ဆိကမိၣ်ထီၣ်က့ၤ မုၢ်နံၤလၢအမၤသးခုနၤ ဒိၣ်ကတၢၢ် လၢနတၢ်အိၣ်မူပူၤန့ၣ်တက့ၢ်. မ့ၢ်ဆၢကတီၢ်ဖဲ နထီၣ်ပှၢ်အခါဧါ မ့တမ့ၢ် နဖိအိၣ်အဆိကတၢၢ်တဂၤအခါန့ၣ်ဧါ. မ့တမ့ၢ် ဖဲနဒိးဘျၢနသးလၢထံ အနံၤဧါ. နတၢ်ဒိးဘျၢထံအမုၢ်နံၤန့ၣ် မ့ၢ်တၢ်အရ့ဒိၣ်ကတၢၢ် ဒီးလီၤသးခုဒိၣ်ကတၢၢ်လၢ နတၢ်အိၣ်မူပူၤလီၤ. ဒီးမုၢ်နံၤအဝဲန့ၣ် နဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ထံၣ်ဘၣ်ဝဲလၢ နပာ်ဖျါထီၣ်လၢ နတၢ်အဲၣ်ယွၤလၢ နသးဒီဖျၢၣ်, နတၢ်ကူၣ်တၢ်ဆးတုၤအလၢာ်, ဒီနဂံၢ်နဘါခဲလၢာ်အဃိ အဝဲသ့ၣ်သးခုဒိၣ်မးလီၤ.—မၢ်ကူး ၁၂:၃၀.

စးထီၣ်လၢ နဒိးဘျၢထံန့ၣ် နကအိၣ်ဒီး တၢ်သူၣ်ခုသးခု လၢတၢ်မၤ ယဟိဝၤယွၤအတၢ်မၤအပူၤလီၤ. ဘၣ်ဆၣ် ဒီပုၢ်ဝဲၢ်တနီၤန့ၣ် အတၢ်သးခု လီၤမၢ်ကွံာ်ဝဲသ့လီၤ. ဘၣ်မနုၤအဃိ တၢ်ကဲထီၣ်အသးဒ်အံၤလဲၣ်. ဒ်သိးပကမၤ ကစၢ်ယွၤအတၢ်မၤ လၢတၢ်သူၣ်ခုသးခုအပူၤ ကသ့အဂီၢ် တၢ်မနုၤကမၤစၢၤပှၤလဲၣ်.

ဘီမုၢ်တၢ်သးခုကစီၣ်န့ၣ် ဟ့ၣ်ပှၤတၢ်သူၣ်ခုသးခုအါမးလီၤ. ဘၣ်မနုၤအဃိလဲၣ်. မ့ၢ်လၢ ယဟိဝၤယွၤ အၢၣ်လီၤဝဲလၢ တယံာ်လၢၤဘၣ် အဘီမုၢ်အံၤ ကမၤလီၤမၢ်ကွံာ်တၢ်အၢတၢ်သီ ဒီးမၤလၢပှဲၤထီၣ် ကစၢ်ယွၤအတၢ်ဘၣ်သး လၢဟီၣ်ခိၣ်ချၢန့ၣ်လီၤ. စဖါနယၤ ၁:၁၄ စံးဘၣ်ပှၤလၢ– “ယွၤအမုၢ်နံၤဖးဒိၣ်တနံၤ အိၣ်ဘူးထီၣ်လံ, အိၣ်ဘူးထီၣ်လံ, ဒီးဟဲဝဲချ့ချ့လီၤ.” ဘၣ်ဆၣ် ပမ့ၢ်တူၢ်ဘၣ်လၢ ပဘၣ်အိၣ်ခိးကွၢ်လၢ်ဝဲ ယွၤအမုၢ်နံၤ ယံာ်တ့ၢ်လံန့ၣ် ပတၢ်သူၣ်ခုသးခု လီၤမၢ်ကွံာ်ဝဲသ့လီၤ. တၢ်အံၤမၤစှၤလီၤဝဲ ပတၢ်သူၣ်ဆူၣ်သးဆူၣ်လၢ တၢ်မၤကစၢ်ယွၤ အတၢ်မၤပူၤသ့လီၤ.—ကတိၤဒိ ၁၃:၁၂.

