သးကညီၤ “ပှၤကညီခဲလၢာ်” တက့ၢ်
ဖဲယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ ကဘၣ်စံၣ်တဲၤတဲလီၤတၢ် ဒ်လဲၣ်အခါ အဝဲဟ့ၣ်ပလီၢ်ဝဲလၢ ပှၤတဒိကနၣ် အဝဲသ့ၣ်ထီဘိဘၣ်. (လူၤကၣ် ၁၀:၃, ၅, ၆) ပဝဲစ့ၢ်ကီး ဖဲပစံၣ်တဲၤတဲလီၤတၢ်အခါ တၢ်ကကဲထီၣ်အသးဒီးပှၤ ဒ်န့ၣ်အသိးစ့ၢ်ကီးလီၤ. ပှၤတနီၤနီၤန့ၣ် အဝဲသ့ၣ်တရ့ဒီးပှၤဂ့ၤဂ့ၤဘၣ် မ့တမ့ၢ် ကကိးဃါပှၤလီၤ. ဖဲအဝဲသ့ၣ်မၤဝဲဒ်န့ၣ်အခါ ဘၣ်သ့ၣ်သ့ၣ် ပကပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ် ဒီးစံၣ်တဲၤတဲလီၤအီၤအဂီၢ် ကကီဝဲလီၤ.
ပှၤလၢအိၣ်ဒီးတၢ်သးကညီၤန့ၣ် ဖဲအဝဲထံၣ်ဝဲလၢ ပှၤဂၤလိၣ်ဘၣ်တၢ်မၤစၢၤ ဒီးအိၣ်ဒီးတၢ်ကီတၢ်ကဲအခါ အဝဲသးကညီၤဘၣ်ဝဲ ဒီးအဲၣ်ဒိးမၤစၢၤဝဲလီၤ. ဘၣ်ဆၣ် ပတၢ်သးကညီၤပှၤဂၤ မ့ၢ်တအိၣ်ဘၣ်န့ၣ် ဖဲပစံၣ်တဲၤတဲလီၤတၢ်အခါ တၢ်ကကဲထီၣ်အသးဒ်လဲၣ်. ပတၢ်သူၣ်ဆူၣ်သးဆူၣ်ကစှၤလီၤ အခီပညီန့ၣ် ပတသူၣ်ဆူၣ်သးဆူၣ်လၢ ကစံၣ်တဲၤတဲလီၤ အဝဲသ့ၣ်လၢၤဘၣ်အဃိ ပမၤစၢၤအဝဲသ့ၣ်တသ့လၢၤဘၣ်. ပတၢ်သးဆူၣ်န့ၣ် လီၤဂာ်ဒီးမ့ၣ်အူလီၤ. ဒ်သိးမ့ၣ်အူကကဲၤဒိၣ်ဒိၣ်အဂီၢ် လိၣ်ဘၣ်ဝဲသ့ၣ်မုၣ်လီၤ. ဒ်န့ၣ်အသိး ဒ်သိးပကအိၣ်ဒီး တၢ်သူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအဂီၢ် ပလိၣ်ဘၣ် တၢ်သးကညီၤလီၤ.—၁ သ့းစၤလနံ ၅:၁၉.
ပကပာ်ဖျါထီၣ် တၢ်သးကညီၤ ထီဘိအဂီၢ်ကကီဝဲလီၤ. ဘၣ်ဆၣ် ဒ်သိးပမၤကန့ၢ်အဂီၢ် တၢ်မနုၤကမၤစၢၤပှၤလဲၣ်. ပကွၢ်လိမၤဒိး ယဟိဝၤယွၤ, ယ့ၣ်ၡူး ဒီးစီၤပီလူး အတၢ်သးကညီၤသ့ဝဲလီၤ.
