ပှၤဖးလံာ်ဖိတဖၣ် အတၢ်သံကွၢ်
ပှၤအါဂၤလၢ ပစိၤခဲအံၤန့ၣ် နာ်ဝဲသးလၢအသံတသ့ဘၣ်လီၤ. ဖဲမုၣ်ကီၤလံၢ်တဲဝဲ နီၢ်အံၣ်အုလၢ အမ့ၢ်အီၣ် တၢ်သ့ၣ်ညါတၢ်ဂ့ၤဒီးတၢ်အၢ အသ့ၣ်သၣ်န့ၣ် အတသံဘၣ်အခါ မ့ၢ်အဝဲအဲၣ်ဒိး ဒုးဆိကမိၣ် နီၢ်အံၣ်အု ဘၣ်ဃးဒီး သးလၢအသံတသ့ဘၣ် အဂ့ၢ်န့ၣ်ဧါ.
ဖျါလၢအဝဲ တဒုးဆိကမိၣ် နီၢ်အံၣ်အု ဒ်န့ၣ်ဘၣ်. မုၣ်ကီၤလံၢ် တတဲဝဲလၢ နီၢ်အံၣ်အု မ့ၢ်အီၣ်သ့ၣ်သၣ်လၢ ကစၢ်ယွၤတြီဃာ်ဝဲန့ၣ် အဝဲကဖျါဒ်သိး အသံဘၣ်ဆၣ် တၢ်အိၣ်လၢအပူၤ လၢပှၤထံၣ်အီၤတသ့ဘၣ် (ပှၤလၢပစိၤခဲအံၤတဖၣ် ကိးဝဲလၢ သးလၢအသံတသ့) န့ၣ်ကဆဲးအိၣ်မူလၢ တၢ်လီၢ်တတီၤတီၤန့ၣ်ဘၣ်. ဖဲမုၣ်ကီၤလံၢ်သူဝဲ ဂုၢ်ဒီးတဲတၢ်ဒီး နီၢ်အံၣ်အုအဆၢကတီၢ် အဝဲတဲဝဲလၢ နီၢ်အံၣ်အုမ့ၢ်အီၣ် သ့ၣ်ဝဲန့ၣ်အသၣ်န့ၣ် ‘အတသံဒီးအတသံဘၣ်ဘၣ်’ လီၤ. အဝဲအဲၣ်ဒိးတဲဝဲလၢ နီၢ်အံၣ်အု ကဆဲးအိၣ်မူလၢ ဟီၣ်ခိၣ်ချၢ, ကန့ၢ်ဘၣ်တၢ်အိၣ်မူလၢ အဂ့ၤန့ၢ်အလီၢ် ဒီးတလိၣ်သန့ၤအသးလၢ ကစၢ်ယွၤဘၣ်.—၁ မိၤၡ့ ၂:၁၇; ၃:၃-၅.
တၢ်သိၣ်တၢ်သီအကမၣ် လၢအဘၣ်ဃးဒီး သးလၢအသံတသ့ဘၣ်န့ၣ် အခီၣ်ထံးခီၣ်ဘိ မ့ၢ်တဟဲစးထီၣ်အသးလၢ ဧ့ၤဒ့ၣ်တၤသၣ်လီၢ်ဘၣ်န့ၣ် ဟဲစးထီၣ်အသး အခါဖဲလဲၣ်. ပတသ့ၣ်ညါလီၤတံၢ်ဘၣ်. ဘၣ်ဆၣ် ပသ့ၣ်ညါလၢ ဖဲထံၣ်လုၢ်ဘၢတၢ်လၢ စီၤနိအၤအစိၤအခါ တၢ်ဘူၣ်တၢ်ဘါကမၣ်ခဲလၢာ် ဘၣ်တၢ်မၤဟးဂီၤကွံာ်အီၤလီၤ. ပှၤပူၤဖျဲးထဲဒၣ် စီၤနိအၤဒီးအဟံၣ်ဖိဃီဖိ လၢအမ့ၢ် ပှၤလၢအဘူၣ်ထီၣ်ဘါထီၣ်တၢ် အမ့ၢ်အတီတဖၣ်လီၤ. ပှၤလၢအသိၣ်လိ တၢ်ဘူၣ်တၢ်ဘါကမၣ် အတၢ်သိၣ်လိန့ၣ် တအိၣ်တ့ၢ် နီတဂၤလၢၤဘၣ်.
လၢတၢ်န့ၣ်အဃိ တၢ်သိၣ်တၢ်သီလၢ အဘၣ်ဃးဒီး သးလၢအသံတသ့ဘၣ်န့ၣ် ကဟဲစးထီၣ်အသးဖဲ ထံလုၣ်ဘၢတၢ် ဝံၤအလီၢ်ခံန့ၣ်လီၤ. ဖဲကစၢ်ယွၤ မၤလီၤဖးကျိာ်တဖၣ် လၢဘၤဘ့းလး ဒီးပှၤဟီၣ်ခိၣ်ဖိတဖၣ် ရၤလီၤအသး “လၢဟီၣ်ခိၣ်ချၢ ဒီဘ့ၣ်ညါ” အခါ အဝဲသ့ၣ် ကလဲၤစိာ်ဃုာ်ဒီး အတၢ်စူၢ်တၢ်နာ်လၢ ပှၤဟီၣ်ခိၣ်ဖိတဖၣ်အိၣ်ဒီး သးလၢအသံတသ့ဘၣ်န့ၣ်လီၤ. (၁ မိၤၡ့ ၁၁:၈, ၉) တၢ်စူၢ်ကမၣ်နာ်ကမၣ် မ့ၢ်ဟဲစးထီၣ်အသး ဖဲလဲၣ်ဂ့ၤဖဲလဲၣ်ဂ့ၤ ပနာ်သ့သပှၢ်ကတၢၢ်လၢ မုၣ်ကီၤလံၢ်လၢအမ့ၢ် “တၢ်ကတိၤကဘျံးကဘျၣ်အပၢ်” န့ၣ်ကဆီၣ်ထွဲမၤစၢၤဝဲ တၢ်စူၢ်တၢ်နာ်အံၤ ဒီးဖဲတၢ်စူၢ်တၢ်နာ်အံၤ ရၤလီၤအသးအခါ အဝဲကသးခုဒိၣ်မးလီၤ.—ယိၤဟၣ် ၈:၄၄.