“ပှ့ၤတၢ်မ့ၢ်တၢ်တီတက့ၢ်, ဒီးဆါကွံာ်အီၤတဂ့ၤ”
“ပှ့ၤတၢ်မ့ၢ်တၢ်တီတက့ၢ်, ဒီးဆါကွံာ်အီၤတဂ့ၤ. ဒီးတၢ်ကူၣ်သ့, ဒီးတၢ်သိၣ်လိ, ဒီးတၢ်ကူၣ်တၢ်ဆးန့ၣ်တက့ၢ်.”—ကတိၤဒိ ၂၃:၂၃.
၁, ၂. (က) လၢနတၢ်အိၣ်မူအပူၤ တၢ်လၢနပာ်လုၢ်ပာ်ပှ့ၤအီၤ အဒိၣ်ကတၢၢ်န့ၣ် မ့ၢ်မနုၤလဲၣ်. (ခ) နပာ်လုၢ်ပာ်ပှ့ၤ တၢ်မ့ၢ်တၢ်တီမနုၤတဖၣ်လဲၣ် ဒီးဘၣ်မနုၤအဃိလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
တၢ်လၢနပာ်လုၢ်ပာ်ပှ့ၤအီၤ အဒိၣ်ကတၢၢ် လၢနတၢ်အိၣ်မူအပူၤန့ၣ် မ့ၢ်မနုၤလဲၣ်. ဒ်ပမ့ၢ် ယဟိဝၤယွၤအခ့အပှၤတဖၣ်အသိး တၢ်လၢပပာ်လုၢ်ပာ်ပှ့ၤအီၤ အဒိၣ်ကတၢၢ်န့ၣ် မ့ၢ်ဝဲပတၢ်ရ့လိာ်သးဒီး ယဟိဝၤယွၤလီၤ. ပတၢ်ရ့လိာ်သးဒီးအီၤန့ၣ် ပတအဲၣ်ဒိးခီလဲဒီး တၢ်အဂၤနီတမံၤဘၣ်. ဒီးပပာ်လုၢ်ပာ်ပှ့ၤစ့ၢ်ကီး လံာ်စီဆှံတၢ်မ့ၢ်တၢ်တီ မ့ၢ်လၢအမၤစၢၤပှၤဒ်သိး ပကကဲထီၣ်ယဟိဝၤယွၤ အတံၤသကိးအဃိလီၤ.—ကလီးစဲ ၁:၉, ၁၀.
၂ ယဟိဝၤယွၤမ့ၢ် ပှၤသိၣ်လိနဲၣ်လိတၢ်လၢ အဂ့ၤကတၢၢ် ဒီးသိၣ်လိပှၤ တၢ်မ့ၢ်တၢ်တီလၢ အအိၣ်လၢအကလုၢ်ကထါ လံာ်စီဆှံအပူၤလီၤ. အဝဲသိၣ်လိပှၤ ဘၣ်ဃးဒီးအမံၤန့ၣ် မ့ၢ်တၢ်လၢအရ့ဒိၣ်ထဲလဲၣ် ဒီးတဲဘၣ်ပှၤ အတၢ်ဂ့ၤတၢ်ဝါလၢ အလီၤကမၢကမၣ်တဖၣ်အဂ့ၢ်န့ၣ်လီၤ. အဝဲဒုးသ့ၣ်ညါပှၤလၢ အအဲၣ်ပှၤဒိၣ်မး ခီဖျိအဟ့ၣ်လီၤကွံာ် အဖိခွါသးဘိ လၢပဂီၢ်န့ၣ်လီၤ. ယဟိဝၤယွၤ သိၣ်လိပှၤလၢ မ့းၡံအၤအဘီအမုၢ်အဂ့ၢ်စ့ၢ်ကီးလီၤ. တကးဒံးဘၣ် အဝဲဟ့ၣ်လီၤပှၤတၢ်မုၢ်လၢ် လၢခါဆူညါအဂီၢ်လီၤ. မ့မ့ၢ်ပှၤလၢ အဘၣ်တၢ်ဒိးဖှူအီၤတဖၣ်န့ၣ် ကထီၣ်ဘၣ်ဆူမူခိၣ် ဒီးမ့မ့ၢ် “သိလၢအဂုၤအဂၤ” တဖၣ်န့ၣ် ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤလီၤ. (ယိၤဟၣ် ၁၀:၁၆) ယဟိဝၤယွၤသိၣ်လိပှၤလၢ ပကဘၣ်အိၣ်မူဒ်လဲၣ်န့ၣ်လီၤ. မ့ၢ်လၢတၢ်မ့ၢ်တၢ်တီတဖၣ်အံၤ မၤစၢၤပှၤဒ်သိး ပကသုးဘူးပသးဆူ တၢ်ဘၣ်တ့ကစၢ်အအိၣ်ဒီး ဟ့ၣ်ပှၤတၢ်မုၢ်လၢ်အဃိ ပပာ်လုၢ်ပာ်ပှ့ၤအီၤဒိၣ်မးလီၤ.
၃. ဒ်သိးပကမၤလိ တၢ်မ့ၢ်တၢ်တီအဂီၢ် ယဟိဝၤယွၤ ဃ့ပှၤစ့ဧါ.
၃ ယဟိဝၤယွၤမ့ၢ်ကစၢ်လၢ အသးအိၣ်ဟ့ၣ်တၢ်ညီ တဂၤစ့ၢ်ကီးလီၤ. အဝဲအသးအိၣ် ဟ့ၣ်တၢ်ညီ တုၤဒၣ်လဲာ်အဟ့ၣ်လီၤကွံာ် အဖိခွါလၢပဂီၢ်လီၤ. ဖဲယဟိဝၤယွၤသ့ၣ်ညါဝဲလၢ ပှၤတဂၤဃုဝဲ တၢ်မ့ၢ်တၢ်တီအခါ အဝဲမၤစၢၤဝဲဒ်သိး ပှၤတဂၤအံၤ ကထံၣ်န့ၢ်တၢ်မ့ၢ်တၢ်တီအဂီၢ်လီၤ. ဒ်သိးပှၤကမၤလိ တၢ်မ့ၢ်တၢ်တီအဂီၢ် အဝဲတဃ့ဝဲစ့ နီတဘျီဘၣ်. ဘၣ်တဘျီ စီၤၡံမိၣ် ဃ့ပှ့ၤတၢ်စိတၢ်ကမီၤလၢ စီၤပ့းတရူးအအိၣ် ဒ်သိးအဝဲကဟ့ၣ်ပှၤဂၤလၢ သးစီဆှံကန့ၢ်အဂီၢ်လီၤ. စီၤပ့းတရူးတဲဘၣ်အီၤလၢ အတၢ်ဆိကမိၣ်န့ၣ်ကမၣ် ဒီးတဲအီၤလၢ “မ်နစ့ဟးဂီၤဃုာ်ဒီးနၤတက့ၢ်. အဂ့ၢ်ဒ်အံၤ, နဆိကမိၣ်လၢယွၤအတၢ်ဟ့ၣ်န့ၣ်, ပှၤပှ့ၤန့ၢ်လၢစ့သ့လီၤ.” (မၤတၢ် ၈:၁၈-၂၀) လၢတၢ်န့ၣ်အဃိ “ပှ့ၤတၢ်မ့ၢ်တၢ်တီ” န့ၣ်အခီပညီမ့ၢ်မနုၤလဲၣ်.