ဖဲပရ့လိာ်ပသးဒီး ဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ်အခါ ပဒိးန့ၢ်ဘၣ် တၢ်ဂံၢ်တၢ်ဘါလၢ ပကမၤယဟိဝၤယွၤ အတၢ်မၤလၢတၢ်သးခုအပူၤလီၤ. ယဟိဝၤယွၤ အခ့အပှၤတဖၣ် အသကဲာ်ပဝးလၢအဂ့ၤန့ၣ် ကထုးန့ၢ်ပှၤဆူ တၢ်ဘူၣ်တၢ်ဘါ အမ့ၢ်အတီအပူၤ ဒီးမၤစၢၤပှၤဒ်သိး ပကမၤယွၤအတၢ်မၤလၢ တၢ်သးခုအပူၤလီၤ. (၁ ပ့းတရူး ၂:၁၂) ဘၣ်ဆၣ် ဖဲပဒီပုၢ်ဝဲၢ်တဖၣ် ဘၣ်တၢ်သိၣ်ဃီၣ်အီၤ မ့ၢ်လၢအတဒိကနၣ် ကစၢ်ယွၤအကလုၢ်အခါန့ၣ် တၢ်ကမၤအသးဒ်လဲၣ်. တၢ်အံၤကမၤဘၣ်ဒိ ပှၤတနီၤလၢ တၢ်အိၣ်ဖှိၣ်ပူၤ ဒီးအဝဲသ့ၣ် အတၢ်သးခု လီၤမၢ်ကွံာ်ဝဲသ့လီၤ.

တၢ်အဲၣ်ကျိၣ်အဲၣ်စ့န့ၣ် မၤလီၤမၢ်ကွံာ် ပတၢ်သူၣ်ခုသးခုသ့စ့ၢ်ကီးန့ၣ်လီၤ. လၢကျဲဒ်လဲၣ်. ဟီၣ်ခိၣ်လၢမုၣ်ကီၤလံၢ်ပၢအီအံၤ လီန့ၢ်ပှၤဒ်သိး ပကဆိကမိၣ်လၢ တၢ်ထူးတၢ်တီၤန့ၣ် ဟ့ၣ်ပှၤတၢ်သူၣ်ခုသးခုနီၢ်နီၢ်သ့ဝဲလီၤ. လၢတၢ်န့ၣ်အဃိ ပကြၢးသ့ၣ်နီၣ်ထီၣ်က့ၤ ယ့ၣ်ၡူးအတၢ်ကတိၤလၢအမ့ၢ်– “ကစၢ်ခံဂၤအတၢ်မၤန့ၣ် ပှၤမၤတသ့ဘၣ်နီတဂၤဘၣ်. အဂ့ၢ်ဒ်အံၤ, ကသးဟ့အဝဲတဂၤ ဒီးကအဲၣ်အဝဲတဂၤလီၤ. မ့တမ့ၢ်ဘၣ်ဒီး ကဘျုးအသးလၢ အဝဲတဂၤ, ဒီးကမၤတရီတပါအဝဲတဂၤလီၤ. ယွၤအတၢ်မၤ, ဒီးမၤမိၣ်အတၢ်မၤန့ၣ် သုမၤတသ့ဘၣ်.” (မးသဲ ၆:၂၄) ပမၤ ကစၢ်ယွၤအတၢ်မၤ လၢတၢ်သူၣ်ခုသးခုအပူၤ ဒီးတကတီၢ်ဃီန့ၣ် ပဃုတၢ်ထူးတၢ်တီၤလၢ ဟီၣ်ခိၣ်န့ၣ် တသ့ဘၣ်.

