ကွၢ်လိမၤဒိးယဟိဝၤယွၤ ခီဖျိဆိကမိၣ်န့ၢ်တၢ်လၢ ပှၤဂၤအဂီၢ်ဒီး အိၣ်ဒီးတၢ်သးကညီၤ
“ပှၤလၢအဆိကမိၣ်တၢ်လၢ ပှၤဖှီၣ်ဖိယာ်ဖိအဂီၢ်န့ၣ် ဘၣ်ဆိၣ်ဂ့ၤဝဲလီၤ.” —စံးထီၣ်ပတြၢၤ ၄၁:၁, ခ့ခါစှီၤကျိာ်.
၁. ပှၤလၢအဘူၣ်ထီၣ်ဘါထီၣ် ယဟိဝၤယွၤတဖၣ်န့ၣ် ပာ်ဖျါထီၣ်ဝဲလၢ အဝဲသ့ၣ် အဲၣ်လိာ်အသးဒ်လဲၣ်.
ပှၤလၢအဘူၣ်ထီၣ်ဘါထီၣ် ယဟိဝၤယွၤ လၢဟီၣ်ခိၣ်ဒီဘ့ၣ်န့ၣ် လီၤဂာ်ဒ်ဟံၣ်ဖိဃီဖိတဒူၣ်အသိးလီၤ. အဝဲသ့ၣ်န့ၣ် လီၤဂာ်ဒ် ပှၤဒီပုၢ်ဝဲၢ်မုၣ်ခွါတဖၣ်လၢ အအဲၣ်လိာ်အသး တဂၤဒီးတဂၤလီၤ. (၁ ယိၤဟၣ် ၄:၁၆, ၂၁) တဘျီတခီၣ် အဝဲသ့ၣ်ဟ့ၣ်လီၤအသးလၢ အဒီပုၢ်ဝဲၢ်အဂီၢ်ဒိၣ်ဒိၣ်မုၢ်မုၢ် ဘၣ်ဆၣ် အါတက့ၢ်န့ၣ် အဝဲသ့ၣ် ပာ်ဖျါထီၣ်တၢ်အဲၣ် ဆံးဆံးဖိလၢ ပဂံၢ်ထီၣ်ဒွးထီၣ်အီၤမးတလၢာ်ဘၣ်. အဒိ အဝဲသ့ၣ် ကကတိၤတၢ်ဒီး ဒီပုၢ်ဝဲၢ်တဖၣ်မုာ်မုာ်ဒီး ရ့ဒီးအဝဲသ့ၣ်လၢတၢ်အဲၣ်တၢ်ကွံအပူၤလီၤ. ဖဲပဆိကမိၣ်န့ၢ်တၢ်လၢ ပှၤဂၤအဂီၢ်ဒ်န့ၣ်အခါ မ့ၢ်ဒၣ်ပကွၢ်လိမၤဒိး ပပၢ်အိၣ်လၢမူခိၣ်လီၤ.—အ့းဖ့းစူး ၅:၁.
၂. ယ့ၣ်ၡူးကွၢ်လိမၤဒိးဝဲ အပၢ်အတၢ်အဲၣ်ဒ်လဲၣ်.
၂ ယ့ၣ်ၡူးကွၢ်လိမၤဒိးအပၢ် လၢလၢပှဲၤပှဲၤလီၤ. ထီဘိန့ၣ် အဝဲရ့ဒီးပှၤဂၤလၢ တၢ်အဲၣ်တၢ်ကွံအပူၤလီၤ. အဝဲတဲဝဲလၢ “ပှၤလၢတၢ်ဘှံးအသး, ဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ, ဟဲဆူယအိၣ်တက့ၢ်. ဒီးယကဒုးအိၣ်ဘှံးသုလီၤ.” (မးသဲ ၁၁:၂၈, ၂၉) ပမ့ၢ်ကွၢ်လိမၤဒိးယ့ၣ်ၡူးဒီး “ဆိကမိၣ်တၢ်လၢ ပှၤဖှီၣ်ဖိယာ်ဖိအဂီၢ်” န့ၣ်မ့ၢ်ဝဲပမၤသးခု ယဟိဝၤယွၤအသး တကးဒံးဘၣ် ပကသးခုစ့ၢ်ကီးလီၤ. (စံးထီၣ်ပတြၢၤ ၄၁:၁, ခ့ခါစှီၤကျိာ်) လၢတၢ်မၤလိအံၤအပူၤ ပကသ့ၣ်ညါဘၣ် တၢ်ဂ့ၢ်လၢဘၣ်ဃးဒီး ပဆိကမိၣ်န့ၢ်တၢ်လၢ ပဟံၣ်ဖိဃီဖိ, ပဒီပုၢ်ဝဲၢ်မုၣ်ခွါတဖၣ် ဒီးပှၤလၢပထံၣ်ဘၣ်အီၤလၢ တၢ်စံၣ်တဲၤတဲလီၤအပူၤတဖၣ်န့ၣ် ကသ့ဒ်လဲၣ်န့ၣ်လီၤ.
ဆိကမိၣ်န့ၢ်တၢ်လၢ နဟံၣ်ဖိဃီဖိတဖၣ်အဂီၢ်
၃. ဝၤတဂၤ ဆိကမိၣ်န့ၢ်တၢ်လၢအမါအဂီၢ် ကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၃ ဝၤသ့ၣ်တဖၣ် ကဘၣ်ပာ်လီၤဒိဂ့ၤတဲာ်ဘၣ် ဒီးကဘၣ်ပာ်ဖျါထီၣ်ဝဲလၢ အကဟုကယာ် အဟံၣ်ဖိဃီဖိဒိၣ်မးန့ၣ်လီၤ. (အ့းဖ့းစူး ၅:၂၅; ၆:၄) လံာ်စီဆှံတဲဝဲလၢ ဝၤန့ၣ်ကဘၣ်ဆိကမိၣ်န့ၢ်တၢ်လၢ အမါအဂီၢ်ဒီး နၢ်ပၢၢ်စၢၤအမါလီၤ. (၁ ပ့းတရူး ၃:၇) ဝၤလၢအနၢ်ပၢၢ်စၢၤအမါတဂၤန့ၣ် သ့ၣ်ညါဝဲလၢ အဝဲလီၤဆီဒီးအမါလၢ တၢ်ဂ့ၢ်အါမံၤသနာ်က့ တဆိကမိၣ်လီၤအသးလၢ အဂ့ၤဒိၣ်န့ၢ်ဒံးအမါဘၣ်. (၁ မိၤၡ့ ၂:၁၈) အဝဲကဆိကမိၣ်န့ၢ်တၢ်လၢ အမါအဂီၢ် ဒီးရ့ဒီးအမါ လၢတၢ်ယူးယီၣ်ပာ်ကဲအပူၤလီၤ. ပိာ်မုၣ်တဂၤလၢအအိၣ်လၢ ကီၢ်ခဲနဒၣ်န့ၣ်တဲဝဲ ဘၣ်ဃးဒီးအဝၤဒ်အံၤ “ယဝၤန့ၣ်တမၤဘၣ်ဒိယသး နီတဘျီဘၣ် ဒီးတတဲဝဲလၢ ‘နတကြၢးတူၢ်ဘၣ် ဒ်အံၤဘၣ်.’ အဝဲဒိကနၣ်ယၤ ဂ့ၤဂ့ၤစ့ၢ်ကီးလီၤ. ဖဲယထံၣ်ကမၣ်အီၤအခါဒၣ်လဲာ် အဝဲမၤစၢၤယၤလၢ တၢ်အဲၣ်တၢ်ကွံအပူၤလီၤ.”
