“ယကလဲၤတၢ်လၢ နတၢ်မ့ၢ်တၢ်တီအပူၤ”
“နဲၣ်လိယၤလၢနကျဲတက့ၢ်, ယွၤဧၢ, ယကလဲၤတၢ်လၢ နတၢ်မ့ၢ်တၢ်တီအပူၤလီၤ.”—စံးထီၣ်ပတြၢၤ ၈၆:၁၁.
၁-၃. (က) ပကြၢးပာ်လုၢ်ပာ်ပှ့ၤ တၢ်မ့ၢ်တၢ်တီထဲလဲၣ်, ဟ့ၣ်တၢ်အဒိတက့ၢ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
လၢပစိၤခဲအံၤ ပှၤအါဂၤန့ၣ် ဖဲအဝဲသ့ၣ်ပှ့ၤတၢ်တမံၤမံၤဝံၤအခါ က့ၤဆှၢကဒါက့ၤဝဲ ဆူပှၤဆါတၢ်ဖိအအိၣ်လီၤ. ဒီးဖဲအဝဲသ့ၣ် ပှ့ၤတၢ်လၢ အီၤလဲ (online) အပူၤအခါဒၣ်လဲာ်န့ၣ် အဲၣ်ဒိးက့ၤဆှၢက့ၤဝဲလီၤ. ဘၣ်သ့ၣ်သ့ၣ် ကမ့ၢ်လၢ တၢ်လၢအဝဲသ့ၣ် ပှ့ၤဝဲန့ၣ် တဂ့ၤထဲသိးဒီး အဝဲသ့ၣ်ဆိကမိၣ်ပာ်စၢၤဝဲ မ့တမ့ၢ် တၢ်ဖိတၢ်လံၤတခါအံၤ တဂ့ၤဘၣ်တမံၤမံၤအဃိလီၤ. လၢတၢ်န့ၣ်အဃိ အဝဲသ့ၣ်အဲၣ်ဒိး ဆီတလဲက့ၤဝဲလၢ တၢ်အဂၤတမံၤမံၤ မ့တမ့ၢ် ဃ့ကဒါက့ၤအစ့လီၤ.
၂ ဘၣ်ဃးဒီး လံာ်စီဆှံတၢ်မ့ၢ်တၢ်တီန့ၣ် ပတဘၣ်မၤဒ်န့ၣ် နီတဘျီဘၣ်. ပ “ပှ့ၤ” တၢ်မ့ၢ်တၢ်တီဝံၤ ပတအဲၣ်ဒိး “ဆါကွံာ်” အီၤနီတဘျီဘၣ်. အဲၣ်ဒိးတဲဝဲ ပမၤလိတၢ်မ့ၢ်တၢ်တီဝံၤ ပတအဲၣ်ဒိးပာ်တ့ၢ်ကွံာ်အီၤ နီတဘျီဘၣ်. (ဖး ကတိၤဒိ ၂၃:၂၃ တက့ၢ်; ၁ တံၤမသ့း ၂:၄) ဒ်တၢ်မၤလိလၢ အပူၤကွံာ်တခါတဲဝဲအသိး ဒ်သိးပကမၤလိတၢ်မ့ၢ်တၢ်တီအဂီၢ် ပဘၣ်ဟ့ၣ်တၢ်ဆၢကတီၢ်အါမးလီၤ. ဒီးဘၣ်သ့ၣ်သ့ၣ် ပကဘၣ်ပာ်တ့ၢ်ကွံာ် တၢ်ဖံးတၢ်မၤလၢ ပကန့ၢ်စ့အါအါန့ၣ်လီၤ. တကးဒံးဘၣ် ဘၣ်သ့ၣ်သ့ၣ် ပဘၣ်ဆီတလဲကွံာ် ပတၢ်ရ့လိာ်သးဒီးပှၤဂၤ, ပတၢ်ဆိကမိၣ် ဒီးတၢ်လၢပမၤအီၤတဖၣ် ဒီးပတဘၣ်ပၣ်ဃုာ်လၢ မိၢ်လုၢ်ပၢ်လၢ်ဒီး တၢ်ဆဲးတၢ်လၤလၢ အတဘၣ်ယဟိဝၤယွၤအသးတဖၣ်လၢၤဘၣ်. ဘၣ်ဆၣ် ပနာ်လၢ တၢ်လၢပဘၣ်တူၢ်ၡူကွံာ်အီၤ ကိးမံၤဒဲးန့ၣ် အလုၢ်အပှ့ၤတဒိၣ်ထဲသိးဒီး တၢ်ဆိၣ်ဂ့ၤလၢ ပဒိးန့ၢ်ဘၣ်အီၤခီဖျိလၢ ပသ့ၣ်ညါထီၣ် တၢ်မ့ၢ်တၢ်တီန့ၣ်ဘၣ်.
