ဒ်သိးနကန့ၢ်ခိၣ်ဖးအဂီၢ် တဘၣ်ပျဲ ပှၤမၤလီၤဃံၢ်နၤ နီတဂၤတဂ့ၤ
“ဒ်သိးနကန့ၢ်ခိၣ်ဖးအဂီၢ် တဘၣ်ပျဲပှၤမၤလီၤဃံၢ်နၤနီတဂၤတဂ့ၤ.”—ကလီးစဲ ၂:၁၈, nwt.
၁, ၂. (က) ယွၤအခ့အပှၤတဖၣ် အိၣ်ခိးကွၢ်လၢ်ဝဲ ခိၣ်ဖးမနုၤလဲၣ်. (ခ) ဒ်သိး ပကသးစၢၢ်ဆၢခိၣ်ဖးလၢ ပကဒိးန့ၢ်ဘၣ်အီၤအဂီၢ် တၢ်မနုၤကမၤစၢၤပှၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ပှၤလၢဘၣ်တၢ်ဒိးဖှူအီၤတဖၣ် အဝဲသ့ၣ်အိၣ်ဒီး တၢ်မုၢ်လၢ်လၢအလုၢ်ဒိၣ်ပှ့ၤဒိၣ်လီၤ. အဝဲသ့ၣ်အိၣ်ခိးကွၢ်လၢ်ဝဲလၢ ကအိၣ်ဘၣ်လၢမူခိၣ်လီၤ. တၢ်မၢဖိပီလူး ကိးဝဲတၢ်မုၢ်လၢ်အံၤလၢ “ခိၣ်ဖး, လၢအမ့ၢ်ဝဲကစၢ်ယွၤအတၢ်ကိး” လၢထးန့ၣ်လီၤ. (ဖံလံးပံၤ ၃:၁၄, ခ့ခါစှီၤကျိာ်) လၢမူခိၣ်န့ၣ် အဝဲသ့ၣ်ကပၢဃုာ်တၢ်ဒီးခရံာ် ဒီးကမၤစၢၤဝဲ ပှၤဟီၣ်ခိၣ်ဖိတဖၣ် ဒ်သိးကကဲထီၣ်ပှၤလၢပှၤပှဲၤအဂီၢ်လီၤ. (လီၣ်ဖျါ ၂၀:၆) တၢ်မုၢ်လၢ်အံၤမ့ၢ်တၢ်လၢ အလီၤသူၣ်မံသးမုာ်ဒိၣ်မးလီၤ. မ့မ့ၢ်သိလၢအဂုာ်အဂၤတဖၣ်န့ၣ် အဝဲသ့ၣ်အိၣ်ခိးကွၢ်လၢ်ဝဲ တၢ်မုၢ်လၢ်လၢအဂၤတခါလီၤ. အဝဲသ့ၣ်မုၢ်လၢ်ဝဲလၢ ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤ ဒီးတၢ်မုၢ်လၢ်အံၤ ဟ့ၣ်အဝဲသၣ်တၢ်သးခုနီၢ်နီၢ်လီၤ.—၂ ပ့းတရူး ၃:၁၃.
၂ စီၤပီလူးအဲၣ်ဒိးမၤစၢၤဝဲ ခရံာ်ဖိလၢအဘၣ်တၢ်ဒိးဖှူအီၤတဖၣ် ဒ်သိးအဝဲသ့ၣ်ကတီတုၤအကတၢၢ် ဒီးကဒိးန့ၢ်ဘၣ်ခိၣ်ဖးအဂီၢ်လီၤ. စီၤပီလူးစံးဘၣ်အဝဲသ့ၣ်လၢ– “သးအိၣ်တၢ်လၢထးန့ၣ်တက့ၢ်.” (ကလီးစဲ ၃:၂) အဝဲသ့ၣ်ကဘၣ်သးစၢၢ်ဆၢ တၢ်မုၢ်လၢ်လၢအလုၢ်ဒိၣ်ပှ့ၤဒိၣ် လၢကအိၣ်မူဘၣ်လၢ မူခိၣ်န့ၣ်လီၤ. (ကလီးစဲ ၁:၄, ၅) ပအိၣ်ဒီးတၢ်မုၢ်လၢ်လၢ ကအိၣ်မူဘၣ်လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ပမ့ၢ်ဆိကမိၣ်ထံ တၢ်ဆိၣ်ဂ့ၤလၢယဟိဝၤယွၤ ကဟ့ၣ်ပှၤတဖၣ်န့ၣ် မၤစၢၤပှၤဒ်သိး ပကသးစၢၢ်ဆၢခိၣ်ဖးလၢ ပကဒိးန့ၢ်ဘၣ်အီၤန့ၣ်လီၤ.—၁ ကရံၣ်သူး ၉:၂၄.
၃. စီၤပီလူးဟ့ၣ်ပလီၢ်ဝဲ ခရံာ်ဖိတဖၣ်ဘၣ်ဃးဒီး တၢ်ဂ့ၢ်မနုၤလဲၣ်.
