သးစၢ်သ့ၣ်ဧၢ, နတၢ်ဘၣ်တ့ကစၢ် အဲၣ်ဒိးလၢနကသးခု
“သ့ၣ်ညါယွၤလၢနကျဲခဲလၢာ်အပူၤတက့ၢ်. ဒီးအဝဲဒၣ်ကမၤလိၤနကျဲလီၤ.”—ကတိၤဒိ ၃:၆.
၁, ၂. ဖဲနဃုထၢတၢ်လၢ နကမၤအီၤလၢ နတၢ်အိၣ်မူအပူၤအခါ နမ့ၢ်ဒိကနၣ် နတၢ်ဘၣ်တ့ကစၢ်အကလုၢ်န့ၣ် ဘၣ်မနုၤအဃိ မ့ၢ်တၢ်လၢအပှဲၤဒီးတၢ်ကူၣ်သ့လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
နမ့မ့ၢ် ပှၤသးစၢ်တဂၤန့ၣ် ဘၣ်ဃးဒီးနတၢ်အိၣ်မူလၢ ခါဆူညါအဂီၢ်န့ၣ် နကဒိးန့ၢ်ဘၣ် တၢ်ဟ့ၣ်ကူၣ်အါမးလီၤ. သရၣ်, သရၣ်မုၣ်တဖၣ်, ပှၤဟ့ၣ်ကူၣ်တၢ်ဖိလၢကၠိတဖၣ် ဒီးပှၤအဂၤတဖၣ်န့ၣ် ကဟ့ၣ်ကူၣ်နၤလၢ နကဃုတၢ်ကူၣ်ဘၣ်ကူၣ်သ့ မ့တမ့ၢ် တၢ်မၤလၢအပတီၢ်ထီ ဒ်သိးနကန့ၢ်ဘၣ် စ့အါအါအဂီၢ်လီၤ. ဘၣ်ဆၣ် မ့မ့ၢ်ယဟိဝၤယွၤ အတၢ်ဟ့ၣ်ကူၣ်န့ၣ် လီၤဆီဒီးအဝဲသ့ၣ်လီၤ. အဝဲအဲၣ်ဒိးလၢ ဖဲနထီၣ်ကၠိအခါ နကဂုာ်ကျဲးစၢး ဒ်သိးအကမၤစၢၤနၤလၢ နဆၢထၢၣ်လၢ နနီၢ်ကစၢ်အခီၣ်ကသ့အဂီၢ်လီၤ. (ကလီးစဲ ၃:၂၃) တကးဒံးဘၣ် အဝဲသ့ၣ်ညါစ့ၢ်ကီးဝဲလၢ ဖဲနသးစၢ်အခါ နကဘၣ်မၤတၢ်ဆၢတဲာ်လၢ အရ့ဒိၣ်လၢ အဘၣ်ထွဲဒီး နတၢ်အိၣ်မူလၢခါဆူညါအဂီၢ်စ့ၢ်ကီးလီၤ. အဃိ အဝဲဟ့ၣ်နၤတၢ်ဟံးစုနဲၣ်ကျဲလၢ ကမၤစၢၤနၤဒ်သိး နကအိၣ်မူဒ်အတၢ်ဘၣ်သး ဖဲမုၢ်နံၤခံကတၢၢ်အတီၢ်ပူၤန့ၣ်လီၤ.—မးသဲ ၂၄:၁၄.
၂ သ့ၣ်နီၣ်ထီၣ်လၢ ယဟိဝၤယွၤန့ၣ် သ့ၣ်ညါဝဲတၢ်ကိးမံၤဒဲးလီၤ. ခါဆူညါ တၢ်ကမၤအသးဒ်လဲၣ် ဒီးတၢ်အကတၢၢ် ဘူးထီၣ်ဝဲထဲလဲၣ်န့ၣ် အဝဲသ့ၣ်ညါဝဲ လီၤတံၢ်လီၤဆဲးလီၤ. (ယၡါယၤ ၄၆:၁၀; မးသဲ ၂၄:၃, ၃၆) ယဟိဝၤယွၤ သ့ၣ်ညါနၤစ့ၢ်ကီးလီၤ. အဝဲသ့ၣ်ညါဝဲ တၢ်လၢအကမၤသးခုနၤ ဒီးတၢ်လၢအကမၤသးအုးနၤတဖၣ်န့ၣ်လီၤ. ပှၤဟီၣ်ခိၣ်ဖိတဖၣ် အတၢ်ဟ့ၣ်ကူၣ်တဖၣ်န့ၣ် ဘၣ်သ့ၣ်သ့ၣ်ကဖျါလၢအဂ့ၤ ဘၣ်ဆၣ် မ့ၢ်တဒိးသန့ၤထီၣ်အသးလၢ ယွၤအကလုၢ်ကထါဘၣ်န့ၣ် တမ့ၢ်တၢ်လၢအိၣ်ဒီးတၢ်ကူၣ်သ့နီၢ်ကီၢ်ဘၣ်.—ကတိၤဒိ ၁၉:၂၁.
တၢ်ကူၣ်သ့န့ၣ် ဟဲဝဲထဲလၢ ယဟိဝၤယွၤအအိၣ်
၃, ၄. ခီဖျိလၢ နီၢ်အံၣ်အုဒီးစီၤအၤဒၣ် ဒိကနၣ်ဝဲ တၢ်ဟ့ၣ်ကူၣ်လၢ အတဂ့ၤဘၣ်အဃိ မၤဘၣ်ဒိ အဝဲသ့ၣ်ဒီးအဖိအလံၤတဖၣ်ဒ်လဲၣ်.
