တၢ်မၤလိ ၁
“လဲၤဒုးကဲထီၣ်ပှၤ . . . လၢယပျဲၢ်ယဘီၣ်”
၂၀၂၀ လံာ်စီဆှံအဆၢလၢ တနံၣ်အဂီၢ်– “လဲၤဒုးကဲထီၣ်ပှၤ . . . လၢယပျဲၢ်ယဘီၣ်တက့ၢ်. ဒီးဘျၢအီၤ” တက့ၢ်.—မးသဲ ၂၈:၁၉.
တၢ်သးဝံၣ် ၇၉ သိၣ်လိအဝဲသ့ၣ်ဒ်သိး ကအိၣ်ဂၢၢ်ဆိးကျၢၤအဂီၢ်
တၢ်မၤလိအံၤ အတၢ်တိာ်ပာ် *
၁-၂. ဖဲယ့ၣ်ၡူးအသွၣ်ခိၣ်န့ၣ် မူခိၣ်ကလူးတဂၤ တဲဘၣ်ပှၤပိာ်မုၣ်တဖၣ်လၢ တၢ်မနုၤလဲၣ် ဒီးယ့ၣ်ၡူး မၢအဝဲသ့ၣ် မၤတၢ်မနုၤလဲၣ်.
ဖဲ ခ.န ၃၃, လါနံစၣ် ၁၆ သီ, ဂီၤခီဂီၤဂီၤန့ၣ် ပှၤပိာ်မုၣ်တနီၤ လဲၤဆူတၢ်သွၣ်ခိၣ် လၢတၢ်သူၣ်အုးသးအုးအပူၤလီၤ. လၢအပူၤကွံာ် ၃၆ နၣ်ရံၣ်ဘျဲၣ်န့ၣ် ပှၤခူၣ်လီၤ ကစၢ်ယ့ၣ်ၡူးခရံာ်ဖဲန့ၣ်လီၤ. ဖဲအဝဲသ့ၣ် လဲၤတုၤလၢ တၢ်သွၣ်ခိၣ်ဒီး ကလဲၤဖှူဝဲ ယ့ၣ်ၡူးအစိၣ်လၢ တၢ်နၢမူဒီးသိအခါ အဝဲသ့ၣ် တထံၣ်ဘၣ်ဝဲ ယ့ၣ်ၡူးအစိၣ် လၢအသွၣ်ခိၣ်ပူၤလၢၤဘၣ်. မူခိၣ်ကလူးတဂၤတဲဘၣ် အဝဲသ့ၣ်လၢ ယ့ၣ်ၡူးဂဲၤဆၢထၢၣ်က့ၤ လၢတၢ်သံလံဒီး “လဲၤပာ်ဝဲလၢ သုမဲာ်ညါ ဆူကၤလံၤလါလီၤ. သုကထံၣ်ဘၣ်အီၤ ဖဲန့ၣ်လီၤ.”—မးသဲ ၂၈:၁-၇; လူၤကၣ် ၂၃:၅၆; ၂၄:၁၀.
၂ ဖဲပှၤပိာ်မုၣ်တဖၣ်အံၤ ဟးထီၣ်လၢ တၢ်သွၣ်ခိၣ်အခါ ယ့ၣ်ၡူးသုးဘူးအသးဆူ အဝဲသ့ၣ်အအိၣ်ဒီး တဲဘၣ်အဝဲသ့ၣ်လၢ “လဲၤစံးဘၣ်တဲဘၣ် ယဒီပုၢ်ဝဲၢ်သ့ၣ်တဖၣ်, ဒ်သိးအကလဲၤဆူ ကၤလံၤလါတက့ၢ်. ဒီးကထံၣ်ဘၣ်ယၤ ဖဲန့ၣ်လီၤ.” (မးသဲ ၂၈:၁၀) ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤဝံၤ တၢ်အဆိကတၢၢ်လၢ အမၤဝဲန့ၣ်မ့ၢ်ဝဲ အဝဲရဲၣ်ကျဲၤဝဲလၢ ကထံၣ်ဖှိၣ်လိာ်အသးဒီး အပျဲၢ်အဘီၣ်တဖၣ်လီၤ. ဒီးဖဲတၢ်အိၣ်ဖှိၣ်အဝဲန့ၣ်န့ၣ် ယ့ၣ်ၡူးဟ့ၣ်လီၤဝဲ တၢ်ဟံးစုနဲၣ်ကျဲလၢ အရ့ဒိၣ်ဒိၣ်မး တနီၤလီၤ.
ယ့ၣ်ၡူးမၢမတၤတဖၣ် လဲၤဒုးကဲထီၣ်ပှၤဂၤ လၢအပျဲၢ်အဘီၣ်လဲၣ်
ယ့ၣ်ၡူးသမူထီၣ်ဝံၤအလီၢ်ခံ ဖဲအထံၣ်လိာ်သးဒီးအတၢ်မၢဖိ ဒီးပှၤအဂၤတဖၣ်လၢ ကၤလံၤလါအခါ အဝဲတဲဘၣ် အဝဲသ့ၣ်လၢ “လဲၤဒုးကဲထီၣ်ပှၤ . . . လၢယပျဲၢ်ယဘီၣ်” (ကွၢ်လံာ်အဆၢ ၃-၄)
၃-၄. ဘၣ်မနုၤအဃိ ပတဲသ့လၢ တၢ်မၤလိာ်ဖဲ မးသဲ ၂၈:၁၉, ၂၀ န့ၣ် တမ့ၢ်ထဲလၢ တၢ်မၢဖိတဖၣ် အဂီၢ်ဘၣ်လဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)
၃ ဖး မးသဲ ၂၈:၁၆-၂၀ တက့ၢ်. ဖဲန့ၣ်န့ၣ် ယ့ၣ်ၡူးတဲဘၣ် အပျဲၢ်အဘီၣ် ဘၣ်ဃးဒီး တၢ်မၤလၢ အဝဲသ့ၣ်ကမၤဝဲ လၢစိၤဖဲန့ၣ်, ဒီးလၢပစိၤခဲအံၤစ့ၢ်ကီး ပမၤတၢ်မၤ အဝဲန့ၣ်လီၤ. ယ့ၣ်ၡူးတဲဝဲလၢ “လဲၤဒုးကဲထီၣ် ပှၤအကလုာ်တဖၣ်ခဲလၢာ်လၢ ယပျဲၢ်ယဘီၣ်တက့ၢ်. . . . သိၣ်လိသီလိအီၤ, ဒ်သိးအကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သု ခဲလၢာ်တက့ၢ်.”
