ကွၢ်လိမၤဒိး ယဟိဝၤယွၤ အတၢ်စံၣ်ညီၣ်တီ ဒီးအတၢ်သးကညီၤတက့ၢ်
“စံၣ်ညီၣ်တၢ်တီ, ဒီးဟ့ၣ်တၢ်ဘျုးတၢ်ဖှိၣ်, ဒီးတၢ်သးကညီၤ, တဂၤလၢအဒီပုၢ်ဝဲၢ်တဂၤလၢ အဒီပုၢ်ဝဲၢ်တက့ၢ်.”—စကၤရယၤ ၇:၉.
၁, ၂. (က) ယ့ၣ်ၡူးထံၣ်ဝဲ ယွၤအတၢ်သိၣ်တၢ်သီတဖၣ်ဒ်လဲၣ်. (ခ) ပှၤကွဲးလံာ်ဒီး ပှၤဖၤရံၤၡဲတဖၣ် သူကမၣ်ဝဲ ယွၤအတၢ်သိၣ်တၢ်သီဒ်လဲၣ်.
ယ့ၣ်ၡူးအဲၣ်ဝဲ စီၤမိၤၡ့အတၢ်သိၣ်တၢ်သီဒိၣ်မးလီၤ. မ့ၢ်လၢတၢ်သိၣ်တၢ်သီတဖၣ်အံၤ ဟဲလၢအပၢ်ယဟိဝၤယွၤ လၢအအဲၣ်ဝဲဒိၣ်ကတၢၢ်တဂၤအအိၣ်အဃိ အဝဲအဲၣ်ဝဲတၢ်သိၣ်တၢ်သီတဖၣ်အံၤန့ၣ် တလီၤကမၢကမၣ်ဘၣ်. စံးထီၣ်ပတြၢၤ ၄၀:၈ န့ၣ်ပာ်ဖျါထီၣ်ဝဲ ယ့ၣ်ၡူးအတၢ်ကတိၤလၢအမ့ၢ်– “ဘၣ်ယသးလၢယကမၤဖဲဒၣ်နသးလီၤ, ယကစၢ်ဧၢ, ဒီးနတၢ်သိၣ်တၢ်သီန့ၣ် အိၣ်ဝဲလၢယသးကံၢ်ပူၤလီၤ.” ယွၤအတၢ်သိၣ်တၢ်သီ လၢဝဲပှဲၤဝဲ, ကဲဘျုးဝဲ ဒီးကဟဲလၢထီၣ်ပှဲၤထီၣ်ဝဲ သပှၢ်တၢၢ်န့ၣ် ယ့ၣ်ၡူးပာ်ဖျါထီၣ်ဝဲလၢ အတၢ်စံးတၢ်ကတိၤ ဒီးအတၢ်ဖံးတၢ်မၤလီၤ.—မးသဲ ၅:၁၇-၁၉.
၂ ဖဲယ့ၣ်ၡူးထံၣ်ဝဲ ပှၤကွဲးလံာ်ဒီးပှၤဖၤရံၤၡဲတဖၣ် သူကမၣ်ဝဲ ယွၤအတၢ်သိၣ်တၢ်သီ ဒ်သိးကမၤကီမၤခဲပှၤဂၤအခါ အဝဲအသးဘၣ်ဒိဒိၣ်မးလီၤ. ယ့ၣ်ၡူး တဲအဝဲသ့ၣ်လၢ– “သုဟ့ၣ်ယွၤပၢၢ်တုၤလၢ တၢ်နၢမူနၢဆှီ ဒ်ဟီၣ်ဝီၤသွ့, စးမူ ဒီးစံယၤသ့ၣ်တဖၣ်အတၢ် ဆံဆဲၣ်ပူတပူ” န့ၣ်အဲၣ်ဒိးစံးဝဲ အဝဲသ့ၣ်မၤထွဲဝဲ စီၤမိၤၡ့အတၢ်သိၣ်တၢ်သီလၢ အကဆူးကတ့ၤ လီၤတံၢ်လီၤဆဲးလီၤ. ဘၣ်ဆၣ် အဝဲသ့ၣ်တမၤဝဲတၢ်မနုၤတဖၣ်လဲၣ်. ယ့ၣ်ၡူးစံးဝဲလၢ– “တၢ်လၢအကါဒိၣ်နီၢ်နီၢ်ဘၣ်ဃးဒီး တၢ်သိၣ်တၢ်သီ ဒ်တၢ်စံၣ်ညီၣ်တီ, တၢ်သူၣ်ကညီၤသးကညီၤ ဒီးတၢ်သူၣ်တီသးတီတဖၣ်န့ၣ်, သုတကနၣ်ဃုာ်အီၤဘၣ်.” (မးသဲ ၂၃:၂၃, ခ့ခါစှီၤကျိာ်) ပှၤဖၤရံၤၡဲတဖၣ် တနၢ်ပၢၢ်ဝဲတၢ်သိၣ်တၢ်သီတဖၣ် အခီပညီဘၣ် ဒီးအဝဲသ့ၣ်ဆိကမိၣ် လီၤအသးလၢအဂ့ၤန့ၢ်ပှၤဂၤလီၤ. ဘၣ်ဆၣ်မ့မ့ၢ် ယ့ၣ်ၡူးန့ၣ် နၢ်ပၢၢ်ဝဲစီၤမိၤၡ့ အတၢ်သိၣ်တၢ်သီတဖၣ် အခီပညီဒီး တၢ်သိၣ်တၢ်သီတခါစုာ်စုာ် ပာ်ဖျါထီၣ်ဝဲ ယဟိဝၤယွၤအဂ့ၢ်ဒ်လဲၣ်န့ၣ် အဝဲနၢ်ပၢၢ်ဝဲစ့ၢ်ကီးလီၤ.
၃. လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤလဲၣ်.
