တၢ်သူၣ်ကညီၤသးကညီၤ—တၢ်ဂ့ၤတၢ်ဝါတခါလၢ ဘၣ်တၢ်ပာ်ဖျါထီၣ်အီၤလၢ တၢ်ကတိၤဒီးတၢ်မၤ
ဖဲပှၤဂၤရ့ဒီးပှၤလၢ တၢ်သူၣ်ကညီၤသးကညီၤ အပူၤအခါ ပသးမုာ်ဒိၣ်မး ဒီးပသ့ၣ်ညါလၢအဝဲသ့ၣ်သးအိၣ်ပှၤလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) လၢတၢ်န့ၣ်အဃိ ပှၤဂၤမ့ၢ်ပာ်ဖျါထီၣ် တၢ်သးကညီၤလၢပဖီခိၣ်န့ၣ် ပစံးဘျုးဘၣ် အဝဲသ့ၣ်ဒိၣ်မးလီၤ. မ့မ့ၢ်ပှၤန့ၣ် ပပာ်ဖျါထီၣ်တၢ်သးကညီၤ ကသ့ဒ်လဲၣ်.
ပှၤလၢအိၣ်ဒီးတၢ်သးကညီၤတဂၤန့ၣ် အဝဲသးအိၣ်ပှၤဂၤနီၢ်ကီၢ် ဒီးအဝဲပာ်ဖျါထီၣ် အတၢ်သးကညီၤ ခီဖျိတၢ်လၢအတဲဝဲ ဒီးမၤဝဲတဖၣ်န့ၣ်လီၤ. တမ့ၢ်ထဲအဝဲအိၣ် ဒီးတၢ်ပာ်ကဲ ယိယိဖိဘၣ်. အဝဲအိၣ်ဒီးတၢ်သးကညီၤန့ၣ် ပာ်ဖျါထီၣ်ဝဲ ခီဖျိရ့ဒီးပှၤဂၤလၢ တၢ်အဲၣ်တၢ်ကွံအပူၤဒီး နၢ်ပၢၢ်ပှၤဂၤ အတၢ်တူၢ်ဘၣ်န့ၣ်လီၤ. တကးဒံးဘၣ် တၢ်သးကညီၤန့ၣ် ပၣ်ဃုာ်လၢ သးအတၤသၣ်အကျါလီၤ. (ကလၤတံ ၅:၂၂, ၂၃) ယဟိဝၤယွၤအဲၣ်ဒိးလၢ ပကအိၣ်ဒီးတၢ်သးကညီၤလီၤ. လၢတၢ်န့ၣ်အဃိ ပကမၤလိသကိး ဘၣ်ဃးဒီး ယဟိဝၤယွၤဒီးအဖိခွါ ပာ်ဖျါထီၣ်တၢ်သးကညီၤဒ်လဲၣ် ဒီးပကွၢ်လိမၤဒိးအဝဲသ့ၣ် ကသ့ဒ်လဲၣ်န့ၣ်လီၤ.
ယဟိဝၤယွၤ ပာ်ဖျါထီၣ်တၢ်သးကညီၤလၢ ပှၤကိးဂၤဒဲးအဖီခိၣ်
ယဟိဝၤယွၤ ပာ်ဖျါထီၣ်တၢ်သးကညီၤလၢ ပှၤကိးဂၤဒဲးအဖီခိၣ် ပၣ်ဃုာ်ဒီး “ပှၤလၢ အတသ့ၣ်ညါ ဘၣ်တၢ်ဘျုးဘၣ်, ဒီးပှၤအအၢအသီတဖၣ်လီၤ.” (လူၤကၣ် ၆:၃၅) အဒိ ယဟိဝၤယွၤ “မၢအမုၢ်ဟဲထီၣ်န့ၢ်ပှၤအဂ့ၤ, ဒီးပှၤအအၢ, ဒီးမၢအတၢ်ဟဲစူၤလၢပှၤအတီ, ဒီးပှၤတတီဘၣ်အလိၤလီၤ.” (မးသဲ ၅:၄၅) ပှၤလၢအတနာ်လၢ ယဟိဝၤယွၤ မ့ၢ်တၢ်ဘၣ်တ့ကစၢ်ဒၣ်လဲာ်န့ၣ် အဝဲသ့ၣ် ဒိးန့ၢ်ဘၣ်တၢ်အဘျုး လၢယဟိဝၤယွၤ အတၢ်သးကညီၤဒီး အိၣ်ဒီးတၢ်သးခုတနီၤလၢ အတၢ်အိၣ်မူအပူၤသ့ဒံးလီၤ.
