တၢ်မၤလိ ၄၅
သးစီဆှံ မၤစၢၤပှၤဒ်လဲၣ်
“ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ် ယဂံၢ်ယဘါတဂၤအပူၤလီၤ.”—ဖံလံးပံၤ ၄:၁၃.
တၢ်သးဝံၣ် ၁၀၄ သးစီဆှံန့ၣ် မ့ၢ်ယွၤအတၢ်ဟ့ၣ်
တၢ်မၤလိအံၤ အတၢ်တိာ်ပာ် *
၁-၂. (က) ဒ်သိးပလဲၤခီဖျိ တၢ်ကီတၢ်ခဲလၢ တနံၤဘၣ်တနံၤကန့ၢ်အဂီၢ် တၢ်မနုၤ မၤစၢၤပှၤလဲၣ်. တဲဖျါထီၣ်တက့ၢ်. (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
“ဖဲယဆိကမိၣ်က့ၤ တၢ်ကီတၢ်ခဲလၢ ယလဲၤခီဖျိတ့ၢ်အီၤအခါ ယသ့ၣ်ညါလၢ မ့မ့ၢ်လၢ ယနီၢ်ကစၢ်အဂံၢ်အဘါဒု ယလဲၤခီဖျိအီၤတန့ၢ်ဘၣ်.” မ့ၢ်နတဲဘၣ်ဒ်န့ၣ် တဘျီဘျီဧါ. ပဝဲအါဂၤန့ၣ် ပတဲဘၣ်ဒ်န့ၣ်လီၤ. ဘၣ်သ့ၣ်သ့ၣ် နကတဲတၢ်ကတိၤအံၤ ဖဲနဆိကမိၣ်ထီၣ်က့ၤ ဘၣ်ဃးဒီး နလဲၤခီဖျိ တၢ်ဆူးတၢ်ဆါ နးနးကလဲာ် မ့တမ့ၢ် ပှၤလၢနအဲၣ်ဘၣ်အီၤတဂၤ သံသဒၣ်ကွံာ်နၤ ဝံၤအလီၢ်ခံန့ၣ်လီၤ. ဖဲနဆိကမိၣ်က့ၤ တၢ်ဂ့ၢ်တဖၣ်အံၤအခါ နကတူၢ်ဘၣ်လၢ ခီဖျိလၢ ယဟိဝၤယွၤဟ့ၣ်နၤ “အစိအကမီၤဒိၣ်ကဲၣ်ဆိး” အဃိ နလဲၤခီဖျိ တၢ်ကီတၢ်ခဲလၢ တနံၤဘၣ်တနံၤ န့ၢ်ဝဲလီၤ.—၂ ကရံၣ်သူး ၄:၇-၉.
၂ ဒ်သိးပတြီဆၢကွံာ် တၢ်လ့ပစီလၢ အဟဲလၢဟီၣ်ခိၣ် လၢအအၢအသီအံၤ ကန့ၢ်အဂီၢ် ပလိၣ်ဘၣ်သးစီဆှံ အတၢ်မၤစၢၤလီၤ. (၁ ယိၤဟၣ် ၅:၁၉) တကးဒံးဘၣ် ပလိၣ်ဘၣ်တၢ်ဂံၢ်တၢ်ဘါ လၢပကထီဒါ “တၢ်နါ” တဖၣ်အဂီၢ်လီၤ. (အ့းဖ့းစူး ၆:၁၂) အဃိ ပကတဲသကိး ကျဲခံဘိလၢ သးစီဆှံမၤစၢၤပှၤ ဒ်သိးပလဲၤခီဖျိ တၢ်သ့ၣ်တဖၣ်အံၤ ကန့ၢ်အဂီၢ်န့ၣ်လီၤ. မ့ၢ်ဝံၤန့ၣ် ပကတဲသကိး တၢ်ဂ့ၢ်လၢဘၣ်ဃးဒီး ဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤအဂီၢ် ပကဘၣ်မၤဒ်လဲၣ်န့ၣ်လီၤ.
သးစီဆှံ ဟ့ၣ်ပှၤတၢ်ဂံၢ်တၢ်ဘါ
၃. ဒ်သိးပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ် ယဟိဝၤယွၤမၤစၢၤပှၤဒ်လဲၣ်.
၃ ယဟိဝၤယွၤအသးစီဆှံ မၤစၢၤပှၤခီဖျိ ဟ့ၣ်ပှၤတၢ်ဂံၢ်တၢ်ဘါ ဒ်သိးပမၤတၢ်လၢ ပကဘၣ်မၤအီၤတဖၣ် ကန့ၢ်အဂီၢ်လီၤ. အဒိ တၢ်မၢဖိပီလူး ထံၣ်ဘၣ်ဒီး တၢ်ကီတၢ်ခဲတဖၣ်ဘၣ်ဆၣ် အဝဲတူၢ်ဘၣ်ဝဲလၢ အဆဲးမၤယဟိဝၤယွၤတၢ်မၤသ့ ခီဖျိလၢ အသန့ၤအသးလၢ “ခရံာ်အစိအကမီၤ” အဃိလီၤ. (၂ ကရံၣ်သူး ၁၂:၉) ဖဲစီၤပီလူး လဲၤတၢ်လၢ မံးၡ့ၣ်နရ့ၣ် အတၢ်လဲၤ ခံဘျီတဘျီအခါ အဝဲစံၣ်တဲၤတဲလီၤတၢ်ဆူၣ်ဆူၣ် တကးဒံးဘၣ် ဂုာ်ကျဲးစၢးမၤတၢ်လၢ အတၢ်လၢာ်ဘူၣ်လၢာ်စ့ၤအဂီၢ်လီၤ. အဝဲအိၣ်လၢ ဝ့ၢ်ကရံၣ်သူး လၢနီၢ်ပြံစကံးလၤ ဒီးစီၤအကူလၤ အဟံၣ်လီၤ. ပှၤခံဂၤအံၤန့ၣ် မ့ၢ်ပှၤဆးဒဲဖိတဖၣ်လီၤ. စီၤပီလူးစ့ၢ်ကီး မ့ၢ်ပှၤဆးဒဲဖိအဃိ ဘၣ်တသီသီန့ၣ် စီၤပီလူး မၤသကိးတၢ်ဒီး အဝဲသ့ၣ်လီၤ. (မၤတၢ် ၁၈:၁-၄) သးစီဆှံ မၤစၢၤစီၤပီလူး ဒ်သိးအကအိၣ်ဒီး တၢ်ဂံၢ်တၢ်ဘါ လၢအကစံၣ်တဲၤတဲလီၤတၢ် ဒီးမၤတၢ်မၤလၢ အနီၢ်ကစၢ် အတၢ်လၢာ်ဘူၣ်လၢာ်စ့ၤအဂီၢ်န့ၣ်လီၤ.
