ဒၤ​ယဲ​နၤ အသး​အိၣ်​အ​နံၣ်​ ၈၀ ဘျဲၣ်​ဒီး​လၢ​အ​ပူၤကွံာ်​အ​နံၣ်​တဖၣ်​န့ၣ်​ အဝဲ​တူၢ်ဘၣ်​တၢ်ကီ​တၢ်ခဲ​အါမး​လီၤ. အဝဲ​အဝၤ​န့ၣ်​ အိၣ်ဒီး​တၢ်​သးပ့ၤနီၣ်​တၢ်ဆူၣ်​ အ​တၢ်ဆါ ဒီး​အိၣ်ဝဲ​လၢ တၢ်လီၢ်​လၢ​ပှၤ​ပာ်​ပှၤသးပှၢ်​အလီၢ် ဒီး​လၢခံ​အဝၤ သံသဒၣ်​ကွံာ်​အီၤ​လီၤ. အ​ဖိခွါ​ခံဂၤ​စ့ၢ်ကီး သံသဒၣ်​ကွံာ်​အီၤ ဒီး​အဝဲ​အိၣ်ဒီး နုၢ်​ခဲစၢၣ်​တၢ်ဆါ​လီၤ. ဘၣ်ဆၣ်​ လၢ​တၢ်​အိၣ်ဖှိၣ်​အ​ပူၤ ဒီး​လၢ​တၢ်​စံၣ်တဲၤ​တဲလီၤ​တၢ်မၤ​အ​ပူၤ​န့ၣ်​ ဒီပုၢ်ဝဲၢ်​တဖၣ်​ထံၣ်​လၢ ဒၤ​ယဲ​နၤ​သးခု​ထီဘိ​လီၤ.

ဒီပုၢ်ဝဲၢ်​ကၠီ(န်) န့ၣ်​ကဲဝဲ ပှၤ​လဲၤတရံး​အံးက့ၤ​ကွၢ်က့ၤ​တၢ် (traveling overseer) အိၣ်ဝဲ ၄၃ နံၣ်​ဘျဲၣ်​လီၤ. အဝဲ​ဘၣ်သူၣ်​ဘၣ်သး​ဝဲ အ​မူဒါ​အံၤ​ဒိၣ်မး ဒီး​တ​ဆိကမိၣ်​ဝဲ​လၢ က​မၤ​တၢ်မၤ​လၢ​အဂၤ​နီ​တခါ​ဘၣ်. ခီဖျိ​လၢ အဝဲ​ဘၣ်​ကွၢ်ထွဲဝဲ အဘူး​အတံၢ်​လၢ အ​အိၣ်​တ​ဆူၣ်​တ​ချ့​ဘၣ်​တဂၤ​အဃိ အဝဲ​မၤဝဲ အ​မူဒါ​အံၤ​တ​သ့​လၢၤဘၣ်. ဒီပုၢ်ဝဲၢ်​မုၣ်​ခွါ​တဖၣ်​လၢ အ​သ့ၣ်ညါ​ဝဲ ဒီပုၢ်ဝဲၢ် ကၠီ(န်) န့ၣ်​ဖဲ​အဝဲသ့ၣ်​က့ၤ​ထံၣ်ဘၣ်​ဝဲ ကၠီ(န်) လၢ​ကဝီၤ​အ​တၢ်​အိၣ်ဖှိၣ်​ ဒီး​တၢ်​အိၣ်ဖှိၣ်​ဖးဒိၣ်​အ​ပူၤ​အခါ အဝဲသ့ၣ်​ထံၣ်ဝဲ​လၢ ကၠီ(န်)အ​တၢ်သးခု တ​လီၤမၢ်​ဘၣ်. အဝဲ​အ​သးခု​ဒံး ဒိၣ်မး​လီၤ.

