၣ်ကျဲတဖၣ်အံၤ ကကဲဘျုးကဲဖှိၣ်လၢပဂီၢ်လီၤ. (၁ တံၤမသ့း ၆:၃) လၢတၢယၤဖှိၣ်အစိၤ ပှၤတနီၤနီၤန့ၣ် “လဲၤတၢ်တဂ့ၤတဘၣ်ဘၣ်” အဝဲသ့ၣ် တမၤတၢ်မၤနီတမံၤဘၣ်ဒီး မၤဘၣ်ဃးအသးဒီးတၢ်ဂ့ၢ်လၢ အတဘၣ်ဃးဒီးအဝဲသ့ၣ်ဘၣ်အဃိ တၢ်အိၣ်ဖှိၣ်သးပှၢ်တဖၣ် သိၣ်အဝဲသ့ၣ်ဘၣ်ဆၣ် အတအဲၣ်ဒိးဘှီလီၤက့ၤအသးဘၣ်. စီၤပီလူးဟ့ၣ်ပလီၢ် ဒီပုၢ်ဝဲၢ်သ့ၣ်တဖၣ် လၢကဘၣ်ရ့ဒီးအဝဲသ့ၣ်ဒ်အံၤလီၤ. စီၤပီလူးတဲဝဲလၢ “ပှၤမ့ၢ်တစူၢ်ဘၣ်ပကလုၢ် လၢလံာ်အပူၤအံၤတဂၤဂၤဒီး, တိၢ်နီၣ်အီၤ, ဒီးဒ်သိးအကမဲာ်ဆှးဒီး, သုတရ့လိာ်ဒီးအီၤတဂ့ၤ.” ပှၤတဘၣ်ရ့ဒီးအီၤ ဒ်ဒုၣ်ဒါအသိးဘၣ်. ဆဲးရ့ဒီးအီၤလၢဘၣ်ဃးဒီး နီၢ်သးတၢ်ဖံးတၢ်မၤအပူၤသ့ ဘၣ်ဆၣ်ကဘၣ်ပာ်ပတုာ်ဝဲ တၢ်ရ့လိာ်မုာ်လိာ် ဒီးအီၤလၢအဂၤတဖၣ်လီၤ. (၂ သ့းစၤလနံ ၃:၁၁-၁၅) အဒိ မုၢ်မဆါတနံၤအံၤ တၢ်အိၣ်ဖှိၣ်သးပှၢ်သ့ၣ်တဖၣ် ဂုာ်ကျဲးစၢးမၤစၢၤ ဒီပုၢ်ဝဲၢ်လၢအတဒိကနၣ်ကစၢ်ယွၤ အတၢ်သိၣ်တၢ်သီတဖၣ်န့ၣ်လီၤ. အဒိ ဒ်သိးဒီး တၢ်ပာ်တၢ်အဲၣ်တီဒီး ပှၤတၢ်ချၢန့ၣ်လီၤ. (၁ ကရံၣ်သူး ၇:၃၉) ပှၤလၢအတအဲၣ်ဒိး ဆီတလဲအသးတဖၣ်န့ၣ် တၢ်အိၣ်ဖှိၣ်သးပှၢ်တဂၤဂၤ ကဟ့ၣ်တၢ်စံၣ်တဲၤလီၤတၢ်လၢ တၢ်အိၣ်ဖှိၣ်အပူၤဒီး ကတဲနၢ်ပၢၢ်ဝဲလၢ တၢ်သကဲာ်ပဝး သ့ၣ်တဖၣ်အံၤအဃိ တၢ်အိၣ်ဖှိၣ်အမံၤဘၣ်ဒိဝဲ သ့အဂ့ၢ်လီၤ. တၢ်အိၣ်ဖှိၣ်သးပှၢ် မ့ၢ်ဟ့ၣ်တၢ်စံၣ်တဲၤတဲလီၤတၢ်လၢ နတၢ်အိၣ်ဖှိၣ်အပူၤဒ်အံၤန့ၣ် နကမၤဒ်လဲၣ်. မ့တမ့ၢ်ဘၣ်ဃးဒီး နီၢ်သးတၢ်ဖံးတၢ်မၤန့ၣ် မ့ၢ်နကဟးဆှဲး တၢ်ရ့လိာ်မုာ်လိာ်ဒီးအီၤဧါ. နမ့ၢ်မၤဒ်အံၤန့ၣ် အဝဲကသ့ၣ်ညါလီၤက့ၤအသးလၢ အတၢ်သကဲာ်ပဝးတဂ့ၤဘၣ် ဒီးအတၢ်မၤန့ၣ် တဘၣ်ယဟိဝၤယွၤ အသးဘၣ်အဃိ ဘၣ်သ့ၣ်သ့ၣ် အကဆီတလဲအသးန့ၣ်လီၤ. [၁]—ကွၢ် တၢ်ဂ့ၢ်လၢ တၢ်မၤလိအကတၢၢ်တက့ၢ်.
