“လၢတၢ်ခဲလၢာ်အပူၤန့ၣ်, စံးထီၣ်ပတြၢၤ တၢ်အဘျုးအဖှိၣ်တက့ၢ်”
မ့ၢ်နထံၣ်လီၤနသးဒ် ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်တဂၤဧါ. ပဝဲခဲလၢာ်န့ၣ် ပကဘၣ် ဆိကမိၣ်ကွၢ် တၢ်သံကွၢ်အံၤလီၤ. လံာ်စီဆှံ တဲဆိပာ်ဝဲလၢ လၢပစိၤခဲအံၤန့ၣ် ပှၤအါဂၤကမ့ၢ် “ပှၤတသ့ၣ်ညါဘၣ် တၢ်အဘျုးအဖှိၣ်ဘၣ်” လီၤ. (၂ တံၤမသ့း ၃:၂) ဘၣ်သ့ၣ်သ့ၣ် နကထံၣ်ဘၣ် ပှၤလၢအမုၢ်လၢ်ဝဲလၢ ပှၤဂၤကဘၣ်မၤန့ၢ်အီၤတၢ် မ့တမ့ၢ် ဟ့ၣ်အီၤတၢ်လီၤ. ဒီးဖျါလၢ အဝဲသ့ၣ်တဖၣ်န့ၣ် တူၢ်ဘၣ်ဝဲလၢ အတလိၣ်စံးဘျုးစံးဖှိၣ် ပှၤလၢအဟ့ၣ်အီၤတၢ်သ့ၣ်တဖၣ်န့ၣ်ဘၣ်. ပဝဲသ့ၣ်တဖၣ်စ့ၢ်ကီး ဘၣ်သ့ၣ်သ့ၣ် ပတအဲၣ်ဒိးရ့ဒီး ပှၤဒ်အံၤတဖၣ်ဘၣ်.
မ့မ့ၢ်ယဟိဝၤယွၤအခ့အပှၤတဖၣ်န့ၣ် ဘၣ်တၢ်ဟ့ၣ်ဂံၢ်ဟ့ၣ်ဘါအီၤလၢက “ကဲထီၣ်ပှၤစံးထီၣ်ပတြၢၤ တၢ်အဘျုးအဖှိၣ်” ဒီးက “စံးထီၣ်ပတြၢၤတၢ်အဘျုးအဖှိၣ်” “လၢတၢ်ခဲလၢာ်အပူၤ” လီၤ. (ကလီးစဲ ၃:၁၅; ၁ သ့းစၤလနံ ၅:၁၈) ပမ့မ့ၢ် ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်န့ၣ် ကကဲဘျုးလၢပဂီၢ်လီၤ. ကဲဘျုးလၢကျဲဒ်လဲၣ်.
ပမ့မ့ၢ် ပှၤလၢအစံးဘျုးစံးဖှိၣ်တၢ်န့ၣ် ကမၤစၢၤပှၤဒ်သိး ပကအိၣ်ဒီး တၢ်ထံၣ်လၢအဂ့ၤ လၢပနီၢ်ကစၢ်အဖီခိၣ်
တၢ်ဂ့ၢ်အရ့ဒိၣ်တမံၤလၢ ပကဘၣ်စံးဘျုးစံးဖှိၣ်တၢ်န့ၣ်မ့ၢ်လၢ အမၤစၢၤပှၤ ဒ်သိးပကအိၣ်ဒီး တၢ်ထံၣ်လၢအဂ့ၤ လၢပနီၢ်ကစၢ် အဖီခိၣ်အဃိလီၤ. ဖဲပှၤတဂၤ စံးဘျုးစံးဖှိၣ်တၢ်အခါ ဘၣ်သ့ၣ်သ့ၣ် အဝဲကတူၢ်ဘၣ်ဝဲလၢ အမ့ၢ်ပှၤလၢအဂ့ၤ ဒီးပှၤလၢအဘၣ် တၢ်စံးဘျုးစံးဖှိၣ်အီၤတဂၤစ့ၢ်ကီး ကသးခုလီၤ. ဘၣ်မနုၤအဃိ တၢ်စံးဘျုးစံးဖှိၣ်န့ၣ် အမၤသးခု ပနီၢ်ကစၢ် ဒီးပှၤဂၤစ့ၢ်ကီးလဲၣ်. ဆိကမိၣ်ကွၢ် တၢ်ဂ့ၢ်အံၤတက့ၢ်. ဖဲပှၤတဂၤဂၤ အဲၣ်ဒိးမၤန့ၢ်နၤ တၢ်တမံၤမံၤအခါ မ့ၢ်လၢအဝဲ ဆိကမိၣ်ဝဲလၢ အကြၢးမၤန့ၢ်နၤအဃိလီၤ. ဒီးမ့ၢ်လၢ နသ့ၣ်ညါလၢ အဝဲသူၣ်အိၣ်သးအိၣ်နၤအဃိ နသးကမုာ်ဒိၣ်မးလီၤ. ဘၣ်ဃးဒီး တၢ်ဂ့ၢ်အံၤန့ၣ် ဆိကမိၣ်ကွၢ် နီၢ်ရူၤသးအဂ့ၢ်တက့ၢ်. ခီဖျိလၢ စီၤဘိၤဧး သးအိၣ်ဟ့ၣ်အီၤတၢ်အဃိ အဝဲကတူၢ်ဘၣ်ဝဲလၢ ပှၤသူၣ်အိၣ်သးအိၣ်အီၤ ဒီးအသးကခုဒိၣ်မးလီၤ.—ရူၤသး ၂:၁၀-၁၃.