ဘၣ်​မနုၤ​အဃိ ဒၤ​ယဲ​နၤ ဒီး ကၠီ(န်) အ​သးခု​ဒံး​လဲၣ်. ပှၤလၢ​အ​တူၢ်ဘၣ်​ တၢ်သူၣ်အုး​သးအုး​တဂၤ​န့ၣ်​ အ​သးခု​က​သ့​ဒ်လဲၣ်. ပှၤလၢ​အဘၣ်​တူၢ်ၡူ​ကွံာ် အ​မူဒါ​လၢ အ​ဘၣ်သူၣ်​ဘၣ်သး​ဝဲ​န့ၣ်​ အိၣ်ဒီး​တၢ်သးခု​က​သ့​ဒ်လဲၣ်. လံာ်စီဆှံ ပာ်ဖျါ​ထီၣ်​န့ၢ်​ပှၤ တၢ်​စံးဆၢ​လီၤ. လံာ်စီဆှံ​တဲဝဲ​လၢ “ပှၤတီ​ပှၤလိၤ က​သးခု​လၢ​ယွၤ​အ​ပူၤ” လီၤ. (စံးထီၣ်​ပတြၢၤ ၆၄:၁၀) ပ​မ့ၢ်​သ့ၣ်ညါ တၢ်​လၢ​အ​က​မၤ​သးခု​ပှၤ​ထီဘိ ဒီး​တၢ်​လၢ​အ​တ​မၤ​သးခု​ပှၤ​ထီဘိ​န့ၣ်​ ပ​က​နၢ်ပၢၢ်​အါထီၣ်​ တၢ်မ့ၢ်​တၢ်တီ​အဝဲ​န့ၣ်​လီၤ.

တၢ်​လၢ​အ​မၤ​သးခု​ပှၤ​န့ၣ်​ အိၣ်ဝဲ​လီၤ. အဒိ ဆိကမိၣ်​ကွၢ် ပှၤလၢ​အ​အဲၣ်လိာ်​အသး​ခံဂၤ ဖျီအသး မ့တမ့ၢ် ပှၤဒီမါဝၤ​ခံဂၤ​လၢ အဖိ​ဟဲ​အိၣ်ဖျဲၣ်​ထီၣ်​ မ့တမ့ၢ် ပှၤလၢ​အ​ဒိးန့ၢ်​ဘၣ်​ မူဒါ​အသီ​လၢ ယဟိဝၤ​ယွၤ​အ​တၢ်မၤ​အ​ပူၤ​န့ၣ်​တက့ၢ်. တၢ်​သ့ၣ်​တဖၣ်​အံၤန့ၣ်​ မ့ၢ်​တၢ်ဟ့ၣ်​လၢ ယဟိဝၤ​ယွၤ​အ​အိၣ်ဒီး မၤ​သးခု​ပှၤ​ဒိၣ်မး​လီၤ. ယဟိဝၤ​ယွၤ​ဟ့ၣ်လီၤ​ပှၤ သးသမူ​တံၤသကိး, ဟ့ၣ်လီၤ​ပှၤ​တၢ်​သ့​တၢ်ဘၣ်​လၢ ပှၤ​က​ထီၣ်ဖိ​ထီၣ်လံၤ ဒီး​ဟ့ၣ်လီၤ​ပှၤ​မူဒါ လၢ​တၢ်​ကရၢကရိ​အ​ပူၤ​လီၤ.—၁ မိၤၡ့ ၂:၁၈, ၂၂; စံးထီၣ်​ပတြၢၤ ၁၂၇:၃; ၁ တံၤမသ့း ၃:၁.