၃ ယ့ၣ်ၡူးဟ့ၣ်ဝဲ တၢ်အဒိလၢဘၣ်ဃးဒီး ပှၤကၤတၢ်ဖိတဂၤလၢ အဟးဃုဝဲ တၢ်မျၢ်ပလဲန့ၣ်လီၤ. ဖဲပှၤတဂၤ ထံၣ်ဝဲတၢ်မျၢ်ပလဲလၢ အလုၢ်ဒိၣ်ပှ့ၤဒိၣ်အခါ ဒ်သိးအဝဲကပှ့ၤဝဲ တၢ်မျၢ်ပလဲအံၤအဂီၢ် အဝဲလဲၤဆါလီၤကွံာ်ဝဲ တၢ်လၢအအိၣ်ဒီးအီၤခဲလၢာ် တဘျီဃီလီၤ. တၢ်မျၢ်ပလဲန့ၣ် ဒိလီၤဝဲ တၢ်မ့ၢ်တၢ်တီလၢ ဘၣ်ဃးဒီးယွၤအဘီအမုၢ်လီၤ. ယ့ၣ်ၡူးပာ်ဖျါထီၣ်ဝဲလၢ တၢ်မ့ၢ်တၢ်တီန့ၣ် အလုၢ်ဒိၣ်ပှ့ၤဒိၣ်လၢ ပှၤလၢအဃုအီၤတဂၤအဂီၢ် ထဲလဲၣ်န့ၣ်လီၤ. (မးသဲ ၁၃:၄၅, ၄၆) ဖဲပမၤလိဘၣ် တၢ်မ့ၢ်တၢ်တီလၢ ဘၣ်ဃးဒီး ယွၤအဘီအမုၢ် ဒီးလံာ်စီဆှံ တၢ်မ့ၢ်တၢ်တီ အဂၤတဖၣ်အခါ ပသးအိၣ်ဟ့ၣ်လီၤကွံာ်တၢ်ကိးမံၤဒဲး ဒ်သိးပကဒိးန့ၢ်ဘၣ် တၢ်မ့ၢ်တၢ်တီတဖၣ်အံၤအဂီၢ်လီၤ. ဒီးပမ့ၢ်ဆဲးပာ်လုၢ်ပာ်ပှ့ၤ တၢ်မ့ၢ်တၢ်တီတဖၣ်အံၤန့ၣ် ပတပာ်တ့ၢ်ကွံာ်အီၤ နီတဘျီဘၣ်. ဘၣ်ဆၣ် လီၤသးအုးဒိၣ်မးလၢ ကစၢ်ယွၤအခ့အပှၤ တနီၤနီၤန့ၣ် တပာ်လုၢ်ပာ်ပှ့ၤဝဲ တၢ်မ့ၢ်တၢ်တီလၢၤဘၣ်, ဒီးတနီၤန့ၣ် တုၤဒၣ်လဲာ်ပာ်တ့ၢ်ကွံာ်ဝဲ တၢ်မ့ၢ်တၢ်တီလီၤ. ဘၣ်ဆၣ် မ့မ့ၢ်ပဝဲန့ၣ် ပတဘၣ်မၤဒ်န့ၣ်ဘၣ်. ပကဘၣ်မၤထွဲ လံာ်စီဆှံ အတၢ်ဟ့ၣ်ကူၣ်လၢအမ့ၢ် “လဲၤတၢ်လၢတၢ်မ့ၢ်တၢ်တီအပူၤ” လီၤ. (ဖး ၃ ယိၤဟၣ် ၂-၄ တက့ၢ်.) တၢ်အံၤအခီပညီမ့ၢ်ဝဲ ပကဘၣ်ပာ်တၢ်မ့ၢ်တၢ်တီလၢ နီၢ်ဂံၢ်တၢဒီး ပပာ်အီၤလၢနီၢ်ဂံၢ်တၢန့ၣ် ပကဘၣ်ပာ်ဖျါထီၣ်အီၤလၢ ပတၢ်အိၣ်မူအပူၤလီၤ. ပှၤတနီၤ “ဆါကွံာ်” မ့တမ့ၢ် ပာ်တ့ၢ်တၢ်မ့ၢ်တၢ်တီလၢ ကျဲဒ်လဲၣ် ဒီးဘၣ်မနုၤအဃိ အဝဲသ့ၣ်မၤဝဲ ဒ်န့ၣ်လဲၣ်. ဒ်သိးပသုတမၤဘၣ်ဒ်န့ၣ် နီတဘျီတဂ့ၤအဂီၢ် ပကဘၣ်မၤဒ်လဲၣ်. ဒီးဒ်သိးပကပာ်လီၤပသး ဂၢၢ်ဂၢၢ်ကျၢၤကျၢၤလၢပက “လဲၤတၢ်လၢတၢ်မ့ၢ်တၢ်တီအပူၤ” အဂီၢ်ပကဘၣ်မၤဒ်လဲၣ်.
ပှၤတနီၤ “ဆါကွံာ်” တၢ်မ့ၢ်တၢ်တီလၢ ကျဲဒ်လဲၣ် ဒီးဘၣ်မနုၤအဃိလဲၣ်
၄. လၢယ့ၣ်ၡူးအစိၤန့ၣ် ဘၣ်မနုၤအဃိ ပှၤတနီၤနီၤ တဆဲးလဲၤတၢ်လၢ တၢ်မ့ၢ်တၢ်တီအပူၤလၢၤဘၣ်လဲၣ်.
၄ လၢယ့ၣ်ၡူးအစိၤန့ၣ် ပှၤတနီၤနီၤ တူၢ်လိာ်တၢ်မ့ၢ်တၢ်တီဘၣ်ဆၣ် အဝဲသ့ၣ် တဆဲးလဲၤတၢ်လၢ တၢ်မ့ၢ်တၢ်တီအပူၤဘၣ်. အဒိ ဖဲယ့ၣ်ၡူးမၤဝဲတၢ်လီၤလး ဒီးဒုးအီၣ်ဒုးအီဝဲ ပှၤဂီၢ်မုၢ်တဖၣ်ဝံၤအခါ ပှၤဂီၢ်မုၢ်တဖၣ် ပိာ်အခံတုၤလၢ ပီၣ်လဲၣ်ကၤလံၤလါ အဝၢ်ဘးခီလီၤ. ယ့ၣ်ၡူးတဲဝဲလၢ “သုမ့ၢ်တအီၣ်ဘၣ်ပှၤကညီဖိခွါအညၣ်, ဒီးသုမ့ၢ်တအီဘၣ်အသွံၣ်ဘၣ်ဒီး, တၢ်မူတအိၣ်ဘၣ်လၢသုပူၤဘၣ်.” ဖဲန့ၣ်အခါ ပှၢ်ဂီၢ်မုၢ်တဖၣ် ဖုးဘၣ်အသးဒီး လၢအဝဲသ့ၣ်ကသံကွၢ်ဝဲ ယ့ၣ်ၡူးအတၢ်ကတိၤအံၤ အခီပညီအလီၢ် အဝဲသ့ၣ်တဲဘၣ်ယ့ၣ်ၡူးလၢ “တၢ်ကတိၤအံၤကီမးလီၤ. မ့ၢ်မတၤဒိကနၣ်အီၤသ့တဂၤလဲၣ်.” ဒီး “အပျဲၢ်အဘီၣ်အါဂၤ တပိာ်လၢၤဘၣ်အခံဘၣ်. ဒီးက့ၤကဒါက့ၤဆူ အလီၢ်ခံတကူၢ်သ့ၣ်လီၤ.”—ယိၤဟၣ် ၆:၅၃-၆၆.
၅, ၆. (က) လၢပစိၤခဲအံၤန့ၣ် ဘၣ်မနုၤအဃိ ပှၤတနီၤ ထုးယံၤထီၣ်အသးဒီး တၢ်မ့ၢ်တၢ်တီလဲၣ်. (ခ) ဘၣ်မနုၤအဃိ ပှၤတနီၤယံၤထီၣ်ဒီး တၢ်မ့ၢ်တၢ်တီ ကယီကယီလဲၣ်.
