တၢ်မၤလိ ၁၉
တၢ်အဲၣ်ဒီးတၢ်တီတၢ်လိၤ လၢဟီၣ်ခိၣ်အအၢအသီအံၤအပူၤ
“နတမ့ၢ်ဘၣ် ကစၢ်တဂၤလၢ အဘၣ်အသးလၢ တၢ်တတီတလိၤဘၣ်, တၢ်အၢတၢ်သီ တအိၣ်တဆိးဘၣ်ဒီးနၤဘၣ်.”—စံးထီၣ်ပတြၢၤ ၅:၄.
တၢ်သးဝံၣ် ၁၄၂ တၢ်မုၢ်လၢ်လၢ အမၤဂၢၢ်မၤကျၢၤပှၤ
တၢ်မၤလိအံၤ အတၢ်တိာ်ပာ် *
၁-၃. (က) ဒ် စံးထီၣ်ပတြၢၤ ၅:၄-၆ ပာ်ဖျါထီၣ်ဝဲအသိး ဘၣ်ဃးဒီး တၢ်အၢတၢ်သီန့ၣ် ယဟိဝၤယွၤ တူၢ်ဘၣ်ဝဲဒ်လဲၣ်. (ခ) ဘၣ်မနုၤအဃိ ပတဲသ့လၢ တၢ်မၤတရီတပါဖိသၣ်န့ၣ် ထီဒါလိာ်အသးဒီး “ခရံာ်အတၢ်သိၣ်တၢ်သီ” လဲၣ်.
ယဟိဝၤယွၤ သးဟ့ဝဲ တၢ်အၢတၢ်သီ ခဲလၢာ်လီၤ. (ဖး စံးထီၣ်ပတြၢၤ ၅:၄-၆ တက့ၢ်.) တၢ်မၤတရီတပါဖိသၣ်န့ၣ် မ့ၢ်တၢ်လၢအလီၤပျံၤလီၤဖုး ဒီးလီၤသးဘၣ်အၢဒိၣ်မးအဃိ ယဟိဝၤယွၤ သးဟ့ဝဲ သပှၢ်ကတၢၢ်လီၤ. ခီဖျိလၢ ပမ့ၢ်ယဟိဝၤပှၤအုၣ်အသးအဃိ ပကွၢ်လိမၤဒိးယဟိဝၤယွၤဒီး ပသးဟ့ တၢ်မၤဒ်အံၤ တကးဒံးဘၣ် ပတဟ့ၣ်အခွဲးလၢ အကအိၣ်လၢတၢ်အိၣ်ဖှိၣ် အပူၤဘၣ်.—ရိမ့ၤ ၁၂:၉; ဧ့ၤဘြံၤ ၁၂:၁၅, ၁၆.
၂ တၢ်မၤတရီတပါဖိသၣ်န့ၣ် ထီဒါလိာ်အသးဒီး “ခရံာ်အတၢ်သိၣ်တၢ်သီ” လီၤ. (ကလၤတံ ၆:၂) ဘၣ်မနုၤအဃိ ပတဲဒ်န့ၣ်သ့လဲၣ်. ဒ်ပမၤလိဘၣ်လၢ တၢ်မၤလိလၢ အပူၤကွံာ်တခါအသိး ခရံာ်အတၢ်သိၣ်တၢ်သီန့ၣ်မ့ၢ်ဝဲ တၢ်ခဲလၢာ်လၢ ယ့ၣ်ၡူးသိၣ်လိဝဲ ခီဖျိလၢ အတၢ်ကတိၤဒီး အတၢ်မၤန့ၣ်လီၤ. ဒီးတၢ်သိၣ်တၢ်သီအံၤ ဒိးသန့ၤထီၣ်အသးလၢ တၢ်အဲၣ်တၢ်ကွံ ဒီးဆီၣ်ထွဲဝဲတၢ်တီတၢ်လိၤလီၤ. ခီဖျိလၢ ခရံာ်ဖိနီၢ်နီၢ်တဖၣ် ဒိကနၣ်ဝဲတၢ်သိၣ်တၢ်သီအံၤအဃိ အဝဲသ့ၣ်ရ့ဒီးဖိသၣ်တဖၣ်ဂ့ၤဂ့ၤ ဒ်သိးဖိသၣ်တဖၣ် ကတူၢ်ဘၣ်ဝဲလၢ ပှၤအဲၣ်အီၤအနီၢ်ကီၢ် ဒီးပှၤဒီသဒၢအီၤလီၤ. ပှၤလၢအမၤတရီတပါဖိသၣ်တဖၣ်န့ၣ် မ့ၢ်ပှၤလၢအအဲၣ်လီၤထဲအသး ဒီးအဝဲသ့ၣ်အတၢ်မၤအံၤန့ၣ် မ့ၢ်တၢ်မၤလၢ အကမၣ်လီၤ. ဖိသၣ်လၢ အဘၣ်တၢ်မၤတရီတပါအီၤန့ၣ် ကတူၢ်ဘၣ်ဝဲလၢ ပှၤလၢအအဲၣ်အီၤဒီး ဒီသဒၢအီၤ တအိၣ်နီတဂၤဘၣ်.
၃ “ပှၤအၢပှၤသီ” ဒီးပှၤလၢအပာ်မၤအသး အိၣ်ဝဲအါဒိၣ်မး ဒီးဘၣ်သ့ၣ်သ့ၣ် အဝဲသ့ၣ်တနီၤန့ၣ် ကဂုာ်ကျဲးစၢးနုာ်လီၤလၢတၢ်အိၣ်ဖှိၣ်ပူၤလီၤ. (၂ တံၤမသ့း ၃:၁၃) လၢတၢ်န့ၣ်အဃိ လၢဟီၣ်ခိၣ်ဒီဘ့ၣ်န့ၣ် ပှၤမၤတရီတပါ ဖိသၣ်အိၣ်ဝဲအါမး ဒီးလၢခရံာ်ဖိနီၢ်နီၢ်တဖၣ်အကျါဒၣ်လဲာ် တၢ်ကဲထီၣ်အသးဒ်အံၤ အိၣ်ဝဲအဃိ လီၤသးအုးဒိၣ်မးလီၤ. ပှၤတနီၤန့ၣ် တဘျီခါအဝဲသ့ၣ် မၤယဟိဝၤယွၤ အတၢ်မၤဘၣ်ဆၣ် လၢခံအဝဲသ့ၣ် မၤဝဲဒ် အတၢ်သးကွံလၢ အတကြၢးတဘၣ်အိၣ်ဝဲအသိး ဒီးမၤတရီတပါ ဖိသၣ်န့ၣ်လီၤ. ပကတဲသကိးတၢ်ဂ့ၢ်လၢ ဘၣ်ဃးဒီး တၢ်မၤတရီတပါဖိသၣ်န့ၣ် ဘၣ်မနုၤအဃိ မ့ၢ်တၢ်ကမၣ်ဖးဒိၣ်လဲၣ်န့ၣ်လီၤ. ဒီးပကတဲသကိး ဘၣ်ဃးဒီး ဖဲပှၤလၢတၢ်အိၣ်ဖှိၣ်အပူၤတဂၤဂၤ မၤဘၣ်တၢ်ကမၣ်ဖးဒိၣ် ဒ် သိးဒီး တၢ်မၤတရီတပါဖိသၣ်အခါ တၢ်အိၣ်ဖှိၣ်သးပှၢ်တဖၣ် ကဘၣ်မၤဝဲဒ်လဲၣ် ဒီးမိၢ်ပၢ်တဖၣ် ဒီသဒၢအဖိတဖၣ် ကသ့ဒ်လဲၣ် အဂ့ၢ်န့ၣ်လီၤ. *
တၢ်ကမၣ်ဖးဒိၣ်တခါ
၄-၅. ဘၣ်မနုၤအဃိ ပတဲသ့လၢ တၢ်မၤတရီတပါဖိသၣ်န့ၣ် မ့ၢ်တၢ်ကမၣ်လၢ အမၤဘၣ်ဒိ ဖိသၣ်လၢ အဘၣ်တၢ်မၤတရီတပါအီၤန့ၣ်လဲၣ်.
