တၢ်ဂ့ၢ်​လၢ​အကြၢး​အဘၣ်​ မ့ၢ်​တအိၣ်​ဘၣ်​ဒီး အဝဲသ့ၣ်​မ့ၢ်​အိၣ်​ဒ်သိး​သိး ဒီတနၤကျၢၤ​န့ၣ်​ မ့ၢ်ဝဲ​တၢ်အုၣ်​အသး​ဖးဒိၣ်​တခါ​လၢ အဝဲသ့ၣ်​မၤကမၣ်မုၣ်​ကမၣ်ခွါလီၤ. လၢတၢ်န့ၣ်​အဃိ တၢ်ဂ့ၢ်​လၢ​အကြၢး​အဘၣ်​ မ့ၢ်​တအိၣ်​ဘၣ်​န့ၣ်​ တၢ်​စံၣ်ညီၣ်​ကမံးတံာ် က​ဘၣ်​ထံၣ်​လိာ်သး​ဒီး​အဝဲသ့ၣ်​လီၤ.—၁ ကရံၣ်သူး ၆:၁၈.

တၢ်​အိၣ်ဖှိၣ်​သးပှၢ်​ကရူၢ်​န့ၣ်​ မ့ၢ်​အဝဲသ့ၣ်​က​ဘၣ်​ဒုးအိၣ်​ထီၣ်ဝဲ တၢ်​စံၣ်ညီၣ်​ကမံးတံာ်​ဧါ တ​လိၣ်​ဒုးအိၣ်​ထီၣ်ဘၣ်​ဧါ​န့ၣ်​ က​ဘၣ်​ဃု​သ့ၣ်ညါ​ဝဲ တၢ်အိၣ်သး​တဖၣ်​ လီၤတံၢ်​လီၤဆဲး​လီၤ. အဒိ အဝဲသ့ၣ်​ ပာ်တၢ်အဲၣ်တီ​ဧါ. လၢ​အ​ပူၤကွံာ် ဘၣ်ဃး​ဒီး​အဝဲသ့ၣ်​ အ​တၢ်အိၣ်​ထီၣ်​အိၣ်​လီၤ​န့ၣ်​ မ့ၢ်​တၢ်​အိၣ်ဖှိၣ်​သးပှၢ် ဟ့ၣ်ပလီၢ်​အဝဲသ့ၣ်​ဝံၤ​လံဧါ. ဘၣ်​မနုၤ​အဃိ​အဝဲသ့ၣ်​ ဘၣ်​အိၣ်​ဒ်သိး​သိး ဒီတနၤကျၢၤ​လဲၣ်. မ့ၢ်​အဝဲသ့ၣ် ရဲၣ်​လီၤ​ကျဲၤလီၤ​ဆိပာ်စၢၤ​ဝဲ ဒ်သိး​က​ကဲထီၣ်​ဒ်အံၤ​အဂီၢ်​ဧါ. ဒ်သိး​တၢ်​သု​တ​ကဲထီၣ်​အသး ဒ်အံၤ​တဂ့ၤ​အဂီၢ် ကျဲ​လၢ​အဂၤ​အိၣ်​တဘိ​ဘိ​ဧါ. တၢ်ဂ့ၢ်​တခါ ဟဲကဲထီၣ်​အသး​သတူၢ်​ကလာ် ဒီး​အဝဲသ့ၣ်​ မၤတၢ်​တဘၣ်​နီတမံၤ​ဘၣ်​အဃိ တၢ်​ကဲထီၣ်​အသး​ဒ်အံၤ​ဧါ. မ့တမ့ၢ် မ့ၢ်​တၢ်ဂ့ၢ်​ဂီၤ​အူ (emergency) ကဲထီၣ်​အသး​တခါ ဒီး​ကျဲ​လၢ​အဂၤ​တအိၣ်​နီ​တဘိ​ဘၣ်​အဃိ အဝဲသ့ၣ်​ဘၣ်​အိၣ်ဝဲ ဒ်သိး​သိး​ဒီတနၤကျၢၤ​ဧါ. (စံၣ်တဲၤ​တဲလီၤ​တၢ် ၉:၁၁) အဝဲသ့ၣ်​မံ​ဖဲလဲၣ်. တၢ်အိၣ်သး​တခါ​ဒီး​တခါ​န့ၣ်​ တ​ဒ်သိး​လိာ်အသး​ဘၣ်. လၢတၢ်န့ၣ်​အဃိ ဒ်သိး​တၢ်​အိၣ်ဖှိၣ်​သးပှၢ်​တဖၣ်​ က​ဆၢတဲာ်​တၢ်​အဂီၢ် တၢ်ဂ့ၢ်​တၢ်ကျိၤ​လၢ​အဝဲသ့ၣ်​ က​ဘၣ်​ဆိကမိၣ်​ဝဲ​န့ၣ်​အိၣ်​ဒံးဝဲ​လီၤ.

တၢ်​အိၣ်ဖှိၣ်​သးပှၢ်​တဖၣ်​ ဃု​သ့ၣ်ညါ​ဝဲ တၢ်ဂ့ၢ်​တၢ်ကျိၤ​ခဲလၢာ်​မ့ၢ်ဝံၤ အဝဲသ့ၣ်​ဘၣ်​ဆၢတဲာ်​ဝဲ​လၢ မ့ၢ်​အဝဲသ့ၣ်​ ကြၢး​ဒုးအိၣ်​ထီၣ်​ တၢ်​စံၣ်ညီၣ်​ကမံးတံာ်​ဧါ​န့ၣ်​လီၤ.