၃ စီၤပီလူးဟ့ၣ်ပလီၢ်စ့ၢ်ကီး ခရံာ်ဖိတဖၣ်ဘၣ်ဃး တၢ်လၢကမၤလီၤဃံၢ်အဝဲသ့ၣ် ဒ်သိးအသုတဒိးန့ၢ်ဘၣ် ခိၣ်ဖးတဂ့ၤအဂီၢ်န့ၣ်လီၤ. အဒိ, အဝဲကွဲးန့ၢ်ပှၤကလီးစဲဖိတဖၣ် လံာ်ပရၢလၢအဘၣ်ဃးဒီး ခရံာ်ဖိအဘျၣ်တဖၣ်အဂ့ၢ်န့ၣ်လီၤ. ခရံာ်ဖိအဘျၣ်တဖၣ်န့ၣ် ဂုာ်ကျဲးစၢးမၤယွၤအတၢ်ဘၣ်သး ခီဖျိမၤထွဲဝဲ စီၤမိၤၡ့အတၢ်သိၣ်တၢ်သီဘၣ်ဆၣ် အဝဲသ့ၣ်တနာ်ခရံာ်ဘၣ်. (ကလီးစဲ ၂:၁၆-၁၈) တကးဒံးဘၣ် စီၤပီလူးတဲစ့ၢ်ကီးဝဲလၢ မုၢ်မဆါတနံၤအံၤ တၢ်ဘၣ်ယိၣ်အါထီၣ်ဒ်လဲၣ် ဒီးဒ်သိးပသုတဒိးန့ၢ်ဘၣ်ခိၣ်ဖးတဂ့ၤအဂီၢ် တၢ်လၢကမၤလီၤဃံၢ်ပှၤတဖၣ်အဂ့ၢ်န့ၣ်လီၤ. ဒီးအဝဲတဲနၢ်ပၢၢ်ဝဲလၢ ပဟးဆှဲးတၢ်သူၣ်လီသးကွံလၢ အတဂ့ၤတဖၣ်ကသ့ဒ်လဲၣ်. ဒီးပမ့ၢ်အိၣ်ဒီးတၢ်သဘံၣ်သဘုၣ်လၢ ပဟံၣ်ပူၤဃီပူၤ မ့တမ့ၢ် ပဒီပုၢ်ဝဲၢ်တဖၣ်အကျါန့ၣ် ပကမၤဒ်လဲၣ်န့ၣ်လီၤ. စီၤပီလူး အတၢ်ဟ့ၣ်ကူၣ်လၢ အလုၢ်ဒိၣ်ပှ့ၤဒိၣ်တဖၣ် မၤစၢၤပှၤလၢမုၢ်မဆါတနံၤအံၤလီၤ. ပကတဲသကိးတၢ်ဟ့ၣ်ပလီၢ်လၢ အပှဲၤဒီးတၢ်အဲၣ်တၢ်ကွံ လၢပထံၣ်ဘၣ်အီၤလၢ စီၤပီလူးအလံာ်ပရၢလၢ အကွဲးန့ၢ်ဝဲပှၤကလီးစဲဖိတဖၣ်န့ၣ်လီၤ.
မၤသံကွံာ် တၢ်သူၣ်လီသးကွံလၢ အတဂ့ၤတဖၣ်
၄. ဒ်သိးနသုတန့ၢ်ဘၣ် ခိၣ်ဖးတဂ့ၤအဂီၢ် ဘၣ်မနုၤအဃိ တၢ်သူၣ်လီသးကွံလၢအတဂ့ၤတဖၣ် မၤလီၤဃံၢ်နၤသ့ဝဲလဲၣ်.
၄ စီၤပီလူး ဒုးသ့ၣ်နီၣ်ထီၣ် ဒီပုၢ်ဝဲၢ်တဖၣ်လၢ တၢ်မုၢ်လၢ်အဒိၣ်အမုၢ်ဝံၤအလီၢ်ခံ အဝဲကွဲးကဒီးဝဲလၢ– “မၤသံသုဂီၤတဖၣ်လၢ ဟီၣ်ခိၣ်ချၢ, ဒ်ပစံးတၢ်အသိး, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤအဲၣ်တဘီ, တၢ်သးကတၢ, တၢ်သးကွံတၢ်လၢအအၢ” တက့ၢ်. (ကလီးစဲ ၃:၅) တၢ်သူၣ်လီသးကွံလၢအတဂ့ၤတဖၣ်န့ၣ် လီၤဘၣ်ယိၣ်ဒိၣ်မး မ့ၢ်လၢအမၤဟးဂီၤ နတၢ်ရ့လိာ်သးဒီးယဟိဝၤယွၤ ဒီးနတၢ်မုၢ်လၢ်လၢခါဆူညါသ့ဝဲအဃိလီၤ. ဒီပုၢ်ဝဲၢ်လၢအမၤဘၣ် တၢ်မၤကမၣ်မုၣ်ကမၣ်ခွါ ဒီးလၢခံပီၢ်ယၢ်လီၤက့ၤသးတဂၤ တဲဝဲလၢ တၢ်သူၣ်လီသးကွံလၢအတဂ့ၤတဖၣ် အသဟီၣ်ဆူၣ်တုၤဒၣ်လဲာ်အဝဲ “မၤဘၣ်တၢ်ကမၣ်ဝံၤမး အသ့ၣ်နီၣ်လီၤက့ၤအသး” လီၤ.
၅. ဖဲပထံၣ်ဘၣ်တၢ်အိၣ်သးလၢ အလီၤဘၣ်ယိၣ်အခါ ပဒီသဒၢလီၤပသး ကသ့ဒ်လဲၣ်.