၄. ဒ် ၂ ကရံၣ်သူး ၁၂:၇-၉ ပာ်ဖျါထီၣ်ဝဲအသိး စီၤပီလူး အိၣ်ဒီးတၢ်ကီတၢ်ခဲမနုၤလဲၣ်.
၄ ဖး ၂ ကရံၣ်သူး ၁၂:၇-၉ တက့ၢ်. ဖဲစီၤပီလူးတဲဝဲလၢ အဘၣ်ဂုာ်ကျဲးစၢးတြီဆၢ ‘တၤဆှုၣ်အိၣ် လၢအဖံးအညၣ်အကျါ’ အခါန့ၣ် အဝဲအဲၣ်ဒိးတဲဝဲ တၢ်မနုၤလဲၣ်. တၢ်ဆှုၣ်မ့ၢ်အိၣ်လၢ နညၣ်ပူၤန့ၣ် ကဆါဘၣ်နၤဒိၣ်မးလီၤ. အဃိ စီၤပီလူးအဲၣ်ဒိးတဲဝဲ အဝဲတူၢ်ဘၣ် တၢ်ဆါတနီၤလၢ အမၤဆါအီၤ ဒိၣ်မးန့ၣ်လီၤ. အဝဲတဲဝဲလၢ အတၢ်ကီတၢ်ခဲအံၤ လီၤဂာ်ဒ် “မုၣ်ကီၤလံၢ်အကလူး” “ထိဘၣ်” အီၤလီၤ. ဘၣ်သ့ၣ်သ့ၣ် တမ့ၢ်လၢ မုၣ်ကီၤလံၢ် မ့တမ့ၢ် အတၢ်ဝံတၢ်နါတဖၣ် ကဟဲဆဲးနုာ် တၢ်ဆှုၣ်လၢ စီၤပီလူးအလိၤ ခီဖျိဒုးအိၣ်ထီၣ် အတၢ်ကီတၢ်ခဲ လၢအဂီၢ်ဘၣ်. ဘၣ်ဆၣ် ဖဲအဝဲသ့ၣ်ထံၣ်ဝဲ “တၤဆှုၣ်” အိၣ်လၢ စီၤပီလူးအလိၤအခါ အဝဲသ့ၣ် ကအဲၣ်ဒိးဆဲးနုာ် ယိာ်လီၤတၢ်ဆှူၣ် လၢအပူၤလီၤ. အခီပညီန့ၣ် အဝဲသ့ၣ် ကဂုာ်ကျဲးစၢး ဒ်သိးစီၤပီလူး ကတူၢ်ဘၣ်တၢ်ဆါ နးထီၣ်အဂီၢ်လီၤ. ဘၣ်ဆၣ် စီၤပီလူး မၤဝဲဒ်လဲၣ်.
၅. ယဟိဝၤယွၤစံးဆၢ စီၤပီလူး အတၢ်ဃ့ဘါထုကဖၣ် ဒ်လဲၣ်.
၅ လၢအခီၣ်ထံးန့ၣ် စီၤပီလူး အဲၣ်ဒိးထုးထီၣ်ကွံာ် “တၤဆှုၣ်” အံၤလီၤ. အဝဲတဲဝဲလၢ ဒ်သိးတၢ်ဆှုၣ်အံၤ “အကဟးဖးဒီးယၤဒီး, ယဃ့ကညးကစၢ် [ယဟိဝၤယွၤ]သၢစုလီၤ.” စီၤပီလူး ဃ့ဘါထုကဖၣ် ဒ်အံၤသနာ်က့ တၢ်ဆှုၣ်လၢအပူၤန့ၣ် တလီၤမၢ်ဘၣ်. အဃိ ပတဲလၢ ယဟိဝၤယွၤ တဒိကနၣ် စီၤပီလူး အတၢ်ဃ့ဘါထုကဖၣ်ဘၣ်န့ၣ် သ့ဧါ. ပတဲဒ်န့ၣ်တသ့ဘၣ်. ကစၢ်ယွၤစံးဆၢ စီၤပီလူး အတၢ်ထုကဖၣ်လီၤ. ယဟိဝၤယွၤ တမၤလီၤမၢ်ကွံာ် စီၤပီလူး အတၢ်ကီတၢ်ခဲဘၣ်ဆၣ် အဝဲမၤစၢၤအီၤဒ်သိး အကအိၣ်ဒီး တၢ်တူၢ်န့ၢ်ခီၣ်ကဲအဂီၢ်လီၤ. ယဟိဝၤယွၤ တဲဝဲလၢ “ယစိယကမီၤ လၢထီၣ်ပှဲၤထီၣ်လၢ တၢ်အဂံၢ်စၢ်အဘါစၢ်အပူၤလီၤ.” (၂ ကရံၣ်သူး ၁၂:၈, ၉) ခီဖျိလၢ ကစၢ်ယွၤ အတၢ်မၤစၢၤအဃိ စီၤပီလူး ဆဲးအိၣ်ဒီးတၢ်သးခု ဒီးပာ်အသး မုာ်မုာ်ခုၣ်ခုၣ်သ့ဝဲလီၤ.—ဖံလံးပံၤ ၄:၄-၇.
၆. (က) ဘၣ်သ့ၣ်သ့ၣ် ယဟိဝၤယွၤ ကစံးဆၢ ပတၢ်ထုကဖၣ် ဒ်လဲၣ်. (ခ) လံာ်စီဆှံအဆၢတဖၣ် လၢလံာ်အဆၢပူၤန့ၣ် ကဲထီၣ်တၢ်ဂံၢ်တၢ်ဘါ လၢနဂီၢ်ဒ်လဲၣ်.
