အဝဲကဂဲၤဆၢထၢၣ်သမူထီၣ်က့ၤန့ၣ် “ယသ့ၣ်ညါ”
“ပတခွါစီၤလါစရူးမံသပ့ၤဝဲ, မ့မ့ၢ်ယလဲၤဒ်သိးကထိၣ်ဂဲၤထီၣ်အီၤလီၤ.”—ယိၤဟၣ် ၁၁:၁၁.
၁. နီၢ်မၢ်သၤနာ်ဝဲလၢ တၢ်ကမၤအသးဒီး စီၤလါစရူးဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
နီၢ်မၢ်သၤန့ၣ် မ့ၢ်ဝဲယ့ၣ်ၡူးအတံၤသကိး ဒီးအပျဲၢ်တဂၤလီၤ. ဒီးအဝဲအသူၣ်အုးသးအုး မ့ၢ်လၢအဒီပုၢ်ဝဲၢ်ခွါ စီၤလါစရူး သံဝဲအဃိလီၤ. တၢ်လၢကမၤမုာ်ထီၣ်က့ၤ နီၢ်မၢ်သၤအသးန့ၣ် အိၣ်ဝဲတမံၤမံၤဧါ. အိၣ်ဝဲလီၤ. ယ့ၣ်ၡူးအၢၣ်လီၤအီၤလၢ– “နဒီပုၢ်ခွါ ကဂဲၤဆၢထၢၣ်က့ၤလီၤ.” တၢ်ကတိၤအံၤ တမၤလီၤမၢ်ကွံာ် နီၢ်မၢ်သၤအတၢ်သူၣ်အုးသးအုးခဲလၢာ်ဘၣ်. ဘၣ်ဆၣ် နီၢ်မၢ်သၤ နာ်ဝဲယ့ၣ်ၡူး အတၢ်အၢၣ်လီၤ ဒီးစံးဝဲလၢ– “ကဂဲၤဆၢထၢၣ်က့ၤဝဲလၢ မုၢ်နံၤကတၢၢ် အတၢ်ဂဲၤဆၢထၢၣ်က့ၤန့ၣ်, ယသ့ၣ်ညါလီၤ.” (ယိၤဟၣ် ၁၁:၂၀-၂၄) နီၢ်မၢ်သၤ နာ်ဝဲလၢခါဆူညါန့ၣ် တၢ်ဂဲၤဆၢထၢၣ်သမူထီၣ်က့ၤ အိၣ်ဝဲလီၤ. ဘၣ်ဆၣ် ယ့ၣ်ၡူးမၤဝဲ တၢ်လီၤလးတခါ ဒီးမၤဂဲၤဆၢထၢၣ်သမူထီၣ်က့ၤ စီၤလါစရူးလီၤ.
၂. ဘၣ်မနုၤအဃိ နအဲၣ်ဒိးအိၣ်ဒီး တၢ်နာ်ဒ်နီၢ်မၢ်သၤအသိးလဲၣ်.
၂ ပတမုၢ်လၢ်လၢ ယ့ၣ်ၡူး မ့တမ့ၢ် အပၢ် ကမၤဂဲၤဆၢထၢၣ်သမူထီၣ်က့ၤ ပှၤလၢပအဲၣ်ဘၣ်အီၤလၢအသံတဖၣ်ခဲအံၤဘၣ်. ဘၣ်ဆၣ် ဒ်နီၢ်မၢ်သၤအသိး မ့ၢ်နနာ်လၢ ခါဆူညါန့ၣ် ပှၤလၢနအဲၣ်ဘၣ်အီၤတဖၣ် ကဂဲၤဆၢထၢၣ်သမူထီၣ်က့ၤဧါ. ဘၣ်သ့ၣ်သ့ၣ် နဝၤ, နမါ, နမိၢ်, နပၢ်, နဖံနဖု မ့တမ့ၢ် နဖိလၢနအဲၣ်အီၤတဖၣ်ကသံဝဲလီၤ. နအိၣ်ခိးကွၢ်လၢ်လၢ နကဖိးဟု, တဲသကိးတၢ် ဒီးတဲနံၤတဲအ့တၢ်ဒီးအဝဲသ့ၣ်လီၤ. ဒ်နီၢ်မၢ်သၤအသိး နတဲသ့လၢ– ‘ပှၤလၢယအဲၣ်လၢအသံတဖၣ်န့ၣ် ယသ့ၣ်ညါလၢအဝဲသ့ၣ် ကဂဲၤဆၢထၢၣ်သမူထီၣ်က့ၤလီၤ.’ ဘၣ်ဆၣ် ပဝဲခရံာ်ဖိတဖၣ် ပကြၢးဆိကမိၣ်ထံ တၢ်ဂ့ၢ်လၢဘၣ်မနုၤအဃိ ပနာ်လၢပှၤသံတဖၣ် ကဂဲၤဆၢထၢၣ်သမူထီၣ်က့ၤ သပှၢ်ကတၢၢ်န့ၣ်လဲၣ်.
၃, ၄. ယ့ၣ်ၡူးမၤဝဲတၢ်မနုၤလဲၣ်, ဒီးအဝဲမၤဝဲဒ်န့ၣ်အဃိ ဒုးဆူၣ်ထီၣ်နီၢ်မၢ်သၤအတၢ်နာ်ဒ်လဲၣ်.
