တၢ်မၤလိ ၄၆
မ့ၢ်နကွၢ်ထွဲလီၤက့ၤန “တၢ်နာ်အကတီၤ” ဧါ
“ဟံးထီၣ် တၢ်နာ်အကတီၤတက့ၢ်.”—အ့းဖ့းစူး ၆:၁၆.
တၢ်သးဝံၣ် ၁၁၉ ပကဘၣ်အိၣ်ဒီးတၢ်နာ်
တၢ်မၤလိအံၤ အတၢ်တိာ်ပာ် *
၁-၂. (က) ဒ် အ့းဖ့းစူး ၆:၁၆ ပာ်ဖျါထီၣ်ဝဲအသိး ဘၣ်မနုၤအဃိ ပကဘၣ်အိၣ်ဒီး “တၢ်နာ်အကတီၤ” လဲၣ်. (ခ) ပကတဲသကိး တၢ်သံကွၢ်မနုၤတဖၣ်လဲၣ်.
မ့ၢ်န “တၢ်နာ်အကတီၤ” အိၣ်ဧါ. (ဖး အ့းဖ့းစူး ၆:၁၆ တက့ၢ်.) ပနာ်လၢ နအိၣ်ဒီး တၢ်နာ်အကတီၤလီၤ. ဒ်ကတီၤဖးဒိၣ်တဘ့ၣ် ဒီသဒၢ ပနီၢ်ခိက့ၢ်ဂီၤအါမံၤအသိး ပတၢ်နာ် ကဒီသဒၢပှၤလၢ တၢ်သကဲာ်ပဝးလၢ အလီၤရၢၢ်, တၢ်မၤဆူၣ်မၤစိး ဒီးတၢ်ကိးမံၤဒဲး လၢအထီဒါလိာ်အသးဒီး ကစၢ်ယွၤ အတၢ်သိၣ်တၢ်သီလီၤ.
၂ ပအိၣ်မူဘၣ်လၢ “မုၢ်နံၤအခံကတၢၢ်တဖၣ်” အဃိပတၢ်နာ် ကဘၣ်တၢ်မၤကွၢ်အီၤလီၤ. (၂ တံၤမသ့း ၃:၁) မ့ၢ်နတၢ်နာ်ဂၢၢ်ကျၢၤဧါ, တဂၢၢ်ကျၢၤဧါန့ၣ် နသ့ၣ်ညါအီၤ ကသ့ဒ်လဲၣ်. ဒ်သိးနတၢ်နာ် ကဂၢၢ်ကျၢၤထီဘိအဂီၢ် နကဘၣ်မၤမနုၤလဲၣ်. ပကတဲသကိး တၢ်သံကွၢ်တဖၣ်အံၤ အတၢ်စံးဆၢလီၤ.
ကွၢ်ထွဲ နကတီၤဂ့ၤဂ့ၤ
ဖဲတၢ်ဒုးဝံၤအခါ သုးဖိတဖၣ် ကွၢ်ကဒါက့ၤ အကတီၤ (ကွၢ်လံာ်အဆၢ ၃)
၃. သုးဖိတဖၣ်န့ၣ် ကွၢ်ထွဲဝဲအကတီၤဒ်လဲၣ် ဒီးဘၣ်မနုၤအဃိလဲၣ်.
၃ လၢပျၢၤန့ၣ် ညီနုၢ်ပှၤသုးဖိတဖၣ်သူဝဲ ကတီၤလၢ အကုခိၣ်ဘၣ်တၢ်မၤအီၤဒီး တၢ်ဖံးလီၤ. သုးဖိတဖၣ် ဖှူအကတီၤလၢသိ ဒ်သိးတၢ်ဖံးသုတဟးဂီၤ ဒီးထးသုတထီၣ်အ့ၣ်တဂ့ၤအဂီၢ်လီၤ. ပှၤသုးဖိတဂၤ မ့ၢ်ထံၣ်ဘၣ်ဝဲလၢ အကတီၤဟးဂီၤ တမံၤမံၤန့ၣ် အဝဲဘှီဂ့ၤထီၣ်က့ၤဝဲလီၤ. အဝဲမ့ၢ်မၤဝဲဒ်န့ၣ်မး အကအိၣ်ကတဲာ်ကတီၤအသးလၢ တၢ်ဒုးလၢခံတဘျီအဂီၢ်လီၤ. တၢ်ဂ့ၢ်အံၤန့ၣ် ဘၣ်ထွဲလိာ်အသးဒီး ပတၢ်နာ်ဒ်လဲၣ်.
၄. ဘၣ်မနုၤအဃိ ပကဘၣ်ဆိကမိၣ်လီၤက့ၤ ပတၢ်နာ်အဂ့ၢ်လဲၣ်. ဒီးပကြၢး ဆိကမိၣ်က့ၤ တၢ်ဂ့ၢ်မနုၤလဲၣ်.
