ပှၤလၢအဘူၣ်ထီၣ်ဘါထီၣ် ယွၤလၢအမ့ၢ် တၢ်သးခုကစၢ်န့ၣ် အဝဲသ့ၣ်ကသူၣ်ခုသးခု
“ပှၤဂီၢ်မုၢ်လၢ အကစၢ်ယွၤမ့ၢ်ယဟိဝၤန့ၣ် သူၣ်ခုသးခုဝဲလီၤ.”—စံးထီၣ်ပတြၢၤ ၁၄၄:၁၅, NWT
၁. ဘၣ်မနုၤအဃိ ယဟိဝၤပှၤအုၣ်အသးတဖၣ် သးခုဝဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ယဟိဝၤပှၤအုၣ်အသးတဖၣ် မ့ၢ်ပှၤလၢအသးခုလီၤ. ဖဲအဝဲသ့ၣ်ထံၣ်လိာ်သးလၢ တၢ်အိၣ်ဖှိၣ်ရိဖှိၣ်, ကဝီၤအတၢ်အိၣ်ဖှိၣ်, အီၣ်သကိးတၢ် ဒီးတဲသကိးတၢ်အခါ အဝဲသ့ၣ်ပှဲၤဒီးတၢ်နံၤတၢ်အ့လီၤ. ဘၣ်မနုၤအဃိ အဝဲသ့ၣ်ပှဲၤဒီးတၢ်သးခုလဲၣ်. ခီဖျိလၢ အဝဲသ့ၣ် သ့ၣ်ညါ ယဟိဝၤယွၤလၢအမ့ၢ် “တၢ်သးခုကစၢ်” တ ဂၤအံၤအဃိလီၤ. (၁ တံၤမသ့း ၁:၁၁, NWT; စံးထီၣ်ပတြၢၤ ၁၆:၁၁) ယဟိဝၤယွၤမ့ၢ် တၢ်သးခုအဂံၢ်ခီၣ်ထံးအဃိ အဝဲအဲၣ်ဒိးလၢ ပဝဲခဲလၢာ်ကသူၣ်ခုသးခုလီၤ. လၢတၢ်န့ၣ်အဃိ ဒ်သိးပကသူၣ်ခုသးခုအဂီၢ် အဝဲဟ့ၣ်ပှၤတၢ်အါမံၤလီၤ. * (ကွၢ်တၢ်ဂ့ၢ်အဘျဲၣ်တက့ၢ်.)—၅ မိၤၡ့ ၁၂:၇; စံၣ်တဲၤတဲလီၤတၢ် ၃:၁၂, ၁၃.
၂, ၃. (က) တၢ်သးခုန့ၣ် အခီပညီမ့ၢ်မနုၤလဲၣ်. (ခ) ပကသးခုအဂီၢ် ဘၣ်မနုၤအဃိကီဝဲလဲၣ်.
၂ မ့မ့ၢ်နၤမီၣ်, မ့ၢ်နအိၣ်ဒီးတၢ်သူၣ်ခုသးခုဧါ. ပအိၣ်ဒီးတၢ်သးခုန့ၣ် အခီပညီမ့ၢ်ဝဲ ပတူၢ်ဘၣ်မုာ်ဒိၣ်မး, ပသူၣ်မံသးမုာ်လၢ ပတၢ်အိၣ်မူအပူၤ ဒီးပအိၣ်ဒီးတၢ်သူၣ်ခုသးခုအါမးန့ၣ်လီၤ. လံာ်စီဆှံပာ်ဖျါထီၣ်ဝဲလၢ ပှၤလၢယဟိဝၤယွၤဆိၣ်ဂ့ၤအီၤန့ၣ် ကပှဲၤဒီးတၢ်သူၣ်ခုသးခုနီၢ်နီၢ်လီၤ. မ့မ့ၢ်ဒ်န့ၣ်န့ၣ် ဘၣ်မနုၤအဃိ မုၢ်ဆါတနံၤအံၤ ပကအိၣ်ဒီးတၢ်သူၣ်ခုသးခုအဂီၢ် ကီဝဲလဲၣ်.
၃ ဖဲပအိၣ်ဒီးတၢ်သူၣ်ကိၢ်သးဂီၤ ဒ်သိးဒီး ပှၤလၢပအဲၣ်ဘၣ်တဂၤသံ မ့တမ့ၢ် ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤ ဒီးဖဲပတၢ်ဆီဟံၣ်ဆီဃီကတၢၢ် မ့တမ့ၢ် ပတၢ်မၤတအိၣ်လၢၤဘၣ်အခါ ပကသးခုအဂီၢ် ကကီဝဲလီၤ. တကးဒံးဘၣ် လၢပဟံၣ်န့ၣ် တၢ်ဃူတၢ်ဖိးမ့ၢ်တအိၣ်ဘၣ် ဒီးမ့ၢ်အိၣ်ထဲတၢ်အ့ၣ်လိာ်ဆိးက့, ပသကိးလၢ တၢ်မၤလီၢ် မ့တမ့ၢ် ပတံၤသကိးလၢကၠိတဖၣ် မ့ၢ်ဒုၣ်ဒွဲၣ်ပှၤ ဒီးခီဖျိလၢ ပမၤယဟိဝၤယွၤအတၢ်မၤအဃိ ပှၤမ့ၢ်မၤအၢမၤနးပှၤ ဒီးထၢနုာ်ပှၤလၢဃိာ်ပူၤန့ၣ် ပကအိၣ်ဒီးတၢ်သးခုအဂီၢ် ကီဝဲလီၤ. ဒီးပတၢ်အိၣ်ဆူၣ်အိၣ်ချ့မ့ၢ်တဂ့ၤဘၣ်, ပမ့ၢ်အိၣ်ဒီးတၢ်ဆါလၢ အဘျါတသ့ဘၣ် ဒီးပမ့ၢ်အိၣ်ဒီးတၢ်သးဟးဂီၤတၢ်ဆါန့ၣ် ပကအိၣ်ဒီးတၢ်သးခုအဂီၢ် တညီစ့ၢ်ကီးဘၣ်. ဘၣ်ဆၣ် သ့ၣ်နီၣ်ထီၣ်လၢ ယ့ၣ်ၡူးခရံာ်န့ၣ်မ့ၢ်ဝဲ “ပှၤလၢအဘၣ်ဆိၣ်ဂ့ၤဆိၣ်ဝါ, လၢအမ့ၢ်ကစၢ်နီၢ်နီၢ်တဂၤ” မ့တမ့ၢ် ပှၤပၢတၢ် လၢအမၤမုာ်ထီၣ် ဒီးမၤသးခုပှၤသးတက့ၢ်. (၁ တံၤမသ့း ၆:၁၅; မးသဲ ၁၁:၂၈-၃၀) ခီဖျိလၢ ပအိၣ်ဘၣ်လၢ ဟီၣ်ခိၣ်လၢ မုၣ်ကီၤလံၢ်ပၢဝဲအဃိ ပထံၣ်ဘၣ်တၢ်ကီတၢ်ခဲအါမးလီၤ. ဘၣ်ဆၣ် ဖဲယ့ၣ်ၡူး စံၣ်တဲၤတဲလီၤတၢ်လၢကစၢၢ်ခိၣ်အခါ အဝဲယၢၤထီၣ်ဝဲ တၢ်ဂ့ၤတၢ်ဝါတနီၤ လၢကမၤစၢၤပှၤဒ်သိး ပကဆဲးအိၣ်ဒီးတၢ်သးခုအဂီၢ်လီၤ.