၄ ယ့ၣ်ၡူးအဲၣ်ဒိးလၢ ပှၤလၢအပိာ်အခံတဖၣ် ကစံၣ်တဲၤတဲလီၤတၢ်လီၤ. တမ့ၢ်ထဲ ယ့ၣ်ၡူးမၤလိာ်ဝဲ အတၢ်မၢဖိလၢအသးတီ ၁၁ ဂၤလၢကမၤဝဲ တၢ်မၤအံၤန့ၣ်ဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်. ဖဲယ့ၣ်ၡူးအိၣ်လၢ ကစၢၢ်ကၤလံၤလါ ဒီးမၤလိာ်ဝဲလၢ ပှၤကဘၣ် လဲၤဒုးကဲထီၣ်ပှၤဂၤ လၢအပျဲၢ်အဘီၣ်အခါ ဖဲန့ၣ်န့ၣ် တအိၣ်ထဲ တၢ်မၢဖိတဖၣ်ဘၣ်. ဆိကမိၣ်ကွၢ် မူခိၣ်ကလူးတဂၤ တဲဘၣ်ဝဲ ပှၤပိာ်မုၣ်တဖၣ် ဒ်လဲၣ်န့ၣ်တက့ၢ်. အဝဲတဲဝဲလၢ “သုကထံၣ်ဘၣ်အီၤ [လၢကၤလံၤလါ]” လီၤ. အဃိဖျါလၢ ဖဲယ့ၣ်ၡူးမၤဝဲ တၢ်အိၣ်ဖှိၣ်အံၤအခါ ပှၤပိာ်မုၣ်တဖၣ်အံၤစ့ၢ်ကီး ကအိၣ်ဖဲန့ၣ်လီၤ. တကးဒံးဘၣ် တၢ်မၢဖိပီလူး တဲဝဲလၢ “ဒီပုၢ်ဝဲၢ်ယဲၢ်ကယၤအဘျဲၣ် ထံၣ်ဘၣ်အီၤ [ယ့ၣ်ၡူး] တစုဃီလီၤ.” (၁ ကရံၣ်သူး ၁၅:၆) အဝဲသ့ၣ် ပာ်ဖှိၣ်ထီၣ်အသးလၢ တၢ်လီၢ်ဖဲလဲၣ်.
၅. ဘၣ်မနုၤအဃိ ပနာ်လၢ တၢ်ပာ်ဖှိၣ်ထီၣ်သးလၢ ၁ ကရံၣ်သူး ၁၅:၆ ပာ်ဖျါထီၣ်ဝဲန့ၣ် မ့ၢ်ဝဲတၢ်ပာ်ဖှိၣ်ထီၣ်သးလၢ ကၤလံၤလါ လၢ မးသဲ အဆၢဒိၣ် ၂၈ ပာ်ဖျါထီၣ်ဝဲန့ၣ်လဲၣ်.
၅ ပနာ်သ့လၢ ဖဲစီၤပီလူးကွဲးဝဲ ၁ ကရံၣ်သူး ၁၅:၆ အခါ အဝဲအဲၣ်ဒိးတဲဝဲ တၢ်ပာ်ဖှိၣ်ထီၣ်သးလၢ ကၤလံၤလါ လၢဘၣ်တၢ်ပာ်ဖျါထီၣ်အီၤဖဲ မးသဲ အဆၢဒိၣ် ၂၈ အပူၤန့ၣ်လီၤ. ဘၣ်မနုၤအဃိ ပတဲဒ်န့ၣ်သ့လဲၣ်. တၢ်ဂ့ၢ်တၢတမံၤန့ၣ် ယ့ၣ်ၡူးအပျဲၢ်အဘီၣ် အါတက့ၢ်န့ၣ်မ့ၢ်ဝဲ ပှၤကၤလံၤလါဖိလီၤ. ဒီးမ့ၢ်လၢ ယ့ၣ်ၡူးကမၤဝဲ တၢ်အိၣ်ဖှိၣ်ဒီး ပှၤအါဂၤအဃိ အဝဲမ့ၢ်မၤဝဲလၢ ကစၢၢ်ကၤလံၤလါန့ၣ် ကညီဒိၣ်န့ၢ်ဒံး အမၤဝဲလၢ ပှၤတဂၤဂၤအဟံၣ် လၢဝ့ၢ်ယရူၤၡလ့ၣ်အပူၤဒံးလီၤ. ခံမံၤတမံၤန့ၣ် ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ တချုးလၢအလဲၤလၢ ကၤလံၤလါဒံးဘၣ်န့ၣ် အဝဲလဲၤထံၣ်လိာ်အသးဒီး တၢ်မၢဖိ ၁၁ ဂၤလၢဟံၣ်လၢ အအိၣ်လၢ ဝ့ၢ်ယရူၤၡလ့ၣ်အပူၤဝံၤလံ. အဃိ အဝဲမ့ၢ်အဲၣ်ဒိး မၢထဲအတၢ်မၢဖိတဖၣ် ဟးစံၣ်တဲၤတဲလီၤတၢ်န့ၣ် အဝဲတဲဘၣ်အဝဲသ့ၣ် ဖဲန့ၣ်လံၤလံၤသ့လီၤ. ဘၣ်ဆၣ် ယ့ၣ်ၡူးတမၤဝဲ ဒ်န့ၣ်ဘၣ်. လၢတၢ်န့ၣ်အလီၢ် ယ့ၣ်ၡူးမၢ အတၢ်မၢဖိတဖၣ်, ပှၤပိာ်မုၣ်တဖၣ် ဒီးပှၤအဂၤတဖၣ် လဲၤထံၣ်ဖှိၣ်လိာ်အသး ဖဲကၤလံၤလါလီၤ.—လူၤကၣ် ၂၄:၃၃, ၃၆.
၆. ဘၣ်မနုၤအဃိ ပတဲသ့လၢ တၢ်မၤလိာ်ဖဲ မးသဲ ၂၈:၂၀ န့ၣ်ဘၣ်ထွဲလိာ်အသး တုၤလၢပစိၤခဲအံၤလဲၣ် ဒီးဆၢကတီၢ်ခဲအံၤ ပှၤအါဂၤ ဒိကနၣ်ဝဲ တၢ်မၤလိာ်အံၤ ဒ်လဲၣ်.
၆ ဆိကမိၣ်ကွၢ် တၢ်ဂ့ၢ်အရ့ဒိၣ် သၢမံၤတမံၤတက့ၢ်. ယ့ၣ်ၡူးတမၢထဲ ခရံာ်ဖိလၢ အအိၣ်မူဖဲ စိၤဖဲန့ၣ်တဖၣ် လဲၤဒုးကဲထီၣ်ပှၤဂၤလၢ အပျဲၢ်အဘီၣ်န့ၣ်ဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်. ဖဲယ့ၣ်ၡူးမၢ အပျဲၢ်အဘီၣ်တဖၣ် လဲၤဒုးကဲထီၣ်ပှၤဂၤလၢ အပျဲၢ်အဘီၣ်အခါ အဝဲမၤကတၢၢ် အတၢ်ကတိၤလၢ “ယအိၣ်ဒီးသု ကိးမုၢ်နံၤမုၢ်နၤဒဲး, တုၤတၢ်အစိၤကတၢၢ်လီၤ.” (မးသဲ ၂၈:၂၀) ဒ်ယ့ၣ်ၡူးတဲဝဲအသိး ဆၢကတီၢ်ခဲအံၤန့ၣ် ပှၤအါဂၤ ဟးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်လီၤ. တနံၣ်ဘၣ်တနံၣ်န့ၣ် ပှၤအဂၤ ၃၀၀,၀၀၀ ဃၣ်ဃၣ် ဒိးဘျၢထံဒ် ယဟိဝၤပှၤအုၣ်အသးတဂၤအသိး ဒီးကဲထီၣ်ခရံာ်အပျဲၢ်အဘီၣ်လီၤ. အဃိ မ့ၢ်တၢ်လၢ အလီၤကမၢကမၣ် ဒိၣ်မးလီၤ.
၇. ခဲအံၤ ပကတဲသကိး တၢ်မနုၤလဲၣ် ဒီးဘၣ်မနုၤအဃိလဲၣ်.
