သးစၢ်သ့ၣ်ဧၢ ဂုာ်ကျဲးစၢး ဒ်သိးသုကဒိးန့ၢ်ဘၣ် “တၢ်အုၣ်က့ၤခီၣ်က့ၤ” တက့ၢ်
“သုစူၢ်တၢ်တဘိယူၢ်ဃီ, . . . မၤသုတၢ်အုၣ်က့ၤခီၣ်က့ၤဒၣ်သုဝဲလၢ တၢ်ပျံၤဒီးတၢ်ကနိးတက့ၢ်.”—ဖံလံးပံၤ ၂:၁၂.
၁. ဘၣ်မနုၤအဃိ အရ့ဒိၣ်လၢပကဘၣ်ဒိးဘျၢထံလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
တနံၣ်ဘၣ်တနံၣ်န့ၣ် ပှၤမၤလိလံာ်စီဆှံဖိလၢ အကလီၢ်တဖၣ် ဒိးဘျၢထံန့ၣ်လီၤ. ပှၤဒိးဘျၢထံအါတက့ၢ်န့ၣ် မ့ၢ်ဝဲပှၤသးစၢ် ဒီးပှၤလိၣ်ဘိတဖၣ်လီၤ. အဝဲသ့ၣ်အကျါအါတက့ၢ်န့ၣ် ဒိၣ်ထီၣ်လၢတၢ်မ့ၢ်တၢ်တီအပူၤလီၤ. လၢပှၤသ့ၣ်တဖၣ်အံၤအကျါန့ၣ် မ့ၢ်နပၣ်ဃုာ်စ့ၢ်ကီးဧါ. နမ့ၢ်ပၣ်ဃုာ်န့ၣ် ပသးခုဒိၣ်မးလီၤ. ခရံာ်ဖိကိးဂၤဒဲး ကဘၣ်ဒိးဘျၢထံလီၤ. ခရံာ်ဖိတဖၣ် မ့ၢ်တဒိးဘျၢထံဘၣ်န့ၣ် အဝဲသ့ၣ်တဒိးန့ၢ်ဘၣ်တၢ်အုၣ်က့ၤခီၣ်က့ၤ ဒီးတအိၣ်မူဘၣ်လီၤထူလီၤယိာ်ဘၣ်.—မးသဲ ၂၈:၁၉, ၂၀; ၁ ပ့းတရူး ၃:၂၁.
၂. ဘၣ်မနုၤအဃိ နကဟ့ၣ်လုၢ်ထီၣ်နသးလၢ ယဟိဝၤယွၤအိၣ်အဂီၢ် နတကြၢးပျံၤတၢ်ဘၣ်လဲၣ်.
၂ နမ့ၢ်ဒိးဘျၢထံန့ၣ် နကဒိးန့ၢ်ဘၣ် ယဟိဝၤယွၤအတၢ်ဆိၣ်ဂ့ၤလၢ ကျဲအါဘိလီၤ. ဘၣ်ဆၣ် နကဒိးန့ၢ်ဘၣ်စ့ၢ်ကီး မူဒါလၢအသီတဖၣ်လီၤ. မူဒါမနုၤတဖၣ်လဲၣ်. ဖဲနဒိးဘျၢထံအနံၤန့ၣ် ဒီပုၢ်ဝဲၢ်လၢအဟ့ၣ် တၢ်စံၣ်တဲၤတဲလီၤတၢ်တဂၤ သံကွၢ်နၤလၢ– “ခီဖျိယ့ၣ်ၡူးခရံာ် အတၢ်ဟ့ၣ်လုၢ်ထီၣ်သးအဃိ မ့ၢ်နပီၢ်ယၢ်လီၤက့ၤနသးလၢ တၢ်ဒဲးဘးဒီး ဟ့ၣ်လုၢ်ထီၣ်နသးလၢ နကမၤယဟိဝၤယွၤအတၢ်ဘၣ်သး ဝံၤလံဧါ.” ဖဲန့ၣ်အခါ နစံးဆၢက့ၤလၢ မ့ၢ်, ဝံၤလံ. နအၢၣ်လီၤလၢ နကအဲၣ်ယဟိဝၤယွၤ ဒီးနကပာ်အတၢ်မၤလၢနီၣ်ဂံၢ်တၢ လၢနတၢ်အိၣ်မူအပူၤလီၤ. နမၤတၢ်အၢၣ်လီၤလၢ အရ့ဒိၣ်တခါအံၤအဃိ မ့ၢ်နတူၢ်ဘၣ်လၢ နတၢ်ဆၢတဲာ်အံၤကမၣ်လံဧါ. လ့ၤတက့ၤ နတတူၢ်ဘၣ်လၢ နတၢ်ဆၢတဲာ်အံၤကမၣ်ဘၣ်. နမ့ၢ်ပျဲ ယဟိဝၤယွၤဟံးစုနဲၣ်ကျဲနၤ လၢနတၢ်အိၣ်မူအပူၤန့ၣ် နတၢ်ဆၢတဲာ်အံၤတကမၣ် နီတဘျီဘၣ်. ပှၤလၢတသ့ၣ်ညါ ယဟိဝၤယွၤန့ၣ် အဝဲသ့ၣ်ဘၣ်ဃးဒီး မုၣ်ကီၤလံၢ်လီၤ. မုၣ်ကီၤလံၢ် တအဲၣ်အဝဲသ့ၣ် ဒီးတအဲၣ်နၤစ့ၢ်ကီးဘၣ်. နမ့ၢ်ပာ်တ့ၢ်ကွံာ် ယဟိဝၤယွၤဒီး အိၣ်လၢမုၣ်ကီၤလံၢ်အအိၣ်တကပၤန့ၣ် နတအိၣ်မူဘၣ် လီၤထူလီၤယိာ်လၢၤဘၣ်. လၢတၢ်န့ၣ်အဃိ မုၣ်ကီၤလံၢ်ကသးခုဝဲဒိၣ်မးလီၤ.