၃ တၢ်ဟ့ၣ်ကူၣ်လၢအတဂ့ၤဘၣ်န့ၣ် အိၣ်ဝဲဖးယံာ်လံ. မုၣ်ကီၤလံၢ်မ့ၢ် ပှၤအဆိကတၢၢ်တဂၤလၢ အဟ့ၣ်ကူၣ်တၢ်လၢ အတဂ့ၤဘၣ်န့ၣ်လီၤ. အဝဲတဲဝဲနီၢ်အံၣ်အုလၢ နီၢ်အံၣ်အုဒီးစီၤအၤဒၣ် မ့ၢ်ဆၢတဲာ်တၢ်လၢ အနီၢ်ကစၢ် လၢအတၢ်အိၣ်မူအဂီၢ်န့ၣ် ကဒိးန့ၢ်ဘၣ် တၢ်သူၣ်ခုသးခုအါန့ၢ်အလီၢ်လီၤ. (၁ မိၤၡ့ ၃:၁-၆) ဘၣ်ဆၣ် မုၣ်ကီၤလံၢ်မ့ၢ် ပှၤလၢအအဲၣ်လီၤထဲအသးလီၤ. အဝဲအဲၣ်ဒိးလၢ နီၢ်အံၣ်အုဒီးစီၤအၤဒၣ် ဒီးအဖိအလံၤတဖၣ် ကဒိအနၣ်အကလုၢ်ဒီး ဘူၣ်ထီၣ်ဘါထီၣ်အီၤလီၤ. မုၣ်ကီၤလံၢ်တအဲၣ်ဒိးလၢ အဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤဘၣ်. ဘၣ်ဆၣ်မုၣ်ကီၤလံၢ် တမၤန့ၢ်အဝဲသ့ၣ် တၢ်နီတမံၤဘၣ်. တၢ်လၢအအိၣ်ဒီးအဝဲသ့ၣ်ခဲလၢာ်န့ၣ် မ့ၢ်ဒၣ်ယဟိဝၤယွၤ ဟ့ၣ်လီၤအဝဲသ့ၣ်လီၤ. ယဟိဝၤယွၤ ဟ့ၣ်လီၤအဝဲသ့ၣ် အသးသမူတံၤသကိး, တၢ်အိၣ်တၢ်ဆိးအလီၢ်လၢ အဃံအလၤ, နီၢ်ခိလၢအလၢအပှဲၤ ဒီးအဝဲသ့ၣ် အိၣ်မူဝဲလီၤထူလီၤယိာ်သ့လီၤ.
၄ လီၤသးအုးဒိၣ်မးလၢ နီၢ်အံၣ်အုဒီးစီၤအၤဒၣ်န့ၣ် တဒိကနၣ်ကစၢ်ယွၤအကလုၢ်ဘၣ်. အဝဲသ့ၣ်မၤဝဲဒ်န့ၣ်န့ၣ် မ့ၢ်ဒၣ်အဝဲသ့ၣ် မၤဟးဂီၤကွံာ် အတၢ်ရ့လိာ်သးဒီးပှၤလၢအဟ့ၣ်လီၤအီၤ သးသမူတဂၤန့ၣ်လီၤ. အဃိအဝဲသ့ၣ် တူၢ်ဘၣ်တၢ်သူၣ်အုးသးအုးနးမးလီၤ. ဒ်ဖီတဖိးလၢ ပှၤဒ့ကွံာ်အီၤလၢ အထူၣ်ခံအသိး နီၢ်အံၣ်အုဒီးစီၤအၤဒၣ်န့ၣ် အသးပှၢ်ထီၣ်ဝဲ ကယီကယီဒီးဘၣ်သံဝဲလီၤ. ဒီးအဝဲသ့ၣ်အဖိအလံၤ ဃုာ်ဒီးပဝဲသ့ၣ်ခဲလၢာ်န့ၣ် ပထံၣ်ဘၣ်တၢ်ကီတၢ်ခဲလီၤ. (ရိမ့ၤ ၅:၁၂) မုၢ်မဆါတနံၤအံၤ ပှၤအါဂၤတဒိကနၣ် ကစၢ်ယွၤအကလုၢ်ဘၣ် ဒီးအဝဲသ့ၣ်မၤဖဲ အသးလီၤ. (အ့းဖ့းစူး ၂:၁-၃) အဝဲသ့ၣ်မၤဝဲဒ်န့ၣ်အဃိ မ့ၢ်အဒိးန့ၢ်ဘၣ်ဝဲအဘျုးဧါ. လံာ်စီဆှံတဲဝဲလၢ ပှၤဟီၣ်ခိၣ်ဖိတဖၣ်လၢ အထီဒါယဟိဝၤယွၤန့ၣ် မ့ၢ်ပှၤလၢအ “တၢ်ကူၣ်သ့ . . . တအိၣ်ဘၣ်.”—ကတိၤဒိ ၂၁:၃၀.
၅. ယဟိဝၤယွၤနာ်န့ၢ် ပှၤဟီၣ်ခိၣ်ဖိတဖၣ်ဒ်လဲၣ် ဒီးအတၢ်နာ်န့ၣ် မ့ၢ်အဘၣ်စ့ၢ်ကီးဧါ.
၅ ယဟိဝၤယွၤနာ်ဝဲလၢ ပှၤဟီၣ်ခိၣ်ဖိတဖၣ် ပၣ်ဃုာ်ဒီးပှၤသးစၢ်အါဂၤန့ၣ် ကအဲၣ်ဒိးသ့ၣ်ညါအီၤဒီး မၤအတၢ်မၤလီၤ. (စံးထီၣ်ပတြၢၤ ၁၀၃:၁၇, ၁၈; ၁၁၀:၃) ယဟိဝၤယွၤ ပာ်လုၢ်ပာ်ပှ့ၤဝဲ ပှၤသးစၢ်တဖၣ်အံၤဒိၣ်မးလီၤ. မ့ၢ်နပၣ်ဃုာ်လၢ အဝဲသ့ၣ် အကျါဧါ. မ့မ့ၢ်ဒ်န့ၣ်န့ၣ် နကဒိးန့ၢ်ဘၣ် တၢ်ဂ့ၤလၢအဟဲလၢ ယဟိဝၤယွၤအအိၣ်အါမးဒီး နကအိၣ်ဒီးတၢ်သူၣ်ခုသးခု လၢနတၢ်အိၣ်မူအပူၤလီၤ. (ဖး ကတိၤဒိ ၃:၆ တက့ၢ်; ကတိၤဒိ ၁၀:၂၂) လၢကစၢ်ယွၤ အတၢ်ဟ့ၣ်တဖၣ်အကျါ ပကတဲသကိး တၢ်ဟ့ၣ်လွံၢ်ခါလၢအမ့ၢ် နီၢ်သးအတၢ်အီၣ်တၢ်အီ, တံၤသကိးလၢအဂ့ၤ, ဖီတၢၣ်လၢအပှဲၤဒီး အခီပညီ ဒီးတၢ်သဘျ့နီၢ်နီၢ်အဂ့ၢ်လီၤ.
ယဟိဝၤယွၤဟ့ၣ်ပှၤ နီၢ်သးအတၢ်အီၣ်တၢ်အီ
၆. ဘၣ်မနုၤအဃိ ပကြၢးမၤလၢပှဲၤ ပနီၢ်သးအတၢ်လိၣ်ဘၣ်လဲၣ်, ဒ်သိးပမၤဒ်န့ၣ်ကသ့အဂီၢ် ယဟိဝၤယွၤ မၤစၢၤပှၤဒ်လဲၣ်.
