ပာ်လုၢ်ပာ်ပှ့ၤ “တၢ်လၢ ယွၤပာ်ဃုာ်ဝဲ”
“တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.”—မၢ်ကူး ၁၀:၉.
၁, ၂. ဧ့ၤဘြံၤ ၁၃:၄ ထိၣ်ဟူးထိၣ်ဂဲၤထီၣ်ပှၤလၢ ပကမၤမနုၤလဲၣ်.
ပဝဲခဲလၢာ် ပအဲၣ်ဒိးမၤလၤကပီၤယဟိဝၤယွၤလီၤ. ဒီးအဝဲကြၢးဒိးန့ၢ် ပတၢ်မၤလၤကပီၤ ဒီးအဝဲအၢၣ်လီၤပှၤလၢ ကမၤလၤကပီၤဆၢက့ၤပှၤလီၤ. (၁ ၡမူၤအ့လး ၂:၃၀; ကတိၤဒိ ၃:၉; လီၣ်ဖျါ ၄:၁၁) ဒီးအဝဲအဲၣ်ဒိးဝဲလၢ ပယူးယီၣ်ပာ်ကဲပှၤဂၤ ဒီးပဒိၣ်ပပှၢ်တဖၣ်လီၤ. (ရိမ့ၤ ၁၂:၁၀; ၁၃:၇) ဘၣ်ဆၣ် တၢ်လၢပကဘၣ် မၤလၤကပီၤအီၤ လီၤလီၤဆီဆီန့ၣ် အိၣ်ဒံးတမံၤဒံး. မ့ၢ်ဝဲတၢ်ဆီဟံၣ်ဆီဃီလီၤ.
၂ တၢ်မၢဖိပီလူးကွဲးဝဲလၢ “မ်တၢ်န့ၢ်မါန့ၢ်ဝၤဒီး လီၢ်မံတဘၣ်အၢဘၣ်န့ၣ်, အိၣ်ဒီးအလၤအကပီၤလၢ ပှၤခဲလၢာ်အကျါတက့ၢ်.” (ဧ့ၤဘြံၤ ၁၃:၄) တမ့ၢ်စီၤပီလူးတဲဝဲ တၢ်ဆီဟံၣ်ဆီဃီအဂ့ၢ် ယိယိဖိန့ၣ်ဘၣ်. စီၤပီလူးအဲၣ်ဒိးလၢ ခရံာ်ဖိတဖၣ်န့ၣ် ကဘၣ်မၤလၤကပီၤ တၢ်ဆီဟံၣ်ဆီဃီလီၤ. အခီပညီန့ၣ် အဝဲသ့ၣ်ကဘၣ် ပာ်လုၢ်ပာ်ပှ့ၤ တၢ်ဆီဟံၣ်ဆီဃီလီၤ. မ့ၢ်နပာ်လုၢ်ပာ်ပှ့ၤ တၢ်ဆီဟံၣ်ဆီဃီဧါ, လီဆီဒၣ်တၢ် နမ့မ့ၢ်ပှၤလၢ အဆီဟံၣ်ဆီဃီန့ၣ် မ့ၢ်နပာ်လုၢ်ပာ်လုၢ်ပာ်ပှ့ၤ နတၢ်ဆီဟံၣ်ဆီဃီဧါ.
၃. ဘၣ်ဃးဒီးတၢ်ဆီဟံၣ်ဆီဃီန့ၣ် ယ့ၣ်ၡူးပာ်ဖျါထီၣ်ဝဲ တၢ်ဟ့ၣ်ကူၣ်လၢ အရ့ဒိၣ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၃ နမ့ၢ်ပာ်လုၢ်ပာ်ပှ့ၤ နတၢ်ဆီဟံၣ်ဆီဃီန့ၣ် နမ့ၢ်ပှၤလၢ အကွၢ်လိမၤဒိး ပှၤလၢအဒိဂ့ၤတဲာ်ဘၣ် လၢအမ့ၢ်ယ့ၣ်ၡူးလီၤ. ယ့ၣ်ၡူးမ့ၢ်ပှၤလၢ အပာ်လုၢ်ပာ်ပှ့ၤဝဲ တၢ်ဆီဟံၣ်ဆီဃီလီၤ. ဖဲပှၤဖၤရံၤၡဲတဖၣ် သံကွၢ်အီၤဘၣ်ဃးဒီး တၢ်မၤကတၢၢ်ကွံာ် တၢ်ဆီဟံၣ်ဆီဃီအဂ့ၢ်အခါ အဝဲစံးဆၢက့ၤဝဲလၢ ကစၢ်ယွၤအတၢ်ကတိၤလၢ ဘၣ်ဃးဒီး ပှၤဆီဟံၣ်ဆီဃီလၢ အဆိကတၢၢ်ခံဂၤအဂ့ၢ်လီၤ. အဝဲတဲဝဲလၢ “အကူၢ်မ့ၢ်ဒ်န့ၣ်ဒီး, ပိာ်ခွါကဟးသဒၣ်အမိၢ်ဒီးအပၢ်, ဒီးကဘျုးအသးဒီးအမါ, ဒီးတၢ်လၢပှၤခံဂၤန့ၣ်ကကဲထီၣ် ပှၤတသွံၣ်ဃီတညၣ်ဃီလီၤ.” ဒီးတဲစ့ၢ်ကီးဝဲလၢ “တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.”—ဖး မၢ်ကူး ၁၀:၂-၁၂ တက့ၢ်; ၁ မိၤၡ့ ၂:၂၄.
၄. ဘၣ်ဃးဒီး တၢ်ဆီဟံၣ်ဆီဃီန့ၣ် ယဟိဝၤယွၤတိာ်ပာ်ဝဲဒ်လဲၣ်.
၄ ယ့ၣ်ၡူးတူၢ်လိာ်ဝဲလၢ ကစၢ်ယွၤမ့ၢ်ပှၤလၢ အဒုးအိၣ်ထီၣ် တၢ်ဆီဟံၣ်ဆီဃီဒီး ပှၤလၢအဆီဟံၣ်ဆီဃီန့ၣ် ကြၢးအိၣ်ဝဲဒ်သိးသိး တစိၤသးလီၤ. ဖဲကစၢ်ယွၤ ဒုးအိၣ်ထီၣ်တၢ်ဆီဟံၣ်ဆီဃီလၢ အဆိကတၢၢ်တဘျီအခါ အဝဲတတဲဝဲ နီၢ်အံၣ်အုဒီးစီၤအၤဒၣ်လၢ အဝဲသ့ၣ် မၤကတၢၢ်ကွံာ် အတၢ်ဆီဟံၣ်ဆီဃီသ့န့ၣ်ဘၣ်. လၢတၢ်န့ၣ်အလီၢ် ကစၢ်ယွၤအတၢ်တိာ်ပာ်လၢ တၢ်ဆီဟံၣ်ဆီဃီအဂီၢ်န့ၣ် မ့ၢ်ဝဲ “ပှၤခံဂၤ” ကဘၣ်အိၣ်ဝဲဒ်သိးသိး လီၤထူလီၤယိာ်လီၤ.
