တၢ်သိၣ်က့ၤသီက့ၤန့ၣ် ပာ်ဖျါထီၣ်ယွၤအတၢ်အဲၣ်တၢ်ကွံ
“ကစၢ်သိၣ်က့ၤသီက့ၤ ပှၤလၢအအဲၣ်” ဝဲတဖၣ်လီၤ.—ဧ့ၤဘြံၤ ၁၂:၆.
၁. ဘၣ်ဃးဒီး တၢ်သိၣ်က့ၤသီက့ၤန့ၣ် ညီနုၢ်လံာ်စီဆှံပာ်ဖျါထီၣ်ဝဲဒ်လဲၣ်.
ဖဲနနၢ်ဟူဘၣ်တၢ်ကတိၤလၢအမ့ၢ် “တၢ်သိၣ်က့ၤသီက့ၤ” အခါ မ့ၢ်နဆိကမိၣ်ဒ်လဲၣ်. ပှၤအါဂၤန့ၣ် ဖဲအနၢ်ဟူဘၣ်ဝဲ တၢ်ကတိၤအံၤအခါ အဝဲသ့ၣ်ဆိကမိၣ်ဝဲလၢ အမ့ၢ်တၢ်စံၣ်ညီၣ်လီၤ. ဘၣ်ဆၣ် တၢ်သိၣ်က့ၤသီက့ၤန့ၣ် တမ့ၢ်ထဲတၢ်စံၣ်ညီၣ်တခါဧိၤဘၣ်. လံာ်စီဆှံပာ်ဖျါထီၣ်ဝဲလၢ တၢ်သိၣ်က့ၤသီက့ၤန့ၣ် ဂ့ၤလၢပဂီၢ် ဒီးတဘျီတခီၣ် လၢတၢ်သိၣ်က့ၤသီက့ၤအဃိ ပဒိးန့ၢ်ဘၣ် တၢ်သ့ၣ်ညါ, တၢ်ကူၣ်သ့, တၢ်အဲၣ်ဒီး မၤပူၤဖျဲးပသးသမူလီၤ. (ကတိၤဒိ ၁:၂-၇; ၄:၁၁-၁၃) ကစၢ်ယွၤ အတၢ်သိၣ်က့ၤသီက့ၤန့ၣ် ပာ်ဖျါထီၣ်လၢအဝဲအဲၣ်ပှၤ ဒီးအဲၣ်ဒိးလၢပကအိၣ်မူဘၣ် လီၤထူလီၤယိာ်လီၤ. (ဧ့ၤဘြံၤ ၁၂:၆) ယွၤအတၢ်သိၣ်က့ၤသီက့ၤန့ၣ် တဘျီတခီၣ် ကပၣ်ဃုာ်ဒီးတၢ်သိၣ်ဃီၣ်လီၤ. ဘၣ်ဆၣ် ယွၤအတၢ်သိၣ်ဃီၣ်န့ၣ် တအၢတသီဘၣ် ဒီးတမၤဆါပှၤဘၣ်. တၢ်ကတိၤလၢအမ့ၢ် “တၢ်သိၣ်က့ၤသီက့ၤ” န့ၣ်အဲၣ်ဒိးတဲဝဲ တၢ်သိၣ်လိနဲၣ်လိ ဒ်သိးဒီးမိၢ်ပၢ်တဖၣ် သိၣ်လိနဲၣ်လိဝဲအဖိလၢ အအဲၣ်ဝဲန့ၣ်လီၤ.
၂, ၃. တၢ်သိၣ်က့ၤသီက့ၤန့ၣ် ဘၣ်ထွဲလိာ်အသးဒီး တၢ်သိၣ်လိနဲၣ်လိ ဒီးတၢ်ဟ့ၣ်တၢ်ကမၣ်လၢ ကျဲဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၂ ဆိကမိၣ်ကွၢ်တၢ်အဒိအံၤတက့ၢ်. ဖိသၣ်ဖိလၢ အမံၤမ့ၢ် ကၠီနံၤန့ၣ် ထူဘီလၢဟံၣ်ပူၤလီၤ. အမိၢ်တဲအီၤလၢ “ကၠီနံၤဧၢ, တဘၣ်ထူဘီလၢဟံၣ်ပူၤတဂ့ၤ နဘီကဘၣ်ထံး ဒီးတၢ်ကဟးဂီၤတမံၤမံၤ.” ဘၣ်ဆၣ် အဝဲတဒိကနၣ် အမိၢ်အကလုၢ်ဘၣ် ဒီးအဝဲဆဲးလိာ်ကွဲဝဲလီၤ. လၢခံအဘီဘၣ်ထံးဒီးဖီကိအဃိ ဖီကိလီၤတဲာ်သ့ၣ်ဖးဝဲလီၤ. အမိၢ်ကသိၣ်အီၤဒ်လဲၣ်. အမိၢ်ကသိၣ်အီၤခီဖျိ ကတဲနၢ်ပၢၢ်အီၤလၢ အဝဲမၤတၢ်န့ၣ် ကမၣ်ဒ်လဲၣ်. ဒီးအမိၢ်အဲၣ်ဒိးလၢအဝဲ ကသ့ၣ်ညါဝဲလၢ ကဘၣ်ဒိကနၣ်အမိၢ်အပၢ်ကလုၢ် ဒီးတၢ်ဘျၢလၢအမိၢ်အပၢ် ပာ်လီၤဝဲတဖၣ်န့ၣ် အရ့ဒိၣ်ဒီးအဘျုးအိၣ်လၢအဂီၢ်လီၤ. ဒ်သိး ကၠီနံၤ ကန့ၢ်တၢ်မၤလိအဂီၢ် အမိၢ်ကဟ့ၣ်အီၤတၢ်ကမၣ်လီၤ. အမိကဟ့ၣ်အီၤတၢ်ကမၣ်ခီဖျိ ကဟံးဃာ်ဝဲအဘီ ဒီးတဒုးလိာ်ကွဲအီၤတစိၢ်တလီၢ်လီၤ. အမိၢ်မၤဒ်န့ၣ်န့ၣ် ကၠီနံၤတဘၣ်သးဝဲဘၣ်. ဘၣ်ဆၣ် ကဲထီၣ်တၢ်မၤစၢၤလၢ ကၠီနံၤအဂီၢ်လီၤ. အဝဲသ့ၣ်ညါထီၣ်ဝဲလၢ မ့ၢ်တဒိကနၣ် အမိၢ်အပၢ်အကလုၢ်ဘၣ်န့ၣ် ကထံၣ်ဘၣ် တၢ်ကီတၢ်ခဲန့ၣ်လီၤ.
