ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်
“မၤမုာ်ထီၣ်လိာ်သုသး, ဒီးမၤထီၣ်မၤထီလိာ်သုသးသကိးသကိး, ဒ်သုမၤစ့ၢ်ကီးအသိးန့ၣ်တက့ၢ်.”—၁ သ့းစၤလနံ ၅:၁၁.
၁, ၂. ဘၣ်မနုၤအဃိ ပကဘၣ်တဲသကိး တၢ်ဂ့ၢ်လၢပမၤမုာ်ထီၣ်က့ၤပှၤဂၤ ကသ့ဒ်လဲၣ်အဂ့ၢ်န့ၣ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
စူစံၤ တဲဝဲလၢ “ပဖိခွါသံ ဘူးကအိၣ်တနံၣ်လံသနာ်က့ ပသူၣ်အုးသးအုး ဒီးပသးဘၣ်ဒိနးနးကလဲာ်ဒံးအဖၢလီၤ.” ဒီပုၢ်ဝဲၢ်ခွါတဂၤ တဲဝဲလၢ ဖဲယမါသံသတူၢ်ကလာ်အခါ “ယတူၢ်ဘၣ်ဆါထဲလဲၣ်န့ၣ် ယတဲဖျါထီၣ်မးတသ့ဘၣ်.” လီၤသးအုးဒိၣ်မးလၢ မုၢ်မဆါတနံၤအံၤ ပှၤအါဂၤန့ၣ် တူၢ်ဘၣ်ဝဲတၢ်သူၣ်အုးသးအုးဒ်အံၤလီၤ. တချုးလၢအၢ်မက့းဒိၣ် တုၤဒံးဘၣ်န့ၣ် ဒီပုၢ်ဝဲၢ်အါဂၤတဆိကမိၣ်ဝဲလၢ ပှၤလၢအအဲၣ်ဘၣ်ဝဲတဖၣ် ကသံဝဲဘၣ်. ဘၣ်သ့ၣ်သ့ၣ် ပှၤလၢနအဲၣ်ဘၣ်အီၤတဂၤ မ့တမ့ၢ် ပှၤလၢနသ့ၣ်ညါအီၤတဂၤဂၤ ကသူၣ်အုးသးအုးခီဖျိလၢ ပှၤလၢအအဲၣ်ဘၣ်ဝဲတဂၤသံအဃိလီၤ. ဖဲန့ၣ်အဆၢကတီၢ် နကဆိကမိၣ်ဘၣ်လၢ ‘ပှၤလၢအသူၣ်အုးသးအုးတဖၣ်န့ၣ် အသးမုာ်ထီၣ်က့ၤဝဲ ကသ့ဒ်လဲၣ်န့ၣ်လီၤ.’
၂ ပှၤတနီၤနီၤတဲဝဲလၢ ဒ်တၢ်ဆၢကတီၢ်လဲၤပူၤကွံာ်ဝဲအသိး တၢ်ပူၤလီၢ်စ့ၢ်ကီး ကဘျါက့ၤဝဲကယီကယီလီၤ. ဘၣ်ဆၣ် တၢ်ကတိၤအံၤ ဘၣ်ဝဲထီဘိဧါ. မုၣ်ကမဲတဂၤ တဲဝဲဒ်အံၤ– “မ့မ့ၢ်ယၤန့ၣ် ယဆိကမိၣ်လၢ ပတၢ်သးအုးလီၤမၢ်သ့, ဘၣ်ဆၣ် ဒိးသန့ၤထီၣ်အသးလၢ တၢ်လၢပမၤတဖၣ်န့ၣ်လီၤ.” အဒိ, ဒ်သိးတၢ်ပူၤလီၢ်တခါ ကဘျါက့ၤဝဲအဂီၢ် ပလိၣ်ဘၣ်တၢ်ဆၢကတီၢ် ဒီးပဘၣ်ကွၢ်ထွဲအီၤဂ့ၤဂ့ၤလီၤ. ဒ်န့ၣ်အသိး ပှၤလၢအသူၣ်အုးသးအုးတဖၣ် အသးကမုာ်ထီၣ်က့ၤအဂီၢ် လိၣ်ဘၣ်ဝဲတၢ်ဆၢကတီၢ်ဒီး တၢ်ကဟုကယာ်စ့ၢ်ကီးလီၤ. ဒ်သိးပှၤလၢ အသူၣ်အုးသးအုးတဖၣ် အတၢ်တူၢ်ဘၣ်ကကိညၢ်လီၤအဂီၢ် ပမၤစၢၤအဝဲသ့ၣ်ကသ့ဒ်လဲၣ်.
ယဟိဝၤယွၤမ့ၢ် “တၢ်မၤမုာ်ခဲလၢာ်အကစၢ်”
၃, ၄. ဘၣ်မနုၤအဃိ ပနာ်သ့လၢ ယဟိဝၤယွၤ နၢ်ပၢၢ်ဝဲပတၢ်သူၣ်အုးသးအုးန့ၣ်လဲၣ်.
၃ ပပၢ်ယဟိဝၤယွၤလၢ အပှဲၤဒီးတၢ်အဲၣ်တၢ်ကွံတဂၤ ကမၤမုာ်ထီၣ်က့ၤပှၤလီၤ. (ဖး ၂ ကရံၣ်သူး ၁:၃, ၄ တက့ၢ်.) ဘၣ်ဃးဒီး တၢ်ဒိသူၣ်ဒိသးလၢ ပှၤဂၤအဖီခိၣ်န့ၣ် အဝဲမ့ၢ်ပှၤလၢ အဒိအတဲာ်ဂ့ၤကတၢၢ်လီၤ. ဒီးအဝဲအၢၣ်လီၤအခ့အပှၤတဖၣ်လၢ “ယဲဒၣ်, ယၤအံၤယမ့ၢ်ပှၤလၢ အမၤမုာ်ထီၣ်က့ၤသုလီၤ.”—ယၡါယၤ ၅၁:၁၂; စံးထီၣ်ပတြၢၤ ၁၁၉:၅၀, ၅၂, ၇၆.