၄ တၢ်မၤတရီတပါဖိသၣ်န့ၣ် မၤဘၣ်ဒိပှၤဂၤယံာ်မးလီၤ. အမၤဘၣ်ဒိ ဖိသၣ်လၢအဘၣ် တၢ်မၤတရီတပါအီၤ တကးဒံးဘၣ် မၤဘၣ်ဒိဖိသၣ်တဂၤအံၤ အဟံၣ်ဖိဃီဖိ, ခရံာ်ဖိဒီပုၢ်ဝဲၢ်မုၣ်ခွါတဖၣ် ဒီးပှၤလၢအအဲၣ်ဘၣ်ဖိသၣ်တဖၣ်လီၤ. တၢ်မၤတရီတပါဖိသၣ်န့ၣ် မ့ၢ်တၢ်ကမၣ်ဖးဒိၣ်တခါလီၤ.
၅ တၢ်မၤတရီတပါဖိသၣ်န့ၣ် မ့ၢ်တၢ်ကမၣ်လၢ အမၤဘၣ်ဒိ ဖိသၣ်လၢ အတူၢ်ဘၣ်တၢ်တဂၤန့ၣ်လီၤ. * တၢ်ကမၣ်အံၤန့ၣ် မၤဘၣ်ဒိဒီးမၤဆါ ပှၤသးလီၤ. တၢ်မၤလိလၢခံတခါ ကပာ်ဖျါထီၣ်န့ၢ်ပှၤ တၢ်ဂ့ၢ်လၢဘၣ်ဃးဒီး တၢ်မၤတရီတပါဖိသၣ်န့ၣ် မၤဘၣ်ဒိဖိသၣ် နးနးကလဲာ် လၢကျဲအါဘိလီၤ. ပှၤဖိသၣ် နာ်အီၣ်အီၤဘၣ်ဆၣ် အဝဲမၤဟးဂီၤကွံာ် ပှၤဖိသၣ်အတၢ်နာ် ဒီးခီဖျိလၢ အမၤဝဲဒ်အံၤအဃိ ဖိသၣ်ကတူၢ်ဘၣ်ဝဲလၢ အတအိၣ်ဒီးတၢ်ဘံၣ်တၢ်ဘၢဘၣ် ဒီးကတူၢ်ဘၣ်တၢ်လၢ အတကြၢးတူၢ်ဘၣ်ဝဲတဖၣ်န့ၣ်လီၤ. ပကဘၣ်ဒီသဒၢ ပှၤဖိသၣ်တဖၣ် ဒ်သိးအဝဲသ့ၣ် သုတထံၣ်ဘၣ် တၢ်အၢတၢ်သီဒ်အံၤ တဂ့ၤအဂီၢ်လီၤ. ဒီးဖိသၣ်လၢ အဘၣ်တၢ်မၤတရီတပါအီၤန့ၣ် ပကဘၣ်မၤမုာ်ထီၣ်အသး ဒီးမၤစၢၤအီၤလီၤ.—၁ သ့းစၤလနံ ၅:၁၄.
၆-၇. ဘၣ်မနုၤအဃိ ပတဲသ့လၢ တၢ်မၤတရီတပါဖိသၣ်န့ၣ် မ့ၢ်တၢ်ကမၣ်လၢ အမၤဘၣ်ဒိ တၢ်အိၣ်ဖှိၣ် ဒီးအထီဒါပဒိၣ်ပပှၢ်လဲၣ်.
၆ တၢ်မၤတရီတပါဖိသၣ်န့ၣ် မ့ၢ်တၢ်ကမၣ်လၢ အမၤဘၣ်ဒိ တၢ်အိၣ်ဖှိၣ်လီၤ. ပှၤလၢတၢ်အိၣ်ဖှိၣ်ပူၤတဂၤဂၤ မ့ၢ်မၤတရီတပါဖိသၣ်န့ၣ် ကမၤဘၣ်ဒိ တၢ်အိၣ်ဖှိၣ်အမံၤလီၤ. (မးသဲ ၅:၁၆; ၁ ပ့းတရူး ၂:၁၂) ဒီးမၤဘၣ်ဒိ ခရံာ်ဖိလၢအအိၣ်ဒီးတၢ်သးတီ လၢအကကွဲၢ်လၢအ “ဂုာ်ကျဲးစၢးဒုးတၢ်လၢ တၢ်နာ်” တဖၣ်အဃိ အဝဲအတၢ်မၤတဖၣ်န့ၣ် မ့ၢ်တၢ်လၢ အတတီတလိၤဘၣ်န့ၣ်လီၤ. (ယူဒၤ ၃) ပတဟ့ၣ်အခွဲးလၢ ပှၤလၢအမၤအၢမၤသီတၢ်လၢ တပီၢ်ယၢ်လီၤက့ၤအသးတဖၣ် ဒီးပှၤလၢအမၤဘၣ်ဒိ တၢ်အိၣ်ဖှိၣ်အမံၤတဖၣ် ကအိၣ်လၢ တၢ်အိၣ်ဖှိၣ်အပူၤဘၣ်.
၇ တၢ်မၤတရီတပါဖိသၣ်န့ၣ် မ့ၢ်တၢ်ကမၣ်လၢ အထီဒါ ပဒိၣ်ပပှၢ်လီၤ. ခရံာ်ဖိတဖၣ်ကဘၣ် “ပာ်အသးလၢ တၢ်စိတၢ်ကမီၤ အဒိၣ်တဖၣ်အဖီလာ်” လီၤ. (ရိမ့ၤ ၁၃:၁) ပပာ်ဖျါထီၣ်လၢ ပဒိးပၢပသးလၢ အဝဲသ့ၣ်အဖီလာ်သ့ခီဖျိ ပပာ်ကဲဒီးမၤထွဲ ထံကီၢ်အတၢ်သိၣ်တၢ်သီလီၤ. ပှၤလၢတၢ်အိၣ်ဖှိၣ်ပူၤတဂၤဂၤ မ့ၢ်မၤကမၣ်ဘၣ် ထံကီၢ်အတၢ်သိၣ်တၢ်သီ ဒ်သိးဒီး တၢ်မၤတရီတပါဖိသၣ်န့ၣ် မ့ၢ်ဒၣ်အထီဒါဝဲ ပဒိၣ်ပပှၢ်တဖၣ်လီၤ. (ထိၣ်သတြီၤဒီး မၤတၢ် ၂၅:၈.) တၢ်အိၣ်ဖှိၣ်သးပှၢ်တဖၣ်န့ၣ် တအိၣ်ဒီးတၢ်စိတၢ်ကမီၤလၢ ကစံၣ်ညီၣ် ပှၤလၢအမၤကမၣ် ထံကီၢ်အတၢ်သိၣ်တၢ်သီန့ၣ်ဘၣ်. ဘၣ်ဆၣ် အဝဲသ့ၣ် တဒီသဒၢဝဲ ပှၤလၢအမၤတရီတပါဖိသၣ်တဖၣ် လၢပဒိၣ်အတၢ်စံၣ်ညီၣ်န့ၣ်ဘၣ်. (ရိမ့ၤ ၁၃:၄) ပှၤလၢအမၤကမၣ်တၢ်တဂၤ ကဘၣ်တူၢ်ဝဲ တၢ်လၢအဟဲပိာ်ထွဲထီၣ်အသးခီဖျိ တၢ်လၢအမၤဝဲတဖၣ်အဃိလီၤ.—ကလၤတံ ၆:၇.
၈. ဖဲပှၤတဂၤ မၤကမၣ်ပှၤအဂၤတဂၤအခါ ယဟိဝၤယွၤ တူၢ်ဘၣ်ဝဲဒ်လဲၣ်.
