ဘၣ်မနုၤအဃိ—“ပဘၣ်စံးထီၣ်ပတြၢၤယွၤ” လဲၣ်
“စံးထီၣ်ပတြၢၤယွၤတက့ၢ် . . . တၢ်စံးထီၣ်ပတြၢၤန့ၣ် မ့ၢ်အ ဂ့ၤအဘၣ်လီၤ” —စံးထီၣ်ပတြၢၤ ၁၄၇:၁.
၁-၃. (က) စံးထီၣ်ပတြၢၤ ၁၄၇ န့ၣ်ဘၣ်သ့ၣ်သ့ၣ် ပှၤကကွဲးအီၤလၢအခါဖဲလဲၣ်. (ခ) လၢစံးထီၣ်ပတြၢၤ ၁၄၇ အပူၤန့ၣ် ပကမၤလိဘၣ် တၢ်ဂ့ၢ်မနုၤလဲၣ်.
ညီနုၢ်န့ၣ် ဖဲပှၤတဂၤဂၤ မၤတၢ်တမံၤမံၤ မ့တမ့ၢ် တဲတၢ်တခါခါလၢ အထုးန့ၢ်ပှၤအသးအခါ ပှၤပတြၢၤအီၤလီၤ. မ့မ့ၢ်ယဟိဝၤယွၤန့ၣ် ပကြၢးစံးပတြၢၤအီၤအါန့ၢ်အန့ၣ်လီၤ. မ့ၢ်လၢပထံၣ်ဘၣ် အစိအကမီၤလၢ အတၢ်ဘၣ်တ့တဖၣ် ဒီးပထံၣ်ဘၣ်အတၢ်အဲၣ်ခီဖျိ ဟ့ၣ်လီၤပှၤအဖိခွါ လၢကပှ့ၤက့ၤပှၤအဃိလီၤ.
၂ ဖဲပဖး စံးထီၣ်ပတြၢၤ ၁၄၇ အခါ ပသ့ၣ်ညါဘၣ်လၢ ပှၤကွဲးထါစံးထီၣ်ပတြၢၤတဂၤအံၤ စံးထီၣ်ပတြၢၤယဟိဝၤယွၤလၢ တၢ်သူၣ်ဆူၣ်သးဆူၣ်အပူၤလီၤ. ဒီးအဝဲဟ့ၣ်ဂံၢ်ဟ့ၣ်ဘါစ့ၢ်ကီးပှၤဂၤလၢ ကစံးထီၣ်ပတြၢၤကစၢ်ယွၤန့ၣ်လီၤ.—ဖး စံးထီၣ်ပတြၢၤ ၁၄၇:၁, ၇, ၁၂ တက့ၢ်.
၃ စံးထီၣ်ပတြၢၤ ၁၄၇ အံၤမတၤကွဲးအီၤလဲၣ်န့ၣ် ပတသ့ၣ်ညါဘၣ်. ဘၣ်သ့ၣ်သ့ၣ် ပှၤလၢအကွဲး စံးထီၣ်ပတြၢၤ ၁၄၇ တဂၤအံၤကအိၣ်မူဘၣ်ဝဲဖဲ ယဟိဝၤယွၤ မၤပူၤဖျဲးထီၣ် ပှၤအံၣ်စရ့လးဖိတဖၣ် လၢဝ့ၢ်ဘၤဘူၤလိၣ်ဒီး ဆှၢက့ၤအဝဲသ့ၣ်ဆူ ဝ့ၢ်ယရူၤၡလ့ၣ် အဆၢကတီၢ်န့ၣ်လီၤ. (စံးထီၣ်ပတြၢၤ ၁၄၇:၂) ယွၤအပှၤဂီၢ်မုၢ်တဖၣ် က့ၤဘူၣ်ထီၣ်ဘါထီၣ်ဘၣ်ဝဲ ယဟိဝၤယွၤလၢ အဝဲသ့ၣ်အထံအကီၢ်အဃိ ပှၤကွဲးစံးထီၣ်ပတြၢၤတဂၤအံၤ စံးထီၣ်ပတြၢၤဝဲ ယဟိဝၤယွၤလီၤ. တကးဒံးဘၣ် အဝဲစံးထီၣ်ပတြၢၤဝဲ ယဟိဝၤယွၤလၢ တၢ်ဂ့ၢ်အဂၤအဃိစ့ၢ်ကီးလီၤ. လၢတၢ်ဂ့ၢ်မနုၤတဖၣ် အဃိလဲၣ်. လၢပတၢ်အိၣ်မူအပူၤ ဘၣ်မနုၤအဃိ ပဘၣ်ကိးထီၣ် “Hallelujah” (ဟါလ့ၤလူယၤ) မ့တမ့ၢ် စံးထီၣ်ပတြၢၤယဟိဝၤလဲၣ်.
ယဟိဝၤယွၤမၤမုာ်ထီၣ်က့ၤ ပှၤအသူၣ်ကၢ်အသးလီၤ
၄. ဖဲစီၤပၤကိရ့ၣ် ပျၢ်ကွံာ်ဝဲပှၤအံၣ်စရ့လးဖိတဖၣ်အခါ အဝဲသ့ၣ်ကတူၢ်ဘၣ်ဝဲဒ်လဲၣ်. ဒီးဘၣ်မနုၤအဃိလဲၣ်.