၃. နမ့ၢ်ဟ့ၣ်လုၢ်ထီၣ်နသးလၢ ယဟိဝၤယွၤအအိၣ်န့ၣ် နကဒိးန့ၢ်ဘၣ် တၢ်မနုၤလဲၣ်.
၃ ဆိကမိၣ်ကွၢ် တၢ်ဆိၣ်ဂ့ၤလၢ နဒိးန့ၢ်ဘၣ်အီၤဖဲ နဟ့ၣ်လုၢ်ထီၣ်နသးလၢ ယဟိဝၤယွၤအအိၣ် ဒီးနဒိးဘျၢထံဝံၤအခါန့ၣ်တက့ၢ်. နဟ့ၣ်လီၤနသးလၢ ယဟိဝၤယွၤအိၣ်အဃိ နတဲသ့သပှၢ်ကတၢၢ်လၢ– “ယွၤအိၣ်လၢယအိၣ်တခီလီၤ. ပှၤကညီကမၤယၤဒ်လဲၣ်ဒ်လဲၣ်န့ၣ် ယတဘၣ်ယိၣ်ဘၣ်.” (စံးထီၣ်ပတြၢၤ ၁၁၈:၆) နအိၣ်လၢယွၤအအိၣ်တကပၤ ဒီးနဒိးန့ၢ်ဘၣ်အတၢ်ဘၣ်သးအဃိ တၢ်ခွဲးတၢ်ယာ်လၢ အဂ့ၤဒိၣ်န့ၢ်အအံၤ တအိၣ်နီတမံၤဘၣ်.
မ့ၢ်ဒၣ်နမူဒါ
၄, ၅. (က) ဒ်သိးနတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤထီဘိအဂီၢ် ဘၣ်မနုၤအဃိ ပတဲသ့လၢ အမ့ၢ်ဝဲနနီၢ်ကစၢ်မူဒါလဲၣ်. (ခ) ပှၤသးပှၢ်မ့ၢ်ဂ့ၤ ပှၤသးစၢ်မ့ၢ်ဂ့ၤ ပထံၣ်ဘၣ်တၢ်မၤကွၢ် မနုၤတဖၣ်သ့ဝဲလဲၣ်.
၄ နတၢ်ရ့လိာ်သးဒီး ယဟိဝၤယွၤန့ၣ် တလီၤဂာ်ဒီးတၢ်န့ၢ်သါတခါလၢ နဒိးန့ၢ်ဘၣ်လၢ နမိၢ်နပၢ်အအိၣ်ဘၣ်. နမ့ၢ်အိၣ်လၢ နမိၢ်နပၢ်အတၢ်ကဟုကယာ်အဖီလာ်သနာ်က့ ဒ်သိးနတၢ်ရ့လိာ်သးဒီးယဟိဝၤယွၤ ကဂၢၢ်ကျၢၤအဂီၢ် မ့ၢ်ဒၣ်နမူဒါလီၤ. ဘၣ်မနုၤအဃိ အရ့ဒိၣ်လၢနကဘၣ်သ့ၣ်နီၣ်ထီၣ်က့ၤ တၢ်ဂ့ၢ်အံၤလဲၣ်. မ့ၢ်လၢခါဆူညါန့ၣ် ပတၢ်နာ်ကဘၣ်တၢ်မၤကွၢ်အီၤ ဒ်လဲၣ်န့ၣ် ပတသ့ၣ်ညါဘၣ်အဃိလီၤ. အဒိ, နမ့ၢ်ဒိးဘျၢထံလၢ နလိၣ်ဘိထီၣ်အခါန့ၣ် လၢခံဖဲနသးပှၢ်ထီၣ်တစဲးအခါ နကအိၣ်ဒီးတၢ်ဆိကမိၣ်လၢအသီ ဒီးနကထံၣ်ဘၣ် တၢ်ကီတၢ်ခဲလၢအသီလီၤ. ပှၤသးစၢ်တဂၤတဲဝဲလၢ– “ဖိသၣ်တဂၤ ခီဖျိလၢအမ့ၢ် ယဟိဝၤပှၤအုၣ်အသးအဃိ လၢကၠိန့ၣ်အဝဲမ့ၢ်တအီၣ်ဘၣ်ဝဲ ကိၣ်ခ့း လၢပှၤမၤတၢ်အိၣ်ဖျဲၣ်ဆၢက့ၤအမုၢ်နံၤ သနာ်က့ တဘၣ်တၢ်နီတမံၤဘၣ်. ဘၣ်ဆၣ် ဖဲအဝဲလိၣ်ဘိထီၣ်အခါ အတၢ်တူၢ်ဘၣ်လၢ အဘၣ်ဃးဒီးတၢ်မံဃုာ်အိၣ်ဃုာ် အသဟီၣ်ကဆူၣ်ထီၣ်ဝဲအဃိ အဝဲကလိၣ်ဘၣ် တၢ်နာ်အဂၢၢ်အကျၢၤလၢ တၢ်ဒိကနၣ် ယဟိဝၤယွၤ အတၢ်သိၣ်တၢ်သီန့ၣ် မ့ၢ်ကျဲလၢအဂ့ၤကတၢၢ်န့ၣ်လီၤ.”
၅ ပှၤထံၣ်ဘၣ်တၢ်မၤကွၢ်အသီန့ၣ် တမ့ၢ်ထဲလၢ ပှၤသးစၢ်တဖၣ်ဘၣ်. ပှၤဘျၢထံလၢ အသးပှၢ်တဖၣ်ဒၣ်လဲာ် လၢတၢ်တမုၢ်လၢ်အပူၤ အတၢ်နာ်ဘၣ်တၢ်မၤကွၢ်အီၤသ့လီၤ. ဘၣ်သ့ၣ်သ့ၣ် တၢ်မၤကွၢ်တဖၣ်န့ၣ် ကဟဲလၢ တၢ်မၤလီၢ်, အဟံၣ်ပူၤဃီပူၤ, မ့တမ့ၢ် အတၢ်အိၣ်ဆူၣ်အိၣ်ချ့တဂ့ၤဘၣ်လီၤ. ပတၢ်အိၣ်သးမ့ၢ်အိၣ်ဒ်လဲၣ်ဂ့ၤ ဒ်လဲၣ်ဂ့ၤ ပသးနံၣ်မ့ၢ်အိၣ်ထဲလဲၣ်ဂ့ၤ ထဲလဲၣ်ဂ့ၤ ပဝဲတဂၤစုာ်စုာ် ပကဘၣ်တီဒီးယဟိဝၤယွၤလီၤ.—ယၤကိာ် ၁:၁၂-၁၄.