၅ လီၤသးအုးဒိၣ်မးလၢ ဆၢကတီၢ်ခဲအံၤန့ၣ် ပှၤတနီၤနီၤ ပာ်တ့ၢ်ကွံာ်တၢ်မ့ၢ်တၢ်တီလီၤ. ဘၣ်သ့ၣ်သ့ၣ် ကမ့ၢ်လၢပှၤမၤတၢ်ဆီတလဲဒ်သိးဒီး တၢ်နၢ်ပၢၢ်အသီလၢ ဘၣ်ဃးဒီးလံာ်စီဆှံအဃိ မ့တမ့ၢ် ဒီပုၢ်ဝဲၢ်လၢ ပှၤသ့ၣ်ညါအီၤအါတဂၤ အတၢ်ကတိၤ မ့တမ့ၢ် အတၢ်မၤအဃိ အဝဲသ့ၣ်လီၤဃံၢ်ဝဲလီၤ. ဒီးပှၤတနီၤန့ၣ် ဖဲပှၤဟ့ၣ်ကူၣ်အီၤလၢလံာ်စီဆှံအခါ တဘၣ်သူၣ်ဘၣ်သးဝဲအဃိ မ့တမ့ၢ် အဝဲသ့ၣ်အသးတလီၤပလိာ်ဒီး ပှၤတဂၤဂၤလၢ တၢ်အိၣ်ဖှိၣ်အပူၤအဃိလီၤ. မ့မ့ၢ်ပှၤအဂၤတနီၤန့ၣ် နာ်ဝဲပှၤလၢအစူးကွံာ်ညိကွံာ် တၢ်မ့ၢ်တၢ်တီတဖၣ် အတၢ်သိၣ်တၢ်သီ ဒီးပှၤလၢအတဲဟးဂီၤပှၤတဖၣ်အဃိလီၤ. တၢ်ဂ့ၢ်တဖၣ်အံၤန့ၣ် မ့ၢ်ဝဲတၢ်ဂ့ၢ်တနီၤလၢ ပှၤတနီၤ ထုးယံၤထီၣ်အသးဒီး တၢ်အိၣ်ဖှိၣ် ဒီးယဟိဝၤယွၤန့ၣ်လီၤ. (ဧ့ၤဘြံၤ ၃:၁၂-၁၄) လၢအဝဲသ့ၣ်ကမၤဝဲဒ်န့ၣ်အလီၢ် အဝဲသ့ၣ်မ့ၢ်နာ်ဝဲ ယ့ၣ်ၡူးဒ်စီၤပ့းတရူးအသိးန့ၣ် ကဂ့ၤထဲလဲၣ်. ဖဲပှၤအါဂၤ တတူၢ်လိာ်ဝဲ ယ့ၣ်ၡူးအတၢ်ကတိၤအခါ ယ့ၣ်ၡူးသံကွၢ်အတၢ်မၢဖိတဖၣ်လၢ မ့ၢ်အဝဲသ့ၣ် အဲၣ်ဒိးပာ်တ့ၢ်ကွံာ်အီၤစ့ၢ်ကီးဧါန့ၣ်လီၤ. ဖဲန့ၣ်န့ၣ် စီၤပ့းတရူးစံးဆၢအီၤလၢ “ကစၢ်ဧၢ, ပကလဲၤဆူမတၤတဂၤအအိၣ်လဲၣ်. တၢ်မူအထူအယိာ် အတၢ်ကတိၤန့ၣ် အိၣ်ဒီးနၤလီၤ.”—ယိၤဟၣ် ၆:၆၇-၆၉.
၆ ပှၤတနီၤန့ၣ် လၢတၢ်တပာ်သူၣ်ပာ်သးအပူၤ အဝဲသ့ၣ်ယံၤထီၣ်ဒီးတၢ်မ့ၢ်တၢ်တီ ကယီကယီလီၤ. ဘၣ်ဆၣ် အနီၢ်ကစၢ် တသ့ၣ်ညါလီၤအသးဘၣ်. ပှၤတဂၤလၢ အယံၤထီၣ်ဒီးတၢ်မ့ၢ်တၢ်တီ ကယီကယီန့ၣ် လီၤဂာ်ဒ်သိး ချံတဘ့ၣ်လၢအယံၤထီၣ်ဒီး ထံကျိကၢၢ်နံၤ ကယီကယီန့ၣ်လီၤ. လံာ်စီဆှံဟ့ၣ်ပလီၢ်ပှၤဒ်သိး ပသုတ “လဲၤပူၤကွံာ်” တၢ်မ့ၢ်တၢ်တီတဂ့ၤအဂီၢ်လီၤ. (ဧ့ၤဘြံၤ ၂:၁) ပှၤလၢအယံၤထီၣ်ဒီး တၢ်မ့ၢ်တၢ်တီ ကယီကယီတဖၣ်န့ၣ် တမ့ၢ်လၢအဝဲသ့ၣ် အဲၣ်ဒိးမၤဝဲဒ်န့ၣ်ဘၣ်. အဝဲသ့ၣ် အတၢ်ရ့လိာ်သးဒီးယဟိဝၤယွၤ စှၤလီၤဝဲကယီကယီ ဒီးလၢခံ တုၤဒၣ်လဲာ်အတၢ်ရ့လိာ်သးဒီးယွၤ ဟးဂီၤကွံာ်ဝဲလီၤ. ဒ်သိး တၢ်တကဲထီၣ်အသးဒီးပှၤ ဒ်အံၤနီတဘျီတဂ့ၤအဂီၢ် ပကဘၣ်မၤဒ်လဲၣ်.
ဒ်သိးပသုတဆါကွံာ် တၢ်မ့ၢ်တၢ်တီ နီတဘျီတဂ့ၤအဂီၢ် ပကဘၣ်မၤဒ်လဲၣ်
၇. တၢ်မနုၤကမၤစၢၤပှၤ ဒ်သိးပသုတဆါကွံာ် တၢ်မ့ၢ်တၢ်တီ နီတဘျီတဂ့ၤအဂီၢ်လဲၣ်.