၇ ပှၤအါဂၤ လၢအမၤလိလံာ်စီဆှံန့ၣ် လဲၤထီၣ်လဲၤထီ ဒီးဒိးဘျၢထံလီၤ. ဘၣ်ဆၣ် ပှၤတနီၤန့ၣ် မၤလိလံာ်စီဆှံထီဘိ သနာ်က့ ဖျါလၢအတအဲၣ်ဒိးကဲထီၣ် ယ့ၣ်ၡူးအပျဲၢ်အဘီၣ်ဘၣ်. ဒီးအဝဲသ့ၣ် မၤလိလံာ်စီဆှံ မုာ်ဘၣ်ဆၣ် တလဲၤထီၣ်လဲၤထီ လၢကဒိးဘျၢထံအဂီၢ်ဘၣ်. ဖဲပမၤလိပှၤတဂၤဂၤ လံာ်စီဆှံအခါ ပအဲၣ်ဒိးမၤစၢၤအီၤလၢ အကမၤထွဲ တၢ်လၢအမၤလိဘၣ်ဝဲတဖၣ် ဒီးကဲထီၣ် ခရံာ်အပျဲၢ်အဘီၣ်လီၤ. လၢတၢ်မၤလိအံၤအပူၤ ပကတဲသကိး ဘၣ်ဃးဒီး ဒ်သိးပှၤမၤလိလံာ်စီဆှံဖိတဖၣ် ကအဲၣ်ယဟိဝၤယွၤ ဒီးကလဲၤထီၣ်လဲၤထီအဂီၢ် ပမၤစၢၤအဝဲသ့ၣ် ကသ့ဒ်လဲၣ်န့ၣ်လီၤ. ဘၣ်မနုၤအဃိ ပကဘၣ်တဲသကိး တၢ်ဂ့ၢ်တဖၣ်အံၤလဲၣ်. မ့ၢ်လၢ တဘျီတခီၣ်န့ၣ် ပကဘၣ်ဆၢတဲာ်တၢ် ဘၣ်ဃးဒီး ပကြၢးဆဲးမၤလိလံာ်စီဆှံ ဒီးအဝဲသ့ၣ်ဧါ မ့တမ့ၢ် ပကြၢးပာ်ပတုာ်ကွံာ် တၢ်မၤလိလံာ်စီဆှံဒီး အဝဲသ့ၣ်ဧါန့ၣ်လီၤ.
မၤစၢၤနပှၤမၤလိလံာ်စီဆှံဖိ ဒ်သိးကအဲၣ် ယဟိဝၤယွၤအဂီၢ်
၈. ဘၣ်မနုၤအဃိ တဘျီတခီၣ်န့ၣ် ကီလၢပကမၤစၢၤ ပပှၤမၤလိလံာ်စီဆှံဖိ ဒ်သိးအဝဲသ့ၣ်ကအဲၣ်ယဟိဝၤယွၤအဂီၢ်လဲၣ်.
၈ ယဟိဝၤယွၤ အဲၣ်ဒိးလၢ ပှၤကမၤအတၢ်မၤ ခီဖျိလၢ ပှၤအဲၣ်အီၤအဃိလီၤ. လၢတၢ်န့ၣ်အဃိ ပအဲၣ်ဒိးမၤစၢၤ ပပှၤမၤလိလံာ်စီဆှံဖိတဖၣ် ဒ်သိးအဝဲသ့ၣ် ကနၢ်ပၢၢ်ထီၣ်ဝဲလၢ ယဟိဝၤယွၤ သူၣ်အိၣ်သးအိၣ်အဝဲသ့ၣ် တဂၤစုာ်စုာ် ဒီးအဲၣ်အဝဲသ့ၣ် ဒိၣ်မးန့ၣ်လီၤ. ပအဲၣ်ဒိးမၤစၢၤအဝဲသ့ၣ် ဒ်သိးအဝဲသ့ၣ် ကထံၣ်ယဟိဝၤယွၤဒ် “ပှၤဖိၣ်ဃဲအပၢ်, ဒီးပှၤလၢအစံၣ်ညီၣ်န့ၢ် ပှၤမုၣ်ကမဲအကွီၢ်လီၤ.” (စံးထီၣ်ပတြၢၤ ၆၈:၅) ဖဲအဝဲသ့ၣ် သ့ၣ်ညါဝဲလၢ ယဟိဝၤယွၤ အဲၣ်အဝဲသ့ၣ်ဒိၣ်မးအခါ အဝဲသ့ၣ်စ့ၢ်ကီး ကအဲၣ်ဆၢက့ၤအီၤလီၤ. ပှၤမၤလိလံာ်စီဆှံဖိတနီၤန့ၣ် မ့ၢ်လၢတဒိးန့ၢ်ဘၣ် အပၢ်အတၢ်အဲၣ် ဒီးတၢ်သးကညီၤဘၣ်အဃိ အဝဲသ့ၣ် ကထံၣ်ယဟိဝၤယွၤဒ် ပၢ်လၢအပှဲၤဒီး တၢ်အဲၣ်တၢ်ကွံန့ၣ် တညီလၢအဂီၢ်ဘၣ်. (၂ တံၤမသ့း ၃:၁, ၃) ဖဲနမၤလိ ပှၤဂၤလံာ်စီဆှံအခါ တဲဘၣ်အီၤ ယဟိဝၤယွၤ အတၢ်ဂ့ၤတၢ်ဝါတဖၣ်တက့ၢ်. မၤစၢၤအီၤဒ်သိး ကနၢ်ပၢၢ်ထီၣ်ဝဲလၢ ကစၢ်ယွၤ အဲၣ်ဒိးလၢအကန့ၢ်ဘၣ် တၢ်မူအထူအယိာ် ဒီးထီဘိန့ၣ် ကစၢ်ယွၤ သးအိၣ်မၤစၢၤအီၤ လၢအကန့ၢ်ဘၣ် တၢ်မူအဂီၢ်တက့ၢ်. ပမၤစၢၤ ပပှၤမၤလိလံာ်စီဆှံဖိဒ်န့ၣ် ကသ့ဒ်လဲၣ်.
၉-၁၀. ဖဲပမၤလိ ပှၤဂၤလံာ်စီဆှံအခါ ပကြၢးသူ လံာ်မနုၤတဖၣ်လဲၣ် ဒီးဘၣ်မနုၤအဃိလဲၣ်.
၉ သူလံာ်လၢအမ့ၢ် “လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ်” ဒီး “ပအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤကသ့ဒ်လဲၣ်.” လံာ်လဲၢ်တဖၣ်အံၤန့ၣ် ဘၣ်တၢ်ထုးထီၣ်အီၤ ဒ်သိးပကမၤစၢၤ ပှၤမၤလိလံာ်စီဆှံဖိတဖၣ် လၢကအဲၣ်ကစၢ်ယွၤအဂီၢ်လီၤ. အဒိ လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ်, တၢ်မၤလိ ၁ န့ၣ်ပာ်ဖျါထီၣ်ဝဲ တၢ်သံကွၢ်တဖၣ်အံၤ အတၢ်စံးဆၢလီၤ. တၢ်သံကွၢ်တဖၣ်အံၤမ့ၢ်ဝဲ မ့ၢ်ကစၢ်ယွၤသးအိၣ်ပှၤ သပှၢ်ကတၢၢ်ဧါ မ့တမ့ၢ် မၤနးမၤဖှီၣ်ပှၤဧါ ဒီးမ့ၢ်နကဲထီၣ် ယဟိဝၤယွၤအတံၤသကိးသ့ဧါ န့ၣ်လီၤ. ဒီးမ့မ့ၢ် ပအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤကသ့ဒ်လဲၣ် န့ၣ်ပာ်ဖျါထီၣ်ဝဲ တၢ်ဂ့ၢ်မနုၤလဲၣ်. လံာ်တဘ့ၣ်အံၤ ကမၤစၢၤ ပပှၤမၤလိလံာ်စီဆှံဖိ ဒ်သိးအဝဲသ့ၣ် ကနၢ်ပၢၢ်ထီၣ်ဝဲလၢ အဝဲသ့ၣ် မ့ၢ်မၤထွဲ လံာ်စီဆှံအတၢ်ဟံးစုနဲၣ်ကျဲန့ၣ် ကကဲဘျုးလၢ အတၢ်အိၣ်မူပူၤဒ်လဲၣ် ဒီးအကဘူးထီၣ်ဒီး ယဟိဝၤယွၤ ဒ်လဲၣ်န့ၣ်လီၤ. နမၤလိ ပှၤအဂၤလၢ လံာ်လဲၢ်တဖၣ်အံၤ မ့ၢ်ဝံၤသနာ်က့ ဖဲနမၤလိကဒီး ပှၤအဂၤအခါ ကတဲာ်ကတီၤဆိပာ်စၢၤနသးလၢ အဝဲသ့ၣ် တဂၤစုာ်စုာ်အဂီၢ် ဒီးဆိကမိၣ်ထံ အဝဲသ့ၣ်အတၢ်လိၣ်ဘၣ်တက့ၢ်.