၄ ဖဲပှၤအံၣ်စရ့လးဖိတဖၣ် ဘၣ်တၢ်က့ၤကိးအီၤဆူ ဝ့ၢ်ဘၤဘူၤလိၣ်အခါ အဝဲသ့ၣ်ကတူၢ်ဘၣ်ဝဲ ဒ်လဲၣ်န့ၣ် ဆိကမိၣ်ကွၢ်တက့ၢ်. ပှၤလၢအက့ၤကိးအဝဲသ့ၣ်တဖၣ်န့ၣ် မၤမဲာ်ဆှးဒီး တဲအဝဲသ့ၣ်လၢ “သးဝံၣ်န့ၢ်ပှၤလၢ စံယိၣ်အတၢ်သးဝံၣ်တယုၢ်ယုၢ်တက့ၢ်.” ဘၣ်ဆၣ် မ့ၢ်လၢပှၤမၤဟးဂီၤ ဝ့ၢ်ယရူၤၡလ့ၣ်အဃိ ပှၤယူဒၤဖိတဖၣ် ကသးဝံၣ်တၢ်အဂီၢ် အဂံၢ်အဘါတအိၣ်လၢၤဘၣ်. (စံးထီၣ်ပတြၢၤ ၁၃၇:၁-၃, ၆) အဝဲသ့ၣ်အသူၣ်အုးသးအုးဒိၣ်မး ဒီးလိၣ်ဘၣ်ဝဲတၢ်မၤမုာ်ထီၣ်က့ၤအီၤလီၤ. ဘၣ်ဆၣ် ဒ်ယွၤအကလုၢ်ကထါ တဲဆိပာ်ဝဲအသိး ယဟိဝၤယွၤမၤစၢၤအပှၤဂီၢ်မုၢ်လီၤ. အဝဲကမၤစၢၤဝဲလၢ ကျဲဒ်လဲၣ်. ပၤရၣ်အစီၤပၤ ကိရ့ၣ်ဒုးနၢၤဝဲ ဝ့ၢ်ဘၤဘူၤလိၣ်ဝံၤအလီၢ်ခံ စံးဝဲဒ်အံၤ– ယွၤ “မၤလိာ်ယၤ ဒ်သိးယကသူၣ်ထီၣ်အဟံၣ်လၢ ယရူၤၡလ့ၣ်အပူၤ” လီၤ. တကးဒံးဘၣ်အဝဲတဲစ့ၢ်ကီး ပှၤအံၣ်စရ့လးဖိတဖၣ်လၢ– “လၢသုကျါန့ၣ် မ့ၢ်မတၤအိၣ်ဝဲလၢအပှၤဂီၢ်မုၢ် ခဲလၢာ်အကျါတဂၤလဲၣ်. မ်ယွၤ, အကစၢ်အိၣ်ဒီးအီၤတက့ၢ်. ကလဲၤထီၣ်ဒၣ်ဝဲတက့ၢ်.” (၂ ကွဲးနီၣ်တၢ် ၃၆:၂၃) ဖဲပှၤအံၣ်စရ့လးဖိလၢ အအိၣ်လၢဝ့ၢ်ဘၤဘူၤလိၣ်တဖၣ် နၢ်ဟူဘၣ်ဝဲ တၢ်ကတိၤအံၤအခါ အဝဲသ့ၣ်အသး ကမုာ်ထီၣ်ဝဲဒိၣ်မးလီၤ.
၅. ဘၣ်ဃးဒီး ယဟိဝၤယွၤအတၢ်စိတၢ်ကမီၤလၢ ကမၤစၢၤပှၤန့ၣ် ပှၤကွဲးစံးထီၣ်ပတြၢၤ စံးဝဲဒ်လဲၣ်.
၅ ယဟိဝၤယွၤမၤမုာ်ထီၣ်က့ၤ ပှၤအံၣ်စရ့လးဖိ ဒီတကလုာ်အသးတကးဒံးဘၣ် မၤမုာ်ထီၣ်စ့ၢ်ကီး ပှၤအံၣ်စရ့လးဖိ တဂၤစုာ်စုာ်အသးလီၤ. မုၢ်မဆါတနံၤအံၤ အဝဲမၤဝဲဒ်န့ၣ်စ့ၢ်ကီးလီၤ. ပှၤကွဲးစံးထီၣ်ပတြၢၤ စံးဝဲလၢယွၤ “မၤဘျါက့ၤပှၤအသူၣ်ကၢ်အသးလီၤ, ဒီးဘိၣ်ထီၣ်အပူၤလီၢ်တဖၣ်လီၤ.” (စံးထီၣ်ပတြၢၤ ၁၄၇:၃) ဖဲပဆူးပဆါအခါ မ့တမ့ၢ် ပသးလီၤစၢ်အခါ ပနာ်သ့သပှၢ်ကတၢၢ်လၢ ယဟိဝၤယွၤ ကကဟုကယာ်ပှၤလီၤ. ယဟိဝၤယွၤ သူၣ်အိၣ်သးအိၣ်ပှၤအဃိ ကမၤမုာ်ထီၣ်က့ၤပှၤဒီး ကမၤလီၤမၢ်ကွံာ် ပတၢ်သူၣ်အုးသးအုးတဖၣ်န့ၣ်လီၤ. (စံးထီၣ်ပတြၢၤ ၃၄:၁၈; ယၡါယၤ ၅၇:၁၅) အဝဲဟ့ၣ်ပှၤတၢ်ကူၣ်သ့ ဒီးတၢ်ဂံၢ်တၢ်ဘါ ဒ်သိးပတူၢ်တၢ်ကီတၢ်ခဲလၢ အဟဲဘၣ်ပှၤတခါဂ့ၤတခါဂ့ၤ ကန့ၢ်အဂီၢ်လီၤ.—ယၤကိာ် ၁:၅.