တၢ်မၤယဟိဝၤယွၤ အတၢ်မၤန့ၣ် တမ့ၢ်တၢ်ဝံတၢ်ယိး အဃၢလၢ ပှၤလၢအအဲၣ်အီၤတဖၣ်အဂီၢ်ဘၣ်. (၁ ယိၤဟၣ် ၅:၃) သ့ၣ်နီၣ်ထီၣ်လၢ ယ့ၣ်ၡူးစံးဝဲ– “ပှၤလၢတၢ်ဘှံးအသး, ဒီးဝံတၢ်ယိးတၢ်ဃၢခဲလၢာ် သ့ၣ်သုဧၢ, ဟဲဆူယအိၣ်တက့ၢ်. ဒီးယကဒုးအိၣ်ဘှံးသုလီၤ. ဟံးထီၣ်ယနီၣ်ယိးဘိလၢသုလိၤ, ဒီးမၤလိတၢ်လၢယၤတက့ၢ်. အဂ့ၢ်ဒ်အံၤ, ယသးစူၤ, ဒီးယသးဆီၣ်လီၤယသးလီၤ. ဒီးသုကထံၣ်န့ၢ် တၢ်အိၣ်ဘှံးလၢ သုသးအဂီၢ်လီၤ. အဂ့ၢ်ဒ်အံၤ, ယနီၣ်ယိးဘိမ့ၢ်အညီ ဒီးယတၢ်ဝံတၢ်ယိးမ့ၢ်အဖှံ လီၤ.” (မးသဲ ၁၁:၂၈-၃၀) ပမ့ၢ်ခရံာ်ဖိလၢ အမ့ၢ်အတီအဃိ တၢ်မၤကစၢ်ယွၤအတၢ်မၤန့ၣ် တမ့ၢ်တၢ်ဝံတၢ်ယိးအဃၢလၢပဂီၢ်ဘၣ်, လၢတၢ်န့ၣ်အလီၢ် ပဒိးန့ၢ်ဘၣ်တၢ်သူၣ်ခုသးခုနီၢ်နီၢ်လီၤ. ပအိၣ်ဒီးတၢ်ဂ့ၢ်အါမံၤ လၢပကမၤယဟိဝၤယွၤအတၢ်မၤလၢ တၢ်သူၣ်ခုသးခုအပူၤလီၤ. မ်ပကကွၢ်သကိး တၢ်ဂ့ၢ်သၢမံၤအံၤတက့ၢ်.—ဃဘးကူာ် ၃:၁၈.

ပမၤ ယွၤလၢအိၣ်ဒီးတၢ်သးခု လၢအဟ့ၣ်ပှၤ သးသမူတဂၤအတၢ်မၤလီၤ. (မၤတၢ် ၁၇:၂၈; ၁ တံၤမသ့း ၁:၁၁, nwt) ပသ့ၣ်ညါလၢ ကစၢ်ယွၤဟ့ၣ်ပှၤသးသမူအဃိ ပကြၢးအဲၣ်ဆၢက့ၤအီၤလီၤ. လၢတၢ်န့ၣ်အဃိ ပဒိးဘျၢထံ မ့ၢ်ယံာ်ထဲလဲၣ်ထဲလဲၣ် သနာ်က့ မ်ပကမၤကစၢ်ယွၤအတၢ်မၤလၢ တၢ်သးခုအပူၤထီဘိတက့ၢ်.

ဆိကမိၣ်ကွၢ် ဒီပုၢ်ဝဲၢ်ခွါ ဟၢးထၢၣ်လၢ အမၤကဝီၤအပှၤကွၢ်တၢ် ယံာ်ဝဲအနံၣ် ၄၀ တဂၤအဂ့ၢ်န့ၣ်တက့ၢ်. အဝဲ “အသးပှၢ်” ဘၣ်ဆၣ် အိၣ်ဒံးဒီးတၢ်သူၣ်ခုသးခုလၢ ကစၢ်ယွၤအတၢ်မၤအပူၤလီၤ. (စံးထီၣ်ပတြၢၤ ၉၂:၁၂-၁၄) အမါအတၢ်အိၣ်ဆူၣ်အိၣ်ချ့ တဂ့ၤဘၣ်အဃိ အဝဲမၤတၢ်တသ့ ဒ်လၢညါအသိးဘၣ်. ဘၣ်ဆၣ် အတၢ်သူၣ်ခုသးခု တလီၤမၢ်ကွံာ်ဝဲဘၣ်. အဝဲစံးဝဲလၢ– “ယသးအုးလၢ ယထံၣ်ဘၣ် ယမါအတၢ်ဆါနးထီၣ်ဝဲ ကွ့ၢ်ကွ့ၢ် ဒီးယကကွၢ်ထွဲအီၤအဂီၢ် ကီဝဲလီၤ. ဘၣ်ဆၣ် ယတပျဲတၢ်အံၤ ကမၤစှၤလီၤ ယတၢ်သူၣ်ခုသးခုလၢ တၢ်မၤကစၢ်ယွၤအတၢ်မၤအပူၤဘၣ်. ယဂုာ်ကျဲးစၢးဒ်သိး ယကအိၣ်ဒီး တၢ်သူၣ်ဆူၣ်သးဆူၣ်လၢ ကစၢ်ယွၤအတၢ်မၤအပူၤ ဒီးယပာ်ယွၤအဘီအမုၢ်လၢ နီၣ်ဂံၢ်တၢအဃိ ယတၢ်သူၣ်ခုသးခု အံၤတလီၤမၢ်ကွံာ်ဝဲဘၣ်.”