၁၀ နပှၤမၤလိလံာ်စီဆှံဖိ မ့ၢ်အဲၣ်ဒိးသ့ၣ်ညါဝဲ တၢ်ဂ့ၢ်တၢ်ကျိၤလၢ အတအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤဘၣ်န့ၣ် နကြၢးမၤဒ်လဲၣ်. ဘၣ်သ့ၣ်သ့ၣ် နဟ့ၣ်ဂံၢ်ဟ့ၣ်ဘါအီၤလၢ ကဖးဝဲ ပလံာ်လဲၢ်လၢ အပာ်ဖျါထီၣ်ဝဲ တၢ်ဂ့ၢ်အံၤ လၢအနီၢ်ကစၢ်သ့လီၤ. နမ့ၢ်မၤဒ်န့ၣ်န့ၣ် နဆဲးမၤလိအီၤ လံာ်လၢပပာ်ဖျါထီၣ်တ့ၢ်အီၤတဖၣ် ကသ့ဝဲလီၤ.
စးထီၣ်တၢ်မၤလိလံာ်စီဆှံ လၢတၢ်ထုကဖၣ် (ကွၢ်လံာ်အဆၢ ၁၁)
၁၁. ပမ့ၢ်မၤလိလံာ်စီဆှံဒီးပှၤဂၤန့ၣ် ပကြၢးစးထီၣ်ဃ့ဘါထုကဖၣ်လၢ အခါဖဲလဲၣ် ဒီးဒ်သိးပှၤမၤလိလံာ်စီဆှံဖိ ကနၢ်ပၢၢ်ဝဲလၢ တၢ်ထုကဖၣ်န့ၣ် မ့ၢ်တၢ်လၢအရ့ဒိၣ်အဂီၢ် ပမၤစၢၤအဝဲသ့ၣ်ကသ့ဒ်လဲၣ်.
၁၁ စးထီၣ်တၢ်မၤလိလံာ်စီဆှံ လၢတၢ်ထုကဖၣ်တက့ၢ်. နမ့ၢ်စးထီၣ် တၢ်မၤလိလၢ တၢ်ထုကဖၣ် ဒီးမၤကတၢၢ်အီၤလၢ တၢ်ထုကဖၣ်န့ၣ် မ့ၢ်တၢ်လၢအဂ့ၤကတၢၢ်လီၤ. ဒီးနမၤအီၤလၢ အဆိအချ့ဒ်အံၤသ့ ခီဖျိနဃ့ဘါထုကဖၣ် တၢ်ဒီးအဝဲသ့ၣ် ဖဲနစးထီၣ်မၤလိလံာ်စီဆှံဒီးအဝဲသ့ၣ် အဆိကတၢၢ် စှၤကိာ်နွံအတီၢ်ပူၤန့ၣ်လီၤ. ပကဘၣ်မၤစၢၤ ပှၤမၤလိလံာ်စီဆှံဖိ ဒ်သိးအကသ့ၣ်ညါဝဲလၢ ပနၢ်ပၢၢ် ကစၢ်ယွၤအကလုၢ်ကထါ သ့ထဲလၢ ကစၢ်ယွၤအသးစီဆှံ အတၢ်မၤစၢၤအဃိလီၤ. ဘၣ်ဃးဒီး တၢ်ထုကဖၣ်ဒ်အံၤန့ၣ် ဒ်သိးဒီပုၢ်ဝဲၢ်တနီၤ ကၡဲပၠးဝဲ အပှၤမၤလိလံာ်စီဆှံဖိအဂီၢ် အဝဲသ့ၣ်ဖးဝဲ ယၤကိာ် ၁:၅ လၢအတဲဝဲလၢ “သုဝဲသ့ၣ်တဂၤဂၤန့ၣ်, န့ၢ်တၢ်ကူၣ်သ့ကူၣ်ဘၣ် အလီၢ်မ့ၢ်အိၣ်ဒီး, မ်အဃ့လၢယွၤ” န့ၣ်လီၤ. ဒီးအဝဲသ့ၣ် သံကွၢ်ဝဲ ပှၤမၤလိလံာ်စီဆှံဖိတဖၣ်လၢ “ပဃ့တၢ်ကူၣ်သ့လၢ ကစၢ်ယွၤအအိၣ် ကသ့ဒ်လဲၣ်” န့ၣ်လီၤ. ပမ့ၢ်မၤဒ်န့ၣ်န့ၣ် အဝဲသ့ၣ် ကသ့ၣ်ညါဝဲလၢ ပကြၢးဃ့ဘါထုကဖၣ်ဆူ ကစၢ်ယွၤအအိၣ်န့ၣ်လီၤ.
၁၂. နသူ စံးထီၣ်ပတြၢၤ ၁၃၉:၂-၄ ဒီးနမၤစၢၤ နပှၤမၤလိလံာ်စီဆှံဖိလၢ ကတဲတၢ်ဒီးယဟိဝၤယွၤပျီပျီ ကသ့ဒ်လဲၣ်.