ယဟိဝၤယွၤ သူၣ်အိၣ်သးအိၣ်ပှၤအဃိ ကမၤမုာ်ထီၣ်က့ၤပှၤဒီး ကမၤလီၤမၢ်ကွံာ် ပတၢ်သူၣ်အုးသးအုးတဖၣ်န့ၣ်လီၤ
၆. တၢ်ကတိၤလၢ စံးထီၣ်ပတြၢၤ ၁၄၇:၄ အပူၤန့ၣ် ကဲဘျုးလၢ ပဂီၢ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၆ ဒီးအဂၤတခါန့ၣ် ပှၤကွဲးစံးထီၣ်ပတြၢၤ ကွၢ်ထီၣ်တၢ်လၢ မူခိၣ်ဒီး စံးဝဲလၢ ယဟိဝၤယွၤ “ဂံၢ်” ဆၣ်ဧိၤဖီဧိၤတဖၣ် ဒီး “ကိးဝဲအမံၤခဲလၢာ်လီၤ.” (စံးထီၣ်ပတြၢၤ ၁၄၇:၄) ပှၤကွဲးစံးထီၣ်ပတြၢၤ ထံၣ်ဝဲဆၣ်တဖၣ် ဘၣ်ဆၣ် ဆၣ်အိၣ်ပှဲၤဖျၢၣ်လဲၣ်န့ၣ် အဝဲတသ့ၣ်ညါဝဲဘၣ်. မုၢ်မဆါတနံၤအံၤစ့ၢ်ကီး ပှၤစဲအ့ၣ်ဖိသ့ၣ်တဖၣ် သ့ၣ်ညါဝဲလၢ ကလဲးစံၣ် (galaxy) အပူၤန့ၣ် ဆၣ်အိၣ်ဝဲအကကွဲၢ်လၢ အကထိတဖၣ်လီၤ. ဒီးလၢမူခိၣ်န့ၣ် ကလဲးစံၣ် အိၣ်ဝဲအကကွဲၢ်လၢအကထိတဖၣ်အကထိလီၤ. ဆၣ်အိၣ်ပှဲၤဖျၢၣ်လဲၣ်န့ၣ် ပှၤဟီၣ်ခိၣ်ဖိတဖၣ် တသ့ၣ်ညါဝဲဘၣ် ဘၣ်ဆၣ် တၢ်ဘၣ်တ့ကစၢ်သ့ၣ်ညါဝဲလီၤ. တကးဒံးဘၣ် အဝဲယုၢ်န့ၢ်ဝဲ ဆၣ်တဖျၢၣ်စုာ်စုာ်အမံၤလီၤ. (၁ ကရံၣ်သူး ၁၅:၄၁) ယွၤလၢအသ့ၣ်ညါ ဆၣ်တဖျၢၣ်စုာ်စုာ်အဂ့ၢ်တဂၤန့ၣ် အဝဲသ့ၣ်ညါနၤစ့ၢ်ကီးလီၤ. တကးဒံးဘၣ် နအိၣ်လၢတၢ်လီၢ်ဖဲလဲၣ်, နတူၢ်ဘၣ်တၢ်ဒ်လဲၣ် ဒီးနလိၣ်ဘၣ်တၢ်မနုၤလဲၣ်န့ၣ် အဝဲသ့ၣ်ညါဝဲလီၤတံၢ်လီၤဆဲးလီၤ.
၇, ၈. (က) ယဟိဝၤယွၤသ့ၣ်ညါဝဲလၢ ပမ့ၢ်ပှၤဒ်လဲၣ်. (ခ) ယဟိဝၤယွၤပာ်ဖျါထီၣ် အတၢ်အဲၣ်တၢ်ကွံ ဒ်လဲၣ်န့ၣ် ဟ့ၣ်တၢ်အဒိတက့ၢ်.
၇ နထံၣ်ဘၣ်တၢ်ကီတၢ်ခဲဒ်လဲၣ်န့ၣ် ယဟိဝၤယွၤသ့ၣ်ညါဝဲ ဒီးအဝဲအိၣ်ဒီးတၢ်စိတၢ်ကမီၤလၢ ကမၤစၢၤနၤလီၤ. (ဖး စံးထီၣ်ပတြၢၤ ၁၄၇:၅ တက့ၢ်.) ဘၣ်သ့ၣ်သ့ၣ် နကတူၢ်ဘၣ်လၢ နတၢ်ကီတၢ်ခဲန့ၣ် နးတလၢတုၤဒၣ်လဲာ် နတူၢ်တပှဲၤလၢၤဘၣ်. ကစၢ်ယွၤနၢ်ပၢၢ် ပတၢ်ဂံၢ်စၢ်ဘါစၢ် ဒီး “သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်အကမူၣ်လီၤ.” (စံးထီၣ်ပတြၢၤ ၁၀၃:၁၄) ပတလၢတပှဲၤဘၣ်အဃိ ပကမၤဘၣ် တၢ်ကမၣ်တဘျီဝံၤတဘျီ ဒီးပသးကဟးဂီၤဝဲလီၤ. တဘျီတခီၣ် ခီဖျိလၢ ပတဲကမၣ်ဘၣ်တၢ်, ပအိၣ်ဒီးတၢ်သူၣ်လီသးကွံလၢ အတကြၢးတဘၣ် ဒီးပသူၣ်က့ၣ်သးကါတၢ်အဃိ ပကသူၣ်အုးသးအုးန့ၣ်လီၤ. မ့မ့ၢ်ယဟိဝၤယွၤန့ၣ် အတၢ်ဂံၢ်စၢ်ဘါစၢ် တအိၣ်နီတမံၤဘၣ်. ဘၣ်ဆၣ် ပတူၢ်ဘၣ်တၢ်ဒ်လဲၣ်န့ၣ် အဝဲသ့ၣ်ညါဝဲ လၢလၢပှဲၤပှဲၤလီၤ.—ယၡါယၤ ၄၀:၂၈.