ကွၢ်လိမၤဒိး ယဟိဝၤယွၤ အတၢ်သးကညီၤတက့ၢ်
ပှၤတဲအၢတဲသီ ယဟိဝၤယွၤအဂ့ၢ်န့ၣ် အိၣ်လၢအနံၣ်လၢ အကထိတဖၣ်လံ. ဘၣ်ဆၣ် ယဟိဝၤယွၤ “မၤဘျုးပှၤလၢ အတသ့ၣ်ညါ ဘၣ်တၢ်ဘျုးဘၣ်, ဒီးပှၤအအၢအသီတဖၣ်လီၤ.” (လူၤကၣ် ၆:၃၅) အဝဲပာ်ဖျါထီၣ် တၢ်အဲၣ်တၢ်ကွံဒ်လဲၣ်. အဝဲဝံသးစူၤ ပှၤကိးဂၤဒဲးလီၤ. ယဟိဝၤယွၤ အဲၣ်ဒိးဝဲလၢ “ပှၤကညီခဲလၢာ်” ကပူၤဖျဲးလီၤ. (၁ တံၤမသ့း ၂:၃, ၄) ယဟိဝၤယွၤသးဟ့တၢ်အၢ ဘၣ်ဆၣ် အဝဲပာ်လုၢ်ပာ်ပှ့ၤဝဲ ပှၤဟီၣ်ခိၣ်ဖိ ဒီးတအဲၣ်ဒိးဝဲလၢ အဝဲသ့ၣ်ကသံဘၣ်.—၂ ပ့းတရူး ၃:၉.
ယဟိဝၤယွၤ သ့ၣ်ညါဝဲလၢ မုၣ်ကီၤလံၢ်န့ၣ် အခိၣ်နူာ်ဂ့ၤ ဒီးဒ်သိးပှၤဟီၣ်ခိၣ်ဖိတဖၣ် ကနာ်အတၢ်လံၣ်တၢ်လီအဂီၢ် အဝဲမၤဝဲသ့လီၤ. (၂ ကရံၣ်သူး ၄:၃, ၄) ပှၤအါဂၤန့ၣ် လၢအဝဲသ့ၣ်အနီၢ်ဆံးခါလံၤလံၤ ဘၣ်တၢ်သိၣ်လိအီၤ ကစၢ်ယွၤအဂ့ၢ်လၢ အကမၣ်တဖၣ်န့ၣ်လီၤ. ခီဖျိလၢ အဝဲသ့ၣ်အိၣ်ဒီးတၢ်ထံၣ် ဒီးတၢ်ဆိကမိၣ်လၢ အကမၣ်တဖၣ်အဃိ အဝဲသ့ၣ်ကတူၢ်လိာ် တၢ်မ့ၢ်တၢ်တီအဂီၢ် ကကီဝဲလီၤ. ဘၣ်ဆၣ် ယဟိဝၤယွၤသးအိၣ်မၤစၢၤဒံး အဝဲသ့ၣ်လီၤ. ပသ့ၣ်ညါဘၣ်ဒ်လဲၣ်.
အဒိ ပှၤနံၤနဝ့ဖိတဖၣ်န့ၣ် ယဟိဝၤယွၤထံၣ်အဝဲသ့ၣ်ဒ်လဲၣ်. အဝဲသ့ၣ်မ့ၢ်ပှၤအၢပှၤသီ သနာ်က့ ယဟိဝၤယွၤ တဲဘၣ်စီၤယိၤနါလၢ “နံၤနဝ့, ဝ့ၢ်ဖးဒိၣ်တဖျၢၣ်န့ၣ်, ဖဲပှၤလၢအတသ့ၣ်ညါအစုထွဲဒီး အစုစ့ၣ်အဆၢဘၣ်, အိၣ်ဝဲတကလးအဘျီတဆံခံဒီးအဘျဲၣ်, ဒီးဆၣ်ဖိကီၢ်ဖိအဒၢအါအါကလဲာ်န့ၣ် ယဲဒၣ်အံၤယတသးလီဘၣ်အီၤဘၣ်ဧါ.” (ယိၤနါ ၄:၁၁) ယဟိဝၤယွၤ သးကညီၤပှၤလၢတသ့ၣ်ညါ အဂ့ၢ်ဒံးဘၣ်တဖၣ်အံၤလီၤ. လၢတၢ်န့ၣ်အဃိ ယဟိဝၤယွၤ ဆှၢလီၤဝဲ စီၤယိၤနါလၢ ကလဲၤဟ့ၣ်ပလီၢ်အဝဲသ့ၣ်လီၤ.