၆ ဆၣ်ဖိကီၢ်ဖိတဖၣ်န့ၣ် အနီၢ်သးအတၢ်လိၣ်ဘၣ် တအိၣ်ဘၣ်. မ့ၢ်လၢအဝဲသ့ၣ်တဖၣ်န့ၣ် တတူၢ်ဘၣ်ဝဲလၢ အကဘၣ်သ့ၣ်ညါ အတၢ်ဘၣ်တ့ကစၢ်အဃိလီၤ. မ့မ့ၢ်ပဝဲ န့ၣ်ပတမ့ၢ်ဒ်န့ၣ်ဘၣ်. (မးသဲ ၄:၄) ဖဲပဒိကနၣ် ကစၢ်ယွၤအကလုၢ်အခါ ပဒိးန့ၢ်ဘၣ် တၢ်သ့ၣ်ညါနၢ်ပၢၢ်, တၢ်ကူၣ်သ့ ဒီးတၢ်သးခုလီၤ. ယ့ၣ်ၡူးတဲဝဲလၢ “ပှၤလၢသ့ၣ်ညါလီၤအသးလၢ အလိၣ်ဘၣ်ကစၢ်ယွၤ အတၢ်ဟံးစုနဲၣ်ကျဲန့ၣ် သးခုဝဲလီၤ.” (မးသဲ ၅:၃, NWT) ယဟိဝၤယွၤဟ့ၣ်ပှၤ လံာ်စီဆှံဒီး အဝဲသူဝဲ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” ဒ်သိးကထုးထီၣ်န့ၢ်ပှၤလံာ်လဲၢ်တဖၣ် လၢကမၤဂၢၢ်ကျၢၤထီၣ် ပတၢ်နာ်န့ၣ်လီၤ. (မးသဲ ၂၄:၄၅) ဒီးလံာ်လဲၢ်တဖၣ်အံၤ မၤဆူၣ်ထီၣ်ပတၢ်နာ်ဒီး မၤစၢၤပှၤဒ်သိး ပတၢ်ရ့လိာ်သးဒီးယဟိဝၤယွၤ ကဂၢၢ်ကျၢၤထီၣ်အဃိ ပကိးအီၤလၢ နီၢ်သးအတၢ်အီၣ်တၢ်အီလီၤ. ပဒိးန့ၢ်ဘၣ်နီၢ်သးအတၢ်အီၣ်တၢ်အီ အကလုာ်ကလုာ်လီၤ.—ယၡါယၤ ၆၅:၁၃, ၁၄.
၇. နီၢ်သးအတၢ်အီၣ်တၢ်အီလၢ အဟဲလၢကစၢ်ယွၤအအိၣ်န့ၣ် ကမၤစၢၤနၤဒ်လဲၣ်.
၇ နီၢ်သးအတၢ်အီၣ်တၢ်အီတဖၣ်န့ၣ် ဟ့ၣ်ပှၤတၢ်ကူၣ်သ့ ဒီးမၤစၢၤပှၤဒ်သိး ပပဲာ်ထံနီၤဖးတၢ်ကသ့အဂီၢ်အဃိ ဒီသဒၢပှၤသ့လၢ ကျဲအါဘိလီၤ. (ဖး ကတိၤဒိ ၂:၁၀-၁၄ တက့ၢ်.) အဒိ တၢ်ကူၣ်သ့ဒီး တၢ်သ့ပဲာ်ထံနီၤဖးတၢ်န့ၣ် ကမၤစၢၤပှၤဒ်သိး ပကသ့ၣ်ညါ တၢ်လံၣ်တၢ်လီတဖၣ်လၢအမ့ၢ် တၢ်ဘၣ်တ့ကစၢ်တအိၣ်ဘၣ် မ့တမ့ၢ် ကျိၣ်စ့ဒီးတၢ်စုလီၢ်ခီၣ်ခိၣ်တဖၣ်န့ၣ် ကမၤသးခုပှၤန့ၣ်လီၤ. ဒီးကမၤစၢၤစ့ၢ်ကီးပှၤလၢ ပကဟးဆှဲး တၢ်သူၣ်လီသးကွံ မ့တမ့ၢ် လုၢ်လၢ်တဖၣ်လၢ အကမၤဘၣ်ဒိပှၤလီၤ. လၢတၢ်န့ၣ်အဃိ တသ့ဖဲအသ့ ဂုာ်ကျဲးစၢးဒ်သိး နကအိၣ်ဒီးတၢ်ကူၣ်သ့ ဒီးပဲာ်ထံနီၤဖးတၢ်ကသ့အဂီၢ်န့ၣ်တက့ၢ်. နမ့ၢ်မၤဒ်န့ၣ်န့ၣ် နကထံၣ်ဘၣ်လၢ ယဟိဝၤယွၤအဲၣ်နၤဒီး အဲၣ်ဒိးဟ့ၣ်နၤ တၢ်လၢအဂ့ၤကတၢၢ်လီၤ.—စံးထီၣ်ပတြၢၤ ၃၄:၈; ယၡါယၤ ၄၈:၁၇, ၁၈.
၈. ဘၣ်မနုၤအဃိ ဆၢကတီၢ်ခဲအံၤန့ၣ် ပကြၢးသုးဘူးပသးဆူ ယဟိဝၤယွၤအအိၣ်လဲၣ် ဒီးပမ့ၢ်မၤဒ်န့ၣ်န့ၣ် ကမၤစၢၤပှၤလၢ ခါဆူညါဒ်လဲၣ်.
၈ တယံာ်လၢၤဘၣ် မုၣ်ကီၤလံၢ်အဟီၣ်ခိၣ်အံၤ ကဘၣ်တၢ်မၤဟးဂီၤကွံာ်အီၤ ခဲလၢာ်လီၤ. ထဲဒၣ်ယဟိဝၤယွၤတဂၤဧိၤန့ၣ် ဒီသဒၢပှၤသ့ ဒီးဟ့ၣ်ပှၤတၢ်လၢ ပလိၣ်ဘၣ်အီၤတဖၣ် သ့ဝဲန့ၣ်လီၤ. ဘၣ်သ့ၣ်သ့ၣ် တၢ်ဆၢကတီၢ်ကဟဲတုၤဝဲလၢ ပကအီၣ်ဘၣ် မ့ၤတဘျီအဂီၢ် ပကဘၣ်ဒိးသန့ၤပသးလၢ ယဟိဝၤယွၤအအိၣ်လီၤ. (ဃဘးကူာ် ၃:၂, ၁၂-၁၉) ဆၢကတီၢ်ခဲအံၤ မ့ၢ်တၢ်ဆၢကတီၢ်လၢ ပကဘၣ်သုးဘူးပသးဆူ ကစၢ်ယွၤအအိၣ်ဒီး မၤဂၢၢ်ကျၢၤထီၣ်ပတၢ်နာ် လၢအဖီခိၣ်လီၤ. (၂ ပ့းတရူး ၂:၉) နမ့ၢ်မၤဒ်န့ၣ်န့ၣ် တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ နကတူၢ်ဘၣ်ဒ် စီၤဒၤဝံးလၢအတဲဝဲ “ယပာ်လီၤယွၤလၢ ယမဲာ်ညါတထံၣ်ဃီလီၤ. မ့ၢ်အအိၣ်လၢယစုထွဲဒီး, ယတဟူးတဝးဘၣ်.”—စံးထီၣ်ပတြၢၤ ၁၆:၈.