ဘၣ်ဆၣ်​ ပ​တၢ်သးခု​တဖၣ်​အံၤန့ၣ်​ လီၤမၢ်​ကွံာ်ဝဲ​သ့​လီၤ. မ့ၢ်​လၢ​ပ​သးသမူ​တံၤသကိး​န့ၣ်​ အ​တ​သး​တီ​ဒီး​ပှၤ မ့တမ့ၢ် သံသဒၣ်​ကွံာ်​ပှၤ​သ့​အဃိ​လီၤ. (ယဃ့းစက့လး ၂၄:၁၈; ဟိၤၡ့ ၃:၁) ဖိလံၤ​တဖၣ်​န့ၣ်​ တ​ဒိကနၣ်​ ကစၢ်​ယွၤ​ဒီး​မိၢ်ပၢ်​အ​ကလုၢ်​သ့ ဒီး​ဘၣ်​သ့ၣ်​သ့ၣ်​ ဘၣ်​တၢ်​နီဟးထီၣ်​ကွံာ်​အီၤ​လၢ တၢ်​အိၣ်ဖှိၣ်​အ​ပူၤ​သ့ဝဲ​လီၤ. အဒိ စီၤ​ၡမူၤအ့လး အ​ဖိခွါ​တဖၣ်​န့ၣ်​ တ​မၤ​ယဟိဝၤ​ယွၤ​အ​တၢ်မၤ​လၢ ကျဲ​လၢ​ယဟိဝၤ​ယွၤ ဘၣ်သူၣ်​ဘၣ်သး​ဝဲ​န့ၣ်​ဘၣ်. ဒီး​စီၤ​ဒၤဝံး​စ့ၢ်ကီး ခီဖျိ​အ​မၤ​ကမၣ်​တၢ်​ဒီး  နီၢ်​ဘၤသၡ့ဘၤ​အဃိ လၢ​အဟံၣ်​ဖိ​ဃီဖိ​အ​ပူၤ တၢ်​သဘံၣ်​သဘုၣ်​အိၣ်​ထီၣ်ဝဲ​လီၤ. (၁ ၡမူၤအ့လး ၈:၁-၃; ၂ ၡမူၤအ့လး ၁၂:၁၁) တၢ်မ့ၢ်​ကဲထီၣ်​အသး​ဒ်အံၤ​န့ၣ်​ တၢ်​သ့ၣ်​တဖၣ်​အံၤ က​မၤ​သးခု​ပှၤ​အလီၢ် မၤ​သူၣ်အုး​သးအုး​ပှၤ​ဒီး မၤဘၣ်ဒိ​ပ​သး​ဒိၣ်မး​လီၤ.

တဘျီတခီၣ်​ ခီဖျိ​လၢ ပ​တၢ်​အိၣ်ဆူၣ်​အိၣ်ချ့​တဂ့ၤ​လၢၤဘၣ်​ မ့တမ့ၢ် ပ​ဘၣ်​ကွၢ်ထွဲ ပ​ဟံၣ်ဖိ​ဃီဖိ မ့တမ့ၢ် တၢ်​ဆီတလဲ​အိၣ်​ထီၣ်​လၢ တၢ်​ကရၢကရိ​အ​ပူၤ​အဃိ ပ​ဘၣ်​ပာ်တ့ၢ်​ကွံာ် ပ​မူဒါ​လီၤ. ပှၤ​အါဂၤ​လၢ အဘၣ်​တူၢ်ၡူ​ကွံာ်​အ​မူဒါ​တဖၣ်​န့ၣ်​ တဲဝဲ​လၢ အဝဲသ့ၣ်​ သ့ၣ်နီၣ်​ဘၣ်က့ၤ တၢ်သးခု​လၢ​အ​ဒိးန့ၢ်​ဘၣ်​ဝဲ​ဖဲ အ​မၤဝဲ​အ​မူဒါ​အခါ​န့ၣ်​လီၤ.

ပ​သ့ၣ်ညါ​ဘၣ်​လၢ တၢ်​သ့ၣ်​တဖၣ်​အံၤန့ၣ်​ ဟ့ၣ်​ပှၤ​တၢ်သးခု​တ​သ့​ထီဘိ​ဘၣ်. ပ​မ့ၢ်​ထံၣ်ဘၣ်​ဒီး တၢ်ကီ​တၢ်ခဲ​ဒၣ်လဲာ် တၢ်​လၢ​အ​က​မၤ​သးခု​ပှၤ​ထီဘိ​န့ၣ်​အိၣ်ဧါ. အိၣ်ဝဲ​လီၤ. ပ​ထံၣ်ဘၣ်​လၢ စီၤ​ၡမူၤအ့လး, စီၤ​ဒၤဝံး​ဒီး ပှၤအဂၤ​တဖၣ်​န့ၣ်​ ထံၣ်ဘၣ်​ဒီး​တၢ်ကီ​တၢ်ခဲ​ဒၣ်လဲာ် အဝဲသ့ၣ်​ အ​တၢ်သးခု တ​လီၤမၢ်​ဘၣ်.

