တၢ်မၤလိ ၂၂
မၤဂ့ၤထီၣ် နနီၢ်ကစၢ်တၢ်မၤလိလံာ်စီဆှံ
“နီၤဖး တၢ်လီၤဆီ [“တၢ်လၢအရ့ဒိၣ်,” NWT] တဖၣ်အဆၢ” တက့ၢ်.—ဖံလံးပံၤ ၁:၁၀.
တၢ်သးဝံၣ် ၃၅ နီၤဖးတၢ်လၢအရ့ဒိၣ်တဖၣ်အဆၢ
တၢ်မၤလိအံၤ အတၢ်တိာ်ပာ် *
၁. ဘၣ်မနုၤအဃိ ပှၤတနီၤန့ၣ် တအဲၣ်ဒိးမၤလိတၢ်ဘၣ်လဲၣ်.
မုၢ်မဆါတနံၤအံၤ ပှၤအါဂၤဘၣ်မၤတၢ်ဆူၣ်ဆူၣ်ဒ်သိး အဝဲသ့ၣ်ကလုၢ်အီၣ် အသးသမူအဂီၢ်လီၤ. ပဒီပုၢ်ဝဲၢ်အါဂၤစ့ၢ်ကီး ဒ်သိးကလုၢ်အီၣ်လုၢ်အီ အဟံၣ်ဖိဃီဖိအဂီၢ် အဝဲသ့ၣ် ဘၣ်မၤတၢ် အနၣ်ရံၣ်အါမးလီၤ. ဒီးပဒီပုၢ်ဝဲၢ်အဂၤတဖၣ် ကလဲၤလၢတၢ်မၤ ဒီးဟဲက့ၤကဒါက့ၤ လၢဟံၣ်အဂီၢ် အတၢ်ဆၢကတီၢ် လၢာ်ဝဲအါမးလီၤ. ဒီးအဝဲသ့ၣ်အါဂၤန့ၣ် ကလုၢ်အီၣ်လုၢ်အီ အဟံၣ်ဖိဃီဖိအဂီၢ် ဘၣ်မၤတၢ်နးဒိၣ်မးလီၤ. လၢတၢ်န့ၣ်အဃိ မ့ၢ်တုၤလၢဟါခီန့ၣ် ပဒီပုၢ်ဝဲၢ်မုၣ်ခွါတဖၣ်အံၤ လီၤဘှံးလီၤတီၤဝဲဒိၣ်မး ဒီးအဝဲသ့ၣ် ကမၤလိတၢ်အဂီၢ် အဂံၢ်အဘါတအိၣ်လၢၤဘၣ်.
၂. နမၤလိတၢ်လၢ ဆၢကတီၢ်ဖဲလဲၣ်.
၂ ပကဘၣ် ဟံးန့ၢ်တၢ်ဆၢကတီၢ်လၢ ပကမၤလိ ကစၢ်ယွၤအကလုၢ်ကထါ ဒီးပတၢ်ကရၢကရိ အလံာ်လဲၢ်သ့ၣ်တဖၣ်လီၤ. ပမ့ၢ်အဲၣ်ဒိးလၢ ပတၢ်ရ့လိာ်သးဒီးယဟိဝၤယွၤဂ့ၤ ဒီးအိၣ်မူဘၣ်လီၤထူလီၤယိာ်န့ၣ် ပကဘၣ်မၤဒ်န့ၣ် သပှၢ်ကတၢၢ်လီၤ. (၁ တံၤမသ့း ၄:၁၅) ပှၤတနီၤ မံပၢၢ်ထီၣ်ဂီၤဂီၤဒီး မၤလိတၢ်ကိးနံၤဒဲးလီၤ. ဖဲန့ၣ်အဆၢကတီၢ် တၢ်ဘှ့ၣ်တၢ်ဘှီၣ် ဒီးအဝဲသ့ၣ် မံဒီတနၤဝံၤလံအဃိ ဆိကမိၣ်တၢ်န့ၢ်ဂ့ၤဂ့ၤလီၤ. မ့မ့ၢ်ပှၤအဂၤတနီၤန့ၣ် ဟံးန့ၢ်တၢ်ဆၢကတီၢ်စှၤမံးနံးလၢ ဟါလီၤခီ ဒ်သိးကမၤလိဒီးဆိကမိၣ်ထံ လံာ်စီဆှံ ဒီးပတၢ်ကရၢကရိ အလံာ်လဲၢ်တဖၣ်လီၤ.
၃-၄. ဘၣ်ဃးဒီး တၢ်ထုးထီၣ်လံာ်လဲၢ်ဒီး တၢ်ဂ့ၢ်တၢ်ကျိၤတဖၣ်န့ၣ် တၢ်ဆီတလဲမနုၤအိၣ်ထီၣ်လဲၣ် ဒီးဘၣ်မနုၤအဃိလဲၣ်.
၃ ပသ့ၣ်ညါလၢ ပကဘၣ်မၤလိတၢ်န့ၣ် မ့ၢ်တၢ်လၢအရ့ဒိၣ် ဒိၣ်မးလီၤ. ဘၣ်ဆၣ်ပကြၢးမၤလိ တၢ်မနုၤလဲၣ်. ဘၣ်သ့ၣ်သ့ၣ် နကတဲလၢ ‘တၢ်လၢယဘၣ်ဖးအီၤန့ၣ် အိၣ်ဒီဒူၣ်. ယကဖးအီၤခဲလၢာ်ဒု တညီဘၣ်.’ ပဒီပုၢ်ဝဲၢ်တနီၤ ဖးလံာ်လဲၢ်ဒီး ကွၢ်တၢ်ဂီၤမူလၢ အဒိးသန့ၤထီၣ်အသးလၢ လံာ်စီဆှံအပူၤ ခဲလၢာ်လီၤ. ဘၣ်ဆၣ် မ့မ့ၢ်ပဒီပုၢ်ဝဲၢ်အဂၤတနီၤန့ၣ် ကမၤဝဲဒ်န့ၣ်အဂီၢ် အတၢ်ဆၢကတီၢ် တအိၣ်ဘၣ်. ပှၤပၢဆှၢတၢ်ကမံးတံာ် သ့ၣ်ညါဝဲ တၢ်ဂ့ၢ်အံၤလီၤ. လၢတၢ်န့ၣ်အဃိ အဝဲသ့ၣ် မၤစှၤလီၤဝဲ တၢ်ဂ့ၢ်တၢ်ကျိၤ လၢလံာ်လဲၢ်လၢ ပှၤစဲကျံးထုးထီၣ်အီၤအပူၤ ဒီးတၢ်ဂ့ၢ်တၢ်ကျိၤလၢ အ့ထၢၣ်နဲးအပူၤလီၤ.