ယဟိဝၤယွၤ ခိးကွၢ်လၢ်ဝဲ မုၢ်နံၤလၢ အဝဲ ကမၤ ဂဲၤဆၢထၢၣ်သမူထီၣ်က့ၤ ပှၤတီပှၤလိၤတဖၣ်
၄ ပပၢ်ယဟိဝၤယွၤစ့ၢ်ကီး ထံၣ်ဘၣ်ဝဲပှၤလၢအအဲၣ်ဘၣ်ဝဲတဖၣ်သံဝဲန့ၣ်လီၤ. အဒိ, ဖဲစီၤအၤဘြၤဟၣ်, စီၤအံၤစဲး, စီၤယၤကိာ်, စီၤမိၤၡ့ဒီး စီၤပၤဒၤဝံး သံအခါန့ၣ် ယဟိဝၤယွၤ ထံၣ်ဝဲလီၤ. (၄ မိၤၡ့ ၁၂:၆-၈; မးသဲ ၂၂:၃၁, ၃၂; မၤတၢ် ၁၃:၂၂) လံာ်စီဆှံပာ်ဖျါထီၣ်ဝဲလၢ ယဟိဝၤယွၤ ခိးကွၢ်လၢ်ဝဲ မုၢ်နံၤလၢအဝဲ ကမၤဂဲၤဆၢထၢၣ်သမူထီၣ်က့ၤ ပှၤတီပှၤလိၤတဖၣ်အံၤန့ၣ်လီၤ. (ယိၤဘး ၁၄:၁၄, ၁၅) အဝဲသ့ၣ်မ့ၢ် ဂဲၤဆၢထၢၣ်သမူထီၣ်က့ၤန့ၣ် အတၢ်အိၣ်မူကပှဲၤဒီး တၢ်အိၣ်ဆူၣ်အိၣ်ချ့ဒီး တၢ်သူၣ်ခုသးခုလီၤ. တကးဒံးဘၣ် ယဟိဝၤယွၤထံၣ်ဘၣ်စ့ၢ်ကီး အဖိဝဲၢ်ကိသံန့ၣ်လီၤ. လံာ်စီဆှံတဲဝဲလၢ ယ့ၣ်ၡူးမ့ၢ် ယွၤ “အတၢ်သူၣ်ဖှံသးညီ” လီၤ. (ကတိၤဒိ ၈:၂၂, ၃၀) လၢတၢ်န့ၣ်အဃိ ဖဲအဖိခွါဘၣ်တၢ်မၤသံအီၤ ဆှုၣ်မဲာ်ကဲၤမဲာ်အခါ အဝဲအသးကဘၣ်ဒိဝဲ ဒိၣ်မးလီၤ.—ယိၤဟၣ် ၅:၂၀; ၁၀:၁၇.
၅, ၆. ယဟိဝၤယွၤ မၤမုာ်ထီၣ်က့ၤပှၤလၢ ကျဲဒ်လဲၣ်.
၅ ပနာ်သ့သပှၢ်ကတၢၢ်လၢ ယဟိဝၤယွၤကမၤစၢၤပှၤလီၤ. လၢတၢ်န့ၣ်အဃိ ပကြၢးဃ့ဘါထုကဖၣ်ထီဘိ ဒီးပာ်ဖျါထီၣ်ပတၢ်တူၢ်ဘၣ် ဒီးပတၢ်သူၣ်အုးသးအုးလၢ အအိၣ်လီၤ. ပသ့ၣ်ညါလၢ ယဟိဝၤယွၤနၢ်ပၢၢ် ပတၢ်တူၢ်ဘၣ် ဒီးမၤမုာ်ထီၣ်က့ၤပှၤအဃိ ပသးခုဒိၣ်မးလီၤ. ဘၣ်ဆၣ် အဝဲကမၤမုာ်ထီၣ်က့ၤပှၤဒ်လဲၣ်.
၆ ယဟိဝၤယွၤ ကမၤစၢၤပှၤ ခီဖျိအသးစီဆှံန့ၣ်လီၤ. (မၤတၢ် ၉:၃၁) ယ့ၣ်ၡူးအၢၣ်လီၤဝဲလၢ ပပၢ်ယဟိဝၤယွၤ ကဟ့ၣ်လီၤအသးစီဆှံဆူပှၤလၢ အဃ့တၢ်မၤစၢၤ လၢအအိၣ်တဖၣ်န့ၣ်လီၤ. (လူၤကၣ် ၁၁:၁၃) စူစံၤ, တဲဝဲလၢ– “ဒ်သိးပကဒိးန့ၢ်ဘၣ် တၢ်မၤမုာ်ထီၣ်က့ၤပှၤအဂီၢ် ပချံးလီၤပခီၣ်ဒီး ပဃ့ဘါထုကဖၣ်တၢ်လၢ ယဟိဝၤယွၤအအိၣ် အဘျီတဖၣ်အဘျီလီၤ. ဖဲပဃ့ဘါထုကဖၣ်တၢ် တဘျီလၢ်လၢ်န့ၣ် ယွၤလၢအမ့ၢ်တၢ်မၤမုာ်ထီၣ်က့ၤအကစၢ် မၤမုာ်ထီၣ်က့ၤပသးထီဘိလီၤ.”—ဖး ဖံလံးပံၤ ၄:၆, ၇ တက့ၢ်.