“ပှ့ၤတၢ်မ့ၢ်တၢ်တီ” န့ၣ်အဲၣ်ဒိးတဲဝဲ တၢ်မနုၤလဲၣ်
၄. လၢတၢ်မၤလိတခါအံၤအပူၤ ဘၣ်ဃးဒီးတၢ်မ့ၢ်တၢ်တီန့ၣ် ပကမၤလိဘၣ် တၢ်ဂ့ၢ်မနုၤလဲၣ်.
၄ ဖး ကတိၤဒိ ၂၃:၂၃ တက့ၢ်. ဒ်သိးပကမၤလိ လံာ်စီဆှံတၢ်မ့ၢ်တၢ်တီအဂီၢ် ပဘၣ်ထဲးဂံၢ်ထဲးဘါလီၤ. ဒီးပဘၣ်တူၢ်ၡူကွံာ် တၢ်လၢအဂၤတဖၣ်စ့ၢ်ကီးလီၤ. ဖဲပ “ပှ့ၤတၢ်မ့ၢ်တၢ်တီ” ဝံၤအလီၢ်ခံ ပကဘၣ်ပလီၢ်ပသးဒ်သိးပသုတ “ဆါကွံာ်” ဘၣ်အီၤနီတဘျီတဂ့ၤအဂီၢ်လီၤ. အခီပညီန့ၣ် ပမၤန့ၢ်တၢ်မ့ၢ်တၢ်တီဝံၤအလီၢ်ခံ ပကဘၣ်ပလီၢ်ပသးဒ်သိး ပသုတပာ်တ့ၢ်ကွံာ်အီၤ နီတဘျီတဂ့ၤအဂီၢ်လီၤ. ပ “ပှ့ၤ” လံာ်စီဆှံတၢ်မ့ၢ်တၢ်တီလၢ ကျဲဒ်လဲၣ်, ဒီးပဘၣ် ပှ့ၤအီၤထဲလဲၣ်. တၢ်သံကွၢ်တဖၣ်အံၤ အတၢ်စံးဆၢန့ၣ် ကမၤစၢၤပှၤဒ်သိး ပကပာ်လုၢ်ပာ်ပှ့ၤအါထီၣ် တၢ်မ့ၢ်တၢ်တီ ဒီးတကးဒံးဘၣ် ကမၤစၢၤပှၤဒ်သိး ပကဆၢတဲာ်လီၤပသး ဂၢၢ်ဂၢၢ်ကျၢၤကျၢၤလၢ ပတပာ်တ့ၢ်ကွံာ်တၢ်မ့ၢ်တၢ်တီ နီတဘျီတဂ့ၤအဂီၢ်န့ၣ်လီၤ. ဒီးပကနၢ်ပၢၢ်ထီၣ်လၢ တၢ်မ့ၢ်တၢ်တီလၢ အဟဲလၢယဟိဝၤယွၤအအိၣ်န့ၣ် ဘၣ်မနုၤအဃိ အလုၢ်အပှ့ၤဒိၣ်န့ၢ်ဒံး တၢ်အဂၤခဲလၢာ်လဲၣ်န့ၣ်လီၤ.
၅, ၆. (က) ပတလိၣ်ဟ့ၣ်စ့သနာ်က့ ပပှ့ၤတၢ်မ့ၢ်တၢ်တီကသ့ဒ်လဲၣ်, ဟ့ၣ်တၢ်အဒိတက့ၢ်. (ခ) တၢ်မ့ၢ်တၢ်တီန့ၣ် ကကဲဘျုးလၢပဂီၢ် ဒ်လဲၣ်.
၅ တၢ်တမံၤမံၤလၢ ပဒိးန့ၢ်ဘၣ်ကလီအီၤန့ၣ် အခီပညီတမ့ၢ်လၢ ပတဘၣ်လိၣ်ဟ့ၣ် တၢ်နီတမံၤဘၣ်န့ၣ်ဘၣ်. ဖဲ ကတိၤဒိ ၂၃:၂၃ အပူၤဧ့ၤဘြံၤအတၢ်ကတိၤ လၢအမ့ၢ် “ပှ့ၤ” န့ၣ်အခီပညီအိၣ်စ့ၢ်ကီးလၢ “မၤန့ၢ်” လီၤ. တၢ်ကတိၤခံဖျၢၣ်လၢာ်အံၤန့ၣ် ပာ်ဖျါထီၣ်ဝဲလၢ ပှၤတဂၤထဲးဂံၢ်ထဲးဘါ မ့တမ့ၢ် ဟ့ၣ်လီၤတၢ်တမံၤမံၤ ဒ်သိးကဒိးန့ၢ်ဘၣ်ဝဲ တၢ်လၢအဆိကမိၣ်ဝဲလၢ အလုၢ်ဒိၣ်ပှ့ၤဒိၣ်လၢအဂီၢ်န့ၣ်လီၤ. ဒ်သိးပကနၢ်ပၢၢ်ထီၣ်လၢ ပပှ့ၤတၢ်မ့ၢ်တၢ်တီကသ့ဒ်လဲၣ်အဂီၢ် ပကဆိကမိၣ်ကွၢ် တၢ်အဒိတခါန့ၣ်လီၤ. ဆိကမိၣ်ကွၢ် လၢပှၤဆါအီၣ်တၢ်အလီၢ်န့ၣ် ပှၤပာ်လီၤတကွံသၣ်တဖၣ်ဒီး ပှၤဟ့ၣ်လီၤအီၤခီလီလီလီၤ. ဘၣ်ဆၣ် ပဆ့ၣ်နီၤအိၣ်လၢပဟံၣ် ဒီးပမုၢ်လၢ်လၢ တကွံသၣ်ကဟဲတုၤလၢ ပစီၢ်နီၤခိၣ်အလိၤန့ၣ်ကသ့ဧါ. တသ့ဘၣ်. ပကဘၣ်လဲၤလၢ ပှၤဆါအီၣ်တၢ်အလီၢ်ဒီး ဟဲက့ၤစိာ်အီၤလၢဟံၣ်လီၤ. ပမ့ၢ်တဘၣ်ဟ့ၣ် တကွံသၣ်အံၤအပှ့ၤဘၣ်သနာ်က့ ဒ်သိးပကဒိးန့ၢ်ဘၣ်တကွံသၣ်အဂီၢ် ပကဘၣ်သူပဂံၢ်ပဘါလီၤ. ဒ်န့ၣ်အသိး ပကမၤလိတၢ်မ့ၢ်တၢ်တီအဂီၢ် ပတလိၣ်ဟ့ၣ်စ့ဘၣ်ဆၣ် ပကဘၣ်ထဲးဂံၢ်ထဲးဘါဒီး ဟ့ၣ်လီၤပသးလီၤ.
