တၢ်မၤလိ ၄၈
တၢ်လၢသုစးထီၣ်မၤန့ၣ် “မၤတုၤ အကဲထီၣ်” တက့ၢ်
တၢ်လၢသုစးထီၣ်မၤန့ၣ် “မၤတုၤ အကဲထီၣ်” တက့ၢ်.—၂ ကရံၣ်သူး ၈:၁၁.
တၢ်သးဝံၣ် ၃၅ နီၤဖးတၢ်လၢအရ့ဒိၣ်တဖၣ်အဆၢ
တၢ်မၤလိအံၤ အတၢ်တိာ်ပာ် *
၁. ယဟိဝၤယွၤ ဟ့ၣ်ပှၤတၢ်ခွဲးတၢ်ယာ် လၢပကမၤ တၢ်မနုၤလဲၣ်.
ယဟိဝၤယွၤ ဟ့ၣ်ပှၤတၢ်ခွဲးတၢ်ယာ် လၢပကဃုထၢလၢ ပကအိၣ်မူဒ်လဲၣ်န့ၣ်လီၤ. အဝဲသိၣ်လိပှၤဒ်သိး ပဆၢတဲာ်တၢ်လၢ အဘၣ်ကသ့အဂီၢ် ဒီးပမ့ၢ်ဆၢတဲာ်တၢ်လၢ အဘၣ်အသးန့ၣ် အဝဲမၤစၢၤပှၤ ဒ်သိးပမၤတၢ် ကကဲထီၣ်လိၣ်ထီၣ်အဂီၢ်လီၤ. (စံးထီၣ်ပတြၢၤ ၁၁၉:၁၇၃) ပမ့ၢ်မၤထွဲ လံာ်စီဆှံအတၢ်ဟ့ၣ်ကူၣ် ဒံးအါန့ၣ် ပဆၢတဲာ်တၢ်လၢအဘၣ် ကသ့ဒံးအါလီၤ.—ဧ့ၤဘြံၤ ၅:၁၄.
၂. ဖဲပဆၢတဲာ်တၢ် ဝံၤအလီၢ်ခံ ဘၣ်သ့ၣ်သ့ၣ် ပကထံၣ်ဘၣ်ဒီး တၢ်ကီတၢ်ခဲမနုၤလဲၣ်.
၂ ပမ့ၢ်ဆၢတဲာ်တၢ်လၢအဘၣ် သနာ်က့ ဘၣ်သ့ၣ်သ့ၣ် ကကီလၢ ပကမၤထွဲဒ် ပတၢ်ဆၢတဲာ်အဂီၢ်လီၤ. ဆိကမိၣ်ကွၢ် တၢ်အဒိတဖၣ်အံၤတက့ၢ်. ဒီပုၢ်ဝဲၢ်ခွါသးစၢ်တဂၤ ပာ်လီၤအသးလၢ ကဖးလံာ်စီဆှံ တုၤအဝံၤ ဒီတဘ့ၣ်လီၤ. အဝဲစးထီၣ်ဖးဝဲ လံာ်စီဆှံ တနွံခံနွံ ဝံၤဒီးတဖးဝဲလၢၤဘၣ်. ဒီးမ့မ့ၢ် ဒီပုၢ်ဝဲၢ်မုၣ်တဂၤန့ၣ် ပာ်လီၤအသးလၢ ကမၤပှၤလဲၤလၢညါ ဘၣ်ဆၣ် အဝဲထုးယံာ် တၢ်ဆၢကတီၢ် လၢကစးထီၣ်မၤဝဲအဂီၢ်လီၤ. တၢ်အိၣ်ဖှိၣ်သးပှၢ်ကရူၢ် ပာ်လီၤအသးလၢ အဝဲသ့ၣ် ကလဲၤဟး အိၣ်သကိး ဒီးဟ့ၣ်ဂံၢ်ဟ့ၣ်ဘါအါထီၣ် တၢ်အိၣ်ဖှိၣ်ဖိတဖၣ်လီၤ. ဘၣ်ဆၣ် တၢ်ဆၢကတီၢ် လဲၤပူၤကွံာ်လၢ အလါတဖၣ်လံ သနာ်က့ အဝဲသ့ၣ် တစးထီၣ်မၤဝဲဒံးဘၣ်. ပမ့ၢ်ကွၢ် တၢ်အိၣ်အသးတဖၣ်အံၤန့ၣ် လီၤဆီလိာ်အသးဘၣ်ဆၣ် တၢ်လၢအလီၤဂာ်လိာ်အသးန့ၣ် အိၣ်ဝဲတမံၤလီၤ. အဝဲသ့ၣ် ဆၢတဲာ်လီၤအသး ဘၣ်ဆၣ် တမၤဝဲဒ် အတၢ်ဆၢတဲာ်တဖၣ်အသိးဘၣ်. ခရံာ်ဖိလၢပျၢၤလၢ အအိၣ်လၢ ဝ့ၢ်ကရံၣ်သူးတဖၣ်စ့ၢ်ကီး အိၣ်ဒီးတၢ်ကီတၢ်ခဲ ဒ်အံၤလီၤ. ပကတဲသကိး တၢ်ဂ့ၢ်လၢ ဘၣ်ဃးဒီး ပမၤလိန့ၢ်တၢ်မနုၤ လၢအဝဲသ့ၣ် အအိၣ်လဲၣ်န့ၣ်လီၤ.