၅ ပကဘၣ်ပလီၢ်ပသး လီၤဆီဒၣ်တၢ် ဖဲပထံၣ်ဘၣ်တၢ်အိၣ်သးလၢ အကကဲထီၣ်တၢ်မၤကွၢ်လၢ ပကမၤကမၣ်ဘၣ် ယဟိၤဝၤယွၤ အတၢ်သိၣ်တၢ်သီအခါန့ၣ်လီၤ. အဒိ, ဖဲပှၤခံဂၤစးထီၣ်ပာ်တၢ်အဲၣ်တီအခါ အဝဲသ့ၣ်မ့ၢ်ပာ်လီၤတၢ်သိၣ်တၢ်သီလၢ အဘၣ်ဃးဒီး တၢ်ဖီၣ်စုဖီၣ်ခီၣ်, တၢ်နၢမူလိာ်သး ဒီးတၢ်အိၣ်ထဲခံဂၤန့ၣ် ကဂ့ၤဝဲလီၤ. (ကတိၤဒိ ၂၂:၃) ဒီးဖဲပလဲၤတၢ်လၢ တၢ်ဖံးတၢ်မၤအဂီၢ် မ့တမ့ၢ် ဖဲပမၤသကိးတၢ် ဒီးပှၤတၢ်ချၢတဖၣ်အခါ တၢ်ဘၣ်ယိၣ်အိၣ်ထီၣ်ဝဲသ့လီၤ. (ကတိၤဒိ ၂:၁၀-၁၂, ၁၆) ပဒီသဒၢလီၤ ပသးကသ့ဒ်လဲၣ်. ဒုးသ့ၣ်ညါပှၤဂၤလၢ နမ့ၢ်ယဟိဝၤပှၤအုၣ်အသးတက့ၢ်. အိၣ်ဒ်သိးပှၤကပာ်ကဲနၤတက့ၢ်. ထီဘိန့ၣ်သ့ၣ်နီၣ်ထီၣ်လၢ တၢ်ဂဲၤလိာ်ကွဲတၢ်အဲၣ်န့ၣ် ကဲထီၣ်တၢ်ဘၣ်ယိၣ်သ့ဝဲလီၤ. ဖဲပသူၣ်အုးသးအုး ဒီးပအိၣ်သယုၢ်သညိအခါ ဘၣ်သ့ၣ်သ့ၣ် ပကလိၣ်ဘၣ် ပှၤလၢအမၤမုာ်ထီၣ်ပသးအဃိ ပကဘၣ်ပလီၢ်ပသးလီၤ. ဘၣ်သ့ၣ်သ့ၣ် ပသးကလီၤစၢ်တုၤဒၣ်လဲာ် ပကတူၢ်လိာ်ပှၤတဂၤဂ့ၤတဂၤဂ့ၤ အတၢ်ကဟုကယာ်န့ၣ်လီၤ. ပမ့ၢ်မၤဒ်န့ၣ်န့ၣ် ကဲထီၣ်တၢ်ဘၣ်ယိၣ်ဒိၣ်မးလီၤ. နမ့ၢ်တူၢ်ဘၣ်ဒ်အံၤန့ၣ် တဘၣ်ပျဲတၢ်တမံၤမံၤ ကမၤလီၤဃံၢ်နၤ ဒ်သိးနသုတဒိးန့ၢ်ဘၣ် ခိၣ်ဖးန့ၣ်တဂ့ၤ. ဃ့တၢ်မၤစၢၤလၢ ယဟိဝၤယွၤအအိၣ် ဒီးလၢဒီပုၢ်ဝဲၢ်တဖၣ်အအိၣ်တက့ၢ်.—ဖး စံးထီၣ်ပတြၢၤ ၃၄:၁၈; ကတိၤဒိ ၁၃:၂၀ တက့ၢ်.
၆. ဖဲပဃုထၢ တၢ်မၤမုာ်မၤဖှံသးအခါ ပကြၢးသ့ၣ်နီၣ်ထီၣ် တၢ်မနုၤလဲၣ်.
၆ ဒ်သိးပဟးဆှဲး တၢ်သူၣ်လီသးကွံလၢ အတဂ့ၤတဖၣ်ကသ့အဂီၢ် ပကဘၣ်ဟးဆှဲး တၢ်မၤမုာ်မၤဖှံသးလၢ အတဂ့ၤတဖၣ်န့ၣ်လီၤ. မုၢ်မဆါတနံၤအံၤ တၢ်မၤမုာ်မၤဖှံသးလၢအတဂ့ၤတဖၣ်န့ၣ် လီၤဂာ်ဒ်လၢညါ ပှၤလၢအအိၣ်လၢ ဝ့ၢ်စဒိၣ် ဒီးဂမိရၤတဖၣ် အတၢ်အိၣ်သးအသိးန့ၣ်လီၤ. (ယူဒၤ ၇) ပှၤလၢအထုးထီၣ် တၢ်ဂီၤမူ ဒီးတၢ်သူၣ်ဝံၣ်သးဆၢတဖၣ် ဒုးဆိကမိၣ်ပှၤလၢ တၢ်မၤကမၣ်မုၣ်ကမၣ်ခွါန့ၣ် တမ့ၢ်တၢ်လၢအကမၣ်ဘၣ် ဒီးတၢ်ဘၣ်ယိၣ်တအိၣ်နီတမံၤဘၣ်. လၢတၢ်န့ၣ်အဃိ ပကဘၣ်ပလီၢ်ပသးထီဘိလီၤ. ဒီးပတကြၢးကွၢ်တၢ်ဂီၤမူ ဒီးဒိကနၣ်တၢ်သူၣ်ဝံၣ်သးဆၢလၢ အတကြၢးတဘၣ်တဖၣ်န့ၣ်ဘၣ်. ပကဘၣ်ဃုထၢ တၢ်ဂီၤမူဒီးတၢ်သူၣ်ဝံၣ်သးဆၢ လၢအသုတကဲထီၣ် တၢ်တြီမၤတံာ်တာ်လၢ ပကဒိးန့ၢ်ဘၣ်ခိၣ်ဖးအဂ့ၤအဂီၢ်န့ၣ်လီၤ.—ကတိၤဒိ ၄:၂၃.
“ကူထီၣ်သိးထီၣ်” တၢ်အဲၣ်တၢ်ကွံ ဒီးတၢ်သးကညီၤတက့ၢ်
၇. လၢခရံာ်ဖိတၢ်အိၣ်ဖှိၣ်အပူၤန့ၣ် တၢ်သဘံၣ်သဘုၣ်အိၣ်ထီၣ်ဝဲသ့ဒ်လဲၣ်.