၁၂ သိၣ်လိ နပှၤမၤလိလံာ်စီဆှံဖိလၢ ကဘၣ်ဃ့ဘါထုကဖၣ်ဝဲ ဒ်လဲၣ်န့ၣ်တက့ၢ်. တဲဘၣ်အီၤလၢ ယဟိဝၤယွၤ အဲၣ်ဒိးနၢ်ဟူဝဲ တၢ်ထုကဖၣ်လၢ အဟဲထီၣ်လၢပသးပူၤ န့ၣ်တက့ၢ်. ဒီးတဲဘၣ်အီၤလၢ လၢပတၢ်ထုကဖၣ်အပူၤန့ၣ် ပတဲဘၣ် ယဟိဝၤယွၤ လၢပတၢ်တူၢ်ဘၣ်တဖၣ်သ့ ဒီးတၢ်လၢ ပတအဲၣ်ဒိးတဲ ပှၤနီတဂၤဘၣ်ဒၣ်လဲာ် ပတဲဘၣ် ကစၢ်ယွၤသ့န့ၣ်တက့ၢ်. ဒီးသ့ၣ်နီၣ်ထီၣ်လၢ ယဟိဝၤယွၤ သ့ၣ်ညါဝဲ ပတၢ်ဆိကမိၣ်တဖၣ် န့ၣ်တက့ၢ်. (ဖး စံးထီၣ်ပတြၢၤ ၁၃၉:၂-၄ တက့ၢ်.) ဒီးဟ့ၣ်ဂံၢ်ဟ့ၣ်ဘါ နပှၤမၤလိလံာ်စီဆှံဖိလၢ ကဃ့ကစၢ်ယွၤ အတၢ်မၤစၢၤ ဒ်သိးအဝဲဆီတလဲ အတၢ်ဆိကမိၣ်လၢအကမၣ် ဒီးပာ်တ့ၢ်ကွံာ် လုၢ်လၢ်လၢအတဂ့ၤဘၣ်တဖၣ် ကန့ၢ်အဂီၢ်န့ၣ်တက့ၢ်. အဒိ ဘၣ်သ့ၣ်သ့ၣ် နပှၤမၤလိလံာ်စီဆှံဖိတဂၤ ပၣ်ဃုာ်လၢမူးပွဲလၢအကမၣ်တဖၣ် ကမုာ်ဒိၣ်မးလီၤ. အဝဲသ့ၣ်ညါဝဲလၢ အကမၣ်ဘၣ်ဆၣ် အအဲၣ်ဒိးမၤဝဲ တၢ်လၢအဘၣ်ထွဲဒီး မူးပွဲအံၤ တနီၤဒံးလီၤ. မ့မ့ၢ်ဒ်န့ၣ်န့ၣ် ဟ့ၣ်ဂံၢ်ဟ့ၣ်ဘါအီၤလၢ ကတဲဘၣ် ယဟိဝၤယွၤ လၢအတၢ်တူၢ်ဘၣ် လီၤတံၢ်လီၤဆဲးတက့ၢ်. ဒီးဟ့ၣ်ဂံၢ်ဟ့ၣ်ဘါစ့ၢ်ကီးအီၤလၢ ကဃ့ကစၢ်ယွၤ လၢကမၤစၢၤအီၤ ဒ်သိးအကအဲၣ်ထဲ တၢ်လၢကစၢ်ယွၤ ဘၣ်သူၣ်ဘၣ်သးဝဲတဖၣ်န့ၣ်တက့ၢ်.—စံးထီၣ်ပတြၢၤ ၉၇:၁၀.
ကွဲမုာ် နပှၤမၤလိလံာ်စီဆှံဖိလၢ ကဟဲထီၣ်တၢ်အိၣ်ဖှိၣ် (ကွၢ်လံာ်အဆၢ ၁၃)
၁၃. (က) ဒ်သိးပပှၤမၤလိလံာ်စီဆှံဖိ ကဟဲထီၣ်တၢ်အိၣ်ဖှိၣ်အဂီၢ် ဘၣ်မနုၤအဃိ ပကြၢးကွဲမုာ်အီၤလၢ အဆိအချ့လဲၣ်. (ခ) ဖဲပပှၤမၤလိလံာ်စီဆှံဖိ ဟဲထီၣ်တၢ်အိၣ်ဖှိၣ်အခါ ဒ်သိးအဝဲကတူၢ်ဘၣ်ဝဲ ဒ်အအိၣ်လၢ အကစၢ်အဟံၣ်အသိးအဂီၢ် ပမၤစၢၤအီၤ ကသ့ဒ်လဲၣ်.
၁၃ ဒ်သိးနပှၤမၤလိလံာ်စီဆှံဖိ ကဟဲထီၣ်တၢ်အိၣ်ဖှိၣ်အဂီၢ် ကွဲမုာ်အီၤလၢ အဆိအချ့တက့ၢ်. တၢ်လၢနပှၤမၤလိလံာ်စီဆှံဖိတဖၣ် နၢ်ဟူဝဲလၢ တၢ်အိၣ်ဖှိၣ်အပူၤန့ၣ် ထိၣ်ဟူးထိၣ်ဂဲၤထီၣ်အီၤ ဒ်သိးကအဲၣ်ဒိးမၤ ယဟိဝၤယွၤအတၢ်မၤ ဒီးမၤစၢၤအီၤဒ်သိး ကလဲၤထီၣ်လဲၤထီအဂီၢ်သ့လီၤ. အဃိ ပၠးအီၤတၢ်ဂီၤမူလၢအမ့ၢ် ဖဲဘီမုၢ်ဘျီၣ်ဒိၣ်န့ၣ် ပှၤမၤတၢ်မနုၤလဲၣ် ဒီးကွဲမုာ်အီၤလၢ ကဟဲထီၣ်တၢ်အိၣ်ဖှိၣ်ဒီးနၤတက့ၢ်. ဒီးမၤစၢၤအီၤ ဒ်သိးအဝဲ ကဟဲတုၤလၢ တၢ်အိၣ်ဖှိၣ်အဂီၢ်တက့ၢ်. ဒီးဖဲနလဲၤမၤလိအီၤ လံာ်စီဆှံအခါ နကွဲမုာ် ပှၤစံၣ်တဲၤတဲလီၤတၢ်ဖိ လၢအဂၤတဖၣ် သ့စ့ၢ်ကီးလီၤ. နမ့ၢ်မၤဒ်န့ၣ်န့ၣ် နပှၤမၤလိလံာ်စီဆှံဖိ ကသ့ၣ်ညါလိာ်အသးဒီး ပှၤဂၤလၢ တၢ်အိၣ်ဖှိၣ်အပူၤ ဒီးဖဲအဟဲထီၣ်တၢ်အိၣ်ဖှိၣ်အခါ အဝဲကတူၢ်ဘၣ်ဝဲဒ် အအိၣ်လၢ အနီၢ်ကစၢ်အဟံၣ်အသိးလီၤ.
မၤစၢၤနပှၤမၤလိလံာ်စီဆှံဖိ ဒ်သိးကလဲၤထီၣ်လဲၤထီ လၢနီၢ်သးတခီ
၁၄. တၢ်မနုၤ ကထိၣ်ဟူးထိၣ်ဂဲၤထီၣ် ပှၤမၤလိလံာ်စီဆှံဖိတဂၤ ဒ်သိးကလဲၤထီၣ်လဲၤထီ လၢနီၢ်သးတခီအဂီၢ်လဲၣ်.
၁၄ ပဖီတၢၣ်န့ၣ် မ့ၢ်ဒ်သိး ပကမၤစၢၤပပှၤမၤလိလံာ်စီဆှံဖိ လၢကလဲၤထီၣ်လဲၤထီ လၢနီၢ်သးတခီလီၤ. (အ့းဖ့းစူး ၄:၁၃) ဖဲပှၤတဂၤ မၤလိလံာ်စီဆှံဒီးပှၤအခါ ဘၣ်သ့ၣ်သ့ၣ် တၢ်လၢအဝဲသးစၢၢ်ဆၢဝဲ ဒိၣ်ကတၢၢ်န့ၣ် ကမ့ၢ်ဝဲ တၢ်မၤလိလံာ်စီဆှံန့ၣ် ကဲဘျုးလၢအဂီၢ် ဒ်လဲၣ်န့ၣ်လီၤ. ဘၣ်ဆၣ် ဖဲအတၢ်အဲၣ် ယဟိဝၤယွၤ ဒိၣ်ထီၣ်အခါ အဝဲကဆိကမိၣ်ထီၣ် ဘၣ်ဃးဒီး အမၤစၢၤပှၤဂၤ ဒီးပှၤလၢတၢ်အိၣ်ဖှိၣ်အပူၤ ကသ့ဒ်လဲၣ်န့ၣ်လီၤ. (မးသဲ ၂၂:၃၇-၃၉) ဖဲတၢ်ဆၢကတီၢ် ကြၢးဝဲဘၣ်ဝဲအခါ တဲဘၣ် နပှၤမၤလိလံာ်စီဆှံဖိလၢ ပအိၣ်ဒီးတၢ်ခွဲးတၢ်ယာ်လၢ ပကဆီၣ်ထွဲ ဘီမုၢ်အတၢ်မၤလၢ ကျိၣ်စ့တကပၤန့ၣ်တက့ၢ်.