၆ ဖး ယၡါယၤ ၅၅:၁-၃ တက့ၢ်. တၢ်လၢယဟိဝၤယွၤတဲပှၤတဖၣ်အံၤန့ၣ် မၤစၢၤပှၤဒ်သိး ပကနၢ်ပၢၢ်ထီၣ်တၢ် ပှ့ၤတၢ်မ့ၢ်တၢ်တီ အခီပညီန့ၣ်လီၤ. ပထံၣ်ဘၣ်လၢယဟိဝၤယွၤ ထိၣ်သတြီၤဝဲ အကလုၢ်ကထါဒ် ထံ, တၢ်နုၢ်ထံ ဒီးစပံးထံလီၤ. ဒ်ထံခုၣ် မၤခုၣ်လီၤ ပှၤလၢအသၣ်ဝံၤထံအသးအသိး တၢ်မ့ၢ်တၢ်တီ မၤမုာ်ထီၣ်ပသး ဒီးဒ်တၢ်နုၢ်ထံ မၤဒိၣ်ထီၣ်ဒီးမၤပှဲၤထီၣ် ဖိသၣ်အဂံၢ်အဘါအသိး တၢ်မ့ၢ်တၢ်တီ မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤလီၤ. ဒီးဘၣ်မနုၤအဃိ ယဟိဝၤယွၤထိၣ်သတြီၤဝဲ အကလုၢ်ကထါဒ် စပံးထံလဲၣ်. လံာ်စီဆှံတဲဝဲလၢ စပံးထံန့ၣ် မၤခုပှၤသးလီၤ. (စံးထီၣ်ပတြၢၤ ၁၀၄:၁၅) ဖဲယဟိဝၤယွၤတဲပှၤလၢ “ဟဲပှ့ၤစပံးထံ” အခါ အဝဲအဲၣ်ဒိးတဲဝဲလၢ ပမ့ၢ်အိၣ်မူမၤထွဲ အတၢ်ဟံးစုနဲၣ်ကျဲန့ၣ် ပတၢ်အိၣ်မူကပှဲၤဒီးတၢ်သးခုလီၤ. (စံးထီၣ်ပတြၢၤ ၁၉:၈) ယဟိဝၤယွၤသူဝဲ တၢ်အဒိတဖၣ်အံၤလၢ ကမၤစၢၤပှၤဒ်သိးပကနၢ်ပၢၢ်ထီၣ်လၢ ပမ့ၢ်မၤလိတၢ်မ့ၢ်တၢ်တီဒီး အိၣ်မူမၤထွဲအီၤန့ၣ် ပကဒိးန့ၢ်ဘၣ်အဘျုးဒ်လဲၣ်န့ၣ်လီၤ. လၢတၢ်မၤလိအံၤအပူၤ ပကသမံသမိးကွၢ် တၢ်ဂ့ၢ်လၢဘၣ်ဃးဒီး ဒ်သိးပကပှ့ၤတၢ်မ့ၢ်တၢ်တီအဂီၢ် တၢ်ယဲၢ်မံၤလၢ ဘၣ်သ့ၣ်သ့ၣ် ပကဘၣ်တူၢ်ၡူကွံာ်အီၤန့ၣ်လီၤ.
ဒ်သိးပကပှ့ၤတၢ်မ့ၢ်တၢ်တီအဂီၢ် ပကဘၣ်တူၢ်ၡူကွံာ် တၢ်မနုၤလဲၣ်
၇, ၈. (က) ဒ်သိးပကပှ့ၤ တၢ်မ့ၢ်တၢ်တီအဂီၢ် ဘၣ်မနုၤအဃိ ပကဘၣ်ဟ့ၣ် တၢ်ဆၢကတီၢ်လဲၣ်. (ခ) ပှၤကၠိဖိသးစၢ်တဂၤ ဟ့ၣ်ၡူကွံာ်ဝဲတၢ်မနုၤလဲၣ် ဒီးဒိးန့ၢ်ဘၣ်ဝဲ အဘျုးဒ်လဲၣ်.
၇ တၢ်ဆၢကတီၢ်. ဒ်သိးပှၤတဂၤကဒိကနၣ် ဘီမုၢ်တၢ်သးခုကစီၣ်, ဖးလံာ်စီဆှံဒီးလံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံအပူၤ, မၤလိလံာ်စီဆှံဒီးယဟိဝၤပှၤအုၣ်အသး, ကတဲာ်ကတီၤအသးလၢ တၢ်အိၣ်ဖှိၣ်တဖၣ်အဂီၢ် ဒီးကထီၣ်တၢ်အိၣ်ဖှိၣ်အဂီၢ်န့ၣ် ကဘၣ်ဟ့ၣ်တၢ်ဆၢကတီၢ်လီၤ. ဒ်သိး ပကအိၣ်ဒီးတၢ်ဆၢကတီၢ်လၢ ပကမၤတၢ်သ့ၣ်တဖၣ်အံၤအဂီၢ် ပကဘၣ်ပာ်တ့ၢ်ကွံာ် တၢ်လၢအရ့တဒိၣ်အါအါတဖၣ်န့ၣ်လီၤ. (ဖး အ့းဖ့းစူး ၅:၁၅, ၁၆ တက့ၢ်.) ဒ်သိးပကမၤလိ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိအဂီၢ် တၢ်ဆၢကတီၢ် ကယံာ်ဝဲထဲလဲၣ်. ပှၤတဂၤဒီးတဂၤ ကဘၣ်ဟ့ၣ်တၢ်ဆၢကတီၢ်ထဲလဲၣ်န့ၣ် တဒ်သိးလိာ်အသးဘၣ်. ကစၢ်ယဟိဝၤယွၤ အတၢ်ကူၣ်သ့, အကျဲ ဒီးတၢ်လၢအမၤဝဲတဖၣ်အဂ့ၢ်န့ၣ် ပမၤလိအီၤတလၢာ်နီတဘျီဘၣ်. (ရိမ့ၤ ၁၁:၃၃) တၢးထီခိးတၢ် အဆိကတၢၢ်တဘ့ၣ်န့ၣ် ထိၣ်သတြီၤဝဲ တၢ်မ့ၢ်တၢ်တီဒီး “ဖီဆံးဆံးဖိတဖိးလၢ အဃံအလၤ” ဒီးတဲဝဲလၢ “တဘၣ်သူၣ်မံသးမုာ်ထဲလၢ နအိၣ်ဒီးတၢ်မ့ၢ်တၢ်တီ အဖီတဖိးန့ၣ်တဂ့ၤ. ထဲဒၣ်ပအိၣ်ဒီးဖီတဖိး မ့ၢ်လၢပှဲၤလၢပဂီၢ်န့ၣ် တမ့ၢ်လၢကစၢ်ယွၤ ကကတဲာ်ကတီၤန့ၢ်ပှၤ တၢ်မ့ၢ်တၢ်တီအဖီ လၢအဂၤတဖၣ်ဘၣ်. အဃိ ပာ်ဖှိၣ်ဃာ်တၢ်မ့ၢ်တၢ်တီ ဒီးဆဲးဃုအါထီၣ်တက့ၢ်.” လၢတၢ်န့ၣ်အဃိ ပကဘၣ်သံကွၢ်လီၤပသးလၢ ‘မ့ၢ်ယသ့ၣ်ညါ ယဟိဝၤယွၤအဂ့ၢ် ထဲလဲၣ်လံလဲၣ်.’ ပမ့ၢ်အိၣ်မူဘၣ် လီၤထူလီၤယိာ်သနာ်က့ ပကဘၣ်မၤလိအါထီၣ် ယဟိဝၤယွၤအဂ့ၢ် ထီဘိလီၤ. ဆၢကတီၢ်ခဲအံၤန့ၣ် အရ့ဒိၣ်ဒိၣ်မးလၢ ပကသူပတၢ်ဆၢကတီၢ်လၢ ပကမၤလိယဟိဝၤယွၤအဂ့ၢ် တသ့ဖဲအသ့န့ၣ်လီၤ. ပကကွၢ်သကိး တၢ်အဒိလၢ ပှၤတဂၤမၤဝဲဒ်အံၤန့ၣ်လီၤ.
