အိၣ်ဒီးတၢ်ကီၤသူၣ်ကီၤသးတက့ၢ်
“မ့မ့ၢ်သးအတၤသၣ်န့ၣ်, မ့ၢ် . . . တၢ်ကီၤသူၣ်ကီၤသး” လီၤ. —ကလၤတံ ၅:၂၂, ၂၃.
၁, ၂. (က) တၢ်ကီၤသူၣ်ကီၤသး မ့ၢ်တအိၣ်ဘၣ်န့ၣ် တၢ်မနုၤကဲထီၣ်အသးသ့လဲၣ်. (ခ) ဘၣ်မနုၤအဃိ ပကဘၣ်တဲသကိး တၢ်ကီၤသူၣ်ကီၤသးအဂ့ၢ်လဲၣ်.
ဒ်သိးပကအိၣ်ဒီး တၢ်ကီၤသူၣ်ကီၤသးအဂီၢ် ယဟိဝၤယွၤမၤစၢၤပှၤသ့လီၤ. (ကလၤတံ ၅:၂၂, ၂၃) ပဝဲဒၣ်သ့ၣ်တဖၣ် ပတလၢတပှဲၤဘၣ်အဃိ ပအိၣ်ဒီးတၢ်ကီၤသူၣ်ကီၤသး ထဲသိးဒီးယဟိဝၤယွၤ တသ့ဘၣ်. မုၢ်မဆါတနံၤအံၤ ပှၤအါဂၤန့ၣ် မ့ၢ်လၢအတၢ်ကီၤသူၣ်ကီၤသးတအိၣ်ဘၣ်အဃိ ထံၣ်ဘၣ်ဝဲတၢ်ကီတၢ်ခဲအါမးလီၤ. ခီဖျိလၢတၢ်ကီၤသူၣ်ကီၤသး တအိၣ်ဘၣ်အဃိ ပှၤတနီၤနီၤန့ၣ် ဘၣ်မၤတၢ်ဂ့ၢ်လၢ အရ့ဒိၣ်သနာ်က့ မၤလၢာ်ဂီၤတၢ်ဆၢကတီၢ်လၢ တၢ်ဂ့ၢ်အဂၤလီၤ. မၤတၢ်မၤတတုၤလီၤတီၤလီၤလၢၤဘၣ် ဒီးတနီၤန့ၣ်ထီၣ်ကၠိဒီး လူၤလံာ်တချုးဘၣ်. တကးဒံးဘၣ် ပှၤတနီၤနီၤန့ၣ် တပၢၤအသးဘၣ်အဃိ အဝဲသ့ၣ်ကတဲဆါဘၣ်ပှၤဂၤ, ကအီမူၤသံး, ကမၤဒၢၣ်မၤဆါဘၣ်ပှၤဂၤ, အဟံၣ်ဖိဃီဖိကလီၤမုၢ်လီၤဖး, အကမၢ်ကထီၣ်, ကသူကသံၣ်မူၤဘှီး, ကလီၤဘၣ်လၢဃိာ်ပူၤ, အသူၣ်ကဘၣ်ဒိသးကဘၣ်ဒိ, ဒိးန့ၢ်ဘၣ်တၢ်ဆူးတၢ်ဆါ ခီဖျိတၢ်မံဃုာ်အိၣ်ဃုာ်ဒီးပှၤဂၤ ဒီးကဒၢထီၣ်အဖိလၢ တသးလီဝဲဘၣ်န့ၣ်လီၤ.—စံးထီၣ်ပတြၢၤ ၃၄:၁၁-၁၄.
၂ ပှၤလၢအတၢ်ကီၤသူၣ်ကီၤသး တအိၣ်ဘၣ်န့ၣ် ဒုးအိၣ်ထီၣ်တၢ်ကီတၢ်ခဲလၢ အနီၢ်ကစၢ်အဂီၢ် တကးဒံးဘၣ် ပှၤဂၤအဂီၢ်စ့ၢ်ကီးလီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး ပှၤဟီၣ်ခိၣ်ဖိတဖၣ် အတၢ်ကီၤသူၣ်ကီၤသး စှၤလီၤဝဲကွ့ၢ်ကွ့ၢ်လီၤ. ဘၣ်ဆၣ် လံာ်စီဆှံတဲဆိပာ်စၢၤဝဲလၢ “မုၢ်နံၤအခံကတၢၢ်” န့ၣ် ပှၤဟီၣ်ခိၣ်ဖိတဖၣ် အတၢ်ကီၤသူၣ်ကီၤသး ကစှၤလီၤဝဲလီၤ. ပတကြၢးကမၢကမၣ်လၢ တၢ်အံၤအဃိဘၣ်.—၂ တံၤမသ့း ၃:၁-၃.
၃. ဘၣ်မနုၤအဃိ ပကဘၣ်အိၣ်ဒီး တၢ်ကီၤသူၣ်ကီၤသးလဲၣ်.
၃ ဘၣ်မနုၤအဃိ ပကဘၣ်အိၣ်ဒီး တၢ်ကီၤသူၣ်ကီၤသးလဲၣ်. လၢတၢ်ဂ့ၢ်ခံမံၤအံၤအဃိလီၤ. တၢတမံၤန့ၣ် ပှၤလၢအအိၣ်ဒီး တၢ်ကီၤသူၣ်ကီၤသးန့ၣ် တထံၣ်ဘၣ်တၢ်ကီတၢ်ခဲအါအါဘၣ်. တကးဒံးဘၣ် အဝဲသ့ၣ်အိၣ်ဒီးတၢ်ရ့လိာ်သးလၢအဂ့ၤ ဒီးပှၤဂၤန့ၣ်လီၤ. ဒီးအဝဲသ့ၣ် ဟးဆှဲးဝဲ တၢ်သူၣ်ဒိၣ်သးဖျိး, တၢ်သူၣ်ကိၢ်သးဂီၤ ဒီးတၢ်သူၣ်ဘၣ်ဒိသးဘၣ်ဒိ သ့ဝဲလီၤ. ခံမံၤတမံၤ ဒ်သိးပဆဲးကဲ ယဟိဝၤယွၤ အတံၤသကိးကန့ၢ်အဂီၢ် ပကဘၣ်ဂ့ၢ်လိာ်ကွံာ် တၢ်လ့ပစီဒီးတၢ်သူၣ်လီသးကွံလၢ အတဂ့ၤတဖၣ်န့ၣ်လီၤ. မ့ၢ်လၢစီၤအၤဒၣ် ဒီးနီၢ်အံၣ်အုတအိၣ်ဒီး တၢ်ကီၤသူၣ်ကီၤသးအဃိ ထံၣ်ဘၣ်ဝဲတၢ်ကီတၢ်ခဲတဖၣ်လီၤ. (၁ မိၤၡ့ ၃:၆) ဒ်န့ၣ်အသိး မုၢ်မဆါတနံၤအံၤစ့ၢ်ကီး ပှၤအါဂၤန့ၣ် အတၢ်ကီၤသူၣ်ကီၤသး တအိၣ်ဘၣ်အဃိ ထံၣ်ဘၣ်ဝဲတၢ်ကီတၢ်ခဲအါမးလီၤ.