၄ အဒိ ပတထုးထီၣ် နံၣ်ကတၢၢ်လံာ်တၢ်ပာ်ဖျါလၢ အဘၣ်ဃးဒီးယဟိဝၤပှၤအုၣ်အသးတဖၣ် လၢၤဘၣ်. တၢ်လဲၤခီဖျိလၢ အကဲထီၣ် တၢ်ဂံၢ်တၢ်ဘါတဖၣ်န့ၣ် ပထံၣ်န့ၢ်အီၤလၢ jw.org® ဒီး JW တၢ်ဂီၤမူ အတၢ်ရဲၣ်တၢ်ကျဲၤ လၢတလါတဘျီအပူၤ အါမးလီၤ. တၢးထီခိးတၢ်လၢကမျၢၢ်အဂီၢ် ဒီးပၢၢ်ထီၣ် (Awake!) မဲးကစံတခါစုာ်စုာ်န့ၣ် ဘၣ်တၢ်ထုးထီၣ်က့ၤအီၤ ဒီတနံၣ်ကျၢၤမး သၢဘ့ၣ်လီၤ. ပမၤတၢ်ဆီတလဲဒ်အံၤန့ၣ် တမ့ၢ်ဒ်သိး ပတၢ်ဆၢကတီၢ် ကအိၣ်အါထီၣ်လၢ ပကမၤတၢ်အဂၤအဂီၢ်ဘၣ်. တၢ်ဆီတလဲတခါအံၤ အတၢ်တိာ်ပာ်န့ၣ် မ့ၢ်ဒ်သိးပကအိၣ်ဒီး တၢ်ဆၢကတီၢ်လၢ ပကသးစၢၢ်ဆၢ “တၢ်လီၤဆီတဖၣ်” မ့တမ့ၢ် တၢ်လၢအရ့ဒိၣ်တဖၣ်အဂီၢ်လီၤ. (ဖံလံးပံၤ ၁:၁၀) ပကတဲသကိး ဘၣ်ဃးဒီး ပသ့ၣ်ညါနီၤဖး တၢ်လၢအရ့ဒိၣ်တဖၣ် ကသ့ဒ်လဲၣ် ဒီးပဒိးန့ၢ်ဘၣ်အဘျုးလၢ ပနီၢ်ကစၢ်တၢ်မၤလိလံာ်စီဆှံအပူၤ လၢလၢပှဲၤပှဲၤ ကသ့ဒ်လဲၣ်န့ၣ်လီၤ.
ပာ်ဆိ တၢ်လၢအရ့ဒိၣ်တဖၣ်
၅-၆. ပကဘၣ်မၤလိ လံာ်မနုၤတဖၣ် လီၤတံၢ်လီၤဆဲးလဲၣ်.
၅ တၢ်လၢပကြၢးမၤလိအီၤ အဆိကတၢၢ်န့ၣ် မ့ၢ်မနုၤလဲၣ်. ပကြၢးမၤလိ ယွၤအကလုၢ်ကထါ ကိးနံၤဒဲးလီၤ. ဒ်သိးပကအိၣ်ဒီး တၢ်ဆၢကတီၢ်လၢ ပကဆိကမိၣ်ထံ တၢ်လၢပဖးအီၤ ဒီးဃုသ့ၣ်ညါ အါထီၣ်အီၤအဂီၢ် တၢ်ဖးလံာ်စီဆှံအဆၢလၢ တနွံအဂီၢ်န့ၣ် ဘၣ်တၢ်မၤစှၤလီၤအီၤလီၤ. ပတၢ်တိာ်ပာ်န့ၣ် တကြၢးမ့ၢ်ထဲ ပကဖးဝံၤ လံာ်စီဆှံအဆၢတဖၣ်ဘၣ်. ပတၢ်တိာ်ပာ်န့ၣ် ကဘၣ်မ့ၢ်ဝဲ ပကဘၣ်ဖးအီၤတုၤ အနုာ်လီၤလၢပသးပူၤ ဒီးပကဘူးဒိၣ်ထီၣ်ဒီး ယဟိဝၤယွၤအဂီၢ်လီၤ.—စံးထီၣ်ပတြၢၤ ၁၉:၁၄.
၆ တၢ်အဂၤလၢ ပကဘၣ်မၤလိအီၤ လီၤတံၢ်လီၤဆဲးန့ၣ် မ့ၢ်မနုၤလဲၣ်. ပဘၣ်ကတဲာ်ကတီၤပသးလၢ တၢးထီခိးတၢ် လၢတၢ်မၤလိအဂီၢ်, တၢ်အိၣ်ဖှိၣ်တၢ်မၤလိလံာ်စီဆှံ ဒီးတၢ်ဂ့ၢ်တၢ်ကျိၤအဂၤလၢ နွံဖးဖီတၢ်အိၣ်ဖှိၣ်အဂီၢ်လီၤ. ပကြၢးဖးစ့ၢ်ကီး တၢးထီခိးတၢ် ဒီးပၢၢ်ထီၣ် (Awake!) ကိးဘ့ၣ်ဒဲးလီၤ.
၇. ပဖးဒီးကွၢ် တၢ်လၢပတၢ်ကရၢကရိ ထုးထီၣ်အီၤလၢ ပပှာ်ယဲၤသန့ ဒီးJW တၢ်ဂီၤမူအပူၤ မ့ၢ်တသ့ခဲလၢာ် ဘၣ်ဆၣ် ဘၣ်မနုၤအဃိ ပတကြၢး သးဟးဂီၤဘၣ်လဲၣ်.
၇ ဘၣ်သ့ၣ်သ့ၣ် နကသံကွၢ်ဘၣ်လၢ ‘မ့မ့ၢ်တၢ်ဂ့ၢ်တၢ်ကျိၤ ဒီးတၢ်ဂီၤမူ လၢအအိၣ်လၢ jw.org® ပှာ်ယဲၤသန့အပူၤ ဒီးတၢ်လၢအအိၣ်လၢ JW တၢ်ဂီၤမူအပူၤ® တခီမီၤ, တၢ်ဂ့ၢ်တၢ်ကျိၤအိၣ်ညါ ဒီဒူၣ်ညါ, ယကဘၣ်မၤလိအီၤဒ်လဲၣ်.’ ဆိကမိၣ်ကွၢ် တၢ်အဒိတခါအံၤတက့ၢ်. လၢတၢ်အီၣ်အကျးန့ၣ် ပှၤပာ်လီၤဆါတၢ်အီၣ် အိၣ်ဝဲအါမးလီၤ. ပှၤလၢအလဲၤပှ့ၤအီၣ်တၢ်တဂၤန့ၣ် တမ့ၢ်လၢ ကပှ့ၤဝဲတၢ်အီၣ် ကိးမံၤဒဲးဘၣ်. အဝဲ ကပှ့ၤဝဲ တၢ်အီၣ်ထဲတနီၤလီၤ. ဒ်န့ၣ်အသိး နဖးဒီးကွၢ် တၢ်လၢပထုးထီၣ်အီၤလၢ အံၣ်လဲးထြီနံး အပူၤခဲလၢာ် မ့ၢ်တသ့ဘၣ်ဆၣ် တဘၣ်သးဟးဂီၤတဂ့ၤ. တသ့ဖဲအသ့ ဖးအီၤဒီးကွၢ်အီၤတက့ၢ်. ခဲအံၤန့ၣ်ပကတဲသကိး တၢ်မၤလိတၢ်န့ၣ် အခီပညီမ့ၢ်မနုၤလဲၣ် ဒီးဒ်သိး ပကဒိးန့ၢ်ဘၣ်အဘျုး အါအါအဂီၢ် ပကဘၣ် မၤလိတၢ်ဒ်လဲၣ်န့ၣ်လီၤ.