ဝၤတဂၤတီဒီးအမါ ခီဖျိလၢအအဲၣ်အမါဒီး သးဟ့တၢ်အၢအဃိ
၄. ဖဲဝၤတဂၤရ့ဒီး ပှၤပိာ်မုၣ်အဂၤတဖၣ်အခါ အဝဲပာ်ဖျါထီၣ်လၢ အဆိကမိၣ်န့ၢ်တၢ်လၢ အမါအဂီၢ်သ့လၢကျဲဒ်လဲၣ်.
၄ ဝၤလၢအဆိကမိၣ်န့ၢ်တၢ်လၢ အမါအဂီၢ်တဂၤန့ၣ် တဂဲၤလိာ်ကွဲတၢ်အဲၣ်ဒီး တပာ်ဖျါထီၣ်တၢ်သူၣ်အိၣ်သးအိၣ် ပိာ်မုၣ်အဂၤလၢ ကျဲလၢအတကြၢးတဘၣ် လၢအနီၢ်ကစၢ်မ့ၢ်ဂ့ၤ လၢအ့ထၢၣ်နဲးအပူၤမ့ၢ်ဂ့ၤန့ၣ်ဘၣ်. (ယိၤဘး ၃၁:၁) တကးဒံးဘၣ် အဝဲတကွၢ်ဝဲပှာ်ယဲၤသန့လၢ အတကြၢးတဘၣ်တဖၣ်န့ၣ်ဘၣ်. အဝဲဆဲးတီဒီးအမါ မ့ၢ်လၢအအဲၣ်အမါ, အဲၣ်ယဟိဝၤယွၤ ဒီးသးဟ့တၢ်အၢအဃိလီၤ.—ဖး စံးထီၣ်ပတြၢၤ ၁၉:၁၄; ၉၇:၁၀ တက့ၢ်.
၅. ပိာ်မုၣ်တဂၤပာ်ဖျါထီၣ်ဝဲလၢ အဆိကမိၣ်န့ၢ်တၢ်လၢ အဝၤအဂီၢ်ကသ့ဒ်လဲၣ်.
၅ ယ့ၣ်ၡူးခရံာ်မ့ၢ် ပှၤတီခိၣ်ရိၤမဲတၢ်တဂၤလၢ အပှဲၤဒီးတၢ်အဲၣ်တၢ်ကွံအဃိ ဝၤတဖၣ်မ့ၢ်ကွၢ်လိမၤဒိးအီၤန့ၣ် ကညီဝဲလၢအမါက “ယူးယီၣ်” အီၤအဂီၢ်လီၤ. (အ့းဖ့းစူး ၅:၂၂-၂၅, ၃၃) ဒီးမါလၢအယူးယီၣ်ပာ်ကဲအဝၤန့ၣ် ဖဲအဝၤအတၢ်မၤအါလၢ တၢ်အိၣ်ဖှိၣ်အတၢ်ဖံးတၢ်မၤတဖၣ် မ့တမ့ၢ် ဘၣ်မၤဘၣ်လိာ်က့ၤ တၢ်ဂ့ၢ်ကီတဖၣ်အခါ အဝဲကနၢ်ပၢၢ်စၢၤအဝၤဒီး ကရ့ဒီးအီၤလၢ တၢ်အဲၣ်တၢ်ကွံအပူၤလီၤ. ပိာ်ခွါလၢ ကီၢ်ဘြံးတၢၣ်တဂၤတဲဝဲလၢ “ဘၣ်တဘျီယမါထံၣ်ဘၣ်ဝဲလၢ ယသးဘၣ်တံာ်တာ်လၢ တၢ်ဂ့ၢ်တမံၤမံၤအဃိလီၤ. ဖဲန့ၣ်အခါ အဝဲမၤထွဲဝဲ တၢ်ဟံးစုနဲၣ်ကျဲလၢ ကတိၤဒိ ၂၀:၅ အပူၤလီၤ. ဒ်သိးယကတဲဘၣ်အီၤ တၢ်ဂ့ၢ်လၢယတဲပၠးအီၤသ့တဖၣ်အဂီၢ် အဝဲအိၣ်ခိးဝဲ တၢ်ဆၢကတီၢ်လၢ အကြၢးအဘၣ်ဒီး “ထုးထီၣ်ဝဲ” တၢ်အိၣ်လၢယသးပူၤလီၤ.”
၆. ဒ်သိးပှၤဖိသၣ်တဖၣ် ကဆိကမိၣ်န့ၢ်တၢ်လၢ ပှၤဂၤအဂီၢ်ဒီး ပာ်ဖျါထီၣ်တၢ်သးကညီၤအဂီၢ် ပမၤစၢၤအဝဲသ့ၣ် ကသ့ဒ်လဲၣ်, ဒီးဖိသၣ်တဖၣ် ကဒိးန့ၢ်ဘၣ်အဘျုးဒ်လဲၣ်.