၇ ပအိၣ်ဘၣ်လၢ ခရံာ်ဖိတၢ်အိၣ်ဖှိၣ်အပူၤအဃိ ပသးခုဒိၣ်မးလီၤ. ဖဲပထီၣ်တၢ်အိၣ်ဖှိၣ်ရိဖှိၣ်အခါ ပမၤလိလံာ်စီဆှံ ဒီးမၤစၢၤလိာ်သးတဂၤဒီးတဂၤ လၢတၢ်အဲၣ်တၢ်ကွံအပူၤလီၤ. ပမၤဒ်အံၤအဃိ မၤစၢၤပှၤလၢ ပကသးစၢၢ်ဆၢခိၣ်ဖးလၢ ပကဒိးန့ၢ်ဘၣ်အီၤန့ၣ်လီၤ. တဘျီတခီၣ် ခီဖျိလၢတၢ်နၢ်ပၢၢ်ကမၣ်လိာ်သးအဃိ တၢ်သဘံၣ်သဘုၣ်အိၣ်ထီၣ်လၢ ပဒီပုၢ်ဝဲၢ်တဖၣ်အကျါသ့လီၤ. ပမ့ၢ်တမၤဘၣ်လိာ်က့ၤ တၢ်သဘံၣ်သဘုၣ်တဖၣ်လၢ အဆိအချ့န့ၣ် ကကဲထီၣ်တၢ်သူၣ်ဟ့သးဟ့လီၤ.—ဖး ၁ ပ့းတရူး ၃:၈, ၉ တက့ၢ်.
၈, ၉. (က) ဒ်သိးပကဒိးန့ၢ်ဘၣ် ခိၣ်ဖးအဂီၢ် တၢ်ဂ့ၤတၢ်ဝါမနုၤတဖၣ် မၤစၢၤပှၤသ့လဲၣ်. (ခ) ဖဲပဒီပုၢ်ဝဲၢ်တဖၣ် မၤဘၣ်ဒိပသးအခါ ဒ်သိးပဆဲးအိၣ်ဒီး တၢ်ဃူတၢ်ဖိးကသ့အဂီၢ် ပကဘၣ်သ့ၣ်နီၣ်ထီၣ်က့ၤ တၢ်မနုၤလဲၣ်.
၈ ပတအဲၣ်ဒိးလၢ တၢ်သူၣ်ဟ့သးဟ့ မၤဟးဂီၤပတၢ်ခွဲးတၢ်ယာ်လၢ ပကဒိးန့ၢ်ဘၣ် ခိၣ်ဖးအဂီၢ်န့ၣ်ဘၣ်. စီၤပီလူးတဲနၢ်ပၢၢ်ဝဲ ခရံာ်ဖိတဖၣ်လၢ– “ဒ်ပှၤလၢယွၤဃုထၢအီၤ, ပှၤစီဆှံ, ဒီးပှၤလၢတၢ်အဲၣ်အီၤသ့ၣ်တဖၣ်အသိးန့ၣ်, ကူထီၣ်သိးထီၣ်တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်တက့ၢ်. ဝံသးစူၤလိာ်သုသး, ဒီးပှၤအတၢ်ကမၣ်မ့ၢ်အိၣ်ဒီး, ပျၢ်လိာ်သုသးတက့ၢ်. ဒ်ခရံာ်ပျၢ်သုတၢ်အသိးန့ၣ်, မၤသုဝဲဒ်န့ၣ်အသိးစ့ၢ်ကီးတက့ၢ်. တၢ်န့ၣ်တဖၣ်ခဲလၢာ်အဖီခိၣ်, ကူထီၣ်သိးထီၣ်တၢ်အဲၣ်တၢ်ကွံလၢအမ့ၢ် တၢ်လၢတၢ်ပှဲၤအပျံၤစၢဃာ်တၢ်န့ၣ်တက့ၢ်.”—ကလီးစဲ ၃:၁၂-၁၄.
၉ တၢ်အဲၣ်တၢ်ကွံ ဒီးတၢ်သးကညီၤန့ၣ် ကမၤစၢၤပှၤဒ်သိး ပကပျၢ်ပှၤဂၤအတၢ်ကမၣ်လီၤ. ပဒီပုၢ်ဝဲၢ်တဂၤဂၤ မ့ၢ်တဲတၢ်တမံၤမံၤ မ့တမ့ၢ် မ့ၢ်မၤဝဲတၢ်တမံၤမံၤလၢ အမၤဘၣ်ဒိပသးန့ၣ် ပကြၢးဆိကမိၣ်ကဒါက့ၤ ဖဲပတဲကမၣ် မ့တမ့ၢ် မၤကမၣ်ဘၣ်ပှၤဂၤအခါ အဝဲသ့ၣ်ပျၢ်ကွံာ်ပတၢ်ကမၣ်န့ၣ်လီၤ. အဝဲသ့ၣ်ပာ်ဖျါထီၣ် တၢ်အဲၣ်တၢ်ကွံ ဒီးတၢ်သးကညီၤလၢပဖီခိၣ်အဃိ ပစံးဘျုးအဝဲသ့ၣ်ဒိၣ်မးလီၤ. (ဖး စံၣ်တဲၤတဲလီၤတၢ် ၇:၂၁, ၂၂ တက့ၢ်.) ယ့ၣ်ၡူးဒုးအိၣ်ဃူအိၣ်ဖိးဝဲ ယွၤအပှၤဂီၢ်မုၢ်တဖၣ်အဃိ ပစံးဘျုးအီၤဒိၣ်မးလီၤ. (ကလီးစဲ ၃:၁၅) ပဝဲခဲလၢာ် ပဘူၣ်ထီၣ်ဘါထီၣ်ယွၤ တဂၤဃီ, ပစံၣ်တဲၤတဲလီၤတၢ်သးခုကစီၣ်တမံၤဃီ ဒီးပဝဲအါဂၤ ပထံၣ်ဘၣ်တၢ်ကီတၢ်ခဲလၢ အလီၤဂာ်လိာ်အသးလီၤ. ပမ့ၢ်အိၣ်ဒီးတၢ်အဲၣ်တၢ်ကွံ ဒီးတၢ်သးကညီၤန့ၣ် ပကပျၢ်လိာ်သးတၢ်ကမၣ်တဂၤဒီးတဂၤ ဒီးတၢ်အိၣ်ဖှိၣ်ကပှဲၤဒီးတၢ်ဃူတၢ်ဖိး ဒီးပကသးစၢၢ်ဆၢခိၣ်ဖးလၢ ပကဒိးန့ၢ်ဘၣ်အီၤလီၤ.