ပတၢ်ရ့လိာ်သးဒီးယဟိဝၤယွၤ မ့ၢ်တအိၣ်ဘၣ်န့ၣ် ပသးခုတသ့ဘၣ်
၄, ၅. ဒ်သိးပကအိၣ်ဒီးတၢ်သးခု ဒီးပကဆဲးသးခုအဂီၢ် ပမၤတၢ်မနုၤသ့ဝဲလဲၣ်.
၄ တၢ်ဂ့ၤတၢ်ဝါလၢ ယ့ၣ်ၡူး ယၢၤထီၣ်ဝဲအဆိကတၢၢ်တခါန့ၣ် မ့ၢ်ဝဲတၢ်ဂ့ၤတၢ်ဝါလၢ အရ့ဒိၣ်တခါလီၤ. အဝဲတဲဝဲ “ပှၤလၢသ့ၣ်ညါလီၤအသးလၢ အလိၣ်ဘၣ်ကစၢ်ယွၤ အတၢ်ဟံးစုနဲၣ်ကျဲန့ၣ် သးခုဝဲလီၤ. မ့ၢ်လၢမူခိၣ်အဘီအမုၢ်န့ၣ် မ့ၢ်ပှၤတဖၣ်န့ၣ်အတၢ်လီၤ.” (မးသဲ ၅:၃, NWT) ပမ့ၢ်သ့ၣ်ညါလၢ ပလိၣ်ဘၣ်ကစၢ်ယွၤအတၢ်ဟံးစုနဲၣ်ကျဲန့ၣ် မ့ၢ်ဝဲပသ့ၣ်ညါလီၤပသးလၢ ပကဘၣ်သ့ၣ်ညါကစၢ်ယွၤအဂ့ၢ် ဒီးပလိၣ်ဘၣ်အတၢ်မၤစၢၤဒီး အတၢ်ဟံးစုနဲၣ်ကျဲလီၤ. ပသ့ၣ်ညါလီၤပသးလၢ ပလိၣ်ဘၣ် ကစၢ်ယွၤအတၢ်ဟံးစုနဲၣ်ကျဲန့ၣ် ပပာ်ဖျါထီၣ်သ့လၢ ကျဲဒ်လဲၣ်. ပပာ်ဖျါထီၣ်သ့ခီဖျိ ပမၤလိလံာ်စီဆှံ, ဒိကနၣ် အတၢ်မၤလိာ်ဒီး ပတၢ်ဘူၣ်ထီၣ်ဘါထီၣ်အီၤန့ၣ် ကဘၣ်မ့ၢ်ဝဲနီၣ်ဂံၢ်တၢ လၢပတၢ်အိၣ်မူအပူၤန့ၣ်လီၤ. ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပကအိၣ်ဒီးတၢ်သးခုလီၤ. ပတၢ်နာ်ဘၣ်ဃးဒီး ကစၢ်ယွၤအတၢ်တိာ်ပာ်လၢ ကဟဲလၢထီၣ်ပှဲၤထီၣ်ဝဲလၢ ခါဆူညါန့ၣ် ကဂၢၢ်ကျၢၤထီၣ်ဝဲလီၤ. ဒီး “တၢ်မုၢ်လၢ်လၢ အဘၣ်တၢ်ဆိၣ်ဂ့ၤ” မ့တမ့ၢ် တၢ်မုၢ်လၢ်လၢ အပှဲၤဒီးတၢ်သးခု လၢပထံၣ်ဘၣ်လၢ လံာ်စီဆှံအပူၤန့ၣ် ကမၤစၢၤပှၤဒ်သိးပကအိၣ်ဒီးတၢ်တူၢ်န့ၢ်ခီၣ်ကဲ ဖဲပထံၣ်ဘၣ် တၢ်ကီတၢ်ခဲအခါန့ၣ်လီၤ.—တံတူး ၂:၁၃.
၅ လၢပတၢ်အိၣ်မူအပူၤ ပမ့ၢ်အဲၣ်ဒိးအိၣ်ဒီး တၢ်သူၣ်ခုသးခုန့ၣ် တၢ်မ့ၢ်ကဲထီၣ်အသးဒ်လဲၣ်ဂ့ၤဒ်လဲၣ်ဂ့ၤ ပကဘၣ်ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤန့ၣ်လီၤ. တၢ်မၢဖိပီလူးကွဲးဝဲလၢ “သးခုလၢ ကစၢ်အပူၤတဘိယူၢ်ဃီတက့ၢ်. ယစံးကဒီး, သးခုတက့ၢ်.” (ဖံလံးပံၤ ၄:၄) ဒ်သိးပကဲထီၣ် ယဟိဝၤယွၤအတံၤသကိးလၢ အဂ့ၤတဂၤကသ့အဂီၢ် ပကဘၣ်အိၣ်ဒီးတၢ်ကူၣ်သ့လီၤ. လံာ်စီဆှံတဲဝဲလၢ ‘ပှၤလၢအထံၣ်န့ၢ်တၢ်ကူၣ်သ့, ဒီးပှၤလၢအမၤန့ၢ် တၢ်သူၣ်ဆးသးဆးန့ၣ် သးခုဝဲလီၤ. ကဲထီၣ်ဝဲလၢတၢ်မူအသ့ၣ်တထံး လၢကယဲၢ်ပှၤလၢအဟံးန့ၢ်အီၤအဂီၢ်, ဒီးပှၤလၢအဟံးဃာ်အီၤန့ၣ် သးခုဝဲလီၤ.’—ကတိၤဒိ ၃:၁၃, ၁၈.
ဒ်သိးပကဆဲးသးခုအဂီၢ် အရ့ဒိၣ်လၢပကဘၣ် ဆဲးမၤထွဲတၢ်လၢ ပမၤလိဘၣ်တဖၣ်
၆. ဒ်သိးပကအိၣ်ဒီးတၢ်သးခုအဂီၢ် ပဘၣ်မၤတၢ်မနုၤလဲၣ်.