၄. ပှၤလၢအိၣ်ဒီးတၢ်ကီတၢ်ခဲလၢ ကကီၤသူၣ်ကီၤသးတဖၣ် ဘၣ်မနုၤအဃိ တလိၣ်သးဆံးဘၣ်လဲၣ်.
၄ ယဟိဝၤယွၤ သ့ၣ်ညါဝဲလၢ ပမ့ၢ်ပှၤတလၢတပှဲၤဘၣ်အဃိ ပကအိၣ်ဒီးတၢ်ကီၤသူၣ်ကီၤသးအဂီၢ် ကကီဝဲလီၤ. ဘၣ်ဆၣ် အဝဲအဲၣ်ဒိးမၤစၢၤပှၤဒ်သိး ပကမၤနၢၤကွံာ် ပတၢ်သူၣ်လီသးကွံလၢ အတဂ့ၤတဖၣ်န့ၣ်လီၤ. (၁ စီၤပၤ ၈:၄၆-၅၀) ဒ်တံၤသကိးလၢအအိၣ်ဒီး တၢ်အဲၣ်တၢ်ကွံတဂၤအသိး ယဟိဝၤယွၤ ဟ့ၣ်ဂံၢ်ဟ့ၣ်ဘါဝဲ ပှၤလၢအိၣ်ဒီးတၢ်ကီတၢ်ခဲလၢ ကကီၤသူၣ်ကီၤသးတဖၣ်လီၤ. လၢတၢ်မၤလိအံၤအပူၤ ပကမၤလိဘၣ် ယဟိဝၤယွၤ အိၣ်ဒီးတၢ်ကီၤသူၣ်ကီၤသးဒ်လဲၣ်. ဒီးတၢ်အဒိလၢအဂ့ၤ ဒီးအတဂ့ၤတဖၣ်လၢ လံာ်စီဆှံအပူၤ ဒီးတၢ်ဟ့ၣ်ကူၣ်တနီၤလၢ ကမၤစၢၤပှၤဒ်သိး ပကအိၣ်ဒီးတၢ်ကီၤသူၣ်ကီၤသးအဂီၢ်လီၤ.
ယဟိဝၤယွၤ ပာ်လီၤဝဲအဒိအတဲာ်
၅, ၆. ဘၣ်ဃးဒီး တၢ်ကီၤသူၣ်ကီၤသးန့ၣ် ယဟိဝၤယွၤ ပာ်လီၤဝဲအဒိအတဲာ်ဒ်လဲၣ်.
၅ ယဟိဝၤယွၤန့ၣ် လၢဝဲပှဲၤဝဲအဃိ အကီၤသူၣ်ကီၤသးန့ၢ်ဂ့ၤဂ့ၤလီၤ. (၅ မိၤၡ့ ၃၂:၄) ဘၣ်ဆၣ် မ့မ့ၢ်ပဝဲသ့ၣ်တဖၣ်န့ၣ် ပတလၢတပှဲၤဘၣ်အဃိ ဒ်သိးပကွၢ်လိမၤဒိး ယဟိဝၤယွၤကန့ၢ်အဂီၢ် ပကဘၣ်သမံသမိးကွၢ် ယဟိဝၤယွၤ အတၢ်ကီၤသူၣ်ကီၤသးအဂ့ၢ်လီၤ. ပမ့ၢ်မၤဒ်န့ၣ်န့ၣ် ဖဲပထံၣ်ဘၣ်တၢ်လၢ အမၤသးအုးပှၤအခါ ပကဘၣ်မၤတၢ်မနုၤလဲၣ်န့ၣ် ပကသ့ၣ်ညါလီၤ. တၢ်အဒိတနီၤလၢ အပာ်ဖျါထီၣ်လၢ ယဟိဝၤယွၤအိၣ်ဒီး တၢ်ကီၤသူၣ်ကီၤသးန့ၣ် မ့ၢ်မနုၤလဲၣ်.
ယဟိဝၤယွၤန့ၣ် လၢဝဲပှဲၤဝဲအဃိ အကီၤသူၣ်ကီၤသးန့ၢ် ဂ့ၤဂ့ၤလီၤ
၆ ဖဲမုၣ်ကီၤလံၢ် ထီဒါယဟိဝၤယွၤအခါ ယဟိဝၤယွၤမၤဝဲဒ်လဲၣ်န့ၣ် ဆိကမိၣ်ကွၢ်တက့ၢ်. ခီဖျိလၢမုၣ်ကီၤလံၢ် မၤဝဲဒ်န့ၣ်အဃိ လီၤဂာ်လၢမူခိၣ်ကလူးလၢ အဂ့ၤသ့ၣ်တဖၣ် ကကမၢကမၣ်, ကသးဒိၣ်ထီၣ်အီၤ ဒီးကသးဟ့အီၤလီၤ. နၤစ့ၢ်ကီး ဖဲနဆိကမိၣ်ထီၣ်လၢ မုၣ်ကီၤလံၢ်ဒုးအိၣ်ထီၣ် တၢ်ကီတၢ်ခဲတဖၣ်အံၤအခါ ဘၣ်သ့ၣ်သ့ၣ် နကတူၢ်ဘၣ်ဒ်မူခိၣ်ကလူးလၢ အဂ့ၤတဖၣ်အံၤအသိးလီၤ. ဘၣ်ဆၣ် မ့မ့ၢ်ယဟိဝၤယွၤန့ၣ် တမၤဆၢကဒါက့ၤဝဲ ကရီကဒးဘၣ်. အဝဲပာ်ဖျါထီၣ် တၢ်ကီၤသူၣ်ကီၤသးဒီး ပာ်ဖျါထီၣ်တၢ်စံးဆၢလီၤတံၢ်လီၤဆဲးလီၤ. ယဟိဝၤယွၤန့ၣ်အသးထီၣ်တၢ်ကီ ဘၣ်ဆၣ်စံၣ်ညီဝဲ မုၣ်ကီၤလံၢ်အတၢ်ပူထီၣ်ထီဒါအံၤ တီတီလိၤလိၤလီၤ. (၂ မိၤၡ့ ၃၄:၆; ယိၤဘး ၂:၂-၆) ဘၣ်မနုၤအဃိ ယဟိဝၤယွၤ ဟ့ၣ်ဝဲတၢ်ဆၢကတီၢ်လဲၣ်. မ့ၢ်လၢအဝဲတအဲၣ်ဒိးလၢ ပှၤဟးဂီၤနီတဂၤဘၣ်. အဝဲအဲၣ်ဒိးဝဲလၢပှၤက “ပီၢ်ယၢ်လီၤက့ၤအသး” လီၤ.—၂ ပ့းတရူး ၃:၉.