၁၀, ၁၁. (က) ပမ့ၢ်အိၣ်ဒီးတၢ်သးက့ၣ်န့ၣ် ဘၣ်မနုၤအဃိ မ့ၢ်တၢ်လၢအလီၤဘၣ်ယိၣ်လဲၣ်. (ခ) ဒ်သိးတၢ်သးက့ၣ် သုတမၤလီၤဃံၢ်ပှၤတဂ့ၤအဂီၢ် ပကဘၣ်မၤဒ်လဲၣ်.
၁၀ တၢ်သးက့ၣ်န့ၣ် ကမၤတံာ်တာ်ပှၤဒ်သိး ပသုတဒိးန့ၢ်ဘၣ်ခိၣ်ဖးတဂ့ၤအဂီၢ်လီၤ. တၢ်သးက့ၣ် ကဲထီၣ်တၢ်လၢအလီၤဘၣ်ယိၣ်ထဲလဲၣ်န့ၣ် တၢ်အဒိလၢ လံာ်စီဆှံအပူၤအိၣ်ဝဲလီၤ. အဒိ, စီၤကၤယံၣ် အသးက့ၣ် စီၤဟ့းဘ့းလးအဃိ မၤသံကွံာ်ဝဲ စီၤဟ့းဘ့းလးလီၤ. စီၤကိၤရး, စီၤဒၤသၣ် ဒီးစီၤအဘံရၣ်တဖၣ်န့ၣ် အသးက့ၣ်ဝဲ စီၤမိၤၡ့အဃိ ပူထီၣ်ထီဒါဝဲစီၤမိၤၡ့န့ၣ်လီၤ. မ့မ့ၢ်စီၤပၤစီၤစီလူးအသးက့ၣ်ဝဲ စီၤဒၤဝံးအဃိ လူၤမၤသံဝဲ စီၤဒၤဝံးလီၤ. လံာ်စီဆှံစံးဝဲလၢ– “ဖဲတၢ်သးဆဲးအဲး ဒီးတၢ်ဂ့ၢ်လိာ်ဘှီလိာ်အိၣ်ဝဲန့ၣ်, တၢ်တၢထီၣ်တၢလီၤ, ဒီးတၢ်မၤအၢမၤသီကိးမံၤဒဲး, အိၣ်ဝဲဖဲန့ၣ်လီၤ.” လံာ်စီဆှံအတၢ်ကတိၤအံၤ ဘၣ်ဒိၣ်မးလီၤ.—ယၤကိာ် ၃:၁၆.
၁၁ ပမ့ၢ်ဂုာ်ကျဲးစၢး မၤအါထီၣ်တၢ်အဲၣ်တၢ်ကွံ ဒီးတၢ်သးကညီၤန့ၣ် ပတသးက့ၣ်တၢ်ညီညီဘၣ်. လံာ်စီဆှံစံးဝဲလၢ– “တၢ်အဲၣ်တၢ်ကွံ ဝံသးစူၤတၢ်ဃဲးဃဲး ဒီးမၤဂ့ၤတၢ်, တၢ်အဲၣ်တၢ်ကွံ တသးကါဘၣ်တၢ်ဘၣ်.” (၁ ကရံၣ်သူး ၁၃:၄) ဒ်သိးပသုတမ့ၢ်ပှၤလၢ အသးက့ၣ်တၢ်တဂ့ၤအဂီၢ် ပကဘၣ်ဂုာ်ကျဲးစၢးအိၣ်ဒီး တၢ်ထံၣ်ဒ်ယဟိဝၤယွၤအသိးလီၤ. ပဒီပုၢ်ဝဲၢ်တဖၣ်န့ၣ် ပကဘၣ်ထံၣ်အီၤ ဒ်ပနီၢ်ခိက့ၢ်ဂီၤတခါခါအသိးလီၤ. လံာ်စီဆှံစံးဝဲလၢ– “တၢ်အက့ၢ်အဂီၤတမံၤမံၤ မ့ၢ်ဘၣ်တၢ်နးတၢ်ဖှီၣ်ဒီး, တၢ်အက့ၢ်အဂီၤ ဘၣ်ဃုာ်ခဲလၢာ်စ့ၢ်ကီးလီၤ.” (၁ ကရံၣ်သူး ၁၂:၁၆-၁၈, ၂၆) ပဒီပုၢ်ဝဲၢ်သ့ၣ်တဖၣ် မ့ၢ်သးခုန့ၣ် ပဘၣ်သးခုဃုာ်ဒီးအဝဲသ့ၣ်လီၤ. ပတဘၣ်သးက့ၣ်အဝဲသ့ၣ်ဘၣ်. ဆိကမိၣ်ကွၢ် စီၤစီလူးအဖိခွါ စီၤယိနၤသၣ် အဂ့ၢ်တက့ၢ်. ဖဲစီၤဒၤဝံး ဘၣ်တၢ်ဃုထၢထီၣ်အီၤလၢစီၤပၤ လၢအဝဲအလီၢ်အခါ စီၤယိနၤသၣ် တသးက့ၣ်အီၤဘၣ်. အဝဲဆီၣ်ထွဲ ဒီးဟ့ၣ်ဂံၢ်ဟ့ၣ်ဘါဝဲ စီၤဒၤဝံးလီၤ. (၁ ၡမူၤအ့လး ၂၃:၁၆-၁၈) မ့ၢ်ပအိၣ်ဒီး တၢ်အဲၣ်တၢ်ကွံ ဒီးတၢ်သးကညီၤဒ် စီၤယိနၤသၣ် အသိးကသ့ဧါ.