၈ လီၤဆီဒၣ်တၢ် တၢ်မၤတရီတပါဖိသၣ်န့ၣ် မ့ၢ်တၢ်မၤကမၣ် ကစၢ်ယွၤလီၤ. (စံးထီၣ်ပတြၢၤ ၅၁:၄) ဖဲပှၤတဂၤ မၤကမၣ် ပှၤအဂၤတဂၤအခါ မ့ၢ်ဒၣ်အဝဲမၤကမၣ် ယဟိဝၤယွၤစ့ၢ်ကီးလီၤ. ဆိကမိၣ်ကွၢ် တၢ်သိၣ်တၢ်သီလၢ ကစၢ်ယွၤဟ့ၣ်လီၤဝဲ ပှၤအံၣ်စရ့လးဖိတဖၣ်န့ၣ်တက့ၢ်. စီၤမိၤၡ့ အတၢ်သိၣ်တၢ်သီ ပာ်ဖျါထီၣ်ဝဲလၢ ပှၤတဂၤမ့ၢ်ဟုၣ်န့ၢ် မ့တမ့ၢ် လံၣ်အီၣ်လီအီၣ် ပှၤလၢအခိၣ်အဃၢၤတဖၣ်န့ၣ် မ့ၢ်အ “မၤတၢ်ဒဲးဘး ဒီးမၤကမၣ်ယွၤ” လီၤ. (၃ မိၤၡ့ ၆:၂-၄) ဒ်န့ၣ်အသိး ပှၤလၢတၢ်အိၣ်ဖှိၣ်ပူၤတဂၤဂၤ မ့ၢ်မၤတရီတပါဖိသၣ်န့ၣ် လီၤဂာ်ဒ် အဟုၣ်န့ၢ်ဝဲ ပှၤဖိသၣ်အတၢ်ဘံၣ်တၢ်ဘၢအဃိ ကစၢ်ယွၤထံၣ်ဝဲလၢ အမ့ၢ်တၢ်လၢ အတတီတလိၤဘၣ်လီၤ. ဒီးပှၤလၢ အမၤဝဲဒ်အံၤန့ၣ် မၤဘၣ်ဒိ ယဟိဝၤယွၤအမံၤဒိၣ်မးလီၤ. လၢတၢ်န့ၣ်အဃိ တၢ်မၤတရီတပါဖိသၣ်န့ၣ် မ့ၢ်တၢ်မၤကမၣ်ကစၢ်ယွၤ ဖးဒိၣ်လီၤ.
၉. လၢအပူၤကွံာ်အနံၣ်အါမး ဒီးတုၤခဲအံၤန့ၣ် ယဟိဝၤယွၤ အတၢ်ကရၢကရိ ပာ်ဖျါထီၣ်ဝဲ လံာ်စီဆှံအတၢ်ဟ့ၣ်ကူၣ်အါမး လၢအဘၣ်ဃးဒီး တၢ်ဂ့ၢ်မနုၤလဲၣ် ဒီးဘၣ်မနုၤအဃိလဲၣ်.
၉ လၢအပူၤကွံာ် အနံၣ်တဖၣ် ဒီးတုၤခဲအံၤန့ၣ် ပတၢ်ကရၢကရိ ပာ်ဖျါထီၣ်ဝဲ လံာ်စီဆှံအတၢ်ဟ့ၣ်ကူၣ်အါမး လၢအဘၣ်ဃးဒီး တၢ်မၤတရီတပါ
ဖိသၣ်န့ၣ်လီၤ. အဒိ တၢးထီခိးတၢ် ဒီး ပၢၢ်ထီၣ် (Awake!) ပာ်ဖျါထီၣ်ဝဲ တၢ်ဂ့ၢ်လၢအဘၣ်ဃးဒီး ပှၤလၢအဘၣ်တၢ်မၤတရီတပါအီၤတဖၣ် လဲၤခီဖျိဝဲ အတၢ်သူၣ်အုးသးအုး ကသ့ဒ်လဲၣ်, ပှၤဂၤတဖၣ် မၤစၢၤအီၤဒီးဟ့ၣ်ဂံၢ်ဟ့ၣ်ဘါအီၤ ကသ့ဒ်လဲၣ် ဒီးမိၢ်ပၢ်တဖၣ် ဒီသဒၢအဖိတဖၣ် ကသ့ဒ်လဲၣ်န့ၣ်လီၤ. ဖဲပှၤတဂၤ မၤတရီတပါဖိသၣ်အခါ တၢ်အိၣ်ဖှိၣ်သးပှၢ်တဖၣ် ကဘၣ်မၤဝဲဒ်လဲၣ်န့ၣ် ပတၢ်ကရၢကရိ သိၣ်လိပာ်စၢၤဝဲ တၢ်အိၣ်ဖှိၣ်သးပှၢ်တဖၣ် လၢလံာ်စီဆှံအပူၤလီၤ. တကးဒံးဘၣ် ကျဲလၢတၢ်အိၣ်ဖှိၣ်သးပှၢ်တဖၣ် မၤဘၣ်ထီၣ်က့ၤ တၢ်ဂ့ၢ်ကီဒ်အံၤတဖၣ်န့ၣ် ပတၢ်ကရၢကရိ အဲၣ်ဒိးလၢ အကလီၤပလိာ်ဒီး ခရံာ်အတၢ်သိၣ်တၢ်သီအဃိ ပတၢ်ကရၢကရိ က့ၤကွၢ်ကဒါက့ၤဝဲ တၢ်ဟံးစုနဲၣ်ကျဲလၢ ဘၣ်ဃးဒီး တၢ်ဂ့ၢ်တဖၣ်အံၤ ထီဘိလီၤ. ဒီးတဘျီတခီၣ်န့ၣ် ပတၢ်ကရၢကရိ ကမၤဂ့ၤထီၣ် တၢ်ဟံးစုနဲၣ်ကျဲလီၤ.ဖဲပှၤတဂၤ မၤတၢ်ကမၣ်ဖးဒိၣ်အခါ တၢ်အိၣ်ဖှိၣ်သးပှၢ်တဖၣ် မၤဝဲဒ်လဲၣ်
၁၀-၁၂. (က) ဖဲတၢ်အိၣ်ဖှိၣ်သးပှၢ်တဖၣ် ရဲၣ်ကျဲၤဝဲတၢ်ဂ့ၢ်တဖၣ် လၢဘၣ်ဃးဒီး ပှၤမၤတၢ်ကမၣ်ဖးဒိၣ်အခါ အဝဲသ့ၣ် ကဘၣ်သ့ၣ်နီၣ်ထီၣ် တၢ်မနုၤလဲၣ် ဒီးအဝဲသ့ၣ် အတၢ်တိာ်ပာ်န့ၣ် မ့ၢ်မနုၤလဲၣ်. (ခ) ဒ် ယၤကိာ် ၅:၁၄, ၁၅ ပာ်ဖျါထီၣ်ဝဲအသိး တၢ်အိၣ်ဖှိၣ်သးပှၢ်တဖၣ် ကဂုာ်ကျဲးစၢးမၤဝဲ တၢ်မနုၤလဲၣ်.
၁၀ ဖဲတၢ်အိၣ်ဖှိၣ်သးပှၢ်တဖၣ် ရဲၣ်ကျဲၤဝဲတၢ်ဂ့ၢ်တဖၣ် လၢဘၣ်ဃးဒီး ပှၤမၤတၢ်ကမၣ်ဖးဒိၣ်အခါ ထီဘိန့ၣ်အဝဲသ့ၣ် ကဘၣ်သ့ၣ်နီၣ်ထီၣ်လၢ ခရံာ်အတၢ်သိၣ်တၢ်သီအဲၣ်ဒိးလၢ အဝဲသ့ၣ်ရ့ဒီး သိတဖၣ်လၢ တၢ်အဲၣ်တၢ်ကွံအပူၤ, မၤတၢ်လၢအဘၣ် ဒီးမၤအီၤတီတီလိၤလိၤလၢ ယွၤအမဲာ်ညါလီၤ. လၢတၢ်န့ၣ်အဃိ ဖဲပှၤတဲဘၣ် အဝဲသ့ၣ်လၢ ပှၤတဂၤမၤတရီတပါဖိသၣ်အခါ အဝဲသ့ၣ် ဘၣ်ဆိကမိၣ်ထံ တၢ်ဂ့ၢ်အါမံၤ ဒီးဆိကမိၣ်ထံအီၤ လီၤတံၢ်လီၤဆဲးလီၤ. တၢ်အိၣ်ဖှိၣ်သးပှၢ်တဖၣ် အမူဒါလၢအရ့ဒိၣ်ကတၢၢ်န့ၣ် မ့ၢ်ဝဲအဝဲသ့ၣ် ကမၤလၤကပီၤ ယဟိဝၤယွၤ ဒီးဒီသဒၢကစၢ်ယွၤ အမံၤဂ့ၤသၣ်ဂ့ၤန့ၣ်လီၤ. (၃ မိၤၡ့ ၂၂:၃၁, ၃၂; မးသဲ ၆:၉) ဒီးတၢ်အိၣ်ဖှိၣ်သးပှၢ် အမူဒါအရ့ဒိၣ်လၢ အဂၤတမံၤန့ၣ် မ့ၢ်ဒ်သိးကမၤစၢၤဝဲ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤတဖၣ် ဒ်သိးအကအိၣ်ဘူးဒီးယဟိဝၤယွၤ ဒီးကဟ့ၣ်ဂံၢ်ဟ့ၣ်ဘါ ဒီးမၤစၢၤဝဲ ပှၤလၢအဘၣ် တၢ်မၤကမၣ်အီၤတဖၣ်န့ၣ်လီၤ.