ယဟိဝၤယွၤ ကတဲာ်ကတီၤန့ၢ်ပှၤ တၢ်ပှ့ၤက့ၤအဃိ ပအိၣ်ဒီးတၢ်သူၣ်ခုသးခု လၢပတၢ်အိၣ်မူပူၤလီၤ. “ယွၤအဲၣ်ဟီၣ်ခိၣ်ဖိ တုၤအဟ့ၣ်လီၤကွံာ် အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤ တဂၤလၢ်လၢ်န့ၣ်, အသုတဟးဂီၤတဂ့ၤ ဒီးကန့ၢ်ဘၣ် တၢ်မူအထူအယိာ်လီၤ.” (ယိၤဟၣ် ၃:၁၆) မ့ၢ်လီၤ. ဖဲပပာ်ဖျါထီၣ်လၢ ပနာ်တၢ်ပှ့ၤက့ၤအခါ ပတၢ်ဒဲးဘးကဘၣ်တၢ်ပျၢ်ကွံာ်အီၤဒီး ပဒိးန့ၢ်ဘၣ် တၢ်မူအထူအယိာ်ကသ့ဝဲလီၤ. တၢ်အံၤမ့ၢ် တၢ်ဂ့ၢ်အဂ့ၤကတၢၢ်တခါလၢ ပကဘၣ်အိၣ်ဒီး တၢ်စံးဘျုးစံးဖှိၣ်လီၤ. ခီဖျိလၢ ပပာ်လုၢ်ပာ်ပှ့ၤ တၢ်ပှ့ၤက့ၤအဃိ တၢ်အံၤထိၣ်ဟူးထိၣ်ဂဲၤထီၣ်ပှၤလၢ ပကမၤယဟိဝၤယွၤ အတၢ်မၤလၢ တၢ်သးခုအပူၤလီၤ.

ဒီပုၢ်ဝဲၢ်ခွါ ကၠ့းစူး အိၣ်လၢကီၢ်မဲးစံၣ်ကိၣ် စံးဝဲလၢ– “တဘျီတခီၣ် ယမၤတၢ်ဒီနံၤဒီနၤ ဒ်သိးယကန့ၢ်အါထီၣ်စ့အဂီၢ်န့ၣ်လီၤ. လၢတၢ်န့ၣ်အဃိ ယကဲထီၣ်တၢ်မၤအကုၢ်န့ၣ်လီၤ. လၢခံန့ၣ် ယမၤလိဘၣ် ယဟိဝၤယွၤအဂ့ၢ် ဒီးယသ့ၣ်ညါဘၣ်စ့ၢ်ကီးလၢ အဝဲဟ့ၣ်လီၤဝဲအဖိခွါယ့ၣ်ၡူး လၢပှၤဟီၣ်ခိၣ်ဖိအဂီၢ်န့ၣ်လီၤ. ဖဲန့ၣ်အခါ ယသးအိၣ်လၢ ယကမၤအတၢ်မၤလီၤ. ဒီးယဟ့ၣ်လုၢ်ထီၣ် ယသးဆူ ယဟိဝၤယွၤအအိၣ်လီၤ. ယဟးထီၣ်လၢ ခီပနံာ်တခါလၢ ယမၤတ့ၢ်တၢ်ယံာ်ဝဲ ၂၈ နံၣ် ဒီးယမၤယွၤအတၢ်မၤလၢ ဆၢကတီၢ်လၢပှဲၤလီၤ. ခဲအံၤ ယမၤကစၢ်ယွၤ အတၢ်မၤလၢ တၢ်သူၣ်ခုသးခုအပူၤ အိၣ်ဝဲတဘျုးနံၣ်လံ.” တၢ်အံၤမ့ၢ်ဝဲ ကၠ့းစူးအတၢ်စးထီၣ်မၤ ယဟိဝၤယွၤအတၢ်မၤလၢ ပှဲၤဒီးတၢ်သးခုလီၤ.