ပကဘၣ်သူပတၢ်ဆၢကတီၢ် လၢပကမၤလိယဟိဝၤယွၤ အဂ့ၢ်တသ့ဖဲအသ့န့ၣ် မ့ၢ်တၢ်အရ့ဒိၣ်ဒိၣ်မးလီၤ
၈ မၤရံကိၤ * (ကွၢ်တၢ်ဂ့ၢ်အဘျဲၣ်တက့ၢ်) လၢအမ့ၢ် ယပၣ်မုၣ်ဖိတဂၤန့ၣ် လဲၤအိၣ်လၢ ကီၢ်အမဲရကၤ ဒ်သိးကလဲၤထီၣ်ကၠိလၢဝ့ၢ်နူယီးလီၤ. ဘၣ်တနံၤ ပှၤလဲၤလၢညါဒီပုၢ်ဝဲၢ်မုၣ်တဂၤ လဲၤစံၣ်တဲၤတဲလီၤတၢ်လၢ အဟံၣ်လီၤ. မၤရံကိၤန့ၣ် အတၢ်ဘူၣ်တၢ်ဘါအိၣ်လံဘၣ်ဆၣ် အဝဲစးထီၣ်မၤလိလံာ်စီဆှံဒီး ဒီပုၢ်အဝဲၢ်မုၣ်အံၤလီၤ. တၢ်လၢအမၤလိဘၣ်ဝဲတဖၣ်န့ၣ် ဘၣ်သူၣ်ဘၣ်သးဝဲဒိၣ်မးအဃိ အဝဲဃ့မၤလိလံာ်စီဆှံ တနွံခံဘျီလီၤ. မၤရံကိၤ ထီၣ်ကၠိဒီး မၤတၢ်မၤလၢဆၢကတီၢ်တပှဲၤအဃိ အတၢ်မၤအါဝဲလီၤ. ဘၣ်ဆၣ်သနာ်က့ အဝဲစးထီၣ်ထီၣ်ဝဲတၢ်အိၣ်ဖှိၣ် တဘျီဃီလီၤ. အဝဲသူစှၤလီၤအတၢ်ဆၢကတီၢ်လၢ တၢ်မၤမုာ်မၤဖှံသးအဃိ အဝဲအိၣ်ဒီးတၢ်ဆၢကတီၢ်လၢ ကမၤလိအါထီၣ် တၢ်မ့ၢ်တၢ်တီလီၤ. ခီဖျိလၢအဝဲမၤဝဲဒ်န့ၣ်အဃိ အဝဲဘူးထီၣ်ဒီးယဟိဝၤယွၤ ကယီကယီ ဒီးတချုးလၢ တနံၣ်ပှဲၤထီၣ်ဒံးဘၣ်န့ၣ် အဝဲဒိးဘျၢထံလီၤ. အဝဲဒိးဘျၢထံ ဃုလါဝံၤအလီၢ်ခံ, ဖဲ ၂၀၀၆ န့ၣ်အဝဲစးထီၣ်မၤဝဲ ပှၤလဲၤလၢညါ တုၤလၢဆၢကတီၢ်ခဲအံၤလီၤ.
၉, ၁၀. (က) ခီဖျိလၢ ပမၤလိတၢ်မ့ၢ်တၢ်တီအဃိ ပတၢ်ထံၣ်လၢဘၣ်ဃးဒီး ကျိၣ်စ့ဒီးတၢ်ထူးတၢ်တီၤတဖၣ်န့ၣ် ဆီတလဲဝဲဒ်လဲၣ်. (ခ) သးစၢ်ပိာ်မုၣ်တဂၤ တူၢ်ၡူကွံာ်ဝဲ တၢ်မနုၤလဲၣ် ဒီးအဝဲ တူၢ်ဘၣ်ဝဲဒ်လဲၣ်.
၉ ကျိၣ်စ့ဒီး တၢ်ထူးတၢ်တီၤတဖၣ်. ဖဲပမၤလိ တၢ်မ့ၢ်တၢ်တီအခါ ဘၣ်သ့ၣ်သ့ၣ် ပကဘၣ်တူၢ်ၡူကွံာ် ပတၢ်ဖံးတၢ်မၤလၢ ပန့ၢ်စ့အါန့ၣ်လီၤ. အဒိ စီၤပ့းတရူးဒီး စီၤအၣ်ဒရ့းန့ၣ် မ့ၢ်ဝဲပှၤမၤညၣ်ဖိဘၣ်ဆၣ် ဖဲယ့ၣ်ၡူးကွဲမုာ်အီၤလၢ ကကဲထီၣ်အပျဲၢ်အဘီၣ်အခါ အဝဲသ့ၣ်ပာ်တ့ၢ်ကွံာ်ဝဲ အတၢ်မၤအံၤလီၤ. (မးသဲ ၄:၁၈-၂၀) ဘၣ်ဆၣ် ဖဲပမၤလိတၢ်မ့ၢ်တၢ်တီအခါ အခီပညီတမ့ၢ်လၢ ပကဘၣ်ပာ်တ့ၢ်ကွံာ် ပတၢ်မၤန့ၣ်ဘၣ်. ပှၤတဂၤန့ၣ် ကဘၣ်မၤတၢ်မၤဒီး ကွၢ်ထွဲအဟံၣ်ဖိဃီဖိလီၤ. (၁ တံၤမသ့း ၅:၈) ဘၣ်ဆၣ် ဖဲနမၤလိလံာ်စီဆှံအခါ နတၢ်ထံၣ်ဘၣ်ဃးဒီး တၢ်ထူးတၢ်တီၤန့ၣ် ဆီတလဲကွံာ်ဝဲလီၤ. နသ့ၣ်ညါထီၣ်လၢ တၢ်အရ့ဒိၣ်ကတၢၢ်လၢ နတၢ်အိၣ်မူအပူၤန့ၣ် မ့ၢ်တၢ်မနုၤလဲၣ်န့ၣ်လီၤ. ယ့ၣ်ၡူးတဲဝဲလၢ “သုတပာ်ဖှိၣ် သုတၢ်လုၢ်ဒိၣ်ပှ့ၤဒိၣ်လၢ ဟီၣ်ခိၣ်ချၢ” တဂ့ၤ, လၢတၢ်န့ၣ်အလီၢ် အဝဲဟ့ၣ်ဂံၢ်ဟ့ၣ်ဘါပှၤလၢ “ပာ်ဖှိၣ်သုတၢ်လုၢ်ဒိၣ်ပှ့ၤဒိၣ်လၢ မူခိၣ်” လီၤ. (မးသဲ ၆:၁၉, ၂၀) မရံယၤလၢအမ့ၢ် ပိာ်မုၣ်သးစၢ်တဂၤန့ၣ် မၤဝဲဒ်န့ၣ်လီၤ.