ယ့ၣ်ၡူး​သ့ၣ်ညါ​ဝဲ တၢ်သးခု​နီၢ်ကီၢ် မ့ၢ်​တၢ်မနုၤ​လဲၣ်န့ၣ်​လီၤ. တချုး​လၢ​အဝဲ​ဟဲ​လီၤ​လၢ ဟီၣ်ခိၣ်​ဒံး​ဘၣ်​န့ၣ်​ လံာ်စီဆှံ​ပာ်ဖျါ​ထီၣ်ဝဲ​လၢ​အဝဲ “သူၣ်ပိၢ်​သးဝး​လၢ [ယွၤ] အမဲာ်​ညါ​တထံၣ်ဃီ” လီၤ. (ကတိၤဒိ ၈:၃၀) ဖဲ​အဝဲ​ဟဲ​လီၤ​လၢ ဟီၣ်ခိၣ်​ချၢ​အခါ တဘျီတခီၣ်​န့ၣ်​ ထံၣ်ဘၣ်​ဒီး​တၢ်ကီ​တၢ်ခဲ​အါမး​လီၤ. ဘၣ်ဆၣ်​ ယ့ၣ်ၡူး ဒိးန့ၢ်​ဘၣ်​တၢ်သးခု ခီဖျိ​လၢ အ​မၤ​အ​ပၢ်​အ​တၢ်မၤ​အဃိ​လီၤ. (ယိၤဟၣ်​ ၄:၃၄) ဖဲ​အဝဲ​ထံၣ်ဘၣ်​ တၢ်ကီ​တၢ်ခဲ အလီၢ်​ခံ​ကတၢၢ်​တဘျီ​အခါ​ဒၣ်လဲာ် လံာ်စီဆှံ​ပာ်ဖျါ​ထီၣ်ဝဲ​လၢ “အဝဲဒၣ်​ဒိး​ထူၣ်စုညါ, . . . လၢ​တၢ်သးခု အိၣ်​ပာ်လီၤ​အသး​လၢ အမဲာ်​ညါ​အဃိ” လီၤ. (ဧ့ၤဘြံၤ ၁၂:၂) တၢ်ဂ့ၢ်​ခံ​မံၤ​လၢ ယ့ၣ်ၡူး​တဲဝဲ​ဘၣ်ဃး​ဒီး တၢ်သးခု​နီၢ်ကီၢ်​အဂ့ၢ်​န့ၣ်​ ပ​က​မၤလိ​န့ၢ်ဘၣ်​တၢ်​အါမး​လီၤ.

ဖဲ​ယ့ၣ်ၡူး အပျဲၢ်​အဘီၣ်​ ၇၀ လဲၤ​စံၣ်တဲၤ​တဲလီၤ​တၢ်​ဝံၤ ဟဲက့ၤ​လၢ​ယ့ၣ်ၡူး​အ​အိၣ်​အခါ အဝဲသ့ၣ်​အ​သးခု​ဒိၣ်မး ခီဖျိ​တၢ်​လၢ​အ​မၤတ့ၢ်ဝဲ​တဖၣ်​ ဒီး​အ​နီဟးထီၣ်​ကွံာ်ဝဲ တၢ်နါ​န့ၢ်​အဃိ​လီၤ. ဘၣ်ဆၣ်​ ယ့ၣ်ၡူး​တဲ​အဝဲသ့ၣ်​လၢ “မ့ၢ်​သး​တဖၣ်​အိၣ်​လၢ​သု​ဖီလာ်​အဃိ​ဒီး, သု​တ​သးခု​တဂ့ၤ. မ့ၢ်​သု​မံၤ​ဆဲးလီၤ​အသး​လၢ​မူခိၣ်​အဃိ​ဒီး, သးခု​တက့ၢ်.” (လူၤကၣ်​ ၁၀:၁-၉, ၁၇, ၂၀) ပ​က​ဒိးန့ၢ်​ဘၣ်​ ယဟိဝၤ​ယွၤ​အ​တၢ်​ဘၣ်သး​န့ၣ်​ မ့ၢ်​တၢ်​လၢ​အရ့ဒိၣ်​န့ၢ်ဒံး မူဒါ​လီၤဆီ​ခဲလၢာ်​ဒီး အ​ဟ့ၣ်​ပှၤ​တၢ်သးခု​ဒိၣ်န့ၢ်​ဒံး မူဒါ​လီၤဆီ​တခါဂ့ၤ​တခါဂ့ၤ​လီၤ.

