ပှၤဖးလံာ်ဖိတဖၣ် အတၢ်သံကွၢ်
ခရံာ်ဖိတဖၣ် ဒ်သိးအဖိသုတအိၣ်တဂ့ၤအဂီၢ် သူဝဲတၢ်ဒီသဒၢလၢအမ့ၢ် IUD သ့ဧါ
ဘၣ်ဃးဒီးတၢ်ဂ့ၢ်အံၤန့ၣ် ခရံာ်ဖိနီၢ်ဒီမါဝၤတဖၣ် ကြၢးမၤဝဲတၢ်ဆၢတဲာ်လၢ အနီၢ်ကစၢ်ဒၣ်ဝဲလီၤ. ဘၣ်ဆၣ် ဒ်သိးအသးလၢအသ့ၣ်ညါဒၣ်တၢ် သုတမၤတံာ်တာ်အီၤတဂ့ၤအဂီၢ် အဝဲသ့ၣ် ကဘၣ်ဃုသ့ၣ်ညါဝဲ IUD န့ၣ်မၤတၢ်ဒ်လဲၣ် ဒီးလံာ်စီဆှံအတၢ်ဟံးစုနဲၣ်ကျဲ အိၣ်ဝဲဒ်လဲၣ်အဂ့ၢ်န့ၣ်လီၤ.
ယဟိဝၤယွၤ မၤလိာ်ဝဲ နီၢ်အံၣ်အုဒီး စီၤအၤဒၣ် ဒီးလၢခံ စီၤနိအၤဒီး အဟံၣ်ဖိဃီဖိလၢ “မ်သုသၣ်ထီၣ်, ဒီးအါထီၣ်” တက့ၢ်. (၁ မိၤၡ့ ၁:၂၈; ၉:၁) လံာ်စီဆှံတတဲဝဲလၢ ခရံာ်ဖိတဖၣ် ကဘၣ်မၤပိာ်ထွဲ တၢ်မၤလိာ်အံၤဘၣ်. လၢတၢ်န့ၣ်အဃိ နီၢ်ဒီမါဝၤတဖၣ်ကဘၣ်ဆၢတဲာ်ဝဲလၢ ကဟံးအဖိပှဲၤဂၤလဲၣ် ဒီးကဟံးအဖိအခါဖဲလဲၣ်န့ၣ်လီၤ. ဒီးအဝဲသ့ၣ်ကသူဝဲ တၢ်ပီးတၢ်လီ မ့တမ့ၢ် ကသံၣ်ကသီဖဲလဲၣ်တခါလဲၣ်န့ၣ် ကဘၣ်ဆၢတဲာ်ဝဲလၢအနီၢ်ကစၢ်လီၤ. အဝဲသ့ၣ် ကြၢးဃုသ့ၣ်ညါဝဲ တၢ်ဂ့ၢ်မနုၤဒံးလဲၣ်.
ခရံာ်ဖိပိာ်မုၣ်လၢအမ့ၢ်မါန့ၣ် ဒ်သိးအသုတဒၢထီၣ်တဂ့ၤအဂီၢ် မ့ၢ်ဆၢတဲာ်ဝဲလၢ ကသူဝဲတၢ်တမံၤဂ့ၤတမံၤဂ့ၤဒၣ်လဲာ် ကဘၣ်လီၤပလိာ်လိာ်အသးဒီး လံာ်စီဆှံ အတၢ်ဟံးစုနဲၣ်ကျဲလီၤ. မ့ၢ်လၢအဝဲသ့ၣ် မၤပိာ်ထွဲ လံာ်စီဆှံအတၢ်ဟံးစုနဲၣ်ကျဲအဃိ အဝဲသ့ၣ်တမၤလီၤတဲာ်အဖိဘၣ်. တၢ်မၤလီၤတဲာ်ဖိန့ၣ် မ့ၢ်ဝဲတၢ်မၤဟးဂီၤ ဖိသၣ်အသးသမူလီၤ. လၢတၢ်န့ၣ်အဃိ တၢ်မၤလီၤတဲာ်ဖိန့ၣ်ထီဒါလိာ်သးဒီး လံာ်စီဆှံအတၢ်သိၣ်တၢ်သီလၢ အဘၣ်ဃးဒီး တၢ်ပာ်လုၢ်ပာ်ပှ့ၤသးသမူန့ၣ်လီၤ. (၂ မိၤၡ့ ၂၀:၁၃; ယံးရမံယၤ ၁:၅) ဘၣ်ဆၣ် မ့ၢ်ပကြၢးသူ IUD ဧါ.