၆ မိၢ်ပၢ်တဖၣ် ပာ်လီၤဒိဂ့ၤတဲာ်ဘၣ်လၢ အဖိအဂီၢ်သ့ခီဖျိ ဆိကမိၣ်န့ၢ်တၢ်လၢ တဂၤဒီးတဂၤအဂီၢ်န့ၣ်လီၤ. တကးဒံးဘၣ် အဝဲသ့ၣ် ကဘၣ်သိၣ်လိအဖိတဖၣ်လၢ ကဆိကမိၣ်န့ၢ်တၢ်လၢ ပှၤဂၤအဂီၢ်ဒီး အိၣ်ဒီးတၢ်သးကညီၤလီၤ. အဒိ မိၢ်ပၢ်တဖၣ်သိၣ်လိအဖိ ဒ်သိးအဖိတဖၣ် သုတဟးဃ့ၢ်ဝ့ၤဝီၤလၢ ဘီမုၢ်ဘျီၣ်ဒိၣ်အပူၤတဂ့ၤသ့ဝဲလီၤ. မ့တမ့ၢ် အဝဲသ့ၣ်သိၣ်လိအဖိလၢ ဖဲဒီပုၢ်ဝဲၢ်တဖၣ် ရ့လိာ်အသးဒီးအီၣ်သကိးအီသကိးတၢ်အခါ ကပျဲပှၤသးပှၢ်တဖၣ် ဟံးန့ၢ်ဆိတၢ်အီၣ်လၢညါသ့လီၤ. ပှၤကိးဂၤဒဲးလၢ တၢ်အိၣ်ဖှိၣ်အပူၤန့ၣ် မၤစၢၤဝဲ မိၢ်ပၢ်တဖၣ်သ့ဝဲလီၤ. ဖဲပှၤဖိသၣ်တဖၣ် အိၣ်ဒီးတၢ်သ့ၣ်ညါလၢကမၤတၢ်တမံၤမံၤ လၢပှၤဂၤအဂီၢ် ဒ်သိးဒီးအဝဲသ့ၣ် အိးထီၣ်န့ၢ်ပဲတြီလၢပဂီၢ်အခါ ပကြၢးစံးပတြၢၤအဝဲသ့ၣ်လီၤ. ပမ့ၢ်မၤဒ်န့ၣ်န့ၣ် ပှၤဖိသၣ်တဖၣ် ကသးခုဒီး အဝဲသ့ၣ်ကသ့ၣ်ညါထီၣ်ဝဲလၢ “ဟ့ၣ်တၢ်န့ၣ် ဘၣ်တၢ်ဆိၣ်ဂ့ၤအါန့ၢ် ဒိးန့ၢ်တၢ်တက့ၢ်လီၤ.”—မၤတၢ် ၂၀:၃၅.
ဆိကမိၣ်န့ၢ်တၢ်လၢ ဒီပုၢ်ဝဲၢ်လၢတၢ်အိၣ်ဖှိၣ်အပူၤတဖၣ်အဂီၢ်
၇. ယ့ၣ်ၡူးဆိကမိၣ်န့ၢ်တၢ်လၢ ပှၤလၢအနၢ်တဟူတၢ်တဂၤအဂီၢ်ဒ်လဲၣ်, ဒီးပန့ၢ်ဘၣ်တၢ်မၤလိလၢ ယ့ၣ်ၡူးအအိၣ်ဒ်လဲၣ်.
၇ ဘၣ်တနံၤ ဖဲယ့ၣ်ၡူးလဲၤလၢ ဒ့းကးပလံၣ်အခါ “ပှၤဟဲစိာ်ပှၤလၢအနၢ်တအၢ ဒီးအုးအးကတာ်ပျ့ၤတဂၤ” လီၤ. (မၢ်ကူး ၇:၃၁-၃၅) ယ့ၣ်ၡူးတမၤဘျါအီၤလၢ ပှၤအါဂၤအမဲာ်ညါဘၣ်. ဘၣ်မနုၤအဃိလဲၣ်. ခီဖျိလၢ အဝဲအနၢ်တဟူတၢ်အဃိ ဘၣ်သ့ၣ်သ့ၣ် လၢပှၤအါဂၤအကျါန့ၣ် အဝဲအမဲာ်ကဆှးလီၤ. ယ့ၣ်ၡူး နၢ်ပၢၢ်န့ၢ်တၢ်လၢအဂီၢ်အဃိ ယ့ၣ်ၡူး “ဟံးန့ၢ်ဒီးဆှၢထီၣ်ကွံာ်အီၤ” ယံၤဒီးပှၤဂီၢ်မုၢ် ဒီးမၤဘျါအီၤလီၤ. ပဝဲသ့ၣ်တဖၣ်န့ၣ် ပမၤတၢ်လီၤလးတသ့ဘၣ် ဘၣ်ဆၣ် ပကြၢးဆိကမိၣ်န့ၢ်တၢ်လၢ ပဒီပုၢ်ဝဲၢ်တဖၣ် အတၢ်လိၣ်ဘၣ်ဒီး အတၢ်တူၢ်ဘၣ်အဂီၢ် ဒီးပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ်သ့ဝဲလီၤ. တၢ်မၢဖိပီလူးကွဲးဝဲလၢ “မ်ပကွၢ်လိာ်ပသးတဂၤဒီးတဂၤ, ဒ်သိးပကသဆၣ်ထီၣ်လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်.” (ဧ့ၤဘြံၤ ၁၀:၂၄) ယ့ၣ်ၡူးနၢ်ပၢၢ်ဝဲ ပှၤလၢအနၢ်တဟူတၢ်တဂၤ အတၢ်တူၢ်ဘၣ်ဒီး ရ့ဒီးအီၤလၢ တၢ်အဲၣ်တၢ်ကွံအပူၤလီၤ. အဃိ မ့ၢ်ဝဲတၢ်ဒိဂ့ၤတဲာ်ဘၣ်လၢ ပဂီၢ်လီၤ.
ပမ့ၢ်အိၣ်ဒီးတၢ်အဲၣ်န့ၣ် တသ့ဖဲအသ့ ပကမၤစၢၤပဒီပုၢ်ဝဲၢ်မုၣ်ခွါလၢ အသးပှၢ် မ့တမ့ၢ် အနီၢ်ခိအဂံၢ်စၢ်ဘါစၢ်တဖၣ်
၈, ၉. ပပာ်ဖျါထီၣ်လၢ ပကဟုကယာ်ပှၤသးပှၢ် ဒီးပှၤလၢအနီၢ်ခိအဂံၢ်ဘါစၢ်တဖၣ်အဂီၢ် ကသ့ဒ်လဲၣ်. (ဟ့ၣ်တၢ်အဒိတဖၣ်တက့ၢ်.)