၈ ဒ်သိးနလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ် မ့ၢ်နတူၢ်ဘၣ်လၢ ယဟိဝၤယွၤ မၤစၢၤနၤတဘျီဘျီဧါ. (ယၡါယၤ ၄၁:၁၀, ၁၃) ပှၤလဲၤလၢညါလၢအမံၤမ့ၢ် ခယိကိၤန့ၣ် ဒိးန့ၢ်ဘၣ်ဝဲ ယဟိဝၤယွၤအတၢ်မၤစၢၤလီၤ. ဖဲအဝဲလဲၤသုးအသးလၢ တၢ်လီၢ်လၢအလီၤဘၣ်မူဒါအခါန့ၣ် အသးလီၤစၢ်ဒိၣ်မးလီၤ. ဘၣ်ဆၣ် ယဟိဝၤယွၤနၢ်ပၢၢ်အတၢ်တူၢ်ဘၣ်န့ၣ် ခယိကိၤ သ့ၣ်ညါဝဲဒ်လဲၣ်. လၢအတၢ်အိၣ်ဖှိၣ်အပူၤ ဒီပုၢ်ဝဲၢ်လၢ နၢ်ပၢၢ်အတၢ်တူၢ်ဘၣ်အိၣ်ဝဲအါမးလီၤ. အဝဲတူၢ်ဘၣ်ဝဲဒ်သိး ယဟိဝၤယွၤစံးဝဲ– “ယအဲၣ်နၤ မ့ၢ်လၢနမ့ၢ်ယဖိမုၣ်ဒီး နဟ့ၣ်လုၢ်ထီၣ်နသးလၢ ယအိၣ်အဃိလီၤ. တမ့ၢ်ထဲနမၤပှၤလဲၤလၢညါအဃိဘၣ်. ဒ်နမ့ၢ်ယပှၤအုၣ်အသးတဂၤအသိး ယအဲၣ်ဒိးလၢ နကအိၣ်ဒီးတၢ်သူၣ်ခုသးခုလီၤ.” ယဟိဝၤယွၤ ပာ်ဖျါထီၣ်ဝဲအတၢ် “သူၣ်ဆးအသးဆး” လၢပှၤဂံၢ်တဘၣ်ဘၣ် လၢနဖီခိၣ်ဒ်လဲၣ်.
ယဟိဝၤယွၤ ကတဲာ်ကတီၤန့ၢ်ပှၤ တၢ်လၢပလိၣ်ဘၣ်တဖၣ်
၉, ၁၀. ယဟိဝၤယွၤ ကမၤစၢၤပှၤလၢကျဲဒ်လဲၣ်, ဟ့ၣ်တၢ်အဒိတက့ၢ်.
၉ ပဝဲကိးဂၤဒဲး ပလိၣ်ဘၣ် တၢ်အီၣ်တၢ်အီ, တၢ်ကူတၢ်ကၤ ဒီးတၢ်အိၣ်တၢ်ဆိးအလီၢ်န့ၣ်လီၤ. ဘၣ်သ့ၣ်သ့ၣ် နကဘၣ်ယိၣ်တၢ်လၢ တၢ်အီၣ်တၢ်အီအဂီၢ်လီၤ. ဘၣ်ဆၣ်ယဟိဝၤယွၤ တ့လီၤဟီၣ်ခိၣ်လၢ ကဒုးမဲထီၣ်တၢ်အီၣ်တၢ်အီ လၢလၢလီၢ်လီၢ်လၢ ပှၤခဲလၢာ်အဂီၢ်လီၤ. တကးဒံးဘၣ် ကတဲာ်ကတီၤဝဲတၢ်အီၣ်တၢ်အီလၢ “စိးဝၣ်ဃးဖိလၢ အကိးထီၣ်တၢ်” တဖၣ်အဂီၢ်စ့ၢ်ကီးလီၤ. (ဖး စံးထီၣ်ပတြၢၤ ၁၄၇: ၈, ၉ တက့ၢ်.) စိးဝၣ်ဃးဖိတဖၣ်ဒၣ်လဲာ် ယဟိဝၤယွၤ မ့ၢ်ဒုးအီၣ်ဒုးအီအဝဲသ့ၣ်န့ၣ် ပနာ်သ့သပှၢ်ကတၢၢ်လၢ အဝဲကဟ့ၣ်ပှၤ တၢ်လၢပလိၣ်ဘၣ်တဖၣ်န့ၣ်လီၤ.—စံးထီၣ်ပတြၢၤ ၃၇:၂၅.