၃ နီၢ်မၢ်သၤန့ၣ် အိၣ်ဘူးဒီးဝ့ၢ်ယရူၤၡလ့ၣ်အဃိ အဝဲမ့ၢ်တထံၣ်ဘၣ်ဝဲ ယ့ၣ်ၡူးမၤသမူထီၣ်က့ၤ မုၣ်ကမဲအဖိခွါလၢ အအိၣ်ဘူးဒီး ဝ့ၢ်နၤအံၣ် လၢကီၢ်ကၤလံၤလါအပူၤ သနာ်က့ ဘၣ်သ့ၣ်သ့ၣ် အဝဲကနၢ်ဟူဘၣ်ဝဲအဂ့ၢ်လီၤ. ဒီးဘၣ်သ့ၣ်သ့ၣ် အဝဲကနၢ်ဟူဘၣ်စ့ၢ်ကီး ယ့ၣ်ၡူးမၤသမူထီၣ်ဝဲ စီၤယၤအ့ၤရူးအဖိမုၣ်အဂ့ၢ်န့ၣ်လီၤ. ပှၤအိၣ်လၢစီၤယၤအ့ၤရူးအဟံၣ်တဖၣ် “သ့ၣ်ညါဝဲလၢအသံ” ဘၣ်ဆၣ် ယ့ၣ်ၡူးဖီၣ်ဝဲဖိသၣ်မုၣ်အံၤအစု ဒီးစံးဝဲလၢ– “ပိာ်မုၣ်ဖိသၣ်ဧၢ, ဂဲၤဆၢထၢၣ်တက့ၢ်.” ဒီးပိာ်မုၣ်ဖိသၣ်အံၤ ဂဲၤဆၢထၢၣ်ဝဲလီၤ. (လူၤကၣ် ၇:၁၁-၁၇; ၈:၄၁, ၄၂, ၄၉-၅၅) နီၢ်မၢ်သၤ ဒီးအဒီပုၢ်ဝဲၢ်မုၣ် နီၢ်မၤရံန့ၣ် သ့ၣ်ညါဝဲလၢ ယ့ၣ်ၡူးမၤဘျါက့ၤဝဲ ပှၤဆါသ့လီၤ. လၢတၢ်န့ၣ်အဃိ အဝဲသ့ၣ်နာ်ဝဲလၢ ယ့ၣ်ၡူးမ့ၢ်အိၣ်ဒီးအဝဲသ့ၣ်န့ၣ် အဒီပုၢ်ဝဲၢ်ခွါတသံဘၣ်. ဘၣ်ဆၣ် ခဲအံၤအဒီပုၢ်ဝဲၢ်ခွါသံလံအဃိ နီၢ်မၢ်သၤမုၢ်လၢ်ဝဲ တၢ်မနုၤလဲၣ်. ပာ်သူၣ်ပာ်သးလၢ အဝဲတဲဝဲလၢ စီၤလါစရူး ကဂဲၤဆၢထၢၣ်သမူထီၣ်က့ၤလၢ ခါဆူညါဖဲ “မုၢ်နံၤကတၢၢ်” န့ၣ်လီၤ. ဘၣ်မနုၤအဃိ အဝဲနာ်ဝဲလၢ ကဟဲလၢပှဲၤထီၣ်သပှၢ်တၢၢ်လဲၣ်. ဒီးဘၣ်မနုၤအဃိ နနာ်သ့လၢ ခါဆူညါတၢ်ဂဲၤဆၢထၢၣ်သမူထီၣ်က့ၤန့ၣ် ကပၣ်ဃုာ်ဒီးပှၤလၢနအဲၣ်ဘၣ်အီၤတဖၣ်လဲၣ်.
၄ ပနာ်တၢ်ဂဲၤဆၢထၢၣ်သမူထီၣ်က့ၤ သ့ဝဲသပှၢ်ကတၢၢ်လီၤ. ခဲအံၤပကတဲသကိး တၢ်ဂ့ၢ်တနီၤလၢအဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ်လီၤ. အဒိ, လၢလံာ်စီဆှံအပူၤန့ၣ် နကထံၣ်ဘၣ် တၢ်ဂ့ၢ်လၢနတဆိကမိၣ်ဘၣ် ကြီကြီကအိၣ်ဝဲလီၤ. ဘၣ်ဆၣ်တၢ်ဂ့ၢ်သ့ၣ်တဖၣ်အံၤ မၤဆူၣ်ထီၣ်နတၢ်နာ်လၢ နကထံၣ်ဘၣ်ကဒီး ပှၤလၢနအဲၣ်ဘၣ်အီၤတဖၣ်န့ၣ်လီၤ.
တၢ်မၤအသးလၢ အဒုးအိၣ်ထီၣ် ပတၢ်မုၢ်လၢ်
၅. ဘၣ်မနုၤအဃိ နီၢ်မၢ်သၤနာ်ဝဲလၢ စီၤလါစရူး ကဂဲၤဆၢထၢၣ်သမူထီၣ်က့ၤ သပှၢ်ကတၢၢ်လဲၣ်.
၅ ပာ်သူၣ်ပာ်သးလၢ နီၢ်မၢ်သၤ တတဲဝဲလၢ– ‘ယမုၢ်လၢ်လၢ ယဒီပုၢ်ဝဲၢ်ခွါ ကဂဲၤဆၢထၢၣ်သမူထီၣ်က့ၤ’ န့ၣ်ဘၣ်. အဝဲတဲဝဲလၢ– “ကဂဲၤဆၢထၢၣ်က့ၤန့ၣ်, ယသ့ၣ်ညါလီၤ.” ဘၣ်မနုၤအဃိ အဝဲနာ်ဝဲဒ်န့ၣ်ဘူၣ်လဲၣ်. မ့ၢ်လၢ အဝဲသ့ၣ်ညါဝဲ တၢ်ဂဲၤဆၢထၢၣ်သမူထီၣ်က့ၤ အဂ့ၢ်လၢ အပူၤကွံာ်တဖၣ်အဃိလီၤ. ဒီးဘၣ်သ့ၣ်သ့ၣ် ဖဲအနီၢ်ဆံးဒံးအခါ အဝဲကမၤလိဘၣ်ဝဲ တၢ်ဂ့ၢ်တဖၣ်အံၤလၢ အဟံၣ် မ့တမ့ၢ် လၢဘူၣ်ဘျီၣ်ပူၤန့ၣ်လီၤ. ခဲအံၤပကတဲသကိး တၢ်ဂဲၤဆၢထၢၣ်သမူထီၣ်က့ၤအဂ့ၢ်သၢခါလၢ လံာ်စီဆှံအပူၤန့ၣ်လီၤ.
၆. နီၢ်မၢ်သၤ ကသ့ၣ်ညါဘၣ်ဝဲ တၢ်လီၤလးမနုၤအဂ့ၢ်လဲၣ်.
