နကထံၣ်ဘၣ် ပှၤလၢအမၤယဟိဝၤယွၤ အတၢ်မၤ ဒီးပှၤလၢတမၤဘၣ်တဖၣ် အတၢ်လီၤဆီလိာ်အသး
“သ့ၣ်ညါနီၤဖးပှၤတီ ဒီးပှၤတတီဘၣ်အဆၢ.”—မၤလကံ ၃:၁၈.
၁, ၂. ဘၣ်မနုၤအဃိ မုၢ်မဆါတနံၤအံၤ ယွၤအခ့အပှၤတဖၣ် အတၢ်အိၣ်မူကီဝဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ကသံၣ်သရၣ် ဒီးကသံၣ်သရၣ်မုၣ်တဖၣ်န့ၣ် အဝဲသ့ၣ်ဘၣ်မၤတၢ်လၢ ပှၤလၢအအိၣ်ဒီးတၢ်ဆါလၢ အဘၣ်ကူဘၣ်ဂာ်ပှၤဂၤသ့အကျါန့ၣ်လီၤ. အဝဲသ့ၣ်ကွၢ်ထွဲဝဲ ပှၤဆူးပှၤဆါတဖၣ်န့ၣ် မ့ၢ်လၢအဝဲသ့ၣ်အဲၣ်ဒိးမၤစၢၤဝဲအဃိလီၤ. ဘၣ်ဆၣ် ဒ်သိးပှၤဆါတဖၣ် အတၢ်ဆူးတၢ်ဆါသုတဘၣ်ကူဘၣ်ဂာ် အဝဲသ့ၣ်တဂ့ၤအဂီၢ် ကဘၣ်ဒီသဒၢလီၤအသးလီၤ. ဒ်န့ၣ်အသိး ပဝဲယဟိဝၤပှၤအုၣ်အသးတဖၣ်စ့ၢ်ကီး ပကဘၣ်ပလီၢ်ပသးလီၤ. ပှၤလၢပခိၣ်ပဃၢၤ ဒီးပှၤလၢတၢ်မၤလီၢ်တဖၣ် အတၢ်ပာ်သူၣ်ပာ်သး ဒီးအသကဲာ်ပဝး လီၤဆီလိာ်အသးဒီးပှၤလီၤ. လၢတၢ်န့ၣ်အဃိ ကဲထီၣ်တၢ်ကီတၢ်ခဲလၢပဂီၢ်သ့လီၤ.
၂ လၢမုၢ်နံၤခံကတၢၢ်အဆၢကတီၢ် ပှၤလၢတအဲၣ်ယွၤန့ၣ် အဝဲသ့ၣ်တမၤထွဲဝဲ ယွၤအတၢ်သိၣ်တၢ်သီလၢ အဘၣ်ဃးဒီး တၢ်အဘၣ်ဒီးတၢ်အကမၣ်န့ၣ်ဘၣ်. ဖဲတၢ်မၢဖိ ပီလူးကွဲးန့ၢ်ဝဲ စီၤတံၤမသ့းလံာ်အခါ အဝဲပာ်ဖျါထီၣ်ဝဲ တၢ်ပာ်သူၣ်ပာ်သးလၢအတဂ့ၤတဖၣ်န့ၣ်လီၤ. စီၤပီလူးတဲဝဲလၢ မုၢ်နံၤခံကတၢၢ်အတီၢ်ပူၤ တၢ်ပာ်သူၣ်ပာ်သးလၢအတဂ့ၤတဖၣ်အံၤ ကအါထီၣ်ဝဲကွ့ၢ်ကွ့ၢ်လီၤ. (ဖး ၂ တံၤမသ့း ၃:၁-၅, ၁၃ တက့ၢ်.) ပှၤလၢပခိၣ်ပဃၢၤတဖၣ် အတၢ်ပာ်သူၣ်ပာ်သးန့ၣ် ကလီၤကမၢကမၣ်လၢပဂီၢ် ဘၣ်ဆၣ် ပမ့ၢ်အိၣ်လၢအဝဲသ့ၣ်အကျါ ယံာ်ထီၣ်ယံာ်ထီၣ်န့ၣ် ပတၢ်ဆိကမိၣ်, ပတၢ်စံးတၢ်ကတိၤ ဒီးပတၢ်ပာ်သူၣ်ပာ်သး လီၤဂာ်ဒီးအဝဲသ့ၣ်သ့ဝဲလီၤ. (ကတိၤဒိ ၁၃:၂၀) လၢတၢ်မၤလိအံၤအပူၤ ပကနၢ်ပၢၢ်ထီၣ်လၢ မုၢ်နံၤခံကတၢၢ်အဆၢကတီၢ်န့ၣ် ပှၤလၢအဘူၣ်ထီၣ်ဘါထီၣ်ယဟိဝၤယွၤ ဒီးပှၤလၢတဘူၣ်ထီၣ်ဘါထီၣ် ယဟိဝၤယွၤ အတၢ်ပာ်သူၣ်ပာ်သး လီၤဆီလိာ်အသးဒ်လဲၣ်. ဒီးဖဲပမၤစၢၤပှၤဂၤလၢ ကသ့ၣ်ညါထီၣ် ယဟိဝၤယွၤအခါ ဒ်သိးအဝဲသ့ၣ်အတၢ်ပာ်သူၣ်ပာ်သး သုတဘၣ်ကူဘၣ်ဂာ်ပှၤတဂ့ၤအဂီၢ် ပကဘၣ်ဒီသဒၢလီၤပသး ဒ်လဲၣ်အဂ့ၢ်န့ၣ်လီၤ.
၃. ၂ တံၤမသ့း ၃:၂-၅ န့ၣ်ပာ်ဖျါထီၣ်ဝဲ ပှၤဒ်လဲၣ်တကလုာ်အဂ့ၢ်လဲၣ်.