၆. (က) တၢ်အၢၣ်လီၤအီလီၤလၢ နမၤဒီးယဟိဝၤယွၤန့ၣ် အခီပညီဒ်လဲၣ်. (ခ) ဖံလံးပံၤ ၄:၁၁-၁၃ န့ၣ်ပမၤလိန့ၢ်ဘၣ် တၢ်မနုၤလဲၣ်.
၆ ဒ်သိးနကတီဒီး ယဟိဝၤယွၤထီဘိအဂီၢ် သ့ၣ်နီၣ်ထီၣ်က့ၤတၢ်အၢၣ်လီၤလၢ နမၤဒီးအီၤတက့ၢ်. နတၢ်အၢၣ်လီၤန့ၣ် အခီပညီမ့ၢ်ဝဲ နအၢၣ်လီၤလၢ နတၢ်အိၣ်သးမ့ၢ်အိၣ်ဒ်လဲၣ်ဂ့ၤ ဒ်လဲၣ်ဂ့ၤ, နတံၤသကိး မ့တမ့ၢ် နမိၢ်နပၢ် မ့ၢ်တဆဲးမၤ ယဟိဝၤယွၤအတၢ်မၤဒၣ်လဲာ် နကဆဲးမၤလၢတၢ်သးတီအပူၤလီၤ. (စံးထီၣ်ပတြၢၤ ၂၇:၁၀) တၢ်အိၣ်သးမ့ၢ်အိၣ်ဒ်လဲၣ်ဂ့ၤ ဒ်လဲၣ်ဂ့ၤ ဒ်သိးနဆဲးတီဒီး နတၢ်အၢၣ်လီၤအီလီၤကန့ၢ်အဂီၢ် ဃ့ယဟိဝၤယွၤလၢ ကမၤစၢၤနၤတက့ၢ်.—ဖး ဖံလံးပံၤ ၄:၁၁-၁၃ တက့ၢ်.
၇. ဒ်သိးနကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် နကဘၣ်မၤအီၤလၢ “တၢ်ပျံၤဒီးတၢ်ကနိး” န့ၣ်အခီပညီမ့ၢ်မနုၤလဲၣ်.
၇ ယဟိဝၤယွၤ အဲၣ်ဒိးလၢနကကဲထီၣ် အတံၤသကိးလီၤ. ဘၣ်ဆၣ် နကကဲထီၣ်အတံၤသကိး ဒီးနကန့ၢ်ဘၣ်တၢ်အုၣ်က့ၤခီၣ်က့ၤအဂီၢ် နကဘၣ်ဂုာ်ကျဲးစၢးလီၤ. ဖံလံးပံၤ ၂:၁၂ တဲဝဲလၢ– “မၤသုတၢ်အုၣ်က့ၤခီၣ်က့ၤဒၣ်သုဝဲလၢ တၢ်ပျံၤဒီးတၢ်ကနိးတက့ၢ်.” အဲၣ်ဒိးစံးဝဲ ပကဘၣ်ဆိကမိၣ်ထံ တၢ်ဂ့ၢ်ဘၣ်ဃး ပအိၣ်ဘူးဒီး ယဟိဝၤယွၤကသ့ဒ်လဲၣ် ဒီးပပၢၤဃာ်ပတၢ်နာ်ကသ့ဒ်လဲၣ်န့ၣ်လီၤ. တဘၣ်နာ်န့ၢ်လီၤ နသးအါတလၢတဂ့ၤ. သ့ၣ်နီၣ်ထီၣ်က့ၤလၢ ပှၤလၢအမၤယွၤအတၢ်မၤလၢ အနံၣ်ဖးယံာ်တနီၤဒၣ်လဲာ် ပၢၤဃာ်အတၢ်သးတီတန့ၢ်ဘၣ်. လၢတၢ်န့ၣ်အဃိ ဒ်သိးနကန့ၢ်ဘၣ် တၢ်အုၣ်က့ၤခီၣ်က့ၤအဂီၢ် တၢ်မနုၤကမၤစၢၤနၤလဲၣ်.
တၢ်မၤလိလံာ်စီဆှံ မ့ၢ်တၢ်လၢအရ့ဒိၣ်
၈. ဖဲပမၤလိလံာ်စီဆှံအခါန့ၣ် ပကဘၣ်မၤအီၤဒ်လဲၣ်. ဘၣ်မနုၤအဃိ အရ့ဒိၣ်လဲၣ်.
