တၢ်တူၢ်လိာ်တမှံၤန့ၣ်—မ့ၢ်တၢ်လၢအရ့ဒိၣ်
“တၢ်ကဒူးကဒ့ၣ်တအိၣ်ဘၣ်ဒီး တူၢ်ထံၣ်တူၢ်တမှံၤလိာ်သုသးတက့ၢ်.”—၁ ပ့းတရူး ၄:၉.
၁. ခရံာ်ဖိတဖၣ်လၢ တၢ်မၢဖိအစိၤန့ၣ် ထံၣ်ဘၣ်တၢ်ကီတၢ်ခဲ မနုၤတဖၣ်လဲၣ်.
ဖဲ ခ.န ၆၂ ဒီး ၆၄ အဘၢၣ်စၢၤန့ၣ် တၢ်မၢဖိပ့းတရူး ကွဲးဝဲလံာ်ဆူပှၤတမှံၤလၢအ “လီၤပြံလီၤပြါလၢ ပီၣ်တူး, လၢကလၤတံ, လၢကးပၤဒကံ, လၢအၤစံ, ဒီးလၢဘံၤသူၤနံ” တဖၣ်အအိၣ်လီၤ. (၁ ပ့းတရူး ၁:၁) ဒီပုၢ်ဝဲၢ်မုၣ်ခွါတဖၣ်အံၤ အိၣ်ဟဲလၢတၢ်လီၢ်အါတီၤလီၤ. အဝဲသ့ၣ်ထံၣ်ဘၣ် “တၢ်လ့ပစီမ့ၣ်အူ” လၢအမ့ၢ် တၢ်မၤအၢမၤနးအဃိ အဝဲသ့ၣ်လိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ ဒီးတၢ်ဟံးစုနဲၣ်ကျဲလီၤ. တကးဒံးဘၣ် အဝဲသ့ၣ်အိၣ်ဘၣ်ဝဲလၢ တၢ်ဆၢကတီၢ်လၢ အကီအခဲဒိၣ်မးန့ၣ်လီၤ. စီၤပ့းတရူး ကွဲးဝဲလၢ “တၢ်ခဲလၢာ်အကတၢၢ်န့ၣ်ဘူးထီၣ်လံ.” စီၤပ့းတရူး တဲဝဲဒ်န့ၣ်ဝံၤ တချုးပှဲၤထီၣ်အနံၣ်တဆံန့ၣ် ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤလီၤ. ခရံာ်ဖိတဖၣ်လၢ အအိၣ်လၢတၢ်လီၢ်ကိးပူၤဒဲးန့ၣ် ဒ်သိးအဝဲသ့ၣ်လဲၤခီဖျိ တၢ်ဆၢကတီၢ်လၢ အကီအခဲအံၤကန့ၢ်အဂီၢ် တၢ်မနုၤမၤစၢၤ အဝဲသ့ၣ်လဲၣ်.—၁ ပ့းတရူး ၄:၄, ၇, ၁၂.
၂, ၃. ဘၣ်မနုၤအဃိ စီၤပ့းတရူး ဟ့ၣ်သဆၣ်ထီၣ်အဒီပုၢ်ဝဲၢ်တဖၣ်လၢ ကဘၣ်တူၢ်လိာ်တမှံၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၂ ဖဲန့ၣ်အခါစီၤပ့းတရူးဟ့ၣ်သဆၣ်ထီၣ် ခရံာ်ဖိတဖၣ်လၢ “တူၢ်ထံၣ်တူၢ်တမှံၤလိာ်သုသးတက့ၢ်.” (၁ ပ့းတရူး ၄:၉) ကြံးအတၢ်ကတိၤလၢအမ့ၢ် “တူၢ်ထံၣ်တူၢ်တမှံၤ” န့ၣ် အခီပညီမ့ၢ်ဝဲ “ပာ်ဖျါထီၣ်တၢ်အဲၣ်တၢ်ကွံ မ့တမ့ၢ် တၢ်သးကညီၤလၢ ပှၤလၢအအိၣ်ဟဲလၢ တၢ်လီၢ်အဂၤတဖၣ်အဖီခိၣ်လီၤ.” မ့မ့ၢ်ဒီပုၢ်ဝဲၢ်တဖၣ်အံၤ အဝဲသ့ၣ် သ့ၣ်ညါတ့ၢ်လိာ်သး ဒီးမၤသကိးတၢ်ဘၣ်ဆၣ် စီၤပ့းတရူးဟ့ၣ်သဆၣ်ထီၣ် အဝဲသ့ၣ်လၢ ကတူၢ်လိာ်ခီၣ်ဆၢ ‘လိာ်သး’ တဂၤဒီးတဂၤလီၤ. တၢ်တူၢ်လိာ်တမှံၤန့ၣ် မၤစၢၤအဝဲသ့ၣ်ဒ်လဲၣ်.
၃ တၢ်တူၢ်လိာ်တမှံၤန့ၣ် မၤဂ့ၤထီၣ်အဝဲသ့ၣ် အတၢ်ရ့လိာ်သး တဂၤဒီးတဂၤလီၤ. မ့မ့ၢ်နၤမီၤ, မ့ၢ်နနီၣ်ဘၣ်လၢ ပှၤကွဲမုာ်နၤလၢအဟံၣ် အိၣ်တဘျီဘျီဧါ. နမ့ၢ်ကွဲမုာ်ပှၤဂၤလၢ နဟံၣ်န့ၣ် နကဘူးထီၣ်ဒီးအီၤလီၤ. ကျဲအဂ့ၤတဘိလၢ နကသ့ၣ်ညါအါထီၣ် ဒီပုၢ်ဝဲၢ်တဖၣ်အဂ့ၢ်န့ၣ် မ့ၢ်ဝဲနကွဲမုာ် အဝဲသ့ၣ်လၢ နဟံၣ်လီၤ. ဖဲစီၤပ့းတရူးအစိၤန့ၣ် မ့ၢ်လၢတၢ်အိၣ်သး နးထီၣ်ဝဲအဃိ ခရံာ်ဖိဖဲန့ၣ်တဖၣ် ကဘၣ်ရ့လိာ်သး ဘူးဘူးတံၢ်တံၢ်လီၤ. “လၢမုၢ်နံၤအခံကတၢၢ်” အဆၢကတီၢ်န့ၣ် ပကဘၣ်မၤ ဒ်န့ၣ်စ့ၢ်ကီးလီၤ.—၂ တံၤမသ့း ၃:၁.
၄. လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၄ ပတူၢ်တံၤတူၢ်တမှံၤ ‘လိာ်သး’ တဂၤဒီးတဂၤကသ့ဒ်လဲၣ်. ဒ်သိးပသုတတူၢ်လိာ်တမှံၤတဂ့ၤအဂီၢ် တၢ်မနုၤမၤတံာ်တာ်ပှၤလဲၣ်. ဒီးပမၤနၢၤအီၤကသ့ဒ်လဲၣ်. ဒ်သိးပကကဲပှၤတမှံၤလၢအဂ့ၤအဂီၢ် တၢ်မနုၤကမၤစၢၤပှၤလဲၣ်.
