နအဲၣ်ဒိးလၢ မတၤတဂၤကသ့ၣ်ညါ ဒီးပာ်လုၢ်ပာ်ပှ့ၤနၤလဲၣ်
“ယွၤတမ့ၢ်ဘၣ် ပှၤတတီတလိၤဘၣ်လၢ အကသးပ့ၤနီၣ်သုတၢ်မၤ, ဒီးသုတၢ်အဲၣ်တၢ်ကွံလၢ သုအဲၣ်အမံၤ . . . အဂ့ၢ်ဘၣ်.”—ဧ့ၤဘြံၤ ၆:၁၀.
၁. ပဝဲခဲလၢာ် ပအဲၣ်ဒိးတၢ်မနုၤလဲၣ်.
ပှၤလၢနသ့ၣ်ညါအီၤ ဒီးပာ်ကဲအီၤတဂၤ မၤနီၣ်နမံၤမ့ၢ်တဘၣ်လၢၤဘၣ် မ့တမ့ၢ် ကွၢ်နီၣ်နၤမ့ၢ်တဘၣ်ဘၣ်န့ၣ် နကတူၢ်ဘၣ်ဒ်လဲၣ်. နသးကဘၣ်ဒိလီၤ. ဘၣ်မနုၤအဃိလဲၣ်. မ့ၢ်လၢပဝဲတဂၤစုာ်စုာ် ပအဲၣ်ဒိးလၢ ပှၤကသ့ၣ်ညါ ဒီးပာ်လုၢ်ပာ်ပှ့ၤပှၤလီၤ. ဘၣ်ဆၣ် ပတအဲၣ်ဒိးထဲလၢ ပှၤကသ့ၣ်ညါပမံၤဘၣ်. ပအဲၣ်ဒိးလၢ ပှၤကသ့ၣ်ညါလၢ ပမ့ၢ်ပှၤဒ်လဲၣ်တဂၤလဲၣ် ဒီးပမၤတ့ၢ်တၢ်မနုၤလဲၣ်န့ၣ်လီၤ.—၄ မိၤၡ့ ၁၁:၁၆; ယိၤဘး ၃၁:၆.
၂, ၃. ပအဲၣ်ဒိးလၢ ပှၤဂၤကသ့ၣ်ညါ ဒီးပာ်လုၢ်ပာ်ပှ့ၤပှၤ ဘၣ်ဆၣ် တဘျီတခီၣ် တၢ်မနုၤကဲထီၣ်အသးသ့လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၂ ပအဲၣ်ဒိးလၢ ပှၤကသ့ၣ်ညါ ဒီးပာ်လုၢ်ပာ်ပှ့ၤပှၤလီၤ. ဘၣ်ဆၣ် ပမ့ၢ်တပလီၢ်ပသးဘၣ်န့ၣ် ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ကဆီၣ်ထွဲပှၤဒ်သိး ပကအဲၣ်ဒိးကဲထီၣ် ပှၤလၢအမံၤဟူသၣ်ဖျါ ဒီးပှၤလၢအရ့ဒိၣ်န့ၣ်လီၤ. ပမ့ၢ်မၤဒ်န့ၣ်န့ၣ် လီၤဂာ်ဒ်သိး ပတပာ်လုၢ်ပာ်ပှ့ၤ ယဟိဝၤယွၤ ဒီးဟ့ၣ်အီၤတၢ်လၢ အကြၢးဒိးန့ၢ်ဘၣ်ဝဲ တဖၣ်န့ၣ်ဘၣ်.—လီၣ်ဖျါ ၄:၁၁.
၃ လၢယ့ၣ်ၡူးအစိၤန့ၣ် တၢ်ဘူၣ်တၢ်ဘါခိၣ်နၢ်တဖၣ် အိၣ်ဒီးတၢ်ထံၣ်လၢ အကမၣ်လီၤ. လၢတၢ်န့ၣ်အဃိ ယ့ၣ်ၡူးဟ့ၣ်ပလီၢ် အပျဲၢ်အဘီၣ်တဖၣ်လၢ “ပှၤကွဲးလံာ်, လၢအအဲၣ်ဒိးဝဲလၢ လူၤကၣ် ၂၀:၄၆, ၄၇) ဘၣ်ဆၣ် မ့မ့ၢ်မုၣ်ကမဲလၢ အထၢနုာ်တိၢ်ခံဘ့ၣ်လၢ တၢ်မၤဘူၣ်အဒၢပူၤန့ၣ် ယ့ၣ်ၡူးစံးပတြၢၤအီၤလီၤ. ပှၤဂၤမ့ၢ်တသ့ၣ်ညါ ဒီးပာ်လုၢ်ပာ်ပှ့ၤအီၤသနာ်က့ ယ့ၣ်ၡူးသ့ၣ်ညါ ဒီးပာ်လုၢ်ပာ်ပှ့ၤအီၤလီၤ. (လူၤကၣ် ၂၁:၁-၄) ယ့ၣ်ၡူးအတၢ်ထံၣ်န့ၣ် လီၤဆီလိာ်အသးဒီး ပှၤဂၤအတၢ်ထံၣ်လီၤ. မ့ၢ်ပအဲၣ်ဒိးလၢ မတၤကသ့ၣ်ညါ ဒီးပာ်လုၢ်ပာ်ပှ့ၤပှၤလဲၣ်. ဒ်သိးပကအိၣ်ဒီးတၢ်ထံၣ်ဒ် ယဟိဝၤယွၤအသိးအဂီၢ် တၢ်မၤလိတခါအံၤ ကမၤစၢၤပှၤလီၤ.
အလဲၤဟးသိးဆ့ထီထီကလဲာ်, ဒီးအဲၣ်ဒိးတၢ်ကတိၤဒိၣ်အီၤလၢဖၠါပူၤ, ဒီးလီၢ်ဆ့ၣ်နီၤလၢ အလၤကပီၤဒိၣ်ကတၢၢ် လၢဘူၣ်ဘျီၣ်ပူၤ, ဒီးတၢ်အလီၢ်ဂ့ၤကတၢၢ်လၢ တၢ်အီၣ်တၢ်အီအပူၤတဖၣ်န့ၣ်, ပလီၢ်သုသးလၢအီၤတက့ၢ်.” ဒီးတဲကဒီးဝဲလၢ ပှၤသ့ၣ်တဖၣ်အံၤ “ကဘၣ်တၢ်စံၣ်ညီၣ် ဒိၣ်ဒၣ်တၢ်တက့ၢ်လီၤ.” (ပှၤအဂ့ၤကတၢၢ်တဂၤလၢ ကသ့ၣ်ညါ ဒီးပာ်လုၢ်ပာ်ပှ့ၤပှၤ
၄. ပှၤအဂ့ၤကတၢၢ်တဂၤလၢ ကသ့ၣ်ညါဒီးပာ်လုၢ်ပာ်ပှ့ၤပှၤန့ၣ် မ့ၢ်မတၤတဂၤလဲၣ် ဒီးဘၣ်မနုၤအဃိလဲၣ်.