၈ ပမ့ၢ်ကဲ ယဟိဝၤယွၤအတံၤသကိးန့ၣ် ပကဘၣ်ဒိကနၣ်အကလုၢ် ဒီးကတိၤတၢ်ဒီးအီၤလီၤ. ကျဲအဂ့ၤကတၢၢ်လၢ ပကဒိကနၣ်ယဟိဝၤယွၤအကလုၢ်န့ၣ် မ့ၢ်ဝဲတၢ်မၤလိလံာ်စီဆှံလီၤ. တကးဒံးဘၣ် ပဘၣ်ဖးလံာ်စီဆှံ ဒီးပတၢ်ကရၢကရိအလံာ်လဲၢ်တဖၣ် ဒီးဆိကမိၣ်ထံ တၢ်လၢပဖးအီၤတဖၣ်န့ၣ်လီၤ. ဘၣ်ဆၣ် ပမၤလိလံာ်စီဆှံန့ၣ် တလီၤဂာ်ဒီး ပှၤတိၢ်ရူးကၠိအလံာ်လၢ တၢ်ဒိးစဲးအဂီၢ်ဘၣ်. လၢတၢ်န့ၣ်အလီၢ် နကဘၣ်မၤလိအီၤလီၤတံၢ်လီၤဆဲး ဒ်သိးကကဲဘျုးလၢနဂီၢ် ဒီးနကသ့ၣ်ညါအါထီၣ် ယဟိဝၤယွၤ အတၢ်ဂ့ၤတၢ်ဝါတဖၣ်အဂီၢ်လီၤ. ဒ်ပှၤဃုသ့ၣ်ညါတၢ်ဖိတဖၣ် ဟးဃုသ့ၣ်ညါဝဲ ဒီးထံၣ်ဝဲတၢ်အသီတဖၣ်အသိး ပဝဲသ့ၣ်တဖၣ်စ့ၢ်ကီး ပကဘၣ်ဃုသ့ၣ်ညါ ယဟိဝၤယွၤအဂ့ၢ် ဒ်န့ၣ်အသိးလီၤ. နမ့ၢ်မၤဒ်အံၤန့ၣ် နကဘူးဒိၣ်ထီၣ်ဒီးကစၢ်ယွၤ ဒီးအဝဲကဘူးဒိၣ်ထီၣ်ဒီးနၤ စ့ၢ်ကီးလီၤ.—ယၤကိာ် ၄:၈.
နတၢ်ဆဲးကျိးလိာ်သးဒီး ယဟိဝၤယွၤအိၣ်ဒ်လဲၣ် (ကွၢ်လံာ်အဆၢ ၈-၁၁)
၉. ဖဲနမၤနီၢ်ကစၢ်တၢ်မၤလိလံာ်စီဆှံအခါ တၢ်ပီးတၢ်လီမနုၤတဖၣ် ကဲဘျုးလၢနဂီၢ်လဲၣ်.
၉ ယဟိဝၤယွၤ အတၢ်ကရၢကရိန့ၣ် ကတဲာ်ကတီၤဝဲ တၢ်ပီးတၢ်လီအကလုာ်ကလုာ် ဒ်သိးကမၤစၢၤနၤလၢ နကမၤနီၢ်ကစၢ် တၢ်မၤလိလံာ်စီဆှံအဂီၢ်လီၤ. အဒိ, နမ့ၢ်နုာ်လီၤလၢ jw.org အပူၤဒီးစံၢ်လီၤ “Bible Study Activities” န့ၣ်နကထံၣ် “Teenagers” အသနၢၣ်န့ၣ်လီၤ. ဒီးနကထံၣ်တၢ်ဂ့ၢ်လၢ ကမၤစၢၤနၤ ဒ်သိးနမၤထွဲ လံာ်စီဆှံ တၢ်ဂ့ၢ်တၢ်ကျိၤလၢ နမၤလိဘၣ်တဖၣ် ကန့ၢ်အဂီၢ်လီၤ. လၢ jw.org အပူၤန့ၣ် နကထံၣ်ဘၣ်စ့ၢ်ကီး လံာ်လၢအမ့ၢ် “လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ်” န့ၣ်လီၤ. ဒ်သိးနမၤအါထီၣ် နတၢ်နာ် ဒီးတဲနၢ်ပၢၢ်ပှၤဂၤလၢ နတၢ်နာ်အဂ့ၢ်ကသ့အဂီၢ် လံာ်အံၤကမၤစၢၤနၤလီၤ. တကးဒံးဘၣ် နဃုထံၣ်န့ၢ်တၢ်ဟ့ၣ်ကူၣ်အဂၤလၢ တၢးထီခိးတၢ်, နီၣ်ဂံၢ် ၁ ၂၀၁၇ ကဘျံးပၤ ၃-၇ အပူၤသ့စ့ၢ်ကီးလီၤ. တၢ်မၤလိလံာ်စီဆှံ ဒီးဆိကမိၣ်ထံ တၢ်လၢနဖးအီၤန့ၣ် အရ့ဒိၣ်လၢ နနီၢ်ကစၢ်တၢ်အုၣ်က့ၤခီၣ်က့ၤအဂီၢ်လီၤ.—ဖး စံးထီၣ်ပတြၢၤ ၁၁၉:၁၀၅ တက့ၢ်.
တၢ်ထုကဖၣ် မ့ၢ်တၢ်လၢအရ့ဒိၣ်
၁၀. ဘၣ်မနုၤအဃိ ခရံာ်ဖိလၢ အဒိးဘျၢထံဝံၤတဖၣ် ကဘၣ် ဃ့ဘါထုကဖၣ်လဲၣ်.
နမ့ၢ်အိၣ်ဒီး တၢ်ကိၢ်တၢ်ဂီၤ တမံၤဂ့ၤတမံၤဂ့ၤ “ပာ်ထီၣ် နတၢ်ဝံတၢ်ယိးလၢ ယွၤအလိၤတက့ၢ်”
၁၀ ဖဲပမၤလိလံာ်စီဆှံအခါန့ၣ် မ့ၢ်ဝဲပဒိကနၣ် ယဟိဝၤယွၤအကလုၢ် ဒီးဖဲပဃ့ဘါထုကဖၣ်တၢ်အခါ မ့ၢ်ဝဲပကတိၤတၢ်ဒီးအီၤလီၤ. ဖဲပဃ့ဘါထုကဖၣ်တၢ်အခါ ပတဘၣ်ဃ့ဝံၤတၢ်မံၤ မ့တမ့ၢ် တဘၣ်ဆိကမိၣ်လၢ တၢ်ထုကဖၣ်န့ၣ် ‘ကမၤဂ့ၤထီၣ် ပဘူၣ်ပတီၢ်န့ၣ်တဂ့ၤ.’ တၢ်ဃ့ဘါထုကဖၣ်န့ၣ် မ့ၢ်တၢ်ဆဲးကျိးလိာ်သးဒီး ပတၢ်ဘၣ်တ့ကစၢ်န့ၣ်လီၤ. ယဟိဝၤယွၤ အဲၣ်ဒိးနၢ်ဟူဝဲ တၢ်လၢနအဲၣ်ဒိးတဲအီၤတဖၣ်န့ၣ်လီၤ. (ဖး ဖံလံးပံၤ ၄:၆ တက့ၢ်.) လၢတၢ်န့ၣ်အဃိ နမ့ၢ်အိၣ်ဒီး တၢ်ကိၢ်တၢ်ဂီၤ တမံၤဂ့ၤတမံၤဂ့ၤ လံာ်စီဆှံ စံးဝဲလၢ “ပာ်ထီၣ်နတၢ်ဝံတၢ်ယိးလၢ ယွၤအလိၤတက့ၢ်.” (စံးထီၣ်ပတြၢၤ ၅၅:၂၂, ခ့ခါစှီၤကျိာ်) ဒီပုၢ်ဝဲၢ်လၢ အကကွဲၢ်တဖၣ် မၤဝဲဒ်အံၤအဃိ ကဲထီၣ်တၢ်မၤစၢၤလၢ အဝဲသ့ၣ်အဂီၢ်လီၤ. နမ့ၢ်မၤဒ်အံၤန့ၣ် ကကဲဘျုးလၢနဂီၢ်စ့ၢ်ကီးလီၤ.