၁၀ ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် ဒ်သိးပတၢ်နာ်ကဂၢၢ်ကျၢၤအဂီၢ် ယဟိဝၤယွၤကတဲာ်ကတီၤန့ၢ်ပှၤ တၢ်လၢပလိၣ်ဘၣ်တဖၣ်လီၤ. ဒီးအဝဲဟ့ၣ်ပှၤ “အတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ်ကယဲၢ်ပသ့ၣ်ညါနၢ်ပၢၢ်တၢ်” န့ၣ်လီၤ. (ဖံလံးပံၤ ၄:၆, ၇) အဒိ, ဒီပုၢ်ဝဲၢ်မးစူၤဒီးအမါ ထံၣ်ဘၣ်ဝဲ ယဟိဝၤယွၤအတၢ်မၤစၢၤလီၤ. ဖဲ ၂၀၁၁ စူၣ်နၣ်မံး ကဲထီၣ်ဖဲကီၢ်ယပၣ်အခါ အဝဲသ့ၣ်မ့ၢ်တထီၣ်အိၣ်လၢ ဟံၣ်ခိၣ်ဘၣ်န့ၣ် ကသံဝဲလီၤ. ဖဲန့ၣ်အဆၢကတီၢ် အဝဲသ့ၣ် အတၢ်ဖိတၢ်လံၤဟးဂီၤကွံာ်ဝဲခဲလၢာ်လီၤ. အဝဲသ့ၣ်ဘၣ်အိၣ်လၢ တၢ်ခံးကျါ ဒီးလၢတၢ်ချံၣ်ကျါ ဒီတနၤကျၢၤညါလီၤ. ဒီးလၢခံတဂီၤန့ၣ် အဝဲသ့ၣ်ဟးဃုဝဲတၢ်လၢ ကဟ့ၣ်ဂံၢ်ဟ့ၣ်ဘါအီၤအဂီၢ်န့ၣ်လီၤ. အဝဲသ့ၣ်ထံၣ်ဝဲထဲ 2006 Yearbook of Jehovah’s Witnesses တဘ့ၣ်လီၤ. ဖဲမးစူၤအိးထီၣ်လံာ်အခါ အဝဲထံၣ်ဝဲတၢ်ဂ့ၢ်အခိၣ်တီလၢအမ့ၢ် “The Deadliest Tsunamis Ever Recorded.” ဒီးတၢ်ဂ့ၢ်အံၤဘၣ်ဃးဒီး ဟီၣ်ခိၣ်ဟူးလၢ စူၤမါတြၤ ဖဲ ၂၀၀၄ ဒီးဒုးကဲထီၣ်ဝဲ စူၣ်နၣ်မံး အဒိၣ်ကတၢၢ်တခါန့ၣ်လီၤ. ဖဲမးစူၤဒီးအမါ ဖးဘၣ်ဝဲဒီပုၢ်ဝဲၢ်တဖၣ် အတၢ်လဲၤခီဖျိအခါ အဝဲသ့ၣ်ဟီၣ်ဝဲလီၤ. အဝဲသ့ၣ်တူၢ်ဘၣ်ဝဲလၢ ယဟိဝၤယွၤဟ့ၣ်အီၤ တၢ်ဂံၢ်တၢ်ဘါလၢ အလိၣ်ဘၣ်ဝဲတဖၣ်န့ၣ်လီၤ. တကးဒံးဘၣ်ယဟိဝၤယွၤ ကွၢ်ထွဲအဝဲသ့ၣ်လၢ ကျဲလၢအဂၤစ့ၢ်ကီးလီၤ. လၢကီၢ်ယပၣ်အပူၤ ဒီပုၢ်ဝဲၢ်လၢအအိၣ်လၢ တၢ်လီၢ်အဂၤတဖၣ် ဟ့ၣ်အဝဲသ့ၣ်တၢ်အီၣ်တၢ်အီ ဒီးတၢ်ကူတၢ်သိးတဖၣ်လီၤ. ခီဖျိလၢတၢ်ကရၢကရိဆှၢလီၤဝဲ ဒီပုၢ်ဝဲၢ်တဖၣ်ဆူ အဝဲသ့ၣ်အအိၣ်အဃိ ကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ်ဒိၣ်မးလီၤ. မးစူၤတဲဝဲလၢ- “ယတူၢ်ဘၣ်လၢ ယဟိဝၤယွၤ အိၣ်လၢပဝဲတဂၤစုာ်စုာ်အကပၤ ဒီးမၤမုာ်ထီၣ်က့ၤပှၤလီၤ. အဃိမ့ၢ်တၢ်လၢ အလီၤသူၣ်မံသးမုာ်ဒိၣ်မးလီၤ.” ဒ်သိးပတၢ်နာ်ကဂၢၢ်ကျၢၤအဂီၢ် ယဟိဝၤယွၤ မၤစၢၤပှၤလၢနီၢ်သးတကပၤ တကးဒံးဘၣ် မၤစၢၤစ့ၢ်ကီးပှၤလၢ နီၢ်ခိအတၢ်လိၣ်ဘၣ်တဖၣ်အဂီၢ်လီၤ.
ယွၤအတၢ်မၤစၢၤ ကဲဘျုးဝဲ
၁၁. ဒ်သိးယွၤအတၢ်မၤစၢၤ ကကဲဘျုးလၢပဂီၢ်န့ၣ် ပကဘၣ်မၤ တၢ်မနုၤလဲၣ်.
၁၁ “ပှၤလၢအဆီၣ်လီၤအသးန့ၣ် ယွၤဝံၣ်ဆၢထၢၣ်အီၤလီၤ.” ယဟိဝၤယွၤ အဲၣ်ပှၤဒီးထီဘိန့ၣ် အဲၣ်ဒိးမၤစၢၤပှၤလီၤ. (စံးထီၣ်ပတြၢၤ ၁၄၇: ၆) ဒ်သိးယွၤအတၢ်မၤစၢၤ ကကဲဘျုးလၢပဂီၢ်န့ၣ် ပကဘၣ်မၤတၢ်မနုၤလဲၣ်. ပကြၢးအိၣ်ဒီး တၢ်ရ့လိာ်သးဒီး ယဟိဝၤယွၤဘူးဘူးတံၢ်တံၢ်လီၤ. ဒ်သိးပမၤဒ်န့ၣ် ကသ့အဂီၢ် ပကဘၣ်အိၣ်ဒီး တၢ်ဆီၣ်လီၤသးလီၤ. (စဖါနယၤ ၂:၃) ပှၤလၢအိၣ်ဒီးတၢ်ဆီၣ်လီၤသးတဖၣ်န့ၣ် နာ်ဝဲလၢ ယဟိဝၤယွၤ ကမၤဘၣ်ဂီၢ်က့ၤ တၢ်တတီတလိၤ ဒီးကမၤလီၤမၢ်ကွံာ် တၢ်နးတၢ်ဖှီၣ်လၢအဝဲသ့ၣ် ထံၣ်ဘၣ်ဝဲတဖၣ်န့ၣ်လီၤ. ယဟိဝၤယွၤဘၣ်သူၣ်ဘၣ်သးဝဲ ပှၤသ့ၣ်တဖၣ်အံၤလီၤ.