၈ ဆိကမိၣ်န့ၢ်တၢ်လၢ ပှၤသးပှၢ်ဒီး ပှၤလၢအနီၢ်ခိ အဂံၢ်အဘါစၢ်တဖၣ်အဂီၢ်တက့ၢ်. တဘျီတခီၣ်န့ၣ် ပအဲၣ်ဒိးမၤဝံၤတၢ်မၤတခါချ့ချ့ ဒီးလၢာ်တၢ်ဆၢကတီၢ်စှၤ ဘၣ်ဆၣ် ပကဘၣ်သ့ၣ်နီၣ်ထီၣ်လၢ တၢ်ဂ့ၤတၢ်ဝါအရ့ဒိၣ်ကတၢၢ်လၢ ခရံာ်ဖိအဂီၢ်န့ၣ် မ့ၢ်ဝဲတၢ်အဲၣ်တၢ်ကွံလီၤ. (ယိၤဟၣ် ၁၃:၃၄, ၃၅) ပမ့ၢ်အိၣ်ဒီးတၢ်အဲၣ်န့ၣ် တသ့ဖဲအသ့ပကမၤစၢၤ ပှၤလၢအသးပှၢ် မ့တမ့ၢ် ပှၤလၢအနီၢ်ခိအဂံၢ်ဘါစၢ်တဖၣ် ဒ်သိးအဝဲသ့ၣ် ထီၣ်တၢ်အိၣ်ဖှိၣ်ဒီး စံၣ်တဲၤတဲလီၤတၢ်ကသ့အဂီၢ်လီၤ. မ့ၢ်တညီလၢပဂီၢ် မ့တမ့ၢ် အဝဲသ့ၣ် မၤဝဲမ့ၢ်တကဲအါအါဒၣ်လဲာ် ပကမၤစၢၤအဝဲသ့ၣ်လီၤ. (မးသဲ ၁၃:၂၃) မဲကၢၤ လၢအအိၣ်လၢ လ့ၣ်ဆီၣ်အလိၤတဂၤန့ၣ် အဟံၣ်ဖိဃီဖိဒီး ဒီပုၢ်ဝဲၢ်ခွါလၢတၢ်အိၣ်ဖှိၣ်အပူၤတဖၣ် မၤစၢၤအီၤအဃိ အဝဲစံးဘျုးဘၣ် အဝဲသ့ၣ်ဒိၣ်မးလီၤ. အဝဲတဲဝဲလၢ “ခီဖျိလၢ အဝဲသ့ၣ်မၤစၢၤယၤအဃိ ယထီၣ်ဘၣ်တၢ်အိၣ်ဖှိၣ်ကိးဘျီဒဲးဃၣ်ဃၣ် ဒီးယဟးစံၣ်တဲၤတဲလီၤဘၣ်တၢ် ထီဘိလီၤ. တၢ်လၢယမၤမုာ်ဒိၣ်ကတၢၢ်န့ၣ် လီၤဆီဒၣ်တၢ် မ့ၢ်ဝဲတၢ်စံၣ်တဲၤတဲလီၤတၢ်လၢ ကမျၢၢ်အမဲာ်ညါလီၤ.”
၉ လၢဘ့ၤသ့လးအါဖျၢၣ်အပူၤန့ၣ် ပဒီပုၢ်ဝဲၢ်မုၣ်ဒီပုၢ်ဝဲၢ်ခွါလၢ အသးပှၢ်မ့တမ့ၢ် အနီၢ်ခိအဂံၢ်အဘါစၢ်တဖၣ် အိၣ်ဝဲလီၤ. ဒီပုၢ်ဝဲၢ်လၢ အတီခိၣ်ရိၤမဲတၢ်လၢ တၢ်ကွၢ်ထွဲပှၤသးပှၢ်တဂၤန့ၣ် ပာ်ဖျါထီၣ်တၢ်အဲၣ်လၢ အဝဲသ့ၣ်အဖီခိၣ် ခီဖျိရဲၣ်လီၤကျဲၤလီၤဝဲလၢ အဝဲသ့ၣ်ကကွဲးလံာ်ဒီး သူလီတဲစိ ဒ်သိးကစံၣ်တဲၤတဲလီၤတၢ်အဂီၢ်လီၤ. ဒီပုၢ်ဝဲၢ် ဘ့(လ်) န့ၣ်အသးအိၣ် ၈၆ နံၣ်ဒီး စံၣ်တဲၤတဲလီၤတၢ် ခီဖျိကွဲးန့ၢ်ပှၤဂၤလံာ်လီၤ. အဝဲတဲဝဲလၢ “ပအိၣ်ဒီးတၢ်ခွဲးတၢ်ယာ်လၢ ပကစံၣ်တဲၤတဲလီၤတၢ် ခီဖျိကွဲးန့ၢ်ပှၤဂၤလံာ်အဃိ ပသးခုဒိၣ်မးလီၤ.” နဲစံၤ လၢအသးအိၣ်အနံၣ် ၉၀ ဃၣ်ဃၣ်တဂၤန့ၣ်တဲဝဲလၢ “ဖဲယကွဲးလံာ်ပရၢအခါ ယတထံၣ်အီၤဒ် ယကွဲးလံာ်ယိယိဖိတဘ့ၣ်ဒီး ထဲနုာ်အီၤလၢ လံာ်ဒၢပူၤဒီးဆှၢအီၤန့ၣ်ဘၣ်. ယထံၣ်အီၤဒ် တၢ်စံၣ်တဲၤတဲလီၤတၢ် တၢ်မၤတခါအသိးလီၤ. မ့ၢ်လၢပှၤဂၤတဖၣ် ကသ့ၣ်ညါထီၣ်တၢ်မ့ၢ်တၢ်တီလီၤ.” အံသဲ လၢအအိၣ်ဖျဲၣ်ထီၣ်ဖဲ ၁၉၂၁ န့ၣ်တဲဝဲလၢ “ယလိၤဆါယပျိၢ်ဆါ ထီဘိလီၤ, ဘၣ်တနံၤနံၤန့ၣ် ဆါဒိၣ်တလၢအဃိ ယသိးထီၣ်ယကူယကၤမး တညီဘၣ်.” ဘၣ်ဆၣ် အဝဲစံၣ်တဲၤတဲလီၤတၢ်လၢလီတဲစိဒီး မၤတၢ်က့ၤကဒါက့ၤလၢ လီတဲစိအပူၤဒီးပှၤတဘျုးဂၤညါလီၤ. ဘါဘရၤ လၢအသးအိၣ် ၈၅ နံၣ်တဂၤတဲဝဲလၢ “ခီဖျိလၢ ယတၢ်အိၣ်ဆူၣ်အိၣ်ချ့တဂ့ၤဘၣ်အဃိ ယကဟးစံၣ်တဲၤတဲလီၤတၢ်အဂီၢ် ကီဝဲဒိၣ်မးလီၤ. ဘၣ်ဆၣ် ယစံၣ်တဲၤတဲလီၤပှၤဂၤလၢ လီတဲစိသ့အဃိ ယစံးဘျုးဘၣ် ယဟိဝၤယွၤဒိၣ်မး.” လၢတနံၣ်ဃၣ်ဃၣ်အတီၢ်ပူၤ ပှၤသးပှၢ်လၢအလုၢ်ဒိၣ်ပှ့ၤဒိၣ်တဖၣ်လၢ ဘ့ၤသ့လးအံၤ စံၣ်တဲၤတဲလီၤတၢ်န့ၢ်ဝဲ အနၣ်ရံၣ် ၁,၂၂၈, ကွဲးဝဲလံာ်ပရၢ ၆,၂၆၅ ဘ့ၣ်, ကိးဝဲလီတဲစိအဘျီ ၂,၀၀၀ ဘျဲၣ်ဒီးဟ့ၣ်လီၤဝဲလံာ်လဲၢ် ၆,၃၁၅ ဘ့ၣ်လီၤ. လၢတၢ်န့ၣ်အဃိ ပနာ်သ့သပှၢ်ကတၢၢ်လၢ ယဟိဝၤယွၤကသးခုဝဲလီၤ.—ကတိၤဒိ ၂၇:၁၁.