၁၀ မရံယၤန့ၣ် လၢအဝဲအနီၢ်ဆံးခါလံၤလံၤ လိာ်ကွဲဝဲဖျၢၣ်ဒိ (golf) မုာ်ဒိၣ်မးလီၤ. ဖဲအဝဲထီၣ်တီၤထီကၠိအခါ အဝဲလိာ်ကွဲဝဲဖျၢၣ်ဒိ ဒံးယံာ်ဒံးဂ့ၤထီၣ်လီၤ. အဝဲလိာ်ကွဲတၢ်ဂ့ၤတုၤဒၣ်လဲာ် ပှၤဟ့ၣ်အီၤ တၢ်မၤလိအစ့ဆီၣ်ထွဲ (scholarship) လၢကထီၣ်ဝဲ ဖၠၣ်စိမိၤကၠိအဂီၢ်လီၤ. မရံယၤ အိၣ်ဒီးအဖီတၢၣ်လၢ ကလုၢ်အီၣ်အသးသမူ ဒီးကဃုစ့အါအါ လၢတၢ်ဂဲၤလိာ်ကွဲဖျၢၣ်ဒိလီၤ. လၢခံန့ၣ် အဝဲမၤလိလံာ်စီဆှံလီၤ. တၢ်လၢအမၤလိဘၣ်ဝဲတဖၣ်န့ၣ် မရံယၤ ဘၣ်သူၣ်ဘၣ်သးဝဲဒိၣ်မးအဃိ စးထီၣ်အိၣ်မူမၤထွဲဝဲလီၤ. အဝဲတဲဝဲလၢ “ယဆီတလဲ ယတၢ်အိၣ်မူသကဲာ်ပဝးဒ် လံာ်စီဆှံ အတၢ်သိၣ်တၢ်သီအိၣ်ဝဲအသိး ဒံးအါထီၣ်ဒီး ယသးခုဒံးဒိၣ်ထီၣ်လီၤ.” မရံယၤသ့ၣ်ညါထီၣ်ဝဲလၢ အဝဲကသးစၢၢ်ဆၢဝဲ အတၢ်ရ့လိာ်သးဒီးယဟိဝၤယွၤ ဒီးတၢ်ဂဲၤလိာ်ကွဲ တကတီၢ်ဃီန့ၣ် တညီဘၣ်. (မးသဲ ၆:၂၄) အဃိ အဝဲဆၢတဲာ်လီၤအသးလၢ ကပာ်တ့ၢ်ကွံာ် တၢ်ဂဲၤလိာ်ကွဲဖျၢၣ်ဒိ ဒီးကဃုထၢတၢ်လၢ အဂ့ၤဒိၣ်န့ၢ်ဒံး တၢ်လိာ်ကွဲအံၤန့ၣ်လီၤ. ဆၢကတီၢ်ခဲအံၤ မရံယၤ မၤဝဲပှၤလဲၤလၢညါဒီး အဝဲတဲဝဲလၢ “ယတၢ်အိၣ်မူ ပှဲၤဒီးအခီပညီဒီး ယအိၣ်ဒီး တၢ်သူၣ်ခုသးခု အါန့ၢ်ဒံးလၢညါ” လီၤ.
ယ့ၣ်ၡူးအၢၣ်လီၤစ့ၢ်ကီးဝဲလၢ လၢတၢ်မ့ၢ်တၢ်တီအဃိ ပမ့ၢ်ဘၣ်တူၢ်ၡူကွံာ်တၢ် ထဲလဲၣ်ထဲလဲၣ်သနာ်က့ ပကန့ၢ်ဘၣ်က့ၤတၢ်အါ န့ၢ်ဒံး တၢ်လၢပဘၣ်တူၢ်ၡူအီၤတဖၣ်
၁၁. ဖဲပမၤလိ တၢ်မ့ၢ်တၢ်တီအခါ ပတၢ်ရ့လိာ်သးဒီးပှၤဂၤန့ၣ် ကကဲထီၣ်အသးဒ်လဲၣ်.
၁၁ တၢ်ရ့လိာ်သးဒီးပှၤဂၤ. ဖဲပစးထီၣ်မၤထွဲ တၢ်လၢပမၤလိဘၣ်လၢ လံာ်စီဆှံပူၤအခါ ပတၢ်ရ့လိာ်သးဒီး ပတံၤသကိးဒီး ပဟံၣ်ဖိဃီဖိတဖၣ်န့ၣ် ဘၣ်သ့ၣ်သ့ၣ် ကဆီတလဲဝဲလီၤ. ဘၣ်မနုၤအဃိလဲၣ်. ဖဲယ့ၣ်ၡူးဃ့ဘါထုကဖၣ်လၢ အပျဲၢ်အဘီၣ်တဖၣ်အဂီၢ်အခါ အဝဲပာ်ဖျါထီၣ်န့ၢ်ပှၤ တၢ်စံးဆၢလီၤ. အဝဲဃ့ထုကဖၣ်ဝဲလၢ “မၤစီဆှံအီၤလၢနတၢ်မ့ၢ်တၢ်တီတက့ၢ်. နကလုၢ်နကထါန့ၣ် မ့ၢ်တၢ်မ့ၢ်တၢ်တီလီၤ.” (ယိၤဟၣ် ၁၇:၁၇) “မၤစီဆှံအီၤ” န့ၣ်အခီပညီ ကမ့ၢ်စ့ၢ်ကီး “မၤလီၤဆီ” အီၤလီၤ. ဖဲပမၤထွဲ တၢ်မ့ၢ်တၢ်တီ လၢပတၢ်အိၣ်မူပူၤအခါ ပလီၤဆီဒီးပှၤဂၤလီၤ. မ့ၢ်လၢ ပမၤထွဲလံာ်စီဆှံ အတၢ်သိၣ်တၢ်သီအဃိလီၤ. ပအဲၣ်ဒိးဆဲးရ့ဒီး ပတံၤသကိးဒီးပဘူးပတံၢ်ဘၣ်ဆၣ် အဝဲသ့ၣ် တနီၤနီၤန့ၣ် ရ့ပှၤတမုာ်ဒ်လၢညါအသိးလၢၤဘၣ် ဒီးဘၣ်သ့ၣ်သ့ၣ် ကထီဒါပတၢ်စူၢ်တၢ်နာ်လၢ အသီအံၤန့ၣ်လီၤ. ဘၣ်ဆၣ် တမ့ၢ်တၢ်လၢ အလီၤကမၢကမၣ်လၢ ပဂီၢ်ဘၣ်. ယ့ၣ်ၡူးတဲဝဲလၢ “ပှၤကညီအဒုၣ်အဒါ ကမ့ၢ်အပှၤဟံၣ်ဖိဒၣ်ဝဲလီၤ.” (မးသဲ ၁၀:၃၆) ယ့ၣ်ၡူးအၢၣ်လီၤစ့ၢ်ကီးဝဲလၢ လၢတၢ်မ့ၢ်တၢ်တီအဃိ ပမ့ၢ်ဘၣ်တူၢ်ၡူကွံာ်တၢ် ထဲလဲၣ်ထဲလဲၣ်သနာ်က့ ပကန့ၢ်ဘၣ်က့ၤတၢ်အါန့ၢ်ဒံး တၢ်လၢပဘၣ်တူၢ်ၡူအီၤတဖၣ်န့ၣ်လီၤ.—ဖး မၢ်ကူး ၁၀:၂၈-၃၀ တက့ၢ်.