၆ ဒ်သိးပကဆဲးအိၣ်ဒီးတၢ်သးခုအဂီၢ် အရ့ဒိၣ်လၢပကဘၣ်မၤထွဲ တၢ်လၢပမၤလိဘၣ်လၢ လံာ်စီဆှံအပူၤန့ၣ်လီၤ. ပကမၤဒ်န့ၣ်အဂီၢ် အရ့ဒိၣ်ထဲလဲၣ်န့ၣ် ယ့ၣ်ၡူးပာ်ဖျါထီၣ်ဝဲခီဖျိ အဝဲတဲဝဲ ‘တၢ်န့ၣ်တဖၣ် သုမ့ၢ်သ့ၣ်ညါ ဒီးသုမ့ၢ်မၤအီၤဒီး, သုကသးခု’ လီၤ. (ယိၤဟၣ် ၁၃:၁၇; ဖး ယၤကိာ် ၁:၂၅ တက့ၢ်.) ပမ့ၢ်အဲၣ်ဒိးမၤလၢပှဲၤ ပနီၢ်သးအတၢ်လိၣ်ဘၣ်ဒီး အိၣ်ဒီးတၢ်သူၣ်ခုသးခုနီၢ်နီၢ်န့ၣ် အရ့ဒိၣ်လၢ ပကဘၣ်မၤဒ်န့ၣ်လီၤ. ပအိၣ်ဒီးတၢ်ကီတၢ်ခဲအါမံၤလၢ အကမၤလီၤမၢ်ကွံာ် ပတၢ်သးခုသ့ ဘၣ်ဆၣ်ဒ်သိးပကဆဲးအိၣ်ဒီး တၢ်သးခုထီဘိအဂီၢ် ပကဘၣ်မၤဒ်လဲၣ်. ပကဆဲးကွၢ်သကိး ယ့ၣ်ၡူးအတၢ်ကတိၤဖဲ အစံၣ်တဲၤတဲလီၤတၢ်လၢ ကစၢၢ်ခိၣ်အခါန့ၣ်လီၤ.
တၢ်ဂ့ၤတၢ်ဝါလၢ ကမၤသးခုပှၤ
၇. ပှၤလၢအသူၣ်အုးသးအုးတဖၣ် အိၣ်ဒီးတၢ်သူၣ်ခုသးခုသ့ လၢကျဲဒ်လဲၣ်.
၇ ‘ပှၤလၢအသူၣ်အုးသးအုးတဖၣ်န့ၣ်, မ့ၢ်ပှၤလၢအသးခု နီၢ်နီၢ်လီၤ. အဂ့ၢ်ဒ်အံၤ, ကဘၣ်တၢ်မၤမုာ်ထီၣ်က့ၤအီၤလီၤ.’ (မးသဲ ၅:၄, ခ့ခါစှီၤကျိာ်) ဘၣ်သ့ၣ်သ့ၣ် ပကဆိကမိၣ်ဘၣ်လၢ ‘ပှၤလၢအသူၣ်အုးသးအုးတဂၤ အဝဲအိၣ်ဒီးတၢ်သူၣ်ခုသးခုကသ့ဒ်လဲၣ်.’ ယ့ၣ်ၡူးတအဲၣ်ဒိးတဲဝဲ ဘၣ်ဃးဒီးပှၤလၢ အသးအုးခဲလၢာ်န့ၣ်ဘၣ်. လၢ “မုၢ်နံၤအခံကတၢၢ်တဖၣ်” အပူၤန့ၣ် မ့ၢ်ဝဲ “ဆၢကတီၢ်လၢ အကီအခဲ” အဃိ ပှၤအၢပှၤသီတဖၣ်စ့ၢ်ကီး ဖဲအဝဲသ့ၣ် ထံၣ်ဘၣ်တၢ်ကီတၢ်ခဲအခါ အသးအုးဝဲလီၤ. (၂ တံၤမသ့း ၃:၁) ဘၣ်ဆၣ် ပှၤသ့ၣ်တဖၣ်အံၤ ဆိကမိၣ်တၢ်ထဲအနီၢ်ကစၢ်အဂီၢ်လီၤ. တဆိကမိၣ်တၢ်ဘၣ်ဃးဒီး ယဟိဝၤယွၤဘၣ်. ဒီးမ့ၢ်လၢအဝဲသ့ၣ် တရ့လိာ်အသးဒီး ယဟိဝၤယွၤဘၣ်အဃိ အဝဲသ့ၣ်တသးခုဘၣ်. နီၢ်နီၢ်န့ၣ် ယ့ၣ်ၡူးအဲၣ်ဒိးတဲဝဲ ပှၤသးအုးတဖၣ်န့ၣ်မ့ၢ်ဝဲ ပှၤလၢအသ့ၣ်ညါလီၤအသးလၢ အလိၣ်ဘၣ်ကစၢ်ယွၤ အတၢ်ဟံးစုနဲၣ်ကျဲတဖၣ်န့ၣ်လီၤ. ပှၤသ့ၣ်တဖၣ်အံၤ အသးအုးမ့ၢ်လၢ အဝဲသ့ၣ်ထံၣ်ဝဲလၢ ပှၤအါဂၤ တတူၢ်လိာ်ကစၢ်ယွၤဘၣ် ဒီးတအိၣ်မူဝဲဒ် ယွၤအတၢ်ဘၣ်သးဘၣ်အဃိလီၤ. တကးဒံးဘၣ် အဝဲသ့ၣ် သ့ၣ်ညါလီၤအသးလၢ အမ့ၢ်ပှၤတၢ်ဒဲးဘးဖိ ဒီးထံၣ်ဘၣ်ဝဲ တၢ်လီၤပျံၤလီၤဖုး အိၣ်ပှဲၤဟီၣ်ခိၣ်အဃိ အဝဲသ့ၣ်သးအုးဝဲလီၤ. အဃိ ယဟိဝၤယွၤထံၣ်ဝဲ ပှၤလၢအသူၣ်အုးသးအုးနီၢ်ကီၢ်တဖၣ် ဒီးမၤမုာ်ထီၣ်က့ၤ အဝဲသ့ၣ်ခီဖျိ အကလုၢ်ကထါလံာ်စီဆှံ, ဟ့ၣ်အဝဲသ့ၣ်တၢ်သူၣ်ခုသးခု ဒီးတၢ်မူလီၤ.—ဖး ယဃ့းစက့လး ၅:၁၁; ၉:၄ တက့ၢ်.
၈. ပမ့ၢ်အိၣ်ဒီးတၢ်သးစူၤန့ၣ် ကမၤစၢၤပှၤလၢ ပကအိၣ်ဒီးတၢ်သူၣ်ခုသးခုသ့လၢ ကျဲဒ်လဲၣ်.