၄ ပှၤအဂ့ၤကတၢၢ်တဂၤလၢ ကသ့ၣ်ညါဒီးပာ်လုၢ်ပာ်ပှ့ၤပှၤန့ၣ် မ့ၢ်မတၤတဂၤလဲၣ်. ပှၤအါဂၤန့ၣ်အဲၣ်ဒိးလၢ ပှၤကသ့ၣ်ညါ ဒီးပာ်လုၢ်ပာ်ပှ့ၤအဝဲသ့ၣ် ခီဖျိ အတၢ်ကူၣ်ဘၣ်ကူၣ်သ့လၢ အပတီၢ်ထီ, တၢ်ဖံးတၢ်မၤလၢအဂ့ၤ ဒီးတၢ်မံၤဟူသၣ်ဖျါလၢ ဟီၣ်ခိၣ်န့ၣ်လီၤ. စီၤပီလူးတဲဖျါထီၣ်ဝဲ ပှၤလၢအဂ့ၤကတၢၢ် လၢကသ့ၣ်ညါဒီးပာ်လုၢ်ပာ်ပှ့ၤပှၤ တဂၤအဂ့ၢ်န့ၣ်လီၤ. အဝဲတဲဝဲလၢ “မ့မ့ၢ်ခဲကနံၣ်အံၤ, သုသ့ၣ်ညါယွၤ, ဒ်ပစံးတၢ်အသိး, ယွၤသ့ၣ်ညါတ့ၢ်သု သတးဒီး, ဘၣ်မနုၤလၢ သုဃၣ်ကဒါက့ၤသုသးဆူ တၢ်အမိၢ်ပှၢ်လၢ အဂံၢ်အဘါစၢ်ဒီးဖှီၣ်ဝဲယာ်ဝဲလၢ သုသးအိၣ်ကဲက့ၤကဒီး ကုၢ်လၢအဖီလာ်လဲၣ်.” (ကလၤတံ ၄:၉) ကစၢ်ယွၤမ့ၢ် တၢ်ဘၣ်တ့ခဲလၢာ်အကစၢ်လီၤ. လၢတၢ်န့ၣ်အဃိ “ယွၤသ့ၣ်ညါတ့ၢ်” ပှၤန့ၣ်မ့ၢ်တၢ်ခွဲးတၢ်ယာ် ဖးဒိၣ်တခါလီၤ. ယဟိဝၤယွၤ သ့ၣ်ညါဝဲလၢ ပမ့ၢ်ပှၤဒ်လဲၣ်တဂၤလဲၣ်. အဝဲအဲၣ်ပှၤ ဒီးအဲၣ်ဒိးကဲပတံၤသကိးလီၤ. ယဟိဝၤယွၤ တ့လီၤပှၤဒ်သိး ပကကဲအတံၤသကိးအဂီၢ်လီၤ.—စံၣ်တဲၤတဲလီၤတၢ် ၁၂:၁၃, ၁၄.
၅. ဒ်သိးကစၢ်ယွၤ ကသ့ၣ်ညါပှၤအဂီၢ် ပကဘၣ်မၤတၢ်မနုၤလဲၣ်.
၅ စီၤမိၤၡ့န့ၣ်မ့ၢ်ဝဲ ယဟိဝၤယွၤ အတံၤသကိးလီၤ. လၢတၢ်န့ၣ်အဃိ ဖဲအဝဲဃ့ယဟိဝၤယွၤလၢ “ဘိးဘၣ်သ့ၣ်ညါလၢ်ယၤလၢနကျဲ” အခါ ယဟိဝၤယွၤ စံးဆၢက့ၤအီၤလၢ “ယကမၤတၢ်အံၤတမံၤလၢ နစံးတၢ်စ့ၢ်ကီးလီၤ. အဂ့ၢ်ဒ်အံၤ, နဘၣ်ဘျုးဘၣ်ဖှိၣ်လၢယမဲာ်ညါ, ဒီးယသ့ၣ်ညါနၤလၢနမံၤလီၤ.” (၂ မိၤၡ့ ၃၃:၁၂-၁၇) ယဟိဝၤယွၤသ့ၣ်ညါ ပဝဲတဂၤစုာ်စုာ်သ့လီၤ. ဘၣ်ဆၣ် ဒ်သိးပကကဲထီၣ် ယဟိဝၤယွၤအတံၤသကိးအဂီၢ် ပကဘၣ်မၤ တၢ်မနုၤလဲၣ်. ပကဘၣ်အဲၣ်အီၤ ဒီးဟ့ၣ်လုၢ်ထီၣ်ပသးဆူအအိၣ်လီၤ.—ဖး ၁ ကရံၣ်သူး ၈:၃ တက့ၢ်.
၆, ၇. တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် မ့ၢ်မနုၤတဖၣ်လဲၣ်.