ယ့ၣ်ၡူးနၢ်ပၢၢ်ပတၢ်တူၢ်ဘၣ်တဖၣ်
၇, ၈. ဘၣ်မနုၤအဃိ ပနာ်သ့လၢ ယ့ၣ်ၡူးကမၤမုာ်ထီၣ်က့ၤပသးလဲၣ်.
၇ ဖဲယ့ၣ်ၡူးအိၣ်လၢဟီၣ်ခိၣ်အခါ အတၢ်ဖံးတၢ်မၤဒီး အတၢ်စံးတၢ်ကတိၤတဖၣ် ပာ်ဖျါထီၣ်ဝဲလၢ အဝဲကွၢ်လိမၤဒိး အပၢ်အတၢ်ဂ့ၤတၢ်ဝါတဖၣ် လီၤတံၢ်လီၤဆဲးလီၤ. (ယိၤဟၣ် ၅:၁၉) ယဟိဝၤယွၤ ဆှၢလီၤဝဲယ့ၣ်ၡူး ဒ်သိးကမၤမုာ်ထီၣ်က့ၤကယဲၢ် “ပှၤအသူၣ်ကၢ်အသးလီၤ” ဒီး “ပှၤလၢအသူၣ်အုးသးအုးခဲလၢာ်” လီၤ. (ယၡါယၤ ၆၁:၁, ၂; လူၤကၣ် ၄:၁၇-၂၁) လၢတၢ်န့ၣ်အဃိ ပှၤသ့ၣ်ညါလၢ ယ့ၣ်ၡူးန့ၣ် နၢ်ပၢၢ်ပှၤဂၤအတၢ်တူၢ်ဘၣ် ဒီးအဲၣ်ဒိးမၤစၢၤပှၤဂၤလီၤ.—ဧ့ၤဘြံၤ ၂:၁၇.
၈ ဖဲယ့ၣ်ၡူးအသးစၢ်ဒံးအခါ ဘၣ်သ့ၣ်သ့ၣ် အဝဲကထံၣ် အတံၤသကိးလၢအအဲၣ်ဘၣ်ဝဲ မ့တမ့ၢ် အဟံၣ်ဖိဃီဖိသံန့ၣ်လီၤ. အဒိ, ဘၣ်သ့ၣ်သ့ၣ် အပၢ်စီၤယိၤသး လၢအကွၢ်လုၢ်ဒိၣ်ထီၣ်အီၤတဂၤ ကသံဝဲဖဲ ယ့ၣ်ၡူးအသးစၢ်ဒံးအခါန့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဖဲအမိၢ်ဒီးအဒီပုၢ်ဝဲၢ်တဖၣ် အိၣ်ဒီးတၢ်သူၣ်အုးသးအုးအခါ ယ့ၣ်ၡူးလၢအအိၣ်ဒီး တၢ်အဲၣ်တၢ်ကွံတဂၤအံၤစ့ၢ်ကီး ကသူၣ်အုးသးအုးဝဲထဲလဲၣ်န့ၣ် ဆိကမိၣ်ကွၢ်တက့ၢ်.
၉. ဖဲစီၤလါစရူးသံအခါ ယ့ၣ်ၡူးပာ်ဖျါထီၣ်ဝဲ တၢ်ဒိသူၣ်ဒိသးဒ်လဲၣ်.
၉ ဖဲအဝဲမၤတၢ်သးခုကစီၣ်တၢ်မၤအခါ အဝဲပာ်ဖျါထီၣ်ဝဲလၢ အနၢ်ပၢၢ်ပှၤဂၤအတၢ်တူၢ်ဘၣ် ဒီးအိၣ်ဒီးတၢ်ဒိသူၣ်ဒိသးလီၤ. အဒိ, ဖဲယ့ၣ်ၡူးအတံၤသကိးလၢအမ့ၢ် စီၤလါစရူးသံအခါ အသးဘၣ်ဒိဒိၣ်မး ဒ်နီၢ်မၤရံဒီး နီၢ်မၢ်သၤအသိးလီၤ. ယ့ၣ်ၡူးသ့ၣ်ညါဝဲလၢ အမၤသမူထီၣ်က့ၤ စီၤလါစရူးသ့သနာ်က့ အဝဲသးကညီၤဘၣ် နီၢ်မၤရံဒီး နီၢ်မၢ်သၤတုၤဒၣ်လဲာ် အဝဲဟီၣ်ဝဲန့ၣ်လီၤ.—ယိၤဟၣ် ၁၁:၃၃-၃၆.
၁၀. ယ့ၣ်ၡူးနၢ်ပၢၢ်ပတၢ်တူၢ်ဘၣ်တဖၣ်န့ၣ် ပနာ်အီၤသ့ဒ်လဲၣ်.
၁၀ ယ့ၣ်ၡူး မၤမုာ်ထီၣ်က့ၤပှၤဂၤန့ၣ် မၤစၢၤပှၤဒ်လဲၣ်. လံာ်စီဆှံတဲဝဲလၢ “မဟါ, ဒီးမဆါအံၤ, ဒီးအစိၤစိၤအဃၣ်ဃၣ်န့ၣ်, ယ့ၣ်ၡူးခရံာ်မ့ၢ် တၢ်ဒ်လီၢ်လီၢ်လီၤ.” အဝဲတဆီတလဲနီတဘျီဘၣ်. (ဧ့ၤဘြံၤ ၁၃:၈) ဒီးဘၣ်တၢ်ကိးအီၤလၢ “တၢ်မူအခိၣ်” မ့ၢ်လၢအဝဲအိးဟိထီၣ်န့ၢ်ပှၤကျဲလၢ ပကအိၣ်မူဘၣ်လီၤထူလီၤယိာ်အဃိလီၤ. တကးဒံးဘၣ် အဝဲနၢ်ပၢၢ်စ့ၢ်ကီး ပတၢ်သူၣ်အုးသးအုး ဒီး “မၤစၢၤပှၤလၢအဘၣ် တၢ်လ့ပစီတဖၣ်သ့ဝဲလီၤ.” (မၤတၢ် ၃:၁၅; ဧ့ၤဘြံၤ ၂:၁၀, ၁၈) လၢတၢ်န့ၣ်အဃိ ဖဲယ့ၣ်ၡူးထံၣ်ဘၣ် ပှၤလၢအသူၣ်အုးသးအုးအခါ အဝဲစ့ၢ်ကီးကသူၣ်အုးသးအုးဝဲန့ၣ် ပနာ်သ့သပှၢ်ကတၢၢ်လီၤ. ဒီးအဝဲနၢ်ပၢၢ်ဝဲပှၤဂၤအတၢ်တူၢ်ဘၣ် ဒီးမၤမုာ်ထီၣ်က့ၤပှၤ ဖဲပလိၣ်ဘၣ် “အဆၢအကတီၢ်” န့ၣ်လီၤ.—ဖး ဧ့ၤဘြံၤ ၄:၁၅, ၁၆ တက့ၢ်.