၆ ဒ်စီၤပီလူးအသိး မ့ၢ်နဃ့ကညးယဟိဝၤယွၤ လၢအကမၤလီၤမၢ်န့ၢ် နတၢ်ကီတၢ်ခဲတဖၣ်န့ၣ် အိၣ်တဘျီဘျီဧါ. ဘၣ်သ့ၣ်သ့ၣ် ဘၣ်ဃးဒီး နတၢ်ကီတၢ်ခဲန့ၣ် နကဃ့ဘါထုကဖၣ်တၢ်အါဘျီ ဘၣ်ဆၣ် နတၢ်ကီတၢ်ခဲတဖၣ် တလီၤမၢ်ဘၣ် မ့တမ့ၢ် ကနးဒိၣ်ထီၣ်လီၤ. ဖဲန့ၣ်အဆၢကတီၢ် မ့ၢ်နတူၢ်ဘၣ်လၢ ယဟိဝၤယွၤ တဘၣ်သူၣ်ဘၣ်သးနၤဘၣ်ဧါ. နမ့ၢ်တူၢ်ဘၣ် ဒ်န့ၣ်န့ၣ် သ့ၣ်နီၣ်ထီၣ် စီၤပီလူး အဒိအတဲာ်တက့ၢ်. ဒ်ယဟိဝၤယွၤစံးဆၢ စီၤပီလူး အတၢ်ထုကဖၣ်အသိး အဝဲကစံးဆၢ နတၢ်ထုကဖၣ်လီၤ. ဘၣ်သ့ၣ်သ့ၣ် ယဟိဝၤယွၤ တမၤလီၤမၢ်န့ၢ် နတၢ်ကီတၢ်ခဲတဖၣ်ဘၣ်. ဘၣ်ဆၣ် ဒ်သိးနလဲၤခီဖျိ တၢ်ကီတၢ်ခဲ ကန့ၢ်အဂီၢ် အဝဲကဟ့ၣ်နၤ တၢ်ဂံၢ်တၢ်ဘါ ခီဖျိလၢ အသးစီဆှံလီၤ. (စံးထီၣ်ပတြၢၤ ၆၁:၃, ၄) ဒီးနမ့ၢ် “လီၤဃံၤ” ဘၣ်ဆၣ် ယဟိဝၤယွၤ တပာ်တ့ၢ်နၤဘၣ်.—၂ ကရံၣ်သူး ၄:၈, ၉; ဖံလံးပံၤ ၄:၁၃.
သးစီဆှံ မၤစၢၤပှၤဒ်သိး ပကဆဲးမၤ ယဟိဝၤယွၤ အတၢ်မၤ
၇-၈. (က) သးစီဆှံန့ၣ် လီၤဂာ်ဒီးကလံၤ လၢကျဲဒ်လဲၣ်. (ခ) စီၤပ့းတရူး ပာ်ဖျါထီၣ်ဝဲလၢ သးစီဆှံ မၤတၢ်ဒ်လဲၣ်.
၇ ကျဲအဂၤတဘိလၢ သးစီဆှံ မၤစၢၤပှၤန့ၣ် မ့ၢ်မနုၤလဲၣ်. သးစီဆှံန့ၣ် ပထိၣ်သတြီၤအီၤဒီး ကလံၤသ့လီၤ. လပီဖးဒိၣ် မ့ၢ်ဟဲလၢ ပီၣ်လဲၣ်အပူၤဒၣ်လဲာ် ခီဖျိလၢ ကလံၤအဃိ ကဘီတဘ့ၣ် လဲၤတၢ်လိၤလိၤ ဒီးလဲၤတုၤလၢ တၢ်လီၢ်လၢအအဲၣ်ဒိးလဲၤဝဲ ဂ့ၤဂ့ၤဘၣ်ဘၣ်သ့လီၤ. ဒ်န့ၣ်အသိး ပမ့ၢ်ထံၣ်ဘၣ်ဒီး တၢ်ကီတၢ်ခဲတဖၣ်ဒၣ်လဲာ် သးစီဆှံ ကမၤစၢၤပှၤဒ်သိး ပဆဲးမၤ ယဟိဝၤယွၤ အတၢ်မၤ တုၤလၢဟီၣ်ခိၣ်သီ ကန့ၢ်အဂီၢ်လီၤ.
၈ ဒ်တၢ်မၢဖိပ့းတရူးမ့ၢ် ပှၤမၤညၣ်ဖိတဂၤအသိး အဝဲသ့ၣ်ညါ တၢ်ဂ့ၢ်အါမး လၢဘၣ်အဃးဒီး တၢ်နီကဘီလီၤ. ကမ့ၢ်လၢတၢ်ဂ့ၢ်အံၤဃိ ဖဲအဝဲကွဲးတၢ်ဂ့ၢ်လၢ ဘၣ်ဃးဒီးသးစီဆှံအခါ အသူဝဲတၢ်ကတိၤလၢ အဘၣ်ထွဲလိာ်သးဒီး ပှၤနီကဘီန့ၣ်လီၤ. အဝဲကွဲးဝဲလၢ “ဝံအတၢ်ကစီၣ် တဟဲလၢပှၤကညီ အတၢ်ဘၣ်အသးဒၣ်ဝဲ နီတဘျီဘၣ်. မ့မ့ၢ်ဒ်သးစီဆှံ ပၢၤဒီးထိၣ်ဂဲၤအသးအသိး, အဝဲသ့ၣ်ကတိၤတၢ်ကစီၣ်လၢ အဟဲလၢ ကစၢ်ယွၤအအိၣ်န့ၣ်လီၤ.” ကြံးအတၢ်ကတိၤလၢ ဘၣ်တၢ်ကွဲးကျိာ်ထံအီၤလၢ “ထိၣ်ဂဲၤ” န့ၣ်အခီပညီလိၤလိၤ မ့ၢ်ဝဲ “စိာ်ဃုာ်” လီၤ.—၂ ပ့းတရူး ၁:၂၁, ခ့ခါစှီၤကျိာ်.