၄ ဒ်သုးဖိလၢပျၢၤတဖၣ်အသိး နမ့ၢ်ကွၢ်ထွဲလီၤက့ၤ နတၢ်နာ်အကတီၤ ထီဘိန့ၣ် နကအိၣ်ကတဲာ်ကတီၤနသးလၢ တၢ်ဒုးအဂီၢ်လီၤ. ဒ်ပမ့ၢ်ခရံာ်ဖိအသိး ပဘၣ်ဒုးတၢ်လၢ နီၢ်သးတခီ ဒီးပဘၣ်ဒုးတၢ်ဒီး တၢ်ဝံတၢ်နါတဖၣ်လီၤ. (အ့းဖ့းစူး ၆:၁၀-၁၂) ဒ်သိးနတၢ်နာ် ကဂၢၢ်ကျၢၤအဂီၢ် ပှၤမၤန့ၢ်နၤ တသ့နီတဂၤဘၣ်. မ့ၢ်နအိၣ်ဒီးတၢ်နာ် လၢအဂၢၢ်ကျၢၤ လၢနကလဲၤခီဖျိတၢ်မၤကွၢ်အဂီၢ်ဧါ. ဒ်သိးနကသ့ၣ်ညါလီၤနသးအဂီၢ် အဆိကတၢၢ်န့ၣ် နကဘၣ် ဃ့ဘါထုကဖၣ် ဆူယဟိဝၤယွၤအအိၣ်လီၤ. မ့ၢ်ဝံၤန့ၣ် နကဘၣ်ဃုသ့ၣ်ညါ လံာ်စီဆှံ ဒ်သိးနကထံၣ်လီၤနသးဒ် ယဟိဝၤယွၤထံၣ်ဝဲအသိးအဂီၢ်လီၤ. (ဧ့ၤဘြံၤ ၄:၁၂) လံာ်စီဆှံတဲဝဲလၢ “သန့ၤနသးလၢယွၤလၢ နသးဒီဖျၢၣ်ညါတက့ၢ်. ဒီးသုတသန့ၤနသးလၢ နတၢ်ကူၣ်တၢ်ဆးဒၣ်နဲတဂ့ၤ.” (ကတိၤဒိ ၃:၅, ၆) ဆိကမိၣ်ကွၢ်က့ၤ ဘၣ်ဃးဒီး တၢ်လၢနဆၢတဲာ်တ့ၢ်အီၤ တယံာ်ဒံးဘၣ်န့ၣ်တက့ၢ်. အဒိ တယံာ်ဒံးဘၣ်န့ၣ် မ့ၢ်နအိၣ်ဒီး ကျိၣ်စ့အတၢ်ကီတၢ်ခဲ ဖးဒိၣ်ဧါ. ဖဲန့ၣ်အဆၢကတီၢ် မ့ၢ်နဆိကမိၣ်ဘၣ် ယဟိဝၤယွၤ အတၢ်အၢၣ်လီၤအီလီၤလၢ ဧ့ၤဘြံၤ ၁၃:၅ အပူၤဧါ. လံာ်စီဆှံအဆၢအံၤ တဲဝဲလၢ “ယတညိကွံာ်ဘၣ်နၤဘၣ်, ယတလဲၤသဒၣ်ဘၣ်နၤဘၣ်.” ခီဖျိလၢ တၢ်အၢၣ်လီၤအီလီၤအံၤအဃိ မ့ၢ်နနာ်လၢ ယဟိဝၤယွၤ ကမၤစၢၤနၤဧါ. နမ့ၢ်နာ်ဒ်န့ၣ်န့ၣ် ဖျါလၢနတၢ်နာ်အကတီၤန့ၣ် ဂ့ၤဒံးလီၤ.
၅. ဖဲနဆိကမိၣ်လီၤက့ၤ ဘၣ်ဃးဒီး နတၢ်နာ်အဂ့ၢ်အခါ ဘၣ်သ့ၣ်သ့ၣ် နကထံၣ်ဘၣ် တၢ်မနုၤလဲၣ်.
၅ ဖဲနက့ၤဆိကမိၣ်လီၤက့ၤ ဘၣ်ဃးဒီး နတၢ်နာ်အဂ့ၢ်အခါ ဘၣ်သ့ၣ်သ့ၣ် နကကမၢကမၣ်လီၤ. ဘၣ်သ့ၣ်သ့ၣ် နကထံၣ်ဘၣ် နတၢ်ဂံၢ်စၢ်ဘါစၢ်လၢ နတပာ်သူၣ်ပာ်သးဘၣ်အီၤတဖၣ်န့ၣ်လီၤ. အဒိ နကထံၣ်ဘၣ်လၢ ခီဖျိလၢ နသူၣ်ကိၢ်သးဂီၤတၢ် အါတလၢ, တၢ်လံၣ်တၢ်လီတဖၣ် ဒီးတၢ်သူၣ်ဟးဂီၤသးဟးဂီၤအဃိ နတၢ်နာ်စှၤလီၤဝဲလီၤ. တၢ်မ့ၢ်ကဲထီၣ်အသးဒီးနၤ ဒ်န့ၣ်န့ၣ် ဒ်သိးနတၢ်နာ် သုတစှၤလီၤအါထီၣ်တဂ့ၤအဂီၢ် နကဘၣ်မၤဒ်လဲၣ်.
ဒီသဒၢနသးလၢ တၢ်သူၣ်ကိၢ်သးဂီၤတၢ်အါတလၢ, တၢ်လံၣ်တၢ်လီတဖၣ် ဒီးတၢ်သူၣ်ဟးဂီၤသးဟးဂီၤ
၆. တၢ်ဘၣ်ယိၣ်မနုၤတဖၣ်န့ၣ် တကမၣ်ဘၣ်လဲၣ်.