ပကဘၣ်ထံၣ်ပှၤဂၤ ဒ်ယဟိဝၤယွၤထံၣ်ဝဲအသိးလီၤ. အဝဲသ့ၣ်မ့ၢ်ပှၤလၢ အလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်အဃိ မ့ၢ်ဖျါလၢအဝဲသ့ၣ် တအဲၣ်ဒိးတူၢ်လိာ် တၢ်မ့ၢ်တၢ်တီသနာ်က့ ပအဲၣ်ဒိးမၤစၢၤအဝဲသ့ၣ် ဒ်သိးကသ့ၣ်ညါထီၣ် ယဟိဝၤယွၤအဂီၢ်လီၤ.
ကွၢ်လိမၤဒိး ယ့ၣ်ၡူးအတၢ်သးကညီၤတက့ၢ်
ယ့ၣ်ၡူးသးကညီၤပှၤဂၤ ဒ်အပၢ်အသိးလီၤ. ဖဲအဝဲထံၣ် ပှၤဂီၢ်မုၢ်တဖၣ်အခါ အဝဲသးကညီၤဘၣ်ဝဲ မ့ၢ်လၢ “တၢ်ဘှံးအဝဲသ့ၣ်အသး, ဒီးလီၤပြံလီၤပြါဝဲ ဒ်သိတဖၣ်လၢ တၢ်တအိၣ်ကွၢ်ဘၣ်အီၤအသိးန့ၣ်လီၤ.” (မးသဲ ၉:၃၆) ဘၣ်မနုၤအဃိ အဝဲသ့ၣ်ကဲထီၣ် ဒ်အံၤလဲၣ်န့ၣ် ယ့ၣ်ၡူးနၢ်ပၢၢ်ဝဲလီၤ. မ့ၢ်လၢတၢ်ဘူၣ်တၢ်ဘါ ခိၣ်နၢ်တဖၣ် တကွၢ်ထွဲအဝဲသ့ၣ်ဂ့ၤဂ့ၤဘၣ် ဒီးသိၣ်လိအဝဲသ့ၣ် တၢ်လံၣ်တၢ်လီအဃိလီၤ. ယ့ၣ်ၡူးသ့ၣ်ညါဝဲလၢ တၢ်ဂ့ၢ်အါမံၤအဃိ အဝဲသ့ၣ်အါဂၤ တကဲထီၣ်အပျဲၢ်အဘီၣ်ဘၣ် သနာ်က့ ယ့ၣ်ၡူးသိၣ်လိဒံးအဝဲသ့ၣ် တၢ်ဂ့ၢ်အါမံၤလီၤ.—မၢ်ကူး ၄:၁-၉.