၃. ခရံာ်ဖိလၢ ဝ့ၢ်ကရံၣ်သူးတဖၣ် ဆၢတဲာ်ဝဲလၢ ကမၤတၢ်မနုၤလဲၣ် ဘၣ်ဆၣ် တၢ်ကဲထီၣ်အသးဒ်လဲၣ်.
၃ ဖဲ ခ.န ၅၅ ဃၣ်ဃၣ်န့ၣ် ခရံာ်ဖိလၢ ဝ့ၢ်ကရံၣ်သူးတဖၣ် ဆၢတဲာ်တၢ် ဘၣ်ဃးဒီး တၢ်ဂ့ၢ်လၢအရ့ဒိၣ်တမံၤလီၤ. အဝဲသ့ၣ် သ့ၣ်ညါဝဲလၢ ဒီပုၢ်ဝဲၢ်မုၣ်ခွါလၢ ဝ့ၢ်ယရူၤၡလ့ၣ် ဒီးကီၢ်ယူဒၤတဖၣ် ထံၣ်ဘၣ်ဒီး တၢ်ကီတၢ်ခဲ ဒီးတၢ်ဖှီၣ်တၢ်ယာ်အဃိ ဒီပုၢ်ဝဲၢ်လၢ တၢ်အိၣ်ဖှိၣ်အဂၤတဖၣ် ထၢဖှိၣ်စ့လၢ ကမၤစၢၤဝဲ ဒီပုၢ်ဝဲၢ်မုၣ်ခွါတဖၣ်အံၤအဂီၢ်လီၤ. ဖဲန့ၣ်န့ၣ် ဒီပုၢ်ဝဲၢ်လၢ ဝ့ၢ်ကရံၣ်သူးတဖၣ်အံၤစ့ၢ်ကီး အိၣ်ဒီးတၢ်သးကညီၤ ဒီးသးအိၣ်ဟ့ၣ်တၢ်အဃိ အဝဲသ့ၣ် ဆၢတဲာ်လီၤအသးလၢ ကမၤစၢၤ ဒီပုၢ်ဝဲၢ်လၢ အဘၣ်ကီဘၣ်ခဲတဖၣ်အံၤလီၤ. အဃိအဝဲသ့ၣ် သံကွၢ်စီၤပီလူးလၢ အဝဲသ့ၣ် ကဘၣ်မၤစၢၤတၢ် ဒ်လဲၣ်န့ၣ်လီၤ. ဒီးစီၤပီလူးဆှၢလီၤဝဲ စီၤတံတူး လၢအဝဲသ့ၣ်အအိၣ် ဒ်သိးအကထၢဖှိၣ် ကျိၣ်စ့လီၤ. (၁ ကရံၣ်သူး ၁၆:၁; ၂ ကရံၣ်သူး ၈:၆) ဖဲစှၤလါဝံၤအလီၢ်ခံ စီၤပီလူးသ့ၣ်ညါဘၣ်ဝဲလၢ ပှၤကရံၣ်သူးဖိတဖၣ် တမၤဝဲဒ် အတဲဝဲအသိးဘၣ်. အဃိ ဖဲပှၤက့ၤစိာ် တၢ်အိၣ်ဖှိၣ်အဂၤတဖၣ် အတၢ်မၤဘူၣ်ဆူ ဝ့ၢ်ယရူၤၡလ့ၣ် အဆၢကတီၢ်န့ၣ် ပှၤက့ၤစိာ်ဃုာ်အဝဲသ့ၣ် အတၢ်ဟ့ၣ်တန့ၢ် တဘျီဃီဘၣ်.—၂ ကရံၣ်သူး ၉:၄, ၅.
၄. ဒ် ၂ ကရံၣ်သူး ၈:၇, ၁၀, ၁၁ ပာ်ဖျါထီၣ်ဝဲအသိး စီၤပီလူး ဟ့ၣ်ဂံၢ်ဟ့ၣ်ဘါဝဲ ခရံာ်ဖိလၢ ဝ့ၢ်ကရံၣ်သူးတဖၣ် ဒ်လဲၣ်.
၄ စီၤပီလူး စံးပတြၢၤ ခရံာ်ဖိလၢ ကရံၣ်သူးတဖၣ် ခီဖျိလၢ အဝဲသ့ၣ် ဆၢတဲာ်တၢ်လၢအဂ့ၤ, အိၣ်ဒီးတၢ်နာ်လၢ အဂၢၢ်ကျၢၤ ဒီးအသးအိၣ်ဟ့ၣ်တၢ်အဃိလီၤ. ဘၣ်ဆၣ် စီၤပီလူး ဘၣ်ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကမၤဝဲဒ် တၢ်လၢအဆၢတဲာ်ဝဲအသိးလီၤ. (ဖး ၂ ကရံၣ်သူး ၈:၇, ၁၀, ၁၁ တက့ၢ်.) ပမ့ၢ်ကွၢ် တၢ်လဲၤခီဖျိအံၤန့ၣ် ပသ့ၣ်ညါဘၣ်လၢ ခရံာ်ဖိလၢ အအိၣ်ဒီးတၢ်သးတီတဖၣ်ဒၣ်လဲာ်န့ၣ် တညီလၢ ကမၤဝဲဒ် အဆၢတဲာ်ပာ်စၢၤဝဲအသိးဘၣ်.
၅. ပကသ့ၣ်ညါဘၣ် တၢ်သံကွၢ်မနုၤတဖၣ် အတၢ်စံးဆၢလဲၣ်.