ဘၣ်​တဘျီ​ဖဲ ယ့ၣ်ၡူး​တဲတၢ်​ဒီး ပှၤ​ဂီၢ်မုၢ်​တဖၣ်​အခါ ပှၤ​ယူဒၤ​မုၣ်​တဂၤ​ဘၣ်သူၣ်​ဘၣ်သး​ဝဲ အ​တၢ်​သိၣ်လိ​တဖၣ်​ဒိၣ်မး​အဃိ အဝဲ​တဲဝဲ​လၢ ယ့ၣ်ၡူး​အမိၢ်​န့ၣ်​ က​သးခုဝဲ​ဒိၣ်မး ခီဖျိ​လၢ အ​အိၣ်ဒီး​အ​ဖိခွါ​တဂၤ​အံၤ​အဃိ​လီၤ. ဘၣ်ဆၣ်​ ယ့ၣ်ၡူး​တဲ​ဆၢက့ၤ​အီၤ​လၢ “မ့ၢ်မး​ပှၤလၢ​အ​နၢ်ဟူ ယွၤ​အ​ကလုၢ်​အ​ကထါ, ဒီး​တိၢ်န့ၢ်ဝဲ​တဖၣ်​န့ၣ်, ဘၣ်​ဆိၣ်ဂ့ၤ [“သးခု” NWT] ဝဲ​လီၤ.” (လူၤကၣ်​ ၁၁:၂၇, ၂၈) ခီဖျိ​လၢ ပ​ဖိ အဃိ ပ​က​ဒိးန့ၢ်​ဘၣ်​တၢ်သးခု​လီၤ. ဘၣ်ဆၣ်​ တၢ်​လၢ​က​မၤ​သးခု​ပှၤ​ထီဘိ​န့ၣ်​မ့ၢ်ဝဲ ပ​ဒိကနၣ်​ယဟိဝၤ​ယွၤ​အ​ကလုၢ် ဒီး​အိၣ်ဒီး​တၢ်​ရ့လိာ်သး​ဒီး​အီၤ ဘူးဘူး​တံၢ်တံၢ်​လီၤ.

ဖဲ​ပ​တူၢ်ဘၣ်​လၢ ယဟိဝၤ​ယွၤ​ဘၣ်သူၣ်​ဘၣ်သး​ပှၤ​အခါ ပ​သးခု​ဒိၣ်မး​လီၤ. အဃိ​ပ​မ့ၢ်​ထံၣ်ဘၣ်​ တၢ်​မၤကွၢ်​န့ၣ်​ တမ့ၢ်​တၢ်​လၢ​အမုာ်​ဘၣ်​ပှၤ​ဘၣ်ဆၣ်​ တၢ်​မၤကွၢ်​တဖၣ်​န့ၣ်​ မၤ​လီၤမၢ်​ပ​တၢ်သးခု​တခါ​အံၤ​တန့ၢ်ဘၣ်. ဖဲ​ပ​ထံၣ်ဘၣ်​ တၢ်​မၤကွၢ်​အခါ ပ​မ့ၢ်​အိၣ်ဒီး​တၢ်သးတီ​န့ၣ်​ ပ​ဒိးန့ၢ်​ဘၣ်​တၢ်သးခု​အါထီၣ်​လီၤ. (ရိမ့ၤ ၅:၃-၅) တကးဒံးဘၣ်​ ယဟိဝၤ​ယွၤ​က​ဟ့ၣ်​ဝဲ ပှၤလၢ​အ​နာ်န့ၢ်​အီၤ​တဖၣ်​လၢ သးစီဆှံ​လီၤ. ဒီး​တၢ်​သူၣ်ခု​သးခု​န့ၣ်​ မ့ၢ်ဝဲ​သး​အ​တၤသၣ်​တခါ​လီၤ. (ကလၤတံ ၅:၂၂) သးစီဆှံ​က​မၤစၢၤ​ပှၤ​ဒ်သိး ပ​က​နၢ်ပၢၢ်ထီၣ်​ စံးထီၣ်​ပတြၢၤ ၆၄:၁၀ လၢ​အ​တဲဝဲ “ပှၤတီ​ပှၤလိၤ က​သးခု​လၢ​ယွၤ​အ​ပူၤ” လီၤ.