၃ စီၤပီလူးကွဲးဝဲ “လၢမုၢ်နံၤအခံကတၢၢ်တဖၣ် အပူၤန့ၣ်, အဆၢအကတီၢ်လၢ အကီအခဲကဘၣ်လီၤ.” ဒီးအဝဲကွဲးလီၤဝဲ တၢ်ပာ်သူၣ်ပာ်သးလၢ အတဂ့ၤ ၁၉ ခါလၢပကထံၣ်ဘၣ်လၢ ပစိၤခဲအံၤန့ၣ်လီၤ. တၢ်ပာ်သူၣ်ပာ်သးတဖၣ်အံၤ လီၤဂာ်လိာ်အသးဒီး တၢ်ပာ်သူၣ်ပာ်သးလၢအအိၣ်လၢ ရိမ့ၤ ၁:၂၉-၃၁ အပူၤလီၤ. ဘၣ်ဆၣ် တၢ်ပာ်သူၣ်ပာ်သးလၢ စီၤပီလူးပာ်ဖျါထီၣ်ဝဲလၢ စီၤတံၤမသ့းအလံာ်အပူၤန့ၣ် တလီၤဂာ်လိာ်အသးဒီး လံာ်စီဆှံအဆၢလၢ အအိၣ်လၢ လံာ်စီဆှံလၢကြံးကျိာ်တကတြူၢ်အပူၤနီတခါဘၣ်. အဆိကတၢၢ်န့ၣ် စီၤပီလူးပာ်ဖျါထီၣ်ဝဲ “ပှၤကညီကမ့ၢ်” ဒီး “ပှၤကညီ” န့ၣ်အဲၣ်ဒိးစံးဝဲ “ပှၤဟီၣ်ခိၣ်ဖိ” မ့ၢ်လၢအဝဲသ့ၣ်အိၣ်ဒီး တၢ်ပာ်သူၣ်ပာ်သးလၢ အတဂ့ၤသ့ဝဲအဃိလီၤ. ဘၣ်ဆၣ် ပှၤဟီၣ်ခိၣ်ဖိကိးဂၤဒဲး တအိၣ်ဒီးတၢ်ပာ်သူၣ်ပာ်သးဒ် စီၤပီလူးပာ်ဖျါထီၣ်ဝဲအသိးဘၣ်. ခရံာ်ဖိတဖၣ် အတၢ်ပာ်သူၣ်ပာ်သးန့ၣ် လီၤဆီဝဲဒိၣ်မးလီၤ.—ဖး မၤလကံ ၃:၁၈ တက့ၢ်.
ပထံၣ်လီၤပနီၢ်ကစၢ်ဒ်လဲၣ်
၄. ပှၤလၢအပာ်ထီၣ်ထီသးန့ၣ် မ့ၢ်ပှၤဒ်လဲၣ်တဂၤလဲၣ်.
၄ စီၤပီလူးတဲဝဲလၢ ပှၤအါဂၤ ကအဲၣ်လီၤဒၣ်ထဲအသး ဒီးကမ့ၢ်ပှၤအဲၣ်ကျိၣ်အဲၣ်စ့ဝံၤ တဲကဒီးဝဲလၢ ပှၤကညီတဖၣ်ကမ့ၢ် ပှၤခိးထဲသိးလိာ်အသး, ပှၤပာ်ထီၣ်ထီအသး ဒီးပှၤပာ်အသး ကဖၢလၢစ့ၢ်ကီးလီၤ. ပှၤလၢအိၣ်ဒီးတၢ်ပာ်သူၣ်ပာ်သး ဒ်အံၤတဖၣ်န့ၣ် အဝဲသ့ၣ်ဆိကမိၣ်လီၤအသးလၢ အဂ့ၤန့ၢ်ပှၤဂၤ ခီဖျိလၢအက့ၢ်အဂီၤ, အတၢ်သ့တၢ်ဘၣ်, အတၢ်အိၣ်တၢ်ယၢၤ မ့တမ့ၢ် အလီၢ်အလၤအဃိလီၤ. ပှၤလၢအိၣ်ဒီးတၢ်ပာ်သူၣ်ပာ်သးဒ်အံၤတဖၣ်န့ၣ် အဲၣ်ဒိးလၢပှၤကပာ်ဒိၣ်အီၤလီၤ. ပှၤကူၣ်ဘၣ်ကူၣ်သ့တဂၤ တဲဝဲလၢ– ‘ပှၤလၢအပာ်ထီၣ်ထီအသးန့ၣ် လီၤဂာ်ဒ်သိး အဘူၣ်ထီၣ်ဘါထီၣ် အနီၢ်ကစၢ်လီၤ.’ ပှၤတနီၤတဲဝဲလၢ တၢ်ပာ်ထီၣ်ထီသးန့ၣ် မ့ၢ်တၢ်လၢအလီၤသးဘၣ်အၢတုၤဒၣ်လဲာ် ပှၤလၢအပာ်ထီၣ်ထီအသးတဖၣ်ဒၣ်လဲာ် မ့ၢ်ထံၣ်ဝဲ ပှၤအဂၤပာ်ထီၣ်ထီအသးန့ၣ် အဝဲသ့ၣ်သးဟ့ဝဲလီၤ.
၅. ယဟိဝၤယွၤ အခ့အပှၤလၢအိၣ်ဒီးတၢ်သးတီတဖၣ် ကဲထီၣ်ပှၤပာ်ထီၣ်ထီအသးဒ်လဲၣ်.
၅ ယဟိဝၤယွၤသးဟ့ဝဲ တၢ်ပာ်ထီၣ်ထီသး မ့တမ့ၢ် ပှၤလၢအ “မဲာ်ကွၢ်တၢ်အိၣ်ဒီး တၢ်ပာ်ထီၣ်ထီသး” န့ၣ်လီၤ. (ကတိၤဒိ ၆:၁၆, ၁၇, ခ့ခါစှီၤကျိာ်) တကးဒံးဘၣ် တၢ်ပာ်ထီၣ်ထီသးန့ၣ် ထုးယံၤထီၣ်ပှၤဒီးကစၢ်ယွၤလီၤ. (စံးထီၣ်ပတြၢၤ ၁၀:၄) တၢ်ပာ်ထီၣ်ထီသးန့ၣ် မ့ၢ်ဝဲမုၣ်ကီၤလံၢ်အတၢ်ပာ်သူၣ်ပာ်သးလီၤ. (၁ တံၤမသ့း ၃:၆) လီၤသးအုးဒိၣ်မးလၢ ယွၤအခ့အပှၤလၢ အိၣ်ဒီးတၢ်သးတီတနီၤဒၣ်လဲာ် ကဲထီၣ်ပှၤလၢအပာ်ထီၣ်ထီအသးသ့ဝဲလီၤ. အဒိ, ပှၤယူဒၤဖိအစီၤပၤဧူးစံယါန့ၣ် အိၣ်ဒီးတၢ်သးတီအနံၣ်အါမးလီၤ. ဘၣ်ဆၣ်လံာ်စီဆှံတဲဝဲလၢ– “တုၤအဆူၣ်ထီၣ်ဒီး, အသးပာ်ထီၣ်ထီအသးတုၤ အတုၤလၢတၢ်ဟးဂီၤလီၤ. အဂ့ၢ်ဒ်အံၤ, မၤကမၣ်ယွၤ, အကစၢ်, ဒီးလဲၤနုာ်လၢယွၤအနူၢ်ပူၤ ဒ်သိးအကဆိၣ်ကဲၤတၢ်နၢမူလၢ တၢ်လုၢ်လီၢ်ဆိၣ်ကဲၤတၢ်နၢမူအဖီခိၣ်လီၤ.” နီၢ်နီၢ်န့ၣ် အတၢ်ခွဲးတၢ်ယာ်တအိၣ်လၢ ကမၤဝဲဒ်န့ၣ်ဘၣ်. လၢခံ စီၤပၤဃံးစကံယၤစ့ၢ်ကီး အိၣ်ဒီးတၢ်ပာ်ထီၣ်ထီသး တစိၢ်တလီၢ်လီၤ.—၂ ကွဲးနီၣ်တၢ် ၂၆:၁၆; ၃၂:၂၅, ၂၆.