၅ ဒ်ခရံာ်ဖိလၢ ဝ့ၢ်ကရံၣ်သူးတဖၣ်အသိး ဘၣ်သ့ၣ်သ့ၣ် တညီလၢ ပကမၤဒ် ပဆၢတဲာ်လီၤပသးအသိးဘၣ်. ဘၣ်မနုၤအဃိ တညီဘၣ်လဲၣ်. မ့ၢ်လၢပတလၢတပှဲၤအဃိ ဘၣ်သ့ၣ်သ့ၣ် ပကအဲၣ်ဒိး ထုးယံာ်တၢ်ဆၢကတီၢ်လီၤ. မ့တမ့ၢ်ဘၣ်န့ၣ် ခီဖျိလၢ တၢ်တမုၢ်လၢ်အပူၤ တၢ်ကဲထီၣ်အသးဒီးပှၤ တမံၤမံၤအဃိ တညီလၢပကမၤထွဲ ဒ်ပတၢ်ဆၢတဲာ် အိၣ်ဝဲအသိးလၢၤဘၣ်. (စံၣ်တဲၤတဲလီၤတၢ် ၉:၁၁; ရိမ့ၤ ၇:၁၈) အဃိ တဘျီတခီၣ် ပကဘၣ်ဆိကမိၣ်ထံက့ၤ ဘၣ်ဃးဒီး ပကြၢးဆီတလဲ ပတၢ်ဆၢတဲာ်ဧါ, တကြၢးဆီတလဲအီၤဘၣ်ဧါန့ၣ်လီၤ. ဖဲန့ၣ်အဆၢကတီၢ် ပကမၤဒ်လဲၣ်. ဒီးဒ်သိးပမၤပိာ်ထွဲဒ် ပတၢ်ဆၢတဲာ်အသိး ကန့ၢ်အဂီၢ် ပကဘၣ်မၤဒ်လဲၣ်.
တချုးလၢ နဆၢတဲာ်တၢ်အခါ
၆. တဘျီတခီၣ် ဘၣ်မနုၤအဃိ ပကဘၣ်ဆီတလဲ ပတၢ်ဆၢတဲာ်လဲၣ်.
၆ တၢ်ဆၢတဲာ်လၢအရ့ဒိၣ်တနီၤန့ၣ် ပတဆီတလဲအီၤ နီတဘျီဘၣ်. အဒိ တၢ်ဆၢတဲာ် ဒ်သိးဒီး ပကမၤယဟိဝၤယွၤ အတၢ်မၤ ဒီးပကတီဒီး ပသးသမူတံၤသကိးန့ၣ် ပတဆီတလဲအီၤဘၣ်. (မးသဲ ၁၆:၂၄; ၁၉:၆) ဘၣ်ဆၣ် မ့ၢ်လၢပတၢ်အိၣ်သး ဆီတလဲသ့အဃိ ဘၣ်သ့ၣ်သ့ၣ် ပတၢ်ဆၢတဲာ်လၢ အဂၤတနီၤန့ၣ် ပကဘၣ် ဆီတလဲအီၤလီၤ. အဃိ ဒ်သိးပဆၢတဲာ်တၢ် လၢအဂ့ၤကတၢၢ်ကသ့အဂီၢ် ပကဘၣ်မၤဒ်လဲၣ်.
၇. ပကြၢးဃ့ထုကဖၣ် လၢတၢ်မနုၤအဂီၢ်လဲၣ် ဒီးဘၣ်မနုၤအဃိလဲၣ်.
၇ ဃ့ဘါထုကဖၣ်လၢ နကအိၣ်ဒီး တၢ်ကူၣ်သ့အဂီၢ်တက့ၢ်. ယဟိဝၤယွၤ အသးစီဆှံ ထိၣ်ဟူးထိၣ်ဂဲၤထီၣ် စီၤယၤကိာ်လၢ ကကွဲးဝဲလၢ “သုဝဲသ့ၣ်တဂၤဂၤန့ၣ်, န့ၢ်တၢ်ကူၣ်သ့ကူၣ်ဘၣ် အလီၢ်မ့ၢ်အိၣ်ဒီး, မ်အဃ့လၢယွၤ, လၢအဟ့ၣ်တၢ်ညီ လၢပှၤခဲလၢာ်” တက့ၢ်. (ယၤကိာ် ၁:၅) ပမ့ၢ်ဆိကမိၣ်ကွၢ်ထံထံန့ၣ် ပဝဲကိးဂၤဒဲးပ “န့ၢ်တၢ်ကူၣ်သ့ကူၣ်ဘၣ် အလီၢ်” အိၣ်လီၤ. အဃိ ဖဲနဘၣ်ဆၢတဲာ်တၢ်အခါမ့ၢ်ဂ့ၤ ဒီးဖဲနဆိကမိၣ်လၢ နဘၣ်ဆီတလဲ နတၢ်ဆၢတဲာ်အခါမ့ၢ်ဂ့ၤ ဃ့ယဟိဝၤယွၤ အတၢ်မၤစၢၤတက့ၢ်. နမ့ၢ်မၤဒ်န့ၣ်န့ၣ် ယဟိဝၤယွၤ ကမၤစၢၤနၤဒ်သိး နဆၢတဲာ်တၢ်လၢ တၢ်ကူၣ်သ့အပူၤ ကသ့အဂီၢ်လီၤ.