လီၤဆီဒၣ်တၢ် ပကြၢးစံးဘျုးစံးဖှိၣ် ကစၢ်ယွၤလီၤ. တဘျီတခီၣ် နကဆိကမိၣ်ဘၣ် တၢ်ဟ့ၣ်လၢ ကစၢ်ယွၤဟ့ၣ်လီၤဝဲ လၢနီၢ်ခိဒီးနီၢ်သးအဂီၢ် ဒီးအဆဲးဟ့ၣ်လီၤဝဲန့ၣ်လီၤ. (၅ မိၤၡ့ ၈:၁၇, ၁၈; မၤတၢ် ၁၄:၁၇) နကြၢးဆိကမိၣ်ကွၢ် ကစၢ်ယွၤ အတၢ်ဂ့ၤတၢ်ဝါတဖၣ် တကးဒံးဘၣ် နကြၢးဆိကမိၣ်ထံ တၢ်ဆိၣ်ဂ့ၤလၢ ကစၢ်ယွၤဟ့ၣ်နၤ ဒီးပှၤလၢနအဲၣ်အီၤတဖၣ်န့ၣ်လီၤ. နမ့ၢ်ဆိကမိၣ်ထံ တၢ်ဘၣ်တ့ကစၢ် သးအိၣ်ဟ့ၣ်တၢ်အဂ့ၢ်န့ၣ် နကအဲၣ်ဒိး စံးဘျုးစံးဖှိၣ်အါထီၣ်အီၤ ဒီးနကပလၢၢ်ဘၣ်လၢ အဝဲအဲၣ်နၤ ဒီးပာ်လုၢ်ပာ်ပှ့ၤနၤ ဒိၣ်မးလီၤ.—၁ ယိၤဟၣ် ၄:၉.
ပကြၢးဆိကမိၣ်ထံ တၢ်လၢယဟိဝၤယွၤ ဟ့ၣ်ပှၤတဖၣ် တကးဒံးဘၣ် ပကဘၣ်စံးဘျုးစံးဖှိၣ်အီၤ ခီဖျိလၢ အတၢ်မၤဂ့ၤအဃိလီၤ. (စံးထီၣ်ပတြၢၤ ၁၀၀:၄, ၅) ပှၤတဲဝဲလၢ “တၢ်စံးဘျုးစံးဖှိၣ်န့ၣ် မၤသးခုအါထီၣ် ပှၤသးလီၤ.”
နမ့မ့ၢ် ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်န့ၣ် နတၢ်ရ့လိာ်သးဒီးပှၤဂၤ ကဂ့ၤဒိၣ်ထီၣ်
အဂၤတမံၤန့ၣ် ပမ့မ့ၢ် ပှၤလၢစံးဘျုးစံးဖှိၣ်တၢ်န့ၣ် ပတၢ်ရ့လိာ်သးဒီး ပှၤဂၤကဂ့ၤထီၣ်လီၤ. ပဝဲခဲလၢာ်န့ၣ် ပအဲၣ်ဒိးလၢ ပှၤဂၤပာ်ဖျါထီၣ် တၢ်စံးဘျုးစံးဖှိၣ် လၢပဖီခိၣ်လီၤ. ဖဲနစံးဘျုးစံးဖှိၣ်ပှၤတဂၤ ခီဖျိလၢ အတၢ်မၤ လၢအပှဲၤဒီးတၢ်အဲၣ်တၢ်ကွံအခါ နတၢ်ရ့လိာ်သးဒီးအီၤ ကဘူးဒိၣ်ထီၣ်လီၤ. (ရိမ့ၤ ၁၆:၃, ၄) တကးဒံးဘၣ် ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်န့ၣ် အါတက့ၢ် အအဲၣ်ဒိးမၤစၢၤပှၤဂၤလီၤ. အဝဲသ့ၣ် ပာ်သူၣ်ပာ်သးဝဲ ပှၤဂၤအတၢ်မၤ လၢအပှဲၤဒီးတၢ်အဲၣ်တၢ်ကွံ ဒီးအကသးအိၣ်ပာ်ဖျါထီၣ် ကဒါက့ၤ တၢ်အဲၣ်တၢ်ကွံလီၤ. ပမ့ၢ်မၤစၢၤပှၤဂၤန့ၣ် ပကဒိးန့ၢ်ဘၣ် တၢ်သးခုလီၤ. ယ့ၣ်ၡူးစ့ၢ်ကီး တဲဝဲလၢ “ဟ့ၣ်တၢ်န့ၣ် ဘၣ်တၢ်ဆိၣ်ဂ့ၤ [“န့ၢ်ဘၣ်တၢ်သးခု,” NWT] အါန့ၢ် ဒိးန့ၢ်တၢ်တက့ၢ်လီၤ.”—မၤတၢ် ၂၀:၃၅.
ရီဘၢၤ အဲမၤ လၢအမ့ၢ် ပှၤဟံးစုနဲၣ်ကျဲတၢ်တဂၤလၢ ခဲၤလံၤဖိနံယါ အဖၠၣ်စိမိၤန့ၣ် ဃုသ့ၣ်ညါဝဲ တၢ်ဂ့ၢ်လၢဘၣ်ဃးဒီး တၢ်စံးဘျုးစံးဖှိၣ် ဒီးအဝဲတဲဝဲလၢ “ပကကဲထီၣ် ပှၤလၢအစံးဘျုးစံးဖှိၣ်တၢ်အဂီၢ် ပကဘၣ် သ့ၣ်ညါလၢ ပလိၣ်ဘၣ်လိာ်သး တဂၤဒီးတဂၤလီၤ. တဘျီတခီၣ် ပဟ့ၣ်တၢ် ဒီးတဘျီတခီၣ် ပန့ၢ်ဘၣ်တၢ်လီၤ.” ဒ်သိးပကဆဲးအိၣ်မူအဂီၢ် ပလိၣ်ဘၣ်ပှၤဂၤ လၢကျဲအါဘိလီၤ. အဒိ ပှၤကဘၣ်ကတဲာ်ကတီၤန့ၢ်ပှၤ တၢ်အီၣ်တၢ်အီ မ့တမ့ၢ် ကသံၣ်ကသီလီၤ. (၁ ကရံၣ်သူး ၁၂:၂၁) ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်န့ၣ် ပာ်လုၢ်ပာ်ပှ့ၤဝဲ တၢ်လၢပှၤဂၤ မၤန့ၢ်အီၤတဖၣ်န့ၣ်လီၤ. မ့ၢ်နမ့ၢ်ပှၤလၢ အသ့ၣ်ညါဆၢက့ၤ တၢ်ဘျုးတၢ်ဖှိၣ်ဧါ.
တၢ်စံးဘျုးစံးဖှိၣ် ဒီးနတၢ်ထံၣ်လၢ ဘၣ်ဃးဒီး တၢ်အိၣ်မူ
တၢ်စံးဘျုးစံးဖှိၣ်န့ၣ် မၤစၢၤစ့ၢ်ကီးပှၤဒ်သိး ပကသးစၢၢ်ဆၢ တၢ်လၢအဂ့ၤတကပၤ အါန့ၢ်ဒံး အအၢတကပၤလီၤ. ပမ့ၢ်ဘၣ်တဲအဒိန့ၣ် ပသးန့ၣ် မၤတၢ်ဒ်သိး တၢ်ပှဲၢ်ထံ (တၢ်ပှံၢ်ထံ) အသိးလီၤ. ဖဲအဝဲပှဲၢ်ကွံာ် တၢ်လၢအတဂ့ၤဘၣ်အခါ နကဒိးန့ၢ်ဘၣ် တၢ်လၢအဂ့ၤလီၤ. နမ့ၢ်သးစၢၢ်ဆၢ တၢ်လၢအဂ့ၤတဖၣ်န့ၣ် နသးစၢၢ်ဆၢ တၢ်ကီတၢ်ခဲတဖၣ် ကစှၤလီၤလီၤ. နစံးဘျုးစံးဖှိၣ်တၢ် ဒံးအါထီၣ်န့ၣ် နကအိၣ်ဒီး တၢ်ထံၣ်လၢအဂ့ၤ ဒံးအါထီၣ်လီၤ. ဒီးနမ့ၢ်အိၣ်ဒီး တၢ်ထံၣ်လၢအဂ့ၤ ဒံးယံာ်ဒံးအါထီၣ်န့ၣ် နကအဲၣ်ဒိး စံးဘျုးစံးဖှိၣ်တၢ် ဒံးယံာ်ဒံးအါထီၣ်လီၤ. နမ့ၢ်သးစၢၢ်ဆၢ တၢ်လၢနကဘၣ်စံးဘျုးစံးဖှိၣ်အီၤတဖၣ်န့ၣ် ကမၤစၢၤနၤလၢ နကမၤဒ် တၢ်မၢဖိပီလူး တဲဝဲအသိးလီၤ. အဝဲတဲဝဲလၢ “သးခုလၢကစၢ်အပူၤ တဘိယူၢ်ဃီတက့ၢ်.”—ဖံလံးပံၤ ၄:၄.