၆ ဘၣ်ဃးဒီး တၢ်ဂ့ၢ်တနီၤန့ၣ် ပမ့ၢ်ဘၣ်ယိၣ်တၢ်န့ၣ် တကမၣ်ဘၣ်. အဒိ ပကြၢးဘၣ်ယိၣ်တၢ် ဘၣ်ဃးဒီး ပကမၤသးအုးဘၣ် ယဟိဝၤယွၤဒီးယ့ၣ်ၡူးအသးန့ၣ်လီၤ. (၁ ကရံၣ်သူး ၇:၃၂) ဒီးပမ့ၢ်မၤဘၣ် တၢ်ကမၣ်ဖးဒိၣ်န့ၣ် ပကဘၣ်ယိၣ်တၢ် ဘၣ်ဃးဒီး ပတၢ်ရ့လိာ်သးဒီး ယဟိဝၤယွၤန့ၣ်လီၤ. (စံးထီၣ်ပတြၢၤ ၃၈:၁၈) ဒီးပကဘၣ်ယိၣ်တၢ် ဘၣ်ဃးဒီး ပကမၤသးအုးဘၣ် ပသးသမူတံၤသကိး ဒီးပကကွၢ်ထွဲ ပဟံၣ်ဖိဃီဖိ ဒီးပဒီပုၢ်ဝဲၢ်မုၣ်ခွါတဖၣ်န့ၣ်လီၤ.—၁ ကရံၣ်သူး ၇:၃၃; ၂ ကရံၣ်သူး ၁၁:၂၈.
၇. ဒ် ကတိၤဒိ ၂၉:၂၅ ပာ်ဖျါထီၣ်ဝဲအသိး ဘၣ်မနုၤအဃိ ပတဘၣ်ပျံၤ ပှၤကညီဘၣ်လဲၣ်.
၇ ပမ့ၢ်ဘၣ်ယိၣ်တၢ်အါတလၢန့ၣ် မၤဘၣ်ဒိ ပတၢ်နာ်သ့စ့ၢ်ကီးလီၤ. အဒိ ဘၣ်သ့ၣ်သ့ၣ် ပကဘၣ်ယိၣ်တၢ် ဘၣ်ဃးဒီး တၢ်အီၣ်တၢ်အီ တၢ်ကူတၢ်သိးအဂီၢ် ထီဘိလီၤ. (မးသဲ ၆:၃၁, ၃၂) လၢတၢ်န့ၣ်အဃိ ဘၣ်သ့ၣ်သ့ၣ် ပကသးစၢၢ်ဆၢထဲ ပကဃုကျိၣ်ဃုစ့လီၤ. ဒီးပကဲထီၣ် ပှၤလၢအအဲၣ်ကျိၣ်အဲၣ်စ့သ့လီၤ. တၢ်မ့ၢ်ကဲထီၣ်အသးဒီးပှၤ ဒ်န့ၣ်န့ၣ် ပတၢ်နာ်လၢ ယဟိဝၤယွၤအဖီခိၣ် ကလီၤစှၤ ဒီးပတၢ်ရ့လိာ်သးဒီး ယဟိဝၤယွၤ ကဟးဂီၤကွံာ်လီၤ. (မၢ်ကူး ၄:၁၉; ၁ တံၤမသ့း ၆:၁၀) ဒီးအဂၤတမံၤန့ၣ် ဘၣ်သ့ၣ်သ့ၣ် ပကဘၣ်ယိၣ်တၢ် အါတလၢ လၢပှၤဂၤကထံၣ်ပှၤ ဒ်လဲၣ်န့ၣ်လီၤ. အဃိ ဘၣ်သ့ၣ်သ့ၣ် ပကပျံၤ လၢပှၤကမၤမဲာ်ဆှးပှၤ မ့တမ့ၢ် မၤအၢမၤနးပှၤ ဒိၣ်န့ၢ်ဒံး ပပျံၤလၢ ပကမၤသးအုးဘၣ် ယဟိဝၤယွၤအသးလီၤ. ဒ်သိး ပသုတကဲထီၣ် ဒ်န့ၣ်တဂ့ၤအဂီၢ် ပကဘၣ်ဃ့ကညး ယဟိဝၤယွၤ လၢကဟ့ၣ်ပှၤတၢ်နာ် ဒီးတၢ်သူၣ်ဒူသးဒူ လၢပလိၣ်ဘၣ်အီၤတဖၣ်န့ၣ်လီၤ.—ဖး ကတိၤဒိ ၂၉:၂၅ တက့ၢ်; လူၤကၣ် ၁၇:၅.
(ကွၢ်လံာ်အဆၢ ၈) *
၈. ဘၣ်ဃးဒီး တၢ်လံၣ်တၢ်လီတဖၣ်န့ၣ် ပကြၢးမၤဒ်လဲၣ်.