၆. လၢတၢ်ဂ့ၢ်မနုၤအဃိ စီၤဒၤဝံး အတၢ်ပာ်ထီၣ်ထီအသး အိၣ်ထီၣ်ဝဲသ့လဲၣ်. ဘၣ်ဆၣ် ဘၣ်မနုၤအဃိ အဝဲအိၣ်ဒီးတၢ်ဆီၣ်လီၤသးလဲၣ်.
၆ ပှၤတနီၤနီၤန့ၣ် အဝဲသ့ၣ်ပာ်ဒိၣ်လီၤအသး မ့ၢ်လၢအဝဲသ့ၣ် ဒိၣ်တၢ်ဂ့ၤ, အမံၤဒိၣ်, အဖၠဲးလၢတၢ်ဒ့တၢ်အူ ဒီးတၢ်သူၣ်ဝံၣ်သးဆၢ, အဂံၢ်ဆူၣ် မ့တမ့ၢ် ခီဖျိလၢပှၤဂၤပတြၢၤအီၤအဃိလီၤ. တၢ်သ့ၣ်တဖၣ်အံၤန့ၣ် အိၣ်ဒီးစီၤဒၤဝံးခဲလၢာ် ဘၣ်ဆၣ် အဝဲဆီၣ်လီၤသး လၢအတၢ်အိၣ်မူဒီတကတီၢ်အပူၤလီၤ. အဒိ, ဖဲစီၤဒၤဝံး မၤသံစီၤကၤလယၤဝံၤအလီၢ်ခံ စီၤပၤစီလူး တဲအီၤလၢကဟ့ၣ်အီၤအဖိမုၣ်လီၤ. ဘၣ်ဆၣ် စီၤဒၤဝံး တဲဝဲလၢ– “ဒ်သိးယကကဲထီၣ်စီၤပၤအမာ်ဒီး, ယမ့ၢ်မတၤတဂၤလဲၣ်. ဒီးယသးသမူမ့ၢ်ဂ့ၤ, ယပၢ်အဟံၣ်လၢအံၣ်စရ့လးအကျါမ့ၢ်ဂ့ၤ, မ့ၢ်မနုၤလဲၣ်.” (၁ ၡမူၤအ့လး ၁၈:၁၈) ဒ်သိးစီၤဒၤဝံး ကအိၣ်ဒီးတၢ်ဆီၣ်လီၤသးအဂီၢ် တၢ်မနုၤမၤစၢၤအီၤလဲၣ်. အဝဲသ့ၣ်ညါဝဲလၢ ကစၢ်ယွၤအိၣ်ဒီးတၢ်ဆီၣ်လီၤသး ဒီးသူၣ်အိၣ်သးအိၣ်အီၤအဃိ အဝဲဒိးန့ၢ်ဘၣ်ဝဲ တၢ်ဂ့ၤတၢ်ဝါ, တၢ်သ့တၢ်ဘၣ် ဒီးတၢ်ခွဲးတၢ်ယာ်တဖၣ်အံၤလီၤ. (စံးထီၣ်ပတြၢၤ ၁၁၃:၅-၈) ဒီးစီၤဒၤဝံးသ့ၣ်ညါဝဲလၢ ကယဲၢ်တၢ်အဂ့ၤလၢ အိၣ်ဒီးအီၤခဲလၢာ်န့ၣ် ဟဲလၢယဟိဝၤယွၤအအိၣ်လီၤ.—ထိၣ်သတြီၤကွၢ်ဒီး ၁ ကရံၣ်သူး ၄:၇.
ပှၤအဂၤတဖၣ် မ့ၢ်ထံၣ်ဝဲ ယွၤအခ့အပှၤတဖၣ် အတၢ်ဆီၣ်လီၤသးန့ၣ် အဝဲသ့ၣ်ကအဲၣ်ဒိးသ့ၣ်ညါထီၣ် ယဟိဝၤယွၤအဂ့ၢ်လီၤ
၇. ဒ်သိးပကအိၣ်ဒီးတၢ်ဆီၣ်လီၤသးအဂီၢ် တၢ်မနုၤကမၤစၢၤပှၤလဲၣ်.
၇ ယဟိဝၤယွၤအခ့အပှၤလၢ မုၢ်မဆါတနံၤအံၤတဖၣ် အိၣ်ဒီး တၢ်ဆီၣ်လီၤသး ဒ်စီၤဒၤဝံးအသိးလီၤ. ပသ့ၣ်ညါလၢ ယဟိဝၤယွၤလၢအမ့ၢ် ယွၤလၢအထီကတၢၢ်တဂၤန့ၣ် အိၣ်ဒီးတၢ်ဆီၣ်လီၤသးအဃိ အလီၤသူၣ်မံသးမုာ်ဒိၣ်မးလီၤ. (စံးထီၣ်ပတြၢၤ ၁၈:၃၅) လံာ်စီဆှံတဲဝဲလၢ– “ကူထီၣ်သိးထီၣ် တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်တက့ၢ်.” ပဂုာ်ကျဲးစၢးမၤထွဲ ဒ်လံာ်စီဆှံတဆၢအံၤအသိးလီၤ. (ကလီးစဲ ၃:၁၂) ပသ့ၣ်ညါစ့ၢ်ကီးလၢ တၢ်အဲၣ်န့ၣ် “တပာ်ဘၣ်အသးကဖၢလၢဘၣ်, တပာ်ထီၣ်ထီဘၣ်အသးဘၣ်.” (၁ ကရံၣ်သူး ၁၃:၄) ဖဲပှၤအဂၤတဖၣ် ထံၣ်ဝဲလၢပအိၣ်ဒီးတၢ်ဆီၣ်လီၤသးအခါ အဝဲသ့ၣ်တဖၣ်စ့ၢ်ကီး ကအဲၣ်ဒိးသ့ၣ်ညါထီၣ် ယဟိဝၤယွၤအဂ့ၢ်လီၤ. မါအတၢ်သကဲာ်ပဝးလၢအဂ့ၤန့ၣ် ထိၣ်ဟူးထိၣ်ဂဲၤထီၣ် အဝၤလၢကဘူၣ်ထီၣ်ဘါထီၣ် ယဟိဝၤယွၤသ့ဝဲလီၤ. ဒ်န့ၣ်အသိး ပှၤအဂၤတဖၣ် မ့ၢ်ထံၣ်ဝဲ ယွၤအခ့အပှၤတဖၣ် အတၢ်ဆီၣ်လီၤသးန့ၣ် အဝဲသ့ၣ်ကအဲၣ်ဒိးသ့ၣ်ညါထီၣ် ယဟိဝၤယွၤလီၤ.—၁ ပ့းတရူး ၃:၁.
