မ့ၢ်နသ့ၣ်နီၣ်ဘၣ်ဒံးဧါ
မ့ၢ်နစံးဆၢ တၢ်သံကွၢ်လၢ အဒိးသန့ၤထီၣ်အသးလၢ တၢးထီခိးတၢ် ၂၀၁၉ အပူၤကဘၣ်ဒံးဧါ.
ကစၢ်ယွၤ အတၢ်အၢၣ်လီၤ လၢအမ့ၢ် “တၢ်အစုကဝဲၤလၢ အတ့လီၤအသးထီဒါနၤန့ၣ် တဘီၣ်ထီၣ်ညီထီၣ် နီတမံၤဘၣ်” န့ၣ်အခီပညီဒ်လဲၣ်. (ယၡါယၤ ၅၄:၁၇)
ပနာ်သ့လၢ ကစၢ်ယွၤ ကဒီသဒၢပှၤလၢ “ပှၤမၤပျံၤတၢ်ဖုးတၢ် အအူသဖှိ” တၢ်လီၤ. (ယၡါယၤ ၂၅:၄, ၅) ပဒုၣ်ပဒါတဖၣ် မၤဘၣ်ဒိပှၤ လီၤထူလီၤယိာ် တန့ၢ်ဘၣ်.—တၢး၁၉.၀၁, ကဘျံးပၤ ၆-၇.
ကစၢ်ယွၤရ့ဒီး ပှၤကနၤဧၣ်ဖိတဖၣ် ဒီးပှၤအံၣ်စရ့လးဖိလၢ အနၣ်က့ၣ်တဖၣ် ဒ်လဲၣ်ဒ်လဲၣ်န့ၣ် ပာ်ဖျါထီၣ်ဝဲ ကစၢ်ယွၤ အတၢ်တီတၢ်လိၤဒ်လဲၣ်.
ကစၢ်ယွၤ ကစံၣ်ညီၣ် ပှၤလၢအမၤကမၣ်မုၣ်ကမၣ်ခွါ ဒီးပှၤလၢအမၤနၢၤအီၣ် ပှၤပိာ်မုၣ် ဒီးပှၤဖိသၣ်တဖၣ်န့ၣ်လီၤ. အဝဲဆိၣ်ဂ့ၤဝဲ ပှၤလၢအဒိကနၣ် အကလုၢ် ဒီးပှၤလၢအရ့ဒီးပှၤဂၤ တီတီလိၤလိၤတဖၣ်န့ၣ်လီၤ.—တၢး၁၉.၀၂, ကဘျံးပၤ ၂၂-၂၃.
ပမ့ၢ်အိၣ်ဘၣ်လၢ ပှၤလၢအတမ့ၢ် ယဟိဝၤပှၤအုၣ်အသးတဖၣ် ဃ့ဘါထုကဖၣ်တၢ်အကျါန့ၣ် ပကြၢးမၤဒ်လဲၣ်.
ပပာ်ဖျါထီၣ် တၢ်ပာ်ကဲ ဒီးအိၣ်ဘှ့ၣ်ဘှ့ၣ်ဘှီၣ်ဘှီၣ်သ့ ဘၣ်ဆၣ်ပတဖီၣ်လိာ်ပစုဒီးအဝဲသ့ၣ် မ့တမ့ၢ် ပတတဲ “အၤမ့ၣ်” ဘၣ်. ပဃ့ဘါထုကဖၣ်လၢ ပသးပူၤသ့လီၤ.—တၢး၁၉.၀၃, ကဘျံးပၤ ၃၁.
တၢ်မၤတရီတပါဖိသၣ်န့ၣ် မ့ၢ်တၢ်ကမၣ်လၢ အဒိၣ်ထဲလဲၣ်.