တၢ်လၢအဒုးအိၣ်ထီၣ် တၢ်ဆီတလဲလၢ တၢ်ဆီဟံၣ်ဆီဃီအပူၤ တစိၢ်တလီၢ်
၅. တၢ်သံန့ၣ် မၤဘၣ်ဒိတၢ်ဆီဟံၣ်ဆီဃီဒ်လဲၣ်.
၅ ဒ်ပသ့ၣ်ညါအသိး ဖဲစီၤအၤဒၣ်မၤကမၣ်တၢ်ဝံၤအလီၢ်ခံ တၢ်ဆီတလဲအိၣ်ထီၣ်ဝဲအါမံၤလီၤ. တၢ်ဆီတလဲအကျါတမံၤန့ၣ် မ့ၢ်ဝဲပှၤဟီၣ်ခိၣ်ဖိတဖၣ်ဘၣ်သံ, ဒီးတၢ်ဆီတလဲအံၤမၤဘၣ်ဒိဝဲ တၢ်ဆီဟံၣ်ဆီဃီလီၤ. တၢ်မၢဖိပီလူးတဲဝဲလၢ တၢ်သံန့ၣ်မၤကတၢၢ်ကွံာ်ဝဲ တၢ်တၢ်ဆီဟံၣ်ဆီဃီ ဒီးသးသမူတံၤသကိးလၢ အအိၣ်မူတ့ၢ်တဂၤန့ၣ် အိၣ်ဒီးတၢ်သဘျ့လၢ ကဆီဟံၣ်ဆီဃီလၢအသီလီၤ.—ရိမ့ၤ ၇:၁-၃.
စီၤမိၤၡ့အတၢ်သိၣ်တၢ်သီ သိၣ်လိပှၤလၢ ကစၢ်ယွၤပာ်လုၢ်ပာ်ပှ့ၤဝဲ တၢ်ဆီဟံၣ်ဆီဃီဒိၣ်မး
၆. စီၤမိၤၡ့အတၢ်သိၣ်တၢ်သီန့ၣ် ဒုးသ့ၣ်ညါပှၤလၢ ကစၢ်ယွၤထံၣ်ဝဲ တၢ်ဆီဟံၣ်ဆီဃီဒ်လဲၣ်.
၆ စီၤမိၤၡ့အတၢ်သိၣ်တၢ်သီ လၢကစၢ်ယွၤဟ့ၣ်လီၤဝဲ ပှၤအံၣ်စရ့လးဖိတဖၣ်န့ၣ် ပာ်ဖျါထီၣ်ဝဲတၢ်ဂ့ၢ်တၢ်ကျိၤတဖၣ် လၢအဘၣ်ဃးဒီး တၢ်ဆီဟံၣ်ဆီဃီန့ၣ်လီၤ. အဒိ ပှၤအံၣ်စရ့လးပိာ်ခွါတဖၣ်န့ၣ် အိၣ်ဒီးတၢ်ခွဲးတၢ်ယာ်လၢ ကဟံးန့ၢ်အမါ အါန့ၢ်ဒံးတဂၤလီၤ. တချုးလၢ ကစၢ်ယွၤဟ့ၣ်လီၤပှၤအံၣ်စရ့လးဖိတဖၣ် တၢ်သိၣ်တၢ်သီဒံးဘၣ်န့ၣ် လုၢ်လၢ်လၢပှၤအံၣ်စရ့လးပိာ်ခွါတဖၣ် ဟံးန့ၢ်အမါ အါန့ၢ်ဒံးတဂၤန့ၣ် အိၣ်ပာ်စၢၤဝဲလီၤ. ဘၣ်ဆၣ် စီၤမိၤၡ့အတၢ်သိၣ်တၢ်သီန့ၣ် ဒီသဒၢဝဲ ပှၤပိာ်မုၣ်ဒီးဖိသၣ်တဖၣ် ဒ်သိးပှၤသုတရ့အဝဲသ့ၣ် တတီတလိၤတဂ့ၤအဂီၢ်န့ၣ်လီၤ. အဒိ ပှၤအံၣ်စရ့လးပိာ်ခွါတဂၤ မ့ၢ်ဆီဟံၣ်ဆီဃီဒီးအကုၢ်မုၣ် ဒီးလၢခံမ့ၢ်ဟံးန့ၢ်အါထီၣ်အမါတဂၤန့ၣ် အဝဲကဘၣ်မၤလၢပှဲၤ အမါလၢအဆိကတၢၢ်တဂၤအံၤ အတၢ်လိၣ်ဘၣ် ဒ်အမၤဝဲလၢညါအသိးလီၤ. ကစၢ်ယွၤ ပာ်လီၤတၢ်သိၣ်တၢ်သီလၢ အဝဲကဘၣ်ဆဲး ဒီသဒၢဒီးကဟုကယာ်အမါအံၤလီၤ. (၂ မိၤၡ့ ၂၁:၉, ၁၀) ဆၢကတီၢ်ခဲအံၤ ပတမၤထွဲ စီၤမိၤၡ့အတၢ်သိၣ်တၢ်သီလၢၤဘၣ်. ဘၣ်ဆၣ် စီၤမိၤၡ့အတၢ်သိၣ်တၢ်သီ ဒုးသ့ၣ်ညါပှၤလၢ ကစၢ်ယွၤ ပာ်လုၢ်ပာ်ပှ့ၤဝဲ တၢ်ဆီဟံၣ်ဆီဃီလီၤ. ဒီးမၤစၢၤပှၤလၢ ပကပာ်လုၢ်ပာ်ပှ့ၤ တၢ်ဆီဟံၣ်ဆီဃီစ့ၢ်ကီးလီၤ.
၇, ၈. (က) ဒ် ၅ မိၤၡ့ ၂၄:၁ ပာ်ဖျါဝဲအသိး ဘၣ်ဃးဒီး တၢ်မၤကတၢၢ်ကွံာ်တၢ်ဆီဟံၣ်ဆီဃီန့ၣ် စီၤမိၤၡ့အတၢ်သိၣ်တၢ်သီ တဲဝဲဒ်လဲၣ်. (ခ) ယဟိဝၤယွၤထံၣ်ဝဲ တၢ်မၤကတၢၢ်ကွံာ်တၢ်ဆီဟံၣ်ဆီဃီ ဒ်လဲၣ်.