၁၁ ပှၤလၢအမၤ တၢ်ကမၣ်ဖးဒိၣ်တဂၤ မ့မ့ၢ်ပှၤတဂၤဂၤလၢ တၢ်အိၣ်ဖှိၣ်အပူၤန့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ဂုာ်ကျဲးစၢး ဃုသ့ၣ်ညါဝဲလၢ ပှၤတဂၤအံၤ မ့ၢ်အပီၢ်ယၢ်လီၤက့ၤအသးဧါ, ဒီးအဝဲ မ့ၢ်ပီၢ်ယၢ်လီၤက့ၤအသးန့ၣ် တၢ်အိၣ်ဖှိၣ်သးပှၢ်တဖၣ် ကမၤစၢၤအီၤ ဒ်သိးအတၢ်ရ့လိာ်သးဒီး ယဟိဝၤယွၤ ကဂ့ၤထီၣ်အဂီၢ်လီၤ. (ဖး ယၤကိာ် ၅:၁၄, ၁၅ တက့ၢ်.) ခရံာ်ဖိတဂၤလၢ အမၤတၢ်ကမၣ်ဖးဒိၣ်ခီဖျိ အမၤလၢပှဲၤ အတၢ်မိၣ်န့ၢ်သးလီလၢ အတဂ့ၤန့ၣ် လီၤဂာ်ဒ် ပှၤလၢအအိၣ်တဆူၣ်ဘၣ်တဂၤလီၤ. အခီပညီမ့ၢ်ဝဲ အဝဲအတၢ်ရ့လိာ်သးဒီးယဟိဝၤယွၤ တဂ့ၤလၢၤဘၣ်. * တၢ်အိၣ်ဖှိၣ်သးပှၢ်တဖၣ်န့ၣ် လီၤဂာ်ဒ် ကသံၣ်သရၣ်လၢ နီၢ်သးတခီလီၤ. အဝဲသ့ၣ် ကဂုာ်ကျဲးစၢး “အုၣ်က့ၤခီၣ်က့ၤ ပှၤဆါ [လၢတၢ်အဒိအံၤအပူၤ, ပှၤမၤကမၣ်တၢ်]” လီၤ. အဝဲသ့ၣ် ကသူဝဲလံာ်စီဆှံ အတၢ်ဟ့ၣ်ကူၣ်တဖၣ် ဒီးကမၤစၢၤဝဲ ပှၤလၢအမၤ တၢ်ကမၣ်ဖးဒိၣ်တဖၣ် ဒ်သိးအဝဲသ့ၣ် အတၢ်ရ့လိာ်သးဒီးယွၤ ကဂ့ၤထီၣ်အဂီၢ်လီၤ. ဘၣ်ဆၣ် အဝဲသ့ၣ် မ့ၢ်ပီၢ်ယၢ်လီၤက့ၤအသး အနီၢ်ကီၢ်မး အတၢ်ရ့လိာ်သး ဒီးယွၤ ဂ့ၤထီၣ်က့ၤဝဲ ကသ့လီၤ.—မၤတၢ် ၃:၁၉; ၂ ကရံၣ်သူး ၂:၅-၁၀.
၁၂ ပထံၣ်ဘၣ်လၢ တၢ်အိၣ်ဖှိၣ်သးပှၢ်တဖၣ် အိၣ်ဒီးမူဒါဖးဒိၣ်လီၤ. မ့ၢ်လၢကစၢ်ယွၤ ဟ့ၣ်လီၤအဝဲသ့ၣ်မူဒါလၢ ကကွၢ်ထွဲ ကစၢ်ယွၤအခ့အပှၤတဖၣ် လၢတၢ်အဲၣ်တၢ်ကွံ ဒီးတၢ်တီတၢ်လိၤအပူၤအဃိ အဝဲသ့ၣ် အဲၣ်ဝဲတၢ်အိၣ်ဖှိၣ်ဖိတဖၣ် ဒိၣ်မးလီၤ. (၁ ပ့းတရူး ၅:၁-၃) အဝဲသ့ၣ် အဲၣ်ဒိးလၢ ဒီပုၢ်ဝဲၢ်တဖၣ် ကတူၢ်ဘၣ်ဝဲလၢ အအိၣ်ဒီးတၢ်ဒီသဒၢ လၢတၢ်အိၣ်ဖှိၣ်အပူၤလီၤ. လၢတၢ်န့ၣ်အဃိ ဖဲပှၤတဲဘၣ်အဝဲသ့ၣ်လၢ ပှၤတဂၤမၤတၢ်ကမၣ်ဖးဒိၣ် ဒ်သိးဒီး တၢ်မၤတရီတပါဖိသၣ်အခါ အဝဲသ့ၣ် ရဲၣ်ကျဲၤတၢ်ချ့ချ့လီၤ. ဆိကမိၣ်ထံ တၢ်သံကွၢ်လၢ လံာ်အဆၢ ၁၃, ၁၅ ဒီး ၁၇ အခီၣ်ထံး ပာ်ဖျါထီၣ်ဝဲန့ၣ်တက့ၢ်.
၁၃-၁၄. ဖဲပှၤတဂၤဂၤတဲဝဲလၢ ပှၤတဂၤမၤတရီတပါဖိသၣ်အခါ တၢ်အိၣ်ဖှိၣ်သးပှၢ်တဖၣ် ကဘၣ်မၤထွဲဝဲ ပဒိၣ်အတၢ်သိၣ်တၢ်သီလၢ ဘၣ်ဃးဒီး ပှၤကဘၣ်တီၣ်ထီၣ်တၢ်ဂ့ၢ်လၢ ပဒိၣ်ပပှၢ်တဖၣ် အအိၣ်ဧါ. တဲဖျါထီၣ်တက့ၢ်.
၁၃ ဖဲပှၤတဂၤဂၤတဲဝဲလၢ ပှၤတဂၤမၤတရီတပါ ဖိသၣ်အခါ ထံကီၢ်အတၢ်သိၣ်တၢ်သီ မ့ၢ်အိၣ်လၢ ပှၤကဘၣ်တီၣ်ထီၣ်တၢ်ဂ့ၢ်လၢ ပဒိၣ်ပပှၢ်တဖၣ် အအိၣ်န့ၣ် မ့ၢ်ပမၤထွဲ တၢ်သိၣ်တၢ်သီအံၤဧါ. ပမၤထွဲဝဲလီၤ. လၢထံကီၢ်တနီၤန့ၣ် တၢ်သိၣ်တၢ်သီအိၣ်လၢ ပှၤမ့ၢ်နၢ်ဟူလၢ ဖိသၣ်တဂၤ ဘၣ်တၢ်မၤတရီတပါအီၤန့ၣ် ပှၤကဘၣ်တဲဘၣ် ပဒိၣ်ပပှၢ်တဖၣ်လီၤ. တၢ်အိၣ်ဖှိၣ်သးပှၢ်လၢ အအိၣ်လၢ ထံကီၢ်ဒ်န့ၣ်တဖၣ်န့ၣ် ဘၣ်မၤထွဲဝဲတၢ်သိၣ်တၢ်သီအံၤလီၤ. (ရိမ့ၤ ၁၃:၁) ဒီးတၢ်သိၣ်တၢ်သီဒ်အံၤတဖၣ်န့ၣ် တထီဒါလိာ်အသးဒီး ကစၢ်ယွၤအတၢ်သိၣ်တၢ်သီဘၣ်. (မၤတၢ် ၅:၂၈, ၂၉) ဖဲပှၤတဂၤဂၤတဲဘၣ် တၢ်အိၣ်ဖှိၣ်သးပှၢ်တဖၣ်လၢ ဘၣ်သ့ၣ်သ့ၣ် ပှၤဖိသၣ်တဂၤ ဘၣ်တၢ်မၤတရီတပါအီၤအခါ တၢ်အိၣ်ဖှိၣ်သးပှၢ်တဖၣ် ကဆဲးကျိးဒီးဝဲၤတြၢ် တဘျီဃီ ဒီးကသံကွၢ်ဝဲဘၣ်ဃးဒီး အဝဲသ့ၣ် ကဘၣ်မၤထွဲဝဲ ပဒိၣ်အတၢ်သိၣ်တၢ်သီဒ်လဲၣ်န့ၣ်လီၤ.