၃ ဒ်ပမ့ၢ်ခရံာ်ဖိအသိး ပမ့ၢ်ယွၤအဟံၣ်ဖိဃီဖိလီၤ. (၁ တံၤမသ့း ၃:၁၅) လၢတၢ်န့ၣ်အဃိ ပပၢ်ယဟိဝၤယွၤအိၣ်ဒီး တၢ်ခွဲးတၢ်ယာ်လၢ ကဆၢတဲာ်တၢ်လၢအဘၣ် ဒီးအကမၣ် ဒီးကသိၣ်က့ၤသီက့ၤပှၤ ဖဲပတဒိကနၣ်အကလုၢ်အခါန့ၣ်လီၤ. ဒီးလၢပတၢ်ဃုထၢအဃိ ပမ့ၢ်ထံၣ်ဘၣ်တၢ်ကီတၢ်ခဲန့ၣ် ယဟိဝၤယွၤအတၢ်သိၣ်က့ၤသီက့ၤ လၢအပှဲၤဒီးတၢ်အဲၣ်တၢ်ကွံ ကမၤစၢၤပှၤဒ်သိး ပကသ့ၣ်နီၣ်ထီၣ်လၢ ပကဘၣ်ဒိကနၣ်အကလုၢ်လီၤ. (ကလၤတံ ၆:၇) ကစၢ်ယွၤအဲၣ်ပှၤဒိၣ်မး ဒီးအဝဲတအဲၣ်ဒိးလၢ ပကဘၣ်ကီဘၣ်ခဲဘၣ်.—၁ ပ့းတရူး ၅:၆, ၇.
၄. (က) ယဟိဝၤယွၤ အဲၣ်ဒိးလၢပကသိၣ်လိနဲၣ်လိပှၤဂၤဒ်လဲၣ်. (ခ) လၢတၢ်မၤလိအံၤအပူၤ ပကတဲသကိးတၢ်ဂ့ၢ်မနုၤတဖၣ်လဲၣ်.
၄ ဖဲပသိၣ်က့ၤသီက့ၤတၢ်အခါ ပမ့ၢ်သူလံာ်စီဆှံန့ၣ် ကမၤစၢၤပဖိ မ့တမ့ၢ် ပပှၤမၤလိလံာ်စီဆှံဖိဒ်သိး ကပိာ်ခရံာ်အခံလီၤ. လၢတၢ်န့ၣ်အဃိ ပသူလံာ်စီဆှံ လၢပကသိၣ်လိ ပှၤမၤလိလံာ်စီဆှံဖိ ဒ်သိးကနၢ်ပၢၢ်ထီၣ်တၢ်အဘၣ် ဒီးကမၤ ‘ကယဲၢ်တၢ်လၢ ယ့ၣ်ၡူးခရံာ် မၤလိာ်တ့ၢ်ပှၤခဲလၢာ်’ အဂီၢ်လီၤ. (မးသဲ ၂၈:၁၉, ၂၀; ၂ တံၤမသ့း ၃:၁၆) ယဟိဝၤယွၤအဲၣ်ဒိး သိၣ်လိနဲၣ်လိအဝဲသ့ၣ် ဒ်သိးအဝဲသ့ၣ်စ့ၢ်ကီး ကမၤစၢၤပှၤဂၤလၢ ပိာ်ယ့ၣ်ၡူးအခံ ကသ့အဂီၢ်လီၤ. (ဖး တံတူး ၂:၁၁-၁၄ တက့ၢ်.) ခဲအံၤပကတဲသကိး တၢ်သံကွၢ်လၢအရ့ဒိၣ်သၢဖျၢၣ် (၁) ယွၤအတၢ်သိၣ်က့ၤသီက့ၤန့ၣ် ပာ်ဖျါထီၣ်ဝဲလၢ အဝဲအဲၣ်ပှၤဒ်လဲၣ်. (၂) ပဟံးန့ၢ်တၢ်မၤလိလၢ ပှၤလၢကစၢ်ယွၤ သိၣ်က့ၤသီက့ၤအီၤတဖၣ်အအိၣ် ကသ့ဒ်လဲၣ်. (၃) ဘၣ်ဃးဒီး တၢ်သိၣ်က့ၤသီက့ၤန့ၣ် ပကွၢ်လိမၤဒိး ယဟိဝၤယွၤ ဒီးအဖိခွါကသ့ဒ်လဲၣ်.
ယွၤသိၣ်က့ၤသီက့ၤတၢ်လၢ တၢ်အဲၣ်တၢ်ကွံအပူၤ
၅. ယဟိဝၤယွၤ အတၢ်သိၣ်က့ၤသီက့ၤန့ၣ် ပာ်ဖျါထီၣ်လၢ အအဲၣ်ပှၤဒ်လဲၣ်.
၅ ယဟိဝၤယွၤ ဘှီဂ့ၤထီၣ်, ဟ့ၣ်ကူၣ်ဟ့ၣ်ဖး ဒီးသိၣ်လိနဲၣ်လိပှၤန့ၣ် မ့ၢ်လၢအဝဲအဲၣ်ပှၤအဃိလီၤ. အဝဲအဲၣ်ဒိးလၢ ပကအိၣ်ဘူးဒီးအီၤ ဒီးအိၣ်မူဘၣ်လီၤထူလီၤယိာ်လီၤ. (၁ ယိၤဟၣ် ၄:၁၆) အဝဲတဆိကမိၣ်ဆံးပှၤဘၣ် ဒီးတမၤဝဲဒ်သိး ပကတူၢ်ဘၣ်လၢ ပလုၢ်ပပှ့ၤတအိၣ်ဘၣ်န့ၣ်ဘၣ်. (ကတိၤဒိ ၁၂:၁၈) လၢတၢ်န့ၣ်အလီၢ် ယဟိဝၤယွၤဃုထံၣ်ဝဲ ပတၢ်ဂ့ၤတၢ်ဝါတဖၣ် ဒီးဟ့ၣ်ပှၤတၢ်ခွဲးတၢ်ယာ်လၢ ပကဃုထၢတၢ်လၢတၢ်သဘျ့အပူၤလီၤ. တၢ်သိၣ်က့ၤသီက့ၤလၢ ပဒိးန့ၢ်ဘၣ်အီၤခီဖျိ လံာ်စီဆှံ, ပလံာ်လဲၢ်တဖၣ်, မိၢ်ပၢ် ဒီးတၢ်အိၣ်ဖှိၣ်သးပှၢ်တဖၣ်အအိၣ်န့ၣ် မ့ၢ်နထံၣ်အီၤဒ်အမ့ၢ် ယဟိဝၤယွၤအတၢ်အဲၣ်ပှၤန့ၣ်ဧါ. ဖဲပတသ့ၣ်ညါလီၤပသးလၢ ပလဲၤကမၣ်ကျဲအခါ တၢ်အိၣ်ဖှိၣ်သးပှၢ်တဖၣ် ကဂုာ်ကျဲးစၢး မၤစၢၤပှၤလၢတၢ်အဲၣ်တၢ်ကွံအပူၤလီၤ. အဝဲသ့ၣ်မၤဝဲဒ်န့ၣ်န့ၣ် မ့ၢ်ဝဲအကွၢ်လိမၤဒိး ယဟိဝၤယွၤအတၢ်အဲၣ်ပှၤန့ၣ်လီၤ.—ကလၤတံ ၆:၁.