၇ ဘၣ်ဃးဒီး တၢ်မၤကတၢၢ်ကွံာ် တၢ်ဆီဟံၣ်ဆီဃီန့ၣ် စီၤမိၤၡ့အတၢ်သိၣ်တၢ်သီ တဲဝဲဒ်လဲၣ်. ယဟိဝၤယွၤ တတိာ်ပာ်ဝဲလၢ ပှၤနီၢ်ဒီမါဝၤတဖၣ် ကမၤကတၢၢ်ကွံာ် အတၢ်ဆီဟံၣ်ဆီဃီ နီတဘျီဘၣ်. ဘၣ်ဆၣ် ပှၤအံၣ်စရ့လးပိာ်ခွါတဂၤ မ့ၢ်ထံၣ်န့ၢ် “တၢ်ဘၣ်အၢတမံၤမံၤ” လၢအမါအလိၤန့ၣ် စီၤမိၤၡ့အတၢ်သိၣ်တၢ်သီပျဲဝဲလၢ အဝဲကမၤကတၢၢ်ကွံာ် အတၢ်ဆီဟံၣ်ဆီဃီလီၤ. (ဖး ၅ မိၤၡ့ ၂၄:၁ တက့ၢ်.) “တၢ်ဘၣ်အၢတမံၤမံၤ” မ့ၢ်ဝဲတၢ်မနုၤလဲၣ်န့ၣ် စီၤမိၤၡ့အတၢ်သိၣ်တၢ်သီ တပာ်ဖျါထီၣ်ဝဲဘၣ်. ဒ်လဲၣ်ဂ့ၤဒ်လဲၣ်ဂ့ၤ တၢ်ဘၣ်အၢတမံၤမံၤန့ၣ် ကမ့ၢ်ဝဲ တၢ်မၤလၢအလီၤမဲာ်ဆှး မ့တမ့ၢ် တၢ်ကမၣ်ဖးဒိၣ်, ဒီးတမ့ၢ်ဝဲတၢ်ကမၣ် ဆံးဆံးဖိဘၣ်. (၅ မိၤၡ့ ၂၃:၁၄) ဘၣ်ဆၣ် လီၤသးအုးဒိၣ်မးလၢ လၢယ့ၣ်ၡူးအစိၤန့ၣ် ပှၤယူဒၤဖိအါမး မၤကတၢၢ်ကွံာ် အတၢ်ဆီဟံၣ်ဆီဃီခီဖျိ “ဖဲဒၣ်တၢ်အဂ့ၢ်ကိးမံၤဒဲးအဃိ” လီၤ. (မးသဲ ၁၉:၃) မ့မ့ၢ်ပဝဲန့ၣ် ပတအဲၣ်ဒိးမၤဒ်န့ၣ် နီတစဲးဘၣ်.
၈ လၢဝံမၤလကံအစိၤန့ၣ် ပှၤပိာ်ခွါအါဂၤ မၤကတၢၢ်ကွံာ် အတၢ်ဆီဟံၣ်ဆီဃီဒီးအမါလီၤ. ဘၣ်သ့ၣ်သ့ၣ် ကမ့ၢ်လၢအဝဲသ့ၣ် အဲၣ်ဒိးဆီဟံၣ်ဆီဃီဒီး ပှၤပိာ်မုၣ်လၢအညါဘီၣ် လၢအတဘူၣ်ထီၣ်ဘါထီၣ် ယဟိဝၤယွၤအဃိလီၤ. ဘၣ်ဃးဒီး တၢ်မၤကတၢၢ်ကွံာ်တၢ်ဆီဟံၣ်ဆီဃီန့ၣ် ယဟိဝၤယွၤပာ်ဖျါထီၣ်ဝဲအတၢ်ထံၣ် ၡဲၡဲပျီပျီလီၤ. အဝဲတဲဝဲလၢ “ပှၤပာ်မၢ်ကွံာ် [“ပှၤမၤကတၢၢ်ကွံာ် တၢ်ဆီဟံၣ်ဆီဃီ” NWT] အမါ, . . . န့ၣ်ယသးဟ့လီၤ.” (မၤလကံ ၂:၁၄-၁၆) ကစၢ်ယွၤတဲဝဲလၢ ပိာ်ခွါတဂၤန့ၣ် “ကဘျုးအသးဆူ ပိာ်မုၣ်အအိၣ်, ဒီးတၢ်လၢပှၤခံဂၤန့ၣ် ကကဲထီၣ်တၢ်တသွံၣ်ဃီတညၣ်ဃီ” လီၤ. စးထီၣ်လၢကစၢ်ယွၤတဲဝဲဒ်န့ၣ် ဒီးတုၤလၢခဲအံၤန့ၣ် ကစၢ်ယွၤအတၢ်ထံၣ်လၢဘၣ်ဃးဒီး တၢ်ဆီဟံၣ်ဆီဃီန့ၣ် တဆီတလဲဒံးဘၣ်. (၁ မိၤၡ့ ၂:၂၄) ယ့ၣ်ၡူးစ့ၢ်ကီး တူၢ်လိာ်ဝဲအပၢ်အတၢ်ထံၣ်အံၤလီၤ. အဃိအဝဲတဲဝဲလၢ “တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.”—မးသဲ ၁၉:၆.
တၢ်ဂ့ၢ်ထဲတမံၤလၢ ပှၤမၤကတၢၢ်ကွံာ် တၢ်ဆီဟံၣ်ဆီဃီသ့
၉. ယ့ၣ်ၡူးအတၢ်ကတိၤလၢ မၢ်ကူး ၁၀:၁၁, ၁၂ န့ၣ်အခီပညီအိၣ်ဒ်လဲၣ်.