မ်တၢ်အိၣ်ဖှိၣ်စီဆှံဝဲ, အိၣ်ဒီးတၢ်ဃူတၢ်ဖိးဒီး တၢ်မုာ်တၢ်ခုၣ်တက့ၢ်
၁၄. ဒ်သိးတၢ်အိၣ်ဖှိၣ်ကစီဆှံအဂီၢ် နမၤစၢၤကသ့ဒ်လဲၣ်.
၁၄ လံာ်စီဆှံစံးဝဲလၢ ပဝဲကိးဂၤဒဲးပကြၢးဂုာ်ကျဲးစၢးဒ်သိး တၢ်အၢတၢ်သီသုတအိၣ်လၢ တၢ်အိၣ်ဖှိၣ်ပူၤတဂ့ၤအဂီၢ်လီၤ. ပကကွၢ်သကိး လၢကရံၣ်သူးတၢ်အိၣ်ဖှိၣ်အပူၤန့ၣ် တၢ်မနုၤကဲထီၣ်အသးလဲၣ်. စီၤပီလူးအဲၣ်ဝဲ ဒီပုၢ်ဝဲၢ်လၢအအိၣ်ဖဲန့ၣ်တဖၣ်လီၤ. စီၤပီလူးမၤစၢၤဘၣ်အဝဲသ့ၣ်အါဂၤ ဒ်သိးကန့ၢ်ဘၣ်တၢ်မ့ၢ်တၢ်တီအဂီၢ်လီၤ. (၁ ကရံၣ်သူး ၁:၁, ၂) ဆိကမိၣ်ကွၢ်လၢ ဖဲဒီပုၢ်ဝဲၢ်တဂၤ ဆဲးမၤကမၣ်မုၣ်ကမၣ်ခွါ ဘၣ်ဆၣ်ပှၤတဟီထီၣ်ကွံာ်အီၤလၢ တၢ်အိၣ်ဖှိၣ်ပူၤဘၣ်အခါ စီၤပီလူး ကတူၢ်ဘၣ်ဝဲဒ်လဲၣ်န့ၣ်တက့ၢ်. စီၤပီလူးမၢ တၢ်အိၣ်ဖှိၣ်သးပှၢ် “ဟ့ၣ်လီၤကွံာ်ပှၤ ဒ်န့ၣ်အသိးဆူမုၣ်ကီၤလံၢ်အစုပူၤ” န့ၣ်လီၤ. အဝဲသ့ၣ်ကဘၣ်ဟီထီၣ်ကွံာ် ပှၤတဂၤအံၤလၢ တၢ်အိၣ်ဖှိၣ်အပူၤန့ၣ်လီၤ. (၁ ကရံၣ်သူး ၅:၁, ၅, ၇, ၁၂) မုၢ်မဆါတနံၤအံၤ, ပှၤလၢအမၤဘၣ်တၢ်ကမၣ်ဖးဒိၣ်ဒီး တပီၢ်ယၢ်လီၤအသးဘၣ်န့ၣ် တၢ်အိၣ်ဖှိၣ်သးပှၢ်တဖၣ် ကဆၢတဲာ်ဝဲလၢ ကဟီထီၣ်ကွံာ်အီၤလၢ တၢ်အိၣ်ဖှိၣ်အပူၤလီၤ. ဖဲန့ၣ်အဆၢကတီၢ် မ့ၢ်ပကရ့ဒီး ပှၤလၢဘၣ်တၢ်ဟီထီၣ်အီၤတဖၣ် ဒ်လံာ်စီဆှံ အတၢ်ဟံးစုနဲၣ်ကျဲအသိးဧါ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပဂုာ်ကျဲးစၢး ပာ်စီဆှံတၢ်အိၣ်ဖှိၣ်န့ၣ်လီၤ. ဒီးအဝဲသ့ၣ် ကသ့ၣ်ညါထီၣ်ဝဲလၢ အကဘၣ်ပီၢ်ယၢ်လီၤအသးဒီး ဃ့ပျၢ်တၢ်ကမၣ်လၢ ယဟိဝၤယွၤအအိၣ်လီၤ.