၁၂. ဒ်သိးပှၤယူဒၤဖိတဂၤ ကပှ့ၤတၢ်မ့ၢ်တၢ်တီအဂီၢ် အဝဲဘၣ်တူၢ်ၡူကွံာ်ဝဲ တၢ်မနုၤလဲၣ်.
၁၂ ပှၤယူဒၤဖိတဂၤလၢအမံၤမ့ၢ် အဲရဲၤ(န်) န့ၣ်လၢအတၢ်အိၣ်မူဒီတစိၤအပူၤ အဝဲနာ်ဝဲလၢ ပှၤမ့ၢ်ကိးသီၣ် ကစၢ်ယွၤအမံၤန့ၣ် ကမၣ်ဝဲလီၤ. ဘၣ်ဆၣ် အဝဲအဲၣ်ဒိးသ့ၣ်ညါဝဲ တၢ်မ့ၢ်တၢ်တီလၢ ဘၣ်ဃးဒီးကစၢ်ယွၤအဂ့ၢ် သပှၢ်ကတၢၢ်လီၤ. ဘၣ်တနံၤ ယဟိဝၤပှၤအုၣ်အသးတဂၤ ပၠးအီၤကစၢ်ယွၤအမံၤလၢ ဧ့ၤဘြံၤလံာ်မဲာ်ဖျၢၣ်လွံၢ်ဖျၢၣ်လီၤ. ဒီးအဝဲမ့ၢ်ထၢနုာ်ဖးဃုာ်ဝဲဒီး တၢ်သီၣ်မိၢ်ပှၢ်န့ၣ် ကသီၣ်လၢ “ယဟိဝၤ” လီၤ. ဖဲအဝဲသ့ၣ်ညါဝဲတၢ်ဂ့ၢ်အံၤအခါ အသးခုဒိၣ်မးအဃိ အဝဲလဲၤဝဲလၢ ဘူၣ်ဘျီၣ်ပူၤဒ်သိးကတဲဘၣ် ရၤဘံ (သရၣ်) တဖၣ်လီၤ. အဝဲဆိကမိၣ်ဝဲလၢ ရၤဘံတဖၣ် မ့ၢ်သ့ၣ်ညါဝဲ တၢ်မ့ၢ်တၢ်တီလၢဘၣ်ဃးဒီး ကစၢ်ယွၤအမံၤန့ၣ် အဝဲသ့ၣ်အသးကခုလီၤ. ဘၣ်ဆၣ် တၢ်တကဲထီၣ်အသးဒ် အဝဲဆိကမိၣ်ဝဲအသိးဘၣ်. လၢတၢ်န့ၣ်အလီၢ် ပှၤထူးပှဲာ်အီၤဒီး နီဟးထီၣ်ကွံာ်အီၤလီၤ. တကးဒံးဘၣ် အဟံၣ်ဖိဃီဖိတဖၣ်စ့ၢ်ကီး ထီဒါအီၤလီၤ. ဘၣ်ဆၣ် အဝဲတပျဲဝဲလၢ တၢ်သ့ၣ်တဖၣ်အံၤ ကမၤတံာ်တာ်အီၤ ဒ်သိးကသ့ၣ်ညါအါထီၣ် ယဟိဝၤယွၤအဂ့ၢ်အဂီၢ်န့ၣ်ဘၣ်. လၢခံန့ၣ် အဲရဲၤ(န်) ကဲထီၣ်ယဟိဝၤပှၤအုၣ်အသးတဂၤ ဒီးဆဲးမၤယဟိဝၤယွၤအတၢ်မၤလၢ တၢ်သးတီအပူၤ လၢအတၢ်အိၣ်မူတစိၤအသးလီၤ. ပဝဲသ့ၣ်တဖၣ်စ့ၢ်ကီး ဖဲပမၤလိတၢ်မ့ၢ်တၢ်တီအခါ ပကဘၣ်သ့ၣ်ညါလၢ ပတၢ်ရ့လိာ်သးဒီးပှၤဂၤန့ၣ် ဆီတလဲဝဲသ့လီၤ.
၁၃, ၁၄. ဖဲပမၤလိတၢ်မ့ၢ်တၢ်တီအခါ ပကဘၣ်ဆီတလဲ ပတၢ်ဆိကမိၣ်ဒီး ပတၢ်မၤမနုၤတဖၣ်လဲၣ်. ဟ့ၣ်တၢ်အဒိတက့ၢ်.
၁၃ တၢ်ဆိကမိၣ်ဒီး တၢ်မၤလၢ အတကဆှီဘၣ်တဖၣ်. ဒ်သိးပကန့ၢ်ဘၣ် တၢ်မ့ၢ်တၢ်တီ ဒီးအိၣ်မူမၤထွဲ ဒ်လံာ်စီဆှံအတၢ်ဘျၢတဖၣ်အသိးအဂီၢ် ပကဘၣ်သးအိၣ်ဆီတလဲ ပတၢ်ဆိကမိၣ်ဒီး ပတၢ်မၤလၢအတကဆှီတဖၣ်လီၤ. တၢ်မၢဖိပ့းတရူးကွဲးဝဲလၢ “ဒ်ဖိသၣ်လၢ အနၢ်လိၤအသိးန့ၣ်, ဒုးမၤက့ၤသုက့ၢ်သုဂီၤ ဒ်တၢ်သးကွံအခီၣ်ထံးလၢ သုတသ့ၣ်ညါဘၣ်တၢ်ဘၣ်အပူၤအသိးန့ၣ်တဂ့ၤ. . . . ကဲထီၣ်သုဝဲစ့ၢ်ကီးလၢ အစီအဆှံလၢ သုမၤတၢ်ဖံးတၢ် ကိးအမံၤဒဲးအပူၤတက့ၢ်.” (၁ ပ့းတရူး ၁:၁၄, ၁၅) လၢပျၢၤ လၢဝ့ၢ်ကရံၣ်သူးအပူၤန့ၣ် ပှၤအါဂၤအတၢ်အိၣ်မူသကဲာ်ပဝး လီၤရၢၢ်လီၤစၢၢ်ဝဲလီၤ. လၢတၢ်န့ၣ်အဃိ ပှၤအိၣ်ဖဲန့ၣ်တဖၣ်န့ၣ် ဒ်သိးအဝဲသ့ၣ် ကကဆှီလၢ ကစၢ်ယွၤအမဲာ်ညါအဂီၢ် ကဘၣ်မၤဝဲတၢ်ဆီတလဲအါမးလီၤ. (၁ ကရံၣ်သူး ၆:၉-၁၁) မုၢ်မဆါတနံၤအံၤစ့ၢ်ကီး ပှၤအါဂၤန့ၣ် ဖဲအဝဲသ့ၣ် မၤလိလံာ်စီဆှံအခါ မၤဝဲတၢ်ဆီတလဲဒ်န့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် တၢ်မၢဖိပ့းတရူး ကွဲးဝဲလၢ “ပသးသမူအဆၢအကတီၢ်လၢအပူၤကွံာ်န့ၣ်, အါလံလၢပမၤဘၣ်ပှၤကလုာ်တဖၣ်အသးအဂီၢ်, ဖဲပလဲၤလၢတၢ်လုၣ်ကိလုၣ်ကပာ်, တၢ်သးကွံတၢ်, တၢ်အီလုၣ်ကိစပံးထံ, တၢ်အီၣ်ဖှိၣ်အီဖှိၣ်, ဒီးတၢ်ဘါတၢ်သးဘၣ်အၢတၢ်ဂီၤတဖၣ်, အဖၢမုၢ်န့ၣ်လံ.”—၁ ပ့းတရူး ၄:၃.