၆. ဖဲပဘၣ်တၢ်သိၣ်က့ၤသီက့ၤပှၤအခါ ပမ့ၢ်ဘၣ်တူၢ်ၡူကွံာ် ပမူဒါဘၣ်ဆၣ် တၢ်သိၣ်က့ၤသီက့ၤအံၤ ပာ်ဖျါထီၣ်ဝဲယွၤအတၢ်အဲၣ်ဒ်လဲၣ်.
၆ တဘျီတခီၣ် တၢ်သိၣ်က့ၤသီက့ၤန့ၣ် တမ့ၢ်ထဲတၢ်ဟ့ၣ်ကူၣ်တခါဧိၤဘၣ်. ပှၤတဂၤမ့ၢ်မၤဘၣ် တၢ်ကမၣ်ဖးဒိၣ်န့ၣ် အဝဲတကြၢးဒိးန့ၢ်ဘၣ် မူဒါတနီၤလၢ တၢ်အိၣ်ဖှိၣ်အပူၤလၢၤဘၣ်. တၢ်မ့ၢ်ကဲထီၣ်အသး ဒ်အံၤဘၣ်ဆၣ် တၢ်သိၣ်က့ၤသီက့ၤအံၤ ပာ်ဖျါထီၣ်ဝဲ ယဟိဝၤယွၤအတၢ်အဲၣ်အီၤန့ၣ်လီၤ. အဒိ, တၢ်သိၣ်က့ၤသီက့ၤအံၤ ကမၤစၢၤအီၤလၢ အဝဲကသ့ၣ်ညါထီၣ်ဝဲလၢ ကဘၣ်သူအါထီၣ် တၢ်ဆၢကတီၢ်လၢ တၢ်မၤလိလံာ်စီဆှံ, ဆိကမိၣ်ထံတၢ်လၢအဖးဝဲတဖၣ် ဒီးဃ့ဘါထုကဖၣ်တၢ်န့ၣ်လီၤ. အဝဲမ့ၢ်မၤဝဲဒ်န့ၣ်န့ၣ် ကမၤစၢၤအီၤဒ်သိး အတၢ်ရ့လိာ်သးဒီးယဟိဝၤယွၤ ကဂၢၢ်ကျၢၤထီၣ်အဂီၢ်လီၤ. (စံးထီၣ်ပတြၢၤ ၁၉:၇) ဒ်တၢ်ဆၢကတီၢ်လဲၤပူၤကွံာ်ဝဲအသိး လၢခံအဝဲကဒိးန့ၢ်ဘၣ်က့ၤဝဲ အမူဒါလၢအလီၤမၢ်ကွံာ်တဖၣ်သ့ဝဲလီၤ. တၢ်ဟီထီၣ်ကွံာ်အတၢ်ရဲၣ်တၢ်ကျဲၤန့ၣ် ပာ်ဖျါထီၣ်ဝဲ ယဟိဝၤယွၤအတၢ်အဲၣ် မ့ၢ်လၢအဝဲအဲၣ်ဒိးဒီသဒၢဝဲ တၢ်အိၣ်ဖှိၣ်ဒ်သိး ကကဆှီအဂီၢ်န့ၣ်လီၤ. (၁ ကရံၣ်သူး ၅:၆, ၇, ၁၁) ကစၢ်ယွၤအတၢ်သိၣ်ဃီၣ်န့ၣ် တီဝဲလိၤဝဲထီဘိအဃိ မၤစၢၤဝဲ ပှၤလၢအဘၣ်တၢ်ဟီထီၣ်ကွံာ်အီၤတဂၤ ဒ်သိးအကနၢ်ပၢၢ်ထီၣ်လၢ အတၢ်ကမၣ်ဒိၣ်ထဲလဲၣ်န့ၣ်လီၤ. တကးဒံးဘၣ် ကထိၣ်ဟူးထိၣ်ဂဲၤထီၣ်အီၤလၢ ကပီၢ်ယၢ်လီၤက့ၤအသးအဂီၢ်လီၤ.—မၤတၢ် ၃:၁၉.
ယဟိဝၤယွၤ အတၢ်သိၣ်က့ၤသီက့ၤန့ၣ် ကဲဘျုးလၢပဂီၢ်
၇. စီၤၡၤဘနၤန့ၣ် မ့ၢ်မတၤလဲၣ် ဒီးတၢ်ပာ်သူၣ်ပာ်သးလၢအတဂ့ၤ မနုၤအိၣ်ထီၣ်ဝဲလဲၣ်.
၇ ဒ်သိးပကနၢ်ပၢၢ်ထီၣ် တၢ်သိၣ်က့ၤသီက့ၤ အလုၢ်အပှ့ၤအဂီၢ် ပကတဲသကိးပှၤခံဂၤလၢ ယဟိဝၤယွၤ သိၣ်က့ၤသီက့ၤအီၤအဂ့ၢ်လီၤ. အဆိကတၢၢ်တဂၤန့ၣ်မ့ၢ်ဝဲ စီၤၡၤဘနၤ လၢအအိၣ်မူဝဲဖဲ အံၣ်စရ့လးအစီၤပၤ စီၤဃံးစကံယၤ ပၢတၢ်အစိၤန့ၣ်လီၤ. ဒီးလၢခံတဂၤန့ၣ် မ့ၢ်ဝဲဒီပုၢ်ခွါ ကြဲ(မ်) လၢပစိၤခဲအံၤလီၤ. စီၤၡၤဘနၤန့ၣ်မ့ၢ်ဝဲ “ပှၤပၢၤတၢ်ပာ်ဖှိၣ်” လၢစီၤပၤ ဃံးစကံယၤအနူၢ်ပူၤ ဒီးအိၣ်ဒီးအလီၢ်အလၤလီၤ. (ယၡါယၤ ၂၂:၁၅) ဘၣ်ဆၣ်အတၢ်ပာ်ထီၣ်ထီသးအိၣ်ထီၣ် ဒီးအဲၣ်ဒိးလၢ ပှၤဆိကမိၣ်ဒိၣ်အီၤလီၤ. လၢတၢ်န့ၣ်အဃိ အဝဲတ့ထီၣ်အနီၢ်ကစၢ် အတၢ်သွၣ်ခိၣ်လၢအလီၤဘီလီၤမုၢ် ဒီးဒိးဝဲ “လ့ၣ်ကဟၣ်အိၣ်ဒီးအလၤကပီၤလီၤ.”—ယၡါယၤ ၂၂:၁၆-၁၈.