၉. ဖဲစီၤပ့းတရူးကွဲးဝဲ တၢ်ကတိၤလၢအမ့ၢ် “စိာ်ဃုာ်” အခါ အဝဲအဲၣ်ဒိးလၢ ပှၤကဆိကမိၣ်ဘၣ် တၢ်ဂ့ၢ်မနုၤလဲၣ်.
၉ ဖဲစီၤပ့းတရူး ကွဲးဝဲတၢ်ကတိၤလၢ “စိာ်ဃုာ်” အခါ အကဒုးဆိကမိၣ်ဘၣ်ပှၤဂၤလၢ တၢ်ဂ့ၢ်မနုၤလဲၣ်. ဖဲစီၤလူၤကၣ် ကွဲးဝဲလံာ်မၤတၢ် ၂၇:၁၅, ခ့ခါစှီၤကျိာ်) ပှၤကူၣ်ဘၣ်ကူၣ်သ့လၢ ဘၣ်ဃးဒီးလံာ်စီဆှံတဂၤ တဲဝဲလၢ ဖဲစီၤပ့းတရူး ကွဲးဝဲလၢ ပှၤကွဲးလံာ်စီဆှံတဖၣ် ဘၣ်တၢ် “ထိၣ်ဂဲၤ” အီၤလၢသးစီဆှံအခါ အတၢ်ကတိၤအံၤ ကဒုးဆိကမိၣ်ပှၤဂၤ ဘၣ်ဃးဒီး ပှၤနီကဘီအဂ့ၢ်လီၤ. စီၤပ့းတရူး အဲၣ်ဒိးတဲဝဲလၢ ဒ်ကလံၤဆီၣ်ကဘီ ဒီးကဘီလဲၤတုၤလၢ တၢ်လီၢ်လၢ အအဲၣ်ဒိးလဲၤဝဲအသိး သးစီဆှံ ဟံးစုနဲၣ်ကျဲ ပှၤကွဲးလံာ်စီဆှံတဖၣ် ဒ်သိးကမၤဝံၤ အမူဒါအဂီၢ်လီၤ. ပှၤကူၣ်ဘၣ်ကူၣ်သ့တဂၤန့ၣ် တဲကဒီးဝဲလၢ ပှၤကွဲးလံာ်စီဆှံတဖၣ်န့ၣ် လီၤဂာ်ဒ် ကဘီလၢ “အသလၣ်ထီၣ် အယၢ်လၣ်လီၤ. အဝဲသ့ၣ် အိၣ်ကတဲာ်ကတီၤအသးလၢ ကမၤဝဲဒ် သးစီဆှံ ဟံးစုနဲၣ်ကျဲအီၤအသိးလီၤ.” ယဟိဝၤယွၤ မၤတၢ်လၢ အကဘၣ်မၤဝဲတဖၣ်လီၤ. အဝဲ ဟ့ၣ်လီၤဝဲ “ကလံၤ” မ့တမ့ၢ် သးစီဆှံလီၤ. ဒီးပှၤကွဲးလံာ်စီဆှံတဖၣ်စ့ၢ်ကီး မၤတၢ်လၢ အကဘၣ်မၤဝဲ ခီဖျိအမၤဝဲဒ် သးစီဆှံ ဟံးစုနဲၣ်ကျဲအီၤအသိးလီၤ.
မၤတၢ် ဒီးပာ်ဖျါထီၣ်ဝဲ တၢ်ဂ့ၢ်လၢဘၣ်ဃးဒီး ချံတဘ့ၣ်လဲၤတၢ် ခီဖျိလၢကလံၤ “စိာ်ကွံာ်” အီၤအခါ အဝဲသူဝဲ ကြံးအတၢ်ကတိၤတဖျၢၣ်အံၤလီၤ. (ကျဲအဆိကတၢၢ်တဘိ– မၤတၢ်လၢ ယဟိဝၤယွၤ မၢအခ့အပှၤတဖၣ်မၤဝဲ ထီဘိ
ကျဲခံဘိတဘိ– မၤယဟိဝၤယွၤအတၢ်မၤ လၢအဂ့ၤကတၢၢ် (ကွၢ်လံာ်အဆၢ ၁၁) *
၁၀-၁၁. ဒ်သိးပကဒိးန့ၢ်ဘၣ် သးစီဆှံ အတၢ်ဟံးစုနဲၣ်ကျဲအဂီၢ် တၢ်လၢပကဘၣ်မၤအီၤခံမံၤန့ၣ် မ့ၢ်မနုၤလဲၣ်. ဟ့ၣ်တၢ်အဒိတက့ၢ်.
၁၀ ဆၢကတီၢ်ခဲအံၤ ယဟိဝၤယွၤ တသူအသးစီဆှံ ဒ်သိးအကမၢ ပှၤကွဲးလံာ်စီဆှံန့ၣ်ဘၣ်. ဘၣ်ဆၣ် ယဟိဝၤယွၤ သူဝဲအသးစီဆှံ ဒ်သိးကဟံးစုနဲၣ်ကျဲ အခ့အပှၤတဖၣ်ဒံးလီၤ. အဃိ ပထံၣ်ဘၣ်လၢ ယဟိဝၤယွၤ ဆဲးမၤဝဲ တၢ်လၢအကဘၣ်မၤဝဲလီၤ. ပဝဲစ့ၢ်ကီး ဒ်သိးပကဒိးန့ၢ်ဘၣ် သးစီဆှံ အတၢ်မၤစၢၤအဂီၢ် တၢ်လၢပကဘၣ်မၤန့ၣ် အိၣ်ဝဲလီၤ. မ့မ့ၢ်ဒ်န့ၣ်န့ၣ် ပမၤအီၤကသ့ဒ်လဲၣ်.