၁၁. ဘၣ်မနုၤအဃိ ပဘၣ်စံးဘျုးယဟိဝၤယွၤ ထီဘိလဲၣ်.
၁၁ ဘၣ်ဆၣ် ပတကြၢး ဃ့ထုကဖၣ်ထဲလၢ ဖဲပလိၣ်ဘၣ် ယဟိဝၤယွၤ အတၢ်မၤစၢၤအခါဧိၤဘၣ်. လံာ်စီဆှံဟ့ၣ်ပလီၢ်ပှၤလၢ– “ကဲထီၣ် ပှၤစံးထီၣ်ပတြၢၤ တၢ်အဘျုးအဖှိၣ်တက့ၢ်.” (ကလီးစဲ ၃:၁၅) တဘျီတခီၣ် ပသူၣ်ကိၢ်သးဂီၤတၢ်အါတလၢ လၢပတၢ်ကီတၢ်ခဲအဂီၢ်အဃိ ပသးပ့ၤနီၣ်ကွံာ် တၢ်ဆိၣ်ဂ့ၤလၢ ပဒိးန့ၢ်ဘၣ်အီၤတဖၣ်န့ၣ်လီၤ. လၢတၢ်န့ၣ်အဃိ ဂုာ်ကျဲးစၢးမၤကွၢ် ဒ်အံၤတက့ၢ်– ကိးနံၤဒဲးန့ၣ် ဆိကမိၣ်ထီၣ် တၢ်ဂ့ၢ်သၢမံၤလၢ နကစံးဘျုး ယဟိဝၤယွၤအဂီၢ် ဒီးစံးဘျုးအီၤတက့ၢ်. ပှၤသးစၢ်တဂၤလၢအမံၤမ့ၢ် အဘံၤကဲန့ၣ် အဝဲဒိးဘျၢထံဖဲအသးအိၣ် ၁၂ နံၣ်အခါလီၤ. အဝဲတဲဝဲလၢ– “ယတူၢ်ဘၣ်လၢ ထဲဒၣ်ယဟိဝၤယွၤတဂၤဧိၤန့ၣ် ကြၢးဒိးန့ၢ်ဘၣ် ပတၢ်စံးဘျုးစံးဖှိၣ်အါန့ၢ် ပှၤအဂၤတဖၣ်လီၤ. ဖဲတၢ်ခွဲးတၢ်ယာ်အိၣ်ထီၣ် တဘျီလၢ်လၢ်န့ၣ် ပကြၢးစံးဘျုးစံးဖှိၣ်အီၤလၢ တၢ်လၢအဝဲဟ့ၣ်ပှၤတဖၣ်န့ၣ်လီၤ.”
နီၢ်ကစၢ်တၢ်လဲၤခီဖျိ ကဲထီၣ်တၢ်ဂံၢ်တၢ်ဘါ
၁၂, ၁၃. မ့ၢ်နထံၣ်ဘၣ် ယဟိဝၤယွၤ အတၢ်မၤစၢၤလၢ နတၢ်အိၣ်မူအပူၤဧါ. ဒီးဘၣ်မနုၤအဃိ အရ့ဒိၣ်လၢ နကဘၣ်ဆိကမိၣ်ထံက့ၤ တၢ်လၢယဟိဝၤယွၤ မၤစၢၤတ့ၢ်နၤတဖၣ်လဲၣ်.
၁၂ စီၤပၤဒၤဝံး ထံၣ်ဘၣ်ဝဲ တၢ်ကီတၢ်ခဲအါမး သနာ်က့ ယဟိဝၤယွၤ မၤစၢၤအီၤလီၤ. မ့ၢ်လၢအထံၣ်ဘၣ် ယဟိဝၤယွၤ အတၢ်မၤစၢၤအဃိ အဝဲစံးဝဲလၢ– “လ့ၣ်ကွၢ်, ဒီးထံၣ်လၢယွၤမ့ၢ် တၢ်ဂ့ၤန့ၣ်တက့ၢ်. ပှၤလၢအသန့ၤအသးလၢအီၤန့ၣ် ဘၣ်ဆိၣ်ဂ့ၤဝဲလီၤ.” (စံးထီၣ်ပတြၢၤ ၃၄:၈) လံာ်စီဆှံတဆၢအံၤ ပာ်ဖျါထီၣ်န့ၢ်ပှၤလၢ ပကဘၣ်တူၢ်ဘၣ် ယဟိဝၤယွၤ အတၢ်မၤစၢၤလၢ ပနီၢ်ကစၢ်လီၤ. ဖဲပဖးလံာ်စီဆှံ, လံာ်လဲၢ်တဖၣ် ဒီးပလဲၤထီၣ်တၢ်အိၣ်ဖှိၣ်ရိဖှိၣ်အခါ ပသ့ၣ်ညါဘၣ်လၢ ကစၢ်ယွၤမၤစၢၤဝဲ ပှၤအဂၤတဖၣ် ဒ်သိးအဝဲသ့ၣ် ကတီဒီးအီၤအဂီၢ်လီၤ. ဘၣ်ဆၣ် ဒ်သိးနတၢ်ရ့လိာ်သးဒီး ယဟိဝၤယွၤကဂၢၢ်ကျၢၤထီၣ်အဂီၢ် နကဘၣ်ထံၣ် ယဟိဝၤယွၤ အတၢ်မၤစၢၤလၢ နတၢ်အိၣ်မူအပူၤလီၤ. လၢနတၢ်အိၣ်မူအပူၤ နထံၣ်ဘၣ် ယဟိဝၤယွၤ မၤစၢၤနၤလၢ ကျဲဒ်လဲၣ်.