The Watchtower of May 15, 1979 (pages 30-31) န့ၣ်တဲနၢ်ပၢၢ်ပှၤ ဘၣ်ဃးဒီး တၢ်ဂ့ၢ်အံၤလီၤ. ဖဲန့ၣ်အဆၢအကတီၢ် IUD လၢပှၤသူအီၤအါတက့ၢ်န့ၣ် ဘၣ်တၢ်တ့အီၤဒီး ဖျးစတံး ဒီးဘၣ်တၢ်ထၢနုာ်အီၤလၢ ပိာ်မုၣ်အဒၢလီၢ်ပူၤ ဒ်သိးအသုတဒၢထီၣ်တဂ့ၤလီၤ. ဒီးတဲစ့ၢ်ကီးဝဲလၢ ဖဲန့ၣ်အဆၢကတီၢ် IUD အံၤမၤတၢ်ဒ်လဲၣ်ဒ်လဲၣ်န့ၣ် ပှၤတသ့ၣ်ညါလီၤတံၢ်လီၤဆဲးဘၣ်. ပှၤစဲအ့ၣ်ဖိအါဂၤ တဲဝဲလၢ IUD န့ၣ် တြီဝဲ ဒ်သိးပိာ်ခွါအချံအသၣ် သုတလဲၤတုၤလၢ ပိာ်မုၣ်အဒံၣ်အအိၣ် ဒီးကဲထီၣ်သးသမူတဂ့ၤအဂီၢ်လီၤ. ပိာ်ခွါအချံအသၣ် ဒီးပိာ်မုၣ်အဒံၣ် မ့ၢ်တထံၣ်လိာ်အသးဘၣ်န့ၣ် ဖိသၣ်အသးသမူကဲထီၣ်တသ့ဘၣ်.
ဘၣ်ဆၣ် တၢ်အုၣ်အသးအိၣ်ဝဲတနီၤလၢ ဖဲပှၤသူ IUD အခါဒၣ်လဲာ် တဘျီတခီၣ်န့ၣ် ပိာ်ခွါအချံအသၣ် ထံၣ်လိာ်အသးဒီး ပိာ်မုၣ်အဒံၣ်အဃိ တၢ်ဒံၣ်အံၤဒိၣ်ထီၣ်ဝဲလၢ ပိာ်မုၣ်အချံအသၣ်အကျိၤ မ့တမ့ၢ် လဲၤနုာ်လီၤလၢဒၢလီၢ်ပူၤသ့လီၤ. ဒီးတၢ်ဒံၣ်အံၤမ့ၢ်လဲၤတုၤလၢ ဒၢလီၢ်ပူၤဘၣ်ဆၣ် ခီဖျိလၢ IUD အဃိ တၢ်ဒံၣ်အံၤကသံဝဲလီၤ. လၢတၢ်န့ၣ်အဃိ ကလီၤဂာ်ဒီးတၢ်မၤလီၤတဲာ်ဖိလီၤ. ဒီးလံာ်အံၤ ဆဲးပာ်ဖျါထီၣ်ဝဲလၢ “ဒ်သိးခရံာ်ဖိတဖၣ် အတၢ်ဆၢတဲာ် သုတထီဒါလိာ်အသးဒီး လံာ်စီဆှံ အတၢ်သိၣ်တၢ်သီလၢအမ့ၢ် တၢ်ပာ်လုၢ်ပာ်ပှ့ၤသးသမူအဂီၢ် တချုးလၢအဝဲသ့ၣ်သူဝဲ IUD အခါ ကဘၣ်ဆိကမိၣ် ဒီးဃုသ့ၣ်ညါဝဲအဂ့ၢ် လီၤတံၢ်လီၤဆဲးလီၤ.”—စံးထီၣ်ပတြၢၤ ၃၆:၉.