“လံာ်စီဆှံအဆၢလၢ အမၤမုာ်ထီၣ်က့ၤပှၤတဖၣ်”
၁၁. လံာ်စီဆှံအဆၢ လၢအမၤမုာ်ထီၣ်က့ၤနသးန့ၣ် မ့ၢ်ဖဲလဲၣ်တဆၢလဲၣ်.
၁၁ လံာ်စီဆှံပာ်ဖျါဝဲ ဖဲစီၤလါစရူးသံအခါ ယ့ၣ်ၡူးအသးဘၣ်ဒိဒိၣ်မးလီၤ. လံာ်စီဆှံတဆၢအံၤ မ့ၢ်ဝဲလံာ်စီဆှံအဆၢလၢ အမၤမုာ်ထီၣ်က့ၤပှၤအါမးအကျါ တဆၢလီၤ. လံာ်စီဆှံတဲဝဲလၢ “ကယဲၢ်တၢ်ကွဲးအသးတဘီလၢ်လၢ်န့ၣ်, ဘၣ်ကွဲးအသးလၢ ပဘၣ်တၢ်သိၣ်တၢ်သီအဂီၢ်, ဒ်သိးတၢ်ဝံသးစူၤ, ဒီးတၢ်မၤမုာ်ဘၣ်ဃးဒီး တၢ်ကွဲးအသးတဖၣ်သတးဒီး ပကအိၣ်ဒီးတၢ်မုၢ်လၢ်လီၤ.” (ရိမ့ၤ ၁၅:၄) လၢတၢ်န့ၣ်အဃိ နမ့ၢ်သူၣ်အုးသးအုးန့ၣ် နဒိးန့ၢ်ဘၣ်တၢ်မၤမုာ်ထီၣ်က့ၤလၢ လံာ်စီဆှံအဆၢလၢလာ်တဖၣ်အံၤသ့ဝဲလီၤ.
-
“ယွၤအိၣ်ဘူးဒီးပှၤလၢ အသူၣ်ကၢ်အသးလီၤ, ဒီးပှၤလၢအပီၢ်ယၢ်လီၤက့ၤအသးန့ၣ် အုၣ်က့ၤခီၣ်က့ၤဝဲလီၤ.”—စံးထီၣ်ပတြၢၤ ၃၄:၁၈, ၁၉.
-
“လၢယဆိကမိၣ် တၢ်အါမံၤအကျါန့ၣ် န [ယဟိဝၤ] မၤမုာ်ထီၣ်က့ၤတၢ်တဖၣ် ဒုးသူၣ်ဖှံသးညီယသးလီၤ.” —စံးထီၣ်ပတြၢၤ ၉၄:၁၉.
-
“ဒီးပကစၢ်ယ့ၣ်ၡူးအကစၢ်ဒၣ်ဝဲ, ဒီးယွၤ, ပပၢ်လၢအအဲၣ်ပှၤ, ဒီးဟ့ၣ်လီၤပှၤလၢတၢ်မၤမုာ်ပှၤ လီၤထူလီၤယိာ်, ဒီးတၢ်မုၢ်လၢ်အဂ့ၤလၢ တၢ်ဘျုးတၢ်ဖှိၣ်န့ၣ်, မ်အမၤမုာ်ထီၣ်က့ၤသုသး, ဒီးဒုးအိၣ်ဂၢၢ်ဆိးကျၢၤသုလၢ ကယဲၢ်တၢ်ကတိၤအဂ့ၤ, ဒီးတၢ်မၤအဂ့ၤအပူၤန့ၣ်တက့ၢ်.”—၂ သ့းစၤလနံ ၂:၁၆, ၁၇. *—ကွၢ်တၢ်ဂ့ၢ်အဘျဲၣ်တက့ၢ်.
ဘီမုၢ်ဘျီၣ်ဒိၣ်န့ၣ် မ့ၢ်ဝဲတၢ်မၤမုာ်ထီၣ်က့ၤအလီၢ်
၁၂. ပမၤမုာ်ထီၣ်က့ၤ ပှၤဂၤကသ့လၢကျဲဒ်လဲၣ်.