၇. ပဟံးန့ၢ်တၢ်မၤလိလၢ ယဟိဝၤယွၤအဒိအတဲာ် ကသ့ဒ်လဲၣ်.
၇ ယဟိဝၤယွၤအဒိအတဲာ်န့ၣ် သိၣ်လိပှၤလၢတချုးလၢ ပတဲတၢ် မ့တမ့ၢ် မၤတၢ်တမံၤမံၤဒံးဘၣ်အခါ ပကဘၣ်ဆိကမိၣ်ထံအီၤလီၤ. ပတဘၣ်မၤဆၢက့ၤတၢ် ကရီကဒးဘၣ်. လၢတၢ်န့ၣ်အဃိ ဖဲပမၤတၢ်ဆၢတဲာ်လၢအရ့ဒိၣ်အခါ ပကဘၣ်ဟံးန့ၢ်တၢ်ဆၢကတီၢ် ဒီးဆိကမိၣ်ထံအီၤလီၤ. ဒီးပကဘၣ်ဃ့ဘါထုကဖၣ် ဒီးဃ့တၢ်ကူၣ်သ့ ဒ်သိးပကတဲတၢ် မ့တမ့ၢ် မၤတၢ်လၢအဘၣ်အဂီၢ်လီၤ. (စံးထီၣ်ပတြၢၤ ၁၄၁:၃) ဖဲပသးဒိၣ်ထီၣ် မ့တမ့ၢ် ပသးတမုာ်ဘၣ်အခါ ပမၤနါစိၤဘၣ်တၢ်သ့ဝဲလီၤ. ပှၤအါဂၤန့ၣ် တဲကမၣ် မ့တမ့ၢ် မၤကမၣ်ဘၣ်တၢ် ခီဖျိတဆိကမိၣ်ထံတၢ်ဘၣ်အဃိ လၢခံအသးအုးဝဲဒိၣ်မးလီၤ.—ကတိၤဒိ ၁၄:၂၉; ၁၅:၂၈; ၁၉:၂.
ယွၤအခ့အပှၤလၢပျၢၤ အဒိအတဲာ်လၢအဂ့ၤဒီး အတဂ့ၤ
၈. (က) တၢ်အဒိအတဲာ်အဂ့ၤ လၢအဘၣ်ဃးဒီး တၢ်ကီၤသူၣ်ကီၤသးန့ၣ် ပဃုထံၣ်န့ၢ်အီၤ ကသ့ဖဲလဲၣ်. (ခ) ဒ်သိးစီၤယိၤသး ကမၤနၢၤကွံာ်ဝဲ စီၤပိၤတံၤဖၢ်အမါ အတၢ်လ့ပစီအဂီၢ် တၢ်မနုၤမၤစၢၤအီၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၈ တၢ်ကီၤသူၣ်ကီၤသးမ့ၢ်တၢ်လၢ အရ့ဒိၣ်န့ၣ် လံာ်စီဆှံပာ်ဖျါထီၣ်ဝဲ မတၤအဒိအတဲာ်လဲၣ်. ဘၣ်သ့ၣ်သ့ၣ် နကသ့ၣ်နီၣ်ထီၣ် စီၤယၤကိာ်အဖိခွါ စီၤယိၤသးအဒိအတဲာ်လီၤ. ဖဲအဝဲမၤတၢ်လၢ စီၤပိၤတံၤဖၢ်အဟံၣ်အခါ ဘၣ်ဂ့ၢ်လိာ်ကွံာ်ဝဲ တၢ်လ့ပစီလီၤ. မ့ၢ်လၢစီၤယိၤသးန့ၣ် “အိၣ်ပှဲၤဒီး ဒုၣ်ဒီးဒ့” ဒီးဒိၣ်တၢ်ဂ့ၤအဃိ စီၤပိၤတံၤဖၢ်အမါ ကွၢ်အီၤဂ့ၤလီၤ. ဒီးအဝဲဂုာ်ကျဲးစၢးကွဲန့ၢ်လွဲန့ၢ် စီၤယိၤသးလၢ ကမံဃုာ်ဒီးအီၤတဘျုးဘျီညါ. ဒ်သိးစီၤယိၤသး ဂ့ၢ်လိာ်ကွံာ်တၢ်လ့ပစီတဖၣ်အံၤ ကန့ၢ်အဂီၢ် တၢ်မနုၤမၤစၢၤအီၤလဲၣ်. ဘၣ်သ့ၣ်သ့ၣ် အဝဲကဆိကမိၣ်ထံဝဲလၢ မ့ၢ်မံဃုာ်ဒီးစီၤပိၤတံၤဖၢ်အမါန့ၣ် တၢ်ကမၤအသးဒီးအီၤဒ်လဲၣ်န့ၣ်လီၤ. ဖဲစီၤပိၤတံၤဖၢ်အမါ ဖီၣ်ထုးအီၤလၢကမံဃုာ်ဒီးအီၤအခါ စီၤယိၤသးဃ့ၢ်ကွံာ်ဝဲလီၤ. အဝဲတဲဝဲလၢ– “ယကမၤတၢ်အၢတၢ်သီ ဒ်သိးအံၤတမံၤဒီး, မၤတၢ်ဒဲးဘးထီဒါကစၢ်ယွၤဒ်လဲၣ်.”—၁ မိၤၡ့ ၃၉:၆, ၉, ခ့ခါစှီၤကျိာ်; ဖး ကတိၤဒိ ၁:၁၀ တက့ၢ်.
ဃ့တၢ်မၤစၢၤလၢ ယဟိဝၤယွၤအအိၣ် ဒ်သိးကဟ့ၣ်နၤ တၢ်ကူၣ်သ့ ဒီးတၢ်ကီၤသူၣ်ကီၤသး လၢနကမၤနၢၤကွံာ် တၢ်လ့ပစီအဂီၢ်န့ၣ်တက့ၢ်
၉. ဒ်သိးနကမၤနၢၤကွံာ် တၢ်လ့ပစီအဂီၢ် နအိၣ်ကတဲာ်ကတီၤနသးကသ့ဒ်လဲၣ်.