ခီဖျိလၢပသကဲာ်ပဝးဂ့ၤအဃိ ပအိၣ်ဒီးတၢ်သူၣ်ဖှံသးညီလီၤ. တချုးလၢနသ့ၣ်ညါ ယဟိဝၤယွၤအခါန့ၣ် နတၢ်အိၣ်မူမၤအသးဒ်လဲၣ်. တၢ်မၢဖိပီလူး ဒုးသ့ၣ်နီၣ်ထီၣ်က့ၤ ခရံာ်ဖိတဖၣ်လၢ အိၣ်ဝဲလၢဝ့ၢ်ရိမ့ၤအပူၤ လၢအဝဲသ့ၣ်မ့ၢ်တ့ၢ် “တၢ်ဒဲးဘးအကုၢ်အပှၤ” ဘၣ်ဆၣ် အခဲအံၤ အဝဲသ့ၣ်ကဲထီၣ် “တၢ်တီတၢ်လိၤအကုၢ်အပှၤ” န့ၣ်လီၤ. မ့ၢ်လၢ အတၢ်အိၣ်မူကဆှီထီၣ်က့ၤဝဲအဃိ အဝဲသ့ၣ်ဒိးန့ၢ်ဘၣ် တၢ်မူအထူအယိာ်သ့ဝဲလီၤ.  (ရိမ့ၤ ၆:၁၇-၂၂) ပဝဲစ့ၢ်ကီး ပမ့ၢ်ဒိကနၣ် ကစၢ်ယွၤအကလုၢ်န့ၣ် ပကပူၤဖျဲးဒီးတၢ်သူၣ်အုးသးအုးလၢ အဟဲကဲထီၣ်အသးခီဖျိ တၢ်သကဲာ်ပဝးလၢအတဂ့ၤဘၣ်အဃိ မ့တမ့ၢ် တၢ်မၤတၢ်အၢတၢ်သီအဃိန့ၣ်လီၤ. တၢ်အံၤမ့ၢ်ဝဲတၢ်အိၣ်မူကျဲလၢ အပှဲၤဒီးတၢ်သးခုန့ၣ်လီၤ.

ပကဆိကမိၣ်ကွၢ် ကၠံမံၤ အဂ့ၢ်အကျိၤလီၤ. အဝဲမ့ၢ်ပှၤလၢအထိဘီးကစၢၣ်ဖိ (boxer) ဒီးမ့ၢ်စ့ၢ်ကီးပှၤတဂၤလၢ အတနာ်လၢယွၤအိၣ်ဝဲဘၣ်. ဖဲကၠံမံၤ လဲၤထီၣ်ဝဲတၢ်အိၣ်ဖှိၣ်ရိဖှိၣ်အခါ အထံၣ်ဘၣ်ဝဲ ဒီပုၢ်ဝဲၢ်တဖၣ်အတၢ်အဲၣ်လိာ်သးအဃိ ထုးန့ၢ်အသးဒိၣ်မးလီၤ. ကၠံမံၤ ဃ့ဝဲလၢယဟိဝၤယွၤ ကမၤစၢၤအီၤ ဒ်သိးအကအိၣ်ဒီးတၢ်နာ်အဂီၢ်လီၤ. တကးဒံးဘၣ် အဝဲဃ့စ့ၢ်ကီးဝဲ ယွၤအတၢ်မၤစၢၤ ဒ်သိးအကပာ်တ့ၢ်ကွံာ် အတၢ်အိၣ်မူလၢအတဂ့ၤဘၣ် ကန့ၢ်အဂီၢ်န့ၣ်လီၤ. ကၠံမံၤ စံးဝဲလၢ “ကယီကယီန့ၣ် ယသ့ၣ်ညါထီၣ်ဘၣ်လၢ ယွၤန့ၣ်အိၣ်ဝဲလီၤ. တကးဒံးဘၣ် အဝဲမ့ၢ်ယွၤလၢအပှဲၤဒီးတၢ်အဲၣ်တၢ်ကွံ ဒီးတၢ်သးကညီၤတဂၤန့ၣ်လီၤ. ယလူၤပိာ်ထွဲ ကစၢ်ယွၤ အတၢ်သိၣ်တၢ်သီအဃိ ကဲထီၣ်ဝဲတၢ်ဒီသဒၢလၢယဂီၢ်န့ၣ်လီၤ. ယမ့ၢ်တဆီတလဲယတၢ်အိၣ်မူန့ၣ် ယကသံ ဒ်ယတံၤသကိးတနီၤလၢ အထိဘီးကစၢၣ်တဖၣ်အသိးန့ၣ်လီၤ. တၢ်ဆၢကတီၢ်လၢ ယဒိးန့ၢ်ဘၣ်တၢ်သးခု အဒိၣ်ကတၢၢ်န့ၣ် မ့ၢ်ဝဲ ဖဲယမၤယဟိဝၤယွၤအတၢ်မၤအခါန့ၣ်လီၤ.”