၁၅. ပဒုးအိၣ်ထီၣ် တၢ်ဃူတၢ်ဖိးလၢ တၢ်အိၣ်ဖှိၣ်အပူၤကသ့ဒ်လဲၣ်.
၁၅ တၢ်ကီတၢ်ခဲ အဂၤတခါကဲထီၣ်အသးလၢ ကရံၣ်သူးတၢ်အိၣ်ဖှိၣ်အပူၤန့ၣ်လီၤ. လၢတၢ်အိၣ်ဖှိၣ်အပူၤန့ၣ် ဒီပုၢ်ဝဲၢ်ကဒဲကဒဲဒၣ်လဲာ် ပာ်ဒ့ၣ်ပာ်ကမၣ်လိာ်အသး ဒီးကိးထီၣ်လိာ်အသးလၢရူန့ၣ်လီၤ. စီၤပီလူးတဲအဝဲသ့ၣ်လၢ “ဘၣ်မနုၤလၢ သုတဒိးဘၣ် တၢ်မၤသုတတီတလိၤဘၣ်လဲၣ်.” (၁ ကရံၣ်သူး ၆:၁-၈) မုၢ်မဆါတနံၤအံၤ ဒီပုၢ်ဝဲၢ်တနီၤနီၤမၤသကိးဝဲတၢ်မၤ ဘၣ်ဆၣ်အဝဲသ့ၣ် အစ့ၡူ မ့တမ့ၢ် ဒီပုၢ်ဝဲၢ်တဂၤကဆိကမိၣ်ဝဲလၢ ဒီပုၢ်ဝဲၢ်အဂၤတဂၤ လံၣ်အီၣ်လီအီၣ်အီၤအဃိ ကိးထီၣ်လိာ်အသးလၢရူလီၤ. ဘၣ်ဆၣ်တၢ်မ့ၢ်ကဲထီၣ်အသးဒ်အံၤန့ၣ် ဘၣ်ဒိယဟိဝၤယွၤဒီး တၢ်အိၣ်ဖှိၣ်အမံၤသ့ဝဲလီၤ. တကးဒံးဘၣ် ကဲထီၣ်တၢ်သဘံၣ်သဘုၣ်လၢ တၢ်အိၣ်ဖှိၣ်အပူၤသ့စ့ၢ်ကီးလီၤ. ယွၤအကလုၢ်ကထါအံၤ ကမၤစၢၤပှၤလၢ ပကအိၣ်ဃူအိၣ်ဖိးဒီး ပဒီပုၢ်ဝဲၢ်တဖၣ်အဂီၢ်လီၤ. ဒ်သိးပအိၣ်ဃူအိၣ်ဖိးကသ့အဂီၢ် ဘၣ်သ့ၣ်သ့ၣ် ပကဘၣ်တူၢ်ၡူပကျိၣ်ပစ့လီၤ. [၂] (ကွၢ်တၢ်ဂ့ၢ်လၢ တၢ်မၤလိအကတၢၢ်တက့ၢ်.) ပကဘၣ်သုးကျဲၤ တၢ်တဘၣ်လိာ်ဖိးဒ့ ဒီးတၢ်ဂ့ၢ်ကီတဖၣ်ဒ်လဲၣ်န့ၣ် ယ့ၣ်ၡူးသိၣ်လိပှၤလီၤ. (ဖး မးသဲ ၅:၂၃, ၂၄; ၁၈:၁၅-၁၇ တက့ၢ်.) ဖဲပဒိကနၣ် အတၢ်ဟံးစုနဲၣ်ကျဲပှၤအခါ ပဒုးအိၣ်ထီၣ် တၢ်ဃူတၢ်ဖိးဒီး တၢ်မုာ်တၢ်ခုၣ် လၢတၢ်အိၣ်ဖှိၣ်ပူၤလီၤ.
၁၆. ဘၣ်မနုၤအဃိ ယွၤအခ့အပှၤတဖၣ် အိၣ်ဃူဃူဖိးဖိးလဲၣ်.