၆ ပကဘၣ်ပာ်လုၢ်ပာ်ပှ့ၤ ပတၢ်ရ့လိာ်သးဒီး ပပၢ်အိၣ်လၢမူခိၣ်န့ၣ်လီၤ. ဒ်ခရံာ်ဖိလၢညါတဖၣ် လၢအအိၣ်လၢကလၤတံ တၢ်အိၣ်ဖှိၣ်ပူၤအသိး ပတဘၣ်ကဲကုၢ်လၢ “တၢ်အမိၢ်ပှၢ်လၢ အဂံၢ်အဘါစၢ်ဒီးဖှီၣ်ဝဲယာ်ဝဲ” လၢအပၣ်ဃုာ်ဒီး ဟီၣ်ခိၣ်အတၢ်မံၤဟူသၣ်ဖျါ တဖၣ်န့ၣ်ဘၣ်. (ကလၤတံ ၄:၉) ဒီပုၢ်ဝဲၢ်လၢအအိၣ်လၢ ကလၤတံတဖၣ်န့ၣ် အဝဲသ့ၣ်သ့ၣ်ညါကစၢ်ယွၤ ဒီးကစၢ်ယွၤသ့ၣ်ညါတ့ၢ် အဝဲသ့ၣ်လီၤ. ဘၣ်ဆၣ် စီၤပီလူးတဲဝဲလၢ အဝဲသ့ၣ် “က့ၤဃၣ်ကဒါက့ၤ” အသးဆူ တၢ်လၢအဘျုးတအိၣ်ဘၣ်န့ၣ်လီၤ. စီၤပီလူးအဲၣ်ဒိးတဲဝဲလၢ ‘ဘၣ်မနုၤအဃိ သုဃၣ်ကဒါက့ၤသုသးဆူ တၢ်အမိၢ်ပှၢ်လၢ အဂံၢ်အဘါစၢ်ဒီးဖှီၣ်ဝဲယာ်ဝဲ ဒီးကဲက့ၤကဒီးကုၢ်လဲၣ်.’
၇ တၢ်ကဲထီၣ်အသးဒီးပှၤ ဒ်အံၤသ့စ့ၢ်ကီးလီၤ. ဒ်စီၤပီလူးအသိး ဖဲပသ့ၣ်ညါထီၣ် တၢ်မ့ၢ်တၢ်တီအခါ ပပာ်တ့ၢ်ကွံာ် တၢ်မံၤဟူသၣ်ဖျါလၢ ဟီၣ်ခိၣ်တဖၣ်န့ၣ်လီၤ. (ဖး ဖံလံးပံၤ ၃:၇, ၈ တက့ၢ်.) အဒိ ပကပာ်တ့ၢ်ကွံာ် တၢ်ကူၣ်ဘၣ်ကူၣ်သ့လၢ အပတီၢ်ထီ, တၢ်ဖံးတၢ်မၤလၢ အန့ၢ်စ့အါအါတဖၣ်န့ၣ်လီၤ. ဒီးဘၣ်သ့ၣ်သ့ၣ် ပကအိၣ်ဒီးတၢ်သ့တၢ်ဘၣ်လၢ တၢ်သူၣ်ဝံၣ်သးဆၢ ဒီးတၢ်လိာ်ခိၣ်လိာ်ကွဲ တကပၤအဃိ ပမ့ၢ်အဲၣ်ဒိးကဲထီၣ် ပှၤလၢအမံၤဟူသၣ်ဖျါ ဒီးပှၤထူးပှၤတီၤန့ၣ်သ့ဝဲလီၤ. ဘၣ်ဆၣ်ပတမၤဘၣ်. ပတူၢ်ၡူကွံာ် တၢ်ခွဲးတၢ်ယာ်တဖၣ်အံၤန့ၣ် ဂ့ၤဝဲလီၤ. (ဧ့ၤဘြံၤ ၁၁:၂၄-၂၇) ဘၣ်ဆၣ် ပမ့ၢ်က့ၤလီကီက့ၤ တၢ်ခွဲးတၢ်ယာ်တဖၣ်အံၤန့ၣ် ပတမ့ၢ်ပှၤလၢအိၣ်ဒီး တၢ်ကူၣ်သ့ဘၣ်. ပမ့ၢ်အိၣ်ဒီး တၢ်ပာ်သူၣ်ပာ်သးဒ်အံၤန့ၣ် ကကဲထီၣ်တၢ်လ့ပစီလၢ ပကက့ၤဃၣ်ကဒါက့ၤပသးဆူ တၢ်လၢပထံၣ်တ့ၢ်အီၤလၢအမ့ၢ်တၢ် “အဂံၢ်အဘါစၢ် ဒီးဖှီၣ်ဝဲယာ်ဝဲ” န့ၣ်လီၤ.
ပာ်လီၤနသးဂၢၢ်ဂၢၢ်ကျၢၤကျၢၤ ဒ်သိးနကမၤတၢ်လၢ ယဟိဝၤယွၤ ကပာ်လုၢ်ပာ်ပှ့ၤနၤအဂီၢ်တက့ၢ်
၈. ပမ့ၢ်အဲၣ်ဒိးလၢ ယဟိဝၤယွၤ ကပာ်လုၢ်ပာ်ပှ့ၤပှၤန့ၣ် ပတလီကီ တၢ်မနုၤလၢၤဘၣ်လဲၣ်.
၈ ပအဲၣ်ဒိးလၢ ယဟိဝၤယွၤ ကပာ်လုၢ်ပာ်ပှ့ၤပှၤအဃိ ပတလီကီဟီၣ်ခိၣ် အတၢ်မံၤဟူသၣ်ဖျါလၢၤဘၣ်. ဒ်သိးပကသးဆူၣ်ဒ်အံၤအဂီၢ် ပမၤတၢ်မနုၤသ့လဲၣ်. ပကဘၣ်သးစၢၢ်ဆၢ တၢ်မ့ၢ်တၢ်တီလၢ အရ့ဒိၣ်ခံမံၤလီၤ. တၢတမံၤန့ၣ် ပှၤလၢအမၤယဟိဝၤယွၤ အတၢ်မၤလၢ တၢ်သးတီအပူၤန့ၣ် ယဟိဝၤယွၤ သ့ၣ်ညါဒီးပာ်လုၢ်ပာ်ပှ့ၤအီၤထီဘိလီၤ. (ဖး ဧ့ၤဘြံၤ ၆:၁၀ တက့ၢ်; ဧ့ၤဘြံၤ ၁၁:၆) ယဟိဝၤယွၤ ပာ်လုၢ်ပာ်ပှ့ၤဝဲ အခ့အပှၤလၢ အတီဒီးအီၤခဲလၢာ်လီၤ. လၢတၢ်န့ၣ်အဃိ ယဟိဝၤယွၤ မ့ၢ်ကွၢ်ကပာ်ကွံာ် အဝဲသ့ၣ်တဂၤဂၤန့ၣ် အဝဲကထံၣ်ဝဲဒ် “တၢ်တတီတလိၤ” တမံၤလီၤ. ထီဘိန့ၣ် ယဟိဝၤယွၤ သ့ၣ်ညါဒီးပာ်လုၢ်ပာ်ပှ့ၤဝဲ “ပှၤလၢအမ့ၢ်အတၢ်လီၤ.” (၂ တံၤမသ့း ၂:၁၉) အဝဲကွၢ်ဝဲ “ပှၤအတီအလိၤအကျဲ” ဒီးကဘၣ်မၤထူၣ်ဖျဲးဝဲဒ်လဲၣ်န့ၣ် သ့ၣ်ညါဝဲလီၤ.—စံးထီၣ်ပတြၢၤ ၁:၆; ၂ ပ့းတရူး ၂:၉.