၃ ဒ်ပမ့ၢ်ခရံာ်ဖိအသိး ပတလိၣ်မၤထွဲ စီၤမိၤၡ့အတၢ်သိၣ်တၢ်သီလၢၤဘၣ်. (ရိမ့ၤ ၇:၆) ဘၣ်ဆၣ် ဘၣ်မနုၤအဃိ ယဟိဝၤယွၤ ပာ်လီၤဝဲစီၤမိၤၡ့အတၢ်သိၣ်တၢ်သီလၢ လံာ်စီဆှံအပူၤလဲၣ်. မ့ၢ်လၢကစၢ်ယွၤအဲၣ်ဒိးလၢ ပကနၢ်ပၢၢ် ဒီးမၤထွဲတၢ်လၢ “အကါဒိၣ်” တဖၣ်လီၤ. ပမ့ၢ်တဲလၢ ကျဲအဂၤတမံၤန့ၣ် အဝဲအဲၣ်ဒိးဝဲလၢ ပကနၢ်ပၢၢ်ထီၣ်လၢ ဘၣ်မနုၤအဃိ အဝဲဟ့ၣ်လီၤဝဲ တၢ်သိၣ်တၢ်သီတဖၣ်အံၤလဲၣ်. အဒိ, ဘၣ်ဃးဒီးတၢ်ပူၤဖျဲးအဝ့ၢ် အတၢ်ရဲၣ်တၢ်ကျဲၤန့ၣ် ပမၤလိန့ၢ်တၢ်မနုၤလဲၣ်. တၢ်မၤလိလၢအပူၤကွံာ်တခါန့ၣ် ပာ်ဖျါဝဲတၢ်လၢ ပှၤလၢအဃ့ၢ်ပူၤဖျဲးအသးတဂၤ ကဘၣ်မၤဝဲန့ၣ် ကဲထီၣ်တၢ်မၤလိလၢ ပဂီၢ်ဒ်လဲၣ်အဂ့ၢ်န့ၣ်လီၤ. လၢတၢ်မၤလိအံၤအပူၤ ပကမၤလိဘၣ်လၢ တၢ်ပူၤဖျဲးအဝ့ၢ်န့ၣ် သိၣ်လိပှၤ ယဟိဝၤယွၤအဂ့ၢ်ဒ်လဲၣ် ဒီးပကွၢ်လိမၤဒိး အတၢ်ဂ့ၤတၢ်ဝါတဖၣ် ကသ့ဒ်လဲၣ်. ဒီးပကတဲသကိး တၢ်သံကွၢ်လၢ လာ်သၢဖျၢၣ်အံၤ အတၢ်စံးဆၢလီၤ. တၢ်ပူၤဖျဲးအဝ့ၢ်န့ၣ် ပာ်ဖျါထီၣ်ဝဲလၢ ယဟိဝၤယွၤအိၣ်ဒီးတၢ်သးကညီၤဒ်လဲၣ်, သိၣ်လိပှၤလၢ ဘၣ်ဃးဒီးသးသမူန့ၣ် ကစၢ်ယွၤအတၢ်ထံၣ်အိၣ်ဒ်လဲၣ် ဒီးတၢ်ရဲၣ်တၢ်ကျဲၤအံၤ ပာ်ဖျါထီၣ်ဝဲ ယွၤအတၢ်စံၣ်ညီၣ်တီအဂ့ၢ်ဒ်လဲၣ်. တၢ်ဂ့ၢ်တခါစုာ်စုာ်န့ၣ် ဆိကမိၣ်ထံအီၤ ဒ်သိးနကွၢ်လိမၤဒိး ယဟိဝၤယွၤ ကသ့ဒ်လဲၣ်န့ၣ်တက့ၢ်.—ဖး အ့းဖ့းစူး ၅:၁ တက့ၢ်.
တၢ်ပူၤဖျဲးအဝ့ၢ် အိၣ်တၢ်အလီၢ်န့ၣ် ပာ်ဖျါထီၣ် ကစၢ်ယွၤအတၢ်သးကညီၤ
၄, ၅. (က) ဒ်သိးပှၤလၢ ဃ့ၢ်ပူၤဖျဲးအသးတဂၤ ကဃ့ၢ်တုၤလၢ တၢ်ပူၤဖျဲးအဝ့ၢ်အပူၤ ညီညီအဂီၢ် တၢ်ရဲၣ်တၢ်ကျဲၤအိၣ်ဝဲဒ်လဲၣ်, ဘၣ်မနုၤအဃိလဲၣ်. (ခ) တၢ်ရဲၣ်တၢ်ကျဲၤအံၤ သိၣ်လိပှၤဘၣ်ဃးဒီး ယဟိဝၤယွၤအဂ့ၢ်ဒ်လဲၣ်.
၄ ယဟိဝၤယွၤ ရဲၣ်လီၤကျဲၤလီၤဝဲ ဝ့ၢ်ဃုဖျၢၣ်ဒ်သိး ပှၤလဲၤဃ့ၢ်ပူၤဖျဲးအသး ကညီအဂီၢ်လီၤ. အဝဲမၢပှၤအံၣ်စရ့လးဖိတဖၣ် ပာ်လီၤတၢ်ပူၤဖျဲးအဝ့ၢ်လၢ ထံကျိယၢ်ဒ့ၣ်အကပၤ တခီသၢဖျၢၣ်တခီသၢဖျၢၣ်န့ၣ်လီၤ. ဘၣ်မနုၤအဃိလဲၣ်. ဒ်သိးပှၤလၢအဃ့ၢ်ပူၤဖျဲးအသးတဖၣ် ကလဲၤဘၣ်ဝဲညီညီ ဒီးကတုၤချ့ချ့အဂီၢ်လီၤ. (၄ မိၤၡ့ ၃၅:၁၁-၁၄) ဒီးကျဲလၢအလဲၤဆူ တၢ်ပူၤဖျဲးအဝ့ၢ်တဖၣ်စ့ၢ်ကီး အဝဲသ့ၣ် ကဘၣ်မၤဝဲ ဂ့ၤဂ့ၤဘၣ်ဘၣ်လီၤ. (၅ မိၤၡ့ ၁၉:၃) ဒ်ပှၤယူဒၤဖိအလုၢ်အလၢ်အိၣ်ဝဲသိး လၢကျဲန့ၣ်အဝဲသ့ၣ် ဘၣ်ပာ်လီၤဝဲတၢ်ပနီၣ် ဒ်သိးကမၤစၢၤ ပှၤလၢအဃ့ၢ်ပူၤဖျဲးအသးတဖၣ် လဲၤဆူတၢ်ပူၤဖျဲးအဝ့ၢ်ကဘၣ်အဂီၢ်လီၤ. မ့ၢ်လၢပှၤအံၣ်စရ့လးဖိတဖၣ် အိၣ်ဒီးတၢ်ပူၤဖျဲးအဝ့ၢ်အဃိ အဝဲသ့ၣ်မ့ၢ်မၤသံဘၣ် ပှၤတဂၤဂၤလၢ တၢ်တပာ်သူၣ်ပာ်သးအပူၤန့ၣ် အဝဲသ့ၣ်တလိၣ်လဲၤဃ့ၢ်ပူၤဖျဲးအသးလၢ ထံကီၢ်အဂၤလၢကလ့ပစီအီၤလၢ ကဘူၣ်ထီၣ်ဘါထီၣ် ယွၤလၢအကမၣ်န့ၣ်ဘၣ်.
၅ ဆိကမိၣ်ကွၢ်တၢ်ဂ့ၢ်တဖၣ်အံၤတက့ၢ်– ယဟိဝၤယွၤ မၤလိာ်ဝဲလၢ ပှၤလၢအမၤသံတၢ်န့ၣ် ကဘၣ်တၢ်မၤသံအီၤလီၤ. ဘၣ်ဆၣ် အဝဲရဲၣ်လီၤကျဲၤလီၤဝဲဒ်သိး ပှၤလၢအမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤတဖၣ် ကဒိးန့ၢ်ဘၣ် အတၢ်သးကညီၤ ဒီးတၢ်ဒီသဒၢအဂီၢ်လီၤ. ပှၤကူၣ်ဘၣ်ကူၣ်သ့လၢ ဘၣ်ဃးလံာ်စီဆှံတဂၤ စံးဝဲလၢ– “တၢ်ခဲလၢာ် ဘၣ်တၢ်ရဲၣ်လီၤကျဲၤလီၤအီၤ ဂ့ၤဂ့ၤဘၣ်ဘၣ် ဒီးညီညီဖိလီၤ.” ယဟိဝၤယွၤ တမ့ၢ်စံၣ်ညီကွီၢ်လၢအအၢအသီဘၣ် ဒီးတကွၢ်ထဲအခ့အပှၤတဖၣ်အတၢ်ကမၣ် ဒ်သိးကစံၣ်ညီၣ်အဝဲသ့ၣ်အဂီၢ်န့ၣ်ဘၣ်. လၢတၢ်န့ၣ်အလီၢ် အဝဲမ့ၢ် “ယွၤလၢအသူၣ်ကညီၤတၢ်ဒိၣ် သးကညီတၢ်အါ” တဂၤလီၤ.—အ့းဖ့းစူး ၂:၄.