၆ ပှၤလၢအဂဲၤဆၢထၢၣ် သမူထီၣ်က့ၤ အဆိကတၢၢ်တဂၤန့ၣ် ကဲထီၣ်အသးဖဲ ယဟိဝၤယွၤဟ့ၣ်ဝဲ ဝံအ့ၤလံယၤ တၢ်စိတၢ်ကမီၤလၢ ကမၤတၢ်လီၤလးအခါန့ၣ်လီၤ. လၢကီၢ်အံၣ်စရ့လးကလံၤစိး တၢ်လီၢ်ဖံၤနံက့ၤ သဝီစၤရဖၤသးအပူၤန့ၣ် မုၣ်ကမဲတဂၤ တူၢ်လိာ်မုာ်ဝဲ ဝံအ့ၤလံယၤလီၤ. လၢတၢ်န့ၣ်အဃိ ဒ်သိးမုၣ်ကမဲအံၤဒီးအဖိခွါ ကဆဲးအိၣ်မူဘၣ်ဝဲအဂီၢ် ယဟိဝၤယွၤ မၤတၢ်လီၤလး ဒ်သိးအကိၣ်ကမူၣ် ဒီးအသိသုတလၢာ်တဂ့ၤန့ၣ်လီၤ. (၁ စီၤပၤ ၁၇:၈-၁၆) လၢခံမုၣ်ကမဲအံၤအဖိခွါန့ၣ် ဆိးက့ဒီးသံဝဲလီၤ. ဘၣ်ဆၣ် ဝံအ့ၤလံယၤ မၤစၢၤအီၤလီၤ. အဝဲထိးဘၣ် ဖိသၣ် ဒီးဃ့ထုကဖၣ်လၢ ယဟိဝၤယွၤအအိၣ်လၢ– “ယွၤယကစၢ်ဧၢ, မ်ဖိသၣ်အသးဟဲက့ၤဆူအပူၤတက့ၢ်.” ဒီးယွၤဒိကနၣ် ဝံအ့ၤလံယၤအတၢ်ထုကဖၣ် ဒီးဖိသၣ်န့ၣ် ဂဲၤဆၢထၢၣ်သမူထီၣ်က့ၤဝဲလီၤ. တၢ်ဂဲၤဆၢထၢၣ်သမူထီၣ်က့ၤအံၤ မ့ၢ်ဝဲအဆိကတၢၢ်တဂၤလၢ လံာ်စီဆှံအပူၤန့ၣ်လီၤ. (ဖး ၁ စီၤပၤ ၁၇:၁၇-၂၄ တက့ၢ်.) ပနာ်သ့သပှၢ်ကတၢၢ်လၢ နီၢ်မၢ်သၤ ကသ့ၣ်ညါဝဲ တၢ်ဂ့ၢ်အံၤလီၤ.
၇, ၈. (က) ဝံအလံၤၡါ မၤမုာ်ထီၣ်က့ၤဝဲ မိၢ်လၢအသးဘၣ်ဒိတဂၤအံၤအသးဒ်လဲၣ်. (ခ) ဝံအလံၤၡါ မၤတၢ်လီၤလးန့ၣ် ပာ်ဖျါထီၣ်ဝဲ ယဟိဝၤယွၤအဂ့ၢ်ဒ်လဲၣ်.
၇ ပှၤလၢအဂဲၤဆၢထၢၣ်သမူထီၣ်က့ၤ ခံဂၤတဂၤန့ၣ် ဝံအလံၤၡါ မၤဝဲလီၤ. လၢဝ့ၢ်ၡူန့ၣ်အပူၤန့ၣ် ပှၤအံၣ်စရ့လးမုၣ်လၢ အဖိအိၣ်တန့ၢ်ဘၣ် အိၣ်ဝဲတဂၤလီၤ. အဝဲဒီးအဝၤန့ၣ် အသးပှၢ်ဒီးအဖိအိၣ်တန့ၢ်လၢၤဘၣ်. ဘၣ်ဆၣ် ခီဖျိလၢအဝဲတူၢ်လိာ်မုာ်ဝဲ ဝံအလံၤၡါဂ့ၤဂ့ၤအဃိ ယဟိဝၤယွၤ ဆိၣ်ဂ့ၤအီၤဒီးဟ့ၣ်အီၤဖိခွါတဂၤလီၤ. လၢခံစှၤကိာ်နံၣ်န့ၣ် အဖိခွါအံၤသံဝဲလီၤ. ထံၣ်တမှံကွၢ်လၢ မိၢ်အံၤအသးကဘၣ်ဒိဝဲ ထဲလဲၣ်န့ၣ်တက့ၢ်. အဝဲအသးဘၣ်ဒိဒိၣ်မးတုၤဒၣ်လဲာ် အလဲၤဃုဝဲဝံအလံၤၡါလၢ ကစၢၢ်ကၢ်မ့ၤလး လၢအယံၤဝဲအကံလိမံထၢၣ် ၃၀ (၁၉ မံးလာ်) လီၤ. ဝံအလံၤၡါ ဆှၢလီၤဆိဝဲ စီၤက့ၤဃစံလၢ ကလဲၤဆူဝ့ၢ်ၡူန့ၣ် ဒ်သိးကမၤသမူထီၣ်က့ၤ ဖိသၣ်န့ၣ်လီၤ. ဘၣ်ဆၣ် စီၤက့ၤဃစံ မၤဝဲတသ့ဘၣ်. လၢတၢ်န့ၣ်အဃိ မိၢ်အံၤဟဲက့ၤကိးဝဲ ဝံအလံၤၡါလၢအဟံၣ်န့ၣ်လီၤ.—၂ စီၤပၤ ၄:၈-၃၁.