၁၂ ပှၤလၢအသူၣ်အုးသးအုးတဖၣ် ဃုထံၣ်န့ၢ်ဝဲ တၢ်မၤမုာ်ထီၣ်က့ၤလၢ တၢ်အိၣ်ဖှိၣ်အပူၤသ့ဝဲလီၤ. (ဖး ၁ သ့းစၤလနံ ၅:၁၁ တက့ၢ်.) ပမၤစၢၤပှၤလၢအ “သူၣ်ကၢ်သးလီၤ” တဖၣ်ကသ့ဒ်လဲၣ်. (ကတိၤဒိ ၁၇:၂၂) သ့ၣ်နီၣ်ထီၣ်လၢ တၢ်ဆၢကတီၢ်အိၣ်ဝဲလၢ တၢ်ကိးမံၤဒဲးအဂီၢ်လီၤ. “အကတီၢ်လၢပှၤကအိၣ်ဘှီၣ်ကလာ်အဂီၢ်, ဒီးအကတီၢ်လၢပှၤကကတိၤတၢ်အဂီၢ်” လီၤ. (စံၣ်တဲၤတဲလီၤတၢ် ၃:၇) မုၣ်ကမဲလၢအမံၤမ့ၢ် ဒံလ့(န်) တဂၤ တဲဝဲလၢ ပှၤလၢအသူၣ်အုးသးအုးတဖၣ်န့ၣ် အဝဲသ့ၣ်အဲၣ်ဒိးတဲဖျါထီၣ် အတၢ်ဆိကမိၣ်ဒီး အတၢ်တူၢ်ဘၣ်တဖၣ်လီၤ. လၢတၢ်န့ၣ်အဃိ တၢ်လၢနမၤသ့အဂ့ၤကတၢၢ်န့ၣ် ဒိကနၣ်န့ၢ် အဝဲသ့ၣ်လၢတၢ်သူၣ်အိၣ်သးအိၣ်အပူၤတက့ၢ်. ကၠူနံယါန့ၣ် အကၠီမၤသံလီၤအသး ဒီးအဝဲတဲဝဲလၢ “ပနၢ်ပၢၢ်ပှၤဂၤအတၢ်တူၢ်ဘၣ် လီၤတံၢ်လီၤဆဲးတသ့ဘၣ်သနာ်က့ အရ့ဒိၣ်လၢ ပကဘၣ်ပာ်ဖျါထီၣ်လၢ ပအဲၣ်ဒိးနၢ်ပၢၢ်စၢၤ အဝဲသ့ၣ်အတၢ်တူၢ်ဘၣ်လီၤ.”
၁၃. ဘၣ်ဃးဒီး တၢ်မၤမုာ်ထီၣ်က့ၤပှၤဂၤန့ၣ် ပကဘၣ်သ့ၣ်နီၣ်ထီၣ် တၢ်မနုၤလဲၣ်.
၁၃ ပဝဲသ့ၣ်တဖၣ် ပကဘၣ်သ့ၣ်နီၣ်ထီၣ်လၢ ပပာ်ဖျါထီၣ်ပတၢ်တူၢ်ဘၣ် တဂၤဒီးတဂၤ တဒ်သိးလိာ်အသးဘၣ်. တဘျီတခီၣ် နတူၢ်ဘၣ်တၢ်နးထဲလဲၣ်န့ၣ် နတဲပၠးပှၤဂၤ လီၤတံၢ်လီၤဆဲးတဘၣ်ဘၣ်. လံာ်စီဆှံစံးဝဲလၢ “ပှၤအသးသ့ၣ်ညါ အသူၣ်အုးအသးအုးဒၣ်ဝဲ, ဒီးပှၤတမှံၤ တမၤဃါဃုာ်အသးဒီး အတၢ်သးခုန့ၣ်ဘၣ်.” (ကတိၤဒိ ၁၄:၁၀) ပှၤတဂၤဂၤ မ့ၢ်တဲပၠးပှၤအတၢ်တူၢ်ဘၣ်ဒၣ်လဲာ် ပကနၢ်ပၢၢ်စၢၤ အတၢ်တူၢ်ဘၣ်အဂီၢ် တညီဝဲထီဘိဘၣ်.
တဘျီတခီၣ် ကျဲအဂ့ၤကတၢၢ်တဘိလၢ ပမၤစၢၤပှၤဂၤသ့န့ၣ် မ့ၢ်ဝဲ “ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်.”
၁၄. ပဟ့ၣ်ဂံၢ်ဟ့ၣ်ဘါ ပှၤလၢအသူၣ်အုးသးအုးတဖၣ် ကသ့ဒ်လဲၣ်.
၁၄ တဘျီတခီၣ် နကဘၣ်လဲၤတဲတၢ်ဒီး ပှၤလၢအသူၣ်အုးသးအုးတဖၣ်ဒ်လဲၣ်န့ၣ် နတသ့ၣ်ညါဘၣ်. ဘၣ်ဆၣ် လံာ်စီဆှံစံးဝဲလၢ “မ့မ့ၢ်ပှၤကူၣ်တၢ်သ့အပျ့ၤန့ၣ် မၤဘျါက့ၤတၢ်လီၤ.” (ကတိၤဒိ ၁၂:၁၈) ပှၤအါဂၤန့ၣ် ဒ်သိးကမၤမုာ်ထီၣ်က့ၤပှၤဂၤအဂီၢ် အဝဲသ့ၣ်ဃုထံၣ်န့ၢ် တၢ်ဂ့ၢ်လၢ လံာ်လၢအမ့ၢ် When Someone You Love Dies အပူၤန့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) တဘျီတခီၣ် ကျဲအဂ့ၤကတၢၢ်တဘိလၢ ပမၤစၢၤပှၤဂၤသ့န့ၣ် မ့ၢ်ဝဲ “ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်.” (ရိမ့ၤ ၁၂:၁၅) ဒီပုၢ်ဝဲၢ်မုၣ် ကဲဘံၤန့ၣ် ခီဖျိလၢအဝၤသံအဃိ အဝဲတဲဝဲလၢ တဘျီတခီၣ် အဝဲပာ်ဖျါထီၣ်အတၢ်တူၢ်ဘၣ်တဘၣ်ဘၣ် အိၣ်ဒၣ်အဝဲဟီၣ်ဝဲန့ၣ်လီၤ. အဝဲတဲကဒီးဝဲလၢ “လၢတၢ်န့ၣ်အဃိ ဖဲယသကိးသ့ၣ်တဖၣ် ဟီၣ်ဒီးယၤအခါ ယဒိးန့ၢ်ဘၣ်တၢ်မၤမုာ်ထီၣ်က့ၤန့ၣ်လီၤ. ဖဲအဝဲသ့ၣ်ဟီၣ်ဒီးယၤအခါ ယတတူၢ်ဘၣ်လၢ ယသးအုးထဲတဂၤဧိၤဘၣ်.”