၈ မုၣ်ကီၤလံၢ်လၢအမ့ၢ် “တၢ်ကတိၤကဘျံးကဘျၣ်အပၢ်” န့ၣ်သူဝဲ ပှၤလၢအအိၣ်လၢအအိၣ်တကပၤ ဒ်သိးကရၤလီၤ ယဟိဝၤယွၤ ဒီးပဒီပုၢ်ဝဲၢ်မုၣ်ခွါတဖၣ်အဂ့ၢ် လၢအကဘျံးကဘျၣ်တဖၣ်လီၤ. (ယိၤဟၣ် ၈:၄၄) အဒိ ပှၤလၢအထီဒါက့ၤ တၢ်မ့ၢ်တၢ်တီတဖၣ် တဲလံၣ်တဲလီ မ့တမ့ၢ် တဲဟးဂီၤ ယဟိဝၤယွၤ အတၢ်ကရၢကရိအဂ့ၢ် ခီဖျိလၢ ပှာ်ယဲၤသန့တဖၣ်, TV အတၢ်ရဲၣ်တၢ်ကျဲၤတဖၣ် ဒီးတၢ်ကစီၣ် အကျိၤအကျဲ လၢအဂၤတဖၣ်လီၤ. တၢ်လံၣ်တၢ်လီတဖၣ်အံၤန့ၣ် မ့ၢ်စ့ၢ်ကီး မုၣ်ကီၤလံၢ်အ “အပျၢ်မ့ၣ်အူ” တဖၣ်လီၤ. (အ့းဖ့းစူး ၆:၁၆) ပှၤတဂၤဂၤ မ့ၢ်စးထီၣ်တဲပှၤ ဘၣ်ဃးဒီး တၢ်လံၣ်တၢ်လီတဖၣ်အံၤန့ၣ် ပတကြၢးဒိကနၣ်အီၤဘၣ်. ဘၣ်မနုၤအဃိလဲၣ်. မ့ၢ်လၢပနာ်အီၣ် ယဟိဝၤယွၤ အတၢ်ကရၢကရိ ဒီးပဒီပုၢ်ဝဲၢ်တဖၣ်အဃိလီၤ. အဃိ ပတဆဲးကျိးဒီး ပှၤလၢအထီဒါက့ၤ တၢ်မ့ၢ်တၢ်တီတဖၣ် လၢကျဲနီတဘိဘၣ်. ပမ့ၢ်အဲၣ်ဒိးသ့ၣ်ညါ တၢ်လၢအဝဲသ့ၣ်တဲဝဲတဖၣ် သပှၢ်ကတၢၢ်ဒၣ်လဲာ် ပတတဲအါတဲစှၤတၢ်ဒီးအဝဲသ့ၣ်ဘၣ်.
၉. တၢ်သူၣ်ဟးဂီၤသးဟးဂီၤ ကမၤဘၣ်ဒိပှၤဒ်လဲၣ်.
၉ တၢ်သူၣ်ဟးဂီၤသးဟးဂီၤ န့ၣ်မၤစှၤလီၤ ပတၢ်နာ်သ့လီၤ. တဘျီတခီၣ် မ့ၢ်လၢပအိၣ်ဒီး တၢ်ကီတၢ်ခဲတဖၣ်အဃိ ပသူၣ်ဟးဂီၤသးဟးဂီၤလီၤ. ပကွၢ်ကပာ်ကွံာ် ပတၢ်ကီတၢ်ခဲတဖၣ်အံၤ တန့ၢ်ဘၣ် ဘၣ်ဆၣ်ပတကြၢး ဆိကမိၣ်အီၤ တလီၢ်လီၢ်ဘၣ်. ပမ့ၢ်ဆိကမိၣ်ဝံၤဆိကမိၣ်က့ၤ ပတၢ်ကီတၢ်ခဲတဖၣ်န့ၣ် ပကသးပ့ၤနီၣ်ကွံာ် တၢ်မုၢ်လၢ်လၢ ယဟိဝၤယွၤ ဟ့ၣ်လီၤပှၤတဖၣ်န့ၣ်လီၤ. (လီၣ်ဖျါ ၂၁:၃, ၄) ပသးမ့ၢ်ဟးဂီၤန့ၣ် ပဂံၢ်ပဘါကလီၤစၢ် ဒီးပတအဲၣ်ဒိး မၤယဟိဝၤယွၤ အတၢ်မၤလၢၤဘၣ်. (ကတိၤဒိ ၂၄:၁၀) ဘၣ်ဆၣ် ပတဘၣ်ပျဲလၢ တၢ်ကကဲထီၣ်အသးဒီးပှၤ ဒ်အံၤဘၣ်.
၁၀. လၢဒီပုၢ်ဝဲၢ်မုၣ်တဂၤ အလံာ်ပရၢန့ၣ် နမၤလိန့ၢ် တၢ်မနုၤလဲၣ်.
၁၀ ဆိကမိၣ်ကွၢ် ဒီပုၢ်ဝဲၢ်မုၣ်လၢ အအိၣ်လၢ ကီၢ်အမဲရကၤတဂၤ အဂ့ၢ်န့ၣ်တက့ၢ်. အဝဲဘၣ်ကွၢ်ထွဲ အဝၤလၢ အအိၣ်တဆူၣ်ဘၣ် နးနးကလဲာ်တဂၤလီၤ. အဝဲကွဲးလံာ်ဆူ ဝဲၤလီၢ်ခိၣ်သ့ၣ် ဒီးကွဲးဝဲလၢ “ခီဖျိလၢ ပတၢ်အိၣ်သးအဃိ တဘျီတခီၣ် ပခိၣ်နူာ်ဘံဘူ ဒီးပသူၣ်ဟးဂီၤသးဟးဂီၤလီၤ. ဘၣ်ဆၣ် ပတၢ်မုၢ်လၢ် တလီၤမၢ်ဘၣ်. ယဟိဝၤယွၤ ဟ့ၣ်ပှၤတၢ်လၢ ကမၤဂၢၢ်ကျၢၤထီၣ်ပတၢ်နာ် ဒီးဟ့ၣ်ဂံၢ်ဟ့ၣ်ဘါပှၤအဃိ ပသးခုဒိၣ်မးလီၤ. ပလိၣ်ဘၣ် တၢ်ဟ့ၣ်ကူၣ်တဖၣ်အံၤ ဒီးတၢ်ဟ့ၣ်ဂံၢ်ဟ့ၣ်ဘါတဖၣ်အံၤလီၤ. တၢ်သ့ၣ်တဖၣ်အံၤ မၤစၢၤပှၤဒ်သိး ပကဆဲးမၤ ယဟိဝၤယွၤအတၢ်မၤ ဒီးပလဲၤခီဖျိ တၢ်ကီတၢ်ခဲလၢ မုၣ်ကီၤလံၢ်ဒုးထံၣ်ပှၤတဖၣ် န့ၢ်ဝဲလီၤ.” လၢဒီပုၢ်ဝဲၢ်မုၣ်တဂၤအံၤ အတၢ်ကတိၤန့ၣ် ပသ့ၣ်ညါဘၣ်လၢ ပလဲၤခီဖျိ ပတၢ်သူၣ်ဟးဂီၤသးဟးဂီၤသ့ဝဲလီၤ. သ့ၣ်နီၣ်ထီၣ်လၢ တၢ်ကီတၢ်ခဲတဖၣ်န့ၣ် မ့ၢ်တၢ်မၤကွၢ်လၢ အဟဲလၢ မုၣ်ကီၤလံၢ်အအိၣ်န့ၣ်တက့ၢ်. နာ်လၢ ယဟိဝၤယွၤ ကမၤမုာ်ထီၣ်နၤ ဒီးပာ်လုၢ်ပာ်ပှ့ၤ နီၢ်သးအတၢ်အီၣ်တၢ်အီ လၢအဝဲ ကတဲာ်ကတီၤန့ၢ်နၤတက့ၢ်. နမ့ၢ်မၤဒ်န့ၣ်န့ၣ် နလဲၤခီဖျိ တၢ်သူၣ်ဟးဂီၤသးဟးဂီၤ ကန့ၢ်ဝဲလီၤ.