ယဟိဝၤယွၤမ့ၢ်ဝဲပှၤလၢ အအိၣ်ဒီးတၢ်သးကညီၤလၢ အဒိဂ့ၤတဲာ်ဘၣ်ဒိၣ်မးလီၤ. ပထံၣ်ဘၣ် အတၢ်သးကညီၤဖဲ တၢ်လၢအမၤန့ၢ်ဝဲ နီၢ်အံၣ်အုဒီးစီၤအၤဒၣ်န့ၣ်လီၤ. ဖဲနီၢ်အံၣ်အုဒီးစီၤအၤဒၣ် မၤတၢ်ကမၣ်ဝံၤအလီၢ်ခံန့ၣ် အဝဲသ့ၣ် “ဆးပကိာ်ထီၣ်ချၢၣ်ဒၢအလၣ်, ဒီးမၤယီၢ်တကိးလၢအဂီၢ်လီၤ.” မ့ၢ်လၢဟီၣ်ခိၣ်ဘၣ်ဆိၣ်အၢဒီး ပှဲၤဒီး “တၤဆှုၣ်တၤမဲဒီးနီၣ်ဧိၤမံၤဧိၤ” အဃိ ယဟိဝၤယွၤ သ့ၣ်ညါလၢ လၢဧ့ၤဒ့ၣ်တၤသၣ်လီၢ်အချၢန့ၣ် အဝဲသ့ၣ်ကလိၣ်ဘၣ် တၢ်ကူတၢ်ကၤ ဒ်သိးကကဲထီၣ်တၢ်ဒီသဒၢလၢ အဝဲသ့ၣ်အဂီၢ်လီၤ. အဃိ လၢတၢ်သးကညီၤအပူၤ ယဟိဝၤယွၤမၤန့ၢ် “ဆ့တၢ်ဖံး” လၢအဝဲသ့ၣ်အဂီၢ်န့ၣ်လီၤ.—၁ မိၤၡ့ ၃:၇, ၁၇, ၁၈, ၂၁.
ယဟိဝၤယွၤအိၣ်ဒီး တၢ်သးကညီၤလၢ “ပှၤအဂ့ၤ, ဒီးပှၤအအၢ” အဖီခိၣ် သနာ်က့ အဝဲအိၣ်ဒီးတၢ်သးကညီၤ လီၤဆီဒၣ်တၢ်လၢ အခ့အပှၤလၢ အိၣ်ဒီးတၢ်သးတီတဖၣ် အဖီခိၣ်န့ၣ်လီၤ. အဒိ ဖဲစကၤရယၤ ကဲဝံအဆၢကတီၢ်န့ၣ် ခီဖျိလၢ ပှၤအံၣ်စရ့လးဖိသ့ၣ်တဖၣ် တဆဲးတ့ထီၣ်တၢ်လုၢ်ဟံၣ် လၢဝ့ၢ်ယရူၤၡလ့ၣ်အပူၤလၢၤဘၣ်အဃိ မူခိၣ်ကလူးတဂၤဘၣ်ယိၣ်တၢ်န့ၣ်လီၤ. ယဟိဝၤယွၤ ဒိကနၣ်ဝဲတၢ်လၢ မူခိၣ်ကလူးတဂၤအံၤတဲဝဲ ဒီးစံးဆၢက့ၤအီၤလၢ “တၢ်ကတိၤအဂ့ၤ, ဒီးတၢ်ကတိၤအမုာ်လီၤ.” (စကၤရယၤ ၁:၁၂, ၁၃) ယဟိဝၤယွၤ ရ့ဒီးဝံအ့ၤလံယၤ ဒ်န့ၣ်စ့ၢ်ကီးလီၤ. ဘၣ်တဘျီန့ၣ် ဝံတဂၤအံၤ အသူၣ်ဟးဂီၤသးဟးဂီၤဒီး တူၢ်ဘၣ်တၢ်သယုၢ်သညိအဃိ အဝဲဃ့ယဟိဝၤယွၤလၢ အကသံလီၤ. ယဟိဝၤယွၤပာ်ဖျါထီၣ်ဝဲလၢ အနၢ်ပၢၢ် ဝံအ့ၤလံယၤအတၢ်တူၢ်ဘၣ်ဒီး ဆှၢလီၤဝဲမူခိၣ်ကလူးတဂၤ လၢကဟ့ၣ်ဂံၢ်ဟ့ၣ်ဘါအီၤအဂီၢ်လီၤ. ယဟိဝၤယွၤဒုးနာ်န့ၢ်စ့ၢ်ကီး ဝံအ့ၤလံယၤလၢ အဝဲတအိၣ်ထဲတဂၤဧိၤဘၣ်. ယဟိဝၤယွၤ အတၢ်သးကညီၤ ဟ့ၣ်ဂံၢ်ဟ့ၣ်ဘါ ဝံအ့ၤလံယၤဒ်သိး အဝဲကဆဲးမၤလၢပှဲၤဝဲ အမူဒါအဂီၢ်လီၤ. (၁ စီၤပၤ ၁၉:၁-၁၈) ဘၣ်ဆၣ် လၢယဟိဝၤယွၤ အခ့အပှၤခဲလၢာ်အကျါန့ၣ် မတၤတဂၤ ကွၢ်လိယဟိဝၤယွၤ အတၢ်သးကညီၤ လၢကျဲလၢအဂ့ၤကတၢၢ်လဲၣ်.