ဒ်သိးပကမၤလိတၢ်အဂီၢ် ပကဘၣ်ထဲးဂံၢ်ထဲးဘါ
၈. ဖဲနမၤလိ တၢးထီခိးတၢ်အခါ နကဘၣ်မၤအီၤ တဆီဘၣ်တဆီဒ်လဲၣ် ဒီးနကဒိးန့ၢ်ဘၣ် အဘျုးဒ်လဲၣ်.
၈ တၢ်မၤလိတၢ်န့ၣ်မ့ၢ်ဝဲ နသးစၢၢ်ဆၢ တၢ်လၢနဖးအီၤတဖၣ် ဒ်သိးနကဒိးန့ၢ်ဘၣ် တၢ်မၤလိ လၢအရ့ဒိၣ်တမံၤမံၤအဂီၢ်လီၤ. ဒီးတမ့ၢ် နဖးဝံၤလံာ်ချ့ချ့ ဒီးတိၤဃာ် တၢ်စံးဆၢန့ၣ်ဘၣ်. အဒိ ဖဲနကတဲာ်ကတီၤနသးလၢ တၢးထီခိးတၢ် တၢ်မၤလိအဂီၢ်အခါ အဆိကတၢၢ်န့ၣ် ကွၢ်တၢ်မၤလိ အတၢ်တိာ်ပာ် လၢအအိၣ်လၢ တၢ်မၤလိ အခီၣ်ထံးန့ၣ်တက့ၢ်. မ့ၢ်ဝံၤန့ၣ် ဆိကမိၣ်ထံ တၢ်မၤလိအခိၣ်တီ, လံာ်အခိၣ်တီ ဒီးတၢ်ကွၢ်ကဒါက့ၤ တၢ်သံကွၢ်တဖၣ်တက့ၢ်. ဒီးဖးကွၢ် လံာ်အဆၢတဖၣ် ကယီကယီ ဒီးလီၤတံၢ်လီၤဆဲးတက့ၢ်. အါတက့ၢ်န့ၣ် လံာ်အဆၢလၢ အဆိကတၢၢ်တကျိၤန့ၣ် ပာ်ဖျါထီၣ်ဝဲ တၢ်ဂ့ၢ်လၢ အရ့ဒိၣ်လၢ လံာ်အဆၢပူၤအဃိ ဖဲနဖး လံာ်အဆၢကိးဆၢဒဲးအခါ ပာ်သူၣ်ပာ်သး လံာ်ကျိၤလၢ အဆိကတၢၢ် တကျိၤတက့ၢ်. ဒီးပာ်သူၣ်ပာ်သးလၢ လံာ်အဆၢတဆၢ စုာ်စုာ်န့ၣ် ဘၣ်ထွဲလိာ်အသးဒီး လံာ်အခိၣ်တီဖိတဖၣ် ဒီးတၢ်ဂ့ၢ်မိၢ်ပှၢ်ဒ်လဲၣ်န့ၣ်တက့ၢ်. တၢ်ကတိၤ ဒီးတၢ်ဂ့ၢ်တၢ်ကျိၤလၢ နတထံၣ်ဘၣ်အီၤ နီတဘျီ ဒီးနအဲၣ်ဒိး ဃုသ့ၣ်ညါအါထီၣ်အီၤန့ၣ် မၤနီၣ်ဃာ်အီၤတက့ၢ်.
၉. (က) ဖဲပမၤလိ တၢးထီခိးတၢ်အခါ ဘၣ်မနုၤအဃိ ပကဘၣ်သးစၢၢ်ဆၢ လံာ်စီဆှံအဆၢတဖၣ်လဲၣ် ဒီးပမၤအီၤကသ့ ဒ်လဲၣ်. (ခ) ပမ့ၢ်ကွၢ်ဖဲ ယိၤၡူ ၁:၈ န့ၣ်ပသ့ၣ်ညါဘၣ်လၢ ပကဘၣ်ဖး လံာ်စီဆှံတကးဒံးဘၣ် ပကဘၣ်မၤမနုၤဒံးလဲၣ်.
၉ ဖဲပမၤလိသကိး တၢးထီခိးတၢ် လၢတၢ်အိၣ်ဖှိၣ်အပူၤန့ၣ် မၤစၢၤပှၤဒ်သိး ပကနၢ်ပၢၢ်ထီၣ် လံာ်စီဆှံအဂီၢ်လီၤ. လီၤဆီဒၣ်တၢ် ပာ်သူၣ်ပာ်သး လံာ်စီဆှံအဆၢလၢ ပှၤကဘၣ်ဖးအီၤ ဖဲပှၤမၤလိတၢ်လၢ တၢ်အိၣ်ဖှိၣ်အခါန့ၣ်တက့ၢ်. တၢ်ကတိၤလၢ လံာ်စီဆှံအဆၢပူၤန့ၣ် ဘၣ်ထွဲဒီး တၢ်ဂ့ၢ်မိၢ်ပှၢ်လၢ လံာ်အဆၢပူၤဒ်လဲၣ်န့ၣ် ပာ်သူၣ်ပာ်သးအီၤ လီၢ်တံၢ်လီၤဆဲးတက့ၢ်. တကးဒံးဘၣ် လံာ်စီဆှံအဆၢလၢ နဖးအီၤတဖၣ်န့ၣ် ဟံးန့ၢ်တၢ်ဆၢကတီၢ် ဒီးဆိကမိၣ်ထံအီၤယိာ်ယိာ် ဒီးဆိကမိၣ်ထံ ဘၣ်ဃးဒီး နကဘၣ် အိၣ်မူမၤထွဲအီၤ ဒ်လဲၣ်န့ၣ်တက့ၢ်.—ဖး ယိၤၡူ ၁:၈ တက့ၢ်.
မိၢ်ပၢ်သ့ၣ်ဧၢ, နဖိတဖၣ် ကဘၣ်မၤလိတၢ်ဒ်လဲၣ်န့ၣ် သိၣ်လိအဝဲသ့ၣ်တက့ၢ် (ကွၢ်လံာ်အဆၢ ၁၀) *
၁၀. ဒ် ဧ့ၤဘြံၤ ၅:၁၄ ပာ်ဖျါထီၣ်ဝဲအသိး ဖဲမိၢ်ပၢ်တဖၣ် မၤဝဲဟံၣ်ဖိဃီဖိ တၢ်မၤလိလံာ်စီဆှံအခါ ဘၣ်မနုၤအဃိ အဝဲသ့ၣ် ကြၢးသိၣ်လိအဖိလၢ ကဘၣ်မၤလိတၢ်ဒီး ဃုသ့ၣ်ညါတၢ် ဒ်လဲၣ်န့ၣ်လဲၣ်.