ဟံၣ်ဖိဃီဖိကိးဂၤဒဲး ဂုာ်ကျဲးစၢးဟံးန့ၢ်ခိၣ်ဖးတက့ၢ်
၁၂. ဒ်သိးဟံၣ်ဖိဃီဖိခဲလၢာ် ကဒိးန့ၢ်ဘၣ်ခိၣ်ဖးအဂီၢ် လံာ်စီဆှံအတၢ်ဟ့ၣ်ကူၣ်အိၣ်ဝဲဒ်လဲၣ်.
၁၂ ပဝဲကိးဂၤဒဲး ပမ့ၢ်မၤထွဲ လံာ်စီဆှံအတၢ်ဟံးစုနဲၣ်ကျဲန့ၣ် ပဟံၣ်ဖိဃီဖိ ကအိၣ်ဒီးတၢ်မုာ်တၢ်ခုၣ်, တၢ်သူၣ်ဖှံသးညီ ဒီးပကဒိးန့ၢ်ဘၣ်ခိၣ်ဖးလီၤ. စီၤပီလူးဟ့ၣ်ကူၣ်ဝဲ ဟံၣ်ဖိဃီဖိတဖၣ်လၢ– “ပိာ်မုၣ်သ့ၣ်ဧၢ, ပာ်သုသးလၢသုဝၤအဖီလာ်, ဒ်အဂ့ၤအဘၣ်လၢကစၢ်အပူၤတက့ၢ်. ပိာ်ခွါသ့ၣ်ဧၢ, အဲၣ်သုမါတက့ၢ်. ဒီးသုတပာ်ဒူသုသးလၢအလိၤတဂ့ၤ. ဖိသၣ်သ့ၣ်ဧၢ, စူၢ်သုမိၢ်သုပၢ်လၢ တၢ်ကိးမံၤဒဲးအပူၤတက့ၢ်. အဂ့ၢ်ဒ်အံၤ, တၢ်န့ၣ်ဘၣ်ကစၢ်အသးလီၤ. ပၢ်သ့ၣ်ဧၢ, ဒ်သိးသုဖိသုလံၤအသး သုတဟးဂီၤတဂ့ၤဒီး, သုတမၤဒိၣ်ထီၣ်အသးတဂ့ၤ.” (ကလီးစဲ ၃:၁၈-၂၁) ဟံၣ်ဖိဃီဖိကိးဂၤဒဲး မ့ၢ်မၤထွဲဝဲ လံာ်စီဆှံအတၢ်ဟ့ၣ်ကူၣ်အံၤန့ၣ် ကကဲဘျုးဝဲသပှၢ်တၢၢ်တမ့ၢ်ဘၣ်ဧါ.
၁၃. ဒီပုၢ်ဝဲၢ်မုၣ်တဂၤ ဒ်သိးအဝၤကဘူၣ်ထီၣ်ဘါထီၣ် ယဟိဝၤယွၤအဂီၢ် အဝဲမၤစၢၤဝဲကသ့ဒ်လဲၣ်.
၁၃ ဘၣ်သ့ၣ်သ့ၣ် နကမ့ၢ်ဒီပုၢ်ဝဲၢ်မုၣ်တဂၤလၢ နဝၤတဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. နမ့ၢ်တူၢ်ဘၣ်လၢ နဝၤတရ့နၤ ဒ်အကြၢးရ့ဝဲအသိးဘၣ်န့ၣ် နကမၤဒ်လဲၣ်. ဘၣ်သ့ၣ်သ့ၣ် နကသးဒိၣ်ထီၣ်နဝၤ ဒီးတဲအါလိာ်သးဒီးအီၤလီၤ. နမ့ၢ်မၤဒ်န့ၣ်န့ၣ် မ့ၢ်နတၢ်အိၣ်သးကဂ့ၤထီၣ်စ့ၢ်ကီးဧါ. နတဲအါလိာ်သးဒီးနဝၤ နမ့ၢ်နၢၤဘၣ်ဆၣ် မ့ၢ်ကထိၣ်ဟူးထိၣ်ဂဲၤထီၣ်အီၤလၢ ကဘူၣ်ထီၣ်ဘါထီၣ် ယဟိဝၤယွၤဧါ. တထိၣ်ဟူးထိၣ်ဂဲၤထီၣ်အီၤဘၣ်. ဘၣ်ဆၣ် နမ့ၢ်ပာ်ကဲအီၤဒ် ဟံၣ်ခိၣ်တဂၤအသိးန့ၣ် နဟံၣ်ဖိဃီဖိကအိၣ် ဒီးတၢ်ဃူတၢ်ဖိး ဒီးနမၤသးခုယဟိဝၤယွၤအသးလီၤ. ဘၣ်သ့ၣ်သ့ၣ် နတၢ်ဒိဂ့ၤတဲာ်ဘၣ်န့ၣ် ကထိၣ်ဟူးထိၣ်ဂဲၤထီၣ် နဝၤအသးလၢ ကအဲၣ်ဒိးဘူၣ်ထီၣ်ဘါထီၣ် ယဟိဝၤယွၤ ဒီးသုခံဂၤလၢာ် သုကဒိးန့ၢ်ဘၣ်ခိၣ်ဖးလီၤ.—ဖး ၁ ပ့းတရူး ၃:၁, ၂ တက့ၢ်.
၁၄. မါလၢတမ့ၢ်ယဟိဝၤ ပှၤအုၣ်အသးတဂၤ မ့ၢ်တယူးယီၣ်ပာ်ကဲ အဝၤလၢအမ့ၢ်ယဟိဝၤပှၤအုၣ်အသးတဂၤန့ၣ် ဝၤအံၤကြၢးမၤတၢ်မနုၤလဲၣ်.