၈ ‘ပှၤလၢအသးစူၤတဖၣ်န့ၣ် သးခုဝဲလီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် ကန့ၢ်ဘၣ်သါထံဧိၤကီၢ်ဧိၤလီၤ.’ (မးသဲ ၅:၅) နမ့ၢ်အိၣ်ဒီးတၢ်သးစူၤန့ၣ် နကဒိးန့ၢ်ဘၣ် တၢ်သးခုဒ်လဲၣ်. ပှၤအါဂၤ တပာ်ကဲပှၤဂၤဘၣ် ဒီးဃုအ့ၣ်လိာ်သးဒီးပှၤဂၤအဃိ ကဲထီၣ်တၢ်ကီတၢ်ခဲအါမးလီၤ. ဘၣ်ဆၣ် ဖဲအဝဲသ့ၣ် သ့ၣ်ညါ တၢ်မ့ၢ်တၢ်တီအခါ အဝဲသ့ၣ်ဆီတလဲအသးဒီး သိးထီၣ်က့ၤဝဲ “ပှၤသီ” လီၤ. ဒီးအဝဲသ့ၣ်ပာ်ဖျါထီၣ်ဝဲ “တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်” လီၤ. (ကလီးစဲ ၃:၉-၁၂) မ့ၢ်လၢအဝဲသ့ၣ်မၤဝဲဒ်န့ၣ်အဃိ အဝဲသ့ၣ် အိၣ်ဒီးတၢ်ဃူတၢ်ဖိး, အတၢ်ရ့လိာ်သးဒီးပှၤဂၤဂ့ၤထီၣ် ဒီးအိၣ်ဒီးတၢ်သူၣ်ခုသးခုနီၢ်နီၢ်လီၤ. တကးဒံးဘၣ်ယွၤအကလုၢ်ကထါ အၢၣ်လီၤဝဲလၢအဝဲသ့ၣ်တဖၣ် ‘ကန့ၢ်ဘၣ်သါထံဧိၤကီၢ်ဧိၤလီၤ.’—စံးထီၣ်ပတြၢၤ ၃၇:၈-၁၀, ၂၉.
၉. (က) ဖဲယ့ၣ်ၡူးတဲဝဲလၢ ပှၤလၢအသးစူၤတဖၣ် “ကန့ၢ်သါဘၣ် ထံဧိၤကီၢ်ဧိၤ” အခါ အဝဲအဲၣ်ဒိးတဲဝဲ တၢ်မနုၤလဲၣ်. (ခ) ဘၣ်မနုၤအဃိ “ပှၤလၢတၢ်သၣ်ဝံၤအသးဒီး တၢ်သူအသးလၢ တၢ်တီတၢ်လိၤတဖၣ်” ကသးခုဝဲလဲၣ်.
၉ ဖဲယ့ၣ်ၡူးတဲဝဲလၢ ပှၤလၢအသးစူၤတဖၣ် “ကန့ၢ်ဘၣ်သါထံဧိၤကီၢ်ဧိၤ” န့ၣ်အဲၣ်ဒိးတဲဝဲ အခီပညီဒ်လဲၣ်. ပှၤလၢအဘၣ်တၢ်ဒိးဖှူအီၤတဖၣ် ကဒိးန့ၢ်ဘၣ်ထံဧိၤကီၢ်ဧိၤခီဖျိ အဝဲသ့ၣ်ကပၢဘၣ်ဝဲဟီၣ်ခိၣ် ဒ်စီၤပၤဒီးပှၤလုၢ်တၢ်အခိၣ်အသိးလီၤ. (လီၣ်ဖျါ ၂၀:၆) ပှၤလၢအကကွဲၢ်တဖၣ်လၢ တအိၣ်ဒီးတၢ်မုၢ်လၢ်လၢ ကထီၣ်ဘၣ်ဆူမူခိၣ်န့ၣ် အဝဲသ့ၣ် ကန့ၢ်ဘၣ်ထံဧိၤကီၢ်ဧိၤခီဖျိ အဝဲသ့ၣ်ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်န့ၣ်လီၤ. ဒီးအဝဲသ့ၣ် ကကဲထီၣ်ပှၤလၢပှၤပှဲၤ ဒီးကအိၣ်ဒီးတၢ်ဃူတၢ်ဖိး ဒီးကပှဲၤဒီးတၢ်သူၣ်ခုသးခုလီၤ. ပှၤခံဖုလၢာ်အံၤမ့ၢ်ဝဲ ပှၤလၢယ့ၣ်ၡူးတဲဝဲလၢ ‘ပှၤလၢတၢ်သၣ်ဝံၤအသးဒီး တၢ်သူအသးလၢ တၢ်တီတၢ်လိၤတဖၣ်န့ၣ် သးခုဝဲလီၤ’ (မးသဲ ၅:၆) ဖဲယဟိဝၤယွၤ မၤလီၤမၢ်ကွံာ် တၢ်အၢတၢ်သီခဲလၢာ်အခါ အဝဲသ့ၣ်အတၢ်သူအသးလၢ တၢ်တီတၢ်လိၤန့ၣ် ကလၢထီၣ်ပှဲၤထီၣ်ဝဲလီၤ. (၂ ပ့းတရူး ၃:၁၃) လၢဟီၣ်ခိၣ်သီအပူၤန့ၣ် တၢ်အၢတၢ်သီတဖၣ် ကလီၤမၢ်ကွံာ်ဝဲ ခဲလၢာ်အဃိ ပှၤတီပှၤလိၤတဖၣ်န့ၣ် ကပှဲၤဒီးတၢ်သူၣ်ခုသးခုဒီး အဝဲသ့ၣ်တသူၣ်အုးသးအုးနီတဘျီလၢၤဘၣ်.—စံးထီၣ်ပတြၢၤ ၃၇:၁၇.
၁၀. ပကဘၣ်အိၣ်ဒီးတၢ်သးကညီၤန့ၣ် အခီပညီမ့ၢ်မနုၤလဲၣ်.
၁၀ ‘ပှၤလၢအသးကညီၤတၢ်တဖၣ်န့ၣ် သးခုဝဲလီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် ကဘၣ်တၢ်သးကညီၤအီၤလီၤ.’ (မးသဲ ၅:၇) ပကဘၣ်အိၣ်ဒီးတၢ်သးကညီၤန့ၣ် အဲၣ်ဒိးတဲဝဲ ပပာ်ဖျါထီၣ်တၢ်ကဟုကယာ်, တၢ်သးကညီၤ ဒီးတၢ်ဒိသူၣ်ဒိသးလၢ ပှၤလၢအဘၣ်ကီဘၣ်ခဲတဖၣ်န့ၣ်လီၤ. ဒီးတၢ်သးကညီၤန့ၣ် တမ့ၢ်ထဲပအိၣ်ဒီးတၢ်တူၢ်ဘၣ်လၢ ပသးကညီၤတၢ်တခါဘၣ်. လံာ်စီဆှံပာ်ဖျါထီၣ်ဝဲလၢ တၢ်သးကညီၤန့ၣ် ပၣ်ဃုာ်စ့ၢ်ကီး ဒီးပမၤတၢ်တမံၤမံၤလၢ ကမၤစၢၤပှၤဂၤန့ၣ်လီၤ.