၉ ပှၤတနီၤနီၤ ကဆိကမိၣ်ဘၣ်ဝဲလၢ ‘ခရံာ်ဖိတဖၣ် မၤကတၢၢ်ကွံာ် အတၢ်ဆီဟံၣ်ဆီဃီဒီး ဆီဟံၣ်ဆီဃီဒီးပှၤလၢအသီတဂၤသ့ဧါ.’ ပာ်သူၣ်ပာ်သးလၢ ယ့ၣ်ၡူးတဲဝဲလၢ “ဖဲဒၣ်ပှၤလၢအပာ်မၢ်အမါ, ဒီးအိၣ်ဃုာ်ဒီးပိာ်မုၣ်အဂၤ တဂၤဂၤန့ၣ်, မ့ၢ်အအဲၣ်ဘၢအမါလီၤ. ဒီးပိာ်မုၣ်မ့ၢ်ပာ်မၢ်အဝၤ, ဒီးအိၣ်ဃုာ်ဒီးပိာ်ခွါအဂၤတဂၤန့ၣ်ဒီး, မ့ၢ်အအဲၣ်ဘၢအဝၤလီၤ.” (မၢ်ကူး ၁၀:၁၁, ၁၂; လူၤကၣ် ၁၆:၁၈) လၢတၢ်န့ၣ်အဃိ ပသ့ၣ်ညါဘၣ်လၢ ယ့ၣ်ၡူးပာ်လုၢ်ပာ်ပှ့ၤဝဲ တၢ်ဆီဟံၣ်ဆီဃီ ဒီးအဝဲအဲၣ်ဒိးလၢ ပကပာ်လုၢ်ပာ်ပှ့ၤ တၢ်ဆီဟံၣ်ဆီဃီစ့ၢ်ကီးလီၤ. ဝၤတဂၤ အမါမ့ၢ်တီဒီးအီၤဘၣ်ဆၣ် အဝဲမ့ၢ်မၤကတၢၢ်ကွံာ် အတၢ်ဆီဟံၣ်ဆီဃီ ဒီးဆီဟံၣ်ဆီဃီလၢအသီန့ၣ် မ့ၢ်အအဲၣ်ဘၢအမါလီၤ. မါစ့ၢ်ကီး အဝၤမ့ၢ်တီဒီးအီၤဘၣ်ဆၣ် အဝဲမ့ၢ်မၤဝဲဒ်န့ၣ်န့ၣ် မ့ၢ်ဒၣ်အအဲၣ်ဘၢအဝၤလီၤ. မ့ၢ်လၢ ထဲဒၣ်တၢ်မၤကတၢၢ်ကွံာ် တၢ်ဆီဟံၣ်ဆီဃီန့ၣ် တမၤကတၢၢ်ကွံာ်ဝဲ ပှၤခံဂၤအတၢ်ဆီဟံၣ်ဆီဃီဒံးဘၣ်အဃိလီၤ. ပှၤဒီမါဝၤခံဂၤ မ့ၢ်မၤကတၢၢ်ကွံာ် အတၢ်ဆီဟံၣ်ဆီဃီဘၣ်ဆၣ် ကစၢ်ယွၤထံၣ်ဒံးအဝဲသ့ၣ်လၢ “တၢ်တသွံၣ်ဃီတညၣ်ဃီ” ဒံးလီၤ. ယ့ၣ်ၡူးတဲစ့ၢ်ကီးဝဲလၢ ပှၤပိာ်ခွါတဂၤမ့ၢ်မၤကတၢၢ်ကွံာ် အတၢ်ဆီဟံၣ်ဆီဃီဒီးအမါလၢအတီဒီးအီၤန့ၣ် တၢ်ဘၣ်ယိၣ်အလီၢ်အိၣ်လၢ အမါကအဲၣ်ဘၢအီၤလီၤ. ဘၣ်မနုၤအဃိလဲၣ်. ဘၣ်သ့ၣ်သ့ၣ် မါတဂၤအံၤ ကဆိကမိၣ်ဝဲလၢ အဝဲကဘၣ်ဆီဟံၣ်ဆီဃီလၢအသီ ဒ်သိးကဒိးန့ၢ်ဘၣ် ကျိၣ်စ့အတၢ်ဆီၣ်ထွဲမၤစၢၤအဂီၢ်လီၤ. ဒီးအဝဲမ့ၢ်ဆီဟံၣ်ဆီဃီလၢအသီန့ၣ် မ့ၢ်ဒၣ်အအဲၣ်ဘၢအဝၤလီၤ.
၁၀. တၢ်ဂ့ၢ်ထဲတမံၤဧိၤလၢ ပှၤမၤကတၢၢ်ကွံာ်တၢ်ဆီဟံၣ်ဆီဃီ ဒီးဆီဟံၣ်ဆီဃီလၢ အသီသ့န့ၣ် မ့ၢ်မနုၤလဲၣ်.
၁၀ ယ့ၣ်ၡူးပာ်ဖျါထီၣ်ဝဲ တၢ်ဂ့ၢ်အိၣ်ထဲတမံၤဧိၤလၢ ပှၤမၤကတၢၢ်ကွံာ်တၢ်ဆီဟံၣ်ဆီဃီသ့န့ၣ်လီၤ. အဝဲတဲဝဲလၢ “ယစံးဘၣ်တဲဘၣ်သု, ဖဲဒၣ်ပှၤလၢအပာ်မၢ်ကွံာ်အမါ လၢအတမ့ၢ်ဘၣ်တၢ်အဲၣ်ဘၢ [“တၢ်မၤကမၣ်မုၣ်ကမၣ်ခွါ” NWT] ဝၤအဃိဘၣ်, ဒီးအိၣ်ဃုာ်ဒီးပိာ်မုၣ်လၢ အဂၤတဂၤဂၤန့ၣ် မ့ၢ်အအဲၣ်ဘၢမါလီၤ. ဒီးပှၤလၢ အအိၣ်ဃုာ်ဒီးပိာ်မုၣ်လၢ အဘၣ်တၢ်ပာ်မၢ်ကွံာ်အီၤန့ၣ်, မၤကမၣ်ပှၤမါလီၤ.” (မးသဲ ၁၉:၉) ဖဲအဝဲစံၣ်တဲၤတဲလီၤတၢ်လၢ တၢ်လူၢ်ခိၣ်အခါသနာ်က့ တဲဝဲဒ်န့ၣ်စ့ၢ်ကီးလီၤ. (မးသဲ ၅:၃၁, ၃၂) ဖဲအံၤန့ၣ် ပထံၣ်ဘၣ်လၢ ယ့ၣ်ၡူးတဲဝဲ “တၢ်မၤကမၣ်မုၣ်ကမၣ်ခွါ” အဂ့ၢ်ခံဘျီလီၤ. တၢ်မၤကမၣ်မုၣ်ကမၣ်ခွါန့ၣ် ဘၣ်သ့ၣ်သ့ၣ် ကပၣ်ဃုာ်ဒီး တၢ်ကမၣ်လၢအမ့ၢ် တၢ်အဲၣ်ဘၢမါအဲၣ်ဘၢဝၤ, ပှၤဆါလီၤအီၣ်သး, ပှၤခံဂၤလၢ အတဖျီဘၣ်အသးဘၣ် မံဃုာ်အိၣ်ဃုာ်လိာ်အသး, မုၣ်ကဒဲကဒဲ ခွါကဒဲကဒဲ အတၢ်မံဃုာ်အိၣ်ဃုာ် ဒီးတၢ်မံဃုာ်အိၣ်ဃုာ်ဒီးဆၣ်ဖိကီၢ်ဖိလီၤ. အဒိ ဝၤတဂၤ မ့ၢ်မၤကမၣ်မုၣ်ကမၣ်ခွါန့ၣ် အမါအိၣ်ဒီးတၢ်ခွဲးတၢ်ယာ်လၢ ကဆၢတဲာ်ဝဲလၢ အကမၤကတၢၢ်ကွံာ်အတၢ်ဆီဟံၣ်ဆီဃီ မ့တမ့ၢ် တမၤဝဲဘၣ်န့ၣ်လီၤ. လၢတၢ်ဂ့ၢ်အံၤအဃိ အဝဲမ့ၢ်မၤကတၢၢ်ကွံာ်အတၢ်ဆီဟံၣ်ဆီဃီန့ၣ် ကစၢ်ယွၤတထံၣ်အဝဲသ့ၣ် ဒ်နီၢ်ဒီမါဝၤအသိးလၢၤဘၣ်.
၁၁. ခရံာ်ဖိတဂၤ အသးသမူတံၤသကိး မ့ၢ်မၤကမၣ်မုၣ်ကမၣ်ခွါသနာ်က့ ဘၣ်မနုၤအဃိ အဝဲကဆၢတဲာ်လီၤအသးလၢ အတမၤကတၢၢ်ကွံာ် အတၢ်ဆီဟံၣ်ဆီဃီဘၣ်လဲၣ်.