၉ ပဟံးန့ၢ်တၢ်မၤလိလၢ စီၤယိၤသးအအိၣ်ကသ့ဒ်လဲၣ်. ပမ့ၢ်ဘၣ်တၢ်လ့ပစီလၢ ကမၤကမၣ်ယွၤအတၢ်သိၣ်တၢ်သီန့ၣ် ပကဘၣ်ဂ့ၢ်လိာ်ကွံာ်အီၤတဘျီဃီလီၤ. ပှၤတနီၤနီၤတချုးလၢ အဝဲသ့ၣ်ကဲထီၣ် ယဟိဝၤပှၤအုၣ်အသးဒံးဘၣ်န့ၣ် အဝဲသ့ၣ် အီၣ်လုၢ်ကိ, အီလုၢ်ကိတၢ်, အီမိာ်, သူကသံၣ်မူၤဘှီး, မၤကမၣ်မုၣ်ကမၣ်ခွါ ဒီးမၤတၢ်ကမၣ်အဂၤတဖၣ်န့ၣ်လီၤ. အဝဲသ့ၣ် ဒိးဘျၢထံဝံၤသနာ်က့ တဘျီတခီၣ် လုၢ်လၢ်လၢအအၢအသီတဖၣ်အံၤ ကဲထီၣ်တၢ်လ့ပစီလၢ အဝဲသ့ၣ်အဂီၢ်ဒံးလီၤ. တၢ်မ့ၢ်ကဲထီၣ်အသးဒီးနၤဒ်အံၤန့ၣ် ဟံးန့ၢ်တၢ်ဆၢကတီၢ်ဒီး ဆိကမိၣ်ထံဘၣ်ဃး နမ့ၢ်တဟးဆှဲး တၢ်လ့ပစီသ့ၣ်တဖၣ်အံၤန့ၣ် နတၢ်ရ့လိာ်သးဒီးယဟိဝၤယွၤ ကဘၣ်ဒိဒ်လဲၣ်န့ၣ်တက့ၢ်. နမ့ၢ်မၤဒ်န့ၣ်န့ၣ် ကမၤစၢၤနၤဒ်သိး နကအိၣ်ဒီးတၢ်ကီၤသူၣ်ကီၤသးလီၤ. ဒီးဆိကမိၣ်ပာ်တၢ်လၢ ကကဲထီၣ်တၢ်လ့ပစီလၢနဂီၢ် ဒီးနကဟးဆှဲးအီၤ ကသ့ဒ်လဲၣ်တက့ၢ်. (စံးထီၣ်ပတြၢၤ ၂၆:၄, ၅; ကတိၤဒိ ၂၂:၃) နမ့ၢ်ထံၣ်ဘၣ်တၢ်မၤကွၢ်ဒ်အံၤန့ၣ် ဃ့တၢ်မၤစၢၤလၢ ယဟိဝၤယွၤအအိၣ် ဒ်သိးကဟ့ၣ်နၤ တၢ်ကူၣ်သ့ ဒီးတၢ်ကီၤသူၣ်ကီၤသး လၢနကမၤနၢၤကွံာ် တၢ်လ့ပစီအဂီၢ်န့ၣ်တက့ၢ်.
၁၀, ၁၁. (က) လၢကၠိန့ၣ် ပှၤသးစၢ်အါဂၤ ထံၣ်ဘၣ်ဝဲတၢ်မနုၤလဲၣ်. (ခ) ဖဲခရံာ်ဖိသးစၢ်တဖၣ် ထံၣ်ဘၣ်တၢ်လ့ပစီအခါ ဒ်သိးအသုတမၤကမၣ်ဘၣ် ယွၤအတၢ်သိၣ်တၢ်သီတဂ့ၤအဂီၢ် တၢ်မနုၤကမၤစၢၤအီၤလဲၣ်.
၁၀ မုၢ်မဆါတနံၤအံၤ ခရံာ်ဖိသးစၢ်အါဂၤန့ၣ် ထံၣ်ဘၣ်ဝဲတၢ်လ့ပစီ ဒ်သိးဒီး စီၤယိၤသးလီၤ. အဒိ, ဆိကမိၣ်ကွၢ် ခ့(မ်) အဂ့ၢ်တက့ၢ်. ကၠိပျၢ် မုၢ်ဃုနံၤအိၣ်ဘှံးနံၤဝံၤ ကၠိမ့ၢ်က့ၤထီၣ်ကဒါက့ၤန့ၣ် အသကိးတဖၣ် ကတိၤဒိၣ်လီၤအသးလၢ အမံဃုာ်ဒီးပှၤဂၤအဂ့ၢ်လီၤ. မ့မ့ၢ် ခ့(မ်) န့ၣ်တမၤဝဲဒ်သိး ပှၤအဂၤတဖၣ်အဃိ ဖဲပှၤတဲသကိးတၢ်အခါ အဝဲဘၣ်အိၣ်ကစုဒုလီၤ. အဝဲအၢၣ်လီၤဝဲလၢ တဘျီတခီၣ်န့ၣ် မ့ၢ်လၢအဝဲတမၤဝဲဒ် ပှၤအဂၤတဖၣ်အသိးဘၣ်အဃိ အဝဲတူၢ်ဘၣ်ဝဲလၢ “ပှၤတကနၣ်ဃုာ်အီၤဘၣ်ဒီး ဘၣ်အိၣ်သယုၢ်သညိဝဲထဲတဂၤဧိၤလီၤ.” ခီဖျိလၢ တပာ်တၢ်အဲၣ်တီအဃိ ပှၤဆိကမိၣ်အီၤလၢ အမ့ၢ်ပှၤတကျၢတခီဘၣ်လီၤ. ဘၣ်ဆၣ် ခ့(မ်) မ့ၢ်ဝဲပှၤလၢအိၣ်ဒီးတၢ်ကူၣ်သ့လီၤ. အဝဲသ့ၣ်ညါဝဲလၢ ဖဲပသးစၢ်ဒံးအခါ တၢ်လ့ပစီလၢအဘၣ်ဃးဒီး တၢ်မံဃုာ်အိၣ်ဃုာ်န့ၣ် အသဟီၣ်ဆူၣ်ဒိၣ်မးလီၤ. (၂ တံၤမသ့း ၂:၂၂) အသကိးတနီၤသံကွၢ်အီၤလၢ နမ့ၢ်မုၣ်ကနီၤလၢ အစီဆှံဒံးဧါ. ဖဲန့ၣ်အခါအဝဲဒိးန့ၢ်ဘၣ် တၢ်ခွဲးတၢ်ယာ်လၢ ကတဲနၢ်ပၢၢ်ပှၤဂၤလၢ ဘၣ်မနုၤအဃိ အဝဲတမံဃုာ်ဒီးပှၤဂၤလဲၣ်န့ၣ်လီၤ. ခရံာ်ဖိသးစၢ်တဖၣ် ပာ်လီၤအသးဂၢၢ်ဂၢၢ်ကျၢၤကျၢၤလၢ ကတြီဆၢကွံာ်တၢ်မၤကမၣ်မုၣ်ကမၣ်ခွါအဃိ ပဝဲသ့ၣ်တဖၣ် ဒီးယဟိဝၤယွၤန့ၣ် ပာ်လုၢ်ပာ်ပှ့ၤအဝဲသ့ၣ်ဒိၣ်မးလီၤ.