ကစၢ်ယွၤပာ်ဖျါထီၣ်ဝဲလၢ အဝဲအိၣ်ဒီး တၢ်သ့တၢ်ဘၣ်လၢ ကမၤသမူထီၣ်က့ၤပှၤသံ
၈ ဝံအလံၤၡါ လဲၤနုာ်လၢဟံၣ်ပူၤ လၢဖိသၣ်အအိၣ် ဒီးဃ့ဘါထုကဖၣ်တၢ်လီၤ. ယဟိဝၤယွၤ စံးဆၢက့ၤဝံအလံၤၡါ အတၢ်ထုကဖၣ် ဒီးမၤသမူထီၣ်က့ၤဝဲ ဖိသၣ်အံၤန့ၣ်လီၤ. ဖဲမိၢ်အံၤထံၣ်ဘၣ်ဝဲအဖိခွါ ဂဲၤဆၢထၢၣ်သမူထီၣ်က့ၤအခါ အဝဲကသးခုဒိၣ်မးလီၤ. (ဖး ၂ စီၤပၤ ၄:၃၂-၃၇ တက့ၢ်.) ဘၣ်သ့ၣ်သ့ၣ် အဝဲကသ့ၣ်နီၣ်ထီၣ်ဝဲ နီၢ်ဃးနၤအတၢ်ထုကဖၣ်န့ၣ်လီၤ. နီၢ်ဃးနၤန့ၣ် အဖိအိၣ်တန့ၢ်ဘၣ် ဘၣ်ဆၣ် လၢခံယဟိဝၤယွၤ ဟ့ၣ်အီၤအဖိခွါ စီၤၡမူၤအ့လးလီၤ. နီၢ်ဃးနၤ စံးထီၣ်ပတြၢၤ ယဟိဝၤယွၤ မ့ၢ်လၢအဝဲ “ဒုးလဲၤလီၤဆူ ပျုၤပူၤ, ဒီးဒုးဟဲက့ၤထီၣ်” တၢ်လီၤ. (၁ ၡမူၤအ့လး ၂:၆) ကစၢ်ယွၤ မၤသမူထီၣ်က့ၤ ဖိသၣ်ပိာ်ခွါလၢအအိၣ်လၢ ကီၢ်ၡူန့ၣ်န့ၣ် မ့ၢ်ဒၣ်အပာ်ဖျါထီၣ်လၢ အဝဲအိၣ်ဒီး တၢ်သ့တၢ်ဘၣ်လၢ ကမၤသမူထီၣ်က့ၤပှၤသံန့ၣ်လီၤ.
၉. တဲဖျါထီၣ် ပှၤဂဲၤဆၢထၢၣ်သမူထီၣ်က့ၤ သၢဂၤတဂၤလၢ လံာ်စီဆှံ ပာ်ဖျါထီၣ်ဝဲန့ၣ်တက့ၢ်.
၉ ဝံအလံၤၡါ သံဝံၤအလီၢ်ခံ တၢ်လၢအလီၤကမၢကမၣ် ဟဲကဲထီၣ်အသးတခါလီၤ. အဝဲကဲဝဲဝံအနံၣ် ၅၀ ဘျဲၣ်ဒီး “ဆါဝဲ” ဒီးလၢခံသံဝဲလီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး လၢဝံအလံၤၡါ အသွၣ်ခိၣ်ပူၤန့ၣ် အိၣ်တ့ၢ်ထဲအဃံလီၤ. ဘၣ်တနံၤဖဲ ပှၤအံၣ်စရ့လးဖိတဖၣ် လဲၤခူၣ်လီၤဝဲ ပှၤသံတဂၤအခါ ဒုၣ်ဒါတဖၣ်ဟဲထီၣ်ဝဲ သတူၢ်ကလာ်လီၤ. လၢတၢ်န့ၣ်အဃိ အဝဲသ့ၣ်တ့ၢ်လီၤဝဲ ပှၤအစိၣ်လၢဝံအလံၤၡါ အသွၣ်ခိၣ်ပူၤ ဒီးအဝဲသ့ၣ်ကရီဃ့ၢ်ပူၤဖျဲးအသးလီၤ. လံာ်စီဆှံစံးဝဲလၢ– “တုၤပှၤစဲၤလီၤအီၤဒီး, ဘၣ်ဒိဒီးစီၤအလံၤၡါအဃံဒီး, မူထီၣ်က့ၤဝဲ, ဒီးဆၢထၢၣ်လၢအခီၣ်လီၤ.” (၂ စီၤပၤ ၁၃:၁၄, ၂၀, ၂၁) တၢ်ကဲထီၣ်အသးတဖၣ်အံၤဒုးနာ်န့ၢ် နီၢ်မၢ်သၤလၢ ယွၤအစိအကမီၤအိၣ်လၢ ကမၤမူထီၣ်က့ၤပှၤသံတဖၣ်အဂီၢ်လီၤ. တၢ်အုၣ်သးတဖၣ်အံၤ ကြၢးဒုးနာ်န့ၢ်နၤလၢ ကစၢ်ယွၤအစိအကမီၤန့ၣ် ဒိၣ်ဝဲထီဝဲလီၤ.
တၢ်မၤအသးလၢ တၢ်မၢဖိအစိၤ
၁၀. စီၤပ့းတရူး မၤစၢၤဝဲ ခရံာ်ဖိဒီပုၢ်ဝဲၢ်မုၣ်လၢ အသံတဂၤဒ်လဲၣ်.