၈. တချုးလၢ ပဆၢတဲာ်တၢ်ဒံးဘၣ်အခါ ပကဘၣ် ဃုသ့ၣ်ညါ တၢ်ဂ့ၢ်တၢ်ကျိၤဒ်လဲၣ်.
၈ ဃုသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးတက့ၢ်. ဃုတၢ်ဟ့ၣ်ကူၣ် လၢလံာ်စီဆှံအပူၤ, ဖးလံာ်လဲၢ်လၢ ယဟိဝၤယွၤ အတၢ်ကရၢကရိ ထုးထီၣ်ဝဲတဖၣ် ဒီးတဲသကိးတၢ်ဒီး ပှၤလၢအကဟ့ၣ်နၤ တၢ်ဟ့ၣ်ကူၣ်လၢ အဂ့ၤတက့ၢ်. (ကတိၤဒိ ၂၀:၁၈) တချုးနဆၢတဲာ်လီၤနသး လၢနကဆီတလဲတၢ်မၤ, သုးလီၢ်သုးကျဲ မ့တမ့ၢ် တချုးလၢ နဃုထၢ တၢ်ကူၣ်ဘၣ်ကူၣ်သ့ လၢအကမၤစၢၤနၤ လၢနကဆဲးမၤ ကစၢ်ယွၤအတၢ်မၤအခါ နကဘၣ်ဃုသ့ၣ်ညါတၢ် လၢကျဲဒ်အံၤန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ.
၉. ပမ့ၢ်သံကွၢ်လီၤပသး တီတီလိၤလိၤန့ၣ် ပကဒိးန့ၢ်ဘၣ်အဘျုးဒ်လဲၣ်.
၉ သံကွၢ်လီၤနသး ဘၣ်ဃးဒီး ဘၣ်မနုၤအဃိ နဆၢတဲာ်လီၤနသးဒ်န့ၣ်လဲၣ်. ဘၣ်ဃးဒီး တၢ်လၢပမၤအီၤတဖၣ်န့ၣ် ပတၢ်ပာ်သူၣ်ပာ်သးအိၣ်ဒ်လဲၣ်န့ၣ် မ့ၢ်တၢ်လၢအရ့ဒိၣ် လၢယဟိဝၤယွၤအဂီၢ်လီၤ. (ကတိၤဒိ ၁၆:၂) ယဟိဝၤယွၤ အဲၣ်ဒိးလၢ ပကမၤတၢ် တီတီလိၤလိၤ လၢတၢ်ကိးမံၤဒဲးအပူၤလီၤ. အဃိ ဖဲပဆၢတဲာ်တၢ်အခါ ပဘၣ်သံကွၢ်လီၤပသး တီတီလိၤလိၤ ဒီးမၤတၢ်တီတီလိၤလိၤ လၢပှၤဂၤအဖီခိၣ်လီၤ. ပမ့ၢ်တမၤဒ်န့ၣ်ဘၣ်န့ၣ် တညီလၢ ပကမၤထွဲဒ် ပတၢ်ဆၢတဲာ် အိၣ်ဝဲအသိးလၢၤဘၣ်. အဒိ ဒီပုၢ်ဝဲၢ်ခွါသးစၢ်တဂၤ ပာ်လီၤအသးလၢ ကမၤပှၤလဲၤလၢညါလီၤ. ဘၣ်ဆၣ် လၢခံန့ၣ် တညီလၢ အကမၤပှဲၤအနၣ်ရံၣ်လၢၤဘၣ် ဒီးဘၣ်သ့ၣ်သ့ၣ် အဝဲတအိၣ်ဒီးတၢ်သးခု လၢတၢ်စံၣ်တဲၤတဲလီၤ တၢ်မၤအပူၤလၢၤဘၣ်. ဘၣ်သ့ၣ်သ့ၣ် အဝဲကဆိကမိၣ်လီၤအသးလၢ အမၤပှၤလဲၤလၢညါ ခီဖျိလၢအအဲၣ်ဒိးမၤ တၢ်ဘၣ်ယဟိဝၤယွၤအသးအဃိလီၤ. ဘၣ်ဆၣ် နီၢ်ကီၢ်န့ၣ် ကမ့ၢ်လၢ အဝဲမၤပှၤလဲၤလၢညါ ခီဖျိလၢ အအဲၣ်ဒိးမၤမုာ် အမိၢ်ပၢ် မ့တမ့ၢ် ပှၤတဂၤဂၤအသးအဃိလီၤ.
၁၀. တၢ်မနုၤကမၤစၢၤပှၤ ဒ်သိးပကဆီတလဲပသးအဂီၢ်လဲၣ်.
၁၀ ဆိကမိၣ်ကွၢ် ဘၣ်ဃးဒီး ပှၤမၤလိလံာ်စီဆှံဖိတဂၤ လၢအပာ်လီၤအသး လၢကဖၠးမီာ်ထူန့ၣ်တက့ၢ်. ဖဲအခီၣ်ထံး တနွံခံနွံန့ၣ် အဝဲမၤဝဲန့ၢ်ဘၣ်ဆၣ် လၢခံအဝဲ အီကဒိးမီာ်ထူ အသီတဘျီလီၤ. ဘၣ်ဆၣ် မ့ၢ်လၢအဝဲ အဲၣ်ယဟိဝၤယွၤ ဒီးအဲၣ်ဒိးမၤ ယွၤအတၢ်ဘၣ်သးအဃိ လၢခံကတၢၢ်န့ၣ် အဝဲဖၠးမီာ်ထူ န့ၢ်ဝဲလီၤ.—ကလီးစဲ ၁:၁၀; ၃:၂၃.