၆. ပှၤဖၤရံၤၡဲတဖၣ် ကွၢ်လိမၤဒိး ယဟိဝၤယွၤအတၢ်သးကညီၤဧါ. တဲနၢ်ပၢၢ်တက့ၢ်.
၆ ပှၤဖၤရံၤၡဲတဖၣ်န့ၣ် တအဲၣ်ဒိးပာ်ဖျါထီၣ် တၢ်သးကညီၤလၢပှၤဂၤအဖီခိၣ်ဘၣ်. အဒိ, ပှၤယူဒၤဖိတဖၣ် အလုၢ်အလၢ်အိၣ်ဝဲလၢ ပှၤတဂၤမ့ၢ်မၤဘၣ် တၢ်ကမၣ်တခါလီၢ်လီၢ် အါန့ၢ်သၢဘျီန့ၣ် ပှၤဖၤရံၤၡဲသ့ၣ်တဖၣ် တပျၢ်အတၢ်ကမၣ်လၢၤဘၣ်. အဝဲသ့ၣ်အတၢ်ပာ်သူၣ်ပာ်သးကမၣ်ဝဲန့ၣ် ယ့ၣ်ၡူးပာ်ဖျါထီၣ်ဝဲခီဖျိ သူဝဲတၢ်အဒိလၢ ပှၤဖၤရံၤၡဲတဂၤ လဲၤဃ့ထုကဖၣ်တၢ်လၢ ပှၤဃ့သွဲဖိတဂၤအကပၤန့ၣ်လီၤ. ပှၤဖၤရံၤၡဲတဂၤန့ၣ် စံးဝဲလၢ– “ယွၤဧၢ, ယစံးထီၣ်ပတြၢၤနၤလီၤ. အဂ့ၢ်ဒ်အံၤ, ယတဒ်သိးဘၣ်ဒီးပှၤဂၤဘၣ်, ပှၤဂုာ်ဆူၣ်ပျိဆူၣ်တၢ်, ပှၤတတီတလိၤဘၣ်, ပှၤအဲၣ်ဘၢတၢ်, ဒီးပှၤဃ့သွဲတဂၤအံၤဒၣ်လဲာ်ဘၣ်လီၤ.” ဘၣ်မနုၤအဃိ ယ့ၣ်ၡူးစံးဝဲ ဒ်န့ၣ်လဲၣ်. မ့ၢ်လၢပှၤဖၤရံၤၡဲတဖၣ်န့ၣ် “တယူးတယီၣ်” ပှၤဂၤနီတစဲးဘၣ် ဒီးအဝဲသ့ၣ် ဆိကမိၣ်ဝဲလၢ တလိၣ်ပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်ဘၣ်.—လူၤကၣ် ၁၈:၉-၁၄.
ပှၤဃ့ပျၢ်တၢ်ကမၣ်လၢ နအိၣ်ညီဧါ. အိၣ်ဒီးတၢ်ဆီၣ်လီၤသးဒီး အိၣ်ဒ်သိးပှၤဟဲတဲတၢ်ဒီးနၤ ကညီအဂီၢ်တက့ၢ် (ကွၢ်လံာ်အဆၢ ၄-၈)
၇, ၈. (က) နကွၢ်လိမၤဒိး ယဟိဝၤယွၤအတၢ်သးကညီၤ ကသ့ဒ်လဲၣ်. (ခ) ဒ်သိးပပျၢ်ပှၤဂၤ အတၢ်ကမၣ်ကညီအဂီၢ် ဘၣ်မနုၤအဃိ ပကဘၣ်အိၣ်ဒီး တၢ်ဆီၣ်လီၤသးလဲၣ်.
၇ ကွၢ်လိမၤဒိး ပှၤဖၤရံၤၡဲတဖၣ်တဂ့ၤ. မ့မ့ၢ် ကွၢ်လိမၤဒိး ယဟိဝၤယွၤတက့ၢ်. ပာ်ဖျါထီၣ် တၢ်သးကညီၤ ဒီးတၢ်ဒိသူၣ်ဒိသးတက့ၢ်. (ဖး ကလီးစဲ ၃:၁၃ တက့ၢ်.) နမ့ၢ်မၤဒ်အံၤန့ၣ် ကညီလၢ ပှၤဂၤကဟဲဃ့ပျၢ် အတၢ်ကမၣ်အဂီၢ်လီၤ. (လူၤကၣ် ၁၇:၃, ၄) သံကွၢ်လီၤနသးလၢ– ‘ပှၤလၢအမၤကမၣ်ယၤ အါဘျီတဖၣ်န့ၣ် မ့ၢ်ယပျၢ်ကွံာ်အတၢ်ကမၣ်တဘျီဃီဧါ. ပှၤလၢအမၤသးထီၣ်ယၤ မ့တမ့ၢ် အမၤဘၣ်ဒိယၤတဖၣ်န့ၣ် မ့ၢ်ယသးအိၣ် မၤဃူမၤဖိးက့ၤတၢ်ဒီး အီၤဧါ.’
၈ ဒ်သိးပကပျၢ်ပှၤဂၤအတၢ်ကမၣ်အဂီၢ် ပကဘၣ်အိၣ်ဒီး တၢ်ဆီၣ်လီၤသးလီၤ. ပှၤဖၤရံၤၡဲတဖၣ်န့ၣ် အဝဲသ့ၣ်ဆိကမိၣ်လၢ အဂ့ၤန့ၢ်ပှၤဂၤအဃိ အဝဲသ့ၣ်တပျၢ်ပှၤဂၤအတၢ်ကမၣ်ဘၣ်. ဘၣ်ဆၣ်ဒ်ပမ့ၢ်ခရံာ်ဖိအသိး ပကဘၣ်အိၣ်ဒီးတၢ်ဆီၣ်လီၤသးဒီး “ပာ်ပှၤဂၤဂ့ၤန့ၢ်” ပနီၢ်ကစၢ် ဒီးပျၢ်ပှၤဂၤအတၢ်ကမၣ်လီၤ. (ဖံလံးပံၤ ၂:၃) ပသံကွၢ်လီၤပသးသ့လၢ ‘မ့ၢ်ယကွၢ်လိမၤဒိး ယဟိဝၤယွၤ ဒီးအိၣ်ဒီးတၢ်ဆီၣ်လီၤသးဧါ.’ ပမ့ၢ်အိၣ်ဒီးတၢ်ဆီၣ်လီၤသးန့ၣ် ကညီလၢပှၤဂၤကဃ့ပျၢ်အတၢ်ကမၣ် ဒီးကညီလၢပကပျၢ်ပှၤဂၤ အတၢ်ကမၣ်စ့ၢ်ကီးလီၤ. ပာ်ဖျါထီၣ်တၢ်သးကညီၤ ဒီးတဘၣ်သးဒိၣ်ထီၣ်တၢ်ချ့ချ့တဂ့ၤ.—စံၣ်တဲၤတဲလီၤတၢ် ၇:၈, ၉.