၁၆ ယွၤအကလုၢ်ကထါ လံာ်စီဆှံတဲဝဲလၢ– “ဒီပုၢ်ဝဲၢ်အိၣ်ဝဲဆိးဝဲ လၢအသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ် ဆံးဒိၣ်လဲၣ်န့ၣ် ကွၢ်ကွၢ်တက့ၢ်” (စံးထီၣ်ပတြၢၤ ၁၃၃:၁) ဖဲပှၤအံၣ်စရ့လးဖိတဖၣ်ဒိကနၣ် ယဟိဝၤယွၤအကလုၢ်အခါ အဝဲသ့ၣ်အိၣ်ဒီး တၢ်ဃူတၢ်ဖိးဒီး တၢ်မုာ်တၢ်ခုၣ်လီၤ. ဘၣ်ဃးဒီး အခ့အပှၤတဖၣ်န့ၣ် ယဟိဝၤယွၤတဲဆိပာ်ဝဲလၢ– “ယကပာ်အီၤတပူၤဃီဒ် ဘိးစရၤအသိအသိးန့ၣ်” လီၤ. (မံကၤ ၂:၁၂) အဝဲတဲပာ်စ့ၢ်ကီးဝဲလၢ အခ့အပှၤတဖၣ် ကမၤလိန့ၢ်တၢ်မ့ၢ်တၢ်တီလၢ လံာ်စီဆှံပူၤ ဒီးကမၤအတၢ်မၤ ဃူဃူဖိးဖိးလီၤ. အဝဲတဲဝဲလၢ– “ယကဟ့ၣ် ပှၤကလုာ်တဖၣ် လၢအကတိၤတၢ်အကျိာ်စီ ဒ်သိးအကကိးထီၣ်ယွၤအမံၤ, ဒီးဒ်သိးအကမၤ အတၢ်လၢအသးတဖျၢၣ်ဃီလီၤ.” (စဖါနယၤ ၃:၉) ပဘူၣ်ထီၣ်ဘါထီၣ်ဘၣ် ယဟိဝၤယွၤဃူဃူဖိးဖိးအဃိ လီၤသူၣ်ခုသးခုဒိၣ်မးလီၤ.
တၢ်အိၣ်ဖှိၣ်သးပှၢ်တဖၣ် မၤစၢၤဝဲ ပှၤလၢအ “မၤကမၣ်တၢ်” တဂၤ (ကွၢ်လံာ်အဆၢ ၁၇)
၁၇. ဖဲပှၤလၢတၢ်အိၣ်ဖှိၣ်ပူၤတဂၤ မ့ၢ်မၤဘၣ်တၢ်ကမၣ်ဖးဒိၣ်အခါ တၢ်အိၣ်ဖှိၣ်သးပှၢ်တဖၣ်ကြၢးမၤဝဲဒ်လဲၣ်.
၁၇ ပှၤတဂၤဂၤ မ့ၢ်မၤဘၣ်တၢ်ကမၣ်ဖးဒိၣ်တမံၤမံၤန့ၣ် တၢ်အိၣ်ဖှိၣ်သးပှၢ်ဘၣ် သိၣ်က့ၤသီက့ၤအီၤလၢအဆိအချ့ လၢတၢ်အဲၣ်တၢ်ကွံအပူၤလီၤ. တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ ယဟိဝၤယွၤအဲၣ်ဒိးလၢ အဝဲသ့ၣ်ကဒီသဒၢတၢ်အိၣ်ဖှိၣ် ဒ်သိးတၢ်ဘၣ်အၢဘၣ်သီ သုတအိၣ်တဂ့ၤ ဒီးတၢ်အိၣ်ဖှိၣ် ကစီဆှံဒီး ကအိၣ်ဃူအိၣ်ဖိးအဂီၢ်လီၤ. (ကတိၤဒိ ၁၅:၃) ဖဲပဖးဘၣ် လံာ်ပရၢအဆိကတၢၢ်လၢ စီၤပီလူးကွဲးဝဲလၢ ကရံၣ်သူး တၢ်အိၣ်ဖှိၣ်အိၣ်အခါ ပသ့ၣ်ညါဘၣ်လၢ အဝဲအဲၣ်ဒီပုၢ်ဝဲၢ်တဖၣ်ဒီး အလီၢ်မ့ၢ်အိၣ်န့ၣ် အဝဲသိၣ်က့ၤသီက့ၤဝဲလီၤ. ပသ့ၣ်ညါဘၣ်လၢ တၢ်အိၣ်ဖှိၣ်သးပှၢ် ဖဲန့ၣ်တဖၣ်န့ၣ် မၤဝဲဒ် စီၤပီလူးအတၢ်ဟံးစုနဲၣ်ကျဲအသိး လၢအဆိအချ့လီၤ. ပတဲဒ်န့ၣ်သ့ခီဖျိ စီၤပီလူးကွဲး လံာ်ပရၢဆူ အဝဲသ့ၣ်အအိၣ်ဝံၤ လၢခံအလါတဖၣ်အလါပူၤကွံာ်အလီၢ်ခံ စီၤပီလူးကွဲးလီၤကဒီးလံာ်ပရၢဒီး စံးပတြၢၤအဝဲသ့ၣ်လီၤ. တချုးဖဲ ဒီပုၢ်ဝဲၢ်တဂၤ “မၤကမၣ်တၢ်တမံၤမံၤ” ဒံးဘၣ်န့ၣ် တၢ်အိၣ်ဖှိၣ်သးပှၢ် ကဘၣ်မၤစၢၤအဝဲသ့ၣ် လၢတၢ်အဲၣ်တၢ်ကွံအပူၤ လၢအဆိအချ့လီၤ.—ကလၤတံ ၆:၁, ခ့ခါစှီၤကျိာ်.