၁၂, ၁၃. (က) ဒ်သိးယွၤအတၢ်မၤစၢၤ ကကဲဘျုးလၢပဂီၢ်န့ၣ် ပကဘၣ်ဟးဆှဲးတၢ်မနုၤလဲၣ်. (ခ) ယဟိဝၤယွၤဘၣ်သူၣ်ဘၣ်သး ပှၤဒ်လဲၣ်တဖၣ်လဲၣ်.
၁၂ “မ့မ့ၢ်ပှၤတတီတလိၤဘၣ်န့ၣ်” ကစၢ်ယွၤ “ဆီၣ်လီၤဝဲလၢဟီၣ်ခိၣ်လီၤ.” (စံးထီၣ်ပတြၢၤ ၁၄၇:၆) ပတအဲၣ်ဒိးလၢ တၢ်ကကဲထီၣ်အသးဒီးပှၤဒ်အံၤဘၣ်. ပအဲၣ်ဒိးလၢ ကစၢ်ယွၤကပာ်ဖျါထီၣ် အတၢ်အဲၣ်လၢအတီလၢ ပဖီခိၣ်န့ၣ်လီၤ. လၢတၢ်န့ၣ်အဃိ ပကဘၣ်သးဟ့တၢ်လၢ ယွၤသးဟ့ဝဲတဖၣ်န့ၣ်လီၤ. (စံးထီၣ်ပတြၢၤ ၉၇:၁၀) အဒိ, ပကဘၣ်သးဟ့ တၢ်မၤကမၣ်မုၣ်ကမၣ်ခွါန့ၣ်လီၤ. အခီပညီန့ၣ် ပကဘၣ်ဟးဆှဲး တၢ်ကွၢ်တၢ်ဂီၤဘ့ၣ်ဆ့ ဒီးတၢ်တမံၤလၢ်လၢ်လၢ ကထိၣ်ဟူးထိၣ်ဂဲၤထီၣ်ပှၤ ဒ်သိးပကမၤဘၣ် တၢ်မၤကမၣ်မုၣ်ကမၣ်ခွါအဂီၢ်န့ၣ်လီၤ. (စံးထီၣ်ပတြၢၤ ၁၁၉:၃၇; မးသဲ ၅:၂၈) ပကဟးဆှဲးတၢ်သ့ၣ်တဖၣ်အံၤအဂီၢ် တမ့ၢ်တၢ်လၢအညီထီဘိဘၣ်. ဘၣ်ဆၣ် ပမ့ၢ်ဂုာ်ကျဲးစၢး ဟးဆှဲးအီၤန့ၣ် ပကဒိးန့ၢ်ဘၣ် ယဟိဝၤယွၤအတၢ်ဆိၣ်ဂ့ၤလီၤ.
၁၃ ဒ်သိးပကဟးဆှဲးတၢ်လ့ပစီအဂီၢ် ပလိၣ်ဘၣ် ယွၤအတၢ်မၤစၢၤလီၤ. လၢတၢ်န့ၣ်အဃိ ပကဘၣ်သန့ၤပသးလၢ ယဟိဝၤယွၤလီၤ. ပမ့ၢ်သန့ၤပသးလၢ ပှၤဟီၣ်ခိၣ်ဖိ မ့တမ့ၢ် ပနီၢ်ကစၢ်အဂံၢ်အဘါန့ၣ် မ့ၢ်ကစၢ်ယွၤကဘၣ်သူၣ်ဘၣ်သးဝဲဧါ. လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ “တဘၣ်ဘၣ်အသးလၢ ကသ့ၣ်အဂံၢ်အဘါ” ဒီး “တအဲၣ်ဒိးဘၣ် ပှၤကညီအခီၣ်ဘၣ်.” (စံးထီၣ်ပတြၢၤ ၁၄၇:၁၀) လၢတၢ်န့ၣ်အဃိ ပကဘၣ်ဆဲးဃ့ဘါထုကဖၣ်လၢ ယဟိဝၤယွၤအအိၣ် ဒ်သိးကမၤစၢၤပှၤလၢ ပကမၤနၢၤကွံာ် ပတၢ်ဂံၢ်စၢ်ဘါစၢ်တဖၣ်န့ၣ်လီၤ. ယဟိဝၤယွၤန့ၣ် အသးအိၣ်ဒိကနၣ် ပတၢ်ထုကဖၣ်ထီဘိလီၤ. ယဟိဝၤယွၤအဲၣ်ဝဲ “ပှၤလၢအပျံၤအီၤ, ပှၤလၢအကွၢ်လၢ် အဘျုးအဖှိၣ်အကျဲ” တဖၣ်လီၤ. (စံးထီၣ်ပတြၢၤ ၁၄၇:၁၁) ကစၢ်ယွၤန့ၣ် အိၣ်ဒီးတၢ်သးတီ ဒီးအဲၣ်ပှၤအဃိ ပသ့ၣ်ညါလၢ အဝဲကဆဲးမၤစၢၤပှၤ ဒ်သိးပကမၤနၢၤကွံာ် ပတၢ်သူၣ်လီသးကွံလၢ အတကြၢးတဘၣ်တဖၣ်န့ၣ်လီၤ.
၁၄. ဘၣ်မနုၤအဃိ ပှၤကွဲးစံးထီၣ်ပတြၢၤ ဒိးန့ၢ်ဘၣ်တၢ်သူၣ်မံသးမုာ်လဲၣ်.