ပဃုထၢလၢ ပကမၤထွဲလံာ်စီဆှံ တၢ်မ့ၢ်တၢ်တီတနီၤ ဒီးတမၤထွဲအီၤတနီၤန့ၣ် တသ့ဘၣ်
၇ ဒ်သိးပကဆဲးလဲၤတၢ်လၢ တၢ်မ့ၢ်တၢ်တီအပူၤအဂီၢ် ပကဘၣ်တူၢ်လိာ် ဒီးဒိကနၣ် တၢ်ကိးမံၤဒဲး လၢယဟိဝၤယွၤတဲပှၤလီၤ. တၢ်မ့ၢ်တၢ်တီန့ၣ် ကဘၣ်မ့ၢ်တၢ်အရ့ဒိၣ်ကတၢၢ်လၢ ပတၢ်အိၣ်မူအပူၤ ဒီးပကဘၣ်မၤထွဲ လံာ်စီဆှံအတၢ်ဟံးစုနဲၣ်ကျဲ လၢတၢ်ကိးမံၤဒဲးအပူၤလီၤ. ဖဲစီၤဒၤဝံးဃ့ဘါထုကဖၣ်တၢ်အခါ အဝဲအၢၣ်လီၤ ယဟိဝၤယွၤလၢ “ယကလဲၤတၢ်လၢ နတၢ်မ့ၢ်တၢ်တီအပူၤလီၤ.” (စံးထီၣ်ပတြၢၤ ၈၆:၁၁) စီၤဒၤဝံးပာ်လီၤအသးလၢ ကဆဲးလဲၤတၢ်လၢ တၢ်မ့ၢ်တၢ်တီအပူၤလီၤ. ပဝဲသ့ၣ်တဖၣ်စ့ၢ်ကီး ပကဘၣ်မၤဒ်န့ၣ်လီၤ. ပမ့ၢ်တမၤဒ်န့ၣ်ဘၣ်န့ၣ် ပကစးထီၣ်ဆိကမိၣ်ဘၣ် တၢ်လၢပဘၣ်တူၢ်ၡူကွံာ်အီၤ ခီဖျိလၢတၢ်မ့ၢ်တၢ်တီအဃိ ဒီးဘၣ်သ့ၣ်သ့ၣ် ပကလီကီထွဲက့ၤအီၤ တနီၤလီၤ. ဘၣ်ဆၣ် ပဃုထၢလၢ ပကမၤထွဲလံာ်စီဆှံ တၢ်မ့ၢ်တၢ်တီတနီၤ ဒီးတမၤထွဲအီၤတနီၤန့ၣ် တသ့ဘၣ်. ပကဘၣ်မၤထွဲ “တၢ်မ့ၢ်တၢ်တီခဲလၢာ်” လီၤ. (ယိၤဟၣ် ၁၆:၁၃) တၢ်မၤလိလၢအပူၤကွံာ်တခါန့ၣ် ပမၤလိဘၣ် ဘၣ်ဃးဒီး တၢ်ယဲၢ်မံၤလၢ ပဘၣ်တူၢ်ၡူကွံာ်အီၤ ခီဖျိလၢ ပမၤလိတၢ်မ့ၢ်တၢ်တီ ဒီးမၤထွဲအီၤအဃိလီၤ. ခဲအံၤ ပကမၤလိဘၣ်လၢ ဒ်သိးပသုတလီကီက့ၤ တၢ်လၢပပာ်တ့ၢ်ကွံာ်အီၤတဂ့ၤအဂီၢ် ပမၤကသ့ဒ်လဲၣ်န့ၣ်လီၤ.—မးသဲ ၆:၁၉.
၈. ဒ်သိး ပသုတယံၤထီၣ်ဒီး တၢ်မ့ၢ်တၢ်တီတဂ့ၤအဂီၢ် ပကဘၣ်သူ ပတၢ်ဆၢကတီၢ်ဒ်လဲၣ်. ဟ့ၣ်တၢ်အဒိတက့ၢ်.
၈ တၢ်ဆၢကတီၢ်. ဒ်သိးပသုတယံၤထီၣ်ဒီး တၢ်မ့ၢ်တၢ်တီနီတဘျီတဂ့ၤအဂီၢ် ပကဘၣ်သူ ပတၢ်ဆၢကတီၢ်လၢ တၢ်ကူၣ်သ့အပူၤလီၤ. ပမ့ၢ်တပလီၢ်ပသးဘၣ်န့ၣ် ပကသူဘၣ်ပတၢ်ဆၢကတီၢ်လၢ တၢ်မၤမုာ်မၤဖှံသး, တၢ်လၢပဘၣ်သူၣ်ဘၣ်သးအီၤ, တၢ်သူအ့ထၢၣ်နဲး မ့တမ့ၢ် တၢ်ကွၢ်တၢ်ဂီၤမူတဖၣ်အဂီၢ် အါမးန့ၣ်လီၤ. တၢ်သ့ၣ်တဖၣ်အံၤန့ၣ် မ့ၢ်တကမၣ်ခဲလၢာ်ဒၣ်လဲာ် ကမၤစှၤလီၤ ပတၢ်ဆၢကတီၢ် လၢပကမၤလိလံာ်စီဆှံဒီး စံၣ်တဲၤတဲလီၤတၢ်အဂီၢ်လီၤ. တၢ်ကဲထီၣ်အသးဒီး အဲမၤ ဒ်န့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) လၢအဲမၤအနီၢ်ဆံးခါလံၤလံၤန့ၣ် အဝဲဒိးကသ့ၣ်မုာ်မးဒီး ဖဲအဝဲချုးတဘျီလၢ်လၢ်န့ၣ် ဒိးဝဲကသ့ၣ်လီၤ. အဲမၤသူဝဲအတၢ်ဆၢကတီၢ်လၢ အကဒိးကသ့ၣ်အဂီၢ်န့ၣ် အါတလၢအဃိ အဝဲစးထီၣ်တူၢ်ဘၣ်ဝဲလၢ အမၤတၢ်န့ၣ်ကမၣ် ဒီးလၢခံအဝဲ ဆၢတဲာ်လီၤအသးလၢ ကမၤတၢ်ဆီတလဲလီၤ. အဝဲဟံးန့ၢ်တၢ်မၤလိလၢ ဒီပုၢ်ဝဲၢ်မုၣ် ခိရံၤ ဝဲ(လ်) အတၢ်လဲၤခီဖျိလီၤ. ခိရံၤ ဝဲ(လ်) န့ၣ်လၢညါအမ့ၢ် ပှၤဒိးပြၢကသ့ၣ်ဖိတဂၤလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ခဲအံၤ အဲမၤသူဝဲအတၢ်ဆၢကတီၢ်လၢ ကမၤအါထီၣ် ယဟိဝၤယွၤအတၢ်မၤ တကးဒံးဘၣ် အဝဲကရ့လိာ်အသးဒီး အဟံၣ်ဖိဃီဖိဒီး အတံၤသကိးတဖၣ်အဂီၢ် အတၢ်ဆၢကတီၢ်အိၣ်အါထီၣ်ဝဲလီၤ. အဲမၤတူၢ်ဘၣ်ဝဲလၢ အဘူးထီၣ်ဒီးကစၢ်ယွၤ တကးဒံးဘၣ် ခီဖျိအသ့ၣ်ညါဝဲလၢ အဝဲသူအတၢ်ဆၢကတီၢ်လၢ တၢ်ကူၣ်သ့အပူၤအဃိ အအိၣ်ဒီးတၢ်သးခုလီၤ.
၉. ကျိၣ်စ့ဒီးတၢ်ထူးတၢ်တီၤတဖၣ် ကဲထီၣ်တၢ်အရ့ဒိၣ်တလၢလၢပဂီၢ် သ့လၢကျဲဒ်လဲၣ်.