ပှၤမ့ၢ်တဒိကနၣ် တဘျီဃီဘၣ် သနာ်က့ တဘၣ်သးဟးဂီၤတဂ့ၤ
အဝဲသ့ၣ်အတၢ်အိၣ်သး မ့ၢ်ဆီတလဲန့ၣ် ဘၣ်သ့ၣ်သ့ၣ် အဝဲသ့ၣ်ကတူၢ်လိာ်ဝဲ တၢ်မ့ၢ်တၢ်တီလီၤ
ပှၤမ့ၢ်တတူၢ်လိာ် ပတၢ်သးခုကစီၣ်သနာ်က့ ပဘၣ်ဂုာ်ကျဲးစၢး နၢ်ပၢၢ်စၢၤအဝဲသ့ၣ်လီၤ. အဝဲသ့ၣ်တတူၢ်လိာ် ပတၢ်သးခုကစီၣ်န့ၣ် ဘၣ်သ့ၣ်သ့ၣ် ကမ့ၢ်လၢအဝဲသ့ၣ် ထံၣ်ဘၣ်ဝဲပှၤလၢ အကိးလီၤအသးလၢ ခရံာ်ဖိတဖၣ် အသကဲာ်ပဝးလၢ အတဂ့ၤအဃိလီၤ. လၢတၢ်န့ၣ်အဃိ အဝဲသ့ၣ်တအိၣ်ဒီးတၢ်ထံၣ်အဂ့ၤ လၢလံာ်စီဆှံ မ့တမ့ၢ် ခရံာ်ဖိတဖၣ်အဖီခိၣ်လၢၤဘၣ်. မ့တမ့ၢ် အဝဲသ့ၣ်ကနၢ်ဟူဘၣ်ဝဲ ပဂ့ၢ်ပကျိၤလၢ အတမ့ၢ်တတီအဃိလီၤ. ဒီးပှၤတနီၤနီၤန့ၣ် ဘၣ်ယိၣ်ဝဲလၢ မ့ၢ်တဲသကိးတၢ်ဒီးပှၤန့ၣ် အဝဲသ့ၣ်အဘူးအတံၢ် မ့တမ့ၢ် ပှၤလၢအတၢ်ကရၢကရိအပူၤတဖၣ် ကမၤမဲာ်ဆှးအီၤလီၤ.
ဒီးပှၤလၢပထံၣ်လိာ်သးဒီးအီၤ တနီၤနီၤန့ၣ် ဘၣ်သ့ၣ်သ့ၣ် အဝဲသ့ၣ်လဲၤခီဖျိဘၣ်ဝဲ တၢ်အိၣ်သးလၢ အလီၤပျံၤလီၤဖုးအဃိ အဝဲသ့ၣ်အသးကဘၣ်ဒိဒိၣ်မးလီၤ. ဒီပုၢ်ဝဲၢ်မုၣ် ခံ(မ်) န့ၣ်မ့ၢ်ဝဲ မံးၡ့ၣ်နရ့ၣ် ဒီးတဲဝဲလၢ ပှၤအါဂၤလၢအအိၣ်လၢ အဟီၣ်ကဝီၤအပူၤတဖၣ်န့ၣ် ခီဖျိလၢတၢ်ဒုးတၢ်ယၤအဃိ တၢ်လၢအိၣ်ဒီးအဝဲသ့ၣ်တဖၣ် လီၤမၢ်ကွံာ်ဝဲခဲလၢာ်လီၤ. ဒီးအဝဲသ့ၣ် အတၢ်မုၢ်လၢ်လၢခါဆူညါအဂီၢ်စ့ၢ်ကီး တအိၣ်နီတမံၤလၢၤဘၣ်. လၢတၢ်န့ၣ်အဃိ အဝဲသ့ၣ်အသူၣ်အ့န့သးအ့န့ ဒီးတအဲၣ်ဒိးနာ်န့ၢ်ပှၤနီတဂၤဘၣ်. ဒီးပှၤလၢအိၣ်လၢ ဟီၣ်ကဝီၤဒ်အံၤတဖၣ်န့ၣ် အဝဲသ့ၣ်ကထီဒါဝဲ ပတၢ်စံၣ်တဲၤတဲလီၤတၢ်မၤလီၤ. ဘၣ်တဘျီ ဖဲ ခံ(မ်) စံၣ်တဲၤတဲလီၤတၢ်အဆၢကတီၢ် ပှၤမၤဒၢၣ်မၤဆါအီၤလီၤ.