၁၁ ဆိကမိၣ်ကွၢ် တၢ်အဒိအံၤတက့ၢ်. ဒ်သိးကလံၤကဆီၣ်အကဘီအဂီၢ် ပှၤနီကဘီတဂၤ ကဘၣ်မၤတၢ် ခံမံၤလီၤ. တၢတမံၤန့ၣ် အဝဲကဘၣ်ဃၣ်ကဘီအခိၣ် လိၤလိၤလၢ ကလံၤအကျိၤလီၤ. အဝဲမ့ၢ်နီကဘီ ယံၤဒီးကလံၤကျိၤန့ၣ် ကဘီတလဲၤတၢ်ဘၣ်. ခံမံၤတမံၤန့ၣ် တသ့ဖဲအသ့ အဝဲကဘၣ်ထုးထီၣ်ဒီး သလၣ်ထီၣ် ကဘီအယၢ်လၣ် ဂ့ၤဂ့ၤလီၤ. ကလံၤမ့ၢ်အူနုာ်လၢ ယၢ်လၣ်အပူၤပှဲၤပှဲၤမး ကဘီကလဲၤတၢ်လီၤ. ဒ်န့ၣ်အသိး ပမ့ၢ်ဒိးန့ၢ်ဘၣ် သးစီဆှံအတၢ်မၤစၢၤမး ပဆဲးမၤ ယဟိဝၤယွၤအတၢ်မၤ ကန့ၢ်လီၤ. ဒ်သိးပကဒိးန့ၢ်ဘၣ် သးစီဆှံ အတၢ်မၤစၢၤအဂီၢ် ပကဘၣ်မၤတၢ်ခံမံၤလီၤ. တၢတမံၤန့ၣ် ပကဘၣ်မၤ တၢ်လၢယဟိဝၤယွၤ အသးစီဆှံ မၢအခ့အပှၤတဖၣ် မၤဝဲန့ၣ်လီၤ. ခံမံၤတမံၤန့ၣ် တသ့ဖဲအသ့ ပကဘၣ်မၤအီၤ လၢအဂ့ၤကတၢၢ်လီၤ. (စံးထီၣ်ပတြၢၤ ၁၁၉:၃၂) ပမ့ၢ်မၤ တၢ်သ့ၣ်တဖၣ်အံၤန့ၣ် သးစီဆှံ ကဟ့ၣ်ပှၤတၢ်ဂံၢ်တၢ်ဘါ ဒ်သိးပဆဲးမၤ ယဟိဝၤယွၤအတၢ်မၤ တုၤလၢဟီၣ်ခိၣ်သီ ကန့ၢ်အဂီၢ်လီၤ.
၁၂. ပကတဲသကိး တၢ်ဂ့ၢ်မနုၤလဲၣ်.
၁၂ ပသ့ၣ်ညါဘၣ် ကျဲခံဘိလၢ သးစီဆှံမၤစၢၤပှၤအဂ့ၢ်လံ. ဖဲပထံၣ်ဘၣ် တၢ်ကီတၢ်ခဲတဖၣ် အဆၢကတီၢ် သးစီဆှံ ဟ့ၣ်ပှၤတၢ်ဂံၢ်တၢ်ဘါ ဒီးမၤစၢၤပှၤ ဒ်သိးပကဆဲးအိၣ်ဒီး တၢ်သးတီအဂီၢ်လီၤ. တကးဒံးဘၣ် သးစီဆှံ ဟံးစုနဲၣ်ကျဲပှၤဒီးမၤစၢၤပှၤ ဒ်သိးပကဆဲးမၤ ယဟိဝၤယွၤအတၢ်မၤ ဒီးပကဒိးန့ၢ်ဘၣ် တၢ်မူအထူအယိာ်အဂီၢ်လီၤ. ခဲအံၤပကတဲသကိး ဘၣ်ဃးဒီး တၢ်လွံၢ်မံၤလၢ ပကဘၣ်မၤအီၤ ဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤအဂီၢ်န့ၣ်လီၤ.
ဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤအဂီၢ် ပကဘၣ်မၤဒ်လဲၣ်
၁၃. ဒ် ၂ တံၤမသ့း ၃:၁၆, ၁၇ ပာ်ဖျါထီၣ်ဝဲအသိး လံာ်စီဆှံအဆၢတဖၣ်န့ၣ် ကမၤစၢၤပှၤဒ်လဲၣ်, ဘၣ်ဆၣ် ပကဘၣ်မၤ တၢ်မနုၤလဲၣ်.
၁၃ တၢတမံၤန့ၣ် မၤလိကစၢ်ယွၤ အကလုၢ်ကထါတက့ၢ်. (ဖး ၂ တံၤမသ့း ၃:၁၆, ၁၇ တက့ၢ်.) ကြံးအတၢ်ကတိၤ လၢဘၣ်တၢ်ကွဲးကျိာ်ထံအီၤလၢ “ကွဲးအသးလၢယွၤ” န့ၣ်အခီပညီလိၤလိၤမ့ၢ်ဝဲ “ကစၢ်ယွၤ ကသါ” လီၤ. ကစၢ်ယွၤသူဝဲ အသးစီဆှံဒီး “ကသါ” နုာ် မ့တမ့ၢ် ထၢနုာ်အတၢ်ဆိကမိၣ် လၢပှၤကွဲးလံာ်စီဆှံဖိတဖၣ် အတၢ်ဆိကမိၣ်ပူၤလီၤ. ဖဲပဖးလံာ်စီဆှံ ဒီးဆိကမိၣ်ထံအီၤအခါ ကစၢ်ယွၤ အတၢ်ဟံးစုနဲၣ်ကျဲတဖၣ် ကနုာ်လီၤလၢပသးပူၤ ဒီးပတၢ်ဆိကမိၣ်အပူၤလီၤ. ဒီးကမၤစၢၤပှၤဒ်သိး ပကဆီတလဲပတၢ်အိၣ်မူ ဒ်တၢ်ဘၣ်ယဟိဝၤယွၤအသး အဂီၢ်လီၤ. (ဧ့ၤဘြံၤ ၄:၁၂) ဘၣ်ဆၣ် ဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤအဂီၢ် ပကဘၣ်ပာ်လီၤ တၢ်ဆၢကတီၢ်လၢ ပကမၤလိလံာ်စီဆှံထီဘိ ဒီးဆိကမိၣ်ထံ တၢ်လၢပဖးအီၤတဖၣ် လီၤတံၢ်လီၤဆဲးလီၤ. ပမ့ၢ်မၤဒ်န့ၣ်န့ၣ် ပတၢ်မၤ ဒီးပတၢ်ကတိၤတဖၣ် ကလဲၤအသးဒ် ကစၢ်ယွၤ အကလုၢ်ကထါအသိးလီၤ.