ဘၣ်ဆၣ်ဖဲ ၁၉၇၉ ဒီးဖဲတၢ်မၤလိအံၤ ဘၣ်တၢ်ရၤလီၤအီၤဝံၤအလီၢ်ခံ တၢ်သ့တၢ်ဘၣ်လၢကသံၣ်ကသီဒီး လၢစဲအ့ၣ်တကပၤန့ၣ် လဲၤထီၣ်လဲၤထီဝဲဒိၣ်မးလီၤ.
ခဲအံၤ IUD အိၣ်အါထီၣ်ဝဲခံခါလီၤ. ဒီးဖဲ ၁၉၈၈ နံၣ်န့ၣ် IUD လၢဘၣ်တၢ်တ့အီၤလၢ တိၢ်ဘီန့ၣ် ဘၣ်တၢ်သူအီၤလၢ ကီၢ်အမဲရကၤအပူၤအါမးလီၤ. တကးဒံးဘၣ်ဖဲ ၂၀၀၁ န့ၣ် IUD လၢအအိၣ်ဒီးဟီၣ်မိ ဟဲပၢၢ်ထီၣ်ဝဲစ့ၢ်ကီးလီၤ. IUD အသီခံခါအံၤ မၤတၢ်ဒ်လဲၣ်န့ၣ် နသ့ၣ်ညါဧါ.
IUD လၢဘၣ်တၢ်တ့အီၤလၢ တိၢ်ဘီ– ဒ်ပတဲတ့ၢ်လၢထးအသိး IUD န့ၣ် မၤဝဲဒ်သိး ပိာ်ခွါအချံအသၣ်န့ၣ် သုတလဲၤနုာ်လီၤလၢ ပိာ်မုၣ်အဒၢလီၢ် ဒီးသုတလဲၤထံၣ်လိာ်သးဒီး ပိာ်မုၣ်အဒံၣ်တဂ့ၤအဂီၢ်လီၤ. ထဲန့ၣ်တကးဒံးဘၣ် IUD လၢဘၣ်တၢ်တ့အီၤလၢတိၢ်ဘီန့ၣ် ကဲထီၣ်ဝဲတၢ်အစုၣ်အပျၢ်လၢ ပိာ်ခွါအချံအသၣ်အဂီၢ်အဃိ လီၤဂာ်ဒ်အမၤသံဝဲပိာ်ခွါအချံအသၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဒီး IUD န့ၣ် မၤဘၣ်ဒိဝဲ ပိာ်မုၣ်အဒၢလီၢ်အကျိၤစ့ၢ်ကီးလီၤ.