ယဟိဝၤယွၤဟ့ၣ်နၤ တံၤသကိးလၢ အဂ့ၤကတၢၢ်တဖၣ်
၉. (က) ဒ် ယိၤဟၣ် ၆:၄၄ ပာ်ဖျါထီၣ်ဝဲအသိး ယဟိဝၤယွၤမၤဝဲ တၢ်မနုၤလဲၣ်. (ခ) ဖဲပထံၣ်လိာ်သးဒီး ယဟိဝၤပှၤအုၣ်အသးအဂၤတဖၣ်အခါ လီၤဆီလိာ်အသးဒီး ပထံၣ်လိာ်သးဒီး ပှၤဂၤဒ်လဲၣ်.
၉ ဖဲနထံၣ်လိာ်သးဒီးပှၤတဂၤဂၤလၢ အတအိၣ်လၢတၢ်မ့ၢ်တၢ်တီအပူၤ အဆိကတၢၢ်တဘျီအခါ မ့ၢ်နသ့ၣ်ညါအဂ့ၢ်ထဲလဲၣ်. ဘၣ်သ့ၣ်သ့ၣ် နကသ့ၣ်ညါအမံၤ ဒီးအနီၢ်ခိက့ၢ်ဂီၤမၤသးဒ်လဲၣ်န့ၣ်လီၤ. ဒီးဘၣ်သ့ၣ်သ့ၣ် နတသ့ၣ်ညါအဂ့ၢ်လၢအဂၤတဖၣ် အါအါဘၣ်. ဘၣ်ဆၣ် ဖဲနထံၣ်လိာ်သးဒီး ပှၤတဂၤဂၤလၢ အအိၣ်လၢတၢ်မ့ၢ်တၢ်တီအပူၤ အဆိကတၢၢ်တဘျီအခါန့ၣ် လီၤဆီလိာ်အသးဒိၣ်မးလီၤ. နသ့ၣ်ညါလၢ အဝဲအဲၣ်ယဟိဝၤယွၤလီၤ. ဒီးနသ့ၣ်ညါလၢ ယဟိဝၤယွၤထံၣ် အဝဲအတၢ်ဂ့ၤတၢ်ဝါတမံၤမံၤ ဒီးကွဲမုာ်အီၤလၢ ကပၣ်ဃုာ်လၢ အဟံၣ်ဖိဃီဖိလၢ အဘူၣ်ထီၣ်ဘါထီၣ်အီၤအကျါလီၤ. (ဖး ယိၤဟၣ် ၆:၄၄ တက့ၢ်.) အဝဲမ့ၢ်ဟဲလၢ တၢ်လီၢ်ဖဲလဲၣ်ဂ့ၤဖဲလဲၣ်ဂ့ၤ မ့တမ့ၢ် မ့ၢ်ဒိၣ်ထီၣ်ဒ်လဲၣ်ဂ့ၤဒ်လဲၣ်ဂ့ၤ နသ့ၣ်ညါပာ်စၢၤအဂ့ၢ်အါမး ဒီးအဝဲသ့ၣ်ညါ နဂ့ၢ်အါမးစ့ၢ်ကီးလီၤ.
ယဟိဝၤယွၤအဲၣ်ဒိးလၢ နကအိၣ်ဒီး တံၤသကိးလၢအဂ့ၤ ဒီးပာ်လီၤဖီတၢၣ်လၢ အပှဲၤဒီးအခီပညီ (ကွၢ်လံာ်အဆၢ ၉-၁၂)
၁၀, ၁၁. ယဟိဝၤယွၤအခ့အပှၤတဖၣ်န့ၣ် လီၤဂာ်လိာ်အသးလၢ ကျဲဒ်လဲၣ် ဒီးကဲဘျုးလၢ ပဂီၢ်ဒ်လဲၣ်.
၁၀ တကးဒံးဘၣ် ဖဲပထံၣ်လိာ်သးဒီး ယဟိဝၤပှၤအုၣ်အသးလၢ အဂၤတဂၤအခါ ပသ့ၣ်ညါပာ်စၢၤတၢ်ဂ့ၢ်လၢ အရ့ဒိၣ်တမံၤဒံးလီၤ. ပကတိၤကျိာ် မ့ၢ်လီၤဆီဒီးအဝဲသ့ၣ်သနာ်က့ ပသ့ၣ်ညါလၢ ပဝဲခဲလၢာ်ပကတိၤ “ကျိာ်စီ” လၢအမ့ၢ် တၢ်မ့ၢ်တၢ်တီလီၤ. (စဖါနယၤ ၃:၉) ပကတိၤကျိာ်စီန့ၣ် အဲၣ်ဒိးတဲဝဲ ပနာ်ကစၢ်ယွၤ, ပအိၣ်မူဒ် ယွၤအတၢ်သိၣ်တၢ်သီအသိး ဒီးပအိၣ်ဒီးတၢ်မုၢ်လၢ်တမံၤဃီလီၤ. တၢ်သ့ၣ်တဖၣ်အံၤ မၤစၢၤပှၤဒ်သိး ပကနာ်န့ၢ်လိာ်ပသးတဂၤဒီးတဂၤ ဒီးမၤဂၢၢ်ကျၢၤထီၣ်ပတၢ်ရ့လိာ်သး ဒ်သိးအသုတဟးဂီၤ နီတဘျီတဂ့ၤအဂီၢ်လီၤ.
၁၁ နမ့ၢ်ဘူၣ်ထီၣ်ဘါထီၣ် ယဟိဝၤယွၤန့ၣ် နကအိၣ်ဒီး တံၤသကိးလၢအဂ့ၤတဖၣ်လီၤ. နအိၣ်ဒီးတံၤသကိးလၢ ဟီၣ်ခိၣ်ဒီဘ့ၣ်လီၤ. နမ့ၢ်တထံၣ်လိာ်သးဒီး အဝဲသ့ၣ်နီတဘျီသနာ်က့ နကဲထီၣ်ဘၣ်အဝဲသ့ၣ်အတံၤသကိးလီၤ. ပှၤအဂၤလၢ အဒိးန့ၢ်ဘၣ်တၢ်ဆိၣ်ဂ့ၤလၢ အလုၢ်ဒိၣ်ပှ့ၤဒိၣ် ဒ်ယဟိဝၤယွၤ အခ့အပှၤတဖၣ်အသိးန့ၣ် မ့ၢ်အအိၣ်တဂၤဂၤဧါ.