၁၄ ဘၣ်သ့ၣ်သ့ၣ် နကမ့ၢ်ဒီပုၢ်ဝဲၢ်ခွါတဂၤလၢ နမါတဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. နမါမ့ၢ်တယူးယီၣ်ပာ်ကဲနၤဘၣ်န့ၣ် နကမၤဒ်လဲၣ်. နမ့ၢ်အဲၣ်ဒိးပာ်ဖျါထီၣ်လၢ နမ့ၢ်ဟံၣ်ခိၣ်ခီဖျိ နကတိၤတၢ်ဒီးအီၤဆူၣ်ဆူၣ်ကိၤကိၤန့ၣ် မ့ၢ်အဝဲကပာ်ကဲနၤဧါ. တမ့ၢ်လၢအဝဲတပာ်ကဲနၤဘၣ်. ကစၢ်ယွၤအဲၣ်ဒိးဝဲလၢ နကကွၢ်လိမၤဒိးယ့ၣ်ၡူး ဒီးပာ်ဖျါထီၣ်တၢ်အဲၣ်တၢ်ကွံလီၤ. (အ့းဖ့းစူး ၅:၂၃) ယ့ၣ်ၡူးမ့ၢ်တၢ်အိၣ်ဖှိၣ်အခိၣ်သနာ်က့ အဝဲပာ်ဖျါထီၣ် တၢ်ဝံသးစူၤ ဒီးတၢ်အဲၣ်တၢ်ကွံထီဘိလီၤ. (လူၤကၣ် ၉:၄၆-၄၈) နမ့ၢ်ကွၢ်လိမၤဒိးယ့ၣ်ၡူးန့ၣ် ဘၣ်သ့ၣ်သ့ၣ်လၢခံန့ၣ် နမါကဘူၣ်ထီၣ်ဘါထီၣ် ယဟိဝၤယွၤစ့ၢ်ကီးလီၤ.
၁၅. ဒီပုၢ်ဝဲၢ်ခွါတဖၣ် အဲၣ်အမါန့ၣ် ပာ်ဖျါထီၣ်ဝဲကသ့ဒ်လဲၣ်.
၁၅ ယဟိဝၤယွၤ သိၣ်လိနဲၣ်လိဝဲ ဝၤတဖၣ်လၢ– “အဲၣ်သုမါတက့ၢ်. ဒီးသုတပာ်ဒူသုသးလၢအလိၤတဂ့ၤ.” (ကလီးစဲ ၃:၁၉) ဝၤလၢအိၣ်ဒီးတၢ်အဲၣ်တၢ်ကွံတဂၤန့ၣ် ကယူးယီၣ်ပာ်ကဲအမါလီၤ. လၢကျဲဒ်လဲၣ်. အဝဲကဒိကနၣ် အမါအတၢ်ထံၣ် ဒီးပာ်ဖျါထီၣ်လၢ အမါအတၢ်ထံၣ်န့ၣ် အရ့ဒိၣ်လၢအဂီၢ်လီၤ. (၁ ပ့းတရူး ၃:၇) မ့ၢ်တမၤထွဲဝဲ အမါအတၢ်ဟ့ၣ်ကူၣ်ခဲလၢာ်သနာ်က့ မ့ၢ်ဒိကနၣ်ဝဲန့ၣ် ကမၤစၢၤအီၤလၢ ကမၤတၢ်ဆၢတဲာ်လၢ အဘၣ်လီၤ. (ကတိၤဒိ ၁၅:၂၂) ဝၤလၢအိၣ်ဒီးတၢ်အဲၣ်တၢ်ကွံတဂၤန့ၣ် တမၢန့ၢ်ဆူၣ်အမါလၢ ကယူးယီၣ်ပာ်ကဲအီၤဘၣ်. လၢတၢ်န့ၣ်အလီၢ် အဝဲကဂုာ်ကျဲးစၢး ဒ်သိးအမါကယူးယီၣ်ပာ်ကဲအီၤအဂီၢ်လီၤ. ဝၤတဂၤမ့ၢ်အဲၣ် အဖိဒီးအမါန့ၣ် အဖိအမါစ့ၢ်ကီး ကဘူၣ်ထီၣ်ဘါထီၣ် ယဟိဝၤယွၤ လၢတၢ်သူၣ်ခုသးခုအပူၤ ဒီးကဒိးန့ၢ်ဘၣ်ခိၣ်ဖးစ့ၢ်ကီးလီၤ.
ဒ်သိးဟံၣ်ဖိဃီဖိ တၢ်သဘံၣ်သဘုၣ်တဖၣ် အသုတကဲထီၣ် တၢ်တြီမၤတံာ်တာ်လၢ ပကဒိးန့ၢ်ဘၣ်ခိၣ်ဖးတဂ့ၤအဂီၢ် ပကဘၣ်မၤဒ်လဲၣ် (ကွၢ်လံာ်အဆၢ ၁၃-၁၅)
သးစၢ်သ့ၣ်ဧၢ—တဘၣ်ပျဲ ပှၤမၤလီၤဃံၢ်နၤနီတဂၤတဂ့ၤ
၁၆, ၁၇. သးစၢ်သ့ၣ်ဧၢ ဒ်သိးနသုတသးထီၣ်ဘၣ် နမိၢ်နပၢ်တဂ့ၤအဂီၢ် နမၤကသ့ဒ်လဲၣ်.
၁၆ ဘၣ်သ့ၣ်သ့ၣ် နကမ့ၢ်ပှၤသးစၢ်တဂၤ ဒီးနကတူၢ်ဘၣ်လၢ နမိၢ်နပၢ်တနၢ်ပၢၢ်နၤဘၣ် မ့တမ့ၢ် အတၢ်သိၣ်တၢ်သီဃံးတလၢလီၤ. လၢတၢ်န့ၣ်အဃိ နသးကဘၣ်တံာ်တာ် ဒီးဘၣ်သ့ၣ်သ့ၣ် နတအဲၣ်ဒိးဘူၣ်ထီၣ်ဘါထီၣ် ယဟိဝၤယွၤလၢၤဘၣ်. ဘၣ်ဆၣ်နမ့ၢ်ပာ်တ့ၢ် ယဟိဝၤယွၤန့ၣ် နကသ့ၣ်ညါဘၣ်လၢ လၢဟီၣ်ခိၣ်ချၢအံၤ ပှၤလၢကအဲၣ်နၤထဲသိးဒီး နမိၢ်နပၢ် ဒီးနတံၤသကိးလၢ အဘူၣ်ထီၣ်ဘါထီၣ် ယဟိဝၤယွၤန့ၣ် တအိၣ်နီတဂၤဘၣ်.
