တၢ်မၤဂ့ၤတၢ် ပမၤဒိၣ်ထီၣ် တၢ်ဂ့ၤတၢ်ဝါတခါအံၤ ကသ့ဒ်လဲၣ်
ပဝဲကိးဂၤဒဲးန့ၣ် ပအဲၣ်ဒိးလၢ ပှၤကထံၣ်ပှၤဒ် ပှၤလၢအဂ့ၤတဂၤလီၤ. ဘၣ်ဆၣ် ဆၢကတီၢ်ခဲအံၤ ပကကဲထီၣ် ပှၤလၢအဂ့ၤအဂီၢ်န့ၣ် တညီဘၣ်. မ့ၢ်လၢပှၤအါဂၤန့ၣ် “တအဲၣ်ဘၣ်ပှၤအဂ့ၤဘၣ်” အဃိလီၤ. (၂ တံၤမသ့း ၃:၃) ဘၣ်ဃးဒီး တၢ်အဘၣ်ဒီး တၢ်အကမၣ်န့ၣ် အဝဲသ့ၣ် ပာ်လီၤတၢ်ဘျၢလၢ အနီၢ်ကစၢ်လီၤ. အဝဲသ့ၣ် “ကိးတၢ်အၢလၢတၢ်ဂ့ၤ, ဒီးတၢ်ဂ့ၤလၢတၢ်အၢ” လီၤ. (ယၡါယၤ ၅:၂၀) ခီဖျိလၢ ပတၢ်လဲၤခီဖျိလၢ အတဂ့ၤဘၣ်တဖၣ် ဒီးပတၢ်ဂံၢ်စၢ်ဘါစၢ်တဖၣ်အဃိ ပကတူၢ်ဘၣ်တၢ်ဒ်သိး အဲ(န်) သ့ဝဲလီၤ. အဲ(န်) * မ့ၢ်ပှၤလၢ အမၤယဟိဝၤယွၤအတၢ်မၤ အိၣ်လံအနံၣ်အါမးလံ. ဘၣ်ဆၣ် အဝဲတဲဝဲလၢ “ယဆိကမိၣ် ယကဲထီၣ်ပှၤလၢအဂ့ၤ တသ့နီတဘျီဘၣ်.”
လီၤသးခုဒိၣ်မးလၢ ပကဲထီၣ်ပှၤလၢ အဂ့ၤသ့ဝဲန့ၣ်လီၤ. တၢ်ဂ့ၤတၢ်ဝါအံၤန့ၣ် ဟဲကဲထီၣ်အသး ခီဖျိလၢ ယွၤအသးစီဆှံလီၤ. ပတၢ်တလၢတပှဲၤဒီး ပှၤဂၤအတၢ်ပာ်သူၣ်ပာ်သးလၢ အတဂ့ၤတဖၣ်န့ၣ် အမၤတံာ်တာ်ပှၤဒ်သိး ပကကဲထီၣ် ပှၤလၢအဂ့ၤ ဘၣ်ဆၣ် ကစၢ်ယွၤသးစီဆှံန့ၣ် အစိကမီၤဒိၣ်န့ၢ်ဒံး တၢ်သ့ၣ်တဖၣ်အံၤလီၤ. ပကဃုသ့ၣ်ညါ ဘၣ်ဃးဒီး တၢ်မၤဂ့ၤတၢ်အဂ့ၢ် လီၤတံၢ်လီၤဆဲး ဒီးပပာ်ဖျါအါထီၣ် တၢ်ဂ့ၤတၢ်ဝါအံၤ ကသ့ဒ်လဲၣ်န့ၣ်လီၤ.
တၢ်မၤဂ့ၤတၢ်န့ၣ် မ့ၢ်မနုၤလဲၣ်
တၢ်မၤဂ့ၤတၢ်န့ၣ်မ့ၢ်ဝဲ တၢ်လၢအတပၣ်ဃုာ်ဒီး တၢ်အၢတၢ်သီဘၣ်. ပှၤလၢအဂ့ၤတဂၤန့ၣ် အိၣ်ဒီးတၢ်သကဲးပဝာ် လၢအဂ့ၤဒိၣ်မး ဒီးမၤတၢ်လၢအဘၣ် ထီဘိလီၤ. ပှၤလၢအဂ့ၤတဂၤန့ၣ် ဃုကျဲလၢ ကမၤစၢၤပှၤဂၤ ဒီးမၤဂ့ၤပှၤဂၤထီဘိလီၤ.