၁၄. (က) ဘၣ်မနုၤအဃိ ပတဲသ့လၢ သးစီဆှံ အိၣ်ဝဲလၢ ပတၢ်အိၣ်ဖှိၣ်အပူၤလဲၣ်. (ခ) ဒ်သိးပကဒိးန့ၢ်ဘၣ်အဘျုး လၢသးစီဆှံအအိၣ် လၢလၢပှဲၤပှဲၤအဂီၢ် ဖဲပထီၣ်တၢ်အိၣ်ဖှိၣ်အခါ ပကဘၣ်မၤဒ်လဲၣ်.
၁၄ ခံမံၤတမံၤန့ၣ် ဘူၣ်ထီၣ်ဘါထီၣ်ကစၢ်ယွၤ တပူၤဃီတက့ၢ်. (စံးထီၣ်ပတြၢၤ ၂၂:၂၂) ကစၢ်ယွၤအသးစီဆှံ အိၣ်ဝဲလၢ ပတၢ်အိၣ်ဖှိၣ်အပူၤလီၤ. (လီၣ်ဖျါ ၂:၂၉) ဘၣ်မနုၤအဃိ ပတဲဒ်န့ၣ်သ့လဲၣ်. ဖဲပဘူၣ်ထီၣ်ဘါထီၣ်တၢ်ဒီး ပဒီပုၢ်ဝဲၢ်မုၣ်ခွါတဖၣ် တပူၤဃီအခါ ပဃ့ဘါထုကဖၣ်လၢ ပကဒိးန့ၢ်ဘၣ်သးစီဆှံ, သးဝံၣ်ဘီမုၢ်အတၢ်သးဝံၣ် လၢအဒိးသန့ၤထီၣ်အသးလၢ ကစၢ်ယွၤအကလုၢ်ကထါ ဒီးပနၢ်ဟူဘၣ် ပဒီပုၢ်ဝဲၢ်လၢ အဘၣ်တၢ်ဃုထၢထီၣ်အီၤ လၢသးစီဆှံတဖၣ် အတၢ်ဟံးစုနဲၣ်ကျဲလၢ အဒိးသန့ၤထီၣ်အသး လၢလံာ်စီဆှံလီၤ. ဒီးဒ်သိးဒီပုၢ်ဝဲၢ်မုၣ်တဖၣ် ကကတဲာ်ကတီၤအသး ဒီးကမၤဝဲ အမူဒါအဂီၢ် သးစီဆှံအံၤ မၤစၢၤအဝဲသ့ၣ် စ့ၢ်ကီးလီၤ. အဃိ ဒ်သိးပကန့ၢ်ဘၣ်အဘျုးလၢ သးစီဆှံအအိၣ် လၢလၢပှဲၤပှဲၤအဂီၢ် ပကဘၣ်အိၣ်ကတဲာ်ကတီၤပသး လၢပကဟ့ၣ်တၢ်စံးဆၢ လၢတၢ်အိၣ်ဖှိၣ်အပူၤလီၤ. ပမ့ၢ်မၤဒ်န့ၣ်န့ၣ် ဖဲပအိၣ်လၢတၢ်အိၣ်ဖှိၣ်အခါ ပကအိၣ်ကတဲာ်ကတီၤပသးလၢ ပကဒိးန့ၢ်ဘၣ်အဘျုးလၢ သးစီဆှံ ဒ်ကဘီလၢ အယၢ်လၣ် အိၣ်သလၣ်ထီၣ်အသး အသိးန့ၣ်လီၤ.
၁၅. လၢတၢ်စံၣ်တဲၤတဲလီၤတၢ်မၤအပူၤ သးစီဆှံမၤစၢၤပှၤဒ်လဲၣ်.
၁၅ သၢမံၤတမံၤန့ၣ် ဟးစံၣ်တဲၤတဲလီၤတၢ်တက့ၢ်. ဖဲပဟးစံၣ်တဲၤတဲလီၤတၢ် ဒီးသိၣ်လိတၢ်အခါ ပမ့ၢ်သူလံာ်စီဆှံန့ၣ် မ့ၢ်ဒၣ်ပပျဲလၢ သးစီဆှံကမၤစၢၤပှၤလၢ ပတၢ်စံၣ်တဲၤတဲလီၤတၢ်မၤ အပူၤန့ၣ်လီၤ. (ရိမ့ၤ ၁၅:၁၈, ၁၉) ဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤအဂီၢ် ပကဘၣ် ဟးစံၣ်တဲၤတဲလီၤတၢ်ထီဘိ ဒီးတသ့ဖဲအသ့ ပကဘၣ်သူ လံာ်စီဆှံလီၤ. ဖဲနဟးစံၣ်တဲၤတဲလီၤတၢ်အခါ ဒ်သိးနတဲတၢ်ဒီးပှၤဂၤ ကသ့အါထီၣ်အဂီၢ် နမၤထွဲဒ် တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ် လၢအအိၣ်လၢ ခရံာ်ဖိအတၢ်အိၣ်မူ ဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အပူၤသ့လီၤ.
၁၆. ကျဲအဂ့ၤကတၢၢ်တဘိ လၢပကဒိးန့ၢ်ဘၣ် သးစီဆှံန့ၣ် မ့ၢ်မနုၤလဲၣ်.