၁၁ လံာ်စီဆှံပာ်ဖျါထီၣ်စ့ၢ်ကီးဝဲ တၢ်အဒိလၢဘၣ်ဃးဒီး ပှၤလၢတဂ့ၢ်လိာ်ကွံာ် တၢ်မၤကမၣ်မုၣ်ကမၣ်ခွါတဖၣ်အဂ့ၢ် စ့ၢ်ကီးလီၤ. ပတၢ်ကီၤသူၣ်ကီၤသး မ့ၢ်တအိၣ်ဘၣ်န့ၣ် ပကထံၣ်ဘၣ်တၢ်ကီတၢ်ခဲလီၤ. နမ့ၢ်ထံၣ်ဘၣ်တၢ်လ့ပစီဒ် ဒီပုၢ်ဝဲၢ်မုၣ်ခ့(မ်) အသိးန့ၣ် ဆိကမိၣ်ထီၣ် ပှၤသးစၢ်လၢတအိၣ်ဒီးတၢ်ကူၣ်သ့ လၢလံာ်ကတိၤဒိ အဆၢဒိၣ် ၇ ပာ်ဖျါထီၣ်ဝဲန့ၣ်တက့ၢ်. တကးဒံးဘၣ် ဆိကမိၣ်ကွၢ်စ့ၢ်ကီး တၢ်ကဲထီၣ်အသးဒီး စီၤအၤမနိၣ် ခီဖျိလၢအမၤကမၣ်တၢ်အဃိန့ၣ်တက့ၢ်. (၂ ၡမူၤအ့လး ၁၃:၁, ၂, ၁၀-၁၅, ၂၈-၃၂) ဒ်သိး ဖိသ့ၣ်တဖၣ် ကအိၣ်ဒီးတၢ်ကူၣ်သ့ ဒီးတၢ်ကီၤသူၣ်ကီၤသးအဂီၢ် မိၢ်ပၢ်တဖၣ် ဖဲသုမၤဟံၣ်ဖိဃီဖိ တၢ်မၤလိလံာ်စီဆှံအခါ တဲသကိးတၢ်ဂ့ၢ်လၢ အဘၣ်ဃးဒီး တၢ်အဒိအတဲာ်လၢ အအိၣ်လၢလံာ်စီဆှံအပူၤန့ၣ်တက့ၢ်.
၁၂. (က) ဖဲစီၤယိၤသးက့ၤထံၣ်လိာ်အသးဒီး အဒီပုၢ်ဝဲၢ်တဖၣ်အခါ အဝဲပာ်ဖျါထီၣ်တၢ်ကီၤသူၣ်ကီၤသးဒ်လဲၣ်. (ခ) ပဝဲသ့ၣ်တဖၣ်စ့ၢ်ကီး ပကဘၣ်ကီၤသူၣ်ကီၤသးလၢ တၢ်ဂ့ၢ်မနုၤတဖၣ်အဃိလဲၣ်.
၁၂ ဖဲစီၤယိၤသးအဒီပုၢ်ဝဲၢ်တဖၣ် ဟဲလၢကီၢ်အဲၤကူပတူး ဒ်သိးကပှ့ၤတၢ်အီၣ်တၢ်အီအခါ စီၤယိၤသးပာ်ဖျါထီၣ်စ့ၢ်ကီး တၢ်ကီၤသူၣ်ကီၤသး အသီတဘျီလီၤ. ခီဖျိလၢစီၤယိၤသး အဲၣ်ဒိးသ့ၣ်ညါဝဲ အဒီပုၢ်ဝဲၢ်တဖၣ် အတၢ်ပာ်သူၣ်ပာ်သးအဃိ အဝဲတတဲဖျါထီၣ်လၢ အမ့ၢ်မတၤတဂၤလဲၣ်န့ၣ်ဘၣ်. ဒီးတုၤအဝဲတူၢ်ဝဲတပှဲၤလၢၤဘၣ်အခါ ဟးထီၣ်လၢအဒီပုၢ်ဝဲၢ်တဖၣ်အကျါ ဒီးလဲၤဟီၣ်ခူသူၣ်ဝဲလီၤ. (၁ မိၤၡ့ ၄၃:၃၀, ၃၁; ၄၅:၁) ဖဲဒီပုၢ်ဝဲၢ်တဂၤဂၤ မ့ၢ်မၤဘၣ်တၢ်တမံၤမံၤလၢ အမၤသးအုးနၤအခါ နမ့ၢ်အိၣ်ဒီးတၢ်ကီၤသူၣ်ကီၤသး ဒ်စီၤယိၤသးအသိးန့ၣ် ကမၤစၢၤနၤဒ်သိး နသုတတဲဘၣ် မ့တမ့ၢ် မၤဘၣ်တၢ်တမံၤမံၤလၢ ကမၤသးအုးနၤလၢခံ တဂ့ၤန့ၣ်လီၤ. (ကတိၤဒိ ၁၆:၃၂; ၁၇:၂၇) ဘၣ်သ့ၣ်သ့ၣ် နဘူးနတံၢ်တဂၤဂၤ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤလီၤ. လၢတၢ်န့ၣ်အဃိ ဒ်သိးနသုတဆဲးကျိးဒီးအီၤတဂ့ၤအဂီၢ် နကဘၣ်အိၣ်ဒီးတၢ်ကီၤသူၣ်ကီၤသးလီၤ. ဒ်သိးနကမၤဒ်န့ၣ်အဂီၢ် ဘၣ်သ့ၣ်သ့ၣ်ကကီဝဲလီၤ. ဘၣ်ဆၣ် နမ့ၢ်သ့ၣ်နီၣ်ထီၣ်လၢ နမၤဒ်အံၤန့ၣ် မ့ၢ်လၢနကွၢ်လိမၤဒိးယဟိဝၤယွၤဒီး မၤဒ်အတၢ်မၤလိာ်အသိးအဃိ ကညီထီၣ်ဝဲလၢနဂီၢ်လီၤ.
