ယဟိဝၤယွၤ မၤမုာ်ထီၣ်ပှၤလၢ ပတၢ်နးတၢ်ဖှီၣ်ခဲလၢာ်အပူၤ
“တၢ်မၤမုာ်ခဲလၢာ်အကစၢ်. . . မၤမုာ်ထီၣ်ပှၤလၢ ပတၢ်နးတၢ်ဖှီၣ်ခဲလၢာ်အပူၤ” လီၤ. —၂ ကရံၣ်သူး ၁:၃, ၄.
၁, ၂. ယဟိဝၤယွၤ မၤမုာ်ထီၣ်က့ၤပှၤလၢ ပတၢ်နးတၢ်ဖှီၣ်အပူၤဒ်လဲၣ်. ဒီးအကလုၢ်ကထါ အၢၣ်လီၤပှၤဒ်လဲၣ်.
ဒီပုၢ်ဝဲၢ်ခွါသးစၢ်လၢ အမ့ၢ်ပှၤသဘျ့တဂၤ ဆိကမိၣ်ထံဝဲဘၣ်ဃး ၁ ကရံၣ်သူး ၇:၂၈ န့ၣ်လီၤ. လံာ်စီဆှံတဆၢအံၤစံးဝဲ ပှၤလၢအဆီဟံၣ်ဆီဃီန့ၣ် “ကဘၣ်တၢ်နးတၢ်ဖှီၣ်လၢ ပဖံးပညၣ်အပူၤလီၤ.” အဝဲလဲၤတဲတၢ်ဒီး တၢ်အိၣ်ဖှိၣ်သးပှၢ်ဒီး သံကွၢ်ဝဲ– “‘တၢ်နးတၢ်ဖှီၣ်’ န့ၣ်အဲၣ်ဒိးစံးဝဲတၢ်မနုၤလဲၣ်. ဒီးတၢ်နးတၢ်ဖှီၣ် မ့ၢ်ဟဲကဲထီၣ်လၢ ယတၢ်ဆီဟံၣ်ဆီဃီအပူၤန့ၣ် ယကဘၣ်မၤဒ်လဲၣ်.” တချုးလၢ တၢ်အိၣ်ဖှိၣ်သးပှၢ် စံးဆၢက့ၤအီၤဒံးဘၣ်န့ၣ် တၢ်အိၣ်ဖှိၣ်သးပှၢ်ဟ့ၣ်ကူၣ်အီၤလၢ အဝဲကဆိကမိၣ်ဆိဝဲ စီၤပီလူး အတၢ်ကတိၤလၢအမ့ၢ်– ယဟိဝၤယွၤမ့ၢ်ဝဲ “တၢ်မၤမုာ်ခဲလၢာ်အကစၢ်. . . အဝဲဒၣ်မၤမုာ်ထီၣ်ပှၤလၢ ပတၢ်နးတၢ်ဖှီၣ်ခဲလၢာ်” အပူၤလီၤ.—၂ ကရံၣ်သူး ၁:၃, ၄.
၂ ပသ့ၣ်ညါလၢ ပပၢ်ယဟိဝၤယွၤန့ၣ်အဲၣ်ပှၤ ဒီးဖဲပဘၣ်ကီဘၣ်ခဲအခါ ကမၤမုာ်ထီၣ်က့ၤပှၤလီၤ. နကသ့ၣ်နီၣ်ထီၣ်လၢ အပူၤကွံာ်န့ၣ် ယဟိဝၤယွၤ မၤစၢၤနၤဒီး ဟံးစုနဲၣ်ကျဲနၤ ခီဖျိအကလုၢ်ကထါလံာ်စီဆှံန့ၣ်လီၤ. လၢ်တၢ်န့ၣ်အဃိပနာ်သ့သပှၢ်ကတၢၢ်လၢ အဝဲအဲၣ်ဒိးဟ့ၣ်ပှၤ တၢ်လၢအဂ့ၤကတၢၢ် ဒ်အဟ့ၣ်အခ့အပှၤလၢညါတဖၣ် အသိးန့ၣ်လီၤ.—ဖး ယံးရမံယၤ ၂၉:၁၁, ၁၂ တက့ၢ်.
၃. တၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၃ ပမ့ၢ်သ့ၣ်ညါလၢ တၢ်ကီတၢ်ခဲ ဒီးတၢ်နးတၢ်ဖှီၣ် ဟဲကဲထီၣ်အသးလၢကျဲဒ်လဲၣ်န့ၣ် ပလဲၤခီဖျိဘၣ်အီၤကညီထီၣ်ဝဲတစဲးဖိလီၤ. ဘၣ်မနုၤအဃိ တၢ်နးတၢ်ဖှီၣ် ဟဲကဲထီၣ်လၢ တၢ်ဆီဟံၣ်ဆီဃီ မ့တမ့ၢ် ဟံၣ်ပူၤဃီပူၤလဲၣ်. တၢ်အဒိအတဲာ် လၢပျၢၤဒီးစိၤခဲအံၤတဖၣ်န့ၣ် ကမၤစၢၤပှၤဒ်သိး ပကထံၣ်န့ၢ်တၢ်မၤမုာ်ထီၣ်က့ၤလၢ ပလိၣ်ဘၣ်တဖၣ်ဒ်လဲၣ်. လၢတၢ်မၤလိအံၤအပူၤ ပကတဲသကိး တၢ်သံကွၢ်တဖၣ်အံၤအတၢ်စံးဆၢ ဒီးပလဲၤခီဖျိ တၢ်နးတၢ်ဖှီၣ်ကသ့ဒ်လဲၣ်န့ၣ်လီၤ.