မ့ၢ်နကွၢ်ထွဲလီၤက့ၤန “တၢ်နာ်အကတီၤ” ဧါ (ကွၢ်လံာ်အဆၢ ၁၁) *
၁၁. ဒ်သိးပကသ့ၣ်ညါလီၤပသးလၢ ပတၢ်နာ် ဂၢၢ်ကျၢၤဧါ, တဂၢၢ်ကျၢၤဧါန့ၣ် ပကြၢးသံကွၢ်လီၤပသး လၢတၢ်သံကွၢ် မနုၤတဖၣ်လဲၣ်.
၁၁ မ့ၢ်နတူၢ်ဘၣ်လၢ နကဘၣ် မၤဂၢၢ်ကျၢၤထီၣ် နတၢ်နာ်ဧါ. လၢအပူၤကွံာ်စှၤလါန့ၣ် မ့ၢ်နသူၣ်ကိၢ်သးဂီၤတၢ် အါတလၢဒံးဧါ, မ့ၢ်နဒိကနၣ် ပှၤလၢအစူးကွံာ်ညိကွံာ်တၢ်တဖၣ် အတၢ်လံၣ်တၢ်လီ ဒီးတဲအါတဲစှၤတၢ်ဒီးအဝဲသ့ၣ် ဘၣ်ဃးဒီး အဝဲသ့ၣ် အတၢ်လံၣ်တၢ်လီဧါ မ့တမ့ၢ် မ့ၢ်နလဲၤခီဖျိ နတၢ်သူၣ်ဟးဂီၤသးဟးဂီၤန့ၢ်ဧါ. နလဲၤခီဖျိ တၢ်သ့ၣ်တဖၣ်အံၤ မ့ၢ်န့ၢ်န့ၣ် နမ့ၢ်ပှၤလၢ အအိၣ်ဒီးတၢ်နာ် လၢအဂၢၢ်ကျၢၤလီၤ. ဘၣ်ဆၣ် ဒ်သိးမုၣ်ကီၤလံၢ် ကထီဒါပှၤအဂီၢ် အဝဲသူဝဲ တၢ်စုကဝဲၤလၢ အဂၤတဖၣ်ဒံးအဃိ ပကဘၣ်ပလီၢ်ပသးလီၤ. ပကတဲသကိး မုၣ်ကီၤလံၢ် အတၢ်စုကဝဲၤလၢ အဂၤတခါ အဂ့ၢ်လီၤ.
ဟးဆှဲး တၢ်အဲၣ်ကျိၣ်အဲၣ်စ့
၁၂. ပမ့ၢ်ကဲထီၣ် ပှၤလၢအအဲၣ်ကျိၣ်အဲၣ်စ့န့ၣ် တၢ်ကမၤအသးဒီးပှၤ ဒ်လဲၣ်.
၁၂ ပမ့ၢ်အဲၣ်ကျိၣ်အဲၣ်စ့န့ၣ် ပတၢ်နာ်ကလီၤစၢ် ဒီးပကမၤစှၤလီၤ ယဟိဝၤယွၤ အတၢ်မၤလီၤ. တၢ်မၢဖိပီလူး တဲဝဲလၢ “ပှၤလၢအဒုးတၢ်န့ၣ်, ဒ်သိးအကမၤဘၣ်ပှၤလၢ အမၢအဒုးတၢ်တဂၤအသးဒီး, တမၤသဘံၣ်ဘုၣ်အသးဒီး တၢ်ဖံးတၢ်မၤဘၣ်ဃးဒီး အအံၤတဃၣ် နီတဂၤဘၣ်” လီၤ. (၂ တံၤမသ့း ၂:၄) ရိမ့ၤအသုးဖိတဖၣ်န့ၣ် တအိၣ်ဒီးတၢ်ခွဲးတၢ်ယာ် လၢကမၤတၢ်မၤအဂၤဘၣ်. အဝဲသ့ၣ် မ့ၢ်မၤတၢ်မၤ လၢအဂၤန့ၣ် တၢ်ကကဲထီၣ်အသး ဒ်လဲၣ်.
၁၃. ဘၣ်မနုၤအဃိ သုးဖိတဂၤန့ၣ် တကြၢးမၤ စံပွါယ့ဘၣ်လဲၣ်.