၁၆ လွံၢ်မံၤတမံၤန့ၣ် ဃ့ဘါထုကဖၣ်ဆူ ယဟိဝၤယွၤအအိၣ်တက့ၢ်. (မးသဲ ၇:၇-၁၁; လူၤကၣ် ၁၁:၁၃) တၢ်ဃ့ဘါထုကဖၣ် မ့ၢ်ကျဲအဂ့ၤကတၢၢ်တဘိလၢ ပကဒိးန့ၢ်ဘၣ် သးစီဆှံအဂီၢ်လီၤ. တၢ်လၢအကတြီဃာ် ပတၢ်ထုကဖၣ် ဒ်သိးပတၢ်ထုကဖၣ် သုတလဲၤတုၤလၢ ယဟိဝၤယွၤအအိၣ် ဒီးပသုတဒိးန့ၢ်ဘၣ် သးစီဆှံတဂ့ၤအဂီၢ်န့ၣ် တအိၣ်နီတမံၤဘၣ်. ပမ့ၢ်အိၣ်ဘၣ်လၢ ဃိာ်ပူၤမ့ၢ်ဂ့ၤ, မုၣ်ကီၤလံၢ်မ့ၢ်ဂ့ၤ တြီဃာ်ဝဲဒ်သိး ပသုတဒိးန့ၢ်ဘၣ် သးစီဆှံတဂ့ၤအဂီၢ် တန့ၢ်ဘၣ်. (ယၤကိာ် ၁:၁၇) ဒ်သိးပကဒိးန့ၢ်ဘၣ် အဘျုးလၢ သးစီဆှံအအိၣ် လၢလၢပှဲၤပှဲၤအဂီၢ် ပကဘၣ် ဃ့ဘါထုကဖၣ်ဒ်လဲၣ်. ပကသ့ၣ်ညါ တၢ်စံးဆၢအဂီၢ် ပကတဲသကိး တၢ်အဒိလၢ အဘၣ်ထွဲဒီး တၢ်ထုကဖၣ် လၢအဘၣ်တၢ်ကွဲးနီၣ်အီၤထဲလၢ လံာ်လူၤကၣ်အပူၤန့ၣ်လီၤ. *
ဃ့ဘါထုကဖၣ်ဆူၣ်ဆူၣ်
၁၇. ဒ်ယ့ၣ်ၡူးဟ့ၣ်တၢ်အဒိလၢ ပထံၣ်ဘၣ်အီၤဖဲ လူၤကၣ် ၁၁:၅-၉, ၁၃ အပူၤအသိး ဘၣ်ဃးဒီးတၢ်ထုကဖၣ်န့ၣ် ပမၤလိန့ၢ်ဘၣ် တၢ်မနုၤလဲၣ်.
၁၇ ဖး လူၤကၣ် ၁၁:၅-၉, ၁၃ တက့ၢ်. ယ့ၣ်ၡူးဟ့ၣ်တၢ်အဒိအံၤ ပာ်ဖျါထီၣ်ဝဲလၢ ဒ်သိးပကဒိးန့ၢ်ဘၣ် သးစီဆှံအဂီၢ် ပကဘၣ် ဃ့ဘါထုကဖၣ်ဒ်လဲၣ်. တၢ်အဒိတခါအံၤ ပာ်ဖျါထီၣ်ဝဲလၢ ပှၤပိာ်ခွါတဂၤန့ၢ်ဘၣ် တၢ်လၢအလိၣ်ဘၣ်ဝဲ ခီဖျိ “အဃ့ဝဲသပှၢ်ပှၢ်” အဃိလီၤ. မုၢ်နၤယိာ်လံဘၣ်ဆၣ် အဝဲတဘၣ်ယိၣ်တၢ်လၢ ကလဲၤဃ့အသကိး တၢ်မၤစၢၤဘၣ်. (လူၤကၣ် ၁၁:၈) * တၢ်အဒိလၢ ယ့ၣ်ၡူးတဲဝဲအံၤ ဘၣ်ထွဲလိာ်အသးဒီး တၢ်ထုကဖၣ်အဂ့ၢ် ဒ်လဲၣ်. ဖဲန့ၣ်န့ၣ် ယ့ၣ်ၡူးတဲဝဲလၢ “ဃ့တက့ၢ်, ဒီးတၢ်ကဟ့ၣ်သုလီၤ. ဃုတက့ၢ်, ဒီးသုကထံၣ်န့ၢ်တၢ်လီၤ. ဒိတကျိာ်တက့ၢ်. ဒီးတၢ်ကအိးထီၣ်န့ၢ်သုလီၤ.” အဃိ ပန့ၢ်ဘၣ်တၢ်မၤလိလၢ ဒ်သိးပကဒိးန့ၢ်ဘၣ် သးစီဆှံအဂီၢ် ပကဘၣ်ဃ့ဘါထုကဖၣ်ဆူၣ်ဆူၣ်လီၤ.
၁၈. ပမ့ၢ်ကွၢ်တၢ်အဒိလၢ ယ့ၣ်ၡူးတဲဝဲန့ၣ် ဘၣ်မနုၤအဃိ ပနာ်သ့သပှၢ်ကတၢၢ်လၢ ယဟိဝၤယွၤ ကဟ့ၣ်လီၤပှၤ အသးစီဆှံလဲၣ်.
၁၈ တၢ်အဒိလၢ ယ့ၣ်ၡူးတဲဝဲန့ၣ် မၤစၢၤပှၤဒ်သိး ပကနၢ်ပၢၢ်ထီၣ်လၢ ဘၣ်မနုၤအဃိ ယဟိဝၤယွၤ ကဟ့ၣ်ပှၤ အသးစီဆှံလဲၣ် န့ၣ်လီၤ. ပိာ်ခွါတဂၤလၢ တၢ်အဒိအံၤအပူၤန့ၣ် အဲၣ်ဒိးတူၢ်လိာ် အပှၤတမှံၤဂ့ၤဂ့ၤလီၤ. အဝဲတူၢ်ဘၣ်ဝဲလၢ အကဘၣ် ဟ့ၣ်ဒုးအီၣ်ဒုးအီ အပှၤတမှံၤလၢ အဟဲလၢ မုၢ်နၤခီ အဆၢကတီၢ်အံၤလီၤ. ဘၣ်ဆၣ် အတၢ်အီၣ်တအိၣ် နီတမံၤဘၣ်. ယ့ၣ်ၡူးတဲဝဲလၢ ခီဖျိလၢ ပှၤပိာ်ခွါတဂၤအံၤ လဲၤဃ့တၢ်လၢ ပှၤလၢအခိၣ်အဃၢၤတဂၤအံၤအအိၣ် သပှၢ်ပှၢ်အဃိ ပှၤဟ့ၣ်လီၤအီၤကိၣ်လီၤ. ယ့ၣ်ၡူးအဲၣ်ဒိးတဲဝဲ တၢ်မနုၤလဲၣ်. ပှၤဟီၣ်ခိၣ်ဖိလၢ အတလၢတပှဲၤတဂၤ မ့ၢ်အဲၣ်ဒိးမၤစၢၤ ပှၤလၢအခိၣ်အဃၢၤတဂၤလၢ အဃ့တၢ်သပှၢ်ပှၢ်န့ၣ် ပပၢ်အိၣ်လၢမူခိၣ် လၢအပှဲၤဒီး တၢ်သးကညီၤတဂၤ ကအဲၣ်ဒိးမၤစၢၤဝဲ ပှၤလၢအဃ့အီၤသးစီဆှံ သပှၢ်ပှၢ်န့ၣ်လီၤ. လၢတၢ်န့ၣ်အဃိ ပမ့ၢ်ဃ့ ယဟိဝၤယွၤ အသးစီဆှံန့ၣ် ပနာ်သ့သပှၢ်ကတၢၢ်လၢ ကစၢ်ယွၤ ကစံးဆၢ ပတၢ်ထုကဖၣ်လီၤ.—စံးထီၣ်ပတြၢၤ ၁၀:၁၇; ၆၆:၁၉.