ပမ့ၢ်အိၣ်ဒီးတၢ်ဆီၣ်လီၤသးဒီး ပမ့ၢ်သးအိၣ်ဆီတလဲ ပတၢ်ပာ်သူၣ်ပာ်သးန့ၣ် ကစၢ်ယွၤကဆိၣ်ဂ့ၤပှၤလီၤ (ကွၢ်လံာ်အဆၢ ၈-၁၀)
၈. ယဟိဝၤယွၤ သိၣ်က့ၤသီက့ၤ စီၤၡၤဘနၤဒ်လဲၣ် ဒီးအဝဲမၤဝဲဒ်လဲၣ်.
၈ မ့ၢ်လၢ စီၤၡၤဘနၤ ဃုတၢ်လၤကပီၤလၢ အနီၢ်ကစၢ်အဂီၢ်အဃိ မူဒါလၢအဝဲဒိးန့ၢ်ဘၣ်ဝဲတဖၣ်န့ၣ် ယဟိဝၤယွၤဟ့ၣ်က့ၤဝဲဆူ စီၤအ့ၤလယါကံၣ်လီၤ. (ယၡါယၤ ၂၂:၁၉-၂၁) တၢ်ဂ့ၢ်အံၤကဲထီၣ်အသးဖဲ စံရံယါ အစီၤပၤစၤနဃ့ရံာ် အဲၣ်ဒိးဟဲမၤဟးဂီၤ ဝ့ၢ်ယရူၤၡလ့ၣ်အခါန့ၣ်လီၤ. လၢခံ ဒ်သိးပှၤယူဒၤဖိကပျံၤတၢ် ဒီးဒ်သိးစီၤပၤဃံးစကံယၤ ကဟ့ၣ်ၡူအသးအဂီၢ် စၤနဃ့ရံာ် ဆှၢလီၤဝဲသုးမုၢ်ဖးဒိၣ်တဖုန့ၣ်လီၤ. (၂ စီၤပၤ ၁၈:၁၇-၂၅) ဖဲန့ၣ်အခါစီၤဃံးစကံယၤ ဆှၢလီၤဝဲ စီၤအ့ၤလယါကံၣ် ဒီးပိာ်ခွါခံဂၤ ဒ်သိးကလဲၤထံၣ်လိာ်သးဒီး သုးဖိတဖၣ်အဂီၢ်လီၤ. လၢပိာ်ခွါခံဂၤအကျါတဂၤန့ၣ် မ့ၢ်ဝဲစီၤၡၤဘနၤဒီး အဝဲကဲထီၣ်က့ၤဝဲ ပှၤကွဲးလံာ်ဖိလီၤ. ဖဲအံၤပသ့ၣ်ညါဘၣ်လၢ စီၤၡၤဘနၤ တသးထီၣ်တၢ်ဘၣ်, အဝဲမၤလိထီၣ်အသး ဒ်သိးကအိၣ်ဒီးတၢ်ဆီၣ်လီၤသးလီၤ. အဝဲသးအိၣ်တူၢ်လိာ်ဝဲ မူဒါလၢအပတီၢ်ဖုၣ်န့ၢ်ဒံးလၢညါလီၤ. ဖဲအံၤပဒိးန့ၢ်ဘၣ်တၢ်မၤလိသၢခါလၢ စီၤၡၤဘနၤအအိၣ်လီၤ.
၉-၁၁. (က) လၢစီၤၡၤဘနၤအအိၣ်န့ၣ် ပဒိးန့ၢ်ဘၣ် တၢ်မၤလိအလုၢ်ဒိၣ်ပှ့ၤဒိၣ်ဒ်လဲၣ်. (ခ) ယဟိဝၤယွၤ အတၢ်ပာ်သူၣ်ပာ်သးလၢ စီၤၡၤဘနၤအဖီခိၣ်န့ၣ် ကဲဘျုးလၢနဂီၢ်ဒ်လဲၣ်.
၉ အဆိကတၢၢ် စီၤၡၤဘနၤ အလီၢ်အလၤလီၤမၢ်ကွံာ်ဝဲန့ၣ် ဒုးသ့ၣ်နီၣ်ထီၣ်ပှၤလၢ “တၢ်ပာ်ထီၣ်ထီအသးန့ၣ် ဆှၢပှၤဆူတၢ်ဟးဂီၤ” လီၤ. (ကတိၤဒိ ၁၆:၁၈, ခ့ခါစှီၤကျိာ်) ဘၣ်သ့ၣ်သ့ၣ် ပကဒိးန့ၢ်ဘၣ်မူဒါလီၤဆီလၢ တၢ်အိၣ်ဖှိၣ်အပူၤလီၤ. ဒီးပှၤအဂၤတဖၣ် ကဆိကမိၣ်လၢ ပမ့ၢ်ပှၤလၢအရ့ဒိၣ်လီၤ. ဖဲန့ၣ်အခါ မ့ၢ်ပအိၣ်ဒီးတၢ်ဆီၣ်လီၤသးဧါ. ဒီးတၢ်သ့တၢ်ဘၣ်လၢအအိၣ်ဒီးပှၤ ဒီးတၢ်အဂ့ၤလၢ ပမၤကဲထီၣ်လိၣ်ထီၣ်အီၤတမံၤလၢ်လၢ်န့ၣ် မ့ၢ်ပစံးဘျုးက့ၤယဟိဝၤယွၤဧါ. (၁ ကရံၣ်သူး ၄:၇) တၢ်မၢဖိပီလူး ဟ့ၣ်ပလီၢ်ဝဲလၢ “မ့ၢ်တၢ်ဘျုးတၢ်ဖှိၣ်လၢ တၢ်ဟ့ၣ်ယၤသတးဒီး, ယစံးဘၣ်ကယဲၢ် ပှၤအိၣ်လၢသုကျါကိးအဂၤဒဲး, လၢအသုတပာ်အသးထီန့ၢ် အဂ့ၤပာ်ဝဲန့ၣ်တဂ့ၤ.”—ရိမ့ၤ ၁၂:၃.