တၢ်ခွဲးတၢ်ယာ်လၢ ပကတူၢ်လိာ်တမှံၤအဂီၢ်
၅. လၢတၢ်အိၣ်ဖှိၣ်ရိဖှိၣ်န့ၣ် ပပာ်ဖျါထီၣ် တၢ်တူၢ်လိာ်တမှံၤကသ့လၢ ကျဲဒ်လဲၣ်.
၅ လၢတၢ်အိၣ်ဖှိၣ်ရိဖှိၣ်တဖၣ်အပူၤ. ယဟိဝၤယွၤ ဒီးအတၢ်ကရၢကရိကွဲမုာ်ပှၤလၢ ပကလဲၤထီၣ်တၢ်အိၣ်ဖှိၣ်ရိဖှိၣ်လီၤ. လၢတၢ်န့ၣ်အဃိ ပအဲၣ်ဒိးလၢ ပှၤလၢအဟဲထီၣ်တၢ်အိၣ်ဖှိၣ်ကိးဂၤဒဲး လီၤဆီဒၣ်တၢ်ပှၤအသီတဖၣ် ကတူၢ်ဘၣ်လၢပတူၢ်လိာ်မုာ် အဝဲသ့ၣ်ဂ့ၤဂ့ၤန့ၣ်လီၤ. (ရိမ့ၤ ၁၅:၇) ယဟိဝၤယွၤကွဲမုာ်အဝဲသ့ၣ်အဃိ အဝဲသ့ၣ် မ့ၢ်ဟဲကူသိးတၢ်ဒ်လဲၣ်ဂ့ၤ မ့ၢ်ဖျါဒ်လဲၣ်ဂ့ၤ ပကဘၣ်ရ့ဒီးတူၢ်လိာ် အဝဲသ့ၣ်ဂ့ၤဂ့ၤလီၤ. (ယၤကိာ် ၂:၁-၄) ပှၤတမှံၤတဂၤမ့ၢ်ဟဲန့ၣ် နကွဲမုာ်အီၤလၢ ကဆ့ၣ်နီၤလၢနကပၤကသ့ဧါ. ဘၣ်သ့ၣ်သ့ၣ် အဝဲကစံးဘျုးစံးဖှိၣ်နၤလၢ နမၤစၢၤအီၤဒ်သိး ကနၢ်ပၢၢ်တၢ်ရဲၣ်တၢ်ကျဲၤတဖၣ်အဂီၢ် မ့တမ့ၢ် နပၠးအီၤလံာ်စီဆှံအဆၢတဖၣ်အဃိလီၤ. ပမ့ၢ်မၤဒ်အံၤန့ၣ် မ့ၢ်ကျဲအဂ့ၤကတၢၢ်တဘိလၢပ “တူၢ်လိာ်ပှၤသမှံၤတဖၣ်” လီၤ.—ရိမ့ၤ ၁၂:၁၃, ခ့ခါစှီၤကျိာ်.
၆. ပကဘၣ်ပာ်ဖျါထီၣ် တၢ်တူၢ်လိာ်တမှံၤ လီၤဆီဒၣ်တၢ် လၢမတၤတဖၣ်အဖီခိၣ်လဲၣ်.
၆ ကွဲအီၣ်အီၤကိၣ်ဖိနီဖိ မ့တမ့ၢ် မ့ၤဖိထံဖိ. ပှၤလၢပျၢၤတဖၣ် အဝဲသ့ၣ်ညီနုၢ်ပာ်ဖျါထီၣ်ဝဲ တၢ်တူၢ်လိာ်တမှံၤခီဖျိ ကွဲမုာ်ပှၤဂၤလၢ ကဟဲအီၣ်သကိးတၢ်လၢအဟံၣ် ဒ်သိးကပာ်ဖျါထီၣ်လၢ အဝဲသ့ၣ်အဲၣ်ဒိးရ့လိာ်သး မ့တမ့ၢ် အိၣ်ဃူအိၣ်ဖိးဒီးအီၤလီၤ. (၁ မိၤၡ့ ၁၈:၁-၈; စံၣ်ညီၣ်ကွီၢ် ၁၃:၁၅; လူၤကၣ် ၂၄:၂၈-၃၀) ပကဘၣ်ပာ်ဖျါထီၣ် တၢ်တူၢ်လိာ်တမှံၤ လီၤဆီဒၣ်တၢ် လၢမတၤတဖၣ်အဖီခိၣ်လဲၣ်. မ့ၢ်ဝဲပဒီပုၢ်ဝဲၢ်တဖၣ်လၢ တၢ်အိၣ်ဖှိၣ်အပူၤန့ၣ်လီၤ. ဆၢကတီၢ်ခဲအံၤ တၢ်ကီတၢ်ခဲဒံးယံာ်ဒံးအါထီၣ်ဝဲအဃိ ပကဘၣ်သန့ၤပသးလၢ ပဒီပုၢ်ဝဲၢ်တဖၣ်အအိၣ် ဒီးကဲထီၣ်တံၤသကိး လၢအိၣ်ဒီးတၢ်သးတီန့ၣ်လီၤ. လၢညါန့ၣ် ပှၤဘ့ၤသ့လးဖိတဖၣ်လၢ အအိၣ်လၢကီၢ်အမဲရကၤန့ၣ် စးထီၣ်မၤဝဲတၢးထီခိးတၢ် တၢ်မၤလိလၢ ဟါခီ ၆:၄၅ မံးနံးလီၤ. ဘၣ်ဆၣ်ဖဲ ၂၀၁၁ န့ၣ်ပှၤပၢဆှၢတၢ်ကမံးတံာ် ဆီတလဲဝဲ တၢ်ဆၢကတီၢ်လၢ ဟါခီ ၆:၁၅ မံးနံးလီၤ. ဘၣ်မနုၤအဃိလဲၣ်. လၢတၢ်ဘိးဘၣ်သ့ၣ်ညါအပူၤန့ၣ် ပာ်ဖျါထီၣ်ဝဲလၢ တၢးထီခိးတၢ် တၢ်မၤလိဝံၤအလီၢ်ခံ ဒ်သိးပှၤဘ့ၤသ့လးဖိတဖၣ် ကန့ၢ်အါထီၣ်တၢ်ဆၢကတီၢ်လၢ ကတူၢ်လိာ်ပှၤဂၤအတၢ်ကွဲမုာ် ဒီးပာ်ဖျါထီၣ် တၢ်တူၢ်လိာ်တမှံၤလၢ ပှၤဂၤအဖီခိၣ်လီၤ. ဝဲၤတြၢ်လၢအဂၤတဖၣ်စ့ၢ်ကီး မၤဝဲဒ်န့ၣ်အသိးလီၤ. ခီဖျိမၤဝဲဒ်န့ၣ်အဃိ ကဲထီၣ်တၢ်ခွဲးတၢ်ယာ်ဖးဒိၣ်လၢ ပှၤဘ့ၤသ့လးဖိတဖၣ် ကရ့လိာ်အသးတဂၤဒီးတဂၤအဂီၢ်လီၤ.