၁၀ ပသ့ၣ်ညါလၢ မိၢ်ပၢ်သ့ၣ်တဖၣ်န့ၣ် အဲၣ်ဒိးလၢအဖိတဖၣ် ကအိၣ်ဒီးတၢ်သးခု ဖဲအဝဲသ့ၣ်မၤ ဟံၣ်ဖိဃီဖိ တၢ်မၤလိလံာ်စီဆှံအခါလီၤ. မိၢ်ပၢ်တဖၣ်န့ၣ် ကြၢးကတဲာ်ကတီၤဆိပာ်စၢၤ တၢ်ဂ့ၢ်လၢ ဟံၣ်ဖိဃီဖိ တၢ်မၤလိလံာ်စီဆှံအဂီၢ်ဘၣ်ဆၣ် တလိၣ်အဝဲသ့ၣ် ကတဲာ်ကတီၤတၢ် လီၤလီၤဆီဆီ မ့တမ့ၢ် ဒိၣ်ဒိၣ်မုၢ်မုၢ် ကိးနွံဒဲးဘၣ်. ဖဲနမၤဟံၣ်ဖိဃီဖိ တၢ်မၤလိလံာ်စီဆှံအခါ နကွၢ် JW တၢ်ဂီၤမူလၢ ပှၤထုးထီၣ်အီၤ တလါတဘျီသ့ဝဲလီၤ. မ့တမ့ၢ် တဘျီတခီၣ် နမၤတၢ်ရဲၣ်တၢ်ကျဲၤလီၤဆီတခါ ဒ်သိးဒီး နတ့ထီၣ်သကိး စီၤနိအၤအကဘီသ့လီၤ. တကးဒံးဘၣ် နကဘၣ်မၤလိ နဖိသ့ၣ်တဖၣ်လၢ အဝဲသ့ၣ် ကဘၣ်မၤလိတၢ် ဒ်လဲၣ်န့ၣ်လီၤ. အဒိ အဝဲသ့ၣ် ကဘၣ်သ့ၣ်ညါဝဲလၢ ကဘၣ်ကတဲာ်ကတီၤအသး လၢတၢ်အိၣ်ဖှိၣ်အဂီၢ်ဒ်လဲၣ် မ့တမ့ၢ် ပှၤလၢကၠိတဖၣ် မ့ၢ်သံကွၢ်အဝဲသ့ၣ် တၢ်သံကွၢ်အခါ ကဘၣ်ဃုသ့ၣ်ညါဝဲ ဒ်လဲၣ်န့ၣ်လီၤ. (ဖး ဧ့ၤဘြံၤ ၅:၁၄ တက့ၢ်.) အဝဲသ့ၣ် မ့ၢ်မၤလိ လံာ်စီဆှံလၢဟံၣ်န့ၣ် ဖဲအဝဲသ့ၣ်လဲၤထီၣ် တၢ်အိၣ်ဖှိၣ်, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ်အခါ ပှၤမ့ၢ်တပၠးတၢ်ဂီၤမူဒၣ်လဲာ် ကညီဝဲလၢ အဝဲသ့ၣ် ကသးစၢၢ်ဆၢတၢ် အဂီၢ်န့ၣ်လီၤ. မိၢ်ပၢ်တဖၣ် ကမၤလိတၢ်ဒီး အဖိယံာ်ထဲလဲၣ်န့ၣ် ဒိးသန့ၤထီၣ်သးလၢ အဖိအသးနံၣ်ဒီး အတၢ်အိၣ်သး အဖီခိၣ်လီၤ.
၁၁. ဘၣ်မနုၤအဃိ ပကဘၣ်သိၣ်လိ ပပှၤမၤလိ လံာ်စီဆှံဖိတဖၣ် ဒ်သိးအဝဲသ့ၣ် ကဃုသ့ၣ်ညါတၢ် လၢအနီၢ်ကစၢ် လီၤတံၢ်လီၤဆဲးန့ၣ်လဲၣ်.
၁၁ ပပှၤမၤလိလံာ်စီဆှံဖိတဖၣ်စ့ၢ်ကီး ကဘၣ်သ့ၣ်ညါဝဲလၢ ကဘၣ်မၤလိတၢ် ဒ်လဲၣ်န့ၣ်လီၤ. ဖဲပပှၤမၤလိလံာ်စီဆှံဖိတဂၤ မၤလိလံာ်စီဆှံသီသီအခါ ပမ့ၢ်ထံၣ်ဘၣ်လၢ အဝဲသ့ၣ် တိၤနီၣ်ဃာ်တၢ်စံးဆၢလၢ အလံာ်တၢ်မၤလိအပူၤ မ့တမ့ၢ် လၢတၢ်အိၣ်ဖှိၣ်အဂီၢ်န့ၣ် ပသးခုဒိၣ်မးလီၤ. ဘၣ်ဆၣ်သနာ်က့ ပကဘၣ်မၤစၢၤ အဝဲသ့ၣ်လၢ ကဘၣ်ဃုသ့ၣ်ညါ တၢ်ဂ့ၢ်တၢ်ကျိၤဒ်လဲၣ် ဒီးဖဲအဝဲသ့ၣ် အိၣ်ထဲတဂၤအခါ ကဘၣ်မၤလိတၢ် ဒ်လဲၣ်န့ၣ်လီၤ. ပမ့ၢ်မၤဒ်န့ၣ်န့ၣ် လၢခံ ဖဲအဝဲသ့ၣ်အိၣ်ဒီး တၢ်ကီတၢ်ခဲအခါ အဝဲသ့ၣ် တလိၣ်သံကွၢ် ပှၤဂၤလၢတၢ်အိၣ်ဖှိၣ်အပူၤလၢ အဝဲသ့ၣ် ကြၢးမၤဝဲ ဒ်လဲၣ်န့ၣ်ဘၣ်. လၢတၢ်န့ၣ်အလီၢ် အဝဲသ့ၣ် ဃုသ့ၣ်ညါဝဲ တၢ်ဂ့ၢ်တၢ်ကျိၤလၢ ကကဲထီၣ်တၢ်မၤစၢၤလၢအဂီၢ် ကသ့ဝဲလီၤ.
ဖဲနမၤလိလံာ်စီဆှံအခါ အိၣ်ဒီးတၢ်တိာ်ပာ်
၁၂. ဖဲပမၤလိတၢ်အခါ ပကဘၣ်အိၣ်ဒီး တၢ်တိာ်ပာ်ဒ်လဲၣ်.
၁၂ နမ့မ့ၢ်ပှၤလၢ အမၤလိတၢ်တမုာ်ဘၣ်န့ၣ် ဘၣ်သ့ၣ်သ့ၣ် နကဆိကမိၣ်ဘၣ်လၢ နကဲထီၣ်ပှၤလၢ အမၤလိတၢ်မုာ် တသ့နီတဘျီဘၣ်. ဘၣ်ဆၣ် နကဲထီၣ်ပှၤလၢ အမၤလိတၢ်မုာ်သ့လီၤ. ဖဲနစးထီၣ်မၤလိတၢ် သီသီအခါ မၤအီၤတၢ်ဆၢကတီၢ်ထဲတစိၢ်ဖိ ဒီးလၢခံ ဟံးန့ၢ်အါထီၣ် တၢ်ဆၢကတီၢ်လၢ နကမၤလိတၢ်အဂီၢ် တက့ၢ်. ဆိကမိၣ်ကွၢ်လၢ ဘၣ်မနုၤအဃိ နဘၣ်မၤလိတၢ်လဲၣ်. ဖဲပမၤလိတၢ်အခါ ပတၢ်တိာ်ပာ်လၢ အရ့ဒိၣ်ကတၢၢ်န့ၣ် ကြၢးမ့ၢ်ဝဲ ဒ်သိးပကဘူးဒိၣ်ထီၣ်ဒီး ယဟိဝၤယွၤအဂီၢ်လီၤ. ဒီးပတၢ်တိာ်ပာ်လၢ အဂၤတခါန့ၣ်မ့ၢ်ဝဲ ပကဃုသ့ၣ်ညါ တၢ်သံကွၢ်လၢ ပှၤဂၤသံကွၢ်ပှၤတဖၣ် အတၢ်စံးဆၢ မ့တမ့ၢ် ဃုသ့ၣ်ညါ တၢ်ဂ့ၢ်တၢ်ကျိၤ လၢအဘၣ်ဃးဒီး ပတၢ်ကီတၢ်ခဲန့ၣ်လီၤ.