၁၁. ဘၣ်မနုၤအဃိ နကဘၣ်ပာ်လီၤဖီတၢၣ် လီၤတံၢ်လီၤဆဲးလဲၣ်.
၁၁ ပာ်လီၤ ဖီတၢၣ် လီၤတံၢ်လီၤဆဲးတက့ၢ်. နမ့ၢ်ပာ်လီၤဖီတၢၣ် လီၤတံၢ်လီၤဆဲးန့ၣ် ကညီလၢ နကလဲၤတုၤလၢ နဖီတၢၣ်အဂီၢ်လီၤ. အဒိ နကပာ်လီၤနသးလၢ နကဖးအါထီၣ် လံာ်စီဆှံလီၤ. ဘၣ်ဆၣ် နမ့ၢ်တပာ်လီၤတၢ်ဆၢကတီၢ်ဘၣ်န့ၣ် ဘၣ်သ့ၣ်သ့ၣ် နတမၤဒ် နဆၢတဲာ်လီၤနသးအသိးဘၣ်. * အဂၤတမံၤန့ၣ် တၢ်အိၣ်ဖှိၣ်သးပှၢ်တဖၣ် ကပာ်လီၤအသးလၢ ကလဲၤဟးအိၣ်သကိး ဒီးဟ့ၣ်ဂံၢ်ဟ့ၣ်ဘါအါထီၣ် ဒီပုၢ်ဝဲၢ်မုၣ်ခွါတဖၣ်ဘၣ်ဆၣ် အဝဲသ့ၣ် တမၤဝဲဒ်န့ၣ်ဘၣ်. ဒ်သိး အဝဲသ့ၣ် မၤဝဲဒ်အဆၢတဲာ်ဝဲအသိး ကန့ၢ်အဂီၢ် အဝဲသ့ၣ်သံကွၢ်လီၤအသး ဒ်အံၤသ့လီၤ. “မ့ၢ်ပမၤနီၣ်ဃာ် ပဒီပုၢ်ဝဲၢ်မုၣ်ခွါလၢ အကလိၣ်ဘၣ် ပတၢ်ဟ့ၣ်ဂံၢ်ဟ့ၣ်ဘါတဖၣ် အမံၤဧါ. မ့ၢ်ပပာ်လီၤ တၢ်ဆၢကတီၢ် လီၤတံၢ်လီၤဆဲး လၢပကလဲၤအိၣ်သကိး အဝဲသ့ၣ်အဂီၢ်ဧါ.”
၁၂. ဘၣ်သ့ၣ်သ့ၣ် ပကဘၣ်မၤ တၢ်မနုၤလဲၣ် ဒီးဘၣ်မနုၤအဃိလဲၣ်.
၁၂ အိၣ်ဒီး တၢ်ထံၣ် လၢအကြၢးအဘၣ်. ပဝဲကိးဂၤဒဲးန့ၣ် ပတအိၣ်ဒီး တၢ်ဆၢကတီၢ် ဒီးတၢ်ဂံၢ်တၢ်ဘါလၢ ပကမၤ တၢ်လၢပအဲၣ်ဒိးမၤအီၤ ကိးမံၤဒဲးအဂီၢ်ဘၣ်. လၢတၢ်န့ၣ်အဃိ အိၣ်ဒီးတၢ်ထံၣ်လၢအကြၢးအဘၣ် ဒီးတၢ်သ့ဆိကမိၣ်ထံတၢ်တက့ၢ်. ဘၣ်သ့ၣ်သ့ၣ် နကဘၣ်ဆီတလဲ နတၢ်ဆၢတဲာ်လၢ နမၤပိာ်ထွဲအီၤ တသ့ဘၣ်တဖၣ်န့ၣ်လီၤ. (စံၣ်တဲၤတဲလီၤတၢ် ၃:၆) ဆိကမိၣ်ထံက့ၤ နတၢ်ဆၢတဲာ်ဝံၤ နမ့ၢ်ကြၢးဆီတလဲ နတၢ်ဆၢတဲာ်န့ၣ် ဆီတလဲအီၤ ဒီးမၤထွဲဒ် တၢ်လၢနဆၢတဲာ်အီၤအသိးတက့ၢ်. ဆိကမိၣ်ကွၢ် တၢ်ဂ့ၢ်ယဲၢ်ခါ လၢကမၤစၢၤနၤ ဒ်သိးနမၤထွဲ နတၢ်ဆၢတဲာ် ကန့ၢ်အဂီၢ်န့ၣ်တက့ၢ်.
တၢ်လၢကမၤစၢၤနၤ ဒ်သိးနမၤထွဲဒ် နတၢ်ဆၢတဲာ် ကန့ၢ်အဂီၢ်
၁၃. ဒ်သိးနကအိၣ်ဒီး တၢ်ဂံၢ်တၢ်ဘါလၢ နကမၤထွဲဒ် နတၢ်ဆၢတဲာ်အိၣ်ဝဲအသိးအဂီၢ် နကဘၣ်မၤဒ်လဲၣ်.
