ဃုတၢ်ထူးတၢ်တီၤလၢ အကဲဘျုးနီၢ်နီၢ်တက့ၢ်
“ဒ်သိးသုကမၤန့ၢ်တံၤသကိးအဂီၢ်, သူဟီၣ်ခိၣ်အတၢ်ထူးတၢ်တီၤ” တက့ၢ်.—လူၤကၣ် ၁၆:၉, ခ့ခါစှီၤကျိာ်.
၁, ၂. မုၢ်မဆါတနံၤအံၤ ဘၣ်မနုၤအဃိ ပှၤဖှီၣ်ဖိယာ်ဖိအိၣ်ဒံးဝဲလဲၣ်.
မုၢ်မဆါတနံၤအံၤ မုၢ်ကျိၤဝဲၤကွာ် (စီးပွားရေး) အတၢ်ရဲၣ်တၢ်ကျဲၤတဖၣ် မၤဘၣ်ဒိပှၤအါဂၤလီၤ. အဒိ, ပှၤသးစၢ်တနီၤနီၤန့ၣ်အဝဲသ့ၣ် ဃုဘၣ်တၢ်မၤကီဒိၣ်မးလီၤ. လၢတၢ်န့ၣ်အဃိ ပှၤတနီၤနီၤ တူၢ်ဆါအသးဒ်သိး ကလဲၤမၤတၢ်လၢ ထံကီၢ်လၢအလဲၤထီၣ်လဲၤထီန့ၣ်လီၤ. ဒီးလၢထံကီၢ်လၢ အလဲၤထီၣ်လဲၤထီတဖၣ်အပူၤဒၣ်လဲာ် ပှၤဖှီၣ်ဖိယာ်ဖိအိၣ်ဝဲအါမးလီၤ. လၢတၢ်လီၢ်ကိးပူၤဒဲးန့ၣ် ပှၤလၢအကဲဒိၣ်တဖၣ် ကဲဒိၣ်ထီၣ်ဝဲဒံးယံာ်ဒံးဒိၣ်ထီၣ် ဘၣ်ဆၣ် မ့မ့ၢ်ပှၤဖှီၣ်ဖိတဖၣ်န့ၣ် အဝဲသ့ၣ်ဖှီၣ်လီၤဝဲ ဒံးယံာ်ဒံးနးထီၣ်လီၤ. တၢ်ကစီၣ်တခါ ပာ်ဖျါထီၣ်ဝဲလၢ ဟီၣ်ခိၣ်ချၢန့ၣ် ပှၤကဲဒိၣ်စှၤဂၤ မ့ၢ်ပာ်ဖှိၣ်အတၢ်ထူးတၢ်တီၤန့ၣ် အတၢ်ကအိၣ်အါန့ၢ်ဒံး ကယဲၢ်ပှၤအိၣ်လၢ ဟီၣ်ခိၣ်ချၢတဖၣ် အတၢ်ထူးတၢ်တီၤန့ၣ်လီၤ. ဖဲအံၤပသ့ၣ်ညါဘၣ်လၢ ပှၤတနီၤနီၤအတၢ်ထူးတၢ်တီၤန့ၣ် မ့ၢ်သူဝဲတုၤလီၤလၢ အဖိစိၤလံၤစိၤဒၣ်လဲာ် သူဝဲတလၢာ်ဘၣ်. မ့မ့ၢ်ပှၤအကကွဲၢ်လၢ အကထိတဖၣ်န့ၣ် အဝဲသ့ၣ်ဖှီၣ်ယာ်ဝဲ ဒိၣ်မးလီၤ. မ့ၢ်လၢ ယ့ၣ်ၡူးသ့ၣ်ညါပာ်ဝဲတၢ်ဂ့ၢ်အံၤအဃိ အဝဲစံးဝဲလၢ– “ပှၤဖှီၣ်ဖိယာ်ဖိတဖၣ်န့ၣ်, အိၣ်ဒီးသုတဘိယူၢ်ဃီ” လီၤ. (မၢ်ကူး ၁၄:၇) ဘၣ်မနုၤအဃိ တၢ်အိၣ်သးဒ်အံၤ ကဲထီၣ်ဝဲလဲၣ်.
၂ ယ့ၣ်ၡူးသ့ၣ်ညါဝဲလၢထဲဒၣ် ယဟိဝၤယွၤအဘီအမုၢ်တခါဧိၤ မၤလီၤမၢ်ကွံာ်ဝဲ တၢ်ကီတၢ်ခဲလၢ အဟဲအိၣ်ထီၣ်ခီဖျိလၢ မုၢ်ကျိၤဝဲၤကွာ်အတၢ်ရဲၣ်တၢ်ကျဲၤအဃိန့ၣ်လီၤ. လံာ်စီဆှံပာ်ဖျါဝဲလၢ မုၣ်ကီၤလံၢ်န့ၣ်သူဝဲ “ပှၤကၤတၢ်ဖိ” လၢအမ့ၢ် မုၢ်ကျိၤဝဲၤကွာ် အတၢ်ရဲၣ်တၢ်ကျဲၤ, တကးဒံးဘၣ် သူစ့ၢ်ကီးဝဲထံဂ့ၢ်ကီၢ်ဂ့ၢ် ဒီးတၢ်ဘူၣ်တၢ်ဘါတဖၣ်န့ၣ်လီၤ. (လီၣ်ဖျါ ၁၈:၃) ယွၤအခ့အပှၤတဖၣ် တမၤဘၣ်ထွဲလိာ်အသးဒီး ထံဂ့ၢ်ကီၢ်ဂ့ၢ်ဒီး တၢ်ဘူၣ်တၢ်ဘါလၢအကမၣ်နီတစဲးဘၣ်. ဘၣ်ဆၣ် ယွၤအခ့အပှၤအါတက့ၢ်န့ၣ် ကဘၣ်မၤဘၣ်ထွဲလိာ်အသးဒီး မုၢ်ကျိၤဝဲၤကွာ်တၢ်ရဲၣ်တၢ်ကျဲၤ တစဲးလီၤ.
၃. ပကမၤလိသကိး တၢ်သံကွၢ်မနုၤတဖၣ်လဲၣ်.
၃ ဒ်ပမ့ၢ်ခရံာ်ဖိတဖၣ်အသိး ပဘၣ်သံကွၢ်လီၤပသးလၢ ဘၣ်ဃးဒီး တၢ်ဃုဟီၣ်ခိၣ်တၢ်ထူးတၢ်တီၤန့ၣ် ပတၢ်ပာ်သူၣ်ပာ်သးအိၣ်ဒ်လဲၣ်. ဒ်သိးပကသ့ၣ်ညါ ပတၢ်ပာ်သူၣ်ပာ်သးအဂီၢ် ပသံကွၢ်လီၤပသးဒ်အံၤ သ့ဝဲလီၤ– ‘ဖဲယသူယတၢ်ထူးတၢ်တီၤအခါ ယပာ်ဖျါထီၣ်လၢ ယတီဒီးယွၤကသ့ဒ်လဲၣ်. ဒ်သိးယသုတမၤဘၣ်ထွဲလိာ်ယသးဒီး မုၢ်ကျိၤဝဲၤကွာ်အတၢ်ရဲၣ်တၢ်ကျဲၤအါအါတဂ့ၤအဂီၢ် ယကဘၣ်မၤဒ်လဲၣ်. မုၢ်မဆါတနံၤအံၤ ယွၤအခ့အပှၤတဖၣ် အိၣ်ဒီးတၢ်နာ်ကစၢ်ယွၤ လၢအသးဒီဖျၢၣ်န့ၣ် တၢ်လဲၤခီဖျိသ့ၣ်တဖၣ် ပာ်ဖျါထီၣ်ဝဲဒ်လဲၣ်.’