ဘၣ်သ့ၣ်သ့ၣ် နကထံၣ်ဘၣ်လၢ ပှၤတနီၤနီၤန့ၣ် အိၣ်ကတဲာ်ကတီၤသး ထီဘိလၢ ကမၤစၢၤအဟံၣ်ဖိဃီဖိ ဒီးအတံၤသကိးတဖၣ်လီၤ. ဘၣ်ဆၣ် တၢ်မၤဂ့ၤတၢ်န့ၣ် ကြၢးမ့ၢ်ထဲန့ၣ်လီၤဧါ. ပဝဲခဲလၢာ် ပတလၢတပှဲၤဘၣ်အဃိ ပပာ်ဖျါထီၣ် တၢ်ဂ့ၤတၢ်ဝါတခါအံၤ တသ့လၢလၢပှဲၤပှဲၤဘၣ်. လံာ်စီဆှံတဲဝဲလၢ “ပှၤအတီလၢအမၤတၢ်ဂ့ၤ, ဒီးတမၤဘၣ်တၢ်ဒဲးဘးဘၣ်န့ၣ် တအိၣ်ဘၣ်လၢဟီၣ်ခိၣ်ချၢ နီတဂၤဘၣ်” လီၤ. (စံၣ်တဲၤတဲလီၤတၢ် ၇:၂၀) တၢ်မၢဖိပီလူး အၢၣ်လီၤဝဲလၢ “ယသ့ၣ်ညါလၢ တၢ်ဂ့ၤတအိၣ် တဆိးဘၣ်လၢယပူၤ, ဒ်ပစံးတၢ်အသိး, လၢယဖံးယညၣ်အပူၤလီၤ.” (ရိမ့ၤ ၇:၁၈) အဃိပသ့ၣ်ညါဘၣ်လၢ ပမ့ၢ်အဲၣ်ဒိးမၤအါထီၣ် တၢ်ဂ့ၤတၢ်ဝါတခါအံၤန့ၣ် ပကဘၣ်ဟံးန့ၢ် တၢ်မၤလိလၢ ယဟိဝၤယွၤလၢအမ့ၢ် တၢ်မၤဂ့ၤတၢ် အဂံၢ်ခိၣ်သ့ၣ် အအိၣ်န့ၣ်လီၤ.
“ယွၤမ့ၢ်တၢ်ဂ့ၤ”
ဘၣ်ဃးဒီးတၢ်ဂ့ၤန့ၣ် ယဟိဝၤယွၤ ပာ်လီၤန့ၢ်ပှၤ တၢ်ဘျၢလီၤ. ဘၣ်ဃးဒီးကစၢ်ယွၤန့ၣ် လံာ်စီဆှံတဲဝဲလၢ “နမ့ၢ်တၢ်ဂ့ၤ, ဒီးနမၤဂ့ၤတၢ်လီၤ. သိၣ်လိယၤလၢ နတၢ်မၤလိာ်န့ၣ်တက့ၢ်.” (စံးထီၣ်ပတြၢၤ ၁၁၉:၆၈) ပကကွၢ်သကိး တၢ်ဂ့ၤခံမံၤလၢ ဘၣ်ဃးဒီးယဟိဝၤယွၤ လၢလံာ်စီဆှံအဆၢဖိအံၤ ပာ်ဖျါထီၣ်ဝဲန့ၣ်လီၤ.