၁၇ ဆိကမိၣ်ကွၢ်ဒ်အံၤတက့ၢ်– နမိၢ်နပၢ် မ့ၢ်တသိၣ်နၤနီတဘျီဘၣ်န့ၣ် မ့ၢ်အဝဲသ့ၣ် အဲၣ်နၤဧါတအဲၣ်နၤဧါန့ၣ် နကသ့ၣ်ညါဒ်လဲၣ်. (ဧ့ၤဘြံၤ ၁၂:၈) အဝဲသ့ၣ်တမ့ၢ်ပှၤလၢပှၤပှဲၤဘၣ်အဃိ အတၢ်သိၣ်ဃီၣ်န့ၣ် မၤဘၣ်ဒိနသးသ့လီၤ. ဘၣ်ဆၣ် တဘၣ်ကွၢ်ထဲအဝဲသ့ၣ် အတၢ်လီၤတူာ်လီၤကာ်န့ၣ်တဂ့ၤ. လၢတၢ်န့ၣ်အလီၢ် ဂုာ်ကျဲးစၢးနၢ်ပၢၢ်စၢၤနမိၢ်နပၢ်လၢ ဘၣ်မနုၤအဃိ အဝဲသ့ၣ်သိၣ်နၤဒ်အံၤလဲၣ်. ပၢၤနသးဒီး တဘၣ်သးဒိၣ်ထီၣ်တၢ်ချ့ချ့တဂ့ၤ. လံာ်စီဆှံစံးဝဲလၢ– “ပှၤလၢအကတိၤတၢ်စှၤထံၣ်န့ၣ် အိၣ်ဒီးတၢ်သ့ၣ်ညါလီၤ. ဒီးပှၤလၢအသးသ့န့ၣ် မ့ၢ်ပှၤအကူၣ်အဆးလီၤ.” (ကတိၤဒိ ၁၇:၂၇) ပာ်လီၤဖီတၢၣ်လၢ နကဂုာ်ကျဲးစၢး ကဲထီၣ်ပှၤလၢအဒိၣ်တုၤခိၣ်ပှဲၤ လၢတူၢ်လိာ်တၢ်ဟ့ၣ်ကူၣ် ဒီးပှၤမ့ၢ်သိၣ်နၤလၢ ကျဲဒ်လဲၣ်ဂ့ၤဒ်လဲၣ်ဂ့ၤ ဂုာ်ကျဲးစၢး ဟံးန့ၢ်တၢ်မၤလိတက့ၢ်. (ကတိၤဒိ ၁:၈) ထီဘိန့ၣ်သ့ၣ်နီၣ်ထီၣ်လၢ နအိၣ်ဒီးမိၢ်ပၢ်လၢ အအဲၣ်ယဟိဝၤယွၤန့ၣ် မ့ၢ်ဝဲတၢ်ဟ့ၣ်လၢအလုၢ်ဒိၣ်ပှ့ၤဒိၣ် တခါန့ၣ်တက့ၢ်. အဝဲသ့ၣ်အဲၣ်ဒိးမၤစၢၤနၤလၢ နကအိၣ်မူဘၣ်လီၤထူလီၤယိာ်လီၤ.
၁၈. ဘၣ်မနုၤအဃိ နပာ်လီၤနသးလၢ နကသးစၢၢ်ဆၢ ခိၣ်ဖးအံၤလဲၣ်.
၁၈ ပအိၣ်ဒီးတၢ်မုၢ်လၢ်လၢ ပကထီၣ်ဘၣ်လၢ မူခိၣ်မ့ၢ်ဂ့ၤ, ပကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤမ့ၢ်ဂ့ၤ ပဝဲတဂၤစုာ်စုာ် ပအိၣ်ခိးကွၢ်လၢ်ခိၣ်ဖးအံၤလီၤ. ပတၢ်မုၢ်လၢ်န့ၣ် မ့ၢ်တၢ်အနီၢ်ကီၢ်လီၤ. တၢ်ဘၣ်တ့ခဲလၢာ်အကစၢ် အၢၣ်လီၤပှၤလၢ– “ဟီၣ်ခိၣ်ကပှဲၤဝဲဒီး တၢ်သ့ၣ်ညါယွၤ ဒ်ထံကျၢၢ်ဘၢပီၣ်လဲၣ်အသိးန့ၣ်လီၤ.” (ယၡါယၤ ၁၁:၉) တယံာ်လၢၤဘၣ် ပှၤလၢအအိၣ်မူဘၣ်လၢ ဟီၣ်ခိၣ်ကိးဂၤဒဲးန့ၣ် ကဒိးန့ၢ်ဘၣ်တၢ်သိၣ်လိလၢ ယဟိဝၤယွၤအအိၣ်လီၤ. ခိၣ်ဖးအံၤအလုၢ်ဒိၣ်ပှ့ၤဒိၣ်ဒိၣ်မးအဃိ ပကြၢးဂုာ်ကျဲးစၢး ဟံးန့ၢ်အီၤလီၤ. လၢတၢ်န့ၣ်အဃိ ထီဘိန့ၣ်သ့ၣ်နီၣ်ထီၣ် ယဟိဝၤယွၤ အတၢ်အၢၣ်လီၤအီလီၤ ဒီးတဘၣ်ပျဲတၢ်တမံၤမံၤ လၢကမၤလီၤဃံၢ်နၤ ဒ်သိးနသုတဒိးန့ၢ်ဘၣ်ခိၣ်ဖးအံၤ တဂ့ၤန့ၣ်တက့ၢ်.