၁၀. ဒ်သိးပဒီပုၢ်ဝဲၢ်တဖၣ် ကဒိးန့ၢ်ဘၣ်အဘျုးလၢ တၢ်အိၣ်ဖှိၣ်အဂီၢ် တသ့ဖဲအသ့ ပမၤစၢၤအဝဲသ့ၣ် ကသ့လၢကျဲဒ်လဲၣ်.
၁၀ ဖဲနလဲၤထီၣ် တၢ်အိၣ်ဖှိၣ်ရိဖှိၣ်အခါ ဆိကမိၣ်န့ၢ်တၢ်လၢပှၤဂၤအဂီၢ်တက့ၢ်. ပမ့ၢ်ဆိကမိၣ်န့ၢ်တၢ်လၢ ပဒီပုၢ်ဝဲၢ်တဖၣ်အဂီၢ်န့ၣ် တသ့ဖဲအသ့ ပကမၤစၢၤအဝဲသ့ၣ်ဒ်သိး အဝဲသ့ၣ် ကဒိးန့ၢ်ဘၣ်အဘျုး ဖဲတၢ်အိၣ်ဖှိၣ်အဆၢကတီၢ်လီၤ. ပမၤကသ့ဒ်လဲၣ်. ပမၤအီၤသ့ခီဖျိ တချုးလၢတၢ်အိၣ်ဖှိၣ်ထီၣ်ဒံးဘၣ်န့ၣ် ပကဟဲတုၤဆိ ဒ်သိးတကဲထီၣ်တၢ်တံာ်တာ် လၢအဝဲသ့ၣ်အဂီၢ် တဂ့ၤန့ၣ်လီၤ. တဘျီတခီၣ် လၢတၢ်ဂ့ၢ်တမံၤမံၤအဃိ ပစဲၤခံသ့လီၤ. ဘၣ်ဆၣ်ပမ့ၢ်စဲၤခံတလီၢ်လီၢ်န့ၣ် ပကဘၣ်ဆိကမိၣ်လၢ ကမၤဘၣ်ဒိ ပဒီပုၢ်ဝဲၢ်တဖၣ်ဒ်လဲၣ်ဒီး ဒ်သိးပကပာ်ဖျါထီၣ်လၢ ပသူၣ်အိၣ်သးအိၣ်အဝဲသ့ၣ်အဂီၢ် ပမၤတၢ်ဆီတလဲမနုၤတဖၣ်သ့လဲၣ်န့ၣ်လီၤ. ပကဘၣ်သ့ၣ်နီၣ်ထီၣ်လၢ ယဟိဝၤယွၤဒီး အဖိခွါယ့ၣ်ၡူးစ့ၢ်ကီး ကွဲမုာ်ပှၤလၢ ပကဟဲထီၣ်တၢ်အိၣ်ဖှိၣ်လီၤ. (မးသဲ ၁၈:၂၀) လၢတၢ်န့ၣ်အဃိ ပကြၢးပာ်ဖျါထီၣ် တၢ်ပာ်ကဲအဝဲသ့ၣ်ခီဖျိ ပဟဲတုၤလၢတၢ်အိၣ်ဖှိၣ် ဘၣ်ဆၢဘၣ်ကတီၢ်န့ၣ်လီၤ.
၁၁. ဘၣ်မနုၤအဃိ ဒီပုၢ်ဝဲၢ်လၢအဒိးန့ၢ်ဘၣ်မူဒါလၢ တၢ်အိၣ်ဖှိၣ်အတၢ်ရဲၣ်တၢ်ကျဲၤအပူၤန့ၣ် ကြၢးမၤထွဲဝဲ တၢ်ဟံးစုနဲၣ်ကျဲဖဲ ၁ ကရံၣ်သူး ၁၄:၄၀ န့ၣ်လဲၣ်.