၁၁ ပာ်သူၣ်ပာ်သးလၢ ယ့ၣ်ၡူးတတဲဝဲလၢ ဖဲပှၤတဂၤအဲၣ်ဘၢအသးသမူတံၤသကိးအခါ ပှၤလၢအသးတီဒီး အသးသမူတံၤသကိးတဂၤန့ၣ် ကဘၣ် မၤကတၢၢ်ကွံာ်ဝဲ အတၢ်ဆီဟံၣ်ဆီဃီန့ၣ်ဘၣ်. အဒိ မါတဂၤန့ၣ် အဝၤမ့ၢ်အဲၣ်ဘၢအီၤဘၣ်ဆၣ် ဘၣ်သ့ၣ်သ့ၣ် အဝဲကဃုထၢဝဲလၢ အတမၤကတၢၢ်ကွံာ် အတၢ်ဆီဟံၣ်ဆီဃီဘၣ်. ဘၣ်မနုၤအဃိလဲၣ်. ဘၣ်သ့ၣ်သ့ၣ် အဝဲကအဲၣ်ဒံးအဝၤ, ကသးအိၣ်ပျၢ်အဝၤအတၢ်ကမၣ် ဒီးကအဲၣ်ဒိးမၤဂ့ၤထီၣ် အတၢ်ဆီဟံၣ်ဆီဃီဒံးအဃိလီၤ. ဒီးကမ့ၢ်လၢ အဝဲမ့ၢ်မၤကတၢၢ်ကွံာ် တၢ်ဆီဟံၣ်ဆီဃီဒီး မ့ၢ်တဆီဟံၣ်ဆီဃီလၢအသီလၢၤဘၣ်န့ၣ် အဝဲကထံၣ်ဘၣ် တၢ်ကီတၢ်ခဲတဖၣ်အဃိလီၤ. အဒိ အဝဲအတၢ်လိၣ်ဘၣ်လၢ ကျိၣ်စ့ ဒီးတၢ်မံဃုာ်အိၣ်ဃုာ်န့ၣ် ကကဲထီၣ်အသးဒ်လဲၣ်. မ့ၢ်အဝဲ ကတူၢ်ဘၣ် လၢအအိၣ်သယုၢ်သညိဧါ. အဝဲမ့ၢ်မၤကတၢၢ်ကွံာ် အတၢ်ဆီဟံၣ်ဆီဃီန့ၣ် ကမၤဘၣ်ဒိအဖိတဖၣ်ဒ်လဲၣ် ဒီးဒ်သိး အဝဲကလုၢ်ဒိၣ်ထီၣ်အဖိလၢ တၢ်မ့ၢ်တၢ်တီအပူၤအဂီၢ် တၢ်ကီတၢ်ခဲကအိၣ်အါထီၣ်ဧါ. (၁ ကရံၣ်သူး ၇:၁၄) ပမ့ၢ်ဆိကမိၣ်ကွၢ် တၢ်ဂ့ၢ်သ့ၣ်တဖၣ်အံၤန့ၣ် ပသ့ၣ်ညါလၢ သးသမူတံၤသကိးလၢအတီတဂၤ မ့ၢ်ဃုထၢဝဲလၢ ကမၤကတၢၢ်ကွံာ် အတၢ်ဆီဟံၣ်ဆီဃီန့ၣ် အဝဲကထံၣ်ဘၣ်ဒီး တၢ်ကီတၢ်ခဲဖးဒိၣ်တဖၣ်လီၤ.
၁၂, ၁၃. (က) ဝံဟိၤၡ့ အတၢ်ဆီဟံၣ်ဆီဃီ ကဲထီၣ်အသးဒ်လဲၣ်. (ခ) ဘၣ်မနုၤအဃိ ဝံဟိဝၤၡ့ ဟဲက့ၤကိးဝဲ နီၢ်ကိမၢၤလဲၣ် ဒီးပမၤလိန့ၢ်တၢ်မနုၤလၢ အဝဲအတၢ်ဆီဟံၣ်ဆီဃီအဂ့ၢ်န့ၣ်လဲၣ်.
၁၂ ဝံဟိၤၡ့အတၢ်လဲၤခီဖျိ ဒုးသ့ၣ်ညါပှၤ ကစၢ်ယွၤအတၢ်ထံၣ်လၢ ဘၣ်ဃးဒီးတၢ်ဆီဟံၣ်ဆီဃီအဂ့ၢ် အါမးန့ၣ်လီၤ. ကစၢ်ယွၤမၢ ဝံဟိၤၡ့ဆီဟံၣ်ဆီဃီဒီး နီၢ်ကိမၢၤ လၢအကကဲထီၣ်ပှၤလၢအ “မၤကမၣ်မုၣ်ကမၣ်ခွါ” ဒီးပိာ်မုၣ်အံၤကအိၣ်ဒီး “အဖိ” လၢအန့ၢ်ဘၣ်ဝဲခီဖျိလၢအ “မၤကမၣ်မုၣ်ကမၣ်ခွါ” အဃိလီၤ. နီၢ်ကိမၢၤ အိၣ်ဖျဲၣ်ထီၣ်ဝဲ ဝံဟိၤၡ့အဖိခွါတဂၤလီၤ. (ဟိၤၡ့ ၁:၂, ၃) လၢခံန့ၣ် အဝဲအိၣ်ဖျဲၣ်ထီၣ်ကဒီးဝဲ အဖိမုၣ်တဂၤဒီးအဖိခွါတဂၤလီၤ. လီၤဂာ်လၢအဝဲဒၢထီၣ်ဝဲ အဖိတဖၣ်အံၤလၢ ပှၤပိာ်ခွါအဂၤလီၤ. နီၢ်ကိမၢၤအဲၣ်ဘၢအီၤ အဘျီတဖၣ်အဘျီဘၣ်ဆၣ် ဝံဟိၤၡ့ တမၤကတၢၢ်ကွံာ်ဝဲ အတၢ်ဆီဟံၣ်ဆီဃီဘၣ်. လၢခံန့ၣ် နီၢ်ကိမၢၤပာ်တ့ၢ်ကွံာ်ဝဲ ဝံဟိၤၡ့ဒီး ကဲထီၣ်ဝဲပှၤကုၢ်လီၤ. ဘၣ်ဆၣ် ဝံဟိၤၡ့လဲၤကိးက့ၤအီၤလီၤ. (ဟိၤၡ့ ၃:၁, ၂) ယဟိဝၤယွၤ အပှၤဂီၢ်မုၢ်တဖၣ်တတီဒီးအီၤ ဒီးဘူၣ်ထီၣ်ဘါထီၣ်ဝဲ ကစၢ်လၢအဂၤတဖၣ်အဃိ အဝဲသူဝဲဝံဟိၤၡ့ ဒ်သိးကပာ်ဖျါထီၣ်ဝဲလၢ အပျၢ်အပှၤဂီၢ်မုၣ်တဖၣ်အတၢ်ကမၣ် အဘျီတဖၣ်အဘျီန့ၣ်လီၤ. ပဟံးန့ၢ်တၢ်မၤလိလၢ ဝံဟိၤၡ့ အတၢ်ဆီဟံၣ်ဆီဃီအပူၤ ကသ့ဒ်လဲၣ်.