ဒၤ​ယဲ​နၤ ဒီး ကၠီ(န်) န့ၣ်​ထံၣ်ဘၣ်​ဒီး တၢ်ကီ​တၢ်ခဲ​ဒၣ်လဲာ် ဘၣ်​မနုၤ​အဃိ အဝဲသ့ၣ်​အိၣ်ဒီး​တၢ်သးခု​လဲၣ်န့ၣ်​ ပ​နၢ်ပၢၢ်​အီၤ​သ့​လီၤ. ဒၤ​ယဲ​နၤ​တဲဝဲ​လၢ “ယသန့ၤယသး​လၢ ယဟိဝၤ​ယွၤ ဒ်​ဖိသၣ်​တဂၤ သန့ၤ​အသး​လၢ အမိၢ်​အ​ပၢ်​အသိး​လီၤ. ယ​တူၢ်ဘၣ်​လၢ ယဟိဝၤ​ယွၤ​ဆိၣ်ဂ့ၤ​ယၤ ခီဖျိ​အ​ဟ့ၣ်​ယၤတၢ်​ဂံၢ်​တၢ်ဘါ ဒ်သိး​ယ​ဆဲး​စံၣ်တဲၤ​တဲလီၤ​တၢ်​လၢ တၢ်​နံၤကမှံ​အ​ပူၤ​က​သ့​အဂီၢ်​လီၤ.” ဖဲ ကၠီ(န်) ဘၣ်​တူၢ်ၡူ​ကွံာ် အ​မူဒါ​ဝံၤ​အလီၢ်​ခံ တၢ်မနုၤ​မၤစၢၤ​အီၤ​ဒ်သိး အဝဲ​က​ဆဲး​အိၣ်ဒီး​တၢ်သးခု ဒီး​က​ဆဲး​စံၣ်တဲၤ​တဲလီၤ​တၢ်​ဆူၣ်ဆူၣ်​အဂီၢ်​လဲၣ်. အဝဲ​တဲဝဲ​လၢ “စးထီၣ်​ဖဲ ၁၉၉၈ န့ၣ်​ယ​ဘၣ်​သိၣ်လိ​တၢ်​လၢ ကၠိ​လၢ​အ​သိၣ်လိ​ပှၤလၢ က​ကွၢ်ထွဲ​တၢ်​အိၣ်ဖှိၣ်​အဂီၢ်​အဃိ ယ​မၤ​နီၢ်ကစၢ်​တၢ်​မၤလိ​လံာ်စီဆှံ အါန့ၢ်ဒံး​လၢညါ​လီၤ.” အဝဲ​တဲဝဲ​လၢ ထီဘိ​န့ၣ်​အဝဲ​ဒီး​အမါ အသး​အိၣ်​မၤဝဲ မူဒါ​လၢ​ယဟိဝၤ​ယွၤ ဟ့ၣ်လီၤ​အီၤ​အဃိ ဖဲ​တၢ်​ဆီတလဲ​အိၣ်​ထီၣ်​အခါ တ​ကီ​လၢ​အဝဲသ့ၣ်​ က​တူၢ်လိာ်​တၢ်​ဆီတလဲ​အဂီၢ်​လၢၤဘၣ်. အဝဲ​တဲဝဲ​လၢ “ပ​မၤ​ဒ်အံၤ​န့ၣ်​ ပ​သး​တ​အုး​ဘၣ်.”