IUD လၢအအိၣ်ဒီး ဟီၣ်မိ– IUD လၢအဂၤတခါန့ၣ် အိၣ်ဒီးဟီၣ်မိဒီးလီၤဂာ်ဒီး ကသံၣ်လၢပှၤအီၣ်ဝဲ ဒ်သိးပှၤသုတဒၢထီၣ်တဂ့ၤအဂီၢ်လီၤ. IUD တခါအံၤ မၤတၢ်ဒ် IUD လၢအလီၢ်လံၤတခါအသိးလီၤ. ဘၣ်ဆၣ် အဝဲပျၢ်လီၤစ့ၢ်ကီး ဟီၣ်မိလၢ ဒၢလီၢ်ပူၤလီၤ. လၢပိာ်မုၣ်တနီၤနီၤအဂီၢ်န့ၣ် IUD အံၤမၤဝဲဒ်သိး ပိာ်မုၣ်သုတပျၢ်လီၤအဒံၣ်တဂ့ၤန့ၣ်လီၤ. ဒီးပိာ်မုၣ် မ့ၢ်တပျၢ်လီၤအဒံၣ်ဘၣ်န့ၣ် အဝဲဒၢထီၣ်တသ့ဘၣ်. တကးဒံးဘၣ် IUD တခါအံၤ မၤဘူလီၤဝဲ ဒၢလီၢ်အကျိၤလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ထဲန့ၣ်တကးဒံးဘၣ် မၤပံာ်ထီၣ်ဝဲ ပိာ်မုၣ်အထံဒ်သိး ပိာ်ခွါအချံအသၣ်လဲၤနုာ်လီၤဝဲဆူ ပိာ်မုၣ်အဒၢလီၢ်ပူၤသုတန့ၢ်တဂ့ၤအဂီၢ်လီၤ.
ဒ်ပတဲတ့ၢ်လၢထးအသိး IUD လၢအသီခံခါအံၤ မၤဘူလီၤဝဲ ဒၢလီၢ်အကျိၤလီၤ. ဖဲအံၤပသ့ၣ်ညါဘၣ်လၢ ပိာ်မုၣ်မ့ၢ်ပျၢ်လီၤအဒံၣ်ဒီး အဒံၣ်မ့ၢ်ထံၣ်လိာ်သးဒီး ပိာ်ခွါအချံအသၣ်န့ၣ် ကကဲထီၣ်တၢ်သးသမူဒီး ကလဲၤနုၤလီၤဝဲလၢ ဒၢလီၢ်အကျိၤလီၤ. ဘၣ်ဆၣ် မ့ၢ်လၢအဒၢလီၢ်အကျိၤဘူလီၤဝဲအဃိ အဒၢတကျၢၤဝဲဘၣ်. ပှၤစဲအ့ၣ်ဖိတဖၣ် နာ်ဝဲလၢ လၢ IUD အဃိ မ့တမ့ၢ် ကသံၣ်ကသီအဃိ တၢ်ကဲထီၣ်အသးဒ်အံၤသ့ ဘၣ်ဆၣ် တကဲထီၣ်အသးဒ်အံၤ ကြီကြီဘၣ်.
လၢတၢ်န့ၣ်အဃိ ပှၤမ့ၢ်သူ IUD လၢဘၣ်တၢ်တ့အီၤလၢ တိၢ်ဘီမ့ၢ်ဂ့ၤ IUD လၢအအိၣ်ဒီး ဟီၣ်မိမ့ၢ်ဂ့ၤ ပှၤဒၢထီၣ်တသ့ဘၣ်န့ၣ် ပတဲလီၤတံၢ်တသ့ဘၣ်. ဘၣ်ဆၣ် ဒ်ပှၤစဲအ့ၣ်ဖိတဖၣ် ဃုသ့ၣ်ညါဝဲအသိး IUD အံၤတြီဝဲ ပိာ်ခွါအချံအသၣ်ဒ်သိး အသုတထံၣ်လိာ်အသးဒီး ပိာ်မုၣ်အဒံၣ်တဂ့ၤအဃိ ပိာ်မုၣ်တဒၢထီၣ်ကြီကြီဘၣ်.