တၢ်မၤတရီတပါဖိသၣ်န့ၣ် မ့ၢ်တၢ်ဒဲးဘးလၢ အမၤကမၣ် ပှၤလၢအတူၢ်ဘၣ်တၢ်, တၢ်အိၣ်ဖှိၣ်, ပဒိၣ်ပပှၢ်တဖၣ် ဒီးကစၢ်ယွၤလီၤ. ထံကီၢ်အတၢ်သိၣ်တၢ်သီ မ့ၢ်အိၣ်လၢ ဖဲပှၤနၢ်ဟူလၢ ပှၤတဂၤ မၤတရီတပါဖိသၣ်အခါ ပှၤကဘၣ်တီၣ်ထီၣ်တၢ်ဂ့ၢ်န့ၣ် တၢ်အိၣ်ဖှိၣ်သးပှၢ်တဖၣ် ကမၤဝဲဒ်န့ၣ်လီၤ.—တၢး၁၉.၀၅, ကဘျံးပၤ ၉-၁၀.
နဆီတလဲ မ့တမ့ၢ် နမၤဂ့ၤထီၣ် တၢ်လၢအအိၣ်လၢ နသူၣ်နသးပူၤနီၢ်နီၢ် ကသ့ဒ်လဲၣ်.
တၢ်အရ့ဒိၣ်လၢ နကဘၣ်မၤအီၤတဖၣ်န့ၣ် မ့ၢ်ဝဲ ဃ့ဘါထုကဖၣ်လၢ ယဟိဝၤယွၤအအိၣ်, ဆိကမိၣ်ထံလီၤက့ၤ နတၢ်ပာ်သူၣ်ပာ်သး အိၣ်ဒ်လဲၣ် ဒီးဃုထၢ တံၤသကိး လၢတၢ်ကူၣ်သ့အပူၤတက့ၢ်.—တၢး၁၉.၀၆, ကဘျံးပၤ ၁၁.
ဆၢကတီၢ်ခဲအံၤ ပအိၣ်ကတဲာ်ကတီၤပသး လၢတၢ်မၤအၢမၤနးအဂီၢ် ကသ့ဒ်လဲၣ်.
ပကဘၣ်မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤလီၤ. ပကဘၣ်နာ်လၢ ယဟိဝၤယွၤအဲၣ်ပှၤ ဒီးတပာ်တ့ၢ်ပှၤ နီတဘျီဘၣ်. ပကဘၣ် ဖးလံာ်စီဆှံ ကိးနံၤဒဲး ဒီးဃ့ဘါထုကဖၣ် ထီဘိလီၤ. ပကဘၣ်နာ်လၢ ဘီမုၢ်အတၢ်ဆိၣ်ဂ့ၤတဖၣ် ကဟဲလၢပှဲၤထီၣ် နီၢ်ကီၢ်လီၤ. ဒီးပကဘၣ် တိၢ်သံဃာ် လံာ်စီဆှံ အဆၢဖိတဖၣ် ဒီးတၢ်သးဝံၣ် လၢပဘၣ်သူၣ်ဘၣ်သးအီၤလီၤ.—တၢး၁၉.၀၇, ကဘျံးပၤ ၂-၄.
ဒ်သိးပဘူးပတံၢ်တဖၣ် ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ပမၤစၢၤအဝဲသ့ၣ် ကသ့ဒ်လဲၣ်.
အရ့ဒိၣ်ဒိၣ်မးလၢ ပကပာ်ဖျါထီၣ် တၢ်ဒိသူၣ်ဒိသး, ပာ်ဖျါထီၣ် တၢ်ဒိဂ့ၤတဲာ်ဘၣ် ဒ်သိးကကဲထီၣ် တၢ်အုၣ်အသး လၢပှၤဂၤအဂီၢ် ဒီးအိၣ်ဒီးတၢ်သူၣ်စူၤသးစူၤ ဒီးတၢ်ကူၣ်သ့တက့ၢ်.—တၢး၁၉.၀၈, ကဘျံးပၤ ၁၅-၁၇.
ဒ်ယ့ၣ်ၡူးအတၢ်အၢၣ်လီၤလၢ မးသဲ ၁၁:၂၈ အပူၤအသိး ပန့ၢ်ဘၣ် တၢ်ဂံၢ်တၢ်ဘါဒ်လဲၣ်.
ပအိၣ်ဒီး ခရံာ်ဖိဒီပုၢ်ဝဲၢ်တဖၣ်လၢ အတီခိၣ်ရိၤမဲပှၤ လၢတၢ်အဲၣ်တၢ်ကွံပူၤ, တံၤသကိးလၢ အဂ့ၤကတၢၢ်တဖၣ် ဒီးတၢ်မၤလၢအဂ့ၤကတၢၢ်လီၤ.—တၢး၁၉.၀၉, ကဘျံးပၤ ၂၃.