တၢ်ကီတၢ်ခဲလၢ တၢ်ဆီဟံၣ်ဆီဃီအပူၤ
၄, ၅. မါဒီးဝၤန့ၣ် ကထံၣ်ဘၣ် တၢ်နးတၢ်ဖှီၣ် မနုၤတဖၣ်လဲၣ်.
၄ ယဟိဝၤယွၤ တ့လီၤဝဲနီၢ်အံၣ်အု ဒီးဆှၢဃီၤဝဲဆူ စီၤအၤဒၣ်အအိၣ် ဒီးအဝဲကဲထီၣ်ဝဲ စီၤအၤဒၣ်အမါလီၤ. ဒီးယဟိဝၤယွၤ စံးဝဲလၢ– “တၢ်လၢပိာ်ခွါအံၤ ကဟးသဒၣ်အမိၢ်အပၢ်, ဒီးကဘျုးအသးဆူပိာ်မုၣ်အအိၣ်, ဒီးတၢ်လၢပှၤခံဂၤန့ၣ် ကကဲထီၣ်တၢ်တသွံၣ်ဃီတညၣ်ဃီလီၤ.” (၁ မိၤၡ့ ၂:၂၄) ဘၣ်ဆၣ် ပတမ့ၢ်ပှၤလၢပှၤပှဲၤနီတဂၤဘၣ်. (ရိမ့ၤ ၃:၂၃) လၢတၢ်န့ၣ်အဃိ ပှၤခံဂၤမ့ၢ်ဆီဟံၣ်ဆီဃီန့ၣ် တၢ်ကီတၢ်ခဲအိၣ်ထီၣ်ဝဲသ့လီၤ. အဒိ, ပိာ်မုၣ်တဂၤ တချုးလၢအဆီဟံၣ်ဆီဃီဒံးဘၣ်န့ၣ် အဝဲဘၣ်ဒိကနၣ် အမိၢ်အပၢ်အကလုၢ်လီၤ. ဘၣ်ဆၣ် မုၢ်မဆါတနံၤအံၤလံာ်စီဆှံစံးဝဲလၢ ဖဲအဝဲဖျီအသးဝံၤန့ၣ် အဝၤကကဲထီၣ်အဟံၣ်ခိၣ်အဃိ အဝဲကဘၣ်ဒိကနၣ်အဝၤအကလုၢ်လီၤ. (၁ ကရံၣ်သူး ၁၁:၃) ဖဲအဝဲသ့ၣ် ဆီဟံၣ်ဆီဃီသီသီအခါ အဝၤကဘၣ်တီခိၣ်ရိၤမဲတၢ်အဃိ ကကီဝဲလၢအဂီၢ်လီၤ. ဒီးအမါစ့ၢ်ကီး ကဘၣ်အိၣ်လၢအဝၤ အတၢ်တီခိၣ်ရိၤမဲအဖီလာ်အဃိ ကကီဝဲလီၤ. တကးဒံးဘၣ် ဖဲပှၤခံဂၤဖျီအသးဝံၤအခါ အဝဲသ့ၣ်ဒီး အမံၤပှၢ်တဖၣ်အဘၢၣ်စၢၤန့ၣ် တၢ်သးတလီၤပလိာ်အိၣ်ထီၣ်ဝဲသ့အဃိ ကဲထီၣ်တၢ်နးတၢ်ဖှီၣ်တခါလီၤ.
၅ တကးဒံးဘၣ် ဖဲဝၤတဂၤသ့ၣ်ညါဝဲလၢ အမါဒၢထီၣ်အခါ အဝဲသ့ၣ်ခံဂၤလၢာ် ကသူၣ်ခုသးခုဝဲ ဒီးတကတီၢ်ဃီန့ၣ် ကသူၣ်ကိၢ်သးဂီၤတၢ် စ့ၢ်ကီးလီၤ. ဖဲအမါဒၢအဆၢကတီၢ်န့ၣ် အဝဲကဘၣ်ယိၣ်တၢ်လၢ အမါဒီးအဖိအတၢ်အိၣ်ဆူၣ်အိၣ်ချ့အဂီၢ်လီၤ. တကးဒံးဘၣ် အဝဲကဘၣ် သ့ၣ်ညါစ့ၢ်ကီးဝဲလၢ အတၢ်လၢာ်ဘူၣ်လၢာ်စ့ၤကအါထီၣ်ဝဲလီၤ. ဒီးအဖိအိၣ်ဖျဲၣ်မ့ၢ်ဝံၤန့ၣ် အဝဲသ့ၣ်ကဘၣ်ဆီတလဲအတၢ်အိၣ်မူလီၤ. ဖဲအဖိအိၣ်ဖျဲၣ်ဝံၤအလီၢ်ခံ မိၢ်န့ၣ်ကဘၣ်ဟ့ၣ်တၢ်ဆၢကတီၢ်လၢ အဖိအဂီၢ်အါထီၣ်ဝဲအဃိ ဟ့ၣ်တၢ်ဆၢကတီၢ်လၢ အဝၤအဂီၢ်ဒ်လၢညါအသိးတန့ၢ်လၢၤဘၣ်. အဝၤစ့ၢ်ကီးအမူဒါ ကအါထီၣ်ဝဲလီၤ. အဝဲကဘၣ်ကွၢ်ထွဲဝဲ အဖိဒီးအမါအတၢ်လိၣ်ဘၣ်တဖၣ်န့ၣ်လီၤ.