ခံ(မ်) န့ၣ် ပှၤမၤအီၤဒ်အံၤဘၣ်ဆၣ် ဘၣ်မနုၤအဃိ အဝဲဆဲးပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်ဒံးလဲၣ်. ထီဘိန့ၣ် အဝဲဂုာ်ကျဲးစၢး သ့ၣ်နီၣ်ထီၣ်က့ၤဝဲ ကတိၤဒိ ၁၉:၁၁ လီၤ. ဖဲန့ၣ်တဲဝဲ “ပှၤကူၣ်တၢ်သ့န့ၣ်သးထီၣ်ကီလီၤ.” ဖဲအဝဲဆိကမိၣ်ဝဲ ဘၣ်ဃးပှၤလၢအဟီၣ်ကဝီၤပူၤတဖၣ် လဲၤခီဖျိဘၣ်ဝဲတၢ်ကီတၢ်ခဲအဂ့ၢ်အခါ မၤစၢၤအီၤဒ်သိး အဝဲကအိၣ်ဒီးတၢ်သးကညီၤအဂီၢ်လီၤ. ပှၤလၢအထံၣ်လိာ်သးဒီးအီၤတဖၣ် တမ့ၢ်ပှၤလၢအတရ့ဒီးအီၤ ဂ့ၤဂ့ၤကိးဂၤဒဲးဘၣ်. ဖဲတၢ်လီၢ်အဝဲန့ၣ် အဝဲမၤတၢ်လဲၤကဒါက့ၤန့ၢ်တနီၤလီၤ.
ပသံကွၢ်လီၤပသးဒ်အံၤသ့ဝဲလီၤ. ‘ယမ့ၢ်တသ့ၣ်ညါ တၢ်မ့ၢ်တၢ်တီဘၣ်န့ၣ် ဖဲယဟိဝၤပှၤအုၣ်အသးတဖၣ် ဟဲစံၣ်တဲၤတဲလီၤယၤအခါ မ့ၢ်ယကထံၣ်အဝဲသ့ၣ်ဒ်လဲၣ်.’ အဒိ ပမ့ၢ်နၢ်ဟူဘၣ် ယဟိဝၤပှၤအုၣ်အသးတဖၣ် အဂ့ၢ်လၢအတမ့ၢ်တတီဘၣ်န့ၣ် ဘၣ်သ့ၣ်သ့ၣ် ပဝဲစ့ၢ်ကီး ပတရ့ဒီးအဝဲသ့ၣ်ဂ့ၤဂ့ၤဘၣ်. အဃိ ပကလိၣ်ဘၣ်ပှၤဂၤ အတၢ်သးကညီၤစ့ၢ်ကီးလီၤ. ယ့ၣ်ၡူးတဲဝဲလၢ ပဘၣ်ရ့ဒီးပှၤဂၤ ဒ်ပအဲၣ်ဒိးလၢ ပှၤဂၤကရ့ပှၤအသိးန့ၣ်လီၤ. လၢတၢ်န့ၣ်အဃိ ပကဘၣ်ဂုာ်ကျဲးစၢးအိၣ်ဒီး တၢ်ဒိသူၣ်ဒိသးလၢ ပှၤဂၤအဖီခိၣ်ဒီးမ့ၢ်ကီဒၣ်လဲာ် ပဘၣ်ဝံသးစူၤအဝဲသ့ၣ်လီၤ.—မးသဲ ၇:၁၂.