၉. ယဟိဝၤယွၤ ပာ်ဖျါထီၣ်ဝဲလၢ အသ့ၣ်ညါဒီးပာ်လုၢ်ပာ်ပှ့ၤ အပှၤဂီၢ်မုၢ်ဒ်လဲၣ်န့ၣ် ဟ့ၣ်တၢ်အဒိတက့ၢ်.
၉ တဘျီတခီၣ် ယဟိဝၤယွၤ ပာ်ဖျါထီၣ်ဝဲလၢ အသ့ၣ်ညါဒီးပာ်လုၢ်ပာ်ပှ့ၤ အပှၤဂီၢ်မုၢ်လၢ ကျဲလၢအလီၤဆီတဖၣ်န့ၣ်လီၤ. (၂ ကွဲးနီၣ်တၢ် ၂၀:၂၀, ၂၉) အဒိ ဖဲစီၤပၤဖၤရိၤ အသုးမုၢ်သံၣ်ဘိတဖၣ် ဟဲလူၤယွၤအပှၤဂီၢ်မုၢ်လၢ ပီၣ်လဲၣ်ဂီၤအခါ ယဟိဝၤယွၤ မၤစၢၤအပှၤဂီၢ်မုၢ်ဒ်လဲၣ်န့ၣ် ဆိကမိၣ်ကွၢ်တက့ၢ်. (၂ မိၤၡ့ ၁၄:၂၁-၃၀; စံးထီၣ်ပတြၢၤ ၁၀၆:၉-၁၁) တၢ်ကဲထီၣ်အသးအံၤမ့ၢ်တၢ်လၢ အလီၤကမၢကမၣ်ဒိၣ်မးအဃိ ပူၤကွံာ်အနံၣ် ၄၀ အလီၢ်ခံဒၣ်လဲာ် ပှၤလၢတၢ်လီၢ်အါတီၢ် တဲသကိးဝဲဘၣ်ဃးဒီး တၢ်ဂ့ၢ်အံၤလီၤ. (ယိၤၡူ ၂:၉-၁၁) တယံာ်လၢၤဘၣ်န့ၣ် စီၤကိးလၢအအိၣ်လၢ ကီၢ်မါကူးန့ၣ် ကဟဲဒုးပှၤအဃိ ပမ့ၢ်သ့ၣ်နီၣ်ထီၣ်က့ၤ ယဟိဝၤယွၤ အဲၣ်အပှၤဂီၢ်မုၢ်ထဲလဲၣ် ဒီးသူဝဲအစိအကမီၤ ဒီးမၤပူၤဖျဲးဝဲအပှၤဂီၢ်မုၢ်တဖၣ် ဒ်လဲၣ်အဂ့ၢ်န့ၣ် ကကဲထီၣ်တၢ်ဂံၢ်တၢ်ဘါလၢပဂီၢ်လီၤ. (ယဃ့းစက့လး ၃၈:၈-၁၂) ဖဲန့ၣ်အဆၢကတီၢ် မ့ၢ်လၢပဃုယဟိဝၤယွၤ အတၢ်ဘၣ်သး ဒီးပတဃုဟီၣ်ခိၣ် အတၢ်ဘၣ်သးအဃိ ပကသးခုဒိၣ်မးလီၤ.
တဘျီတခီၣ် ယဟိဝၤယွၤ ဆိၣ်ဂ့ၤအခ့အပှၤလၢ အတီဒီးအီၤတဖၣ် လၢကျဲလၢအဝဲသ့ၣ် တဆိကမိၣ်ဘၣ်ဝဲ နီတဘျီဘၣ်
၁၀. ပကဘၣ်သးစၢၢ်ဆၢ တၢ်မ့ၢ်တၢ်တီ မနုၤတဖၣ်လဲၣ်.
၁၀ ခံမံၤတမံၤန့ၣ် ပကဘၣ်သးစၢၢ်ဆၢလၢ ယဟိဝၤယွၤ မ့ၢ်ပာ်လုၢ်ပာ်ပှ့ၤပှၤန့ၣ် အဝဲကဆိၣ်ဂ့ၤပှၤလၢ ကျဲလၢပတဆိကမိၣ်ဘၣ် နီတဘျီဘၣ်န့ၣ်လီၤ. ပှၤမ့ၢ်မၤတၢ်ဂ့ၤဒ်သိး ပှၤဂၤကစံးထီၣ်ပတြၢၤအီၤအဂီၢ်န့ၣ် ယဟိဝၤယွၤ တဆိၣ်ဂ့ၤအီၤဘၣ်. ဘၣ်မနုၤအဃိလဲၣ်. ယ့ၣ်ၡူးတဲဝဲလၢ ဖဲပှၤဂၤစံးပတြၢၤအီၤအခါ အဝဲသ့ၣ်န့ၢ်ဘၣ် တၢ်အဘျုးလီၤ. (ဖး မးသဲ ၆:၁-၅ တက့ၢ်.) ဘၣ်ဆၣ် ဖဲပှၤမၤတၢ်ဂ့ၤလၢပှၤဂၤအဂီၢ် ဒီးတဒိးန့ၢ်ဘၣ်တၢ်စံးပတြၢၤ နီတမံၤဘၣ်အခါ ယဟိဝၤယွၤလၢ “အထံၣ်တၢ်လၢ တၢ်ခူသူၣ်” န့ၣ်ထံၣ်အဝဲသ့ၣ်လီၤ. ယဟိဝၤယွၤ ပာ်သူၣ်ပာ်သးတၢ်လၢ အဝဲသ့ၣ်မၤဝဲတဖၣ် ဒီးဆိၣ်ဂ့ၤအဝဲသ့ၣ်လီၤ. တဘျီတခီၣ် ယဟိဝၤယွၤ ဆိၣ်ဂ့ၤအခ့အပှၤတဖၣ်လၢ ကျဲလၢပတဆိကမိၣ်ဘၣ် နီတဘျီဘၣ်န့ၣ်လီၤ. ပကတဲသကိး တၢ်အဒိတနီၤလီၤ.