ထီဘိန့ၣ် ပာ်လုၢ်ပာ်ပှ့ၤမူဒါလၢ ယဟိဝၤယွၤ ဟ့ၣ်နၤလၢ အတၢ်ကရၢကရိအပူၤန့ၣ်တက့ၢ်
၁၃ ခရံာ်ဖိကိးဂၤဒဲး ထံၣ်ဘၣ်ဝဲ ယဟိဝၤယွၤအတၢ်မၤစၢၤလၢ ကျဲတဘိအံၤလီၤ. အဝဲကွဲမုာ်ပှၤလၢ ပကသုးဘူးပသးလၢအအိၣ် ဒီးအဖိခွါအအိၣ်လီၤ. ယ့ၣ်ၡူးစံးဝဲလၢ– “ယပၢ်လၢအမၢလီၤယၤန့ၣ် မ့ၢ်တမိၤဘၣ်ဒီး, ပှၤဟဲဆူယအိၣ်တသ့ဘၣ်နီတဂၤဘၣ်.” (ယိၤဟၣ် ၆:၄၄) မ့ၢ်နတူၢ်ဘၣ်လၢ ယဟိဝၤယွၤ မိၤနၤဆူအအိၣ်ဧါ. မ့တမ့ၢ် နဆိကမိၣ်လၢ ‘ယဟိဝၤယွၤ မိၤယမိၢ်ယပၢ် ဆူအအိၣ်အဃိ မ့ၢ်ယပိာ်အဝဲသ့ၣ်အခံလီၤဧါ. သ့ၣ်နီၣ်ထီၣ်က့ၤလၢ ဖဲနဟ့ၣ်လုၢ်ထီၣ်နသးလၢ ယဟိဝၤယွၤအအိၣ် ဒီးဒိးဘျၢထံအခါ နဒိးန့ၢ်ဘၣ်တၢ်ခွဲးတၢ်ယာ်လီၤဆီလၢ နကရ့လိာ်သးဒီးအီၤန့ၣ်လီၤ. လံာ်စီဆှံ စံးဝဲလၢ– “ပှၤတဂၤဂၤမ့ၢ်အဲၣ်ယွၤဒီး, အဝဲဒၣ်ကဘၣ်တၢ်သ့ၣ်ညါအီၤလၢယွၤလီၤ.” (၁ ကရံၣ်သူး ၈:၃) ထီဘိန့ၣ် ပာ်လုၢ်ပာ်ပှ့ၤမူဒါလၢ ယဟိဝၤယွၤ ဟ့ၣ်နၤလၢအတၢ်ကရၢကရိအပူၤန့ၣ်တက့ၢ်.
၁၄, ၁၅. ဒ်သိးနတၢ်နာ် ကဂၢၢ်ကျၢၤထီၣ်အဂီၢ် တၢ်စံၣ်တဲၤတဲလီၤတၢ် တၢ်မၤ မၤစၢၤနၤကသ့ဒ်လဲၣ်.
၁၄ နထံၣ်ဘၣ်စ့ၢ်ကီး ယဟိဝၤယွၤ အတၢ်မၤစၢၤ ဖဲအဝဲဟ့ၣ်နၤတၢ်သးဒူ ဒ်သိးနကတဲဘၣ်ပှၤဂၤလၢ နတၢ်နာ်အဂ့ၢ် လၢတၢ်စံၣ်တဲၤတဲလီၤတၢ်မၤအပူၤ မ့တမ့ၢ် လၢကၠိအခါန့ၣ်လီၤ. နကစံၣ်တဲၤတဲလီၤ နသကိးလၢကၠိတဖၣ်န့ၣ် ကကီလၢနဂီၢ်လီၤ. နကဘၣ်ယိၣ်လၢ အဝဲသ့ၣ်ကမၤဆၢက့ၤဝဲဒ်လဲၣ်န့ၣ်လီၤ. လီၤဆီဒၣ်တၢ် ဖဲနကဘၣ်တဲဖျါထီၣ် နတၢ်နာ်အဂ့ၢ်လၢ ပှၤအါဂၤအမဲာ်ညါအခါန့ၣ် နကပျံၤတၢ်လီၤ. တၢ်မနုၤကမၤစၢၤနၤလဲၣ်.
၁၅ ဆိကမိၣ်ကွၢ် ဘၣ်မနုၤအဃိ နနာ်တၢ်ဒ်အံၤလဲၣ်. လၢ jw.org အပူၤန့ၣ် နဒိးန့ၢ်ဘၣ် study guides လၢနကျိာ်သ့ဧါ. မ့ၢ်သ့န့ၣ် သူအီၤတက့ၢ်. ဖဲန့ၣ်နကထံၣ်ဘၣ် တၢ်ဂ့ၢ်တဖၣ်လၢ ကမၤစၢၤနၤ ဒ်သိးနကဆိကမိၣ်ထံ နတၢ်စူၢ်တၢ်နာ်အဂ့ၢ် ဒီးဘၣ်မနုၤအဃိ နနာ်တၢ်ဒ်အံၤလဲၣ် ဒီးနတဲနၢ်ပၢၢ်ပှၤဂၤလၢ နတၢ်နာ်အဂ့ၢ်ကသ့ဒ်လဲၣ်န့ၣ်လီၤ. နမ့ၢ်အိၣ်ဒီးတၢ်နာ်န့ၢ်လီၤသး ဒီးကတဲာ်ကတီၤပာ်စၢၤဂ့ၤဂ့ၤန့ၣ် နကအဲၣ်ဒိး တဲဘၣ်ပှၤဂၤလၢ ယဟိဝၤယွၤအဂ့ၢ်လီၤ.—ယံးရမံယၤ ၂၀:၈, ၉.