ပမ့ၢ်ပာ်လုၢ်ပာ်ပှ့ၤ သးသမူန့ၣ် ပတဂၢ်လီၤ “တၢ်သွံၣ်လၢအတၢ်ဒဲးဘးတအိၣ်ဘၣ်” န့ၣ်ဘၣ်
၉. ဒ်သိးပှၤအံၣ်စရ့လးဖိတဖၣ် ကသ့ၣ်ညါလၢ သးသမူမ့ၢ်တၢ်လၢ အလုၢ်ဒိၣ်ပှ့ၤဒိၣ်အဂီၢ် ယဟိဝၤယွၤ မၤစၢၤအဝဲသ့ၣ်ဒ်လဲၣ်.
၉ တၢ်ပူၤဖျဲးအဝ့ၢ် အတၢ်ရဲၣ်တၢ်ကျဲၤန့ၣ် မ့ၢ်ဒ်သိးကဒီသဒၢဝဲ ပှၤအံၣ်စရ့လးဖိလၢ အမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤတဖၣ်န့ၣ်လီၤ. (၅ မိၤၡ့ ၁၉:၁၀) ယဟိဝၤယွၤ ပာ်လုၢ်ပာ်ပှ့ၤဝဲသးသမူ ဒီးသးဟ့ဝဲတၢ်မၤသံမၤဝီလီၤ. (ကတိၤဒိ ၆:၁၆, ၁၇) ပှၤတဂၤမ့ၢ်မၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤဒၣ်လဲာ် ကစၢ်ယွၤတပာ်ဝဲလၢ တၢ်ဂ့ၢ်ဆံးဆံးဖိဘၣ် မ့ၢ်လၢအမ့ၢ်ယွၤလၢအတီအလိၤ ဒီးအစီအဆှံတဂၤအဃိလီၤ. ပှၤလၢအမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤတဂၤ ဒိးန့ၢ်ဘၣ်ဝဲတၢ်သးကညီၤသ့လီၤ. ဘၣ်ဆၣ်အဝဲကဘၣ်လဲၤတဲဘၣ် ပှၤသူၣ်က့သးပှၢ်တဖၣ်လၢ အတၢ်ဂ့ၢ်တၢ်ကျိၤလီၤ. ပှၤလၢအမၤသံတၢ်တဂၤအံၤ ပှၤသူၣ်က့သးပှၢ်တဖၣ် မ့ၢ်စံၣ်ညီၣ်ဝဲလၢ အဝဲမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤန့ၣ် အဝဲကဘၣ်အိၣ်လၢ တၢ်ပူၤဖျဲးအဝ့ၢ်ပူၤ တုၤလၢပှၤလုၢ်တၢ်အခိၣ်သံဝဲတစုလီၤ. ဘၣ်သ့ၣ်သ့ၣ် ပှၤလၢအဃ့ၢ်ပူၤဖျဲးအသးတဂၤ ကဘၣ်အိၣ်လၢ တၢ်ပူၤဖျဲးအဝ့ၢ်ပူၤ တစိၤအသးလီၤ. တၢ်ရဲၣ်တၢ်ကျဲၤအံၤ ဒုးသ့ၣ်ညါဝဲ ပှၤအံၣ်စရ့လးဖိခဲလၢာ်လၢ သးသမူန့ၣ်မ့ၢ်တၢ်လၢအလုၢ်ဒိၣ်ပှ့ၤဒိၣ်လီၤ. ဒ်သိးကမၤလၤကပီၤ ပှၤလၢအဟ့ၣ်သးသမူတဂၤကသ့အဂီၢ် အဝဲသ့ၣ်ကဘၣ်ဟးဆှဲး တၢ်လၢကကဲထီၣ် တၢ်ဘၣ်ယိၣ်လၢ ပှၤဂၤအသးသမူအဂီၢ်န့ၣ်လီၤ.
၁၀. ယ့ၣ်ၡူးပာ်ဖျါထီၣ်ဝဲ ပှၤကွဲးလံာ်ဒီပှၤဖၤရံၤၡဲတဖၣ် တပာ်လုၢ်ပာ်ပှ့ၤဝဲ ပှၤဂၤအသးသမူလၢကျဲဒ်လဲၣ်.
၁၀ ပှၤကွဲးလံာ် ဒီးပှၤဖၤရံၤၡဲတဖၣ်န့ၣ် တပာ်လုၢ်ပာ်ပှ့ၤဝဲ သးသမူ ဒ်ယဟိဝၤယွၤအသိးဘၣ်. ယ့ၣ်ၡူးစံးဘၣ် အဝဲသ့ၣ်လၢ– “တၢ်သ့ၣ်ညါအနီၣ်ဝံၣ်န့ၣ်, သုစိာ်ကွံာ်လံ, သုတလဲၤနုာ်ဘၣ် သုကစၢ်ဒၣ်သုဝဲဘၣ်. ဒီးပှၤလဲၤနုာ်ဝဲတဖၣ်န့ၣ်, သုတြီအီၤလီၤ.” (လူၤကၣ် ၁၁:၅၂) ယ့ၣ်ၡူး အဲၣ်ဒိးစံးဝဲတၢ်မနုၤလဲၣ်. အဲၣ်ဒိးစံးဝဲလၢ ပှၤကွဲးလံာ်ဒီး ပှၤဖၤရံၤၡဲတဖၣ်န့ၣ် အိၣ်ဒီးမူဒါလၢ ကတဲနၢ်ပၢၢ်ပှၤဂၤလၢ ကစၢ်ယွၤအကလုၢ်ကထါ ဒီးမၤစၢၤအဝဲသ့ၣ်ဒ်သိးကန့ၢ်ဘၣ် တၢ်မူအထူအယိာ်အဂီၢ်လီၤ. ဘၣ်ဆၣ်အဝဲသ့ၣ် တမၤဝဲဒ်န့ၣ်ဘၣ်. လၢတၢ်န့ၣ်အလီၢ် အဝဲသ့ၣ်တြီဝဲပှၤဂၤလၢ ကပိာ်ဝဲယ့ၣ်ၡူးလၢအမ့ၢ် “တၢ်မူအခိၣ်” တဂၤအခံလီၤ. (မၤတၢ် ၃:၁၅) ခီဖျိလၢအဝဲသ့ၣ် မၤဝဲဒ်အံၤအဃိ ဆှၢဝဲပှၤဂၤဒ်သိးကတုၤလၢ တၢ်ဟးဂီၤလီၤ. ပှၤကွဲးလံာ်ဒီးပှၤဖၤရံၤၡဲတဖၣ်န့ၣ် ပာ်ထီၣ်ထီအသး ဒီးကွၢ်ထဲအနီၢ်ကစၢ်အဂီၢ် ဒီးတသးအိၣ်မၤစၢၤပှၤဂၤဘၣ်. အဝဲသ့ၣ်မ့ၢ်ပှၤလၢအအၢအသီ ဒီးအတၢ်အဲၣ်တၢ်ကွံတအိၣ်ဘၣ်.
၁၁. (က) တၢ်မၢဖိပီလူး ပာ်လုၢ်ပာ်ပှ့ၤဝဲသးသမူဒ် ယဟိဝၤယွၤအသိးန့ၣ် ပာ်ဖျါထီၣ်ဝဲလၢကျဲဒ်လဲၣ်. (ခ) ဒ်သိးပကအိၣ်ဒီးတၢ်သူၣ်ဆူၣ်သးဆူၣ် လၢတၢ်စံၣ်တဲၤတဲလီၤတၢ်မၤအပူၤ ဒ်စီၤပီလူးအသိးအဂီၢ် တၢ်မနုၤကမၤစၢၤပှၤလဲၣ်.