မ့ၢ်နကွဲမုာ်ပှၤအသီတဖၣ်လၢ ကဟဲအီၣ်မ့ၤ, ကိၣ်ဖိနီဖိလၢနဟံၣ် မ့တမ့ၢ် ဟးလိာ်ကွဲဒီးနၤကသ့ဧါ
၇, ၈. ဖဲပှၤတမှံၤဟဲဟ့ၣ်တၢ်စံၣ်တဲၤတဲလီၤလၢ ပတၢ်အိၣ်ဖှိၣ်အခါ ပပာ်ဖျါထီၣ် တၢ်တူၢ်လိာ်တမှံၤကသ့လၢ ကျဲဒ်လဲၣ်.
၇ တဘျီတခီၣ် ဒီပုၢ်ဝဲၢ်လၢတၢ်အိၣ်ဖှိၣ်အဂၤ, ကဝီၤအပှၤကွၢ်တၢ် မ့တမ့ၢ် ဝဲၤတြၢ်အပှၤခၢၣ်စးန့ၣ် ကဟဲဟ့ၣ်တၢ်စံၣ်တဲၤတဲလီၤတၢ်လၢ ပတၢ်အိၣ်ဖှိၣ်လီၤ. မ့ၢ်ပဟံးန့ၢ်တၢ်ခွဲးတၢ်ယာ်လၢ ပပာ်ဖျါထီၣ် တၢ်တူၢ်လိာ်တမှံၤလၢ ဒီပုၢ်ဝဲၢ်တဖၣ်အံၤအဖီခိၣ်ကသ့ဧါ. (ဖး ၃ ယိၤဟၣ် ၅-၈ တက့ၢ်.) ပမၤအီၤသ့ခီဖျိ ပကွဲမုာ်အဝဲသ့ၣ် လၢကဟဲအီၣ်သကိးတၢ် မ့တမ့ၢ် ကဟဲဟးလၢပဟံၣ်လီၤ.
၈ ဒီပုၢ်ဝဲၢ်မုၣ်တဂၤလၢအအိၣ်လၢ ကီၢ်အမဲရကၤန့ၣ် သ့ၣ်နီၣ်ထီၣ်ဝဲလၢ “အဝဲဒီးအဝၤန့ၣ် တူၢ်လိာ်မုာ်ဝဲပှၤတမှံၤအါဂၤလၢ အဟဲဟ့ၣ်တၢ်စံၣ်တဲၤတဲလီၤတၢ် ဒီးအဝဲသ့ၣ်အမါ တဘျုးနံၣ်ညါ.” အဝဲတူၢ်ဘၣ်ဝဲလၢ ဒီပုၢ်ဝဲၢ်တဖၣ်အံၤ အတၢ်လဲၤခီဖျိ ကိးခါဒဲးန့ၣ် မၤဆူၣ်ထီၣ်အဂံၢ်အဘါ ဒီးတကတီၢ်ဃီန့ၣ် အဝဲသ့ၣ်ရ့လိာ်အသးမုာ်ဒိၣ်မး. အဝဲတဲဝဲ “ပမၤဒ်န့ၣ်အဃိ ပတသးအုးနီတဘျီဘၣ်.”
၉, ၁၀. (က) မတၤတဖၣ် ကလိၣ်ဘၣ်တၢ်လီၢ်လၢ ကအိၣ်ဝဲအဂီၢ်လဲၣ်. (ခ) ပှၤလၢအဟံၣ်ဆံးတဖၣ် မၤစၢၤဝဲကသ့ဧါ. ဟ့ၣ်အဒိတက့ၢ်.
၉ ပှၤတမှံၤလၢ ကဘၣ်အိၣ်ယံာ်တဖၣ်. လၢပျၢၤန့ၣ်ပှၤအါတက့ၢ် ကတဲာ်ကတီၤပာ်ဝဲ တၢ်လီၢ်လၢပှၤတမှံၤအဂီၢ်လီၤ. (ယိၤဘး ၃၁:၃၂; ဖံၤလ့မိၣ် ၂၂) မုၢ်မဆါတနံၤအံၤစ့ၢ်ကီး ပမၤဒ်န့ၣ်အသိးသ့ဝဲလီၤ. ညီနုၢ်န့ၣ် ဖဲကဝီၤအပှၤကွၢ်တၢ်ဒီးအမါ ဟဲလၢပတၢ်အိၣ်ဖှိၣ်အခါ အဝဲသ့ၣ်လိၣ်ဘၣ်ဝဲတၢ်လီၢ်လၢ ကအိၣ်ဝဲအဂီၢ်လီၤ. ဒီးပှၤလၢအဟဲထီၣ် ကၠိလၢတၢ်ကရၢကရိဒုးအိၣ်ထီၣ်ဝဲ ဒီးပှၤမၤစၢၤတၢ်လၢ တၢ်သူၣ်ထီၣ်ဘှီထီၣ် တၢ်မၤတဖၣ်စ့ၢ်ကီး ပဟ့ၣ်အဝဲသ့ၣ်တၢ်လီၢ်လၢ ကအိၣ်ဝဲအဂီၢ်သ့လီၤ. ခီဖျိလၢန့ဆၢၣ် တၢ်ဘၣ်ဒိဘၣ်ထံးအဃိ ပှၤလၢအဟံၣ်ဟးဂီၤတဖၣ်စ့ၢ်ကီး ပဒုးအိၣ်အဝဲသ့ၣ်လၢပဟံၣ် တုၤအဝဲသ့ၣ်တ့ထီၣ်က့ၤဝဲ အဟံၣ်ဝံၤတစုကသ့ဧါ. ပတကြၢးဆိကမိၣ်လၢ ထဲဒၣ်ပှၤလၢအဟံၣ်ဒိၣ်တဖၣ် မၤစၢၤဝဲသ့န့ၣ်ဘၣ်. ဘၣ်သ့ၣ်သ့ၣ် အဝဲသ့ၣ်မၤစၢၤဝဲ တဘျုးဘျီလံ. အဃိ နဟံၣ်မ့ၢ်ဆံးဒၣ်လဲာ် မ့ၢ်နတူၢ်လိာ်မုာ်အဝဲသ့ၣ်လၢ ကဟဲအိၣ်လၢနဟံၣ်ကသ့ဧါ.