၁၃ ခရံာ်ဖိတဂၤ မ့ၢ်အဲၣ်ဘၢအသးသမူတံၤသကိးန့ၣ် အသးသမူတံၤသကိးလၢ အတီဒီးအီၤတဂၤ ကဘၣ်မၤတၢ်ဆၢတဲာ်လီၤ. ယ့ၣ်ၡူးတဲဝဲလၢ သးသမူတံၤသကိးလၢ အတမၤကမၣ်တၢ်တဂၤန့ၣ် အိၣ်ဒီးတၢ်ခွဲးတၢ်ယာ်လၢ ကမၤကတၢၢ်ကွံာ်အတၢ်ဆီဟံၣ်ဆီဃီ ဒီးအိၣ်ဒီးတၢ်သဘျ့လၢ ကဆီဟံၣ်ဆီဃီလၢအသီလီၤ. ဘၣ်ဆၣ် သးသမူတံၤသကိးလၢ အတမၤကမၣ်တၢ်တဂၤ မ့ၢ်ဃုထၢလၢ အကပျၢ်ကွံာ်အဝၤမ့တမ့ၢ်အမါ အတၢ်ကမၣ်န့ၣ် တကမၣ်ဘၣ်. ဝံဟိၤၡ့ကိးက့ၤဝဲ နီၢ်ကိမၢၤလီၤ. စးထီၣ်လၢ နီၢ်ကိမၢၤဟဲက့ၤလၢဝံဟိၤၡ့အအိၣ်န့ၣ် ဝံဟိၤၡ့တဲအီၤလၢ အဝဲတဘၣ်လဲၤမံဃုာ်ဒီး ပှၤပိာ်ခွါအဂၤ နီတဘျီလၢၤဘၣ်. ဝံဟိၤၡ့ “တမံဃုာ်” ဒီးနီၢ်ကိၤမၢၤတစိၢ်ဖိလီၤ. (ဟိၤၡ့ ၃:၃, NWT, footnote) လၢခံန့ၣ် ဝံဟိၤၡ့က့ၤမံဃုာ်ဒီး အမါနီၢ်ကိမၢၤလီၤ. ဝံဟိၤၡ့အတၢ်လဲၤခီဖျိအံၤ ပာ်ဖျါထီၣ်ဝဲလၢ ယဟိဝၤယွၤ အသးအိၣ်တူၢ်လိာ်ဒီး ရ့လိာ်က့ၤအသးဒီး ပှၤအံၣ်စရ့လးဖိလၢ အကဟဲက့ၤကဒါက့ၤဆူအအိၣ်လီၤ. (ဟိၤၡ့ ၁:၁၁; ၃:၃-၅) တၢ်မၤလိတခါအံၤ သိၣ်လိပှၤဘၣ်ဃးဒီး တၢ်ဆီဟံၣ်ဆီဃီအဂ့ၢ်ဒ်လဲၣ်. သးသမူတံၤသကိးလၢ အတမၤကမၣ်တၢ်တဂၤ မ့ၢ်မံဃုာ်က့ၤဒီး အသးသမူတံၤသကိးလၢ အအဲၣ်ဘၢအီၤန့ၣ် မ့ၢ်ဒၣ်အဝဲပာ်ဖျါထီၣ်ဝဲလၢ အပျၢ်ကွံာ်အသးသမူတံၤသကိး အတၢ်ကမၣ်န့ၣ်လီၤ. (၁ ကရံၣ်သူး ၇:၃, ၅) ဒီးအဝဲမံဃုာ်က့ၤဒီး အသးသမူတံၤသကိးလၢ အအဲၣ်ဘၢအီၤမ့ၢ်ဝံၤန့ၣ် အဝဲတအိၣ်ဒီး တၢ်ခွဲးတၢ်ယာ်လၢ ကမၤကတၢၢ်ကွံာ် အတၢ်ဆီဟံၣ်ဆီဃီလၢၤဘၣ်. ဒီးအဝဲသ့ၣ် ဒီမါဝၤခံဂၤ ကဘၣ်မၤသကိးတၢ်ဒ်သိးသိး ဒီးကဘၣ်မၤစၢၤလိာ်အသးတဂၤဒီးတဂၤ ဒ်သိးကပာ်လုၢ်ပာ်ပှ့ၤတၢ်ဆီဟံၣ်ဆီဃီ ဒ်ကစၢ်ယွၤအသိးအဂီၢ်လီၤ.
နမ့ၢ်ထံၣ်ဘၣ် တၢ်ကီတၢ်ခဲဒိၣ်ဒိၣ်မုၢ်မုၢ်ဒၣ်လဲာ် ပာ်လုၢ်ပာ်ပှ့ၤ နတၢ်ဆီဟံၣ်ဆီဃီ
၁၄. ဒ် ၁ ကရံၣ်သူး ၇:၁၀, ၁၁ ပာ်ဖျါထီၣ်ဝဲအသိး လၢတၢ်ဆီဟံၣ်ဆီဃီအပူၤ တၢ်ကဲထီၣ်အသးသ့ဒ်လဲၣ်.
၁၄ ခရံာ်ဖိကိးဂၤဒဲး ကြၢးပာ်လုၢ်ပာ်ပှ့ၤ တၢ်ဆီဟံၣ်ဆီဃီ ဒ်ယဟိဝၤယွၤဒီးယ့ၣ်ၡူးအသိးလီၤ. ဘၣ်ဆၣ် မ့ၢ်လၢပတလၢတပှဲၤအဃိ တဘျီတခီၣ်ခရံာ်ဖိတနီၤ တမၤဝဲဒ်န့ၣ်ဘၣ်. (ရိမ့ၤ ၇:၁၈-၂၃) လၢတၢ်န့ၣ်အဃိ ခရံာ်ဖိတနီၤလၢ တၢ်မၢဖိအစိၤ အိၣ်ဒီးတၢ်ကီတၢ်ခဲလၢ အတၢ်ဆီဟံၣ်ဆီဃီအပူၤန့ၣ် တမ့ၢ်တၢ်လၢ အလီၤကမၢကမၣ်လၢပဂီၢ်ဘၣ်. တၢ်မၢဖိပီလူးကွဲးဝဲလၢ “မါတဂၤ, မ်အသုတလဲၤသဒၣ် [“အိၣ်လီၤဖး” NWT] အဝၤတဂ့ၤ.” ဘၣ်ဆၣ် တဘျီတခီၣ် ခရံာ်ဖိတနီၤ အိၣ်လီၤဖးဒီး အသးသမူတံၤသကိးလီၤ.—ဖး ၁ ကရံၣ်သူး ၇:၁၀, ၁၁ တက့ၢ်.