၁၃ ဃ့ဘါထုကဖၣ်တၢ် ဒ်သိးနမၤထွဲဒ် နတၢ်ဆၢတဲာ်အိၣ်ဝဲအသိး ကန့ၢ်အဂီၢ်တက့ၢ်. ဒ်သိးနမၤဒ် နတၢ်ဆၢတဲာ်အိၣ်ဝဲအသိး ကသ့အဂီၢ် ကစၢ်ယွၤဟ့ၣ်နၤ တၢ်ဂံၢ်တၢ်ဘါလၢန “ကမၤတၢ်” အဂီၢ်သ့လီၤ. (ဖံလံးပံၤ ၂:၁၃) အဃိ ဃ့ယဟိဝၤယွၤ ဒ်သိးအသးစီဆှံ ကဟ့ၣ်နၤ တၢ်ဂံၢ်တၢ်ဘါ လၢနလိၣ်ဘၣ်အီၤန့ၣ်တက့ၢ်. နမ့ၢ်တူၢ်ဘၣ်လၢ ကစၢ်ယွၤ တစံးဆၢ နတၢ်ထုကဖၣ်ဒံးဘၣ်န့ၣ် ဆဲးဃ့ထုကဖၣ်တက့ၢ်. မၤဒ်ယ့ၣ်ၡူးတဲဝဲအသိးတက့ၢ်. ယ့ၣ်ၡူးတဲဝဲလၢ “ဃ့တက့ၢ်, ဒီးတၢ် [သးစီဆှံ] ကဟ့ၣ်သုလီၤ.”—လူၤကၣ် ၁၁:၉, ၁၃.
၁၄. ဒ်သိးနမၤထွဲဒ် နတၢ်ဆၢတဲာ်အသိး ကသ့အဂီၢ် တၢ်ဟ့ၣ်ကူၣ်ဖဲ ကတိၤဒိ ၂၁:၅ အပူၤ ကမၤစၢၤနၤဒ်လဲၣ်.
၁၄ ရဲၣ်လီၤကျဲၤလီၤ တၢ်တက့ၢ်. (ဖး ကတိၤဒိ ၂၁:၅ တက့ၢ်.) တၢ်မၤလၢ နစးထီၣ် မၤအီၤတမံၤမံၤန့ၣ် ဒ်သိးနမၤအီၤ တုၤအဝံၤကသ့အဂီၢ် နကဘၣ် ရဲၣ်လီၤကျဲၤလီၤပာ်စၢၤတၢ်လီၤ. ဒီးနကဘၣ်မၤဒ် နရဲၣ်လီၤကျဲၤလီၤပာ်အီၤ အသိးလီၤ. ဒ်န့ၣ်အသိး ဖဲနဆၢတဲာ်လီၤနသး လၢနကမၤတၢ်တမံၤမံၤဝံၤအခါ ဒ်သိးနမၤအီၤ ကန့ၢ်အဂီၢ် ကွဲးလီၤဃာ် တၢ်ကိးမံၤဒဲးလၢ နကဘၣ်မၤအီၤတဖၣ်တက့ၢ်. ဖဲနကမၤတၢ်မၤလၢ အကီတမံၤမံၤအခါ နမ့ၢ်နီၤဖးလီၤ တၢ်လၢနကဘၣ်မၤအီၤတဖၣ် ဒီးနမၤအီၤတခါဘၣ်တခါ မ့ၢ်ဝံၤန့ၣ် နကထံၣ်ဘၣ်လၢ နမၤတၢ် ကဲထီၣ်လိၣ်ထီၣ် ထဲလဲၣ်န့ၣ်လီၤ. စီၤပီလူး ဟ့ၣ်ဂံၢ်ဟ့ၣ်ဘါ ခရံာ်ဖိလၢ ဝ့ၢ်ကရံၣ်သူးတဖၣ်လၢ အဝဲသ့ၣ် တဘၣ်ဂုာ်ကျဲးစၢး ထၢဖှိၣ်စ့မၤဘူၣ်ဖဲ အဝဲလဲၤတုၤလၢ အဝဲသ့ၣ်အအိၣ်အခါဘၣ်. လၢတၢ်န့ၣ်အလီၢ် အဝဲဟ့ၣ်ဂံၢ်ဟ့ၣ်ဘါ ပှၤခရံာ်ဖိတဖၣ်အံၤလၢ အကပာ်ဃာ် တၢ်လၢအဝဲသ့ၣ် ကဟ့ၣ်မၤဘူၣ်ဝဲတဖၣ်ဖဲ “နွံနံၤအကျါ, မုၢ်ခီၣ်ထံးအနံၤ” ကိးနွံဒဲးလီၤ. (၁ ကရံၣ်သူး ၁၆:၂) ဖဲပဆၢတဲာ်လီၤပသးလၢ ပကမၤတၢ်မၤ လၢအကီအခဲတမံၤမံၤအခါ ပမ့ၢ်နီၤဖးဆံးလီၤအီၤန့ၣ် ပတလိၣ်ဘၣ်ယိၣ်လၢ ပမၤထွဲဒ် ပတၢ်ဆၢတဲာ်အိၣ်ဝဲအသိး တန့ၢ်ဘၣ်န့ၣ်ဘၣ်.
၁၅. နမ့ၢ်ကွဲးနီၣ်ဃာ် တၢ်လၢနကမၤအီၤတဖၣ်န့ၣ် ကကဲဘျုးဒ်လဲၣ်.