၁၀ ဒီပုၢ်ဝဲၢ်ခွါတဂၤလၢအအိၣ်လၢ ခိၣ်ရံယါကလံၤထံး န့ၣ်သ့ၣ်နီၣ်ထီၣ်ဝဲ ဖဲပှၤလၢဟဲထီၣ် ကၠိလၢတၢ်ကရၢကရိဒုးအိၣ်ထီၣ်ဝဲတဖၣ် ဟဲအိၣ်လၢအဟံၣ်အခါလီၤ. အဝဲကွဲးဝဲလၢ “အခီၣ်ထံးန့ၣ် ပကိးအိၣ်အဝဲသ့ၣ်တဘူၣ်ဘၣ်မ့ၢ်လၢ ပဖျီသးဝံၤတယံာ်ဒံးဘၣ် ဒီးပဟံၣ်ဆံးအဃိလီၤ. ဘၣ်ဆၣ်လၢခံမ့ၢ်လၢ ပကွဲမုာ်ပှၤကၠိဖိတဖၣ်လၢ ကဟဲအိၣ်လၢပဟံၣ်အဃိ ပသးခုဒိၣ်မးလီၤ. ပထံၣ်ဘၣ်လၢ အဝဲသ့ၣ်မၤသကိး ယဟိဝၤယွၤအတၢ်မၤ ဒီးဂုာ်ကျဲးစၢးတုၤထီၣ်ထီၣ်ဘးလၢ အနီၢ်သးဖီတၢၣ်ဒ်သိးသိးအဃိ ပသးခုဒိၣ်မးလီၤ.”
၁၁. ပှၤလၢအဟဲသုးအသးလၢ ပတၢ်အိၣ်ဖှိၣ်တဖၣ်န့ၣ် ဘၣ်မနုၤအဃိ ပကဘၣ်တူၢ်လိာ်မုာ်အဝဲသ့ၣ်လဲၣ်.
၁၁ ဒီပုၢ်ဝဲၢ်မုၣ်ခွါအသီလၢ နတၢ်အိၣ်ဖှိၣ်ပူၤ. တဘျီတခီၣ် ဒီပုၢ်ဝဲၢ်မုၣ်ခွါ မ့တမ့ၢ် ဟံၣ်ဖိဃီဖိတဒူၣ်ဒူၣ် လၢအအိၣ်လၢတၢ်အိၣ်ဖှိၣ်အဂၤန့ၣ် ကဟဲသုးအသးလၢ နလီၢ်ကဝီၤအပူၤလီၤ. အဝဲသ့ၣ်ဟဲသုးအသးန့ၣ် ဘၣ်သ့ၣ်သ့ၣ် ကမ့ၢ်လၢနတၢ်အိၣ်ဖှိၣ် လိၣ်ဘၣ်တၢ်မၤစၢၤ မ့တမ့ၢ် ကမ့ၢ်လၢအဝဲသ့ၣ် မၤပှၤလဲၤလၢညါ ဒီးလီၤဘၣ်မူဒါလၢ နတၢ်အိၣ်ဖှိၣ်အဃိလီၤ. လၢအဝဲသ့ၣ်အဂီၢ်န့ၣ်မ့ၢ်ဝဲ တၢ်ဆီတလဲဖးဒိၣ်တခါလီၤ. အဝဲသ့ၣ်ကဘၣ်အိၣ်ဝဲလၢ တၢ်လီၢ်အသီ, တၢ်အိၣ်ဖှိၣ်အသီ, ဘၣ်သ့ၣ်သ့ၣ် ကဘၣ်မၤလိဝဲကျိာ်အသီ ဒီးတၢ်ဆဲးတၢ်လၤအသီလီၤ. လၢတၢ်န့ၣ်အဃိ နကွဲမုာ်အဝဲသ့ၣ်လၢ ကဟဲအီၣ်မ့ၤ, ကိၣ်ဖိနီဖိလၢနဟံၣ် မ့တမ့ၢ် ဟးလိာ်ကွဲဒီးနၤကသ့ဧါ. နမ့ၢ်မၤဒ်အံၤန့ၣ် ကကဲထီၣ်တၢ်မၤစၢၤလၢ အဝဲသ့ၣ် ကအိၣ်ဒီးတံၤသကိး ဒီးကလီၤဒုးဒီး ဒီပုၢ်ဝဲၢ်တဖၣ်လီၤ.
၁၂. ဖဲပတူၢ်လိာ်တမှံၤအခါ တလိၣ်လၢပကဘၣ် ကတဲာ်ကတီၤတၢ်အါအါဂီၢ်ဂီၢ်ဘၣ်န့ၣ် ဒီပုၢ်ဝဲၢ်မုၣ်ခွါတနီၤ အတၢ်လဲၤခီဖျိအိၣ်ဒ်လဲၣ်.
၁၂ ဒ်သိးနကတူၢ်လိာ်တမှံၤအဂီၢ် နတလိၣ်ကတဲာ်ကတီၤတၢ်ဒီဒူၣ်ဒီထၢဘၣ်. (ဖး လူၤကၣ် ၁၀:၄၁, ၄၂ တက့ၢ်.) ဒီပုၢ်ဝဲၢ်ခွါတဂၤ သ့ၣ်နီၣ်ထီၣ်က့ၤဝဲ ဖဲအဝဲဒီးအမါကဲထီၣ် မံးၡ့ၣ်နရ့ၣ် သီသီအခါန့ၣ်လီၤ. အဝဲတဲဝဲ “ပသးစၢ် ဒီးပတၢ်လဲၤခီဖျိတအိၣ်ဘၣ် ဒီးပသ့ၣ်နီၣ်ဘၣ်ပဟံၣ်လီၤ. ဘၣ်တဟါယမါသ့ၣ်နီၣ်ဘၣ်အဟံၣ်ဒိၣ်မး ဒီးယဂုာ်ကျဲးစၢး မၤမုာ်ထီၣ်အသးဘၣ်ဆၣ် ယမၤတန့ၢ်ဘၣ်. ဒီးကဘၣ်ဖဲ ဟါခီ ၇:၃၀ န့ၣ် ပနၢ်ဟူပှၤဒိတကျိာ်ပပဲတြီလီၤ. အဝဲမ့ၢ်ဝဲပှၤမၤလိလံာ်စီဆှံဖိ ဒီးအဝဲဆၢထၢၣ်လၢ ပဲတြီအမဲာ်ညါ ဒီးဟဲစိာ်န့ၢ်ပှၤ လံၣ်မိသၣ်သၢဖျၢၣ်လီၤ. အဝဲဟဲဝဲဒ်သိး ကတူၢ်လိာ်မုာ်ဝဲ မံးၡ့ၣ်နရ့ၣ် လၢအဟဲသီအံၤလီၤ. ပကိးနုာ်လီၤအီၤလၢဟံၣ်ပူၤ ဒီးပဒုးအီအီၤထံတခွး ဒီးပကျဲန့ၢ်အီၤ ခၠီးကလဲး ကိၢ်ကိၢ်တခွးလီၤ. ဖဲန့ၣ်အခါ ပတဲစွါဟံလံၤကျိာ်တဘၣ်ဒံးဘၣ် ဒီးအဝဲစ့ၢ်ကီး တဲကီၤလၤဝါကျိာ်တဘၣ်ဘၣ်.” ဒီပုၢ်ဝဲၢ်အံၤတဲဝဲလၢ တၢ်လဲၤခီဖျိအံၤ မၤစၢၤအဝဲသ့ၣ် ဒ်သိးကစးထီၣ်ရ့ဒီး ဒီပုၢ်ဝဲၢ်လၢအအိၣ်ဖဲန့ၣ်တဖၣ် ဒီးကအိၣ်ဒီးတၢ်သးခုအဂီၢ်လီၤ.