၁၅. ပမ့ၢ်တူၢ်ဘၣ်လၢ ပလဲၤဟ့ၣ်ဂံၢ်ဟ့ၣ်ဘါ ပှၤလၢအသူၣ်အုးသးအုးတဖၣ် လၢပနီၢ်ကစၢ် မ့ၢ်တသ့ဘၣ်န့ၣ် ပဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကျဲအဂၤကသ့ဒ်လဲၣ်. (ကွၢ်တၢ်ဂ့ၢ်လၢ “ တၢ်ကတိၤလၢအမၤမုာ်ထီၣ်က့ၤပှၤဂၤ” တက့ၢ်.)
၁၅ နမ့ၢ်တူၢ်ဘၣ်လၢ နလဲၤဟ့ၣ်ဂံၢ်ဟ့ၣ်ဘါ ပှၤလၢအသူၣ်အုးသးအုးတဖၣ် လၢနနီၢ်ကစၢ် မ့ၢ်တသ့ဘၣ်န့ၣ် နဆှၢန့ၢ်အီၤခးဖိ မ့တမ့ၢ် နကွဲးအိၣ်သကိးအဝဲသ့ၣ်လၢ လံာ်ပရၢ မ့တမ့ၢ် ဆှၢန့ၢ်အီၤ အံမ့(လ်) (e-mail) လၢလီတဲစိအပူၤသ့ဝဲလီၤ. ဒီးနကွဲးလီၤန့ၢ်အီၤ လံာ်စီဆှံအဆၢလၢ ကမၤမုာ်ထီၣ်က့ၤအသး မ့တမ့ၢ် နကွဲးဖျါထီၣ်ပှၤလၢအသံတဂၤ အတၢ်ဂ့ၤတၢ်ဝါတမံၤမံၤ မ့တမ့ၢ် တၢ်မၤဂ့ၤလၢအမၤဝဲလၢ နသးပ့ၤနီၣ်အီၤတန့ၢ်တဖၣ်သ့ဝဲလီၤ. ကၠူနံယါ တဲဝဲလၢ “ဒီပုၢ်ဝဲၢ်သ့ၣ်တဖၣ် ဆှၢန့ၢ်ယၤ မဲးစ့း (message) မ့တမ့ၢ် ကွဲမုာ်ယၤလၢ ယကရ့လိာ်သးဒီး ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်အဃိ ကဲထီၣ်တၢ်မၤစၢၤလၢ ယဂီၢ်ဒိၣ်မးလီၤ. အဝဲသ့ၣ်မၤဝဲဒ်အံၤအဃိ ယတူၢ်ဘၣ်လၢ အဝဲသ့ၣ်အဲၣ်ယၤဒီး ကဟုကယာ်ယၤလီၤ.”
၁၆. ကျဲအဂၤတဘိလၢ ပကဟ့ၣ်ဂံၢ်ဟ့ၣ်ဘါပှၤဂၤန့ၣ် မ့ၢ်မနုၤလဲၣ်.
၁၆ ပတၢ်ဃ့ဘါထုကဖၣ်န့ၣ် မၤစၢၤပဒီပုၢ်ဝဲၢ်လၢ အသူၣ်အုးသးအုးတဖၣ်သ့ဝဲလီၤ. ပဃ့ဘါထုကဖၣ် ဒီးအဝဲသ့ၣ်ဒ်သိးသိး မ့တမ့ၢ် ပဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ်သ့စ့ၢ်ကီးလီၤ. ဒီးမ့ၢ်ကီလၢနကဃ့ဘါထုကဖၣ်တၢ် ခီဖျိနဘၣ်ယိၣ်လၢ နကဟီၣ်အဃိဒၣ်လဲာ် နမ့ၢ်ဃ့ဘါထုကဖၣ်လၢ သူၣ်ဒီဖျၢၣ်သးဒီဖျၢၣ်န့ၣ် ကမၤမုာ်ထီၣ်က့ၤ အဝဲသ့ၣ်အသးလီၤ. ဒံလ့(န်) တဲဝဲ “တဘျီတခီၣ် ဖဲဒီပုၢ်ဝဲၢ်မုၣ်သ့ၣ်တဖၣ် ဟဲဟ့ၣ်ဂံၢ်ဟ့ၣ်ဘါယၤအခါ ယမၢအဝဲသ့ၣ် ဃ့ဘါထုကဖၣ်န့ၢ်တၢ်လၢယဂီၢ်လီၤ. အါတက့ၢ် ဖဲအဝဲသ့ၣ် စးထီၣ်ဃ့ဘါထုကဖၣ်အခါ အကလုၢ်ကနိးဝဲ ဘၣ်ဆၣ် လၢခံန့ၣ်အကလုၢ်တကနိးလၢၤဘၣ် ဒီးဃ့ဝဲလၢတၢ်သူၣ်အိၣ်သးအိၣ်အပူၤလီၤ. အဝဲသ့ၣ်အတၢ်နာ်လၢအဂၢၢ်ကျၢၤ, အတၢ်အဲၣ်ဒီး အတၢ်ကဟုကယာ်န့ၣ် မၤဂၢၢ်ကျၢၤထီၣ် ယတၢ်နာ်စ့ၢ်ကီးလီၤ.”