ဒ်သိးပကသးအိၣ်မၤတၢ် ဒီးအိၣ်ဒီးတၢ်သ့တၢ်ဘၣ် လၢပကမၤတၢ်အဂီၢ် ယဟိဝၤယွၤ မၤစၢၤပှၤဒ်လဲၣ်. (ဖံလံးပံၤ ၂:၁၃)
ပမ့ၢ်ဖးလံာ်စီဆှံ ဒီးဆိကမိၣ်ထံအီၤန့ၣ် ပကဒိးန့ၢ်ဘၣ် တၢ်ဂံၢ်တၢ်ဘါ, တၢ်သးအိၣ် ဒီးတၢ်သ့တၢ်ဘၣ် လၢအဟဲလၢ ကစၢ်ယွၤအအိၣ်လီၤ. ဒီးကစၢ်ယွၤ အသးစီဆှံ မၤစၢၤပှၤ ဒ်သိးပတၢ်သ့တၢ်ဘၣ် ကအါထီၣ်အဂီၢ်သ့လီၤ.—တၢး၁၉.၁၀, ကဘျံးပၤ ၂၁.
တချုးလၢ ပဆၢတဲာ်တၢ် လၢအရ့ဒိၣ်တမံၤမံၤဒံးဘၣ်န့ၣ် ပကဘၣ်မၤ တၢ်မနုၤတဖၣ်လဲၣ်.
ပကဘၣ်မၤ တၢ်ယဲၢ်ခါ လၢအမ့ၢ် ဃုသ့ၣ်ညါ တၢ်ဂ့ၢ်တၢ်ကျိၤ, ဃ့ဘါထုကဖၣ်လၢ နကအိၣ်ဒီးတၢ်ကူၣ်သ့, သံကွၢ်လီၤနသး ဘၣ်ဃးဒီး ဘၣ်မနုၤအဃိ နဆၢတဲာ်လီၤနသး ဒ်န့ၣ်လဲၣ်, ပာ်လီၤဖီတၢၣ် လီၤတံၢ်လီၤဆဲး ဒီးအိၣ်ဒီးတၢ်ထံၣ် လၢအကြၢးအဘၣ်တက့ၢ်.—တၢး၁၉.၁၁, ကဘျံးပၤ ၂၇-၂၉.
တၢ်စူၢ်တၢ်နာ်လၢ ဘၣ်ဃးဒီး ပှၤသးသံတသ့ဘၣ်န့ၣ် အခီၣ်ထံးခီၣ်ဘိ ဟဲစးထီၣ်အသးဖဲ မုၣ်ကီၤလံၢ် လ့ပစီဝဲ နီၢ်အံၣ်အုအခါဧါ.
ဖျါလၢတမ့ၢ်ဒ်န့ၣ်ဘၣ်. မုၣ်ကီၤလံၢ်တဲဘၣ် နီၢ်အံၣ်အုလၢ အဝဲတသံဘၣ်လီၤ. မုၣ်ကီၤလံၢ် တတဲဝဲလၢ နီၢ်အံၣ်အုန့ၣ် အနီၢ်ခိကသံ ဒီးအသးတသံဘၣ်န့ၣ်ဘၣ်. ဖဲထံလုၢ်ဘၢတၢ်အဆၢကတီၢ် တၢ်ဘူၣ်တၢ်ဘါအကမၣ်န့ၣ် တအိၣ်တ့ၢ် နီတခါဘၣ်. အဃိ လီၤဂာ်လၢ တၢ်စူၢ်တၢ်နာ်လၢ ဘၣ်ဃးဒီး ပှၤသးသံတသ့ဘၣ်န့ၣ် ကဟဲစးထီၣ်အသး ဖဲတချုးကစၢ်ယွၤ မၤလီၤဖးဝဲ ပှၤလၢအသူၣ်ထီၣ် တၢးဘၤဘ့းလးအခါန့ၣ်လီၤ.—တၢး၁၉.၁၂, ကဘျံးပၤ ၁၅.