၁၁ ပမ့ၢ်ဆိကမိၣ်န့ၢ်တၢ်လၢ ပဒီပုၢ်ဝဲၢ်တဖၣ်အဂီၢ်န့ၣ် ပကမၤထွဲ လံာ်စီဆှံအတၢ်ဟံးစုနဲၣ်ကျဲလၢအမ့ၢ် “တၢ်ခဲလၢာ်န့ၣ်, မ်ပှၤမၤဂ့ၤဂ့ၤဘၣ်ဘၣ်, တဂ့ၢ်တဂ့ၢ်တက့ၢ်.” (၁ ကရံၣ်သူး ၁၄:၄၀) ပဒီပုၢ်ဝဲၢ်လၢ အဒိးန့ၢ်ဘၣ်မူဒါလၢ တၢ်အိၣ်ဖှိၣ်အတၢ်ရဲၣ်တၢ်ကျဲၤပူၤတဖၣ် မ့ၢ်မၤဝံၤဝဲအမူဒါ ဒ်တၢ်ဆၢကတီၢ်လၢ ပှၤပာ်ပနီၣ်အီၤအသိးန့ၣ် မ့ၢ်ဒၣ်အဝဲမၤထွဲဝဲ တၢ်ဟံးစုနဲၣ်ကျဲအံၤလီၤ. ဒီးမ့ၢ်ဝဲအဆိကမိၣ်န့ၢ်တၢ်လၢ ဒီပုၢ်ဝဲၢ်လၢ အကဖီၣ်မူဒါလၢခံတဂၤအဂီၢ် တကးဒံးဘၣ် အဆိကမိၣ်န့ၢ်တၢ်လၢ တၢ်အိၣ်ဖှိၣ်ဖိခဲလၢာ်အဂီၢ်စ့ၢ်ကီးလီၤ. ဆိကမိၣ်ကွၢ်လၢ တၢ်အိၣ်ဖှိၣ်မ့ၢ်ဝံၤစဲၤခံန့ၣ် ကမၤဘၣ်ဒိ ပှၤအဂၤတဖၣ်ဒ်လဲၣ်န့ၣ်တက့ၢ်. ပဒီပုၢ်ဝဲၢ်တနီၤန့ၣ် ကဘၣ်က့ၤနီကါဖးယံၤ ဒီးတနီၤန့ၣ် ကဘၣ်ဒိးဝဲ ဘၢး(စ်)ကါ မ့တမ့ၢ် လ့ၣ်မ့ၣ်အူလီၤ. ဒီးဒီပုၢ်ဝဲၢ်အဂၤတနီၤန့ၣ် အိၣ်ဒီးအသးသမူတံၤသကိးလၢ အတစူၢ်တနာ်တၢ်ဘၣ် ဒီးအသးသမူတံၤသကိး အဲၣ်ဒိးလၢအဝဲသ့ၣ် ကဟဲက့ၤတုၤဆူဟံၣ် ဘၣ်ဆၢဘၣ်ကတီၢ်လီၤ.
၁၂. ဘၣ်မနုၤအဃိ တၢ်အိၣ်ဖှိၣ်သးပှၢ်တဖၣ် ကြၢးဒိးန့ၢ်ပတၢ်ပာ်ကဲဒီး ပတၢ်အဲၣ်န့ၣ်လဲၣ်. (ကွၢ်တၢ်လွံၢ်နၢၣ်လၢ “ ဆိကမိၣ်န့ၢ်တၢ်လၢ ပှၤလၢအတီခိၣ်ရိၤမဲတၢ်အဂီၢ်” တက့ၢ်.)
၁၂ တၢ်အိၣ်ဖှိၣ်သးပှၢ်တဖၣ်န့ၣ် ဂုာ်ကျဲးစၢးမၤတၢ်လၢ တၢ်အိၣ်ဖှိၣ်အဂီၢ်ဒီး တၢ်စံၣ်တဲၤတဲလီၤတၢ်မၤအပူၤအဃိ ပကြၢးပာ်ကဲဒီးအဲၣ်အဝဲသ့ၣ်လီၤ. (ဖး ၁ သ့းစၤလနံ ၅:၁၂, ၁၃ တက့ၢ်.) ပစံးဘျုးဘၣ်အဝဲသ့ၣ်လၢ တၢ်ခဲလၢာ်လၢ အမၤန့ၢ်ပှၤအဃိလီၤ. ဒီးအဝဲသ့ၣ်မ့ၢ်ပှၤလၢအ ‘ဆိးသီလၢ ပသးအဂီၢ်, ဒ်ပှၤလၢအကဘၣ်စံးဆၢတၢ်အသိး’ အဃိ ပပာ်ဖျါထီၣ်လၢ ပစံးဘျုးဘၣ်အဝဲသ့ၣ် ခီဖျိလၢ ပဒိကနၣ်အကလုၢ် ဒီးဆီၣ်ထွဲမၤစၢၤအဝဲသ့ၣ်လီၤ.—ဧ့ၤဘြံၤ ၁၃:၇, ၁၇.
ဆိကမိၣ်န့ၢ်တၢ်လၢ ပှၤလၢနလဲၤစံၣ်တဲၤတဲလီၤအီၤတဖၣ်အဂီၢ်
၁၃. ဘၣ်ဃးဒီး ယ့ၣ်ၡူးရ့ဒီးပှၤဂၤန့ၣ် ပမၤလိန့ၢ်တၢ်မနုၤလဲၣ်.
၁၃ ဘၣ်ဃးဒီးယ့ၣ်ၡူးန့ၣ် ဝံယၡါယၤတဲဆိပာ်စၢၤဝဲလၢ “တပိၢ်တဘိလၢအသဘှံးန့ၣ် တမၤတဲာ်ကွံာ်ဘၣ်ဝဲဘၣ်, ဒီးတမၤပံာ်ဘၣ်မ့ၣ်အူဒၢအပှံာ်လၢ အကပီၤပံာ်လ့ပံာ်လ့ဘၣ်.” (ယၡါယၤ ၄၂:၃) ခီဖျိလၢ ယ့ၣ်ၡူးအဲၣ်ပှၤအဂၤအဃိ အဝဲအိၣ်ဒီးတၢ်ဒိသူၣ်ဒိသးလၢ ပှၤအဂၤအဖီခိၣ်လီၤ. ယ့ၣ်ၡူးနၢ်ပၢၢ်ဝဲ ပှၤလၢအသူၣ်ဟးဂီၤသးဟးဂီၤဒီး အဂံၢ်အဘါလီၤစၢ်ဒ်သိး “တပိၢ်တဘိလၢအသဘှံး” မ့တမ့ၢ် “မ့ၣ်အူဒၢအပှံာ်လၢ အကပီၤပံာ်လ့ပံာ်လ့” အဃိ ယ့ၣ်ၡူးရ့ဒီးအဝဲသ့ၣ်လၢ တၢ်အဲၣ်တၢ်ကွံဒီး တၢ်သူၣ်စူၤသးစူၤအပူၤလီၤ. ပှၤဖိသၣ်တဖၣ်ဒၣ်လဲာ်န့ၣ် အဲၣ်ဒိးဟဲဆူယ့ၣ်ၡူးအအိၣ်လီၤ. (မၢ်ကူး ၁၀:၁၄) ပဝဲသ့ၣ်တဖၣ်န့ၣ် ပနၢ်ပၢၢ်ပှၤဂၤ မ့တမ့ၢ် သိၣ်လိပှၤအဂၤဒ်သိး ယ့ၣ်ၡူးတသ့ဘၣ်. ဘၣ်ဆၣ် ပပာ်ဖျါထီၣ်လၢ ပဆိကမိၣ်န့ၢ်တၢ်လၢ ပှၤလၢပလဲၤစံၣ်တဲၤတဲလီၤအီၤတဖၣ်အဂီၢ်သ့ ခီဖျိပဆိကမိၣ်ထံ ဘၣ်ဃးဒီး ပကတဲတၢ်ဒီးအဝဲသ့ၣ် ဒ်လဲၣ်, ပကလဲၤလၢ ဆၢကတီၢ်ဖဲလဲၣ် ဒီးပကတဲတၢ်ဒီးအဝဲသ့ၣ် ယံာ်ထဲလဲၣ်န့ၣ်လီၤ.