၁၅ နမ့ၢ်ကွဲးလီၤဃာ် တၢ်လၢနကမၤအီၤတဖၣ်န့ၣ် ကညီလၢ နကမၤထွဲအီၤ အဂီၢ်လီၤ. (၁ ကရံၣ်သူး ၁၄:၄၀) အဒိ တၢ်အိၣ်ဖှိၣ်သးပှၢ်ကရူၢ် ကဃုထၢဝဲ တၢ်အိၣ်ဖှိၣ်သးပှၢ်တဂၤလၢ ကကွဲးလီၤဝဲ တၢ်လၢတၢ်အိၣ်ဖှိၣ်သးပှၢ်တဖၣ် ဆၢတဲာ်ဝဲတဖၣ်, မတၤကဘၣ်မၤဝဲမူဒါလဲၣ် ဒီးကဘၣ်မၤဝံၤဝဲ ဆံးယံာ်လဲၣ်န့ၣ်လီၤ. တၢ်အိၣ်ဖှိၣ်သးပှၢ်တဖၣ် မ့ၢ်ကွဲးနီၣ်ဃာ်ဝဲ ဒ်အံၤန့ၣ် ကညီလၢအဝဲသ့ၣ် ကမၤထွဲဝဲဒ် အတၢ်ဆၢတဲာ် အိၣ်ဝဲအသိးလီၤ. (၁ ကရံၣ်သူး ၉:၂၆) လၢနတၢ်အိၣ်မူ ကိးနံၤဒဲးအပူၤစ့ၢ်ကီး နမၤထွဲဒ် တၢ်ဟ့ၣ်ကူၣ်အံၤအသိးသ့လီၤ. အဒိ ကွဲးနီၣ်ဃာ် တၢ်လၢနကဘၣ်မၤအီၤ လၢတနံၤဘၣ်တနံၤအတီၢ်ပူၤ ဒီးတၢ်လၢနကမၤအီၤလၢ အဆိကတၢၢ်န့ၣ် ကွဲးလီၤအီၤလၢ တၢ်ဖီခိၣ်ကတၢၢ်တက့ၢ်. နမ့ၢ်မၤဒ်န့ၣ်န့ၣ် ကညီလၢ နကမၤ တၢ်လၢနစးထီၣ်မၤအီၤတဖၣ် တုၤလၢအဝံၤတစုန့ၣ်လီၤ. ဒီးတကးဒံးဘၣ် နမၤတၢ် ကကဲထီၣ်လိၣ်ထီၣ် အါထီၣ်လီၤ.
၁၆. ဒ်သိး နမၤထွဲဒ် နတၢ်ဆၢတဲာ်အိၣ်ဝဲအသိး ကန့ၢ်အဂီၢ် နကဘၣ်မၤဒ်လဲၣ် ဒီး ရိမ့ၤ ၁၂:၁၁ ဟ့ၣ်ဂံၢ်ဟ့ၣ်ဘါပှၤ ဒ်လဲၣ်.
၁၆ ဂုာ်ကျဲးစၢး ထဲးဂံၢ်ထဲးဘါ. ဒ်သိးနကမၤတၢ်လၢ နရဲၣ်လီၤကျဲၤလီၤအီၤ ဒီးနမၤအီၤကဝံၤအဂီၢ် နကဘၣ် ထဲးဂံၢ်ထဲးဘါလီၤ. (ဖး ရိမ့ၤ ၁၂:၁၁ တက့ၢ်.) စီၤပီလူး တဲဘၣ်စီၤတံၤမသ့းလၢ အကဘၣ် “ကျဲးစၢး” “ထီဘိ” ဒ်သိးအကကဲထီၣ် ပှၤသိၣ်လိတၢ် လၢအဂ့ၤန့ၢ်အလီၢ်အဂီၢ်လီၤ. ဘၣ်ဃးဒီး နီၢ်သးအဖီတၢၣ် လၢအဂၤတဖၣ်စ့ၢ်ကီး ပမၤထွဲ တၢ်ဟ့ၣ်ကူၣ်အံၤသ့လီၤ.—၁ တံၤမသ့း ၄:၁၃, ၁၆, ခ့ခါစှီၤကျိာ်.
၁၇. ဒ်သိး ပမၤထွဲဒ် ပတၢ်ဆၢတဲာ်အိၣ်ဝဲအသိး ကန့ၢ်အဂီၢ် အ့းဖ့းစူး ၅:၁၅, ၁၆ မၤစၢၤပှၤဒ်လဲၣ်.