၁၁. တၢ်အဒိ ဘၣ်ဃးဒီး ပှၤၡၤမရံဖိတဂၤအဂ့ၢ်န့ၣ် သိၣ်လိပှၤတၢ်ဂ့ၢ်မနုၤလဲၣ်.
၁၁ ဖး လူၤကၣ် ၁၀:၃၀-၃၇ တက့ၢ်. တၢ်အဒိလၢယ့ၣ်ၡူးဟ့ၣ်ဝဲ ဘၣ်ဃးဒီး ပှၤၡၤမရံဖိတဂၤအတၢ်သးကညီၤအဂ့ၢ်န့ၣ် ပသ့ၣ်ညါဘၣ်လၢ တၢ်သးကညီၤန့ၣ် အခီပညီနီၢ်နီၢ်မ့ၢ်ဝဲဒ်လဲၣ်န့ၣ်လီၤ. ပှၤၡၤမရံတဂၤ သးကညီၤဘၣ်ဝဲ ပှၤလၢအဘၣ်ဒိတဂၤအဃိ ထိၣ်ဟူးထိၣ်ဂဲၤထီၣ်အီၤလၢ ကမၤစၢၤဝဲန့ၣ်လီၤ. ယ့ၣ်ၡူးဟ့ၣ်တၢ်အဒိဝံၤ အဝဲတဲဝဲ “လဲၤမၤနဲဒ်န့ၣ်အသိးတက့ၢ်.” လၢတၢ်န့ၣ်အဃိ ပသံကွၢ်လီၤပသးဒ်အံၤသ့ဝဲလီၤ. ‘မ့ၢ်ယမၤဒ်န့ၣ်ဧါ, မ့ၢ်ယမၤဒ် ပှၤၡၤမရံဖိတဂၤအံၤ မၤဝဲအသိးစ့ၢ်ကီးဧါ. ဖဲပှၤအဂၤတူၢ်ဘၣ်တၢ်ကီတၢ်ခဲအခါ ဒ်သိးယကမၤစၢၤအဝဲသ့ၣ်အဂီၢ် ယမၤတၢ်မနုၤသ့လဲၣ်. အဒိ မ့ၢ်ယမၤစၢၤပှၤသးပှၢ်လၢ တၢ်အိၣ်ဖှိၣ်အပူၤ, မုၣ်ကမဲ, ခွါကမဲ ဒီးဖိသၣ်လၢ အမိၢ်အပၢ် တမ့ၢ်ယဟိဝၤပှၤအုၣ်အသးတဖၣ်သ့ဧါ. မ့ၢ်ယတဲ “မုာ်ထီၣ် . . . ပှၤလၢ အဂံၢ်စၢ်ဘါစၢ်တဖၣ်” အသးသ့ဧါ.’—၁ သ့းစၤလနံ ၅:၁၄; ယၤကိာ် ၁:၂၇.
ပမ့ၢ်စးထီၣ်မၤစၢၤပှၤဂၤန့ၣ် ဖဲပထံၣ်ဘၣ်အဝဲသ့ၣ်သးခုအခါ ပကသးခုစ့ၢ်ကီး (ကွၢ်လံာ်အဆၢ ၁၂)
၁၂. ဖဲပပာ်ဖျါထီၣ်တၢ်သးကညီၤလၢ ပှၤဂၤအဖီခိၣ်အခါ ဘၣ်မနုၤအဃိ ပသးခုလဲၣ်.
၁၂ ဘၣ်မနုၤအဃိ ပှၤလၢအသးကညီၤတၢ်န့ၣ် အိၣ်ဒီးတၢ်သးခုလဲၣ်. ဖဲပပာ်ဖျါထီၣ်လၢ ပသးကညီၤပှၤအဂၤအခါ မ့ၢ်ဝဲပဟ့ၣ်တၢ်လီၤ. ဒီးယ့ၣ်ၡူးတဲဝဲ ပမ့ၢ်ဟ့ၣ်တၢ်န့ၣ်ကမၤသးခုပှၤလီၤ. ဒီးပသးခု မ့ၢ်လၢပသ့ၣ်ညါလၢ တၢ်လၢပမၤတဖၣ်န့ၣ် မၤသးခုယဟိဝၤယွၤအသးအဃိလီၤ. (မၤတၢ် ၂၀:၃၅; ဖး ဧ့ၤဘြံၤ ၁၃:၁၆ တက့ၢ်.) စီၤပၤဒၤဝံးတဲဝဲလၢ ပှၤလၢအပာ်ဖျါထီၣ်တၢ်သးကညီၤန့ၣ် “ယွၤကအံးထီၣ်ကွၢ်လီၤအီၤ, ဒီးဒုးမူဒံးအီၤလီၤ. ကဘၣ်တၢ်ဆိၣ်ဂ့ၤအီၤ [သးခု, NWT] လၢထံဧိၤကီၢ်ဧိၤအပူၤ” လီၤ. (စံးထီၣ်ပတြၢၤ ၄၁:၁, ၂) ပမ့ၢ်ပာ်ဖျါထီၣ်တၢ်သးကညီၤ ဒီးအိၣ်ဒီးတၢ်ဒိသူၣ်ဒိသးလၢ ပှၤဂၤအဖီခိၣ်န့ၣ် ပကဒိးန့ၢ်ဘၣ် ယဟိဝၤယွၤအတၢ်သးကညီၤ ဒီးပကအိၣ်ဒီးတၢ်သူၣ်ခုသးခု လီၤထူလီၤယိၤလီၤ.—ယၤကိာ် ၂:၁၃.
ဘၣ်မနုၤအဃိ “ပှၤလၢအသးကဆှီတဖၣ်” သးခုဝဲလဲၣ်
၁၃, ၁၄. ဘၣ်မနုၤအဃိ အရ့ဒိၣ်လၢ ပကဘၣ်အိၣ်ဒီးတၢ် “သးကဆှီ” လဲၣ်.