ဆဲးမၤမုာ်ထီၣ်က့ၤပှၤဂၤတက့ၢ်
၁၇-၁၉. ဘၣ်မနုၤအဃိ ပကဘၣ်ဟ့ၣ်ဂံၢ်ဟ့ၣ်ဘါ ပှၤဂၤထီဘိလဲၣ်.
၁၇ ပှၤတဂၤအတၢ်သူၣ်အုးသးအုး ကလီၤမၢ်အဂီၢ် ကယံာ်ဝဲထဲလဲၣ်န့ၣ် ပတဲလီၤတံၢ်လီၤဆဲးတသ့ဘၣ်. ဖဲပှၤလၢပအဲၣ်ဘၣ်တဂၤ သံသီသီအခါ ပဘူးပတံၢ် ဒီးပတံၤသကိးသ့ၣ်တဖၣ် ကဟဲလၢပအိၣ်အါမးလီၤ. ဘၣ်ဆၣ်လၢခံ ယံာ်ထီၣ်ယံာ်ထီၣ်န့ၣ် ပှၤတဟဲကြီကြီလၢၤဘၣ်. ဘၣ်ဆၣ်ပှၤလၢအသူၣ်အုးသးအုးတဖၣ် လိၣ်ဘၣ်ဒံးတၢ်မၤမုာ်ထီၣ်က့ၤန့ၣ်လီၤ. လၢတၢ်န့ၣ်အဃိ အိၣ်ကတဲာ်ကတီၤနသးဒ်သိး နကမၤစၢၤအဝဲသ့ၣ်တက့ၢ်. လံာ်စီဆှံတဲဝဲ “ပှၤအတံၤအသကိးအဲၣ်တၢ် ကိးအဆၢအကတီၢ်ဒဲး, ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.” (ကတိၤဒိ ၁၇:၁၇) ပကဘၣ်မၤမုာ်ထီၣ်က့ၤ ပှၤလၢအသူၣ်အုးသးအုးတဖၣ် တုၤလၢအသးမုာ်ထီၣ်က့ၤတစုလီၤ.—ဖး ၁ သ့းစၤလနံ ၃:၇ တက့ၢ်.
၁၈ ထီဘိန့ၣ်သ့ၣ်နီၣ်ထီၣ်လၢ အဝဲသ့ၣ်အသူၣ်အုးသးအုးအဃိ အဝဲသ့ၣ်အသးလီၤညီမးလီၤ. အဒိ, ဘၣ်သ့ၣ်သ့ၣ် ဖဲအဝဲသ့ၣ်ဖျီသးအနံၤဆၢက့ၤအမုၢ်နံၤအဆၢကတီၢ်မ့ၤဂ့ၤ, နၢ်ဟူဘၣ်တၢ်သးဝံၣ်တယုၢ်ယုၢ်မ့ၢ်ဂ့ၤ, ထံၣ်ဘၣ်တၢ်ဂီၤတဖၣ်မ့ၢ်ဂ့ၤ, မၤတၢ်တမံၤမံၤအဆၢကတီၢ်မ့ၢ်ဂ့ၤ, တၢ်နၢတခါခါမ့ၢ်ဂ့ၤ, တၢ်သီၣ်တမံၤမံၤ မ့တမ့ၢ် ကလံၤသီၣ်ဂီၤ ဆီတလဲအဆၢကတီၢ်မ့ၢ်ဂ့ၤ အဝဲသ့ၣ်အသးလီၤသ့ဝဲလီၤ. ပှၤလၢအသးသမူတံၤသကိး သံသဒၣ်အီၤသီသီတဂၤ ဖဲလဲၤထီၣ်တၢ်အိၣ်ဖှိၣ်ဖးဒိၣ် မ့တမ့ၢ် လဲၤထီၣ်တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး အဆိကတၢၢ်တဘျီအခါ အဝဲကသူၣ်အုးသးအုးဒိၣ်မးလီၤ. ဒီပုၢ်ဝဲၢ်တဂၤတဲဝဲ “ယသ့ၣ်ညါ မ့ၢ်တုၤလၢယဖျီသးအနံၤဆၢက့ၤမုၢ်နံၤ မ့တမ့ၢ် ယမါသံအမုၢ်နံၤန့ၣ် ကကီလၢယဂီၢ်ဖးဒိၣ်ညါ. ဘၣ်ဆၣ် မ့ၢ်လၢဒီပုၢ်ဝဲၢ်မုၣ်ဒီပုၢ်ဝဲၢ်ခွါတနီၤ ရဲၣ်ကျဲၤဝဲ တၢ်အီၣ်သကိးအီသကိးတၢ် ဒီးတံၤသကိးတဖၣ်အဃိ ယတတူၢ်ဘၣ်လၢ ယအိၣ်သယုၢ်သညိလၢၤဘၣ်.”