နမ့မ့ၢ်ပှၤလၢ အစံးဘျုးစံးဖှိၣ်တၢ်န့ၣ် ကမၤစၢၤနၤဒ်သိး နသုတဆိကမိၣ်တၢ် လၢအတဂ့ၤတခီ တဂ့ၤအဂီၢ်လီၤ. နစံးဘျုးစံးဖှိၣ်တၢ် ဒီးတကတီၢ်ဃီန့ၣ် နကသူၣ်က့ၣ်သးကါတၢ်, နကသူၣ်အုးသးအုး မ့တမ့ၢ် သးဒိၣ်ထီၣ်တၢ်န့ၣ် တညီဘၣ်. ပှၤလၢအသးအိၣ် စံးဘျုးစံးဖှိၣ်တၢ်န့ၣ် တအဲၣ်တၢ်ထူးတၢ်တီၤဘၣ်. တကးဒံးဘၣ် အဝဲသးမံဒီး တၢ်လၢအိၣ်ဒီးအီၤ ဒီးတဂုာ်ကျဲးစၢး လၢကဒိးန့ၢ်အါထီၣ်တၢ်အဂီၢ် ထီဘိဘၣ်.—ဖံလံးပံၤ ၄:၁၂.
ဆိကမိၣ်ထံ တၢ်ဆိၣ်ဂ့ၤခဲလၢာ် လၢနဒိးန့ၢ်ဘၣ်အီၤတဖၣ်
ဒ်ပမ့ၢ်ခရံာ်ဖိအသိး ပသ့ၣ်ညါလၢ မုၣ်ကီၤလံၢ်အဲၣ်ဒိးလၢ ပသးအုး ဒီးသးဟးဂီၤ ခီဖျိလၢ တၢ်ကီတၢ်ခဲလၢ ပထံၣ်ဘၣ်အီၤလၢ မုၢ်နံၤခံကတၢၢ်အံၤအဃိလီၤ. နမ့ၢ်အိၣ်ဒီး တၢ်ထံၣ်လၢအတဂ့ၤ ဒီးကဒူးကဒ့ၣ်တၢ်ထီဘိန့ၣ် အဝဲကသးခုဒိၣ်မးလီၤ. ဒီးနမ့မ့ၢ် ပှၤဒ်န့ၣ်န့ၣ် တညီလၢ ပှၤကဒိကနၣ် နတၢ်သးခုကစီၣ်အဂီၢ်လၢၤဘၣ်. တၢ်စံးဘျုးစံးဖှိၣ်တၢ်န့ၣ် ဘၣ်ထွဲလိာ်အသးဒီး သးအတၤသၣ် ဒိၣ်မးလီၤ. အဒိ ခီဖျိလၢ ပထံၣ်ဘၣ် တၢ်အဂ့ၤ လၢကစၢ်ယွၤဟ့ၣ်လီၤပှၤတဖၣ်အဃိ ဒီးပနာ် အတၢ်အၢၣ်လီၤအီလီၤလၢ ခါဆူညါအဂီၢ်အဃိ ပဒိးန့ၢ်ဘၣ် တၢ်သးခုလီၤ.—ကလၤတံ ၅:၂၂, ၂၃.