ကွၢ်လိမၤဒိး စီၤပီလူးအတၢ်သးကညီၤတက့ၢ်
ပှၤလၢအမၤအၢမၤနး အီၤတဖၣ်ဒၣ်လဲာ် စီၤပီလူး ပာ်ဖျါထီၣ်တၢ်သးကညီၤလၢ အဝဲသ့ၣ်အဖီခိၣ်လီၤ. ဘၣ်မနုၤအဃိလဲၣ်. မ့ၢ်လၢအပူၤကွံာ်န့ၣ် အမ့ၢ်တ့ၢ်ပှၤဒ်န့ၣ်အသိးလီၤ. အဝဲတဲဝဲလၢ “ယဲဒၣ်အံၤလၢအခီၣ်ထံးန့ၣ်, ယမ့ၢ်ပှၤဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူလီၤ. ဘၣ်ဆၣ်ဒီး ယန့ၢ်ဘၣ်တၢ်သးကညီၤလီၤ. အဂ့ၢ်ဒ်အံၤ, ယတသ့ၣ်ညါဘၣ်တၢ်ဘၣ်, ဒီးယတနာ်ဘၣ်တၢ်ဘၣ်ဒီး, ယမၤတၢ်န့ၣ်လီၤ.” (၁ တံၤမသ့း ၁:၁၃) စီၤပီလူးသ့ၣ်ညါဝဲလၢ ယဟိဝၤယွၤ ဒီးယ့ၣ်ၡူး ပာ်ဖျါထီၣ်တၢ်သးကညီၤလၢအဖီခိၣ်လီၤ. အဝဲနၢ်ပၢၢ်စၢၤဝဲ ပှၤလၢအထီဒါအီၤတဖၣ် အတၢ်တူၢ်ဘၣ် မ့ၢ်လၢအပူၤကွံာ်န့ၣ် အဝဲစ့ၢ်ကီး ထီဒါတၢ်မ့ၢ်တၢ်တီအဃိလီၤ.
တဘျီတခီၣ် စီၤပီလူး ထံၣ်ဘၣ်ဒီးပှၤလၢအသူၣ်ဆူၣ်သးဆူၣ်လၢ တၢ်ဘူၣ်တၢ်ဘါလၢ အကမၣ်အဂီၢ်လီၤ. ဖဲန့ၣ်အခါ မ့ၢ်အဝဲတူၢ်ဘၣ်ဝဲဒ်လဲၣ်. မၤတၢ် ၁၇:၁၆ ပာ်ဖျါထီၣ်ဝဲလၢ ဖဲအဝဲအိၣ်လၢ “အၤသ့ၣ်အဖၢမုၢ်ဒီး, ထံၣ်ဝ့ၢ်န့ၣ်ပှဲၤဝဲဒီးတၢ်ဂီၤဒီး, အသးကိၢ်ထီၣ်ဝဲလီၤ.” ဘၣ်ဆၣ်အဝဲသူဝဲ တၢ်ဂီၤတၢ်ဖှီၣ်အဂ့ၢ်ဒ်သိး ကသိၣ်လိပှၤဂၤလၢ တၢ်မ့ၢ်တၢ်တီအဂီၢ်လီၤ. (မၤတၢ် ၁၇:၂၂, ၂၃) ဖဲအဝဲလဲၤစံၣ်တဲၤတဲလီၤတၢ်ဆူ ပှၤကလုာ်လၢ အဂၤတဖၣ်အအိၣ်အခါ အဝဲဆီတလဲ အတၢ်စံၣ်တဲၤတဲလီၤတၢ် အကျိၤအကျဲဒ်သိး “ကအုၣ်က့ၤခီၣ်က့ၤပှၤတနီၤနီၤ” အဂီၢ်လီၤ.—၁ ကရံၣ်သူး ၉:၂၀-၂၃.