၁၄ ဖဲတၢ်အိၣ်ဖှိၣ်သးပှၢ်တဖၣ် တဲတၢ်ဒီး ပှၤလၢအဘၣ်တၢ်မၤတရီတပါအီၤ ဒီးအမိၢ်အပၢ် မ့တမ့ၢ် ပှၤလၢအသ့ၣ်ညါဝဲလၢ ဘၣ်သ့ၣ်သ့ၣ် ဖိသၣ်တဂၤအံၤ ဘၣ်တၢ်မၤတရီတပါအီၤအခါ တၢ်အိၣ်ဖှိၣ်သးပှၢ်တဖၣ် ကဒုးသ့ၣ်နီၣ်ထီၣ် အဝဲသ့ၣ်လၢ အဝဲသ့ၣ် အိၣ်ဒီးတၢ်ခွဲးတၢ်ယာ်လၢ ကတီၣ်ထီၣ်တၢ်ဂ့ၢ်လၢ ပဒိၣ်ပပှၢ်တဖၣ်အအိၣ်လီၤ. ဘၣ်ဆၣ် ပှၤလၢအမၤတရီတပါတၢ်တဂၤ မ့မ့ၢ်ဘၣ်ဖုး ပှၤတဂၤဂၤလၢ တၢ်အိၣ်ဖှိၣ်အပူၤ ဒီးပမ့ၢ်တီၣ်ထီၣ်တၢ်ဂ့ၢ်လၢ ပဒိၣ်ပပှၢ်အအိၣ်န့ၣ် လၢခံပှၤအါဂၤ ကသ့ၣ်ညါထီၣ်ဝဲအဃိ ပကြၢးမၤဒ်လဲၣ်. မ့ၢ်ခရံာ်ဖိလၢ အတီၣ်ထီၣ်တၢ်ဂ့ၢ်တဂၤ ကြၢးဆိကမိၣ်ဝဲလၢ ကစၢ်ယွၤအမံၤ ကဘၣ်တၢ်ဒုၣ်ဒွဲၣ်စံးအၢအီၤ ခီဖျိလၢ အတီၣ်ထီၣ်တၢ်ဂ့ၢ်အဃိဧါ. အဝဲတကြၢး ဆိကမိၣ်ဝဲဒ်န့ၣ်ဘၣ်. နီၢ်ကီၢ်န့ၣ် ပှၤလၢအမၤဘၣ်ဒိ ကစၢ်ယွၤအမံၤန့ၣ် မ့ၢ်ဝဲပှၤလၢ အမၤတရီတပါဖိသၣ်လီၤ.
၁၅-၁၆. (က) ဒ် ၁ တံၤမသ့း ၅:၁၉ ပာ်ဖျါထီၣ်ဝဲအသိး တချုးလၢ တၢ်အိၣ်ဖှိၣ်သးပှၢ်တဖၣ် မၤဝဲတၢ်စံၣ်ညီၣ် ကမံးတံာ်ဒံးဘၣ်န့ၣ် ဘၣ်မနုၤအဃိ အဝဲသ့ၣ် လိၣ်ဘၣ်ပှၤအုၣ်အသး ခံဂၤလဲၣ်. (ခ) ဖဲတၢ်အိၣ်ဖှိၣ်သးပှၢ်တဖၣ် နၢ်ဟူဘၣ်ဝဲလၢ ပှၤတဂၤဂၤတဲဝဲလၢ ပှၤလၢတၢ်အိၣ်ဖှိၣ်အပူၤတဂၤဂၤ မၤတရီတပါဖိသၣ်အခါ အဝဲသ့ၣ် ကမၤဝဲတၢ်မနုၤလဲၣ်.
၁၅ မ့မ့ၢ်လၢ တၢ်အိၣ်ဖှိၣ်အပူၤန့ၣ် တချုးလၢ တၢ်အိၣ်ဖှိၣ်သးပှၢ်တဖၣ် မၤဝဲတၢ်စံၣ်ညီၣ်ကမံးတံာ်ဒံးဘၣ်န့ၣ် ဘၣ်မနုၤအဃိ အဝဲသ့ၣ် ကဘၣ်အိၣ်ဒီး ပှၤအုၣ်အသး ခံဂၤန့ၣ်လဲၣ်. လံာ်စီဆှံပာ်ဖျါထီၣ်ဝဲလၢ အဝဲသ့ၣ်မ့ၢ်အိၣ်ဒီးပှၤအုၣ်အသး အစှၤကတၢၢ်ခံဂၤမး အတၢ်စံၣ်ညီၣ်န့ၣ် ကမ့ၢ်တၢ်လၢ အတီအလိၤလီၤ. လၢတၢ်န့ၣ်အဃိ ဖဲပှၤတဂၤ ဘၣ်တၢ်ပာ်တၢ်ကမၣ်လၢအလိၤ လၢအဝဲမၤတၢ်ကမၣ်ဖးဒိၣ်အခါ အဝဲမ့ၢ်တဲဝဲလၢ အတမၤဘၣ်န့ၣ် တချုးလၢ တၢ်အိၣ်ဖှိၣ်သးပှၢ်တဖၣ် မၤဝဲတၢ်စံၣ်ညီၣ်ကမံးတံာ်ဒံးဘၣ်န့ၣ် ပှၤအုၣ်အသးကဘၣ်အိၣ်ဝဲ ခံဂၤလီၤ. (၅ မိၤၡ့ ၁၉:၁၅; မးသဲ ၁၈:၁၆; ဖး ၁ တံၤမသ့း ၅:၁၉ တက့ၢ်.) ဘၣ်ဆၣ် မ့ၢ်အခီပညီအိၣ်စ့ၢ်ကီးလၢ ဖဲပှၤတဂၤ ဘၣ်တၢ်ပာ်တၢ်ကမၣ်လၢအလိၤ လၢအဝဲမၤတရီတပါဖိသၣ်အခါ တချုးပှၤတီၣ်ထီၣ်တၢ်ဂ့ၢ်လၢ ပဒိၣ်ပပှၢ်တဖၣ်အအိၣ်ဒံးဘၣ်န့ၣ် ပှၤကဘၣ်အိၣ်ဒီး ပှၤအုၣ်အသးခံဂၤန့ၣ်ဧါ. တမ့ၢ်ဒ်န့ၣ်ဘၣ်. တၢ်သိၣ်တၢ်သီတခါအံၤန့ၣ် တဘၣ်ထွဲလိာ်အသးဒီး တၢ်အိၣ်ဖှိၣ်သးပှၢ် မ့တမ့ၢ် ပှၤဂၤလၢ အကတီၣ်ထီၣ်တၢ်ဂ့ၢ်လၢ အဘၣ်ဃးဒီး ပှၤမၤကမၣ်ပဒိၣ်အတၢ်သိၣ်တၢ်သီ န့ၣ်ဘၣ်.