တၢ်အဒိလၢဘၣ်ဃးဒီး ပှၤကွၢ်တၢ်ဖိတၢ်လံၤ လၢအတတီတဂၤအဂ့ၢ်
၄, ၅. (က) ယ့ၣ်ၡူးဟ့ၣ်တၢ်အဒိလၢ ဘၣ်ဃးဒီးပှၤကွၢ်တၢ်ဖိတၢ်လံၤတဂၤန့ၣ် တၢ်ကဲထီၣ်အသးဒီးအီၤဒ်လဲၣ်. (ခ) ယ့ၣ်ၡူးမၢ အပျဲၢ်အဘီၣ်သ့ၣ်တဖၣ် မၤတၢ်မနုၤလဲၣ်.
၄ ဖး လူၤကၣ် ၁၆:၁-၉ တက့ၢ်. ယ့ၣ်ၡူးဟ့ၣ်တၢ်အဒိလၢ ဘၣ်ဃးဒီး ပှၤကွၢ်တၢ်ဖိတၢ်လံၤလၢ အတတီတဂၤန့ၣ် ကဲထီၣ်တၢ်အဒိအတဲာ်လၢ ပဂီၢ်ဒ်လဲၣ်. ပှၤကွၢ်တၢ်ဖိတၢ်လံၤတဂၤအံၤ ပှၤပာ်ဒ့ၣ်ပာ်ကမၣ်အီၤ လၢအဝဲမၤလၢာ်ဂီၤ အတၢ်မၤကစၢ်အတၢ်ထူးတၢ်တီၤလီၤ. လၢတၢ်န့ၣ်အဃိ အတၢ်မၤကစၢ်နီဟးထီၣ်ကွံာ်အီၤလၢ တၢ်မၤလီၢ်န့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဘၣ်ဆၣ် ပှၤကွၢ်တၢ်ဖိတၢ်လံၤတဂၤအံၤ တချုးလၢ အဝဲဟးထီၣ်ဒံးဘၣ်န့ၣ် သူဝဲ “အတၢ်ကူၣ်တၢ်ဆး” ဒ်သိးကဒီတံၤဒီသကိးဒီးပှၤအဂၤအဂီၢ်လီၤ. ခီဖျိအဝဲမၤဝဲဒ်န့ၣ်အဃိ ဖဲအဝဲဟးထီၣ် တၢ်မၤမ့ၢ်ဝံၤအလီၢ်ခံ ပှၤလၢကမၤစၢၤအီၤအိၣ်ဝဲလီၤ. ယ့ၣ်ၡူးသူဝဲတၢ်အဒိအံၤန့ၣ် တမ့ၢ်လၢအဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်လၢ ကမၤတၢ်တတီတလိၤဒ်သိး ကလုၢ်အီၣ်လုၢ်အီအသးသမူအဂီၢ်န့ၣ်ဘၣ်. လၢတၢ်န့ၣ်အလီၢ် အဝဲသူဝဲတၢ်အဒိအံၤ ဒ်သိးကသိၣ်လိအပျဲၢ်အဘီၣ်သ့ၣ်တဖၣ် တၢ်ဂ့ၢ်လၢအရ့ဒိၣ်တခါလီၤ.
၅ ဟီၣ်ခိၣ်အံၤပှဲၤဝဲဒီး တၢ်တတီတလိၤအဃိ ဒ်ပှၤကွၢ်တၢ်ဖိတၢ်လံၤတဂၤအံၤ ကွၢ်ဆၢၣ်မဲာ်ဘၣ်တၢ်ကီတၢ်ခဲအသိး အပျဲၢ်အဘီၣ်တဖၣ်စ့ၢ်ကီး ကလုၢ်အီၣ်လုၢ်အီအသးသမူအဂီၢ် ကကီခဲဝဲန့ၣ် ယ့ၣ်ၡူးသ့ၣ်ညါဝဲလီၤ. လၢတၢ်န့ၣ်အဃိ ယ့ၣ်ၡူးတဲဘၣ်အပျဲၢ်အဘီၣ်သ့ၣ်တဖၣ်လၢ– “စုလီၢ်တတီခီၣ်ခိၣ်တလိၤဘၣ်န့ၣ်, ဒုးကဲထီၣ်အီၤလၢ သုတံၤသုသကိးတက့ၢ်.” တၢ်ကတိၤအံၤ အဲၣ်ဒိးဟ့ၣ်သဆၣ်ထီၣ်ပှၤလၢ ပကသူဟီၣ်ခိၣ်အတၢ်ထူးတၢ်တီၤ ဒ်သိးပကကဲထီၣ် ယဟိဝၤယွၤဒီး ယ့ၣ်ၡူး အတံၤသကိးန့ၣ်လီၤ. ဘၣ်မနုၤအဃိ အဝဲတဲဝဲဒ်န့ၣ်လဲၣ်. မ့ၢ်လၢဖဲတၢ်ထူးတၢ်တီၤတဖၣ် လီၤမၢ်ကွံာ်ဝဲအခါ ယဟိဝၤယွၤဒီး ယ့ၣ်ၡူး “ကတူၢ်လိာ်ပှၤဆူ ဟံၣ်လီၤထူလီၤယိာ်တဖၣ်အပူၤ” လီၤ. ပဟံးန့ၢ်တၢ်မၤလိလၢ ယ့ၣ်ၡူး အတၢ်သိၣ်လိအံၤကသ့ဒ်လဲၣ်.
၆. မုၢ်မဆါတနံၤအံၤ မုၢ်ကျိၤဝဲၤကွာ်အတၢ်ရဲၣ်တၢ်ကျဲၤတဖၣ် တပၣ်ဃုာ်လၢ ယွၤအတၢ်တိာ်ပာ်အကျါဘၣ်န့ၣ် ပသ့ၣ်ညါဘၣ်ဒ်လဲၣ်.