ခရံာ်ဖိနီၢ်ဒီမါဝၤလၢ အဲၣ်ဒိးသူဝဲ IUD တဖၣ် ကဘၣ်တဲသကိးတၢ်ဒီး အကသံၣ်ကရၣ်လီၤ. ဖဲန့ၣ် အကသံၣ်သရၣ် ကတဲနၢ်ပၢၢ်အီၤလၢ IUD အိၣ်ဝဲအကလုာ်ကလုာ်အဂ့ၢ် ဒီး IUD အံၤ ကကဲဘျုးဒ်လဲၣ်ဒီး တၢ်ဘၣ်ယိၣ်အိၣ်လၢ ပိာ်မုၣ်အဂီၢ် ဒ်လဲၣ်န့ၣ်လီၤ. ပှၤတဂၤဂ့ၤတဂၤဂ့ၤ ဒီးကသံၣ်သရၣ်ဒၣ်လဲာ် မၤတၢ်ဆၢတဲာ်လၢ အဝဲသ့ၣ်အဂီၢ်တန့ၢ်ဘၣ်. (ရိမ့ၤ ၁၄:၁၂; ကလၤတံ ၆:၄, ၅) အဝဲသ့ၣ် ကဘၣ်မၤတၢ်ဆၢတဲာ်လၢ အနီၢ်ကစၢ်ဒၣ်ဝဲလီၤ. အဝဲသ့ၣ်မ့ၢ်မၤတၢ်ဆၢတဲာ်လၢ အလီၤပလိာ်ဒီး လံာ်စီဆှံ အတၢ်ဟံးစုနဲၣ်ကျဲန့ၣ် ကမၤသးခုယဟိဝၤယွၤအသး ဒီးအဝဲသ့ၣ်ကအိၣ်ဒီး သးလၢအသ့ၣ်ညါဒၣ်တၢ်လၢ အဂ့ၤစ့ၢ်ကီးလီၤ.—ထိၣ်သတြီၤဒီး ၁ တံၤမသ့း ၁:၁၈, ၁၉; ၂ တံၤမသ့း ၁:၃.
^ လံာ်အဆၢ. 8 တၢ်အိၣ်ဆူၣ်အိၣ်ချ့အဝဲၤကျိၤလၢ အမ့ၢ် England’s National Health Service န့ၣ် ပာ်ဖျါထီၣ်ဝဲလၢ– IUD လၢဘၣ်တၢ်တ့အီၤဒီး တိၢ်ဘီအါအါန့ၣ် အသဟီၣ်ဆူၣ်အဃိ ဒ်သိးပှၤသုတဒၢထီၣ်တဂ့ၤအဂီၢ် ဒီသဒၢဝဲန့ၢ် အမျးကယၤ ၉၉ ဘျဲၣ်ညါလီၤ. လၢတၢ်န့ၣ်အဃိ တနံၣ်အတီၢ်ပူၤန့ၣ် ပိာ်မုၣ်လၢအသူ IUD အဂၤ ၁၀၀ အကျါန့ၣ်ဘၣ်သ့ၣ်သ့ၣ် ကဒၢထီၣ်ဝဲတဂၤလီၤ. ဘၣ်ဆၣ် မ့မ့ၢ် IUD လၢဘၣ်တၢ်တ့အီၤဒီး တိၢ်ဘီစှၤကိာ်ဖိန့ၣ် ဒီသဒၢတၢ်တန့ၢ်ထဲသိးဒီး IUD လၢဘၣ်တၢ်တ့အီၤဒီး တိၢ်ဘီအါအါန့ၣ်ဘၣ်.
^ လံာ်အဆၢ. 9 IUD လၢအအိၣ်ဒီး ဟီၣ်မိန့ၣ် မၤဘူလီၤဝဲဒၢလီၢ်အကျိၤလီၤ. ပိာ်မုၣ်လၢအသဘျ့မ့ၢ်ဂ့ၤ, လၢအဆီဟံၣ်ဆီဟံၣ်ဆီဃီမ့ၢ်ဂ့ၤ အလုၢ်အလၢ်ဟဲမ့ၢ်အါန့ၣ် တဘျီတခီၣ် ကသံၣ်သရၣ်မၢအဝဲသ့ၣ်သူ IUD ဒ်သိးအလုၢ်အလၢ်ဟဲကစှၤလီၤအဂီၢ်လီၤ.