၆-၈. ပှၤနီၢ်ဒီမါဝၤလၢ အဖိအိၣ်တန့ၢ်ဘၣ်တဖၣ်န့ၣ် အဝဲသ့ၣ်တူၢ်ဘၣ်ဝဲဒ်လဲၣ်.
၆ ပှၤနီၢ်ဒီမါဝၤ တနီၤနီၤန့ၣ် ကထံၣ်ဘၣ်တၢ်နးတၢ်ဖှီၣ် လၢအဂၤတဖၣ်လီၤ. အဒိ, ဘၣ်သ့ၣ်သ့ၣ် အဝဲသ့ၣ်လီကီအဖိ ဘၣ်ဆၣ် အဖိအိၣ်တန့ၢ်ဘၣ်. မ့ၢ်လၢအဖိအိၣ်တန့ၢ်ဘၣ်အဃိ မါန့ၣ်အသးကဘၣ်ဒိဝဲဒိၣ်မးလီၤ. (ကတိၤဒိ ၁၃:၁၂) လၢပျၢၤန့ၣ် တၢ်ဆီဟံၣ်ဆီဃီ ဒီးတၢ်ဟံးဖိဟံးလံၤန့ၣ် မ့ၢ်တၢ်လၢအရ့ဒိၣ်ဒိၣ်မးလၢ ပိာ်မုၣ်သ့ၣ်တဖၣ်အဂီၢ်လီၤ. စီၤယၤကိာ်အမါ နီၢ်ရၤဃ့လးန့ၣ် ဖဲအဒီပုၢ်ဝဲၢ်မုၣ်ဒၢထီၣ်အခါ အဝဲဒၢတန့ၢ်ဘၣ်အဃိ အသးဘၣ်ဒိဒိၣ်မးလီၤ. (၁ မိၤၡ့ ၃၀:၁, ၂) ပှၤတနီၤနီၤ ထံၣ်ဝဲလၢတၢ်ဟံးဖိဟံးလံၤအါအါန့ၣ် မ့ၢ်တၢ်လၢအရ့ဒိၣ် ဒိၣ်မးလီၤ. လၢတၢ်န့ၣ်အဃိ မံးၡ့ၣ်နရ့ၣ်လၢ အလဲၤအိၣ်ဘၣ်လၢ ထံကီၢ်ဒ်အံၤတဖၣ်န့ၣ် ပှၤသံကွၢ်အီၤလၢ ဘၣ်မနုၤအဃိ သုတဟံးသုဖိဘၣ်လဲၣ်. မံးၡ့ၣ်နရ့ၣ်တဖၣ် ဂုာ်ကျဲးစၢးတဲနၢ်ပၢၢ်အဝဲသ့ၣ်သနာ်က့ အဝဲသ့ၣ်တဲဝဲလၢ ဒ်သိးသုဖိကအိၣ်အဂီၢ် “ပကဃ့ဘါထုကဖၣ်န့ၢ် တၢ်လၢသုဂီၢ်လီၤ.”
၇ ဆိကမိၣ်ကွၢ် တၢ်အဒိလၢအဂၤတခါတက့ၢ်. ဒီပုၢ်ဝဲၢ်မုၣ်လၢ ကီၢ်အဲကလံးတဂၤ လီကီဝဲအဖိဒိၣ်မးလီၤ. ဘၣ်ဆၣ် အဝဲသ့ၣ်ညါဝဲလၢ အဖိအိၣ်တန့ၢ်ဘၣ်အဃိ အသးဘၣ်ဒိဒိၣ်မးလီၤ. လၢတၢ်န့ၣ်အဃိ အဝဲဒီးအဝၤ ဆၢတဲာ်လီၤအသးလၢ ကကွၢ်လုၢ်ဖိဝဲ ဖိသၣ်တဂၤလီၤ. ဘၣ်ဆၣ် အသးတမုာ်ထီၣ်က့ၤတဘျီဃီဘၣ်. အဝဲတဲဝဲလၢ “ယကွၢ်လုၢ်ဖိ, ဖိသၣ်သနာ်က့ တလီၤဂာ်ဒ်သိး ယကစၢ်သွံၣ်ထံဘၣ်.”