၁၀ လံာ်စီဆှံလၢ ကြံးကျိာ်တကတြူၢ်အပူၤစ့ၢ်ကီး ပာ်ဖျါထီၣ်ဝဲ ယွၤအခ့အပှၤလၢအသးတီတဖၣ် မၤဂဲၤဆၢထၢၣ်သမူထီၣ်က့ၤ ပှၤသံန့ၣ်လီၤ. ပတဲသကိးတ့ၢ် တၢ်ဂ့ၢ်ဘၣ်ဃးဒီး ယ့ၣ်ၡူးမၤသမူထီၣ်က့ၤပှၤသံ လၢဝ့ၢ်နၤအံၣ် လၢစီၤယၤအ့ၤရူးအဟံၣ်န့ၣ်လီၤ. လၢခံတၢ်မၢဖိပ့းတရူး မၤသမူထီၣ်က့ၤ နီၢ်ဒီၢ်ကါလၢ ဘၣ်တၢ်ကိးစ့ၢ်ကီးအီၤလၢ နီၢ်တဘံၤသါန့ၣ်လီၤ. စီၤပ့းတရူး လဲၤနုာ်လီၤလၢဒၢးပူၤ လၢနီၢ်တဘံၤသါအစိၣ်ကပၤ ဒီးစံးဝဲလၢ– “နီၢ်တဘံၤသါဧၢ, ဂဲၤဆၢထၢၣ်တက့ၢ်.” ဒီးအဝဲဂဲၤဆၢထၢၣ်သမူထီၣ်က့ၤဝဲလီၤ. စီၤပ့းတရူး “ဟ့ၣ်လီၤက့ၤအီၤ” လၢ ခရံာ်ဖိလၢအအိၣ်ဖဲန့ၣ်တဖၣ်န့ၣ်လီၤ. တၢ်မၤအသးအံၤ ထိၣ်ဟူးထိၣ်ဂဲၤထီၣ် ပှၤဝ့ၢ်ဖိအါဂၤအသး ဒ်သိးကကဲထီၣ်– “ပှၤစူၢ်က့ၤနာ်က့ၤ” တၢ်န့ၣ်လီၤ. ခရံာ်အပျဲၢ်အဘီၣ်အသီတဖၣ်အံၤ တဲဘၣ်ပှၤဂၤတၢ်သးခုကစီၣ်လၢ အဘၣ်ဃးဒီး ယ့ၣ်ၡူးဒီးယဟိဝၤယွၤန့ၣ် အိၣ်ဒီးတၢ်သ့တၢ်ဘၣ်လၢ ကမၤဂဲၤဆၢထၢၣ်သမူထီၣ်က့ၤ ပှၤသံတဖၣ်သ့ဝဲအဂ့ၢ်န့ၣ်လီၤ.—မၤတၢ် ၉:၃၆-၄၂.
၁၁. ကသံၣ်သရၣ် စီၤလူၤကၣ် စံးဝဲလၢ ပိာ်ခွါသးစၢ်တဂၤအံၤ ဘၣ်မနုၤလဲၣ်. ဒီးတၢ်မၤအသးအံၤ ကဲဘျုးလၢပှၤဂၤအဂီၢ်ဒ်လဲၣ်.
၁၁ ဖဲစီၤပီလူး မၤသမူထီၣ်က့ၤ ပှၤတဂၤအခါ ပှၤလၢအထံၣ်ဘၣ်ဝဲန့ၣ် အိၣ်ဝဲစ့ၢ်ကီးလီၤ. ဘၣ်တဘျီ စီၤပီလူးမၤဝဲ တၢ်အိၣ်ဖှိၣ်လၢဟံၣ်ဖီခိၣ် လၢဝ့ၢ်တြိၤအါအပူၤန့ၣ်လီၤ. ခဲအံၤ ဝ့ၢ်အံၤအိၣ်လၢ ကီၢ်ထၢးကံၣ် မုၢ်ထီၣ်ကလံၤစိးတခီန့ၣ်လီၤ. စီၤပီလူးတဲတၢ်တုၤလၢ ဖးဖီမုၢ်လီၤ. ဒီးပှၤသးစၢ်လၢအမ့ၢ် စီၤအူတူၤဃူးန့ၣ် ဆ့ၣ်နီၤဒိကနၣ်တၢ်လၢ ပဲတြီဖိအခိၣ် ဒီးမံခ့ဘၣ်အသးအဃိ လီၤတဲာ်လၢဟံၣ်သၢကထြၢအဖီလာ်န့ၣ်လီၤ. ဘၣ်သ့ၣ်သ့ၣ် စီၤလူၤကၣ်န့ၣ် မ့ၢ်ဝဲပှၤအဆိကတၢၢ်တဂၤလၢ အလဲၤဖီၣ်ထီၣ် စီၤအူတူၤဃူးန့ၣ်လီၤ. ဒ်ကသံၣ်သရၣ်တဂၤအသိး စီၤလူၤကၣ်သ့ၣ်ညါဝဲလၢ ဖိသၣ်အံၤတမ့ၢ်လၢအဘၣ်ဒိ ယိယိဖိဘၣ် အဝဲသံဝဲလီၤ. စီၤပီလူးစ့ၢ်ကီး စံၣ်လီၤလၢတၢ်ဖီလာ် ဒီးဖိးဟုထီၣ်စီၤအူတူၤဃူး ဒီးစံးဝဲလၢ– “အဝဲမူဒံးကစီဒီလီၤ.” ပှၤအိၣ်ဖဲန့ၣ်တဖၣ် ထံၣ်ဘၣ်ဝဲတၢ်မၤအသးအံၤအဃိ ကမၢကမၣ်ဝဲဒိၣ်မးလီၤ. အဝဲသ့ၣ်သ့ၣ်ညါဝဲလၢ ဖိသၣ်ပိာ်ခွါအံၤသံဝဲလံ. ဘၣ်ဆၣ် ဘၣ်တၢ်မၤဂဲၤဆၢထၢၣ်သမူထီၣ်က့ၤအီၤအဃိ အဝဲသ့ၣ် “အသူၣ်မုာ်သးမုာ်ဝဲဒိၣ်မးလီၤ.”—မၤတၢ် ၂၀:၇-၁၂, ခ့ခါစှီၤကျိာ်.
တၢ်မုၢ်လၢ်လၢ ပနာ်န့ၢ်သ့
၁၂, ၁၃. ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဂ့ၢ်လၢ ပမၤလိဘၣ်တဖၣ်အံၤန့ၣ် ပတၢ်သံကွၢ်မနုၤဟဲအိၣ်ထီၣ်ဝဲသ့လဲၣ်.