ဒ်သိးနကတူၢ်လိာ်တမှံၤအဂီၢ် တဘၣ်ပျဲတၢ်မၤတံာ်တာ်နၤ နီတမံၤတဂ့ၤ
၁၃. တၢ်တူၢ်လိာ်တမှံၤန့ၣ် ကမၤစၢၤနၤဒ်လဲၣ်.
၁၃ ဒ်သိးနကတူၢ်လိာ်တမှံၤအဂီၢ် မ့ၢ်နဘၣ်ယိၣ်တၢ်တဘျီဘျီဧါ. နမ့ၢ်ဘၣ်ယိၣ်တၢ်န့ၣ် တၢ်ဆၢကတီၢ်လၢအမုာ်ဒီး တၢ်ခွဲးတၢ်ယာ်လၢ နကရ့ဒီးပှၤလၢ ကကဲနတံၤသကိး ထီဘိတဖၣ်အဂီၢ် ကၡူကွံာ်ဝဲလီၤ. တၢ်တူၢ်လိာ်တမှံၤန့ၣ် မ့ၢ်ဝဲကျဲအဂ့ၤကတၢၢ်တဘိလၢ ပကမၤလီၤမၢ် ပတၢ်တူၢ်ဘၣ်လၢ ပအိၣ်သယုၢ်သညိန့ၣ်လီၤ. ဘၣ်ဆၣ်ပှၤတဂၤ ကတူၢ်လိာ်တမှံၤအဂီၢ် ဘၣ်မနုၤအဃိ မၤယံာ်မၤနီၢ်အသးလဲၣ်. မ့ၢ်လၢတၢ်ဂ့ၢ်အါမံၤအဃိလီၤ.
၁၄. ပကတူၢ်လိာ်ပှၤဂၤအတၢ်ကွဲမုာ် မ့တမ့ၢ် ပကကွဲမုာ်ပှၤဂၤအဂီၢ် ပမ့ၢ်တူၢ်ဘၣ်လၢ ပတၢ်ဆၢကတီၢ် ဒီးပဂံၢ်ပဘါ တအိၣ်ဘၣ်န့ၣ် ပကြၢးမၤဒ်လဲၣ်.
၁၄ တၢ်ဆၢကတီၢ် ဒီးတၢ်ဂံၢ်တၢ်ဘါ. ယဟိဝၤယွၤအခ့အပှၤတဖၣ် အတၢ်မၤအါ ဒီးအမူဒါအိၣ်အါမးလီၤ. လၢတၢ်န့ၣ်အဃိ ပှၤတနီၤနီၤတူၢ်ဘၣ်ဝဲလၢ အဝဲသ့ၣ်အတၢ်ဆၢကတီၢ် ဒီးအဂံၢ်အဘါလၢ ကတူၢ်လိာ်တမှံၤအဂီၢ်တအိၣ်လၢၤဘၣ်. နမ့ၢ်တူၢ်ဘၣ်ဒ်အံၤန့ၣ် ဒ်သိးနကတူၢ်လိာ်ပှၤဂၤအတၢ်ကွဲမုာ် ဒီးနပာ်ဖျါထီၣ် တၢ်တူၢ်လိာ်တမှံၤကန့ၢ်အဂီၢ် နကဘၣ်ဆီတလဲ နတၢ်ရဲၣ်တၢ်ကျဲၤလီၤ. မ့ၢ်လၢလံာ်စီဆှံ ဟ့ၣ်သဆၣ်ထီၣ်ပှၤလၢ ပကဘၣ်တူၢ်လိာ်တမှံၤအဃိ တၢ်တူၢ်လိာ်တမှံၤန့ၣ် မ့ၢ်တၢ်လၢအရ့ဒိၣ်လီၤ. (ဧ့ၤဘြံၤ ၁၃:၂) ဒီးတၢ်တူၢ်လိာ်တမှံၤန့ၣ် မ့ၢ်တၢ်လၢပကြၢးမၤအီၤလီၤ. ဘၣ်ဆၣ် ဒ်သိးနတူၢ်လိာ်တမှံၤကန့ၢ်အဂီၢ် ဘၣ်သ့ၣ်သ့ၣ် နကဘၣ်မၤစှၤလီၤ နတၢ်ဆၢကတီၢ်လၢ နသူအီၤလၢ တၢ်လၢအရ့တဒိၣ်ဘၣ်တဖၣ်အဂီၢ်န့ၣ်လီၤ.
၁၅. ဘၣ်မနုၤအဃိ ပှၤတနီၤနီၤတူၢ်ဘၣ်လၢ အဝဲသ့ၣ်တူၢ်လိာ် ပှၤတမှံၤတန့ၢ်ဘၣ်လဲၣ်.
၁၅ နတၢ်တူၢ်ဘၣ်အိၣ်ဒ်လဲၣ်. နအဲၣ်ဒိးတူၢ်လိာ်တမှံၤ ဘၣ်ဆၣ်နတူၢ်ဘၣ်လၢ နမၤတန့ၢ်ဘၣ်အိၣ်တဘျီဘျီဧါ. ဘၣ်သ့ၣ်သ့ၣ် မ့ၢ်လၢနမဲာ်ဆှး မ့တမ့ၢ် နဘၣ်ယိၣ်လၢ ပှၤတမှံၤတၢ်ကကၢၣ်အသးအဃိလီၤ. မ့တမ့ၢ် ဘၣ်သ့ၣ်သ့ၣ် ကမ့ၢ်လၢ နစ့တအိၣ်အါအါဘၣ်အဃိ နဘၣ်ယိၣ်လၢ နတူၢ်လိာ်ပှၤတမှံၤတန့ၢ်ထဲသိး ဒီပုၢ်ဝဲၢ်မုၣ်ခွါအဂၤတဖၣ်ဘၣ်အဃိလီၤ. သ့ၣ်နီၣ်ထီၣ်လၢ တလိၣ်လၢနဟံၣ်ကဘၣ်ဒိၣ်ဘၣ်. နဟံၣ်မ့ၢ်အိၣ် ကဆှဲကဆှီ ဒီးနသးမ့ၢ်ဂ့ၤန့ၣ် နပှၤတမှံၤကသးခုဝဲလီၤ.
၁၆, ၁၇. ဒ်သိးနကကွဲပှၤတမှံၤအဂီၢ် တၢ်လၢကမၤစှၤလီၤ နတၢ်သူၣ်ကိၢ်သးဂီၤန့ၣ် မ့ၢ်မနုၤလဲၣ်.