၆ ဘၣ်မနုၤအဃိ ယ့ၣ်ၡူးကိးဝဲ တၢ်ထူးတၢ်တီၤတဖၣ်လၢ “စုလီၢ်တတီခီၣ်ခိၣ်တလိၤ” လဲၣ်န့ၣ်အဝဲတတဲဖျါထီၣ်ဝဲဘၣ်. ဘၣ်ဆၣ် လံာ်စီဆှံပာ်ဖျါထီၣ်ဝဲလၢ တၢ်ဃုတၢ်ထူးတၢ်တီၤအါအါဂီၢ်ဂီၢ်န့ၣ် တပၣ်ဃုာ်လၢ ယွၤအတၢ်တိာ်ပာ်အကျါဘၣ်. အဒိ, လၢဧ့ၤဒ့ၣ်တၤသၣ်အလီၢ်ပူၤန့ၣ် ယဟိဝၤယွၤဟ့ၣ် နီၢ်အံၣ်အုဒီး စီၤအၤဒၣ် တၢ်လၢအဝဲသ့ၣ် လိၣ်ဘၣ်ဝဲတဖၣ် လၢလၢပှဲၤပှဲၤလီၤ. (၁ မိၤၡ့ ၂:၁၅, ၁၆) ဒီးလၢခံ ဖဲကစၢ်ယွၤဒုးလီၤ သးစီဆှံလၢ ပှၤလၢဘၣ်တၢ်ဒိးဖှူအီၤတဖၣ်အလိၤအခါ အဝဲသ့ၣ် “အိၣ်ဒီးအသူၣ်တဖျၢၣ်ဃီအသးတဖျၢၣ်ဃီ, ဒီးတစံးဘၣ်လၢအစုလီၢ်အခီၣ်ခိၣ်မ့ၢ် အတၢ်ဒၣ်ဝဲနီတဂၤဘၣ်. မ့မ့ၢ်အတၢ်ခဲလၢာ်န့ၣ် ပာ်ဃုာ်ဝဲတပူၤဃီလီၤ.” (မၤတၢ် ၄:၃၂) ဝံယၡါယၤတဲဆိပာ်ဝဲလၢ မုၢ်ကအိၣ်ဝဲတနံၤ ပှၤဟီၣ်ခိၣ်ဖိတဖၣ် ကအိၣ်ဘၣ်မုာ်မုာ်ခုၣ်ခုၣ် ဒီးတၢ်လၢအလိၣ်ဘၣ်ဝဲတဖၣ်န့ၣ် ကဒိးန့ၢ်ဘၣ်ဝဲလၢလၢလီၢ်လီၢ်လီၤ. (ယၡါယၤ ၂၅:၆-၉; ၆၅:၂၁, ၂၂) ဘၣ်ဆၣ်တချုးလၢ မုၢ်နံၤအဝဲန့ၣ်ဟဲတုၤဒံးဘၣ်န့ၣ် ယ့ၣ်ၡူးအပျဲၢ်အဘီၣ်သ့ၣ်တဖၣ် လိၣ်ဘၣ်ဝဲ “တၢ်ကူၣ်သ့” ဒ်သိးကသူဝဲဟီၣ်ခိၣ် အတၢ်ထူးတၢ်တီၤလၢ ကလုၢ်အီၣ်လုၢ်အီအသးသမူအဂီၢ်လီၤ. ဒီးတကတီၢ်ဃီန့ၣ် အဝဲသ့ၣ်ကဘၣ်ဂုာ်ကျဲးစၢးမၤ တၢ်ဘၣ်ယဟိဝၤယွၤအသးစ့ၢ်ကီးလီၤ.
သူဟီၣ်ခိၣ်တၢ်ထူးတၢ်တီၤ လၢတၢ်ကူၣ်သ့တက့ၢ်
၇. လၢ လူၤကၣ် ၁၆:၁၀-၁၃ အပူၤ ယ့ၣ်ၡူးဟ့ၣ်ကူၣ်ပှၤဒ်လဲၣ်.
၇ ဖး လူၤကၣ် ၁၆:၁၀-၁၃ တက့ၢ်. ပှၤကွၢ်တၢ်ဖိတၢ်လံၤလၢ ယ့ၣ်ၡူးဟ့ၣ်တၢ်အဒိတဂၤန့ၣ် အဝဲဒီတံၤဒီသကိးဒီးပှၤဂၤ ဒ်သိးကကဲဘျုးလၢ အနီၢ်ကစၢ်အဂီၢ်လီၤ. ဘၣ်ဆၣ် ယ့ၣ်ၡူးအဲၣ်ဒိးလၢ အပျဲၢ်အဘီၣ်သ့ၣ်တဖၣ် ကဒီတံၤဒီသကိးဒီးအီၤ ဒီးယဟိဝၤယွၤန့ၣ် တမ့ၢ်ထဲလၢအဝဲသ့ၣ် အနီၢ်ကစၢ်အဘျုးအဂီၢ်ဘၣ်. အဝဲအဲၣ်ဒိးလၢ ပကနၢ်ပၢၢ်လၢ ဒ်သိးပကပာ်ဖျါထီၣ်လၢ ပတီဒီးကစၢ်ယွၤအဂီၢ် ပကဘၣ်သူ ပတၢ်ထူးတၢ်တီၤတဖၣ် ဒ်လဲၣ်န့ၣ်လီၤ. ပမၤအီၤကသ့လၢကျဲဒ်လဲၣ်.
၈, ၉. ဟ့ၣ်တၢ်အဒိဘၣ်ဃးဒီး ပှၤလၢအသူဟီၣ်ခိၣ် အတၢ်ထူးတၢ်တီၤ ဒီးပာ်ဖျါထီၣ်တၢ်သးတီန့ၣ်တက့ၢ်.
၈ ယ့ၣ်ၡူးတဲဝဲဘၣ်ဃး ဘီမုၢ်တၢ်သးခုကစီၣ်ကရၤလီၤအသးလၢ ဟီၣ်ခိၣ်ဒီဘ့ၣ်အဂ့ၢ်လီၤ. ကျဲတဘိလၢ ပပာ်ဖျါထီၣ်ပတၢ်သးတီဒီး ကစၢ်ယွၤန့ၣ် မ့ၢ်ဝဲပသူပတၢ်ထူးတၢ်တီၤ လၢပကဟ့ၣ်တၢ်မၤဘူၣ်လၢ ဟီၣ်ခိၣ်ဒီဘ့ၣ် တၢ်စံၣ်တဲၤတဲလီၤတၢ်မၤအဂီၢ်လီၤ. (မးသဲ ၂၄:၁၄) လၢကီၢ်အ့ဒယါန့ၣ် ဖိသၣ်ပိာ်မုၣ်ဖိတဂၤ စူးဃာ်ဝဲ ကိၣ်ပှ့ၤလၢပှၤဟ့ၣ်အီၤတဖၣ် ဒီးအဝဲတပှ့ၤတၢ်လိၣ်ကွဲလၢၤဘၣ်. လၢခံ ဖဲအစူးဘူပှဲၤအခါ အဝဲဟ့ၣ်လီၤဝဲတၢ်မၤဘူၣ်လၢ တၢ်စံၣ်တဲၤတဲလီၤတၢ်မၤအဂီၢ်လီၤ. မ့မ့ၢ် ဒီပုၢ်ဝဲၢ်ခွါလၢအဂၤတဂၤန့ၣ် အိၣ်ဒီးဃီၤကျီးလီၤ. အဝဲဟ့ၣ်မၤဘူၣ်လီၤဝဲ အဃီၤသၣ်တနီၤဆူ မလၢၤယါလၢၢ်(မ်) ပှၤကွဲးကျိာ်ထံတၢ်အရူလီၤ. မ့ၢ်လၢပှၤကွဲးကျိာ်ထံတၢ်အရူ လိၣ်ဘၣ်ဃီၤသၣ်အဃိ အဝဲတူၢ်ဘၣ်ဝဲလၢ အမ့ၢ်ဟ့ၣ်လီၤ ဃီၤသၣ်န့ၣ်အဘျုးကအိၣ်ဒိၣ်န့ၢ်ဒံး ဟ့ၣ်လီၤဝဲစ့န့ၣ်လီၤ. တကးဒံးဘၣ် ဒီပုၢ်ဝဲၢ်လၢ ကြံး(စ်) တဖၣ်စ့ၢ်ကီး အဝဲသ့ၣ်ဟ့ၣ်လီၤမၤဘူၣ်ဝဲ သ့ၣ်စၤယံးသိ, တၢ်နုၢ်ထံလီၤသကၤ (cheese) ဒီးတၢ်အီၣ်အဂၤတဖၣ်လၢ ဘ့ၤသ့လးန့ၣ်လီၤ. အဝဲသ့ၣ်အတၢ်မၤအံၤ မ့ၢ်တၢ်မၤလၢအပှဲၤဒီး “တၢ်ကူၣ်သ့” လီၤ.