ပတကြၢးအိၣ်ဒီးတၢ်နာ်န့ၢ်လီၤသး တလၢကွံာ်အခၢးဘၣ် ဒီးပတကြၢးဆိကမိၣ်လၢ ပှၤလ့ပစီပှၤတန့ၢ်ဘၣ်န့ၣ်ဘၣ်
၁၃. လၢစီၤဒၤဝံးအအိၣ်န့ၣ် ပဟံးန့ၢ်တၢ်မၤလိမနုၤသ့လဲၣ်.
၁၃ ပမၤလိန့ၢ်တၢ်လၢ စီၤပၤဒၤဝံးအအိၣ်သ့စ့ၢ်ကီးလီၤ. ဖဲစီၤစီလူး ဒီးစီၤၡံမံၤ မၤသးထီၣ်အီၤအခါ အဝဲတသးထီၣ်တၢ် မ့တမ့ၢ် တသူဝဲအတၢ်စိတၢ်ကမီၤလၢ ကမၤကၣ်က့ၤအဝဲသ့ၣ်ဘၣ်. (၁ ၡမူၤအ့လး ၂၆:၉-၁၁; ၂ ၡမူၤအ့လး ၁၆:၅-၁၀) ဘၣ်ဆၣ် စီၤဒၤဝံးန့ၣ် တအိၣ်ဒီးတၢ်ကီၤသူၣ်ကီၤသး ထီဘိစ့ၢ်ကီးဘၣ်. ပသ့ၣ်ညါဘၣ်ခီဖျိ ပဖးဘၣ်လၢအသးဒိၣ်ထီၣ် စီၤနၤဘလး ဒိၣ်မး ဒီးအဝဲမၤကမၣ်မုၣ်ကမၣ်ခွါ ဒီးနီၢ်ဘၤသၡ့ဘၤန့ၣ်လီၤ. (၁ ၡမူၤအ့လး ၂၅:၁၀-၁၃; ၂ ၡမူၤအ့လး ၁၁:၂-၄) ပဟံးန့ၢ်တၢ်မၤလိလၢ အလုၢ်ဒိၣ်ပှ့ၤဒိၣ်လၢ စီၤဒၤဝံးအအိၣ်သ့ဝဲလီၤ. အဆိကတၢၢ်န့ၣ် ပှၤလၢအတီခိၣ်ရိၤမဲ ယွၤအပှၤဂီၢ်မုၢ်တဖၣ်န့ၣ် ကဘၣ်အိၣ်ဒီးတၢ်ကီၤသူၣ်ကီၤသး ဒ်သိးအသုတသူကမၣ်ဘၣ် အတၢ်စိတၢ်ကမီၤတဂ့ၤအဂီၢ်လီၤ. ခံထံၣ်တထံၣ်န့ၣ် ပတကြၢးအိၣ်ဒီးတၢ်နာ်န့ၢ်လီၤသး တလၢကွံာ်အခၢးဘၣ် ဒီးပတကြၢးဆိကမိၣ်လၢ ပှၤလ့ပစီပှၤတန့ၢ်ဘၣ်န့ၣ်ဘၣ်.—၁ ကရံၣ်သူး ၁၀:၁၂.
တၢ်လၢနမၤသ့တဖၣ်
၁၄. ဒီပုၢ်ဝဲၢ်တဂၤ လဲၤခီဖျိဘၣ်ဝဲတၢ်မနုၤလဲၣ် ဒီးပမ့ၢ်ထံၣ်ဘၣ် တၢ်အိၣ်သးဒ်အံၤန့ၣ် ဘၣ်မနုၤအဃိ အရ့ဒိၣ်လၢ ပကဘၣ်အိၣ်ဒီးတၢ်ကီၤသူၣ်ကီၤသး ဒ်ဒီပုၢ်ဝဲၢ်တဂၤအံၤအသိးလဲၣ်.
၁၄ ဒ်သိးနတၢ်ကီၤသူၣ်ကီၤသးကအါထီၣ်အဂီၢ် နကဘၣ်မၤတၢ်မနုၤလဲၣ်. ဆိကမိၣ်ကွၢ် လွံကၠံၤတၢ်လဲၤခီဖျိတခါအံၤတက့ၢ်. ပှၤတဂၤအကါဟဲတဲးဘၣ်ဝဲ ဒီပုၢ်ဝဲၢ်လွံကၠံၤ အကါအခံလီၤ. တမ့ၢ်လွံကၠံၤ အတၢ်ကမၣ်ဘၣ် ဘၣ်ဆၣ်အဝဲကိးဃါဝဲ လွံကၠံၤ ဒီးအဲၣ်ဒိးစးထီၣ် တၢ်အ့ၣ်လိာ်န့ၣ်လီၤ. လွံကၠံၤ ဃ့ထုကဖၣ်လၢ ယဟိဝၤယွၤအအိၣ် ဒ်သိးကအိၣ်ဒီးတၢ်ကီၤသူၣ်ကီၤသးအဂီၢ်လီၤ. ဒီးလွံကၠံၤ ဂုာ်ကျဲးစၢးတဲတၢ်ဒီးအီၤမုာ်မုာ်ဘၣ်ဆၣ် အဝဲဆဲးဃါဝဲ လွံကၠံၤလီၤ. လၢတၢ်န့ၣ်အဃိ လွံကၠံၤကွဲးနီၣ်ဃာ်ဝဲ အဝဲအကါခီပနံာ် (insurance) အဂ့ၢ်အကျိၤဝံၤ ဒီးဟးထီၣ်ဝဲဖဲန့ၣ်လီၤ. ပူၤကွံာ်တနွံဝံၤအလီၢ်ခံ လွံကၠံၤ လဲၤဝဲတၢ်က့ၤအိၣ်သကိးဟံၣ်ကစၢ်လၢ ပိာ်မုၣ်တဂၤအအိၣ်န့ၣ်လီၤ. ဒီးပိာ်မုၣ်အံၤအဝၤန့ၣ် မ့ၢ်ဝဲပှၤလၢအတဲးဘၣ် လွံကၠံၤ အကါန့ၣ်လီၤ. ဖဲအဝဲထံၣ် လွံကၠံၤအခါအမဲာ်ဆှး ဒီးဃ့ဝံသးစူၤဝဲ လွံကၠံၤလီၤ. အဝဲဃ့ဝဲ လွံကၠံၤအကါခီပနံာ် အဂ့ၢ်အကျိၤ ဒ်သိးကဘှီန့ၢ်က့ၤဝဲ လွံကၠံၤအကါလၢအဆိအချ့အဂီၢ်လီၤ. ဒီးဖဲလွံကၠံၤ တဲသကိးလံာ်စီဆှံအဂ့ၢ် ဒီးအမါအခါ အဝဲဆ့ၣ်နီၤဒိကနၣ်ဝဲ ဒီးဘၣ်သူၣ်ဘၣ်သးဝဲစ့ၢ်ကီးလီၤ. ဒီးလွံကၠံၤ သ့ၣ်ညါဝဲလၢ တၢ်ကီၤသူၣ်ကီၤသးန့ၣ် မ့ၢ်တၢ်လၢအရ့ဒိၣ်လီၤ. အဝဲမ့ၢ်တပၢၤအသးဘၣ် ဒီးမ့ၢ်သးဒိၣ်ထီၣ်တၢ်န့ၣ် ကလီၤမဲာ်ဆှးထဲလဲၣ်.—ဖး ၂ ကရံၣ်သူး ၆:၃, ၄ တက့ၢ်.