၁၃ ဆိကမိၣ်ကွၢ် တၢ်အဒိအံၤတက့ၢ်. ဘၣ်တဂီၤ ပှၤသုးဖိတဖၣ် ကၠီးလိအသးလၢ တၢ်ဒုးအဂီၢ် ဒီးဖဲန့ၣ်န့ၣ် ပှၤသုးဖိလီၤမၢ်တဂၤလီၤ. ပှၤသုးဖိတဂၤအံၤ တလဲၤကၠီးလိအသးဘၣ် ဒီးလဲၤဆါတၢ်အီၣ်လၢ ဖၠါပူၤလီၤ. ဒီးဖဲဟါခီန့ၣ် ပှၤသုးဖိတဖၣ် ကွၢ်ထွဲဘှီဂ့ၤထီၣ် အတၢ်စုကဝဲၤတဖၣ် ဒီးကျ့အ့ၣ်ထီၣ် အနးလီၤ. ဘၣ်ဆၣ် ဖဲန့ၣ်အဆၢကတီၢ် ပှၤသုးဖိလၢ အလဲၤဆါ တၢ်အီၣ်တၢ်အီတဂၤန့ၣ် ကတဲာ်ကတီၤထီၣ် တၢ်အီၣ်တၢ်အီလၢ ကလဲၤဆါဝဲ လၢခံတနံၤအဂီၢ်လီၤ. ဒီးဖဲမုၢ်ဆ့ၣ်ထီၣ်န့ၣ် လၢတၢ်တမုၢ်လၢ်အပူၤ ဒုၣ်ဒါတဖၣ် ဟဲဒုးတၢ်လီၤ. အဃိ သုးဖိလၢ အအိၣ်ကတဲာ်ကတီၤအသးလၢ တၢ်ဒုးအဂီၢ်န့ၣ် ကမ့ၢ်သုးဖိဒ်လဲၣ်တကလုာ်လဲၣ်. ဒီးသုးခိၣ် ကဘၣ်သူၣ်ဘၣ်သး သုးဖိဒ်လဲၣ်တဖၣ်လဲၣ်. ဒီးနမ့ၢ်ဘၣ်ဒုးတၢ်န့ၣ် မ့ၢ်နကအဲၣ်ဒိးဒုးတၢ်လၢ သုးဖိလၢ အကၠီးလိပာ်စၢၤအသး အကပၤဧါ, မ့တမ့ၢ် သုးဖိလၢ အတကၠီးလိအသးတဂၤ အကပၤဧါ.
၁၄. ဒ်ပမ့ၢ် ခရံာ်အသုးဖိတဂၤအသိး ပပာ်လုၢ်ပာ်ပှ့ၤ တၢ်မနုၤလဲၣ်.
၁၄ ဒ်ပမ့ၢ် သုးဖိလၢအဂ့ၤတဂၤအသိး တၢ်လၢအရ့ဒိၣ်ကတၢၢ် လၢပဂီၢ်န့ၣ် မ့ၢ်ဝဲပကမၤသးခု ပသုးခိၣ်လၢအမ့ၢ် ယဟိဝၤယွၤဒီးယ့ၣ်ၡူး အသးန့ၣ်လီၤ. ပမ့ၢ်မၤသးခု အဝဲသ့ၣ်အသးန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်န့ၢ် တၢ်ခဲလၢာ်လၢ အအိၣ်လၢ မုၣ်ကီၤလံၢ် အဟီၣ်ခိၣ်အံၤန့ၣ်လီၤ. ပဂုာ်ကျဲးစၢး သူပတၢ်ဆၢကတီၢ် ဒီးတၢ်ဂံၢ်တၢ်ဘါလၢ ယဟိဝၤယွၤအတၢ်မၤ ဒီးပတၢ်နာ်ကဂၢၢ်ကျၢၤအဂီၢ် ဒီးပတၢ်စုကဝဲၤလၢ အဂၤတဖၣ်စ့ၢ်ကီး ကဂ့ၤထီဘိအဂီၢ်လီၤ.
၁၅. စီၤပီလူး ဟ့ၣ်ပလီၢ်ပှၤဒ်လဲၣ် ဒီးဘၣ်မနုၤအဃိလဲၣ်.
၁၅ တၢ်မၢဖိပီလူး ဟ့ၣ်ပလီၢ်ဝဲလၢ “ပှၤလၢအသါကကဲ ပှၤအထူးအတီၤတဖၣ်” က “ဃၣ်ကွံာ်အသးလၢတၢ်နာ်” လီၤ. လၢတၢ်န့ၣ်အဃိ ပကဘၣ်ပလီၢ်ပသးလီၤ. (၁ တံၤမသ့း ၆:၉, ၁၀) တၢ်ကတိၤလၢအမ့ၢ် “ဃၣ်ကွံာ်အသး” န့ၣ်အဲၣ်ဒိးတဲဝဲ ပသးစၢၢ်ဆၢ တၢ်လၢပတလိၣ်ဘၣ်အီၤတဖၣ် ဒံးယံာ်ဒံးအါထီၣ်လီၤ. ဒီးလၢခံ ပတၢ် “သးကွံတၢ်အါမံၤလၢ အတဂ့ၤဘၣ်” ဒီးပသးလၢအအဲၣ်ဒိး “မၤအၢတၢ်” န့ၣ်ဒိၣ်ထီၣ်ဝဲသ့လီၤ. လၢပကမၤဒိၣ်ထီၣ် ပတၢ်သူၣ်လီသးကွံတဖၣ်အံၤအလီၢ် ပကဘၣ်ထံၣ်အီၤဒ် အမ့ၢ်တၢ်စုကဝဲၤလၢ အမၤစှၤလီၤ ပတၢ်နာ်န့ၣ်လီၤ.