၁၁ ဒ်သိးပသုတလီၤဂာ်ဒီး ပှၤကွဲးလံာ် ဒီးပှၤဖၤရံၤၡဲတဂ့ၤအဂီၢ် ပကွၢ်လိမၤဒိး ယဟိဝၤယွၤကသ့ဒ်လဲၣ်. ပကဘၣ်ပာ်ကဲ ဒီးပာ်လုၢ်ပာ်ပှ့ၤသးသမူလီၤ. တၢ်မၢဖိပီလူး ပာ်လုၢ်ပာ်ပှ့ၤဝဲ ပှၤဂၤအသးသမူ ခီဖျိအဝဲစံၣ်တဲၤတဲလီၤဝဲ ဘီမုၢ်တၢ်သးခုကစီၣ်ဆူ ပှၤအါဂၤအအိၣ်လီၤ. လၢတၢ်န့ၣ်အဃိ အဝဲစံးဝဲလၢ– “ယကဆှီဒီးပှၤကညီအသွံၣ်ကိးဂၤဒဲးလီၤ.” (ဖး မၤတၢ် ၂၀:၂၆, ၂၇ တက့ၢ်.) စီၤပီလူးစံၣ်တဲၤတဲလီၤတၢ်န့ၣ် မ့ၢ်ဒ်သိးအသုတတူၢ်ဘၣ်လၢ အအိၣ်ဒီးတၢ်ကမၣ်တဂ့ၤအဂီၢ်ဧါ မ့တမ့ၢ် မ့ၢ်လၢယဟိဝၤယွၤ မၢအီၤအဃိဧါ. တမ့ၢ်ဒ်န့ၣ်ဘၣ်. မ့ၢ်လၢအဝဲအဲၣ်ပှၤဂၤ ဒီးထံၣ်ဝဲလၢပှၤသးသမူန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ် ဒီးအဝဲအဲၣ်ဒိးဝဲလၢ အဝဲသ့ၣ်ကဒိးန့ၢ်ဘၣ် တၢ်မူအထူအယိာ်လီၤ. (၁ ကရံၣ်သူး ၉:၁၉-၂၃) ပဝဲစ့ၢ်ကီး ပကြၢးထံၣ်ပှၤဂၤအသးသမူဒ် ယဟိဝၤယွၤအသိးလီၤ. အဝဲအဲၣ်ဒိးလၢ ပှၤခဲလၢာ်ကပီၢ်ယၢ်လီၤက့ၤအသး ဒီးကအိၣ်မူဘၣ်လီၤထူလီၤယိာ်လီၤ. (၂ ပ့းတရူး ၃:၉) ဒ်သိးပကွၢ်လိမၤဒိး ယဟိဝၤယွၤ ကသ့အဂီၢ် ပကဘၣ်အဲၣ်ပှၤဂၤလီၤ. ပမ့ၢ်အိၣ်ဒီးတၢ်သးကညီၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကစံၣ်တဲၤတဲလီၤပှၤဂၤလၢ တၢ်သူၣ်ဆူၣ်သးဆူၣ်အပူၤ ဒီးပကအိၣ်ဒီးတၢ်သူၣ်ခုသးခုလီၤ.
၁၂. တၢ်သိၣ်တၢ်သီလၢ အဒီသဒၢပသးသမူန့ၣ် ဘၣ်မနုၤအဃိ အရ့ဒိၣ်လၢ ယွၤအခ့အပှၤတဖၣ်အဂီၢ်လဲၣ်.
၁၂ ပမ့ၢ်ပာ်လုၢ်ပာ်ပှ့ၤသးသမူဒ် ယဟိဝၤယွၤအသိးန့ၣ် ပကဒိကနၣ်တၢ်သိၣ်တၢ်သီလၢ အဒီသဒၢပသးသမူလီၤ. ဖဲပနီကါဒီးဖံးတၢ်မၤတၢ်အခါမ့ၢ်ဂ့ၤ ဖဲပသူၣ်ထီၣ်ဘှီထီၣ်တၢ်, ဘှီဂ့ၤထီၣ်က့ၤတၢ်အခါ မ့တမ့ၢ် ဖဲပလဲၤထီၣ်တၢ်အိၣ်ဖှိၣ်အခါမ့ၢ်ဂ့ၤ ပကဘၣ်မၤထွဲ တၢ်သိၣ်တၢ်သီတဖၣ်အံၤလီၤ. ပှၤတနီၤနီၤန့ၣ် ဖဲအဝဲသ့ၣ်မၤတၢ်အခါ အဲၣ်ဒိးလၢအတၢ်မၤဝံၤဝဲချ့ချ့ မ့တမ့ၢ် တအဲၣ်ဒိးလၢအကျိၣ်အစ့ လၢာ်အါအါဘၣ်အဃိ မၤကရီတၢ်လီၤ. အဝဲသ့ၣ်မ့ၢ်မၤဝဲဒ်အံၤန့ၣ် တၢ်ဘၣ်ယိၣ်အိၣ်ထီၣ်ဝဲသ့လီၤ. ဘၣ်ဆၣ် ပှၤဂၤအသးသမူ ဒီးတၢ်အိၣ်ဆူၣ်အိၣ်ချ့န့ၣ် အလုၢ်အပှ့ၤဒိၣ်န့ၢ်ဒံး တၢ်ဆၢကတီၢ် ဒီးကျိၣ်စ့လီၤ. ပကစၢ်ယွၤန့ၣ် မၤတၢ်လၢအဘၣ် ထီဘိ ဒီးပဝဲစ့ၢ်ကီး ပအဲၣ်ဒိးလီၤဂာ်ဒီးအီၤလီၤ. လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ် ထီဘိန့ၣ်အဝဲသ့ၣ် ကဘၣ်ပလီၢ်အသး ဒ်သိးတၢ်ဘၣ်ယိၣ်သုတကဲထီၣ်လၢ အနီၢ်ကစၢ် ဒီးပှၤဂၤအသးသမူအဂီၢ်တဂ့ၤန့ၣ်လီၤ. (ကတိၤဒိ ၂၂:၃) လၢတၢ်န့ၣ်အဃိ တၢ်အိၣ်ဖှိၣ်သးပှၢ် မ့ၢ်ဟ့ၣ်ပလီၢ်နၤ မ့တမ့ၢ် မ့ၢ်ဟံးစုနဲၣ်ကျဲနၤန့ၣ် ဒိကနၣ်အီၤတက့ၢ်. (ကလၤတံ ၆:၁) ပမ့ၢ်ပာ်လုၢ်ပာ်ပှ့ၤ သးသမူဒ်ယဟိဝၤယွၤအသိးန့ၣ် ပတဂၢ်လီၤ “တၢ်သွံၣ်လၢအတၢ်ဒဲးဘးတအိၣ်ဘၣ်” န့ၣ်ဘၣ်.
စံၣ်ညီၣ်တၢ် “ဒ်တၢ်စံၣ်ညီၣ်တဖၣ်အံၤအသိး” တက့ၢ်
၁၃, ၁၄. ပှၤအံၣ်စရ့လးဖိ အပှၤသူၣ်က့သးပှၢ်တဖၣ် ကွၢ်လိမၤဒိး ယဟိဝၤယွၤအတၢ်စံၣ်ညီၣ်တီ ကသ့ဒ်လဲၣ်.