သိၣ်လိနပှၤမၤလိလံာ်စီဆှံဖိလၢ ဖဲအဝဲအိၣ်ဒီး တၢ်ဂ့ၢ်ကီအခါ အကဘၣ်မၤဝဲဒ်လဲၣ် (ကွၢ်လံာ်အဆၢ ၁၅)
၁၅. ဖဲပပှၤမၤလိလံာ်စီဆှံဖိ အိၣ်ဒီးတၢ်ကီတၢ်ခဲအခါ ဒ်သိးအမၤတၢ်လၢအဘၣ် ကသ့အဂီၢ် ပကဘၣ်မၤစၢၤအီၤဒ်လဲၣ်.
၁၅ သိၣ်လိနပှၤမၤလိလံာ်စီဆှံဖိလၢ ဖဲအဝဲအိၣ်ဒီး တၢ်ဂ့ၢ်ကီအခါ အကဘၣ်မၤဝဲ ဒ်လဲၣ်န့ၣ်တက့ၢ်. အဒိ ဆိကမိၣ်ကွၢ်လၢ နပှၤမၤလိလံာ်စီဆှံဖိလၢ အမ့ၢ်ပှၤစံၣ်တဲၤတဲလီၤတၢ်ဖိ လၢအဘျၢထံ တဝံၤဒံးဘၣ်တဂၤ ဟဲတဲဘၣ်နၤလၢ အဝဲအသးတမုာ် ပှၤတဂၤဂၤ လၢတၢ်အိၣ်ဖှိၣ်အပူၤန့ၣ်တက့ၢ်. ဖဲန့ၣ်န့ၣ် တဘၣ်တဲအီၤလၢ မတၤတဂၤဘၣ်, မတၤတဂၤကမၣ်န့ၣ်တဂ့ၤ. တဲဘၣ်အီၤလၢ လံာ်စီဆှံတဲဝဲလၢ ပကြၢးမၤဒ်လဲၣ်န့ၣ်တက့ၢ်. အဝဲမ့ၢ်ပျၢ်ကွံာ် ဒီပုၢ်ဝဲၢ်အတၢ်ကမၣ် ဒီးသးပ့ၤနီၣ်ကွံာ် ဝဲသ့လီၤ. အဝဲမၤဝဲဒ်န့ၣ် မ့ၢ်တန့ၢ်ဘၣ်န့ၣ် အဝဲကြၢးလဲၤတဲတၢ်ဒီး ပှၤတဂၤန့ၣ်လၢ တၢ်အဲၣ်တၢ်ကွံအပူၤ ဒီးအတၢ်တိာ်ပာ်န့ၣ် ကဘၣ်မ့ၢ်ဒ်သိးအက “န့ၢ်က့ၤ . . . ဒီပုၢ်ဝဲၢ်” အဂီၢ်လီၤ. (ထိၣ်သတြီၤဒီး မးသဲ ၁၈:၁၅ တက့ၢ်.) ဒီးမၤစၢၤနပှၤမၤလိလံာ်စီဆှံဖိ လၢကကတဲာ်ကတီၤ ဆိပာ်စၢၤဝဲ တၢ်လၢအကတဲဝဲန့ၣ်တက့ၢ်. ဒ်သိးအဝဲ ကဘှီဘၣ်ထီၣ်က့ၤ တၢ်ဂ့ၢ်ကီအဂီၢ် ကဘၣ်ဃုသ့ၣ်ညါတၢ်ဂ့ၢ်လၢ JW Library® app ဒီး jw.org® ဒ်လဲၣ်န့ၣ် တဲပၠးအီၤတက့ၢ်. တချုးလၢ အဝဲဒိးဘျၢထံဒံးဘၣ်အခါ အဝဲမ့ၢ်မၤလိအသးလၢ အကဘၣ်မၤဘၣ်ထီၣ်က့ၤ တၢ်ဂ့ၢ်ကီဒီးပှၤဂၤ ဒ်လဲၣ်န့ၣ် ဖဲအဝဲဒိးဘျၢထံ ဝံၤအခါ အတၢ်ရ့လိာ်သးဒီးပှၤဂၤ ကဂ့ၤဝဲလီၤ.
၁၆. ဖဲနလဲၤသိၣ်လိ နပှၤမၤလိလံာ်စီဆှံဖိအခါ နမ့ၢ်လဲၤကိးဃုာ်ဒီး ပှၤစံၣ်တဲၤတဲလီၤတၢ်ဖိအဂၤန့ၣ် ကကဲဘျုးဒ်လဲၣ်.
၁၆ ဖဲနလဲၤမၤလိတၢ်ဒီး နပှၤမၤလိလံာ်စီဆှံဖိအခါ လဲၤကိးဒီပုၢ်ဝဲၢ်အဂၤ ဒီးဖဲကဝီၤအပှၤကွၢ်တၢ် ဟဲအိၣ်သကိး နတၢ်အိၣ်ဖှိၣ်အခါ လဲၤကိးအီၤလၢ နပှၤမၤလိလံာ်စီဆှံဖိ အအိၣ်တက့ၢ်. ဘၣ်မနုၤအဃိ နကဘၣ်မၤ ဒ်န့ၣ်လဲၣ်. မ့ၢ်လၢ တၢ်လၢနမၤစၢၤ နပှၤမၤလိလံာ်စီဆှံဖိ တသ့ဘၣ်တဖၣ်န့ၣ် ဘၣ်သ့ၣ်သ့ၣ် အဝဲသ့ၣ် မၤစၢၤဝဲသ့လီၤ. အဒိ ဘၣ်သ့ၣ်သ့ၣ် နပှၤမၤလိလံာ်စီဆှံဖိ ကဂုာ်ကျဲးစၢးဖၠးမီာ် ဘၣ်ဆၣ် ဖၠးဝဲတန့ၢ်ဘၣ်. မ့မ့ၢ်ဒ်န့ၣ်န့ၣ် လဲၤကိးဒီပုၢ်ဝဲၢ်လၢ လၢအပူၤကွံာ် အတၢ်အိၣ်သး လီၤဂာ်ဒ်သိးဒီးအီၤန့ၣ်တက့ၢ်. ဘၣ်သ့ၣ်သ့ၣ် အဝဲအတၢ်ဟ့ၣ်ကူၣ်န့ၣ် ကကဲဘျူးလၢ နပှၤမၤလိလံာ်စီဆှံဖိ အဂီၢ်လီၤ. နသိၣ်လိလံာ်စီဆှံ လၢဒီပုၢ်ဝဲၢ်လၢ အအိၣ်ဒီးတၢ်လဲၤခီဖျိတဂၤ အမဲာ်ညါ မ့ၢ်တဘၣ်ဘၣ်န့ၣ် နမၢအဝဲ သိၣ်လိန့ၢ်နၤသ့လီၤ. ဖဲနလဲၤသိၣ်လိ နပှၤမၤလိလံာ်စီဆှံဖိအခါ နမ့ၢ်လဲၤကိးပှၤဂၤန့ၣ် နပှၤမၤလိလံာ်စီဆှံဖိ ကဒိးန့ၢ်ဘၣ်အဘျုးလၢ အဝဲသ့ၣ် အတၢ်လဲၤခီဖျိလီၤ. သ့ၣ်နီၣ်ထီၣ်လၢ ပတၢ်တိာ်ပာ်န့ၣ် မ့ၢ်ဒ်သိး ပကမၤစၢၤပပှၤမၤလိလံာ်စီဆှံဖိ ဒ်သိးကလဲၤထီၣ်လဲၤထီ လၢနီၢ်သးတခီအဂီၢ်လီၤ.