၁၆. ပမ့ၢ်ကွၢ် မၢ်ကူး ၁၀:၁၇-၂၂ န့ၣ်ပကြၢးသံကွၢ်လီၤပသးလၢ တၢ်သံကွၢ် မနုၤတဖၣ်လဲၣ်.
၁၆ ဘၣ်သ့ၣ်သ့ၣ် ပကအိၣ်ဒီးကျိၣ်စ့ လၢလၢပှဲၤပှဲၤလၢ ပကပှ့ၤ တၢ်ဖိတၢ်လံၤတဖၣ်အဂီၢ်လီၤ. အဃိ ပမ့ၢ်ပှ့ၤတၢ်လၢ ပလီကီဘၣ်ဆၣ် ပတလိၣ်ဘၣ်အီၤ နီၢ်ကီၢ်တဖၣ်န့ၣ် မ့ၢ်အကမၣ်ဧါ. တကမၣ်ဘၣ်. ဘၣ်ဆၣ် ဆိကမိၣ်ကွၢ် တၢ်သံကွၢ်တဖၣ်အံၤတက့ၢ်. ပပှ့ၤတၢ်ဖိတၢ်လံၤတဖၣ် မ့ၢ်န့ၢ်သနာ်က့ မ့ၢ်ပအိၣ်ဒီးတၢ်ဆၢကတီၢ် ဒီးတၢ်ဂံၢ်တၢ်ဘါလၢ ပကသူအီၤ ဒီးကတဲာ်ကတီၤအီၤအဂီၢ် သပှၢ်တၢၢ်ဧါ. မ့ၢ်ပကဲထီၣ် ပှၤလၢအအဲၣ် တၢ်ထူးတၢ်တီၤ အါတလၢသ့ဧါ. ခီဖျိလၢ ပအဲၣ်တၢ်ထူးတၢ်တီၤအဃိ မ့ၢ်ပကဲထီၣ်ဒ် ပှၤသးစၢ်တဂၤလၢ အတတူၢ်လိာ်ယ့ၣ်ၡူး အတၢ်ကွဲမုာ်လၢ ကမၤအါထီၣ် ကစၢ်ယွၤအတၢ်မၤဘၣ်အသိး သ့ဧါ. (ဖး မၢ်ကူး ၁၀:၁၇-၂၂ တက့ၢ်.) ပမ့ၢ်အိၣ်မူ ယိယိဖိ ဒီးသူပတၢ်ဆၢကတီၢ်ဒီး ပတၢ်ဂံၢ်တၢ်ဘါလၢ ပကမၤ ကစၢ်ယွၤ အတၢ်ဘၣ်သးန့ၣ် မ့ၢ်တၢ်လၢအဂ့ၤဒိၣ်မးလီၤ.
ဖီၣ်ဃာ်နတၢ်နာ်အကတီၤ ကျၢၤကျၢၤထီဘိ
၁၇. ထီဘိန့ၣ် ပကြၢးသ့ၣ်နီၣ်ထီၣ် တၢ်မနုၤလဲၣ်.
၁၇ ထီဘိန့ၣ် ပကဘၣ်သ့ၣ်နီၣ်ထီၣ်လၢ ပအိၣ်လၢ တၢ်ဒုးပျီအပူၤ ဒီးပကဘၣ်အိၣ်ကတဲာ်ကတီၤပသးလၢ ပကဒုးတၢ် လၢတနံၤဘၣ်တနံၤအဂီၢ်လီၤ. (လီၣ်ဖျါ ၁၂:၁၇) ပဒီပုၢ်ဝဲၢ်မုၣ်ခွါတဖၣ် မၤဂၢၢ်ကျၢၤထီၣ်န့ၢ် ပတၢ်နာ်တန့ၢ်ဘၣ်. အဃိပကဘၣ် မၤဂၢၢ်ကျၢၤထီၣ် ပတၢ်နာ်လၢ ပနီၢ်ကစၢ်လီၤ.
၁၈. ဘၣ်မနုၤ အဃိ သုးဖိလၢပျၢၤတဖၣ်န့ၣ် ကြၢးဖီၣ်ဃာ်အကတီၤ ဃံးဃံးလဲၣ်.
၁၈ လၢပျၢၤန့ၣ် ပှၤသုးဖိတဂၤ မ့ၢ်ဒုးတၢ်လၢ တၢ်သူၣ်ဒူသးဒူအပူၤန့ၣ် ပှၤမၤလၤကပီၤအီၤလီၤ. ဘၣ်ဆၣ် ဖဲအဝဲဟဲက့ၤလၢတၢ်ဒုးအခါ အကတီၤ မ့ၢ်တပၣ်ဘၣ်န့ၣ် ကလီၤမဲာ်ဆှးလၢအဂီၢ်ဒိၣ်မးလီၤ. တၤစ့ၣ်ထါ(စ်) လၢအမ့ၢ် ပှၤကူၣ်ဘၣ်ကူၣ်သ့လၢ ဘၣ်ဃးဒီး ပှၤရိမ့ၤဖိ အတၢ်စံၣ်စိၤတဲစိၤန့ၣ် တဲဝဲလၢ “ပှၤသုးဖိတဂၤ မ့ၢ်တၢၤကွံာ် အကတီၤန့ၣ် မ့ၢ်တၢ်လၢအလီၤမဲာ်ဆှး ဒိၣ်ကတၢၢ်လီၤ.” လၢတၢ်န့ၣ်အဃိ သုးဖိတဖၣ်န့ၣ် ဖီၣ်ဃာ်အကတီၤ ဃံးဃံးလီၤ.