၁၃ ယဟိဝၤယွၤ မၤလိာ်ပှၤအံၣ်စရ့လးဖိ အပှၤသူၣ်က့သးပှၢ်တဖၣ်လၢ ကကွၢ်လိမၤဒိးအတၢ်စံၣ်ညီၣ်တီန့ၣ်လီၤ. အဆိကတၢၢ်န့ၣ် ပှၢ်သူၣ်က့သးပှၢ်တဖၣ် ကဘၣ်ဃုသ့ၣ်ညါ တၢ်ဂ့ၢ်ခဲလၢာ်လီၤတံၢ်လီၤဆဲးလီၤ. တချုးလၢပှၤသူၣ်က့သးပှၢ်တဖၣ် ဆၢတဲာ်ဝဲလၢ ကပာ်ဖျါထီၣ်တၢ်သးကညီၤဒံးဘၣ်န့ၣ် အဝဲသ့ၣ်ကဘၣ်ဃုသ့ၣ်ညါဝဲ ပှၤလၢအမၤသံတၢ်တဂၤ အတၢ်ပာ်သူၣ်ပာ်သး ဒီးအတၢ်အိၣ်ထီၣ်အိၣ်လီၤ လၢအပူၤကွံာ် လီၤတံၢ်လီၤဆဲးလီၤ. ဒီးပှၤသူၣ်က့သးပှၢ်တဖၣ် ကဘၣ်ဃုသ့ၣ်ညါဝဲ ပှၤလၢအမၤသံတၢ်တဂၤ မၤသံဝဲပှၤဂၤန့ၣ် မ့ၢ်လၢအသးဟ့ဝဲဧါ မ့တမ့ၢ် အဲၣ်ဒိးမၤသံဝဲအဃိဧါ. (ဖး ၄ မိၤၡ့ ၃၅:၂၀-၂၄ တက့ၢ်.) တၢ်အုၣ်သးမ့ၢ်အိၣ်လၢ အဝဲမၤသံပှၤဂၤလၢ အသးဟ့ဝဲအဃိဒၣ်လဲာ် ပှၤအုၣ်အသးလီၤတံၢ်လီၤဆဲး မ့ၢ်အိၣ်အစှၤကတၢၢ်ခံဂၤမး ပှၤမၤသံအီၤသ့လီၤ.—၄ မိၤၡ့ ၃၅:၃၀.
၁၄ ပှၤသူၣ်က့သးပှၢ်တဖၣ် ဃုသ့ၣ်ညါတၢ်ဂ့ၢ်လီၤတံၢ်လီၤဆဲး မ့ၢ်ဝံၤအလီၢ်ခံ အဝဲသ့ၣ်တဘၣ်ကွၢ်ထဲ တၢ်ကမၣ်လၢပှၤအံၤမၤဝဲဘၣ် ကဘၣ်ကွၢ်စ့ၢ်ကီး ပှၤလၢအမၤသံတၢ်တဂၤအံၤ အတၢ်ပာ်သူၣ်ပာ်သးအိၣ်ဒ်လဲၣ်န့ၣ်လီၤ. ပှၤသူၣ်က့သးပှၢ်တဖၣ် ကဘၣ်အိၣ်ဒီးတၢ်ကူၣ်သ့ ဒ်သိးကသ့ၣ်ညါလၢ ဘၣ်မနုၤအဃိ အဝဲမၤဝဲဒ်အံၤလဲၣ်န့ၣ်လီၤ. လၢတၢ်န့ၣ်အဃိ ဒ်သိးအဝဲသ့ၣ်ကအိၣ်ဒီး တၢ်သ့ၣ်ညါနၢ်ပၢၢ်, တၢ်သးကညီၤ ဒီးတၢ်စံၣ်ညီၣ်တီ ဒ်ယဟိဝၤယွၤအသိးအဂီၢ် အဝဲသ့ၣ်လိၣ်ဘၣ် ယဟိဝၤယွၤအသးစီဆှံ အတၢ်မၤစၢၤလီၤ.—၂ မိၤၡ့ ၃၄:၆, ၇.
၁၅. ယ့ၣ်ၡူးအတၢ်ထံၣ်လၢ ပှၤတၢ်ဒဲးဘးဖိတဖၣ်အဖီခိၣ်န့ၣ် လီၤဆီလိာ်အသးဒီး ပှၤဖၤရံၤၡဲတဖၣ်အတၢ်ထံၣ်ဒ်လဲၣ်.
၁၅ ပှၤဖၤရံၤၡဲတဖၣ် တစံၣ်ညီၣ်တၢ်လၢ တၢ်သးကညီၤအပူၤဘၣ်. အဝဲသ့ၣ်ကွၢ်ထဲ တၢ်ကမၣ်လၢပှၤတဂၤမၤဝဲ ဒီးတကွၢ်ဝဲပှၤလၢအမၤတၢ်ကမၣ်တဂၤ အတၢ်ပာ်သူၣ်ပာ်သးဘၣ်. ဖဲပှၤဖၤရံၤၡဲတဖၣ် ထံၣ်ဝဲယ့ၣ်ၡူးအီၣ်တၢ်လၢ စီၤမးသဲအဟံၣ်အခါ အဝဲသ့ၣ်သံကွၢ် ယ့ၣ်ၡူးအပျဲၢ်အဘီၣ်တဖၣ်လၢ– “ဘၣ်မနုၤလၢ သုသရၣ်အီၣ်တၢ်ဒီးပှၤဃ့သွဲ ဒီးပှၤတၢ်ဒဲးဘးဖိလဲၣ်.” ယ့ၣ်ၡူးစံးဆၢက့ၤ အဝဲသ့ၣ်လၢ– “ပှၤလၢအအိၣ်ဆူၣ်အိၣ်ချ့တဖၣ်န့ၣ်, မၤကသံၣ်သရၣ်အလီၢ်တအိၣ်ဘၣ်, မ့ၢ်ထဲပှၤလၢအမၤတကဲဘၣ်တဖၣ်န့ၣ် ဧိၤလီၤ. တၢ်တထံၣ်အံၤ, ဘၣ်ယသးလၢတၢ်သူၣ်ကညီၤသးကညီၤ ဒီးတမ့ၢ်ဘၣ်တၢ်လုၢ်တၢ်ပာ်ဘၣ်န့ၣ်, လဲၤမၤလိတက့ၢ်. အဂ့ၢ်ဒ်အံၤ, ယဟဲကိးက့ၤပှၤအတီအလိၤတမ့ၢ်ဘၣ်, မ့ၢ်ပှၤတၢ်ဒဲးဘးဖိလီၤ.” (မးသဲ ၉:၉-၁၃) မ့ၢ်ယ့ၣ်ၡူး တဲပူၤဖျဲးဝဲ ပှၤတၢ်ဒဲးဘးဖိတဖၣ်အတၢ်ကမၣ်ဧါ. တမ့ၢ်ဘၣ်, အဝဲအဲၣ်ဒိးလၢပှၤတၢ်ဒဲးဘးဖိတဖၣ် ကပီၢ်ယၢ်လီၤက့ၤအသးလီၤ. လၢတၢ်န့ၣ်အဃိ တၢ်ကစီၣ်လၢ ယ့ၣ်ၡူးစံၣ်တဲၤတဲလီၤဝဲအါတက့ၢ်န့ၣ် ဘၣ်ဃးဒီးတၢ်ပီၢ်ယၢ်လီၤက့ၤသးအဂ့ၢ်လီၤ. (မးသဲ ၄:၁၇) ယ့ၣ်ၡူးသ့ၣ်ညါဝဲလၢ “ပှၤဃ့သွဲ ဒီးပှၤတၢ်ဒဲးဘးဖိအါဂၤ” အဲၣ်ဒိးဆီတလဲအတၢ်အိၣ်မူလီၤ. ဒီးအဝဲသ့ၣ်လဲၤလၢ စီၤမးသဲအဟံၣ်န့ၣ် တမ့ၢ်ထဲအကလဲၤအီၣ်တၢ်အဂီၢ်ဘၣ်. ပှၤတၢ်ဒဲးဘးဖိတဖၣ်လဲၤလၢ စီၤမးသဲအဟံၣ်န့ၣ် မ့ၢ်လၢအဝဲသ့ၣ် အဲၣ်ဒိးဒိကနၣ် ယ့ၣ်ၡူးအတၢ်စံၣ်တဲၤတဲလီၤအဃိလီၤ. (မၢ်ကူး ၂:၁၅) လီၤသးအုးဒိၣ်မးလၢ ပှၤဖၤရံၤၡဲသ့ၣ်တဖၣ် တထံၣ်ပှၤဂၤဒ် ယ့ၣ်ၡူးထံၣ်ဝဲအသိးဘၣ်. အဝဲသ့ၣ်တနာ်ဝဲလၢ ပှၤအဂၤတဖၣ် ကဆီတလဲအသးဘၣ် ဒီးအဝဲသ့ၣ်ထံၣ် ပှၤတၢ်ဒဲးဘးဖိတဖၣ်ဒ် ပှၤလၢအတၢ်မုၢ်လၢ်တအိၣ်လၢၤဘၣ်အသိးန့ၣ်လီၤ. အဝဲသ့ၣ်အတၢ်ထံၣ်န့ၣ် လီၤဆီလိာ်အသးဒီး ယဟိဝၤယွၤလၢအစံၣ်ညီၣ်တၢ်တီ ဒီးအိၣ်ဒီးတၢ်သးကညီၤတဂၤဒိၣ်မးလီၤ.