ဖဲပအိၣ်ခိးလၢ တၢ်အကတၢၢ်ကဟဲဝဲအဆၢကတီၢ်န့ၣ် ပကဘၣ်အိၣ်ဒီး တၢ်ပာ်သူၣ်ပာ်သး ဒ်လဲၣ်တကလုာ်လဲၣ်. ပကဘၣ်သ့ၣ်နီၣ်ထီၣ်က့ၤလၢ ပမ့ၢ်မၤတၢ်ဘၣ်ကစၢ်ယွၤအသးန့ၣ် ပမုၢ်လၢ်လၢ ပကဒိးန့ၢ်ဘၣ် တၢ်မူအထူအယိာ်သ့ဝဲလီၤ. လၢတၢ်န့ၣ်အဃိ “ပမၤတၢ်ဂ့ၤန့ၣ် မ်ပသုတလီၤဘှံးလီၤတီၤတဂ့ၤ. အဂ့ၢ်ဒ်အံၤ ပမ့ၢ်တလီၤဘှံးဘၣ်ဒီး, တုၤအမုၢ်အလါဘၣ်ဒီး, ပကကူးတၢ်န့ၣ်လီၤ.” (ကလၤတံ ၆:၈, ၉) ခီဖျိ ယဟိဝၤယွၤ အတၢ်မၤစၢၤအဃိ မ်ပဆဲးတီဒီးအီၤတုၤအကတၢၢ်တက့ၢ်. တကးဒံးဘၣ် ပကဂုာ်ကျဲးစၢး မၤအါထီၣ်ခရံာ်ဖိအတၢ်ဂ့ၤတၢ်ဝါတဖၣ် ဒ်သိးပကလဲၤခီဖျိ “တၢ်နးတၢ်ဖှီၣ်ဖးဒိၣ်” ဒီးမၤကစၢ်ယွၤအတၢ်မၤလၢ တၢ်သူၣ်ခုသးခုအပူၤ ကန့ၢ်အဂီၢ်လီၤ.—လီၣ်ဖျါ ၇:၉, ၁၃, ၁၄; ယၤကိာ် ၁:၂-၄.

ခီဖျိလၢ ပအဲၣ်ယဟိဝၤယွၤ, မၤလၤကပီၤအမံၤ ဒီးမၤအတၢ်မၤအဃိ ပနာ်သ့သပှၢ်ကတၢၢ်လၢ အဝဲကဆိၣ်ဂ့ၤပှၤန့ၣ်လီၤ. ပမ့ၢ်မၤအတၢ်မၤလၢ တၢ်သူၣ်ခုသးခုအပူၤန့ၣ် ပကတူၢ်ဘၣ်ဒ် ပှၤကွဲးထါစံးထီၣ်ပတြၢၤ စီၤဒၤဝံးစံးဝဲအသိး– “ယပာ်လီၤယွၤလၢယမဲာ်ညါ တထံၣ်ဃီလီၤ. မ့ၢ်အအိၣ်လၢယစုထွဲဒီး ယတဟူးတဝးဘၣ်. မၤသးဒ်န့ၣ်ဒီး ယသးသူၣ်ခုသးခု, ဒီးယလၤကပီၤသူၣ်ဖှံသးညီလီၤ. ယဖံးယညၣ်စ့ၢ်ကီး ကအိၣ်ကဆိးလၢ တၢ်မုၢ်လၢ်အပူၤလီၤ.”—စံးထီၣ်ပတြၢၤ ၁၆:၈, ၉.