၈ လံာ်စီဆှံစံးဝဲလၢ ပိာ်မုၣ်တဂၤ “ကတုၤလၢတၢ်အုၣ်က့ၤခီၣ်က့ၤ, လၢအဆံးစၢ်အဖိလီၤ.” (၁ တံၤမသ့း ၂:၁၅) ဘၣ်ဆၣ် လံာ်စီဆှံတဆၢအံၤ တအဲၣ်ဒိးစံးဝဲလၢ ပိာ်မုၣ်န့ၣ်ဆံးစၢ်အဖိအဃိ န့ၢ်ဘၣ်တၢ်အုၣ်က့ၤခီၣ်က့ၤဘၣ်. မ့မ့ၢ်ဒ်န့ၣ်န့ၣ် လံာ်စီဆှံတဆၢအံၤ အဲၣ်ဒိးစံးဝဲအခီပညီဒ်လဲၣ်. အဲၣ်ဒိးစံးဝဲလၢ မိၢ်န့ၣ်အတၢ်မၤကအါလၢ ကဘၣ်ကွၢ်ထွဲဒီး ကဟုကယာ်အဖိဒီး အဟံၣ်အဃီလီၤ. လၢတၢ်န့ၣ်အဃိ ကမၤလၢာ်ဂီၤတၢ်ဆၢကတီၢ်လၢ ကဟးတဲအီၣ်ပှၤဂ့ၢ် မ့တမ့ၢ် ကနုာ်လီၤမၤဘၣ်ထွဲအသးဒီး ပှၤဂၤအတၢ်ဂ့ၢ်အဂီၢ်န့ၣ် အတၢ်ဆၢကတီၢ်တအိၣ်လၢၤဘၣ်. (၁ တံၤမသ့း ၅:၁၃) ဘၣ်ဆၣ်သနာ်က့ လၢအတၢ်ဆီဟံၣ်ဆီဃီ မ့တမ့ၢ် အဟံၣ်ပူၤဃီပူၤန့ၣ် တၢ်ကီတၢ်ခဲကအိၣ်ဒံးဝဲလီၤ.
ယဟိဝၤယွၤ အတၢ်အၢၣ်လီၤအီလီၤ အိၣ်ဝဲအါမးလၢ အဝဲကမၤမုာ်ထီၣ်က့ၤပှၤ ဖဲပဘၣ်တၢ်နးတၢ်ဖှီၣ် အဆၢကတီၢ်န့ၣ်လီၤ
၉. တၢ်နးတၢ်ဖှီၣ်အဂၤတမံၤလၢ ပှၤလၢအဆီဟံၣ်ဆီဃီတဖၣ် ကထံၣ်ဘၣ်ဝဲန့ၣ် မ့ၢ်မနုၤလဲၣ်.
၉ တၢ်နးတၢ်ဖှီၣ်အဂၤတမံၤလၢ ပှၤလၢအဆီဟံၣ်ဆီဃီတဖၣ် ကထံၣ်ဘၣ်ဝဲန့ၣ် မ့ၢ်ဝဲဖဲအသးသမူတံၤသကိး သံဝဲအခါန့ၣ်လီၤ. အဝဲသ့ၣ် တဆိကမိၣ်ဘၣ်ဝဲလၢ တၢ်ကမၤအသးဒီးအီၤဒ်အံၤဘၣ်. သနာ်က့ ပှၤအါဂၤလဲၤခီဖျိဘၣ်ဝဲ တၢ်အိၣ်သးလၢအကီအခဲအံၤလီၤ. ဘၣ်ဆၣ် မ့ၢ်လၢခရံာ်ဖိသ့ၣ်တဖၣ် နာ်ဝဲတၢ်ဂဲၤဆၢထၢၣ်သမူထီၣ်က့ၤအဃိ အဝဲသ့ၣ်ဒိးန့ၢ်ဘၣ် တၢ်မၤမုာ်ထီၣ်က့ၤအသးလီၤ. (ယိၤဟၣ် ၅:၂၈, ၂၉) လၢလံာ်စီဆှံအပူၤန့ၣ် ပပၢ်ယဟိဝၤယွၤ အတၢ်အၢၣ်လီၤအီလီၤအိၣ်ဝဲအါမးလၢ အဝဲကမၤမုာ်ထီၣ်က့ၤပှၤ ဖဲပဘၣ်တၢ်နးတၢ်ဖှီၣ်အဆၢကတီၢ်န့ၣ်လီၤ. ခဲအံၤပကကွၢ်သကိး ယဟိဝၤယွၤအခ့အပှၤတနီၤန့ၣ် ဒိးန့ၢ်ဘၣ်ဝဲတၢ်မၤမုာ်ထီၣ်က့ၤအသးဒ်လဲၣ်. ဒီးကဲထီၣ်တၢ်မၤစၢၤလၢ အဝဲသ့ၣ်အဂီၢ်ဒ်လဲၣ်.
နသးသမူတံၤသကိး မ့ၢ်သံန့ၣ် နဃုထံၣ်န့ၢ်တၢ်မၤမုာ်ထီၣ်က့ၤနသး ကသ့ဒ်လဲၣ် (ကွၢ်လံာ်အဆၢ ၉, ၁၂ တက့ၢ်.)
