ဒ်သိး နတၢ်မၤလိလံာ်စီဆှံ ကကဲဘျုး ဒီးကမုာ်အဂီၢ် နမၤကသ့ဒ်လဲၣ်
စီၤယိၤၡူကဘၣ်ဆှၢဝဲ ပှၤအံၣ်စရ့လးဖိတဖၣ်လၢ ကီၢ်တၢ်စံးပာ်အပူၤလီၤ. လၢစီၤယိၤၡူအဂီၢ် မ့ၢ်ဝဲမူဒါလၢအကီဒိၣ်မးလီၤ. ဘၣ်ဆၣ် ယဟိဝၤယွၤ ဟ့ၣ်ဆူၣ်ထီၣ်အီၤ ဒီးဟ့ၣ်ဂံၢ်ဟ့ၣ်ဘါအီၤလၢ “ပာ်ဆူၣ်နသး, ဒီးတံးတဟီၣ်တက့ၢ်.” ဒီးယဟိဝၤယွၤတဲစ့ၢ်ကီး စီၤယိၤၡူလၢ အဝဲမ့ၢ်ဖးဒီးဒိကနၣ် အတၢ်သိၣ်တၢ်သီန့ၣ် အဝဲကဆၢတဲာ်တၢ်လၢအဘၣ် ဒီးအတၢ်ဆၢတဲာ် ကကဲထီၣ်လိၣ်ထီၣ်ဝဲလီၤ.—ယိၤၡူ ၁:၇, ၈.
ပအိၣ်မူဘၣ်လၢ “အဆၢအကတီၢ်လၢ အကီအခဲ” အဃိ ပတၢ်အိၣ်မူကကီခဲဝဲလီၤ. (၂ တံၤမသ့း ၃:၁) ပမ့ၢ်အဲၣ်ဒိးကဲထီၣ် ပှၤကူၣ်တၢ်သ့ဒ် စီၤယိၤၡူအသိးန့ၣ် ပကဘၣ်မၤထွဲ တၢ်ဟ့ၣ်ကူၣ်လၢ ယဟိဝၤယွၤ ဟ့ၣ်လီၤပှၤတဖၣ်န့ၣ်လီၤ. ပကဘၣ်ဖးလံာ်စီဆှံထီဘိ ဒီးတၢ်လၢပမၤလိန့ၢ်တဖၣ်န့ၣ် ပကဘၣ်သူအီၤဒ်သိး ပဆၢတဲာ်တၢ်လၢအဘၣ် ကသ့အဂီၢ်လီၤ.
ပဝဲတနီၤနီၤ ပကဘၣ်မၤလိလံာ်စီဆှံ ဒ်လဲၣ်န့ၣ် ပတသ့ၣ်ညါဘၣ်. မ့တမ့ၢ် ပမၤလိလံာ် စီဆှံတမုာ်ဘၣ်. ဘၣ်ဆၣ် နီၢ်ကစၢ်တၢ်မၤလိလံာ်စီဆှံန့ၣ် မ့ၢ်တၢ်လၢအရ့ဒိၣ်လီၤ. နမ့ၢ်ကွၢ် တၢ်လွံၢ်နၢၣ်လၢအမ့ၢ် “ မၤကွၢ်ဒ် တၢ်ဟ့ၣ်ကူၣ်လၢ လာ်အံၤအသိးတက့ၢ်” န့ၣ်နကထံၣ်န့ၢ် တၢ်ဟ့ၣ်ကူၣ်လၢ ကမၤစၢၤနၤ ဒ်သိးနတၢ်မၤလိလံာ်စီဆှံ ကကဲဘျုး ဒီးနမၤအီၤကမုာ်အဂီၢ်လီၤ.
ပှၤကွဲးထါ စံးထီၣ်ပတြၢၤ သးဝံၣ်ထီၣ်ဝဲလၢ “ဒုးလဲၤယၤလၢ နတၢ်မၤလိာ်အကျဲန့ၣ်တက့ၢ်. အဂ့ၢ်ဒ်အံၤ, ယမုာ်လၤတၢ်လၢ အပူၤလီၤ.” (စံးထီၣ်ပတြၢၤ ၁၁၉:၃၅) နမ့ၢ်မၤဒ်န့ၣ်န့ၣ် နမၤလိလံာ်စီဆှံ ကမုာ်ဝဲလီၤ. နမ့ၢ်ဆဲးမၤလိလံာ်စီဆှံန့ၣ် နကထံၣ်န့ၢ်တၢ်လုၢ်ဒိၣ်ပှ့ၤဒိၣ်အါမးလီၤ.
နတဆှၢဘၣ် ပှၤအံၣ်စရ့လးဖိ ဒ်စီၤယိၤၡူအသိးသနာ်က့ နအိၣ်ဒီးနနီၢ်ကစၢ် အတၢ်ကီတၢ်ခဲတဖၣ်လီၤ. လၢတၢ်န့ၣ်အဃိ မၤလိလံာ်စီဆှံ ဒီးဒိကနၣ် ကစၢ်ယွၤအကလုၢ် ဒ်စီၤယိၤၡူအသိးတက့ၢ်. နမ့ၢ်မၤဒ်န့ၣ်န့ၣ် နဆၢတဲာ်တၢ်လၢအဘၣ်ကသ့ဝဲလီၤ.