၁၈. (က) ယွၤအကလုၢ်ကထါမၤစၢၤပှၤခရံာ်ဖိလၢ တၢယၤဖှိၣ်အစိၤတဖၣ်ဒ်လဲၣ်. (ခ) လၢခံတနွံန့ၣ် ပကမၤလိသကိးတၢ်ဂ့ၢ်မနုၤလဲၣ်.
၁၈ ပသ့ၣ်ညါဘၣ်လီၤတံၢ်လီၤဆဲးလၢ တၢယၤဖှိၣ်အစိၤန့ၣ် ဖဲခရံာ်ဖိသ့ၣ်တဖၣ် မၤပိာ်ထွဲယွၤအတၢ်ဟံးစုနဲၣ်ကျဲလၢ လံာ်စီဆှံပူၤအခါ အဝဲသ့ၣ်အတၢ်အိၣ်ဖှိၣ်န့ၣ် စီဆှံ, ပှဲၤဒီးတၢ်မုာ်တၢ်ခုၣ်ဒီး အိၣ်ဒီးတၢ်ဃူတၢ်ဖိးလီၤ. (၁ ကရံၣ်သူး ၁:၁၀; အ့းဖ့းစူး ၄:၁၁-၁၃; ၁ ပ့းတရူး ၃:၈) မ့ၢ်လၢအဝဲသ့ၣ်မၤဝဲဒ်န့ၣ်အဃိ လဲၤစံၣ်တဲၤတဲလီၤဘၣ်တၢ်သးခုကစီၣ်လၢ “ကယဲၢ်ပှၤဘၣ်တ့အသးလၢမူခိၣ်အဖီလာ်န့ၣ်” လီၤ. (ကလီးစဲ ၁:၂၃) မုၢ်မဆါတနံၤအံၤစ့ၢ်ကီး ယဟိဝၤ အပှၤဂီၢ်မုၢ်တဖၣ်န့ၣ် အိၣ်ဒီးတၢ်မုာ်တၢ်ခုၣ်, တၢ်ဃူတၢ်ဖိး, ဒီးအဝဲသ့ၣ် စံၣ်တဲၤတဲလီၤတၢ်သးခုကစီၣ်လၢ ဟီၣ်ခိၣ်ဒီဘ့ၣ်လီၤ. တၢ်မၤလိလၢခံတခါန့ၣ် ကပာ်ဖျါထီၣ်န့ၢ်ပှၤဘၣ်ဃး အဝဲသ့ၣ်သူၣ်ဆူၣ်သးဆူၣ်လၢ ကမၤလၤကပီၤ ယဟိဝၤယွၤဒီး ကဒိကနၣ် အတၢ်ဟံးစုနဲၣ်ကျဲလၢ လံာ်စီဆှံအပူၤအဂ့ၢ်န့ၣ်လီၤ.—စံးထီၣ်ပတြၢၤ ၇၁:၁၅, ၁၆.
^ [၁] (လံာ်အဆၢ ၁၃) ကွၢ် Organized to Do Jehovah’s Will, pages 134-136 တက့ၢ်.
^ [၂] (လံာ်အဆၢ ၁၅) တၢ်ဂ့ၢ်ဘၣ်ဃးဒီး တၢ်အိၣ်အသးလၢ ခရံာ်ဖိကဒဲကဒဲ ကိးထီၣ်လိာ်အသးလၢရူသ့န့ၣ် ကွၢ်ဖဲ “အိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံပူၤတက့ၢ်,” လံာ်ကဘျံပၤ ၂၂၃, တၢ်ဂ့ၢ်အဘျဲၣ်အပူၤတက့ၢ်.