ယဟိဝၤယွၤ မၤစၢၤနၤဒ်သိး နကပာ်လီၤဖီတၢၣ်လၢ ပှဲၤဒီးအခီပညီ
၁၂. နပာ်လီၤ နီၢ်သးအဖီတၢၣ်မနုၤတဖၣ်သ့လဲၣ်.
၁၂ ဖး စံၣ်တဲၤတဲလီၤတၢ် ၁၁:၉–၁၂:၁ တက့ၢ်. မ့ၢ်နအိၣ်ဒီးဖီတၢၣ် တမံၤမံၤဧါ. ဘၣ်သ့ၣ်သ့ၣ် နကပာ်လီၤဖီတၢၣ်လၢ နကဖးလံာ်စီဆှံကိးနံၤဒဲး မ့တမ့ၢ် နကပၣ်ဃုာ်လၢ တၢ်အိၣ်ဖှိၣ်အတၢ်ရဲၣ်တၢ်ကျဲၤအပူၤ မ့တမ့ၢ် နကမၤဂ့ၤထီၣ်နတၢ်စံးဆၢတဖၣ်လီၤ. ဒီးဘၣ်သ့ၣ်သ့ၣ် နကဂုာ်ကျဲးစၢး ဒ်သိးနသူလံာ်စီဆှံလၢ နတၢ်စံၣ်တဲၤတဲလီၤတၢ်မၤအပူၤ ကသ့ဂ့ၤဂ့ၤအဂီၢ်လီၤ. ဒီးဖဲနသ့ၣ်ညါလီၤနသးလၢ နလဲၤထီၣ်လဲၤထီ မ့တမ့ၢ် ပှၤဂၤတဲနၤလၢ နလဲၤထီၣ်လဲၤထီအခါ ဘၣ်သ့ၣ်သ့ၣ် နကသးခုဒိၣ်မးလီၤ. မ့ၢ်လၢနမၤတၢ်လၢ အဘၣ်ကစၢ်ယွၤအသး ဒ်ယ့ၣ်ၡူးမၤဝဲအသိးအဃိ နကြၢးသးခုလီၤ.—စံးထီၣ်ပတြၢၤ ၄၀:၈; ကတိၤဒိ ၂၇:၁၁.
၁၃. ဘၣ်မနုၤအဃိ တၢ်မၤယဟိဝၤယွၤအတၢ်မၤန့ၣ် ဂ့ၤဒိၣ်န့ၢ်ဒံး တၢ်သးစၢၢ်ဆၢ ဖီတၢၣ်လၢဘၣ်ဃးဒီး ဟီၣ်ခိၣ်တကပၤန့ၣ်လဲၣ်.
၁၃ နမ့ၢ်သးစၢၢ်ဆၢ တၢ်မၤယဟိဝၤယွၤအတၢ်မၤန့ၣ် မ့ၢ်ဒၣ်နမၤတၢ်လၢ အကမၤသးခုနၤဒီး နတၢ်အိၣ်မူကပှဲၤဒီး အခီပညီလီၤ. တၢ်မၢဖိပီလူး ဟ့ၣ်ကူၣ်ဝဲလၢ “မ့ၢ်သုသ့ၣ်ညါလၢ သုမၤတၢ်လၢ ကစၢ်အပူၤန့ၣ်, တမ့ၢ်ဘၣ်တၢ်ကလီကလီဘၣ်သတးဒီး, မ်သုအိၣ်စံာ်အိၣ်ကျၢၤ, အိၣ်ဂၢၢ်အိၣ်ခၢၣ်, ဒီးမၤတၢ်အါအါဂီၢ်ဂီၢ်လၢကစၢ်အတၢ်မၤ, တထံၣ်ဃီတက့ၢ်.” (၁ ကရံၣ်သူး ၁၅:၅၈) ပှၤဟီၣ်ခိၣ်ဖိတဖၣ် သးစၢၢ်ဆၢဝဲဖီတၢၣ်လၢအမ့ၢ် တၢ်ဃုကျိၣ်ဃုစ့ မ့တမ့ၢ် တၢ်မံၤဟူသၣ်ဖျါတဖၣ်ဘၣ်ဆၣ် အဝဲသ့ၣ် တအိၣ်ဒီးတၢ်သးခု အနီၢ်ကီၢ်ဘၣ်. အဝဲသ့ၣ် မၤတၢ်မ့ၢ်ကဲထီၣ်လိၣ်ထီၣ်သနာ်က့ လၢခံကတၢၢ်န့ၣ် အဝဲသ့ၣ်တူၢ်ဘၣ်ဝဲလၢ အမ့ၢ်တၢ်ကလီကလီလီၤ. (လူၤကၣ် ၉:၂၅) ပမ့ၢ်ကွၢ် စီၤပၤၡလိၤမိၤအဒိအတဲာ်န့ၣ် ပသ့ၣ်ညါဘၣ် တၢ်ဂ့ၢ်အံၤလီၤ.—ရိမ့ၤ ၁၅:၄.
၁၄. နန့ၢ်ဘၣ် တၢ်မၤလိမနုၤလၢ စီၤၡလိၤမိၤအအိၣ်လဲၣ်.