ပှၤ​အါဂၤ​န့ၣ်​ တူၢ်ဘၣ်​ဝဲ​လၢ တၢ်ကတိၤ​ဖဲ စံးထီၣ်​ပတြၢၤ ၆၄:၁၀ န့ၣ်​ဘၣ်​ဝဲ​လီၤ. အဒိ ပ​က​ဆိကမိၣ်​ကွၢ် ပှၤဒီမါဝၤ​ခံဂၤ​လၢ အ​မၤတၢ်​လၢ ကီၢ်အမဲရကၤ​ဘ့ၤသ့လး​အဂ့ၢ်​လီၤ. အဝဲသ့ၣ်​မၤတၢ်​ဖဲ​န့ၣ်​အ​နံၣ်​ ၃၀ ဘျဲၣ်​ဝံၤ​ပှၤ​မၢ​အဝဲသ့ၣ်​က့ၤ​မၤ ပှၤလဲၤလၢညါ​လီၤဆီ​လီၤ. အဝဲသ့ၣ်​တဲဝဲ​လၢ “ဖဲ​န​ဘၣ်​တူၢ်ၡူ​ကွံာ် တၢ်​လၢ​န​ဘၣ်သူၣ်​ဘၣ်သး​အီၤ​တမံၤမံၤ​အခါ န​သးတမုာ်ဘၣ်​န့ၣ်​ မ့ၢ်ဝဲ​န့ဆၢၣ်​လီၤ. ဘၣ်ဆၣ်​ န​တ​သးအုး​ထီဘိ​ဘၣ်.” ဖဲ​အဝဲသ့ၣ်​ဒိးန့ၢ်​ဘၣ်​မူဒါ​အသီ တဘျီဃီ​န့ၣ်​ အဝဲသ့ၣ်​လဲၤ​စံၣ်တဲၤ​တဲလီၤ​တၢ် ဒီး​ဒီပုၢ်ဝဲၢ်​လၢ တၢ်​အိၣ်ဖှိၣ်​ပူၤ​တဖၣ်​လီၤ. အဝဲသ့ၣ်​တဲ​စ့ၢ်ကီး​ဝဲ​လၢ “ပ​ဃ့​ဘါ​ထုကဖၣ်​လၢ တၢ်ဂ့ၢ်​တနီၤ​အဂီၢ် လီၤတံၢ်​လီၤဆဲး​လီၤ. ဒီး​ဖဲ​ပ​ထံၣ်ဘၣ်​လၢ ပ​တၢ်​ထုကဖၣ်​ ဘၣ်​တၢ်​စံးဆၢ​အီၤ​အခါ ပ​ဒိးန့ၢ်​ဘၣ်​တၢ်ဂံၢ်​တၢ်ဘါ ဒီး​တၢ်​သူၣ်ခု​သးခု​လီၤ. ဖဲ​ပ​လဲၤ​တုၤလၢ တၢ်​အိၣ်ဖှိၣ်​အ​ပူၤ​တယံာ်ဘၣ်​န့ၣ်​ ဒီပုၢ်ဝဲၢ်​အဂၤ​လၢ တၢ်​အိၣ်ဖှိၣ်​အ​ပူၤ​န့ၣ်​ စးထီၣ်​မၤဝဲ ပှၤလဲၤလၢညါ ဒီး​ပ​အိၣ်ဒီး ပှၤ​မၤလိ​လံာ်စီဆှံ​ဖိ​လၢ အ​လဲၤထီၣ်​လဲၤထီ​ခံဂၤ​လီၤ.”