၁၆. ဒ်သိးနတဲပၠးပှၤဂၤ နတၢ်နာ်အဂ့ၢ်ဒူဒူကဘူၣ်အဂီၢ် တၢ်မနုၤကမၤစၢၤနၤလဲၣ်.
၁၆ နမ့ၢ်ကတဲာ်ကတီၤနသး ဂ့ၤဂ့ၤသနာ်က့ နကတဲဖျါထီၣ်နတၢ်နာ်အဂီၢ် ဘၣ်သ့ၣ်သ့ၣ် နကပျံၤတၢ်ဒံးလီၤ. ဒီပုၢ်ဝဲၢ်မုၣ် လၢအသးအိၣ် ၁၈ နံၣ်တဂၤ အဝဲဒိးဘျၢထံဖဲ အသးအိၣ် ၁၃ နံၣ်အခါလီၤ. အဝဲတဲဝဲလၢ– “ယနာ်တၢ်မနုၤလဲၣ်န့ၣ် ယသ့ၣ်ညါ ဘၣ်ဆၣ် တဘျီတခီၣ် ယကတဲပၠးပှၤဂၤလၢ ယတၢ်နာ်အဂ့ၢ်န့ၣ် ကီဒိၣ်မး.” လၢတၢ်န့ၣ်အဃိ အဝဲဂုာ်ကျဲးစၢး စံၣ်တဲၤတဲလီၤပှၤဂၤ ဒ်အဝဲတဲဝဲသ့အသိး ဒီးသူဝဲတၢ်ကတိၤယိယိဖိလီၤ. အဝဲတဲဝဲလၢ– “ယတံၤသကိးလၢကၠိတဖၣ် အဝဲသ့ၣ်တဲဖျါထီၣ်ဝဲ တၢ်လၢအမၤဝဲတဖၣ် ပျီပျီအဃိ ယၤစ့ၢ်ကီးယကြၢးမၤဒ်သိးအဝဲသ့ၣ်လီၤ. အဃိ တဘျီတခီၣ်န့ၣ် ယယၢၤထီၣ်တၢ်လၢယမၤတဖၣ် ဒ်သိးဒီး ‘ဖဲမဟါယသိၣ်လိပှၤဂၤ လံာ်စီဆှံ. . . ’ ဒီးယဆဲးတဲ တၢ်ဂ့ၢ်တၢ်ကျိၤလီၤ. ယတစးထီၣ်တဲ လံာ်စီဆှံအဂ့ၢ်တဘျီဃီဘၣ်ဆၣ် ခီဖျိလၢယမၤဒ်အံၤအဃိ ယသကိးတနီၤနီၤ အဲၣ်ဒိးသ့ၣ်ညါအါထီၣ်တၢ်ဂ့ၢ် ဒီးသံကွၢ်ယၤ ဖဲယသိၣ်လိပှၤဂၤလံာ်စီဆှံအခါ ယမၤအီၤဒ်လဲၣ်. ယမၤအီၤဒ်န့ၣ် အါထီၣ်အါထီၣ်ဒီး ယတဲပၠးဘၣ်ပှၤဂၤလၢ ယတၢ်နာ်အဂ့ၢ်ညီထီၣ်ဝဲလီၤ. ယမၤဒ်န့ၣ်မ့ၢ်ဝံၤန့ၣ် ယပှဲၤဒီးတၢ်သူၣ်ခုသးခုလီၤ.”
၁၇. ဒ်သိးနတဲတၢ်ဒီး ပှၤဂၤကဘူၣ်အဂီၢ် တၢ်အဂၤမနုၤ ကမၤစၢၤနၤလဲၣ်.
၁၇ ပှၤအဂၤတဖၣ်မ့ၢ်တူၢ်ဘၣ်လၢ နသးအိၣ်အဝဲသ့ၣ်နီၢ်နီၢ် ဒီးပာ်ကဲအဝဲသ့ၣ်န့ၣ် အဝဲသ့ၣ်စ့ၢ်ကီး ကပာ်ကဲနၤ ဒီးနတၢ်နာ်န့ၣ်လီၤ. ဒီပုၢ်ဝဲၢ်မုၣ် အိၤလံဘံယါန့ၣ် အသးအိၣ် ၁၇ နံၣ်ဒီးဖဲအဝဲဒိးဘျၢထံအခါ အညါဘီၣ်ဘီၣ်ဖိလီၤ. အဝဲတဲဝဲလၢ– “ယဘၣ်ယိၣ်လၢ ဖဲယတဲသကိးတၢ်ဒီးပှၤဂၤအခါ ယမ့ၢ်တဲဃုာ်ဒီး လံာ်စီဆှံအဂ့ၢ်န့ၣ် ပှၤကထံၣ်ယၤဒ် ယမ့ၢ်ပှၤအပျုၢ် လၢတၢ်ဘူၣ်တၢ်ဘါတကပၤလီၤ.” ဘၣ်ဆၣ် လၢခံအဝဲဆီတလဲအတၢ်ထံၣ်လီၤ. အဝဲဆိကမိၣ်က့ၤဝဲလၢ– “ပှၤသးစၢ်အါဂၤတသ့ၣ်ညါ ယဟိဝၤပှၤအုၣ်အသးအဂ့ၢ်နီတစဲးဘၣ်. အဝဲသ့ၣ်နၢ်ဟူဘၣ် ယဟိဝၤပှၤအုၣ်အသးအဂ့ၢ်ခီဖျိပှၤလီၤ. လၢတၢ်န့ၣ်အဃိ ပတၢ်အိၣ်ထီၣ်အိၣ်လီၤန့ၣ် မ့ၢ်တၢ်လၢအရ့ဒိၣ်လီၤ. ဘၣ်မနုၤအဃိလဲၣ်န့ၣ် ဖဲပတဲပၠးပှၤဂၤပတၢ်နာ်အဂ့ၢ်အခါ ပမ့ၢ်မဲာ်ဆှး, ပမ့ၢ်ပျံၤတၢ် မ့တမ့ၢ် ပမ့ၢ်တဲအီၤဘူၣ်ဘူၣ်တဘူၣ်ဘူၣ်န့ၣ် အဝဲသ့ၣ်ကထံၣ်ပှၤဒ်လဲၣ်. အဝဲသ့ၣ်ကထံၣ်ပှၤ ဒ်ပှၤလၢအသးတဆူၣ်လၢ တၢ်ဘူၣ်တၢ်ဘါအဂီၢ်ဘၣ်. လၢတၢ်န့ၣ်အဃိ ပတၢ်နာ်န့ၢ်လီၤသးမ့ၢ်တအိၣ်ဘၣ်န့ၣ် ဘၣ်သ့ၣ်သ့ၣ် အဝဲသ့ၣ် ကတဲဆါပှၤလီၤ. ပမ့ၢ်တဲတၢ်ဒီးအဝဲသ့ၣ်မုာ်မုာ် ဒီးတဲဖျါထီၣ်ပတၢ်နာ်အဂ့ၢ် ဒ်ပတဲတၢ်မုၢ်ဆ့ၣ်မုၢ်ဂီၤအသိးန့ၣ် အဝဲသ့ၣ်ကပာ်ကဲပှၤလီၤ.”