တၢ်မၤမုာ်ထီၣ်က့ၤပှၤ ဖဲတၢ်နးတၢ်ဖှီၣ်အဆၢကတီၢ်
၁၀. နီၢ်ဃးနၤ ဒိးန့ၢ်ဘၣ်တၢ်မၤမုာ်ထီၣ်က့ၤအီၤဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၀ ဆိကမိၣ်ကွၢ် တၢ်မၤအသးဒီး စီၤအ့လကါနၤ အမါနီၢ်ဃးနၤတက့ၢ်. အဝဲလီကီအဖိဘၣ်ဆၣ် အဖိအိၣ်တန့ၢ်ဘၣ်. မ့မ့ၢ်စီၤအ့လကါနၤ အမါခံဂၤတဂၤ နီၢ်ပနံးနၤန့ၣ် အဖိအိၣ်ဝဲအါမးလီၤ. (ဖး ၁ ၡမူၤအ့လး ၁:၄-၇ တက့ၢ်.) ဒီးမ့ၢ်လၢ နီၢ်ပနံးနၤ မၤဆဲးအဲးနီၢ်ဃးနၤ “တနံၣ်ဘၣ်တနံၣ်” အဃိ နီၢ်ဃးနၤအသးဘၣ်ဒိ ဒိၣ်မးလီၤ. မ့ၢ်လၢအတူၢ်ဘၣ်ဝဲ ဒ်အံၤအဃိ အဝဲဃုထံၣ်န့ၢ် တၢ်မၤမုာ်ထီၣ်က့ၤအသးဖဲလဲၣ်. အဝဲဃ့ဘါထုကဖၣ်လၢ ယဟိဝၤယွၤအအိၣ်လီၤ. တကးဒံးဘၣ် အဝဲလဲၤဃ့ဘါထုကဖၣ်တၢ်လၢ ယဟိဝၤယွၤအဒဲစီဆှံအပူၤ ဖးယံာ်ညါလီၤ. အဝဲဃ့ဝဲလၢ ယဟိဝၤယွၤကဟ့ၣ်အီၤဖိခွါတဂၤ ဒီးနာ်ဝဲလၢယဟိဝၤယွၤကမၤစၢၤအီၤလီၤ. အဝဲဃ့ဘါထုကဖၣ်ဝံၤအလီၢ်ခံ အသးမုာ်ထီၣ်ဝဲဒီး “အမဲာ်တအုၣ်သပှီၤလၢၤဘၣ်.” (၁ ၡမူၤအ့လး ၁:၁၂, ၁၇, ၁၈) အဝဲသ့ၣ်ညါဝဲလၢ ယဟိဝၤယွၤ ကဟ့ၣ်အီၤအဖိခွါ မ့တမ့ၢ် ကမၤမုာ်ထီၣ်က့ၤအီၤလၢ ကျဲအဂၤတဘိဘိလီၤ.
၁၁. တၢ်ဃ့ဘါထုကဖၣ် မၤမုာ်ထီၣ်က့ၤပှၤသ့လၢ ကျဲဒ်လဲၣ်.
၁၁ မ့ၢ်လၢပတလၢတပှဲၤဘၣ် ဒီးပအိၣ်မူဘၣ်လၢ ဟီၣ်ခိၣ်လၢအအၢအသီအံၤအပူၤအဃိ ပကထံၣ်ဘၣ်တၢ်နးတၢ်ဖှီၣ်လီၤ. (၁ ယိၤဟၣ် ၅:၁၉) ဘၣ်ဆၣ်ပဒိးန့ၢ်ဘၣ်တၢ်မၤစၢၤသ့ဝဲလီၤ. ပဃ့ဘါထုကဖၣ်လၢ ယဟိဝၤယွၤ လၢအမ့ၢ် “တၢ်မၤမုာ်ခဲလၢာ်အကစၢ်” အအိၣ်သ့ဝဲလီၤ. နီၢ်ဃးနၤမၤဝဲဒ်န့ၣ်လီၤ. အဝဲတဲဘၣ်ယဟိဝၤယွၤလၢ အတၢ်တူၢ်ဘၣ်ဒီး ဃ့တၢ်မၤစၢၤလၢ ယဟိဝၤယွၤအအိၣ်လီၤ. ဒ်န့ၣ်အသိး ပဝဲဒၣ်သ့ၣ်တဖၣ် ဖဲပတူၢ်ဘၣ်တၢ်နးတၢ်ဖှီၣ်အခါ တမ့ၢ်ထဲပကဘၣ်တဲဖျါထီၣ် ပတၢ်ကီတၢ်ခဲတဖၣ်ဘၣ် ပကဘၣ်ဃ့ကညးအီၤလၢ ကမၤစၢၤပှၤဒီးတဲဘၣ်အီၤ ပတၢ်တူၢ်ဘၣ်တဖၣ်န့ၣ်လီၤ.—ဖံလံးပံၤ ၄:၆, ၇.
၁၂. ဒ်သိးနီၢ်အၣ်နၤ လဲၤခီဖျိဝဲ တၢ်ကီတၢ်ခဲတဖၣ်လၢ တၢ်သူၣ်ခုသးခုအပူၤ ကန့ၢ်အဂီၢ် တၢ်မနုၤမၤစၢၤအီၤလဲၣ်.