ပတၢ်ကတိၤဒီး ပကလုၢ်န့ၣ် ကဘၣ်ပာ်ဖျါထီၣ်လၢ ပအဲၣ်ပှၤအဂၤတဖၣ်ဒီး သူၣ်အိၣ်သးအိၣ်အဝဲသ့ၣ်
၁၄. ပကဘၣ်တဲတၢ်ဒီးပှၤဂၤဒ်လဲၣ်န့ၣ် ဘၣ်မနုၤအဃိ ပဘၣ်ဆိကမိၣ်ထံအီၤလဲၣ်.
၁၄ ပကြၢးတဲတၢ်ဒီးပှၤဂၤဒ်လဲၣ်. ဆၢကတီၢ်ခဲအံၤ ပှၤလၢအကကွဲၢ်တဖၣ်န့ၣ် “တၢ်ဘှံးအဝဲသ့ၣ်အသး, ဒီးလီၤပြံလီၤပြါဝဲ” ခီဖျိလၢ ထံကီၢ်ပဒိၣ်ပပှၢ်တဖၣ်, ပှၤမၤစံပွါယ့တဖၣ် ဒီးတၢ်ဘူၣ်တၢ်ဘါခိၣ်နၢ်တဖၣ် မၤတၢ်တတီတလိၤအဃိလီၤ. (မးသဲ ၉:၃၆) လၢတၢ်န့ၣ်အဃိ ပှၤအါဂၤန့ၣ် တနာ်အီၣ်ပှၤအဂၤလၢၤဘၣ် ဒီးအတၢ်မုၢ်လၢ် လီၤမၢ်ကွံာ်ဝဲလီၤ. အဃိ ပတၢ်ကတိၤဒီး ပကလုၢ်န့ၣ် ကဘၣ်ပာ်ဖျါထီၣ်လၢ ပအိၣ်ဒီးတၢ်သးကညီၤဒီး ပသးအိၣ်အဝဲသ့ၣ်လီၤ. ပှၤအါဂၤ အဲၣ်ဒိးဒိကနၣ်ဝဲ ပတၢ်သးခုကစီၣ်န့ၣ် တမ့ၢ်ထဲလၢ ပသူလံာ်စီဆှံအဃိဘၣ် မ့ၢ်လၢပပာ်ကဲဒီးသူၣ်အိၣ်သးအိၣ် အဝဲသ့ၣ်နီၢ်နီၢ်အဃိ စ့ၢ်ကီးလီၤ.
၁၅. ပပာ်ဖျါထီၣ်လၢ ပဆိကမိၣ်န့ၢ်တၢ်လၢ ပှၤလၢပလဲၤစံၣ်တဲၤတဲလီၤအီၤတဖၣ်အဂီၢ် ကသ့လၢကျဲဒ်လဲၣ်.
၁၅ ကျဲလၢပပာ်ဖျါထီၣ်လၢ ပဆိကမိၣ်န့ၢ်တၢ်လၢ ပှၤလၢပတၢ်စံၣ်တဲၤတဲလီၤအီၤတဖၣ်အဂီၢ်သ့န့ၣ် အိၣ်ဝဲအါမးလီၤ. ဖဲပသံကွၢ်အဝဲသ့ၣ် တၢ်သံကွၢ်အခါ ပကဘၣ်သံကွၢ်လၢ တၢ်အဲၣ်တၢ်ကွံဒီးတၢ်ပာ်ကဲအပူၤလီၤ. ပှၤလဲၤလၢညါတဂၤတဲဝဲလၢ ဖဲအစံၣ်တဲၤတဲလီၤတၢ်အခါ ပှၤဖဲန့ၣ်တဖၣ် မဲာ်ဆှးသ့အဃိ အဝဲတသံကွၢ်ဝဲ တၢ်သံကွၢ်လၢအကီဘၣ်. အဝဲတသံကွၢ်ဝဲ တၢ်သံကွၢ်ဒ်သိးဒီး “မ့ၢ်နသ့ၣ်ညါ ကစၢ်ယွၤအမံၤဧါ” မ့တမ့ၢ် “ယွၤအဘီအမုၢ် မ့ၢ်တၢ်မနုၤလဲၣ်” န့ၣ်ဘၣ်. လၢတၢ်န့ၣ်အလီၢ် အဝဲတဲဝဲလၢ “ယထံၣ်ဘၣ်ကစၢ်ယွၤအမံၤလၢ လံာ်စီဆှံအပူၤ. ယဖးပၠးနၤကသ့ဧါ.” ခီဖျိလၢ ပှၤတဂၤဒီးတဂၤ အကလုာ်ဒီးတၢ်ဆဲးတၢ်လၤ တဒ်သိးလိာ်အသးဘၣ်အဃိ ပတဲဒ်အံၤထီဘိတသ့ဘၣ်. ဘၣ်ဆၣ် ဖဲပလဲၤစံၣ်တဲၤတဲလီၤတၢ်အခါ ထီဘိန့ၣ် ပကြၢးရ့ဒီးပှၤဂၤလၢ တၢ်အဲၣ်ဒီးတၢ်ပာ်ကဲအပူၤလီၤ. ဒ်သိးပကမၤဒ်န့ၣ်အဂီၢ် ပကဘၣ်ဂုာ်ကျဲးစၢးဃုသ့ၣ်ညါ ပှၤလၢပတၢ်စံၣ်တဲၤတဲလီၤ လီၢ်ကဝီၤအပူၤတဖၣ်အဂ့ၢ် ဂ့ၤဂ့ၤလီၤ.