ဒ်နမ့ၢ် ယဟိဝၤယွၤ အခ့အပှၤတဂၤအသိး ဘၣ်သ့ၣ်သ့ၣ် နကတူၢ်လိာ် တၢ်လၢနဖးဘၣ်အီၤလၢ တၢ်ဂ့ၢ်အံၤအပူၤလီၤ. ဘၣ်ဆၣ် ဘၣ်သ့ၣ်သ့ၣ် နကတူၢ်ဘၣ်ဒံးလၢ ပကစံးဘျုးစံးဖှိၣ်တၢ် ဒီးအိၣ်ဒီးတၢ်ထံၣ်လၢအဂ့ၤ ထီဘိန့ၣ် တညီဘၣ်. သနာ်က့ တဘၣ်ဟ့ၣ်အၡူတဂ့ၤ. နမၤဂ့ၤထီၣ် နတၢ်ပာ်သူၣ်ပာ်သး လၢနကစံးဘျုးစံးဖှိၣ်တၢ်အဂီၢ် ဒီးနဆဲးပၢၤဃာ် နတၢ်ပာ်သူၣ်ပာ်သးအံၤသ့လီၤ. နမၤအီၤ ကသ့ဒ်လဲၣ်. တနံၤဘၣ်တနံၤန့ၣ် ဟံးန့ၢ်တၢ်ဆၢကတီၢ် ဒီးဆိကမိၣ်ကွၢ် ဘၣ်ဃးဒီး နကဘၣ်စံးဘျုးစံးဖှိၣ်တၢ် လၢတၢ်ဂ့ၢ်မနုၤ အဂီၢ်လဲၣ်န့ၣ်တက့ၢ်. နမၤဒ်န့ၣ် ဒံးအါန့ၣ် နကအဲၣ်ဒိး စံးဘျုးစံးဖှိၣ်တၢ် ဒံးအါလီၤ. နမ့ၢ်မၤဒ်န့ၣ်န့ၣ် နကအိၣ်ဒီး တၢ်သးခုဒိၣ်န့ၢ်ဒံး ပှၤလၢအသးစၢၢ်ဆၢ တၢ်ကီတၢ်ခဲတဖၣ်န့ၣ်လီၤ. ဆိကမိၣ်ကွၢ် တၢ်လၢကစၢ်ယွၤ ဒီးပှၤဂၤမၤဝဲတဖၣ်န့ၣ် ကဲထီၣ်တၢ်ဂံၢ်တၢ်ဘါလၢနဂီၢ် ဒီးအမၤသးခုနၤ ဒ်လဲၣ်န့ၣ်တက့ၢ်. ဒီးတနံၤဘၣ်တနံၤန့ၣ် နကွဲးလီၤစ့ၢ်ကီး တၢ်လၢနကဘၣ်စံးဘျုးစံးဖှိၣ်အီၤအဂ့ၢ် ခံမံၤ, သၢမံၤသ့လီၤ.
ပှၤလၢအဃုသ့ၣ်ညါတၢ်တဖၣ် ထံၣ်ဘၣ်ဝဲလၢ “နမ့ၢ်စံးဘျုးစံးဖှိၣ်ပှၤဂၤ ထီဘိန့ၣ် အဆီတလဲန့ၢ် နခိၣ်နူာ်မၤတၢ်အကျိၤအကျဲသ့အဃိ ကညီလၢ နကအိၣ်ဒီးတၢ်သးခု လၢနတၢ်အိၣ်မူအပူၤလီၤ.” ပှၤလၢအစံးဘျုးစံးဖှိၣ်တၢ်န့ၣ် န့ၢ်ဘၣ်တၢ်သးခု အါမးလီၤ. ဆိကမိၣ်ကွၢ် တၢ်ဆိၣ်ဂ့ၤလၢ နဒိးန့ၢ်ဘၣ်အီၤတဖၣ်, သးခုလၢ တၢ်လၢနဒိးန့ၢ်အီၤ လၢနတၢ်အိၣ်မူအပူၤ ဒီးသးအိၣ်စံးဘျုးစံးဖှိၣ်တၢ် ထီဘိတက့ၢ်. ပာ်လုၢ်ပာ်ပှ့ၤ တၢ်လၢနဒိးန့ၢ်ဘၣ်အီၤတဖၣ်ဒီး “စံးထီၣ်ပတြၢၤယွၤ” ခီဖျိလၢအ “ဂ့ၤဝဲ” အဃိဒီး “စံးထီၣ်ပတြၢၤ တၢ်အဘျုးအဖှိၣ်” “လၢတၢ်ခဲလၢာ်အပူၤ” တက့ၢ်.—၁ ကွဲးနီၣ်တၢ် ၁၆:၃၄; ၁ သ့းစၤလနံ ၅:၁၈.