၉ ဒီပုၢ်ဝဲၢ်လၢ ကီၢ်စြံၣ်လၣ်ကၣ် တဂၤ အဝဲပျဲဝဲလၢ ပှၤကမၤတၢ်အိၣ်ဖှိၣ်ရိဖှိၣ်ဒီး တၢ်အိၣ်ဖှိၣ်ဖးဒိၣ်လၢ အတၢ်လီၢ်တၢ်ကျဲလီၤ. ဒီးဟ့ၣ်ဝဲအခွဲးလၢ ဒီပုၢ်ဝဲၢ်လၢအမၤယွၤအတၢ်မၤလၢ ဆၢကတီၢ်လၢပှဲၤတဖၣ် ကအိၣ်ဖဲန့ၣ်စ့ၢ်ကီးလီၤ. မ့ၢ်လၢဒီပုၢ်ဝဲၢ်အံၤ သးအိၣ်မၤစၢၤတၢ်ဒ်အံၤအဃိ ကဲဘျုးဝဲလၢ ဒီပုၢ်ဝဲၢ်လၢအစ့တအိၣ်အါအါဘၣ်တဖၣ်အဂီၢ်လီၤ. ဒီးတၢ်လီၢ်လၢ တၢ်စံၣ်တဲၤတဲလီၤဘၣ်တၢ်တြီဃာ်အီၤန့ၣ် ဒီပုၢ်ဝဲၢ်တဖၣ် သူဝဲအဟံၣ်လၢ ပှၤကမၤတၢ်အိၣ်ဖှိၣ်ရိဖှိၣ်အဂီၢ်လီၤ. ဒီးအဝဲသ့ၣ် တလိၣ်ငါ တၢ်လီၢ်အဂၤဘၣ်အဃိ ကဲထီၣ်တၢ်မၤစၢၤလၢ ပှၤလဲၤလၢညါ ဒီးပှၤလၢအစ့တအိၣ်ဘၣ်တဖၣ်ကထီၣ်ဘၣ် တၢ်အိၣ်ဖှိၣ်ရိဖှိၣ်အဂီၢ်လီၤ.
ယွၤအခ့အပှၤတဖၣ် သူဝဲအတၢ်ထူးတၢ်တီၤတဖၣ် ဒ်သိးကမၤစၢၤပှၤဂၤအဂီၢ်
၁၀. ပမ့ၢ်ဟ့ၣ်တၢ်လၢ တၢ်သူၣ်အိၣ်သးအိၣ်န့ၣ် ပကဒိးန့ၢ်ဘၣ်အဘျုးဒ်လဲၣ်.
၁၀ တၢ်အဒိတဖၣ်အံၤ ပာ်ဖျါထီၣ်ဝဲလၢယွၤအခ့အပှၤတဖၣ်မ့ၢ် “ပှၤလၢအမၤတီလၢ တၢ်အစှၤကတၢၢ်” အပူၤဒၣ်လဲာ်န့ၣ်လီၤ. (လူၤကၣ် ၁၆:၁၀) အဝဲသ့ၣ်သူဝဲအတၢ်ထူးတၢ်တီၤတဖၣ် ဒ်သိးကမၤစၢၤပှၤဂၤအဂီၢ်လီၤ. ယဟိဝၤယွၤအတံၤသကိးတဖၣ် မၤစၢၤဘၣ်ပှၤဂၤအဃိ အဝဲသ့ၣ်တူၢ်ဘၣ်ဝဲဒ်လဲၣ်. အဝဲသ့ၣ်သ့ၣ်ညါဝဲလၢ မ့ၢ်သးအိၣ်ဟ့ၣ်တၢ်န့ၣ် ကဒိးန့ၢ်ဘၣ် တၢ်ထူးတၢ်တီၤ လၢအကဲဘျုး “နီၢ်နီၢ်” လၢမူခိၣ်အဃိ သးခုဝဲဒိၣ်မးလီၤ. (လူၤကၣ် ၁၆:၁၁) ဒီပုၢ်ဝဲၢ်မုၣ်တဂၤ ဟ့ၣ်မၤဘူၣ်လီၤဝဲ စ့လၢ ကမၤစၢၤ ဘီမုၢ်တၢ်မၤအဂီၢ်ထီဘိလီၤ. အဝဲတဲဝဲ မ့ၢ်လၢ အသးအိၣ်ဟ့ၣ်တၢ်အဃိ တနံၣ်ဘၣ်တနံၣ်န့ၣ် တၢ်လၢအလီၤကမၢကမၣ် ဟဲကဲထီၣ်အသးဒီးအီၤအါမးလီၤ. အဝဲတဲဝဲ– “ယတူၢ်ဘၣ်လၢ ဒ်ယတၢ်သးအိၣ်ဟ့ၣ်တၢ် အါထီၣ်ဝဲအသိး ယတၢ်ထံၣ်လၢအဂ့ၤလၢပှၤဂၤ အဖီခိၣ်စ့ၢ်ကီး ဒံးအါထီၣ်ဝဲလီၤ. ဒီးမ့ၢ်လၢ ယသးအိၣ်ဟ့ၣ်တၢ်အဃိ ယပျၢ်ပှၤဂၤအတၢ်ကမၣ် ညီထီၣ်, ယတၢ်သးစူၤလၢ ပှၤဂၤအဖီခိၣ်အါထီၣ်, ယတူၢ်တၢ်သးဟးဂီၤန့ၢ်ထီၣ် ဒီးယတူၢ်လိာ်တၢ်ဟ့ၣ်ကူၣ်စ့ၢ်ကီး ညီထီၣ်ဝဲလီၤ.” ပှၤအါဂၤ တူၢ်ဘၣ်ဝဲလၢ တၢ်ဟ့ၣ်မၤစၢၤပှၤဂၤန့ၣ် ကဲဘျုးလၢ အဝဲသ့ၣ်အနီၢ်ကစၢ်အဂီၢ် စ့ၢ်ကီးလီၤ. —စံးထီၣ်ပတြၢၤ ၁၁၂:၅; ကတိၤဒိ ၂၂:၉.