ယဟိဝၤယွၤ ပာ်လုၢ်ပာ်ပှ့ၤဒီးဆိၣ်ဂ့ၤဝဲ ပိာ်မုၣ်သးစၢ်တဂၤလၢ ကျဲလၢ အတဆိကမိၣ်ဘၣ်ဝဲ နီတဘျီဘၣ်
၁၁. ယဟိဝၤယွၤ ပာ်ဖျါထီၣ်လၢ အပာ်လုၢ်ပာ်ပှ့ၤ နီၢ်မၤရံလၢ ကျဲဒ်လဲၣ်.
၁၁ ယဟိဝၤယွၤဃုထၢထီၣ်ဝဲ နီၢ်မၤရံ ဒ်သိးကကဲထီၣ် အဖိခွါယ့ၣ်ၡူးအမိၢ်လီၤ. နီၢ်မၤရံန့ၣ် အိၣ်ဒီးတၢ်ဆီၣ်လီၤသး ဒီးအဝဲအိၣ်လၢ ဝ့ၢ်ဖိလၢအမ့ၢ် နစၤရ့းအပူၤန့ၣ်လီၤ. ဝ့ၢ်အံၤအိၣ်ယံၤဒီး ဝ့ၢ်ယရူၤၡလ့ၣ် ဒီးတၢ်လုၢ်ဟံၣ်လီၤ. (ဖး လူၤကၣ် ၁:၂၆-၃၃ တက့ၢ်.) ဘၣ်မနုၤအဃိ ယဟိဝၤယွၤ ဃုထၢထီၣ်နီၢ်မၤရံ လဲၣ်. မူခိၣ်ကလူးကၤဘြံၤအ့လး ဟဲတဲဘၣ်နီၢ်မၤရံလၢအ “ဘၣ်ဘျုးလၢယွၤ” လီၤ. တကးဒံးဘၣ် ပမ့ၢ်ဆိကမိၣ်ထံတၢ်ဂ့ၢ်လၢ နီၢ်မၤရံတဲတၢ်ဒီးအဘူးအတံၢ် နီၢ်အ့းလံၤစါဘ့းန့ၣ် ပသ့ၣ်ညါဘၣ်လၢ အဝဲအိၣ်ဒီးတၢ်ရ့လိာ်သးဒီး ယဟိဝၤယွၤလၢအဂ့ၤလီၤ. (လူၤကၣ် ၁:၄၆-၅၅) ယဟိဝၤယွၤထံၣ် ဒီးပာ်သူၣ်ပာ်သး နီၢ်မၤရံလီၤ. ဒီးခီဖျိလၢ နီၢ်မၤရံတီဒီးအီၤအဃိ အဝဲဆိၣ်ဂ့ၤဝဲလၢ ကျဲလၢအတဆိကမိၣ်ဘၣ်ဝဲ နီတဘျီဘၣ်န့ၣ်လီၤ.
၁၂. ဖဲယ့ၣ်ၡူးအိၣ်ဖျဲၣ်ထီၣ်အခါ ယဟိဝၤယွၤ ပာ်ဖျါထီၣ်လၢ အဝဲပာ်လုၢ်ပာ်ပှ့ၤအီၤဒ်လဲၣ်.
၁၂ ဖဲယ့ၣ်ၡူးအိၣ်ဖျဲၣ်ထီၣ်အခါ ယဟိဝၤယွၤ ဒုးသ့ၣ်ညါဝဲ မတၤတဖၣ်လဲၣ်. အဝဲတဒုးသ့ၣ်ညါ ပဒိၣ်ပပှၢ် ဒီးပှၤလၢအရ့ဒိၣ်လၢ ဝ့ၢ်ယရူၤၡလ့ၣ် ဒီးဝ့ၢ်ဘ့ၤသလ့ဃ့ၣ်အပူၤ နီတဂၤဘၣ်. လၢတၢ်န့ၣ်အလီၢ် အဝဲမၢမူခိၣ်ကလူးတဖၣ် လဲၤတဲဘၣ်ပှၤကွၢ်သိတဖၣ်လၢ အအိၣ်ဒီးတၢ်ဆီၣ်လီၤသးန့ၣ်လီၤ. ဖဲန့ၣ်အခါ အဝဲသ့ၣ်ကွၢ်သိလၢစံာ်ပျီပူၤ လၢဝ့ၢ်ဘ့ၤသလ့ဃ့ၣ်အချၢန့ၣ်လီၤ. (လူၤကၣ် ၂:၈-၁၄) ဒီးပှၤကွၢ်သိတဖၣ် လဲၤဟးအိၣ်သကိးဝဲ ဖိသၣ်ယ့ၣ်ၡူးန့ၣ်လီၤ. (လူၤကၣ် ၂:၁၅-၁၇) ဖဲန့ၣ်အခါ ယ့ၣ်ၡူးဘၣ်တၢ်မၤလၤကပီၤအီၤ ဒ်အံၤအဃိ နီၢ်မၤရံဒီးစီၤယိၤသး ကကမၢကမၣ်ဝဲဒိၣ်မးလီၤ. ပမ့ၢ်ထိၣ်သတြီၤ ယဟိဝၤယွၤ ဒီးမုၣ်ကီၤလံၢ် မၤတၢ်အကျိၤအကျဲတဖၣ်န့ၣ် လီၤဆီလိာ်အသးဒိၣ်မးလီၤ. အဒိ ဖဲမုၣ်ကီၤလံၢ် ဆှၢလီၤဝဲပှၤမၢ်ကူးဖိတဖၣ် လၢကလဲၤအိၣ်သကိး ယ့ၣ်ၡူးဒီးအမိၢ်အပၢ်အခါ ပှၤယရူၤၡလ့ၣ်ဖိကိးဂၤဒဲး သ့ၣ်ညါဝဲယ့ၣ်ၡူး အိၣ်ဖျဲၣ်ထီၣ်အဂ့ၢ်လီၤ. လၢတၢ်န့ၣ်အဃိ တၢ်ကီတၢ်ခဲ အိၣ်ထီၣ်ဝဲအါမးလီၤ. (မးသဲ ၂:၃) မ့ၢ်လၢမုၣ်ကီၤလံၢ် မၤဝဲဒ်အံၤအဃိ ဖိသၣ်လၢအတၢ်ကမၣ် တအိၣ်ဘၣ်တဖၣ် ဘၣ်သံဝဲအါမးလီၤ.—မးသဲ ၂:၁၆.