ပမ့ၢ်အိၣ်ဒီးတၢ်ကီၤသူၣ်ကီၤသးန့ၣ် ကကဲဘျုးလၢ ပတၢ်စံၣ်တဲၤတဲလီၤတၢ်မၤအဂီၢ် (ကွၢ်လံာ်အဆၢ ၁၄)
၁၅, ၁၆. တၢ်မၤလိလံာ်စီဆှံန့ၣ် မၤစၢၤနၤဒီးနဟံၣ်ဖိဃီဖိ ကသ့ဒ်လဲၣ်.
၁၅ တၢ်ဖးလံာ်စီဆှံထီဘိ ဒီးတၢ်မၤလိလံာ်စီဆှံလီၤတံၢ်လီၤဆဲးန့ၣ် ကမၤစၢၤခရံာ်ဖိတဖၣ်ဒ်သိး ကအိၣ်ဒီးတၢ်ကီၤသူၣ်ကီၤသးအဂီၢ်လီၤ. သ့ၣ်နီၣ်ထီၣ်လၢ ကစၢ်ယွၤတဲ စီၤယိၤၡူ ဒ်အံၤန့ၣ်တက့ၢ်– “လံာ်တၢ်သိၣ်တၢ်သီအံၤတဘၣ် ဟးထီၣ်ကွံာ်လၢနထးခိၣ်ဘၣ်, မ့မ့ၢ်နဘၣ်ဆိကမိၣ်လၢ အပူၤလၢမုၢ်ဆါဒီးလၢမုၢ်နၤ, ဒ်သိးနကပလီၢ်နသး, ဒီးမၤတၢ်ဒ်ကယဲၢ်တၢ်ကွဲးအသးလၢအပူၤလီၤ. အဂ့ၢ်ဒ်အံၤ, တုၤနုၤတစုနကဒုးဘီၣ်ထီၣ်ညီထီၣ်နကျဲ, ဒီးနကမၤဒီးတၢ်ကူၣ်သ့လီၤ.” (ယိၤၡူ ၁:၈) ဘၣ်ဆၣ် ဒ်သိးနကအိၣ်ဒီး တၢ်ကီၤသူၣ်ကီၤသး ဒီးနတၢ်ကီၤသူၣ်ကီၤသး ကအါထီၣ်အဂီၢ် တၢ်မၤလိလံာ်စီဆှံ မၤစၢၤနၤကသ့ဒ်လဲၣ်.
တၢ်မၤလိလံာ်စီဆှံထီဘိန့ၣ် ကမၤစၢၤပှၤဒ်သိး ပကအိၣ်ဒီးတၢ်ကီၤသူၣ်ကီၤသးလီၤ
၁၆ တၢ်အဒိအတဲာ်လၢ လံာ်စီဆှံအပူၤတဖၣ် ပာ်ဖျါထီၣ်န့ၢ်ပှၤလၢ ပမ့ၢ်အိၣ်ဒီးတၢ်ကီၤသူၣ်ကီၤသးန့ၣ် ကကဲဘျုးဒ်လဲၣ် ဒီးပမ့ၢ်တအိၣ်ဒီးတၢ်ကီၤသူၣ်ကီၤသးဘၣ်န့ၣ် ပကထံၣ်ဘၣ်တၢ်ကီတၢ်ခဲဒ်လဲၣ်န့ၣ်လီၤ. ယဟိဝၤယွၤ ပာ်လီၤတၢ်အဒိအတဲာ်လၢ လံာ်စီဆှံအပူၤန့ၣ် မ့ၢ်ဒ်သိးကသိၣ်လိပှၤအဂီၢ်လီၤ. (ရိမ့ၤ ၁၅:၄) လၢတၢ်န့ၣ်အဃိ ပမ့ၢ်ဖး, မၤလိဒီးဆိကမိၣ်ထံတၢ်အဒိ လၢလံာ်စီဆှံအပူၤန့ၣ် ကကဲဘျုးလၢပဂီၢ်လီၤ. တကးဒံးဘၣ် ဂုာ်ကျဲးစၢးဃုနၢ်ပၢၢ် တၢ်အဒိလၢလံာ်စီဆှံအပူၤတဖၣ် ဘၣ်ထွဲလိာ်အသးဒီးနၤ ဒီးနဟံၣ်ဖိဃီဖိဒ်လဲၣ်န့ၣ်တက့ၢ်. ဒီးဃ့တၢ်မၤစၢၤလၢ ယဟိဝၤယွၤအအိၣ် ဒ်သိးနမၤထွဲ လံာ်စီဆှံအတၢ်ဟံးစုနဲၣ်ကျဲ ကသ့အဂီၢ်န့ၣ်တက့ၢ်. နမ့ၢ်သ့ၣ်ညါလီၤနသးလၢ နတၢ်ကီၤသူၣ်ကီၤသး တအိၣ်ဘၣ်လၢ ကျဲတဘိဘိန့ၣ် တဘၣ်ကွၢ်ကပာ်ကွံာ် နတၢ်ဂံၢ်စၢ်ဘါစၢ်အံၤတဂ့ၤ. ဒီးဒ်သိးနတၢ်ကီၤသူၣ်ကီၤသး ကအိၣ်အါထီၣ်အဂီၢ် ဂုာ်ကျဲးစၢးမၤဆူၣ်ဆူၣ် ဒီးဃ့တၢ်မၤစၢၤ လၢယဟိဝၤယွၤအအိၣ်တက့ၢ်. (ယၤကိာ် ၁:၅) ဃုသ့ၣ်ညါအါထီၣ်စ့ၢ်ကီး တၢ်ဂ့ၢ်တၢ်ကျိၤလၢ ပလံာ်လဲၢ်တဖၣ်အပူၤ ဒ်သိးကကဲထီၣ်တၢ်မၤစၢၤလၢ နဂီၢ်တက့ၢ်.