၁၆ ဖဲတၢ်အိၣ်ဖှိၣ်သးပှၢ် နၢ်ဟူဘၣ်လၢ ပှၤတဂၤဂၤတဲဝဲလၢ ပှၤလၢတၢ်အိၣ်ဖှိၣ်အပူၤတဂၤဂၤ မၤတရီတပါဖိသၣ်အခါ အဝဲသ့ၣ် ကဂုာ်ကျဲးစၢးမၤထွဲ ပဒိၣ်အတၢ်သိၣ်တၢ်သီ လၢအဘၣ်ဃးဒီး ပှၤတီၣ်ထီၣ်တၢ်ဂ့ၢ်တၢ်ကျိၤလီၤ. ဒီးအဝဲသ့ၣ် ကဂုာ်ကျဲးစၢး ဃုသ့ၣ်ညါဝဲ တၢ်မၤအသးတဖၣ် လီၤတံၢ်လီၤဆဲး ဒီးဒ်လံာ်စီဆှံ အတၢ်သိၣ်တၢ်သီအိၣ်ဝဲအသိး အဝဲသ့ၣ် မ့ၢ်ဘၣ်မၤ တၢ်စံၣ်ညီၣ်ကမံးတံာ်န့ၣ် ကမၤဝဲလီၤ. အဆိကတၢၢ်န့ၣ် တၢ်အိၣ်ဖှိၣ်သးပှၢ်တဖၣ် ကသံကွၢ်ပှၤတဂၤအံၤ ဒီးအဝဲမ့ၢ်တဲဝဲလၢ အတမၤကမၣ်တၢ်ဘၣ်န့ၣ် တၢ်အိၣ်ဖှိၣ်သးပှၢ်တဖၣ် ကသံကွၢ်ဝဲ ပှၤလၢအသ့ၣ်ညါဝဲ တၢ်ကဲထီၣ်အသးတဖၣ်န့ၣ်လီၤ. ပှၤလၢအကပာ်ဂၢၢ်ပာ်ကျၢၤဝဲ တၢ်ဂ့ၢ်တၢ်ကျိၤ မ့ၢ်အိၣ်ခံဂၤန့ၣ် တၢ်အိၣ်ဖှိၣ်သးပှၢ်တဖၣ် ကမၤဝဲ တၢ်စံၣ်ညီၣ်ကမံးတံာ်လီၤ. * အဒိ ပှၤလၢအတဲဘၣ် တၢ်အိၣ်ဖှိၣ်သးပှၢ်လၢ တၢ်ဂ့ၢ်တၢ်ကျိၤ ဒီးပှၤအုၣ်အသး မ့ၢ်အိၣ်အါထီၣ်ဒံးတဂၤလၢ အတဲဝဲလၢ ပှၤတဂၤအံၤ မၤတရီတပါပှၤဖိသၣ်တဂၤအံၤ မ့တမ့ၢ် လၢအပူၤကွံာ်တဘျီ အဝဲမၤတရီတပါ ဖိသၣ်လၢအဂၤတဂၤန့ၣ် ပှၤကမၤ တၢ်စံၣ်ညီၣ်ကမံးတံာ်လီၤ. ဒီးပှၤအုၣ်အသး အဂၤတဂၤလၢ အကပာ်ဂၢၢ်ပာ်ကျၢၤဝဲ တၢ်ဂ့ၢ်တၢ်ကျိၤအံၤ မ့ၢ်တအိၣ်ဘၣ်သနာ်က့ အခီပညီတမ့ၢ်လၢ ပှၤတဂၤအံၤ တမၤကမၣ်တၢ်ဘၣ်န့ၣ်ဘၣ်. တၢ်အိၣ်ဖှိၣ်သးပှၢ်တဖၣ် ကသ့ၣ်ညါဝဲလၢ ဘၣ်သ့ၣ်သ့ၣ် ပှၤတဂၤအံၤ အကမၤဘၣ် တၢ်တမံၤမံၤလၢ အမၤဘၣ်ဒိပှၤဂၤ နးမးလီၤ. တကးဒံးဘၣ် ဒ်သိးတၢ်အိၣ်ဖှိၣ်သးပှၢ်တဖၣ် ကဒီသဒၢ တၢ်အိၣ်ဖှိၣ်အဂီၢ် ထီဘိန့ၣ် အဝဲသ့ၣ် ကပလီၢ်အသး ဘၣ်ဃးဒီး ပှၤလၢဘၣ်သ့ၣ်သ့ၣ် အမၤတရီတပါတ့ၢ် ဖိသၣ်န့ၣ်လီၤ.—မၤတၢ် ၂၀:၂၈.
၁၇-၁၈. တၢ်စံၣ်ညီၣ်ကမံးတံာ် အမူဒါမ့ၢ်မနုၤလဲၣ်န့ၣ် တဲဖျါထီၣ်တက့ၢ်.
၁၇ တၢ်စံၣ်ညီၣ်ကမံးတံာ်န့ၣ် အမူဒါမ့ၢ်မနုၤလဲၣ်. အဝဲသ့ၣ် ဆၢတဲာ်တၢ် ဘၣ်ဃးဒီး ပှၤလၢအမၤကမၣ်တၢ်တဂၤ ဆဲးအိၣ်လၢ တၢ်အိၣ်ဖှိၣ်အပူၤသ့ဧါ မ့တမ့ၢ် တသ့လၢၤဧါန့ၣ်လီၤ. အဝဲသ့ၣ်တဆၢတဲာ်ဝဲလၢ ပှၤလၢအမၤတရီတပါဖိသၣ်တဂၤ ကြၢးဘၣ်တၢ်စံၣ်ညီၣ်အီၤ ခီဖျိလၢ အမၤကမၣ် ပဒိၣ်အတၢ်သိၣ်တၢ်သီအဃိန့ၣ်ဘၣ်. အဝဲသ့ၣ်ပျဲဝဲလၢ ပဒိၣ်တဖၣ် ကဆၢတဲာ်ဝဲလၢ ပှၤလၢအမၤကမၣ် ထံကီၢ်အတၢ်သိၣ်တၢ်သီတဂၤ ကြၢးဘၣ်တၢ်စံၣ်ညီၣ်အီၤဒ်လဲၣ်န့ၣ်လီၤ.—ရိမ့ၤ ၁၃:၂-၄; တံတူး ၃:၁.
၁၈ ဖဲတၢ်အိၣ်ဖှိၣ်သးပှၢ်တဖၣ် မၤဝဲတၢ်စံၣ်ညီၣ်ကမံးတံာ်အခါ အဝဲသ့ၣ်အမူဒါန့ၣ် ဘၣ်ဃးထဲလၢ နီၢ်သးတခီ မ့တမ့ၢ် လၢတၢ်ဘူၣ်တၢ်ဘါတခီလီၤ. အဝဲသ့ၣ် သူဝဲလံာ်စီဆှံအတၢ်ဟံးစုနဲၣ်ကျဲ ဒ်သိးကဆၢတဲာ်ဝဲလၢ ပှၤလၢအမၤတရီတပါတၢ်တဂၤ ပီၢ်ယၢ်လီၤအသးဧါ, တပီၢ်ယၢ်လီၤအသးဧါန့ၣ်လီၤ. ဒီးအဝဲ မ့ၢ်တပီၢ်ယၢ်လီၤအသးဘၣ်န့ၣ် အဝဲကဘၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤ ဒီးပှၤကဒုးသ့ၣ်ညါ တၢ်အိၣ်ဖှိၣ်ဖိတဖၣ်လၢ ပှၤတဂၤအံၤ တကဲယဟိဝၤပှၤအုၣ်အသးလၢၤဘၣ်န့ၣ်လီၤ. (၁ ကရံၣ်သူး ၅:၁၁-၁၃) အဝဲမ့ၢ်ပီၢ်ယၢ်လီၤက့ၤအသးန့ၣ် ပှၤတဟီထီၣ်ကွံာ်အီၤ လၢတၢ်အိၣ်ဖှိၣ်အပူၤဘၣ်. ဘၣ်ဆၣ် တၢ်အိၣ်ဖှိၣ်သးပှၢ်တဖၣ် ကတဲဘၣ်အီၤလၢ လၢအနံၣ်အါမးအတီၢ်ပူၤ မ့တမ့ၢ် လၢအတၢ်အိၣ်မူဒီတစိၤန့ၣ် အဝဲတန့ၢ်ဘၣ်တၢ်ခွဲးတၢ်ယာ်လၢ တၢ်အိၣ်ဖှိၣ်အပူၤ နီတမံၤလၢၤဘၣ် ဒီးအဝဲဟံးထီၣ်မူဒါလၢ တၢ်အိၣ်ဖှိၣ်အပူၤ တန့ၢ်နီတခါလၢၤဘၣ်. ဒီးမ့ၢ်လၢ တၢ်အိၣ်ဖှိၣ်သးပှၢ် အဲၣ်ဒိးဒီသဒၢဖိသၣ်တဖၣ်အဃိ လၢတၢ်ခူသူၣ်အပူၤ အဝဲသ့ၣ် ကဟ့ၣ်ပလီၢ်ဝဲ ခရံာ်ဖိမိၢ်ပၢ်တဖၣ် လၢကအိၣ်ဒီး တၢ်ပလီၢ်ပဒီ ဖဲအဖိတဖၣ် အိၣ်ဘူးဒီး ပှၤတဂၤန့ၣ်အခါလီၤ. ဒီးဖဲအဝဲသ့ၣ် ဟ့ၣ်ပလီၢ်မိၢ်ပၢ်တဖၣ်အခါ ကဘၣ်ပလီၢ်အသး ဒ်သိးအသုတတဲဖျါထီၣ် ပှၤလၢအဘၣ် တၢ်မၤတရီတပါအီၤတဂၤန့ၣ် တဂ့ၤအဂီၢ်လီၤ.