၁၃. ဖဲယ့ၣ်ၡူးအိၣ်ဖျဲၣ်ထီၣ်န့ၢ်အသီ ၄၀ ဝံၤအလီၢ်ခံ ဘၣ်တၢ်လဲၤကိးအီၤလၢ တၢ်လုၢ်ဟံၣ်အခါ ယဟိဝၤယွၤမၤလၤကပီၤအီၤလၢ ကျဲဒ်လဲၣ်.
၁၃ ဖဲပှၤအံၣ်စရ့လးဖိအစိၤန့ၣ် ယဟိဝၤယွၤ အတၢ်သိၣ်တၢ်သီအိၣ်ဝဲလၢ မိၢ်တဂၤ အိၣ်ဖျဲၣ်ထီၣ်အဖိခွါမ့ၢ်န့ၢ် အသီ ၄၀ ဝံၤအလီၢ်ခံန့ၣ် အဝဲကဘၣ်လဲၤဟ့ၣ်လုၢ်ထီၣ်တၢ်ဆူ ယဟိဝၤယွၤအအိၣ်လီၤ. လၢတၢ်န့ၣ်အဃိ နီၢ်မၤရံ, စီၤယိၤသး ဒီးယ့ၣ်ၡူး လဲၤဝဲလၢတၢ်လုၢ်ဟံၣ်လၢ ဝ့ၢ်ယရူၤၡလ့ၣ်န့ၣ်လီၤ. အဝဲသ့ၣ်ဘၣ်လဲၤတၢ်ယံၤဝဲ ၉ ကံလိမံထၢၣ် (၆ မံးလာ်) လီၤ. (လူၤကၣ် ၂:၂၂-၂၄) ဖဲအဝဲသ့ၣ်လဲၤလၢကျဲအခါ ဘၣ်သ့ၣ်သ့ၣ် နီၢ်မၤရံကဆိကမိၣ်ထီၣ်ဘၣ်ဝဲလၢ ပှၤလုၢ်တၢ်အဒိၣ် ကမၤလၤကပီၤယ့ၣ်ၡူးလၢ ကျဲလၢအလီၤလီၤဆီဆီလီၤ. ယ့ၣ်ၡူးဘၣ်တၢ်မၤလၤကပီၤအီၤလီၤ. ဘၣ်ဆၣ် ယ့ၣ်ၡူးဘၣ်တၢ်မၤလၤကပီၤအီၤလၢ ကျဲ လၢနီၢ်မၤရံ တဆိကမိၣ်ဘၣ်ဝဲ နီတဘျီဘၣ်န့ၣ်လီၤ. ယဟိဝၤယွၤ ဃုထၢထီၣ် စီၤစူၤမ့းအိၣ်လၢအမ့ၢ် “ပှၤအတီအလိၤ, ဒီးယူးယီၣ်ယွၤ” ဒီးဝံမုၣ်နီၢ်အၣ်နၤ လၢအမ့ၢ်မုၣ်ကမဲ လၢအသးအိၣ် ၈၄ နံၣ်န့ၣ် တဲဝဲလၢ ယ့ၣ်ၡူးကကဲထီၣ် မ့းၡံအၤဒီးခရံာ်လၢဘၣ် တၢ်တဲဆိပာ်အီၤန့ၣ်လီၤ.—လူၤကၣ် ၂:၂၅-၃၈.
၁၄. ယဟိဝၤယွၤဆိၣ်ဂ့ၤ နီၢ်မၤရံဒ်လဲၣ်.
၁၄ နီၢ်မၤရံတီဒီး ယဟိဝၤယွၤ ဒီးကွၢ်လုၢ်ဒိၣ်ထီၣ် ယ့ၣ်ၡူးအဃိ မ့ၢ်ယဟိဝၤယွၤ ပာ်ဖျါထီၣ်လၢ အပာ်လုၢ်ပာ်ပှ့ၤအီၤလၢ ကျဲတဘိဘိဧါ. ပာ်ဖျါထီၣ်ဝဲလီၤ. အဝဲပာ်ဖျါထီၣ်ဝဲ ခီဖျိရဲၣ်ကျဲၤဝဲဒ်သိး နီၢ်မၤရံအတၢ်ကတိၤ ဒီးတၢ်လၢအမၤဝဲတနီၤ ကဘၣ်တၢ်ကွဲးလီၤအီၤလၢ လံာ်စီဆှံပူၤလီၤ. ဒီးအဂၤတမံၤန့ၣ်ဖျါလၢ ဖဲယ့ၣ်ၡူးစံၣ်တဲၤတဲလီၤတၢ် သၢနံၣ်တခီအတီၢ်ပူၤန့ၣ် နီၢ်မၤရံတလဲၤဃုာ်ဒီးအီၤဘၣ်. ဘၣ်သ့ၣ်သ့ၣ် မ့ၢ်လၢနီၢ်မၤရံ မ့ၢ်မုၣ်ကမဲအဃိ အဝဲကဘၣ်အိၣ်တ့ၢ်လၢ နစၤရ့အပူၤန့ၣ်လီၤ. အဝဲတလဲၤဃုာ်ဘၣ်ဒီးယ့ၣ်ၡူး ဒ်ပှၤဂၤအသိးသနာ်က့ ဖဲယ့ၣ်ၡူးသံအခါ အဝဲအိၣ်လၢ ယ့ၣ်ၡူးအကပၤလီၤ. (ယိၤဟၣ် ၁၉:၂၆) ဒီးဖဲဘူၣ်ယဲၢ်ဆံအနံၤန့ၣ် တချုးလၢယ့ၣ်ၡူး အပျဲၢ်အဘီၣ်အဂၤတဖၣ် ဒိးန့ၢ်ဘၣ်သးစီဆှံအခါ နီၢ်မၤရံအိၣ်လၢ အဝဲသ့ၣ်အကျါလီၤ. (မၤတၢ် ၁:၁၃, ၁၄) ဖျါလၢအဝဲဘၣ် တၢ်ဒိးဖှူအီၤဃုာ်ဒီး ယ့ၣ်ၡူးအပျဲၢ်အဘီၣ်တဖၣ်လီၤ. လၢတၢ်န့ၣ်အဃိ အဝဲမ့ၢ်ဘၣ်တၢ်ဒိးဖှူအီၤန့ၣ် အဝဲကအိၣ်ဘၣ်ဒီးယ့ၣ်ၡူး လၢမူခိၣ်လီၤထူလီၤယိာ်လီၤ. ခီဖျိလၢ အဝဲအိၣ်ဒီးတၢ်သးတီအဃိ ဒိးန့ၢ်ဘၣ်ဝဲ တၢ်ဆိၣ်ဂ့ၤဖးဒိၣ်လီၤ.