ယ့ၣ်ၡူးမ့ၢ်ပှၤလၢ အအိၣ်ဒီးတၢ်သးကညီၤအါမး
ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ပှၤဂၤထံၣ်အီၤလၢ အမ့ၢ်ပှၤလၢအိၣ်ဒီး တၢ်သးကညီၤဒိၣ်မးလီၤ. အဝဲတမၤဒူမၤကိၤအသးဒီး တမၢဆူၣ်ပှၤဂၤလၢ ပှၤကဘၣ်မၤဒ် အတၢ်ဘၣ်သး နီတဘျီဘၣ်. အဝဲသူၣ်အိၣ်သးအိၣ်ပှၤဂၤဒီး တဲဝဲလၢ “ပှၤလၢတၢ်ဘှံးအသး, ဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ, ဟဲဆူယအိၣ်တက့ၢ်. ဒီးယကဒုးအိၣ်ဘှံးသုလီၤ. . . . အဂ့ၢ်ဒ်အံၤ, ယနီၣ်ယိးဘိမ့ၢ်အညီ, ဒီးယတၢ်ဝံတၢ်ယိးမ့ၢ်အဖှံလီၤ.” (မးသဲ ၁၁:၂၈-၃၀) မ့ၢ်လၢအဝဲအိၣ်ဒီးတၢ်သးကညီၤအဃိ ဖဲအဝဲလဲၤတၢ်လီၢ် တပူၤဂ့ၤတပူၤဂ့ၤ ပှၤဟးပိာ်အခံလီၤ. လၢတၢ်သးကညီၤအပူၤ ယ့ၣ်ၡူးဒုးအီၣ်အဝဲသ့ၣ်တၢ်အီၣ်, မၤဘျါက့ၤအဝဲသ့ၣ်, ဒီးသိၣ်လိအဝဲသ့ၣ် တၢ်ဂ့ၢ် “အါမံၤ” လၢအဘၣ်ဃးဒီးအပၢ်န့ၣ်လီၤ.—မၢ်ကူး ၆:၃၄; မးသဲ ၁၄:၁၄; ၁၅:၃၂-၃၈.
ယ့ၣ်ၡူးနၢ်ပၢၢ် ပှၤဂၤအတၢ်တူၢ်ဘၣ်ဒီး ရ့ဒီးပှၤဂၤလၢတၢ်သးကညီၤအပူၤလီၤ. တကးဒံးဘၣ် အဝဲဆိကမိၣ်န့ၢ်တၢ်လၢ ပှၤဂၤအဂီၢ်လီၤ. မ့ၢ်ကီလၢ ယ့ၣ်ၡူးအဂီၢ်ဘၣ်ဆၣ် အဝဲမၤစၢၤပှၤလၢအဟဲလၢ အအိၣ်ကိးဂၤဒဲး လၢတၢ်သးကညီၤအပူၤလီၤ. (လူၤကၣ် ၉:၁၀, ၁၁) ဆိကမိၣ်ကွၢ် တၢ်မၤအသးဒီး ပိာ်မုၣ်လၢ အအိၣ်ဒီးတၢ်ဆါသွံၣ်လီၤ တဂၤန့ၣ်တက့ၢ်. အဝဲအဲၣ်ဒိးဘျါက့ၤအဃိ အဝဲထိးဘၣ်ယ့ၣ်ၡူး အဆ့ကၤလီၤ. ဘၣ်ဆၣ် ဒ်စီၤမိၤၡ့အတၢ်သိၣ်တၢ်သီ အိၣ်ဝဲအသိး မ့ၢ်လၢအဝဲတကဆှီဘၣ်အဃိ အဝဲတကြၢးမၤဒ်န့ၣ်ဘၣ်. (၃ မိၤၡ့ ၁၅:၂၅-၂၈) ဘၣ်ဆၣ် ယ့ၣ်ၡူးမၤဆၢက့ၤဝဲဒ်လဲၣ်. ယ့ၣ်ၡူးတတဲတၢ်ဒီးအီၤလၢ တၢ်သးထီၣ်အပူၤဘၣ်. ယ့ၣ်ၡူးထံၣ် လၢအဝဲပျံၤတၢ် ဒီးမ့ၢ်လၢအဝဲတူၢ်ဘၣ်တၢ်ဆါအံၤ အိၣ်လံ ၁၂ နံၣ်လံအဃိ ယ့ၣ်ၡူးသးကညီၤအီၤန့ၣ်လီၤ. အဃိ ယ့ၣ်ၡူးတဲအီၤလၢ “ဖိမုၣ်ဧၢ, နတၢ်နာ်မၤဘျါက့ၤလံနၤလံ. က့ၤမုာ်မုာ်, ဒီးအိၣ်ဘျါက့ၤလၢနတၢ်ဆါတက့ၢ်.” (မၢ်ကူး ၅:၂၅-၃၄) ယ့ၣ်ၡူးအိၣ်ဒီး တၢ်သးကညီၤနီၢ်ကီၢ်လီၤ.