၁၃. (က) ဒ်သိးပှၤသးစၢ်တဂၤ တဲဖျါထီၣ် အတၢ်နာ်လၢကၠိ ကသ့အဂီၢ် အဝဲမၤဝဲ တၢ်မနုၤသ့လဲၣ်. (ခ) နမၤထွဲ တၢ်ဟ့ၣ်ကူၣ်ဖဲ ကလီးစဲ ၄:၆ အပူၤကသ့ဒ်လဲၣ်.
၁၃ အဒိ နမ့မ့ၢ်ပှၤသးစၢ်လၢ အထီၣ်ကၠိတဂၤန့ၣ် ဘၣ်သ့ၣ်သ့ၣ် နတံၤသကိးလၢကၠိခဲလၢာ် ကနာ်ဝဲ တၢ်သးသမူလဲလိာ်အသး တဆီဘၣ်တဆီလီၤ. ဒီးနကအဲၣ်ဒိး တဲဘၣ်အဝဲသ့ၣ်လၢ ဘၣ်မနုၤအဃိ နနာ်လၢ ပဘၣ်တၢ်တ့လီၤပှၤ ဒ်လံာ်စီဆှံတဲဝဲအသိးန့ၣ်လဲၣ်. ဘၣ်ဆၣ် ဘၣ်သ့ၣ်သ့ၣ် နကတူၢ်ဘၣ်လၢ နတဲဘၣ်အဝဲသ့ၣ် တသ့ဘၣ်. အဃိ နကဘၣ်မၤ တၢ်မၤလိလံာ်စီဆှံလီၤ. ဖဲနမၤဒ်န့ၣ်အခါ ဘၣ်သ့ၣ်သ့ၣ် နကအိၣ်ဒီး တၢ်တိာ်ပာ်ခံခါလီၤ. နတၢ်တိာ်ပာ်န့ၣ် ကမ့ၢ်ဝဲ (၁) နတၢ်နာ်လၢ ကစၢ်ယွၤတ့လီၤတၢ်ခဲလၢာ် ကဂၢၢ်ကျၢၤထီၣ်အဂီၢ်ဒီး (၂) နကမၤလိနသးလၢ နတဲဖျါထီၣ်နတၢ်နာ် ကသ့အါထီၣ် အဂီၢ်လီၤ. (ရိမ့ၤ ၁:၂၀; ၁ ပ့းတရူး ၃:၁၅) အဆိကတၢၢ်န့ၣ် နသံကွၢ်လီၤနသး ဒ်အံၤသ့လီၤ. ‘ဘၣ်မနုၤအဃိ ယတံၤသကိးလၢကၠိတဖၣ် နာ်ဝဲသးသမူအတၢ်လဲလိာ်အသး တဆီဘၣ်တဆီလဲၣ်.’ ဝံၤဒီး ဃုသ့ၣ်ညါ ပတၢ်ကရၢကရိ အလံာ်လဲၢ်တဖၣ် လီၤတံၢ်လီၤဆဲးတက့ၢ်. ဘၣ်သ့ၣ်သ့ၣ် ဖဲနတဲဖျါထီၣ် နတၢ်နာ်အခါ နကထံၣ်ဘၣ်လၢ တကီထဲသိးဒီး နဆိကမိၣ်ပာ်စၢၤအသိးဘၣ်. ပှၤအါဂၤနာ်ဝဲ သးသမူအတၢ်လဲလိာ်အသး တဆီဘၣ်တဆီ ခီဖျိလၢ ပှၤလၢအဝဲသ့ၣ် ပာ်ကဲဝဲတဂၤ တဲအဝဲသ့ၣ်လၢ အမ့ၢ်တၢ်နီၢ်ကီၢ်အဃိလီၤ. နမ့ၢ်ဃုထံၣ်န့ၢ် တၢ်ဂ့ၢ်တၢ်ကျိၤ ထဲတခါခံခါဧိၤန့ၣ် ဘၣ်သ့ၣ်သ့ၣ် နစံးဆၢက့ၤ ပှၤလၢအအဲၣ်ဒိးသ့ၣ်ညါ တၢ်မ့ၢ်တၢ်တီတဖၣ် ကသ့လီၤ.—ဖး ကလီးစဲ ၄:၆ တက့ၢ်.
မၤအါထီၣ် နတၢ်သူၣ်ဆူၣ်သးဆူၣ် လၢနကမၤလိတၢ်အဂီၢ်
၁၄-၁၆. (က) လံာ်စီဆှံအကတြူၢ်လၢ နမ့ၢ်တသ့ၣ်ညါအီၤ ဂ့ၤဂ့ၤတဖၣ်န့ၣ် နမၤလိအါထီၣ်အဂ့ၢ် ကသ့ဒ်လဲၣ်. (ခ) ဒ်သိး နကနၢ်ပၢၢ်အါထီၣ် လံာ်ဧၤမိၣ်အဂီၢ် လံာ်စီဆှံအဆၢအဂၤတဖၣ် မၤစၢၤနၤကသ့ဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “ဃုသ့ၣ်ညါအါထီၣ် ပှၤလၢအအိၣ်လၢ လံာ်စီဆှံပူၤအဂ့ၢ်.”)
၁၄ ဆိကမိၣ်ကွၢ် လၢတၢ်အိၣ်ဖှိၣ်လီၢ်န့ၣ် ပှၤကဖးဒီး တဲသကိး လံာ်စီဆှံတကတြူၢ်လၢ ဝံတဂၤကွဲးဝဲန့ၣ်တက့ၢ်. ဘၣ်သ့ၣ်သ့ၣ် ဝံလၢအကွဲးဝဲ လံာ်စီဆှံ တကတြူၢ်အံၤန့ၣ် နတသ့ၣ်ညါအဂ့ၢ် ဂ့ၤဂ့ၤဘၣ်. အဃိ နမ့ၢ်အဲၣ်ဒိး မၤအါထီၣ် နတၢ်သူၣ်ဆူၣ်သးဆူၣ် ဒ်သိးနကအဲၣ်ဒိး သ့ၣ်ညါအါထီၣ် တၢ်ဂ့ၢ်လၢ ဝံတဂၤအံၤကွဲးဝဲန့ၣ် နမၤအီၤ ကသ့ဒ်လဲၣ်.