ပ​က​သးခု​ထီဘိ​န့ၣ်​ တညီဘၣ်. တဘျီတခီၣ်​န့ၣ်​ ပ​က​တူၢ်ဘၣ်​ တၢ်​သးအုး​လီၤ. ဘၣ်ဆၣ်​ ယဟိဝၤ​ယွၤ ဟ့ၣ်ဂံၢ်​ဟ့ၣ်ဘါ​ပှၤလၢ တၢ်ကတိၤ​ဖဲ စံးထီၣ်​ပတြၢၤ ၆၄:၁၀ အ​ပူၤ​လီၤ. ပ​သး​အဂံၢ်​အဘါ မ့ၢ်​လီၤစၢ်​သနာ်က့ ပ​မ့ၢ်​အိၣ်ဒီး​တၢ်သးတီ​န့ၣ်​ ပ​နာ်​သ့​သပှၢ်​ကတၢၢ်​လၢ​ပ “သးခု​လၢ​ယွၤ​အ​ပူၤ” သ့​ဒီး​ပ​အိၣ်ခိး​ကွၢ်လၢ် “မူခိၣ်​အသီ, ဒီး​ဟီၣ်ခိၣ်​အသီ” လၢ​ယဟိဝၤ​ယွၤ အၢၣ်လီၤ​ပာ်စၢၤ​ပှၤ​သ့ဝဲ​န့ၣ်​လီၤ. ဖဲ​န့ၣ်​န့ၣ်​ ပှၤ​ကိးဂၤ​ဒဲး​က​လၢပှဲၤ​ထီၣ်​ ဒီး​က “သူၣ်ခု​သးခု​ဒီး​သူၣ်ဖှံ​သးညီ . . . လီၤစိၤ​လီၤထီ” ခီဖျိ​တၢ်​လၢ ယဟိဝၤ​ယွၤ က​မၤန့ၢ်​ပှၤ​တဖၣ်​အဃိ​လီၤ.—ယၡါယၤ ၆၅:၁၇, ၁၈.

ထံၣ်တမှံ​ကွၢ်​လၢ တၢ်​က​မၤ​အသး​ဒ်လဲၣ်​န့ၣ်​တက့ၢ်. ပ​ကအိၣ်​ဒီး တၢ်​အိၣ်ဆူၣ်​အိၣ်ချ့​လၢ အလၢ​အပှဲၤ ဒီး​ကိးနံၤဒဲး ဖဲ​ပ​ပၢၢ်ထီၣ်​အခါ ပ​က​ပှဲၤ​ဒီး​တၢ်ဂံၢ်​တၢ်​ဘါလီၤ. လၢ​အ​ပူၤကွံာ် တၢ်​လၢ​အ​မၤ​သးအုး​ပှၤ​တဖၣ်​န့ၣ်​ တ​မၤ​သးအုး​ပှၤ နီတဘျီ​လၢၤဘၣ်. ယဟိဝၤ​ယွၤ​အၢၣ်လီၤ​ဝဲ​လၢ “တၢ်​အ​ခီၣ်ထံး​တဖၣ်​န့ၣ်​ တၢ်​တ​သ့ၣ်နီၣ်ထီၣ်​က့ၤ​ဘၣ်​အီၤ​ဘၣ်. ဒီး​တအိၣ်​ထီၣ်​လၢၤဘၣ်​လၢ ပှၤ​အ​သးကံၢ်​ပူၤ​ဘၣ်.” ပ​က​ထံၣ်ဘၣ်​က့ၤ​ဒီး ပှၤလၢ​ပ​အဲၣ်ဘၣ်​အီၤ လၢ​အ​သံသဒၣ်​ကွံာ်​ပှၤ​တဖၣ်​လီၤ. ဖဲ​န့ၣ်​အခါ ပ​က​တူၢ်ဘၣ်​ဒ် ဖိသၣ်​ပိာ်မုၣ်​လၢ အသး​အိၣ်​ ၁၂ နံၣ်​အမိၢ်​အ​ပၢ်​တူၢ်ဘၣ်​ဝဲ​အသိး​လီၤ. ဖဲ​ယ့ၣ်ၡူး​မၤ​သမူထီၣ်​က့ၤ အဝဲသ့ၣ်​အ​ဖိမုၣ်​အခါ အဝဲသ့ၣ်​ “ကမၢ​ကမၣ်​ဒိၣ်​နီၢ်​မး​လီၤ.” (မၢ်ကူး ၅:၄၂) လၢခံကတၢၢ်​န့ၣ်​ ပှၤ​ကိးဂၤ​ဒဲး က​ကဲထီၣ်​ပှၤတီ​ပှၤလိၤ​အ​နီၢ်ကီၢ် ဒီး​က “သးခု​လၢ​ယွၤ​အ​ပူၤ” လီၤထူ​လီၤယိာ်​လီၤ.