၁၄ စီၤၡလိၤမိၤလၢအမ့ၢ် ပှၤလၢအကဲဒိၣ်, ပှၤလၢအစိအကမီၤဒိၣ်န့ၣ် တဲလီၤအသးလၢ “ဟဲယကမၤကွၢ်နၤလၢ တၢ်နံၤတၢ်အ့လီၤ. မၤသးဒ်န့ၣ်ဒီး, မုာ်လၤတၢ်လၢတၢ်ဂ့ၤတက့ၢ်.” အဝဲတဲဝဲဝံၤ မၤကွၢ်ဝဲဒ်န့ၣ်အသိးလီၤ. (စံၣ်တဲၤတဲလီၤတၢ် ၂:၁-၁၀) စီၤၡလိၤမိၤ တ့ထီၣ်ဝဲ ဟံၣ်လၢအလီၤဘီလီၤမုၢ်, ဖီကရၢၢ်ဒီးတၢ်ဟးကသုၣ်ကသီအလီၢ် လၢအဃံအလၤ ဒီးမၤတၢ်ခဲလၢာ်လၢ အအဲၣ်ဒိးမၤဝဲလီၤ. မ့ၢ်အဝဲတူၢ်ဘၣ် တၢ်သူၣ်ခုသးခုဒီး တၢ်သူၣ်မံသးမုာ်ဧါ. ဖဲစီၤၡလိၤမိၤ ဆိကမိၣ်ထီၣ်က့ၤဝဲ တၢ်လၢအမၤတ့ၢ်ဝဲတဖၣ်အခါ အဝဲတဲဝဲလၢ “ကယဲၢ်တၢ်ခဲလၢာ်မ့ၢ်တၢ်ကလီကလီ, . . . ဒီးတၢ်ဘျုးတၢ်ဖှိၣ်တအိၣ်ဘၣ်.” (စံၣ်တဲၤတဲလီၤတၢ် ၂:၁၁) မ့ၢ်နကဟံးန့ၢ်တၢ်မၤလိလၢ စီၤၡလိၤမိၤအအိၣ်ဧါ.
ပမ့ၢ်ဒိကနၣ် ယဟိဝၤယွၤအကလုၢ်န့ၣ် ဂ့ၤလၢပဂီၢ် ဒီးကဟ့ၣ်ပှၤတၢ်သဘျ့ အနီၢ်ကီၢ်လီၤ
၁၅. ဒ်ပမၤလိဘၣ်လၢ စံးထီၣ်ပတြၢၤ ၃၂:၈ အသိး ဘၣ်မနုၤအဃိ ပလိၣ်ဘၣ်တၢ်နာ်လဲၣ်, ဒီးပတၢ်နာ် ကမၤစၢၤပှၤဒ်လဲၣ်.
၁၅ ပှၤတနီၤနီၤန့ၣ် မၤကမၣ်တၢ် ဒီးတူၢ်ဘၣ်တၢ်သူၣ်အုးသးအုးဝံၤမး ဟံးန့ၢ်တၢ်မၤလိလီၤ. ယဟိဝၤယွၤတအဲၣ်ဒိးလၢ နမၤဒ်န့ၣ်ဘၣ်. အဝဲအဲၣ်ဒိးလၢ နကဒိကနၣ်အကလုၢ်လီၤ. နကမၤဒ်န့ၣ်အဂီၢ် နကလိၣ်ဘၣ်တၢ်နာ်လီၤ. ဒီးတၢ်ဃုထၢလၢ နမၤအီၤ ခီဖျိလၢနတၢ်နာ်အဃိန့ၣ် တမၤသးအုးနၤ နီတဘျီဘၣ်. ဒီးယဟိဝၤယွၤတသးပ့ၤနီၣ် ‘နတၢ်အဲၣ်တၢ်ကွံလၢနအဲၣ်အမံၤ’ နီတဘျီဘၣ်. (ဧ့ၤဘြံၤ ၆:၁၀) လၢတၢ်န့ၣ်အဃိ ဂုာ်ကျဲးစၢးမၤဂၢၢ်ကျၢၤထီၣ် နတၢ်နာ်န့ၣ်တက့ၢ်. နမ့ၢ်မၤဒ်န့ၣ်န့ၣ် လၢနတၢ်အိၣ်မူအပူၤ နဆၢတဲာ်တၢ်လၢအဘၣ်ကသ့ ဒီးနကထံၣ်ဘၣ်လၢ နပၢ်အိၣ်လၢမူခိၣ် အဲၣ်ဒိးလၢနဒိးန့ၢ်ဘၣ် တၢ်လၢအဂ့ၤကတၢၢ်လၢနဂီၢ်လီၤ.—ဖး စံးထီၣ်ပတြၢၤ ၃၂:၈ တက့ၢ်.
ကစၢ်ယွၤဟ့ၣ်နၤ တၢ်သဘျ့နီၢ်ကီၢ်
၁၆. ဘၣ်မနုၤအဃိ ပကြၢးပာ်လုၢ်ပာ်ပှ့ၤ တၢ်သဘျ့ဒီး သူအီၤလၢတၢ်ကူၣ်သ့အပူၤလဲၣ်.
၁၆ စီၤပီလူးကွဲးဝဲလၢ “ဖဲယွၤအသးစီဆှံ အိၣ်ဝဲအလီၢ်န့ၣ် တၢ်သဘျ့အိၣ်ဝဲလီၤ.” (၂ ကရံၣ်သူး ၃:၁၇, ခ့ခါစှီၤကျိာ်) ယဟိဝၤယွၤ ပာ်လုၢ်ပာ်ပှ့ၤဝဲ တၢ်သဘျ့ဒီး အဝဲတ့လီၤပှၤဒ်သိး ပကအဲၣ်ဒိးအိၣ်ဒီးတၢ်သဘျ့အဂီၢ်လီၤ. ဘၣ်ဆၣ် အဝဲအဲၣ်ဒိးလၢ ပကသူပတၢ်သဘျ့လၢ တၢ်ကူၣ်သ့အပူၤဒ်သိး ကဒီသဒၢပှၤအဂီၢ်လီၤ. ဘၣ်သ့ၣ်သ့ၣ် နတံၤသကိးတနီၤ ကကွၢ်ဝဲတၢ်ဂီၤဘ့ၣ်ဆ့, မၤကမၣ်မုၣ်ကမၣ်ခွါ, ဂဲၤလိာ်ကွဲ တၢ်လိာ်ကွဲလၢ အကဲထီၣ်တၢ်လီၤဘၣ်ယိၣ်လၢ အသးသမူအဂီၢ်, သူကသံၣ်မူၤဘှီး မ့တမ့ၢ် အီလုၣ်ကိသံးလီၤ. လၢအခီၣ်ထံးန့ၣ် ပှၤအါဂၤလၢအမၤဝဲ တၢ်သ့ၣ်တဖၣ်အံၤန့ၣ် ဖျါလၢအသးခု ဘၣ်ဆၣ်လၢခံ အဝဲသ့ၣ်တူၢ်ဘၣ် တၢ်ပိာ်ထွဲလၢ အအၢလီၤ. အဝဲသ့ၣ်တူၢ်ဘၣ် တၢ်ဆူးတၢ်ဆါ, စွဲကသံၣ်မူၤဘှီး ဒီးတနီၤန့ၣ် တုၤဒၣ်လဲာ်ဘၣ်သံဝဲလီၤ. (ကလၤတံ ၆:၇, ၈) ပှၤသးစၢ်လၢ အမၤဝဲတၢ်သ့ၣ်တဖၣ်အံၤန့ၣ် ကတူၢ်ဘၣ်ဝဲလၢ အအိၣ်ဒီးတၢ်သဘျ့ ဘၣ်ဆၣ် နီၢ်ကီၢ်န့ၣ်အဝဲသ့ၣ် တအိၣ်ဒီးတၢ်သဘျ့ဘၣ်.—တံတူး ၃:၃.