၁၆ နမ့ၢ်ဘၣ်ယိၣ်တၢ်လၢ နကကွဲမုာ်ပှၤတမှံၤအဂီၢ်န့ၣ် တမ့ၢ်ထဲနၤတဂၤဧိၤဘၣ်. တၢ်အိၣ်ဖှိၣ်သးပှၢ်တဂၤလၢ အအိၣ်လၢကီၢ်ဘြံးတၢၣ်န့ၣ် တဲဝဲလၢ “ပဘၣ်ကတဲာ်ကတီၤတၢ်လၢ ပှၤတမှံၤအဂီၢ်န့ၣ် ပသူၣ်ကိၢ်သးဂီၤတၢ်ဒိၣ်မးလီၤ. ဘၣ်ဆၣ် တၢ်ဆိၣ်ဂ့ၤဒီး တၢ်သူၣ်မံသးမုာ်လၢ ပဒိးန့ၢ်ဘၣ်အီၤခီဖျိ ပမၤတၢ်တမံၤလၢ်လၢ်လၢ ပကဘူၣ်ထီၣ်ဘါထီၣ် ယဟိဝၤယွၤအဂီၢ်န့ၣ် ဂ့ၤဒိၣ်န့ၢ် ပတၢ်ကိၢ်တၢ်ဂီၤလီၤ. ပဆ့ၣ်နီၤတဲသကိးတၢ် ဒီးအီသကိးထံချီ ဒီးပှၤတမှံၤတဖၣ်န့ၣ် မုာ်ဘၣ်ယၤဒိၣ်မး.” တၢ်ပာ်ဖျါထီၣ်တၢ်သူၣ်အိၣ်သးအိၣ် ပှၤတမှံၤန့ၣ် မ့ၢ်ဝဲလုၢ်လၢ်လၢအဂ့ၤတခါလီၤ. (ဖံလံးပံၤ ၂:၄) ပှၤအါဂၤန့ၣ် တဲပၠးပှၤဂၤလၢ အနီၢ်ကစၢ်အတၢ်လဲၤခီဖျိမုာ်ဝဲလီၤ. အဃိဘၣ်သ့ၣ်သ့ၣ် ပမ့ၢ်ကွဲမုာ်အဝဲသ့ၣ်လၢပဟံၣ်မး ပကနၢ်ဟူဘၣ် အဝဲသ့ၣ်အတၢ်လဲၤခီဖျိလီၤ. တၢ်အိၣ်ဖှိၣ်သးပှၢ်တဂၤကွဲးဝဲလၢ “ယကွဲဒီပုၢ်ဝဲၢ်လၢ တၢ်အိၣ်ဖှိၣ်ပူၤတဖၣ်လၢ ယဟံၣ်အဃိ ယနၢ်ပၢၢ်ထီၣ်အဝဲသ့ၣ်အတၢ်အိၣ်သး ဒီးယသ့ၣ်ညါအါထီၣ် အဝဲသ့ၣ်အဂ့ၢ်လီၤ. လီၤဆီဒၣ်တၢ် ယသ့ၣ်ညါဘၣ်လၢ အဝဲသ့ၣ်ဒိးန့ၢ်ဘၣ် တၢ်မ့ၢ်တၢ်တီဒ်လဲၣ်အဂ့ၢ်န့ၣ်လီၤ.” နမ့ၢ်ပာ်ဖျါထီၣ် တၢ်သူၣ်အိၣ်သးအိၣ်လၢ ပှၤတမှံၤအဖီခိၣ်န့ၣ် နနာ်သ့သပှၢ်ကတၢၢ်လၢ ပှၤခဲလၢာ်ကသးခုဝဲလီၤ.
၁၇ ဒီပုၢ်ဝဲၢ်မုၣ်တဂၤ လၢအမၤပှၤလဲၤလၢညါန့ၣ် အဝဲတူၢ်လိာ်ဝဲ ပှၤကၠိဖိလၢအဟဲထီၣ်ကၠိလၢ တၢ်ကရၢကရိဒုးအိၣ်ထီၣ်ဝဲတဖၣ်န့ၣ်လီၤ. အဝဲတဲဝဲလၢ “အခီၣ်ထံးန့ၣ် ယဘၣ်ယိၣ်တၢ် မ့ၢ်လၢယဟံၣ်န့ၣ် တၢ်တအိၣ်အါအါဘၣ် အိၣ်ဒၣ်ထဲတၢ်ပီးတၢ်လီလၢ ပှၤဟ့ၣ်ယၤတဖၣ်လီၤ. ပှၤသိၣ်လိနဲၣ်လိတၢ် အမါတဂၤ တဲတၢ်တမံၤလၢ အမၤမုာ်ယသးဒိၣ်မးန့ၣ်လီၤ. အဝဲတဲလၢ ဖဲအဝဲဒီးအဝၤမၤကဝီၤအပှၤကွၢ်တၢ် တၢ်မၤအခါ အဝဲသ့ၣ်လဲၤအိၣ်တမှံၤလၢ ပှၤလၢအနီၢ်သးဆူၣ် ဒီးအိၣ်မူတၢ်အိၣ်မူယိယိဖိတဖၣ် အဟံၣ်န့ၣ် မ့ၢ်တၢ်လၢအဂ့ၤကတၢၢ်လီၤ. ယသ့ၣ်နီၣ်က့ၤ ဖဲပနီၢ်ဆံးအခါ ယမိသူဝဲတၢ်ကတိၤလၢအမ့ၢ် ‘ပအီၣ်တၢ်ဒိးတၢ်လၣ် အိၣ်ဒီးတၢ်အဲၣ်န့ၣ် ဂ့ၤဒိၣ်တက့ၢ်လီၤ.’” (ကတိၤဒိ ၁၅:၁၇) ပတလိၣ်ဘၣ်ယိၣ်တၢ်ဘၣ်. တၢ်လၢအရ့ဒိၣ်ကတၢၢ်န့ၣ် ပကဘၣ်ပာ်ဖျါထီၣ် တၢ်အဲၣ်လၢ ပှၤတမှံၤအဖီခိၣ်လီၤ.
၁၈, ၁၉. ပမ့ၢ်တူၢ်လိာ်တမှံၤန့ၣ် ကမၤစၢၤပှၤဒ်သိး ပကမၤလီၤမၢ်ကွံာ် ပတၢ်ပာ်သူၣ်ပာ်သးလၢ အတဂ့ၤတဖၣ်ဒ်လဲၣ်.