ယဟိဝၤယွၤ မ့ၢ်တၢ်ဂ့ၤ. တၢ်မၤဂ့ၤတၢ်န့ၣ် မ့ၢ်ဝဲယဟိဝၤယွၤ အတၢ်ဂ့ၤတၢ်ဝါတခါလၢ အအိၣ်ဒီးအီၤထီဘိလီၤ. ဒီးအတၢ်ဂ့ၤတၢ်ဝါလၢ အဂၤခဲလၢာ်န့ၣ် ဘၣ်ထွဲလိာ်အသးဒီး တၢ်မၤဂ့ၤတၢ်လီၤ. ဆိကမိၣ်ကွၢ် တၢ်ကဲထီၣ်အသး ဖဲယဟိဝၤယွၤ တဲစီၤမိၤၡ့လၢ ယကဒုးနဲၣ်နၤ “ယတၢ်ဂ့ၤခဲလၢာ် လၢနမဲာ်ညါ” အခါန့ၣ်တက့ၢ်. ဖဲယဟိဝၤယွၤ ပာ်ဖျါထီၣ် အတၢ်လၤတၢ်ကပီၤ ဃုာ်ဒီးအတၢ်မၤဂ့ၤတၢ်အခါ စီၤမိၤၡ့နၢ်ဟူတၢ်ကလုၢ်လၢ အတဲဝဲလၢ “ယွၤ, ကစၢ်ယွၤလၢအသးအိၣ်တၢ်, ဒီးသးကညီၤတၢ်, သးထီၣ်ကီ, ဒီးအဘျုးအဖှိၣ်ဒီး အမ့ၢ်အတီအိၣ်ဝဲအါမးလီၤ. ဟံးဃာ်တၢ်ဘျုးတၢ်ဖှိၣ်လၢပှၤကထိတဖၣ်အဂီၢ်, ပျၢ်တၢ်အၢတၢ်သီ ဒီးတၢ်သရူးတၢ်ကမၣ် ဒီးတၢ်ဒဲးတူာ်တၢ်ဒဲးဘးလီၤ. ဒီးတကွၢ်ကပာ်တၢ်ဒဲးဘး လ့ၤတက့ၤဘၣ်” လီၤ. (၂ မိၤၡ့ ၃၃:၁၉; ၃၄:၆, ၇) လၢတၢ်န့ၣ်အဃိ ပသ့ၣ်ညါဘၣ်လၢ ယဟိဝၤယွၤ ဂ့ၤဝဲလၢာ်လၢာ်ဆ့ဆ့ လၢကျဲကိးဘိဒဲးလီၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲမ့ၢ်ပှၤဟီၣ်ခိၣ်ဖိလၢ အဂ့ၤကတၢၢ်ဘၣ်ဆၣ် အဝဲတဲဝဲလၢ “ပှၤဂ့ၤတအိၣ်ဘၣ်, အိၣ်ထဲယွၤတဂၤဧိၤလီၤ.”—လူၤကၣ် ၁၈:၁၉.
ပမ့ၢ်ကွၢ် ယဟိဝၤယွၤအတၢ်ဘၣ်တ့တဖၣ်န့ၣ် ပထံၣ်ဘၣ် အတၢ်မၤဂ့ၤတၢ်တဖၣ်
ယဟိဝၤယွၤ မၤဂ့ၤတၢ်. တၢ်လၢယဟိဝၤယွၤ မၤဝဲခဲလၢာ်န့ၣ် ပာ်ဖျါထီၣ်ဝဲလၢ အဝဲမ့ၢ်ပှၤလၢ အဂ့ၤလီၤ. လံာ်စီဆှံတဲဝဲလၢ “ယွၤမၤဂ့ၤတၢ်ခဲလၢာ်, ဒီးအသးအိၣ် ကယဲၢ်အတ့လီၤတၢ်ခဲလၢာ်လီၤ.” (စံးထီၣ်ပတြၢၤ ၁၄၅:၉) ယဟိဝၤယွၤ မ့ၢ်တၢ်ဂ့ၤဒီး တကွၢ်ဒိၣ်ဆံးအါစှၤတၢ်ဘၣ်အဃိ အဝဲဟ့ၣ်ပှၤကိးဂၤဒဲး သးသမူ ဒီးတၢ်လၢအဝဲသ့ၣ်လိၣ်ဘၣ်ဝဲ ဒ်သိးကအိၣ်မူအဂီၢ်န့ၣ်လီၤ. (မၤတၢ် ၁၄:၁၇) ယဟိဝၤယွၤမၤဂ့ၤတၢ် ခီဖျိလၢ အပျၢ်ကွံာ် ပတၢ်ကမၣ်န့ၣ်လီၤ. ပှၤကွဲးထါစံးထီၣ်ပတြၢၤ ကွဲးဝဲလၢ “ယွၤဧၢ, နဲဒၣ်အံၤနမ့ၢ်တၢ်ဂ့ၤ, ဒီးနပျၢ်ကွံာ်တၢ်ညီ” လီၤ. (စံးထီၣ်ပတြၢၤ ၈၆:၅) ပနာ်သ့လီၤတံၢ်လၢ ယဟိဝၤယွၤ “တတြီဘၣ်တၢ်ဂ့ၤလၢ ပှၤလဲၤတၢ် တီတီလိၤလိၤတဖၣ်န့ၣ် နီတမံၤဘၣ်” လီၤ.—စံးထီၣ်ပတြၢၤ ၈၄:၁၁.