၁၇, ၁၈. (က) တၢ်ဒိကနၣ် ကစၢ်ယွၤအကလုၢ်န့ၣ် ကဟ့ၣ်ပှၤ တၢ်သဘျ့နီၢ်ကီၢ်ဒ်လဲၣ်. (ခ) နီၢ်အံၣ်အုဒီးစီၤအၤဒၣ်န့ၣ် အိၣ်ဒီးတၢ်သဘျ့အါန့ၢ်ဒံး ပှၤဟီၣ်ခိၣ်ဖိလၢ မုၢ်မဆါတနံၤအံၤတဖၣ်ဒ်လဲၣ်.
၁၇ ပမ့ၢ်ဒိကနၣ် ယဟိဝၤယွၤအကလုၢ်န့ၣ် ဂ့ၤလၢပဂီၢ်လီၤ. ဂ့ၤလၢပတၢ်အိၣ်ဆူၣ်အိၣ်ချ့အဂီၢ် ဒီးဟ့ၣ်ပှၤတၢ်သဘျ့ အနီၢ်ကီၢ်လီၤ. (စံးထီၣ်ပတြၢၤ ၁၉:၇-၁၁) ဖဲပဃုထၢလၢပကဒိကနၣ်ကစၢ်ယွၤ အတၢ်သိၣ်တၢ်သီဒီး အတၢ်ဟံးစုနဲၣ်ကျဲအခါ မ့ၢ်ဝဲပသူပတၢ်သဘျ့လၢ တၢ်ကူၣ်သ့အပူၤလီၤ. နမ့ၢ်မၤဒ်န့ၣ်န့ၣ် မ့ၢ်ဒၣ်နပာ်ဖျါထီၣ်လၢ နမ့ၢ်ပှၤတဂၤလၢ ကစၢ်ယွၤဒီးနမိၢ်နပၢ်နာ်အီၤသ့လီၤ. အဃိ ဘၣ်သ့ၣ်သ့ၣ် နမိၢ်နပၢ်အတၢ်နာ်န့ၢ်နၤ ကအါထီၣ်ဒီးကဟ့ၣ်အါထီၣ်နၤ တၢ်သဘျ့လီၤ. ဒီးယဟိဝၤယွၤစ့ၢ်ကီး အၢၣ်လီၤအီလီၤဝဲလၢ တယံာ်လၢၤဘၣ်န့ၣ် အဝဲကဟ့ၣ်ဝဲပှၤလၢအတီဒီးအီၤတဖၣ်လၢ တၢ်သဘျ့နီၢ်ကီၢ်လီၤ. တၢ်သဘျ့အံၤ လံာ်စီဆှံကိးဝဲလၢ “ကစၢ်ယွၤအဖိတဖၣ် အတၢ်သဘျ့ လၢအလၢအပှဲၤဒီးတၢ်လၤကပီၤ” န့ၣ်လီၤ.—ရိမ့ၤ ၈:၂၁, ခ့ခါစှီၤကျိာ်.
၁၈ နီၢ်အံၣ်အုဒီးစီၤအၤဒၣ် ဒိးန့ၢ်ဘၣ်ဝဲ တၢ်သဘျ့အံၤလီၤ. လၢဧ့ၤဒ့ၣ်တၤသၣ်လီၢ်အပူၤ တၢ်လၢယဟိဝၤယွၤတမၢဝဲ နီၢ်အံၣ်အုဒီးစီၤအၤဒၣ်မၤဝဲန့ၣ် အိၣ်ထဲတမံၤဧိၤလီၤ. အဝဲသ့ၣ် တဘၣ်အီၣ်ဝဲ ထဲဒၣ်သ့ၣ်တထူၣ်ဧိၤအသၣ်လီၤ. (၁ မိၤၡ့ ၂:၉, ၁၇) မ့ၢ်နဆိကမိၣ်လၢ ကစၢ်ယွၤဟ့ၣ်အဝဲသ့ၣ် တၢ်သိၣ်တၢ်သီအံၤန့ၣ် အဃံးတလၢဧါ မ့တမ့ၢ် ကစၢ်ယွၤမၤတၢ် တတီတလိၤဘၣ်ဧါ. ပတဆိကမိၣ်ဒ်န့ၣ်ဘၣ်. ပမ့ၢ်ဆိကမိၣ်ကွၢ်န့ၣ် ပှၤဟီၣ်ခိၣ်ဖိတဖၣ် ထုးထီၣ်ဝဲ တၢ်သိၣ်တၢ်သီအါမး ဒီးမၢဆူၣ်ပှၤလၢ ပကဒိကနၣ်တၢ်သိၣ်တၢ်သီတဖၣ်အံၤလီၤ. မ့မ့ၢ် ယဟိဝၤယွၤန့ၣ် ဟ့ၣ်လီၤဝဲနီၢ်အံၣ်အုဒီးစီၤအၤဒၣ်လၢ တၢ်သိၣ်တၢ်သီ ထဲတထံၣ်ဧိၤလီၤ.
၁၉. ဒ်သိးပကဒိးန့ၢ်ဘၣ် တၢ်သဘျ့အဂီၢ် ယဟိဝၤယွၤဒီး ယ့ၣ်ၡူးသိၣ်လိပှၤ တၢ်မနုၤလဲၣ်.