၁၀ ခံထံၣ်တထံၣ်န့ၣ် တၢ်သိၣ်က့ၤသီက့ၤလၢအဆူၣ် လၢယဟိဝၤယွၤ ဟ့ၣ်စီၤၡၤဘနၤန့ၣ် ပာ်ဖျါထီၣ်လၢ အဝဲနာ်ဝဲလၢ စီၤၡၤဘနၤဆီတလဲအသးကန့ၢ်ဝဲလီၤ. (ကတိၤဒိ ၃:၁၁, ၁၂) ပှၤလၢအမူဒါလီၤဆီ လီၤမၢ်ကွံာ်ဝဲတဖၣ် ဟံးန့ၢ်တၢ်မၤလိလၢ စီၤၡၤဘနၤအတၢ်လဲၤခီဖျိသ့ဝဲလီၤ. လၢအဝဲသ့ၣ်ကသးဒိၣ်ထီၣ်တၢ် ဒီးသးဟးဂီၤအလီၢ် အဝဲသ့ၣ်ဟ့ၣ် ယဟိဝၤယွၤတၢ်လၢ အဂ့ၤကတၢၢ်သ့ဒံးဝဲလီၤ. အဝဲသ့ၣ်ထံၣ်ဝဲ တၢ်သိၣ်က့ၤသီက့ၤအံၤ ဒ်အမ့ၢ်တၢ်ပာ်ဖျါထီၣ် ယဟိဝၤယွၤအတၢ်အဲၣ် လၢအဝဲသ့ၣ်အဖီခိၣ်သ့ဝဲလီၤ. ဒီးသ့ၣ်နီၣ်ထီၣ်လၢပပၢ်ယဟိဝၤယွၤ ကဆိၣ်ဂ့ၤဝဲပှၤလၢ အဆီၣ်လီၤအသးန့ၣ်လီၤ. (ဖး ၁ ပ့းတရူး ၅:၆, ၇ တက့ၢ်.) ပမ့ၢ်အိၣ်ဒီးတၢ်ဆီၣ်လီၤသး ဒီးကပုာ်ဒ်ကပံာ်အသိးန့ၣ် ယဟိဝၤယွၤ အတၢ်သိၣ်က့ၤသီက့ၤ လၢအပှဲၤဒီးတၢ်အဲၣ်တၢ်ကွံန့ၣ် ဘှီပှၤသ့ဝဲလီၤ.
၁၁ သၢထံၣ်တထံၣ်န့ၣ် ပန့ၢ်ဘၣ်တၢ်မၤလိအလုၢ်ဒိၣ်ပှ့ၤဒိၣ်လၢ ယဟိဝၤယွၤအတၢ်ပာ်သူၣ်ပာ်သးလၢ စီၤၡၤဘနၤအဖီခိၣ်န့ၣ်လီၤ. ယဟိဝၤယွၤ အတၢ်သိၣ်က့ၤသီက့ၤန့ၣ် ပာ်ဖျါထီၣ်လၢ အဝဲသးဟ့တၢ်ဒဲးဘး ဘၣ်ဆၣ် ပာ်ဖျါထီၣ်စ့ၢ်ကီးဝဲလၢ အဝဲအဲၣ်ပှၤလၢအမၤ တၢ်ဒဲးဘးတဂၤအံၤလီၤ. ယဟိဝၤယွၤဃုထံၣ်ဝဲ ပှၤတၢ်ဂ့ၤတၢ်ဝါတဖၣ်လီၤ. နမ့မ့ၢ်မိၢ်ပၢ် မ့တမ့ၢ် တၢ်အိၣ်ဖှိၣ်သးပှၢ်န့ၣ် မ့ၢ်နကကွၢ်လိမၤဒိး ယဟိဝၤယွၤ အဒိအတဲာ်ဧါ.—ယူဒၤ ၂၂, ၂၃.
၁၂-၁၄. (က) ပှၤတနီၤနီၤန့ၣ် ဖဲအဝဲသ့ၣ် ဒိးန့ၢ်ဘၣ်တၢ်သိၣ်က့ၤသီက့ၤလၢ ယဟိဝၤယွၤအအိၣ်အခါ မၤဝဲဒ်လဲၣ်. (ခ) လံာ်စီဆှံဆီတလဲ ဒီပုၢ်ဝဲၢ်တဂၤ အတၢ်ပာ်သူၣ်ပာ်သးဒ်လဲၣ် ဒီးကဲဘျုးဒ်လဲၣ်.
၁၂ လီၤသးအုးဒိၣ်မးလၢ ပှၤတနီၤနီၤန့ၣ် ဖဲအဘၣ်တၢ်သိၣ်က့ၤသီက့ၤအခါ အသးဘၣ်ဒိဝဲတုၤဒၣ်လဲာ် အဝဲသ့ၣ်ထုးယံၤထီၣ်အသးဒီး ကစၢ်ယွၤ ဒီးအတၢ်အိၣ်ဖှိၣ်လီၤ. (ဧ့ၤဘြံၤ ၃:၁၂, ၁၃) ပှၤမၤစၢၤအဝဲသ့ၣ်သ့ဒံးဧါ. သ့ဒံးဝဲလီၤ. ပမ့ၢ်ကွၢ် ကြဲ(မ်) န့ၣ် အဝဲဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤ ဒီးလၢခံအဝဲ ဘၣ်တၢ်တူၢ်လိာ်က့ၤအီၤလီၤ. ဘၣ်ဆၣ် လၢခံန့ၣ် အဝဲတဟးစံၣ်တဲၤတဲလီၤတၢ် ဒီးတလဲၤထီၣ်တၢ်အိၣ်ဖှိၣ်လၢၤဘၣ်. တၢ်အိၣ်ဖှိၣ်သးပှၢ်တဂၤ ဂုာ်ကျဲးစၢးရ့ဒီးအီၤဒီး လၢခံအဝဲမၢတၢ်အိၣ်ဖှိၣ်သးပှၢ် မၤလိအီၤလံာ်စီဆှံလီၤ.