နကဘၣ် ဒီသဒၢနဖိတဖၣ်ဒ်လဲၣ်
ဒ်သိးမိၢ်ပၢ်တဖၣ် ကဒီသဒၢအဖိ လၢတၢ်မၤတရီတပါအဂီၢ် အဝဲသ့ၣ် သူဝဲတၢ်ဂ့ၢ်တၢ်ကျိၤလၢ တၢ်ကရၢကရိ ထုးထီၣ်ဝဲတဖၣ် ဒီးဘၣ်ဃးဒီး တၢ်မံဃုာ်အိၣ်ဃုာ်အဂ့ၢ်လၢ အဖိတဖၣ်ကြၢးသ့ၣ်ညါဝဲန့ၣ် အဝဲသ့ၣ်တဲဘၣ်ဝဲ အဖိလီၤ. (ကွၢ်လံာ်အဆၢ ၁၉-၂၂ တက့ၢ်.)
၁၉-၂၂. ဒ်သိးမိၢ်ပၢ်တဖၣ် ကဒီသဒၢအဖိအဂီၢ် အဝဲသ့ၣ် ကဘၣ်မၤဝဲ တၢ်မနုၤလဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)
၁၉ မတၤတဖၣ် အိၣ်ဒီးမူဒါလၢ ကဒီသဒၢဝဲ ဖိသၣ်တဖၣ်လဲၣ်. မ့ၢ်ဝဲမိၢ်ပၢ်တဖၣ်လီၤ. * မိၢ်ပၢ်သ့ၣ်ဧၢ, နဖိတဖၣ်န့ၣ် “မ့ၢ်တၢ်န့ၢ်သါလၢယွၤ” ဟ့ၣ်လီၤနၤလီၤ. (စံးထီၣ်ပတြၢၤ ၁၂၇:၃) လၢတၢ်န့ၣ်အဃိ နအိၣ်ဒီးမူဒါလၢ နကဒီသဒၢ နဖိတဖၣ်လီၤ. နဒီသဒၢနဖိလၢ ပှၤလၢအမၤတရီတပါတၢ် အစုပူၤကသ့ဒ်လဲၣ်.
၂၀ အဆိကတၢၢ်န့ၣ် ဃုသ့ၣ်ညါအါထီၣ်တၢ်ဂ့ၢ် လၢဘၣ်ဃးဒီး ပှၤလၢအမၤတရီတပါတၢ် အဂ့ၢ်တက့ၢ်. ဃုသ့ၣ်ညါ ပှၤလၢအမၤတရီတပါဖိသၣ်န့ၣ် မ့ၢ်ပှၤဒ်လဲၣ် ဒီးဒ်သိးအဝဲသ့ၣ် ကကွဲန့ၢ်လွဲန့ၢ် ပှၤဖိသၣ်အဂီၢ် အဝဲသ့ၣ်သူဝဲ ကျဲဒ်လဲၣ်တဖၣ်လဲၣ်န့ၣ်တက့ၢ်. ပာ်သူၣ်ပာ်သး တၢ်အိၣ်အသး လၢအလီၤဘၣ်ယိၣ် ဒီးပှၤလၢအကဒုးအိၣ်ထီၣ် တၢ်ကီတၢ်ခဲ ဒ်အံၤတဖၣ်န့ၣ်တက့ၢ်. (ကတိၤဒိ ၂၂:၃; ၂၄:၃) ဒီးသ့ၣ်နီၣ်ထီၣ်လၢ ညီနုၢ်န့ၣ် ပှၤလၢအမၤတရီတပါဖိသၣ်န့ၣ် မ့ၢ်ဝဲပှၤလၢ ဖိသၣ်သ့ၣ်ညါပာ်စၢၤအီၤ ဒီးနာ်န့ၢ်အီၤလီၤ.
၂၁ ခံခါတခါန့ၣ် တဲတၢ်ဒီးနဖိတဖၣ်ပျီပျီ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကတဲတၢ်ဒီးနၤ ပျီပျီတက့ၢ်. (၅ မိၤၡ့ ၆:၆, ၇) နမ့ၢ်အဲၣ်ဒိးမၤဒ်န့ၣ်န့ၣ် ဖဲနဖိတဖၣ်တဲတၢ်အခါ နကဘၣ်ဒိကနၣ်န့ၢ် အဝဲသ့ၣ် လီၤတံၢ်လီၤဆဲးလီၤ. (ယၤကိာ် ၁:၁၉) သ့ၣ်နီၣ်ထီၣ်လၢ ညီနုၢ်န့ၣ် ဖိသၣ်လၢ အဘၣ်တၢ်မၤတရီတပါအီၤန့ၣ် တအဲၣ်ဒိးတဲဘၣ်ဝဲ ပှၤနီတဂၤဘၣ်. အဝဲသ့ၣ် မ့ၢ်တဲဝဲန့ၣ် ဘၣ်သ့ၣ်သ့ၣ် အဝဲသ့ၣ် ကဘၣ်ယိၣ်ဝဲလၢ ပှၤတနာ်အီၣ်အီၤဘၣ် မ့တမ့ၢ် ပှၤလၢအမၤတရီတပါအီၤတဂၤ ကတဲပျံၤတဲဖုးပာ်စၢၤအီၤ ဒ်သိးအသုတတဲဘၣ်ပှၤ နီတဂၤတဂ့ၤအဂီၢ်လီၤ. အဃိ နမ့ၢ်ဆိကမိၣ်လၢ နဖိတဖၣ် ဘၣ်တၢ်တမံၤမံၤန့ၣ် သံကွၢ်အဝဲသ့ၣ်လၢ တၢ်အဲၣ်တၢ်ကွံအပူၤ ဒီးအဝဲသ့ၣ် မ့ၢ်စံးဆၢနၤ ဒ်လဲၣ်ဂ့ၤဒ်လဲၣ်ဂ့ၤ ဒိကနၣ်လၢ တၢ်သူၣ်စူၤသးစူၤအပူၤတက့ၢ်.
၂၂ သၢခါတခါန့ၣ် သိၣ်လိနဖိတဖၣ်တက့ၢ်. ဘၣ်ဃးဒီး တၢ်မံဃုာ်အဂ့ၢ်န့ၣ် တဲဘၣ်အဝဲသ့ၣ်လၢ တၢ်လၢအကြၢး သ့ၣ်ညါဝဲတဖၣ်န့ၣ်တက့ၢ်. ဒီးနကြၢးတဲဘၣ်အဝဲသ့ၣ် တၢ်မနုၤလဲၣ်န့ၣ် ကဒိးသန့ၤထီၣ်အသးလၢ အဝဲသ့ၣ် အသးအနံၣ်အလါ ဒီးအတၢ်သ့ၣ်ညါနၢ်ပၢၢ် အဖီခိၣ်လီၤ. ဒီးသိၣ်လိနဖိတဖၣ်လၢ ပှၤမ့ၢ်အဲၣ်ဒိးဖီၣ်အဝဲသ့ၣ်လၢ ကျဲလၢအတကြၢးတဘၣ်န့ၣ် အဝဲသ့ၣ် ကဘၣ်မၤဝဲဒ်လဲၣ် ဒီးကဘၣ်တဲဝဲဒ်လဲၣ် န့ၣ်တက့ၢ်. ဒီးမၤထွဲတၢ်ကရၢကရိ အတၢ်ဟ့ၣ်ကူၣ်လၢ ဘၣ်ဃးဒီးနကဘၣ်ဒီသဒၢ နဖိတဖၣ် ဒ်လဲၣ်န့ၣ်တက့ၢ်.—ကွၢ်တၢ်လွံၢ်နၢၣ်လၢအမ့ၢ် “ ဃုသ့ၣ်ညါတၢ်ဂ့ၢ် ဒီးသိၣ်လိနဖိတက့ၢ်.”