၁၉. ဘၣ်မနုၤအဃိ ပနာ်သ့လၢ ပကမၤနၢၤတၢ်လဲၣ်.
၁၉ မုၣ်ကီၤလံၢ် ဒုးပှၤထီဘိဘၣ်ဆၣ် မ့ၢ်လၢသးစီဆှံမၤစၢၤပှၤ လၢကျဲခံဘိအဃိ ပနာ်သ့လၢ ပကမၤနၢၤတၢ်လီၤ. အဆိကတၢၢ်န့ၣ် သးစီဆှံ ဟ့ၣ်ပှၤတၢ်ဂံၢ်တၢ်ဘါ လၢပကလဲၤခီဖျိ တၢ်ကီတၢ်ခဲတဖၣ်အဂီၢ်လီၤ. ဒီးခံမံၤတမံၤန့ၣ် သးစီဆှံ မၤစၢၤပှၤဒ်သိး ပဆဲးမၤ ယဟိဝၤယွၤအတၢ်မၤ တုၤလၢဟီၣ်ခိၣ်သီ ကန့ၢ်အဂီၢ်လီၤ. မ်ပကပာ်လီၤပသးလၢ ပကဂုာ်ကျဲးစၢး ဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤတက့ၢ်.
တၢ်သးဝံၣ် ၄၁ ဒိကနၣ်ယတၢ်ထုကဖၣ်
^ လံာ်အဆၢ. 5 တၢ်မၤလိတခါအံၤ ကပာ်ဖျါထီၣ်ဝဲလၢ ဒ်သိးပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ် ယွၤအသးစီဆှံ မၤစၢၤပှၤသ့ ဒ်လဲၣ် ဒီးဒ်သိးပကဒိးန့ၢ်ဘၣ် သးစီဆှံအတၢ်မၤစၢၤ လၢလၢပှဲၤပှဲၤအဂီၢ် ပကဘၣ်မၤဒ်လဲၣ်န့ၣ်လီၤ.
^ လံာ်အဆၢ. 16 တၢ်ထုကဖၣ်န့ၣ် မ့ၢ်တၢ်အရ့ဒိၣ်လၢ ယ့ၣ်ၡူးအတၢ်အိၣ်မူပူၤလီၤ. ဒ်သိး ပကနၢ်ပၢၢ်တၢ်ဂ့ၢ်အံၤအဂီၢ် စီၤလူၤကၣ် မၤစၢၤပှၤအါန့ၢ် ပှၤကွဲးလံာ်တၢ်သးခုကစီၣ် အဂၤတဖၣ်လီၤ.—လူၤကၣ် ၃:၂၁; ၅:၁၆; ၆:၁၂; ၉:၁၈, ၂၈, ၂၉; ၁၈:၁; ၂၂:၄၁, ၄၄.
^ လံာ်အဆၢ. 17 ကွၢ်တၢ်မၤနီၣ်လၢအမ့ၢ် “ဃ့ဝဲသပှၢ်ပှၢ်” လၢအအိၣ်ဖဲ လါယူၤလံ ၂၀၁၈ ခရံာ်ဖိအတၢ်အိၣ်မူ ဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ ကဘျံးပၤ ၆ တက့ၢ်.
^ လံာ်အဆၢ. 60 တၢ်တဲဖျါထီၣ်တၢ်ဂီၤ အခီပညီ– ကျဲအဆိကတၢၢ်တဘိ– ဒီပုၢ်ဝဲၢ်မုၣ်ခွါခံဂၤ လဲၤတုၤလၢ ဘီမုၢ်ဘျီၣ်ဒိၣ်. ဒီးအဝဲသ့ၣ် အိၣ်ဖှိၣ်သကိးဒီး ဒီပုၢ်ဝဲၢ်မုၣ်ခွါ အဂၤတဖၣ် ဖဲယဟိဝၤယွၤအသးစီဆှံ အိၣ်အလီၢ်လီၤ. ကျဲခံဘိတဘိ– အဝဲသ့ၣ် ကတဲာ်ကတီၤပာ်စၢၤအသး လၢကပၣ်ဃုာ်လၢ တၢ်အိၣ်ဖှိၣ်အပူၤ. ဒီးကျဲအဂၤလၢ ပမၤလိဘၣ်အီၤလၢ တၢ်မၤလိအံၤအပူၤ ဒ်သိးဒီး တၢ်မၤလိကစၢ်ယွၤ အကလုၢ်ကထါ, တၢ်စံၣ်တဲၤတဲလီၤတၢ် ဒီးတၢ်ဃ့ဘါထုကဖၣ် ဆူယဟိဝၤယွၤအအိၣ်စ့ၢ်ကီး မၤစၢၤပှၤဒ်သိး ပကဒိးန့ၢ်ဘၣ် အဘျုးလၢ သးစီဆှံအဂီၢ်လီၤ.