ပရ့ဒီးပှၤဂၤဒ်လဲၣ်
၈. (က) မုၢ်မဆါတနံၤအံၤ ပှၤမ့ၢ်တဒိကနၣ်မိၢ်ပၢ်အကလုၢ်သနာ်က့ ပှၤအါဂၤထံၣ်ဝဲဒ်လဲၣ်. (ခ) လံာ်စီဆှံစံးဝဲလၢ ဖိသ့ၣ်တဖၣ် ကဘၣ်မၤတၢ်မနုၤလဲၣ်.
၈ စီၤပီလူးပာ်ဖျါထီၣ်ဝဲလၢ လၢမုၢ်နံၤခံကတၢၢ်အဆၢကတီၢ်န့ၣ် ပှၤကရ့လိာ်သးတဂၤဒီးတဂၤ ဒ်လဲၣ်န့ၣ်လီၤ. အဝဲကွဲးဝဲလၢ ဖိသၣ်တဖၣ် တဒိကနၣ်အမိၢ်အပၢ် အကလုၢ်လၢၤဘၣ်. မုၢ်မဆါတနံၤအံၤ လံာ်လဲၢ်, တၢ်ဂီၤမူ ဒီးကွဲၤဟူဖျါအတၢ်ရဲၣ်တၢ်ကျဲၤအါမးန့ၣ် ပာ်ဖျါထီၣ်ဝဲလၢ ဖိတဖၣ်မ့ၢ်တဒိကနၣ် မိၢ်ပၢ်အကလုၢ်သနာ်က့ တမ့ၢ်တၢ်လၢအကမၣ်ဘၣ်. ဘၣ်ဆၣ် တၢ်တဒိကနၣ်တၢ်န့ၣ် မၤဘၣ်ဒိဟံၣ်ဖိဃီဖိအတၢ်ရ့လိာ်သး တကးဒံးဘၣ် မၤဘၣ်ဒိပှၤလၢပခိၣ်ပဃၢၤတဖၣ် သ့စ့ၢ်ကီးလီၤ. တၢ်မ့ၢ်တၢ်တီအံၤ ပှၤဟီၣ်ခိၣ်ဖိတဖၣ် သ့ၣ်ညါဝဲဖးယံာ်လံ. အဒိ, ပှၤကြံးဖိလၢပျၢၤတဖၣ်န့ၣ် အတၢ်သိၣ်တၢ်သီအိၣ်ဝဲလၢ ပှၤတဂၤမ့ၢ်မၤဒၢၣ်မၤဆါအမိၢ်အပၢ်န့ၣ် အတၢ်ခွဲးတၢ်ယာ် ကလီၤမၢ်ကွံာ်လၢ အပှၤတဝၢအကျါလီၤ. ဒီးလၢရိမ့ၤအတၢ်သိၣ်တၢ်သီအဖီလာ်န့ၣ် ပှၤတဂၤမ့ၢ်မၤဒၢၣ်မၤဆါအပၢ်န့ၣ် ပှၤကစံၣ်ညီၣ်အီၤဒ် ပှၤစံၣ်ညီၣ်ပှၤလၢအမၤသံတၢ်အသိးလီၤ. လံာ်စီဆှံလၢ ဧ့ၤဘြံၤကျိာ်တကတြူၢ် ဒီးလံာ်စီဆှံလၢ ကြံးကျိာ်တကတြူၢ်အပူၤန့ၣ် တၢ်သိၣ်တၢ်သီအိၣ်ဝဲလၢ ဖိသ့ၣ်တဖၣ် ကဘၣ်ယူးယီၣ်အမိၢ်အပၢ်န့ၣ်လီၤ.—၂ မိၤၡ့ ၂၀:၁၂; အ့းဖ့းစူး ၆:၁-၃.
၉. ဒ်သိးပှၤသးစၢ်တဖၣ် ကဒိကနၣ် အမိၢ်အပၢ်အကလုၢ်အဂီၢ် တၢ်မနုၤကမၤစၢၤအီၤလဲၣ်.
၉ မုၢ်မဆါတနံၤအံၤ ပှၤအါဂၤတအိၣ်ဒီး တၢ်ဒိကနၣ် ဘၣ်ဆၣ် ဒ်သိးဖိသ့ၣ်တဖၣ် ကအိၣ်ဒီးတၢ်ဒိကနၣ် အမိၢ်အပၢ်အကလုၢ်အဂီၢ် တၢ်မနုၤမၤစၢၤအဝဲသ့ၣ်သ့လဲၣ်. ဖိသ့ၣ်တဖၣ် မ့ၢ်ဆိကမိၣ်ထံဝဲ တၢ်အဂ့ၤလၢအမိၢ်အပၢ် မၤန့ၢ်အီၤန့ၣ် အဝဲသ့ၣ်အတၢ်စံးဘျုးစံးဖှိၣ်ကအါထီၣ် ဒီးကအဲၣ်ဒိးဒိကနၣ် အမိၢ်အပၢ်အကလုၢ်လီၤ. ပှၤသးစၢ်တဖၣ်ကဘၣ်သ့ၣ်ညါဝဲလၢ ကစၢ်ယွၤလၢအမ့ၢ် ပဝဲခဲလၢာ်အပၢ်န့ၣ် အဲၣ်ဒိးလၢဖိသ့ၣ်တဖၣ်ကဒိကနၣ် အမိၢ်အပၢ်အကလုၢ်လီၤ. ပှၤသးစၢ်သ့ၣ်တဖၣ် မ့ၢ်တဲဖျါထီၣ်အမိၢ်အပၢ် အတၢ်ဂ့ၤတၢ်ဝါအဂ့ၢ်လၢ အတံၤသကိးတဖၣ်အမဲာ်ညါန့ၣ် အတံၤသကိးတဖၣ်စ့ၢ်ကီး ကအဲၣ်ဒိးပာ်ကဲဝဲ အနီၢ်ကစၢ်အမိၢ်အပၢ်လီၤ. ဘၣ်ဆၣ် မိၢ်ပၢ်သ့ၣ်တဖၣ် မ့ၢ်တပာ်ဖျါထီၣ် တၢ်အဲၣ်တၢ်ကွံလၢ အဖိတဖၣ်အဖီခိၣ်ဘၣ်န့ၣ် အဖိတဖၣ်ကဒိကနၣ်အကလုၢ်အဂီၢ် ကကီဝဲလီၤ. ဘၣ်ဆၣ် ဖိသၣ်လၢအဒိးန့ၢ်ဘၣ် အမိၢ်အပၢ်အတၢ်အဲၣ် လၢလၢပှဲၤပှဲၤန့ၣ် မ့ၢ်ကီလၢကဒိကနၣ်အမိၢ်အပၢ် အကလုၢ်ဒၣ်လဲာ်ကဒိကနၣ်ဝဲလီၤ. ဒီပုၢ်ဝဲၢ်သးစၢ်လၢအမံၤမ့ၢ် အီစတ့ န့ၣ်တဲဝဲလၢ– “ဖဲယမၤကမၣ်တၢ်အခါ ယဂုာ်ကျဲးစၢး တဲပူၤဖျဲးယသး ဘၣ်ဆၣ် ယမိဒီးယပါ တဲနၢ်ပၢၢ်ယၤလၢ ဘၣ်မနုၤအဃိ အဝဲသ့ၣ်ပာ်လီၤဝဲ တၢ်ဘျၢအံၤလဲၣ်. ဒီးအဝဲသ့ၣ်အိးဟိထီၣ်ကျဲဒ်သိး ပတဲတၢ်ပျီပျီကညီအဂီၢ်လီၤ. အဝဲသ့ၣ်မၤဝဲဒ်န့ၣ်အဃိ မၤစၢၤယၤဒ်သိး ယကဒိကနၣ်အဝဲသ့ၣ်အကလုၢ်လီၤ. အဝဲသ့ၣ်အတၢ်ကဟုကယာ်ယၤ ဖျါဝဲအဃိ ယအဲၣ်ဒိးမၤသးခုအဝဲသ့ၣ်အသးလီၤ.”
၁၀, ၁၁. (က) ပှၤလၢတအဲၣ်လိာ်အသးကဒဲကဒဲတဖၣ် အတၢ်ပာ်သူၣ်ပာ်သးကအိၣ်ဒ်လဲၣ်. (ခ) ခရံာ်ဖိလၢအမ့ၢ်အတီတဖၣ် ပာ်ဖျါထီၣ်တၢ်အဲၣ် လၢပှၤဂၤအဖီခိၣ်ထဲလဲၣ်.
၁၀ စီၤပီလူးပာ်ဖျါထီၣ်ဝဲ ပှၤလၢတအဲၣ်လိာ်အသး ကဒဲကဒဲတဖၣ် အတၢ်ပာ်သူၣ်ပာ်သးကအိၣ်ဒ်လဲၣ်န့ၣ်လီၤ. အဝဲပာ်ဖျါထီၣ်ဝဲလၢ “ပှၤတစူၢ်ဘၣ်အမိၢ်အပၢ်ဘၣ်” ဝံၤအလီၢ်ခံ ပာ်ဖျါထီၣ်စ့ၢ်ကီးဝဲလၢ ပှၤတသ့ၣ်ညါဘၣ်တၢ်အဘျုးအဖှိၣ်ဘၣ်န့ၣ်လီၤ. အဝဲတဲဝဲဒ်န့ၣ်န့ၣ် မ့ၢ်လၢပှၤလၢတသ့ၣ်ညါ တၢ်ဘျုးတၢ်ဖှိၣ်တဖၣ်န့ၣ် တပာ်လုၢ်ပာ်ပှ့ၤဝဲ တၢ်လၢပှၤဂၤမၤန့ၢ်အီၤတဖၣ်ဘၣ်. တကးဒံးဘၣ် ပာ်ဖျါထီၣ်စ့ၢ်ကီးဝဲ ပှၤတစီတဆှံဘၣ်အဂ့ၢ်လီၤ. စီၤပီလူးတဲဝဲလၢ ပှၤအသူၣ်တကၢ်အသးတလီၤဘၣ်န့ၣ် မ့ၢ်ပှၤတဖၣ်လၢ တအဲၣ်ဒိးမၤဃူမၤဖိးတၢ်ဒီးပှၤဂၤန့ၣ်လီၤ. မ့မ့ၢ်ပှၤဒုၣ်ဒွဲၣ်တၢ် ဒီးပှၤဟ့ၣ်လီၤကွံာ်ပှၤဂၤန့ၣ် အဝဲသ့ၣ်တဲဆါ ဒီးတဲဟးဂီၤပှၤဂၤ ဃုာ်ဒီးကစၢ်ယွၤလီၤ. ဒီးပှၤလၢအမ့ၢ် ပှၤပာ်တၢ်ကမၣ်လၢ ပှၤဂၤအလိၤကလီကလီတဖၣ်န့ၣ် အဝဲသ့ၣ်ကတဲဟးဂီၤ ပှၤမံၤလၤသၣ်ကပီၤလီၤ. *—ကွၢ်တၢ်ဂ့ၢ်အဘျဲၣ်တက့ၢ်.
၁၁ ယဟိဝၤယွၤအပှၤဂီၢ်မုၢ်တဖၣ် ပာ်ဖျါထီၣ်တၢ်အဲၣ်နီၢ်နီၢ်လၢ ပှၤဂၤအဖီခိၣ်အဃိ အဝဲသ့ၣ်လီၤဆီဒီး ပှၤအဂၤတဖၣ်ဒိၣ်မးလီၤ. တၢ်ကတိၤအံၤမ့ၢ်ဝဲတီဝဲလီၤ. ယ့ၣ်ၡူးတဲဝဲလၢ စီၤမိၤၡ့ အတၢ်မၤလိာ်အကျါ တၢ်မၤလိာ်လၢအဒိၣ်န့ၢ်ဒံး တၢ်အဲၣ်ပှၤလၢနဃၢၤန့ၣ် မ့ၢ်ဝဲတၢ်အဲၣ်ယဟိဝၤယွၤလီၤ. (မးသဲ ၂၂:၃၈, ၃၉) ယ့ၣ်ၡူးတဲစ့ၢ်ကီးဝဲလၢ ခရံာ်ဖိလၢအမ့ၢ်အတီတဖၣ်န့ၣ် ကဘၣ်တၢ်သ့ၣ်ညါအီၤခီဖျိလၢ အဝဲသ့ၣ်အဲၣ်လိာ်အသး ကဒဲကဒဲအဃိလီၤ. (ဖး ယိၤဟၣ် ၁၃:၃၄, ၃၅ တက့ၢ်.) ခရံာ်ဖိလၢအမ့ၢ်အတီတဖၣ်န့ၣ် ကဘၣ်အဲၣ်စ့ၢ်ကီးအဒုၣ်အဒါလီၤ.—မးသဲ ၅:၄၃, ၄၄.