ဖဲပဟး စံၣ်တဲၤတဲလီၤတၢ်အခါ ပကထံၣ်ဘၣ်ဒီး ပှၤလၢအတတူၢ်လိာ်ပှၤ မ့တမ့ၢ် ပှၤလၢအစူၢ်ကမၣ် နာ်ကမၣ်တၢ်တဖၣ်လီၤ. ဖဲန့ၣ်အခါ ပကွၢ်လိမၤဒိး စီၤပီလူးအဒိအတဲာ်သ့ခီဖျိ ပသူတၢ်ဂ့ၢ်လၢ အဘၣ်ဃးဒီးအဝဲသ့ၣ်တဖၣ် ဒ်သိးပက “စံၣ်တဲၤတဲလီၤတၢ်အဂ့ၤ” လၢအဝဲသ့ၣ်အဂီၢ်န့ၣ်လီၤ. (ယၡါယၤ ၅၂:၇) ဒီပုၢ်ဝဲၢ်မုၣ်ဒီရသံၤ တဲဝဲလၢ “လၢပဟီၣ်ကဝီၤအပူၤန့ၣ် ပှၤအါဂၤဘၣ်တၢ်သိၣ်လိအီၤလၢ ကစၢ်ယွၤန့ၣ်အတၢ်သးကညီၤတအိၣ်ဘၣ် ဒီးဃုထံၣ်ထဲပတၢ်ကမၣ်လီၤ. ယမ့ၢ်ထံၣ်ဒီးပှၤဒ်အံၤတဖၣ်န့ၣ် ယပတြၢၤ အဝဲသ့ၣ်အတၢ်နာ်ကစၢ်ယွၤ ဒီးယဖးပၠးအဝဲသ့ၣ် လံာ်စီဆှံအဆၢလၢ အဘၣ်ဃးဒီး ယဟိဝၤယွၤအတၢ်ဂ့ၤတၢ်ဝါ ဒီးအတၢ်တိာ်ပာ် လၢညါဆူညါအဂ့ၢ်လီၤ.”
“မၤနၢၤတၢ်အၢလၢတၢ်ဂ့ၤန့ၣ်တက့ၢ်”
တၢ်အကတၢၢ် ဒံးယာ်ဒံးဘူးထီၣ်ဝဲအဃိ ပကထံၣ်ဘၣ်လၢ ပှၤတနီၤနီၤန့ၣ် အတၢ်ပာ်သူၣ်ပာ်သး “ကအၢလီၤဝဲ နးထီၣ်နးထီၣ်လီၤ.” (၂ တံၤမသ့း ၃:၁, ၁၃) ဘၣ်ဆၣ် အဝဲသ့ၣ် အတၢ်ပာ်သူၣ်ပာ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပဝဲသ့ၣ်တဖၣ် ပကဘၣ်ဆဲးအိၣ်ဒီး တၢ်သးကညီၤ ဒီးတၢ်သးခုလီၤ. ယဟိဝၤယွၤ ဟ့ၣ်ဂံၢ်ဟ့ၣ်ဘါပှၤလၢ “မၤနၢၤတၢ်အၢလၢတၢ်ဂ့ၤန့ၣ်တက့ၢ်.” (ရိမ့ၤ ၁၂:၂၁) ဒီပုၢ်ဝဲၢ်မုၣ်ကၠဲၤစံၤခၤန့ၣ် မၤဝဲပှၤလဲၤလၢညါ ဒီးတဲဝဲလၢညီနုၢ်န့ၣ် အဝဲထံၣ်ဘၣ်ဒီးပှၤလၢ အပာ်ထီၣ်ထီအသး, ပှၤလၢအဒုၣ်ဒွဲၣ်ယဟိဝၤပှၤအုၣ်အသး ဒီးအတၢ်စံၣ်တဲၤတဲလီၤန့ၣ်လီၤ. အဝဲတဲဝဲလၢ “ယမ့ၢ်ထံၣ်ဘၣ်ဒီးပှၤဒ်အံၤတဖၣ်န့ၣ် ယသးဘၣ်တံာ်တာ်သနာ်က့ ယဃ့ထုကဖၣ်လၢယသးပူၤ ဒီးဃ့လၢယဟိဝၤယွၤ ကမၤစၢၤယၤဒ်သိး ယကထံၣ်ပှၤဂၤ ဒ်အဝဲထံၣ်ဝဲအသိးန့ၣ်လီၤ.” မ့ၢ်လၢအမၤဝဲဒ်အံၤအဃိ မၤစၢၤအီၤဒ်သိး အဝဲတသးစၢၢ်ဆၢထဲ အနီၢ်ကစၢ်တၢ်တူၢ်ဘၣ်ဘၣ် ဒီးကသးစၢၢ်ဆၢဝဲလၢ ကဘၣ်မၤစၢၤပှၤဂၤဒ်လဲၣ်န့ၣ်လီၤ.