၁၄ ယဟိဝၤယွၤအၢၣ်လီၤပှၤလၢ ဖဲပထံၣ်ဘၣ်တၢ်ကီတၢ်ခဲအခါ အဝဲကမၤစၢၤပှၤလီၤ. ဖဲပှၤအံၣ်စရ့လးဖိသ့ၣ်တဖၣ် ဟဲက့ၤကဒါက့ၤလၢ ဝ့ၢ်ယရူၤၡလ့ၣ်အခါ ပှၤကွဲးစံးထီၣ်ပတြၢၤ ဆိကမိၣ်ထီၣ်က့ၤဝဲ ဘၣ်ဃးဒီး တၢ်လၢယဟိဝၤယွၤမၤစၢၤအဝဲသ့ၣ် အဂ့ၢ်န့ၣ်လီၤ. ပှၤကွဲးစံးထီၣ်ပတြၢၤ သးဝံၣ်ထီၣ်ဝဲလၢယွၤ “မၤဆူၣ်လံနတြဲၤအနီၣ်ဘိ, ဆိၣ်ဂ့ၤဆိၣ်ဝါလံ နဖိနလံၤအိၣ်လၢနပူၤလီၤ. ပာ်လီၤတၢ်ဃူတၢ်ဖိးလၢနကီၢ်အဃၢၤ” လီၤ. (စံးထီၣ်ပတြၢၤ ၁၄၇:၁၃, ၁၄) အဝဲသ့ၣ်ညါဝဲလၢ ယဟိဝၤယွၤဒီသဒၢအပှၤဂီၢ်မုၢ် ဒီးမၤဂၢၢ်ကျၢၤထီၣ် ဝ့ၢ်အတြဲၤအဃိ အဝဲသူၣ်မံသးမုာ်ဝဲဒိၣ်မးလီၤ.
ဖဲပသူၣ်ကိၢ်သးဂီၤလၢ တၢ်မၤကွၢ်အဃိအခါ ကစၢ်ယွၤအကလုၢ်ကထါ ကမၤစၢၤပှၤဒ်လဲၣ် (ကွၢ်လံာ်အဆၢ ၁၅-၁၇)
၁၅-၁၇. (က) တဘျီတခီၣ် လၢတၢ်မၤကွၢ်အဃိ ပကတူၢ်ဘၣ်ဒ်လဲၣ်. ဘၣ်ဆၣ် ယဟိဝၤယွၤသူဝဲ အကလုၢ်ကထါ လံာ်စီဆှံဒီး မၤစၢၤပှၤဒ်လဲၣ်. (ခ) ယဟိဝၤယွၤအကလုၢ်ကထါ “ဃ့ၢ်ဝဲချ့မး” ဒ်သိးကမၤစၢၤပှၤဒ်လဲၣ်. ဟ့ၣ်အဒိတက့ၢ်.
၁၅ နအိၣ်ဒီးတၢ်ကီတၢ်ခဲအဃိ ဘၣ်သ့ၣ်သ့ၣ် နကဘၣ်ယိၣ်တၢ်လီၤ. ဘၣ်ဆၣ် ယဟိဝၤယွၤဟ့ၣ်နၤ တၢ်ကူၣ်သ့ဒ်သိး နမၤဘၣ်ဂီၢ်က့ၤ နတၢ်ကီတၢ်ခဲတဖၣ်ကန့ၢ်အဂီၢ်လီၤ. ပှၤကွဲးစံးထီၣ်ပတြၢၤ စံးဝဲလၢကစၢ်ယွၤ “မၢအတၢ်မၤလိာ်လဲၤတၢ်လၢ ဟီၣ်ခိၣ်ချၢ, အတၢ်ကတိၤဃ့ၢ်ဝဲချ့မးလီၤ.” ဒီးအဝဲပာ်ဖျါထီၣ်စ့ၢ်ကီးဝဲလၢ ကစၢ်ယွၤန့ၣ်ဒုးလီၤ မူခိၣ်ဖီ, ပစီၤထံလီၤသကၤ ဒီးသူၣ်လီၤ. ဒီးအဝဲထုးထီၣ်တၢ်သံကွၢ်လၢ “မ့ၢ်မတၤဆၢထၢၣ်လၢ အတၢ်ဂိၢ်အမဲာ်ညါ သ့တဂၤလဲၣ်.” ဝံၤဒီးဆဲးတဲဝဲလၢ မ့မ့ၢ်ယဟိဝၤယွၤန့ၣ် “မၢလီၤအတၢ်မၤလိာ်, ဒီးမၤပှံၢ်လီၤအီၤ, ဒုးအူထီၣ်အကလံၤ, ဒီးထံယွၤဝဲလီၤ.” (စံးထီၣ်ပတြၢၤ ၁၄၇:၁၅-၁၈) ဒ်သိးနလဲၤခီဖျိ တၢ်ကီတၢ်ခဲသ့ၣ်တဖၣ်ကန့ၢ်အဂီၢ် ကစၢ်ယွၤလၢ အသ့တၢ်လၢာ် ဒီးအိၣ်ဒီးတၢ်စိတၢ်ကမီၤလၢ အတ့လီၤပစီၤထံ ဒီးမူခိၣ်ဖီတဂၤအံၤ မၤစၢၤနၤတသ့ဘၣ်ဧါ.
လၢနတၢ်အိၣ်မူအပူၤ ယဟိဝၤယွၤဟံးစုနဲၣ်ကျဲ နၤလၢ အဆိအချ့န့ၣ် မ့ၢ်နထံၣ်ဘၣ်အီၤစ့ၢ်ကီးဧါ.