ပှၤနီၢ်ဒီမါဝၤတဖၣ် မၤဂ့ၤထီၣ်အတၢ်ရ့လိာ်သး ကသ့ဒ်လဲၣ်. (ကွၢ်လံာ်အဆၢ ၁၅)
၁၅, ၁၆. (က) တၢ်ကီတၢ်ခဲ မ့ၢ်ဟဲအိၣ်ထီၣ်လၢ တၢ်ဆီဟံၣ်ဆီဃီအပူၤန့ၣ် ပှၤနီၢ်ဒီမါဝၤတဖၣ် ကဘၣ်မၤဝဲဒ်လဲၣ် ဒီးဘၣ်မနုၤအဃိလဲၣ်. (ခ) ခရံာ်ဖိလၢ အသးသမူတံၤသကိး မ့တမ့ၢ်ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ဖဲတၢ်ကီတၢ်ခဲအိၣ်ထီၣ် လၢအတၢ်ဆီဟံၣ်ဆီဃီအပူၤအခါ ကဘၣ်မၤဝဲဒ်လဲၣ်.
၁၅ တၢ်ဂ့ၢ်တၢ်ကျိၤလၢ ပှၤနီၢ်ဒီမါဝၤတဖၣ် အိၣ်လီၤဖးဝဲန့ၣ် စီၤပီလူးတပာ်ဖျါထီၣ်ဝဲဘၣ်. အဝဲတဲဝဲလၢ မါတဂၤလၢအအိၣ်လီၤဖးဒီးအဝၤန့ၣ် “အဝၤတအိၣ်ဘၣ်ဒီးမ်အအိၣ်တက့ၢ်.” အဃိ ပသ့ၣ်ညါဘၣ်လၢ တၢ်ဂ့ၢ်တၢ်ကျိၤလၢ အဝဲသ့ၣ်အိၣ်လီၤဖးန့ၣ် တမ့ၢ်လၢအဝၤအဲၣ်ဘၢအီၤအဃိဘၣ်. မ့မ့ၢ်လၢ အဝၤအဲၣ်ဘၢအီၤအဃိန့ၣ် အဝဲမၤကတၢၢ်ကွံာ် အတၢ်ဆီဟံၣ်ဆီဃီ ဒီးဆီဟံၣ်ဆီဃီလၢအသီကသ့ဝဲလီၤ. လၢတၢ်န့ၣ်အဃိ ပသ့ၣ်ညါဘၣ်လၢ ပှၤနီၢ်ဒီမါဝၤလၢ အအိၣ်လီၤဖးတဖၣ်န့ၣ် ယဟိဝၤယွၤထံၣ်ဒံးအဝဲသ့ၣ် လၢနီၢ်ဒီမါဝၤလီၤ. စီၤပီလူးတဲဝဲလၢ ပှၤနီၢ်ဒီမါဝၤတဖၣ် မ့ၢ်အိၣ်ဒီးတၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ မ့တမ့ၢ်ဘၣ်လၢ တၢ်မၤကမၣ်မုၣ်ကမၣ်ခွါအဃိဘၣ်န့ၣ် အဝဲသ့ၣ် ကဘၣ်မၤဘၣ်ဂီၢ်က့ၤ အတၢ်ကီတၢ်ခဲတဖၣ်ဒီး အိၣ်ဒ်သိးသိးလီၤ. အဝဲသ့ၣ်လဲၤဃ့ဝဲ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤသ့လီၤ. ဒီးတၢ်အိၣ်ဖှိၣ်သးပှၢ်တဖၣ်န့ၣ် တအိၣ်ဃူအဝဲသ့ၣ်နီတဂၤဘၣ်, ဘၣ်ဆၣ် ကဟ့ၣ်ကူၣ်အဝဲသ့ၣ်လၢ လံာ်စီဆှံအပူၤလီၤ.
၁၆ ခရံာ်ဖိလၢ အသးသမူတံၤသကိး မ့တမ့ၢ်ပှၤလၢအဘူၣ်ထီၣ်ဘါထီၣ် ယဟိဝၤယွၤမီၤ. ဖဲအဝဲသ့ၣ် အိၣ်ဒီးတၢ်ကီတၢ်ခဲအခါ အိၣ်လီၤဖးဝဲသ့ဧါ. ဒ်ပမၤလိတ့ၢ်အသိး လံာ်စီဆှံတဲဝဲလၢ ပှၤမၤကတၢၢ်ကွံာ် တၢ်ဆီဟံၣ်ဆီဃီသ့ဝဲ ထဲဒၣ်လၢတၢ်မၤကမၣ်မုၣ်ကမၣ်ခွါအဃိလီၤ. ဘၣ်ဆၣ် ပှၤအိၣ်လီၤဖးသ့လၢ တၢ်ဂ့ၢ်မနုၤတဖၣ်အဃိလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်. စီၤပီလူးကွဲးဝဲလၢ “ဒီးပိာ်မုၣ်လၢအအိၣ်ဒီးအဝၤလၢအတနာ်ဘၣ်တၢ်, ဒီးမ့ၢ်ဘၣ်အသးလၢအကအိၣ်ဝဲဆိးဝဲဒီးအီၤဒီး, မ်အသုတလဲၤသဒၣ် အီၤတဂ့ၤ.” (၁ ကရံၣ်သူး ၇:၁၂, ၁၃) လံာ်စီဆှံအဆၢအံၤ ဘၣ်ထွဲလိာ်အသးဒီးပှၤစ့ၢ်ကီးလီၤ.
၁၇, ၁၈. ခရံာ်ဖိတနီၤ မ့ၢ်ထံၣ်ဘၣ်တၢ်အိၣ်အသးလၢ အကီအခဲနးနးကလဲာ်သနာ်က့ ဘၣ်မနုၤအဃိ အဝဲသ့ၣ်ဆၢတဲာ်လီၤအသးလၢ ကဆဲးအိၣ်ဝဲဒီး အသးသမူတံၤသကိးလဲၣ်.