ပှၤလၢအအိၣ်ဒီးတၢ်သးကညီၤန့ၣ် ကမၤစၢၤပှၤဂၤ
တၢ်အဒိလၢ ပတဲသကိးအီၤခဲအံၤအပူၤန့ၣ် ပကမၤလိန့ၢ်ဘၣ်လၢ ပမ့ၢ်အိၣ်ဒီးတၢ်သးကညီၤန့ၣ် ပကမၤတၢ်တမံၤမံၤ ဒ်သိးကမၤစၢၤပှၤဂၤန့ၣ်လီၤ. ယ့ၣ်ၡူးပာ်ဖျါထီၣ်ဝဲလၢ ပကဘၣ်မၤဒ်န့ၣ်န့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ဘၣ်ဃးဒီး တၢ်ဂ့ၢ်အံၤန့ၣ် ယ့ၣ်ၡူးဟ့ၣ်ဝဲတၢ်အဒိ လၢအမ့ၢ်ပှၤၡၤမရံဖိ လၢအဂ့ၤတဂၤအဂ့ၢ်န့ၣ်လီၤ. ယ့ၣ်ၡူးတဲဝဲလၢ ပှၤယူဒၤဖိတဂၤ ပှၤတမျာ်အီၤ, ဒိအီၤတီၢ်အီၤ ဒီးပှၤပာ်တ့ၢ်အီၤလၢ ကျဲကပၤန့ၣ်လီၤ. ပှၤၡၤမရံဖိ ဒီးပှၤယူဒၤဖိ သးဟ့လိာ်သးတဂၤဒီးတဂၤ သနာ်က့ ဖဲပှၤၡၤမရံဖိတဂၤ လဲၤထံၣ်ဝဲ ပှၤယူဒၤဖိတဂၤအံၤလၢကျဲအခါ အသးကညီၤအီၤလီၤ. ဒီးတၢ်သးကညီၤ ထိၣ်ဟူးထိၣ်ဂဲၤထီၣ်အီၤ လၢကမၤစၢၤဝဲ ပှၤယူဒၤဖိတဂၤအံၤန့ၣ်လီၤ. အဝဲမၤကဆှီ န့ၢ်အီၤအတၢ်ပူၤလီၢ် ဝံၤဒီးလဲၤဆှၢအီၤလၢ ပှၤတမှံၤအဘျီၣ်န့ၣ်လီၤ. ပှၤၡၤမရံဖိတဂၤအံၤ ဟ့ၣ်လီၤဝဲ ပှၤကွၢ်ပှၤတမှံၤအဘျီၣ်တဂၤလၢစ့ ဒ်သိးကကွၢ်ထွဲန့ၢ်အီၤ ပှၤယူဒၤဖိတဂၤအံၤအဂီၢ်န့ၣ်လီၤ. တကးဒံးဘၣ် အဝဲအၢၣ်လီၤဝဲလၢ တၢ်လၢာ်ဘူၣ်လၢာ်စ့ၤ မ့ၢ်လၢာ်အါန့ၢ်အန့ၣ်န့ၣ် အဝဲကဟ့ၣ်က့ၤဝဲလီၤ.—လူၤကၣ် ၁၀:၂၉-၃၇.
တၢ်သးကညီၤ ကထိၣ်ဟူးထိၣ်ဂဲၤထီၣ်ပှၤလၢ ပကမၤ ဒီးပကတဲတၢ်လၢ အကဲထီၣ်တၢ်ဂံၢ်တၢ်ဘါလၢပှၤဂၤအဂီၢ် ဒီးဆိကမိၣ်န့ၢ်တၢ်လၢ ပှၤဂၤအဂီၢ်လီၤ. လံာ်စီဆှံတဲဝဲလၢ “တၢ်မၤကိၢ်မၤဂီၤလၢပှၤကညီ အသးကံၢ်ပူၤန့ၣ် ဒုးသကူးအီၤလီၤ. မ့မ့ၢ်တၢ်ကတိၤမုာ်တထံၣ်န့ၣ် ဒုးသးခုအီၤလီၤ.” (ကတိၤဒိ ၁၂:၂၅) ဖဲတၢ်သးကညီၤ ဒီးတၢ်မၤဂ့ၤတၢ် ထိၣ်ဟူး ထိၣ်ဂဲၤထီၣ်ပှၤလၢ ပကတဲတၢ်လၢ အကဲထီၣ်တၢ်ဂံၢ်တၢ်ဘါလၢ ပှၤဂၤအဂီၢ်အခါ အဝဲသ့ၣ်ကသးခုလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ပတၢ်ကတိၤလၢ အိၣ်ဒီးတၢ်သးကညီၤန့ၣ် ပာ်ဖျါထီၣ်ဝဲလၢ ပသးအိၣ်ပှၤဂၤ ဒီးကမၤစၢၤအဝဲသ့ၣ်လၢ ဆဲးတူၢ်တၢ်ကီတၢ်ခဲ ကန့ၢ်အဂီၢ်လီၤ.—ကတိၤဒိ ၁၆:၂၄.