၁၁. (က) ပတၢ်သးအိၣ်ဟ့ၣ်တၢ်န့ၣ် ပာ်ဖျါထီၣ်လၢ ပအိၣ်ဒီး “တၢ်ကူၣ်သ့” ဒ်လဲၣ်. (ခ) မုၢ်မဆါတနံၤအံၤ လၢယွၤအခ့အပှၤတဖၣ်အကျါ တၢ်ကဲထီၣ်အသးဒီး အဝဲသ့ၣ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၁ ပမ့ၢ်သူပတၢ်ထူးတၢ်တီၤတဖၣ် လၢကမၤစၢၤ ပှၤဂၤလၢကစံၣ်တဲၤတဲလီၤတၢ် အဂီၢ်န့ၣ် မ့ၢ်ဒၣ်ပပာ်ဖျါထီၣ်လၢပအိၣ်ဒီး “တၢ်ကူၣ်သ့” လီၤ. ပမၤကစၢ်ယွၤအတၢ်မၤလၢ ဆၢကတီၢ်လၢပှဲၤ မ့တမ့ၢ် ပလဲၤသုးပသးလၢ တၢ်လီၢ်လၢ ပှၤလိၣ်ဘၣ်ပှၤစံၣ်တဲၤတဲလီၤတၢ်ဖိတဖၣ် မ့ၢ်တသ့ဘၣ်သနာ်က့ ပမၤစၢၤပှၤဂၤသ့ဒံးဝဲလီၤ. (ကတိၤဒိ ၁၉:၁၇) အဒိ, တၢ်မၤဘူၣ်လၢပဟ့ၣ်လီၤတဖၣ် ကဲထီၣ်တၢ်မၤစၢၤလၢ တၢ်ထုးထီၣ်ရၤလီၤလံာ်လဲၢ်အဂီၢ် တကးဒံးဘၣ် ကဲဘျုးစ့ၢ်ကီးလၢ ပှၤလၢအအိၣ်လၢ ထံကီၢ်လၢတၢ်လဲၤထီၣ်လဲၤထီတအိၣ်ဘၣ်တဖၣ် ကဒိးန့ၢ်ဘၣ် လံာ်လဲၢ်အဂီၢ်လီၤ. လၢထံကီၢ်ဒ်သိးဒီး ခီကိၣ်, မၤဒၤကါစကၤ ဒီးရဝၣ်ဒၣ်န့ၣ် လံာ်စီဆှံတဖၣ်အပှ့ၤဒိၣ်ဒိၣ်မးလီၤ. ဒ်သိးပှၤပှ့ၤလံာ်စီဆှံတဘ့ၣ်ကန့ၢ်အဂီၢ် အဝဲသ့ၣ်ကဘၣ်မၤတၢ်တနွံ မ့တမ့ၢ် တလါညါလီၤ. လၢညါန့ၣ် ဒီပုၢ်ဝဲၢ်သ့ၣ်တဖၣ် ကဘၣ်ဆၢတဲာ်ဝဲလၢ မ့ၢ်အဝဲသ့ၣ်ကပှ့ၤတၢ်အီၣ်တၢ်အီလၢ အဟံၣ်ဖိဃီဖိအဂီၢ်ဧါ မ့တမ့ၢ် ကပှ့ၤလံာ်စီဆှံဧါန့ၣ်လီၤ. ဘၣ်ဆၣ်ခဲအံၤ မ့ၢ်လၢပှၤအါဂၤ ဟ့ၣ်တၢ်မၤဘူၣ်အဃိ “ပှၤလၢအတၢ်အိၣ်အါန့ၣ်, အတၢ်တအိၣ်ဘျဲၣ်ဘၣ်, ဒီးပှၤလၢ အတၢ်အိၣ်စှၤန့ၣ်, တစှၤဘၣ်ဝဲဘၣ်.” လၢတၢ်န့ၣ်အဃိ ယဟိဝၤယွၤအတၢ်ကရၢကရိ ကွဲးကျိာ်ထံ ဒီးထုးထီၣ်ဝဲ လံာ်စီဆှံန့ၢ်ဝဲ ဒီးနီၤလီၤကလီဝဲအဃိ ယဟိဝၤပှၤအုၣ်အသး တဂၤစုာ်စုာ် တကးဒံးဘၣ် ပှၤမၤလိလံာ်စီဆှံဖိတဖၣ်စ့ၢ်ကီး ဒိးန့ၢ်ဘၣ်ဝဲလီၤ. (ဖး ၂ ကရံၣ်သူး ၈:၁၃-၁၅ တက့ၢ်.) လၢတၢ်န့ၣ်အဃိ ပှၤလၢအဟ့ၣ်တၢ်မ့ၢ်ဂ့ၤ ပှၤလၢအဒိးန့ၢ်ဘၣ်တၢ်တဖၣ်မ့ၢ်ဂ့ၤ ကဲထီၣ်ယဟိဝၤယွၤအတံၤသကိးသ့ဝဲလီၤ.
ဒ်သိးပသုတမၤဘၣ်ဃးပသးဒီး မုၢ်ကျိၤဝဲၤကွာ် အတၢ်ရဲၣ်တၢ်ကျဲၤတဖၣ် အါအါတဂ့ၤအဂီၢ် ပကဘၣ်မၤဒ်လဲၣ်
၁၂. စီၤအၤဘြၤဟၣ် အိၣ်ဒီးတၢ်နာ်ကစၢ်ယွၤန့ၣ် ပာ်ဖျါထီၣ်ဝဲလၢကျဲဒ်လဲၣ်.
၁၂ လၢပကဃု ဟီၣ်ခိၣ်အတၢ်ထူးတၢ်တီၤအါအါအလီၢ် ပမ့ၢ်ဃုတၢ်ထူးတၢ်တီၤလၢ အကဲဘျုး “နီၢ်နီၢ်” န့ၣ် ပကဲထီၣ် ယဟိဝၤယွၤအတံၤသကိးသ့ဝဲလီၤ. ပှၤတီပှၤလိၤစီၤအၤဘြၤဟၣ် မၤဝဲဒ်န့ၣ်လီၤ. အဝဲဒိကနၣ် ယဟိဝၤယွၤအကလုၢ်ဒီး အဲၣ်ဒိးကဲဝဲ ယဟိဝၤယွၤအတံၤသကိးအဃိ အဝဲဟးထီၣ်ကွံာ်လၢ ဝ့ၢ်အထူးအတီၤအပူၤဒီး အိၣ်ဝဲဆိးဝဲလၢ ဒဲပူၤန့ၣ်လီၤ. (ဧ့ၤဘြံၤ ၁၁:၈-၁၀) ထီဘိန့ၣ်အဝဲဒိးသန့ၤအသးလၢ ယဟိဝၤယွၤလီၤ. တဒိးသန့ၤအသးလၢ တၢ်ထူးတၢ်တီၤတဖၣ်ဘၣ်. (၁ မိၤၡ့ ၁၄:၂၂, ၂၃) ယ့ၣ်ၡူးဟ့ၣ်သဆၣ်ထီၣ် ပှၤအဂၤတဖၣ်လၢ ကအိၣ်ဒီးတၢ်နာ်ဒ် စီၤအၤဘြၤဟၣ်အသိးလီၤ. ဘၣ်တဘျီအဝဲတဲဘၣ် ပှၤသးစၢ်လၢ အထူးအတီၤတဂၤဒ်အံၤ– “နသးမ့ၢ်အိၣ်လၢ နကလၢထီၣ်ပှဲၤထီၣ်ဒီး, လဲၤဆါလီၤကွံာ်နစုလီၢ်နခီၣ်ခိၣ်, ဒီးဟ့ၣ်တၢ်လၢပှၤဖှီၣ်ဖိယာ်ဖိတက့ၢ်. ဒီးနကအိၣ်ဒီးနတၢ်လုၢ်ဒိၣ်ပှ့ၤဒိၣ်လၢ မူခိၣ်လီၤ. ဒီးဟဲပိာ်ယခံတက့ၢ်.” (မးသဲ ၁၉:၂၁) ပှၤသးစၢ်တဂၤအံၤ တအိၣ်ဒီးတၢ်နာ်ဒ် စီၤအၤဘြၤဟၣ်အသိးဘၣ်. ဘၣ်ဆၣ် ပှၤလၢအနာ် ယွၤန့ၣ်အိၣ်ဒံးဝဲလီၤ.
၁၃. (က) စီၤပီလူးဟ့ၣ်ကူၣ် ဝဲစီၤတံၤမသ့းဒ်လဲၣ်. (ခ) ပမၤထွဲ စီၤပီလူးအတၢ်ဟ့ၣ်ကူၣ်ကသ့ဒ်လဲၣ်.