ယဟိဝၤယွၤပာ်ဖျါထီၣ်လၢ အပာ်လုၢ်ပာ်ပှ့ၤအဖိခွါ
၁၅. ဖဲယ့ၣ်ၡူးအိၣ်လၢ ဟီၣ်ခိၣ်အခါ ယဟိဝၤယွၤပာ်ဖျါထီၣ်လၢ အအဲၣ်အီၤလၢ ကျဲဒ်လဲၣ်.
၁၅ ယ့ၣ်ၡူးတလီကီ တၢ်လၤကပီၤလၢ တၢ်ဘူၣ်တၢ်ဘါခိၣ်နၢ် ဒီးထံကီၢ်ခိၣ်နၢ်တဖၣ်အအိၣ်ဘၣ်. ဘၣ်ဆၣ်ဖဲအပၢ် ပာ်ဖျါထီၣ်လၢအအဲၣ်အီၤ ခီဖျိတဲတၢ်ဒီးအီၤလၢ မူခိၣ်သၢဘျီအခါ အဝဲအသးကဆူၣ်ထီၣ်ဒိၣ်မးလီၤ. ဖဲယ့ၣ်ၡူးဒိးဘျၢထံလၢ ထံကျိယၢ်ဒ့ၣ်ဝံၤအခါ တၢ်ကလုၢ်သီၣ်ထီၣ်လၢမူခိၣ် ဒီးတဲဝဲလၢ “အဝဲတဂၤအံၤ မ့ၢ်ယဖိခွါလၢယအဲၣ်, ဒီးဘၣ်ယသးလၢအီၤလီၤ.” (မးသဲ ၃:၁၇) ဖဲန့ၣ်အဆၢကတီၢ် ဖျါလၢပှၤအဂၤလၢ အနၢ်ဟူ ယဟိဝၤယွၤ တဲတၢ်န့ၣ် ထဲဒၣ်စီၤယိၤဟၣ်တဂၤလီၤ. လၢခံတချုးလၢ ယ့ၣ်ၡူးသံဒံးဘၣ်တနံၣ်န့ၣ် အတၢ်မၢဖိသၢဂၤနၢ်ဟူဝဲလၢ ယဟိဝၤယွၤ တဲဝဲလၢ “အဝဲတဂၤအံၤ မ့ၢ်ယဖိခွါလၢ ယအဲၣ်, ဒီးဘၣ်ယသးလၢအီၤလီၤ. ဒိကနၣ်အကလုၢ်တက့ၢ်.” (မးသဲ ၁၇:၅) ဒီးတချုးလၢ ယ့ၣ်ၡူးသံဒံးဘၣ် စှၤကိးသီန့ၣ် ယဟိဝၤယွၤ တဲလီၤကဒီးတၢ်လၢမူခိၣ် ဆူယ့ၣ်ၡူးအအိၣ်န့ၣ်လီၤ.—ယိၤဟၣ် ၁၂:၂၈.
ယဟိဝၤယွၤ ပာ်ဖျါထီၣ်လၢ အဝဲသ့ၣ်ညါဒီးပာ်လုၢ်ပာ်ပှ့ၤ အဖိခွါန့ၣ် နမၤလိန့ၢ်ဘၣ်တၢ်မနုၤလဲၣ် (ကွၢ်လံာ်အဆၢ ၁၅-၁၇)
၁၆, ၁၇. ယဟိဝၤယွၤ မၤလၤကပီၤယ့ၣ်ၡူးလၢ ကျဲလၢအတဆိကမိၣ်ဘၣ်ဝဲ နီတဘျီဘၣ်ဒ်လဲၣ်.
၁၆ ယ့ၣ်ၡူးသ့ၣ်ညါဝဲလၢ ပှၤကကိးအီၤလၢ ပှၤလၢအကတိၤကမၣ်ယွၤ ဒီးအဝဲကဘၣ်သံလၢ ကျဲလၢအလီၤမဲာ်ဆှးန့ၣ်လီၤ. ဘၣ်ဆၣ် အဝဲတလူၤဘၣ် အနီၢ်ကစၢ် အတၢ်ဘၣ်သးဘၣ်. လၢတၢ်န့ၣ်အလီၢ် အဝဲဃ့ဘါထုကဖၣ်လၢ ကစၢ်ယွၤအတၢ်ဘၣ်သး ကဟဲလၢထီၣ်ပှဲၤထီၣ်အဂီၢ်လီၤ. (မးသဲ ၂၆:၃၉, ၄၂) ယ့ၣ်ၡူးတလီကီလၢ ဟီၣ်ခိၣ်ကပာ်လုၢ်ပာ်ပှ့ၤအီၤဘၣ်. ဘၣ်ဆၣ် အဝဲလီကီလၢအပၢ် ကပာ်လုၢ်ပာ်ပှ့ၤအီၤအဃိ “အဝဲဒၣ်ဒိးထူၣ်စုညါ, ဒီးပာ်တၢ်မဲာ်ဆှးလၢ တၢ်နီတမံၤဘၣ်.” (ဧ့ၤဘြံၤ ၁၂:၂) ယဟိဝၤယွၤ ပာ်ဖျါထီၣ်လၢ အပာ်လုၢ်ပာ်ပှ့ၤယ့ၣ်ၡူး လၢကျဲဒ်လဲၣ်.