နကဲထီၣ်ပှၤလၢ အိၣ်ဒီးတၢ်သးကညီၤ ကသ့ဒ်လဲၣ်
ခီဖျိလၢ ကစၢ်ယွၤတ့လီၤပှၤဒ် အက့ၢ်အဂီၤအဃိ ပဝဲခဲလၢာ်န့ၣ် ပအိၣ်ဒီးတၢ်သ့တၢ်ဘၣ်လၢ ပကပာ်ဖျါထီၣ်တၢ်သးကညီၤလီၤ. (၁ မိၤၡ့ ၁:၂၇) အဒိ စီၤယူၤလံလၢအမ့ၢ် ပှၤရိမ့ၤဖိအသုးခိၣ်န့ၣ် အိၣ်ဒီးမူဒါလၢ ကလဲၤဆှၢဝဲစီၤပီလူးဆူ ရိမ့ၤလီၤ. ဖဲအဝဲသ့ၣ်လဲၤတုၤလၢစံဒိၣ်အခါ အဝဲ “မၤစီၤပီလူးလၢတၢ်အဘျုး [“တၢ်သးကညီၤ” NWT], ဒီးဒုးလဲၤအီၤဆူ တံၤသကိးတဖၣ်အအိၣ်, ဒ်သိးအကဒိးန့ၢ် အဝဲသ့ၣ်အတၢ်အံးတၢ်ကွၢ်န့ၣ်လီၤ.” (မၤတၢ် ၂၇:၃) ဖဲအဝဲသ့ၣ် လဲၤတၢ်ဒီးကဘီဟးဂီၤအခါ ပှၤမ့းလံတ့ၤဖိတဖၣ်န့ၣ် ပာ်ဖျါထီၣ်တၢ် “မၤဂ့ၤ” မ့တမ့ၢ် “တၢ်သးကညီၤ” လၢစီၤပီလူးဒီးပှၤဂၤတဖၣ်အဖီခိၣ် “တဆံးတစှၤဘၣ်” လီၤ. ပှၤမ့းလံတ့ၤဖိတဖၣ်န့ၣ် မၤကဲၤထီၣ်န့ၢ်အဝဲသ့ၣ်မ့ၣ်အူ ဒ်သိးအဝဲသ့ၣ် ကမၤကလၢၤထီၣ်အသးအဂီၢ်န့ၣ်လီၤ. (မၤတၢ် ၂၈:၁, ၂) ပှၤသ့ၣ်တဖၣ်အံၤ မၤဝဲဒ်အံၤန့ၣ် မ့ၢ်အဝဲသ့ၣ်မၤတၢ်ဂ့ၤလီၤ. ဘၣ်ဆၣ် ဒ်သိးပကမၤသးခု ယဟိဝၤယွၤအသးအဂီၢ်န့ၣ် ပကဘၣ်အိၣ်ဒီးတၢ်သးကညီၤထီဘိလီၤ. တမ့ၢ်ထဲ တဘျီတခီၣ်ဘၣ်.
ယဟိဝၤယွၤ အဲၣ်ဒိးလၢ ပကမၤအါထီၣ်ပတၢ်ဂ့ၤတၢ်ဝါလၢအမ့ၢ် တၢ်သးကညီၤ ဒီးပာ်ဖျါထီၣ်အီၤလၢ ပတၢ်အိၣ်မူအပူၤလီၤ. လၢတၢ်န့ၣ်အဃိ အဝဲတဲပှၤလၢပကဘၣ် “ကူထီၣ်သိးထီၣ်” တၢ်သးကညီၤလီၤ. (ကလီးစဲ ၃:၁၂) ဘၣ်ဆၣ် ပကအိၣ်ဒီးတၢ်သးကညီၤန့ၣ် တညီထီဘိဘၣ်. ဘၣ်သ့ၣ်သ့ၣ် ကမ့ၢ်လၢ ပမဲာ်ဆှး, တၢ်ဘၣ်ယိၣ်အလီၢ်အိၣ် မ့တမ့ၢ် ပအဲၣ်လီၤထဲပသးအါတစဲးအဃိလီၤ. မ့တမ့ၢ် ဘၣ်သ့ၣ်သ့ၣ် ကမ့ၢ်လၢပှၤတနီၤနီၤန့ၣ် ရ့ဒီးပှၤ အၢအၢသီသီအဃိ ပကပာ်ဖျါထီၣ်တၢ်သးကညီၤလၢ အဝဲသ့ၣ်အဖီခိၣ်န့ၣ် တညီလၢပဂီၢ်ဘၣ်. ဘၣ်ဆၣ် ပမ့ၢ်ဃ့ယဟိဝၤယွၤ အသးစီဆှံ ဒီးကွၢ်လိမၤဒိးယဟိဝၤယွၤန့ၣ် ကမၤစၢၤပှၤဒ်သိး ပကကဲထီၣ်ပှၤလၢ အအိၣ်ဒီးတၢ်သးကညီၤ နီၢ်ကီၢ်လီၤ.—၁ ကရံၣ်သူး ၂:၁၂.