၁၃ တၢ်အိၣ်ဖှိၣ်သးပှၢ်တဂၤအံၤ တဲဝဲလၢ “ကြဲ(မ်)အိၣ်ဒီးတၢ်ပာ်ထီၣ်ထီသး ဒီးအဝဲပာ်ဒ့ၣ်ပာ်ကမၣ်ဝဲ တၢ်အိၣ်ဖှိၣ်သးပှၢ်တဖၣ်လၢ အဟီထီၣ်ကွံာ်အီၤန့ၣ်လီၤ. လၢတၢ်န့ၣ်အဃိ လၢခံ ပတဲသကိးလံာ်စီဆှံအဆၢလၢ အဘၣ်ဃာ်ဒီးတၢ်ပာ်ထီၣ်ထီသး ဒီးတၢ်ပာ်ထီၣ်ထီသး မၤဘၣ်ဒိပှၤဒ်လဲၣ်အဂ့ၢ်လီၤ. ခီဖျိလၢ လံာ်စီဆှံအဃိ အဝဲထံၣ်လီၤက့ၤ အတၢ်ဂံၢ်စၢ်ဘါစၢ်လီၤ. ဖဲန့ၣ်အဝဲကမၢကမၣ်ဒိၣ်မး ဒီးတၢ်လၢအထံၣ်ဝဲတဖၣ်န့ၣ် အဝဲတဘၣ်သူၣ်ဘၣ်သးဝဲဘၣ်. အဝဲအၢၣ်လီၤဝဲလၢ လၢညါန့ၣ်အဝဲအိၣ်ဒီး တၢ်ပာ်ထီၣ်ထီသး လၢအလီၤဂာ်ဒီး ‘သ့ၣ်’ တဘိလၢအမၤဘၢအမဲာ်လီၤ. လၢတၢ်န့ၣ်အဃိ အဝဲအတၢ်ကီတၢ်ခဲန့ၣ် မ့ၢ်ဝဲအတၢ်ပာ်သူၣ်ပာ်သး လၢအတဂ့ၤလီၤ. ဘၣ်ဆၣ် ဖဲအဝဲသ့ၣ်ညါလီၤက့ၤ အတၢ်ပာ်သူၣ်ပာ်သးအခါ အဝဲဆီတလဲကွံာ်ဝဲလၢအဆိအချ့လီၤ. အဝဲလဲၤထီၣ်ကဒါက့ၤတၢ်အိၣ်ဖှိၣ်ထီဘိ, မၤလိလံာ်စီဆှံလၢ တၢ်သူၣ်ဆူၣ်သးဆူၣ်အပူၤ ဒီးဒုးအိၣ်ထီၣ်ဝဲလုၢ်လၢ်လၢ ကဃ့ဘါထုကဖၣ်တၢ်ကိးနံၤဒဲးန့ၣ်လီၤ. တကးဒံးဘၣ် အဝဲမၤလၢပှဲၤဝဲဟံၣ်ခိၣ် အမူဒါလၢနီၢ်သးတကပၤအဃိ အဖိဒီးအမါသးခုဒိၣ်မးလီၤ.”—လူၤကၣ် ၆:၄၁, ၄၂; ယၤကိာ် ၁:၂၃-၂၅.
၁၄ တၢ်အိၣ်ဖှိၣ်သးပှၢ်တဂၤအံၤ တဲကဒီးဝဲလၢ “ဘၣ်တနံၤ, ကြဲ(မ်) တဲယၤတၢ်ကတိၤတဖျၢၣ်န့ၣ် ထုးန့ၢ်ယသးဒိၣ်မးလီၤ. အဝဲတဲဝဲလၢ ‘ယသ့ၣ်ညါတၢ်မ့ၢ်တၢ်တီ အိၣ်အနံၣ်အါမးလံ ဒီးယမၤပှၤလဲၤလၢညါ တၢ်မၤစ့ၢ်ကီးလီၤ. ဘၣ်ဆၣ် အခဲအံၤမး ယတဲသ့လၢ ယအဲၣ်ယဟိဝၤယွၤလီၤ.’” တယံာ်ဘၣ်ဒီး အဝဲဒိးန့ၢ်ဘၣ်မူဒါလၢ ကဖီၣ်ကလုၢ်ဒၢ (microphones) လၢတၢ်အိၣ်ဖှိၣ်ပူၤ ဒီးအဝဲဒိးန့ၢ်ဘၣ်မူဒါအံၤအဃိ သးခုဝဲဒိၣ်မးလီၤ. တၢ်အိၣ်ဖှိၣ်သးပှၢ် တဲဝဲလၢ “အဝဲအဒိအတဲာ်န့ၣ် သိၣ်လိယၤလၢ ဖဲပှၤတဂၤဆီၣ်လီၤအသးလၢ ယွၤအမဲာ်ညါ ခီဖျိတူၢ်လိာ်တၢ်သိၣ်ဃီၣ်န့ၣ် အဝဲဒိးန့ၢ်ဘၣ်တၢ်ဆိၣ်ဂ့ၤအါမးလီၤ.”
ဖဲနသိၣ်က့ၤသီက့ၤ ပှၤဂၤအခါ ကွၢ်လိမၤဒိးကစၢ်ယွၤ ဒီးယ့ၣ်ၡူးတက့ၢ်
၁၅. ဒ်သိးပတၢ်သိၣ်က့ၤသီက့ၤ ကကဲဘျုးအဂီၢ် ပကဘၣ်မၤတၢ်မနုၤလဲၣ်.
ပှၤဂၤမ့ၢ်ထံၣ်ဝဲလၢ နအိၣ်ဒီး တၢ်ဆီၣ်လီၤသးန့ၣ် အဝဲသ့ၣ်ကတူၢ်လိာ် နတၢ်သိၣ်က့ၤသီက့ၤအဂီၢ် ကညီထီၣ်ဝဲလီၤ
၁၅ ပမ့ၢ်အဲၣ်ဒိးကဲထီၣ် ပှၤသိၣ်လိတၢ်လၢအဂ့ၤတဂၤန့ၣ် ပကဘၣ်ကဲထီၣ်ဆိ ကၠိဖိလၢအဂ့ၤလီၤ. (၁ တံၤမသ့း ၄:၁၅, ၁၆) ဒ်န့ၣ်အသိး နမ့မ့ၢ်ပှၤလၢယဟိဝၤယွၤသူဝဲ ဒ်သိးကသိၣ်က့ၤသီက့ၤပှၤဂၤအဂီၢ်န့ၣ် နကဘၣ်အိၣ်ဒီးတၢ်ဆီၣ်လီၤသး ဒီးပျဲယဟိဝၤယွၤလၢ ကဟံးစုနဲၣ်ကျဲနၤလီၤ. ပှၤဂၤမ့ၢ်ထံၣ်ဝဲလၢ နအိၣ်ဒီးတၢ်ဆီၣ်လီၤသးန့ၣ် အဝဲသ့ၣ်ကတူၢ်လိာ် နတၢ်သိၣ်က့ၤသီက့ၤအဂီၢ် ကညီထီၣ်ဝဲလီၤ. ပကကွၢ်သကိး ယ့ၣ်ၡူးအဒိအတဲာ်လီၤ.