၉ ကျိၣ်စ့ဒီး တၢ်ထူးတၢ်တီၤတဖၣ်. ဒ်သိးပကဆဲးလဲၤတၢ်လၢ တၢ်မ့ၢ်တၢ်တီအပူၤအဂီၢ် ပတဘၣ်ဟ့ၣ်အခွဲးလၢ ကျိၣ်စ့ဒီး တၢ်ထူးတၢ်တီၤတဖၣ် ကကဲထီၣ်တၢ်လၢ အရ့ဒိၣ်တလၢ လၢပတၢ်အိၣ်မူအပူၤဘၣ်. ဖဲပမၤလိ တၢ်မ့ၢ်တၢ်တီအခါ ပနာ်လၢ တၢ်မၤယဟိဝၤယွၤအတၢ်မၤန့ၣ် အရ့ဒိၣ်န့ၢ်ဒံး ကျိၣ်စ့ဒီး တၢ်ထူးတၢ်တီၤတဖၣ်အဃိ ပသးအိၣ်တူၢ်ၡူကွံာ် တၢ်သ့ၣ်တဖၣ်အံၤ လၢတၢ်မ့ၢ်တၢ်တီအဂီၢ်လီၤ. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်အသိး ပကထံၣ်ဘၣ်လၢ ပှၤအဂၤတဖၣ်ပှ့ၤဝဲ အံၣ်လဲးထြီနံးတၢ်ပီးတၢ်လီ လၢအဟဲထီၣ်သီတဖၣ် မ့တမ့ၢ် တၢ်အဂၤတဖၣ်န့ၣ်လီၤ. ဖဲန့ၣ်အခါ ပကတူၢ်ဘၣ်လၢ တၢ်လီၤဟိအိၣ်ဒီးပှၤတမံၤမံၤလီၤ. ဒီးဘၣ်သ့ၣ်သ့ၣ် ပတသးမံဒီး တၢ်လၢအအိၣ်ဒီးပှၤလၢၤဘၣ်. အဃိ ပကသးစၢၢ်ဆၢ တၢ်ဃုကျိၣ်ဃုစ့ဒီးတၢ်ထူးတၢ်တီၤ အါန့ၢ်တၢ်မၤယဟိဝၤယွၤ အတၢ်မၤန့ၣ်လီၤ. တၢ်မၤအသးဒီး စီၤဒ့မၤ ဒ်န့ၣ်လီၤ. အဝဲအဲၣ် “တၢ်လၢအအံၤတဃၣ်” တုၤဒၣ်လဲာ် ပာ်တ့ၢ်ကွံာ်အမူဒါ ဒီးတၢ်မၢဖိပီလူးန့ၣ်လီၤ. (၂ တံၤမသ့း ၄:၁၀) ဘၣ်သ့ၣ်သ့ၣ် ကမ့ၢ်လၢ စီၤဒ့မၤန့ၣ် အဲၣ်ဝဲကျိၣ်စ့ဒီး တၢ်ထူးတၢ်တီၤအါန့ၢ် တၢ်မၤယဟိဝၤယွၤ အတၢ်မၤအဃိလီၤ. မ့တမ့ၢ်ဘၣ်န့ၣ် ကမ့ၢ်လၢ အဝဲတအဲၣ်ဒိး တူၢ်ဆါအသးဃုာ်ဒီး စီၤပီလူးလၢၤဘၣ် အဃိလီၤ. ပမၤလိန့ၢ်တၢ်မနုၤလၢ စီၤဒ့မၤအအိၣ်လဲၣ်. ဘၣ်သ့ၣ်သ့ၣ် လၢညါန့ၣ် ပကမ့ၢ်ပှၤလၢ အအဲၣ်ကျိၣ်အဲၣ်စ့ဒီး လူၤတၢ်ထူးတၢ်တီၤလီၤ. ပမ့ၢ်တပလီၢ်ပသးဘၣ်န့ၣ် ပတၢ်အဲၣ်အံၤ ကဟဲက့ၤဒိၣ်ထီၣ်ဝဲ ကယီကယီ တုၤဒၣ်လဲာ် ပတၢ်အဲၣ်တၢ်မ့ၢ်တၢ်တီ လီၤမၢ်ကွံာ်ဝဲလီၤ.
၁၀. ပကဘၣ်တြီဆၢကွံာ် တၢ်မနုၤသ့ၣ်တဖၣ်လဲၣ်.
၁၀ တၢ်ရ့လိာ်သးဒီးပှၤဂၤ. ဒ်သိးပကဆဲးလဲၤတၢ်လၢ တၢ်မ့ၢ်တၢ်တီအပူၤအဂီၢ် ပတဘၣ်ပျဲလၢ ပှၤလၢအတဘူၣ်ထီၣ်ဘါထီၣ် ယဟိဝၤယွၤတဖၣ် အတၢ်ပာ်သူၣ်ပာ်သး ကလုၢ်ဘၢပှၤဘၣ်. ဖဲပစးထီၣ်မၤလိ တၢ်မ့ၢ်တၢ်တီအခါ ပတၢ်ရ့လိာ်သးဒီး ပသကိးလၢအတမ့ၢ် ယဟိဝၤပှၤအုၣ်အသးတဖၣ် ဒီးပဟံၣ်ဖိဃီဖိတဖၣ်န့ၣ် ဆီတလဲဝဲလီၤ. ဘၣ်သ့ၣ်သ့ၣ် အဝဲသ့ၣ်တနီၤန့ၣ် ကပာ်ကဲဝဲပတၢ်နာ်အသီအံၤ ဘၣ်ဆၣ် အဝဲသ့ၣ်တနီၤန့ၣ် ကထီဒါပှၤလီၤ. (၁ ပ့းတရူး ၄:၄) ဒ်လဲၣ်ဂ့ၤဒ်လဲၣ်ဂ့ၤ ပဂုာ်ကျဲးစၢးအဂ့ၤကတၢၢ် ဒ်သိးပကအိၣ်ဃူဃူဖိးဖိးဒီး ပဟံၣ်ဖိဃီဖိ ဒီးပကပာ်ဖျါထီၣ်တၢ်အဲၣ် လၢအဝဲသ့ၣ်အဖီခိၣ်လီၤ. ဘၣ်ဆၣ် ဒ်သိးပကမၤမုာ် အဝဲသ့ၣ်အသးအဂီၢ် ပကွၢ်ကပာ်ကွံာ် ယဟိဝၤယွၤအတၢ်ဘျၢတသ့ဘၣ်. ဒ် ၁ ကရံၣ်သူး ၁၅:၃၃ တဲဝဲအသိး ပတံၤသကိးလၢ ပရ့ဒီးအီၤဘူးဘူးတံၢ်တံၢ်တဖၣ်န့ၣ် ကြၢးမ့ၢ်ပှၤလၢ အအဲၣ်ယဟိဝၤယွၤလီၤ.