၁၄ ဒဲဘဲၤဒီးကၠဲစမဲၤ မ့ၢ်ပှၤအီသံးဖိန့ၣ် အိၣ်လံအနံၣ်အါမးလံ. ဒဲဘဲၤ မ့ၢ်ပှၤဖီၣ်စ့စရီလၢ အဖၠဲးဘၣ်ဆၣ် ခီဖျိလၢ အအီသံးအဃိ အဝဲဆဲးမၤအတၢ်မၤတန့ၢ်လၢၤဘၣ်. မ့မ့ၢ် ကၠဲစမဲၤန့ၣ် ပှၤသ့ၣ်ညါအီၤလၢ အမ့ၢ်ပှၤလၢ အသးဒိၣ်ထီၣ်တၢ်ညီဒီး အမၤဆူၣ်မၤစိးတၢ်လီၤ. ဘၣ်တနံၤ ဖဲအဝဲအီသံးအခါ ထံၣ်လိာ်အသးဒီး မံးၡ့ၣ်နရ့ၣ်ဒီမါဝၤခံဂၤ လၢကျဲဖီခိၣ်လီၤ. မံးၡ့ၣ်နရ့ၣ်ခံဂၤအံၤ တဲဘၣ်အီၤလၢ အကလဲၤမၤလိလံာ်စီဆှံဒီးအီၤလီၤ. ဒီးလၢခံတနွံ ဖဲမံးၡ့ၣ်နရ့ၣ်ခံဂၤလဲၤလၢ အဟံၣ်အခါ ဒဲဘဲၤဒီးကၠဲစမဲၤ ခံဂၤလၢာ်န့ၣ်မူၤသံးလီၤ. အဝဲသ့ၣ် တဆိကမိၣ်ဝဲလၢ မံးၡ့ၣ်နရ့ၣ်ခံဂၤအံၤ ကသးအိၣ်အဝဲသ့ၣ် တုၤဒၣ်လဲာ် ကဟဲလၢအဝဲသ့ၣ်အဟံၣ်ဘၣ်. ဖဲမံးၡ့ၣ်နရ့ၣ်ခံဂၤ လဲၤကဒါက့ၤလၢခံတဘျီအခါ တၢ်အိၣ်အသးဆီတလဲဝဲလီၤ. ဒဲဘဲၤဒီးကၠဲစမဲၤန့ၣ် အသးအိၣ်မၤလိ လံာ်စီဆှံတၢ်မ့ၢ်တၢ်တီဒိၣ်မး ဒီးအဝဲသ့ၣ် မၤထွဲဝဲ တၢ်လၢအမၤလိဘၣ်ဝဲတဖၣ် ချ့ချ့လီၤ. တချုး သၢလါပှဲၤထီၣ်ဒံးဘၣ်န့ၣ် အဝဲသ့ၣ် တအီသံးလၢၤဘၣ် ဒီးလၢခံအဝဲသ့ၣ် ဖျီအသးဒ် ပဒိၣ်အတၢ်သိၣ်တၢ်သီ အိၣ်ဝဲအသိးလီၤ. ပှၤအါဂၤလၢ အဝဲသ့ၣ်အသဝီပူၤန့ၣ် ပာ်သူၣ်ပာ်သးဝဲလၢ ဒဲဘဲၤဒီးကၠဲစမဲၤ အတၢ်အိၣ်မူဆီတလဲအဃိ အဝဲသ့ၣ်စ့ၢ်ကီး မၤလိလံာ်စီဆှံလီၤ.
၁၅. ဒ်သိးပကပှ့ၤတၢ်မ့ၢ်တၢ်တီအဂီၢ် တၢ်ဆီတလဲလၢ ပကဘၣ်မၤအီၤ အကီကတၢၢ်အကျါတခါန့ၣ် မ့ၢ်မနုၤလဲၣ် ဒီးဘၣ်မနုၤအဃိလဲၣ်.
၁၅ မိၢ်လုၢ်ပၢ်လၢ်ဒီး တၢ်ဆဲးတၢ်လၤလၢ တဘၣ်ကစၢ်ယွၤအသးတဖၣ်. တၢ်ဆီတလဲလၢ ပကဘၣ်မၤအီၤ အကီကတၢၢ်အကျါတခါန့ၣ် မ့ၢ်ဝဲပတဘၣ်မၤဘၣ်ထွဲလိာ်ပသးဒီး မိၢ်လုၢ်ပၢ်လၢ်ဒီး တၢ်ဆဲးတၢ်လၤတဖၣ်လၢ တဘၣ်ကစၢ်ယွၤအသးန့ၣ်လီၤ. ပှၤတနီၤနီၤန့ၣ် ဖဲအသ့ၣ်ညါထီၣ်ဝဲ ကစၢ်ယွၤအတၢ်ထံၣ်လၢ ဘၣ်ဃးဒီးတၢ်ဂ့ၢ်သ့ၣ်တဖၣ်အံၤအခါဒၣ်လဲာ် ကီလၢအဝဲသ့ၣ် ကဟးဆှဲးဝဲဒံး. အဝဲသ့ၣ်ဘၣ်ယိၣ်ဝဲလၢ အဟံၣ်ဖိဃီဖိ ဒီးအသကိးတဖၣ် ကတူၢ်ဘၣ်ဝဲဒ်လဲၣ်န့ၣ်လီၤ. အဝဲသ့ၣ်သ့ၣ်ညါဝဲလၢ ပှၤတနီၤနီၤန့ၣ် ပာ်ဒိၣ်ဝဲ မိၢ်လုၢ်ပၢ်လၢ်သ့ၣ်တဖၣ် ဒ်သိးဒီး တၢ်မၤလၤကပီၤ ဘူးတံၢ်လၢအသံသ့ၣ်တဖၣ်န့ၣ်လီၤ. (၅ မိၤၡ့ ၁၄:၁) တၢ်မနုၤကမၤစၢၤပှၤဒ်သိး ပကမၤတၢ်ဆီတလဲအဂီၢ်လဲၣ်. ပဟံးန့ၢ်တၢ်မၤလိလၢ ပှၤဒိဂ့ၤတဲာ်ဘၣ် လၢပျၢၤတဖၣ်လၢ အမၤတၢ်ဆီတလဲ ဖဲအသ့ၣ်ညါထီၣ် တၢ်မ့ၢ်တၢ်တီအခါ သ့ဝဲန့ၣ်လီၤ. လၢအဝဲသ့ၣ်အကျါတနီၤန့ၣ် မ့ၢ်ဝဲခရံာ်ဖိလၢညါလၢ ဝ့ၢ်အ့းဖ့းစူးအပူၤတဖၣ်လီၤ.
