တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ်
ဖဲပှၤလၢပအဲၣ်ဘၣ်အီၤတဂၤ သံအခါ
“ကစၢ်ယွၤသ့ၣ်ညါ တၢ်ခဲလၢာ်လီၤ. . . ဘံၣ်ဘံၣ်ဧၢ. . . တဘၣ်ဟီၣ်တဂ့ၤ.”
တၢ်ကတိၤအံၤ ဘၣ်တၢ်တဲကသွံအီၤလၢ ဘံၣ်ဘံၣ်အနၢ်ပူၤ ဖဲတချုး ပှၤခူၣ်လီၤအပၢ်အဆၢကတီၢ်န့ၣ်လီၤ. မ့ၢ်လၢအပၢ်သံ ဖဲကါဘၣ်ထံးလိာ်အသးအခါန့ၣ်လီၤ.
ဘံၣ်ဘံၣ် အဲၣ်အပၢ်ဒိၣ်မးလီၤ. ဖဲအသကိးမုၣ်တဂၤ ဟ့ၣ်ဂံၢ်ဟ့ၣ်ဘါအီၤ ဒ်လၢထးအံၤအသိးအခါ အဝဲတဒိးန့ၢ်ဘၣ် တၢ်သူၣ်မံသးမုာ်ဘၣ်. လၢတၢ်န့ၣ်အလီၢ် အသးဘၣ်ဒိဝဲလီၤ. အဝဲတဲလီၤက့ၤအသး အဘျီတဖၣ်အဘျီလၢ “ယပါအံၤတကြၢးသံဒံးဘၣ်.” နံၣ်တဖၣ်လဲၤပူၤကွံာ်ဝဲလံ ဘၣ်ဆၣ် ဖဲအဝဲဖးဘၣ် တၢ်ဂ့ၢ်တၢ်ကျိၤဘၣ်ဃးဒီး တၢ်သံအခါ အသးအုးဒံးဝဲလီၤ.
ဘံၣ်ဘံၣ် သ့ၣ်ညါဘၣ်ဝဲလၢ ဖဲပှၤလၢပအဲၣ်ဘၣ်အီၤတဂၤ သံအခါန့ၣ် ပတၢ်သးအုး တလီၤမၢ်ကွံာ်ဝဲညီညီဘၣ်, လီၤဆီဒၣ်တၢ် ပှၤလၢပအဲၣ်အီၤဒိၣ်တဂၤ မ့ၢ်သံဝဲအဆၢကတီၢ်န့ၣ်လီၤ. လၢလံာ်စီဆှံအပူၤ တၢ်သံန့ၣ် ဘၣ်တၢ်ပာ်ဖျါထီၣ်အီၤဒ်အမ့ၢ် “ဒုၣ်ဒါလၢအကဘၣ်တၢ်ဟးဂီၤလၢခံကတၢၢ်” န့ၣ်လီၤ. (၁ ကရံၣ်သူး ၁၅:၂၆) ပှၤလၢပအဲၣ်ဘၣ်အီၤတဂၤသံဝဲ သတူၢ်ကလာ်သ့ဝဲဒီး မ့ၢ်တၢ်လၢပှၤမၤပတုာ်အီၤတသ့ဘၣ်လီၤ. ဖဲပတပလီၢ်ပသးအခါ တၢ်သံအံၤဟံးန့ၢ်ကွံာ်ဝဲ ပှၤလၢပအဲၣ်ဘၣ်အီၤတဖၣ်န့ၣ်လီၤ. ပဝဲသ့ၣ်တဖၣ် ပဃ့ၢ်ပူၤဖျဲးပသးလၢ တၢ်သံအံၤတသ့နီတဂၤဘၣ်. လၢတၢ်န့ၣ်အဃိ ပမ့ၢ်တူၢ်ဘၣ် တၢ်သူၣ်အုးသးအုး ယံာ်ယံာ်သနာ်က့ တမ့ၢ်တၢ်လၢအလီၤကမၢကမၣ်ဘၣ်.
ဘၣ်သ့ၣ်သ့ၣ် ပကဆိကမိၣ်ဘၣ်လၢ– ‘ပှၤလၢပအဲၣ်ဘၣ်အီၤတဂၤ မ့ၢ်သံဝဲန့ၣ်ပကတူၢ်ဘၣ် တၢ်သူၣ်အုးသးအုး ယံာ်ထဲလဲၣ်. ပလဲၤခီဖျိ ပတၢ်သူၣ်အုးသးအုးကသ့ဒ်လဲၣ်. ပမၤမုာ်ထီၣ်က့ၤ ပှၤလၢအသူၣ်အုးသးအုး ကသ့ဒ်လဲၣ်. ပှၤလၢပအဲၣ်ဘၣ်အီၤတဂၤ မ့ၢ်သံန့ၣ် တၢ်မုၢ်လၢ်လၢ အဂီၢ်ကအိၣ်ဒံးဧါ.