၁၁. ပဟးဆှဲးတၢ်ဆိကမိၣ်ဒီး တၢ်မၤလၢ အတကဆှီဘၣ်တဖၣ် ကသ့ဒ်လဲၣ်.
၁၁ တၢ်ဆိကမိၣ်ဒီး တၢ်မၤလၢ အတကဆှီဘၣ်တဖၣ်. ဒ်သိးပကဆဲးလဲၤတၢ်လၢ တၢ်မ့ၢ်တၢ်တီအပူၤအဂီၢ် ပကဘၣ်အိၣ်ကဆှီ မ့တမ့ၢ် စီဆှံလၢ ယဟိဝၤယွၤအမဲာ်ညါလီၤ. (ယၡါယၤ ၃၅:၈; ဖး ၁ ပ့းတရူး ၁:၁၄-၁၆ တက့ၢ်.) ဖဲပမၤလိ တၢ်မ့ၢ်တၢ်တီအခါ ပမၤတၢ်ဆီတလဲ ဒ်လံာ်စီဆှံ အတၢ်ဘျၢအိၣ်ဝဲအသိးလီၤ. ဒီးပဝဲတနီၤနီၤန့ၣ် ပဘၣ်မၤတၢ်ဆီတလဲ ဖးအါညါလီၤ. ဘၣ်ဆၣ် ပကဘၣ်ပလီၢ်ပသးဒ်သိး ပတၢ်အိၣ်မူလၢ အကဆှီန့ၣ် သုတကဲထီၣ်ကဒါက့ၤ တၢ်အိၣ်မူလၢ အတကဆှီဘၣ်တဂ့ၤန့ၣ်လီၤ. ဒ်သိးပတြီဆၢကွံာ် တၢ်လ့ပစီလၢ ပကမၤဘၣ်တၢ်လၢ အတကဆှီဘၣ်တဖၣ် ကန့ၢ်အဂီၢ် တၢ်မနုၤကမၤစၢၤပှၤလဲၣ်. ပမ့ၢ်ဆိကမိၣ်ထံ ယဟိဝၤယွၤအတၢ်ဟ့ၣ်န့ၣ် ကမၤစၢၤပှၤဒ်သိး ပကအိၣ်ကဆှီအဂီၢ်လီၤ. အဝဲဟ့ၣ်လီၤပှၤ အဖိခွါယ့ၣ်ၡူးခရံာ်လၢ အပာ်လုၢ်ပာ်ပှ့ၤဝဲဒီး အအဲၣ်ဝဲန့ၣ်လီၤ. (၁ ပ့းတရူး ၁:၁၈, ၁၉) ဒ်သိးပဆဲးအိၣ်ကဆှီလၢ ယဟိဝၤယွၤအမဲာ်ညါကသ့အဂီၢ် ထီဘိန့ၣ် ပကဘၣ်သ့ၣ်နီၣ်ထီၣ်လၢ ယ့ၣ်ၡူးအတၢ်ပှ့ၤက့ၤန့ၣ် အလုၢ်အပှ့ၤဒိၣ် ထဲလဲၣ်န့ၣ်လီၤ.
၁၂, ၁၃. (က) ဘၣ်မနုၤအဃိ ပကဘၣ်ထံၣ် နံၤသဘျ့တဖၣ်ဒ် ယဟိဝၤယွၤထံၣ်ဝဲအသိးလဲၣ်. (ခ) ပကဆဲးမၤလိသကိး တၢ်ဂ့ၢ်မနုၤလဲၣ်.
၁၂ မိၢ်လုၢ်ပၢ်လၢ်ဒီး တၢ်ဆဲးတၢ်လၤလၢ တဘၣ်ကစၢ်ယွၤအသးတဖၣ်. ဖဲပဟံၣ်ဖိဃီဖိ, ပတံၤသကိးလၢ တၢ်မၤလီၢ်ဒီး တံၤသကိးလၢကၠိတဖၣ် မၤဝဲမူးပွဲလၢ တဘၣ်ကစၢ်ယွၤအသးတဖၣ်အခါ အဝဲသ့ၣ် ကအဲၣ်ဒိးလၢ ပပၣ်ဃုာ်လၢ အဝဲသ့ၣ်အကျါလီၤ. ဖဲအဝဲသ့ၣ်မၢပပၣ်ဃုာ်လၢ လုၢ်လၢ်ထူသနူ ဒီးနံၤသဘျ့ လၢတဘၣ်ကစၢ်ယွၤအသးအခါ ဒ်သိးပတြီဆၢကွံာ် တၢ်ဆီၣ်သနံးတဖၣ်အံၤကန့ၢ်အဂီၢ် တၢ်မနုၤကမၤစၢၤပှၤလဲၣ်. ဘၣ်မနုၤအဃိ ယဟိဝၤယွၤ တဘၣ်သူၣ်ဘၣ်သးဝဲ နံၤသဘျ့တဖၣ်အံၤလဲၣ်န့ၣ် ပကဘၣ်သ့ၣ်ညါ လီၤတံၢ်လီၤဆဲးလီၤ. နံၤသဘျ့တဖၣ်အံၤ ဟဲစးထီၣ်အသးဒ်လဲၣ်န့ၣ် ပဃုသ့ၣ်ညါအါထီၣ်အီၤလၢ ပလံာ်လဲၢ်တဖၣ်အပူၤသ့ဝဲလီၤ. ဖဲပဆိကမိၣ်ထံ လံာ်စီဆှံအတၢ်သိၣ်တၢ်သီ လၢဘၣ်ဃးဒီး ပတမၤလၤကပီၤ နံၤသဘျ့တဖၣ်အံၤအခါ ပတူၢ်ဘၣ်လၢ ပလဲၤကျဲလၢ “အဘၣ်ကစၢ်အသး” န့ၣ်လီၤ. (အ့းဖ့းစူး ၅:၁၀) ပမ့ၢ်နာ်န့ၢ် ယဟိဝၤယွၤဒီး အတၢ်ကတိၤတဖၣ်န့ၣ် ပတဘၣ်ယိၣ်တၢ်လၢ ပှၤဂၤကဆိကမိၣ်ပှၤဒ်လဲၣ်န့ၣ်ဘၣ်.—ကတိၤဒိ ၂၉:၂၅.
၁၃ ပအဲၣ်ဒိး ဆဲးလဲၤတၢ်လၢ တၢ်မ့ၢ်တၢ်တီအပူၤ ထီဘိလီၤ. ဒီးပဆၢတဲာ်လီၤပသးဒ်န့ၣ်စ့ၢ်ကီးလီၤ. တၢ်မနုၤကမၤစၢၤပှၤဒ်သိး ပတၢ်ဆၢတဲာ် ကဂၢၢ်ကျၢၤအါထီၣ်အဂီၢ်လဲၣ်. ပကတဲသကိး တၢ်ဂ့ၢ်သၢမံၤလၢ ပကဘၣ်မၤအီၤန့ၣ်လီၤ.