၁၉ ထီဘိန့ၣ်သ့ၣ်နီၣ်ထီၣ်လၢ ပှၤလၢအသူၣ်အုးသးအုးတဖၣ် တလိၣ်ဘၣ်တၢ်ဟ့ၣ်ဂံၢ်ဟ့ၣ်ဘါထဲ မုၢ်နံၤလၢအရ့ဒိၣ်လၢ အဝဲသ့ၣ်အဂီၢ်န့ၣ်ဘၣ်. ကၠူနံယါ တဲဝဲ “တဘျီတခီၣ် မ့တမ့ၢ်မုၢ်နံၤလၢ အလီၤဆီဘၣ်သနာ်က့ ပှၤမ့ၢ်ရ့ဒီးယၤဒီး မၤစၢၤယၤန့ၣ် ကဲဘျုးလၢယဂီၢ်ဒိၣ်မးလီၤ. ဖဲန့ၣ်အခါ မ့ၢ်တၢ်ဆၢကတီၢ်လၢ အလုၢ်ဒိၣ်ပှ့ၤဒိၣ်ဒီး မၤမုာ်ထီၣ်က့ၤယၤနီၢ်နီၢ်လီၤ.” ပမၤလီၤမၢ်ကွံာ် အဝဲသ့ၣ်အတၢ်သူၣ်အုးသးအုး ဒီးအတၢ်သယုၢ်သညိတဖၣ်တသ့ဘၣ် ဘၣ်ဆၣ် ပမၤမုာ်ထီၣ်က့ၤ အဝဲသ့ၣ်သ့ခီဖျိ ပမၤန့ၢ်တၢ်တမံၤမံၤလၢ အဝဲသ့ၣ်အဂီၢ်န့ၣ်လီၤ. (၁ ယိၤဟၣ် ၃:၁၈) ကဲဘံၤ တဲဝဲ “ဖဲယထံၣ်ဘၣ် တၢ်သူၣ်အုးသးအုးအဆၢကတီၢ် တၢ်အိၣ်ဖှိၣ်သးပှၢ်လၢအိၣ်ဒီး တၢ်အဲၣ်တၢ်ကွံတဖၣ် မၤစၢၤယၤအဃိ ယစံးဘျုးယဟိဝၤယွၤ ဒိၣ်မးလီၤ. ဒီးယတူၢ်ဘၣ် ယဟိဝၤယွၤအတၢ်ကဟုကယာ်လၢ အပှဲၤဒီးတၢ်အဲၣ်တၢ်ကွံန့ၣ်လီၤ.”
၂၀. ဘၣ်မနုၤအဃိ ယဟိဝၤယွၤ အတၢ်အၢၣ်လီၤအီလီၤန့ၣ် မၤမုာ်ထီၣ်က့ၤပှၤလၢ အသူၣ်အုးသးအုးတဖၣ်အသးသ့လဲၣ်.
၂၀ ပသ့ၣ်ညါဘၣ်လၢ ယဟိဝၤယွၤ လၢအမ့ၢ်တၢ်မၤမုာ်ထီၣ်က့ၤ အကစၢ်န့ၣ် ကမၤလီၤမၢ်ကွံာ် တၢ်သူၣ်အုးသးအုးဒီး ကမၤသမူထီၣ်က့ၤပှၤသံတဖၣ်အဃိ ပသးခုဒိၣ်မးလီၤ. (ယိၤဟၣ် ၅:၂၈, ၂၉) ကစၢ်ယွၤအၢၣ်လီၤဝဲလၢ “တၢ်သံလီၤဘျၢလံလီၤထူလီၤယိာ်လံ, ဒီးကစၢ်ယွၤထွါကွံာ်မဲာ်ထံလၢ ကယဲၢ်ပှၤအမဲာ်” လီၤ. (ယၡါယၤ ၂၅:၈) ဖဲန့ၣ်အဆၢကတီၢ် လၢပကဟီၣ်ဃုာ်ဒီး “ပှၤလၢအဟီၣ်တဖၣ်” အလီၢ် ပကသးခုဃုာ်ဒီး “ပှၤလၢအသးခုတဖၣ်” န့ၣ်လီၤ.—ရိမ့ၤ ၁၂:၁၅.
^ လံာ်အဆၢ. 8 လံာ်စီဆှံပာ်ဖျါထီၣ်ဝဲလၢ ဖဲယ့ၣ်ၡူးအသးအိၣ် ၁၂ နံၣ်အခါ စီၤယိၤသးအိၣ်မူဒံးဝဲလီၤ. ဘၣ်ဆၣ် ဖဲယ့ၣ်ၡူးမၤတၢ်လီၤလး အဆိကတၢၢ်တဘျီလၢ အဒုးကဲထီၣ်ထံလၢ စပံးထံအခါမ့ၢ်ဂ့ၤ စးထီၣ်ဖဲန့ၣ်ဝံၤအလီၢ်ခံမ့ၢ်ဂ့ၤ လံာ်စီဆှံတပာ်ဖျါထီၣ်ဝဲ စီၤယိၤသးအဂ့ၢ်လၢၤဘၣ်. လၢတၢ်န့ၣ်အဃိ ဘၣ်သ့ၣ်သ့ၣ် ကမ့ၢ်လၢစီၤယိၤသးသံလံအဃိလီၤ. ဖဲယ့ၣ်ၡူးအိၣ်လၢ သ့ၣ်တၢၣ်လိၤအခါ အဝဲမၤလိာ် တၢ်မၢဖိယိၤဟၣ်လၢ ကကွၢ်ထွဲအမိၢ် နီၢ်မၤရံလီၤ. အပၢ်စီၤယိၤသးမ့ၢ်အိၣ်မူဒံးန့ၣ် တမ့ၢ်လၢ အဝဲကမၢတၢ်မၢဖိယိၤဟၣ်လၢ ကကွၢ်ထွဲအမိၢ်န့ၣ်ဘၣ်.—ယိၤဟၣ် ၁၉:၂၆, ၂၇.
^ လံာ်အဆၢ. 11 လံာ်စီဆှံအဆၢအဂၤတဖၣ် လၢကမၤမုာ်ထီၣ်က့ၤပှၤန့ၣ် မ့ၢ်ဝဲ စံးထီၣ်ပတြၢၤ ၂၀:၁, ၂; ၃၁:၇; ၃၈:၈, ၉, ၁၅; ၅၅:၂၂; ၁၂၁:၁, ၂; ယၡါယၤ ၅၇:၁၅; ၆၆:၁၃; ဖံလံးပံၤ ၄:၁၃ ဒီး ၁ ပ့းတရူး ၅:၇.
^ လံာ်အဆၢ. 14 See also the article “Comfort the Bereaved, as Jesus Did” in the November 1, 2010, issue of The Watchtower.