၁၃ ယ့ၣ်ၡူးတဲဝဲလၢ ‘ပှၤလၢအသးကဆှီတဖၣ်န့ၣ် သးခုဝဲလီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် ကထံၣ်ဘၣ်ယွၤလီၤ.’ (မးသဲ ၅:၈) ဒ်သိးပသးကကဆှီအဂီၢ် ပတၢ်ဆိကမိၣ် ဒီးပတၢ်ပာ်သူၣ်ပာ်သးတဖၣ်စ့ၢ်ကီး ကဘၣ်ကဆှီလီၤ. ဒီးအရ့ဒိၣ်လၢ ပကဘၣ်မၤဒ်န့ၣ်လီၤ. ပမ့ၢ်မၤဒ်န့ၣ်မး ယဟိဝၤယွၤ ကတူၢ်လိာ်ပတၢ်ဘူၣ်ထီၣ်ဘါထီၣ်လီၤ.—ဖး ၂ ကရံၣ်သူး ၄:၂ တက့ၢ်; ၁ တံၤမသ့း ၁:၅.
၁၄ ပှၤလၢအသးကဆှီန့ၣ် အတၢ်ရ့လိာ်သးဒီးယဟိဝၤယွၤဂ့ၤဝဲလီၤ. ယဟိဝၤယွၤတဲဝဲလၢ ‘ပှၤလၢအဆှုၣ်အကူအသိး . . . န့ၣ်သးခုဝဲလီၤ.’ (လီၣ်ဖျါ ၂၂:၁၄) “ဆှုၣ်အကူအသိး” န့ၣ် အဲၣ်ဒိးတဲဝဲအခီပညီဒ်လဲၣ်. ပှၤလၢ ဘၣ်တၢ်ဒိးဖှူအီၤတဖၣ်အဂီၢ်န့ၣ် အခီပညီမ့ၢ်ဝဲ ယဟိဝၤယွၤထံၣ်အဝဲသ့ၣ် ဒ်ပှၤစီဆှံအသိးအဃိ ယဟိဝၤယွၤကဟ့ၣ်အဝဲသ့ၣ် တၢ်မူအထူအယိာ်လၢမူခိၣ် ဒီးအဝဲသ့ၣ်သံတသ့လၢၤဘၣ်. ဒီးတကးဒံးဘၣ် အဝဲသ့ၣ်ကအိၣ်ဒီးတၢ်သူၣ်ခုသးခု လီၤထူလီၤယိၤလီၤ. ဒီမ့မ့ၢ်လၢ ပှၤဂီၢ်မုၢ်ဖးဒိၣ်လၢ ကအိၣ်မူဘၣ်လၢဟီၣ်ခိၣ် လီၤထူလီၤယိာ်တဖၣ်အဂီၢ်န့ၣ် အခီပညီမ့ၢ်ဝဲ ယဟိဝၤယွၤဟ့ၣ်အဝဲသ့ၣ်အခွဲးလၢ ကကဲထီၣ်အတံၤသကိး မ့ၢ်လၢယဟိဝၤယွၤထံၣ်အဝဲသ့ၣ် ဒ်ပှၤတီပှၤလိၤအသိးအဃိလီၤ. လၢတၢ်န့ၣ်အဃိ လံာ်စီဆှံတဲဝဲလၢ အဝဲသ့ၣ် “ဆှုၣ်အဆ့ဒီးမၤဝါထီၣ်အီၤလၢ သိဖိအသွံၣ်လီၤ.”—လီၣ်ဖျါ ၇:၉, ၁၃, ၁၄.
၁၅, ၁၆. ပှၤလၢအသးကဆှီတဖၣ် “ထံၣ်ဘၣ်ယွၤ” သ့လၢကျဲဒ်လဲၣ်.
၁၅ ယဟိဝၤယွၤတဲဝဲလၢ “ပှၤကညီလၢအထံၣ်ဘၣ်ယမဲာ်န့ၣ် တမူဘၣ်ဘၣ်.” (၂ မိၤၡ့ ၃၃:၂၀) မ့မ့ၢ်ဒ်န့ၣ်န့ၣ် ပှၤလၢအသးကဆှီတဖၣ် “ထံၣ်ဘၣ်ယွၤ” ကသ့ဒ်လဲၣ်. ကြံးအတၢ်ကတိၤလၢ ဘၣ်တၢ်ကွဲးကျိာ်ထံက့ၤအီၤလၢ “ထံၣ်ဘၣ်” န့ၣ်အခီပညီမ့ၢ်စ့ၢ်ကီး ထံၣ်တမှံကွၢ်, နၢ်ပၢၢ် မ့တမ့ၢ် သ့ၣ်ညါလီၤ. လၢတၢ်န့ၣ်အဃိတၢ် “ထံၣ်ဘၣ်ယွၤ” အခီပညီန့ၣ် အဲၣ်ဒိးတဲဝဲလၢ ပသ့ၣ်ညါလၢကစၢ်ယွၤ မ့ၢ်ပှၤဒ်လဲၣ်တဂၤလဲၣ် ဒီးပအဲၣ်အတၢ်ဂ့ၤတၢ်ဝါတဖၣ်န့ၣ်လီၤ. (အ့းဖ့းစူး ၁:၁၈) ယ့ၣ်ၡူးကွၢ်လိမၤဒိးဝဲ ယဟိဝၤယွၤ အတၢ်ဂ့ၤတၢ်ဝါတဖၣ် လီၤတံၢ်လီၤဆဲးအဃိ အဝဲတဲဝဲလၢပှၤလၢ “အထံၣ်ယၤန့ၣ်, မ့ၢ်အထံၣ်လံပၢ်န့ၣ်လီၤ.”—ယိၤဟၣ် ၁၄:၇-၉.
၁၆ ဖဲပထံၣ်ဘၣ် ကစၢ်ယွၤမၤစၢၤပှၤလၢ ပတၢ်အိၣ်မူပူၤအခါ ပတဲသ့လၢပ “ထံၣ်ဘၣ်ယွၤ” စ့ၢ်ကီးလီၤ. (ယိၤဘး ၄၂:၅) တကးဒံးဘၣ်ပ “ထံၣ်” အီၤသ့ခီဖျိ ပသးစၢၢ်ဆၢတၢ်လၢအဝဲအၢၣ်လီၤဝဲလၢ ကမၤန့ၢ်ဝဲပှၤလၢ အအိၣ်ကဆှီဒီး မၤအတၢ်မၤလၢ တၢ်သးတီတဖၣ်အဂီၢ်န့ၣ်လီၤ. ဒီးပှၤလၢ အဘၣ်တၢ်ဒိးဖှူအီၤတဖၣ်န့ၣ် ဖဲအဝဲသ့ၣ်ဂဲၤဆၢထၢၣ်သမူထီၣ်က့ၤလၢ မူခိၣ်အခါ ကထံၣ်ဘၣ်ယဟိဝၤယွၤနီၢ်ကီၢ်လီၤ.—၁ ယိၤဟၣ် ၃:၂.