ပလိၣ်ဘၣ်မၤအါထီၣ် ပတၢ်သးကညီၤန့ၣ် ပသ့ၣ်ညါအီၤကသ့ဒ်လဲၣ်. သံကွၢ်လီၤနသးလၢ ‘မ့ၢ်ယဒိကနၣ်န့ၢ် ပှၤဂၤလၢ တၢ်သူၣ်အိၣ်သးအိၣ်အပူၤ ဒီးဂုာ်ကျဲးစၢးနၢ်ပၢၢ် အဝဲသ့ၣ်အတၢ်တူၢ်ဘၣ်ဧါ. ဖဲပှၤဂၤလိၣ်ဘၣ်တၢ်မၤစၢၤအခါ မ့ၢ်ယပာ်သူၣ်ပာ်သးစ့ၢ်ကီးဧါ. ယပာ်ဖျါထီၣ်တၢ်သးကညီၤလၢ ပှၤလၢအတမ့ၢ် ယဟံၣ်ဖိဃီဖိ မ့တမ့ၢ် ယတံၤသကိးဘူးဘူးတံၢ်တံၢ်တဖၣ်အဖီခိၣ် လၢခံကတၢၢ်တဘျီန့ၣ် ဖဲလဲၣ်အဆၢကတီၢ်လဲၣ်.’ နသံကွၢ်လီၤနသးမ့ၢ်ဝံၤန့ၣ် ပာ်လီၤဖီတၢၣ်ဒ်သိးဒီး နကဃုသ့ၣ်ညါအါထီၣ် ပှၤလၢအအိၣ်လၢ နကပိာ်ကပၤတဖၣ်အဂ့ၢ် လီၤဆီဒၣ်တၢ် ဒီပုၢ်ဝဲၢ်လၢတၢ်အိၣ်ဖှိၣ်အပူၤတဖၣ် အဂ့ၢ်န့ၣ်တက့ၢ်. နမ့ၢ်မၤဒ်န့ၣ်န့ၣ် နကသ့ၣ်ညါလၢ အဝဲသ့ၣ်အိၣ်ဒီး တၢ်ကီတၢ်ခဲမနုၤတဖၣ်လဲၣ် ဒီးအဝဲသ့ၣ်လိၣ်ဘၣ် တၢ်မနုၤလဲၣ်န့ၣ်လီၤ. ဒီးရ့ဒီးအဝဲသ့ၣ်လၢ တၢ်သးကညီၤအပူၤ ဒ်ကျဲလၢနအဲၣ်ဒိးလၢ အဝဲသ့ၣ်ကရ့နၤန့ၣ်တက့ၢ်. (မးသဲ ၇:၁၂) ဒီးဃ့ယဟိဝၤယွၤ အတၢ်မၤစၢၤတက့ၢ်. နမ့ၢ်မၤဒ်န့ၣ်န့ၣ် အဝဲကမၤစၢၤနၤဒ်သိး နကကဲထီၣ်ပှၤလၢ အအိၣ်ဒီးတၢ်သးကညီၤလီၤ.—လူၤကၣ် ၁၁:၁၃.
တၢ်သးကညီၤန့ၣ် ကဲဘျုးလၢ ပှၤဂၤအဂီၢ်ဒ်လဲၣ်
စီၤပီလူးပာ်ဖျါထီၣ်ဝဲ တၢ်လၢအမၤစၢၤအီၤ ဒ်သိးကကဲထီၣ်ပှၤစံၣ်တဲၤတဲလီၤတၢ်ဖိလၢ အဂ့ၤတဂၤလီၤ. တၢ်လၢအမၤစၢၤအီၤတဖၣ်အကျါတခါန့ၣ် မ့ၢ်ဝဲတၢ်သးကညီၤလီၤ. (၂ ကရံၣ်သူး ၆:၃-၆) စီၤပီလူးမ့ၢ်ပှၤလၢ အပာ်ဖျါထီၣ်တၢ်သးကညီၤလၢ တၢ်ကတိၤဒီး တၢ်မၤအဃိ ပှၤဂၤတဖၣ်ဘၣ်သူၣ်ဘၣ်သးအီၤဒီး တူၢ်ဘၣ်ဝဲလၢ စီၤပီလူးသူၣ်အိၣ်သးအိၣ်အဝဲသ့ၣ်လီၤ. (မၤတၢ် ၂၈:၃၀, ၃၁) ပမ့ၢ်အိၣ်ဒီး တၢ်သးကညီၤဒ် စီၤပီလူးအသိးန့ၣ် ပှၤအါဂၤ ကအဲၣ်ဒိးမၤလိအါထီၣ် တၢ်မ့ၢ်တၢ်တီလီၤ. ပမ့ၢ်အိၣ်ဒီးတၢ်သးကညီၤ လၢပှၤကိးဂၤဒဲးအဖီခိၣ် ဃုာ်ဒီးပှၤလၢ အရ့ဒီးပှၤအၢအၢသီသီတဖၣ်န့ၣ် ဘၣ်သ့ၣ်သ့ၣ် ကထုးန့ၢ်အဝဲသ့ၣ်အသး ဒီးအဝဲသ့ၣ်ဆီတလဲ အတၢ်ပာ်သူၣ်ပာ်သးသ့လီၤ. (ရိမ့ၤ ၁၂:၂၀) ဒီးဘၣ်သ့ၣ်သ့ၣ် လၢခံန့ၣ် အဝဲသ့ၣ် ကအဲၣ်ဒိးမၤလိ လံာ်စီဆှံလီၤ.
လၢပၤရဒံစူးအပူၤန့ၣ် ပှၤကိးဂၤဒဲး ကရ့လိာ်အသးလၢ တၢ်သးကညီၤလီၤ. ပှၤလၢအဟဲက့ၤ ဂဲၤဆၢထၢၣ်သမူထီၣ်က့ၤတဖၣ်န့ၣ် ပှၤကရ့ဒီးအီၤလၢ တၢ်သးကညီၤအပူၤလီၤ. လၢအဝဲသ့ၣ်အကျါတနီၤန့ၣ် ကတူၢ်ဘၣ်ဝဲလၢ ပှၤရ့ဒီးအီၤလၢ တၢ်သးကညီၤအပူၤ အဆိကတၢၢ်တဘျီလီၤ. လၢတၢ်န့ၣ်အဃိ အဝဲသ့ၣ်စ့ၢ်ကီး ကအဲၣ်ဒိးရ့ဒီး ပှၤဂၤလၢ တၢ်အဲၣ်တၢ်ကွံအပူၤလီၤ. ပှၤလၢအတအိၣ်ဒီး တၢ်သးကညီၤ ဒီးတအဲၣ်ဒိးမၤစၢၤပှၤဂၤတဖၣ်န့ၣ် တအိၣ်မူဘၣ်လၢ ယွၤအဘီအမုၢ် အတၢ်ပၢအဖီလာ်ဘၣ်. ထဲဒၣ်ပှၤလၢ အအိၣ်ဒီးတၢ်အဲၣ် ဒီးတၢ်သးကညီၤန့ၣ် ကအိၣ်မူဘၣ်လၢ ပၤရဒံစူးအပူၤ လီၤထူလီၤယိာ်လီၤ. (စံးထီၣ်ပတြၢၤ ၃၇:၉-၁၁) ဖဲန့ၣ်အဆၢကတီၢ် ဟီၣ်ခိၣ်ကပှဲၤဒီး တၢ်ဃူတၢ်ဖိးဒီး တၢ်ဘံၣ်တၢ်ဘၢနီၢ်ကီၢ်လီၤ. ဆၢကတီၢ်ခဲအံၤဒၣ်လဲာ် ပမ့ၢ်အိၣ်ဒီးတၢ်သးကညီၤန့ၣ် ပဒိးန့ၢ်ဘၣ် အဘျုးသ့လီၤ. လၢကျဲဒ်လဲၣ်.