ဒီပုၢ်ဝဲၢ်မုၣ်တဂၤ ဖီၣ်ဃာ်အကတီၤဃံးဃံး ခီဖျိဖးလံာ်စီဆှံ, ထီၣ်တၢ်အိၣ်ဖှိၣ်ထီဘိ ဒီးတသ့ဖဲအသ့ ဟးစံၣ်တဲၤတဲလီၤတၢ် (ကွၢ်လံာ်အဆၢ ၁၉)
၁၉. ပဖီၣ်ဃာ် ပတၢ်နာ်အကတီၤကျၢၤကျၢၤ ကသ့ဒ်လဲၣ်.
၁၉ ပဖီၣ်ဃာ် ပတၢ်နာ်အကတီၤကျၢၤကျၢၤ သ့ခီဖျိ ပထီၣ်တၢ်အိၣ်ဖှိၣ်ထီဘိ ဒီးတဲဘၣ်ပှၤဂၤလၢ ယဟိဝၤယွၤ ဒီးအမံၤအဂ့ၢ်လီၤ. (ဧ့ၤဘြံၤ ၁၀:၂၃-၂၅) ဒီးပဖးလံာ်စီဆှံ ကိးနံၤဒဲး ဒီးပဃ့ဘါထုကဖၣ် လၢယဟိဝၤယွၤ ကမၤစၢၤပှၤဒ်သိး ပကမၤထွဲ တၢ်လၢပမၤလိဘၣ်အီၤတဖၣ် လၢတၢ်ကိးမံၤဒဲးအပူၤလီၤ. (၂ တံၤမသ့း ၃:၁၆, ၁၇) ပမ့ၢ်မၤဒ်န့ၣ်န့ၣ် မုၣ်ကီၤလံၢ် အတၢ်စုကဝဲၤတဖၣ် မၤဘၣ်ဒိပှၤ လီၤထူလီၤယိာ်တန့ၢ်ဘၣ်. (ယၡါယၤ ၅၄:၁၇) ဒီးပ “တၢ်နာ်အကတီၤ” ကဒီသဒၢပှၤလီၤ. ဒီးပကမၤသကိးတၢ်ဒီး ပဒီပုၢ်ဝဲၢ်မုၣ်ခွါတဖၣ် လၢတၢ်သူၣ်ဒူသးဒူအပူၤ ဒီးကိးနံၤဒဲးန့ၣ် ပကမၤနၢၤတၢ်လီၤ. တကးဒံးဘၣ် တၢ်လၢအရ့ဒိၣ်ကတၢၢ်န့ၣ် ဖဲယ့ၣ်ၡူး မၤနၢၤကွံာ် မုၣ်ကီၤလံၢ် ဒီးအခ့အပှၤတဖၣ်အခါ ပကအိၣ်ဆၢထၢၣ်ဘၣ်လၢ ယ့ၣ်ၡူးအအိၣ်တခီလီၤ.—လီၣ်ဖျါ ၁၇:၁၄; ၂၀:၁၀.
တၢ်သးဝံၣ် ၁၁၈ “မၤအါထီၣ်ပတၢ်နာ်”
^ လံာ်အဆၢ. 5 ပှၤသုးဖိတဖၣ် ဘၣ်သူဝဲကတီၤ ဒ်သိးကဒီသဒၢလီၤအသးအဂီၢ်လီၤ. ပတၢ်နာ်န့ၣ် လီၤဂာ်ဒ်သိး ကတီၤလီၤ. ဒ်ပှၤသုးဖိတဂၤ ဘၣ်ကွၢ်ထွဲဝဲ အကတီၤဂ့ၤဂ့ၤအသိး ပဝဲစ့ၢ်ကီး ဒ်သိးပတၢ်နာ် ကဂၢၢ်ကျၢၤ ထီဘိအဂီၢ် ပကဘၣ်မၤ ဒ်န့ၣ်လီၤ. လၢတၢ်မၤလိအံၤအပူၤ ပကတဲသကိး ဘၣ်ဃးဒီး ဒ်သိးပ “တၢ်နာ်အကတီၤ” ကဂ့ၤထီဘိအဂီၢ် ပကဘၣ်မၤ ဒ်လဲၣ်န့ၣ်လီၤ.
^ လံာ်အဆၢ. 58 တၢ်တဲဖျါထီၣ်တၢ်ဂီၤ အခီပညီ– ဖဲယဟိဝၤပှၤအုၣ်အသး အဟံၣ်ဖိဃီဖိတဒူၣ် ထံၣ်ဘၣ်ဝဲ ပှၤလၢအထီဒါက့ၤ တၢ်မ့ၢ်တၢ်တီ လၢအတဲလံၣ်တဲလီ ယဟိဝၤပှၤအုၣ်အသးတဖၣ်အဂ့ၢ်လၢ TV ပူၤအခါ အဝဲသ့ၣ် ပံးကွံာ်အ TV တဘျီဃီလီၤ.
^ လံာ်အဆၢ. 60 တၢ်တဲဖျါထီၣ်တၢ်ဂီၤ အခီပညီ– လၢခံ ဖဲဟံၣ်ဖိဃီဖိ တၢ်မၤလိလံာ်စီဆှံ အတီၢ်ပူၤ ဟံၣ်ခိၣ်တဂၤ သူဝဲလံာ်စီဆှံ အတၢ်ဂ့ၢ်တၢ်ကျိၤတဖၣ် ဒ်သိးကဟ့ၣ်ဂံၢ်ဟ့ၣ်ဘါ အဟံၣ်ဖိဃီဖိ.