၁၆. ပှၤအ့းဖ့းစူးဖိတနီၤ တူၢ်ၡူကွံာ်ဝဲတၢ်မနုၤသ့ၣ်တဖၣ်လဲၣ်.
၁၆ လၢပျၢၤ လၢဝ့ၢ်အ့းဖ့းစူးအပူၤန့ၣ် ပှၤမၤတၢ်မၤကဒါမဲာ် အိၣ်ဝဲအါမးလီၤ. ဘၣ်ဆၣ် ပှၤလၢအမၤဝဲ တၢ်မၤကဒါမဲာ် အတၢ်ဖံးတၢ်မၤတဖၣ်န့ၣ် ဖဲအဝဲသ့ၣ်ကဲထီၣ်ခရံာ်ဖိအခါ အဝဲသ့ၣ်မၤဝဲဒ်လဲၣ်. လံာ်စီဆှံပာ်ဖျါထီၣ်ဝဲလၢ “ပှၤအါဒံအါဂၤလၢ အမၤတ့ၢ်တၢ်မၤကဒါမဲာ် အတၢ်ဖံးတၢ်မၤ ဟဲစိာ်ပာ်ဖှိၣ်အလံာ်လၢ အသိၣ်လိအီၤဘၣ်ဃး တၢ်မၤတမံၤအံၤအဂ့ၢ်တဖၣ် တပူၤဃီ ဒီးဒွဲၣ်အူကွံာ်ဝဲလၢ ကမျၢၢ်အမဲာ်ညါလီၤ. အဝဲသ့ၣ်ဂံၢ်ကွၢ်ဒွးကွၢ် လံာ်သ့ၣ်တဖၣ်အံၤခဲလၢာ်အပှ့ၤ, ဒီးလီၤလၢဝဲ စ့အဘ့ၣ်ယဲၢ်ကလးန့ၣ်လီၤ.” (မၤတၢ် ၁၉:၁၉, ၂၀, ခ့ခါစှီၤကျိာ်) ခရံာ်ဖိတဖၣ်အံၤ သးအိၣ်တူၢ်ၡူကွံာ်ဝဲ အလံာ်လဲၢ်လၢ အပှ့ၤဒိၣ်တဖၣ်အံၤအဃိ ယဟိဝၤယွၤဆိၣ်ဂ့ၤအဝဲသ့ၣ်လီၤ.
ဒ်သိးနကမၤလိ တၢ်မ့ၢ်တၢ်တီအဂီၢ် နဘၣ်ဟ့ၣ် တၢ်မနုၤလဲၣ်
၁၇. (က) ဒ်သိးပကမၤန့ၢ် တၢ်မ့ၢ်တၢ်တီအဂီၢ် တၢ်လၢပကဘၣ်တူၢ်ၡူကွံာ်အီၤတနီၤန့ၣ် မ့ၢ်မနုၤလဲၣ်. (ခ) တၢ်မၤလိလၢခံတခါန့ၣ် ပကတဲသကိးတၢ်ဂ့ၢ်မနုၤလဲၣ်.
၁၇ ဒ်သိးနကမၤလိ တၢ်မ့ၢ်တၢ်တီအဂီၢ် နဘၣ်ဟ့ၣ် တၢ်မနုၤလဲၣ်. ပဝဲခဲလၢာ်န့ၣ် ပဘၣ်ဟ့ၣ်လီၤတၢ်ဆၢကတီၢ်လီၤ. ဒီးတနီၤနီၤန့ၣ် ဘၣ်တူၢ်ၡူကွံာ်ဝဲ တၢ်ခွဲးတၢ်ယာ်လၢ ကကဲဒိၣ်ထီၣ်အဂီၢ်န့ၣ်လီၤ. ဒီးပတၢ်ရ့လိာ်သးဒီးပှၤဂၤ ကဆီတလဲဝဲစ့ၢ်ကီးလီၤ. ပဝဲအါဂၤန့ၣ် ပဘၣ်ဆီတလဲ ပတၢ်ဆိကမိၣ်ဒီး တၢ်လၢပမၤသ့ၣ်တဖၣ် ဒီးပဘၣ်ပာ်တ့ၢ်ကွံာ် လုၢ်လၢ်ထူသနူဒီး တၢ်ဆဲးတၢ်လၤတဖၣ်လၢ တဘၣ်ယဟိဝၤယွၤအသးန့ၣ်လီၤ. ဘၣ်ဆၣ် ပနာ်လၢ လံာ်စီဆှံတၢ်မ့ၢ်တၢ်တီန့ၣ် အလုၢ်အပှ့ၤဒိၣ်န့ၢ်ဒံး တၢ်လၢပဘၣ်တူၢ်ၡူကွံာ်အီၤသ့ၣ်တဖၣ်လီၤ. ခီဖျိလၢ လံာ်စီဆှံတၢ်မ့ၢ်တၢ်တီအဃိ ပအိၣ်ဒီးတၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ်သ့ဝဲလီၤ. ပတၢ်ရ့လိာ်သးဒီးအီၤန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်ကတၢၢ် လၢပတၢ်အိၣ်မူအပူၤလီၤ. ဖဲပဆိကမိၣ်ကွၢ် တၢ်ဆိၣ်ဂ့ၤကိးမံၤဒဲးလၢ ပဒိးန့ၢ်ဘၣ်အီၤ ခီဖျိလၢတၢ်မ့ၢ်တၢ်တီအဃိအခါ ဘၣ်မနုၤအဃိ ပှၤတနီၤနီၤအဲၣ်ဒိး “ဆါကွံာ်” တၢ်မ့ၢ်တၢ်တီလဲၣ်န့ၣ် ပနၢ်ပၢၢ်အီၤကီဒိၣ်မးလီၤ. ဘၣ်မနုၤအဃိ ပှၤတနီၤနီၤဆါကွံာ် တၢ်မ့ၢ်တၢ်တီလဲၣ် ဒီးဒ်သိးပသုတမၤဘၣ် တၢ်ကမၣ်ဖးဒိၣ်ဒ်န့ၣ် နီတဘျီတဂ့ၤအဂီၢ် ပမၤကသ့ဒ်လဲၣ်. ပကထံၣ်န့ၢ်တၢ်စံးဆၢ လၢတၢ်မၤလိလၢခံတခါအပူၤလီၤ.
^ လံာ်အဆၢ. 8 ပှၤမံၤတနီၤ ဘၣ်တၢ်ဆီတလဲအီၤလီၤ.