ပမ့ၢ်အိၣ်ဒီးတၢ်သးကညီၤန့ၣ် ပကဒိးန့ၢ်ဘၣ်အဘျုး
လံာ်စီဆှံတဲဝဲလၢ “ဖဲနသးကညီၤတၢ်န့ၣ်, နမၤဘျုးမၤဖှိၣ်လီၤနသးတမံၤလီၤ.” (ကတိၤဒိ ၁၁:၁၇, ခ့ခါစှီၤကျိာ်) ပှၤအါဂၤန့ၣ် အဲၣ်ဒိးအိၣ်ဒီးပှၤလၢ အသးကညီၤတၢ် ဒီးအဝဲသ့ၣ်စ့ၢ်ကီး က့ၤရ့ကဒါက့ၤ ပှၤလၢအသးကညီၤတၢ်တဂၤ လၢတၢ်သးကညီၤအပူၤလီၤ. ယ့ၣ်ၡူးတဲဝဲလၢ “ဒ်သုဃီၣ်ဟ့ၣ်တၢ်အသိးန့ၣ်, တၢ်ကဃီၣ်ဟ့ၣ်က့ၤသုလီၤ.” (လူၤကၣ် ၆:၃၈) လၢတၢ်န့ၣ်အဃိ ပှၤလၢအအိၣ်ဒီးတၢ်သးကညီၤတဖၣ်န့ၣ် ကန့ၢ်ဘၣ်အတံၤသကိးလၢအဂ့ၤအဂီၢ် တကီဘၣ် ဒီးအဝဲသ့ၣ် ဆဲးပၢၤဃာ်အတၢ်ရ့လိာ်သး ကန့ၢ်ဝဲလီၤ.
တၢ်မၢဖိပီလူးတဲဝဲ အ့းဖ့းစူးတၢ်အိၣ်ဖှိၣ်ဖိတဖၣ်လၢ “ဝံသးစူၤလိာ်သုသး, သူၣ်ကညီၤသးကညီၤလိာ်သုသး, ပျၢ်လိာ်သုတၢ်” တက့ၢ်. (အ့းဖ့းစူး ၄:၃၂) ပှၤကိးဂၤဒဲး မ့ၢ်အိၣ်ဒီးတၢ်သးကညီၤန့ၣ် တၢ်အိၣ်ဖှိၣ်ကဂၢၢ်ထီၣ်ကျၢၤထီၣ်ဒီး တၢ်ဃူတၢ်ဖိးကအါထီၣ်ဝဲလီၤ. လၢတၢ်န့ၣ်အဃိ ပတဘၣ်စံၣ်ညီၣ်ပဒီပုၢ်ဝဲၢ်တဖၣ်, တဲဟးဂီၤအဝဲသ့ၣ်အဂ့ၢ်, တဲတၢ်တမံၤမံၤလၢ အဆူၣ်အကိၤ မ့တမ့ၢ် တဲလီၤနံၤတၢ်တမံၤမံၤ လၢကမၤဘၣ်ဒိ အဝဲသ့ၣ်န့ၣ်ဘၣ်. လၢတၢ်န့ၣ်အလီၢ် ပအဲၣ်ဒိးတဲတၢ်ကတိၤလၢ ကကဲထီၣ်တၢ်မၤစၢၤ ဒီးတၢ်ဂံၢ်တၢ်ဘါလၢ ပှၤဂၤအဂီၢ်လီၤ. (ကတိၤဒိ ၁၂:၁၈) ပမ့ၢ်မၤဒ်န့ၣ်န့ၣ် ပဒီပုၢ်ဝဲၢ်လၢ တၢ်အိၣ်ဖှိၣ်အပူၤခဲလၢာ် ကမၤယဟိဝၤယွၤ အတၢ်မၤလၢတၢ်သးခုအပူၤလီၤ.