“မၤလိ မၤတၢ်ဂ့ၤတက့ၢ်”
ပဘၣ်တၢ်တ့လီၤပှၤ ဒ်ယွၤအက့ၢ်အဂီၤအဃိ ပကဲထီၣ်ပှၤလၢ အဂ့ၤဒီးမၤတၢ်လၢ အဂ့ၤတဖၣ်သ့လီၤ. (၁ မိၤၡ့ ၁:၂၇) ဘၣ်ဆၣ် တၢ်ဂ့ၤတၢ်ဝါတဖၣ်အံၤ တဟဲကဲထီၣ် ဒၣ်အတၢ်ဘၣ်. လၢတၢ်န့ၣ်အဃိ ယဟိဝၤယွၤတဲပှၤလၢ ပကဘၣ် “မၤလိမၤတၢ်ဂ့ၤ” လီၤ. (ယၡါယၤ ၁:၁၇) ဘၣ်ဆၣ် ပမၤလိပသး ဒ်သိးပကမၤတၢ်ဂ့ၤ ကသ့ဒ်လဲၣ်. ပကဆိကမိၣ်ကွၢ် တၢ်ဂ့ၢ်သၢထံၣ်လၢ ပမၤဒ်န့ၣ်သ့လီၤ.
တၢတထံၣ်န့ၣ် ပကဘၣ်ဃ့သးစီဆှံ ဒ်သိးကမၤစၢၤပှၤ လၢပကကဲထီၣ်ပှၤဂ့ၤတဂၤ လၢယွၤအမဲာ်ညါအဂီၢ်လီၤ. (ကလၤတံ ၅:၂၂) ဒ်သိးပအဲၣ်တၢ်လၢအဂ့ၤ ဒီးသးဟ့တၢ်လၢအအၢ ကသ့အဂီၢ် ယွၤအသးစီဆှံ မၤစၢၤပှၤသ့လီၤ. (ရိမ့ၤ ၁၂:၉) လံာ်စီဆှံတဲဝဲလၢ ယဟိဝၤယွၤဒုး ‘အိၣ်ဂၢၢ်ဆိးကျၢၤပှၤလၢ ကယဲၢ်တၢ်ကတိၤအဂ့ၤ, ဒီးတၢ်မၤအဂ့ၤအပူၤ’ သ့လီၤ.—၂ သ့းစၤလနံ ၂:၁၆, ၁၇.
ခံထံၣ်တထံၣ်န့ၣ် ပကဘၣ်ဖးလံာ်စီဆှံလီၤ. ဖဲပဖးလံာ်စီဆှံအခါ ယဟိဝၤယွၤသိၣ်လိပှၤလၢ “ကယဲၢ်ကျဲဧိၤကပူၤဧိၤလၢ အဂ့ၤအဘၣ်” ဒီးကတဲာ်ကတီၤပှၤလၢ ပကမၤ “ကယဲၢ်တၢ်မၤဂ့ၤ တမံၤလၢ်လၢ်အဂီၢ်” လီၤ. (ကတိၤဒိ ၂:၉; ၂ တံၤမသ့း ၃:၁၇) ပသးန့ၣ် လီၤဂာ်ဒ် တၢ်လုၢ်ဒိၣ်ပှ့ၤဒိၣ် တလါဖးဒိၣ် တဖျၢၣ်လီၤ. ဖဲပဖးလံာ်စီဆှံ ဒီးဆိကမိၣ်ထံအီၤအခါ မ့ၢ်ဒၣ်ပပာ်ဖှိၣ်တၢ်ဂ့ၤလၢ ပသးပူၤအဃိ လီၤဂာ်ဒ် ပမၤပှဲၤပတၢ်လုၢ်ဒိၣ်ပှ့ၤဒိၣ် တလါဖးဒိၣ်ဒီးတၢ်ထူးတၢ်တီၤ ဒ်သိးအကမၤစၢၤပှၤ လၢခါဆူညါအဂီၢ်လီၤ.—လူၤကၣ် ၆:၄၅; အ့းဖ့းစူး ၅:၉.
