လံာ်​မးသဲ​ပာ်ဖျါ​ထီၣ်ဝဲ​လၢ– “ယ့ၣ်ၡူး​လဲၤနုာ်​ဆူ​ယွၤ​အ​တၢ်လုၢ်ဟံၣ်​ပူၤ, ဒီး​ဟီထီၣ်ကွံာ်​ကယဲၢ်​ပှၤ​ပှ့ၤတၢ်, ဒီး​ပှၤဆါ​တၢ်​လၢ​တၢ်လုၢ်ဟံၣ်​ပူၤ​ခဲလၢာ်, ဒီး​ထွၣ်​လီၤဃံၤ​ကွံာ်​ပှၤ​တိာ်​လီၤ​စ့​အလီၢ်, ဒီး​ပှၤလၢ​အ​ဆါ​ထိၣ်လွံၢ်​သ့ၣ်​တဖၣ် အ​လီၢ်ဆ့ၣ်နီၤ​လီၤ. ဒီး​စံး​ဘၣ်​အီၤ တၢ်ကွဲး​အသး, ယ​ဟံၣ်​က​ဘၣ်​တၢ်​ကိး​အီၤ​လၢ တၢ်ဘါ​ထုကဖၣ်​အဟံၣ်​လီၤ. မ့မ့ၢ်​သု​ဝဲ​သ့ၣ်​အံၤ, သု​မၤ​မး​အီၤ​လၢ တၢ်​ဟုၣ်​တၢ်ဘျၣ်​အ​ပူၤ​လီၤ.”—မးသဲ ၂၁:၁၂, ၁၃.

တၢ်​စံၣ်​စိၤ​တဲ​စိာ်​ပာ်ဖျါ​ထီၣ်ဝဲ​လၢ ပှၤဆါ​တၢ်​လၢ တၢ်လုၢ်ဟံၣ်​တဖၣ် ဆါ​တၢ်​အ​ပှ့ၤဒိၣ် ဒိၣ်မး​လီၤ. အဒိ, ညီနုၢ်​ထိၣ်လွံၢ်​န့ၣ် အပှ့ၤ​တ​ဒိၣ်​ဘၣ်​အဃိ ဒ်သိး​ပှၤဖှီၣ်​ဖိ​တဖၣ် က​လဲၤ​လုၢ်ထီၣ်​တၢ်​အဂီၢ် ပှ့ၤ​ဝဲ​န့ၢ်​လီၤ. ဘၣ်ဆၣ် လၢ​ပှၤ​ယူဒၤ​ဖိ အ​လံာ်လဲၢ်​လၢပျၢၤ​တဖၣ်​အ​ပူၤ ပာ်ဖျါ​ထီၣ်ဝဲ​လၢ ဖဲ​တၢ်မၢဖိ​အ​စိၤ ထိၣ်လွံၢ်​ခံဘ့ၣ်​န့ၣ် အပှ့ၤ​အိၣ်ဝဲ​ထဲသိးဒီး စ့​ဒန့ၤရံၤ​ထူ​တဘ့ၣ်​ညါ​လီၤ. ဘၣ်ဆၣ် ဒ်သိး​ပှၤ​က​န့ၢ်ဘၣ် စ့​ဒန့ၤရံၤ​ထူ​တဘ့ၣ်​အဂီၢ် က​ဘၣ်​မၤဝဲ​တၢ်မၤ ၂၅ သီ​လီၤ. မ့ၢ်​လၢ​ထိၣ်လွံၢ်​တဖၣ် အ​ပှ့ၤဒိၣ်​ထဲ​အံၤ​ညါ​အဃိ ပှၤဖှီၣ်​ဖိ​တဖၣ် ပှ့ၤ​ဝဲ​တ​န့ၢ်​လၢၤဘၣ်. (၃ မိၤၡ့ ၁:၁၄; ၅:၇; ၁၂:၆-၈) ခီဖျိ​လၢ ထိၣ်လွံၢ်​တဖၣ်​အပှ့ၤ​ဒိၣ်ထီၣ်ဝဲ​အဃိ ရၤဘံ​စူးမ့ၤ​အိၣ် ဘဲ(န်) က​မၤ​လ့​လး အသး​ဒိၣ်ထီၣ်​တၢ်​ဒီး မၤ​လီၤ​စှၤ​ဝဲ​တၢ်​လုၢ်​တၢ်​ပာ်​လၢ ပှၤ​ယူဒၤ​ဖိ​က​ဘၣ်​ဟ့ၣ်​လုၢ်ထီၣ်​ဝဲ​န့ၣ်​လီၤ. လၢတၢ်န့ၣ်​အဃိ ထိၣ်လွံၢ်​ခံဘ့ၣ်​န့ၣ် အပှ့ၤ​လီၤ​က့ၤဝဲ ၉၉ မျးကယၤ​န့ၣ်​လီၤ.

ဒ်​ပ​သ့ၣ်ညါ​ဘၣ်​အသိး ပှၤဆါ​တၢ်ဖိ​တဖၣ်​အံၤ သူၣ်လီသးကွံ​တၢ် ဒီး​မၤတၢ်​တတီ​တလိၤ​လီၤ. လၢတၢ်န့ၣ်​အဃိ ယ့ၣ်ၡူး​ကိး​အဝဲသ့ၣ်​လၢ “တၢ်​ဟုၣ်​တၢ်ဘျၣ်” န့ၣ်​ကြၢး​ဝဲ​ဘၣ်​ဝဲ​လီၤ.