၁၇ ရဲၣ်လီၤကျဲၤလီၤ နတၢ်ဆၢကတီၢ် လၢတၢ်ကူၣ်သ့အပူၤတက့ၢ်. (ဖး အ့းဖ့းစူး ၅:၁၅, ၁၆ တက့ၢ်) ပာ်လီၤတၢ်ဆၢကတီၢ်လၢ နကမၤတၢ်လၢ နဆၢတဲာ်အီၤတဖၣ် ဒီးတဘၣ်သုး တၢ်ဆၢကတီၢ်တဂ့ၤ. ဘၣ်သ့ၣ်သ့ၣ် တၢ်ဆၢကတီၢ်လၢ အဂ့ၤကတၢၢ်လၢနဂီၢ်န့ၣ် တအိၣ်နီတဘျီဘၣ်. အဃိ တဘၣ်အိၣ်ခိး တၢ်ဆၢကတီၢ်လၢ အဂ့ၤကတၢၢ် လၢနကမၤ နမူဒါအဂီၢ်တဂ့ၤ. (စံၣ်တဲၤတဲလီၤတၢ် ၁၁:၄) ဒ်သိးနမၤတၢ်လၢ အရ့ဒိၣ်တဖၣ် ကန့ၢ်အဂီၢ် နကဘၣ်ပလီၢ်နသး ဒ်သိးနတသူလၢာ်ဂီၤဘၣ် နတၢ်ဆၢကတီၢ် ဒီးတၢ်ဂံၢ်တၢ်ဘါလၢ တၢ်လၢအရ့တဒိၣ်အါအါဘၣ်တဖၣ် အဂီၢ်တဂ့ၤန့ၣ်လီၤ. (ဖံလံးပံၤ ၁:၁၀) မ့ၢ်သ့န့ၣ် ဃုထၢတၢ်ဆၢကတီၢ်လၢ ပှၤတမၤတံာ်တာ်နၤအါအါဘၣ် အဆၢကတီၢ်တက့ၢ်. ဒုးသ့ၣ်ညါ ပှၤဂၤလၢ နကဘၣ်သးစၢၢ်ဆၢတၢ်န့ၣ်တက့ၢ်. ပံးဃာ်နလီတဲစိ ဒီးကွၢ်က့ၤန အံမ့(လ်) မ့တမ့ၢ် စိၣ်ၡဲၣ် မံဒံယါ လၢခံတက့ၢ်. *
၁၈-၁၉. ဒ်သိးနမၤတၢ်လၢ နဆၢတဲာ်အီၤတဖၣ် တုၤလၢအဝံၤ ကန့ၢ်အဂီၢ် တၢ်မနုၤကမၤစၢၤနၤလဲၣ်.
၁၈ သးစၢၢ်ဆၢ တၢ်အဘျုးလၢ နကန့ၢ်ဘၣ်. တၢ်အဘျုးလၢ နကန့ၢ်ဘၣ် မ့တမ့ၢ် တၢ်လၢအကဲထီၣ်လိၣ်ထီၣ်တဖၣ်န့ၣ် လီၤဂာ်ဒ် တၢ်လီၢ်လၢ နအဲၣ်ဒိးလဲၤတုၤ တတီၤလီၤ. နမ့ၢ်အဲၣ်ဒိးလဲၤတုၤလၢ တၢ်လီၢ်တတီၤန့ၣ် သပှၢ်ကတၢၢ်န့ၣ် ကျဲမ့ၢ်ပံး ဒီးနမ့ၢ်ဘၣ်လဲၤလၢ ကျဲအဂၤတဘိသနာ်က့ နကဆဲးလဲၤတၢ်လီၤ. ဒ်န့ၣ်အသိး ဖဲပဆၢတဲာ်တၢ်ဝံၤအခါ ပမ့ၢ်သးစၢၢ်ဆၢ တၢ်အဘျုးလၢ ပကဒိးန့ၢ်ဘၣ်အီၤန့ၣ် တၢ်ကီတၢ်ခဲ မ့ၢ်အိၣ်ဒၣ်လဲာ် ပတဟ့ၣ်အၡူဘၣ်.—ကလၤတံ ၆:၉.
၁၉ ပကဆၢတဲာ်တၢ်လၢအဘၣ် ဒီးမၤထွဲဒ် ပတၢ်ဆၢတဲာ်အိၣ်ဝဲအသိးန့ၣ် ကကီဝဲလီၤ. ဘၣ်ဆၣ် ဒ်သိးပမၤတၢ်လၢ ပဆၢတဲာ်အီၤတဖၣ် တုၤလၢအဝံၤ ကန့ၢ်အဂီၢ် ယဟိဝၤယွၤ ကမၤစၢၤပှၤ, ကဟ့ၣ်ပှၤ တၢ်ကူၣ်သ့ ဒီးတၢ်ဂံၢ်တၢ်ဘါ လၢပလိၣ်ဘၣ်အီၤတဖၣ်န့ၣ်လီၤ.
တၢ်သးဝံၣ် ၆၅ လဲၤဆူညါ
^ လံာ်အဆၢ. 5 မ့ၢ်နတူၢ်ဘၣ်လၢ နတၢ်ဆၢတဲာ် ကမၣ်တဘျီဘျီဧါ. မ့တမ့ၢ် တဘျီတခီၣ်န့ၣ် ကီလၢနကဆၢတဲာ်တၢ်အဂီၢ်ဧါ ဒီးကီလၢနကမၤပိာ်ထွဲ ဒ်နဆၢတဲာ်ပာ်စၢၤတၢ် အသိးဧါ. တၢ်မၤလိတခါအံၤ ကမၤစၢၤနၤဒ်သိး နလဲၤခီဖျိ တၢ်ကီတၢ်ခဲတဖၣ်အံၤ ကန့ၢ်အဂီၢ် ဒီးနမၤတၢ်လၢ နဆၢတဲာ်ပာ်စၢၤအီၤတဖၣ် တုၤလၢအဝံၤ ကန့ၢ်အဂီၢ်လီၤ.
^ လံာ်အဆၢ. 11 နမ့ၢ်အဲၣ်ဒိး ပာ်လီၤတၢ်ဆၢကတီၢ်လၢ နကဖးလံာ်စီဆှံအဂီၢ်န့ၣ် နသူ “Schedule for Bible Reading” လၢအအိၣ်လၢ jw.org® အပူၤသ့လီၤ.
^ လံာ်အဆၢ. 17 ဘၣ်ဃးဒီး တၢ်သူတၢ်ဆၢကတီၢ် လၢတၢ်ကူၣ်သ့အပူၤန့ၣ် နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ်န့ၣ် ကွၢ်လၢ “20 Ways to Create More Time” in the April 2010 issue of Awake! တက့ၢ်.