ပအိၣ်ဒီးတၢ်ကီတၢ်ခဲသနာ်က့ ပအိၣ်ဒီးတၢ်သးခုသ့
၁၇. ပှၤလၢအမၤဃူမၤဖိးတၢ်န့ၣ် ဘၣ်မနုၤအဃိ အဝဲသ့ၣ်သးခုလဲၣ်.
၁၇ ယ့ၣ်ၡူးတဲကဒီးဝဲလၢ ‘ပှၤလၢအမၤဃူမၤဖိးတၢ်တဖၣ်န့ၣ် သးခုဝဲလီၤ.’ (မးသဲ ၅:၉) ဖဲပစးထီၣ် လဲၤမၤဃူမၤဖိးဆိတၢ်ဒီးပှၤဂၤအခါ ပအိၣ်ဒီးတၢ်သးခုသ့ဝဲလီၤ. ခရံာ်အပျဲၢ်အဘီၣ် စီၤယၤကိာ်ကွဲးဝဲလၢ “တၢ်တီတၢ်လိၤအတၤသၣ်န့ၣ်, ဘၣ်ဖှံလီၤအသးလၢ တၢ်ဃူတၢ်ဖိးအပူၤလၢ ပှၤလၢအမၤတၢ်ဃူတၢ်ဖိးအစုပူၤလီၤ.” (ယၤကိာ် ၃:၁၈) လၢတၢ်န့ၣ်အဃိ နမ့ၢ်အိၣ်ဒီးတၢ်ကီတၢ်ခဲလၢ ကအိၣ်ဃူအိၣ်ဖိးဒီး ပှၤလၢတၢ်အိၣ်ဖှိၣ်အပူၤ မ့တမ့ၢ် နဟံၣ်ဖိဃီဖိတဂၤဂၤန့ၣ် ဃ့တၢ်မၤစၢၤလၢယဟိဝၤယွၤအအိၣ် ဒ်သိးနမၤဃူမၤဖိးတၢ်ဒီးအဝဲသ့ၣ် ကန့ၢ်အဂီၢ်တက့ၢ်. ယဟိဝၤယွၤကဟ့ၣ်နၤ အသးစီဆှံ ဒ်သိးကမၤစၢၤနၤလၢ နကပာ်ဖျါထီၣ် ခရံာ်ဖိအတၢ်ဂ့ၤတၢ်ဝါတဖၣ် ဒီးနကပှဲၤဒီးတၢ်သူၣ်ခုသးခုအဂီၢ်လီၤ. ပကဘၣ် စးထီၣ်မၤဃူမၤဖိးတၢ်ဒီးပှၤဂၤန့ၣ် မ့ၢ်တၢ်လၢအရ့ဒိၣ်န့ၣ် ယ့ၣ်ၡူးတဲဝဲလၢ “မၤသးဒ်န့ၣ်ဒီး နမ့ၢ်လဲၤစိာ်နတၢ်မၤဘူၣ်ဆူ တၢ်လုၢ်လီၢ်, ဒီးဖဲန့ၣ် နမ့ၢ်သ့ၣ်နီၣ်ထီၣ်က့ၤလၢ နဒီပုၢ်ဝဲၢ်ပာ်တၢ်ကမၣ်လၢ နလိၤတမံၤမံၤဒီး, ပာ်တ့ၢ်နတၢ်မၤဘူၣ်ဖဲန့ၣ် လၢတၢ်လုၢ်လီၢ်အမဲာ်ညါ, ဒီးက့ၤက့ၤတက့ၢ်. အိၣ်ဃူလိာ်ဒီးနဒီပုၢ်ဝဲၢ်တက့ၢ်. တုၤနုၤတစုဟဲစိာ်နတၢ်မၤဘူၣ်တက့ၢ်.”—မးသဲ ၅:၂၃, ၂၄.
ယဟိဝၤယွၤအသးစီဆှံ ကမၤစၢၤနၤ ဒ်သိးနကပာ်ဖျါထီၣ် ခရံာ်ဖိအတၢ်ဂ့ၤတၢ်ဝါတဖၣ် ဒီးနကသးခုဒိၣ်ထီၣ်အဂီၢ်
၁၈, ၁၉. ခရံာ်ဖိတဖၣ် ဘၣ်တၢ်မၤအၢမၤနးအီၤ ဘၣ်ဆၣ်ဘၣ်မနုၤအဃိ အဝဲသ့ၣ် အသးခုဒံးဝဲလဲၣ်.
၁၈ ‘တုၤပှၤဒုၣ်ဒွဲၣ်သု, ဒီးမၤအၢမၤနးသု, ဒီးစံးအၢသုကဘျံးကဘျၣ်လၢ ကယဲၢ်တၢ်အၢတၢ်သီ လၢယဃိဒီး, သုကသးခုလီၤ.’ ယ့ၣ်ၡူးအဲၣ်ဒိးတဲဝဲ အခီပညီဒ်လဲၣ်. အဝဲတဲကဒီးဝဲ “သူၣ်ခုသးခု, ဒီးသူၣ်ဖှံသးညီတက့ၢ်. အဂ့ၢ်ဒ်အံၤ, သုဘျုးအိၣ်ဝဲလၢမူခိၣ်န့ၣ်ဒိၣ်ဝဲလီၤ. အဂ့ၢ်ဒ်အံၤ, ပှၤမၤအၢမၤနးဝံလၢ အအိၣ်ထီၣ်လၢသုမဲာ်ညါတဖၣ် ဒ်န့ၣ်အသိးလီၤ.” (မးသဲ ၅:၁၁, ၁၂) တၢ်မၢဖိတဖၣ် ဖဲပှၤတီၢ်အီၤ ဒီးပှၤဟ့ၣ်လီၤတၢ်ကလုၢ်ဒ်သိး အသုတဟးစံၣ်တဲၤတဲလီၤတၢ်တဂ့ၤအခါ “အဝဲသ့ၣ်သူၣ်ခုသးခု, ဒီးဟးထီၣ်ကွံာ်ဝဲ” လီၤ. တမ့ၢ်လၢပှၤတီၢ်အဝဲသ့ၣ်အဃိ အဝဲသ့ၣ်သးခုဘၣ်. အဝဲသ့ၣ် အသးခုခီဖျိလၢဘၣ်တၢ် “ပာ်အီၤလၢ ပှၤကြၢးဒိးတၢ်မဲာ်ဆှး” လၢခရံာ်အမံၤအဃိလီၤ.—မၤတၢ် ၅:၄၁.