မ့ၢ်နကြၢးပာ်ပတုာ် တၢ်မၤလိလံာ်စီဆှံဒီး ပှၤဂၤဧါ
၁၇-၁၈. ဖဲနဆၢတဲာ်လီၤနသး ဘၣ်ဃးဒီး နကပတုာ် မၤလိလံာ်စီဆှံဒီး ပှၤတဂၤဂၤအခါ နကဘၣ်ဆိကမိၣ်ဃုာ်ဒီး တၢ်ဂ့ၢ်မနုၤလဲၣ်.
၁၇ နပှၤမၤလိ လံာ်စီဆှံဖိတဂၤ မ့ၢ်တလဲၤထီၣ်လဲၤထီဘၣ်န့ၣ် ဘၣ်သ့ၣ်သ့ၣ် နကဆိကမိၣ်ဘၣ်လၢ ‘မ့ၢ်ယကြၢးပာ်ပတုာ် တၢ်မၤလိလံာ်စီဆှံဒီးအီၤဧါ.’ တချုးလၢ နဆၢတဲာ်လီၤနသး ဒ်အံၤဒံးဘၣ်န့ၣ် နကြၢးဆိကမိၣ် နပှၤမၤလိလာ်စီဆှံဖိ အတၢ်သ့တၢ်ဘၣ်လီၤ. ပှၤတနီၤန့ၣ် လဲၤထီၣ်လဲၤထီ ဃၢန့ၢ်ဒံး ပှၤအဂၤတနီၤဒံးလီၤ. အဃိ သံကွၢ်လီၤနသးလၢ ‘မ့ၢ်ယပှၤမၤလိလံာ်စီဆှံဖိ လဲၤထီၣ်လဲၤထီ ဖဲအကြၢးဒီးအီၤဧါ’ ဒီး ‘မ့ၢ်အ “တိၢ်န့ၢ်” မ့တမ့ၢ် မၤထွဲ တၢ်လၢအမၤလိဘၣ်ဝဲ တဖၣ်ဧါ.’ (မးသဲ ၂၈:၂၀) ဒ်သိးပှၤမၤလိလံာ်စီဆှံဖိတဂၤ ကလဲၤထီၣ်လဲၤထီအဂီၢ် တၢ်ဆၢကတီၢ် လိၣ်ဝဲဘၣ်ဆၣ် အဝဲကြၢးဆီတလဲ အတၢ်အိၣ်မူ ကယီကယီလီၤ.
၁၈ ပှၤမၤလိလံာ်စီဆှံဖိတဂၤ မၤလိလံာ်စီဆှံ ယံာ်လံဘၣ်ဆၣ် မ့ၢ်ဖျါလၢ တၢ်မၤလိလံာ်စီဆှံ တမ့ၢ်တၢ်အရ့ဒိၣ် လၢအဂီၢ်ဘၣ်န့ၣ် ပကြၢးမၤဒ်လဲၣ်. ဆိကမိၣ်ကွၢ် တၢ်အိၣ်သးအံၤတက့ၢ်. နပှၤမၤလိလံာ်စီဆှံဖိတဂၤ မၤလိဝဲ လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ် ဝံၤလံ, ဒီးဘၣ်သ့ၣ်သ့ၣ် အဝဲစးထီၣ်မၤလိဝဲ ပအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤကသ့ဒ်လဲၣ် လံဘၣ်ဆၣ် တထီၣ်တၢ်အိၣ်ဖှိၣ်နီတဘျီဘၣ် ဒီးတၢ်သ့ၣ်နီၣ်ထီၣ်က့ၤ အမူးဒၣ်လဲာ်န့ၣ် တထီၣ်ဝဲ နီတဘျီဘၣ်. ဒီးတဘျီတခီၣ် အဝဲတမၤလိလံာ်စီဆှံ ခီဖျိလၢ တၢ်ဂ့ၢ်ဆံးဆံးဖိအဃိ ဒၣ်လဲာ်န့ၣ်လီၤ. မ့မ့ၢ်ဒ်န့ၣ်န့ၣ် နကြၢးတဲတၢ်ဒီးအီၤ ပျီပျီလီၤ. *
၁၉. မ့ၢ်ဖျါလၢ နပှၤမၤလိလံာ်စီဆှံဖိတဂၤ တထံၣ်ဝဲ တၢ်မၤလိလံာ်စီဆှံ ဒ်အမ့ၢ်တၢ်လၢ အရ့ဒိၣ်ဘၣ်န့ၣ် နကဘၣ်တဲအီၤတၢ်မနုၤလဲၣ် ဒီးနကဘၣ်ဆိကမိၣ် တၢ်ဂ့ၢ်မနုၤလဲၣ်.
၁၉ နစးထီၣ်သံကွၢ်အီၤဒ်အံၤ သ့လီၤ. ‘ဒ်သိးနကကဲထီၣ် ယဟိဝၤပှၤအုၣ်အသးတဂၤအဂီၢ် တၢ်လၢအကီကတၢၢ် လၢနဂီၢ်န့ၣ် မ့ၢ်မနုၤလဲၣ်.’ ဘၣ်သ့ၣ်သ့ၣ် နပှၤမၤလိလံာ်စီဆှံဖိ ကတဲနၤလၢ ‘ယမၤလိလံာ်စီဆှံ မုာ်ဘၣ်ဆၣ် ယတအဲၣ်ဒိးကဲ ယဟိဝၤပှၤအုၣ်အသး နီတဘျီဘၣ်.’ ဒီးနမၤလိ လံာ်စီဆှံဒီးအီၤ မ့ၢ်ယံာ်တတီၤဖိလံဘၣ်ဆၣ် အတၢ်ပာ်သူၣ်ပာ်သး မ့ၢ်အိၣ်ဒ်အံၤန့ၣ် နကဘၣ်ဆိကမိၣ်ထံ ဘၣ်ဃးဒီး နကပတုာ်ကွံာ် တၢ်မၤလိလံာ်စီဆှံဒီးအီၤလီၤ. ဒီးအဂၤတမံၤန့ၣ် ဖဲနသံကွၢ်အီၤ တၢ်သံကွၢ်အခါ အဆိကတၢၢ်တဘျီ ဘၣ်သ့ၣ်သ့ၣ် အဝဲကတဲဘၣ်နၤလၢ တၢ်မနုၤ ထုးဃၢအီၤလဲၣ်န့ၣ်လီၤ. အဒိ အဝဲကတူၢ်ဘၣ်ဝဲလၢ အလဲၤစံၣ်တဲၤတဲလီၤတၢ် တဟံၣ်ဘၣ်တဟံၣ် တသ့ဘၣ်. နမ့ၢ်သ့ၣ်ညါ အတၢ်တူၢ်ဘၣ်န့ၣ် နကဘၣ်မၤစၢၤအီၤဒ်လဲၣ်န့ၣ် နကသ့ၣ်ညါထီၣ်လီၤ.
တဘၣ်မၤလိ လံာ်စီဆှံဒီး ပှၤလၢ အတလဲၤထီၣ်လဲၤထီတဖၣ် လၢၤတဂ့ၤ (ကွၢ်လံာ်အဆၢ ၂၀)
၂၀. ဖဲပဆၢတဲာ်လီၤပသး ဘၣ်ဃးဒီး ပကြၢးဆဲးမၤလိလံာ်စီဆှံဒီး မတၤတဖၣ်လဲၣ်အခါ မၤတၢ် ၁၃:၄၈ မၤစၢၤပှၤဒ်လဲၣ်.