၁၂. ယ့ၣ်ၡူးအဲၣ်ပှၤဂၤန့ၣ် ပာ်ဖျါထီၣ်ဝဲဒ်လဲၣ်.
၁၂ ယ့ၣ်ၡူးပာ်ဖျါထီၣ်ဝဲလၢ အအဲၣ်ပှၤဂၤနီၢ်နီၢ်လီၤ. အဝဲပာ်ဖျါထီၣ်ဝဲခီဖျိ လဲၤဝဲဆူဝ့ၢ်တဝ့ၢ်ဘၣ်တဝ့ၢ် ဒ်သိးကစံၣ်တဲၤတဲလီၤပှၤဂၤလၢ ယွၤအဘီမုၢ်တၢ်သးခုကစီၣ်လီၤ. ဒီးအဝဲမၤဘျါဝဲ ပှၤမဲာ်ဘျီၣ်, ပှၤအခီၣ်ဟးဂီၤ, ပှၤဘၣ်တၢ်ဆါအၢ ဒီးပှၤနၢ်တအၢတဖၣ်လီၤ. တကးဒံးဘၣ် အဝဲမၤမူထီၣ်ဝဲပှၤသံလီၤ. (လူၤကၣ် ၇:၂၂) ယ့ၣ်ၡူးန့ၣ် ပှၤဟီၣ်ခိၣ်ဖိအါဂၤသးဟ့အီၤဒၣ်လဲာ် အဝဲဟ့ၣ်လီၤအသးသမူလၢ ပှၤဟီၣ်ခိၣ်ဖိအဂီၢ်လီၤ. ယ့ၣ်ၡူးပာ်ဖျါထီၣ်ဝဲ တၢ်အဲၣ်လၢလၢပှဲၤပှဲၤ ဒ်အပၢ်အသိးလီၤ. ယဟိဝၤပှၤအုၣ်အသးလၢဟီၣ်ခိၣ်ဒီဘ့ၣ် ကွၢ်လိမၤဒိးဝဲယ့ၣ်ၡူးဒီး ပာ်ဖျါထီၣ်တၢ်အဲၣ်လၢ ပှၤဂၤအဖီခိၣ်လီၤ.
၁၃. တၢ်အဲၣ်လၢပပာ်ဖျါထီၣ်အီၤန့ၣ် မၤစၢၤပှၤဂၤလၢ ကအဲၣ်ဒိးသ့ၣ်ညါထီၣ် ယဟိဝၤယွၤအဂ့ၢ်ဒ်လဲၣ်.
၁၃ ဖဲပပာ်ဖျါထီၣ်တၢ်အဲၣ်လၢ ပှၤဂၤအဖီခိၣ်အခါ ကထိၣ်ဟူးထိၣ်ဂဲၤထီၣ်အဝဲသ့ၣ်လၢ ကအဲၣ်ဒိးသ့ၣ်ညါထီၣ် ပပၢ်အိၣ်လၢမူခိၣ်အဂ့ၢ်လီၤ. အဒိ, ပိာ်ခွါလၢအအိၣ်လၢယိၤကီၢ်တဂၤ ဖဲအဝဲလဲၤထီၣ်တၢ်အိၣ်ဖှိၣ်ဖးဒိၣ်အခါ ထံၣ်ဘၣ်ဝဲဒီပုၢ်ဝဲၢ်မုၣ်ခွါတဖၣ် ပာ်ဖျါထီၣ်တၢ်အဲၣ်လၢတဂၤဒီးတဂၤအဃိ ထုးန့ၢ်အသးဒိၣ်မးလီၤ. လၢခံဖဲအဝဲဟဲက့ၤတုၤလၢအဟံၣ်အခါ အဝဲဃ့မၤလိလံာ်စီဆှံ ဒီးယဟိဝၤပှၤအုၣ်အသး တနွံခံဘျီလီၤ. ဒီးအဝဲစံၣ်တဲၤတဲလီၤဝဲ အဘူးအတံၢ်တဖၣ်လီၤ. ဃုလါဝံၤအလီၢ်ခံ ဒိးန့ၢ်ဘၣ်ဝဲကၠိဖိမူဒါ လၢအမ့ၢ်တၢ်ဖးလံာ်စီဆှံ အဆိကတၢၢ်တဘျီ လၢတၢ်အိၣ်ဖှိၣ်အပူၤလီၤ. မ့ၢ်ပဝဲသ့ၣ်တဖၣ် ပပာ်ဖျါထီၣ် တၢ်အဲၣ်လၢပှၤဂၤအဖီခိၣ်ဧါ. သံကွၢ်လီၤက့ၤနသးလၢ– ‘ပှၤလၢယဟံၣ်ပူၤဃီပူၤ, လၢတၢ်အိၣ်ဖှိၣ်အပူၤ ဒီးတၢ်စံၣ်တဲၤတဲလီၤတၢ်မၤအပူၤတဖၣ်န့ၣ် မ့ၢ်ယဂုာ်ကျဲးစၢး မၤစၢၤအဝဲသ့ၣ်တသ့ဖဲအသ့ဧါ. မ့ၢ်ယဂုာ်ကျဲးစၢး ထံၣ်ပှၤဂၤဒ် ယဟိဝၤယွၤထံၣ်ဝဲအသိးဧါ.’
ထွံၣ်မံၤတဖၣ် ဒီးသိဖိတဖၣ်
၁၄, ၁၅. ပှၤအါဂၤန့ၣ် အိၣ်ဒီးတၢ်ပာ်သူၣ်ပာ်သးလၢ အတဂ့ၤဒ်လဲၣ်တဖၣ်လဲၣ်. ဒီးတနီၤန့ၣ် ဆီတလဲအတၢ်ပာ်သူၣ်ပာ်သးဒ်လဲၣ်.