၁၂ တၢ်ဂဲၤဆၢထၢၣ်သမူထီၣ်က့ၤအဂ့ၢ်လၢ ပတဲသကိးအီၤတဖၣ် ကြၢးဒုးဆူၣ်ထီၣ်နတၢ်နာ် ဒ်နီၢ်မၢ်သၤအသိးန့ၣ်လီၤ. ပနာ်သ့သပှၢ်ကတၢၢ်လၢ ယွၤလၢအဟ့ၣ်ပှၤသးသမူတဂၤအံၤ မၤသမူထီၣ်က့ၤဝဲ ပှၤလၢအသံတဖၣ်သ့ဝဲလီၤ. ယဟိဝၤယွၤ အခ့အပှၤလၢအသးတီဒ်သိးဒီး ဝံအ့လံၤယၤ, ယ့ၣ်ၡူး ဒီးစီၤပ့းတရူးန့ၣ် ထံၣ်ဘၣ်ယဟိဝၤယွၤ မၤတၢ်လီၤလးလၢ အမၤသမူထီၣ်က့ၤပှၤသံန့ၣ်လီၤ. ဘၣ်ဆၣ် ဖဲအဝဲသ့ၣ်အစိၤ ပှၤသံလၢအတဂဲၤဆၢထၢၣ်တဖၣ်တခီမီၤ. ပှၤလၢအိၣ်ဒီးတၢ်သးတီတဖၣ် မုၢ်လၢ်ဝဲလၢ ခါဆူညါန့ၣ် ယွၤကမၤသမူထီၣ်က့ၤ ပှၤလၢအသံတဖၣ်န့ၣ်ဧါ. နီၢ်မၢ်သၤစံးဝဲလၢ အဝဲ– “ကဂဲၤဆၢထၢၣ်က့ၤဝဲလၢ မုၢ်နံၤကတၢၢ် အတၢ်ဂဲၤဆၢထၢၣ်က့ၤန့ၣ်, ယသ့ၣ်ညါလီၤ.” ပအိၣ်ဒီးတၢ်နာ်ဒ် နီၢ်မၢ်သၤအသိးကသ့ဧါ. ဘၣ်မနုၤအဃိ နီၢ်မၢ်သၤ နာ်ဝဲလၢခါဆူညါ တၢ်ဂဲၤဆၢထၢၣ်သမူထီၣ်က့ၤ ကအိၣ်ဝဲလဲၣ်. နၤစ့ၢ်ကီး ဘၣ်မနုၤအဃိ နနာ်သ့လဲၣ်.
၁၃ လံာ်စီဆှံပာ်ဖျါထီၣ်ဝဲလၢ ယွၤအခ့အပှၤလၢအသးတီတဖၣ် နာ်ဝဲလၢခါဆူညါန့ၣ် တၢ်ဂဲၤဆၢထၢၣ် သမူထီၣ်က့ၤကအိၣ်ဝဲလီၤ. ပကကွၢ်သကိးတၢ်အဒိတနီၤလီၤ.
၁၄. စီၤအၤဘြၤဟၣ် အဂ့ၢ်န့ၣ် သိၣ်လိပှၤဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဂ့ၢ်ဒ်လဲၣ်.
၁၄ ဆိကမိၣ်ကွၢ် ဒ်သိးစီၤအၤဘြၤဟၣ် ကန့ၢ်ဘၣ်အဖိခွါ စီၤအံၤစဲးအဂီၢ် ဘၣ်အိၣ်ခိးဝဲဖးယံာ်ညါ. ဘၣ်ဆၣ် ယဟိဝၤယွၤစံးဘၣ်အီၤလၢ– “ဟံးန့ၢ်နဖိခွါ, နဖိခွါတဂၤဃီ, စီၤအံၤစဲးလၢနအဲၣ်အီၤ, ဒီးလဲၤဆူကီၢ်မိၤရံယၤ, ဒီးလုၢ်ထီၣ်အီၤဖဲန့ၣ် လၢတၢ်လုၢ်မ့ၣ်အူ” တက့ၢ်. (၁ မိၤၡ့ ၂၂:၂) နဆိကမိၣ် ဖဲစီၤအၤဘြၤဟၣ် နၢ်ဟူဘၣ်ဝဲ ယဟိဝၤယွၤ အတၢ်ကတိၤအံၤအခါ အဝဲကတူၢ်ဘၣ်ဝဲဒ်လဲၣ်. ယဟိဝၤယွၤ အၢၣ်လီၤဝဲလၢ ပှၤဟီၣ်ခိၣ်ဖိတဖၣ် ကဒိးန့ၢ်ဘၣ်တၢ်ဆိၣ်ဂ့ၤ ခီဖျိစီၤအၤဘြၤဟၣ် အချံအသၣ်လီၤ. (၁ မိၤၡ့ ၁၃:၁၄-၁၆; ၁၈:၁၈; ရိမ့ၤ ၄:၁၇, ၁၈) တကးဒံးဘၣ် ယဟိဝၤယွၤ တဲဝဲလၢတၢ်ဆိၣ်ဂ့ၤ ကဟဲခီဖျိ “စီၤအံၤစဲး” န့ၣ်လီၤ. (၁ မိၤၡ့ ၂၁:၁၂) ဘၣ်ဆၣ် စီၤအၤဘြၤဟၣ် မ့ၢ်ဟ့ၣ်လုၢ်ထီၣ်အဖိခွါန့ၣ် တၢ်ဆိၣ်ဂ့ၤတဖၣ်အံၤ ဟဲလၢထီၣ်ပှဲၤထီၣ်ဝဲကသ့ဒ်လဲၣ်. စီၤပီလူးကွဲးဝဲလၢ စီၤအၤဘြၤဟၣ်နာ်ဝဲလၢ ယဟိဝၤယွၤ မၤဂဲၤဆၢထၢၣ်သမူထီၣ်က့ၤ စီၤအံၤစဲးသ့လီၤ. (ဖး ဧ့ၤဘြံၤ ၁၁:၁၇-၁၉ တက့ၢ်.) ဘၣ်ဆၣ် လံာ်စီဆှံ တပာ်ဖျါထီၣ်ဝဲလၢ စီၤအၤဘြၤဟၣ် ဆိကမိၣ်ဝဲလၢ ဘၣ်သ့ၣ်သ့ၣ် စီၤအံၤစဲး ကဂဲၤဆၢထၢၣ်သမူထီၣ်က့ၤ တဘျီဃီ ဖဲစှၤကိာ်နၣ်ရံၣ်, တနံၤဃီ မ့တမ့ၢ် တနွံအတီၢ်ပူၤန့ၣ်ဘၣ်. အဖိခွါကဂဲၤဆၢထၢၣ်သမူထီၣ်က့ၤ အခါဖဲလဲၣ်န့ၣ် စီၤအၤဘြၤဟၣ် တသ့ၣ်ညါဝဲဘၣ်. ဘၣ်ဆၣ် အဝဲနာ်ဝဲသပှၢ်ကတၢၢ်လၢ ယဟိဝၤယွၤ ကမၤသမူထီၣ်က့ၤ စီၤအံၤစဲးန့ၣ်လီၤ.