၁၃ စီၤတံၤမသ့းန့ၣ် မ့ၢ်ပှၤတဂၤလၢ အိၣ်ဒီးတၢ်နာ်စ့ၢ်ကီးလီၤ. စီၤပီလူးကိးဝဲ စီၤတံၤမသ့းလၢ “ယ့ၣ်ၡူးခရံာ်အသုးဖိလၢ အဂ့ၤတဂၤ” လီၤ. အဝဲတဲဝဲ– “ပှၤလၢအဒုးတၢ်န့ၣ်, ဒ်သိးအကမၤဘၣ်ပှၤလၢ အမၢအဒုးတၢ်တဂၤ အသးဒီး, တမၤသဘံၣ်ဘုၣ်အသးဒီး တၢ်ဖံးတၢ်မၤဘၣ်ဃးဒီး အအံၤတဃၣ်နီတဂၤဘၣ်.” (၂ တံၤမသ့း ၂:၃, ၄ ) မုၢ်မဆါတနံၤအံၤ ပှၤလၢအမၤယွၤအတၢ်မၤလၢ ဆၢကတီၢ်လၢပှဲၤ အဂၤတကကွဲၢ်ဘျဲၣ်ဃုာ်ဒီး ယ့ၣ်ၡူးအပျဲၢ်အဘီၣ်လၢအဂၤခဲလၢာ် ဂုာ်ကျဲးစၢးအိၣ်မူထွဲဝဲဒ် စီၤပီလူးအတၢ်ဟ့ၣ်ကူၣ်အသိးလီၤ. အဝဲသ့ၣ် ဘၣ်ဟးဆှဲးဝဲတၢ်လ့ပစီဒီး ဟီၣ်ခိၣ်တၢ်သူၣ်လီသးကွံတဖၣ်လီၤ. အဝဲသ့ၣ် နၢ်ပၢၢ်ဝဲလံာ်စီဆှံတၢ်ဟ့ၣ်ကူၣ်လၢအမ့ၢ်– “ပှၤလၢအလိၢ်စ့န့ၣ် ကကဲထီၣ်စ့ကစၢ်အကုၢ်လီၤ.” (ကတိၤဒိ ၂၂:၇) မုၣ်ကီၤလံၢ်အဲၣ်ဒိးဝဲလၢ ပကသူပတၢ်ဆၢကတီၢ်ဒီး ပဂံၢ်ပဘါတဖၣ်လၢ ပကဃုဟီၣ်ခိၣ် အတၢ်ထူးတၢ်တီၤအဂီၢ်လီၤ. ပှၤတနီၤနီၤန့ၣ် ဃ့လိၢ်စ့အါအါလၢ ကပှ့ၤဟံၣ်, ပှ့ၤကါ, ဃုတၢ်ကူၣ်ဘၣ်ကူၣ်သ့ မ့တမ့ၢ် လၢတၢ်တ့တၢ်ဖျီအဃိ အကမၢ်ထီၣ်ဝဲဒီဒူၣ်ညါလီၤ. ပမ့ၢ်တပလီၢ်ပသးန့ၣ် ပကမၢ်ကထီၣ်အါနံၣ်အါလါလီၤ. ဘၣ်ဆၣ် ပမ့ၢ်အိၣ်မူယိယိဖိ, မ့ၢ်တမၤထီၣ်ကမၢ်ဘၣ် ဒီးပမ့ၢ်တသူစ့အါအါဘၣ်န့ၣ် မ့ၢ်ဒၣ်ပပာ်ဖျါထီၣ်လၢ ပအိၣ်ဒီးတၢ်ကူၣ်သ့လီၤ. ဒီးပမ့ၢ်မၤဒ်န့ၣ်န့ၣ် လၢပကကဲဘၣ်ဟီၣ်ခိၣ်အတၢ်ထူးတၢ်တီၤ အကုၢ်အလီၢ် ပကမၤဘၣ်ယဟိဝၤယွၤအတၢ်မၤလၢ တၢ်သဘျ့အပူၤလီၤ.—၁ တံၤမသ့း ၆:၁၀.
၁၄. ပကဘၣ်ပာ်လီၤပသး ဂၢၢ်ဂၢၢ်ကျၢၤကျၢၤလၢ ပကမၤတၢ်မနုၤလဲၣ်. ဟ့ၣ်တၢ်အဒိတက့ၢ်.
၁၄ ဒ်သိးပအိၣ်မူယိယိဖိကသ့အဂီၢ် ပကဘၣ်ပာ် ယွၤအဘီအမုၢ်လၢ နီၣ်ဂံၢ်တၢလီၤ. ပှၤဒီမါဝၤခံဂၤ အဝဲသ့ၣ်အိၣ်ဒီးတၢ်မၤတခါလၢ အန့ၢ်စ့အါမးန့ၣ်လီၤ. ဘၣ်ဆၣ် အဝဲသ့ၣ်အဲၣ်ဒိးက့ၤမၤဝဲ ကစၢ်ယွၤအတၢ်မၤလၢ ဆၢကတီၢ်လၢပှဲၤအဃိ အဝဲသ့ၣ် ဆါကွံာ် အခီပနံာ်, ချံစဲး ဒီးအတၢ်စုလီၢ်ခီၣ်ခိၣ်လၢ အဂၤတဖၣ်န့ၣ်လီၤ. အဝဲသ့ၣ်ရဲၣ်ကျဲၤတၢ်ခဲလၢာ်ဝံၤအလီၢ်ခံ လဲၤမၤစၢၤတၢ်လၢ တၢ်သူၣ်ထီၣ်ဘှီထီၣ် ယဟိဝၤပှၤအုၣ်အသး အဝဲၤလီၢ်ခိၣ်သ့ၣ်လၢ ဝီဝံး(ခ်), လၢအအိၣ်လၢ ဝ့ၢ်နူယီးန့ၣ်လီၤ. မ့ၢ်လၢအဝဲသ့ၣ် လဲၤမၤစၢၤတၢ်ဖဲန့ၣ်အဃိ ဒိးန့ၢ်ဘၣ်ဝဲ တၢ်ခွဲးတၢ်ယာ်လၢ ကမၤသကိးဘၣ်တၢ်ဒီး အမိၢ်အပၢ်ဒီး အဖိမုၣ်ဒီးအမာ် တစိၢ်တလီၢ်လီၤ. ဒီပုၢ်ဝဲၢ်မုၣ်လၢအအိၣ်လၢ ဝ့ၢ်ခိၤလိၤရါဒိၤ လၢကီၢ်အမဲရကၤ ဒီးအမ့ၢ်ပှၤလဲၤလၢညါတဂၤ အဝဲမၤ တၢ်မၤလၢ နၣ်ရံၣ်တပှဲၤဘၣ်လၢ စ့တၢး (bank) န့ၣ်လီၤ. ဒီးမ့ၢ်လၢအမၤတၢ်ဆူၣ်အဃိ အတၢ်မၤခိၣ်လီကီအီၤဒီး ကဟ့ၣ်အီၤတၢ်မၤလၢ ကဘၣ်မၤဝဲ နၣ်ရံၣ်ပှဲၤပှဲၤ ဒီးကန့ၢ်ဘၣ်လါလဲအါထီၣ်သၢစးလီၤ. ဘၣ်ဆၣ် အဝဲမ့ၢ်မၤတၢ်မၤအံၤန့ၣ် ဟ့ၣ်လီၤအသးလၢ တၢ်စံၣ်တဲၤတဲလီၤတၢ်မၤ တချုးအါအါလၢၤဘၣ်အဃိ တတူၢ်လိာ်ဝဲတၢ်မၤအံၤဘၣ်. တၢ်အဒိလၢအဘၣ်ဃးဒီး ယွၤအခ့အပှၤတဖၣ် သးအိၣ်တူၢ်ဆါအသးန့ၣ် အိၣ်ဒံးဝဲအါမးလီၤ. ပမ့ၢ်ပာ်လီၤပသး ဂၢၢ်ဂၢၢ်ကျၢၤကျၢၤလၢ ပကပာ်ယွၤအဘီအမုၢ်လၢ နီၣ်ဂံၢ်တၢန့ၣ် မ့ၢ်ဒၣ်ပပာ်ဖျါထီၣ်လၢ ပပာ်လုၢ်ပာ်ပှ့ၤ ပတၢ်ရ့လိာ်သးဒီးယွၤ ဒီးတၢ်ထူးတၢ်တီၤနီၢ်နီၢ် အါန့ၢ်ဒံး ဟီၣ်ခိၣ်တၢ်ထူးတၢ်တီၤန့ၣ်လီၤ.