၁၄ လၢမုၢ်နံၤခံကတၢၢ် အဆၢကတီၢ်န့ၣ် ပှၤအါဂၤအိၣ်ဒီး တၢ်ပာ်သူၣ်ပာ်သးလၢအတဂ့ၤအဃိ ပကြၢးဟးဆှဲးအီၤလီၤ. အဒိ, ပှၤအါဂၤ တအဲၣ်တၢ်အဂ့ၤဘၣ်. အဝဲသ့ၣ်သးဟ့တၢ်ဂ့ၤ ဒီးထီဒါဝဲလီၤ. ပှၤဒ်အံၤတဖၣ်န့ၣ် အတၢ်ကီၤသူၣ်ကီၤသးတအိၣ်ဘၣ် မ့ၢ်ပှၤအဒူလီၤ. ဒီးတနီၤန့ၣ် မ့ၢ်ပှၤလၢအခိၣ်ကိၤလီၤ. တချုးလၢအဝဲသ့ၣ် မၤတၢ်တမံၤမံၤန့ၣ် တဆိကမိၣ်ဆိဝဲဘၣ်. တၢ်လၢအဝဲသ့ၣ်မၤဝဲတဖၣ် မၤဘၣ်ဒိပှၤဂၤဒ်လဲၣ်ဒ်လဲၣ်န့ၣ် တပာ်ဝဲလၢအခိၣ်နူာ်ပူၤဘၣ်.
၁၅ ပှၤအါဂၤန့ၣ် လၢညါအတၢ်ပာ်သူၣ်ပာ်သး လီၤဂာ်ဒ်ဆၣ်ဖိကီၢ်ဖိလၢ အဒူတဖၣ်အသိးလီၤ. ဘၣ်ဆၣ်လၢခံန့ၣ် အဝဲသ့ၣ်ဆီတလဲကွံာ် အတၢ်ပာ်သူၣ်ပာ်သးလီၤ. လံာ်စီဆှံ တဲဆိပာ်ဝဲလၢ တၢ်ကကဲထီၣ်အသးဒ်အံၤလီၤ. (ဖး ယၡါယၤ ၁၁:၆, ၇ တက့ၢ်.) လၢလံာ်စီဆှံအပူၤန့ၣ် ပဖးဘၣ်လၢ ဆၣ်ဖိကီၢ်ဖိလၢအဒူအကိၤ ဒ်သိးထွံၣ်မံၤ ဒီးခ့ယုၢ်န့ၣ် ကအိၣ်ကဆိးတပူၤဃီဒီးသိဖိ ဒီးဂီၤဖံးဖိလီၤ. ဘၣ်မနုၤအဃိ အဝဲသ့ၣ် ကအိၣ်ဃူအိၣ်ဖိးလဲၣ်. ဝံအတၢ်စံးပာ်ဆဲးတဲကဒီးဝဲဒ်အံၤ– “ဟီၣ်ခိၣ်ကပှဲၤဝဲဒီး တၢ်သ့ၣ်ညါယွၤ” လီၤ. (ယၡါယၤ ၁၁:၉) ဆၣ်ဖိကီၢ်ဖိတဖၣ်န့ၣ် မၤလိယဟိဝၤယွၤအဂ့ၢ်တသ့ဘၣ်. လၢတၢ်န့ၣ်အဃိ ဝံအတၢ်စံးပာ်အံၤ အဲၣ်ဒိးစံးစ့ၢ်ကီးဝဲ ပှၤဟီၣ်ခိၣ်ဖိတဖၣ် ကဆီတလဲအတၢ်ပာ်သူၣ်ပာ်သးန့ၣ်လီၤ.
လံာ်စီဆှံအတၢ်ဟံးစုနဲၣ်ကျဲတဖၣ် ဆီတလဲပှၤတၢ်အိၣ်မူသ့ (ကွၢ်လံာ်အဆၢ ၁၆)
၁၆. လံာ်စီဆှံ မၤစၢၤဝဲပှၤအဂၤတဖၣ်လၢ ကဆီတလဲအတၢ်အိၣ်မူဒ်လဲၣ်.
ပကမၤတၢ်ဆီတလဲအဂီၢ် တမ့ၢ်တၢ်လၢအညီဘၣ် ဘၣ်ဆၣ် ယွၤအသးစီဆှံမၤစၢၤဝဲ ပှၤလၢအအဲၣ်ဒိးမၤ ယွၤအတၢ်ဘၣ်သးတဖၣ်လီၤ
၁၆ ပဒီပုၢ်ဝဲၢ်မုၣ်ခွါအါဂၤန့ၣ် လၢညါအဝဲသ့ၣ်အတၢ်ပာ်သူၣ်ပာ်သး လီၤဂာ်ဒ်ဆၣ်ဖိကီၢ်ဖိလၢ အဒူအကိၤအသိး ဘၣ်ဆၣ် ခဲအံၤအဝဲသ့ၣ် အိၣ်ဃူအိၣ်ဖိးဒီးပှၤဂၤလီၤ. နဖးအဝဲသ့ၣ်တနီၤအဂ့ၢ်လၢ အအိၣ်ဖဲ “လံာ်စီဆှံဆီတလဲ ပတၢ်အိၣ်မူ” လၢ jw.org သ့ဝဲလီၤ. ပှၤလၢအသ့ၣ်ညါယဟိဝၤယွၤ ဒီးမၤအတၢ်မၤတဖၣ်န့ၣ် လီၤဆီလိာ်အသးဒီး ပှၤလၢအပာ်မၤအသးဒ်သိး အယူးယီၣ်ယွၤ ဘၣ်ဆၣ် အစိအကမီၤန့ၣ် သမၢဝဲတဖၣ်န့ၣ်လီၤ. ပှၤဒ်အံၤတဖၣ်န့ၣ် တဲလီၤအသးလၢ အဘူၣ်ထီၣ်ဘါထီၣ်ယွၤ ဘၣ်ဆၣ် အသကဲာ်ပဝးန့ၣ် တလီၤဂာ်ဒ်ပှၤလၢ အဘူၣ်ထီၣ်ဘါထီၣ်ယွၤဘၣ်. ဘၣ်ဆၣ် ယွၤအခ့အပှၤတနီၤန့ၣ် လၢညါအဝဲသ့ၣ်မ့ၢ်တ့ၢ်ပှၤလၢအဒူအကိၤလီၤ. ခဲအံၤအဝဲသ့ၣ် ‘ကူထီၣ်သိးထီၣ်အနီၢ်သီတ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ်အပူၤလီၤ.’ (အ့းဖ့းစူး ၄:၂၃, ၂၄) ဖဲပှၤတဂၤစးထီၣ်မၤလိ ကစၢ်ယွၤအဂ့ၢ်အခါ အဝဲကသ့ၣ်ညါထီၣ်ဝဲလၢ ကဘၣ်မၤထွဲဝဲကစၢ်ယွၤ အတၢ်သိၣ်တၢ်သီလီၤ. လၢတၢ်န့ၣ်အဃိ ကဲထီၣ်တၢ်မၤစၢၤလၢ အဝဲသ့ၣ်ကဆီတလဲ အတၢ်စူၢ်တၢ်နာ်, အတၢ်ဆိကမိၣ် ဒီးတၢ်လၢအမၤဝဲတဖၣ်လီၤ. အဝဲသ့ၣ်ကမၤဝဲတၢ်ဆီတလဲဒ်အံၤအဂီၢ် တမ့ၢ်တၢ်လၢအညီဘၣ်. ဘၣ်ဆၣ် ယွၤအသးစီဆှံမၤစၢၤဝဲ ပှၤလၢအအဲၣ်ဒိးမၤ ယွၤအတၢ်ဘၣ်သးတဖၣ်လီၤ.