၁၅ အဆိကတၢၢ် သံကွၢ်လီၤနသးလၢ ‘ဘၣ်ဃးဒီးပှၤကွဲးလံာ်တဂၤအံၤန့ၣ် ယသ့ၣ်ညါပာ်စၢၤ တၢ်ဂ့ၢ်မနုၤလဲၣ်.’ အဝဲမ့ၢ် မတၤလဲၣ်, အဝဲအိၣ်ဖဲလဲၣ် ဒီးအဝဲမၤ တၢ်ဖံးတၢ်မၤ မနုၤလဲၣ်. ပမ့ၢ်ဃုသ့ၣ်ညါ အါထီၣ်တၢ်ဂ့ၢ်တဖၣ်အံၤန့ၣ် ဘၣ်သ့ၣ်သ့ၣ် ကမၤစၢၤပှၤဒ်သိး ပကနၢ်ပၢၢ်အါထီၣ် ဘၣ်ဃးဒီး တၢ်ကတိၤ မ့တမ့ၢ် တၢ်အဒိတဖၣ်လၢ ပှၤကွဲးလံာ်သူဝဲန့ၣ်လီၤ. ဖဲနဖးလံာ်စီဆှံ အဆၢကတီၢ် ဃုကွၢ်တၢ်ကတိၤသ့ၣ်တဖၣ်လၢ အကမၤစၢၤနၤ ဒ်သိးနကသ့ၣ်ညါထီၣ် ဘၣ်ဃးဒီး ပှၤကွဲးလံာ်တဂၤအံၤ မ့ၢ်ပှၤဒ်လဲၣ်တဂၤလဲၣ် န့ၣ်တက့ၢ်.
၁၆ ဒီးအဂၤတခါန့ၣ် နမ့ၢ်သ့ၣ်ညါလၢ လံာ်အံၤဘၣ်တၢ်ကွဲးအီၤလၢ အခါဖဲလဲၣ်န့ၣ် ကကဲထီၣ်တၢ်မၤစၢၤလၢ နဂီၢ်ဖးဒိၣ်လီၤ. နဃုသ့ၣ်ညါ တၢ်ဂ့ၢ်တဖၣ်အံၤလၢ “ဟီၣ်ခိၣ်သီ တၢ်ကွဲးကျိာ်ထံ လံာ်စီဆှံ” (New World Translation of the Holy Scriptures) အလီၢ်ခံ “လံာ်စီဆှံကတြူၢ်တဖၣ်အဂ့ၢ်” (Table of the Books of the Bible) အပူၤသ့ဝဲလီၤ. တကးဒံးဘၣ် တၢ်ဆၢကတီၢ်လၢ အဘၣ်ဃးဒီးဝံတဖၣ် ဒီးစီၤပၤတဖၣ်န့ၣ် နကွၢ်ဖဲ A6 တၢ်ဂ့ၢ်ဘၣ်ထွဲလိာ်သးအပူၤ သ့ဝဲလီၤ. ဖဲနမၤလိ လံာ်စီဆှံတဘ့ၣ်လၢ ဝံတဂၤကွဲးဝဲအခါ နမ့ၢ်ဃုသ့ၣ်ညါ ပှၤလၢစိၤဖဲန့ၣ်တဖၣ် အတၢ်အိၣ်မူ မၤအသးဒ်လဲၣ်န့ၣ် ဂ့ၤဝဲလီၤ. ဝံတဂၤန့ၣ် ဂုာ်ကျဲးစၢးမၤစၢၤ ပှၤအဂၤလၢ အကမၤဂ့ၤထီၣ် တၢ်ပာ်သူၣ်ပာ်သး မ့တမ့ၢ် လုၢ်လၢ်မနုၤသ့ၣ်တဖၣ်လဲၣ်. မတၤသ့ၣ်တဖၣ် အိၣ်မူတကတီၢ်ဃီ ဒီးပှၤကွဲးလံာ်တဂၤအံၤန့ၣ်လဲၣ်. ဒ်သိးနကနၢ်ပၢၢ်အါထီၣ် တၢ်အိၣ်အသးတဖၣ်အဂီၢ် ဘၣ်သ့ၣ်သ့ၣ် နကဘၣ်ကွၢ် လံာ်စီဆှံအကတြူၢ်လၢ အဂၤတဖၣ်လီၤ. အဒိ ဒ်သိးနကနၢ်ပၢၢ်အါထီၣ် တၢ်အိၣ်အသးလၢ ဝံဧၤမိၣ် အစိၤအဂီၢ် နမ့ၢ်ဖး လံာ်စီဆှံအဆၢအဂၤတဖၣ်ဖဲ ၂ စီၤပၤ ၁၄:၂၅-၂၈ ဒီး ၂ ကွဲးနီၣ်တၢ် ၂၆:၁-၁၅ အပူၤန့ၣ် ကကဲဘျုးဒိၣ်မးလီၤ. * တကးဒံးဘၣ် ဘၣ်သ့ၣ်သ့ၣ် ဝံဟိၤၡ့ န့ၣ်အိၣ်မူ တကတီၢ်ဃီဒီး ဝံဧၤမိၣ်အဃိ နကဘၣ်ကွၢ်စ့ၢ်ကီးဒီး လံာ်လၢဝံဟိၤၡ့ကွဲးဝဲန့ၣ်လီၤ. နမ့ၢ်မၤဒ်န့ၣ်န့ၣ် နကနၢ်ပၢၢ်အါထီၣ် တၢ်အိၣ်အသးလၢ ဝံဧၤမိၣ်အစိၤလီၤ.—ဟိၤၡ့ ၁:၁-၁၁; ဧၤမိၣ် ၁:၁.
ပာ်သူၣ်ပာ်သးတၢ်ဂ့ၢ် ဆံးဆံးဖိသ့ၣ်တဖၣ်
၁၇-၁၈. တဲဖျါထီၣ် တၢ်အဒိလၢ လံာ်အဆၢအပူၤ မ့တမ့ၢ် နနီၢ်ကစၢ် အတၢ်လဲၤခီဖျိ ဒ်သိးနကပာ်ဖျါထီၣ်လၢ တၢ်ဂ့ၢ်လၢ အဖျါလၢအရ့တဒိၣ်တဖၣ်န့ၣ် အမၤစၢၤနၤ လၢနမၤနီၢ်ကစၢ် တၢ်မၤလိလံာ်စီဆှံ ကမုာ်ဒိၣ်ထီၣ်အဂီၢ် ဒ်လဲၣ်န့ၣ်တက့ၢ်.