ဒ်ပမၤလိဘၣ်အသိး တၢ်သးကညီၤန့ၣ် မ့ၢ်ဝဲတၢ်ဂ့ၤတၢ်ဝါတခါလၢ ပကဘၣ်ပာ်ဖျါထီၣ်အီၤလၢ ပတၢ်ကတိၤဒီး တၢ်မၤန့ၣ်လီၤ. ပမ့ၢ်အိၣ်ဒီး တၢ်သးကညီၤန့ၣ်မ့ၢ်ဝဲ ပကွၢ်လိမၤဒိး ယဟိဝၤယွၤလၢ အအိၣ်ဒီးတၢ်အဲၣ်ဒီး အသးအိၣ်ဟ့ၣ်တၢ်န့ၣ်လီၤ. (အ့းဖ့းစူး ၅:၁) ပမ့ၢ်အိၣ်ဒီးတၢ်သးကညီၤန့ၣ် ကမၤဂၢၢ်ကျၢၤထီၣ် ပတၢ်အိၣ်ဖှိၣ် ဒီးကထိၣ်ဟူးထိၣ်ဂဲၤထီၣ် ပှၤဂၤလၢ ကမၤယဟိဝၤယွၤ အတၢ်မၤအဂီၢ်လီၤ. လၢတၢ်န့ၣ်အဃိ တသ့ဖဲအသ့ မ်ပပာ်ဖျါထီၣ်တၢ်သးကညီၤ ဒ်သိးပှၤအဂၤတဖၣ်ကထံၣ်လၢ ယဟိဝၤပှၤအုၣ်အသးတဖၣ်န့ၣ် မ့ၢ်ပှၤလၢအအိၣ်ဒီးတၢ်သးကညီၤန့ၣ်တက့ၢ်.
^ လံာ်အဆၢ. 2 ကညီလံာ်စီဆှံလၢ မ့ၤစံၣ်ကွဲးကျိာ်ထံဝဲန့ၣ် ပာ်ဖျါထီၣ်ဝဲလၢ တၢ်သူၣ်စူၤသးစူၤလီၤ.
^ လံာ်အဆၢ. 13 တၢ်ဂ့ၢ်လၢခံတခါအပူၤန့ၣ် ပကတဲသကိး တၢ်ဂ့ၤတၢ်ဝါလၢအမ့ၢ် တၢ်မၤဂ့ၤတၢ် လၢအပၣ်ဃုာ်လၢ သးအတၤသၣ်အကျါန့ၣ်လီၤ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်—လံာ်လၢတၢ်မၤလိအဂီၢ်
တၢ်အဲၣ်တၢ်ကွံ မ့ၢ်တၢ်ဂ့ၤတၢ်ဝါလၢ အလုၢ်ဒိၣ်ပှ့ၤဒိၣ်
လံာ်စီဆှံ ပာ်ဖျါထီၣ်ဝဲလၢ တၢ်အဲၣ်တၢ်ကွံန့ၣ် ဟဲကဲထီၣ်အသး ခီဖျိလၢယဟိဝၤယွၤ အသးစီဆှံလီၤ. တၢ်အဲၣ်တၢ်ကွံ မ့ၢ်မနုၤလဲၣ်. ပမၤအါထီၣ်အီၤကသ့ဒ်လဲၣ်. ဒီးပပာ်ဖျါထီၣ်အီၤ ကိးနံၤဒဲးကသ့ဒ်လဲၣ်.
တၢးထီခိးတၢ်—လံာ်လၢတၢ်မၤလိအဂီၢ်
တၢ်သူၣ်ခုသးခု တၢ်ဂ့ၤတၢ်ဝါလၢ ပဒိးန့ၢ်ဘၣ်လၢ ယွၤအအိၣ်
နမ့ၢ်တူၢ်ဘၣ်လၢ တၢ်မၤကွၢ်လၢ တနံၤဘၣ်တနံၤတဖၣ် မၤစှၤလီၤ နတၢ်သူၣ်ခုသးခုန့ၣ် ဒ်သိးနကန့ၢ်ဘၣ်က့ၤ တၢ်သးခုအဂီၢ် နမၤတၢ်မနုၤသ့ဝဲလဲၣ်.
တၢးထီခိးတၢ်—လံာ်လၢတၢ်မၤလိအဂီၢ်
တၢ်ဃူတၢ်ဖိး ပထံၣ်န့ၢ်အီၤ ကသ့ဒ်လဲၣ်
ပအိၣ်မူဘၣ်လၢ ဟီၣ်ခိၣ်လၢအပှဲၤဒီး တၢ်ကီတၢ်ခဲအဃိ ဒ်သိးပကအိၣ်ဒီး တၢ်ဃူတၢ်ဖိးအဂီၢ် ပကဘၣ်ဂုာ်ကျဲးစၢးလီၤ. လံာ်စီဆှံ မၤစၢၤပှၤသ့လီၤ.
တၢးထီခိးတၢ်—လံာ်လၢတၢ်မၤလိအဂီၢ်
တၢ်ဝံသးစူၤ—အိၣ်ဒီးတၢ်တူၢ်န့ၢ်ခီၣ်ကဲလၢ တၢ်မုၢ်လၢ်အပူၤ
တၢ်ဝံသးစူၤနီၢ်ကီၢ်န့ၣ် မ့ၢ်မနုၤလဲၣ်, ပဒုးအိၣ်ထီၣ်တၢ်ဝံသးစူၤကသ့ဒ်လဲၣ် ဒီးပမ့ၢ်အိၣ်ဒီးတၢ်ဝံသးစူၤန့ၣ် ကကဲဘျုးလၢ ပဂီၢ်ဒ်လဲၣ်.