၁၅. ပှၤတီပှၤလိၤ စီၤယိၤဘးနာ်ဝဲဒ်လဲၣ်.
၁၅ ပှၤတီပှၤလိၤ စီၤယိၤဘးစ့ၢ်ကီး နာ်ဝဲလၢခါဆူညါန့ၣ် တၢ်ဂဲၤဆၢထၢၣ်သမူထီၣ်က့ၤ ကအိၣ်ဝဲလီၤ. အဝဲသ့ၣ်ညါဝဲလၢ သ့ၣ်တထူၣ်ပှၤကူာ်ကွံာ်အီၤ မ့ၢ်ဝံၤသနာ်က့ အခိၣ်ဆၢၣ်အံၤန့ၣ် အဒိးကထီၣ်က့ၤ ဒီးကဲထီၣ်သ့ၣ်လၢအသီတခိၣ်သ့ဝဲလီၤ. ဘၣ်ဆၣ် မ့မ့ၢ်ပှၤကညီန့ၣ် တမ့ၢ်ဒ်န့ၣ်ဘၣ်. (ယိၤဘး ၁၄:၇-၁၂; ၁၉:၂၅-၂၇) ပှၤကညီမ့ၢ်သံန့ၣ် ဟဲက့ၤဂဲၤဆၢထၢၣ်သမူထီၣ်က့ၤလၢ အနီၢ်ကစၢ်ဒၣ်ဝဲတသ့ဘၣ်. (၂ ၡမူၤအ့လး ၁၂:၂၃; စံးထီၣ်ပတြၢၤ ၈၉:၄၈) စီၤယိၤဘး အဲၣ်ဒိးတဲဝဲလၢ ယွၤမၤသမူထီၣ်က့ၤ ပှၤသံတသ့ဘၣ်န့ၣ် တမ့ၢ်ဘၣ်. လၢတၢ်န့ၣ်အလီၢ် အဝဲနာ်ဝဲလၢ ယဟိဝၤယွၤ ကသ့ၣ်နီၣ်ထီၣ်က့ၤအီၤလီၤ. (ဖး ယိၤဘး ၁၄:၁၃-၁၅ တက့ၢ်.) ယွၤကမၤသမူထီၣ်က့ၤအီၤ အခါဖဲလဲၣ်န့ၣ် စီၤယိၤဘးတသ့ၣ်ညါဝဲဘၣ်. ဘၣ်ဆၣ်အဝဲနာ်ဝဲလၢ ယွၤလၢအဟ့ၣ်သးသမူတဂၤအံၤ မၤသမူထီၣ်က့ၤပှၤသံသ့ ဒီးဖဲအမၤသမူထီၣ်က့ၤပှၤသံအခါ အဝဲကသ့ၣ်နီၣ်ထီၣ်က့ၤအီၤလီၤ.
၁၆. မူခိၣ်ကလူး ဟ့ၣ်ဂံၢ်ဟ့ၣ်ဘါ စီၤဒၤနံးယ့လးဒ်လဲၣ်.
၁၆ ဆိကမိၣ်ကွၢ် ပှၤတီပှၤလိၤ စီၤဒၤနံးယ့လးအဂ့ၢ်စ့ၢ်ကီးတက့ၢ်. အဝဲမၤ ယဟိဝၤယွၤအတၢ်မၤလၢ တၢ်သးတီအပူၤ ဒီးယဟိဝၤယွၤ ဆီၣ်ထွဲမၤစၢၤအီၤစ့ၢ်ကီးလီၤ. ဘၣ်တဘျီ မူခိၣ်ကလူးတဂၤ ကိးစီၤဒၤနံးယ့လးလၢ “ပှၤလၢအဘၣ်တၢ်အဲၣ်အီၤ” ဒီးတဲဘၣ်အီၤလၢ “မ်နဘၣ်တၢ်ဃူတၢ်ဖိးတက့ၢ်.” ဒီး “အိၣ်ဒီးနဂံၢ်နဘါတက့ၢ်.”— ဒၤနံးယ့လး ၉:၂၂, ၂၃; ၁၀:၁၁, ၁၈, ၁၉.
၁၇, ၁၈. ယဟိဝၤယွၤ အၢၣ်လီၤဝဲ စီၤဒၤနံးယ့လးဒ်လဲၣ်.
၁၇ ဖဲစီၤဒၤနံးယ့လးအသးအိၣ် အနံၣ် ၁၀၀ ဃၣ်ဃၣ်ဒီးဘူးထီၣ်လၢကသံအခါ အဝဲကဆိကမိၣ်ဘၣ်ဝဲလၢ တၢ်ကကဲထီၣ်အသးဒီးအီၤဒ်လဲၣ်န့ၣ်လီၤ. မ့ၢ်စီၤဒၤနံးယ့လး မုၢ်လၢ်ဝဲလၢ အဝဲကဂဲၤဆၢထၢၣ်သမူထီၣ်က့ၤန့ၣ်ဧါ. အဝဲနာ်ဝဲသပှၢ်တၢၢ်လီၤ. ဖဲလံာ်ဒၤနံးယ့လး ဘူးထီၣ်လၢကကတၢၢ်န့ၣ် ပဖးဘၣ်လၢ ကစၢ်ယွၤအၢၣ်လီၤအီၤလၢ– “လဲၤတၢ်တုၤအကတၢၢ်တက့ၢ်. ဒီးနကအိၣ်ဘှံး” လီၤ. (ဒၤနံးယ့လး ၁၂:၁၃) စီၤဒၤနံးယ့လး သ့ၣ်ညါဝဲလၢ ပှၤလၢအသံန့ၣ် မ့ၢ်ဒၣ်အအိၣ်ဘှံး ဒီး “တၢ်သ့ၣ်ညါမ့ၢ်ဂ့ၤ, တၢ်ကူၣ်သ့မ့ၢ်ဂ့ၤ, တအိၣ်ဘၣ်လၢပျုၤပူၤ” ဘၣ်န့ၣ်လီၤ. (စံၣ်တဲၤတဲလီၤတၢ် ၉:၁၀) ဘၣ်ဆၣ် စီၤဒၤနံးယ့လး အတၢ်မုၢ်လၢ်တလၢာ်ဒံးဘၣ်. ယဟိဝၤယွၤ အၢၣ်လီၤဒံးအီၤတၢ်တမံၤလီၤ.