၁၇ ဖဲပဖးလံာ်စီဆှံအခါ ပမ့ၢ်အိၣ်ဒီးသးလၢ အဲၣ်ဒိးမၤလိအါထီၣ်တၢ်န့ၣ် ဂ့ၤဒိၣ်မးလီၤ. အဒိ နကဖး ဝံအတၢ်စံးပာ်ဖဲ စကၤရယၤ အဆၢဒိၣ် ၁၂ လၢအတဲဆိပာ်ဝဲ မ့းၡံအၤ အတၢ်သံအဂ့ၢ်န့ၣ်လီၤ. (စကၤရယၤ ၁၂:၁၀) ဖဲနဖးတုၤလၢ အဆၢဖိ ၁၂ အခါ နကထံၣ်ဘၣ်လၢ ဖဲမ့းၡံအၤသံအခါ “စီၤနၤသၣ်အဟံၣ် အပှၤဒူၣ်ဖိ” ကဟီၣ် ဒီးကသူၣ်အုးသးအုး ဒိၣ်မးလီၤ. ပာ်သူၣ်ပာ်သး တၢ်ကတိၤတဖၣ်အံၤ ဒီးအိၣ်ပတုာ်ဝံၤ သံကွၢ်လီၤနသးလၢ ‘စီၤနၤသၣ်အဟံၣ် အပှၤဒူၣ်ဖိ ဒီးမ့းၡံအၤန့ၣ် ဘၣ်ထွဲလိာ်အသးဒ်လဲၣ်. ယဃုသ့ၣ်ညါအါထီၣ် တၢ်ဂ့ၢ်တၢ်ကျိၤလၢ အဂၤကသ့ဒံးဧါ.’ အဃိ နကဃုသ့ၣ်ညါအါထီၣ် တၢ်ဂ့ၢ်တၢ်ကျိၤအံၤလီၤ. ဒီးနကထံၣ်န့ၢ် လံာ်စီဆှံအဆၢလၢအမ့ၢ် ၂ ၡမူၤအ့လး ၅:၁၃, ၁၄ လီၤ. ဖဲန့ၣ်န့ၣ် နကသ့ၣ်ညါဘၣ်လၢ စီၤနၤသၣ်န့ၣ် မ့ၢ်ဝဲစီၤပၤဒၤဝံး အဖိခွါတဂၤလီၤ. ဒီးဖဲ လူၤကၣ် ၃:၂၃, ၃၁ န့ၣ်နကထံၣ်ဘၣ်လၢ ယ့ၣ်ၡူးန့ၣ် ဟဲလီၤစၢၤလီၤသွဲၣ်လၢ စီၤနၤသၣ်န့ၣ်လီၤ. စီၤနၤသၣ်န့ၣ် နီၢ်မၤရံ ဟဲလီၤစၢၤလီၤသွဲၣ် လၢအီၤလီၤ. * (ကွၢ် လါယူၤ ၂၀၁၈, ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ တၢ်ဂ့ၢ်ဘျးစဲ, ကဘျံးပၤ ၆, စီၤယိၤသးအပၢ်န့ၣ် မ့ၢ်မတၤလဲၣ် တက့ၢ်.) ဖဲန့ၣ်န့ၣ် နကသးစၢၢ်ဆၢထီၣ် တၢ်ဂ့ၢ်တၢ်ကျိၤတဘျီဃီလီၤ. နသ့ၣ်ညါလၢ ဝံအတၢ်စံးပာ်အိၣ်ဝဲလၢ ယ့ၣ်ၡူးကဟဲလီၤစၢၤလီၤသွဲၣ်လၢ စီၤဒၤဝံးအဟံၣ်ဖိဃီဖိလီၤ. (မးသဲ ၂၂:၄၂) ဘၣ်ဆၣ် စီၤဒၤဝံး အဖိခွါအိၣ်အဂၤ ၂၀ ဘျဲၣ်ညါလီၤ. အဃိ ဝံစကၤရယၤ ပာ်ဖျါထီၣ်ဝဲ လီၤတံၢ်လီၤဆဲးလၢ စီၤနၤသၣ် အဟံၣ်ဖိဃီဖိကဟီၣ်လၢ ယ့ၣ်ၡူးအတၢ်သံန့ၣ် တမ့ၢ်တၢ်လၢ အလီၤကမၢကမၣ်ဘၣ်.
၁၈ ဆိကမိၣ်ကွၢ် တၢ်အဒိလၢ အဂၤတခါတက့ၢ်. ဖဲ လူၤကၣ် အဆၢဒိၣ်တၢန့ၣ် ပဖးဘၣ်လၢ မူခိၣ်ကလူး ကၤဘြံၤအ့လး ဟဲလၢနီၢ်မၤရံအိၣ် ဒီးတဲဘၣ်အီၤလၢ အဝဲကအိၣ်ဖျဲၣ်ထီၣ် အဖိခွါတဂၤ ဒီးဖိခွါအံၤ “ကမ့ၢ်ပှၤအဒိၣ်, ဒီးကဘၣ်တၢ်ကိးအီၤလၢ တၢ်ထီကတၢၢ် အဖိခွါလီၤ. ဒီးကစၢ်ယွၤကဟ့ၣ်အီၤလၢ အပၢ်စီၤဒၤဝံးအလီၢ်ပစိာ်, ဒီးကပၢ [“ပၢတၢ်ဒ်စီၤပၤ,” NWT] ဘၣ်စီၤယၤကိာ်အဟံၣ် အစိၤစိၤအဃၣ်ဃၣ်လီၤ.” (လူၤကၣ် ၁:၃၂, ၃၃) ပဝဲအါတက့ၢ်န့ၣ် ပပာ်သူၣ်ပာ်သးဘၣ် ကၤဘြံၤအ့လး အတၢ်ကတိၤ အဆိကတၢၢ်တကူာ်လၢ အတဲဝဲလၢ ယ့ၣ်ၡူးကဘၣ်တၢ်ကိးအီၤလၢ “တၢ်ထီကတၢၢ်အဖိခွါ” လီၤ. ဘၣ်ဆၣ် ကၤဘြံၤအ့လး တဲစ့ၢ်ကီးဝဲလၢ ယ့ၣ်ၡူး “ကပၢတၢ်ဒ်စီၤပၤ” လီၤ. အဃိ ပကသံကွၢ်ဘၣ်လၢ ဘၣ်ဃးဒီး ကၤဘြံၤအ့လး အတၢ်ကတိၤအံၤန့ၣ် ဘၣ်သ့ၣ်သ့ၣ် နီၢ်မၤရံ ကဆိကမိၣ်ဘၣ်ဝဲဒ်လဲၣ်. မ့ၢ်အဝဲဆိကမိၣ်ဝဲလၢ ယ့ၣ်ၡူးန့ၣ် ကထီၣ်စီၤပၤဟ့ၤရိာ်အလီၢ် မ့တမ့ၢ် ကဟံးန့ၢ် ပှၤလၢအန့ၢ်ဘၣ်သါ စီၤပၤဟ့ၤရိာ်အလီၢ် ဒီးကပၢဝဲ ပှၤအံၣ်စရ့လးဖိတဖၣ်န့ၣ်ဧါ. ယ့ၣ်ၡူးမ့ၢ်ကဲထီၣ်ဘၣ်ဖုး စီၤပၤန့ၣ် နီၢ်မၤရံကကဲထီၣ် စီၤပၤအမိၢ် ဒီးအဝဲအဟံၣ်ဖိဃီဖိတဖၣ် ကအိၣ်ဘၣ်လၢနီပူၤလီၤ. ဘၣ်ဆၣ် လံာ်စီဆှံ တပာ်ဖျါထီၣ်ဝဲလၢ နီၢ်မၤရံတဲဝဲ ကၤဘြံၤအ့လး ဘၣ်ဃးဒီးတၢ်ဂ့ၢ်ဒ်န့ၣ် နီတဘျီဘၣ်. ဒီးအဝဲတဃ့ဝဲ တၢ်အလီၢ်အလၤလၢ ယွၤအဘီအမုၢ်အပူၤ ဒ်ယ့ၣ်ၡူးအပျဲၢ်အဘီၣ်ခံဂၤ ဃ့တဲအသိး နီတဘျီဘၣ်. (မးသဲ ၂၀:၂၀-၂၃) တၢ်ဂ့ၢ်တဖၣ်အံၤန့ၣ် ဒုးသ့ၣ်ညါပှၤလၢ နီၢ်မၤရံန့ၣ် မ့ၢ်ပှၤလၢအအိၣ်ဒီး တၢ်ဆီၣ်လီၤသးဒိၣ်မးလီၤ.