၁၇. ဒ်သိး ဖိသ့ၣ်တဖၣ် အတၢ်ကီၤသူၣ်ကီၤသး ကအါထီၣ်အဂီၢ် မိၢ်ပၢ်တဖၣ်မၤစၢၤဝဲသ့လၢ ကျဲဒ်လဲၣ်.
၁၇ ဒ်သိး နဖိသ့ၣ်တဖၣ် ကအိၣ်ဒီးတၢ်ကီၤသူၣ်ကီၤသးအဂီၢ် နမၤစၢၤအီၤကသ့ဒ်လဲၣ်. မိၢ်ပၢ်သ့ၣ်တဖၣ်သ့ၣ်ညါဝဲလၢ အဖိသ့ၣ်တဖၣ် တအိၣ်ဖျဲၣ်ထီၣ်ဃုာ်ဒီး တၢ်ကီၤသူၣ်ကီၤသးဘၣ်. လၢတၢ်န့ၣ်အဃိ အဝဲသ့ၣ်ဘၣ်သိၣ်လိအဖိတဖၣ် ခီဖျိအနီၢ်ကစၢ်အဒိအတဲာ်န့ၣ်လီၤ. (အ့းဖ့းစူး ၆:၄) နမ့ၢ်ထံၣ်ဘၣ်လၢနဖိတဖၣ် အတၢ်ကီၤသူၣ်ကီၤသး တအိၣ်အါအါဘၣ်န့ၣ် သံကွၢ်လီၤနသးလၢ မ့ၢ်နပာ်လီၤတၢ်ဒိဂ့ၤတဲာ်ဘၣ်လၢ အဝဲသ့ၣ်အဂီၢ်ဧါ. နပာ်လီၤဒိဂ့ၤတဲာ်ဘၣ်သ့ခီဖျိ လဲၤစံၣ်တဲၤတဲလီၤတၢ်ထီဘိ, ထီၣ်တၢ်အိၣ်ဖှိၣ်ရိဖှိၣ်ထီဘိ ဒီးမၤဟံၣ်ဖိဃီဖိတၢ်မၤလိလံာ်စီဆှံန့ၣ်လီၤ. ဒီးအလီၢ်မ့ၢ်အိၣ်လၢနဘၣ်တြီနဖိန့ၣ် တြီအီၤဒူဒူတက့ၢ်. ယဟိဝၤယွၤစ့ၢ်ကီး ပာ်လီၤဝဲတၢ်သိၣ်တၢ်သီလၢ နီၢ်အံၣ်အု ဒီးစီၤအၤဒၣ်အဂီၢ်လီၤ. တၢ်သိၣ်တၢ်သီတဖၣ်အံၤ ကမၤစၢၤအဝဲသ့ၣ်ဒ်သိး ကပာ်ကဲယဟိဝၤယွၤ အတၢ်န့ၢ်စိန့ၢ်ကမီၤလီၤ. ဒ်န့ၣ်အသိး မိၢ်ပၢ်သ့ၣ်တဖၣ်မ့ၢ်သိၣ်အဖိ ဒီးအိၣ်ဒီးဒိတဲာ်လၢအဂ့ၤန့ၣ် မ့ၢ်ဒၣ်အဝဲသ့ၣ်သိၣ်လိအဖိ ဒ်သိးကအိၣ်ဒီး တၢ်ကီၤသူၣ်ကီၤသးအဂီၢ်လီၤ. မိၢ်ပၢ်တဖၣ်ကဘၣ် မၤစၢၤအဖိဒ်သိး အဖိတဖၣ်ကဒိကနၣ် ယွၤအတၢ်သိၣ်တၢ်သီ ဒီးပာ်ကဲယွၤအဂီၢ်န့ၣ်လီၤ.—ဖး ကတိၤဒိ ၁:၅, ၇, ၈ တက့ၢ်.
၁၈. ဘၣ်မနုၤအဃိ ပကဘၣ်ဃုထၢတံၤသကိးလၢ တၢ်ကူၣ်သ့အပူၤန့ၣ်လဲၣ်.
၁၈ ပမ့မ့ၢ်မိၢ်ပၢ်ဂ့ၤ တမ့ၢ်ဘၣ်မ့ၢ်ဂ့ၤ ပကြၢးဃုထၢတံၤသကိးလၢ တၢ်ကူၣ်သ့အပူၤလီၤ. နတံၤသကိးတဖၣ် မ့ၢ်အဲၣ်ယဟိဝၤယွၤန့ၣ် ကဟ့ၣ်ဂံၢ်ဟ့ၣ်ဘါနၤလၢ နကအိၣ်ဒီးနီၢ်သးဖီတၢၣ် ဒီးဟးဆှဲးတၢ်လၢအလီၤဘၣ်ယိၣ်တဖၣ်လီၤ. (ကတိၤဒိ ၁၃:၂၀) တကးဒံးဘၣ် အဝဲသ့ၣ်အဒိအတဲာ်လၢအဂ့ၤန့ၣ် ကထိၣ်ဟူးထိၣ်ဂဲၤထီၣ်နၤလၢ နကအိၣ်ဒီးတၢ်ကီၤသူၣ်ကီၤသးဒ် အဝဲသ့ၣ်အသိးလီၤ. ဒီးနတၢ်ဒိဂ့ၤတဲာ်ဘၣ်စ့ၢ်ကီး ကကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ်လီၤ. ပမ့ၢ်အိၣ်ဒီးတၢ်ကီၤသူၣ်ကီၤသးန့ၣ် ကမၤသးခုယဟိဝၤယွၤအသး, ပကသူၣ်ဖှံသးညီ ဒီးပကအိၣ်ဒီး တၢ်ရ့လိာ်မုာ်လိာ်လၢအဂ့ၤ ဒီးပဟံၣ်ဖိဃီဖိလီၤ.