၁၈ နတၢ်တူၢ်ဘၣ်လၢ ပှၤဂၤအဖီခိၣ်အိၣ်ဒ်လဲၣ်. လၢနတၢ်အိၣ်ဖှိၣ်ပူၤန့ၣ် ပှၤလၢအမၤသးထီၣ်နၤအိၣ်ဧါ. နမ့ၢ်တဂုာ်ကျဲးစၢးမၤလီၤမၢ် နတၢ်တူၢ်ဘၣ်လၢအတဂ့ၤတဖၣ်န့ၣ် နတၢ်ထံၣ်လၢ အဝဲအဖီခိၣ်စ့ၢ်ကီး တဆီတလဲဝဲဘၣ်. နမ့ၢ်တဘၣ်သူၣ်ဘၣ်သး ပှၤတဂၤဂၤအတၢ်ပာ်သူၣ်ပာ်သး မ့တမ့ၢ် ပှၤတဂၤဂၤ မ့ၢ်မၤဘၣ်ဒိနသးဒီး နသးပ့ၤနီၣ်ကွံာ်အီၤ မ့ၢ်တန့ၢ်ဘၣ်န့ၣ် ဘၣ်သ့ၣ်သ့ၣ် နတအဲၣ်ဒိးကွဲမုာ်အီၤလၢနဟံၣ်ဘၣ်.
၁၉ လံာ်စီဆှံတဲဝဲလၢ နမ့ၢ်တူၢ်လိာ်တမှံၤန့ၣ် နမၤဂ့ၤထီၣ်နတၢ်ရ့လိာ်သးဒီးပှၤဂၤ တကးဒံးဘၣ် နမၤဂ့ၤထီၣ် နတၢ်ရ့လိၤသးဒီး နဒုၣ်နဒါဒၣ်လဲာ်သ့ဝဲလီၤ. (ဖး ကတိၤဒိ ၂၅:၂၁, ၂၂ တက့ၢ်.) နမ့ၢ်ကွဲမုာ် ပှၤတဂၤဂၤလၢ နဟံၣ်န့ၣ် ဘၣ်သ့ၣ်သ့ၣ် နတၢ်ထံၣ်လၢ အဖီခိၣ်ကဂ့ၤထီၣ် ဒီးနတၢ်ရ့လိာ်သးဒီးအီၤ ကဂ့ၤထီၣ်လီၤ. ဖဲန့ၣ်အခါနကသ့ၣ်ညါထီၣ် အတၢ်ဂ့ၤတၢ်ဝါတနီၤလၢ ယဟိဝၤယွၤ ထံၣ်ဝဲဒီးမိၤအီၤလၢ တၢ်မ့ၢ်တၢ်တီအပူၤန့ၣ်လီၤ. (ယိၤဟၣ် ၆:၄၄) တၢ်အဲၣ်မ့ၢ်ထိၣ်ဟူးထိၣ်ဂဲၤထီၣ်နၤလၢ နကကွဲမုာ်ပှၤတဂၤဂၤန့ၣ် နတၢ်ရ့လိာ်သးဒီးအီၤဘူးထီၣ်သ့ဝဲလီၤ. တၢ်အဲၣ်ထိၣ်ဟူးထိၣ်ဂဲၤထီၣ်နၤလၢ နကကွဲမုာ်ပှၤတမှံၤန့ၣ် နသ့ၣ်ညါသ့ဒ်လဲၣ်. နသ့ၣ်ညါအီၤသ့ခီဖျိ နမၤထွဲတၢ်ဟ့ၣ်ကူၣ်လၢ ဖံလံးပံၤ ၂:၃ လၢအတဲဝဲ “မ်ပှၤပာ်ပှၤဂၤဂ့ၤန့ၢ်အကစၢ်ဒၣ်ဝဲတက့ၢ်.” ပကြၢးဆိကမိၣ်ထီၣ်လၢ ဒီပုၢ်ဝဲၢ်မုၣ်ခွါတဖၣ်န့ၣ် ဂ့ၤန့ၢ်ပှၤလၢ ကျဲဒ်လဲၣ်တဘိလဲၣ်. ဘၣ်သ့ၣ်သ့ၣ် ပကွၢ်လိမၤဒိး အဝဲသ့ၣ်အတၢ်နာ်, အတၢ်တူၢ်န့ၢ်ခီၣ်ကဲ ဒီးအတၢ်ဂ့ၤတၢ်ဝါလၢ အဂၤတဖၣ်သ့ဝဲလီၤ. ပမ့ၢ်ဆိကမိၣ်ထံ အဝဲသ့ၣ်အတၢ်ဂ့ၤတၢ်ဝါတဖၣ်န့ၣ် ပတၢ်အဲၣ်အဝဲသ့ၣ်ကအါထီၣ် ဒီးပပာ်ဖျါထီၣ် တၢ်တူၢ်လိာ်တမှံၤလၢ အဝဲသ့ၣ်အဖီခိၣ်ကညီထီၣ်ဝဲလီၤ.
ကဲထီၣ်ပှၤတမှံၤလၢအဂ့ၤ
ဟံၣ်ကစၢ်န့ၣ် ကတဲာ်ကတီၤပာ်စၢၤတၢ်ဂ့ၤဂ့ၤလၢ ပှၤတမှံၤအဂီၢ် (ကွၢ်လံာ်အဆၢ ၂၀)
၂၀. ပမ့ၢ်တူၢ်လိာ်ပှၤဂၤအတၢ်ကွဲမုာ်န့ၣ် ပကြၢးတီဒီးပတၢ်အၢၣ်လီၤဒ်လဲၣ် ဒီးဘၣ်မနုၤအဃိလဲၣ်.