၁၆ မုၢ်မဆါတနံၤအံၤစ့ၢ်ကီး ယဟိဝၤယွၤဟံးစုနဲၣ်ကျဲပှၤ ခီဖျိအကလုၢ်ကထါလံာ်စီဆှံန့ၣ်လီၤ. ပှၤကွဲးစံးထီၣ်ပတြၢၤ တဲဝဲလၢ ယဟိဝၤယွၤ အတၢ်ကတိၤ “ဃ့ၢ်ဝဲချ့မး” ဒ်သိးကမၤစၢၤပှၤအဂီၢ်လီၤ. ဖဲပလိၣ်ဘၣ်အဆၢကတီၢ်န့ၣ် ကစၢ်ယွၤ ကဟံးစုနဲၣ်ကျဲပှၤ လၢကျဲလၢအဘၣ်န့ၣ်လီၤ. တၢ်ဖးလံာ်စီဆှံ, လံာ်လဲၢ်လၢ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” ကတဲာ်ကတီၤန့ၢ်ပှၤ, JW တၢ်ဂီၤမူ တၢ်ရဲၣ်တၢ်ကျဲၤ, jw.org, ဒီးတၢ်ဟ့ၣ်ဂံၢ်ဟ့ၣ်ဘါလၢ တၢ်အိၣ်ဖှိၣ်သးပှၢ်ဒီး ပဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်အအိၣ်န့ၣ် ကဲဘျုးလၢပဂီၢ်ထဲလဲၣ်န့ၣ် ဆိကမိၣ်ကွၢ်တက့ၢ်. (မးသဲ ၂၄:၄၅) လၢနတၢ်အိၣ်မူအပူၤ ယဟိဝၤယွၤဟံးစုနဲၣ်ကျဲနၤလၢ အဆိအချ့န့ၣ် မ့ၢ်နထံၣ်ဘၣ်အီၤစ့ၢ်ကီးဧါ.
၁၇ ဒီပုၢ်ဝဲၢ်မုၣ်စမိ(န်) ထံၣ်ဘၣ်ဝဲလၢ ကစၢ်ယွၤအကလုၢ်ကထါမၤစၢၤအီၤန့ၣ်လီၤ. အဝဲတူၢ်ဘၣ်ဝဲလၢ အမ့ၢ်ပှၤလၢအလုၢ်အပှ့ၤတအိၣ်ဘၣ် ဒီးဆိကမိၣ်ဝဲလၢ ယဟိဝၤယွၤစ့ၢ်ကီးတအဲၣ်အီၤဘၣ်. ဘၣ်ဆၣ် ဖဲအသးလီၤစၢ်အခါ အဝဲဆဲးဃ့ဘါထုကဖၣ်လၢ ယဟိဝၤယွၤအအိၣ်ဒီး မၢယဟိဝၤယွၤမၤစၢၤအီၤလီၤ. တကးဒံးဘၣ် အဝဲဆဲးမၤဝဲ နီၢ်ကစၢ်တၢ်မၤလိလံာ်စီဆှံစ့ၢ်ကီးလီၤ. ခီဖျိလၢ စမိ(န်) မၤဝဲဒ်အံၤအဃိ အဝဲစံးဝဲလၢ “ဖဲယလိၣ်ဘၣ် တၢ်မၤစၢၤတဘျီလၢ်လၢ်န့ၣ် ယဒိးန့ၢ်ဘၣ် ယဟိဝၤယွၤ အတၢ်ဟံးစုနဲၣ်ကျဲဒီး အတၢ်ဟ့ၣ်ဂံၢ်ဟ့ၣ်ဘါလီၤ.” လၢတၢ်န့ၣ်အဃိ ခဲအံၤအဝဲအိၣ်ဒီး တၢ်ထံၣ်လၢအဂ့ၤလၢ အနီၢ်ကစၢ်အဖီခိၣ်န့ၣ်လီၤ.
၁၈. ဘၣ်မနုၤအဃိ နတူၢ်ဘၣ်လၢ ယဟိဝၤယွၤ အိၣ်ဘူးဒီးနၤလဲၣ်, ဒီးဘၣ်မနုၤအဃိ ပဘၣ် “စံးထီၣ်ပတြၢၤယွၤ” လဲၣ်.
၁၈ ပှၤကွဲးစံးထီၣ်ပတြၢၤတဂၤ သ့ၣ်ညါဝဲလၢ ယဟိဝၤယွၤ ဃုထၢပှၤအံၣ်စရ့လးဖိတဖၣ် ဒ်သိးကကဲထီၣ်အပှၤဂီၢ်မုၢ်အဂီၢ်လီၤ. အဝဲသ့ၣ် မ့ၢ်ကလုာ်ဒူၣ်ထဲတဒူၣ်လၢ ဒိးန့ၢ်ဘၣ်ဝဲ ကစၢ်ယွၤ “အကလုၢ်ကထါ, ဒီးအတၢ်မၤလိာ်” လီၤ. (ဖး စံးထီၣ်ပတြၢၤ ၁၄၇:၁၉, ၂၀ တက့ၢ်.) မုၢ်မဆါတနံၤအံၤ ပဘၣ်တၢ်သ့ၣ်ညါပှၤလၢ ပမ့ၢ်ယဟိဝၤပှၤအုၣ်အသးအဃိ မ့ၢ်တၢ်ခွဲးတၢ်ယာ်လီၤဆီလီၤ. ပသးခုဒိၣ်မးလၢ ပသ့ၣ်ညါဘၣ် ယဟိဝၤယွၤအဂ့ၢ်, ပဒိးန့ၢ်ဘၣ်အတၢ်ဟံးစုနဲၣ်ကျဲလၢ လံာ်စီဆှံအပူၤဒီး ပရ့လိာ်သးဒီးအီၤ ဘူးဘူးတံၢ်တံၢ်သ့အဃိလီၤ. ဒ်ပှၤကွဲးစံးထီၣ်ပတြၢၤ ၁၄၇ အသိး တၢ်ဂ့ၢ်လၢပကဘၣ် “စံးထီၣ်ပတြၢၤယွၤ” န့ၣ်အိၣ်ဝဲအါမးလီၤ. ဒီးပကဘၣ်ဟ့ၣ်ဂံၢ်ဟ့ၣ်ဘါ ပှၤဂၤလၢကမၤဝဲ ဒ်န့ၣ်စ့ၢ်ကီးလီၤ.