သၢထံၣ်တထံၣ်န့ၣ် ပကဘၣ်ဂုာ်ကျဲးစၢး “ကွၢ်လိတၢ်ဂ့ၤ” လီၤ. (၃ ယိၤဟၣ် ၁၁) လၢလံာ်စီဆှံအပူၤန့ၣ် ပထံၣ်ဘၣ် ပှၤဒိဂ့ၤတဲာ်ဘၣ်လၢပဂီၢ်လီၤ. ပှၤလၢအဒိဂ့ၤတဲာ်ဘၣ်ကတၢၢ်န့ၣ် မ့ၢ်ဝဲယဟိဝၤယွၤ ဒီးယ့ၣ်ၡူးလီၤ. ဘၣ်ဆၣ် ပဆိကမိၣ်ကွၢ် ပှၤဒိဂ့ၤတဲာ်ဘၣ်အဂၤလၢ အမၤဂ့ၤတၢ်အဂ့ၢ် သ့ဝဲလီၤ. ဘၣ်သ့ၣ်သ့ၣ် နကဆိကမိၣ်ထီၣ်ဘၣ် နီၢ်တဘံၤသါ ဒီးစီၤဘၢ်နါဘၤအဂ့ၢ်န့ၣ်လီၤ. (မၤတၢ် ၉:၃၆; ၁၁:၂၂-၂၄) ဖဲနမၤ နီၢ်ကစၢ်တၢ်မၤလိလံာ်စီဆှံအခါ နမ့ၢ်မၤလိ အဝဲသ့ၣ်အဂ့ၢ်န့ၣ် ကကဲဘျုးလၢ နဂီၢ်ဒိၣ်မးလီၤ. ဒီးဖဲနမၤလိတၢ်အခါန့ၣ် ပာ်သူၣ်ပာ်သးလၢ အဝဲသ့ၣ်မၤစၢၤပှၤဂၤဒ်လဲၣ် န့ၣ်တက့ၢ်. တကးဒံးဘၣ် ဆိကမိၣ်ကွၢ်လၢ နမၤစၢၤနဟံၣ်ဖိဃီဖိ မ့တမ့ၢ် ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤတနီၤ ကသ့ဒ်လဲၣ်န့ၣ်တက့ၢ်. ဆိကမိၣ်ကွၢ်စ့ၢ် ကီးလၢ ခီဖျိလၢနီၢ်တဘံၤသါ ဒီးစီၤဘၢ်နါဘၤ မၤဂ့ၤပှၤဂၤတဖၣ်အဃိ ဒိးန့ၢ်ဘၣ်အဘျုးဒ်လဲၣ်န့ၣ်တက့ၢ်. နၤစ့ၢ်ကီး နဒိးန့ၢ်ဘၣ်အဘျုးဒ်န့ၣ် သ့လီၤ.
ပဆိကမိၣ်ဘၣ်ဃးဒီး ပှၤဒိဂ့ၤတဲာ်ဘၣ်လၢအမၤဂ့ၤတၢ် ဖဲပစိၤခဲအံၤတဖၣ်အဂ့ၢ် သ့ဝဲစ့ၢ်ကီးလီၤ. အဒိ ဆိကမိၣ်ကွၢ် တၢ်အိၣ်ဖှိၣ်သးပှၢ်လၢ အဂုာ်ကျဲးစၢးမၤတၢ်ဆူၣ်ဆူၣ် လၢတၢ်အိၣ်ဖှိၣ်အပူၤဒီး “အဲၣ်ပှၤဂ့ၤ” တဖၣ်န့ၣ်တက့ၢ်. ဒီးဆိကမိၣ်ကွၢ် ဒီပုၢ်ဝဲၢ်မုၣ်တဖၣ်လၢအမ့ၢ် “ပှၤသိၣ်တၢ်လၢအဂ့ၤ” ခီဖျိလၢ အတၢ်ကတိၤ ဒီးတၢ်မၤန့ၣ်တက့ၢ်. (တံတူး ၁:၈; ၂:၃) ဒီပုၢ်ဝဲၢ်မုၣ် ရိၣ်စလဲ တဲဝဲလၢ “ယသကိးန့ၣ် ဂုာ်ကျဲးစၢးထဲးဂံၢ်ထဲးဘါ ဒ်သိးကမၤစၢၤဒီး ဟ့ၣ်ဂံၢ်ဟ့ၣ်ဘါပှၤဂၤ လၢတၢ်အိၣ်ဖှိၣ်အပူၤလီၤ. အဝဲဆိကမိၣ်ကွၢ် ပှၤဂၤအတၢ်အိၣ်သး ဒီးဟ့ၣ်ဝဲတၢ်ဟ့ၣ် ဆံးဆံးဖိတဖၣ် ခဲအံၤခဲအံၤ မ့တမ့ၢ် တသ့ဖဲအသ့ မၤစၢၤအဝဲသ့ၣ် လၢကျဲလၢအဂၤတဖၣ်န့ၣ်လီၤ. ယထံၣ်အီၤဒ် အဝဲမ့ၢ် ပှၤလၢအဂ့ၤနီၢ်ကီၢ်တဂၤလီၤ.”