ဖဲတၢ်ထူးတၢ်တီၤတဖၣ် လီၤမၢ်ကွံာ်ဝဲအခါ
၁၅. တၢ်ထူးတၢ်တီၤလၢ အမၤသးခုပှၤအဒိၣ်ကတၢၢ်န့ၣ် မ့ၢ်တၢ်မနုၤလဲၣ်.
၁၅ ပမ့ၢ်အိၣ်ဒီးတၢ်ထူးတၢ်တီၤအါအါသနာ်က့ အခီပညီတမ့ၢ်လၢ ယွၤဘၣ်သးပှၤဘၣ်. ယွၤဆိၣ်ဂ့ၤပှၤလၢအ “ထူးထီၣ်တီၤထီၣ်လၢ တၢ်မၤဂ့ၤတဖၣ်” န့ၣ်လီၤ. (ဖး ၁ တံၤမသ့း ၆:၁၇-၁၉ တက့ၢ်.) အဒိ, ဒီပုၢ်ဝဲၢ်မုၣ်လၢ အမံၤမ့ၢ် လူၤစံယၤန့ၣ် အိၣ်လၢကီၢ်အံးထလံၣ်လီၤ. အဝဲသ့ၣ်ညါဝဲလၢ ပှၤလိၣ်ဘၣ် ပှၤစံၣ်တဲၤတဲလီၤတၢ်ဖိလၢ ကီၢ်အါလဘ့နံယါန့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) လၢတၢ်န့ၣ်အဃိ ဖဲ ၁၉၉၃ နံၣ်န့ၣ် အဝဲလဲၤသုးအသးလၢ ကီၢ်အါလဘ့နံယါန့ၣ်လီၤ. အဝဲအတၢ်မၤတအိၣ်ဘၣ် ဘၣ်ဆၣ် နာ်ဝဲလၢယဟိဝၤယွၤ ကကဟုကယာ်ဒီး လုၢ်အီၣ်လုၢ်အီအီၤလီၤ. အဝဲမၤလိ အါလဘ့နံယါအကျိာ်ဒီး မၤစၢၤဘၣ်ပှၤအဂၤ ၆၀ ဘျဲၣ်လၢကဟ့ၣ်လုၢ်ထီၣ်အသးလၢ ယွၤအအိၣ်န့ၣ်လီၤ. ဘၣ်သ့ၣ်သ့ၣ် ပတၢ်စံၣ်တဲၤတဲလီၤတၢ် အဟီၣ်ကဝီၤန့ၣ် တဖီထီၣ်သၣ်ထီၣ်ဒ်သိးဒီးအီၤဘၣ်. ဘၣ်ဆၣ် ပမ့ၢ်မၤစၢၤပှၤဂၤလၢ ကျဲတဘိဂ့ၤတဘိဂ့ၤ ဒ်သိးကသ့ၣ်ညါထီၣ် ယဟိဝၤယွၤ ဒီးကဲထီၣ်အတံၤသကိးန့ၣ် ပကဒိးန့ၢ်ဘၣ်တၢ်သူၣ်မံသးမုာ်ထီဘိလီၤ.—မးသဲ ၆:၂၀.
တၢ်လၢပမၤလၢ ယဟိဝၤယွၤ ဒီးအဘီအမုၢ်အဂီၢ်န့ၣ် ကဟ့ၣ်ပှၤ တၢ်သူၣ်ခုသးခုနီၢ်နီၢ်
၁၆. (က) ဟီၣ်ခိၣ်တၢ်ပနံာ်တၢ်ကၤ အတၢ်ရဲၣ်တၢ်ကျဲၤလၢ မုၢ်မဆါတနံၤအံၤတဖၣ် တၢ်ကကဲထီၣ်အသးဒီးအီၤဒ်လဲၣ်. (ခ) လၢတၢ်န့ၣ်အဃိ ပကြၢးသူ ပတၢ်ထူးတၢ်တီၤတဖၣ်ဒ်လဲၣ်.
၁၆ ယ့ၣ်ၡူးပာ်ဖျါထီၣ်ဝဲလီၤတံၢ်လီၤဆဲးလၢ ဟီၣ်ခိၣ်တၢ်ပနံာ်တၢ်ကၤအတၢ်ရဲၣ်တၢ်ကျဲၤ လၢအမၤဘၣ်ဒိ ပှၤအဂၤတဖၣ်န့ၣ် တယံာ်ဘၣ် ကလီၤမၢ်ကွံာ်ဝဲလီၤ. လၢလံာ်စီဆှံတဆၢအံၤ အပူၤန့ၣ် ယ့ၣ်ၡူးသူဝဲ တၢ်ကတိၤလၢအမ့ၢ် ‘တုၤအလၢာ်ကွံာ်’ လီၤ. တသူဝဲတၢ်ကတိၤလၢအမ့ၢ် ‘မ့ၢ်လၢာ်ကွံာ်’ န့ၣ်ဘၣ်. (လူၤကၣ် ၁၆:၉) လၢတၢ်န့ၣ်အဃိ မုၢ်နံၤခံကတၢၢ်အဆၢကတီၢ်န့ၣ် ပထံၣ်ဘၣ်လၢ စ့တၢးတနီၤနီၤ အဝဲသ့ၣ်ဟ့ၣ်စ့တန့ၢ်လၢၤဘၣ်အဃိ ဘၣ်ပံးကွံာ်ဝဲ ဒီးလၢထံကီၢ်တနီၤနီၤန့ၣ် စံပွါယ့ (စီးပွားရေး) လီၤဝဲလီၤ. ဘၣ်ဆၣ်တယံာ်လၢၤဘၣ်န့ၣ် တၢ်အိၣ်သးကနးဒိၣ်ထီၣ်ဝဲကွ့ၢ်ကွ့ၢ်လီၤ. တကးဒံးဘၣ် ပဒိၣ်ပပှၢ်, တၢ်ဘူၣ်တၢ်ဘါလၢအကမၣ်ဒီး တၢ်ပနံာ်တၢ်ကၤ အတၢ်ရဲၣ်တၢ်ကျဲၤတဖၣ် ကဟးဂီၤကွံာ်ဝဲလီၤ. တၢ်လၢထူဒီးစ့န့ၣ် မ့ၢ်တၢ်အရ့ဒိၣ်လၢ တၢ်ပနံာ်တၢ်ကၤ အတၢ်ရဲၣ်တၢ်ကျဲၤအဂီၢ်လီၤ. ဘၣ်ဆၣ် ဝံယဃ့းစက့လးဒီး ဝံစဖါနယၤတဲဆိပာ်ဝဲလၢ မုၢ်ကအိၣ်ဝဲတနံၤ ထူဒီးစ့န့ၣ် အလုၢ်အပှ့ၤတအိၣ်လၢၤဘၣ်. (ယဃ့းစက့လး ၇:၁၉; စဖါနယၤ ၁:၁၈) အဒိ, ဖဲနသးပှၢ်ထီၣ်အခါ နသ့ၣ်ညါလီၤနသးလၢ လၢအပူၤကွံာ်န့ၣ် နကဘၣ်ဃုနီၢ်သး တၢ်ထူးတၢ်တီၤအလီၢ် နဂုာ်ကျဲးစၢးဃုလၢဟီၣ်ခိၣ်တၢ်ထူးတၢ်တီၤတဖၣ်လီၤ. ဘၣ်ဆၣ်ခဲအံၤ နသ့ၣ်ညါလၢ တၢ်ထူးတၢ်တီၤလၢ နဃုအီၤတဖၣ် အဘျုးတအိၣ်လၢၤဘၣ်အဃိ နကတူၢ်ဘၣ်ဒ်လဲၣ်. ပမ့ၢ်ပာ်ဒိၣ်ဟီၣ်ခိၣ်တၢ်ထူးတၢ်တီၤန့ၣ် ပကတူၢ်ဘၣ်ဒ်သိး ပှၤတဂၤလၢ အဃုစ့လၢအတၢ်အိၣ်မူ ဒီတကတီၢ်အပူၤ ဒီးဒိးန့ၢ်ဘၣ်စ့ဒီဒူၣ်ညါလီၤ. ဘၣ်ဆၣ် လၢခံအဝဲသ့ၣ်ညါဝဲလၢ အစ့သ့ၣ်တဖၣ်န့ၣ် မ့ၢ်အတူးခဲလၢာ်လီၤ. (ကတိၤဒိ ၁၈:၁၁) ဟီၣ်ခိၣ်အတၢ်ထူးတၢ်တီၤသ့ၣ်တဖၣ် တယံာ်လၢၤဘၣ်န့ၣ် ကလီၤမၢ်ကွံာ်ဝဲလီၤ. လၢတၢ်န့ၣ်အဃိ ဟံးန့ၢ်တၢ်ခွဲးတၢ်ယာ်လၢ နကသူတၢ်လၢအအိၣ်ဒီးနၤတဖၣ် ဒ်သိးနကကဲထီၣ်ယဟိဝၤယွၤဒီး ယ့ၣ်ၡူး အတံၤသကိးန့ၣ်တက့ၢ်. တၢ်လၢပမၤလၢ ယဟိဝၤယွၤဒီး အဘီအမုၢ်အဂီၢ်န့ၣ် ကဟ့ၣ်ပှၤတၢ်သူၣ်ခုသးခုနီၢ်နီၢ်လီၤ.