၂၀ ပှၤကွဲးထါစံးထီၣ်ပတြၢၤ စီၤဒၤဝံး သံကွၢ်ဝဲလၢ “ယွၤဧၢ, မ့ၢ်မတၤကအိၣ်ဝဲဆိးဝဲလၢ နဒဲပူၤတဂၤလဲၣ်.” (စံးထီၣ်ပတြၢၤ ၁၅:၁) လၢခံစီၤဒၤဝံး ဆဲးတဲကဒီးဝဲ တၢ်ဂ့ၤတၢ်ဝါလၢ ယဟိဝၤယွၤအဲၣ်ဒိးဝဲလၢ ပှၤတမှံၤတဖၣ် ကပာ်ဖျါထီၣ်ဝဲန့ၣ်လီၤ. လၢအကျါတခါန့ၣ်မ့ၢ်ဝဲ တီဒီးအတၢ်အၢၣ်လီၤန့ၣ်လီၤ. လံာ်စီဆှံတဲဝဲလၢ “လၢအတၢ်ဆိၣ်လီၤအသးအပူၤ, တၢ်အၢမ့ၢ်ဘၣ်က့ၤအီၤဒၣ်လဲာ်, မၤဝဲဒ်အအၢၣ်လီၤဝဲအသိးန့ၣ်လီၤ.” (စံးထီၣ်ပတြၢၤ ၁၅:၄, ခ့ခါစှီၤကျိာ်) ဖဲပှၤကွဲမုာ်ပှၤအခါ ပမ့ၢ်အၢၣ်လီၤပှၤဂၤလၢ ပကလဲၤန့ၣ် ပတကြၢးမၤဟးဂီၤ ပတၢ်အၢၣ်လီၤဘၣ်. ဘၣ်သ့ၣ်သ့ၣ် အဝဲသ့ၣ်ကတဲာ်ကတီၤပာ်ဝဲ တၢ်လၢပဂီၢ်ဝံၤလံအဃိ ပမ့ၢ်တလဲၤလၢၤဘၣ်န့ၣ် တၢ်လၢအဝဲသ့ၣ်ထဲးဂံၢ်ထဲးဘါ ဒီးကတဲာ်ကတီၤပာ်ဝဲတဖၣ် ကကဲထီၣ်တၢ်ကလီကလီလီၤ. (မးသဲ ၅:၃၇) ပှၤတနီၤနီၤန့ၣ် အဲၣ်ဒိးလဲၤဝဲလၢ တၢ်ကွဲမုာ်လၢအဂ့ၤဒိၣ်အဂၤတခါအဃိ အဝဲတလဲၤဝဲလၢ တၢ်ကွဲမုာ်လၢအအၢၣ်လီၤတ့ၢ်ဝဲ တခါန့ၣ်လၢၤဘၣ်. ပမ့ၢ်မၤဒ်န့ၣ်န့ၣ် မ့ၢ်ပအိၣ်ဒီးတၢ်အဲၣ်တၢ်ကွံ ဒီးတၢ်ပာ်ကဲဧါ. ပှၤလၢအကိးပှၤတဂၤ မ့ၢ်ကတဲာ်ကတီၤန့ၢ်ပှၤတၢ်တမံၤဂ့ၤတမံၤဂ့ၤ ပကြၢးသးမံလီၤ. (လူၤကၣ် ၁၀:၇) လၢတၢ်ဂ့ၢ်အရ့ဒိၣ်အဃိ ပလဲၤမ့ၢ်တသ့လၢၤဘၣ်န့ၣ် ပကဘၣ်ဒုးသ့ၣ်ညါဆိ ပှၤလၢအကွဲမုာ်ပှၤတဂၤ လၢအဆိအချ့လီၤ.
၂၁. ပမ့ၢ်နၢ်ပၢၢ်လီၢ်ကဝီၤ အတၢ်ဆဲးတၢ်လၤန့ၣ် ကမၤစၢၤပှၤလၢ ပကဲထီၣ်ပှၤတမှံၤလၢအဂ့ၤ ကသ့ဒ်လဲၣ်.
၂၁ အရ့ဒိၣ်လၢပကဘၣ်ပာ်ကဲ လီၢ်ကဝီၤအတၢ်ဆဲးတၢ်လၤ စ့ၢ်ကီးလီၤ. တၢ်ဆဲးတၢ်လၤတနီၤန့ၣ် ပှၤမ့ၢ်တကွဲမုာ်ပှၤသနာ်က့ ပလဲၤသ့လီၤ. ဘၣ်ဆၣ် အဂၤတနီၤန့ၣ် ပှၤမ့ၢ်ကွဲမုာ်ပှၤမး ပလဲၤသ့လီၤ. ဒီးတၢ်လီၢ်တနီၤန့ၣ် အဝဲသ့ၣ်ဒုးအီၣ်ဒုးအီဝဲ ပှၤတမှံၤတၢ်အီၣ်လၢအဝံၣ်အဘဲဝံၤမး ဒုးအီၣ်က့ၤဝဲ အဟံၣ်ဖိဃီဖိလီၤ. မ့မ့ၢ်တၢ်လီၢ်အဂၤတနီၤန့ၣ် ဟံၣ်ဖိဃီဖိဒီးပှၤတမှံၤတဖၣ် အီၣ်သကိးတၢ်တဘျီဃီလီၤ. ဒီးတၢ်လီၢ်တနီၤနီၤန့ၣ် ပှၤတမှံၤဘၣ်ဟဲစိာ်တၢ်တမံၤမံၤ ဘၣ်ဆၣ် အဂၤတနီၤန့ၣ် ပှၤတမှံၤတလိၣ်ဟဲစိာ်တၢ်နီတမံၤဘၣ်. တၢ်ဆဲးတၢ်လၤတနီၤနီၤန့ၣ် ပှၤမ့ၢ်ကွဲမုာ်ပှၤ တဘျီခံဘျီမး ပကြၢးတူၢ်လိာ်လီၤ. ဘၣ်ဆၣ် အဂၤတနီၤန့ၣ် ပှၤမ့ၢ်တတူၢ်လိာ် တၢ်ကွဲမုာ်အဆိကတၢၢ်တဘျီဘၣ်န့ၣ် ဖျါလၢတၢ်ပာ်ကဲတအိၣ်ဘၣ်. ဒ်လဲၣ်ဂ့ၤဒ်လဲၣ်ဂ့ၤ ပကြၢးဂုာ်ကျဲးစၢးလၢအဂ့ၤကတၢၢ်ဒ်သိး ပှၤလၢအကွဲမုာ်ပှၤတဂၤ ကသးခုအဂီၢ်လီၤ.
၂၂. ဘၣ်မနုၤအဃိ အရ့ဒိၣ်လၢပကဘၣ် ‘တူၢ်ထံၣ်တူၢ်တမှံၤလိာ်သး’ လဲၣ်.
၂၂ စီၤပ့းတရူးတဲဝဲလၢ “တၢ်ခဲလၢာ်အကတၢၢ်န့ၣ် ဘူးထီၣ်လံ.” (၁ ပ့းတရူး ၄:၇) မုၢ်မဆါတနံၤအံၤ ပထံၣ်ဘၣ်လၢ တၢ်နးတၢ်ဖှီၣ်ဖးဒိၣ်ဘူးထီၣ်လံလီၤ. ဒ်တၢ်ဆၢကတီၢ် လဲၤပူၤကွံာ်ဝဲအသိး တၢ်အိၣ်သးတဖၣ် နးထီၣ်ဝဲအဃိ ပကဘၣ်မၤအါထီၣ် ပတၢ်အဲၣ် ဒီပုၢ်ဝဲၢ်တဖၣ်လီၤ. စီၤပ့းတရူးအတၢ်ဟ့ၣ်ကူၣ်လၢ “တူၢ်ထံၣ်တူၢ်တမှံၤ လိာ်သုသးတက့ၢ်” န့ၣ်ဘၣ်ထွဲလိာ်သးဒီးပှၤလၢ ဆၢကတီၢ်ခဲအံၤဒိၣ်န့ၢ် ဆၢကတီၢ်လၢညါလီၤ. (၁ ပ့းတရူး ၄:၉) တၢ်တူၢ်လိာ်တမှံၤန့ၣ် မ့ၢ်တၢ်လၢ အမၤမုာ်ပသး တကးဒံးဘၣ် မ့ၢ်တၢ်လၢအရ့ဒိၣ်လၢ ဆၢကတီၢ်ခဲအံၤ ဒီးခါဆူညါအဂီၢ်လီၤ.