၁၆. တၢ်စံၣ်ညီၣ်ကမံးတံာ်န့ၣ် အဝဲသ့ၣ်ကဘၣ် ဃုသ့ၣ်ညါဝဲတၢ်ဂ့ၢ်မနုၤလဲၣ်.
၁၆ မုၢ်မဆါတနံၤအံၤ တၢ်အိၣ်ဖှိၣ်သးပှၢ်တဖၣ်စ့ၢ်ကီး ကဘၣ်ကွၢ်လိမၤဒိး ယဟိဝၤလၢအမ့ၢ် ယွၤလၢအအဲၣ် “တၢ်စံၣ်ညီၣ်တီ” န့ၣ်လီၤ. (စံးထီၣ်ပတြၢၤ ၃၇:၂၈) အဆိကတၢၢ်န့ၣ် ဒ်သိးအဝဲသ့ၣ် ကသ့ၣ်ညါဝဲလၢ ပှၤတဂၤအံၤအတၢ်ကမၣ် အိၣ်ဧါတအိၣ်ဧါန့ၣ် အဝဲသ့ၣ်ကဘၣ် “သံကွၢ်တၢ်လီၤတံၢ်လီၤဆဲး” လီၤ. ဒ်သိးတၢ်အိၣ်ဖှိၣ်သးပှၢ်တဖၣ် ဆၢတဲာ်တၢ်လၢအဘၣ်ကသ့အဂီၢ် အဝဲသ့ၣ်ကဘၣ်မၤထွဲ လံာ်စီဆှံ အတၢ်ဟံးစုနဲၣ်ကျဲတဖၣ်လီၤ. (၅ မိၤၡ့ ၁၃:၁၂-၁၄) တၢ်အိၣ်ဖှိၣ်သးပှၢ်တဖၣ်လၢ အပၣ်ဃုာ်လၢ တၢ်စံၣ်ညီၣ်ကမံးတံာ်န့ၣ် အဝဲသ့ၣ်ကဘၣ်ဃုသ့ၣ်ညါဝဲ လီၤတံၢ်လီၤဆဲးလၢ ပှၤလၢအမၤတၢ်ကမၣ်ဖးဒိၣ်တဂၤအံၤ မ့ၢ်အပီၢ်ယၢ်လီၤအသးနီၢ်နီၢ်ဧါ တပီၢ်ယၢ်လီၤအသးဘၣ်ဧါန့ၣ်လီၤ. အဝဲသ့ၣ်ကမၤဒ်န့ၣ်အဂီၢ် တမ့ၢ်တၢ်လၢအညီထီဘိဘၣ်. ပှၤတဂၤပီၢ်ယၢ်လီၤက့ၤအသးဧါ တပီၢ်ယၢ်လီၤအသးဘၣ်ဧါန့ၣ် ပသ့ၣ်ညါအီၤသ့ခီဖျိလၢ အတၢ်ပာ်သူၣ်ပာ်သး ဒီးအတၢ်ဖံးတၢ်မၤတဖၣ်လီၤ. (လီၣ်ဖျါ ၃:၃) ပှၤလၢအမၤတၢ်ကမၣ်တဂၤ ဒ်သိးအကန့ၢ်ဘၣ် တၢ်သးကညီၤအဂီၢ် အဝဲကဘၣ်ပီၢ်ယၢ်လီၤက့ၤအသးလီၤ. *—ကွၢ်တၢ်ဂ့ၢ်အဘျဲၣ်တက့ၢ်.
၁၇, ၁၈. ပှၤတဂၤပီၢ်ယၢ်လီၤက့ၤအသးနီၢ်နီၢ်ဧါ တပီၢ်ယၢ်လီၤအသးဘၣ်ဧါန့ၣ် တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၇ ယဟိဝၤယွၤဒီး ယ့ၣ်ၡူးန့ၣ် ထံၣ်တၢ်လၢအအိၣ်လၢ ပှၤသးပူၤအဃိ အဝဲသ့ၣ်သ့ၣ်ညါဝဲ ပှၤတၢ်ဆိကမိၣ် ဒီးပှၤတၢ်ပာ်သူၣ်ပာ်သးလီၤ. ဘၣ်ဆၣ်မ့မ့ၢ် တၢ်အိၣ်ဖှိၣ်သးပှၢ်တဖၣ်န့ၣ် တထံၣ်တၢ်အိၣ်လၢ ပှၤသးပူၤဘၣ်. လၢတၢ်န့ၣ်အဃိ နမ့မ့ၢ်တၢ်အိၣ်ဖှိၣ်သးပှၢ်တဂၤန့ၣ် ပှၤတဂၤပီၢ်ယၢ်လီၤက့ၤအသးဧါ တပီၢ်ယၢ်လီၤက့ၤအသးဘၣ်ဧါန့ၣ် မ့ၢ်နသ့ၣ်ညါကသ့ဒ်လဲၣ်. အဆိကတၢၢ် ဃ့ဘါထုကဖၣ် ဒ်သိးနကအိၣ်ဒီးတၢ်ကူၣ်သ့ ဒီးတၢ်သ့ပဲာ်ထံနီၤဖးတၢ်အဂီၢ်တက့ၢ်. (၁ စီၤပၤ ၃:၉) ခံထံၣ်တထံၣ်န့ၣ် ဒ်သိးနကသ့ၣ်ညါ ပှၤလၢအပီၢ်ယၢ်လီၤက့ၤအသးတဂၤ မ့ၢ်အ “သးအုးဘၣ်ဃး ဒီးဟီၣ်ခိၣ်” ဧါ မ့တမ့ၢ် အ “သးအုးဘၣ်ဃးဒီးယွၤ” ဧါန့ၣ် သူလံာ်စီဆှံ ဒီးလံာ်လဲၢ်လၢ တၢ်အခ့အပှၤလၢအကလုၢ်တီ ထုးထီၣ်န့ၢ်ပှၤတဖၣ်တက့ၢ်. (၂ ကရံၣ်သူး ၇:၁၀, ၁၁) ကွၢ်စ့ၢ်ကီး လံာ်စီဆှံပာ်ဖျါထီၣ်ဝဲ ဘၣ်ဃးပှၤလၢအပီၢ်ယၢ်လီၤက့ၤအသး ဒီးပှၤလၢတပီၢ်ယၢ်လီၤက့ၤအသးတဖၣ် အတၢ်ပာ်သူၣ်ပာ်သး, အတၢ်ဆိကမိၣ် ဒီးတၢ်ဖံးတၢ်မၤတက့ၢ်.