၁၂ မ့ၢ်လၢပဖိအိၣ်တန့ၢ်ဘၣ် မ့တမ့ၢ် ပှၤလၢပအဲၣ်ဘၣ်အီၤတဂၤသံအဃိ ပသးကဘၣ်ဒိဝဲ ဒိၣ်မးလီၤ. ဘၣ်ဆၣ် ပထံၣ်န့ၢ်တၢ်မၤမုာ်ထီၣ်က့ၤသ့ဝဲလီၤ. ဆိကမိၣ်ကွၢ် နီၢ်အၣ်နၤအဒိအတဲာ်တက့ၢ်. အဝဲအိၣ်မူဝဲဖဲ ယ့ၣ်ၡူးအိၣ်လၢ ဟီၣ်ခိၣ်ချၢအဆၢကတီၢ်လီၤ. အဝဲဆီဟံၣ်ဆီဃီ ယံာ်ဝဲထဲဒၣ်နွံနံၣ် ဒီးအဝၤသံသဒၣ်ကွံာ်အီၤလီၤ. ဒီးလီၤဂာ်လၢအဖိစ့ၢ်ကီး တအိၣ်နီတဂၤဘၣ်. ဘၣ်ဆၣ် ဒ်သိးအတူၢ်တၢ်ကန့ၢ်အဂီၢ် တၢ်မနုၤမၤစၢၤအီၤလဲၣ်. အဝဲ “တဟးဖးဒီးတၢ်လုၢ်ဟံၣ်ဘၣ်.” ဖဲနီၢ်အၣ်နၤ အသးအိၣ် ၈၄ နံၣ်အခါဒၣ်လဲာ် အဝဲလဲၤဃ့ဘါထုကဖၣ်တၢ် ဒီးဘူၣ်ထီၣ်ဘါထီၣ် ယဟိဝၤယွၤ လၢတၢ်လုၢ်ဟံၣ်အပူၤထီဘိလီၤ. (လူၤကၣ် ၂:၃၇) မ့ၢ်လၢအဝဲမၤဝဲဒ်အံၤအဃိ ဒိးန့ၢ်ဘၣ်ဝဲတၢ်မၤမုာ်ထီၣ်က့ၤ ဒီးမၤစၢၤစ့ၢ်ကီးအီၤလၢ ကလဲၤခီဖျိဝဲ တၢ်ကီတၢ်ခဲတဖၣ်အံၤလၢ တၢ်သူၣ်ခုသးခုအပူၤလီၤ.
၁၃. ဖဲပသးဘၣ်ဒိလၢ ပဘူးပတံၢ်အဃိအခါ တံၤသကိးစဲၣ်နီၤတဖၣ် မၤမုာ်ထီၣ်က့ၤပှၤ ကသ့ဒ်လဲၣ်.
၁၃ ပဝဲသ့ၣ်တဖၣ်စ့ၢ်ကီး ပဃုထံၣ်န့ၢ်တၢ်မၤမုာ်ထီၣ်က့ၤ သ့ခီဖျိလၢ ပတံၤသကိးစဲၣ်နီၤလၢ တၢ်အိၣ်ဖှိၣ်ပူၤတဖၣ်အအိၣ်န့ၣ်လီၤ. (ကတိၤဒိ ၁၈:၂၄) ဖီလၤတဲဝဲလၢ ဖဲအမိဟးထီၣ်လၢ တၢ်မ့ၢ်တၢ်တီအပူၤအခါ အသးအိၣ်ဒၣ်ထဲ ယဲၢ်နံၣ်ဒံးလီၤ. ဖဲန့ၣ်အဆၢကတီၢ် အသးဘၣ်ဒိ ဒီးကီဝဲလၢအဂီၢ်ဒိၣ်မးလီၤ. ဘၣ်ဆၣ် ဒီပုၢ်ဝဲၢ်မုၣ်တဂၤလၢ အမၤပှၤလဲၤလၢညါ လၢအမံၤမ့ၢ် အဲ(န်) န့ၣ်ဟ့ၣ်ဂံၢ်ဟ့ၣ်ဘါအီၤဒီး ပာ်ဖျါထီၣ်တၢ်အဲၣ်တၢ်ကွံလၢ အဖီခိၣ်လီၤ. ဖီလၤ တဲဝဲလၢ “အဲ(န်)န့ၣ် တမ့ၢ်ယဘူးယတံၢ်ဘၣ်သနာ်က့ အဝဲအတၢ်အဲၣ်တၢ်ကွံဒီး အတၢ်ကဟုကယာ်န့ၣ် မၤစၢၤယၤဒိၣ်မးလီၤ. တကးဒံးဘၣ် မၤစၢၤစ့ၢ်ကီးယၤဒ်သိး ယကဆဲးမၤ ယဟိဝၤယွၤအတၢ်မၤအဂီၢ်လီၤ.” လၢခံ ဖီလၤအမိန့ၣ် ဟဲက့ၤနုာ်က့ၤလၢ တၢ်မ့ၢ်တၢ်တီအပူၤအဃိ ဖီလၤအသးခုဒိၣ်မးလီၤ. အဲ(န်) စ့ၢ်ကီး အသးခုဒိၣ်မး မ့ၢ်လၢအမၤစၢၤဘၣ် ဖီလၤဒ်သိးကဆဲးမၤ ယဟိဝၤယွၤအတၢ်မၤအဃိလီၤ.
၁၄. ပမ့ၢ်မၤမုာ်ထီၣ်ပှၤဂၤအသးန့ၣ် ပကဒိးန့ၢ်ဘၣ်အဘျုးဒ်လဲၣ်.