ပကဘၣ်ဆဲးဃု ပှၤလၢအအဲၣ်ဒိးသ့ၣ်ညါ တၢ်မ့ၢ်တၢ်တီတဖၣ်လီၤ
လၢခံပှၤတနီၤနီၤ ကတူၢ်လိာ်ပတၢ်မၤစၢၤ ဒီးကမၤလိတၢ်မ့ၢ်တၢ်တီလီၤ
ဖဲပဟးစံၣ်တဲၤတဲလီၤတၢ်ဒီး ဒီပုၢ်ဝဲၢ်တဖၣ်အခါ ပကဘၣ်ဂုာ်ကျဲးစၢး ဟ့ၣ်ဂံၢ်ဟ့ၣ်ဘါ အဝဲသ့ၣ်လီၤ. ကၠဲၤစံၤခၤ တဲဝဲလၢ ဖဲအဝဲလဲၤစံၣ်တဲၤတဲလီၤတၢ်ဒီး ဒီပုၢ်ဝဲၢ်အဂၤတဖၣ်အခါ ဒီပုၢ်ဝဲၢ်တဂၤထံၣ်ဘၣ်ဝဲ တၢ်ထီဒုၣ်ထီဒါလီၤ. ဖဲန့ၣ်အခါ အဝဲသ့ၣ်တတဲသကိးဝဲ တၢ်ဂ့ၢ်အဝဲန့ၣ်ဘၣ်. လၢတၢ်န့ၣ်အလီၢ် အဝဲတဲသကိးဝဲ တၢ်ဂ့ၢ်အဂ့ၤလၢ အဘၣ်ဃးဒီးတၢ်စံၣ်တဲၤတဲလီၤ တၢ်မၤလဲၤထီၣ်လဲၤထီ ဒ်လဲၣ်အဂ့ၢ်န့ၣ်လီၤ.
တဘျီတခီၣ် ပကစံၣ်တဲၤတဲလီၤတၢ်အဂီၢ် ကကီဝဲန့ၣ် ယဟိဝၤယွၤ သ့ၣ်ညါဝဲလီၤ. ဘၣ်ဆၣ် ပမ့ၢ်ကွၢ်လိမၤဒိး အတၢ်သးကညီၤန့ၣ် အဝဲကသးခုဒိၣ်မးလီၤ. (လူၤကၣ် ၆:၃၆) ဘၣ်ဆၣ် ပသ့ၣ်ညါလၢ ယဟိဝၤယွၤန့ၣ် တပာ်ဖျါထီၣ် တၢ်သးကညီၤ ဒီးတၢ်ဝံသးစူၤ လၢအဝဲသ့ၣ်အဖီခိၣ် လီၤထူလီၤယိာ်ဘၣ်. ပနာ်သ့သပှၢ်ကတၢၢ်လၢ အဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤဟးဂီၤကွံာ် တၢ်အၢတၢ်သီခဲလၢာ်လီၤ. တချုးလၢတၢ်ဆၢကတီၢ်အံၤ ဟဲဒံးဘၣ်န့ၣ် တၢ်စံၣ်တဲၤတဲလီၤတၢ်မၤ မ့ၢ်တၢ်လၢအရ့ဒိၣ်ဒိၣ်မးလီၤ. (၂ တံၤမသ့း ၄:၂) မ်ပကဆဲး စံၣ်တဲၤတဲလီၤတၢ်လၢ တၢ်သူၣ်ဆူၣ်သးဆူၣ်အပူၤ ဒီးပာ်ဖျါထီၣ်တၢ်သးကညီၤလၢ “ပှၤကညီခဲလၢာ်” အဖီခိၣ်တက့ၢ်.