မၤဂၢၢ်ကျၢၤထီၣ် နတၢ်ဆၢတဲာ်လၢ နကလဲၤတၢ်လၢ တၢ်မ့ၢ်တၢ်တီအပူၤ
၁၄. (က) ပမ့ၢ်ဆဲးမၤလိ လံာ်စီဆှံန့ၣ် ကမၤစၢၤပှၤဒ်သိး ပကဆၢတဲာ်လီၤပသး ဂၢၢ်ဂၢၢ်ကျၢၤကျၢၤလၢ ပတပာ်တ့ၢ်ကွံာ်တၢ်မ့ၢ်တၢ်တီ နီတဘျီတဂ့ၤအဂီၢ်ဒ်လဲၣ်. (ခ) ဘၣ်မနုၤအဃိ ပလိၣ်ဘၣ် တၢ်ကူၣ်သ့, တၢ်သိၣ်လိ ဒီးတၢ်ကူၣ်တၢ်ဆးလဲၣ်.
၁၄ အဆိကတၢၢ်န့ၣ် ပကဘၣ် မၤလိလံာ်စီဆှံဒီး ဆိကမိၣ်ထံအီၤ လီၤတံၢ်လီၤဆဲးလီၤ. နကဘၣ် ပာ်လီၤတၢ်ဆၢကတီၢ် လၢနကမၤဒ်န့ၣ်အဂီၢ်လီၤ. ဒ်နမၤလိလံာ်စီဆှံ အါထီၣ်အသိး နတၢ်အဲၣ်တၢ်မ့ၢ်တၢ်တီ ဒံးယံာ်ဒံးကအါထီၣ်ဒီး နတၢ်ဆၢတဲာ်လၢ ဘၣ်ဃးဒီးနတပာ်တ့ၢ်ကွံာ် တၢ်မ့ၢ်တၢ်တီ နီတဘျီဘၣ်န့ၣ် ကဂၢၢ်ကျၢၤထီၣ်ဝဲလီၤ. ကတိၤဒိ ၂၃:၂၃ တဲဝဲလၢပကဘၣ် “ပှ့ၤတၢ်မ့ၢ်တၢ်တီ” တကးဒံးဘၣ် တဲစ့ၢ်ကီးဝဲလၢ ပကဘၣ်ပှ့ၤ “တၢ်ကူၣ်သ့, ဒီးတၢ်သိၣ်လိ, ဒီးတၢ်ကူၣ်တၢ်ဆး” လီၤ. ထဲပသ့ၣ်ညါထီၣ် လံာ်စီဆှံတၢ်မ့ၢ်တၢ်တီန့ၣ် တလၢပှဲၤဒံးဘၣ်. ပကဘၣ်မၤထွဲအီၤလၢ ပတၢ်အိၣ်မူအပူၤလီၤ. ဖဲပဒိးန့ၢ်ဘၣ်တၢ်ကူၣ်တၢ်ဆး မ့တမ့ၢ် နၢ်ပၢၢ်ထီၣ်တၢ်ဂ့ၢ်အခါ ပက့ၤပာ်ဖှိၣ်က့ၤအီၤဒီး တၢ်ဂ့ၢ်လၢပသ့ၣ်ညါပာ်စၢၤအီၤတဖၣ်လီၤ. ဖဲန့ၣ်န့ၣ် ပကန့ၢ်ဘၣ်တၢ်ကူၣ်သ့ ဒီးကမၤစၢၤပှၤ ဒ်သိးပကမၤထွဲ တၢ်လၢပသ့ၣ်ညါအီၤတဖၣ်လီၤ. တဘျီတခီၣ်န့ၣ် တၢ်မ့ၢ်တၢ်တီ ကသိၣ်လိပှၤ ခီဖျိအဒုးသ့ၣ်ညါပှၤလၢ ပကဘၣ်မၤတၢ်ဆီတလဲန့ၣ်လီၤ. ပကြၢးမၤထွဲ တၢ်သိၣ်လိအံၤ တဘျီဃီလီၤ. လံာ်စီဆှံတဲဝဲလၢ တၢ်သိၣ်လိန့ၣ် အလုၢ်ဒိၣ်ပှ့ၤဒိၣ်န့ၢ်စ့လီၤ.—ကတိၤဒိ ၈:၁၀.
၁၅. တၢ်မ့ၢ်တၢ်တီန့ၣ် ဒီသဒၢပှၤဒ် ယီၢ်တကိးအသိးဒ်လဲၣ်.
၁၅ ခံမံၤတမံၤန့ၣ် ပကဘၣ်ဆၢတဲာ်လီၤပသးလၢ ပကမၤထွဲတၢ်မ့ၢ်တၢ်တီလၢ ပတၢ်အိၣ်မူအပူၤ ကိးနံၤဒဲးလီၤ. လံာ်စီဆှံ ထိၣ်သတြီၤဝဲ တၢ်မ့ၢ်တၢ်တီလၢ ပှၤသုးဖိတဂၤအယီၢ်တကိးလီၤ. (အ့းဖ့းစူး ၆:၁၄) လၢပျၢၤပှၤသုးဖိတဖၣ်န့ၣ် ဖဲအဝဲသ့ၣ်လဲၤဒုးတၢ်အခါ အယီၢ်တကိးကဲထီၣ်တၢ်မၤစၢၤ ဒီးတၢ်ဒီသဒၢလၢ အဝဲသ့ၣ်အဂီၢ်လီၤ. ဘၣ်ဆၣ် အဝဲသ့ၣ် ကဘၣ်စၢဃာ်ဝဲအယီၢ်တကိး ဃံးဃံးလီၤ. အဝဲသ့ၣ် အယီၢ်တကိးမ့ၢ်လီၤကျီန့ၣ် တကဲထီၣ် တၢ်မၤစၢၤလၢ အဝဲသ့ၣ်အဂီၢ်လၢၤဘၣ်. တၢ်မ့ၢ်တၢ်တီန့ၣ် ဒီသဒၢပှၤဒ် ယီၢ်တကိးအသိးဒ်လဲၣ်. ပမ့ၢ်မၤထွဲ တၢ်မ့ၢ်တၢ်တီထီဘိန့ၣ် ကဒီသဒၢပှၤလၢ တၢ်ဆိကမိၣ်လၢ အတဂ့ၤဘၣ်တဖၣ် ဒီးကမၤစၢၤပှၤဒ်သိး ပကဆၢတဲာ်တၢ်လၢအဘၣ်လီၤ. ဖဲပအိၣ်ဒီး တၢ်ကီတၢ်ခဲဖးဒိၣ် မ့တမ့ၢ် ပထံၣ်ဘၣ်ဒီး တၢ်လ့ပစီလၢ ပကမၤကမၣ်ဘၣ်တၢ်အခါ လံာ်စီဆှံ တၢ်မ့ၢ်တၢ်တီ ကမၤစၢၤပှၤဒ်သိး ပကဆၢတဲာ်လီၤပသး ဂၢၢ်ဂၢၢ်ကျၢၤကျၢၤလၢ ပကမၤတၢ်အဘၣ်အဂီၢ်လီၤ. ဒ်ပှၤသုးဖိတဂၤ ဖဲအလဲၤဒုးတၢ်အခါ တပာ်တ့ၢ်ဝဲအယီၢ်တကိး နီတဘျီဘၣ်အသိး ပဝဲသ့ၣ်တဖၣ်စ့ၢ်ကီး ပတဘၣ်ပာ်တ့ၢ်တၢ်မ့ၢ်တၢ်တီ နီတဘျီဘၣ်. ပကဘၣ်မၤထွဲ လံာ်စီဆှံတၢ်မ့ၢ်တၢ်တီ လၢပတၢ်အိၣ်မူ ကိးသနၢၣ်ဒဲးအပူၤလီၤ. ပှၤသုးဖိတဖၣ်န့ၣ် ကဘၣ်ထီထီၣ်ဝဲအနးလၢ ယီၢ်တကိးအလိၤလီၤ. မ့မ့ၢ်ပဝဲမီၤ, ပမၤဒ်န့ၣ်ကသ့ဒ်လဲၣ်.