၁၄ ပမ့ၢ်ဂုာ်ကျဲးစၢးမၤစၢၤပှၤဂၤန့ၣ် ပသးပ့ၤနီၣ်ကွံာ် ပနီၢ်ကစၢ် တၢ်ကီတၢ်ခဲတဖၣ်သ့လီၤ. အဒိ, ဒီပုၢ်ဝဲၢ်မုၣ်လၢအသဘျ့မ့ၢ်ဂ့ၤ ဒီပုၢ်ဝဲၢ်မုၣ်လၢအဆီဟံၣ်ဆီဃီဝံၤမ့ၢ်ဂ့ၤအဝဲသ့ၣ် သ့ၣ်ညါဝဲလၢ မ့ၢ်ဟးစံၣ်တဲၤတဲလီၤ ဘီမုၢ်တၢ်သးခုကစီၣ်န့ၣ် မ့ၢ်ဒၣ်အမၤသကိးတၢ်ဒီး ယဟိဝၤယွၤဒီး မၤအတၢ်ဘၣ်သးလီၤ. လၢတၢ်န့ၣ်အဃိ အဝဲသ့ၣ်အသးခုဒိၣ်မးလီၤ. ပဝဲသ့ၣ်တဖၣ်စ့ၢ်ကီး ပပာ်ဖျါထီၣ် တၢ်သူၣ်အိၣ်သးအိၣ်ပှၤဂၤသ့ခီဖျိ ပလဲၤတဲဘၣ် အဝဲသ့ၣ်လၢတၢ်သးခုကစီၣ်န့ၣ်လီၤ. ဒီးဖဲပမၤသကိးတၢ်ဒီး ပဒီပုၢ်ဝဲၢ်မုၣ်ဒီပုၢ်ဝဲၢ်ခွါသ့ၣ်တဖၣ်အခါ ပကဘူးထီၣ်ဒီး အဝဲသ့ၣ်စ့ၢ်ကီးလီၤ. (ဖံလံးပံၤ ၂:၄) တၢ်မၢဖိပီလူးစ့ၢ်ကီး မၤဝဲဒ်အံၤလီၤ. အဝဲကဟုကယာ်ပှၤဂၤဒ်မိၢ်လၢအ “အံးက့ၤကွၢ်က့ၤ အဖိဒၣ်ဝဲအသိး” န့ၣ်လီၤ. တကးဒံးဘၣ် အဝဲမၤမုာ်ထီၣ်ပှၤဂၤ ဒီးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်တဖၣ်ဒ် ပၢ်တဂၤလၢအကွၢ်ထွဲ “အဖိဒၣ်ဝဲအသိးလီၤ.”—ဖး ၁ သ့းစၤလနံ ၂:၇, ၁၁, ၁၂ တက့ၢ်.
တၢ်မၤမုာ်ထီၣ်က့ၤလၢ ဟံၣ်ဖိဃီဖိအဂီၢ်
၁၅. မတၤတဖၣ်အိၣ်ဒီးမူဒါလၢ ကသိၣ်လိဖိသ့ၣ်တဖၣ်လဲၣ်.
၁၅ ပမၤမုာ်ထီၣ်ပှၤဂၤလၢ တၢ်အိၣ်ဖှိၣ်ပူၤတဖၣ် ကသ့ဒ်လဲၣ်. တဘျီတခီၣ် ပှၤအသီလၢ တၢ်အိၣ်ဖှိၣ်အပူၤတဖၣ် ကဃ့ပှၤတၢ်မၤစၢၤ ဒ်သိးပကသိၣ်လိအဖိတဖၣ် လံာ်စီဆှံလီၤ. ဘၣ်ဆၣ် လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤ ဟ့ၣ်လီၤမိၢ်ပၢ်တဖၣ် မူဒါလၢကဘၣ်သိၣ်လိအဖိအလံၤန့ၣ်လီၤ. (ကတိၤဒိ ၂၃:၂၂; အ့းဖ့းစူး ၆:၁-၄) တဘျီတခီၣ် မိၢ်ပၢ်တဖၣ်လိၣ်ဘၣ် ပှၤဂၤအတၢ်မၤစၢၤလီၤ. ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် အဝဲသ့ၣ်ကဘၣ်သိၣ်လိအဖိတဖၣ်လၢ အနီၢ်ကစၢ်ဒၣ်ဝဲလီၤ. မိၢ်ပၢ်တဖၣ် ကဘၣ်တဲသကိးတၢ်ဒီး အဖိတဖၣ်ထီဘိလီၤ.
မိၢ်ပၢ်တဖၣ် ကဘၣ်တဲသကိးတၢ်ဒီး အဖိတဖၣ် ထီဘိလီၤ
၁၆. ဖဲပမၤစၢၤပှၤဂၤအခါ ပကြၢးသ့ၣ်နီၣ်ထီၣ် တၢ်မနုၤလဲၣ်.
၁၆ ဖဲမိၢ်ပၢ်တဖၣ် ဃ့ပှၤတၢ်မၤစၢၤလၢ ပကသိၣ်လိအဖိတဖၣ် လံာ်စီဆှံအခါ ပကဘၣ်သ့ၣ်နီၣ်ထီၣ်လၢ ပတဘၣ်ဟံးန့ၢ် မိၢ်ပၢ်တဖၣ် အမူဒါဘၣ်. တဘျီတခီၣ် ပသိၣ်လိဖိသၣ်တဂၤလံာ်စီဆှံဒီး ဖိသၣ်အမိၢ်အပၢ်န့ၣ် တမ့ၢ်ယဟိဝၤပှၤအုၣ်အသးဘၣ်. ဖဲပမၤလိလံာ်စီဆှံဒီး ဖိသၣ်တဖၣ်အခါ ပကြၢးမၤလိအီၤလၢ အဝဲသ့ၣ်အဟံၣ် ဖဲအမိၢ်အပၢ် မ့တမ့ၢ် ဒီပုၢ်ဝဲၢ်လၢအဒိၣ်တုာ်ခိၣ်ပှဲၤတဂၤဂၤ အိၣ်ဝဲအဆၢကတီၢ် မ့တမ့ၢ် မၤအီၤလၢတၢ်လီၢ်လၢ ပှၤအဂၤတဖၣ်ထံၣ်ပှၤသ့န့ၣ်လီၤ. ပမ့ၢ်မၤဒ်န့ၣ်န့ၣ် တကဲထီၣ်တၢ်ထံၣ်ကမၣ်လၢ ပှၤဂၤအဂီၢ်ဘၣ်. လၢခံန့ၣ် ဘၣ်သ့ၣ်သ့ၣ် မိၢ်ပၢ်တဖၣ် ကသိၣ်လိက့ၤအဖိလၢ ယဟိဝၤယွၤအဂ့ၢ်န့ၣ်လီၤ.