၁၆. ဒ်သိးပတၢ်သိၣ်က့ၤသီက့ၤ ဒီးပတၢ်သိၣ်လိနဲၣ်လိ ကကဲဘျုးအဂီၢ် ပဟံးန့ၢ်တၢ်မၤလိလၢ ယ့ၣ်ၡူးအအိၣ်ကသ့ဒ်လဲၣ်.
၁၆ မ့ၢ်ကီလၢ ယ့ၣ်ၡူးကဒိကနၣ် အပၢ်အကလုၢ်သနာ်က့ အဝဲဒိကနၣ်ဝဲထီဘိလီၤ. (မးသဲ ၂၆:၃၉) အဝဲဒုးသ့ၣ်နီၣ်ထီၣ် ပှၤလၢအဒိကနၣ် အတၢ်စံၣ်တဲၤတဲလီၤတဖၣ် လၢအတၢ်သိၣ်လိ ဒီးအတၢ်ကူၣ်ဘၣ်ကူၣ်သ့တဖၣ်န့ၣ် ဟဲလၢအပၢ်အအိၣ်လီၤ. (ယိၤဟၣ် ၅:၁၉, ၃၀) ယ့ၣ်ၡူးန့ၣ်အိၣ်ဒီးတၢ်ဆီၣ်လီၤသး ဒီးတၢ်ဒိကနၣ်အဃိ မၤစၢၤအီၤဒ်သိးအဝဲကကဲထီၣ် သရၣ်လၢအသးအိၣ်မၤစၢၤပှၤဂၤလီၤ. ပှၤလၢအသူၣ်ဘျၢသးဘျၢတဖၣ် ရ့ဒီးအီၤမုာ်ဝဲလီၤ. (ဖး မးသဲ ၁၁:၂၉ တက့ၢ်.) ယ့ၣ်ၡူးအတၢ်ကတိၤလၢ အပှဲၤဒီးတၢ်အဲၣ်တၢ်ကွံန့ၣ် ဟ့ၣ်ဂံၢ်ဟ့ၣ်ဘါဝဲ ပှၤလၢအသးဟးဂီၤ ဒီးအသးလီၤစၢ်တဖၣ်လီၤ. (မးသဲ ၁၂:၂၀) ဖဲအပျဲၢ်အဘီၣ်တဖၣ် တဲအါလိာ်အသးလၢ မတၤကကဲထီၣ် ပှၤအဒိၣ်ကတၢၢ်တဂၤလဲၣ်အခါ ယ့ၣ်ၡူးသိၣ်က့ၤသီက့ၤအဝဲသ့ၣ်လၢ တၢ်အဲၣ်တၢ်ကွံအပူၤလီၤ.—မၢ်ကူး ၉:၃၃-၃၇; လူၤကၣ် ၂၂:၂၄-၂၇.
၁၇. ဒ်သိးတၢ်အိၣ်ဖှိၣ်သးပှၢ်တဖၣ် ကကွၢ်ထွဲတၢ်အိၣ်ဖှိၣ်ဂ့ၤဂ့ၤအဂီၢ် တၢ်ဂ့ၤတၢ်ဝါမနုၤတဖၣ် ကမၤစၢၤအဝဲသ့ၣ်လဲၣ်.
၁၇ ဖဲတၢ်အိၣ်ဖှိၣ်သးပှၢ်တဖၣ် သိၣ်က့ၤသီက့ၤတၢ်လၢ အဒိးသန့ၤထီၣ်အသးလၢ လံာ်စီဆှံအတၢ်ဟံးစုနဲၣ်ကျဲအခါ အဝဲသ့ၣ်ကဘၣ်ကွၢ်လိမၤဒိး ယ့ၣ်ၡူးလီၤ. အဝဲသ့ၣ်မ့ၢ်မၤဝဲဒ်န့ၣ်န့ၣ် မ့ၢ်ဒၣ်အပာ်ဖျါထီၣ်လၢ အဝဲသ့ၣ်အဲၣ်ဒိးလၢ ကစၢ်ယွၤ ဒီးအဖိခွါကဟံးစုနဲၣ်ကျဲအီၤလီၤ. တၢ်မၢဖိပ့းတရူးကွဲးဝဲလၢ “ဘုၣ်အီၣ်ဘုၣ်အီ ယွၤအသိတဖုအိၣ်လၢသုကျါ, ဒီးကွၢ်အီၤလၢတၢ်မၢဆူၣ်သုအဃိတမ့ၢ်ဘၣ်, မ့ၢ်လၢသုသးအိၣ်ထီၣ်ဒၣ်တၢ်အဃိတက့ၢ်. လၢစ့ဘၣ်ဃးဒီးတၢ်မဲာ်ဆှးအဃိ တမ့ၢ်ဘၣ်, မ့ၢ်လၢသုသးအိၣ်သပှၢ်တၢၢ်အဃိတက့ၢ်. ဒ်ပှၤပာ်ကစၢ်အသးလၢ တၢ်န့ၢ်သါအဖီခိၣ်တမ့ၢ်ဘၣ်, မ့ၢ်ဒ်ပှၤကဲထီၣ်သိတဖု အဒိအတဲာ်အသိးတက့ၢ်.” (၁ ပ့းတရူး ၅:၂-၄) တၢ်အိၣ်ဖှိၣ်သးပှၢ်လၢ အပျဲကစၢ်ယွၤဒီးကစၢ်ခရံာ် ဟံးစုနဲၣ်ကျဲအီၤန့ၣ် ကဒိးန့ၢ်ဘၣ်အဘျုး တကးဒံးဘၣ် ပှၤလၢအဝဲသ့ၣ်တီခိၣ်ရိၤမဲဝဲတဖၣ် ကဒိးန့ၢ်ဘၣ်အဘျုးစ့ၢ်ကီးလီၤ.—ယၡါယၤ ၃၂:၁, ၂, ၁၇, ၁၈.
၁၈. (က) ယဟိဝၤယွၤ အဲၣ်ဒိးလၢ မိၢ်ပၢ်တဖၣ် ကမၤတၢ်မနုၤလဲၣ်. (ခ) ကစၢ်ယွၤမၤစၢၤမိၢ်ပၢ်တဖၣ်ဒ်လဲၣ်.