၁၉ ကျဲလၢယဟိဝၤယွၤ ရ့ဒီးပှၤန့ၣ် ပှဲၤဒီးတၢ်ကူၣ်သ့လီၤ. လၢအဝဲကဟ့ၣ်လီၤပှၤ တၢ်သိၣ်တၢ်သီအါမးအလီၢ် လၢတၢ်သူၣ်စူၤသးစူၤအပူၤ အဝဲသိၣ်လိပှၤလၢ ပကမၤပိာ်ထွဲ တၢ်သိၣ်တၢ်သီလၢအမ့ၢ် တၢ်အဲၣ်တၢ်ကွံလီၤ. အဝဲသိၣ်လိပှၤလၢ ပကအိၣ်မူဒ် အတၢ်ဟံးစုနဲၣ်ကျဲ ဒီးသးဟ့တၢ်အၢအဂီၢ်လီၤ. (ရိမ့ၤ ၁၂:၉) ယဟိဝၤယွၤအဖိခွါ ယ့ၣ်ၡူးန့ၣ် ဖဲအစံၣ်တဲၤတဲလီၤတၢ်လၢ တၢ်လူၢ်ခိၣ်အခါ အဝဲသိၣ်လိပှၤ ဒ်သိးပကနၢ်ပၢၢ်ထီၣ်လၢ ဘၣ်မနုၤအဃိ ပှၤဟီၣ်ခိၣ်ဖိတဖၣ် မၤတၢ်အၢလဲၣ်န့ၣ်လီၤ. (မးသဲ ၅:၂၇, ၂၈) လၢဟီၣ်ခိၣ်သီအပူၤန့ၣ် ဒ်ယွၤအဘီအမုၢ်အစီၤပၤအသိး ယ့ၣ်ၡူးကဆဲးသိၣ်လိပှၤလီၤ. ဘၣ်ဃးဒီး တၢ်အဘၣ်ဒီးတၢ်အကမၣ်န့ၣ် ပကအိၣ်ဒီးတၢ်ထံၣ် ဒ်သိးဒီးအီၤအဂီၢ် အဝဲကသိၣ်လိပှၤလီၤ. (ဧ့ၤဘြံၤ ၁:၉) ယ့ၣ်ၡူးကမၤစၢၤပှၤဒ်သိး ပနီၢ်ခိဒီးပတၢ်ဆိကမိၣ်တဖၣ် ကလၢထီၣ်ပှဲၤထီၣ်အဂီၢ်လီၤ. ပတသးအိၣ်မၤ တၢ်ကမၣ်နီတစဲးလၢၤဘၣ်. ပတတူၢ်ဘၣ် တၢ်လၢအဟဲကဲထီၣ်အသးခီဖျိလၢ တၢ်တလၢတပှဲၤအဃိလၢၤဘၣ်. ဒီးလၢခံကတၢၢ်န့ၣ် ပကဒိးန့ၢ်ဘၣ် “တၢ်သဘျ့လၢ အလၢအပှဲၤဒီးတၢ်လၤကပီၤ” လၢယဟိဝၤယွၤ အၢၣ်လီၤအီလီၤပာ်စၢၤဝဲန့ၣ်လီၤ.
၂၀. (က) ယဟိဝၤယွၤသူဝဲ အတၢ်သဘျ့ဒ်လဲၣ်. (ခ) ပကွၢ်လိမၤဒိးအီၤ ကသ့ဒ်လဲၣ်.
၂၀ လၢဟီၣ်ခိၣ်သီအပူၤန့ၣ် ပတအိၣ်ဒီးတၢ်သဘျ့ လၢာ်လၢာ်ဆ့ဆ့ဘၣ်. ဘၣ်မနုၤအဃိလဲၣ်. မ့ၢ်လၢ ဖဲပမၤတၢ်တမံၤဂ့ၤတမံၤဂ့ၤ ပကဘၣ်မၤအီၤခီဖျိလၢ ပအဲၣ်ကစၢ်ယွၤ ဒီးပှၤဂၤအဃိလီၤ. ပမ့ၢ်အိၣ်ဒီးတၢ်အဲၣ်ဒ်အံၤန့ၣ် မ့ၢ်ဒၣ်ပကွၢ်လိမၤဒိး ယဟိဝၤယွၤလီၤ. မ့မ့ၢ်ယဟိဝၤယွၤန့ၣ် အိၣ်ဒီးတၢ်သဘျ့ လၢာ်လၢာ်ဆ့ဆ့ဘၣ်ဆၣ် တၢ်လၢအဝဲမၤဝဲတမံၤလၢ်လၢ်န့ၣ် မၤဝဲလၢ တၢ်အဲၣ်တၢ်ကွံအပူၤလီၤ. ဒီးအဝဲရ့ဒီးပှၤလၢ တၢ်အဲၣ်တၢ်ကွံအပူၤစ့ၢ်ကီးလီၤ. (၁ ယိၤဟၣ် ၄:၇, ၈) လၢတၢ်န့ၣ်အဃိ ပသ့ၣ်ညါဘၣ်လၢ ပဒိးန့ၢ်ဘၣ်တၢ်သဘျ့နီၢ်နီၢ်သ့ ထဲလၢပကွၢ်လိမၤဒိးကစၢ်ယွၤတခါလီၤ.
၂၁. (က) ဘၣ်ဃးဒီး ယဟိဝၤယွၤန့ၣ် စီၤဒၤဝံးတူၢ်ဘၣ်ဝဲဒ်လဲၣ်. (ခ) လၢတၢ်မၤလိ လၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၂၁ မ့ၢ်နစံးဘျုး ယဟိဝၤယွၤ ခီဖျိတၢ်အဂ့ၤခဲလၢာ်လၢ အဟ့ၣ်လီၤနၤအဃိန့ၣ်ဧါ. အဝဲဟ့ၣ်လီၤနၤ နီၢ်သးအတၢ်အီၣ်တၢ်အီ, တံၤသကိးလၢ အဂ့ၤတဖၣ်, ဖီတၢၣ်လၢအပှဲၤဒီး အခီပညီ, တၢ်မုၢ်လၢ်လၢ နကဒိးန့ၢ်ဘၣ် တၢ်သဘျ့နီၢ်ကီၢ် ဒီးတၢ်ဟ့ၣ်အဂ့ၤလၢ အဂၤတဖၣ်လီၤ. ဘၣ်သ့ၣ်သ့ၣ် နကတူၢ်ဘၣ်ဒ် စီၤဒၤဝံးလၢ အဃ့ဘါထုကဖၣ်ဝဲလၢ “နကဘိးဘၣ်သ့ၣ်ညါယၤလၢ တၢ်မူအကျဲလီၤ. တၢ်သူၣ်ခုသးခု လၢထီၣ်ပှဲၤထီၣ်ဝဲလၢ နမဲာ်ညါ, တၢ်အမုာ်အိၣ်လၢ နစုထွဲလီၤထူလီၤယိာ်လီၤ.” (စံးထီၣ်ပတြၢၤ ၁၆:၁၁) လၢတၢ်မၤလိလၢခံတခါန့ၣ် ပကမၤလိတၢ်မ့ၢ်တၢ်တီလၢ အလုၢ်ဒိၣ်ပှ့ၤဒိၣ်လၢ စံးထီၣ်ပတြၢၤ အဆၢဒိၣ် ၁၆ အပူၤလီၤ. တၢ်မၤလိအံၤ ကမၤစၢၤပှၤဒ်သိး ပကသ့ၣ်ညါထီၣ်လၢ ပအိၣ်ဒီး တၢ်အိၣ်မူလၢအဂ့ၤကတၢၢ် ကသ့ဒ်လဲၣ်န့ၣ်လီၤ.