၁၇, ၁၈. ကစၢ်ယွၤအတံၤသကိးတဖၣ် ခိးကွၢ်လၢ်ဝဲတၢ်မနုၤလဲၣ်.
၁၇ ဖဲယွၤအဘီအမုၢ်ပၢတၢ်အခါ တလိၣ်လၢ ပှၤကဘၣ်ငါအိၣ်ဟံၣ် ဒီးဃ့လိၢ်စ့လၢ ပှၤဂၤအအိၣ်လၢၤဘၣ်. တၢ်အီၣ်တၢ်အီတဖၣ် ကအိၣ်လၢလၢလီၢ်လီၢ် ဒီးပတလိၣ်ပှ့ၤအီၣ်ပှ့ၤအီလၢၤဘၣ်. တကးဒံးဘၣ် ပတလိၣ်ဟ့ၣ်စ့လၢ ကသံၣ်သရၣ်ဒီး ကသံၣ်ကသီအဂီၢ်လၢၤဘၣ်. ယဟိဝၤယွၤအတံၤသကိးတဖၣ် ကအိၣ်ဘၣ်မုာ်မုာ်ခုၣ်ခုၣ်လၢ ဟီၣ်ခိၣ်ချၢန့ၣ်လီၤ. မ့မ့ၢ် ထူ, စ့ဒီး တၢ်လၢ အလုၢ်ဒိၣ်ပှ့ၤဒိၣ်လၢအဂၤတဖၣ် ပှၤကသူဝဲလၢ တၢ်မၤဃံမၤလၤအဂီၢ် တမ့ၢ်လၢ ပှၤကကဲဒိၣ်ထီၣ်အဂီၢ်ဘၣ်. တကးဒံးဘၣ် ဒ်သိးပှၤကသူၣ်ထီၣ်ဟံၣ်အဂီၢ် သ့ၣ်လၢအညၣ်ဂ့ၤ, လၢၢ်လၢအဂ့ၤဒီး ထးတဖၣ်ကအိၣ်ဝဲ လၢလၢလီၢ်လီၢ်လီၤ. ဒီးပတံၤသကိးသ့ၣ်တဖၣ် ကဟဲမၤစၢၤပှၤလၢ တၢ်သူၣ်အိၣ်သးအိၣ်အပူၤလီၤ. တမ့ၢ်လၢ ကန့ၢ်ဘၣ်အဘူးအလဲအဂီၢ်ဘၣ်. တၢ်လၢအအိၣ်လၢ ဟီၣ်ခိၣ်တဖၣ်န့ၣ် ပကသူဘၣ်အီၤဒ်သိးသိးခဲလၢာ်လီၤ.
၁၈ တၢ်သ့ၣ်တဖၣ်အံၤ မ့ၢ်ဝဲခိၣ်ဖးတနီၤလၢ ယဟိဝၤယွၤ အတံၤသကိးတဖၣ် ကဒိးန့ၢ်ဘၣ်ဝဲန့ၣ်လီၤ. ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ကကိးပသူထီၣ်လၢ တၢ်သူၣ်ခုသးခုအပူၤ ဒီးကနၢ်ဟူဝဲ ယ့ၣ်ၡူးအတၢ်ကတိၤလၢအမ့ၢ်– “ပှၤလၢအဘၣ်ဆိၣ်ဂ့ၤလၢယပၢ်, သုဝဲသ့ၣ်ဧၢ, ဟဲန့ၢ်ဘၣ်သါဘီဧိၤမုၢ်ဧိၤလၢ အကတီၤပာ်န့ၢ်သုဂီၢ်လၢဟီၣ်ခိၣ် အခီၣ်ထံးကဲထီၣ်လံၤလံၤန့ၣ်တက့ၢ်.”—မးသဲ ၂၅:၃၄.
^ လံာ်အဆၢ. 4 ပှၤကွၢ်တၢ်ဖိတၢ်လံၤတဂၤန့ၣ် မၤဝဲဒ်ပှၤပာ်ဒ့ၣ်ပာ်ကမၣ်အီၤ အသိးဧါ တမၤဘၣ်ဧါန့ၣ်ယ့ၣ်ၡူးတတဲဖျါထီၣ်ဝဲဘၣ်. ဘၣ်ဆၣ် လၢ လူၤကၣ် ၁၆:၁ အပူၤ တၢ်ကတိၤလၢ အမ့ၢ် “ဆှိးအီၤ” န့ၣ် ဘၣ်သ့ၣ်သ့ၣ် အခီပညီအဲၣ်ဒိးစံးဝဲ ပှၤပာ်ဒ့ၣ်ပာ်ကမၣ်အီၤလၢ အမၤလၢာ်ဂီၤ အသရၣ်အတၢ်ထူးတၢ်တီၤလီၤ. တၢ်ပာ်ဒ့ၣ်ပာ်ကမၣ်အံၤ အဘၣ်ဧါတဘၣ်ဧါန့ၣ် ပတသ့ၣ်ညါလီၤတံၢ်ဘၣ်. ဘၣ်ဆၣ်ယ့ၣ်ၡူးသူဝဲတၢ်အဒိအံၤန့ၣ် တမ့ၢ်အဝဲအဲၣ်ဒိးပာ်ဖျါဝဲ တၢ်ဂ့ၢ်လၢဘၣ်မနုၤအဃိ ပှၤကွၢ်တၢ်ဖိတၢ်လံၤတဂၤအံၤ ဘၣ်တၢ်နီဟးထီၣ်အီၤလဲၣ်န့ၣ်ဘၣ်. အဝဲအဲၣ်ဒိးပာ်ဖျါဝဲလၢ ဖဲပှၤကွၢ်တၢ်ဖိတၢ်လံၤတဂၤအံၤ ဘၣ်တၢ်နီဟးထီၣ်ကွံာ်အီၤအခါ အဝဲမၤဝဲဒ်လဲၣ်န့ၣ်လီၤ.
^ လံာ်အဆၢ. 15 The life story of Lucia Moussanett appears in the June 22, 2003, issue of Awake!, pages 18-22.