၁၉-၂၀. ဒ် ယၤကိာ် ၁:၂၂–၂၅ ဒီး ၄:၈ ပာ်ဖျါထီၣ်ဝဲအသိး ဖဲပမၤလိတၢ်အခါ ပတၢ်တိာ်ပာ်န့ၣ် ကဘၣ်မ့ၢ်မနုၤလဲၣ်.
၁၉ ထီဘိန့ၣ် ပကဘၣ်သ့ၣ်နီၣ်ထီၣ်လၢ ဖဲပမၤလိ ကစၢ်ယွၤအကလုၢ်ကထါ ဒီးပတၢ်ကရၢကရိ အလံာ်လဲၢ်တဖၣ်အခါ ပတၢ်တိာ်ပာ် အခိၣ်သ့ၣ်မ့ၢ်ဝဲ ပကဘူးထီၣ်ဒီး ယဟိဝၤယွၤလီၤ. ပအဲၣ်ဒိးသ့ၣ်ညါလီၤပသး လီၤတံၢ်လီၤဆဲးလၢ ‘ပက့ၢ်ပဂီၤ’ မ့တမ့ၢ် ပမ့ၢ်ပှၤဒ်လဲၣ်တဂၤလဲၣ် ဒီးဒ်သိး ပကမၤသးခု ယွၤအသးအဂီၢ် ပကဘၣ်မၤ တၢ်ဆီတလဲ မနုၤတဖၣ်လဲၣ်န့ၣ်လီၤ. (ဖး ယၤကိာ် ၁:၂၂-၂၅; ၄:၈ တက့ၢ်.) ကိးဘျီဒဲး ဖဲပစးထီၣ်မၤလိတၢ်အခါ ပကြၢးဃ့ ယဟိဝၤယွၤ အသးစီဆှံ လၢကမၤစၢၤပှၤအဂီၢ်လီၤ. ဒီးပကြၢးဃ့အီၤလၢ ကမၤစၢၤပှၤဒ်သိး ပကန့ၢ်ဘၣ် အဘျုးအဂ့ၤကတၢၢ် လၢတၢ်ဂ့ၢ်တၢ်ကျိၤလၢ ပမၤလိအီၤတဖၣ် ဒီးကမၤစၢၤပှၤဒ်သိး ပကသ့ၣ်ညါလၢ ပဘၣ်မၤ တၢ်ဆီတလဲ မနုၤတဖၣ်လဲၣ်န့ၣ်လီၤ.
၂၀ ဘၣ်ဃးဒီး ယွၤအခ့အပှၤလၢ အအိၣ်ဒီးတၢ်သးတီတဂၤန့ၣ် ပှၤကွဲးထါစံးထီၣ်ပတြၢၤ တဲဝဲလၢအဝဲ “မုာ်လၤဝဲလၢ ယွၤအတၢ်သိၣ်တၢ်သီအပူၤ, ဒီးလၢအတၢ်သိၣ်တၢ်သီန့ၣ် ဆိကမိၣ်ဝဲလၢ မုၢ်ဆါဆဲးလၢမုၢ်နၤလီၤ. . . . ဒီးကယဲၢ်အမၤတၢ် တမံၤလၢ်လၢ်န့ၣ်, ကကဲထီၣ်လိၣ်ထီၣ်တၢ်လီၤ.” မ်ပဝဲကိးဂၤဒဲး လီၤဂာ်ဒ်န့ၣ်အသိးတက့ၢ်.—စံးထီၣ်ပတြၢၤ ၁:၂, ၃.
တၢ်သးဝံၣ် ၈၈ ဒုးသ့ၣ်ညါယၤလၢ နကျဲဧိၤကပူၤဧိၤတက့ၢ်
^ လံာ်အဆၢ. 5 ယဟိဝၤယွၤ ဟ့ၣ်ပှၤတၢ်ဂ့ၢ်တၢ်ကျိၤအါမး ဒ်သိးပကကွၢ်, ဖး ဒီးမၤလိအီၤ အဂီၢ်လီၤ. တၢ်မၤလိတခါအံၤ ကမၤစၢၤပှၤဒ်သိး ပကဃုထၢတၢ်လၢ ပကမၤလိအီၤ ဒီးပာ်ဖျါထီၣ်ဝဲ တၢ်ဟ့ၣ်ကူၣ်လၢ ကမၤစၢၤပှၤဒ်သိး ပကဒိးန့ၢ်ဘၣ်အဘျုးလၢ ပနီၢ်ကစၢ် တၢ်မၤလိလံာ်စီဆှံအပူၤ အါအါအဂီၢ်လီၤ.
^ လံာ်အဆၢ. 16 လၢ ဟီၣ်ခိၣ်သီ တၢ်ကွဲးကျိးထံလံာ်စီဆှံ လၢကျိာ်အဂၤန့ၣ် နကထံၣ်ဘၣ်လၢ လံာ်စီဆှံအဆၢတဖၣ်အံၤန့ၣ် မ့ၢ်ဝဲလံာ်စီဆှံအဆၢလၢ အဘျးစဲလိာ်အသးဒီး ဧၤမိၣ် ၁:၁ န့ၣ်လီၤ.
^ လံာ်အဆၢ. 17 လၢ ဟီၣ်ခိၣ်သီ တၢ်ကွဲးကျိးထံလံာ်စီဆှံ လၢကျိာ်အဂၤန့ၣ် နကထံၣ်ဘၣ်လၢ လံာ်စီဆှံအဆၢတဖၣ်အံၤန့ၣ် မ့ၢ်ဝဲလံာ်စီဆှံအဆၢ လၢအဘျးစဲလိာ်အသးဒီး စကၤရယၤ ၁၂:၁၂ န့ၣ်လီၤ.
^ လံာ်အဆၢ. 63 တၢ်တဲဖျါထီၣ်တၢ်ဂီၤ အခီပညီ– မိၢ်ပၢ်တဖၣ် မၤစၢၤအဖိ ဒ်သိးအဝဲသ့ၣ် ကကတဲာ်ကတီၤ အသးလၢ တၢးထီခိးတၢ် တၢ်မၤလိအဂီၢ်လီၤ.
^ လံာ်အဆၢ. 65 တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤ ဃုသ့ၣ်ညါဝဲ စီၤဧၤမိၣ်အဂ့ၢ်. ဒီးတၢ်ဂီၤလၢအလီၢ်ခံန့ၣ် ပာ်ဖျါထီၣ်ဝဲ တၢ်လၢဒီပုၢ်ဝဲၢ်တဂၤအံၤ ဆိကမိၣ်ထံ ဒီးထံၣ်တမှံကွၢ်ဝဲ ဖဲအဖးဝဲ လံာ်စီဆှံအခါလီၤ.