ယဟိဝၤယွၤဟ့ၣ်ဂံၢ်ဟ့ၣ်ဘါ အခ့အပှၤတဖၣ်လၢက “ဃုတၢ်ဂ့ၤ” လီၤ. (ဧၤမိၣ် ၅:၁၄) ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပကအဲၣ်တၢ်လၢ ယဟိဝၤယွၤတဲဝဲလၢအဂ့ၤ တကးဒံးဘၣ် ပကအဲၣ်ဒိးမၤ တၢ်လၢအဂ့ၤ သပှၢ်ကတၢၢ်လီၤ.
ပကဘၣ်ဂုာ်ကျဲးစၢးကဲထီၣ် ပှၤလၢအဂ့ၤ ဒီးမၤတၢ်လၢအဂ့ၤလီၤ
ဒ်သိးပကကဲ ပှၤလၢအဂ့ၤအဂီၢ် တလိၣ်လၢပကဘၣ်မၤ တၢ်တမံၤမံၤ လၢပှၤဂၤအဂီၢ် ဒ်သိးအဝဲသ့ၣ်ကကမၢကမၣ် မ့တမ့ၢ် ဟ့ၣ်အဝဲသ့ၣ်တၢ်ဟ့ၣ် လၢအပှ့ၤဒိၣ်ဘၣ်. အဒိ ဖဲပသူၣ်အီၣ်တၢ်ဒိးတၢ်လၣ်အခါ ဒ်သိးကဒိၣ်ထီၣ်အဂီၢ် ပတလူအီၤလၢ ထံအါအါ ထဲတဘျီဧိၤဘၣ်. လၢတၢ်န့ၣ်အလီၢ် ပလူအီၤလၢထံဖဲအဘၣ် ဒီးပလူအီၤ အဘျီတဖၣ်အဘျီလီၤ. ဒ်န့ၣ်အသိး ပမ့ၢ်မၤတၢ်ဆံးဆံးဖိအါမး ဒ်သိးကမၤစၢၤ ပှၤဂၤန့ၣ် ပပာ်ဖျါထီၣ်လၢ ပမ့ၢ်ပှၤလၢအဂ့ၤလီၤ.
လံာ်စီဆှံ ဟ့ၣ်သဆၣ်ထီၣ်ပှၤလၢ ပက “ကတဲာ်ကတီၤ” ဒီး “အိၣ်ကတီၤ” ပသးလၢ ကမၤတၢ်ဂ့ၤအဂီၢ်လီၤ. (၂ တံၤမသ့း ၂:၂၁; တံတူး ၃:၁) ပမ့ၢ်ပာ်သူၣ်ပာ်သး ပှၤဂၤအတၢ်အိၣ်သးန့ၣ် ပကထံၣ်န့ၢ်ကျဲလၢ ပကမၤ “တၢ်ဂ့ၤ, လၢအကထီၣ်ဝဲထီဝဲအဂီၢ်” ဒီးမၤစၢၤအဝဲသ့ၣ် ကသ့လီၤ. (ရိမ့ၤ ၁၅:၂) အဃိ ပဟ့ၣ်အီၤ တၢ်တမံၤမံၤလၢ အအိၣ်ဒီးပှၤသ့လီၤ. (ကတိၤဒိ ၃:၂၇) ဒီးပကကွဲမုာ်အီၤ ဒ်သိးကဟဲအီၣ်မ့ၤဒီးပှၤ မ့တမ့ၢ် ဟဲအိၣ်သကိးပှၤ ဒ်သိးပကဟ့ၣ်ဂံၢ်ဟ့ၣ်ဘါလိာ်သး အဂီၢ်လီၤ. ပမ့ၢ်သ့ၣ်ညါလၢ ပှၤအိၣ်တဆူၣ်ဘၣ်တဂၤဂၤန့ၣ် ပလဲၤဟးအိၣ်သကိးအီၤ မ့တမ့ၢ် ပကိးအီၤလၢ လီတဲစိသ့ဝဲလီၤ. ပမ့ၢ်မၤဒ်န့ၣ်န့ၣ် ပကထံၣ်န့ၢ် တၢ်ခွဲးတၢ်ယာ်အါမး လၢပကတဲတၢ် “ဒ်သိးပှၤနၢ်ဟူတၢ်တဖၣ် ကန့ၢ်ဘၣ်အဘျုးအဖှိၣ်ဒီး, ကတိၤတၢ်ဂ့ၤလၢ တၢ်မၤထီၣ်မၤထီတၢ် ဖဲအလီၢ်အိၣ်” လီၤ.—အ့းဖ့းစူး ၄:၂၉.