၁၉ မုၢ်မဆါတနံၤအံၤစ့ၢ်ကီး ယဟိဝၤယွၤအခ့အပှၤတဖၣ် ဘၣ်တၢ်မၤအၢမၤနးအီၤ လၢယ့ၣ်ၡူးခရံာ်အမံၤအဃိဘၣ်ဆၣ် အဝဲသ့ၣ်သးခုဝဲလီၤ. (ဖး ယၤကိာ် ၁:၂-၄ တက့ၢ်.) ဒ်တၢ်မၢဖိတဖၣ်အသိး ပတသးခုလၢ ပှၤမၤအၢမၤသီပှၤအဃိဘၣ်. ဘၣ်ဆၣ်ပသးခု မ့ၢ်လၢ ပတီဒီးယဟိဝၤယွၤအဃိ အဝဲကဟ့ၣ်ပှၤတၢ်ဂံၢ်တၢ်ဘါ ဒ်သိးပတူၢ်တၢ်ကကဲအဂီၢ်အဃိလီၤ. ဆိကမိၣ်ကွၢ် ဟဲနရံၤ ဒီနံး ဒီးအဝဲၢ်ခွါအဂ့ၢ်တက့ၢ်. ဖဲ လါအီကူး ၁၉၄၄ နံၣ်န့ၣ် ပှၤဖီၣ်န့ၢ်အဝဲသ့ၣ်ဒီး ပှၤက့ၤကိးအဝဲသ့ၣ်လၢ ဃိာ်ပူၤ (concentration camp) လီၤ. ပှၤလၢမၤအၢမၤနးအဝဲသ့ၣ်တဖၣ်န့ၣ် တဲဝဲလၢ “နမၢဆူၣ် အဝဲသ့ၣ်လၢကမၤတၢ် တမံၤဂ့ၤတမံၤဂ့ၤတန့ၢ်ဘၣ်. နမၤအၢမၤနးအဝဲသ့ၣ်နာ်က့ အဝဲသ့ၣ်သးခုဒံး.” ဒီးဟဲနရံၤတဲဝဲလၢ “ယတူၢ်တၢ်မၤအၢမၤနးတဖၣ်အံၤကဲန့ၣ် တမ့ၢ်လၢယအဲၣ်ဒိးကဲ ပှၤဒူပှၤဃိၤအဃိဘၣ်. မ့ၢ်လၢ ယအဲၣ်ဒိးတီဒီးယဟိဝၤယွၤအဃိ ယတူၢ်တၢ်ကီတၢ်ခဲတဖၣ်အံၤလၢ တၢ်သူၣ်ဒူသးဒူအပူၤကဲဝဲလီၤ. ယမၤဒ်န့ၣ်အဃိ ယပှဲၤဒီးတၢ်သူၣ်ခုသးခုလီၤ. ဒီးခီဖျိလၢ ယဃ့ဘါထုကဖၣ်လၢ တၢ်သူၣ်ဆူၣ်သးဆူၣ်အဃိ ယဘူးဒိၣ်ထီၣ်ဒီးယဟိဝၤယွၤ ဒီးကစၢ်ယွၤစ့ၢ်ကီး မၤစၢၤယၤနီၢ်ကီၢ်လီၤ.”
၂၀. ဘၣ်မနုၤအဃိ ပသးခုလၢပမၤဘၣ် ယွၤလၢအမ့ၢ် “တၢ်သးခုကစၢ်” တဂၤ အတၢ်မၤန့ၣ်လဲၣ်.
၂၀ ယဟိဝၤယွၤလၢအမ့ၢ် “တၢ်သးခုကစၢ်” တဂၤ မ့ၢ်ဘၣ်သူၣ်ဘၣ်သးပှၤန့ၣ် ပမ့ၢ်ဘၣ်တၢ်မၤအၢမၤနးပှၤမ့ၢ်ဂ့ၤ, ပဟံၣ်ဖိဃီဖိ မ့ၢ်ထီဒါပှၤမ့ၢ်ဂ့ၤ, ပမ့ၢ်ဆိက့ မ့တမ့ၢ် ပမ့ၢ်သးပှၢ်ထီၣ်မ့ၢ်ဂ့ၤ ပအိၣ်ဒီးတၢ်သူၣ်ခုသးခုသ့ဝဲလီၤ. (၁ တံၤမသ့း ၁:၁၁, NWT) တကးဒံးဘၣ် ပသးခုသ့ဝဲ ခီဖျိလၢ ပကစၢ်ယွၤလၢ “အကတိၤတၢ်ကဘျံးကဘျၣ် တသ့ဘၣ်တဂၤ” အၢၣ်လီၤအီလီၤပှၤလၢ ကမၤန့ၢ်ပှၤတၢ်ဂ့ၤအါမံၤအဃိလီၤ. (တံတူး ၁:၂) ဖဲယဟိဝၤယွၤမၤလၢပှဲၤထီၣ် အတၢ်အၢၣ်လီၤအီလီၤတဖၣ်အခါ ပတသ့ၣ်နီၣ်ထီၣ်က့ၤ ပတၢ်ကီတၢ်ခဲလၢ ပတူၢ်ဘၣ်ခဲအံၤတဖၣ်လၢၤဘၣ်. တၢ်အိၣ်မူလၢ ပၤရဒံစူးအပူၤန့ၣ် ကမုာ်ဒိၣ်န့ၢ် ပဆိကမိၣ်ဒံး. ဒီးပ “ကမုာ်လၤသးခုလၢ တၢ်ဘီၣ်တၢ်ညီ ဒီးတၢ်ဃူတၢ်ဖိးအပူၤလီၤ.”—စံးထီၣ်ပတြၢၤ ၃၇:၁၁, ခ့ခါစှီၤကျိာ်.
^ လံာ်အဆၢ. 1 ကြံးအတၢ်ကတိၤလၢအမ့ၢ် ‘သးခု’ န့ၣ်လၢပှၤကညီလံာ်စီဆှံအပူၤ ဘၣ်တၢ်ကွဲးကျိာ်ထံအီၤလၢ ‘ဘၣ်ဆိၣ်ဂ့ၤ’ လီၤ. ဘၣ်ဆၣ် တၢ်ကတိၤလၢအမ့ၢ်ဘၣ်ဆိၣ်ဂ့ၤန့ၣ် လၢကြံးကျိာ် အိၣ်ဝဲလီၤလီၤဆီဆီတဖျၢၣ်လီၤ. တၢ်ဆိၣ်ဂ့ၤန့ၣ် ခီဖျိလၢနမၤတၢ်တမံၤမံၤအဃိ နဒိးန့ၢ်ဘၣ်တၢ်ဆိၣ်ဂ့ၤ, မ့မ့ၢ်သးခုန့ၣ် ခီဖျိလၢနဒိးန့ၢ်ဘၣ်ကစၢ်ယွၤ အတၢ်ဆိၣ်ဂ့ၤအဃိ နသးခုလီၤ.