၁၇. ဖိသၣ်တဖၣ် မၤမုာ်ထီၣ်က့ၤအဟံၣ်ဖိဃီဖိ ကသ့ဒ်လဲၣ်.
၁၇ သးစၢ်လၢအမၤလိဘၣ် ယဟိဝၤယွၤအဂ့ၢ်တဖၣ် မၤမုာ်ထီၣ်ဒီး ဟ့ၣ်ဂံၢ်ဟ့ၣ်ဘါ အဟံၣ်ဖိဃီဖိတဖၣ် သ့ဝဲလီၤ. မၤဝဲသ့လၢ ကျဲဒ်လဲၣ်. မၤဝဲသ့ခီဖျိပာ်ဖျါထီၣ် တၢ်ယူးယီၣ်ပာ်ကဲအမိၢ်အပၢ် ဒီးဖံးစၢၤမၤစၢၤ အဝဲသ့ၣ်န့ၣ်လီၤ. တကးဒံးဘၣ် ဖဲဖိသၣ်တဖၣ် အိၣ်ဒီးတၢ်သးတီလၢ ယဟိဝၤယွၤအဖီခိၣ်အခါ ကဲထီၣ်တၢ်ဂံၢ်တၢ်ဘါလၢ ဟံၣ်ဖိဃီဖိအဂီၢ်လီၤ. တချုးလၢ ထံလုၢ်ဘၢတၢ်အခါ စီၤလ့ၤမ့းမ့ၢ်ပှၤလၢ အဘူၣ်ထီၣ်ဘါထီၣ် ယဟိဝၤယွၤလီၤ. အဝဲတဲဝဲဘၣ်ဃးဒီး အဖိခွါစီၤနိအၤလၢ– “အအံၤတဂၤ ကမၤမုာ်ထီၣ်က့ၤပှၤလၢ ပတၢ်မၤဒီး ပမၤတၢ်လၢ ပစုတုၤတၢ်ဘှံးပသးအဂ့ၢ် လၢဟီၣ်ခိၣ်လၢ ယွၤဆိၣ်အၢအီၤအဃိလီၤ.” အတၢ်စံးပာ်အံၤ လၢထီၣ်ပှဲၤထီၣ်ဝဲဖဲ ထံလုၢ်ဘၢတၢ်ဝံၤ အလီၢ်ခံန့ၣ်လီၤ. (၁ မိၤၡ့ ၅:၂၉; ၈:၂၁) မုၢ်မဆါတနံၤအံၤ ဖိသၣ်လၢအိၣ်ဒီးတၢ်သးတီဒီး ယဟိဝၤယွၤန့ၣ် မၤမုာ်ထီၣ်အဟံၣ်ဖိဃီသ့ဝဲစ့ၢ်ကီးလီၤ. ဒ်သိးအဟံၣ်ဖိဃီဖိခဲလၢာ် လဲၤခီဖျိဝဲတၢ်မၤကွၢ်လၢ ဆၢကတီၢ်ခဲအံၤ ဒီးခါဆူညါကန့ၢ်အဂီၢ် အဝဲသ့ၣ်မၤစၢၤဝဲသ့လီၤ.
၁၈. ဒ်သိးပကအိၣ်ဒီး တၢ်တူၢ်န့ၢ်ခီၣ်ကဲအဂီၢ် တၢ်မနုၤကမၤစၢၤပှၤလဲၣ်.
၁၈ မုၢ်မဆါတနံၤအံၤ ယဟိဝၤယွၤ အပှၤဂီၢ်မုၢ်တဖၣ် ဒိးန့ၢ်ဘၣ်ဝဲ တၢ်မၤမုာ်ထီၣ်က့ၤ ခီဖျိလၢ တၢ်ဃ့ဘါထုကဖၣ်, ဆိကမိၣ်ထံ တၢ်အဒိအတဲာ်တဖၣ်လၢ လံာ်စီဆှံပူၤ ဒီးတၢ်ရ့လိာ်သးဒီးဒီပုၢ်ဝဲၢ်တဖၣ် ဘူးဘူးတံၢ်တံၢ်အဃိလီၤ. (ဖး စံးထီၣ်ပတြၢၤ ၁၄၅:၁၈, ၁၉ တက့ၢ်.) ပသ့ၣ်ညါလၢ ယဟိဝၤယွၤန့ၣ် ကမၤမုာ်ထီၣ်က့ၤပှၤထီဘိ ဒီးပမ့ၢ်ကွၢ်ဆၢၣ်မဲာ်ဘၣ် တၢ်ကီတၢ်ခဲန့ၣ် ပနာ်သ့သပှၢ်ကတၢၢ်လၢ အဝဲကမၤစၢၤပှၤ ဒ်သိးပကအိၣ်ဒီးတၢ်တူၢ်န့ၢ်ခီၣ်ကဲအဂီၢ်လီၤ.