ပဃုတၢ်ခွဲးတၢ်ယာ် ဒ်သိးပကမၤဂ့ၤ ပှၤကိးဂၤဒဲး အဂီၢ်လီၤ. လၢတၢ်န့ၣ်အဃိ ပတကွၢ်ဒိၣ်ဆံးအါစှၤ ပှၤနီတဂၤဘၣ်. ကျဲအဂ့ၤကတၢၢ် တဘိလၢ ပရ့ဒီးပှၤဂၤဒ် ယဟိဝၤယွၤလၢ အမ့ၢ်ပှၤလၢ အတကွၢ်ဒိၣ်ဆံးအါစှၤတၢ်န့ၣ် မ့ၢ်ဝဲပစံၣ်တဲၤတဲလီၤ ယွၤအဘီမုၢ်တၢ်သးခုကစီၣ် ဆူပှၤကိးဂၤဒဲးအအိၣ်န့ၣ်လီၤ. ဒ်ယ့ၣ်ၡူးမၤလိာ်ဝဲအသိး ပဃုတၢ်ခွဲးတၢ်ယာ် လၢကမၤဂ့ၤပှၤလၢ အသးဟ့ပှၤတဖၣ်ဒၣ်လဲာ်န့ၣ်လီၤ. (လူၤကၣ် ၆:၂၇) ပပာ်ဖျါထီၣ် တၢ်သးကညီၤ ဒီးမၤဂ့ၤပှၤဂၤန့ၣ် တကမၣ်နီတဘျီဘၣ်, မ့ၢ်လၢ “တၢ်သိၣ်တၢ်သီလၢအတြီ” ဝဲတၢ်မၤတဖၣ်အံၤန့ၣ် “တအိၣ်နီတမံၤဘၣ်” အဃိလီၤ. (ကလၤတံ ၅:၂၂, ၂၃) ဖဲပှၤဂၤရ့ဒီးပှၤ အၢအၢသီသီ မ့တမ့ၢ် ပထံၣ်ဘၣ်တၢ်ကီတၢ်ခဲ အခါဒၣ်လဲာ် ပမ့ၢ်မၤဂ့ၤတၢ်န့ၣ် ဘၣ်သ့ၣ်သ့ၣ် ပှၤဂၤကတူၢ်လိာ် တၢ်မ့ၢ်တၢ်တီ ဒီးမၤလၤကပီၤယွၤလီၤ.—၁ ပ့းတရူး ၃:၁၆, ၁၇.
ဖဲပမၤတၢ်ဂ့ၤအခါ ပဒိးန့ၢ်ဘၣ်အဘျုး
“ပှၤဂ့ၤပှၤဝါတဖၣ် ကဘၣ်တၢ်ဟ့ၣ်ဘျုးအီၤ လၢအတၢ်မၤတဖၣ်အဃိလီၤ.” (ကတိၤဒိ ၁၄:၁၄, ခ့ခါစှီၤကျိာ်) ပမ့ၢ်မၤဂ့ၤတၢ်န့ၣ် ပကဒိးန့ၢ်ဘၣ် တၢ်အဘျုးမနုၤတဖၣ်လဲၣ်. ပမ့ၢ်ဂ့ၤလၢပှၤဂၤအဖီခိၣ်န့ၣ် ဘၣ်သ့ၣ်သ့ၣ် ပှၤဂၤစ့ၢ်ကီး ကဂ့ၤလၢပဖီခိၣ်လီၤ. (ကတိၤဒိ ၁၄:၂၂) ပှၤဂၤမ့ၢ်တရ့ဒီးပှၤ ဂ့ၤဂ့ၤသနာ်က့ ပကြၢးမၤဂ့ၤတၢ်လၢ အဝဲသ့ၣ်အဖီခိၣ်ထီဘိလီၤ. ပမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် အဝဲသ့ၣ်ကဆီတလဲ အတၢ်ပာ်သူၣ်ပာ်သး ဒီးကရ့ဒီးပှၤဂ့ၤဂ့ၤလီၤ.—ရိမ့ၤ ၁၂:၂၀.