၂၀ လီၤသးအုးဒိၣ်မးလၢ ပှၤမၤလိလံာ်စီဆှံဖိတနီၤန့ၣ် လီၤဂာ်ဒီး ပှၤအံၣ်စရ့လးဖိလၢ ဝံယဃ့းစက့လး အစိၤတဖၣ်လီၤ. ဘၣ်ဃးဒီး အဝဲသ့ၣ်န့ၣ် ယဟိဝၤယွၤတဲဘၣ် ဝံယဃ့းစက့လးလၢ “ကွၢ်ကွၢ်, နအိၣ်လၢအဂီၢ်မၤသးဒ် ပှၤလၢအကလုၢ်မုာ်, လၢအသံကျံတၢ်သ့မးတဂၤ အတၢ်သးဝံၣ်မုာ်မုာ်အသိးန့ၣ်လီၤ. အဂ့ၢ်ဒ်အံၤ, နၢ်ဟူနတၢ်ကတိၤ ဘၣ်ဆၣ်ဒီး, တမၤဘၣ်အီၤဘၣ်” လီၤ. (ယဃ့းစက့လး ၃၃:၃၂) ဘၣ်သ့ၣ်သ့ၣ် ပကတဲဘၣ် ပပှၤမၤလိလံာ်စီဆှံဖိ ဘၣ်ဃးဒီး ပအဲၣ်ဒိးပာ်ပတုာ် တၢ်မၤလိလံာ်စီဆှံဒီးအီၤန့ၣ် ကကီလၢပဂီၢ်လီၤ. ဘၣ်ဆၣ် “တၢ်အဆၢအကတီၢ်” အိၣ်တ့ၢ်ဒၣ် “အံၣ်ကိာ်” မ့တမ့ၢ် တစဲးဖိလီၤ. (၁ ကရံၣ်သူး ၇:၂၉) အဃိ ပမ့ၢ်ဟးဃု ပှၤလၢအပာ်ဖျါထီၣ်ဝဲလၢ အမ့ၢ်ပှၤလၢ “တၢ်ပာ်အီၤ လၢအကန့ၢ်ဘၣ်တၢ်မူ လီၤထူလီၤယိာ်” န့ၣ်ကဂ့ၤဒိၣ်န့ၢ်ဒံး ပသူလၢာ် ပတၢ်ဆၢကတီၢ်လၢ ပှၤမၤလိလံာ်စီဆှံဖိလၢ အတလဲၤထီၣ်လဲၤထီတဖၣ်လီၤ.—ဖး မၤတၢ် ၁၃:၄၈ တက့ၢ်.
ဘၣ်သ့ၣ်သ့ၣ် လၢနလီၢ်ကဝီၤန့ၣ် ပှၤလၢအဃ့ထုကဖၣ်လၢ ကဒိးန့ၢ်ဘၣ် တၢ်မၤစၢၤအဂီၢ်န့ၣ် ကအိၣ်ဝဲလီၤ (ကွၢ်လံာ်အဆၢ ၂၀)
၂၁. ၂၀၂၀ နံၣ်, လံာ်စီဆှံအဆၢလၢ တနံၣ်အဂီၢ်န့ၣ် မ့ၢ်မနုၤလဲၣ် ဒီးကမၤစၢၤပှၤလၢ ပကမၤမနုၤလဲၣ်.
၂၁ ၂၀၂၀ နံၣ်, လံာ်စီဆှံအဆၢလၢ တနံၣ်အဂီၢ်န့ၣ် ကမၤစၢၤပှၤဒ်သိး ပကဆိကမိၣ် ဘၣ်ဃးဒီး ပမၤဂ့ၤထီၣ် ပတၢ်သ့တၢ်ဘၣ်လၢ တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ် အတၢ်မၤအပူၤ ကသ့ဒ်လဲၣ်န့ၣ်လီၤ. ဒီးကမၤစၢၤစ့ၢ်ကီးပှၤလၢ ပကဆိကမိၣ်ထံ ယ့ၣ်ၡူးအတၢ်ကတိၤလၢ အတဲဝဲဖဲ ကစၢၢ်ကၤလံၤလါလီၤ. အဝဲတဲဝဲလၢ “လဲၤဒုးကဲထီၣ်ပှၤ . . . လၢယပျဲၢ်ယဘီၣ်တက့ၢ်. ဒီးဘျၢအီၤ” တက့ၢ်န့ၣ်လီၤ.—မးသဲ ၂၈:၁၉.
မ်ပပာ်လီၤပသးလၢ ပကမၤဂ့ၤထီၣ် ပတၢ်သ့တၢ်ဘၣ်လၢ တၢ်ဒုးကဲထီၣ်ပှၤဂၤလၢ ခရံာ်အတၢ်မၤအပူၤ ဒီးမၤစၢၤ ပပှၤမၤလိလံာ်စီဆှံဖိ ဒ်သိးကဒိးဘျၢထံအဂီၢ်တက့ၢ် (ကွၢ်လံာ်အဆၢ ၂၁)
တၢ်သးဝံၣ် ၇၀ ဃုထံၣ်န့ၢ်ပှၤလၢအသးဂ့ၤတဖၣ်
^ လံာ်အဆၢ. 5 ၂၀၂၀ လံာ်စီဆှံအဆၢလၢ တနံၣ်အဂီၢ်န့ၣ် ဟ့ၣ်ဂံၢ်ဟ့ၣ်ဘါပှၤလၢ ပကမၤထွဲယ့ၣ်ၡူး အတၢ်ကတိၤလၢအမ့ၢ် “ဒုးကဲထီၣ်ပှၤ . . . လၢယပျဲၢ်ယဘီၣ်” လီၤ. ယဟိဝၤယွၤ အခ့အပှၤကိးဂၤဒဲးန့ၣ် ကဘၣ်ဒိကနၣ်ဝဲ တၢ်မၤလိာ်အံၤလီၤ. ဒ်သိးပပှၤမၤလိ လံာ်စီဆှံဖိတဖၣ် ကကဲထီၣ် ခရံာ်အပျဲၢ်အဘီၣ်အဂီၢ် ပမၤစၢၤအဝဲသ့ၣ် ကသ့ဒ်လဲၣ်. ဒ်သိးအဝဲသ့ၣ် ကသုးဘူးအသးဆူ ယဟိဝၤယွၤအအိၣ်အဂီၢ် ပမၤစၢၤအဝဲသ့ၣ် ကသ့ဒ်လဲၣ်. ပှၤတဂၤဂၤ လၢပမၤလိလံာ်စီဆှံဒီးအီၤန့ၣ် မ့ၢ်ပကြၢး ဆဲးမၤလိအီၤဒံးဧါ, တကြၢးမၤလၢၤဘၣ်ဧါန့ၣ် ပဆၢတဲာ်အီၤ ကသ့ဒ်လဲၣ်. တၢ်မၤလိတခါအံၤ ကပာ်ဖျါထီၣ်န့ၢ်ပှၤ တၢ်သံကွၢ်တဖၣ်အံၤ အတၢ်စံးဆၢလီၤ.
^ လံာ်အဆၢ. 18 ကွၢ်တၢ်ဂီၤမူလၢအမ့ၢ် ပာ်ပတုာ် တၢ်မၤလိလံာ်စီဆှံဒီး ပှၤမၤလိလံာ်စီဆှံဖိလၢ တလဲၤထီၣ်လဲၤထီတဖၣ် လၢ JW တၢ်ဂီၤမူ အပူၤတက့ၢ်.