၁၈ တၢ်သိၣ်က့ၤသီက့ၤလၢ ဟံၣ်ပူၤဃီပူၤစ့ၢ်ကီး ဒ်န့ၣ်လီၤ. ယဟိဝၤယွၤ တဲဟံၣ်ခိၣ်လၢ “မၤဒိၣ်ထီၣ်သုဖိတဖၣ် အသးတဂ့ၤ. မ့မ့ၢ်လုၢ်အီၣ်အီၤလၢ ကစၢ်အတၢ်သိၣ်တၢ်သီ, ဒီးအတၢ်သိၣ်ဃီၣ်သီဃီၣ် အပူၤတက့ၢ်.” (အ့းဖ့းစူး ၆:၄) မ့ၢ်ပလိၣ်ဘၣ် တၢ်သိၣ်လိနဲၣ်လိ ဒီးတၢ်သိၣ်က့ၤသီက့ၤဧါ. ကတိၤဒိ ၁၉:၁၈ တဲဝဲလၢ “တၢ်မုၢ်လၢ်အိၣ်ဝဲအဖၢမုၢ်ဒီး, သိၣ်ဃီၣ်နဖိခွါတက့ၢ်. ဒီးဆၢသံအီၤတဂ့ၤ.” ယဟိဝၤယွၤ ဟ့ၣ်ဝဲမိၢ်ပၢ်တဖၣ်အမူဒါလၢ ကသိၣ်က့ၤသီက့ၤအဖိလီၤ. အဝဲသ့ၣ်မ့ၢ်တသိၣ်အဖိန့ၣ် ကဘၣ်ဟ့ၣ်က့ၤ တၢ်စံးဆၢလၢ ယဟိဝၤယွၤအအိၣ်လီၤ. (၁ ၡမူၤအ့လး ၃:၁၂-၁၄) ဘၣ်ဆၣ်မိၢ်ပၢ်လၢ အဃ့တၢ်မၤစၢၤလၢ ကစၢ်ယွၤအအိၣ်, သန့ၤကအသးလၢ ကစၢ်ယွၤကလုၢ်ကထါ ဒီးပျဲယွၤအသးစီဆှံဟံးစုနဲၣ်ကျဲအီၤန့ၣ် ယဟိၤဝၤယွၤကဟ့ၣ်အဝဲသ့ၣ် တၢ်ကူၣ်သ့ဒီး တၢ်ဂံၢ်တၢ်ဘါလီၤ.—ဖး ယၤကိာ် ၁:၅ တက့ၢ်.
မၤလိနသး ဒ်သိးနကအိၣ်ဘၣ်မုာ်မုာ်ခုၣ်ခုၣ် လီၤထူလီၤယိာ်အဂီၢ်
၁၉, ၂၀. (က) ပမ့ၢ်တူၢ်လိာ်ကစၢ်ယွၤ အတၢ်သိၣ်က့ၤသီက့ၤန့ၣ် ပကဒိးန့ၢ်ဘၣ်တၢ်ဆိၣ်ဂ့ၤဒ်လဲၣ်. (ခ) တၢ်မၤလိလၢခံတခါန့ၣ် ပကမၤလိသကိးတၢ်ဂ့ၢ်မနုၤလဲၣ်.
၁၉ ပမ့ၢ်တူၢ်လိာ် ကစၢ်ယွၤအတၢ်သိၣ်က့ၤသီက့ၤ ဒီးဖဲပဘၣ်သိၣ်က့ၤသီက့ၤပှၤဂၤအခါ ပမ့ၢ်ကွၢ်လိမၤဒိး ယဟိဝၤယွၤဒီးယ့ၣ်ၡူးန့ၣ် ပကဒိးန့ၢ်ဘၣ်တၢ်ဆိၣ်ဂ့ၤ အါအါဂီၢ်ဂီၢ်လီၤ. တကးဒံးဘၣ် ပတၢ်အိၣ်ဖှိၣ် ဒီးပဟံၣ်ဖိဃီဖိ ကပှဲၤဒီးတၢ်ဃူတၢ်ဖိး ဒီးပှၤကိးဂၤဒဲးန့ၣ် ကတူၢ်ဘၣ်ဝဲလၢ အဒိးန့ၢ်ဘၣ်တၢ်အဲၣ်တၢ်ကွံ, အဝဲသ့ၣ်အိၣ်ဒီးအလုၢ်အပှ့ၤ ဒီးတဘၣ်ယိၣ်ဘၣ်ဘှီတၢ်ဘၣ်. တၢ်ဃူတၢ်ဖိးဒီးတၢ်သူၣ်ခုသးခုလၢ ပထံၣ်ဘၣ်အီၤတဖၣ်အံၤ မ့ၢ်ဒၣ်တၢ်တစဲးဖိဒံးလီၤ. လၢခါဆူညါန့ၣ် ပကထံၣ်ဘၣ်အါန့ၢ်အန့ၣ်ဒံးလီၤ. (စံးထီၣ်ပတြၢၤ ၇၂:၇) ယဟိဝၤယွၤ အတၢ်သိၣ်က့ၤသီက့ၤန့ၣ် ကတဲာ်ကတီၤပှၤဒ်သိး ပကအိၣ်ဃူဃူဖိးဖိးလီၤထူလီၤယိာ် ဒ်ဟံၣ်ဖိဃီဖိတဒူၣ်လၢ ပပၢ်ယဟိဝၤယွၤ အတၢ်ကဟုကယာ်အဖီလာ်န့ၣ်လီၤ. (ဖး ယၡါယၤ ၁၁:၉ တက့ၢ်.) ပမ့ၢ်သ့ၣ်နီၣ်ထီၣ်တၢ်ဂ့ၢ်အံၤန့ၣ် ပကထံၣ်ဘၣ်လၢ တၢ်သိၣ်က့ၤသီက့ၤန့ၣ် မ့ၢ်ဝဲကျဲအဂ့ၤတဘိလၢ ယဟိဝၤယွၤ ပာ်ဖျါထီၣ်အတၢ်အဲၣ်လၢ ပဖီခိၣ်န့ၣ်လီၤ.
၂၀ တၢ်မၤလိလၢခံတခါန့ၣ် ပကမၤလိအါထီၣ် ဘၣ်ဃးတၢ်သိၣ်က့ၤသီက့ၤ လၢဟံၣ်ပူၤဃီပူၤ ဒီးလၢတၢ်အိၣ်ဖှိၣ်ပူၤန့ၣ်လီၤ. ပကတဲသကိးတၢ်ဂ့ၢ် ဘၣ်ဃးဒီးပပၢၤပသး ကသ့ဒ်လဲၣ်. ဒီးပဟးဆှဲးတၢ်လၢ ကမၤဘၣ်ဒိပှၤဒိၣ်န့ၢ် ပဘၣ်တၢ်သိၣ်က့ၤသီက့ၤပှၤ ကသ့ဒ်လဲၣ်န့ၣ်လီၤ.