၁၈ သၢထံၣ်တထံၣ်န့ၣ် ကွၢ်အဝဲသ့ၣ်အတၢ်ပာ်သူၣ်ပာ်သး ဒီးတဘၣ်ကွၢ်ထဲတၢ်ကမၣ်လၢ အဝဲသ့ၣ်မၤဘၣ်ဝဲန့ၣ်တဂ့ၤ. ဆိကမိၣ်ဃုာ်ဒီး ဘၣ်မနုၤအဃိ အဝဲမၤဘၣ်ဝဲဒ်အံၤလဲၣ်. ဘၣ်မနုၤအဃိ အဝဲဆၢတဲာ်ဝဲဒ်အံၤလဲၣ်. အဝဲအတၢ်ကီတၢ်ခဲ ဒီးအတၢ်ဂံၢ်စၢ်ဘါစၢ်အိၣ်ဒ်လဲၣ်. လံာ်စီဆှံ တဲဆိပာ်စၢၤဝဲလၢ ယ့ၣ်ၡူးန့ၣ်မ့ၢ်ဝဲ တၢ်အိၣ်ဖှိၣ်အခိၣ်အဃိ အဝဲ “တစံၣ်ညီၣ်ဘၣ်တၢ်ဒ် တၢ်လၢအထံၣ်လၢအမဲာ်အသိးဘၣ်န့ၣ်, ဒီးတစံၣ်ညီၣ်တဲာ်ဘၣ်တၢ်ဒ် တၢ်လၢအနၢ်ဟူလၢ အနၢ်အသိးဘၣ်. ဒီးကစံၣ်ညီၣ် ပှၤဖှီၣ်ဖိယာ်ဖိလၢတၢ်တီ, ဒီးကစံၣ်ညီၣ်တဲာ် ပှၤဟီၣ်ခိၣ်ဖိလၢ အဘၣ်နးဘၣ်ဖှီၣ်လၢ တၢ်လိၤလီၤ.” (ယၡါယၤ ၁၁:၃, ၄) တၢ်အိၣ်ဖှိၣ်သးပှၢ်သ့ၣ်ဧၢ, ယ့ၣ်ၡူးဃုထၢထီၣ်သုလၢ သုကကွၢ်ထွဲအတၢ်အိၣ်ဖှိၣ်လီၤ. လၢတၢ်န့ၣ်အဃိ ဒ်သိးနစံၣ်ညီၣ်တၢ်လၢ တၢ်တီတၢ်လိၤ ဒီးတၢ်သးကညီၤကသ့အဂီၢ် အဝဲကမၤစၢၤနၤလီၤ. (မးသဲ ၁၈:၁၈-၂၀) ပအိၣ်ဒီးတၢ်အိၣ်ဖှိၣ်သးပှၢ်လၢ အကွၢ်ထွဲပှၤ တကးဒံးဘၣ် အဝဲသ့ၣ်မၤစၢၤပှၤ ဒ်သိးပကမၤတၢ်တီတီလိၤလိၤ ဒီးပာ်ဖျါထီၣ်တၢ်သးကညီၤလၢ ပှၤဂၤအဖီခိၣ်အဃိ ပသးခုဒိၣ်မးလီၤ.
၁၉. ဘၣ်ဃးဒီး တၢ်ပူၤဖျဲးအဝ့ၢ် အတၢ်ရဲၣ်တၢ်ကျဲၤအဂ့ၢ်န့ၣ် နအဲၣ်ဒိးမၤထွဲအီၤဖဲလဲၣ်တခါလဲၣ်.
၁၉ စီၤမိၤၡ့အတၢ်သိၣ်တၢ်သီန့ၣ် ပာ်ဖျါထီၣ်ဝဲ “တၢ်မ့ၢ်တၢ်တီအက့ၢ်အဂီၤလၢ တၢ်သိၣ်တၢ်သီအပူၤ” န့ၣ်လီၤ. ဒီးတၢ်သိၣ်တၢ်သီတဖၣ်န့ၣ် သိၣ်လိပှၤ ယဟိဝၤယွၤအဂ့ၢ် ဒီးအတၢ်ဟံးစုနဲၣ်ကျဲအဂ့ၢ်န့ၣ်လီၤ. (ရိမ့ၤ ၂:၂၀) တၢ်ပူၤဖျဲးအဝ့ၢ်န့ၣ် ပာ်ဖျါထီၣ်ဝဲတၢ်သိၣ်တၢ်သီလၢ တၢ်အိၣ်ဖှိၣ်သးပှၢ်တဖၣ် ကဘၣ် “စံၣ်ညီၣ်တၢ်တီ” ဒီးသိၣ်လိစ့ၢ်ကီးပဝဲခဲလၢာ်လၢ ကပာ်ဖျါထီၣ် တၢ်အဲၣ်လၢအပှဲၤဒီး “တၢ်ဘျုးတၢ်ဖှိၣ်, ဒီးတၢ်သးကညီၤ” န့ၣ်လီၤ. (စကၤရယၤ ၇:၉) ပတအိၣ်လၢ စီၤမိၤၡ့အတၢ်သိၣ်တၢ်သီအဖီလာ်သနာ်က့ ယဟိဝၤယွၤ အတၢ်ထံၣ်န့ၣ် တဆီတလဲဘၣ်. လၢတၢ်န့ၣ်အဃိ အဝဲမ့ၢ်ဒံးကစၢ်လၢ အအဲၣ်တၢ်စံၣ်ညီၣ်တီ ဒီးအိၣ်ဒီးတၢ်သးကညီၤန့ၣ်လီၤ. ပဘူၣ်ထီၣ်ဘါထီၣ်ဘၣ် ယွၤဒ်အံၤတဂၤအဃိ မ့ၢ်ဝဲတၢ်ခွဲးတၢ်ယာ်ဖးဒိၣ်တခါလီၤ. မ်ပကွၢ်လိမၤဒိး အတၢ်ဂ့ၤတၢ်ဝါတဖၣ် ဒီးဃုတၢ်ပူၤဖျဲး ဒီးတၢ်အိၣ်တဒၢအလီၢ်လၢအအိၣ်န့ၣ်တက့ၢ်.
^ လံာ်အဆၢ. 16 ကွၢ်လၢ “Questions From Readers” in The Watchtower, September 15, 2006, page 30 န့ၣ်တက့ၢ်.