၁၇ ဘၣ်ဆၣ် တၢ်အိၣ်အသးတနီၤန့ၣ် ပာ်ဖျါထီၣ်ဝဲလၢ “ဝၤလၢအတနာ်ဘၣ်တၢ်” တဂၤတ “ဘၣ်အသးလၢအကအိၣ်ဝဲဆိးဝဲဒီး” အမါန့ၣ်ဘၣ်. အဒိ, အဝဲကမၤနၢၤအီၣ်ဃီၣ်အမါအါတလၢ တုၤဒၣ်လဲာ် တၢ်ဘၣ်ယိၣ်အလီၢ်အိၣ်လၢ အမါအတၢ်အိၣ်ဆူၣ်အိၣ်ချ့ မ့တမ့ၢ် အသးသမူအဂီၢ် ဒီးဘၣ်သ့ၣ်သ့ၣ် တလုၢ်အီၣ်လုၢ်အီအမါဒီးအဟံၣ်ဖိဃီဖိဘၣ် မ့တမ့ၢ် ကမၤဝဲဒ်သိး အမါမၤကစၢ်ယွၤအတၢ်မၤ တသ့ဘၣ်အဂီၢ်လီၤ. အဝဲမ့ၢ်မၤအမါဒ်န့ၣ် ဒီးမ့ၢ်တတဲဝဲလၢအတ “ဘၣ်အသးလၢအကအိၣ်ဝဲဆိးဝဲဒီး” အမါသနာ်က့ အမါတဂၤအံၤ ဆၢတဲာ်လီၤအသးလၢ အကအိၣ်လီၤဖးဒီးအီၤသ့လီၤ. မ့ၢ်လၢ လိၣ်လၢအမါကမၤဝဲဒ်န့ၣ်အဃိလီၤ. ဘၣ်ဆၣ် ခရံာ်ဖိတနီၤလၢ အထံၣ်ဘၣ်ဒီးတၢ်အိၣ်အသးဒ်အံၤန့ၣ် ဆၢတဲာ်လီၤအသးလၢ ကဆဲးအိၣ်ဒံးဒီးအသးသမူတံၤသကိးလီၤ. အဝဲသ့ၣ် တူၢ်ဆါအသးဒီး ဂုာ်ကျဲးစၢးမၤဂ့ၤထီၣ် အတၢ်ဆီဟံၣ်ဆီဃီလီၤ. ဘၣ်မနုၤအဃိ အဝဲသ့ၣ် ဆၢတဲာ်လီၤအသးလၢ ကမၤဝဲဒ်န့ၣ်လဲၣ်.
၁၈ ခီဖျိလၢတၢ်အိၣ်အသးတဖၣ်န့ၣ်အဃိ ပှၤနီၢ်ဒီမါဝၤတဖၣ် မ့ၢ်အိၣ်လီၤဖးသနာ်က့ အဝဲသ့ၣ် မ့ၢ်ဒံးပှၤနီၢ်ဒီမါဝၤ ဒီးကထံၣ်ဘၣ်ဒီး တၢ်ကီတၢ်ခဲလၢ ပပာ်ဖျါထီၣ်တ့ၢ်အီၤတဖၣ်န့ၣ်လီၤ. တၢ်မၢဖိပီလူး ပာ်ဖျါထီၣ်ဝဲ တၢ်ဂ့ၢ်အဂၤတမံၤလၢ ပှၤနီၢ်ဒီမါဝၤတဖၣ် ကဘၣ်အိၣ်ဝဲတပူၤဃီန့ၣ်လီၤ. အဝဲကွဲးဝဲလၢ “ဝၤလၢအတနာ်ဘၣ်တၢ်တဂၤ, တၢ်ပာ်အီၤလၢအကဆှီလၢအမါအဃိ, ဒီးမါလၢအတနာ်ဘၣ်တၢ်တဂၤ, တၢ်ပာ်အီၤလၢအကဆှီလၢအဝၤအဃိလီၤ. မ့တမ့ၢ်ဘၣ်ဒ်န့ၣ်ဒီး, သုဖိမ့ၢ်တၢ်တကဆှီဘၣ်လီၤ. မ့မ့ၢ်ခဲကနံၣ်အံၤ, မ့ၢ်အကဆှီဝဲလီၤ.” (၁ ကရံၣ်သူး ၇:၁၄) ခရံာ်ဖိအါဂၤန့ၣ် မ့ၢ်ထံၣ်ဘၣ်တၢ်အိၣ်အသးလၢ အကီအခဲနးနးကလဲာ်သနာ်က့ အဝဲသ့ၣ်ဆၢတဲာ်လီၤအသးလၢ အကအိၣ်ဝဲဒီး အသးသမူတံၤသကိးလၢ အတဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. ခီဖျိလၢ အဝဲသ့ၣ်မၤဝဲဒ်န့ၣ်အဃိ လၢခံအသးသမူတံၤသကိး ကဲထီၣ်ယဟိဝၤပှၤအုၣ်အသးအဃိ အဝဲသ့ၣ် အသးခုဝဲဒိၣ်မးလီၤ.—ဖး ၁ ကရံၣ်သူး ၇:၁၆ တက့ၢ်; ၁ ပ့းတရူး ၃:၁, ၂.
၁၉. ဘၣ်မနုၤအဃိ ခရံာ်ဖိအါဂၤ အိၣ်ဒီးဟံၣ်မုာ်ဃီပၢၤလဲၣ်.
၁၉ ယ့ၣ်ၡူးပာ်ဖျါထီၣ်ဝဲ တၢ်ဟ့ၣ်ကူၣ်လၢဘၣ်ဃးဒီး တၢ်မၤကတၢၢ်ကွံာ်တၢ်ဆီဟံၣ်ဆီဃီ ဒီးတၢ်မၢဖိပီလူး ပာ်ဖျါထီၣ်ဝဲ တၢ်ဟ့ၣ်ကူၣ်လၢဘၣ်ဃးဒီး တၢ်အိၣ်လီၤဖးန့ၣ်လီၤ. အဝဲသ့ၣ်ခံဂၤလၢာ်န့ၣ် အဲၣ်ဒိးဝဲလၢ ကစၢ်ယွၤအခ့အပှၤတဖၣ် ကပာ်လုၢ်ပာ်ပှ့ၤတၢ်ဆီဟံၣ်ဆီဃီလီၤ. လၢဟီၣ်ခိၣ်ဒီဘ့ၣ်န့ၣ် ခရံာ်ဖိနီၢ်ဒီမါဝၤလၢ အအိၣ်ဒီးဟံၣ်မုာ်ဃီပၢၤန့ၣ် အိၣ်ဝဲအါမးလီၤ. ဒီးဘၣ်သ့ၣ်သ့ၣ် လၢနတၢ်အိၣ်ဖှိၣ်အပူၤန့ၣ် နကထံၣ်ဘၣ် ဝၤလၢအအိၣ်ဒီးတၢ်သးတီတဂၤ အဲၣ်အမါ ဒီးအမါစ့ၢ်ကီး ပာ်ဖျါထီၣ် တၢ်ပာ်ကဲလၢ အဝၤအဖီခိၣ်လီၤ. အဝဲသ့ၣ်တဖၣ်န့ၣ် ပာ်ဖျါထီၣ်ဝဲလၢ ပမၤလၤကပီၤ တၢ်ဆီဟံၣ်ဆီဃီသ့လီၤ. ကစၢ်ယွၤအကလုၢ်ကထါ တဲဝဲလၢ “ပိာ်ခွါကဟးသဒၣ်အမိၢ်ဒီးအပၢ်, ဒီးကဘျုးအသးဒီးအမါ, ဒီးအဝဲခံဂၤန့ၣ်ကကဲထီၣ်တညၣ်ဃီလီၤ.” (အ့းဖ့းစူး ၅:၃၁, ၃၃) ပှၤနီၢ်ဒီမါဝၤလၢ အကကွဲၢ်တဖၣ် ပာ်ဖျါထီၣ်ဝဲလၢ ကစၢ်ယွၤအတၢ်ကတိၤအံၤ မ့ၢ်တၢ်လၢအဘၣ်အဃိ ပသးခုဒိၣ်မးလီၤ.