“ပှၤဒ်န့ၣ်သိးတဖၣ်န့ၣ် ဟးဆှဲးအီၤတက့ၢ်”
၁၇. ပဟးဆှဲးပှၤလၢ အိၣ်ဒီးတၢ်ပာ်သူၣ်ပာ်သးလၢ အတဂ့ၤတဖၣ်ကသ့ဒ်လဲၣ်.
၁၇ မုၢ်မဆါတနံၤအံၤ ပှၤလၢအဘူၣ်ထီၣ်ဘါထီၣ်ကစၢ်ယွၤဒီး ပှၤလၢအတဘူၣ်ထီၣ်ဘါထီၣ်ယွၤဘၣ်န့ၣ် လီၤဆီလိာ်အသးဒိၣ်မးလီၤ. ပကဘၣ်ပလီၢ်ပသးဒ်သိး ပှၤလၢပခိၣ်ပဃၢၤတဖၣ် အတၢ်ပာ်သူၣ်ပာ်သးလၢအတဂ့ၤ သုတဘၣ်ကူဘၣ်ဂာ်ပှၤတဂ့ၤအဂီၢ်လီၤ. လၢ ၂ တံၤမသ့း ၃:၂-၅ အပူၤန့ၣ် ပာ်ဖျါထီၣ်ဝဲ တၢ်ပာ်သူၣ်ပာ်သးလၢ ပကဘၣ်ဟးဆှဲးအီၤတဖၣ် ဒီးပအဲၣ်ဒိးမၤထွဲ လံာ်စီဆှံအတၢ်ဟ့ၣ်ကူၣ်အံၤန့ၣ်လီၤ. ပကဟးဆှဲးပှၤလၢအိၣ်ဒီး တၢ်ပာ်သူၣ်ပာ်သးလၢအတဂ့ၤတဖၣ် လၢာ်လၢာ်ဆ့ဆ့တသ့ဘၣ်. ဘၣ်သ့ၣ်သ့ၣ် ပကဘၣ်မၤသကိးတၢ်ဒီးအဝဲသ့ၣ်, လဲၤထီၣ်ကၠိဒီးအဝဲသ့ၣ် မ့တမ့ၢ် အိၣ်ဒီးအဝဲသ့ၣ်လီၤ. ဘၣ်ဆၣ် တလိၣ်လၢပကဆိကမိၣ်တၢ် ဒီးမၤဒ်အဝဲသ့ၣ်မၤဝဲအသိးဘၣ်. ဒ်သိးပမၤဒ်န့ၣ်ကသ့အဂီၢ် တၢ်မနုၤကမၤစၢၤပှၤလဲၣ်. ပမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ ခီဖျိပမၤလိအါထီၣ်လံာ်စီဆှံ ဒီးရ့ဒီးပှၤလၢ အအဲၣ်ကစၢ်ယွၤန့ၣ်လီၤ.
၁၈. တၢ်လၢပတဲဒီး တၢ်လၢပမၤန့ၣ် ကထိၣ်ဟူးထိၣ်ဂဲၤထီၣ်ပှၤဂၤဒ်လဲၣ်.
၁၈ ပအဲၣ်ဒိးမၤစၢၤစ့ၢ်ကီး ပှၤအဂၤတဖၣ်ဒ်သိး ကသ့ၣ်ညါထီၣ် ယဟိဝၤယွၤအဂ့ၢ်လီၤ. ဟံးန့ၢ်တၢ်ခွဲးတၢ်ယာ်လၢ နကစံၣ်တဲၤတဲလီၤပှၤဂၤ ဒီးဃ့တၢ်မၤစၢၤလၢယဟိဝၤယွၤအအိၣ် ဒ်သိးနကတဲတၢ်ကတိၤလၢအထုးန့ၢ်ပှၤသး ဖဲတၢ်ဆၢကတီၢ်လၢ အကြၢးဝဲဘၣ်ဝဲကသ့အဂီၢ်တက့ၢ်. ပကဘၣ်တဲဘၣ်ပှၤဂၤလၢ ပမ့ၢ်ယဟိဝၤပှၤအုၣ်အသးလီၤ. ပမ့ၢ်မၤဒ်န့ၣ်န့ၣ် ပတၢ်ဒိဂ့ၤတဲာ်ဘၣ် ကမၤလၤကပီၤယဟိဝၤယွၤလီၤ. ယဟိဝၤယွၤသိၣ်လိပှၤလၢ “ပဘၣ်ညိကွံာ်တၢ်တယူးတယီၣ်ဘၣ်ယွၤ, ဒီးတၢ်သးကွံဘၣ်ဃးဒီးဟီၣ်ခိၣ်, ဒီးလၢပဘၣ်အိၣ်ပဘၣ်ဆိးလၢ အအံၤတဃၣ်အိၣ်ဒီး တၢ်ပာ်ပသးသပှၢ်သပှၢ်, အိၣ်ဒီးပသူၣ်တီပသးလိၤ, ဒီးတၢ်ယူးယီၣ်ယွၤ” န့ၣ်လီၤ. (တံတူး ၂:၁၁-၁၄) ပမ့ၢ်ကွၢ်လိမၤဒိး ယဟိဝၤယွၤဒီး မၤအတၢ်ဘၣ်သးန့ၣ် ပှၤဂၤကထံၣ်ဝဲလီၤ. ပှၤတနီၤနီၤကတဲဝဲလၢ– “ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢကစၢ်အိၣ်ဝဲဒီးသုလီၤ.”—စကၤရယၤ ၈:၂၃.
^ လံာ်အဆၢ. 10 ကြံးအတၢ်ကတိၤလၢအမ့ၢ် di·aʹbo·los န့ၣ်အခီပညီမ့ၢ်ဝဲ “ပှၤပာ်တၢ်ကမၣ်လၢ ပှၤဂၤအလိၤကလီကလီ” မ့တမ့ၢ် “ပှၤလၢအတဲဟးဂီၤပှၤဂ့ၢ်” လီၤ. လၢလံာ်စီဆှံအပူၤ တၢ်ကတိၤအံၤ ပှၤသူအီၤလၢ မုၣ်ကီၤလံၢ်အဂီၢ် မ့ၢ်လၢအဝဲတဲဟးဂီၤကစၢ်ယွၤအဂ့ၢ်န့ၣ်လီၤ.