၂၃. တၢ်မၤတရီတပါဖိသၣ်န့ၣ် ပထံၣ်အီၤဒ်လဲၣ် ဒီးလၢတၢ်မၤလိ လၢခံတခါန့ၣ် ပကတဲသကိး တၢ်သံကွၢ်မနုၤလဲၣ်.
၂၃ ဒ်ပမ့ၢ် ယဟိဝၤပှၤအုၣ်အသးတဖၣ်အသိး တၢ်မၤတရီတပါဖိသၣ်န့ၣ် ပထံၣ်အီၤဒ် တၢ်ကမၣ်ဖးဒိၣ် ဒီးအအၢအသီဒိၣ်မးလီၤ. ပတၢ်အိၣ်ဖှိၣ်လၢ အအိၣ်လၢ ခရံာ်အတၢ်သိၣ်တၢ်သီ အဖီလာ်န့ၣ် တဒီသဒၢဝဲ ပှၤလၢအမၤတရီတပါတၢ်တဂၤ လၢတၢ်စံၣ်ညီၣ်န့ၣ်ဘၣ်. ပဒီပုၢ်ဝဲၢ်တဂၤဂၤ မ့ၢ်ဘၣ်တၢ်မၤတရီတပါအီၤန့ၣ် ပမၤစၢၤအဝဲသ့ၣ် ကသ့ဒ်လဲၣ်. လၢတၢ်မၤလိ လၢခံတခါန့ၣ် ပကမၤလိဘၣ် တၢ်ဂ့ၢ်အံၤလီၤ.
တၢ်သးဝံၣ် ၁၀၃ ပှၤကွၢ်သိတဖၣ်—တၢ်ဘျုးတၢ်ဖှိၣ်လၢပှၤကညီ
^ လံာ်အဆၢ. 5 လၢတၢ်မၤလိအံၤအပူၤ ပကထံၣ်ဘၣ် တၢ်ဂ့ၢ်လၢ ဘၣ်ဃးဒီး ပဒီသဒၢဖိသၣ်တဖၣ်လၢ တၢ်မၤတရီတပါ ကသ့ဒ်လဲၣ်န့ၣ်လီၤ. ဒီးပကမၤလိဘၣ်လၢ တၢ်အိၣ်ဖှိၣ်သးပှၢ်တဖၣ် ဒီသဒၢတၢ်အိၣ်ဖှိၣ် ကသ့ဒ်လဲၣ် ဒီးမိၢ်ပၢ်တဖၣ် ဒီသဒၢအဖိတဖၣ် ကသ့ဒ်လဲၣ်န့ၣ်လီၤ.
^ လံာ်အဆၢ. 3 တၢ်ကတိၤအခီပညီ– တၢ်မၤတရီတပါဖိသၣ်န့ၣ်မ့ၢ်ဝဲ ပှၤလၢအဒိၣ်တုာ်ခိၣ်ပှဲၤတဂၤ မၤဖိသၣ်တမံၤမံၤလၢ တၢ်သးကတၢအပူၤ ဒ်သိးကမၤလၢပှဲၤ အတၢ်သးကတၢအဂီၢ်န့ၣ်လီၤ. တၢ်မၤတရီတပါဖိသၣ်န့ၣ် ပၣ်ဃုာ်ဒီး တၢ်မံဃုာ်, တၢ်မံဃုာ်လၢကိာ်ပူၤ မ့တမ့ၢ် ခံပူၤ, ဖူးလဲး ဖိသၣ်အမုၣ်ခွါက့ၢ်ဂီၤ, အနုၢ်, အခံ မ့တမ့ၢ် တၢ်မၤလၢအလီၤရၢၢ် လၢအဂၤတဖၣ်န့ၣ်လီၤ. ပှၤလၢအဘၣ်တၢ်မၤတရီတပါအီၤ အါတက့ၢ်န့ၣ် မ့ၢ်ဝဲဖိသၣ်ပိာ်မုၣ်ဘၣ်ဆၣ် ဖိသၣ်ပိာ်ခွါလၢ အဘၣ်တၢ်မၤတရီတပါအီၤန့ၣ် အိၣ်ဝဲအါမး စ့ၢ်ကီးလီၤ. ပှၤလၢအမၤတရီတပါဖိသၣ် အါတက့ၢ်န့ၣ်မ့ၢ်ဝဲ ပှၤပိာ်ခွါဘၣ်ဆၣ် ပှၤလၢအမၤတရီတပါဖိသၣ်တနီၤန့ၣ် မ့ၢ်ဝဲပိာ်မုၣ်လီၤ.
^ လံာ်အဆၢ. 5 တၢ်ကတိၤအခီပညီ– လၢတၢ်မၤလိတခါအံၤ ဒီးတၢ်မၤလိ လၢခံတခါအပူၤ တၢ်ကတိၤလၢအမ့ၢ် “ပှၤလၢအဘၣ် တၢ်မၤတရီတပါအီၤ” န့ၣ်အဲၣ်ဒိးတဲဝဲ ပှၤလၢအဘၣ် တၢ်မၤတရီတပါအီၤလၢ အနီၢ်ဆံးခါလီၤ. ပသူတၢ်ကတိၤအံၤ ဒ်သိးပှၤကသ့ၣ်ညါလၢ ဖိသၣ်လၢ အဘၣ်တၢ်မၤအီၤ ဒ်အံၤတဖၣ်န့ၣ် တူၢ်ဘၣ်တၢ်နးဒိၣ်မး, ဘၣ်တၢ်မၤနၢၤအီၣ်အီၤ ဒီးအတၢ်ကမၣ်တအိၣ်ဘၣ်န့ၣ်လီၤ.
^ လံာ်အဆၢ. 11 ပှၤတဂၤဂၤ မ့ၢ်မၤဘၣ်တၢ်ကမၣ်ဖးဒိၣ် ခီဖျိလၢ အတၢ်ရ့လိာ်သးဒီးယဟိဝၤယွၤ လီၤစၢ်ဝဲအဃိန့ၣ် အခီပညီတမ့ၢ်လၢ အဝဲအတၢ်ကမၣ် တအိၣ်ဘၣ်န့ၣ်ဘၣ်. ပှၤလၢအမၤကမၣ်တၢ်တဂၤအံၤ အိၣ်ဒီးမူဒါလၢလၢပှဲၤပှဲၤလၢ တၢ်လၢအမၤဝဲ ဒီးအတၢ်ဃုထၢအဃိလီၤ. ဒီးယဟိဝၤယွၤ ကစံၣ်ညီၣ်အီၤ ခီဖျိတၢ်လၢ အမၤဝဲအဃိလီၤ.—ရိမ့ၤ ၁၄:၁၂.
^ လံာ်အဆၢ. 16 ဖဲတၢ်အိၣ်ဖှိၣ်သးပှၢ်တဖၣ် တဲသကိးတၢ်ဒီး ပှၤလၢအဘၣ်တၢ်ပာ်တၢ်ကမၣ်လၢအလိၤအခါ အဝဲသ့ၣ် တမၢပှၤဖိသၣ်တဂၤအံၤ အိၣ်လၢအဝဲသ့ၣ်အမဲာ်ညါ နီတဘျီဘၣ်. ဒီးမိၢ်ပၢ်တဖၣ် မ့တမ့ၢ် ပှၤဒိၣ်တုာ်ခိၣ်ပှဲၤလၢ ဖိသၣ်နာ်န့ၢ်အီၤဒီး တဲတၢ်ဒီးအီၤမုာ်တဂၤ ကတဲဘၣ်ဝဲ တၢ်အိၣ်ဖှိၣ်သးပှၢ်လၢ တၢ်လၢဖိသၣ်တဂၤအံၤ တဲဘၣ်အီၤတဖၣ်န့ၣ်လီၤ. အဝဲသ့ၣ် မ့ၢ်မၤဝဲဒ်အံၤန့ၣ် တမၤဘၣ်ဒိအါထီၣ် ဖိသၣ်တဂၤအံၤ အသးလၢၤဘၣ်.
^ လံာ်အဆၢ. 19 ပှၤလၢအကွၢ်ဒိၣ်ထီၣ်ဖိသၣ် မ့တမ့ၢ် ပှၤအဂၤလၢ အကွၢ်ထွဲ ပှၤဖိသၣ်တဖၣ် စ့ၢ်ကီး အိၣ်ဒီးမူဒါဒ် မိၢ်ပၢ်အသိးလီၤ.