၁၇ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲဃ့ဝဲလၢ ကဒိးန့ၢ်ဘၣ်က့ၤ တၢ်လၤတၢ်ကပီၤလၢအအိၣ်ဒီးအီၤ တချုးဖဲအဟဲလီၤလၢ ဟီၣ်ခိၣ်အဆၢကတီၢ်န့ၣ်လီၤ. (ယိၤဟၣ် ၁၇:၅) လံာ်စီဆှံ တပာ်ဖျါထီၣ်ဝဲလၢ ယ့ၣ်ၡူးလီကီဝဲ တၢ်လၤကပီၤအါန့ၢ်ဒံး အဒိးန့ၢ်ဘၣ်ဝဲ လၢညါန့ၣ်ဘၣ်. အဝဲဟဲမၤယဟိဝၤယွၤ အတၢ်ဘၣ်သးလၢ ဟီၣ်ခိၣ်သနာ်က့ အဝဲတမုၢ်လၢ်ဝဲလၢ အကဒိးန့ၢ်ဘၣ် ခိၣ်ဖးလီၤဆီတခါဘၣ်. ဘၣ်ဆၣ် ယဟိဝၤယွၤ မၤဝဲဒ်လဲၣ်. ယဟိဝၤယွၤ မၤလၤကပီၤအီၤလၢ ကျဲလၢအတမုၢ်လၢ်ဘၣ်ဝဲ နီတဘျီဘၣ်န့ၣ်လီၤ. ဖဲယဟိဝၤယွၤ မၤမူထီၣ်က့ၤယ့ၣ်ၡူးအခါ အဝဲဟ့ၣ်အီၤ “မံၤဒိၣ်န့ၢ် ကယဲၢ်တၢ်အမံၤခဲလၢာ်” လီၤ. တကးဒံးဘၣ် ယဟိဝၤယွၤဟ့ၣ်အီၤ သးသမူလၢ အသံတသ့ဘၣ်န့ၣ်လီၤ. ဒီးအဝဲမ့ၢ်ပှၤအဆိကတၢၢ်တဂၤလၢ အဒိးန့ၢ်ဘၣ်ခိၣ်ဖးအံၤလီၤ. လၢညါန့ၣ် ပှၤတဒိးန့ၢ်ဘၣ်ခိၣ်ဖးဒ်အံၤ နီတဂၤဘၣ်. * (ကွၢ်တၢ်ဂ့ၢ်အဘျဲၣ်တက့ၢ်.) (ဖံလံးပံၤ ၂:၉; ၁ တံၤမသ့း ၆:၁၆) ယ့ၣ်ၡူးတီဒီး ယဟိဝၤယွၤအဃိ အဝဲဒိးန့ၢ်ဘၣ်ခိၣ်ဖးလၢ အဂ့ၤကတၢၢ်တခါလီၤ.
၁၈. ဒ်သိးပသုတလီကီ ဟီၣ်ခိၣ်အတၢ်မံၤဟူသၣ်ဖျါ တဂ့ၤအဂီၢ် ပကဘၣ်မၤတၢ်မနုၤလဲၣ်.
၁၈ ပအဲၣ်ဒိးလၢ ယဟိဝၤယွၤ ကပာ်လုၢ်ပာ်ပှ့ၤပှၤအဃိ ပတလီကီဟီၣ်ခိၣ် အတၢ်မံၤဟူသၣ်ဖျါလၢၤဘၣ်. ဒ်သိးပကသးဆူၣ်ဒ်အံၤအဂီၢ် ပမၤတၢ်မနုၤသ့လဲၣ်. ထီဘိန့ၣ် ပကဘၣ်သ့ၣ်နီၣ်ထီၣ်လၢ ပမ့ၢ်တီဒီးယဟိဝၤယွၤန့ၣ် အဝဲကပာ်လုၢ်ပာ်ပှ့ၤပှၤ ဒီးကဆိၣ်ဂ့ၤပှၤထီဘိလီၤ. တကးဒံးဘၣ် ပထံၣ်ဘၣ်အါဘျီလၢ အဝဲဆိၣ်ဂ့ၤအခ့အပှၤလၢ အတီဒီးအီၤတဖၣ်လၢ ကျဲလၢအဝဲသ့ၣ် တဆိကမိၣ်ဘၣ်ဝဲ နီတဘျီဘၣ်န့ၣ်လီၤ. လၢတၢ်န့ၣ်အဃိ ခါဆူညါန့ၣ် ယဟိဝၤယွၤကဆိၣ်ဂ့ၤပှၤလၢ ကျဲဒ်လဲၣ်န့ၣ် ပဆိကမိၣ်ကွၢ်တလၢာ်ဘၣ်. ဘၣ်ဆၣ်ခဲအံၤ ဖဲပတူၢ်ဘၣ်တၢ်ကီတၢ်ခဲ ဒီးတၢ်နးတၢ်ဖှီၣ်အခါ ပကဘၣ်သ့ၣ်နီၣ်ထီၣ်လၢ တယံာ်လၢၤဘၣ်န့ၣ် ဟီၣ်ခိၣ်အံၤကဒံကွံာ်ဝဲလီၤ. လၢတၢ်န့ၣ်အဃိ ပမ့ၢ်ဒိးန့ၢ်ဘၣ် တၢ်မံၤဟူသၣ်ဖျါလၢ ဟီၣ်ခိၣ်အံၤသနာ်က့ ကဒံကွံာ်ဝဲစ့ၢ်ကီးလီၤ. (၁ ယိၤဟၣ် ၂:၁၇) ပပၢ်ယဟိဝၤယွၤလၢ အပှဲၤဒီးတၢ်အဲၣ်တၢ်ကွံန့ၣ် အဝဲ “တမ့ၢ်ဘၣ်ပှၤတတီတလိၤဘၣ်” အဃိ အဝဲတသးပ့ၤနီၣ် တၢ်လၢပမၤ ဒီးပတၢ်အဲၣ်အမံၤန့ၣ်ဘၣ်. (ဧ့ၤဘြံၤ ၆:၁၀) အဝဲကထံၣ်ဒီးပာ်လုၢ်ပာ်ပှ့ၤပှၤ ဒီးဘၣ်သ့ၣ်သ့ၣ် ကဆိၣ်ဂ့ၤပှၤလၢ ကျဲလၢပတဆိကမိၣ်ဘၣ် နီတဘျီဘၣ်န့ၣ်လီၤ.
^ လံာ်အဆၢ. 17 လံာ်စီဆှံလၢ ဧ့ၤဘြံၤကျိာ်တကတြူၢ်အပူၤန့ၣ် တပာ်ဖျါထီၣ်ဝဲ သးသမူလၢ အသံတသ့ဘၣ် အဂ့ၢ်နီတထံၣ်ဘၣ်. လၢတၢ်န့ၣ်အဃိ ခိၣ်ဖးအံၤ ကမ့ၢ်ဝဲခိၣ်ဖးလၢ ယ့ၣ်ၡူးတမုၢ်လၢ်ဘၣ်ဝဲ နီတဘျီဘၣ်န့ၣ်လီၤ.