ဖဲပပတုာ်မၤတၢ်အၢ ဒီးပမၤက့ၤတၢ်ဂ့ၤအခါ ပဒိးန့ၢ်ဘၣ်အဘျုးလီၤ. ဒီပုၢ်ဝဲၢ်မုၣ်ခွါအါဂၤ တဲဝဲလၢ တၢ်ကဲထီၣ်အသး ဒီးအဝဲသ့ၣ် ဒ်န့ၣ်လီၤ. နဲစံၤတဲဝဲလၢ “ဖဲယဒိၣ်ထီၣ်အခါ ယနၢ်က့ၣ်, ယလုၢ်လၢ်သကဲာ်ပဝးတဂ့ၤဘၣ် ဒီးယတၢ်ပာ်ကဲတအိၣ်ဘၣ်. ဘၣ်ဆၣ် ဖဲယမၤလိဘၣ်တၢ်လၢ ယဟိဝၤယွၤတဲဝဲလၢအဂ့ၤအခါ ယအိၣ်မူမၤထွဲအီၤ ဒီးယတူၢ်ဘၣ်တၢ်သးခုအါထီၣ်လီၤ. အခဲအံၤ ယပာ်လုၢ်ပာ်ပှ့ၤလီၤယသး ဒီးယပာ်ကဲလီၤယသးလီၤ.”
တၢ်ဂ့ၢ်အရ့ဒိၣ်ကတၢၢ်လၢ ပကြၢးမၤအါထီၣ် တၢ်ဂ့ၤတၢ်ဝါလၢအမ့ၢ် တၢ်မၤဂ့ၤတၢ်န့ၣ် မ့ၢ်လၢအမၤသးခုယဟိဝၤယွၤ အဃိန့ၣ်လီၤ. ပှၤဂၤမ့ၢ်တထံၣ် ပတၢ်မၤလၢအဂ့ၤတဖၣ်ဒၣ်လဲာ် ယဟိဝၤယွၤ ထံၣ်ဝဲလီၤ. ယဟိဝၤယွၤသ့ၣ်ညါဝဲ ပတၢ်မၤဒီးပတၢ်ဆိကမိၣ် လၢအဂ့ၤကိးမံၤဒဲးလီၤ. (အ့းဖ့းစူး ၆:၇, ၈) ဒီးအဝဲဆိၣ်ဂ့ၤပှၤဒ်လဲၣ်. လံာ်စီဆှံတဲဝဲလၢ “ပှၤလၢအဂ့ၤန့ၣ် ဘၣ်ယွၤအသးလီၤ.” (ကတိၤဒိ ၁၂:၂) လၢတၢ်န့ၣ်အဃိ မ်ပကမၤအါထီၣ် တၢ်ဂ့ၤတက့ၢ်. ယဟိဝၤယွၤအၢၣ်လီၤဝဲလၢ ကဟ့ၣ်ဝဲ “ပှၤလၢ အမၤတၢ်ဂ့ၤတဂၤလၢ်လၢ်” လၢ “တၢ်လၤတၢ်ကပီၤ, ဒီးတၢ်ယူးတၢ်ယီၣ်, ဒီးတၢ်ဃူတၢ်ဖိး” လီၤ.—ရိမ့ၤ ၂:၁၀.
^ လံာ်အဆၢ. 2 ပှၤမံၤတနီၤ ဘၣ်တၢ်ဆီတလဲအီၤလီၤ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်—လံာ်လၢတၢ်မၤလိအဂီၢ်
တၢ်စူၢ်တၢ်နာ်—တၢ်ဂ့ၤတၢ်ဝါတခါလၢ အကမၤစၢၤပှၤဒ်သိး ပကအိၣ်ဒီး တၢ်ဂံၢ်တၢ်ဘါ
ပမ့ၢ်အိၣ်ဒီး တၢ်နာ်န့ၣ် ပကအိၣ်ဒီးတၢ်ဂံၢ်တၢ်ဘါ အါမးလီၤ ပမ့ၢ်အိၣ်ဒီးတၢ်နာ်န့ၣ် ပလဲၤခီဖျိ တၢ်ကီတၢ်ခဲတဖၣ် လၢအဖျါဖးဒိၣ်ဖးထီ ဒ်သိးဒီးကစၢၢ်ကလိတဖၣ်သ့လီၤ