၁၆. တၢ်သိၣ်လိပှၤဂၤလၢ တၢ်မ့ၢ်တၢ်တီန့ၣ် မၤစၢၤပှၤဒ်သိး ပကဆဲးလဲၤတၢ်လၢ တၢ်မ့ၢ်တၢ်တီအပူၤဒ်လဲၣ်.
၁၆ သၢမံၤတမံၤန့ၣ် တသ့ဖဲအသ့ သိၣ်လိပှၤဂၤလၢ လံာ်စီဆှံတၢ်မ့ၢ်တၢ်တီတက့ၢ်. လံာ်စီဆှံန့ၣ် ဘၣ်တၢ်ထိၣ်သတြီၤအီၤဒီးနးလီၤ. ဒ်ပှၤသုးဖိတဂၤ ထီဃာ်ဝဲအနးလၢ အယီၢ်တကိးအလိၤကျၢၤကျၢၤအသိး ပကဘၣ်ဟံးဃာ် ယွၤအကလုၢ်ကထါ ကျၢၤကျၢၤလီၤ. (အ့းဖ့းစူး ၆:၁၇) ပဝဲခဲလၢာ် ပဂုာ်ကျဲးစၢး “နီၤဖးတၢ်မ့ၢ်တၢ်တီ အကလုၢ်အကထါအဆၢ တီတီလိၤလိၤ” ဒီးကဲထီၣ်ပှၤသိၣ်လိတၢ် လၢအဂ့ၤဒိၣ်ထီၣ်ဆူညါထီဘိသ့ဝဲလီၤ. (၂ တံၤမသ့း ၂:၁၅) ဖဲပသိၣ်လိပှၤဂၤအခါ ပမ့ၢ်သူလံာ်စီဆှံန့ၣ် ပတၢ်သ့ၣ်ညါဒီးတၢ်အဲၣ် တၢ်မ့ၢ်တၢ်တီကအါထီၣ်ထီဘိလီၤ. ဒီးပတၢ်ပာ်လီၤသးလၢ ပကလဲၤတၢ်လၢတၢ်မ့ၢ်တၢ်တီအကျဲန့ၣ် ကဂၢၢ်ကျၢၤထီၣ်ဝဲလီၤ.
တၢ်မ့ၢ်တၢ်တီန့ၣ် မ့ၢ်တၢ်ဟ့ၣ်အလုၢ်ဒိၣ်ပှ့ၤဒိၣ်တခါလၢ ယဟိဝၤယွၤဟ့ၣ်ပှၤလီၤ
၁၇. ဘၣ်မနုၤအဃိ နပာ်လုၢ်ပာ်ပှ့ၤ တၢ်မ့ၢ်တၢ်တီလဲၣ်.
၁၇ တၢ်မ့ၢ်တၢ်တီန့ၣ် မ့ၢ်တၢ်ဟ့ၣ် အလုၢ်ဒိၣ်ပှ့ၤဒိၣ်တခါလၢ ယဟိဝၤယွၤ ဟ့ၣ်ပှၤလီၤ. ဒီးခီဖျိလၢ တၢ်မ့ၢ်တၢ်တီအဃိ ပအိၣ်ဒီး တၢ်ရ့လိာ်သးဒီး ပပၢ်လၢမူခိၣ် ဘူးဘူးတံၢ်တံၢ်သ့ဝဲလီၤ. ပတၢ်ရ့လိာ်သးဒီး ယဟိဝၤယွၤန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ် ကတၢၢ်လီၤ. ယဟိဝၤယွၤ သိၣ်လိပှၤတၢ်အါမး ဘၣ်ဆၣ် တၢ်သ့ၣ်တဖၣ်အံၤ အိၣ်ဒၣ်တစဲးဒံးလီၤ. အဝဲအၢၣ်လီၤပှၤလၢ ကသိၣ်လိပှၤထီဘိလီၤ. အဃိပာ်လုၢ်ပာ်ပှ့ၤ တၢ်မ့ၢ်တၢ်တီဒ် တၢ်မျၢ်ပလဲအသိးန့ၣ်တက့ၢ်. ဆဲး “ပှ့ၤတၢ်မ့ၢ်တၢ်တီတက့ၢ်, ဒီးဆါကွံာ်အီၤတဂ့ၤ.” နမ့ၢ်မၤဒ်န့ၣ်န့ၣ်န ‘လဲၤတၢ်လၢ အတၢ်မ့ၢ်တၢ်တီအပူၤ’ ဒ်စီၤဒၤဝံးအၢၣ်လီၤဝဲ ယဟိဝၤယွၤအသိး ကသ့ဝဲန့ၣ်လီၤ.—စံးထီၣ်ပတြၢၤ ၈၆:၁၁.
^ လံာ်အဆၢ. 8 ပှၤမံၤ ဘၣ်တၢ်ဆီတလဲအီၤလီၤ.
^ လံာ်အဆၢ. 8 လဲၤလၢ JW တၢ်ဂီၤမူ တၢ်ရဲၣ်တၢ်ကျဲၤ ဒီးကွၢ်လၢ INTERVIEWS AND EXPERIENCES > TRUTH TRANSFORMS LIVES တက့ၢ်.