၁၆. တချုးပလဲၤစံၣ်တဲၤတဲလီၤတၢ်အခါ ပကလဲၤလၢ ဆၢကတီၢ်ဖဲလဲၣ်န့ၣ် ဘၣ်မနုၤအဃိ ပကဘၣ်ဆိကမိၣ်န့ၢ်တၢ်လၢ ဟံၣ်ကစၢ်အဂီၢ်လဲၣ်.
၁၆ ပကြၢးလဲၤဆူပှၤဂၤအအိၣ် လၢဆၢကတီၢ်ဖဲလဲၣ်. ဖဲပလဲၤတဟံၣ်ဘၣ်တဟံၣ်အခါ တမ့ၢ်လၢဟံၣ်ကစၢ်ကွဲမုာ်ပှၤအဃိ အဝဲသ့ၣ်တအဲၣ်ဒိးတဲတၢ်ဒီးပှၤအါအါဘၣ်. အဃိ အရ့ဒိၣ်ဒိၣ်မးလၢ ပကလဲၤဆူအဝဲသ့ၣ်အအိၣ် ဖဲတၢ်ဆၢကတီၢ်လၢ အဝဲသ့ၣ် ကအဲၣ်ဒိးတဲတၢ်ဒီးပှၤအခါန့ၣ်လီၤ. (မးသဲ ၇:၁၂) အဒိ လၢနလီၢ်ကဝီၤအပူၤ မ့ၢ်တုၤလၢမုၢ်ဃုနံၤ, အိၣ်ဘှံးနံၤန့ၣ် ပှၤဖဲန့ၣ်တဖၣ်မံပၢၢ်ထီၣ်စဲၤခံဧါ. မ့မ့ၢ်ဒ်န့ၣ်န့ၣ် နစးထီၣ်ဟးစံၣ်တဲၤတဲလီၤဆိတၢ်လၢ ကျဲမုၢ်ခိၣ်, စံၣ်တဲၤတဲလီၤတၢ်တပူၤလၢ်လၢ် မ့တမ့ၢ် နက့ၤကဒါက့ၤဆူ ပှၤလၢအချုးတဖၣ်အအိၣ်သ့ဝဲလီၤ.
၁၇. တချုးပလဲၤစံၣ်တဲၤတဲလီၤတၢ်အခါ ပကတဲတၢ်ယံာ်ထဲလဲၣ်န့ၣ် ဘၣ်မနုၤအဃိ ပကဘၣ်ဆိကမိၣ်န့ၢ်တၢ်လၢ ဟံၣ်ကစၢ်အဂီၢ်လဲၣ်.
၁၇ ပကြၢးတဲတၢ်ဒီး ဟံၣ်ကစၢ် ယံာ်ထဲလဲၣ်. ပှၤအါဂၤန့ၣ် အတၢ်မၤအါအဃိ ဖဲပလဲၤစံၣ်တဲၤတဲလီၤအဝဲသ့ၣ် လီၤဆီဒၣ်တၢ်အဆိကတၢၢ်တဘျီအခါ မ့ၢ်သ့န့ၣ် တဘၣ်အိၣ်ယံာ်ယံာ်တဂ့ၤ. ပမ့ၢ်တဲတၢ်တစိၢ်ဖိန့ၣ် ဂ့ၤဒိၣ်န့ၢ်ဒံးပတဲတၢ်ဖးယံာ်ဒံး. (၁ ကရံၣ်သူး ၉:၂၀-၂၃) ဟံၣ်ကစၢ်မ့ၢ်သ့ၣ်ညါဝဲလၢ ပနၢ်ပၢၢ်လၢ အဝဲသ့ၣ် အိၣ်ဒီးအတၢ်မၤန့ၣ် ဖဲပလဲၤဟးအိၣ်သကိးအီၤ လၢခံတဘျီအခါ အဝဲကအဲၣ်ဒိးဒိကနၣ်ပှၤလီၤ. ပမ့ၢ်ပာ်ဖျါထီၣ် တၢ်ဂ့ၤတၢ်ဝါလၢ အဟဲလၢကစၢ်ယွၤအသးစီဆှံန့ၣ် ပကကဲထီၣ် “ယွၤအပှၤမၤသကိးတၢ်” လီၤ. လၢတၢ်န့ၣ်အဃိ ယဟိဝၤယွၤကသူပှၤ ဒ်သိးပှၤဂၤကသ့ၣ်ညါထီၣ် တၢ်မ့ၢ်တၢ်တီအဂီၢ်လီၤ.—၁ ကရံၣ်သူး ၃:၆, ၇, ၉.
၁၈. ဖဲပဆိကမိၣ်န့ၢ်တၢ်လၢ ပှၤဂၤအဂီၢ်အခါ ပကဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်.
၁၈ ပဝဲခဲလၢာ် တသ့ဖဲအသ့ မ်ပဆိကမိၣ်န့ၢ်တၢ်လၢ ပဟံၣ်ဖိဃီဖိတဖၣ်, ပဒီပုၢ်ဝဲၢ်မုၣ်ခွါတဖၣ် ဒီးပှၤလၢပလဲၤစံၣ်တဲၤတဲလီၤအီၤတဖၣ် အဂီၢ်န့ၣ်တက့ၢ်. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤလၢ ခဲအံၤဒီးခါဆူညါလီၤ. လံာ်စီဆှံတဲဝဲလၢ “ပှၤလၢအဆိကမိၣ်တၢ်လၢ ပှၤဖှီၣ်ဖိယာ်ဖိအဂီၢ်န့ၣ် ဘၣ်ဆိၣ်ဂ့ၤဝဲလီၤ. ယွၤကမၤပူၤမၤဖျဲးအီၤလၢ တၢ်ကိၢ်တၢ်ဂီၤအမုၢ်တနံၤန့ၣ်လီၤ. ယွၤကကဟုဘံၣ်ကယာ်ဘၢအီၤ ဒီးဒုးမူအီၤန့ၣ်လီၤ. အဝဲကဘၣ် တၢ်ကိးအီၤလၢ ပှၤဘၣ်ဆိၣ်ဂ့ၤလၢ ထံဧိၤကီၢ်ဧိၤအပူၤန့ၣ်လီၤ.”—စံးထီၣ်ပတြၢၤ ၄၁:၁, ၂, ခ့ခါစှီၤကျိာ်.