ဂုာ်ကျဲးစၢး ဒ်သိးနကဒိးန့ၢ်ဘၣ် တၢ်အုၣ်က့ၤခီၣ်က့ၤတက့ၢ်
၁၈. ဒ်သိးနကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် နကဘၣ်မၤတၢ်မနုၤလဲၣ်.
၁၈ ပသ့ၣ်ညါဘၣ်လၢ ဒ်သိးပကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ပကဘၣ်ဂုာ်ကျဲးစၢးသပှၢ်ကတၢၢ်လီၤ. ဒ်သိးပမၤဒ်န့ၣ်ကသ့အဂီၢ် ပကဘၣ်ဖး ဒီးဆိကမိၣ်ထံ ယွၤအကလုၢ်ကထါ, ဃ့ဘါထုကဖၣ် ဒီးဆိကမိၣ်ထံက့ၤ တၢ်လၢယဟိဝၤယွၤ မၤစၢၤတ့ၢ်ပှၤအဂ့ၢ်န့ၣ်လီၤ. နမ့ၢ်မၤဒ်န့ၣ်န့ၣ် နကတူၢ်ဘၣ်လၢ ယဟိဝၤယွၤမ့ၢ်နတံၤသကိးလီၤ. တကးဒံးဘၣ် နကအဲၣ်ဒိးတဲဘၣ်ပှၤဂၤလၢ နတၢ်နာ်အဂ့ၢ်လီၤ.—ဖး စံးထီၣ်ပတြၢၤ ၇၃:၂၈ တက့ၢ်.
၁၉. ဒ်သိးပကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ဘၣ်မနုၤအဃိ ပကဘၣ်ထဲးဂံၢ်ထဲးဘါလဲၣ်.
၁၉ ယ့ၣ်ၡူးစံးဝဲလၢ– “ပှၤမ့ၢ်မိၣ်ပိာ်အသးလၢ ယခံတဂၤဂၤန့ၣ်, မ်အညိကွံာ်အသးဒၣ်ဝဲ, ဒီးဟံးန့ၢ်အထူၣ်စုညါ, ဒီးပိာ်ယခံတက့ၢ်.” (မးသဲ ၁၆:၂၄) ဒ်သိးပပိာ်ယ့ၣ်ၡူးအခံကသ့အဂီၢ် ပဝဲခရံာ်ဖိတဂၤစုာ်စုာ် ပကဘၣ်ဟ့ၣ်လုၢ်ထီၣ်ပသးဆူ ယဟိဝၤယွၤအအိၣ် ဒီးဒိးဘျၢထံလီၤ. ဘၣ်ဆၣ် ဒ်သိးပကဒိးန့ၢ်ဘၣ် တၢ်မူအထူအယိာ် လၢဟီၣ်ခိၣ်သီပူၤအဂီၢ် တၢ်လၢပကဘၣ်မၤန့ၣ် အိၣ်ဒံးဝဲအါမးလီၤ. လၢတၢ်န့ၣ်အဃိ ဒ်သိးနကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ဂုာ်ကျဲးစၢးလၢအဂ့ၤကတၢၢ်တက့ၢ်.
တၢ်ဂ့ၤအဂၤလၢ နကဘၣ်သး
တၢးထီခိးတၢ်—လံာ်လၢတၢ်မၤလိအဂီၢ်
သးစၢ်သ့ၣ်ဧၢ—နကဘျၢထံအဂီၢ် မ့ၢ်နအိၣ်ကတဲာ်ကတီၤနသးလံဧါ
တၢ်သံကွၢ် သၢဘီ ကမၤစၢၤနၤလၢ နကဆၢတဲာ်တၢ်အဂီၢ်လီၤ.
တၢးထီခိးတၢ်—လံာ်လၢတၢ်မၤလိအဂီၢ်
သးစၢ်သ့ၣ်ဧၢ—သုကတဲာ်ကတီၤသုသး လၢတၢ်ဘျၢထံအဂီၢ်ကသ့ဒ်လဲၣ်
နကဘျၢထံအဂီၢ် နသးမ့ၢ်ဒ့ဒီ မ့တမ့ၢ် နမိၢ်နပၢ်မ့ၢ်ဆိကမိၣ်ဝဲလၢ အခါတဘၣ်ဒံးဘၣ်အဃိ နကမၤဒ်လဲၣ်.