၁၈ ယဟိဝၤယွၤ အမူခိၣ်ကလူး တဲအီၤလၢအဝဲက– “ဆၢထၢၣ်” ဒီးဒိးန့ၢ်ဘၣ်တၢ်န့ၢ်သါလၢ “မုၢ်နံၤတဖၣ်အကတၢၢ်လီၤ.” တၢ်ကကဲထီၣ်အသးဒီးအီၤလၢ ဆၢကတီၢ်ဖဲလဲၣ်န့ၣ် စီၤဒၤနံးယ့လး တသ့ၣ်ညါဝဲဘၣ်. အဝဲသ့ၣ်ညါဝဲလၢ ကသံဒီးကအိၣ်ဘှံးလီၤ. ဘၣ်ဆၣ် ဖဲစီၤဒၤနံးယ့လး နၢ်ဟူဘၣ်ဝဲ တၢ်အၢၣ်လီၤလၢနက “ဆၢထၢၣ်” ဒီးဒိးန့ၢ်ဘၣ်တၢ်န့ၢ်သါအခါ အဝဲသ့ၣ်ညါဝဲလၢ ခါဆူညါန့ၣ် အကဂဲၤဆၢထၢၣ်သမူထီၣ်က့ၤဝဲလီၤ. အဝဲသံဝံၤဖးယံာ်တုၤလၢ “မုၢ်နံၤတဖၣ်အကတၢၢ်” မးတၢ်ဂဲၤဆၢထၢၣ်သမူထီၣ်က့ၤ ကကဲထီၣ်ဝဲလီၤ.
ဒ်နီၢ်မၢ်သၤအသိး နနာ်သ့သပှၢ်ကတၢၢ်လၢ ခါဆူညါန့ၣ် တၢ်ဂဲၤဆၢထၢၣ်သမူထီၣ်က့ၤ ကအိၣ်ဝဲ (ကွၢ်လံာ်အဆၢ ၁၉, ၂၀)
၁၉, ၂၀. (က) တၢ်ကတိၤလၢ နီၢ်မၢ်သၤ တဲဝဲယ့ၣ်ၡူးန့ၣ် ပမၤလိဘၣ်တၢ်ဂ့ၢ်မနုၤလဲၣ်. (ခ) တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၁၉ ပသ့ၣ်ညါလီၤတံၢ်လၢ နီၢ်မၢ်သၤအိၣ်ဒီးတၢ်ဂ့ၢ်အဂ့ၤလၢ ကနာ်ဝဲလၢ အဒီပုၢ်ဝဲၢ်ခွါ စီၤလါစရူး “ကဂဲၤဆၢထၢၣ်က့ၤဝဲလၢ မုၢ်နံၤကတၢၢ် အတၢ်ဂဲၤဆၢထၢၣ်က့ၤန့ၣ်” လီၤ. တၢ်လၢယဟိဝၤယွၤ အၢၣ်လီၤ စီၤဒၤနံးယ့လး ဒီးနီၢ်မၢ်သၤ အတၢ်နာ်လၢဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤလၢ ခါဆူညါန့ၣ် ကြၢးမၤဂၢၢ်ကျၢၤထီၣ် ပတၢ်နာ်လီၤ. လၢတၢ်န့ၣ်အဃိ ပနာ်လၢခါဆူညါန့ၣ် တၢ်ဂဲၤဆၢထၢၣ်သမူထီၣ်က့ၤ ကအိၣ်ဝဲသပှၢ်ကတၢၢ်လီၤ.
၂၀ ပမၤလိဘၣ်လၢ လၢညါန့ၣ်တၢ်ဂဲၤဆၢထၢၣ်သမူထီၣ်က့ၤ အိၣ်အနီၢ်ကီၢ်လီၤ. ဒီးမ့ၢ်ဝဲတၢ်အုၣ်သးလၢ ပှၤသံတဖၣ် ကအိၣ်မူဘၣ်က့ၤအသီတဘျီလီၤ. ဒ်ပိာ်မုၣ်ဒီးပိာ်ခွါလၢ အမၤယွၤအတၢ်မၤလၢတၢ်သးတီတဖၣ်အသိး ပဝဲစ့ၢ်ကီး ပမုၢ်လၢ်လၢပှၤသံတဖၣ် ကဆၢထၢၣ်သမူထီၣ်က့ၤလၢ ခါဆူညါန့ၣ်လီၤ. ဘၣ်ဆၣ် တၢ်အၢၣ်လီၤအိၣ်ဖးယံာ်မး တၢ်ဂဲၤဆၢထၢၣ်သမူထီၣ်က့ၤ ကဲထီၣ်အသးလၢခံန့ၣ် တၢ်အုၣ်အသးအိၣ်ဧါ. မ့ၢ်အိၣ်န့ၣ် ပကြၢးနာ် ခါဆူညါတၢ်ဂဲၤဆၢထၢၣ်သမူထီၣ်က့ၤ အါန့ၢ်ဒံးပှၤတီပှၤလိၤလၢညါတဖၣ်လီၤ. ဘၣ်ဆၣ်တၢ်ဂဲၤဆၢထၢၣ်သမူထီၣ်က့ၤ ကကဲထီၣ်အခါဖဲလဲၣ်. ပကတဲသကိး တၢ်ဂ့ၢ်တဖၣ်အံၤလၢ တၢ်မၤလိလၢခံတခါအပူၤလီၤ.
